CNI International News

တိုကျို၊ ဇန်နဝါရီ ၇

ဗင်နီဇွဲလားသမ္မတ နီကိုလပ်စ် မာဒူရို (Nicolas Maduro) ကို အမေရိကန်က ဖမ်းဆီးခဲ့ပြီးနောက် အမေရိကန်ရေနံ ကုမ္ပဏီများသည် ဗင်နီဇွဲလား၏ ရေနံနှင့် သဘာဝဓာတ်ငွေ့ လုပ်ငန်းကို ပြန်လည်ထူထောင်မှုတွင် ဦးဆောင်သွား မည်ဟု အမေရိကန်သမ္မတ ဒေါ်နယ်ထရမ့် (Donald Trump) က ပြောကြားခဲ့ကြောင်း Nikkei Asia မှ ဖော်ပြခဲ့ သည်။

ထို့နောက် ဗင်နီဇွဲလား၏ အနာဂတ်အပြောင်းအလဲ အထူးသဖြင့် ရေနံလုပ်ငန်းတွင် တရုတ်နိုင်ငံ၏ အခန်းကဏ္ဍ သည် အလွန်အရေးကြီးလာကြောင်း ကျွမ်းကျင်သူများက သုံးသပ်ခဲ့သည်။

ထို့ကြောင့် Nikkei Asia သတင်းဝက်ဘ်ဆိုက်က ဗင်နီဇွဲလား အနာဂတ်၊ တရုတ်၏ အခန်းကဏ္ဍနှင့်ပတ်သက်ပြီး အဓိကစောင့်ကြည့်ရမည့် အချက် ၄ ချက်ကို ဖော်ပြထားသည်။

ပထမအချက်မှာ တရုတ်နိုင်ငံသည် ဗင်နီဇွဲလား၏ အကြီးဆုံး ကြွေးရှင်နိုင်ငံဖြစ်သည်။

လွန်ခဲ့သည့် ဆယ်စုနှစ် နှစ်ခုအတွင်း တရုတ်နိုင်ငံသည် ဗင်နီဇွဲလားသို့ အမေရိကန်ဒေါ်လာ ၆၀ ဘီလီယံကျော် ချေးပေးထားခဲ့သည်။ ထိုချေးငွေများကို ဗင်နီဇွဲလားက ရေနံဖြင့် ပြန်လည်ပေးဆပ်နေရခြင်း ဖြစ်သည်။

ထို့ကြောင့် လက်ရှိ ဗင်နီဇွဲလားအစိုးရ ပြုတ်ကျသွားပါက ထိုအကြွေးများကို မည်သူက ဆက်လက် တာဝန်ယူမည် နည်းဆိုသည့် အချက်သည် တရုတ်အတွက် အဓိက စိုးရိမ်စရာ ဖြစ်နေသည်။

တရုတ်-ဗင်နီဇွဲလား ဆက်ဆံရေးကို ပြသထားစဉ်

ဒုတိယအချက်မှာ ဗင်နီဇွဲလား၏ ရေနံများအပေါ် တရုတ်က မှီခိုအားထားနေရမှု ဖြစ်သည်။

တရုတ်နိုင်ငံသည် ဗင်နီဇွဲလားက ရောင်းချနေသည့် ရေနံ စုစုပေါင်း၏ ၈၀ ရာခိုင်နှုန်းခန့်ကို ဝယ်ယူနေသည့် အဓိက ဖောက်သည်နိုင်ငံ ဖြစ်သည်။

အမေရိကန်က ဗင်နီဇွဲလားကို ယာယီထိန်းချုပ် လိုက်သည့်အတွက် ရေနံစီးဆင်းမှု ပြတ်တောက်သွားမည်ကို တရုတ်က စိုးရိမ်နေသော်လည်း ရေရှည်တွင် ဗင်နီဇွဲလား၏ ရေနံနှင့်ပတ်သက်သည့် အခြေခံ အဆောက်အအုံများ ပြန်လည်ကောင်းမွန်လာပါက ရေနံဈေးနှုန်းများ ကျဆင်းလာနိုင်သည်ကိုလည်း မျှော်လင့်နေကြသည်။

တတိယအချက်မှာ ရေနံပေးချေမှုတွင် ခရစ်ပတိုငွေကြေး အသုံးပြုမှု ဖြစ်သည်။

အမေရိကန်၏ စီးပွားရေး ပိတ်ဆို့မှုများကြောင့် မာဒူရို အစိုးရသည် တရုတ်နှင့် ရေနံ အရောင်းအဝယ် လုပ်ရာတွင် အမေရိကန်ဒေါ်လာ အသုံးမပြုဘဲ Tether ကဲ့သို့သော ခရစ်ပတို ငွေကြေးများကို အသုံးပြုခဲ့သည်။

ယခုအခါ အမေရိကန်က ဝင်ရောက် ထိန်းချုပ် လိုက်သည့်အတွက် ထိုကဲ့သို့ ခရစ်ပတိုငွေကြေးဖြင့် လျှို့ဝှက် ငွေပေးချေမှုစနစ်များ ရပ်ဆိုင်းသွားပြီး တရုတ်ကုမ္ပဏီများအတွက် အခက်အခဲ ဖြစ်စေနိုင်သည်ဟု လေ့လာသူ များက ပြောကြားခဲ့သည်။

နောက်ဆုံးအချက်မှာ ပထဝီနိုင်ငံရေး တင်းမာမှု မြင့်တက်လာခြင်းဖြစ်သည်။

မာဒူရိုသည် တရုတ်နှင့် ရုရှားတို့၏ အဓိက မဟာမိတ်ဖြစ်သဖြင့် ၎င်းအား ဖမ်းဆီးလိုက်ခြင်းသည် တရုတ်နှင့်ရုရှား ၏ ဩဇာလွှမ်းမိုးမှုကို အမေရိကန်က တိုက်ရိုက် စိန်ခေါ်လိုက်ခြင်း ဖြစ်သည်။

