CNI News

၂၀၂၅ ခုနှစ်၊ ဒီဇင်ဘာ ၁ 

“ဝ’ တပ်ဖွဲ့မှ လက်နက်များ မပံ့ပိုးတော့သဖြင့် ပြည်သူ့ကာကွယ်ရေးတပ်ဖွဲ့(PDF)များသည် ကချင်လွတ်လပ်ရေး တပ်မတော်(KIA) ကို လမ်းကြောင်းပြောင်း ချိတ်ဆက်နေကြောင်း စစ်ရေးနှင့်နိုင်ငံရေး အကဲခတ်များက CNI သတင်းဌာနသို့ ပြောသည်။

ယခင်က PDF များသည် မြန်မာနိုင်ငံအရှေ့ပိုင်းအတွက် TNLA ဖြင့် ချိတ်ဆက်ကာ “ဝ” တပ်ဖွဲ့ထံမှ လက်နက်များ ကို ရယူခြင်းဖြစ်ပြီး ယခုလက်ရှိတွင် “ဝ” မှ လက်နက်ပံ့ပိုးမှု မရှိသကဲ့သို့ TNLA သည်လည်း မြန်မာ့တပ်မတော်နှင့် အပစ်ရပ်စဲ၍ PDF များဖြင့် ပူးပေါင်းထိန်းချုပ်ထားသည့် မိုးကုတ်နှင့် မိုးမိတ်မြို့တို့မှ ဆုတ်ခွာရန်ရှိနေသည်။

မိုးကုတ်နှင့် မိုးမိတ်မြို့တို့မှ ဆုတ်ခွာရေး TNLA နှင့် PDF တို့အကြား အပြန်အလှန် တင်းမာမှုများ ရှိနေသဖြင့် KIA အဖွဲ့သို့ လမ်းကြောင်းပြောင်း ချိတ်ဆက်သည့် အနေအထားတွင် PDF များ မိုးကုတ်နှင့် မိုးမိတ်မှ ဆုတ်ခွာရေးကိစ္စ အလွယ်တကူ မဖြစ်လာနိုင်ကြောင်း နိုင်ငံရေးလေ့လာသုံးသပ်သူ စိုင်းမိဏ်းက CNI သတင်းဌာနသို့ ပြောသည်။

၎င်းက “PDF နဲ့ TNLA ကြားထဲမှာ တိတိကျကျ ဆွေးနွေးမှု၊ တိတိကျကျ နားလည် သဘောပေါက်မှု၊ အပေးအယူ မျှတမှု အဲဒါမရှိရင်တော့ လားရှိုးမြို့လို့ ရှောရှောရှူရှူ ဖြစ်မှာမဟုတ်ဘူး။ တစ်ဖက်ကလည်း မိုးမိတ်ဆိုတဲ့ နေရာ က TNLA မတိုင်ခင် KIA ကလည်း နှစ်ပတ်ကျော်ကြာ ဝင်သိမ်းတဲ့ အနေအထား ရှိခဲ့ဖူးတယ်လေ။ KIA ထိန်းချုပ် ထားတဲ့ နယ်မြေ၊ KIA လှုပ်ရှားနိုင်တဲ့ နယ်မြေကနေ ဆက်စပ်မှုတွေရှိနေတော့ KIA ကို ဖိအား  မပေးနိုင်သရွေ့ KIA ကို TNLA လိုမျိုး အပစ်ရပ် မလုပ်သေးနိုင် သရွေ့ကတော့ လွယ်လွယ်နဲ့တော့ ဖြစ်လာမှာ မဟုတ်ဘူး။ တစ်ဖက် တစ်လမ်းကလည်း အခု PDF တွေကလည်း အရင်တုန်းကတော့ အရှေ့ပိုင်းအတွက်ဆိုရင် TNLA ကို ချိတ်ဆက် တယ်။ ဒါပေမယ့် ဒီလမ်းကြောင်းက “ဝ” တပ်ဖွဲ့ကလည်း လက်နက်မပံ့ပိုးဖို့ ဟန့်တားမှုတွေ၊ ထုတ်ပြန်တာတွေရှိ တယ်။ ကျားဖြန့်တွေ ဝင်ပြီးတော့မှ စစ်လက်နက်ပစ္စည်းတွေ သယ်ယူပေးတဲ့လူကို သေဒဏ်ပေးတာတွေ လုပ်ပြ တယ်။ အဲဒီလို အနေအထားဆိုတော့ PDF ကလည်း မြန်မာနိုင်ငံ မြောက်ပိုင်းမှာ ရှိနေတဲ့ အင်အားကောင်းတဲ့ KIA အဖွဲ့ကို လမ်းကြောင်းပြောင်းပြီးတော့မှ ချိတ်ဆက်နေတာတွေ ရှိတဲ့အနေအထားဆိုတော့ ဒီကိစ္စကတော့ လွယ် လွယ်နဲ့ ဖြစ်လာမယ် မထင်ဘူး” ဟု ပြောသည်။

