CNI International News

စတော့ဟုမ်း၊ ဒီဇင်ဘာ ၂

၂၀၂၄ ခုနှစ်က ကမ္ဘာပေါ်ရှိ လက်နက်ထုတ်လုပ်သည့် ကုမ္ပဏီများသည် ဝင်ငွေများ စံချိန်တင် မြင့်မားစွာ ရရှိခဲ့ ကြောင်း DW သတင်းဝက်ဘ်ဆိုက်မှ ဖော်ပြခဲ့သည်။

ဆွီဒင်အခြေစိုက် စတော့ဟုမ်း နိုင်ငံတကာ ငြိမ်းချမ်းရေး သုတေသန အင်စတီကျု (SIPRI)သည် လက်နက် ရောင်းချမှု အများဆုံး Top 100 စာရင်းကို ထုတ်ပြန်ခဲ့သည်။

ထိုစာရင်းတွင် ပါဝင်သည့် လက်နက်ကုမ္ပဏီများသည် ပြီးခဲ့သည့်နှစ်က ဝင်ငွေ ဒေါ်လာ ၆၇၉ ဘီလျံအထိ ရရှိခဲ့သည်ဟု ဖော်ပြထားသည်။

ထိုပမာဏသည် ၂၀၂၃ ခုနှစ်နှင့် နှိုင်းယှဉ်ပါက ၅ ဒသမ ၉ ရာခိုင်နှုန်း မြင့်တက်လာခြင်း ဖြစ်သည်ဟု ဆိုသည်။

လက်နက်ရောင်းလို့ ဝင်ငွေအများဆုံးရတဲ့ နိုင်ငံတကာ လက်နက်ကုမ္ပဏီတွေကို တွေ့ရစဉ်

အထူးသဖြင့် ယူကရိန်းစစ်ပွဲကြောင့် လက်နက် ဝယ်လိုအားများ မြင့်တက်ခဲ့ပြီး ၂၀၂၄ ခုနှစ်တွင်လည်း လက်နက် ဝယ်လိုအားသည် ထပ်မံ မြင့်တက်ခဲ့သည်ဟု ဆိုသည်။

ထို့ကြောင့် ယူကရိန်း-ရုရှား စစ်ပွဲကို အကြောင်းပြုပြီ စီးပွားရှာရန် ကောင်းမွန်လာခြင်း ရှိ၊မရှိ မေးခွန်းများ ထွက်ပေါ်လာခဲ့သည်။

"ကာကွယ်ရေးကဏ္ဍ အတွက်ဆိုရင်တော့ သေချာပေါက် စီးပွားရှာလို့ ကောင်းနေတာပေါ့။ လွန်ခဲ့တဲ့ ၂ နှစ်ကဆိုရင် လက်နက်ကုမ္ပဏီတွေရဲ့ ဝင်ငွေတွေက မြင့်တက်လာခဲ့တယ်လေ" ဟု SIPRI ၏ စစ်ဘက် အသုံးစရိတ်နှင့် လက်နက်များ ထုတ်လုပ်ရေး ပရိုဂရမ်၏ ဒါရိုက်တာ နန် တီယန် (Nan Tian) က ပြောကြားခဲ့သည်။

၎င်း၏ ပြောကြားချက်အရ စစ်ပွဲအတွင်း ပျက်စီးသွားသည့် လက်နက်များ၊ ကုန်ခမ်းသွားသည့် လက်နက်ခဲယမ်း များကို ပြန်လည်ဖြည့်တင်းရေးအတွက် လက်နက်အသစ်များအား တိုးမြှင့်ထုတ်လုပ်နေသော  သဘော သက်ရောက်နေသည်။

လက်နက်အများဆုံး ထုတ်လုပ်သည့် ထိပ်သီး ကုမ္ပဏီ ၁၀၀ စာရင်းတွင် ကုမ္ပဏီ ၃၉ ခုသည် အမေရိကန်၌ အခြေစိုက်ထားသော လက်နက်ကုမ္ပဏီများ ဖြစ်သည်။

လက်နက်ကြီးကျည်ကိုတွေ့ရစဉ်

အမေရိကန်အခြေစိုက် ကုမ္ပဏီ ၃၉ ခု၏ ဝင်ငွေသည် ကမ္ဘာလုံးဆိုင်ရာ လက်နက်ရောင်းချမှု ဝင်ငွေ စုစုပေါင်း၏ ထက်ဝက်နီးပါး ရှိခဲ့သည်။

သို့သော်လည်း ၎င်းတို့၏ အလုံးစုံ ပျမ်းမျှဝင်ငွေသည် ၃ ဒသမ ၈ ရာခိုင်နှုန်းသာ ရှိနေသည်။

ရုရှားမှလွဲပြီး ကျန် ဥရောပကုမ္ပဏီ ၂၆ ခု၏ ဝင်ငွေ စုစုပေါင်းသည် ၁၃ ရာခိုင်နှုန်းအထိ မြင့်တက်လာခဲ့သည်။

တစ်နိုင်ငံချင်းစီအရ ဂျာမနီ လက်နက်ကုမ္ပဏီများသည် ဥရောပတွင် ဝင်ငွေ အများဆုံးဖြစ်ခဲ့ပြီး ၃၆ ရာခိုင်နှုန်း မြင့်တက် ခဲ့သည်။

၂၀၂၃-၂၀၂၄ ခုနှစ်အတွင်း ကမ္ဘာပေါ်တွင် လက်နက်ရောင်းချမှုမှ ဝင်ငွေ အများဆုံး ရရှိခဲ့သည့် ၁၀ နိုင်ငံမှာ ဂျပန် (၄၀ ရာခိုင်နှုန်း) ၊ ဂျာမနီ (၃၆ ရာခိုင်နှုန်း) ၊ တောင်ကိုရီးယား (၃၁ ရာခိုင်နှုန်း) ၊ ရုရှား (၂၃ ရာခိုင်နှုန်း)၊ အစ္စရေး (၁၆ ရာခိုင်နှုန်း) ၊ ပြင်သစ် (၁၂ ရာခိုင်နှုန်း) ၊ တူရကီ (၁၁ ရာခိုင်နှုန်း) ၊ အီတလီ (၉ ဒသမ ၁ ရာခိုင်နှုန်း) ၊အိန္ဒိယ (၈ ဒသမ ၂ ရာခိုင်နှုန်း) ၊ ဗြိတိန် (၆ ဒသမ ၆ ရာခိုင်နှုန်း) နှင့် အမေရိကန် (၃ ဒသမ ၈ ရာခိုင်နှုန်း) တို့ ဖြစ်သည်။

Source: DW