တရုတ်နိုင်ငံကမူ အမေရိကန်က မာဒူရိုအား ဖမ်းဆီးမှုကို ပြင်းပြင်းထန်ထန် ရှုတ်ချထားပြီး ၎င်းတို့၏ ရင်းနှီးမြှုပ်နှံ မှုများကို ကာကွယ်ရန် မည်သို့ တုန့်ပြန်မည်ဆိုခြင်းကို စောင့်ကြည့်ရမည်ဟု ကျွမ်းကျင်သူများက သုံးသပ်ခဲ့သည်။

Source: Nikkei Asia

CNI International News

၂၀၂၆ ခုနှစ်၊ ဇန်နဝါရီ ၇

အမေရိကန်က ဗင်နီဇွဲလားသမ္မတ မာဒူရို (Nicolas Maduro) ကို ဖမ်းဆီးခဲ့ပြီးနောက် ပထဝီနိုင်ငံရေး တင်းမာမှု များ မြင့်တက်လာမှုနှင့်အတူ ရွှေဈေးနှုန်းများလည်း မြင့်တက်လာခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ထို့နောက် ရွှေစျေးနှုန်းသည် တစ်အောင်စလျှင် အမေရိကန်ဒေါ်လာ ၄၅၄၉ ဒေါ်လာအထိ စံချိန်တင် အမြင့်ဆုံး ဈေးသို့ ပြန်လည် ရောက်ရှိသွားနိုင်ကြောင်း ရွှေကုန်သည်များက ခန့်မှန်းနေကြသည်။

ထိုအခြေအနေကြောင့် ထိုင်းနိုင်ငံအတွင်း ရွှေတုံး ဈေးနှုန်းများသည် တစ်ဘတ်သားလျှင် ၆၇,၀၀၀ ဘတ် အထိ မြင့်တက်လာနိုင်ကြောင်း ရွှေကုန်သည်များက ခန့်မှန်းထားသည်။

မာဒူရို ဖမ်းဆီးခံရမှုသည် ပထဝီနိုင်ငံရေးဆိုင်ရာ စိုးရိမ်မှုများကို မြင့်တက်စေခဲ့သဖြင့် ဇန်နဝါရီ ၅ ရက် နံနက်ပိုင်း က အရောင်းအဝယ် စျေးကွက်တွင် ရွှေဈေးသည် ၂ ရာခိုင်နှုန်းနီးပါး မြင့်တက်ခဲ့ကာ တစ်အောင်စလျှင် ၄၄၁၈ ဒေါ်လာအထိ ရောက်ရှိခဲ့ကြောင်း၊ နောက်ပိုင်းတွင် ၄၄၀၈ ဒေါ်လာတွင် ဈေးငြိမ်သွားခဲ့ကြောင်း Hua Seng Heng Futures ကုမ္ပဏီ၏ သုတေသနဌာန ဒုတိယဥက္ကဋ္ဌ သီရိလပ်ခ် ပါကိုတီပရာဖာ (Siriluck Pakotiprapha)  က  ပြောကြားခဲ့သည်။

၂၀၂၅ ခုနှစ်ကုန်ပိုင်းတွင် ရွှေဈေး အနည်းငယ် ပြန်ကျခဲ့သော်လည်း တစ်နှစ်ပတ်လုံး အနေအထားအရ ရွှေဈေး သည် ၆၀ ရာခိုင်နှုန်းကျော် မြင့်တက်ခဲ့သည်။

ဗင်နီဇွဲလားသမ္မတ မာဒူရို ဖမ်းဆီးခံရစဉ်

ပြီးခဲ့သည့် ဒီဇင်ဘာလ ၂၆ ရက်နေ့ကလည်း ရွှေတစ်အောင်စလျှင် ၄၅၄၉ ဒသမ ၇၁ ဒေါ်လာဖြင့် စံချိန်တင် အမြင့် ဆုံး ဈေးသို့ ရောက်ရှိခဲ့ဖူးသည်။

“ထူးခြားတဲ့ ဖြစ်ရပ်မျိုးတွေ မရှိရင်တောင်မှ ရွှေဈေးဟာ ဇန်နဝါရီလ တစ်လတည်းမှာပဲ ပုံမှန်အားဖြင့် ၅ ဒသမ ၆ ရာခိုင်နှုန်းလောက်အထိ တက်လေ့ရှိပါတယ်” ဟု သီရိလပ်ခ်က ပြောကြားခဲ့သည်။

“အခုအချိန်မှာတော့ အမေရိကန်က ဗင်နီဇွဲလားမှာ စစ်ရေးအရ အရှိန်မြှင့် ဆောင်ရွက်နေပြီး တခြားနိုင်ငံတွေမှာ လည်း အလားတူ လုပ်ဆောင်လာနိုင်ခြေ ရှိတယ်လို့ အရိပ်အယောင် ပြနေတဲ့အတွက် ပထဝီနိုင်ငံရေးဆိုင်ရာ စိုးရိမ်ရတဲ့ အချက်တွေက ရွှေစျေးကို မြင့်တက်စေရတဲ့ အကြောင်းရင်းတစ်ခု ဖြစ်လာခဲ့ပါတယ်” ဟု ၎င်းက ဆို သည်။

ပထဝီနိုင်ငံရေး ပဋိပက္ခများ အထူးသဖြင့် ဗင်နီဇွဲလားအပေါ် အမေရိကန်၏ တိုက်ခိုက်မှုနှင့်  ဆက်နွှယ်သည့် တင်းမာမှုများ ပိုမိုပြင်းထန် လာမည်ဆိုပါက ရွှေဈေးသည် အချိန်တို အတွင်းမှာပင် စံချိန်တင် အမြင့်ဆုံးဖြစ်သော တစ်အောင်စလျှင် ၄၅၄၉ ဒေါ်လာအထိ ပြန်လည်မြင့်တက်သွားလိမ့်မည်ဟု သီရိလပ်ခ်က ပြောသည်။

