CNI International News

ဝါရှင်တန်၊ ဇန်နဝါရီ ၁၉

အမေရိကန်တပ်ဖွဲ့များသည် ယီမင်နိုင်ငံရှိ အီရန်၏ ကျောထောက်နောက်ခံ ရရှိထားသည့် ဟူရ်သီသူပုန်များကို သီတင်းတစ်ပတ်အတွင်း စတုတ္ထမြောက်နေ့အဖြစ် တိုက်ခိုက်ခဲ့ရာတွင် ဟူရ်သီသူပုန်များ ပစ်လွှတ်ရန် ပြင်ဆင် ထားသော ဒုံးကျည် ၁၄ စင်းကို တိုက်ခိုက်ဖျက်ဆီးနိုင်ခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ထိုဒုံးကျည်များသည် ဒေသတွင်း အမေရိကန်ရေတပ် စစ်သင်္ဘောများနှင့် ကုန်တင်သင်္ဘောများအတွက် ခြိမ်းခြောက်မှုဖြစ်သည်ဟု အမေရိကန်ဗဟိုစစ်ဌာနချုပ် (CENTCOM)က ဇန်နဝါရီ ၁၇ ရက်တွင် ပြောကြားခဲ့သည်။

ယီမင်နိုင်ငံ၏ နေရာဒေသ အများအပြားကို ထိန်းချုပ်ထားသည့် ဟူရ်သီသူပုန်သည် ပြီးခဲ့သည့်နှစ် နိုဝင်ဘာလ ကတည်းက ဒေသတွင်းရှိ သင်္ဘောများအား တိုက်ခိုက်နေပြီး အမေရိကန်စစ်တပ်၏ တန်ပြန်တိုက်ခိုက်မှုများကို ခံခဲ့ရသည့်တိုင် ၎င်းတို့၏ တိုက်ခိုက်မှုများကို ရပ်တန့်မည်မဟုတ်ကြောင်း ပြောကြားခဲ့သည်။

"အစ္စရေးရဲ့ သင်္ဘောတွေ၊ ဒါမှမဟုတ် အစ္စရေးဆိပ်ကမ်းတွေကို သွားရောက်မယ့် သင်္ဘောတွေကို ပစ်မှတ်ထား တိုက်ခိုက်နေတာတွေကို ကျနော်တို့ ရပ်တန့်သွားမှာ မဟုတ်ပါဘူး။ ဒါက ပါလက်စတိုင်းတွေကို ထောက်ခံကြောင်း ပြသတဲ့အနေနဲ့ တိုက်ခိုက်နေတာပါ" ဟု ဟူရ်သီသူပုန်အဖွဲ့၏ ပြောရေးဆိုခွင့်ရှိသူ မိုဟာမက် အဗ္ဗဒယ်ဆာလမ် (Mohamed Abdelsalam)က အယ်လ်ဂျာဇီးယား သတင်းဌာနကို ဇန်နဝါရီ ၁၈ ရက်တွင် ပြောကြားခဲ့သည်။

အမေရိကန်ဗဟိုစစ်ဌာနချုပ်ကို တွေ့ရစဉ်

အမေရိကန် ဗဟိုစစ်ဌာနချုပ်ကမူ ဟူရ်သီသူပုန်တို့၏ ဒုံးကျည်များသည် အချိန်မရွေး ပစ်လွှတ်နိုင်သည့် အသင့် အနေအထားတွင် ရှိနေသဖြင့် ထိုဒုံးကျည်များကို တိုက်ခိုက် ဖျက်ဆီးခဲ့ခြင်းဖြစ်ကြောင်း X လူမှုမီဒီယာ၌ ရေးသား ဖော်ပြခဲ့သည်။

အမေရိကန်၏ တိုက်ခိုက်မှုများသည် ပင်လယ်နီ (Red Sea) ၊ ဘက်ဘ် အယ်လ် မန်ဒက် ရေလက်ကြား (Bab-el-Mandeb Strait) နှင့် အေဒင်ပင်လယ်ကွေ့ (Gulf of Aden) အတွင်းရှိ နိုင်ငံတကာ ကုန်တင်သင်္ဘောများကို ပစ်မှတ်ထားသည့် ဟူရ်သီသူပုန်များ၏ အဆင်အခြင်ကင်းမဲ့သော တိုက်ခိုက်မှု စွမ်းဆောင်ရည်များကို လျော့ကျ စေရန်ဖြစ်ကြောင်း CENTCOM က ထုတ်ပြန်ခဲ့သည်။

ဟူရ်သီသူပုန်တို့ ထိန်းချုပ်ထားသည့် ယီမင်နိုင်ငံ၏ Saba သတင်းအေဂျင်စီကမူ အမေရိကန်နှင့် ဗြိတိန်တပ်ဖွဲ့များ သည် ဟိုဒီအိုင်ဒါ (Hodeidah) ၊ တာအစ်ဇ် (Taiz) ဒါမာ (Dhamar) ၊ အယ်လ် ဘေဒါ (al-Bayda) နှင့် ဆာဒါ (Saada) ပြည်နယ်များကို ထိမှန်ခဲ့ကြောင်း ဖော်ပြခဲ့သည်။

သို့သော် အမေရိကန်စစ်ဌာနချုပ်ကမူ ဇန်နဝါရီ ၁၇ ရက်က ပြုလုပ်ခဲ့သည့်် တိုက်ခိုက်မှုများတွင် ဗြိတိန်တပ်ဖွဲ့များ ပါဝင်ကြောင်း ပြောကြားခဲ့ခြင်းမရှိပေ။

Source: အယ်လ်ဂျာဇီးယား

CNI International News

အစ္စလာမ်မာဘက်၊ ဇန်နဝါရီ ၁၉

အီရန်နိုင်ငံအတွင်းရှိ စစ်သွေးကြွစခန်းများကို ပါကစ္စတန်လေတပ်က ဇန်နဝါရီ ၁၈ ရက်တွင် လေကြောင်း တိုက်ခိုက်ခဲ့သဖြင့် လူ ၉ ဦးထက်မနည်း သေဆုံးခဲ့ကာ နှစ်နိုင်ငံအကြား တင်းမာမှုများမြင့်တက်လာခဲ့သည်ဟု အေပီမှ ဖော်ပြခဲ့သည်။

