CNI International News

ဒါကာ၊ ဇန်နဝါရီ ၃၀

အိန္ဒိယတွင် ခိုလှုံနေသည့် ဘင်္ဂလားဒေ့ရှ် ဝန်ကြီးချုပ်ဟောင်း ရှိတ်ဟာဆီနာ (Sheik Hasina) က ဖေဖော်ဝါရီလ အတွင်း ပြုလုပ်မည့် ရွေးကောက်ပွဲအပေါ် ပြင်းထန်စွာ ရှုတ်ချခဲ့သည်ဟု အေပီမှ ဖော်ပြခဲ့သည်။

ထိုရွေးကောက်ပွဲတွင် ဟာဆီနာ၏ Awami League ပါတီသည် ဝင်ရောက်ယှဉ်ပြိုင်ခွင့် ပိတ်ပင်ခံခဲ့ရပြီး ယခု ဟာဆီနာ ပြောဆိုခဲ့သည့် မှတ်ချက် စကားများကြောင့် ရွေးကောက်ပွဲမတိုင်မီ တင်းမာမှုများကို မြင့်တက် စေခဲ့သည်။

ပေါင်းစုံပါဝင်ပြီး လွတ်လပ်မှုနှင့် တရားမျှတမှုရှိသည့် ရွေးကောက်ပွဲများ မရှိပါက ဘင်္ဂလားဒေ့ရှ်သည် ရေရှည် မတည်ငြိမ်မှုများနှင့် ရင်ဆိုင်ရလိမ့်မည်ဟု ဟာဆီနာက ပြီးခဲ့သည့် သီတင်းပတ်အတွင်း အေပီသတင်းဌာနသို့ ပေးပို့ခဲ့သည့် အီးမေးလ်ထဲတွင် သတိပေးခဲ့သည်။

ဟာဆီနာသည် ၎င်း၏ ၁၅ နှစ်ကြာ အုပ်ချုပ်မှုကို အဆုံးသတ်စေခဲ့သည့် ၂၀၂၄ ခုနှစ်က လူထုအုံကြွမှုအတွင်း ဆန္ဒပြသူများကို ရက်စက်စွာ အင်အားသုံး ဖြိုခွင့်ခဲ့မှုအတွက် သေဒဏ် ချမှတ်ခံထားရသည်။

ငြိမ်းချမ်းရေးနိုဘယ်လ်ဆုရှင် မိုဟာမက် ယူနွတ် (Muhammad Yunus) ဦးဆောင်သည့် ဘင်္ဂလားဒေ့ရှ် ယာယီ အစိုးရသည် ယခင်အာဏာရ Awami League ပါတီကို ရွေးကောက်ပွဲဝင်ခွင့် ပိတ်ပင်ခဲ့ခြင်းသည် ၎င်းတို့အား ထောက်ခံသူ သန်းပေါင်းများစွာကို တမင်တကာ မဲပေးခွင့် ပိတ်ပင်ခဲ့သည်ဟုလည်း ဟာဆီနာက စွပ်စွဲခဲ့သည်။

ဝန်ကြီးချုပ်ဟောင်း ရှိတ်ဟာဆီနာကို တွေ့ရစဉ်

လူဦးရေ အများအပြားကို နိုင်ငံရေးတွင် ပါဝင်ခွင့် ပိတ်ပင်လိုက်ခြင်းသည် မကျေနပ်မှုများအား ပိုမိုနက်ရှိုင်းစေကာ အဖွဲ့အစည်းများကို တရားမဝင် ဖြစ်စေသလို အနာဂတ် မတည်ငြိမ်မှုများအတွက် အခြေအနေများကို ဖန်တီး ပေးရာ ရောက်ကြောင်း ဟာဆီနာက အီးမေးလ်ထဲ၌ ရေးသားခဲ့သည်။

“ဖယ်ကျဉ်မှုတွေနဲ့ မွေးဖွားလာတဲ့ အစိုးရတစ်ရပ်ဟာ ကွဲပြားနေတဲ့ နိုင်ငံတော်ကို စည်းလုံးအောင် မလုပ်နိုင်ပါဘူး” ဟု ဟာဆီနာက ပြောကြားခဲ့သည်။

လူဦးရေ ၁၂၇ သန်းရှိသည့် ဘင်္ဂလားဒေ့ရှ်တွင် ဖေဖော်ဝါရီ ၁၂ ရက်နေ့၌ ရွေးကောက်ပွဲ ကျင်းပမည်ဖြစ်ပြီး နိုင်ငံရေးပါတီများသည် ပြီးခဲ့သည့် သီတင်းပတ်မှ စတင်၍ မဲဆွယ်စည်းရုံးမှုများ ပြုလုပ်နေကြသည်။

ထိုရွေးကောက်ပွဲကို စောင့်ကြည့်ရန် ဥရောပသမဂ္ဂနှင့် ဓနသဟာယအဖွဲ့ အပါအဝင် ပြည်ပနိုင်ငံများမှ လေ့လာ စောင့်ကြည့်သူ ၅၀၀ ခန့် လာရောက်လိမ့်မည်ဟု မျှော်လင့်ရကြောင်း ရွေးကောက်ပွဲကော်မရှင်က ပြောကြားခဲ့ သည်။

Source: အေပီ

CNI International News

ဝါရှင်တန်၊ ဇန်နဝါရီ ၃၀

အမေရိကန်ပြည်ထောင်စုသည် အီရန်ကမ်းလွန်အနီးတွင် စစ်အင်အား တိုးမြှင့်လာမှုသည် ၂၀၂၅ ခုနှစ်၊ ဇွန်လထက် ပိုမို ပြင်းထန်လာသည်ဟု အယ်ဂျားဇီးယားမှ ဖော်ပြခဲ့သည်။

ထိုကဲ့သို့ စစ်အင်အား တိုးမြှင့်လာမှုသည် အီရန်နိုင်ငံကို တိုက်ခိုက်ရန် အမေရိကန်က စီစဉ်နေသည့် အရိပ် အယောင် ဖြစ်နိုင်ကြောင်း ကျွမ်းကျင်သူများကလည်း သုံးသပ်ထားကြသည်။

မကြာသေးမီ ရက်ပိုင်းအတွင်းက အာရေဗျပင်လယ် (Arabian Sea) သို့ အမေရိကန်က စေလွှတ်ခဲ့သော စစ်သင်္ဘော အုပ်စုများတွင် နျူကလီးယားစွမ်းအင်သုံး လေယာဉ်တင် သင်္ဘောဖြစ်သည့် USS Abraham Lincoln လည်း ပါဝင်သည်။

