CNI International News

ဂူဝါဟတီ၊ မတ်လ ၁၇

အိန္ဒိယနိုင်ငံအတွင်းရှိ မီဇိုများ အပါအဝင် နိုင်ငံနယ်နိမိတ် အပြင်ဘက်မှာရှိနေသော ချင်းမျိုးနွယ်စုများ အားလုံး ပြန်လည်ပေါင်းစည်းရေးကို မီဇိုရမ်ပြည်နယ်ဝန်ကြီးချုပ် လာဒူဟိုမာက ကြိုးပမ်းလုပ်ဆောင်နေသည်ဟု Deccan Herald သတင်းဝက်ဘ်ဆိုက်မှ ဖော်ပြခဲ့သည်။

ယခုနှစ်(၂၀၂၄) မတ်လ ၄ ရက်က လာဒူဟိုမာသည် မီဇိုရမ်ပြည်နယ်မှ မီဇိုများ၊ မြန်မာနှင့် ဘင်္ဂလားဒေ့ရှ်မှ ချင်းလူမျိုးများ၊ မဏိပူရနှင့် အခြားနေရာများမှ ကူကီး-မရာလူမျိုးများ စုပေါင်းပါဝင်သည့် ဇိုအသိုင်းအဝိုင်း ပြန်လည် ပေါင်းစည်း ရေးအတွက် ၎င်း၏ အားထုတ်ကြိုးပမ်းမှုများကို ရည်ညွှန်း ပြောကြားခဲ့သည်။

ဖေဖော်ဝါရီ ၂၆ ရက်ကလည်း အသက် ၇၆ နှစ်အရွယ် လာဒူဟိုမာသည် မီဇိုရမ်ပြည်နယ်၊ အိုင်ဇောလ် (Aizawl) မြို့တော်တွင် ချင်းလက်နက်ကိုင်အဖွဲ့ ၂ ဖွဲ့ ပေါင်းစည်းရေးကို သဘာပတိအဖြစ် ဧည့်ခံပြုလုပ်ခဲ့သည်။

 ချင်းလက်နက်ကိုင် ၂ ဖွဲ့ ပေါင်းစည်းရေး မီဇိုရမ်ပြည်နယ်ဝန်ကြီးချုပ် အသိသက်သေအဖြစ် ပါဝင်စဉ်

ထိုချင်းလက်နက်ကိုင်အဖွဲ့ ၂ ဖွဲ့သည် ၂၀၂၁ ခုနှစ်၊ ဖေဖော်ဝါရီလက တပ်မတော်က အာဏာကို လွှဲပြောင်းရယူခဲ့ ပြီးချိန် ကတည်းက တစ်ဖက်နှင့်တဖက် တိုက်ခိုက်ခဲ့ကြသည့် ပြိုင်ဘက်အဖွဲ့များဖြစ်သည်။

ထိုလက်နက်ကိုင်အဖွဲ့ ၂ ဖွဲ့ ပေါင်းစည်းသည့် အခမ်းအနားတွင် လာဒူဟိုမာ တက်ရောက်ခဲ့ပြီးနောက် ချင်း ခေါင်းဆောင်များနှင့် လက်ဆွဲနှုတ်ဆက်ခဲ့သလို ဓာတ်ပုံ အရိုက်ခံခဲ့သဖြင့် အိန္ဒိယ၏ ပြည်သူအများစုကို အံ့အား သင့်စေခဲ့သည်။

မီဇိုရမ် (Mizoram) ပြည်နယ်ဝန်ကြီးချုပ် လာဒူဟိုမာ (Lalduhoma) သည် မတ်လ ၁၀ ရက်က ဗဟိုအစိုးရ၏ လွတ်လပ်စွာ လှုပ်ရှားသွားလာခွင့် အစီအစဉ် (FMR) ကို အဆုံးသတ်မည့် ဆုံးဖြတ်ချက်ကို သွယ်ဝိုက်ထောက်ခံ ခဲ့ခြင်းဖြင့် အများစုကို အံ့အားသင့်စေခဲ့ပြန်သည်။

ချင်းပြည်နယ်ကို မီဇိုရမ်ပြည်နယ်နဲ့ပေါင်းစည်းရန် လွှတ်တော်အမတ်က CNF ကို သွားရောက်ဆွေးနွေးစဉ်