အီရန်က ပါကစ္စတန်နယ်စပ်ဒေသတွင် ဘာလုချ် (Baluch) စစ်သွေးကြွ အဖွဲ့နှစ်ဖွဲ့ကို ဇန်နဝါရီ ၁၆ ရက်က တိုက်ခိုက်ခဲ့ပြီးနောက် ပါကစ္စတန်ကလည်း အီရန်နိုင်ငံအတွင်း လေကြောင်းတိုက်ခိုက်မှုများ ပြုလုပ်ပြီး တုန့်ပြန်ခဲ့ခြင်းဖြစ်သည်။

ထိုစစ်သွေးကြွအဖွဲ့များသည် ပါကစ္စတန်နှင့် အီရန်နိုင်ငံများတွင် အကြမ်းဖက် တိုက်ခိုက်မှုများ ပြုလုပ်နေသည်။

အဆိုပါ တိုက်ခိုက်မှုများနှင့်ပတ်သက်ပြီး အီရန်နှင့်ပါကစ္စတန်အကြား အပြန်အလှန် စွပ်စွဲပြစ်တင်မှုများ ပြုလုပ် ခဲ့သည်။

ယခုကဲ့သို့ တစ်နိုင်ငံနှင့် တစ်နိုင်ငံအကြား တိုက်ခိုက်မှုများကြောင့် အီရန်နှင့် ပါကစ္စတန်အကြား သံတမန် ဆက်ဆံရေးတွင် တင်းမာမှုများ မြင့်တက်ခဲ့ပြီး နှစ်နိုင်ငံစလုံးသည် ပြည်တွင်းရေး ဖိအားများနှင့် ရင်ဆိုင်နေရသည်။

 ကန့်ကွက်နေကြစဉ်

ဂါဇာကမ်းမြောင်ဒေသတွင် အစ္စရေးနှင့် ဟားမာ့စ်အဖွဲ့အကြား စစ်ပွဲဖြစ်ပွားနေချိန်တွင် အီရန်က ပါကစ္စတန် နယ်နိမိတ်ပေါ်တွင် တိုက်ခိုက်မှုများ ပြုလုပ်ခဲ့ပြီး ပါကစ္စတန်ကလည်း အီရန်၏ နယ်နိမိတ်ပေါ်၌ တုန့်ပြန် တိုက်ခိုက်မှုများ ပြုလုပ်ခဲ့ခြင်းဖြစ်သည်။

ဇန်နဝါရီ ၁၈ ရက်က တိုက်ခိုက်မှုသည် ရည်ရွယ်ထားသည့် စစ်ရေးပစ်မှတ်များကို တိကျစွာ ထိမှန်ခဲ့ကြောင်း ပါကစ္စတန်နိုင်ငံခြားရေးဝန်ကြီးဌာနက ပြောကြားခဲ့သည်။ 

"ဒီနေ့ မနက်ပိုင်းက လုပ်ဆောင်ချက်ဟာ အကြမ်းဖက်လှုပ်ရှားမှုတွေ မဖြစ်ပွားခင်မှာ ခိုင်မာတိကျတဲ့ ထောက်လှမ်းရေးသတင်းတွေနဲ့အတူ ပြုလုပ်ခဲ့တာ ဖြစ်ပါတယ်။ ဒီလုပ်ဆောင်ချက်ဟာ ပါကစ္စတန်ရဲ့ အမျိုးသားလုံခြုံရေးကို ခြိမ်းခြောက်မှုတွေရန်က ကာကွယ်ဖို့ ပြုလုပ်ခဲ့တာ ဖြစ်ပါတယ်" ဟု ပါကစ္စတန် နိုင်ငံခြားရေးဝန်ကြီးဌာနက ထုတ်ပြန်ခဲ့သည်။

နိုင်ငံခြားရေး၀န်ကြီးဌာနရှေ့မှာ လုံခြုံရေးတစ်ဦးကိုတွေ့ရစဉ်

ပါစ္စတန်စစ်တပ်သည် တိုက်ခိုက်ရေးဒရုန်းများ၊ ရော့ကတ်များ၊ ဖောက်ခွဲရေးပစ္စည်းများနှင့် ဒုံးကျည်များကို အသုံးပြု တိုက်ခိုက်ခဲ့ခြင်းဖြစ်ကြောင်း ထုတ်ပြန်ခဲ့ပြီး ပါကစ္စတန် တိုက်လေယာဉ်များသည် အီရန် လေပိုင်နက် အတွင်းသို့ ဝင်ရောက်ခြင်းမရှိဘဲ အဝေးမှ ပစ်ခတ်တိုက်ခိုက်ခဲ့သည့် သဘောမျိုး ထုတ်ပြန်ခဲ့သည်။

အီရန်၏ စစ္စတန်နှင့် ဘာလူချီစတန် (Sistan and Baluchestan) ပြည်နယ်၏ ဒုတိယအုပ်ချုပ်ရေးမှူး အလီ ရီဇာ မာဟာမက်တီ (Ali Reza Marhamati) ကမူ ပါကစ္စတန်၏ တိုက်ခိုက်မှုကြောင့် အမျိုးသမီး ၃ ဦး၊ ကလေး ၄ ဦးနှင့် အမျိုးသား ၂ ဦးသေဆုံးခဲ့ပြီး အပြစ်မဲ့ အရပ်သားများ သေဆုံးခဲ့ခြင်းဖြစ်သည်ဟု ပြောကြားခဲ့သည်။

Source: အေပီ

CNI International News

ပေကျင်း၊ ဇန်နဝါရီ ၁၈

ထိုင်ဝမ်ကို ထိန်းချုပ်ရန် အင်အားသုံး လုပ်ဆောင်သွားမည်ဆိုသည့် ခြိမ်းခြောက်မှုများသည် ပြည်ပကြားဝင် စွက်ဖက်မှုများနှင့် လက်တစ်ဆုပ်စာ ထိုင်ဝမ်ခွဲထွက်ဝါဒီများကိုသာ ရည်ရွယ်ခြင်းဖြစ်ကြောင်း တရုတ်က ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထို့ပြင် ထိုင်ဝမ်ဒေသခံများ အနေဖြင့် တရုတ်အပေါ် အထင်အမြင် လွဲမှားနေမှုများကို အဆုံးသတ်ရန် လိုအပ် ကြောင်းလည်း တရုတ်၏ ထိုင်ဝမ်ရေးရာရုံးက ဇန်နဝါရီ ၁၇ ရက်တွင် ပြောကြားခဲ့သည်။