အမေရိကန် စစ်အင်အား တိုးမြှင့်မှုကို ပြသထားစဉ်

လွန်ခဲ့သည့်နှစ် ဇွန်လက ၁၂ ရက်ကြာ ဖြစ်ပွားခဲ့သော အီရန်-အစ္စရေး စစ်ပွဲ အတွင်းတွင်လည်း အမေရိကန်သည် ၎င်း၏မဟာမိတ် အစ္စရေးဘက်မှ ရပ်တည်ကာ အီရန်၏ နျူကလီးယားစက်ရုံ ၃ ခုကို  ဗုံးကြဲတိုက်ခိုက်ခဲ့ချိန်က ကမ္ဘာအနှံ့ရှိ စစ်လက်နက် ပစ္စည်းများကို အီရန်အနီးရှိ ဒေသသို့ ဖြန့်ကြက်ခဲ့ဖူးသည်။

ထို့ပြင် ပြီးခဲ့သည့်နှစ် နှောင်းပိုင်းကလည်း ဗင်နီဇွဲလားနိုင်ငံပိုင် သင်္ဘောများသည် အမေရိကန်သို့ မူးယစ်ဆေးဝါး များ မှောင်ခို ပို့ဆောင်နေသည်ဟု စွပ်စွဲကာ ဗင်နီဇွဲလားသင်္ဘောများကို မတိုက်ခိုက်မီ ရက်သတ္တပတ်  အနည်းငယ် အလိုတွင် ကာရေဘီယံပင်လယ်၌ စစ်အင်အားများ စုဆောင်းခဲ့သည်။

နောက်ဆုံးတွင် အမေရိကန်သည် ဇန်နဝါရီ ၃ ရက်၌ ဗင်နီဇွဲလားကို စစ်ရေးအရ စီးနင်း တိုက်ခိုက်မှုတစ်ခု ပြုလုပ် ကာ ဗင်နီဇွဲလားသမ္မတ မာဒူရို (Nicolas Maduro) ကို ဖမ်းဆီး ခေါ်ဆောင်သွားခဲ့သည်။

အီရန်နိုင်ငံတွင် ပြီးခဲ့သည့် ဒီဇင်ဘာလ နှောင်းပိုင်းမှစ၍ ငွေကြေးတန်ဖိုး ကျဆင်းမှုအပေါ် မကျေနပ်ရာမှ နောက်ပိုင်း၌ အစိုးရအပြောင်းအလဲအတွက် တောင်းဆိုလာကြသည့် ဆန္ဒပြပွဲများ ပေါ်ပေါက်ခဲ့သည်။

အမေရိကန် စစ်အင်အားကို ပြသထားစဉ်

ထို့နောက် အီရန်လုံခြုံရေးတပ်ဖွဲ့များသည် ဆန္ဒပြသူများကို အစုလိုက် အပြုံလိုက် သတ်ဖြတ်ခဲ့သည်ဟု စွပ်စွဲခံ ခဲ့ရပြီး အီရန်ဆိုင်ရာ ကုလသမဂ္ဂ အထူးကိုယ်စားလှယ်၏ ပြောကြားချက်အရ အနည်းဆုံး ဆန္ဒပြသူ ၅၀၀၀ ခန့် သတ်ဖြတ်ခံခဲ့ရပြီး ထောင်နှင့်ချီ ဖမ်းဆီးထိန်းသိမ်း ခံထားရသည်ဟုဆိုသည်။

အမေရိကန်သမ္မတ ဒေါ်နယ်ထရမ့်(Donald Trump )က ထိုအခြေအနေကို အသုံးချကာ အီရန်ဘာသာရေး ခေါင်းဆောင်များကို ပြင်းပြင်းထန်ထန် ဝေဖန်ခဲ့ပြီး ဆန္ဒပြသူများအား အကူအညီများ လာနေကြောင်း ပြောကြားခဲ့ သည့်အပြင် အကယ်၍ အီရန်က အကျဉ်းသားများကို ကွပ်မျက်မှုများ ပြုလုပ်ပါက စစ်ရေးအရ အရေးယူမည်ဟု ခြိမ်းခြောက်ခဲ့သည်။

ထရမ့်၏ စကားလုံးများနှင့် အီရန် ကမ်းလွန်ရေပြင်တွင် ပုံမှန်မဟုတ်သော အမေရိကန် စစ်အင်အားတိုးမြှင့် ဖြန့်ကြက်မှုများက တိုက်ခိုက်မှုများ မကြာမီ ဖြစ်ပွားလာနိုင်သည့် အရိပ်အယောင်ရှိကြောင်း အချို့သော လေ့လာ ဆန်းစစ်သူများက ပြောကြားခဲ့ကြသည်။

Source: အယ်ဂျားဇီးယား

CNI International News

ဘာလင်၊ ဇန်နဝါရီ ၃၀

တရုတ်၏ ထိပ်သီးဗိုလ်ချုပ်ကြီးများအပေါ် သမ္မတ ရှီကျင့်ဖျင် (Xi Jinping) ၏ ယုံကြည်မှုသည် လျော့ကျလာဖွယ် ရှိကြောင်း DW သတင်းဝက်ဘ်ဆိုက်မှ ဖော်ပြခဲ့သည်။

တရုတ်ပြည်သူ့လွတ်မြောက်ရေးတပ်မတော် (PLA) ၏ ထိပ်တန်း ခေါင်းဆောင်နှစ်ဦးကို စည်းကမ်းဖောက်ဖျက်မှု ကျူးလွန်ခြင်းကြောင့် စုံစမ်းစစ်ဆေးမှုများ ပြုလုပ်နေကြောင်း တရုတ်အာဏာပိုင်များက ပြီးခဲ့သည့် သီတင်းပတ် ကုန်တွင် ကြေညာခဲ့ပြီးနောက် ရှီကျင့်ဖျင်၏ သဘောထားကို သုံးသပ်နေကြခြင်းဖြစ်သည်။

စုံစမ်းစစ်ဆေးခံ ရသူများအနက် သမ္မတ ရှီ၏ စစ်ဘက်ဆိုင်ရာ အရင်းနှီးဆုံး မဟာမိတ်တစ်ဦးဖြစ်ပြီး သြဇာ ကြီးမားသော ဗဟိုစစ်ကော်မရှင် (CMC) ၏ ဒုတိယဥက္ကဋ္ဌ နှစ်ဦးအနက် တစ်ဦးဖြစ်သည့် ထိပ်တန်းဗိုလ်ချုပ်ကြီး ကျန်းယိုရှာ (Zhang Youxia) ပါဝင်သည်။

