CNI International News
ဒက်ကာ၊ ဒီဇင်ဘာ ၁
အာဖရိကသမဂ္ဂ(AU)သည် အာဏာသိမ်းမှု ဖြစ်ပွားခဲ့သည့် ဂီနီဘစ်ဆောနိုင်ငံကို အဖွဲ့ဝင်အဖြစ်မှ ဆိုင်းငံ့ခဲ့ပြီး အခြေခံဥပဒေနှင့်မညီသော အပြောင်းအလဲများကို လက်ခံမည် မဟုတ်ကြောင်း ပြောကြားခဲ့သည်ဟု အေပီမှ ဖော်ပြခဲ့သည်။
အာဖရိကသမဂ္ဂ ငြိမ်းချမ်းရေးနှင့် လုံခြုံရေးကောင်စီက နိုဝင်ဘာ ၂၈ ရက်တွင် ထုတ်ပြန်ခဲ့သည့် ကြေညာချက်၌ AU သည် ဖွဲ့စည်းပုံအခြေခံဥပဒေနှင့်မညီသည့် အစိုးရအပြောင်းအလဲကို လုံးဝလက်မခံကြောင်း ထပ်လောင်း ဖော်ပြခဲ့သည်။
ထို့ကြောင့် ဂီနီဘစ်ဆောနိုင်ငံကို အာဖရိကသမဂ္ဂ၏ လှုပ်ရှားမှုများ၊ လုပ်ငန်းတာဝန်များနှင့် အင်စတီကျူးရှင်းများ တွင် ပါဝင်ခြင်းကို ချက်ချင်းဆိုင်းငံ့ကြောင်း ဖော်ပြခဲ့သည်။
ဂီနီဘစ်ဆောတွင် ဖွဲ့စည်းပုံအခြေခံဥပဒေဆိုင်ရာ အခင်းအကျင်းကို ပြန်လည်ထိန်းသိမ်းနိုင်သည့် အချိန်အထိ ဆိုင်းငံ့ချက်သည် အသက်ဝင်နေမည်ဟုလည်း ထုတ်ပြန်ချက်၌ ဖော်ပြခဲ့သည်။
ဂီနီဘစ်ဆောတွင် အာဏာသိမ်း ခံရပြီးနော်က ဖြုတ်ချခံခဲ့ရသည့် သမ္မတဟောင်း ယူမာရို စစ်ဆိုကို အမ်ဘလို (Umaro Sissoco Embaló) သည် နိုဝင်ဘာ ၂၈ ရက် ညပိုင်းက နိုင်ငံအတွင်းမှ ထွက်ခွာသွားပြီးဖြစ်ကြောင်း၊ ထို့နောက် နိုဝင်ဘာ ၂၉ ရက် နံနက်ပိုင်းတွင် ကွန်ဂိုနိုင်ငံသို့ ရောက်ရှိသွားပြီဖြစ်ကြောင်း အမ်ဘလို၏ သမ္မတရုံး ဝန်ထမ်းချုပ် ကာလီဖာ ဆော်ရက်စ် ကက်ဆာမာ (Califa Soares Cassamá) က ပြောကြားခဲ့သည်။
ဂီနီဘစ်ဆောနိုင်ငံအတွင်းကို တွေ့ရစဉ်
"ဟုတ်ပါတယ်။ သမ္မတက ဘရက်ဇာဗေးလ် (Brazzaville) မြို့ကို ရောက်သွားပါပြီ။ ကျနော်တို့က ညပိုင်းမှ ထွက်လာတာဖြစ်ပြီး ဒီနေ့ မနက်ပိုင်းမှာ ကွန်ဂိုရဲ့ မြို့တော် ဘရက်ဇာဗေးလ်ကို ရောက်လာကြပါပြီ" ဟု ကက်ဆာမာက အေပီသတင်းဌာနကို အတည်ပြု ပြောကြားခဲ့သည်။
ကမ္ဘာ့အဆင်းရဲဆုံး နိုင်ငံများထဲတွင် ပါဝင်သည့် ဂီနီဘစ်ဆောနိုင်ငံသည် လွန်ခဲ့သည့် နှစ်ပေါင်း ၅၀ ကျော် ပေါ်တူဂီနိုင်ငံထံမှ လွတ်လပ်ရေး ရခဲ့ပြီးချိန်ကတည်းက အာဏာသိမ်းမှု ၄ ကြိမ် ဖြစ်ပွားခဲ့သည့်အပြင် အာဏာ သိမ်းရန် ကြိုးပမ်းမှုများလည်း အကြိမ်ကြိမ်ရှိခဲ့သည်။
လူဦးရေ ၂ ဒသမ ၂ သန်း နေထိုင်သည့် ဂီနီဘစ်ဆောသည် လက်တင်အမေရိကနှင့် ဥရောပကြား မူးယစ်ဆေးဝါး မှောင်ခိုကူးသည့် ဆုံချက်နေရာ တစ်ခုအဖြစ် လူသိများသည်။
ဂီနီဘစ်ဆောတွင် နိုဝင်ဘာ ၂၆ ရက်က အာဏာသိမ်းမှု ဖြစ်ပွားခဲ့ပြီးနောက် အနောက်အာဖရိကနိုင်ငံများ စီးပွား ရေး ပူးပေါင်းဆောင်ရွက်ရေးအဖွဲ့ (ECOWAS) သည် နိုဝင်ဘာ ၂၇ ရက်တွင် ဂီနီဘစ်ဆောနိုင်ငံကို အဖွဲ့ဝင်အဖြစ်မှ ဆိုင်းငံ့ခဲ့သည်။
Source: အေပီ