ထိုင်းရွှေကုန်သည်များအသင်း၏ ထုတ်ပြန်ချက်အရ ဒီဇင်ဘာ ၅ ရက် နံနက်ပိုင်း အရောင်းအဝယ် စျေးကွက်တွင် ပြည်တွင်း ရွှေစျေးနှုန်းများသည် ရွှေတစ်ဘတ်သားကို ၆၅၀ ဘတ်အထိ မြင့်တက်ခဲ့ပြီး နေ့လယ်ပိုင်း၌ ရွှေချောင်း စျေးနှုန်းသည် တစ်ဘတ်သားလျှင် ၆၅,၅၀၀ ဘတ်သို့ ရောက်ရှိသွားခဲ့ကြောင်း ဖော်ပြထားသည်။

Source: ဘန်ကောက်ပို့စ်

CNI International News

ဟာဗားနား ၊ ဇန်နဝါရီ ၇

ဇန်နဝါရီ ၃ ရက်တွင် အမေရိကန်မှ ဗင်နီဇွဲလားနိုင်ငံကို ဝင်ရောက်တိုက်ခိုက်ခဲ့ချိန်၌ ကျူးဘားအရာရှိ ၃၂ ဦး သေဆုံးခဲ့ပြီးနောက် ကျူးဘားနိုင်ငံမှာ ဝမ်းနည်းခြင်း အထိမ်းအမှတ်အဖြစ် ဇန်နဝါရီ ၅ ရက်က နိုင်ငံတော်အလံ များကို တိုင်တစ်ဝက် လျှော့ချခဲ့သည်ဟု အေပီမှ ဖော်ပြခဲ့သည်။

တစ်ချိန်တည်းမှာပင် ကျူးဘား ပြည်သူများသည် ဗင်နီဇွဲလားသမ္မတ မာဒူရို (Nicolas Maduro) အဖမ်းခံရမှုသည် ၎င်းတို့၏ အနာဂတ်အပေါ်  သက်ရောက်လာနိုင်မည့် အခြေအနေများအတွက် စိုးရိမ်နေကြသည်။

ကျူးဘားနှင့် ဗင်နီဇွဲလား အစိုးရများသည် အလွန်နီးကပ်သည့် ဆက်ဆံရေးရှိသဖြင့် ကျူးဘား စစ်သားများနှင့် လုံခြုံရေး အေးဂျင့်များသည် ဗင်နီဇွဲလားသမ္မတ၏ သက်တော်စောင့်များအဖြစ် မကြာခဏ တာဝန်ယူလေ့ရှိသည်။

ထို့ပြင် ဗင်နီဇွဲလားမှ ရရှိသော ရေနံသည် စီးပွားရေး ခက်ခဲနေသည့် ကျူးဘားနိုင်ငံကို နှစ်ပေါင်းများစွာကြာအောင် ဆက်လက် ရပ်တည်နိုင်ရန် ကြီးမားသော အထောက်အပံ့တစ်ခု ဖြစ်ခဲ့သည်။

ကျူးဘားပြည်သူများကို တွေ့ရစဉ်

အမေရိကန်သမ္မတ ဒေါ်နယ်ထရမ့် (Donald Trump) အစိုးရကမူ မာဒူရိုကို ရာထူးမှ ဖြုတ်ချခြင်းသည် ဆယ်စုနှစ် များစွာကြာ ရည်မှန်းထားခဲ့သည့် အခြားရည်မှန်းချက် တစ်ခုဖြစ်သော ကျူးဘားအစိုးရကို ထိုးနှက်ချက် ပေးနိုင်ရန် အတွက် အထောက်အကူ ဖြစ်စေလိမ့်မည်ဟု တိုက်ရိုက် သတိပေးခဲ့သည်။

ဗင်နီဇွဲလားနှင့် ကျူးဘားတို့၏ ဆက်ဆံရေးကို ဖြတ်တောက်လိုက်ခြင်းသည် ကျူးဘား ခေါင်းဆောင်များအတွက် ဆိုးရွားသော နောက်ဆက်တွဲ အကျိုးဆက်များကို ဖြစ်ပေါ်စေနိုင်မည်ဟု ကျွမ်းကျင်သူများက ပြောကြားခဲ့သည်။

ကျူးဘားအစိုးရကမူ ဗင်နီဇွဲလားကို အမေရိကန်၏ တိုက်ခိုက်မှုအား နိုင်ငံတော်အဆင့် အကြမ်းဖက်မှုဟု ဝေဖန်ခဲ့ ပြီး နိုင်ငံတကာ အသိုင်းအဝိုင်း အနေဖြင့် အမေရိကန်ကို ဝိုင်းဝန်းဆန့်ကျင်ကြရန် တောင်းဆိုခဲ့သည်။

မာဒူရိုအား ဖယ်ရှားခြင်းအားဖြင့် ကျူးဘား၏ ယိမ်းယိုင်နေသည့် စီးပွားရေးသည် ပိုမိုဆိုးရွား သွားစေလိမ့်မည်ဟု ထရမ့်က ဇန်နဝါရီ ၃ ရက်က ပြောကြားခဲ့သည်။

“ကျူးဘားက ပြိုလဲတော့မှာပါ။ သိပ်မကြာခင် ပြိုလဲသွားပါလိမ့်မယ်”ဟု ထရမ့်က ပြောကြားခဲ့သည်။

Source: အေပီ

CNI International News

နယူးယောက်၊ ဇန်နဝါရီ ၇

ဗင်နီဇွဲလားသမ္မတ မာဒူရို (Nicolas Marudo)သည် ရာထူးမှ ဖယ်ရှားခံရမည်ဟု ကြိုတင်ခန့်မှန်းပြီး လောင်းကြေး ထပ်ခဲ့သည့် အမည်မဖော်လိုသူ ကုန်သည်တစ်ဦးသည် အမြတ်ငွေ ဒေါ်လာ ၄၁၀,၀၀၀ ခန့် ရရှိသွားခဲ့ကြောင်း ရိုက်တာမှ ဖော်ပြခဲ့သည်။