အခြားအဆင့်မြင့် ဗိုလ်ချုပ်ကြီး တစ်ဦးဖြစ်သူ လျူကျန်းလီ (Liu Zhenli) လည်း စုံစမ်းစစ်ဆေးခံနေရပြီး ၎င်းတို့ နှစ်ဦးလုံးသည် ရာထူးမှ ဖယ်ရှားခံခဲ့ရသည်။

နိုင်ငံရေးသမားများကို စည်းကမ်းဘောင်အတွင်း ရှိစေရန်နှင့် သစ္စာမဲ့ခြင်းကို အပြစ်ပေးရန်အတွက် ကွန်မြူနစ် ပါတီအတွင်း အဂတိလိုက်စားမှု တိုက်ဖျက်ရေး လှုပ်ရှားမှုများကို နှစ်ပေါင်းများစွာ အသုံးပြုခဲ့သည်။

တရုတ်စစ်တပ် ဗိုလ်ချုပ်ကြီး ကျန်းယိုရှာကို တွေ့ရစဉ်

မကြာသေးမီကမူ ရှီသည် လက်နက်ကိုင်တပ်ဖွဲ့များ၏ ခေါင်းဆောင်မှုပုံစံကို ပြန်လည်ပုံဖော်ရန် ကြိုးပမ်းလာခဲ့ပြီး ၎င်း၏ အာရုံစိုက်မှုသည် ဗိုလ်ချုပ်ကြီးများနှင့် စစ်တပ်အပေါ် ပြောင်းလဲလာဖွယ်ရှိသည်။

ပြီးခဲ့သည့်နှစ် အောက်တိုဘာလတွင် တရုတ်အာဏာပိုင်များက စစ်ဘက်ဆိုင်ရာ အရာရှိ ကိုးဦးကို အဂတိလိုက်စား မှုဖြင့် စုံစမ်းစစ်ဆေးနေကြောင်း ကြေညာခဲ့သည်။

 ၂၀၂၂ ခုနှစ်တွင် ရှီသည် ကွန်မြူနစ်ပါတီ၏ အကြိမ် ၂၀ မြောက် ညီလာခံ၌ တတိယအကြိမ်မြောက် သမ္မတ သက်တမ်းကို ရယူရန် ပါတီ၏ ထုံးတမ်းစဉ်လာများအား ချိုးဖောက်ခဲ့ချိန်က ကျန်းသည် ရှီကို လူသိရှင်ကြား ထောက်ခံခဲ့သူဖြစ်ကြောင်း ထိုင်ဝမ်အမျိုးသားကာကွယ်ရေးနှင့် လုံခြုံရေးသုတေသနဌာနမှ မင်ရှီရှန် (Ming-Shih Shen) က ပြောကြားခဲ့သည်။

ရှီသည် ၎င်း၏ အာဏာကို ခိုင်မာစေရန်အတွက် ယုံကြည်ရသည့် မဟာမိတ်များကို ပုံမှန်ထက်စောပြီး ရာထူး တိုးမြှင့် ပေးခြင်းဖြင့် စစ်တပ်အတွင်း နှစ်ရှည်လများ ကျင့်သုံးခဲ့သော စည်းမျဉ်းများနှင့် တားမြစ်ချက်များစွာ ကိုလည်း ချိုးဖောက်ခဲ့သည်ဟု ရှန်က ပြောကြားခဲ့သည်။

တရုတ်စစ်တပ် ခေါင်းဆောင်တွေကို တွေ့ရစဉ်

သို့သော် စစ်တပ်အတွင်း အဂတိလိုက်စားမှု တိုက်ဖျက်ရေး လှုပ်ရှားမှု ပထမလှိုင်းအပြီးတွင် ကျန်းသည် ပစ်မှတ် မဟုတ်ခဲ့သော်လည်း နေရထိုင်ရ ပိုမိုကျပ်တည်းလာပြီး ခြိမ်းခြောက်ခံရသည်ဟု ခံစားလာရနိုင်ကြောင်း ရှန်က ဆိုသည်။။

“ရှီက သူ့ (ကျန်း) ကို မယုံကြည်တော့တာ ရှင်းပါတယ်။ ကျန်းဟာ ဘာကြောင့် မျက်နှာသာ ပေးမခံရတော့တာလဲ ဆိုတာနဲ့ ပတ်သက်ပြီး အဂတိလိုက်စားမှု ဒါမှမဟုတ် အမေရိကန်မီဒီယာတွေ ဖော်ပြသလို သူလျှိုလုပ်ပေးမှု ကြောင့်ဆိုတဲ့ ခန့်မှန်းချက်တွေ ထွက်ပေါ်လာခဲ့ပါတယ်။ ဒါပေမယ့် ရှီကသာ ကျန်းအပေါ် ယုံကြည်မှုရှိနေမယ် ဆိုရင် အဲဒီခန့်မှန်းချက်တွေက အရေးမကြီးပါဘူး။ ယုံကြည်မှု ပျက်ပြားသွားပြီဆိုရင်တော့ အပြောင်းအလဲတွေ ဖြစ်လာမှာ ဖြစ်ပါတယ်” ဟု ထိုင်ဝမ်ရှိ Tamkang တက္ကသိုလ်မှ ကျွန်းကျင်သူ ယင်ယူလင် ( Ying-Yu Lin) က ပြောကြားခဲ့သည်။

Source: DW

CNI International News

ဝါရှင်တန်၊ ဇန်နဝါရီ ၂၉

ဗင်နီဇွဲလားယာယီသမ္မတ ဒယ်လ်ဆီ ရိုဒရီဂွက်ဇ် (Delcy Rodriguez) သည် အမေရိကန်၏ ရန်ဘက်နိုင်ငံများနှင့် ဆက်ဆံရေးကို တရားဝင် ဖြတ်တောက်ပြီး အမေရိကန်အစိုးရနှင့် ပူးပေါင်းဆောင်ရွက်ရန် ရှိ၊မရှိကို သံသယရှိ ကြောင်း အမေရိကန်ထောက်လှမ်းရေး အစီအရင်ခံစာများက ဖော်ပြနေသည်ဟု ထိုအကြောင်းအရာနှင့် နီးစပ်သူ ၄ ဦးက မကြာသေးမီ ရက်ပိုင်းအတွင်း ပြောကြားခဲ့သည်ဟု ရိုက်တာမှ ဖော်ပြခဲ့သည်။

