CNI International News

အစ္စလာမ်မာဘက်၊ နိုဝင်ဘာ ၂၈

အာဖဂန်နစ္စတန်နှင့် ပါကစ္စတန်ကြား ပြီးခဲ့သည့်လက အပစ်အခတ်ရပ်စဲရေး သဘောတူညီချက် ရရှိခဲ့သော်လည်း ပါကစ္စတန်နိုင်ငံအတွင်း ပြီးခဲ့သည့်ရက်ပိုင်းက အသေခံဗုံးခွဲ တိုက်ခိုက်မှုများနှင့် နှစ်နိုင်ငံနယ်စပ်တွင် ဒရုန်း တိုက် ခိုက်မှုများ ဖြစ်ပွားခဲ့သဖြင့် ထိုအပစ်အခတ်ရပ်စဲရေး သဘောတူညီချက်သည် ကျိုးပျက်လွယ်သော အခြေအနေသို့ ရောက်ရှိနေကြောင်း South China Morning Post မှ ဖော်ပြခဲ့သည်။

လက်ရှိတွင် အာဖဂန်နှင့် ပါကစ္စတန်တို့သည် တစ်ဖက်နှင့်တစ်ဖက် သတိ အနေအထားဖြင့် စောင့်ကြည့်နေကြ ချိန်၌ ကြားဝင်စေ့စပ်ညှိနှိုင်းသူများဖြစ်သည့် ကာတာ၊ တူရကီ၊ အီရန်နှင့်ရုရှားတို့သည် အာဖဂန်နှင့် ပါကစ္စတန် ကြား နောက်တစ်ကြိမ် ရန်လို တိုက်ခိုက်မှုများကို တားဆီးရန် အခွင့်အရေး အနည်းငယ်သာရှိကြောင်း လေ့လာသူ များက ပြောကြားခဲ့သည်။

တစ်နည်းဆိုရပါက အာဖဂန်နှင့် ပါကစ္စတန်ကြား တင်းမာမှုများသည် ရှည်လျားသည့် ကြားခံစစ်ဆင်ရေး တစ်ခု အဖြစ် ပြောင်းလဲသွားနိုင်ပြီး အိုင်အက်စ်-ခိုရာဆန် (Isis-K) ကဲ့သို့ အကြမ်းဖက် အဖွဲ့များအတွက် နောက်တစ်ကြိမ် ခေါင်းပြန်ထောင်လာနိုင်သည့် အခြေအနေသို့ ရောက်ရှိစေနိုင်ကြောင်း ကျွမ်းကျင်သူများက သတိပေးထားသည်။

ပါကစ္စတန်နှင့် အာဖဂန်နစ္စတန်ကြား အန္တရာယ်ကြီးသော ကြောင်နှင့်ကြွက် ကစားနည်းသည် တစ်ဖက်နှင့် တစ်ဖက် လက်စားချေသည့် အဆင့်သို့ ဝင်ရောက်လာခဲ့ကြောင်း ကနေဒါနှင့် ပြင်သစ်နိုင်ငံဆိုင်ရာ အာဖဂန် သံအမတ်ဟောင်း အိုမာ ဆာမက် (Omar Samad) က ပြောကြားခဲ့သည်။

ကြားဝင်စေ့စပ်ပေးသူများ အချိန်မီ ဝင်ရောက် မလာခင်မှာပင် တင်းမာမှုများသည် အလွယ်တကူ မြင့်တက်သွား နိုင်ကြောင်း ဆာမက်က ပြောသည်။

တာလီဘန်တွေကို တွေ့ရစဉ်

ပါကစ္စတန် တာလီဘန် (TTP) အဖွဲ့ဝင်များ ခိုလှုံနေသည်ဟု ကုလသမဂ္ဂက ခန့်မှန်းထားသည့် အာဖဂန်၏ ခို့စ် (Khost) ၊ ကူနာ (Kunar ) နှင့် ပက်တီကာ (Paktika) ပြည်နယ် ၃ ခုတွင် ပါကစ္စတန်က လေကြောင်း တိုက်ခိုက်ခဲ့ ကြောင်း အာဖဂန်တာလီဘန်အဖွဲ့က စွပ်စွဲခဲ့သည်။

သို့သော် ထိုလေကြောင်း တိုက်ခိုက်မှုများအတွက် သင့်တော်သည့် အချိန်တွင် သင့်တော်သလို တုန့်ပြန်သွားမည် ဟု အာဖဂန်တာလီဘန်အဖွဲ့က ခြိမ်းခြောက်ထားသော်လည်း လက်တွေ့ တုန့်ပြန်ခြင်း မရှိသေးပေ။

“ပါကစ္စတန်တပ်ဖွဲ့တွေရဲ့ ရန်လိုတဲ့ လုပ်ဆောင်ချက်တွေဟာ ဘာကိုမှ အကျိုးမရှိစေပါဘူး” ဟု အာဖဂန် အစိုးရ အဖွဲ့ ပြောရေးဆိုခွင့်ရှိသူ ဇာဘီဟူလာ မူဂျာဟစ် (Zabihullah Mujahid) က ပြောကြားခဲ့သည်။

ပါကစ္စတန်အစိုးရကမူ TTP အဖွဲ့သည် ယခုလအတွင်း အသေခံဗုံး ခွဲတိုက်ခိုက်မှု ၃ ကြိမ် လုပ်ဆောင်ခဲ့ကြောင်း ပြောကြားခဲ့ပြီး ပါကစ္စတန်ဝန်ကြီးချုပ် ရှာဘက် ရှရစ်ဖ် (Shehbaz Sharif) ကလည်း အာဖဂန်မှ ဝင်ရောက်လာ သည့် စစ်သွေးကြွများကို လိုက်လံ နှိမ်နင်းသွားမည်ဖြစ်ကြောင်း ကတိပြုခဲ့သည်။

Source: South China Morning Post