FMR သည် အိန္ဒိယနှင့် မြန်မာ၏ ၁၆၄၃ ကီလိုမီတာ အရှည်ရှိ နယ်စပ်ဒေသ တစ်လျှောက်တွင် နေထိုင်သည့် မီဇိုများနှင့် အခြားတိုင်းရင်သား လူမျိုးစုများကို နှစ်နိုင်ငံအကြား ခရီးသွား အထောက်အထားများ မပါဘဲ သတ်မှတ် ထားသည့် နေရာအထိ သွားလာလှုပ်ရှားခွင့် ပေးထားသော အစီအစဉ်ဖြစ်သည်။

အိန္ဒိယရဲတပ်ဖွဲ့အရာရှိဟောင်း တစ်ဦးဖြစ်သည့် လာဒူဟိုမာက မီဇိုရမ်ပြည်နယ်လွှတ်တော်တွင် မိန့်ခွန်း ပြောကြား ချိန်က နယ်စပ်ဒေသတစ်လျှောက်တွင် နေထိုင်သူများ၏ လှုပ်ရှားသွားလာမှုအား စည်းကမ်းသတ်မှတ်မည့် ဗဟိုအစိုးရ၏ အစီအစဉ်ကို ထောက်ခံကြောင်း ပြောကြားခဲ့သည်။

လာဒူဟိုမာသည် ၂၀၂၄ ခုနှစ်ကမူ FMR အစီအစဉ်ကို ဖျက်သိမ်းမည့် ဗဟိုအစိုးရ၏ ဆုံးဖြတ်ချက်ကို ကန့်ကွက်ခဲ့ပြီး နောက် ယခုအခါတွင် ပြောင်းလဲပြီး ထောက်ခံခဲ့ခြင်းဖြစ်သည်။

ထိုအချိန်က ဗဟိုအစိုးရ၏ ဆုံးဖြတ်ချက်သည် နယ်စပ်ဒေသတစ်လျှောက်ရှိ ဇိုလူမျိုးများကို ကွဲပြားသွားစေရုံ သာမက ဇိုလူမျိုးများ ပေါင်းစည်းရေး အိပ်မက်သည်လည်း အကောင်အထည်ပေါ်လာရန် ဟန့်တားရာ ရောက်လိမ့်မည်ဟု လာဒူဟိုမာက ပြောကြားခဲ့ဖူးသည်။

Source: Deccan Herald

CNI International News

ဝါရှင်တန်၊ မတ်လ ၁၇

အမေရိကန်သမ္မတ ဒေါ်နယ်ထရမ့် ( Donald Trump) က သူသည် ယီမင်နိုင်ငံရှိ ဟူရ်သီသူပုန်များ ထိန်းချုပ်ထား သည့် နေရာများကို လေကြောင်းတိုက်ခိုက်မှုများ ဆက်တိုက်ပြုလုပ်ရန် အမိန့်ပေးခဲ့သည်ဟု ပြောကြားခဲ့ကြောင်း အေပီမှ ဖော်ပြခဲ့သည်။

အီရန်၏ ကျောထောက်နောက်ခံကို ရရှိထားသည် ဟူရ်သီအဖွဲ့အနေဖြင့် ပင်လယ်နီတွင် သင်္ဘောများကို တိုက်ခိုက်မှုများအား မရပ်တန့်မချင်း အမေရိကန်က သာလွန်ပြီး ပြင်းထန်သည့် အင်အားကို အသုံးပြုသွား မည်ဟုလည်း ထရမ့်က ပြောကြားခဲ့သည်။

အမေရိကန်၏ လေကြောင်း တိုက်ခိုက်မှုများကြောင့် လူ ၃၁ ဦးထက်မနည်း သေဆုံးခဲ့သည်ဟုလည်း ဟူရ်သီ အဖွဲ့က ပြောကြားခဲ့သည်။

