CNI International News

တိုင်ပေ၊ မတ်လ ၃၁

ထိုင်ဝမ်၏ အတိုက်အခံပါတီဖြစ်သည့် ကူမင်တန်ပါတီ(KMT)ဥက္ကဋ္ဌ ချမ်းလီဝမ် (Cheng Li-wun) သည် တရုတ်နိုင်ငံသို့ သွားမည်ဖြစ်ပြီး သမ္မတ ရှီကျင့်ဖျင်(Xi Jinping)နှင့် တွေ့ဆုံရန် မျှော်လင့်ထားကြောင်း Nikkei Asia မှ ဖော်ပြခဲ့သည်။  

ချမ်းလီဝမ်သည် တရုတ်သမ္မတ ရှီကျင့်ဖျင် (Xi Jinping)က ဖိတ်ကြားခဲ့ခြင်းကြောင့် တရုတ်နိုင်ငံသို့ သွားရောက် ရန် စီစဉ်နေခြင်းဖြစ်သည်။

တရုတ်သို့ သွားရောက်မည့် ချမ်းနှင့် ကိုယ်စားလှယ်အဖွဲ့သည် ဧပြီလ ၇ ရက်မှ ၁၂ ရက်အထိ ကျန်းစု (Jiangsu) ၊ ရှန်ဟိုင်း (Shanghai)နှင့် ဘေကျင်း (Bejing) မြို့များသို့ သွားရောက် လည်ပတ်မည်ဖြစ်သည်။

ချမ်း အနေဖြင့် အမေရိကန်သို့ မသွားရောက်မီ တရုတ်သို့ အရင်သွားရန် ဆုံးဖြတ်ချက်အပေါ် ပြည်တွင်း၊ ပြင်ပမှ ဝေဖန်မှုများ ထွက်ပေါ်နေသည်။

ချမ်းကမူ ရှီနှင့် တွေ့ဆုံခြင်းသည် ထိုင်ဝမ် ရေလက်ကြား နှစ်ဖက်စလုံး ငြိမ်းချမ်းရေးအတွက် အရေးပါသော အခြေခံအုတ်မြစ် ဖြစ်လာနိုင်သည်ဟု ယုံကြည်ထားသည်။

ထိုင်ဝမ်အတိုက်အခံ ခေါင်းဆောင် ချမ်းလီဝမ်ကို တွေ့ရစဉ်

ချမ်း၏ တရုတ်ခရီးစဉ်သည် ထိုင်ဝမ်နှင့် တရုတ်ကြား စစ်ရေးတင်းမာမှုများ မြင့်တက်နေချိန်တွင် ပေါ်ပေါက်လာ ခြင်း ဖြစ်သည်။

တစ်ဖက်တွင်လည်း အာဏာရ DPP ပါတီ ဦးဆောင်သည့် ထိုင်ဝမ်အစိုးရသည် တရုတ်၏ ကျူးကျော်မှုကို ခုခံရန် ကာကွယ်ရေးအသုံးစရိတ် ထိုင်ဝမ်ဒေါ်လာ ၁ ဒသမ ၂၅ ထရီလျံ သုံးစွဲရန် အဆိုပြုထားသည်။

ကူမင်တန်ပါတီ(KMT)ကမူ အမေရိကန် လက်နက်များ ဝယ်ယူရန် ထိုင်ဝမ်ဒေါ်လာ ၃၈၀ ဘီလျံသာ လျာထားရန် ဆန္ဒရှိနေပြီး အစိုးရနှင့် သဘောထား ကွဲလွဲလျက်ရှိသည်။

သို့သော် KMT ပါတီဝင် အချို့ကမူ ပါတီ၏ မူလ အဆိုပြုချက်ထက် ပိုမိုမြင့်မားသော စစ်ရေးအသုံးစရိတ်ကို တောင်းဆိုနေကြသည်။

ထိုင်ချွမ်း (Taichung) မြို့တော်ဝန် လူရှောင်းယန်(Lu Shiow-yen) က ကာကွယ်ရေး အသုံးစရိတ်ကို ထိုင်ဝမ် ဒေါ်လာ ၈၀၀ ဘီလျံမှ ၁ ထရီလျံကြား သတ်မှတ်သင့်ကြောင်း အကြံပြုထားသည်။

ချမ်း၏ ခရီးစဉ်နှင့် ကာကွယ်ရေး အသုံးစရိတ် ငြင်းခုံမှုများသည် လာမည့် ၂၀၂၈ ခုနှစ် ထိုင်ဝမ်ရွေးကောက်ပွဲ အတွက် အရေးပါသော နိုင်ငံရေး အခင်းအကျင်းများ ဖြစ်လာနိုင်သည်ဟု ကျွမ်းကျင်သူများက သုံးသပ်ထားသည်။

Source: Nikkei Asia

CNI International News

တဲလ်အဗစ်၊ မတ်လ ၃၁

ဟစ်ဇ်ဘိုလာအဖွဲ့၏ ဒုံးကျည်များဖြင့် ဆက်တိုက် ပစ်ခတ်နေမှုကို ရပ်တန့်ရန်အတွက် လက်ဘနွန်တောင်ပိုင်းတွင် စစ်ဆင်ရေးများကို ထပ်မံတိုးမြှင့်ရန် အစ္စရေးဝန်ကြီးချုပ် နေတန်ယာဟု(Benjamin Netanyahu)က စစ်တပ်ကို အမိန့်ပေးထားကြောင်း ရိုက်တာမှ ဖော်ပြခဲ့သည်။

လွန်ခဲ့သည့် သီတင်းပတ်က အစ္စရေးသည် လီတာနီမြစ် (Litani River) အထိ ကြားခံနယ်မြေကို တိုးချဲ့သတ်မှတ် နေကြောင်း ပြောကြားခဲ့သည်။