ရိုဒရီဂွက်ဇ်ကို အီရန်၊ တရုတ်နှင့် ရုရှားကဲ့သို့ ဗင်နီဇွဲလားနှင့် ရင်းနှီးသည့် နိုင်ငံတကာ မဟာမိတ်များနှင့် ဆက်ဆံ ရေးအား ဖြတ်တောက်ရန်၊ ထိုနိုင်ငံများ၏ သံတမန်များနှင့် အကြံပေးပုဂ္ဂိုလ်များကို ဗင်နီဇွဲလားမှ နှင်ထုတ်စေ လိုကြောင်း အမေရိကန်အရာရှိများက လူသိရှင်ကြား ပြောဆိုထားသည်။

သို့သော် ယခုလ အစောပိုင်းတွင် ကျင်းပခဲ့သော ရိုဒရီဂွက်ဇ်၏ ကျမ်းသစ္စာဆိုပွဲသို့ အဆိုပါနိုင်ငံများမှ ကိုယ်စား လှယ်များ တက်ရောက်ခဲ့သော်လည်း ရိုဒရီဂွက်ဇ်သည် ထိုနိုင်ငံများနှင့် ဆက်ဆံရေး ဖြတ်တောက်မည့် အခြေအနေ ကို လူသိရှင်ကြား ကြေညာခြင်း မရှိသေးပေ။

ဖမ်းဆီးခံလိုက်ရတဲ့ ဗင်နီဇွဲလားသမ္မတဟောင်း မာဒူရိုကို တွေ့ရစဉ်

ဇန်နဝါရီ ၃ ရက်တွင် အမေရိကန်က ဗင်နီဇွဲလားသမ္မတ နီကိုလပ်စ် မာဒူရို (Nicolas Maduro) ကို ဖမ်းဆီးခဲ့ပြီး နောက် ရိုဒရီဂွက်ဇ်သည် ယာယီသမ္မတ ဖြစ်လာခဲ့သူဖြစ်သည်။

အမည်မဖော်လိုသည့် သတင်းရင်းမြစ်များ၏ အဆိုအရ အမေရိကန် ထောက်လှမ်းရေး အစီအရင်ခံစာများတွင် ရိုဒရီဂွက်ဇ်သည် ဗင်နီဇွဲလားနိုင်ငံအတွင်း အမေရိကန်၏ မဟာဗျူဟာကို အပြည့်အဝ လက်ခံခြင်း ရှိ၊ မရှိကို ရှင်းလင်းစွာ မသိရကြောင်း ဖော်ပြထားသည်။

CIA ညွှန်ကြားရေးမှူး ဂျွန် ရက်ကလစ်ဖ် (John Ratcliffe) သည် ဇန်နဝါရီ ၁၅ ရက်တွင် ကာရာကပ်စ် (Caracas) မြို့တော်သို့ သွားရောက်ခဲ့ပြီး ရိုဒရီဂွက်ဇ်နှင့် ဗင်နီဇွဲလား နိုင်ငံရေးအနာဂတ်ကို ဆွေးနွေးခဲ့သည်။

အမေရိကန်သည် ဗင်နီဇွဲလား၏ များပြားလှသည့် ရေနံများကို အသုံးချပြီး ဗင်နီဇွဲလား အပါအဝင် အနောက်ကမ္ဘာ ခြမ်းတွင် ၎င်း၏ ပြိုင်ဘက်နိုင်ငံများ၏ သြဇာလွှမ်းမိုးမှုကို ထိန်းချုပ်ရန် ကြိုးပမ်းနေသည်။

ဗင်နီဇွဲလားယာယီသမ္မတ ဒယ်လ်ဆီ ရိုဒရီဂွက်ဇ်ကို တွေ့ရစဉ်

ရိုဒရီဂွက်ဇ် အနေဖြင့် အမေရိကန်၏ ပြိုင်ဘက် နိုင်ငံများနှင့် ဆက်ဆံရေးကို ဖြတ်တောက်ခဲ့မည်ဆိုပါက ဗင်နီဇွဲလား၏ စွမ်းအင်ကဏ္ဍတွင် အမေရိကန် ရင်းနှီးမြှုပ်နှံမှုများအတွက် အခွင့်အလမ်းများ ပိုမိုပွင့်လာမည် ဖြစ်သည်။

သို့သော် ရိုဒရီဂွက်ဇ် အနေဖြင့် အမေရိကန်၏ ပြိုင်ဘက်နိုင်ငံများနှင့် ဆက်ဆံရေးကို ဖြတ်တောက်ခြင်း မရှိပါက ဗင်နီဇွဲလားကို အဝေးမှ ညွှန်ကြားလိုသည့် အမေရိကန်၏ အားထုတ်ကြိုးပမ်းမှုများကို လျော့ကျစေမည်ဖြစ်သည်။

ထိုအကြောင်းအရာနှင့် ပတ်သက်ပြီး ရိုက်တာသတင်းဌာန၏ မှတ်ချက် တောင်းခံမှုကို စီအိုင်အေနှင့် ဗင်နီဇွဲလား အစိုးရတို့က တုန့်ပြန်ခြင်း မရှိခဲ့ပေ။

Source: ရိုက်တာ

CNI International News

ဘန်ကောက်၊ ဇန်နဝါရီ ၂၉

ထိုင်းနိုင်ငံ၏ အဓိက အတိုက်အခံ ပါတီဖြစ်သည့် ပြည်သူ့ပါတီ (PP) သည် အစိုးရအဖွဲ့သစ်အဖြစ် ရွေးကောက်ခံ ရပါက ဘတ် ၂၅၀ ဘီလီယံ တန်ဖိုးရှိ  "ပထမ ရက် ၁၀၀" စီးပွားရေးစီမံကိန်းကို စတင် အကောင်အထည်ဖော် သွားမည်ဟု ကတိပြုခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ထိုစီမံကိန်းသည် လုပ်ငန်းရှင်များအတွက် ငွေကြေး စီးဆင်းမှုကို မြှင့်တင်ပေးခြင်း၊ မျှတသော ပြိုင်ဆိုင်မှုကို တင်းကျပ်ခြင်းနှင့် ပြည်တွင်းဝယ်လိုအားကို လှုံ့ဆော်ပေးခြင်းတို့ဖြင့် ထိုင်းနိုင်ငံ၏ စီးပွားရေးကို ပြန်လည် ဦးမော့လာစေရန် ရည်ရွယ်ပြီး လက်ရှိ အသုံးပြုနေသော အစိုးရထောက်ပံ့မှု အစီအစဉ်ကိုလည်း ဆက်လက် လုပ်ဆောင်သွားမည်ဟု ဆိုသည်။