အနာဂတ်တွင် ဖြစ်လာနိုင်ခြေရှိသည့် ဖြစ်ရပ်များကို ကြိုတင်ခန့်မှန်းပြီး လောင်းကြေး ထပ်နိုင်သည့် Polymarket ကုမ္ပဏီ၏ ဝက်ဘ်ဆိုဒ်၌ ယခုအနိုင်ရရှိခဲ့သော ကုန်သည်တစ်ဦးက အကောင့်ဖွင့်ခဲ့ခြင်း ဖြစ်သည်။

ဇန်နဝါရီ ၃ ရက် စီးနင်းတိုက်ခိုက်မှု မတိုင်မီ မာဒူရို ရာထူးမှ ဖယ်ရှားခံရနိုင်ခြေ အလွန်နည်းပါးသည့် အခြေအနေ တွင် ထိုအမည်မဖော်လိုသည့် ကုန်သည်တစ်ဦးက မာဒူရို ဖယ်ရှားခံရမည်ဟု ခန့်မှန်းထားသော  လောင်းကြေး စာချုပ်များကို ဝယ်ယူစုဆောင်းထားခဲ့ခြင်း ဖြစ်သည်။

မာဒူရို အဖမ်းမခံရမီ အချိန်ထိ ထိုလောင်းကြေးများ၏ တန်ဖိုးမှာ ဒေါ်လာ ၃၄,၀၀၀ ခန့်သာ ရှိခဲ့သည်။

သို့သော် မာဒူရိုကို အမေရိကန်စစ်တပ်က ဖမ်းဆီးခေါ်ဆောင်ခဲ့သည့်သတင်း ထွက်ပေါ်လာပြီးနောက်တွင် လောင်း ကြေး တန်ဖိုးမှာ အဆမတန် မြင့်တက်သွားခဲ့ကြောင်း Polymarket ဝက်ဘ်ဆိုက်၏ အချက်အလက်များ၌ ဖော်ပြ ထားသည်။

လောင်းကစား ကုမ္ပဏီတစ်ခုကိုတွေ့ရစဉ်

အဆိုပါ အမည်မဖော်လိုသည့် ကုန်သည်၏ အကောင့်ကို ပြီးခဲ့သည့်လကမှ စတင်ဖွင့်လှစ်ခဲ့ခြင်းဖြစ်သည်။

ဇန်နဝါရီ ၃၁ ရက်မတိုင်မီ အမေရိကန်က ဗင်နီဇွဲလားကို ကျူးကျော် ဝင်ရောက်ခဲ့လျှင် အကျိုးအမြတ် ရရှိမည့် လောင်းကြေး စာချုပ်များအား ဒီဇင်ဘာ ၂၇ ရက်နေ့တွင် ဒေါ်လာ ၉၆ ဖြင့် စတင်ဝယ်ယူခဲ့ခြင်းဖြစ်သည်။

ထို့နောက် အလားတူ လောင်းကြေးမျိုး ထပ်မံဝယ်ယူခဲ့ခြင်းဖြစ်ကာ စုစုပေါင်း အရင်းငွေ ဒေါ်လာ  ၃၄,၀၀၀ ရှိခဲ့ရာမှ မာဒူရို ဖမ်းဆီးခံရချိန်၌ အမြတ်ငွေ ဒေါ်လာ ၄၁၀,၀၀၀ အထိ ရရှိခဲ့ခြင်းဖြစ်သည်။

Polymarket ကဲ့သို့ ကုမ္ပဏီများသည် အားကစား၊ ဖျော်ဖြေရေး၊ နိုင်ငံရေးနှင့် စီးပွားရေး စသည့် လက်တွေ့လောက တွင် ဖြစ်ပျက်နေသော ဖြစ်ရပ်အမျိုးမျိုး၏ ရလဒ်များအပေါ် Yes or No ဟူသည့် ရွေးချယ်မှုဖြင့် လောင်းကြေး ထပ်နိုင်သည့် အရောင်းအဝယ် ပြုလုပ်နိုင်သော စာချုပ်များကို ဝန်ဆောင်မှုပေးထားခြင်း ဖြစ်သည်။

Source: Reuters

CNI International News

ဟာဗားနား၊ ဇန်နဝါရီ ၆

ဇန်နဝါရီ ၃ ရက်က ဗင်နီဇွဲလားနိုင်ငံအတွင်း အမေရိကန်၏ တိုက်ခိုက်မှုများကြောင့် ကျူးဘားအရာရှိ ၃၂ ဦး သေဆုံးခဲ့ကြောင်း ကျူးဘားအစိုးရမှ ဇန်နဝါရီ ၅ ရက်တွင် ထုတ်ပြန်ခဲ့သည်ဟု အေပီမှ ဖော်ပြခဲ့သည်။

ထိုထုတ်ပြန်ချက်သည် ဗင်နီဇွဲလားနိုင်ငံအတွင်း အမေရိကန်၏ တိုက်ခိုက်မှုများကြောင့် သေဆုံးသူဦးရေနှင့် ပတ်သက်၍ ကျူးဘားဘက်မှ ပထမဆုံး တရားဝင် ထုတ်ပြန်ချက်ဖြစ်သည်။

ဗင်နီဇွဲလားအစိုးရ၏ တောင်းဆိုချက်အရ ကျူးဘားစစ်တပ်နှင့် ရဲအရာရှိများသည် မစ်ရှင်တစ်ခုဖြင့် ဗင်နီဇွဲလားသို့ ရောက်ရှိနေခြင်းဖြစ်ကြောင်း ကျူးဘားနိုင်ငံပိုင် ရုပ်သံက ဖော်ပြထားသည်။