သို့သော် နေတန်ယာဟု၏ ရည်ညွှန်းချက်မှာ ထိုနယ်မြေကို ဆိုလိုခြင်း သို့မဟုတ် အခြားနယ်မြေများကို ထပ်မံ သိမ်းပိုက်ရန် ဆိုလိုခြင်း ဖြစ်မည်ကိုမူ ချက်ချင်း ရှင်းလင်းစွာ မသိရသေးပေ။

“ကျူးကျော် ဝင်ရောက်လာမယ့် ခြိမ်းခြောက်မှုတွေကို နောက်ဆုံးအနေနဲ့ ဟန့်တားနိုင်ဖို့နဲ့ ကျနော်တို့ နယ်စပ်ကို ပစ်ခတ်နေတဲ့ တင့်ကားဖျက် ဒုံးကျည်တွေကို တားဆီးနိုင်ဖို့ အခုရှိနေတဲ့ လုံခြုံရေးနယ်မြေကို ထပ်မံတိုးချဲ့ဖို့ ကျနော် ညွှန်ကြားထားပါတယ်”ဟု နေတန်ယာဟုက အစ္စရေးမြောက်ပိုင်း စစ်ဌာနချုပ်မှတဆင့် ဗွီဒီယိုဖြင့် ပြောကြားခဲ့သည်။

ဟစ်ဇ်ဘိုလာအဖွဲ့ကို တွေ့ရစဉ်

အစ္စရေးတပ်ဖွဲ့များသည် ကျန်ရှိနေသော တံတားများနှင့် အစ္စရေးနယ်စပ် မြောက်ဘက် ကီလိုမီတာ ၃၀ (၂၀ မိုင်) အကွာတွင် မြေထဲပင်လယ်အတွင်းသို့ စီးဝင်သော လီတာနီမြစ်အထိ လုံခြုံရေးနယ်မြေကို ထိန်းချုပ်သွားမည်ဟု ပြီးခဲ့သည့် သီတင်းပတ်က အစ္စရေးကာကွယ်ရေးဝန်ကြီး အစ္စရေးကက်ဇ်(Israel Katz) က ပြောကြားခဲ့သည်။

အမေရိကန်နှင့် အစ္စရေးတို့က အီရန်နိုင်ငံကို လေကြောင်းမှ တိုက်ခိုက်မှုများ ပြုလုပ်ခဲ့ပြီးနောက် အီရန် ကျောထောက် နောက်ခံပြု ဟစ်ဇ်ဘိုလာအဖွဲ့က အစ္စရေးနိုင်ငံအတွင်းသို့ ဒုံးကျည်များဖြင့် စတင်ပစ်ခတ်ခဲ့ခြင်း ဖြစ်သည်။

လက်ဘနွန် ကျန်းမာရေးဝန်ကြီးဌာန၏ ထုတ်ပြန်ချက်အရ အစ္စရေး၏ လေကြောင်း တိုက်ခိုက်မှုများနှင့် မြေပြင် စစ်ဆင်ရေးများကြောင့် လက်ဘနွန်နိုင်ငံတွင် ကလေးသူငယ်များ၊ အမျိုးသမီးများနှင့် ဆေးဘက်ဆိုင်ရာ ဝန်ထမ်း များ အပါအဝင် လူပေါင်း ၁၁၀၀ ကျော် သေဆုံးခဲ့ရပြီး ဖြစ်သည်ဟုဆိုသည်။

အစ္စရေးစစ်တပ်ကမူ လက်ဘနွန်တောင်ပိုင်း တိုက်ပွဲများအတွင်း ၎င်းတို့၏ စစ်သား ၄ ဦး သေဆုံးခဲ့ကြောင်း ပြောကြားခဲ့သည်။

Source: ရိုက်တာ

CNI International News

ကိုင်ရို၊ မတ်လ ၃၀

ယီမင်နိုင်ငံရှိ ဟူရ်သီသူပုန်အဖွဲ့၏ တိုက်ခိုက်မှုများသည် သီတင်းပတ် အနည်းငယ်ကြာ ငြိမ်သက်နေပြီးနောက် မတ်လ ၂၇ ရက်တွင် အစ္စရေးကို ဒုံးကျည်များဖြင့် ပစ်ခတ်တိုက်ခိုက်ခဲ့၍ ကမ္ဘာ့ရေကြောင်း ကုန်သွယ်ရေး လမ်းကြောင်းများအပေါ် စိုးရိမ်ပူပန်မှုများ တစ်ကျော့ပြန် မြင့်တက်လာစေသည်ဟု အေပီမှ ဖော်ပြခဲ့သည်။

အထူးသဖြင့် အီရန်နိုင်ငံက ဟော်မုဇ်ရေလက်ကြား (Strait of Hormuz) ကို ထိန်းချုပ် ပိတ်ဆို့ထားသဖြင့် အရေး ပါသော ကုန်သွယ်ရေးလမ်းကြောင်း တစ်ခုမှာ ရပ်တန့်လုနီးပါး ဖြစ်နေချိန်တွင် ပင်လယ်နီ (Red Sea)ရှိ ကုန်သွယ် ရေး လမ်းကြောင်းပါ ထပ်မံ အနှောင့်အယှက် ဖြစ်လာနိုင်ခြေ ရှိနေသည်။

ဟူသီအဖွဲ့၏ ထုတ်ပြန်ချက်အရ ၎င်းတို့သည် အစ္စရေးတောင်ပိုင်းရှိ  စစ်ဘက်ဆိုင်ရာ နေရာများကို ဒုံးကျည် အများအပြားဖြင့် ပစ်ခတ်ခဲ့ကြောင်း ဖော်ပြထားသည်။

ပင်လယ်နီမှာ ရေနံတင် သင်္ဘောတိုက်ခိုက်ခံရစဉ်

ထိုတိုက်ခိုက်မှုသည် အီရန်စစ်ပွဲ စတင်ကတည်းက ဟူရ်သီအဖွဲ့၏ ပထမဆုံး တိုက်ခိုက်မှုဖြစ်သည်။

