CNI International News

ဘေဂျင်း၊ ဒီဇင်ဘာ ၂

ပြီးခဲ့သည့်နှစ်က တရုတ်၏ ကမ္ဘာလုံးဆိုင်ရာ လက်နက်ရောင်းချမှုများသည် မြင့်တက်ခဲ့သော်လည်း တရုတ် ကာကွယ်ရေးကုမ္ပဏီ ၈ ခု၏ စုစုပေါင်း ဝင်ငွေသည် သိသာစွာ လျော့ကျခဲ့ကြောင်း South China Morning Post မှ ဖော်ပြခဲ့သည်။

ဆွီဒင်အခြေစိုက် စတော့ဟုမ်း နိုင်ငံတကာ ငြိမ်းချမ်းရေး သုတေသန အင်စတီကျု (SIPRI) ၏ လက်နက်ရောင်းချ မှု အများဆုံး Top 100 စာရင်းတွင် ပါဝင်သည့် တရုတ်ကာကွယ်ရေးကုမ္ပဏီ ၈ ခု၏ ဝင်ငွေ စုစုပေါင်းသည် ၁၀ ရာခိုင်နှုန်း (ဒေါ်လာ ၈၈ ဒသမ ၃) ဘီလျံ လျော့ကျခဲ့သည်ဟု ဖော်ပြခဲ့သည်။

တရုတ်၏ ကာကွယ်ရေးပစ္စည်းများ ထုတ်လုပ်သည့် ကုမ္ပဏီများ၏ စွမ်းဆောင်ရည်သည် ဂျပန်နှင့် တောင်ကိုရီး ယားတို့၏ ကာကွယ်ရေးပစ္စည်း ထုတ်လုပ်သော ကုမ္ပဏီများနှင့် နှိုင်းယှဉ်ပါက သိသာစွာ ကျဆင်းနေသည်ကို တွေ့ရသည်ဟု ထုတ်ပြန်ချက်တွင် ဖော်ပြခဲ့သည်။

ဂျပန်နှင့် တောင်ကိုရီးယားတို့သည် ကမ္ဘာလုံးဆိုင်ရာ လက်နက်ရောင်းအားများလည်း မြင့်တက်မှုနှင့်အတူ ကာကွယ်ရေးပစ္စည်း ထုတ်လုပ်မှုများမှ ဝင်ငွေများ မြင့်တက်ခဲ့သည်ဟု SIPRI က ဖော်ပြခဲ့သည်။

တရုတ်ထုတ် ဒုံးကျည်ကို တွေ့ရစဉ်

ယူကရိန်းစစ်ပွဲ၊ ဂါဇာစစ်ပွဲနှင့် ဒေသတွင်း၊ ကမ္ဘာလုံးဆိုင်ရာ တင်းမာမှုများကြောင့် ကမ္ဘာတစ်ဝန်း လက်နက်များနှင့် စစ်ပစ္စည်းကုမ္ပဏီများ၏ ဝင်ငွေများ မြင့်တက်နေခြင်းနှင့် တရုတ်၏ ကာကွယ်ရေးကဏ္ဍမှ ဝင်ငွေလျော့ကျမှုသည် ဆန့်ကျင်ဘက် အခြေအနေ ဖြစ်နေသည်။

"တရုတ်ရဲ့ လက်နက် ရောင်းဝယ်ရေးကဏ္ဍမှာ အဂတိလိုက်စားမှု စွဲချက်တွေကြောင့် ၂၀၂၄ ခုနှစ်ထဲမှာ အဓိက လက်နက် ကန်ထရိုက်တွေ ရွှေ့ဆိုင်းတာ ဒါမှမဟုတ် ဖျက်သိမ်းတာတွေ ရှိခဲ့ပါတယ်" ဟု SIPRI ၏ စစ်ဘက် အသုံးစရိတ်နှင့် လက်နက်များ ထုတ်လုပ်ရေး ပရိုဂရမ်၏ ဒါရိုက်တာ နန် တီယန် (Nan Tian) က ပြောကြားခဲ့ သည်။

၂၀၂၂ ခုနှစ်က တရုတ်သမ္မတ ရှီကျင့်ဖျင် (Xi Jinping) ၏ အမိန့်ဖြင့် အဂတိလိုက်စားမှု တိုက်ဖျက်ရေး လှုပ်ရှားမှု တွင် ပစ်မှတ်ထားခံခဲ့ရသည့် အဖွဲ့အစည်းများအနက် တရုတ်ပြည်သူ့လွတ်မြောက်ရေးတပ်မတော်(PLA)သည် လည်း တစ်ခုအပါအဝင် ဖြစ်ခဲ့သည်။

တရုတ်ထုတ် တိုက်လေယာဉ်ကို တွေ့ရစဉ်

၂၀၂၃ ခုနှစ်တွင် တရုတ်၏ ဒုံးကျည်တပ်ဖွဲ့သည် အဂတိလိုက်စားမှုဖြင့် ပစ်မှတ်ထား ခံခဲ့ရပြီးနောက် စစ်တပ်၏ အမြင့်ပိုင်း အလွှာအထိ အဂတိလိုက်စားမှုများကို စုံစမ်းစစ်ဆေးခဲ့သည်။

အောက်တိုဘာလထဲတွင်လည်း တရုတ်စစ်တပ်၏ ဗိုလ်ချုပ်ကြီး ၈ ဦးသည် အာဏာရ ကွန်မြူနစ်ပါတီမှ ထုတ်ပယ် ခံခဲ့ရသည်။

ထိုဗိုလ်ချုပ်ကြီးများအနက် တရုတ်၏ နံပါတ် ၂ အဆင့် ဗိုလ်ချုပ်ကြီး ဟီ ဝေတုန် (He Weidong) လည်း ပါဝင်ခဲ့ သည်။

ဟီသည် တရုတ်၏ အမြင့်ဆုံး စစ်ဌာနချုပ် အဖွဲ့အစည်းဖြစ်သည့် ဗဟိုစစ်ကော်မရှင်တွင် ရှီ၏ လက်အောက်၌ ဒုတိယဥက္ကဋ္ဌအဖြစ် တာဝန်ထမ်းဆောင်ခဲ့သူဖြစ်သည်။

အာရှနှင့် အနောက်နိုင်ငံများမှ သံတမန်များကမူ တရုတ်၏ အဂတိလိုက်စားမှု တိုက်ဖျက်ရေး လှုပ်ရှားမှုများသည် တရုတ်၏ မြင့်တက်လာသည့် စစ်အင်အား တည်ဆောက်မှုအပေါ် မည်မျှ သက်ရောက်မှု ရှိမည်ဆိုခြင်းကို လေ့လာ နေကြောင်း ပြောကြားခဲ့သည်။

Source: South China Morning Post