ဇန်နဝါရီ ၁၃ ရက်က ပြုလုပ်ခဲ့သည့်် သမ္မတရွေးကောက်ပွဲကို အနိုင်ရခဲ့သည့် ထိုင်ဝမ်၏ ဒီမိုကရက်တစ် တိုးတက် ရေးပါတီ (DPP) ကမူ ထိုင်ဝမ်ကို ပိုင်ဆိုင်ကြောင်း ကြေညာထားသော တရုတ်၏ ပြောကြားချက်များကို ငြင်းဆို ခဲ့ပြီး တရုတ်နှင့် ဆွေးနွေးမှုများပြုလုပ်ရန် ထပ်တလဲလဲ ကမ်းလှမ်းခဲ့သည်။

သို့သော် တရုတ်အစိုးရက ထိုင်ဝမ်၏ ကမ်းလှမ်းမှုများကို ပယ်ချခဲ့သည်။

ထိုင်ဝမ်သမ္မတအဖြစ် ရွေးကောက်ခံခဲ့ရသည် လိုင်ချင်တေးကို အန္တရာယ်များသည့် ခွဲထွက်ဝါဒီ တစ်ဦးအဖြစ် တရုတ်က ယူဆထားသည်။ 

 ထိုင်ဝမ် အလံကို လွှင့်တင်နေစဉ်

တရုတ်၏ ထိုင်ဝမ်ရေးရာရုံးမှ ပြောရေးဆိုခွင့်ရှိသူ ချန်းပင်ဟွာ (Chen Binhwa) ကမူ ထိုင်ဝမ်ရွေးကောက်ပွဲ ရလဒ် သည် ထိုင်ဝမ်အပေါ်ထားရှိသည့်် တရုတ်၏သဘောထားကို ပြောင်းလဲစေနိုင်မည် မဟုတ်ကြောင်းနှင့် ထိုင်ဝမ် သည် တရုတ်နှင့်ပြန်လည် ပေါင်းစည်းရမည်ဖြစ်ကြောင်း ပြောကြားခဲ့သည်။

ထို့ပြင် မိမိတို့၏ အင်အားပြ ခြိမ်းခြောက်မှုများသည် ထိုင်ဝမ်ဒေသခံ အများစုကို ရည်ရွယ်ခြင်း မဟုတ်ကြောင်း၊ ပြည်ပ၏ ကြားဝင်စွက်ဖက်မှုများနှင့် ထိုင်ဝမ်လွတ်လပ်ရေး ခွဲထွက်ဝါဒီ အချို့ကိုသာ ရည်ရွယ်ခြင်းဖြစ်ကြောင်း ချန်က ပြောကြားခဲ့သည်။

တရုတ်သည် ပြီးခဲ့သည့် တစ်နှစ်ကျော်က ထိုင်ဝမ်ကျွန်းအနီးတွင် အကြီးစား စစ်ရေးလေ့ကျင့်မှု နှစ်ကြိမ်ပြုလုပ်ခဲ့ ပြီး ထိုင်ဝမ်ရေလက်ကြားအတွင်းသို့ တိုက်လေယာဉ်များနှင့် စစ်သင်္ဘောများကို ပုံမှန်စေလွှတ်ခဲ့သည်။

DPP ပါတီအနေဖြင့် နောင်တမရဘဲ လွတ်လပ်ရေးကြိုးပမ်းသည့် ရန်လိုမှုများကို ဆက်လက် လုပ်ဆောင်မည် ဆိုပါက ထိုင်ဝမ်ကို အန္တရာယ်များသည့် အခြေအနေသို့ တွန်းပို့ရာရောက်ပြီး ထိုင်ဝမ်ကို အကြီးအကျယ် ထိခိုက် နစ်နာစေလိမ့်မည်ဖြစ်ကြောင်း ချန်က ပြောကြားခဲ့သည်။

Source: ရိုက်တာ

CNI International News

ဘန်ကောက်၊ ဇန်နဝါရီ ၁၈ 

ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) သည် ရဲတပ်ဖွဲ့ အထွေထွေဆေးရုံတွင် ဆက်ရှိနေဆဲဖြစ်ကြောင်းနှင့် ပြစ်ဒဏ်ကာလမစေ့မီ ကတိခံဝန်ဖြင့် ပြန်လည်လွတ်မြောက်ရန် လျှောက်ထား နိုင်ကြောင်း တရားရေးအာဏာပိုင်များက ဇန်နဝါရီ ၁၇ ရက်တွင် ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့ သည်။ 

သက်ဆင်သည် အမှန်တကယ် နာမကျန်းဖြစ်နေခြင်း ဟုတ်/မဟုတ်နှင့် ဆေးရုံ၏ ဆေးကုသဆောင်တွင် တကယ် ရှိ/မရှိ အတည်ပြုရန် နိုင်ငံရေးပါတီများက ကြိုးပမ်းနေချိန်တွင် တရားရေးဝန်ကြီး၏ အကြံပေးပုဂ္ဂိုလ် ဆွမ်ဘွန် မူအန်ကလမ် (Somboon Muangklum) က တရားရေးဝန်ကြီးဌာန၌ ပြုလုပ်သည့် သတင်းစာ ရှင်းလင်းပွဲမှာ အထက်ပါအတိုင်း ပြောကြားခဲ့သည်။

အစိုးရဌာနများအပေါ် မကျေနပ်ချက်များကို စုံစမ်းတင်ပြရန် အစိုးရက ခန့်ထားသည့် အရာရှိ (ombudsman)၏ ကိုယ်စားလှယ်တစ်ဦးသည် ရဲတပ်ဖွဲ့ အထွေထွေဆေးရုံသို့ လာရောက်ခဲ့ပြီး ဆေးရုံဝင်းအတွင်းရှိ မဟာ ဘူမီဘော ရာချာနူဆွန်း ၈၈ ပန်ဆာ အဆောက်အအုံ (Maha Bhumibol Rachanusorn 88 Phansa Building) ၏ ၁၄ လွှာ တွင် သက်ဆင်နှင့် တွေ့ဆုံခဲ့ကြောင်း ဆွမ်ဘွန်က ပြောကြားခဲ့သည်။

သက်ဆင်နဲ့ ထိုင်းရဲတပ်ဖွဲ့အကြီးအကဲကိုတွေ့ရစဉ်

သက်ဆင်သည် ဆေးရုံတွင် ဆက်ရှိနေပြီး အခြားသူများ ထင်နေသကဲ့သို့ လူနေတိုက်ခန်းထဲတွင် နေထိုင်နေခြင်း မဟုတ်ကြောင်း မစ္စတာဆွမ်ဘွန်က ပြောသည်။