“အမေရိကန်သင်္ဘောတွေ၊ လေယာဉ်တွေနဲ့ ရေတပ်ပိုင်ဆိုင်မှုတွေကို ကာကွယ်ဖို့နဲ့ လွတ်လပ်စွာ ရေကြောင်း သွားလာခွင့်ကို ထိန်းသိမ်းဖို့အတွက် ကျနော်တို့ရဲ့ တိုက်လေယာဉ်တွေဟာ အကြမ်းဖက်သမားတွေရဲ့ စခန်းတွေ၊ ခေါင်းဆောင်တွေနဲ့ ဒုံးကျည်ကာကွယ်ရေးစနစ်တွေကို တိုက်ခိုက်မှုတွေ ပြုလုပ်နေပါတယ်။ အမေရိကန် ပင်လယ် ကူး သင်္ဘောတွေနဲ့ ရေတပ်သင်္ဘောတွေရဲ့ လွတ်လပ်စွာ ရေကြောင်းသွားလာခွင့်ကို ဘယ်လိုအကြမ်းဖက် အင်အား စုကမှ ရပ်တန့်နိုင်မှာ မဟုတ်ပါဘူး”ဟု ထရမ့်က လူမှုမီဒီယာတွင် ရေးသားခဲ့သည်။

အမေရိကန် တိုက်လေယာဉ်တွေကို တွေ့ရစဉ်

“ဟူရ်သီ အကြမ်းဖက်သမားအားလုံး၊ သင်တို့ အချိန်ကုန်ပြီ။ ဒီနေ့ကစပြီး သင်တို့ရဲ့ တိုက်ခိုက်မှုတွေကို ရပ်တန့် ရမယ်။ မရပ်ဘူးဆိုရင်တော့ သင်တို့အရင်က တစ်ခါမှ မကြုံဖူးတဲ့ ငရဲနဲ့ ရင်ဆိုင်ရလိမ့်မယ်”ဟု ထရမ့်က ၎င်း၏ Truth Social လူမှုမီဒီယာတွင် ရေးသားဖော်ပြခဲ့သည်။

ထရမ့်သည် ဟူရ်သီအဖွဲ့ကို ကျောထောက်နောက်ခံ ပေးထားသည့် အီရန်နိုင်ငံကိုလည်း သတိပေးခဲ့ပြီး ဟူရ်သီ အဖွဲ့ကို ထောက်ခံမှုအား ချက်ချင်းရပ်တန့်ရန်၊ အီရန် အနေဖြင့် အမေရိကန်ကို ခြိမ်းခြောက်မည်ဆိုပါက အမေရိကန်သည် အီရန်ကို အပြည့်အဝ တာဝန်ခံခိုင်းမည်ဖြစ်သလို အီရန်အပေါ် ကောင်းမွန်စွာ ဆက်ဆံမည် မဟုတ်ကြောင်း ထရန့်က ပြောကြားခဲ့သည်။

အမေရိကန်သည် အီရန်၏ နျူကလီးယား စီမံကိန်းနှင့်ပတ်သက်ပြီး အီရန်ကို ဆွေးနွေးပွဲ စားပွဲဝိုင်းသို့ ခေါ်ဆောင်ရန် ကြိုးပမ်းနေသည်။

ဟူရ်သီသူပုန်တွေကို တွေ့ရစဉ်

ထို့နောက် တစ်ချိန်တည်းမှာပဲ အီရန်အပေါ် ပိတ်ဆို့မှုများ ချမှတ်ခဲ့ပြီးနောက် သီတင်းပတ် အနည်းငယ်အကြာတွင် ဟူရ်သီသူပုန်များကို တိုက်ခိုက်ခဲ့ခြင်းဖြစ်သည်။

ဟူရ်သီအဖွဲ့ကမူ ၎င်းတို့ ထိန်းချုပ်ထားသည့် နယ်နိမိတ်များအတွင်း ပေါက်ကွဲမှုများ ဖြစ်ပွားခဲ့ကြောင်း ဆန်နာ (Sanaa) မြို့တော်နှင့် ဆော်ဒီနယ်စပ်ဒေသရှိ ဟူရ်သီများ ခြေကုပ်ယူထားသည့် ဆာဒါး (Saada) ပြည်နယ်များ တွင် လေကြောင်း တိုက်ခိုက်ခံခဲ့ရကြောင်း ပြောကြားခဲ့သည်။

အွန်လိုင်းတွင် ထွက်ပေါ်နေသည့် ဓာတ်ပုံများ၌ ဆန်နာလေဆိပ် အဆောက်အအုံပေါ်မှာ မီးခိုးများ ထွက်ပေါ် နေပုံများကို မြင်တွေ့ရသည်။