အစ္စရေးစစ်တပ်ကမူ ယီမင်နိုင်ငံဘက်မှ ပစ်လွှတ်လိုက်သော ဒုံးကျည်တစ်စင်းကို ကြားဖြတ်ဟန့်တားနိုင်ခဲ့ကြောင်း အတည်ပြုခဲ့သည်။

ထို့ပြင် ဟူသီသူပုန်များနှင့် ပတ်သက်၍ မေးမြန်းရာတွင် အစ္စရေးစစ်ဘက် ပြောရေးဆိုခွင့်ရှိသူ ဗိုလ်မှူးချုပ် အက်ဖီ ဒက်ဖရင် (Effie Defrin) က မိမိတို့အနေဖြင့် စစ်မျက်နှာ အများအပြားဖွင့်ပြီး တိုက်ရန် ပြင်ဆင်ထားကြောင်း ပြောကြားခဲ့သည်။

မကြာသေးမီက ဂါဇာတွင် ဖြစ်ပွားခဲ့သော အစ္စရေး-ဟားမာ့စ်  စစ်ပွဲအတွင်းကလည်း ဟူရ်သီအဖွဲ့သည် ပါလက်စတိုင်းများဘက်မှ ရပ်တည်ကြောင်း ပြသရန်အတွက် ပင်လယ်နီနှင့် အေဒင်ပင်လယ်ကွေ့အတွင်းရှိ သင်္ဘောများကို တိုက်ခိုက်ခဲ့သည်။

ထိုတိုက်ခိုက်မှုများကြောင့် သင်္ဘောကုမ္ပဏီများသည် ကုန်ကျစရိတ် များပြားလှသော လမ်းကြောင်းသစ်များကို ရွေးချယ်ကာ ပင်လယ်နီကို ရှောင်ကွင်းမောင်းနှင်ခဲ့ကြရသည်။

ဟူရ်သီသူပုန်ကိုတွေ့ရစဉ်

လက်ရှိတွင်လည်း အမေရိကန်နှင့် အစ္စရေးတို့ အနေဖြင့် အီရန်ကို တိုက်ခိုက်ရန်အတွက် ပင်လယ်နီကို အသုံးပြုခွင့် ရရှိလိမ့်မည် မဟုတ်ကြောင်း၊ မိမိတို့၏ လက်ချောင်းများသည် သေနတ် မောင်းခလုပ်များပေါ်တွင် တင်ထား ကြောင်း ဟူရ်သီအဖွဲ့၏ ပြောရေးဆိုခွင့်ရှိသူ ဗိုလ်မှူးချုပ် ယာယာ ဆာရီ (Yahya Saree) က မတ်လ ၂၇ ရက်တွင် ပြောကြားခဲ့သည်။

အီရန်စစ်ပွဲ စတင်ဖြစ်ပွားခဲ့ချိန်ကတည်းက ဆော်ဒီနိုင်ငံသည် ၎င်း၏ ရေနံတင်ပို့မှု အများစုကို ဟော်မုဇ် ရေလက် ကြားမှတဆင့် မပို့ဆောင်တော့ဘဲ ပင်လယ်နီလမ်းကြောင်းသို့ ပြောင်းလဲပို့ဆောင်ခဲ့သည်။

အဘယ်ကြောင့်ဆိုသော် အီရန်နိုင်ငံက ဟော်မုဇ်ရေလက်ကြားတွင် ၎င်းတို့ကို ရန်လိုနေသည့် အင်အားကြီး နိုင်ငံများ၏ သင်္ဘောများ ဖြတ်သန်းသွားလာခွင့်ကို ပိတ်ပင်ထားကြောင်း ကြေညာထားသဖြင့် ဆော်ဒီက ပင်လယ်နီမှတဆင့် လမ်းကြောင်းပြောင်းပြီး ပို့ဆောင်ခဲ့ခြင်းဖြစ်သည်။

Source: အေပီ

CNI International News

ဘန်ကောက်၊ မတ်လ ၃၀

ထိုင်းဝန်ကြီးချုပ် အနူတင် ချန်ဗီရာကူလ် (Anutin Charnvirakul) သည် မတ်လ ၂၉ ရက်က နာခွန်းဖနွန် (Nakhon Phanom) ခရိုင်၊ သတ်ဖနွန် (That Phanom) မြို့နယ်ရှိ စက်သုံးဆီဆိုင် တစ်ဆိုင်သို့ ကြိုတင် အကြောင်းကြားခြင်းမရှိဘဲ ကိုယ်တိုင်ကားဆီထည့်၍ သွားရောက်စစ်ဆေးခဲ့ကြောင်း The Nation မှ ဖော်ပြခဲ့ သည်။

ထိုခရီးစဉ်အတွင်း ဝန်ကြီးချုပ် အနူတင်သည် ကားတစ်စီးကို ငှားရမ်းမောင်းနှင်ခဲ့ပြီး ဒေသခံ အရာရှိများကို ကြိုတင်အသိပေးခြင်းမရှိဘဲ ဆီဆိုင်သို့ ရောက်ရှိသွားခဲ့ခြင်း ဖြစ်သည်။

ထို့နောက် သူသည် ဆီဆိုင်ပိုင်ရှင်နှင့် ခရိုင်တာဝန်ရှိသူများနှင့် စကားပြောဆိုခဲ့ပြီး စွမ်းအင်ကို ဆက်လက်ပြီး ဂရုတစိုက် ချွေတာသုံးစွဲကြရန်၊ ပြည်သူလူထုနှင့် ထိတွေ့ပြောဆိုမှုများကို ဆက်လက် ပြုလုပ်သင့်ကြောင်း တိုက်တွန်းခဲ့သည်။

