CNI International News
ဝါရှင်တန်၊ နိုဝင်ဘာ ၂၉
ဗင်နီဇွဲလား မူးယစ်ဆေးဝါး ဂိုဏ်းများ၏ မှောင်ခိုကူးမှုကို နှိမ်နင်းရာတွင် မကြာမီအချိန်အတွင်း မြေပြင်စစ်ဆင်ရေး ပြုလုပ်သွားမည်ဟု အမေရိကန်သမ္မတ ဒေါ်နယ်ထရမ့် (Donald Trump) က ပြောကြားခဲ့သည်ဟု DW သတင်း ဝက်ဘ်ဆိုက်၌ ဖော်ပြခဲ့သည်။
အမေရိကန်သည် နိုင်ငံဖြတ်ကျော် ရာဇဝတ်မှုများနှင့် မူးယစ်ဆေးဝါး မှောင်ခိုကူးမှုများကို ရပ်တန့်မည်ဆိုသည့် ကြေညာချက်ဖြင့် ကာရစ်ဘီယံဒေသတွင် စစ်ရေးလှုပ်ရှားမှုများအား တိုးမြှင့်နေမှုနှင့်အတူ အမေရိကန်နှင့် ဗင်နီဇွဲလားကြား တင်းမာမှု မြင့်တက်နေချိန်၌ ထရမ့်၏ သတိပေးချက် ထွက်ပေါ်လာခြင်းဖြစ်သည်။
ဗင်နီဇွဲလားအစိုးရကမူ အမေရိကန်၏ စစ်အင်အား ဖြန့်ကြက်ချထားမှုနှင့် မူးယစ်ဆေးဝါး နှိမ်နင်းရေး လှုပ်ရှားမှု သည် ဗင်နီဇွဲလားသမ္မတ နီကိုလက်စ် မာဒူရို (Nicolas Maduro) ကို ဖြုတ်ချရန် ကြိုးပမ်းအားထုတ်နေခြင်း ဖြစ်ကြောင်း ပြောကြားခဲ့သည်။
အမေရိကန်သည် မာဒူရိုကို ဗင်နီဇွဲလား၏ တရားဝင်မှု မရှိသည့် ခေါင်းဆောင်အဖြစ် ရှုမြင်ထားပြီး မာဒူရိုသည် မူးယစ်ဆေးဝါး မှောင်ခိုကူးမှုနှင့် ပတ်သက်နေကြောင်း စွပ်စွဲခဲ့သည်။
ထရမ့်သည် ဖလော်ရီဒါ (Florida) ရှိ ၎င်း၏ Mar-a-Lago စံအိမ်တွင် ကျေးဇူးတော်နေ့အဖြစ် ပွဲအခမ်းအနား ပြုလုပ်ချိန်က အမေရိကန် စစ်မှုထမ်းများနှင့် ဗွီဒီယို ဆက်သွယ်မှုမှတစ်ဆင့် အမှာစကား ပြောကြားခဲ့သည်။
ဗင်နီဇွဲလားသမ္မတ လူကာရှန်ကိုကို တွေ့ရစဉ်
ထိုအမှာစကားအတွင်း ဗင်နီဇွဲလား မူးယစ်ဆေးဝါး မှောင်ခိုကူးသူများကို ပင်လယ်ပြင်တွင် တိုက်ခိုက်နေသည့် စစ်ဆင်ရေး အများစုအား ရပ်တန့်တော့မည်ဖြစ်ကြောင်း ပြောကြားခဲ့သည်။
“ကျနော်တို့ဟာ ပင်လယ်ပြင်က စစ်ဆင်ရေးတွေကို ၈၅ ရာခိုင်နှုန်းအထိ ရပ်တန့်လိုက်ပါပြီ။ မကြာခင် အချိန်မှာပဲ မြေပြင်ကနေ သူတို့ (မူးယစ်ဆေးဝါး မှောင်ခိုကူးသူများ)ကို တားဆီးဖို့ စတင်လုပ်ဆောင်သွားမှာပါ။ မြေပြင်က ပိုပြီးလွယ်ပါတယ်။ မကြာခင် စတင်တော့မှာပါ” ဟု ထရမ့်က ပြောကြားခဲ့သည်။
ထရမ့် ပြောဆိုခဲ့သည့် တပ်ရင်းတပ်ဖွဲ့အချို့သည် Southern Spear အမည်ရှိ မူးယစ်ဆေးဝါး တိုက်ဖျက်ရေး စစ်ဆင်ရေးတွင် တိုက်ရိုက် ပါဝင်နေသည့် တပ်ရင်းတပ်ဖွဲ့များဖြစ်သည်။
မကြာသေးမီက အမေရိကန်တပ်ဖွဲ့များသည် ကာရစ်ဘီယံပင်လယ်နှင့် ပစိဖိတ်သမုဒ္ဒရာတို့တွင် မူးယစ်ဆေးဝါး မှောင်ခိုကူးသည်ဟု သံသယရှိသည့် သင်္ဘောများကို တိုက်ခိုက်မှုများ ပြုလုပ်ခဲ့သဖြင့် လူ ၈၃ ဦးထက်မနည်း သေဆုံးခဲ့သည်။
Source: DW