ကျူးဘားအရာရှိများသည် ဗင်နီဇွဲလားတွင် မည်သည့်မစ်ရှင်ကို လုပ်ဆောင်နေသည် ဆိုခြင်းကိုမူ ရှင်းရှင်း လင်းလင်း မထုတ်ပြန်ခဲ့သော်လည်း ကျူးဘားသည် ဗင်နီဇွဲလား၏ ရင်းနှီးသော မဟာမိတ်ဖြစ်ပြီး ဗင်နီဇွဲလား အစိုးရ၏ လုပ်ငန်းစဉ်များ၌ ကူညီရန်အတွက် စစ်တပ်နှင့် ရဲတပ်ဖွဲ့ဝင်များကို စေလွှတ်ထားသည်မှာ နှစ်ပေါင်း များစွာ ကြာမြင့်ပြီဖြစ်သည်။

ဗင်နီဇွဲလားနဲ့ ကျူးဘား အလံကိုတွေ့ရစဉ်

“သိတဲ့အတိုင်းပဲ၊ မနေ့က ကျူးဘားလူမျိုး အတော်များများ သေဆုံးခဲ့ပါတယ်။ တစ်ဖက်မှာတော့ သေဆုံးမှုတွေ အများကြီးရှိခဲ့ပေမယ့် ကျနော်တို့ဘက်မှာတော့ တစ်ယောက်မှ မသေပါဘူး” ဟု အမေရိကန်သမ္မတ ဒေါ်နယ် ထရမ့် (Donald Trump) က ဇန်နဝါရီ ၄ ရက် ညပိုင်းတွင် ဖလော်ရီဒါ (Florida) မှ ဝါရှင်တန် (Washington) သို့  သွားရောက်သည့် ခရီးစဉ်အတွင်း Air Force One လေယာဉ်ပေါ်၌ သတင်းထောက်များကို ပြောကြားခဲ့သည်။

အမေရိကန်၏ ဗုံးကြဲ တိုက်ခိုက်မှုများအတွင်း လူအများအပြား သေဆုံးခဲ့ကြောင်း ဗင်နီဇွဲလားအစိုးရက ဝန်ခံထား သော်လည်း အသေအပျောက်စာရင်း အတိအကျကိုမူ အတည်ပြုပြောကြားခြင်း မရှိသေးပေ။

ကျူးဘားအစိုးရကမူ သေဆုံးသွားသော ၎င်းတို့၏ အရာရှိများအတွက် နှစ်ရက်ကြာ ဝမ်းနည်းခြင်း အထိမ်းအမှတ် သတ်မှတ်ကြောင်း ကြေညာခဲ့သည်။

ကျူးဘားသမ္မတဟောင်းနှင့် တော်လှန်ရေးခေါင်းဆောင် ရာအူးလ် ကတ်စထရို (Raúl Castro) နှင့် ကျူးဘား သမ္မတ မီဂွယ် ဒီယက်ဇ် ကာနယ် (Miguel Díaz-Canel) တို့က သေဆုံးသူများ၏ မိသားစုများထံ ဝမ်းနည်းကြောင်း သဝဏ်လွှာများ ပေးပို့ခဲ့ကြသည်။

သေဆုံးသူများ၏ အမည်စာရင်းနှင့် ၎င်းတို့ တာဝန်ယူခဲ့သည့် ရာထူးများကိုမူ ကျူးဘားအာဏာပိုင်များက ချက်ချင်း ထုတ်ဖော်ပြောဆိုခြင်း မရှိသေးပေ။

ကျူးဘား ရွှေ့ပြောင်း နေထိုင်သူ မိဘများက မွေးဖွားလာခဲ့သည့် အမေရိကန် နိုင်ငံခြားရေးဝန်ကြီး မာကို ရူဘီယို (Marco Rubio) ကမူ ဗင်နီဇွဲလားနိုင်ငံတွင် ကျူးဘား၏ ပါဝင်ပတ်သက်မှုကို ထောက်ပြ ပြောဆိုခဲ့သည်။

မာဒူရို၏ ပြည်တွင်းလုံခြုံရေး ယန္တရားကို ကျူးဘားနိုင်ငံသားများက ဦးဆောင်နေခြင်းဖြစ်ပြီး ၎င်းတို့သည် မာဒူရိုကို အထောက်အပံ့ပေးနေကြောင်း ရူဘီယိုက ပြောကြားခဲ့သည်။

“မာဒူရိုကို ကာကွယ်ပေးထားတဲ့ လုံခြုံရေးတပ်ဖွဲ့ဝင်တွေနဲ့ သူတို့ရဲ့ ထောက်လှမ်းရေးဌာန တစ်ခုလုံးမှာ ကျူးဘားလူမျိုးတွေနဲ့ ပြည့်နေတာဟာ အားလုံးသိပါတယ်” ဟု ရူဘီယိုက ပြောကြားခဲ့သည်။

Source: အေပီ

CNI International News

ဘေဂျင်း၊ ဇန်နဝါရီ ၆

မည်သည့်နိုင်ငံကိုမဆို ကမ္ဘာ့တရားသူကြီး (world judge) အဖြစ် ဆောင်ရွက်နေခြင်းကို တရုတ်က လက်ခံမည် မဟုတ်ကြောင်း တရုတ်နိုင်ငံခြားရေးဝန်ကြီး ဝမ်ယိ (Wang Yi)က ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဇန်နဝါရီ ၃ ရက်တွင် အမေရိကန်စစ်တပ်က ဗင်နီဇွဲလားကို ဝင်ရောက်တိုက်ခိုက်ခဲ့ပြီး ဗင်နီဇွဲလားသမ္မတ မာဒူရို (Nicolas Maduro) အား ဖမ်းဆီးခေါ်ဆောင်သွားခဲ့ပြီးနောက် ဝမ်ယိက ထိုကဲ့သို့ ပြောကြားခဲ့ခြင်းဖြစ်သည်။