တာဝန်ရှိသူများ၏ ပြောကြားချက်အရ နာခွန်းဖနွန်ခရိုင်တွင် လက်ရှိ၌ စက်သုံးဆီဆိုင် စုစုပေါင်း ၃၃၃ ဆိုင် ရှိပြီး ၎င်းတို့အနက် ၇၂ ဆိုင်မှာ လုပ်ငန်းကြီးမားသည့် ဆီဆိုင်ကြီးများဖြစ်ကာ သတ်ဖနွန်မြို့နယ် တစ်ခုတည်းတွင်ပင် ဆီဆိုင်ကြီး ၁၀ ဆိုင်ရှိကြောင်း သိရသည်။

ထိုင်းဝန်ကြီးချုပ် အနူတင် စက်သုံးဆီဆိုင်ကို စစ်ဆေးနေစဉ်

ဒီဇယ်ဆီ ထောက်ပံ့မှုမှာ ပုံမှန်အခြေအနေသို့ ပြန်လည် ရောက်ရှိနေပြီဖြစ်ပြီး ခရိုင်အတွင်းရှိ မြို့နယ်အားလုံးတွင် ပုံမှန်အခြေအနေဖြစ်သည့် အစိမ်းရောင်အဆင့် (Green Level) သို့ ရောက်ရှိသွားပြီဖြစ်ကြောင်း တာဝန်ရှိသူများက ပြောကြားခဲ့သည်။

အခြားသော စက်သုံးဆီ အမျိုးအစားများကိုလည်း ပုံမှန်အတိုင်း ဖြန့်ဖြူးပေးနေပြီး ယခင်က တွေ့ရှိခဲ့ရသည့် ဆီ တန်းစီ စောင့်ဆိုင်းရမှုများမှာလည်း လျော့ပါးသွားပြီဖြစ်သည်။

ပြည်နယ်အာဏာပိုင်များ အနေဖြင့် ပြည်သူလူထုထု၏ အသံကို နားထောင်ရန်နှင့် လာမည့် ဆောင်ခရမ် ရေကစား ပွဲတော် ကာလအတွင်း ခရီးသွားလာသူများအတွက် စက်သုံးဆီ လုံလောက်မှုရှိစေရန် စက်သုံးဆီ အခြေအနေကို အနီးကပ် စောင့်ကြည့်စစ်ဆေးရန်လည်း အနူတင်က မှာကြားခဲ့သည်။

Source: The Nation

CNI International News

ဝါရှင်တန်၊ မတ်လ ၃၀

အမေရိကန်နှင့် အစ္စရေးတို့ ပူးပေါင်းပြီး အီရန်ကို တိုက်ခိုက်ခဲ့သည့် စစ်ပွဲ တစ်လပြည့်ချိန်တွင် အမေရိကန်နိုင်ငံ တစ်ဝန်းရှိ မြို့ကြီးများတွင် သမ္မတ ဒေါ်နယ်ထရမ့် (Donald Trump) ၏ အုပ်ချုပ်မှုကို ဆန့်ကျင်သည့် “No Kings” (ဘုရင် မရှိစေရ) ဆန္ဒပြပွဲများသည် တစ်ကျော့ပြန် ဖြစ်ပွားလာခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ထိုကဲ့သို့ လမ်းလျှောက် ချီတက် ဆန္ဒပြပွဲများသည် သမ္မတထရမ့် ဒုတိယသက်တမ်း စတင်ပြီးနောက်ပိုင်း တစ်နိုင်ငံ လုံး အတိုင်းအတာဖြင့် တတိယမြောက် ပြုလုပ်သည့် ဆန္ဒပြပွဲများဖြစ်ပြီး ယခုတစ်ကြိမ်တွင် အီရန်စစ်ပွဲကို ဆန့်ကျင်သည့် အသံများ ပိုမိုကျယ်လောင်လာခဲ့သည်။

အာဏာရှင်နှင့် သက်ဦးဆံပိုင် ဘုရင်စနစ်တို့ကို ဆန့်ကျင်ရန် ရည်ရွယ်လှုပ်ရှားခဲ့သည့် “No Kings” ဝက်ဘ်ဆိုက်၏ ဖော်ပြချက်အရ အမေရိကန်ပြည်ထောင်စုရှိ ပြည်နယ် ၅၀ လုံးတွင် ဆန္ဒပြပွဲ စုစုပေါင်း ၃၃၀၀ ကျော်ကို ကျင်းပရန် စီစဉ်ထားသည်။

ထိုဆန္ဒပြပွဲများအနက် နယူးယောက် (New York) ၊ လော့စ်အိန်ဂျလိစ် (Los Angeles) နှင့် ဝါရှင်တန်ဒီစီ (Washington, DC) ကဲ့သို့သော မြို့ကြီးများတွင် လူအင်အား အမြောက်အမြား တက်ရောက်ကြမည်ဟု မျှော်လင့်ရ သည်။

No Kings ဆန္ဒပြနေစဉ်

ထို့ပြင် ရောမ (Rome) ၊ ပဲရစ် (Paris) နှင့် ဘာလင် (Berlin) ကဲ့သို့သော ဥရောပမှ မြို့ကြီးများတွင်လည်း တစ်ပြိုင် နက်တည်း ဆန္ဒပြပွဲများ ပြုလုပ်လျက်ရှိသည်။

ပွဲစီစဉ်သူများသည် ကွန်ဆာဗေးတစ် ဝါဒီများ အားကောင်းသည့် အမေရိကန် မြို့ကြီးများ၏ ပြင်ပဒေသများတွင် နေထိုင်သူများကို စည်းရုံးရန် ရည်ရွယ်ထားကြသည်။

ဆန္ဒပြပွဲများတွင် ပါဝင်ဆင်နွှဲသူ စုစုပေါင်း၏ သုံးပုံနှစ်ပုံခန့်မှာ မြို့လယ်ခေါင် နေရာများတွင် မဟုတ်သော ပြင်ပဒေသများရှိ ဆန္ဒပြပွဲများတွင် ပါဝင်ကြလိမ့်မည်ဟု ပွဲစီစဉ်သူများက ဆိုသည်။

