CNI International News
မော်စကို၊ နိုဝင်ဘာ ၂၉
အမေရိကန်နှင့် ယူကရိန်းတို့ ဆွေးနွေးနေသည့် ငြိမ်းချမ်းရေး အဆိုပြုချက် မူကြမ်းသည် ယူကရိန်းပဋိပက္ခ အဆုံးသတ်ရန် အနာဂတ် သဘောတူညီချက်၏ အခြေခံဖြစ်လာနိုင်ကြောင်း ရုရှားသမ္မတ ဗလာဒီမာ ပူတင် (Vladimir Putin) က နိုဝင်ဘာ ၂၇ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။
အမေရိကန်သမ္မတ ဒေါ်နယ်ထရမ့် (Donald Trump) က သူသည် ဒုတိယကမ္ဘာစစ်ပြီးနောက် ဥရောပတွင် အဆိုးရွားဆုံး ပဋိပက္ခဖြစ်သည့် ယူကရိန်းစစ်ပွဲကို အဆုံးသတ်လိုကြောင်း ပြောကြားခဲ့သည်။
သို့သော် ဩဂုတ်လက အလက်စကာ (Alaska ) တွင် ပူတင်နှင့် ပြုလုပ်ခဲ့သည့် အစည်းအဝေး အပါအဝင် ၎င်း၏ အားထုတ် ကြိုးပမ်းမှုများသည် ယူကရိန်းစစ်ပွဲကို အဆုံးသတ်နိုင်သည့် ငြိမ်းချမ်းရေးကို ဆောင်ကြဉ်းပေးနိုင်ခဲ့ခြင်း မရှိပေ။
ပြီးခဲ့သည့် သီတင်းပတ်က ပေါက်ကြားလာခဲ့သည့် အချက် ၂၈ ချက်ပါ အမေရိကန်၏ ငြိမ်းချမ်းရေးအစီအစဉ် ကြောင့် ယူကရိန်းနှင့် ဥရောပ အရာရှိများကို စိုးရိမ်စေခဲ့သည်။
ထိုငြိမ်းချမ်းရေးအစီအစဉ်တွင် ယူကရိန်း၏ နယ်မြေ စုစုပေါင်း၏ ၅ ပုံ ၁ ပုံကို ရုရှားက ထိန်းချုပ်ရေးနှင့် ယူကရိန်း စစ်တပ်အင်အားကို ကန့်သတ်ရေးတို့အား တောင်းဆိုထားသည့် ရုရှား၏ တောင်းဆိုချက်များကို လိုက်လျောထား ကြောင်း ယူကရိန်းနှင့် ဥရောပအရာရှိများက ယူဆခဲ့ကြသည်။
ယူကရိန်းငြိမ်းချမ်းရေး ဆုတောင်းနေစဉ်
ကာဂျစ်စတန်နိုင်ငံ၊ ဘိရှ်ကက် (Bishkek) မြို့တွင် ဆိုဗီယက်ယူနီယံ အဖွဲ့ဝင်ဟောင်း နိုင်ငံများ၏ ခေါင်းဆောင် များနှင့် ပြုလုပ်သည့် အစည်းအဝေး အပြီးတွင် ပူတင်က အမေရိကန်နှင့် ယူကရိန်းသည် အချက် ၂၈ ချက်ပါ အစီအစဉ်ကို ၄ ပိုင်းခွဲရန် ဆုံးဖြတ်ခဲ့ကြောင်းနှင့် ထိုအစီအစဉ်၏ မိတ္တူကို ရုရှားအစိုးရထံ ပေးပို့ခဲ့သည်ဟု ပြောကြားခဲ့သည်။
“ခြုံပြီးပြောရရင်တော့ အဲဒီအစီအစဉ်ဟာ အနာဂတ် သဘောတူညီချက်တွေအတွက် အခြေခံတစ်ခု ဖြစ်လာနိုင် တယ်ဆိုတာ ကျနော်တို့ သဘောတူပါတယ်။ အမေရိကန်ကလည်း ကျနော်တို့ရဲ့ သဘောထားကို ထည့်သွင်း စဉ်းစားထားတာကို ကျနော်တို့ သိခဲ့ပါတယ်” ဟု ပူတင်က ပြောကြားခဲ့သည်။
သို့သော် ထိုအစီအစဉ်နှင့်ပတ်သက်ပြီး ဆွေးနွေးမှုများ ပြုလုပ်ရန် လိုအပ်နေဆဲဖြစ်ကြောင်းလည်း ၎င်းက ဆိုသည်။
ရုရှားက ဥရောပကို တိုက်ခိုက်မည် မဟုတ်ကြောင်း ကတိကဝတ်ကို ဥရောပနိုင်ငံများက လိုချင်ပါက ရုရှားက လည်း ထိုကတိကဝတ်ကို ပေးရန် ဆန္ဒရှိသည်ဟုလည်း ပူတင်က ပြောကြားခဲ့သည်။
Source: ရိုက်တာ