ပါတီခေါင်းဆောင် နတ်တာဖွန် ရူအန်ပန်ယာဝပ် (Natthaphong Ruengpanyawut) သည် ဇန်နဝါရီ ၂၇ ရက်က ထိုင်းစက်မှုလက်မှု လုပ်ငန်းရှင်များအဖွဲ့ချုပ် (FTI) ၏ အမှုဆောင်များနှင့် တွေ့ဆုံပြီးနောက် ထိုအစီအစဉ်ကို အကျဉ်းချုံး ရှင်းလင်းပြောကြားခဲ့သည်။

ထိုင်းပြည်သူ့ပါတီကို တွေ့ရစဉ်

အစောပိုင်းအဆင့်တွင် စီးပွားရေး တည်ဆောက်ပုံဆိုင်ရာ ဟာကွက်များကို ပိတ်ဆို့ရန်နှင့် ထိုင်းစီးပွားရေး လုပ်ငန်းများနှင့် အလုပ်သမားများအတွက် တရားမျှတမှု ပြန်လည်ဖော်ဆောင်ပေးရန် အာရုံစိုက်သွားမည်ဟု နက်တာဖွန်က ပြောကြားခဲ့သည်။

ပြည်သူ့ပါတီ (PP) ဦးဆောင်သည့် အစိုးရသည် စံချိန်မမီသည့် ထုတ်ကုန်များနှင့် ဒစ်ဂျစ်တယ် ပလပ်ဖောင်းများ ပေါ်တွင် ပြိုင်ဆိုင်မှုကို ပျက်ပြားစေသော ပြည်ပနိုင်ငံသားများ၏ အွန်လိုင်းရှော့ပင်များကို ချက်ချင်းနှိမ်နင်း သွားမည်ဖြစ်ကြောင်း ၎င်းက ပြောသည်။

ထိုကိစ္စကို မဖြေရှင်းနိုင်ပါက ထိုင်းလုပ်ငန်းရှင်များနှင့် အလုပ်သမားများကို တိုက်ရိုက် ထိခိုက်စေလိမ့်မည်ဟုလည်း နက်တာဖွန်က သတိပေးခဲ့သည်။

ထိုင်းပြည်သူ့ပါတီကို တွေ့ရစဉ်

စီးပွားရေး လှုံ့ဆော်မှုနှင့် ပတ်သက်၍ အစိုးရအနေဖြင့် ထောက်ပံ့ကြေးပေးသည့် စနစ်ကို ဆက်လက် လုပ်ဆောင် ခြင်း အပါအဝင် ပြည်တွင်းသုံးစွဲငွေ ယန္တရားများမှတဆင့် စားသုံးမှုနှင့် ထုတ်လုပ်မှု ကဏ္ဍနှစ်ခုလုံးတွင် စီးပွားရေး လှုပ်ရှားမှုများကို အရှိန်မြှင့်တင်သွားမည်ဟု ၎င်းက ဆိုသည်။

အဆိုပါ မူဝါဒအောက်တွင် ပြည်သူ့ပါတီသည် အဓိကယန္တရား ၃ ခုမှတဆင့် ငွေကြေး စီးဆင်းမှုအတွက် ဘတ် ၂၅၀ ဘီလီယံ အသုံးပြုရန် စီစဉ်ထားသည်။

ထိုယန္တရား ၃ ခုမှာ အိမ်ရာပိုင်ဆိုင်မှုနှင့် အိမ်ခြံမြေကဏ္ဍကို ပံ့ပိုးရန်အတွက် ပထမဆုံး အိမ်ရာချေးငွေအဖြစ် ဘတ် ၁၀၀ ဘီလီယံ၊ တရားဝင်ချေးငွေ ပိုမိုရရှိစေရန်နှင့် ပြင်ပချေးငွေအပေါ် မှီခိုမှုကို လျှော့ချရန် SME ချေးငွေအဖြစ် ဘတ် ၅၀ ဘီလီယံနှင့် ထုတ်လုပ်မှုနှင့် ဝန်ဆောင်မှုများကို ဒစ်ဂျစ်တယ်နှင့် AI နည်းပညာအသုံးပြုသည့် စက်မှု လုပ်ငန်းများအဖြစ် အဆင့်မြှင့်တင်ရန် အသွင်ကူးပြောင်းရေး ချေးငွေအဖြစ် ဘတ် ၁၀၀ ဘီလီယံ တို့ ဖြစ်သည်။

Source: ဘန်ကောက်ပို့စ်

CNI International News

ဝါရှင်တန်၊ ဇန်နဝါရီ ၂၉

အမေရိကန်သမ္မတ ဒေါ်နယ်ထရမ့် (Donald Trump)၏ ငြိမ်းချမ်းရေးဘုတ်အဖွဲ့သည် ဥရောပသမဂ္ဂ၏ အလယ်အလတ် အာဏာကို ချုပ်ကိုင်ဖို့အတွက် ကြိုးပမ်းမှုတစ်ခုလားဆိုကာ ကျွမ်းကျင်ပညာရှင်များက ထောက်ပြနေသည်ဟု အယ်လ်ဂျာဇီးယားမှ ဖော်ပြခဲ့သည်။

ထရမ့်၏ ဂါဇာပြန်လည် ထူထောင်ရေး ကြီးကြပ်မှုဆိုင်ရာ ငြိမ်းချမ်းရေးဘုတ်အဖွဲ့တွင် ပါဝင်ရန် ဖိတ်ကြားချက်ကို ဥရောပနိုင်ငံ အများစုက ငြင်းပယ်ခြင်း သို့မဟုတ် စိုးရိမ်ပူပန်မှုများကို အကြောင်းပြပြီး စဉ်းစားနေဆဲဖြစ်ကြောင်း ယဉ်ကျေးစွာ အကြောင်းပြန်ခဲ့ကြသည်။ 

ထရမ့်၏ ဖိတ်ကြားချက်ကို ဥရောပသမဂ္ဂ အတွင်းမှ ဟန်ဂေရီနှင့် ဘူလ်ဂေးရီးယား နိုင်ငံတို့ကသာ ပါဝင်ရန် လက်ခံခဲ့ကြသည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