“ဘယ်နိုင်ငံကမှ ကမ္ဘာ့ပုလိပ် (World Police) အဖြစ် ဆောင်ရွက်နိုင်တယ်လို့ ကျနော်တို့ ဘယ်တုန်းကမှ မယုံ ကြည်ခဲ့သလို ဘယ်နိုင်ငံကမှ ကမ္ဘာ့တရားသူကြီး (World Judge) အဖြစ် ဆောင်ရွက်နိုင်တယ်ဆိုတာကို ကျနော် တို့ လက်မခံပါဘူး” ဟု ဝမ်က ဇန်နဝါရီ ၄ ရက်တွင် ဘေဂျင်း၌ ပါကစ္စတန်နိုင်ငံခြားရေးဝန်ကြီး အစ်ဟက် ဒါး (Ishaq Dar) နှင့်တွေ့ဆုံချိန်၌ ပြောကြားခဲ့သည်။

ဝမ်သည် အမေရိကန်ကို တိုက်ရိုက် အမည်တပ်ခြင်းမပြုဘဲ “ဗင်နီဇွဲလား နိုင်ငံအတွင်း ရုတ်တရက် ဖြစ်ပေါ် တိုးတက်လာသည့် အခြေအနေများ” ဟု ရည်ညွှန်း ပြောဆိုခဲ့ခြင်း ဖြစ်သည်။

အသက် ၆၃ နှစ်အရွယ်ရှိ မာဒူရိုအား မျက်လုံးကိုစည်းပြီး လက်ထိပ်ခတ်ထားသည့် ဓာတ်ပုံများကြောင့် ဗင်နီဇွဲလား ပြည်သူများ ထိတ်လန့်နေရချိန်တွင် ဝမ်က ဗင်နီဇွဲလားနှင့်ပတ်သက်ပြီး ပထမဆုံးအကြိမ်အဖြစ် မှတ်ချက်ပေးခဲ့ ခြင်း ဖြစ်သည်။

ဗင်နီဇွဲလားသမ္မတ မာဒူရိုကို အမေရိကန် ဖမ်းဆီးခေါ်ဆောင်လာစဉ်

“နိုင်ငံအားလုံးရဲ့ အချုပ်အခြာအာဏာနဲ့ လုံခြုံရေးကို နိုင်ငံတကာ ဥပဒေတွေအောက်မှာ အပြည့်အဝ ကာကွယ် ပေးရပါမယ်” ဟု ဝမ်က ပြောကြားခဲ့သည်။

တရုတ်သည် သံတမန်ရေးရာတွင် ဩဇာတိက္ကမကြီးမားသည့် နိုင်ငံဖြစ်လာရန် ရည်မှန်းထားပြီး အထူးသဖြင့် ၂၀၂၃ ခုနှစ်၌ ဆော်ဒီနှင့် အီရန်တို့ကြား အံ့အားသင့်ဖွယ် ပြန်လည်သင့်မြတ်ရေးကို ကြားဝင်စေ့စပ်ပေးနိုင်ခဲ့သည်။

ထို့ပြင် တရုတ်နိုင်ငံအနေဖြင့် ကုန်သွယ်ရေး ဆွေးနွေးမှုများတွင် အမေရိကန်နှင့် ထိပ်တိုက် ရင်ဆိုင်နိုင်ခဲ့သည့် အောင်မြင်မှုများက ၎င်း၏ ယုံကြည်မှုကို ပိုမိုခိုင်မာစေခဲ့သည်ဟု လေ့လာဆန်းစစ်သူများက ပြောကြားခဲ့သည်။

သို့သော် အမေရိကန်သည် ဗင်နီဇွဲလားအစိုးရကို လတ်တလော အချိန်တွင် ကြီးကြပ်ကွပ်ကဲသွားမည်ဆိုသည့် သမ္မတ ဒေါ်နယ်ထရမ့် (Donald Trump) ၏ ပြောကြားချက်သည် နှစ်ပေါင်း ၅၀ ကျော် ကြာမြင့်ပြီဖြစ်သည့် ဗင်နီဇွဲလားနှင့် တရုတ်ကြား သံတမန်ဆက်ဆံရေးအတွက် စိန်ခေါ်မှုတစ်ခုဖြစ်လာကြောင်း ကျွမ်းကျင်သူများက ပြောကြားခဲ့သည်။

Source: ရိုက်တာ

CNI International News

ပဲရစ်၊ ဇန်နဝါရီ ၆

အမေရိကန်သမ္မတ ဒေါ်နယ်ထရမ့် (Donald Trump) က ဂရင်းလန်းကျွန်း (Greenland) ကို သိမ်းယူမည်ဟု ထပ်မံ ခြိမ်းခြောက်ခဲ့ပြီးနောက် ပြင်သစ်နိုင်ငံက ဒိန်းမတ်နှင့် ဂရင်းလန်းကျွန်းတို့၏ အချုပ်အခြာအာဏာနှင့် နယ်မြေတည်တံ့ခိုင်မြဲမှုအပေါ် ထောက်ခံကြောင်း ဇန်နဝါရီ ၅ ရက်တွင် ပြောကြားခဲ့သည်ဟု ရိုက်တာမှ ဖော်ပြ ခဲ့သည်။

“ဒါဟာ ဒိန်းမတ်နဲ့အတူ ရပ်တည်တဲ့ စည်းလုံးညီညွတ်မှုပါပဲ။ ဂရင်းလန်းဟာ ဂရင်းလန်းကျွန်းသူ၊ ကျွန်းသားတွေနဲ့ ဒိန်းမတ်ပြည်သူတွေ ပိုင်ဆိုင်တာ ဖြစ်ပါတယ်။ သူတို့ဆန္ဒက အဓိကကျပါတယ်။ နယ်နိမိတ်တွေကို အင်အားသုံးပြီး ပြောင်းလဲလို့မရပါဘူး” ဟု ပြင်သစ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ ပါစကယ် ကွန်ဖက်ရုဇ် (Pascal Confavreux) က TF1 ရုပ်သံကို ပြောကြားခဲ့သည်။