“ဒီစနေနေ့ လူထုလှုပ်ရှားမှုရဲ့ ထူးခြားတဲ့အချက်က လူဘယ်လောက်များများ ဆန္ဒပြနေကြတာလဲ ဆိုတာတင် မဟုတ်ဘဲ ဘယ်နေရာတွေမှာ ဆန္ဒပြနေကြတာလဲ ဆိုတာပါပဲ” ဟု ပြီးခဲ့သည့်နှစ်က No Kings လှုပ်ရှားမှုကို စတင်ခဲ့သည့် Indivisible အမည်ရှိ အကျိုးအမြတ် မယူသည့်အဖွဲ့၏ ပူးတွဲတည်ထောင်သူ လီယာ ဂရင်းဘာ့ချ် (Leah Greenberg) က ပြောကြားခဲ့သည်။

No Kings ဆန္ဒပြနေစဉ်

သို့သော် အဓိက ဆန္ဒပြပွဲကို မင်နီဆိုးတား (Minnesota) ပြည်နယ်ရှိ Twin Cities ဟု လူသိများသော မင်နီယာပိုလစ် - စိန့်ပေါလ် (Minneapolis-St Paul) ဒေသတွင် ကျင်းပရန် စီစဉ်ထားသည်။

အမေရိကန် အလယ်ပိုင်းတွင်ရှိသည့် မင်နီဆိုးတားပြည်နယ်သည် ပြီးခဲ့သည့် ဒီဇင်ဘာလအတွင်း သမ္မတ ထရမ့်၏ ရွှေ့ပြောင်းများနှိမ်နင်းသည့် Operation Metro Surge စစ်ဆင်ရေး၏ အချက်အခြာကျသည့် နေရာတစ်ခု ဖြစ်လာခဲ့သည်။

အဆိုပါ စစ်ဆင်ရေးအတွင်း ဖက်ဒရယ်လူဝင်မှုကြီးကြပ်ရေး (ICE) အေးဂျင့်ပေါင်း ၃၀၀၀ ကျော်သည် Twin Cities ဒေသသို့ ဝင်ရောက်စီးနင်းခဲ့ကြပြီး လူပေါင်းများစွာကို အင်အားအလွန်အကျွံ အသုံးပြုပြီး ဖမ်းဆီးခဲ့ကြောင်းဟု စွပ်စွဲခံခဲ့ရသည်။

Source: အယ်လ်ဂျာဇီးယား

CNI International News

ဝါရှင်တန်၊ မတ်လ ၃၀

ယီမင်နိုင်ငံရှိ အီရန်ကျောထောက်နောက်ခံပြု ဟူရ်သီသူပုန်များသည် မတ်လ ၂၈ ရက်က အစ္စရေးကို ပထမဆုံး အကြိမ် တိုက်ခိုက်မှုများ ပြုလုပ်ခဲ့ပြီး အရှေ့အလယ်ပိုင်းစစ်ပွဲအတွင်း ပါဝင်လာခဲ့သည်ဟု ရိုက်တာမှ ဖော်ပြခဲ့ သည်။

အမေရိကန် မရိန်းတပ်ဖွဲ့များကလည်း အရှေ့အလယ်ပိုင်းဒေသသို့ ရောက်ရှိလာသောကြောင့် စစ်ဘောင်ကျယ် လာမည့် အန္တရာယ်မှာ ပိုမိုမြင့်တက်လာခဲ့သည်။ 

အမေရိကန်သည် တစ်လခန့် ကြာမြင့်နေပြီဖြစ်သော ထိုစစ်ပွဲအတွင်းသို့ မရိန်းတပ်ဖွဲ့ဝင် ထောင်ပေါင်းများစွာကို စေလွှတ်ထားကာ တပ်ဖွဲ့ခွဲ နှစ်ခုအနက် ပထမတပ်ဖွဲ့သည် ကမ်းတက်တိုက်ခိုက်ရေးသင်္ဘောဖြင့် မတ်လ ၂၇ ရက် တွင် ရောက်ရှိလာခဲ့ကြောင်း အမေရိကန်စစ်တပ်က မတ်လ ၂၈ ရက်၌ ထုတ်ပြန်ခဲ့သည်။

အမေရိကန်၏ ပင်တဂွန်စစ်ဌာနချုပ် အနေဖြင့် အီရန်နိုင်ငံအတွင်း သီတင်းပတ်များစွာ ကြာမြင့်မည့် မြေပြင် စစ်ဆင်ရေးများအတွက် ပြင်ဆင်နေကြောင်း၊ ထိုစစ်ဆင်ရေးတွင် အထူးတပ်ဖွဲ့များနှင့် ပုံမှန်ခြေလျင်တပ်ရင်းများ ပါဝင်သည့် စီးနင်းတိုက်ခိုက်မှုများ ဖြစ်ပေါ်လာနိုင်ခြေရှိကြောင်း အမေရိကန်အရာရှိများကို ကိုးကား၍ ဝါရှင်တန်ပို့စ် သတင်းစာက မတ်လ ၂၈ ရက်တွင် ဖော်ပြခဲ့သည်။

အမေရိကန်မရိန်းတပ်ဖွဲ့ကို တွေ့ရစဉ်

သို့သော် သမ္မတ ဒေါ်နယ်ထရမ့် (Donald Trump) အနေဖြင့် မြေပြင်တပ်ဖွဲ့များ စေလွှတ်မည့် စီမံချက်များကို အတည်ပြုခြင်း ရှိ၊မရှိ မသေချာသေးကြောင်း ဝါရှင်တန်ပို့စ်က ဆက်လက် ဖော်ပြထားသည်။