Source: အေပီ

CNI International News

မော်စကို၊ မတ်လ ၁၅

ယူကရိန်းပဋိပက္ခတွင် ရက်ပေါင်း ၃၀ ကြာ အပစ်အခတ်ရပ်စဲရေးအတွက် အမေရိကန်၏ အဆိုပြုချက်ကို မူအရ သဘောတူကြောင်း ရုရှားသမ္မတ ဗလာဒီမာ ပူတင် (Vladimir Putin) က မတ်လ ၁၃ ရက်တွင် ပြောကြားခဲ့ သည်ဟု အေပီမှ ဖော်ပြခဲ့သည်။

သို့သော် ထိုအပစ်အခတ်ရပ်စဲရေး သဘောတူညီချက်ထဲတွင် သတ်မှတ်ထားသည့် ဖော်ပြချက်များကို အပြီးသတ် လုပ်ဆောင်ရခြင်း မရှိသေးပေ။

ထို့ကြောင့် မည်သည့် အပစ်အခတ်ရပ်စဲရေး သဘောတူညီချက်မဆို ရေရှည်တည်မြဲသည့် ငြိမ်းချမ်းရေးကို ဖော်ဆောင်သော လမ်းတစ်ခု ဖြစ်သင့်ကြောင်းလည်း ပူတင်က ပြောကြားခဲ့သည်။

“အိုင်ဒီယာအရတော့ မှန်ပါတယ်။ အဲဒါကို ကျနော်တို့ သေချာပေါက် ထောက်ခံပါတယ်။ ဒါပေမယ့် ကျ‌နော်တို့တွေ ဆွေးနွေးရမယ့် ကိစ္စတွေ ရှိနေပါတယ်။ ကျနော်တို့အနေနဲ့ ကျနော်တို့ရဲ့ အမေရိကန် လုပ်ဖော်ကိုင်ဖက်တွေနဲ့ မိတ်ဖက်တွေနဲ့ ဆွေးနွေးဖို့လိုတယ်လို့ ကျနော် ထင်ပါတယ်။ သမ္မတ ဒေါ်နယ်ထရမ့် (Donald Trump) နဲ့လည်း ဖုန်းဆက်ပြီး ဆွေးနွေးဖို့လိုပါတယ်”ဟု ပူတင်က မော်စကိုမြို့တော်တွင် ပြုလုပ်သည့် သတင်းစာ ရှင်းလင်းပွဲ၌ ပြောကြားခဲ့သည်။

ယူကရိန်းစစ်ပွဲအတွင်း ရှေ့တန်းတစ်နေရာမှာ စစ်သားတစ်ဦးကိုတွေ့ရစဉ်

ယူကရိန်းဘက်က လက်ခံထားသည့် အပစ်အခတ်ရပ်စဲရေး အဆိုပြုချက်အတွက် ရုရှားနှင့်ဆွေးနွေးရန် မော်စကို သို့ ထရမ့်၏ အထူးသံတမန် စတိဗ် ဝစ်ကော့ဖ် (Steve Witkoff) ရောက်ရှိလာခဲ့ပြီးနောက် နာရီပိုင်းအကြာတွင် ပူတင်က ထိုကဲ့သို့ ပြောကြားခဲ့ခြင်းဖြစ်သည်။

အမေရိကန်သမ္မတ ထရမ့်ကမူ ရုရှားဘက်မှ ကောင်းမွန်သည့် အချက်ပြမှုများ ရှိခဲ့ကြောင်းနှင့် ပူတင်၏ ပြောကြား ချက်ကို အကောင်းမြင်သည့်ဘက်မှ ရှုမြင်ကြောင်း ပြောကြားခဲ့သည်။

ထို့ပြင် သူသည် ပူတင်နှင့် ဆွေးနွေးရန် အသင့်ရှိကြောင်းနှင့် လက်ရှိအချိန်သည် စစ်ပွဲကို အဆုံးသတ်ရမည့် အချိန်သို့ ရောက်ရှိလာပြီဖြစ်ကြောင်း ထရမ့်က ထပ်မံပြောဆိုခဲ့သည်။

