CNI International News

ဘစ်ဆော၊ နိုဝင်ဘာ ၂၈

ဂီနီဘစ်ဆောနိုင်ငံတွင် သမ္မတနန်းတော်အနီး၌ သေနတ်သံများကို ကြားရကြောင်း သတင်းများ ထွက်ပေါ်ခဲ့ ပြီးနောက် စစ်တပ်က အာဏာသိမ်းလိုက်ပြီဟု နိုဝင်ဘာ ၂၆ ရက်တွင် နိုင်ငံပိုင်ရုပ်သံမှ ကြေညာခဲ့သည်။

ဂီနီဘစ်ဆောတွင် ရွေးကောက်ပွဲ ပြုလုပ်ပြီးနောက် ၃ ရက်အကြာတွင် ယခုကဲ့သို့ အာဏာသိမ်းမှု ဖြစ်ပွားခဲ့ခြင်း ဖြစ်သည်။

ဂီနီဘစ်ဆောသမ္မတ ယူမာရို စစ်ဆိုကို အမ်ဘလို (Umaro Sissoco Embaló) ကလည်း သူသည် ရာထူးမှ ဖြုတ်ချ ခံရပြီး ဖမ်းဆီးခံထားရကြောင်း ပြင်သစ်မီဒီယာများကို ပြောကြားခဲ့သည်။

ယခုဖြစ်စဉ်သည် မကြာသေးမီ နှစ်များအတွင်း အာဏာသိမ်းမှုများ ဖြစ်ပွားခဲ့သည့် အနောက်အာဖရိကတွင် နောက်ဆုံး အာဏာသိမ်းမှု တစ်ခုဖြစ်သည်။

“နိုင်ငံတော် ပြန်လည်ထူထောင်ရေးနဲ့ တည်ငြိမ်ရေးအတွက် စစ်ဘက်ဆိုင်ရာဌာနချုပ်ဟာ သမ္မတကို ရာထူးက ချက်ချင်းဖြုတ်ချဖို့နဲ့ နိုင်ငံရဲ့ အင်စတီကျူးရှင်း အားလုံးကို နောက်ထပ် ပေါ်ပေါက်လာမယ့် အခင်းအကျင်းတွေ မတိုင်မီ အချိန်အထိ ဆိုင်းငံ့ထားဖို့ ဆုံးဖြတ်ခဲ့ပါတယ်”ဟု စစ်တပ်၏ ပြောရေးဆိုခွင့်ရှိသူ ဒီနစ် အန် ချာမာ (Dinis N’Tchama) က ပြောကြားခဲ့သည်။ 

နိုဝင်ဘာ ၂၃ ရက်က ပြုလုပ်ခဲ့သည့် ရွေးကောက်ပွဲတွင် မဲရလဒ်များကို ကြိုးကိုင်ခြယ်လှယ်ပြီး တိုင်းပြည်ကို မတည်မငြိမ်ဖြစ်အောင် လုပ်ဆောင်မည့် အစီအစဉ်အား ဖော်ထုတ် သိရှိခဲ့သဖြင့် ယခုကဲ့သို့ တုန့်ပြန်ဆောင်ရွက် ရခြင်းဖြစ်သည်ဟုလည်း ၎င်းက ဆိုသည်။

ဂီနီဘစ်ဆော စစ်တပ်က အာဏာသိမ်းကြောင်း ကြေညာနေစဉ်

ထိုရွေးကောက်ပွဲတွင် ယခုဖမ်းဆီးခံထားရသည့် သမ္မတ အမ်ဘလိုနှင့် အတိုက်အခံ ကိုယ်စားလှယ်လောင်း ဖြစ်သည့်  ဖာနန်ဒို ဒီးယက်စ် (Fernando Dias) တို့က ၎င်းတို့နှစ်ဦးစလုံး အနိုင်ရကြောင်း ကြေညာခဲ့ကြသည်။

စစ်တပ်ကမူ အတိုက်အခံ ကိုယ်စားလှယ်လောင်း ဒီးယက်စ်ကိုလည်း ဖမ်းဆီးထားကြောင်း ဒီးယက်စ်၏ ပါတီက Facebook တွင် ရေးသားခဲ့သည်။

ထို့ပြင် နိုင်ငံတော်တရားရုံ၏ ပိတ်ပင်မှုကြောင့် နိုဝင်ဘာ ၂၃ ရက် ရွေးကောက်ပွဲတွင် ပါဝင်ယှဉ်ပြိုင်ခွင့် မရခဲ့သည့် အတိုက်အခံ ခေါင်းဆောင် ဒိုမင်ဂို ဆိုင်မိုအက်စ် ပါရဲရား (Domingos Simoes Pereira) ကိုလည်း နိုဝင်ဘာ၂၆ ရက်၌ ဖမ်းဆီးခဲ့သည်ဟု ၎င်းနှင့်နီးစပ်သော သတင်းအရင်းအမြစ်နှစ်ခုက ပြောကြားခဲ့သည်။

ဂီနီဘစ်ဆောနိုင်ငံသည် လွတ်လပ်ရေး ရပြီးကတည်းက အာဏာသိမ်းမှု ၄ ကြိမ် ဖြစ်ပွားခဲ့သည့်အပြင် အာဏာ သိမ်းရန် ကြိုးပမ်းမှုများလည်း အကြိမ်ကြိမ် ရှိခဲ့သည်။

Source: အေပီ