 ဒုဗိုလ်ချုပ်ကြီးဂွမ်မော်နဲ့ တခြားလက်နက်ကိုင်တွေကို တွေ့ရစဉ်

KIA သည် ရှမ်းပြည်နယ်မြောက်ပိုင်း၊ ကချင်ပြည်နယ်၊ စစ်ကိုင်းတိုင်းဒေသကြီးတို့အထိ အင်အား တည်ဆောက်၍ လှုပ်ရှားလာခဲ့ရာ အင်အားကြီး တိုင်းရင်းသား လက်နက်ကိုင် အဖွဲ့အစည်းအဖြစ် ရပ်တည်လျက်ရှိသည်။

KIA သည် မြန်မာနိုင်ငံရှိ လက်နက်ခဲယမ်း ထုတ်လုပ်နိုင်သော လက်နက်ကိုင်အဖွဲ့အစည်းများထဲက တစ်ဖွဲ့ဖြစ် သလို အင်အားကြီးသော လက်နက်ကိုင် အဖွဲ့အဖြစ်လည်း ရပ်တည်လျက်ရှိသည်။

KIA သည် မြန်မာ့တပ်မတော်က ၂၀၂၁ ခုနှစ်၊ ဖေဖော်ဝါရီ ၁ ရက်မှာ NLD အစိုးရကို ဖြုတ်ချ လိုက်ခြင်းကြောင့် ပြောင်းလဲလာသော နိုင်ငံရေး အခင်းအကျင်းကြီးထဲမှာ အင်အားကို ပိုမို ကြီးထွားအောင် တည်ဆောက်နိုင်ခဲ့သလို ထိန်းချုပ်နယ်မြေများလည်း ကျယ်ပြန့်လာခဲ့သည်။

KIA သည် ၂၀၂၁ ခုနှစ် နိုင်ငံရေးပြဿနာများ ဖြစ်ပေါ်လာပြီးနောက်ပိုင်း စစ်ကိုင်းတိုင်းဒေသကြီးအတွင်းရှိ ပြည်သူ့ကာကွယ်ရေးတပ်ဖွဲ့ (PDF)၊ ဒေသခံကာကွယ်ရေးတပ်ဖွဲ့ (LDF) တို့ကို စစ်သင်တန်းများပေးခြင်း၊ လက်နက်နှင့် ခဲယမ်းများ ထောက်ပံ့ခြင်း၊ ပူးပေါင်း စစ်ဆင်ရေးများ လုပ်ဆောင်ခြင်း၊ လက်နက်ခဲယမ်းများ ရောင်းချပေးခြင်းတို့ လုပ်ဆောင်လျက်ရှိသည်။

ချင်းညီနောင်အဖွဲ့နဲ့ KIA မှ ဒုဗိုလ်ချုပ်ကြီးဂွမ်မော် တွေ့ဆုံစဉ်

KIA အနေဖြင့် လက်ရှိ နိုင်ငံရေး လိုအပ်ချက်အရ တော်လှန်ရေး အင်အားစုများနှင့် လက်တွဲနေခြင်းဖြစ်ပြီး မလိုအပ်တော့သည့်အခါတွင် MNDAA နှင့် TNLA တို့ကဲ့သို့ လုပ်ဆောင်လာနိုင်ကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။