ဇန်နဝါရီ ၅ ရက်တွင် ထရမ့်က The Atlantic မဂ္ဂဇင်းနှင့် အင်တာဗျူး ပြုလုပ်ချိန်၌ “ကျနော်တို့က ဂရင်းလန်းကို လိုအပ်တာ အမှန်ပါပဲ။ ကာကွယ်ရေးအတွက် အဲဒီကျွန်းကို လိုအပ်ပါတယ်” ဟု ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်နဲ့ ဂရင်းလန်းကျွန်းကို တွေ့ရစဉ်

၎င်း၏ ပြောကြားချက်သည် အမေရိကန်က ဗင်နီဇွဲလားသမ္မတ မာဒူရို (Nicolas Maduro) ကို ဖမ်းဆီးခဲ့ပြီးနောက် တစ်ရက်အကြာတွင် ထွက်ပေါ်လာခြင်းဖြစ်သည်။

ထရမ့်ကမူ အမေရိကန်သည် ဗင်နီဇွဲလားနိုင်ငံကို စီမံခန့်ခွဲသွားမည်ဟု ပြောဆိုထားသည်။

ဒိန်းမတ်နှင့် ဂရင်းလန်းကျွန်း၏ ခေါင်းဆောင်များကမူ ဂရင်းလန်းကျွန်းကို သိမ်းယူမည်ဟု ခြိမ်းခြောက်နေ ခြင်းအား ရပ်တန့်ရန် ထရမ့်ကို ဇန်နဝါရီ ၄ ရက်က တိုက်တွန်းခဲ့ကြသည်။

Source: ရိုက်တာ

CNI International News

ဝါရှင်တန်၊ ဇန်နဝါရီ ၆

အမေရိကန်သမ္မတ ဒေါ်နယ်ထရမ့်သည် ကိုလံဘီယာအစိုးရအပေါ် စစ်ရေးအရ အရေးယူမည်ဟု ဇန်နဝါရီ ၄ ရက် က ခြိမ်းခြောက် ပြောဆိုခဲ့ကြောင်း ရိုက်တာမှ ဖော်ပြခဲ့သည်။

ထိုသို့သော စစ်ဆင်ရေးမျိုးသည် ၎င်းအတွက် အဆင်ပြေကြောင်း ထရမ့်က Air Force One လေယာဉ်ပေါ်တွင် သတင်းထောက်များကို ပြောကြားခဲ့သည်။

ထို့နောက် ကိုလံဘီယာအစိုးရထံမှ ဒေါသတကြီး တုန့်ပြန်မှုများ ထွက်ပေါ်လာခဲ့သည်။

ဇန်နဝါရီ ၃ ရက် အစောပိုင်းက ဗင်နီဇွဲလားသမ္မတ မာဒူရို (Nicolas Maduro) ကို အမေရိကန်က ဖမ်းဆီး ခေါ်ဆောင် သွားခဲ့ပြီးနောက် ထရမ့်၏ မှတ်ချက်စကားများ ထွက်ပေါ်လာခြင်းဖြစ်သည်။

“ကိုလံဘီယာနိုင်ငံဟာ အရမ်းကို စိတ်မချရတဲ့ အခြေအနေမှာ ရှိနေပါတယ်။ ကိုလံဘီယာကို ကိုကင်းတွေ ထုတ်လုပ်ပြီး အမေရိကန်ကို ရောင်းချရတာကို သဘောတွေ့နေတဲ့ ကျန်းမာရေးမကောင်းတဲ့ လူတစ်ယောက်က အုပ်ချုပ်နေတာပါ။ သူ အဲဒီလိုလုပ်နေတာ ကြာကြာခံမှာ မဟုတ်တော့ပါဘူး” ဟု ထရမ့်က ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်နဲ့ ကိုလံဘီယာသမ္မတ ပက်ထရိုကို တွေ့ရစဉ်

ထရမ့်၏ မှတ်ချက်စကားသည် ကိုလံဘီယာသမ္မတ ဂူစတာဗို ပက်ထရို (Gustavo Petro) ကို ရည်ညွှန်းပြော ဆိုခြင်း ဖြစ်နိုင်ကြောင်း လေ့လာသူများက ပြောကြားခဲ့သည်။

ကိုလံဘီယာနိုင်ငံအပေါ် အမေရိကန်က စစ်ရေးအရ အရေးယူ ဆောင်ရွက်မှုများ ပြုလုပ်ရန် အစီအစဉ် ရှိ၊ မရှိ တိုက်ရိုက် မေးမြန်းရာတွင် ထရမ့်က “ကျနော့်အတွက်တော့ အဲဒါက အဆင်ပြေပါတယ်”ဟု ဖြေကြားခဲ့သည်။
ကိုလံဘီယာအစိုးရကမူ ထရမ့်၏ ပြောကြားချက်များသည် ရွေးကောက် တင်မြှောက်ခံထားရသော ခေါင်းဆောင် တစ်ဦးအပေါ် လက်မခံနိုင်သော ခြိမ်းခြောက်မှု ဖြစ်သည်ဟုဆိုကာ ပယ်ချလိုက်သည်။

“ဒါဟာ နိုင်ငံတကာဥပဒေရဲ့ စံတန်ဖိုးတွေကို ချိုးဖောက်ပြီး အခြားနိုင်ငံရဲ့ ပြည်တွင်းရေးကို လျော်ကန်သင့်မြတ်မှု မရှိဘဲ ဝင်ရောက်စွက်ဖက်တာ ဖြစ်ပါတယ်” ဟု ကိုလံဘီယာနိုင်ငံခြားရေးဝန်ကြီးဌာနက ဇန်နဝါရီ ၄ ရက် နှောင်း ပိုင်းတွင် ထုတ်ပြန်ခဲ့သည်။

ထို့ပြင် ကိုလံဘီယာသမ္မတ ပက်ထရိုကလည်း မိမိအား ပုတ်ခတ် စော်ကားနေမှုကို ရပ်တန့်ရန် ထရမ့်ကို တိုက်တွန်းကြောင်း ပြောကြားခဲ့သည်။