ယူကရိန်းစစ်ပွဲကို တွေ့ရစဉ်

“ပူတင်ကတော့ အလားအလာကောင်းတဲ့ စကားတွေကို ပြောသွားတာပါ။ ဒါပေမယ့် မပြည့်စုံသေးပါဘူး။ အခု ဆိုရင် ရုရှားဘက်က သဘောတူ၊ မတူဆိုတာကို ကြည့်ရတော့မယ်။ သူတို့ဘက်က သဘောမတူဘူးဆိုရင်တော့ ကမ္ဘာကြီးအတွက် အရမ်းစိတ်ပျက်စရာကောင်းမယ့် အခိုက်အတန့်တစ်ခု ဖြစ်လာပါလိမ့်မယ်”ဟု ထရမ့်က မတ်လ ၁၃ ရက်တွင် အိမ်ဖြူတော်၌ နေတိုးအတွင်းရေးမှူးချုပ် မာ့ခ် ရူတီ (Mark Rutte) နှင့်ပြုလုပ်သည့် အစည်းအဝေး၌ ပြောကြားခဲ့သည်။

ယူကရိန်းသမ္မတ ဇာလန်းစကီး (Volodymyr Zelenskyy) ကမူ ပူတင်သည် ထိုအပစ်အခတ်ရပ်စဲရေးကို ငြင်းပယ်ရန် ပြင်ဆင်ထားကြောင်း ပြောကြားခဲ့သည်။

“ပူတင်က စစ်ပွဲကို ဆက်လက် ဆင်နွှဲချင်တယ်လို့ သမ္မတ ထရမ့်ကို မပြောရဲပါဘူး။ သူက ယူကရိန်းနိုင်ငံသား တွေကို သတ်ချင်နေတာပါ။ အဲဒါကြောင့်ပဲ သူတို့တွေက အပစ်အခတ်ရပ်စဲရေးနဲ့ပတ်သက်ပြီး ယတိပြတ် မဆုံးဖြတ်နိုင်သေးတာပါ” ဟု ဇာလန်းစကီးက ပြောကြားခဲ့သည်။

Source: အေပီ

CNI International News

ဂူဝါဟတီ၊ မတ်လ ၁၅

အိန္ဒိယပြည်ထဲရေးဝန်ကြီး အမစ်ရှား ( Amit Shah ) သည် မတ်လ ၁၄ ရက် ညပိုင်းမှစပြီး နိုင်ငံအရှေ့မြောက်ပိုင်း ဒေသသို့ ၃ ရက်ကြာ ခရီးစဉ်အဖြစ် သွားရောက်မည်ဖြစ်ကြောင်း Deccan Herald သတင်းဝက်ဘ်ဆိုက်မှ ဖော်ပြခဲ့ သည်။

ရှားသည် အာသံ (Assam) ပြည်နယ်၊ ဂျော်ဟတ် (Jorhat) မြို့သို့ မတ်လ ၁၄ ရက် ညပိုင်းတွင် ရောက်ရှိမည်ဖြစ် ပြီး ထိုမြို့မှတဆင့် ဂိုလက်ဟတ် (Golaghat ) ခရိုင်ရှိ ဒါဂါအွန် ( Dergaon ) မြို့သို့ ဆက်လက် သွားရောက်မည် ဖြစ်သည်။

သူသည် ထိုမြို့ရှိ လာချစ် ဘာဖူကန် ရဲအကယ်ဒမီ Lachit Barphukan Police Academy တွင် ညအိမ်မည် ဖြစ်သည်။

မတ်လ ၁၅ ရက် နံနက်ပိုင်းတွင်မူ သူသည် ရူပီး ၁၆၇ ဒသမ ၄ ကုဋေဖြင့် အပြီးသတ် ဆောက်လုပ်ခဲ့သည့် ရဲအကယ်ဒမီ အဆင့်မြှင့်တင်မွမ်းမံမှု ပထမအဆင့် ဖွင့်ပွဲအခမ်းအနားကို ဖွင့်လှစ်ပေးမည်ဖြစ်သည်။

အိန္ဒိယပြည်ထဲရေးဝန်ကြီး အမစ်ရှားကို တွေ့ရစဉ်

ထို့နောက် ရူပီး ၄၂၅ ဒသမ ၄၈ ကုဋေ ကုန်ကျမည့် ဒုတိယအဆင့် ပြုပြင်မွမ်းမံမှုအတွက် ဖွင့်ပွဲ အခမ်းအနားတွင် အုတ်မြစ်ချသွားမည်ဖြစ်သည်။

ထို့နောက် ရှားသည် မီဇိုရမ် (Mizoram) ပြည်နယ်သို့ သွားရောက်မည်ဖြစ်ပြီး အာသံရိုင်ဖယ်တပ် (Assam Rifles) ကို အိုင်ဇော (Aizawl) မြို့တော်မှ ဇိုခေါ်ဆန် (Zokhawsang) မြို့သို့ ပြောင်းရွှေ့သည့် အခမ်းအနားကို တက်ရောက် မည်ဖြစ်သည်။