အကျဉ်းသားများ အကျင့်စာရိတ္တ ပြန်လည်ထူထောင်ရေးဌာနမှ လက်ထောက်ညွှန်ကြားရေးမှူးချုပ် စစ်သီ သုတိဗွန် (Sitthi Sutivong) လည်း ထိုသတင်းစာ ရှင်းလင်းပွဲကို တက်ရောက်ခဲ့ပြီး သက်ဆင်သည် အသက်အရွယ် ကြီးရင့်ပြီး နာမကျန်းဖြစ်နေ၍ ခံဝန်ဖြင့် ပြန်လည်လွတ်မြောက်ရန် လျှောက်ထားခွင့်ရှိကြောင်း သတင်းထောက် များကို ပြောကြားခဲ့သည်။

မည်သို့ပင်ဆိုစေ အကျဉ်းသားများသည် ၎င်းတို့ကိုယ်တိုင် ခံဝန်ဖြင့် လွတ်မြောက်ရန် လုပ်ဆောင်ခွင့်မရှိသဖြင့် အကျဉ်းသားများကို ခံဝန်ဖြင့် ပြန်လွှတ်ပေးရန် အကျဉ်းထောင် အုပ်ချုပ်ရေးမှူး၏ ခံဝန်လျှောက်ထားပေးမှုကို လိုအပ်ကြောင်း စစ်သီက ပြောကြားခဲ့သည်။

သက်ဆင်နဲ့ သမီး ၂ ဦးကိုတွေ့ရစဉ်

သက်ဆင်ကို အကျဉ်းချခဲ့သည့် ဘန်ကောက် ရမန်အကျဉ်းထောင်၏ အုပ်ချုပ်ရေးမှူးသည် လက်ရှိအချိန်အထိ သက်ဆင်ကို ခံဝန်ဖြင့် ပြန်လွှတ်ပေးရန် တောင်းဆိုခြင်းမရှိသေးကြောင်း ၎င်းက ထပ်လောင်း ပြောကြားခဲ့သည်။

အသက် ၇၄ နှစ်အရွယ် သက်ဆင်သည် ပြီးခဲ့သည့်နှစ် သြဂုတ်လ ၂၂ ရက်က ထိုင်းနိုင်ငံသို့ ပြန်လည် ရောက်ရှိခဲ့ ပြီးနောက် အကျင့်ပျက်ခြစားမှု၊ အာဏာအလွဲသုံးမှုများဖြင့် ထောင်ဒဏ် ၁၅ နှစ် ချမှတ်ခံခဲ့ရသည်။ 

သို့သော် သက်ဆင်က ထိုင်းဘုရင်ထံတွင် အသနားခံစာတင်ခဲ့ပြီးနောက် ထိုင်းဘုရင်က ၎င်း၏ ထောင်ဒဏ်ကို ၁ နှစ်အထိ လျှော့ချပေးခဲ့သည်။

ထိုင်းအထက်လွှတ်တော် အမတ်တစ်ဦးကမူ သက်ဆင်သည် လာမည့်လတွင် ပြန်လည်လွတ်မြောက် လာနိုင် ကြောင်း ခန့်မှန်းပြောကြားခဲ့သည်။ 

Source: ဘန်ကောက်ပို့စ်

CNI International News

မော်စကို၊ ဇန်နဝါရီ ၁၈

စစ်ပွဲဆက်လက် ဖြစ်ပွားနေမည်ဆိုပါက ယူကရိန်း၏ အချုပ်အခြာအာဏာကို ပြင်းထန်စွာ ထိခိုက်စေလိမ့်မည် ဖြစ်ကြောင်း ရုရှားသမ္မတ ဗလာဒီမာပူတင် (Vladimir Putin)က ပြောကြားခဲ့ကြောင်း ရိုက်တာမှ ဖော်ပြခဲ့သည်။

ထို့နောက် ရုရှားသည် မိမိတို့ရရှိထားသည် နယ်နိမိတ်များကို မည်သည့်အခါမျှ စွန့်လွှတ်မည်မဟုတ်ကြောင်း ရုရှားသမ္မတ ပူတင် (Vladimir Putin) က ဇန်နဝါရီ ၁၆ ရက်တွင် ပြောကြားခဲ့သည်။

ယူကရိန်းသမ္မတ  ဇာလန်းစကီး (Volodymyr Zelenskiy) ၏ တောင်းဆိုမှုဖြင့် ကမ္ဘာလုံးဆိုင်ရာ ညီလာခံတစ်ခုကို လက်ခံကျင်းပရန် ဆွစ်ဇာလန်နိုင်ငံက သဘောတူခဲ့ပြီးနောက် တစ်ရက်အကြာတွင် ပူတင်၏ မှတ်ချက်စကားများ ထွက်ပေါ်ခဲ့ခြင်းဖြစ်သည်။

အနောက်နိုင်ငံများနှင့် ယူကရိန်းအကြား ဆွေးနွေးနေသည့် ငြိမ်းချမ်းရေးဖော်မြူလာများကို ပူတင်က ပယ်ချခဲ့ပြီး ထိုငြိမ်းချမ်းရေးဖော်မြူလာများထဲတွင် လက်မခံနိုင်ဖွယ် တောင်းဆိုချက်များ ပါဝင်နေသည်ဟု ပြောကြားခဲ့သည်။

 ဇာလန်းစကီးကို တွေ့ရစဉ်

"ကောင်းပြီလေ။ သူတို့က မဆွေးနွေးချင်ဘူးဆိုလည်း မဆွေးနွေးရုံပဲပေါ့။ ယူကရိန်းရဲ့ တန်ပြန်ထိုးစစ်က ကျရှုံးရုံ တင် မကပါဘူး။ အခြေအနေက ရုရှားစစ်တပ်ရဲ့ လက်ထဲကို အလုံးစုံရောက်ရှိနေပါပြီ။ ဒီအတိုင်းသာ ဆက်သွား မယ်ဆိုရင် ယူကရိန်းရဲ့ အချုပ်အခြာအာဏာပိုင်မှုကို အစားထိုး မရလောက်တဲ့အထိ အကြီးအကျယ် ထိခိုက်စေ ပါလိမ့်မယ်"ဟု ပူတင်က ပြောကြားခဲ့သည်။

ယူကရိန်း၏ တန်ပြန်ထိုးစစ် အောင်မြင်ခြင်း မရှိမှုနှင့်အတူ မကြာသေးမီ လများအတွင်းက စစ်ပွဲနှင့်ပတ်သက်ပြီး ထုတ်ပြန်ခဲ့သည့် ပူတင်၏ အစီရင်ခံစာများထဲတွင် ၎င်းကိုယ်ကိုယ် ပိုမိုယုံကြည်မှုရှိလာသည့် လက္ခဏာများကို ပြသခဲ့သလို ပိုမိုရန်လိုလာသည့် အသွင်ကို မြင်တွေ့ရသည်။

