CNI International News
ဘစ်ဆော၊ နိုဝင်ဘာ ၂၉
ဂီနီဘစ်ဆောနိုင်ငံတွင် ရွေးကောက်ပွဲ ပြုလုပ်ခဲ့ပြီးနောက် ၃ ရက် အကြာဖြစ်သည့် နိုဝင်ဘာ ၂၆ ရက်တွင် အာဏာသိမ်းမှု ဖြစ်ပွားခဲ့သည်။
နိုဝင်ဘာ ၂၃ ရက်က ပြုလုပ်ခဲ့သည့် ရွေးကောက်ပွဲတွင် လက်ရှိသမ္မတ ယူမာရို စစ်ဆိုကို အမ်ဘလို (Umaro Sissoco Embaló) နှင့် ပြိုင်ဘက် ကိုယ်စားလှယ်လောင်း ဖာနန်ဒို ဒီယက်စ် (Fernando Dias) တို့က အနိုင်ရရှိ ကြောင်း ကြေညာခဲ့ကြသည်။
ဂီနီဘစ်ဆောပြည်သူ ၂ သန်းခွဲခန့်က ရွေးကောက်ပွဲတွင် မဲရလဒ်များ ကြေညာချက်ကို စောင့်ဆိုင်းနေချိန်၌ စစ်တပ်က အာဏာသိမ်းကြောင်းနှင့် သမ္မတကို ဖမ်းဆီးထားကြောင်း ကြေညာခဲ့သည်။
လက်ရှိတွင် အာဏာသိမ်းမှု ဖြစ်ပွားပြီးနောက် ၂ ရက်အကြာ၌ စစ်တပ်က ဖမ်းဆီးထားသည်ဆိုသည့် သမ္မတ အမ်ဘလိုသည် လူမြင်ကွင်းမှ ပျောက်ကွယ်နေသည်။
ကောလာဟလများအရ အမ်ဘလိုသည် ရွေးကောက်ပွဲ ပြီးချိန်ကတည်းက ကိုယ်ပိုင် ဂျက်လေယာဉ်ဖြင့် ပြင်သစ် သို့ ချက်ချင်း ထွက်ခွာသွားခဲ့ကြောင်း သတင်းများ ပျံ့နေသည်။
အမ်ဘလိုကို ဖမ်းဆီးထားသည်ဆိုသည့် စစ်တပ်၏ ကြေညာချက်ကို တရားဝင် အတည်ပြုနိုင်ခြင်း မရှိသော်လည်း စစ်တပ်သည် ဗိုလ်ချုပ်ကြီး ဟော်တာ အန်တာ (Horta N'Ta) ကို ယာယီသမ္မတအဖြစ် ခန့်အပ်ကြောင်း ကြေညာခဲ့ သည်။
ဂီနီဘစ်ဆောမှာ စစ်တပ်က လုံခြုံရေးယူထားစဉ်
အန်တာသည် ယခင်က အမ်ဘလို၏ သက်တော်စောင့် တစ်ဦးဖြစ်ပြီး စစ်ဦးစီးချုပ်အဖြစ် တာဝန်ထမ်းဆောင် ခဲ့ဖူးသော်လည်း အတိတ်ကာလက ၎င်းတို့နှစ်ဦးကြား ဆက်ဆံရေးကို ရှင်းလင်းစွာ မသိရပေ။
အတိုက်အခံများကမူ အာဏာသိမ်း ခေါင်းဆောင်များသည် အမ်ဘလို၏ နီးစပ်သည့် မဟာမိတ်များဖြစ်ကြောင်း ယူဆနေကြသည်။
ထို့ပြင် စစ်တပ်က ရွေးကောက်ပွဲ ဝင်ခွင့်မရသည့် ဒိုမင်ဂိုဆိုင်မိုအက်စ်ပါရဲရား (Domingos Simoes Pereira) ကိုလည်း ဖမ်းဆီးထားသည်ဟု ကြေညာခဲ့သည်။
အာဏာသိမ်းမှု ဖြစ်ပွားပြီးကတည်းက ပါရဲရားနှင့် အဆက်အသွယ် မရတော့ကြောင်း ၎င်း၏ ပါတီက ပြောကြားခဲ့ သည်။
လက်ရှိတွင် အမ်ဘလို၊ ဒီးယက်စ်နှင့် ပါရဲရားတို့ ၃ ဦးစလုံးသည် လူမြင်ကွင်းမှ ပျောက်ကွယ် နေဆဲဖြစ်သဖြင့် ၎င်းတို့ကို စစ်တပ်က ဖမ်းဆီးထားခြင်း သို့မဟုတ် ထွက်ပြေးတိမ်းရှောင်နေခြင်း ဟုတ်၊မဟုတ်ကို ရှင်းလင်းစွာ မသိရသေးပေ။
Source: DW