ရှားသည် မတ်လ ၁၅ ရက် မွန်းလွဲပိုင်းတွင် ဂူဝါဟတီ (Guwahati) မြို့သို့ ပြန်လာမည်ဖြစ်ပြီး ညပိုင်းတွင် ကိုအီနာဒိုရာ (Koinadhora) မြို့ရှိ ပြည်နယ်ဧည့်ရိပ်သာတွင် အိပ်မည်ဖြစ်သည်။

မတ်လ ၁၆ ရက် နံနက်ပိုင်းတွင် သူသည် အာသံ (Assam) ပြည်နယ်၊ ကိုကရာဂျ်ဟာ (Kokrajhar) ခရိုင်ရှိ ဒေါ့မာ (Dotma) မြို့သို့ သွားရောက်ပြီး All Bodo Students Union (ABSU) ကျောင်းသားသမဂ္ဂ၏ ၅၇ ကြိမ်မြောက် နှစ်ပတ်လည် အခမ်းအနားကို တက်ရောက်ပြီး မိန့်ခွန်းပြောကြားမည်ဖြစ်သည်။

ထို့နောက် သူသည် ဂူဝါဟတီမြို့သို့ မွန်းလွဲပိုင်းတွင် ပြန်လည်ရောက်ရှိမည်ဖြစ်ပြီး ညပိုင်းတွင် နယူးဒေလီ (New Delhi ) မြို့တော်သို့ ပြန်လည်ထွက်ခွာမည်ဖြစ်သည်။

Source: Deccan Herald

CNI International News

ဟောင်ကောင်၊ မတ်လ ၁၄

အမေရိကန်သမ္မတ ဒေါ်နယ်ထရမ့် (Donald Trump) သည် တရုတ်၏ သင်္ဘောများကို အခကြေးငွေများ များပြား စွာ ကောက်ခံမည်ဟု ခြိမ်းခြောက်ခဲ့ပြီး တရုတ်ကုန်စည်များအပေါ် အခွန်များတိုးမြှင့် ကောက်ခံနေချိန်တွင် အာရှမှ ကုန်စည်တင်ပို့သူများသည် အမေရိကန်သို့ ကုန်စည်များ ဆက်လက်တင်ပို့နေကြသည်ဟု Nikkei Asia မှ ဖော်ပြခဲ့သည်။

၂၀၂၅ ခုနှစ် ပထမ ၂ လအတွင်း အမေရိကန်သို့ ဦးတည်လာသည့် ကွန်တိန်နာတင် သင်္ဘောအရေအတွက်သည် မြင့်တက်ခဲ့ပြီး လော့စ်အိန်ဂျလိစ် ဆိပ်ကမ်း(Port of Los Angeles) သည် ၎င်း၏ ဆိပ်ကမ်းသက်တမ်း ၁၁၇ နှစ် အတွင်း သင်္ဘော အဝင်၊အထွက် အများဆုံးကာလ ဖြစ်ခဲ့သည်ဟု ဆိုသည်။

ယခုနှစ် ပထမ ၂ လအတွင်း အမေရိကန်၏ ဆိပ်ကမ်းများတွင် ပေ ၂၀ ကွန်တိန်နာ အလုံးရေး ၄ ဒသမ ၃ သန်းကို စီမံခန့်ခွဲခဲ့ရသည်။

ပြီးခဲ့သည့်နှစ်က ကွန်တိန်နာ အလုံးရေ ၃ ဒသမ ၀၁ သန်းမှ ပိုမိုမြင့်တက် လာခဲ့ခြင်းဖြစ်သည်ဟု အမျိုးသား လက်လီရောင်းချမှုဆိုင်ရာအဖွဲ့ချုပ်  (NRF) က ထုတ်ပြန်ခဲ့သည်။

ပုံမှန်အားဖြင့် တရုတ်နှစ်ကူး ကာလဖြစ်သည့် ဖေဖော်ဝါရီလအတွင်း  ကွန်တိန်နာများ ရောက်ရှိမှု နှေးကွေးလေ့ရှိ သော်လည်း ယခုနှစ် ဖေဖော်ဝါရီလသည် ၃ နှစ်အတွင်း ဆိပ်ကမ်းများ၌ သင်္ဘောအဝင်အထွက် အများဆုံး ဖြစ်ခဲ့ သည်ဟု ဆိုသည်။

