CNI International News

မော်စကို၊ အောက်တိုဘာ ၁၆

BRICS အဖွဲ့ဝင်နိုင်ငံများသည် အခြားနိုင်ငံများ သို့မဟုတ် အခြားနိုင်ငံများ၏ ငွေကြေးများကို ပစ်မှတ်ထားခြင်း မရှိကြောင်း ကရင်မလင် ပြောရေးဆိုခွင့်ရှိသူ ဒီမီထရီ ပက်စ်ကော့ဗ် (Dmitry Peskov) က ပြောကြားခဲ့သည်ဟု တာ့စ်သတင်းဌာနမှ ဖော်ပြခဲ့သည်။

BRICS အဖွဲ့သည် အမေရိကန်၏ ဒေါ်လာငွေကြေးကို လျော့ပါးစေရန် လုပ်ဆောင်နေသည်ဆိုသည့် အမေရိကန် သမ္မတ ဒေါ်နယ်ထရမ့် (Donald Trump) ၏ မှတ်ချက်စကားကို ပက်စ်ကော့ဗ်က ငြင်းဆိုသည့် အနေဖြင့် ထိုကဲ့သို့ ပြောကြားခဲ့ခြင်းဖြစ်သည်။

“ဒီအဖွဲက တတိယနိုင်ငံတွေ ဒါမှမဟုတ် တတိယနိုင်ငံတွေရဲ့ ငွေကြေးတွေကို ပစ်မှတ်ထားဖို့ အစီအစဉ်တွေ ဘယ်တုန်းကမှ မရှိခဲ့ပါဘူး။ ဒီအဖွဲ့ဟာ အဖွဲ့ဝင်နိုင်ငံတွေရဲ့ ပြည်သူတွေရဲ့ အကျိုးနဲ့ သာယာဝပြောရေး၊ တည်ငြိမ် ရေးတွေအတွက် အပြန်အလှန် ပူးပေါင်းဆောင်ရွက်တဲ့ ဘုံသဘောထားနဲ့အတူ ဖွဲ့စည်းထားတာ ဖြစ်ပါတယ်” ဟု ပက်စ်ကော့ဗ်က ပြောကြားခဲ့သည်။

BRICS အစည်းအဝေး ကျင်းပနေစဉ်

ထိုသဘောထားကို အဖွဲ့ဝင်နိုင်ငံများ၏ ခေါင်းဆောင်များနှင့် အရာရှိများ ပါဝင်သည့် BRICS အစည်းအဝေးများ တွင် ဆုံးဖြတ်ခဲ့ခြင်းဖြစ်ပြီး ထိုသဘောထားကို နားလည်ရန် အလွန်အရေးကြီးကြောင်း ၎င်းက ဆိုသည်။

အစောပိုင်းတွင် ထရမ့်ကမူ BRICS အဖွဲ့သည် ဒေါ်လာကို တိုက်ခိုက်နေကြောင်းနှင့် BRICS အဖွဲ့ဝင်နိုင်ငံများအား ကုန်သွယ်ခွန်များ တိုးမြှင့်မည်ဖြစ်ကြောင်း ခြိမ်းခြောက်ခဲ့သည်။

BRICS အဖွဲ့တွင် ဘရာဇီးလ်၊ ရုရှား၊ အိန္ဒိယ၊ တရုတ်၊ တောင်အာဖရိက၊ အီဂျစ်၊ အီသီယိုပီးယား၊ အင်ဒိုနီးရှား၊ အီရန် နှင့် ယူအေအီးနိုင်ငံတို့ ပါဝင်သည်။

Source: တာ့စ်