ရိုက်တာသတင်းဌာနကလည်း ပင်တဂွန်စစ်ဌာနချုပ်သည် အီရန်နိုင်ငံအတွင်း မြေပြင်တပ်ဖွဲ့များ စေလွှတ်ခြင်း အပါအဝင် စစ်ဆင်ရေးများ ပြုလုပ်ရန် စဉ်းစားသုံးသပ်နေကြောင်း ဖော်ပြခဲ့သည်။

ပြီးခဲ့သည့် ဖေဖော်ဝါရီလ ၂၈ ရက်နေ့က စတင်ခဲ့သည့် အမေရိကန်၊ အစ္စရေးနှင့် အီရန်ကြား ဖြစ်ပွားနေသည့် စစ်ပွဲသည် အရှေ့အလယ်ပိုင်း ဒေသတစ်ခုလုံးသို့ ကူးစက်ပြန့်နှံ့သွားခဲ့ပြီး လူပေါင်းထောင်ချီ သေဆုံးခဲ့ရသည်။

ထို့ပြင် ကမ္ဘာ့စွမ်းအင် ထောက်ပံ့မှု ကွင်းဆက်ကို ပြတ်တောက်သွားစေခဲ့ပြီး ကမ္ဘာ့စီးပွားရေးကိုပါ ပြင်းထန်စွာ ရိုက်ခတ်နေသည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

အမေရိကန် နိုင်ငံခြားရေးဝန်ကြီး မာကို ရူဘီယို (Marco Rubio) ကမူ အမေရိကန်အနေဖြင့် မြေပြင်တပ်ဖွဲ့များ အသုံးမပြုဘဲ မိမိတို့၏ ရည်မှန်းချက်များကို အောင်မြင်အောင် ဆောင်ရွက်နိုင်သော်လည်း၊ သမ္မတ ထရမ့် အနေဖြင့် စစ်ဗျူဟာကို လိုအပ်သလို အခြေအနေအရ ပြောင်းလဲနိုင်ရန် အချို့သော တပ်ဖွဲ့များကို ဒေသတွင်းသို့ စေလွှတ်ထားခြင်းဖြစ်ကြောင်း မတ်လ ၂၇ ရက်တွင် ပြောကြားခဲ့သည်။

ထို့ပြင် ပင်တဂွန်စစ်ဌာနချုပ်သည် အမေရိကန် ကြည်းတပ်၏ အမှတ် ၈၂ လေကြောင်းချီ တပ်မမှ ထောင်နှင့်ချီ သည့် စစ်သားများကိုလည်း စေလွှတ်ဖွယ်ရှိနေသည်။

အမေရိကန်နှင့် အီရန်ကြား ကြားဝင်စေ့စပ်ပေးမည့် ပါကစ္စတန်သည် ဒေသတွင်း တင်းမာမှုများကို လျှော့ချနိုင်မည့် နည်းလမ်းများ ရှာဖွေရန်အတွက် ဆော်ဒီ၊ တူရကီနှင့် အီဂျစ်နိုင်ငံတို့မှ နိုင်ငံခြားရေးဝန်ကြီးများနှင့် ဆွေးနွေးမှုများ ပြုလုပ်လျက်ရှိသည်။

Source: ရိုက်တာ

CNI International News

ဘန်ကောက်၊ မတ်လ ၂၈

ထိုင်းဝန်ကြီးချုပ်နှင့် ပြည်ထဲရေးဝန်ကြီး အနူတင် ချန်ဗီရာကူလ် (Anutin Charnvirakul) သည် နိုင်ငံအတွင်း ဖြစ်ပေါ်နေသော လောင်စာဆီပြတ်လပ်မှု အကျပ်အတည်းကို ဖြေရှင်းရန်အတွက် ဘန်ကောက်မြို့တော် အပါအဝင် ပြည်နယ် ၇၆ ခုလုံးမှ ပြည်နယ်အုပ်ချုပ်ရေးမှူးများနှင့် အရေးပေါ် ထိပ်သီးအစည်းအဝေးကို မတ် ၂၇ ရက်တွင် ပြုလုပ်ခဲ့ကြောင်း The Nation မှ ဖော်ပြခဲ့သည်။

အစိုးရအိမ်တော်တွင် ကျင်းပသော ထိုအစည်းအဝေး၌ ပြည်ထဲရေးဝန်ကြီးဌာနမှ အဆင့်မြင့် အရာရှိကြီးများ တက်ရောက်ခဲ့ကြပြီး အဓိကအားဖြင့် လာမည့် ဧပြီလတွင် ပြုလုပ်မည့် ဆောင်ခရမ် ရေကစားပွဲတော် ကာလ အတွင်း ခရီးသွားလာမှု အလွန်များပြားလာမည့် အခြေအနေကို ကြိုတင်ပြင်ဆင်ရန်နှင့် ပြည်သူများအကြား လောင်စာဆီများကို အထိတ်တလန့် ဝယ်ယူမှုများ မဖြစ်စေရန် ဆွေးနွေးခဲ့ကြသည်။

ထိုင်းနိုင်ငံရှိ ရေနံချက်စက်ရုံများသည် တစ်ရက်လျှင် လောင်စာဆီ လီတာ ၇၇ သန်းခန့် ထုတ်လုပ်ပေးနိုင်ပြီး နိုင်ငံ၏ လောင်စာဆီ ပုံမှန်လိုအပ်ချက်မှာ လီတာ ၆၇ သန်းသာ ရှိသဖြင့် ပုံမှန်အခြေအနေ ဆိုပါက ထုတ်လုပ် မှုသည် သုံးစွဲမှုနှုန်းထက် ပိုလျှံနေသည်ဟု အနူတင်က ပြောကြားခဲ့သည်။

စက်သုံးဆီနဲ့ ဈေးနှုန်းမြင့်တက်မှုကို သရုပ်ပြထားစဉ်

သို့သော် အရှေ့အလယ်ပိုင်း စစ်ပွဲကြောင့် ဖြစ်ပေါ်လာသော စိုးရိမ်ပူပန်မှုများကြောင့် လက်ရှိ နေ့စဉ် လောင်စာဆီ ဝယ်ယူမှုနှုန်းသည် လီတာ ၈၇ သန်း အထိ စံချိန်တင် မြင့်တက်သွားခဲ့သည်ဟု ဆိုသည်။