သို့သော် ထိုအခြေအနေသည် ၂၀၀၃ ခုနှစ်က သမ္မတ ဂျော့ချ် ဒဗလျူ ဘုရှ် (George W Bush) ၏ အီရတ် ကျူးကျော်စစ်တွင် ပါဝင်ရန် တောင်းဆိုမှုနှင့်ပတ်သက်ပြီး ဥရောပနိုင်ငံများကြား ပြသခဲ့သည့် စည်းလုံးမှု အခြေအနေနှင့် နှိုင်းယှဉ်ပါက ယခုတစ်ကြိမ်တွင် ဥရောပ၏ စည်းလုံးမှုသည် ပိုမိုကောင်းမွန်နေသည်။

အီရတ် ကျူးကျော်စစ်နှင့်ပတ်သက်ပြီး ပူးပေါင်းပါဝင်ရန် အမေရိကန်၏ တောင်းဆိုချက်ကို ထိုအချိန်က စပိန်၊ ဗြိတိန်၊ ပိုလန်၊ ဟန်ဂေရီ၊ ချက်သမ္မတနိုင်ငံနှင့် စလိုဗက်ကီးယားတို့က သဘောတူခဲ့ကြသည်။

လက်ရှိတွင် ပြင်သစ်နိုင်ငံကမူ ထရမ့်၏ ငြိမ်းချမ်းရေးဘုတ်အဖွဲ့သည် ဂါဇာ၏ မူဘောင်ထက် ကျော်လွန်နေပြီး၊ အထူးသဖြင့် မေးခွန်းထုတ်၍ မရသော ကုလသမဂ္ဂ၏ အခြေခံမူများနှင့် ဖွဲ့စည်းပုံများအပေါ်  မေးခွန်းများ ထွက်ပေါ်စေခဲ့သည်ဆိုသည့် အခြေခံ အကြောင်းပြချက်ဖြင့်  ထရမ့်၏ ဖိတ်ကြားချက်ကို ငြင်းပယ်ခဲ့သည်။

ထရမ့်သည် ဒိန်းမတ်နိုင်ငံ၏ နယ်နိမိတ်ဖြစ်သည့် ဂရင်းလန်းကျွန်းအား အင်အားသုံး သိမ်းပိုက်မည်ဟု ခြိမ်းခြောက် ခဲ့သည့် သံတမန်ရေးရာ အငြင်းပွားမှု အပြီးတွင် အမေရိကန်၏ ရင်းနှီးသော မဟာမိတ်ဖြစ်‌သော ဒိန်းမတ်နိုင်ငံကို ငြိမ်းချမ်းရေးဘုတ်အဖွဲ့သို့ ဖိတ်ကြားခြင်း မရှိခဲ့ပေ။

ထရမ့်ရဲ့ ငြိမ်းချမ်းရေးဘုတ်အဖွဲ့ ဖွဲ့စည်းမှု လက်မှတ်ထိုးစဉ်

ထရမ့်သည် ဇန်နဝါရီ ၂၂ ရက်က ဆွစ်ဇာလန်နိုင်ငံ၊ ဒါးဗို့စ် (Davos) မြို့တွင် ကျင်းပသည့် ကမ္ဘာ့စီးပွားရေးဖိုရမ်၌ ၎င်း၏ ငြိမ်းချမ်းရေးဘုတ်အဖွဲ့အတွက် ပဋိညာဉ်ကို လက်မှတ်ရေးထိုးခဲ့သည်။

ထိုဘုတ်အဖွဲ့ကို ယနေ့အထိ ဖွဲ့စည်းခဲ့သမျှ အဖွဲ့များထဲတွင် အကျိုးသက်ရောက်မှု အရှိဆုံး အဖွဲ့အစည်းများထဲမှ တစ်ခုဖြစ်ကြောင်း ပြောကြားခဲ့သည်။

ထရမ့်၏ ပြောကြားချက်ကြောင့် ဘုတ်အဖွဲ့တွင် ပါဝင်ရန် ဖိတ်ကြားခံရသည့် နိုင်ငံအများစုအတွက် အကျိုး သက်ရောက်မှု ကြီးမားလွန်းနေသည်ဟု ထင်မြင်စေခဲ့ပြီး ကုလသမဂ္ဂ၏ လုပ်ပိုင်ခွင့်များကို အစားထိုးရန် ကြိုးပမ်းချက် တစ်ခုအဖြစ် ရှုမြင်ခံနေရသည်။

ဝင်ရိုးစုံကမ္ဘာ အခင်းအကျင်းကို ဖော်ဆောင်နေပြီး အမေရိကန် ဦးဆောင်သော ကမ္ဘာ့အခင်းအကျင်းအား စိန်ခေါ်နေသည့် တရုတ်နိုင်ငံကလည်း ထရမ့်၏ ငြိမ်းချမ်းရေးဘုတ်အဖွဲ့တွင် ပါဝင်ရန် ဖိတ်ကြားချက်ကို ငြင်းဆိုခဲ့သည်။

Source: အယ်လ်ဂျာဇီးယား

CNI International News

ကိယက်ဗ်၊ ဇန်နဝါရီ ၂၉

ရုရှားနှင့်ယူကရိန်း စစ်ပွဲအတွင်း နှစ်နိုင်ငံစလုံးတွင် ထိခိုက်ဒဏ်ရာရသူ၊ သေဆုံးသူနှင့် ပျောက်ဆုံးသူ အရေအတွက် စုစုပေါင်းသည် ၂ သန်းနီးပါး ရှိလာခဲ့ကြောင်း အမေရိကန်ကျွမ်းကျင်ပညာရှင် အဖွဲ့တစ်ဖွဲ့က ပြောကြားခဲ့သည်ဟု South China Morning Post မှ ဖော်ပြခဲ့သည်။

ယူကရိန်းကို ရုရှားက ဝင်ရောက် တိုက်ခိုက်ခဲ့သည့် ၂၀၂၂ ခုနှစ်ကတည်းက ရုရှားဘက်မှ ထိခိုက်ဒဏ်ရာရသူနှင့် အသေအပျောက် စုစုပေါင်း ၁ ဒသမ ၂ သန်းရှိခဲ့ပြီး ၎င်းတို့အနက် သေဆုံးသူ ၃၂၅,၀၀၀ ခန့်ရှိခဲ့သည်ဟု မဟာ ဗျူဟာနှင့် နိုင်ငံတကာလေ့လာရေးစင်တာ (CSIS) ၏ လေ့လာချက် စစ်တမ်းတွင် ဖော်ပြခဲ့သည်။

