CNI International News

ဘန်ကောက်၊ နိုဝင်ဘာ ၂၉

ထိုင်းနိုင်ငံ၊ ဘန်ကောက်မြို့တော်ရှိ ကလောင်ပရန် ဗဟိုအကျဉ်းထောင် (Klongprem Central Prison) တွင် အကျဉ်းချခံထားရသည့် ဝန်ကြီးချုပ်ဟောင်း သက်ဆင် ရှင်နာဝပ် (Thaksin Shinawatra) ထံသို့ ၎င်း၏ သားသမီး ၃ ဦးနှင့် ၎င်းတို့၏ မိသားစုများ လာရောက် တွေ့ဆုံခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ထို့နောက် သက်ဆင်၏ အငယ်ဆုံးသမီးဖြစ်သည့် ဝန်ကြီးချုပ်ဟောင်း ပေတုန်တန် (Paetongtarn) က အကျဉ်း ထောင်ထဲတွင် ရိုက်ကူးခဲ့သည့် မိသားစုဓာတ်ပုံကို လူမှုမီဒီယာ၌ တင်ခဲ့ပြီး အကျဉ်းထောင် အာဏာပိုင်များကို လည်း ကျေးဇူးတင်ကြောင်း ရေးသားခဲ့သည်။

ယခုတွေ့ဆုံမှုသည် စက်တင်ဘာ ၉ ရက်က သက်ဆင် အကျဉ်းချခံခဲ့ရပြီးနောက်ပိုင်း ၎င်း၏ မိသားစုများကို အကြိမ် ၂၀ မြောက် တွေ့ဆုံခွင့် ပေးခြင်းလည်းဖြစ်သည်။

အကျဉ်းထောင် အာဏာပိုင်များက နိုင်ငံတစ်ဝန်းတွင် နှစ်သစ်ကူး အခါသမယအတွင်း အကျဉ်းသားများနှင့် ၎င်းတို့၏ မိသားစုဝင်များကို အနီးကပ် တွေ့ဆုံခွင့်ပေးထားပြီး မိသားစုဝင်များ အတူတကွ နေထိုင်ခွင့်၊ အတူ စားသောက်ခွင့်၊ အနီးကပ် တွေ့ဆုံခွင့်နှင့် ဖုန်းဆက်ခွင့်များ ပေးထားသည်။

ပေတုန်တန်နှင့်အတူ ၎င်း၏ ခင်ပွန်းဖြစ်သူ ပီဒေ့ါ ဆွတ်ဆာဝက်စ် (Pidok Sooksawas) ၊ အစ်မဖြစ်သူ ပင်တုန်တာ ရှင်နာဝပ် ကူနာကွန်ဝေါင် (Pintongta Shinawatra Kunakornwong) ၊ အစ်ကိုဖြစ်သူ ပန်တုန်တေ ရှင်နာဝပ် (Panthongtae Shinawatra) နှင့် ၎င်း၏ ဇနီးဖြစ်သူ နတ်သီယာ ဖူအန်ခမ်း (Natthiya Puangkham) ၊ သက်ဆင် ၏ ရှေ့နေဖြစ်သူ ဝင်ယတ် ချတ်မွန်ထရီ (Winyat Chatmontree) တို့က သက်ဆင်ထံ လာရောက် တွေ့ဆုံခဲ့ခြင်း ဖြစ်သည်။

ပေတုန်တန်က အကျဉ်းထောင်ထဲက မိသားစုပုံကို ပြသစဉ်

ထိုအကျဉ်းထောင်တွင် အကျဉ်းသားများ ပြုလုပ်ထားသည့် အစားအစာများနှင့် လက်မှုပစ္စည်းများကို ရောင်းချ သည့် မီနီမားကက် တစ်ခုလည်းရှိပြီး အကျဉ်းထောင်သို့ လာရောက်သူများက ထိုအစားအစာများနှင့် ပစ္စည်းများကို ဝယ်ယူနိုင်သည်။

“အဲဒီအချိန်လေးမှာ ကျမဟာ ပေတုန်တန်ဆိုတဲ့ ဘဝကို ပြန်ရခဲ့သလို ခံစားခဲ့ရပါတယ်။ ငယ်ငယ်တုန်းကလိုမျိုး ကျမ အဖေရဲ့ လက်ကိုတွဲပြီး မောင်နှမတွေနဲ့ ဈေးထဲမှာ လမ်းလျှောက်ခဲ့ရပါတယ်။ ၂ နာရီလောက်သာ တွေးခွင့် ရခဲ့ပေမယ့် ကျမတို့ အတူနေထိုင်နေရသလို ခံစားခဲ့ရပါတယ်။ ကျမ အဖေနဲ့ပတ်သက်ပြီး စိုးရိမ်နေသူတွေကို ပြောချင်တာက အဖေက ကျန်းကျန်းမာမာပါပဲ။ အားလုံးရဲ့ ချစ်ခင် ဂရုစိုက်မှုတွေကို သူက သိထားပြီး အားလုံးကိုလည်း သူက အလေးထားတယ်ဆိုတာ ပြောခဲ့ပါတယ်”ဟု ပေတုန်တန်က လူမှုမီဒီယာတွင် ရေးသားခဲ့ သည်။

လက်ရှိ ထိုင်းနိုင်ငံတွင် ရေလွှမ်းမိုးမှုများ ဖြစ်ပွားနေခြင်းနှင့်ပတ်သက်ပြီး သတင်းထောက်များက သက်ဆင်၏ သဘောထားကို မေးမြန်းချိန်၌ ပေတုန်တန်က ၎င်း၏ ဖခင်သည် ရေလွှမ်းမိုးမှုကို စိုးရိမ်နေကြောင်း ဖြေကြား ခဲ့သည်။

သက်ဆင်သည် ၂၀၂၃ ခုနှစ်၊ သြဂုတ်လက ထိုင်းနိုင်ငံသို့ ပြန်လည် ရောက်ရှိချိန်တွင် အာဏာအလွဲသုံးမှုဖြင့် ထောင်ဒဏ်  ၈ နှစ် ချမှတ်ခံခဲ့ရသော်လည်း နောက်ပိုင်းတွင် ထိုင်းဘုရင်က ထောင်ဒဏ် ၁ နှစ်အထိ လျှော့ချပေး ခဲ့သည်။

သို့သော် အကျဉ်းချခံနေရသည့် ထိုကာလအတွင်း သက်ဆင်သည် ဘန်ကောက်မြို့တော်ရှိ ရဲတပ်ဖွဲ့ အထွေထွေ ဆေးရုံ၏ VIP အခန်းတွင် နေထိုင်ခဲ့မှုနှင့်ပတ်သက်ပြီး တရားရုံးချုပ်က စက်တင်ဘာ ၉ ရက်၌ ၎င်းကို ထောင်ဒဏ် ၁ နှစ် ချမှတ်ခဲ့သည်။

Source: ဘန်ကောက်ပို့စ်