ကုန်ပစ္စည်းများနှင့် အခွန်နှုန်းထားများကို ညွန်းပြထားစဉ်

ထိုအခြေအနေများကို သုံးသပ်ခြင်းဖြင့် တရုတ်၏ ကုန်စည်တင်ပို့သူများသည် အမေရိကန်သို့ သင်္ဘောများနှင့်  ကုန်စည်များ ပို့ဆောင်မှုကို တိုးမြှင့်ဖွယ်ရှိသည်ဟု ယူဆနိုင်ခြေရှိသည်။

သို့သော်လည်း ထရမ့်၏ မခန့်မှန်းနိုင်သည့် မူဝါဒများနှင့် ကုန်သွယ်ရေး အစီအမံများသည် တရုတ်၏ ကုန်သွယ်ရေး ပုံစံများကို တည်ငြိမ်မှုမရှိ ဖြစ်စေနိုင်ကာ အနာဂါတ် ပို့ကုန်ကဏ္ဍ အလားအလာကို ရေရာမှု မရှိစေခဲ့ကြောင်း ကျွမ်းကျင်သူများက ပြောကြားခဲ့သည်။

ထို့ကြောင့် တရုတ်၏ ကုန်စည်တင်ပို့သူများည် အမေရိကန်၏ ဖြစ်လာနိုင်ဖွယ်ရှိသည့် မူဝါဒ အပြောင်းအလဲများ မတိုင်မီ အမေရိကန်သို့ ကုန်စည်များကို သင်္ဘောများဖြင့် အလျင်စလို တင်ပို့ဖွယ် ရှိသည်ဟုလည်း လေ့လာသူများ က ပြောကြားခဲ့သည်။

ထရမ့်သည် ၎င်း၏ ပထမ သက်တမ်းဖြစ်သည့် ၂၀၁၇ ခုနှစ်မှ ၂၀၂၁ ခုနှစ် အတွင်းကလည်း ဒေါ်လာ ဘီလျံချီ တန်ကြေးရှိသော တရုတ်၏ ပို့ကုန်များအပေါ် အခွန်များ တိုးမြှင့်ကောက်ခံခဲ့သဖြင့် တရုတ်ကလည်း အလားတူ စီမံကိန်းများနှင့် အမေရိကန်၏ ကုန်စည်များကို အခွန်းတိုးကောက်ခဲ့ပြီး နှစ်နိုင်ငံအကြား ကုန်သွယ်ရေးစစ်ပွဲ ဖြစ်ပွားခဲ့သည်။

Source: Nikkei Asia

CNI International News

တိုင်ပေ၊ မတ်လ ၁၄

ထိုင်ဝမ်တွင် တရုတ်၏ ဩဇာလွှမ်းမိုးမှုနှင့် စိမ့်ဝင်ထိုးဖောက်မှုများ မြင့်တက်နေကြောင်း ထိုင်ဝမ်သမ္မတ လိုင်ချင်တေ(Lai Ching-te) က မတ်လ ၁၃ ရက်တွင် သတိပေးခဲ့သည်ဟု ရိုက်တာမှ ဖော်ပြခဲ့သည်။

ထိုင်ဝမ်ကို သိမ်းသွင်းမည့် တရုတ်၏ အားထုတ် ကြိုးပမ်းမှုများအား ဖြေရှင်းရန်  အစီအမံများ လုပ်ဆောင်နေ ကြောင်း ၎င်းက ပြောသည်။

တရုတ်သည် မကြာသေးမီ နှစ်များအတွင်း စစ်ရေးလေ့ကျင့်မှုများ၊ ကုန်သွယ်ရေး ပိတ်ဆို့မှုများနှင့် ဩဇာ လွှမ်းမိုးရေး လှုပ်ရှားမှုများကို တိုးမြှင့်ပြုလုပ်နေပြီး တရုတ်၏ အချုပ်အခြာ အာဏာပိုင်ကြောင်း ကြေညာချက်ကို ထိုင်ဝမ်က လက်ခံစေရန် အတင်းအဓမ္မ ဖိအားပေးနေသည်ဟု ထိုင်ဝမ်က စွပ်စွဲခဲ့သည်။