လက်ရှိအချိန်တွင် ရုရှားသည် ယူကရိန်း၏ နယ်မြေ ၁၇ ဒသမ ၅ ရာခိုင်နှုန်းကို ထိန်းချုပ်ထားသည်။ 

ယူကရိန်းစစ်သားတွေကိုတွေ့ရစဉ်

ဆွေးနွေးညှိနှိုင်းမှုများအတွက် ပြောဆိုမှုများသည် ယူကရိန်းတွင် မိမိတို့ ထိန်းချုပ်ထားသည့် နယ်မြေများကို စွန့်လွှတ်ရန် ကြိုးပမ်းချက် တစ်ခုဖြစ်သည်။

ထိုကြိုးပမ်းချက်သည် မဖြစ်နိုင်ကြောင်း၊ အောင်မြင်လိမ့်မည် မဟုတ်သည်ကို လူတိုင်းက သိရှိထားကြောင်း ပူတင် က ပြောကြားခဲ့သည်။  

ဇာလန်းစကီးက အဆိုပြုခဲ့သည့် ငြိမ်းချမ်းရေး ဖော်မြူလာတစ်ခုတွင် ယူကရိန်း၏ နယ်မြေတည်တံ့ခိုင်မြဲရေးကို ပြန်လည်ထိန်းသိမ်းရန်၊ ရန်လိုမှုများကို ရပ်နားရန်၊ ရုရှားစစ်သားများ ယူကရိန်းမှ ထွက်ခွာရန်နှင့် အခြားအချက် များ ပါဝင်သည်။ 

ရုရှားကမူ ဆွေးနွေးညှိနှိုင်းမှုများသည် မြေပြင်တွင် ရုရှားတပ်ဖွဲ့များ ဖန်တီးခဲ့သည့် လက်တွေ့ကျသော အခြေအနေ အသစ်များကိုပါ ထည့််သွင်း ဆွေးနွေးရမည်ဖြစ်ကြောင်း ပြောကြားခဲ့သည်။

Source: ရိုက်တာ

ဘဂ္ဂဒက်၊ ဇန်နဝါရီ ၁၇

အီရတ်နိုင်ငံရှိ တစ်စိတ်တစ်ပိုင်း ကိုယ်ပိုင်အုပ်ချုပ်ခွင့်ရ ကာ့ဒ်ဒေသတွင် အစ္စရေး၏ စပိုင်ဌာနချုပ်ကို အီရန်၏ တော်လှန်ရေးအစောင့်တပ်ဖွဲ့က တိုက်ခိုက်ခဲ့ကြောင်း အီရန်က ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထို့ပြင် အီရန်တော်လှန်ရေး အစောင့်တပ်ဖွဲ့သည် ဆီးရီးယားနိုင်ငံတွင် အိုင်အက်စ် စစ်သွေးကြွများကိုလည်း တိုက်ခိုက်ခဲ့သည်ဟု အီရန်နိုင်ငံပိုင်မီဒီယာက ဇန်နဝါရီ ၁၅ ရက်တွင် ဖော်ပြခဲ့သည်။

အောက်တိုဘာ ၇ ရက်က စတင်ဖြစ်ပွားခဲ့သည့် အစ္စရေး-ဟားမာ့စ် စစ်ပွဲအတွင်း ယခုကဲ့သို့ တိုက်ခိုက်မှုများသည် အရှေ့အလယ်ပိုင်းဒေသအနှံ့ ပဋိပက္ခများ ဖြစ်ပွားမည့်အရေးကို စိုးရိမ်မှုများ ပိုမိုမြင့်တက်စေခဲ့သည်။

အီရတ်ရှိ မော့ဆက်ဌာနချုပ် တိုက်ခိုက်ခံရစဉ်

"မကြာသေးခင်က အီရန်ထိပ်သီး တပ်မှူးတစ်ဦးနဲ့ တော်လှန်ရေးအင်အားစုတွေရဲ့ တပ်မှူးတွေကို သတ်ဖြတ်ခဲ့တဲ့ အစ္စရေးရဲ့ ရက်စက်ကြမ်းကြုတ်မှုတွေကို တုန့်ပြန်တဲ့အနေနဲ့ အီရတ်နိုင်ငံ ကာ့ဒ်ဒေသမှာရှိတဲ့ အစ္စရေး ထောက် လှမ်းရေးအဖွဲ့ မော့ဆက် (Mossad) ရဲ့ ဌာနချုပ်တွေထဲက တစ်ခုကို ပဲ့ထိန်းဒုံးကျည်တွေနဲ့ တိုက်ခိုက်ခဲ့ပါတယ်" ဟု အီရန်တော်လှန်ရေးအစောင့်တပ်ဖွဲ့က ထုတ်ပြန်ခဲ့သည်။

ထိုဖြစ်စဉ်နှင့်ပတ်သက်ပြီး မှတ်ချက်ပေးရန် တောင်းဆိုမှုကို အစ္စရေး အစိုးရအရာရှိများက ချက်ချင်းတုန့်ပြန်ခဲ့ခြင်း မရှိပေ။ 

ကာ့ဒ်ဒေသရှိ အာဘီလ် (Erbil) မြို့တော်တွင် အမေရိကန်ကောင်စစ်ဝန်ရုံးအနီးရှိ လူနေရပ်ကွက်များ၏ အရှေ့ မြောက်ပိုင်းတွင် ဖြစ်ပွားခဲ့သည့် ထိုတိုက်ခိုက်မှုများအပြင် အီရန်တပ်ဖွဲ့များသည် ဆီးရီးယားနိုင်ငံရှိ အိုင်အက်စ် စစ်သွေးကြွများ အပါအဝင် အီရန်တွင် အကြမ်းဖက်မှုများ လုပ်ဆောင်နေသည့် အကြမ်းဖက်သမားများကို ပဲ့ထိန်းဒုံးကျည်များဖြင့် ပစ်ခတ်တိုက်ခိုက်ခဲ့သည်ဟု ထုတ်ပြန်ချက်တွင် ဖော်ပြခဲ့သည်။ 