“ဒုတိယကမ္ဘာစစ်နောက်ပိုင်း ဘယ်စစ်ပွဲမှာမှ ဒီလောက် များပြားတဲ့ ထိခိုက်ဒဏ်ရာရမှု သို့မဟုတ် သေဆုံးမှုမျိုးကို ဘယ်အင်အားကြီးနိုင်ငံမှ မကြုံတွေ့ခဲ့ရဖူးပါဘူး။ ရုရှားတပ်တွေဟာ စစ်မြေပြင်မှာ နှေးကွေးစွာနဲ့ ရှေ့ဆက်ချီတက် နေပါတယ်” ဟု CSIS က ထုတ်ပြန်ခဲ့သည်။

ယူကရိန်းနိုင်ငံသူတွေကို တွေ့ရစဉ်

ယူကရိန်းနှင့် ရုရှားကြား ၄ နှစ်နီးပါးကြာ ဖြစ်ပွားနေသည့် စစ်ပွဲကို အဆုံးသတ်ရန် ရည်ရွယ်ပြီး နှစ်နိုင်ငံစလုံးမှ ညှိနှိုင်းရေးမှူးများ အမေရိကန်၏ ကြားဝင်စေ့စပ်မှုဖြင့် တိုက်ရိုက် ဆွေးနွေးပွဲများ ပြုလုပ်ခဲ့ပြီးနောက် ရက်ပိုင်း အကြာတွင် ယခုထုတ်ပြန်ချက် ထွက်ပေါ်လာခြင်းဖြစ်သည်။

ယူကရိန်းနှင့် ရုရှားကြား ဆွေးနွေးပွဲများကို ဖေဖော်ဝါရီ ၁ ရက်တွင် ယူအေအီးနိုင်ငံ၊ အဘူဒါဘီ(Abu Dhabi) မြို့၌ ဆက်လက် ကျင်းပသွားဖွယ်ရှိသည်။

ယူကရိန်းတပ်ဖွဲ့များသည်လည်း ၂၀၂၂ ခုနှစ်၊ ဖေဖော်ဝါရီလမှ ၂၀၂၅ ခုနှစ်၊ ဒီဇင်ဘာလအတွင်း ထိခိုက်ဒဏ်ရာ ရသူ နှင့် သေဆုံးသူ စုစုပေါင်း ၅၀၀,၀၀၀ နှင့် ၆၀၀,၀၀၀ ကြားရှိခဲ့ပြီး ၎င်းတို့အနက် လူပေါင်း ၁၀၀,၀၀၀ မှ ၁၄၀,၀၀၀ ကြားသည် သေဆုံးခဲ့ခြင်းဖြစ်ကြောင်း CSIS က ထုတ်ပြန်ခဲ့သည်။

Source: South China Morning Post

CNI International News

ဒမတ်စကတ်၊ ဇန်နဝါရီ ၂၈

ဇန်နဝါရီ ၁၈ ရက်က ဆီးရီးယားဒီမိုကရက်တစ်တပ်ဖွဲ့ (SDF) သည် ရက်ကာ (Raqqa) နှင့် ဒိုင်ယာအက်ဇော (Deir Az Zor) မြို့များမှ  ဆုတ်ခွာမည်ဟု ကြေညာလိုက်ခြင်းသည် ဆီးရီးယားအရှေ့မြောက်ပိုင်းအတွက် အရေးပါသော အလှည့်အပြောင်းတစ်ခု ဖြစ်လာခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ထိုကြေညာချက်သည် နိုင်ငံအတွင်းရှိ လူမျိုးစုများနှင့် ဒေသခံများကြား မတူကွဲပြားသော ခံစားချက်များကို ဖြစ်ပေါ်စေခဲ့ပြီး ပျော်ရွှင်မှုနှင့် စိုးရိမ်မှုများကို ပေါ်ပေါက်လာစေခဲ့သည်။

တစ်ဖက်တွင် ဆယ်စုနှစ်တစ်ခုကြာ ပဋိပက္ခများအပြီး တည်ငြိမ်မှုကို မျှော်လင့်နေသူများ ရှိသကဲ့သို့ အခြား တစ်ဖက်တွင်မူ မိမိတို့၏ အသက်အန္တရာယ်နှင့် လူမျိုးစု အနာဂတ်အတွက် စိုးရိမ်နေရသူများ ရှိနေသည်။

အာရပ်လူမျိုးအများစု နေထိုင်သည့် ရက်ကာနှင့် ဒိုင်ယာအက်ဇောကဲ့သို့ မြို့များမှ ကာ့ဒ်တပ်ဖွဲ့များဖြစ်သည့် SDF တပ်ဖွဲ့များ ဆုတ်ခွာသွားမှုကို အာရပ်ဒေသခံများက ဝမ်းမြောက်ဝမ်းသာ ကြိုဆိုခဲ့ကြသည်။

ကာ့ဒ် SDF တပ်ဖွဲ့ကိုတွေ့ရစဉ်

ကာ့ဒ်တပ်ဖွဲ့များ ဦးဆောင်သော အုပ်ချုပ်ရေးအောက်တွင် နှစ်ရှည်လများ ဖိနှိပ်ခံခဲ့ရသည်ဟု ယူဆခဲ့ကြသည့် အာရပ်မျိုးနွယ်စုများသည် ယခုအခါတွင် မိမိတို့ကိုယ်တိုင် စီမံခန့်ခွဲခွင့်ရမည်ဟု မျှော်လင့်နေကြသည်။

သို့သော် ထိုမြို့များတွင် နေထိုင်သည့် ကာ့ဒ်လူမျိုးစုများနှင့် SDF အဖွဲ့ကို ထောက်ခံခဲ့သူများအတွက်မူ ယခု အပြောင်းအလဲသည် ၎င်းတို့၏ အသက်ရှင်သန်ရေးအတွက် ခြိမ်းခြောက်မှုတစ်ခု ဖြစ်လာခဲ့သည်။

ဆီးရီးယားသမ္မတ အာမက် အယ်လ် ရှာရား (Ahmed al-Sharaa) ၏ အစိုးရတပ်ဖွဲ့များနှင့် အာရပ် လက်နက်ကိုင် များက ၎င်းတို့အား လက်စားချေ သတ်ဖြတ်မည့် အရေးကို ကာ့ဒ်လူမျိုးစုက စိုးရိမ်နေကြသည်။