Source: ရိုက်တာ

CNI International News

ကာရာကက်စ်၊ ဇန်နဝါရီ ၅

အမေရိကန်စစ်တပ်က ဗင်နီဇွဲလားသမ္မတ နီကိုလပ်စ် မက်ဒူရို (Nicolás Maduro) ကို ဇန်နဝါရီ ၃ ရက်တွင် ဖမ်းဆီးခေါ်ဆောင်သွားခဲ့ပြီးနောက် ဗင်နီဇွဲလားနိုင်ငံကို မည်သူက အုပ်ချုပ်နေသနည်းဆိုသည့် မေးခွန်းကို ဗင်နီဇွဲလား ပြည်သူများကြား စိတ်ရှုပ်ထွေးစွာဖြင့် သိရှိရန် ကြိုးပမ်းနေကြသည်ဟု အေပီမှ ဖော်ပြခဲ့သည်။

လူဦးရေ ၂၉ သန်းရှိသော ဗင်နီဇွဲလားနိုင်ငံတွင် အောင်မြင်မှု မရှိခဲ့သည့် အာဏာသိမ်းရန် ကြိုးပမ်းမှုများ၊ စစ်တပ် အတွင်း ပုန်ကန်မှုများ၊ လူထုဆန္ဒပြပွဲများနှင့် စီးပွားရေး ပိတ်ဆို့မှုများကို ကျော်ဖြတ်ကာ အာဏာတည်မြဲခဲ့သည့် အာဏာရှင် မာဒူရိုသည် လက်ရှိတွင် အမေရိကန်၌ ထိန်းသိမ်းခံထားရသည်။

“မနက်ဖြန် ဘာတွေဖြစ်လာမှာလဲ” ဟု ဗင်နီဇွဲလားနိုင်ငံ ကာရာကတ်စ် (Caracas) မြို့တော်တွင် နေထိုင်သူ တစ်ဦးဖြစ်သည့် ဟွမ် ပါဘလို ပက်ထရိုနီ (Juan Pablo Petrone) က ပြောကြားခဲ့သည်။

မြို့တော်အတွင်း ကြောက်ရွံ့မှုများ လွှမ်းမိုးနေပြီး ကုန်တိုက်များနှင့် ဓာတ်ဆီဆိုင်များတွင် တန်းစီစောင့်ဆိုင်းနေ သည့် လူတန်းရှည်ကြီးများမှလွဲ၍ လမ်းမများပေါ်တွင် လူသူကင်းမဲ့သွားခဲ့သည်။

ဗင်နီဇွဲလား ဒုသမ္မတကို တွေ့ရစဉ်

အမေရိကန်သမ္မတ ဒေါ်နယ်ထရမ့် (Donald Trump) ကမူ ဗင်နီဇွဲလားပြည်သူများ သိချင်နေသည့် အဖြေတစ်ခုကို ပေးခဲ့သည်။

ထိုအဖြေမှာ အမေရိကန်အစိုးရသည် ဗင်နီဇွဲလားနိုင်ငံကို အုပ်ချုပ်သွားမည်ဖြစ်ကြောင်း ထရမ့်က ပြောကြားခဲ့ခြင်း ဖြစ်ပြီး မာဒူရို၏ အယုံကြည်ရဆုံး လက်ထောက်တစ်ဦးနှင့် ပူးပေါင်းဆောင်ရွက်ဖွယ် ရှိနေသည်။

သမ္မတရာထူး ဆက်ခံရန် အစီအစဉ်အရ ဒုတိယနေရာတွင် ရှိနေသည့် ဒုသမ္မတ ဒယ်လ်စီ ရိုဒရီဂွက်ဇ် (Delcy Rodríguez) သည် ၂၀၁၈ ခုနှစ်ကတည်းက မာဒူရို၏ လက်ထောက်အဖြစ် တာဝန်ထမ်းဆောင်ခဲ့သူဖြစ်သည်။

သူသည် ဗင်နီဇွဲလား၏ ရေနံအပေါ် အခြေခံသော စီးပွားရေးနှင့် ကြောက်မက်ဖွယ်ကောင်းသော ထောက်လှမ်းရေး ဌာနကို ကြီးကြပ်ခဲ့သူဖြစ်ပြီး ဇန်နဝါရီ ၃ ရက်တွင် ဗင်နီဇွဲလား တရားရုံးချုပ်က ဒယ်လ်စီအား ယာယီသမ္မတအဖြစ် တာဝန်ယူရန် အမိန့်ထုတ်ပြန်ခဲ့သည်။

“ဗင်နီဇွဲလားနိုင်ငံကို ပြန်လည်ကြီးကျယ် ခမ်းနားလာအောင် လုပ်ဆောင်ဖို့အတွက် ကျနော်တို့ တွေးထားတာတွေ ကို လုပ်ဆောင်ဖို့ သူ့ (ဒယ်လ်စီ) မှာ ဆန္ဒရှိပါတယ်” ဟု ထရမ့်က သတင်းထောက်များကို ပြောကြားခဲ့သည်။

ဒယ်လ်စီသည် ထရမ့်၏ ပထမသက်တမ်း ကာလအတွင်း ဗင်နီဇွဲလား၏ ဒီမိုကရေစီစနစ်ကို ထိခိုက်စေရန် လုပ်ဆောင်ခဲ့မှုကြောင့် အမေရိကန်၏ ပိတ်ဆို့ အရေးယူမှုများ ခံခဲ့ရသူဖြစ်သည်။

ယခုအခါတွင် ထရမ့်သည် ဗင်နီဇွဲလားနိုင်ငံနှင့် ပတ်သက်သည့် ၎င်း၏ အစီအစဉ်များကို အကောင်အထည် ဖော်ရန် အတွက် ဒယ်လ်စီနှင့် ပူးပေါင်းဆောင်ရွက်ဖွယ်ရှိ နေသည်ဟု ကျွမ်းကျင်သူများက သုံးသပ်ခဲ့ကြသည်။

Source: အေပီ