လောင်စာဆီ လုံးဝ ပြတ်လပ်သွားခြင်းမှ ကာကွယ်ရန်အတွက် အစိုးရအနေဖြင့် ဆီဈေးနှုန်း အထောက်အပံ့ ပေးမှုများကို ရပ်ဆိုင်းရန်နှင့် ဈေးနှုန်းများကို ကမ္ဘာ့ဈေးကွက်၏ ပြောင်းလဲမှုနှင့်လိုက်ပြီး အတက်အကျ ပြုလုပ်ရန် ဆုံးဖြတ်ခဲ့ရကြောင်း အနူတင်က အတည်ပြုခဲ့သည်။

ယခုကဲ့သို့ အကျပ်အတည်း ကာလတွင် အခွင့်ကောင်းယူ အမြတ်ထုတ်လိုသူများကို အနူတင်က ပြင်းထန်စွာ သတိပေးလိုက်ပြီး ပြည်နယ်အုပ်ချုပ်ရေးမှူးများ အနေဖြင့် စစ်ပွဲကာလ စီးပွားရေး စီမံခန့်ခွဲမှု ယန္တရားတစ်ခု ဖွဲ့စည်းတည်ထောင်ရန် ညွှန်ကြားခဲ့သည်။

စက်သုံးဆီနဲ့ ဈေးနှုန်းမြင့်တက်မှုကို သရုပ်ပြထားစဉ်

ထိုယန္တရားသည် ဒေသတွင်းရှိ စက်သုံးဆီ လက်ကျန် အခြေအနေများကို အနီးကပ် စောင့်ကြည့်ရန်နှင့် စက်သုံးဆီ သိုလှောင်ထားခြင်း သို့မဟုတ် အခြေခံ လူသုံးကုန်ပစ္စည်းများကို ဈေးတင်ရောင်းချခြင်းများ ပြုလုပ်သည့် မည်သည့် စီးပွားရေး လုပ်ငန်းကိုမဆို ချက်ချင်း ထိရောက်စွာ အရေးယူမည်ဖြစ်သည်။

ထို့ပြင် သယ်ယူပို့ဆောင်ရေး လုပ်ငန်းရှင်များ၊ တောင်သူလယ်သမားများနှင့် ဝင်ငွေနည်းပါးသော အိမ်ထောင်စု များအတွက် ရည်ရွယ်သည့် ကူညီထောက်ပံ့ရေး အစီအစဉ်များကို အမြန်ဆုံး အကောင်အထည်ဖော်ရန် အနူတင်က ပြည်ထဲရေးဝန်ကြီးဌာနကို ညွှန်ကြားခဲ့သည်။

တစ်နိုင်ငံလုံး အတိုင်းအတာဖြင့် ရိုးရာနှစ်သစ်ကူး အားလပ်ရက်များအတွက် ပြင်ဆင်နေကြချိန်တွင်လည်း ယာဉ်စည်းကမ်း ဖောက်ဖျက်မှုများကို လုံးဝသည်းမခံဘဲ ထိရောက်စွာ အရေးယူမည့် မူဝါဒကို ကျင့်သုံးရန်လည်း အနူတင်က အမိန့်ထုတ်ပြန်ခဲ့သည်။

Source: The Nation

CNI International News

၂၀၂၆ ခုနှစ်၊ မတ်လ ၂၈

ဖိလစ်ပိုင်နိုင်ငံတွင် ကျင်းပမည့် ၄၈ ကြိမ်မြောက် အာဆီယံထိပ်သီး အစည်းအဝေး၌ အီရန်စစ်ပွဲအကြောင်း အဓိကထား ဆွေးနွေးသွားမည်ဟု ဖိလစ်ပိုင်သမ္မတ ဖာဒီနန် မားကို့စ် ဂျူနီယာ (Ferdinand Marcos Jr.) က ပြောကြားခဲ့ကြောင်း Bernama သတင်းဝက်ဘ်ဆိုက်မှ ဖော်ပြခဲ့သည်။

အာဆီယံထိပ်သီး အစည်းအဝေးများနှင့် ဆက်စပ် အစည်းအဝေးများကို လာမည့် မေလ ၈ ရက်မှ ၉ ရက်အထိ စီဘူး (Cebu) မြို့၌ ကျင်းပသွားမည်ဖြစ်ကြောင်း အတည်ပြုသည့် အခမ်းအနား တစ်ခုတွင် မားကို့စ်က အီရန်စစ်ပွဲ အကြောင်း ထည့်သွင်း ပြောကြားခဲ့ခြင်းဖြစ်သည်။

သမ္မတမားကို့စ်သည် မတ်လ ၂၇ ရက်က ကာဗိုက် (Cavite) ပြည်နယ် ဆီလန်း (Silang) မြို့၌ ပြုလုပ်သော အခမ်းအနားတစ်ခုတွင် ထိုကဲ့သို့ ပြောကြားခဲ့ခြင်းဖြစ်ကြောင်း ဖိလစ်ပိုင်သတင်းအေဂျင်စီ (PNA) နှင့် ဆင်ဟွာ သတင်းတို့ကလည်း ဖော်ပြခဲ့ကြသည်။

အာဆီယံအလှည့်ကျဥက္ကဋ္ဌ ဖိလစ်ပိုင်သမ္မတ မားကို့စ်ကို တွေ့ရစဉ်

အရှေ့အလယ်ပိုင်း ပဋိပက္ခကြောင့် ရေနံအကျပ်အတည်း ဖြစ်ပွားနေသည့် အခြေအနေများနှင့် ရင်ဆိုင်နေရ ချိန်တွင် အာဆီယံအဖွဲ့ဝင်နိုင်ငံများက အစည်းအဝေးကို စီစဉ်ထားသည့်အတိုင်း ဆက်လက် ကျင်းပရန် သဘောတူညီခဲ့ကြကြောင်း မားကို့စ်က ဆိုသည်။