ထို့ကြောင့် ထောင်နှင့်ချီသည့် ကာ့ဒ်မိသားစုများသည် အလွန်အေးသည့် ဆောင်းရာသီအတွင်း ၎င်းတို့၏ နေအိမ် များကို စွန့်ခွာကာ SDF တပ်ဖွဲ့များ ထိန်းချုပ်ထားဆဲဖြစ်သော ဆီးရီးယားနိုင်ငံ မြောက်ပိုင်းဒေသများသို့ ထွက်ပြေး နေကြသည်။

ဆီးရီးယားနိုင်ငံတွင် စစ်အာဏာရှင်ဟောင်း ဘာရှာ အယ်လ် အာဆတ် (Bashar al-Assad) ပြုတ်ကျခဲ့ပြီးနောက် တည်ငြိမ်မှုရရန် ကြိုးပမ်းနေသော်လည်း လူမျိုးစုများကြား ယုံကြည်မှု ပျက်ပြားနေခြင်းနှင့် လက်စားချေလိုသည့် ဆန္ဒများက စစ်ပွဲသစ် တစ်ခုဆီသို့ ဦးတည်သွားနိုင်သည့် အန္တရာယ်ရှိနေသည်။

လက်ရှိတွင်လည်း SDF တပ်ဖွဲ့များ ဆုတ်ခွာသွားမှုအပေါ် အောင်ပွဲခံခြင်းနှင့် ထိတ်လန့်နေခြင်းဆိုသည့် ဆန့်ကျင် ဘက် ခံစားချက်နှစ်ရပ်မှာ ဆီးရီးယား၏ အနာဂတ် ပြန်လည်သင့်မြတ်ရေးအတွက် အကြီးမားဆုံး အတားအဆီး ဖြစ်နေသည်ဟု ကျွမ်းကျင်သူများက ပြောကြားခဲ့သည်။

Source: Al Jazeera

CNI International News

တိုကျို၊ ဇန်နဝါရီ ၂၈

ထိုင်ဝမ်တွင် ပူးတွဲစစ်ဆင်ရေးများအတွင်း အမေရိကန်တပ်ဖွဲ့များ တိုက်ခိုက်ခံရသည့် အခြေအနေမျိုး၌ ဂျပန်အနေ ဖြင့် မျက်ကွယ်ပြုထားမည်ဆိုပါက ဂျပန်နှင့် အမေရိကန်ကြား မဟာမိတ်ဆက်ဆံရေး ပြိုကွဲလိမ့်မည်ဖြစ်ကြောင်း ဂျပန်ဝန်ကြီးချုပ် ဆာနာအဲ တာကာအီချီ (Sanae Takaichi) က ပြောကြားခဲ့သည်။

“တကယ်လို့ အဲဒီမှာ တစ်ခုခု ပြင်းပြင်းထန်ထန် ဖြစ်ခဲ့မယ်ဆိုရင် ကျမတို့ဟာ ထိုင်ဝမ်မှာရှိတဲ့ ဂျပန်နဲ့ အမေရိကန် နိုင်ငံသားတွေကို သွားကယ်ရမှာပါ။ အဲဒီအခြေအနေမျိုးမှာ ဂျပန်နဲ့ အမေရိကန်တို့ ပူးတွဲဆောင်ရွက်မှုတွေ ပြုလုပ် လာရနိုင်ပါတယ်”ဟု တာကာအီချီက ထိုင်ဝမ်ပဋိပက္ခ ဖြစ်ပွားချိန်တွင် ဂျပန်၏ စစ်ရေးအရ ပါဝင်ပတ်သက် နိုင် ခြေနှင့် ပတ်သက်ပြီး နောက်ဆုံး အသေးစိတ် ရှင်းလင်းချက်၌ ထည့်သွင်းပြောကြားခဲ့သည်။

“ကျမတို့နဲ့ ပူးတွဲဆောင်ရွက်နေတဲ့ အမေရိကန်တပ်ဖွဲ့တွေ တိုက်ခိုက်ခံရချိန်မှာ ဂျပန်က ဘာမှမလုပ်ဘဲ ဘေး ရှောင် နေမယ်ဆိုရင် ဂျပန်-အမေရိကန် ဆက်ဆံရေး ပြိုကွဲသွားပါလိမ့်မယ်။ အဲဒါကြောင့် ကျမတို့က လက်ရှိ တည်ရှိနေတဲ့ ဥပဒေဘောင်အတွင်းမှာ  တိတိကျကျ တုန့်ပြန် ဆောင်ရွက်သွားမှာဖြစ်ပြီး မြေပြင် အခြေအနေကို သုံးသပ်ပြီး ဆုံးဖြတ်ဆောင်ရွက်သွားမှာပါ”ဟု တာကာအီချီက ပြောကြားခဲ့သည်။

ဂျပန်ဝန်ကြီးချုပ် ဆာနာအဲ တာကာအီချီကို တွေ့ရစဉ်

တာကာအီချီသည် ဇန်နဝါရီ ၂၆ ရက်ညက ဂျပန်ရုပ်သံ အစီအစဉ်တစ်ခုတွင် ထိုမှတ်ချက် စကားများကို ပြောကြား ခဲ့ခြင်း ဖြစ်သည်။

တာကာအီချီသည် ပြီးခဲ့သည့်နှစ် နိုဝင်ဘာလအတွင်းက လွှတ်တော်တွင် ထိုင်ဝမ် အရေးနှင့်ပတ်သက်ပြီး ပြော ကြားခဲ့သည့် မှတ်ချက်များကို အသေးစိတ် ရှင်းလင်းတင်ပြရန် သို့မဟုတ် ပြန်လည်ရုပ်သိမ်းရန် အတိုက်အခံ ပါတီများ၏ ဖိအားပေးခြင်းကို ခံခဲ့ရသည်။

ထိုအချိန်က တာကာအီချီသည် ထိုင်ဝမ်ကို တရုတ်က တိုက်ခိုက်မည်ဆိုပါက ဂျပန်က ကြားဝင်ဆောင်ရွက်မည်ဟု ပြောကြားခဲ့သဖြင့် ဂျပန်နှင့် တရုတ်ကြား ဆက်ဆံရေးများသည် ဆယ်စုနှစ် တစ်စုကျော်အတွင်း အနိမ့်ဆုံးအဆင့် သို့ ကျဆင်းသွားခဲ့သည်။

Source: South China Morning Post