သေဆုံးသွားပြီးဖြစ်သည့် အီရန်တပ်မှူး ဆိုလေမာနီကို တွေ့ရစဉ်

အိုင်အက်စ်အဖွဲ့သည် အီရန်တွင် ယခုလအတွင်း လူပေါင်း ၁၀၀ နီးပါး သေဆုံးခဲ့သည့် ဖောက်ခွဲတိုက်ခိုက်မှုနှစ်ခုကို ၎င်းတို့ လုပ်ဆောင်ခဲ့ခြင်းဖြစ်ကြောင်း တာဝန်ခံ ထွက်ဆိုခဲ့သည်။

အမေရိကန်၏ ဒရုန်းတိုက်ခိုက်မှုကြောင့် သေဆုံးခဲ့သည့် အီရန်ထိပ်သီးတပ်မှူး ကက်ဆမ် ဆိုလေမာနီ (Qassam Soleimani) ၏ ဝမ်းနည်းအောင့်မေ့ဖွယ် နှစ်ပတ်လည် အခမ်းအနားတွင် အိုင်အက်စ်အဖွဲ့က ဖောက်ခွဲတိုက်ခိုက်ခဲ့ ခြင်းဖြစ်သည်။

အီရန်ကမူ မိမိတို့ အာဇာနည်များ၏ နောက်ဆုံးသွေးစက်များ မကုန်မခမ်းမချင်း လက်တုန့်ပြန်မှုများကို ဆက်လက် လုပ်ဆောင်သွားမည်ဖြစ်ပြီး တော်လှန်ရေး အစောင့်တပ်ဖွဲ့၏ ထိုးစစ်ဆန်သည့် စစ်ဆင်ရေးများကို ဆက်လက် ပြုလုပ်သွားမည်ဟု ထုတ်ပြန်ချက်တွင် ဖော်ပြခဲ့သည်။

Source: ရိုက်တာ

CNI International News

ဘန်ကောက်၊ ဇန်နဝါရီ ၁၇

ထိုင်းအစိုးရသည် မြန်မာနိုင်ငံအတွင်းရှိ ခုခံနိုင်စွမ်းအားနည်းသည့် လူဦးရေကို လူသားချင်း စာနာထောက်ထားမှု ဆိုင်ရာ အကူအညီများ ထောက်ပံ့ပေးရန် စဉ်းစားနေကြောင်း ဘန်ကောက်ပို့စ်မှ ဖော်ပြခဲ့သည်။

ထို့ပြင် မြန်မာနိုင်ငံ၏ ပဋိပက္ခကို အဖြေရှာရန် မြန်မာခေါင်းဆောင်များ၊ တိုင်းရင်းသား လူနည်းစုများနှင့်အတူ ဆွေးနွေးမှုများကို ဦးဆောင်ပြုလုပ်ရန် စဉ်းစားနေသည်ဟုလည်း ထိုအစီအစဉ်နှင့်ပတ်သက်ပြီး သိရှိထားသည့် ထိုင်းစစ်ဘက်ဆိုင်ရာ သတင်းရင်းမြစ်တစ်ခုက ပြောကြားခဲ့သည်။

ထိုင်းဝန်ကြီးချုပ် ဆရီသာ သာဗီဆင် (Srettha Thavisin) သည် နိုင်ငံခြားရေးဝန်ကြီး ပန်ပရီ ဘာဟီဒါ နျူကာရာ (Parnpree Bahiddha-nukara) ၊ စစ်တပ် အကြီးအကဲများနှင့်တွေ့ဆုံပြီး မြန်မာနိုင်ငံ၏ ပဋိပက္ခကို ဆွေးနွေးခဲ့ သည်။ 

ထိုင်းဝန်ကြီးချုပ် ဆရီသာသာဗီဆင်ကို တွေ့ရစဉ်

မြန်မာနိုင်ငံ၏ ပဋိပက္ခသည် ရေရှည်ကြာမြင့်မည်ဆိုပါက ထိုင်းနိုင်ငံအပေါ်ကိုလည်း ကြီးမားစွာ ဂယက် ရိုက်ခတ် စေလိမ့်မည်ဟု ထိုသတင်းရင်းမြစ်က ပြောကြားခဲ့သည်။       

ထို့ကြောင့် မြန်မာ၏ အိမ်နီးချင်းဖြစ်သည့် ထိုင်းနိုင်ငံသည် ဝန်ကြီးချုပ် ဆရီသာ၏ ဦးဆောင်မှုအောက်တွင် မြန်မာနိုင်ငံကို လူသားချင်းစာနာ ထောက်ထားမှုဆိုင်ရာ အကူအညီများ ပေးအပ်ခြင်းအားဖြင့် မြန်မာ့အရေးနှင့် ပတ်သက်သည့် အာဆီယံ၏ အချက် ၅ ချက်ပါ သဘောထားဆန္ဒ ထုတ်ပြန်ချက်ကို အကောင်အထည်ဖော် ဆောင်ရွက်သွားရန် စဉ်းစားနေသည်။ 

မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီလ၌ တပ်မတော်က အာဏာရယူခဲ့ပြီးနောက် လအနည်းငယ် အကြာမှာ ပဲ အာဆီယံက အချက် ၅ ချက်ပါ သဘောဆန္ဒ ထုတ်ပြန်ချက်ကို အကောင်အထည်ဖော်ရန် မြန်မာ့တပ်မတော် ခေါင်းဆောင်များကို အဆိုပြုခဲ့သည်။ 

မြန်မာနိုင်ငံသားများ ထိုင်းနိုင်ငံထဲရောက်နေစဉ်

သို့သော်လည်း မြန်မာနိုင်ငတွင် တပ်မတော်နှင့် လက်နက်ကိုင်တပ်ဖွဲ့များအကြား တိုက်ပွဲများ ဖြစ်ပွားခဲ့သဖြင့် အာဆီယံ၏ အစီအစဉ်သည် အကောင်အထည် ပေါ်လာခဲ့ခြင်းမရှိပေ။

"ထိုင်းအစိုးရဟာ နိုင်ငံခြားရေးဝန်ကြီးဌာနကတစ်ဆင့် မြန်မာအစိုးရနဲ့ ပူးပေါင်းဆောင်ရွက်ပြီး လိုအပ်တဲ့ ကူညီ ထောက်ပံ့မှုတွေ ပြုလုပ်သွားမှာပါ" ဟု ထိုသတင်းရင်းမြစ်က ဘန်ကောက်ပို့စ် သတင်းစာကို ပြောကြားခဲ့သည်။