၎င်းက “PDF မှာက ကိုယ့်နယ်မြေ၊ ကိုယ့်လက်နက်ခဲယမ်း အထူးသဖြင့် ထောက်ပို့ပေါ့၊ လိုအပ်ချက်ရှိနေတော့ တခြား မရနိုင်ဘူးဆို KO ကလည်း လက်နက်စက်ရုံ ရှိပြီးသားလေ။ လက်နက်လည်း ထုတ်နိုင်တယ်။ ဆီလည်း ထုတ်နိုင်တယ်ဆိုတော့ KIO ကို ချဉ်းကပ်တာက ထောက်ပို့လမ်းကြောင်းအတွက် ချဉ်းကပ်တာလည်း ဖြစ်နိုင်ပါ တယ်။ KIA ကလည်း သူ့ကို ထိပ်တိုက် ဖြစ်လာတဲ့အချိန်၊ သူ့အနေနဲ့ နိုင်ငံရေး အဆုံးအဖြတ်ပေးတဲ့ အချိန်ကြတော့ သဘောထားတစ်မျိုး ဖြစ်ရင်ဖြစ်မှာပေါ့။ အခု KIA ကတော့ စကားလည်း မပြောသေးဘူး။ ဆွေးနွေးပွဲလည်းမဝင် သေးဘူး။ မြေပြင်မှာပဲ စစ်ရေးပဋိပက္ခတွေ ဖြစ်နေတဲ့အခါကြတော့ PDF က အသုံးတည့်ချင် တည့်မှာပေါ့။ နောက်ပိုင်း သူနိုင်ငံရေး political solution တစ်ခုခု ရတယ်ဆိုရင်တော့ PDF နဲ့ပတ်သက်ပြီး KIA ကလည်း သူ့ အထိုင်ကနေသူ စဉ်းစားတော့မှာပေါ့။ လောလောဆယ် လိုအပ်ချက်အရ တွဲနေတာလို့ပဲထင်တယ်။ မလိုလား အပ်တော့ဘူးဆိုရင် ကိုးကန့်တို့၊ ပလောင်တို့လိုပဲ ဖြစ်လာလိမ့်မယ်လို့ တွက်ရတာပဲ သိပ်ကွာမယ်တော့ မထင်ပါ ဘူး” ဟု ပြောသည်။

 KIA သည် စစ်ကိုင်းတိုင်းဒေသကြီးအတွင်းရှိ ဟုမ္မလင်း၊ ဗန်းမောက်၊ ထီးချိုင့်၊ တမူး၊ ခမ်းပတ်၊ ဖောင်းပြင်၊ ရွှေပြည်အေး၊ မော်လိုက်၊ ကသာ၊ ကောလင်း၊ ပင်လည်ဘူး၊ အင်းတော် အပါအဝင် နာဂဒေသတို့ကို ထိန်းချုပ် နိုင်ရေးအတွက် PDF၊ KNA-Burma(ကူကီး)၊ နာဂလက်နက်ကိုင်များဖြစ်သော ENDA/ENNO နှင့် NPDF၊ ABSDF၊ AA၊ CNDF တို့ကို ချိတ်ဆက်ကာ အကောင်အထည် ဖော်နေခြင်းဖြစ်ကြောင်း သိရသည်။

ထို့ပြင် ပြီးခဲ့သည့် ဩဂုတ်လအတွင်းကလည်း KIA ဒုတိယဥက္ကဋ္ဌ ဒုဗိုလ်ချုပ်ကြီးဂွမ်မော် ဖိတ်ကြားချက်အရ ချင်းညီနောင် အဖွဲ့ဝင်များဖြစ်သည့် ချင်းအမျိုးသားကောင်စီ (မင်းတပ်)၊ ချင်းအမျိုးသားအဖွဲ့ချုပ် (CNO/ CNDF)၊ ဇိုမီးဖက်ဒရယ်အစည်းအရုံး (ZFU)၊ ချင်းကာကွယ်ရေးတပ် (ကန်ပက်လက်)၊ ချင်းလဲန်းကာကွယ်ရေးတပ် (မတူပီ) တပ်မဟာ ၁ နှင့် မရာနယ်မြေအုပ်ချုပ်ရေးကောင်စီ (MTC/ MDF) တို့မှ ကိုယ်စားလှယ်များသည် လိုင်ဇာမြို့သို့ သွားရောက်ခဲ့ကြသေးသည်။