၂၀၂၆ ခုနှစ်အတွက် အာဆီယံအလှည့်ကျဥက္ကဋ္ဌ တာဝန်ယူထားသော ဖိလစ်ပိုင်နိုင်ငံ အနေဖြင့် ထိုအစည်းအဝေး တွင် အဓိကအားဖြင့် စက်သုံးဆီနှင့် ရေနံထွက်ပစ္စည်းများ ထောက်ပံ့မှု၊ စားနပ်ရိက္ခာ ဖူလုံရေးနှင့် ကုန်ဈေးနှုန်းများ၊ ရွှေ့ပြောင်းလုပ်သားများအရေး စသည့် အချက်များကို အလေးပေး ဆွေးနွေးသွားမည် ဖြစ်သည်။

သို့သော် လက်ရှိ ကမ္ဘာ့အခြေအနေများကြောင့် အာဆီယံ ထိပ်သီး အစည်းအဝေးကို ပုံမှန်ထက် လျှော့ချပြီး အဓိက အချက်များသာ ပါဝင်သည့် အစည်းအဝေးအဖြစ် ချုံ့ပြီး ပြုလုပ်သွားမည်ဟု မားကို့စ်က ပြောကြားခဲ့သည်။

Source: Bernama

CNI International News

ဝါရှင်တန်၊ မတ်လ ၂၈

အမေရိကန်သမ္မတ ဒေါ်နယ်ထရမ့် (Donald Trump) က အီရန်၏ လျှပ်စစ်ဓာတ်အားပေးစက်ရုံများ တိုက်ခိုက် မည့် အစီအစဉ်ကို နောက်ထပ် ၁၀ ရက် ထပ်မံ ရွှေ့ဆိုင်းပေးကြောင်း ပြောကြားခဲ့သည်ဟု ရိုက်တာမှ ဖော်ပြခဲ့ သည်။

စစ်ပွဲကို အဆုံးသတ်ရန် အမေရိကန်က အဆိုပြုထားသည့် အချက် ၁၅ ချက်ပါ စီမံကိန်းအား အီရန်ဘက်က ပယ်ချခဲ့ပြီးနောက် ထရမ့်၏ ပြောကြားချက် ထွက်ပေါ်လာခြင်းဖြစ်သည်။

အရှေ့အလယ်ပိုင်းဒေသ တစ်ခုလုံးသို့ ကူးစက်ပြန့်နှံ့သွားခဲ့သည့် အီရန် စစ်ပွဲကြောင့် လူပေါင်းသောင်းချီ သေဆုံးခဲ့ ရပြီး စွမ်းအင်နှင့် ဓာတ်မြေဩဇာ ဈေးနှုန်းများ မြင့်တက်ခဲ့ကာ ကမ္ဘာ့စီးပွားရေးမှာလည်း ငွေကြေးဖောင်းပွမှုဒဏ် ကို အကြီးအကျယ် ခံစားနေရသည်။

မတ်လ ၂၆ ရက်က အိမ်ဖြူတော်တွင် ပြုလုပ်သော အစိုးရအဖွဲ့ အစည်းအဝေး၌ သမ္မတထရမ့်က အီရန်အနေဖြင့် သဘောတူညီချက်တစ်ခု မရယူနိုင်ပါက ဖိအားများ ပိုမိုတိုးမြှင့်သွားမည်ဟု ခြိမ်းခြောက် ပြောဆိုခဲ့သည်။

အီရန်အလံကို တွေ့ရစဉ်

ထို့နောက် အီရန်၏ စွမ်းအင်စက်ရုံများကို တိုက်ခိုက်မည့် အစီအစဉ်အား  ဧပြီလ ၆ ရက်အထိ ၁၀ ရက်တာ ဆိုင်းငံ့ ထားမည်ဖြစ်ကြောင်း ထရမ့်က ၎င်း၏ Truth Social လူမှုကွန်ရက်စာမျက်နှာတွင် ရေးသားခဲ့သည်။

“မီဒီယာအတုတွေနဲ့ တခြားသူတွေက သတင်းအမှားတွေ လွှင့်နေကြပေမဲ့ ဆွေးနွေးမှုတွေကတော့ ဆက်ရှိနေ သလို အရမ်းလည်း အဆင်ပြေ ချောမွေ့နေပါတယ်”ဟု ထရမ့်က ရေးသားခဲ့သည်။

အီရန်အစိုးရဘက်ကမူ အမေရိကန်နှင့် မည်သည့် ဆွေးနွေးမှုမျှ ပြုလုပ်နေခြင်း မရှိကြောင်း ငြင်းဆိုထားသည်။

တစ်ဖက်တွင်လည်း သမ္မတထရမ့်က အမေရိကန်သည် အီရန်ရှိ မည်သည့်အဖွဲ့အစည်း၊ မည်သည့်ပုဂ္ဂိုလ်များနှင့် ညှိနှိုင်းနေသည်ဆိုသည်ကို အတိအကျ ထုတ်ဖော်ပြောကြားခြင်း မရှိသေးပေ။

အထူးသဖြင့် လက်ရှိ စစ်ပွဲအတွင်း အီရန်၏ ထိပ်တန်း အဆင့်မြင့် အရာရှိကြီး အများအပြား လုပ်ကြံသတ်ဖြတ် ခံထားရသဖြင့် အီရန်အစိုးရအတွင်း မည်သူက အာဏာကို အမှန်တကယ် ထိန်းချုပ်ထားသနည်းဆိုသည်မှာ မေးခွန်းထုတ်စရာ ဖြစ်နေသည်။

Source: ရိုက်တာ