ပြီးခဲ့သည့်နှစ် ဒီဇင်ဘာလက ပန်ပရီသည် ၎င်းတို့ နိုင်ငံခြားရေးဝန်ကြီးဌာနအနေဖြင့် ထိုင်း-မြန်မာ နယ်စပ် တစ်လျှောက် မြန်မာတိုက်ပွဲရှောင်များအတွက် လူသားချင်း စာနာထောက်ထားမှုဆိုင်ရာ  အကူအညီများ ထောက်ပံ့ပေးရန် အစီအစဉ်တစ်ရပ် စတင်လုပ်ဆောင်ဖို့ စဉ်းစားခဲ့သည်ဟု ပြောကြားခဲ့သည်။

မစ္စတာပန်ပရီ၏ အဆိုအရ မြန်မာသည် ထိုင်းနိုင်ငံခြားရေးဝန်ကြီးဌာနနှင့် တွေ့ဆုံရန် လုပ်ငန်းတာဝန်အဖွဲ့ကို ထိုင်းသို့ စေလွှတ်ရခြင်း မရှိသေးကြောင်း သိရသည်။ 

Source: ဘန်ကောက်ပို့စ်

CNI International News

ဆိုးလ်၊ ဇန်နဝါရီ ၁၇

မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) က ဖွဲ့စည်းပုံအခြေခံဥပဒေတွင် တောင်ကိုရီးယား ကို "အဓိကရန်သူ၊ ထာဝရရန်သူ" အဖြစ် အဓိပ္ပာယ်ဖွင့်ဆို သတ်မှတ်ရန် တိုက်တွန်းခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ထို့ပြင် မြောက်ကိုရီးယားလွှတ်တော်ကလည်း တောင်ကိုရီးယားနှင့် ဆွေးနွေးပွဲများပြုလုပ်ရန် တိုက်တွန်းနေသည့် အဖွဲ့အစည်းများကို စွန့်လွှတ်ဖို့ ဆုံးဖြတ်ခဲ့သည်ဟု မြောက်ကိုရီးယားနိုင်ငံပိုင် KCNA သတင်းအေဂျင်စီက ဇန်နဝါရီ ၁၆ ရက်တွင် ဖော်ပြခဲ့သည်။

ဇန်နဝါရီ ၁၅ ရက်က ပြုလုပ်သည့် ပြည်သူ့လွှတ်တော်ချုပ်၏ အစည်းအဝေးတွင် ကင်မ်က မိန့်ခွန်းပြောကြားခဲ့ရာ၌ မြောက်ကိုရီးယားသည် တောင်ကိုရီးယားပြည်သူများကို တစ်နိုင်ငံတည်းသားများအဖြစ် မရည်ညွှန်းသင့်ကြောင်း တောင်ကိုရီးယားသည် ရန်သူဖြစ်သည်ဆိုသည့် အတွေးအခေါ်ကို ပျံ့နှံ့စေရန် ပညာရေးကဏ္ဍကို တင်းကျပ်သည့် ဥပဒေတစ်ရပ် ထုတ်ပြန်သင့်ကြောင်း ပြောကြားခဲ့သည်။

မြောက်ကိုရီးယား ခေါင်းဆောင် ကင်မ်ဂျုံအန်ကို တွေ့ရစဉ်

ထို့ပြင် ဖွဲ့စည်းပုံအခြေခံဥပဒေ ပြန်လည်ပြင်ဆင်မှုကို နောက်တစ်ကြိမ် ပြုလုပ်မည့် အစည်းအဝေးတွင် ဆွေးနွေး သင့်ကြောင်းလည်း ကင်မ်က ပြောကြားခဲ့သည်။

တောင်ကိုရီးယားနှင့် မြောက်ကိုရီးယားသည် နှစ်နိုင်ငံ ပင်လယ်ရေကြောင်း နယ်စပ်အနီးတွင် ကျည်အစစ်များဖြင့် စစ်ရေးလေ့ကျင့်မှုများ ပြုလုပ်ခဲ့ပြီးနောက် တင်းမာမှုများ မြင့်တက်နေချိန်တွင် ကင်မ်၏ မှတ်ချက်စကားများ ထွက်ပေါ်လာခြင်းဖြစ်သည်။

တောင်ကိုရီးယားသမ္မတ ယွန်းဆော့ရွဲ(Yoon Suk Yeol) ကလည်း ဇန်နဝါရီ ၁၆ ရက်တွင် ပြုလုပ်သည့်် အစိုးရ အဖွဲ့အစည်းအဝေး၌ မြောက်ကိုရီးယား၏ လုပ်ဆောင်မှုများကို ဝေဖန်ခဲ့သည်။

ထို့နောက် ကိုရီးယားနှစ်နိုင်ငံအကြား ရန်သူများအဖြစ် အဓိပ္ပာယ်ဖွင့်ဆိုမှုသည် မြောက်ကိုရီးယား၏ အမျိုးသားရေး နှင့် သမိုင်းကြောင်းကို ဆန့်ကျင်သည့် သဘောသဘာဝကို ပြသရာရောက်ကြောင်း ၎င်းက ပြောကြားခဲ့သည်။

တောင်ကိုရီးယားကို တွေ့ရစဉ်

ကင်မ်ကမူ ဖွဲ့စည်းပုံအခြေခံဥပဒေထဲတွင် ကိုရီးယားကျွန်းဆွယ်၌ စစ်ပွဲဖြစ်ပွားလာသည့် အချိန်တွင် တောင်ကိုရီးယားကို အလုံးစုံသိမ်းပိုက်မည့် အခြေအနေအား သတ်မှတ်ပြဋ္ဌာန်းနိုင်သည်ဟုလည်း ပြောကြားခဲ့ သည်။

ကိုရီးယားနှစ်နိုင်ငံအကြား တရားမဝင် ပင်လယ်ရေကြောင်း နယ်စပ်အဖြစ် ရှုမြင်ခံထားရသည့် NLL စည်းသည် တရားမဝင်ကြောင်း၊ တောင်ကိုရီးယားအနေဖြင့် မိမိတို့၏ လေပိုင်နက်၊ ရေပိုင်နက်နှင့် ကုန်မြေပိုင်နက်များကို အနည်းငယ်မျှပင် ချိုးဖောက်ဝင်ရောက်ခဲ့မည်ဆိုပါက စစ်ကြေညာခြင်းအဖြစ် ယူဆသွားမည်ဟုလည်း ကင်မ်က ပြောကြားခဲ့သည်။

မြောက်ပိုင်း ကန့်သတ်စည်း (Northern Limit Line- NLL) ကို ၁၉၅၀-၁၉၅၃ ခုနှစ် ကိုရီးယားစစ်ပွဲ အဆုံးသတ် ချိန်တွင် အမေရိကန်ဦးဆောင်သည့် ကုလသမဂ္ဂတပ်ဖွဲ့များက သတ်မှတ်ရေးဆွဲခဲ့ခြင်းဖြစ်သည်။

Source: ဘန်ကောက်ပို့စ်

CNI International News

ဝါရှင်တန်၊ ဇန်နဝါရီ ၁၇

၂၀၂၄ ခုနှစ် အမေရိကန် သမ္မတရွေးကောက်ပွဲအတွက် အိုင်အိုဝါ (Iowa) ပြည်နယ်တွင် ဇန်နဝါရီ ၁၅ ရက်က ပြုလုပ်ခဲ့သည့် ရီပတ်ဘလစ်ကန်ပါတီ ကိုယ်စားပြု ဝင်ရောက်ယှဉ်ပြိုင်ရန် ကိုယ်စားလှယ်လောင်း ရွေးချယ်သည့် အစည်းအဝေးတွင် သမ္မတဟောင်း ဒေါ်နယ်ထရမ့်က ပြတ်သားစွာ အနိုင်ရရှိခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

ထရမ့်သည် ပြိုင်ဘက် ရီပတ်ဘလစ်ကန်များဖြစ်သည့် ဖလော်ရီဒါ (Florida) ပြည်နယ်အုပ်ချုပ်ရေးမှူး ရွန် ဒီဆန်းတစ် (Ron DeSantis) ၊ တောင်ကာရိုလိုင်းနား (South Carolina) ပြည်နယ် အုပ်ချုပ်ရေးမှူးဟောင်း နစ်ကီ ဟာလေး (Nikki Haley) တို့ကို အလွယ်တကူ အနိုင်ရခဲ့ခြင်းဖြစ်ပြီး ပါတီကိုယ်စားပြု ကိုယ်စားလှယ်လောင်းအဖြစ် ရွေးချယ်ခံရရန် ခြေလှမ်းတစ်လှမ်း ပိုမိုနီးစပ်လာခဲ့သည်။

ထရမ့်သည် ရီပတ်ဘလစ်ကန် ကိုယ်စားလှယ် ၄၀ အနက် ၂၀ ၏ ထောက်ခံမှုကို ရရှိခဲ့ပြီး ဒီဆန်းတစ်က ၈ ဦး၏ ထောက်ခံမှု၊ ဟာလေးက ၇ ဦး၏ ထောက်ခံမှုကိုသာ ရရှိခဲ့သည်။

နစ်ကီဟာလေး အမည်ကိုတွေ့ရစဉ်

နည်းပညာ စွန့်ဦးတီထွင်ပညာရှင် ဗီဗက် ရာမာဆွာမိ (Vivek Ramaswamy) ကမူ ကိုယ်စားလှယ် ၂ ဦး၏ ထောက်ခံမှုကိုသာရရှိခဲ့သဖြင့် သူသည် ရီပတ်ဘလစ်ကန်ပါတီ ကိုယ်စားပြုသည့်် ကိုယ်စားလှယ်လောင်း နေရာအတွက် ဆက်လက် ယှဉ်ပြိုင်မည် မဟုတ်တော့ကြောင်း ကြေညာခဲ့ပြီး ထရမ့်ကို ထောက်ခံသွားမည်ဟု ပြောကြားခဲ့သည်။

ထရမ့်၏ ထောက်ခံမှုနှုန်း ရလဒ်များအရ သူသည် တရားရေးဆိုင်ရာ အမှုအခင်းများနှင့် ရင်ဆိုင်နေရသည့်တိုင် ရီပတ်ဘလစ်ကန်ပါတီကို ဆက်လက် လွှမ်းမိုးထားနိုင်ဆဲဖြစ်ကြောင်း ပြသရာရောက်ခဲ့သည်။ 

ထို့ပြင် ထရမ့်၏ တရားရေးဆိုင်ရာ အမှုအခင်းများသည် ၎င်းအား ထောက်ခံသူများ၏ ထောက်ခံမှုနှုန်းကို ကြီးကြီးမားမား လျော့ကျသွားစေခဲ့ခြင်းမရှိဘဲ ထရမ့် ထောက်ခံသူအများစုက ထိုအမှုအခင်းများသည် နိုင်ငံရေး စေ့ဆော်မှုကြောင့်သာဖြစ်သည်ဟု ယူဆထားကြသည်။

ဒေါ်နယ်ထရမ့်ကို တွေ့ရစဉ်

အိုင်အိုဝါပြည်နယ်သည် ရီပတ်ဘလစ်ကန်ကိုယ်စားပြု ကိုယ်စားလှယ်လောင်းများကို သမ္မတရွေးကောက်ပွဲတွင် ရွေးချယ်မှုများအနက် ရှုပ်ထွေးသည့် မှတ်တမ်းများရှိခဲ့သည်။

ထိုပြည်နယ်တွင် ထရမ့် မတိုင်မီ ရီပတ်ဘလစ်ကန်ကိုယ်စားပြု ကိုယ်စားလှယ်လောင်းတစ်ဦး သမ္မတအဖြစ် အနိုင် ရရှိခဲ့သည့် နောက်ဆုံးမှတ်တမ်းမှာ ၂၀၀၀ ပြည့်နှစ်ကဖြစ်ပြီး ထိုအချိန်က ဂျော့ချ် ဒဗလျူဘုရ် (George W Bush) အနိုင်ရခဲ့ခြင်းဖြစ်သည်။

ထို့နောက် ထရမ့်သည် ၂၀၁၆ ခုနှစ် သမ္မတရွေးကောက်ပွဲတွင် အိုင်အိုဝါပြည်နယ်တွင် အနိုင်ရရှိခဲ့ပြီး ဘုရှ်ပြီးလျှင် ထိုပြည်နယ်၌ အနိုင်ရပြီး သမ္မတဖြစ်လာခဲ့သည်။

သို့သော် ထရမ့်သည် ၂၀၂၀ ပြည့်နှစ် သမ္မတရွေးကောက်ပွဲတွင် အိုင်အိုဝါပြည်နယ်တွင် လက်ရှိသမ္မတ ဂျိုးဘိုင်ဒန် (Joe Biden)ကို အနိုင်ရခဲ့သော်လည်း ပြည်နယ်အားလုံး၏ မဲရာခိုင်နှုန်း စုစုပေါင်းတွင်မူ ဘိုင်ဒန်က အနိုင်ရခဲ့ပြီး သမ္မတဖြစ်လာခဲ့ခြင်းဖြစ်သည်။

Source: အယ်လ်ဂျာဇီးယား