လိုင်သည် ထိပ်သီးလုံခြုံရေး အရာရှိများနှင့် အစည်းအဝေး ပြုလုပ်ခဲ့ပြီးနောက် တရုတ်သည် ထိုင်ဝမ်၏ ဒီမိုကရေစီ ကို အသုံးချပြီး ရာဇဝတ်ဂိုဏ်းများ၊ မီဒီယာများ၊ စစ်မှုထမ်းများနှင့် စစ်မှုထမ်းဟောင်းများ ၊ ရဲအရာရှိများ အပါအဝင် မတူကွဲပြားသည့် လူ့အဖွဲ့အစည်းများကို သိမ်းသွင်းရန် ကြိုးပမ်းနေသည်ဟု သတင်းထောက်များကို ပြောကြားခဲ့ သည်။

“သူတို့ (တရုတ်) က ကျနော်တို့ကြားထဲမှာ သဘောထား ကွဲလွဲအောင်၊ ပျက်စီးရာပျက်စီးကြောင်းတွေ ဖြစ်စေတဲ့ လှုပ်ရှားမှုတွေကို လုပ်ဆောင်နေပါတယ်” ဟု လိုင်က သမ္မတရုံးက တိုက်ရိုက်ထုတ်လွှင့်သည့် သတင်းစာ ရှင်းလင်းပွဲတွင် ပြောကြားခဲ့သည်။

တရုတ်၏ ထိုင်ဝမ်ရေးရာရုံးကမူ လိုင်၏ ပြောကြားချက်နှင့် ပတ်သက်ပြီး ရိုက်တာသတင်းဌာန၏ မှတ်ချက် တောင်းခံမှုကို ချက်ချင်းတုန့်ပြန်ခဲ့ခြင်းမရှိပေ။

ထိုင်ဝမ်သမ္မတ လိုင်ချင်တေးနဲ့ လုပ်ငန်းရှင်များကို တွေ့ရစဉ်

လိုင်၏ မှတ်ချက် စကားများနှင့်ပတ်သက်ပြီး တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မော်နင်း (Mao Ning) ကို သတင်းထောက်များက မေးမြန်းခဲ့ကြသည်။

ထိုသို့ မေးမြန်းမှုတွင် မော်နင်းက “လိုင်၏ အစိုးရအဖွဲ့ မည်သို့ပင် ပြောဆိုနေစေကာမူ ထိုင်ဝမ်သည် တရုတ်၏ အစိတ်အပိုင်း ဖြစ်သည်ဆိုသည့် အချက်ကို ပြောင်းလဲစေလိမ့်မည် မဟုတ်ကြောင်း၊ အမိမြေနှင့် ပြန်လည် ပေါင်းစည်းရေးကို ပြောင်းလဲစေမည် မဟုတ်ကြောင်း” ပြန်လည် ဖြေကြားခဲ့သည်။

ထိုင်ဝမ်အစိုးရ၏ မှတ်တမ်းများအရ ၂၀၂၄ ခုနှစ်အတွင်း ထိုင်ဝမ်တွင် တရုတ်အတွက် သူလျှိုလုပ်ပေးမှု စွဲချက်ဖြင့် လူပေါင်း ၆၄ ဦး တရားစွဲခံခဲ့ရသည်။ ထိုအရေအတွက်သည် ၂၀၂၁ ခုနှစ်ကထက် ၃ ဆကျော် များပြားခဲ့သည်ဟု လိုင်က ပြောသည်။

တရားစွဲဆိုခံရသူ အများစုသည် လက်ရှိ တာဝန်ထမ်းဆောင်နေဆဲ စစ်သားများနှင့် စစ်မှုထမ်းဟောင်းများ ဖြစ်သည်ဟုလည်း ၎င်းက ဆိုသည်။

“အဲဒီလို ဩဇာလွှမ်းမိုးရေး လှုပ်ရှားမှုတွေ၊ ကြိုးကိုင်ချယ်လှယ်မှုတွေကြောင့် ခက်ခက်ခဲခဲ ရယူထားရတဲ့ ထိုင်ဝမ်ရဲ့ လွတ်လပ်ခွင့်၊ ဒီမိုကရေစီနဲ့ သာယာဝပြောမှုတွေ ဆုံးရှုံးသွားနိုင်မယ့် အခြေအနေကို လူအများစုက စိုးရိမ်နေကြပါ တယ်” ဟု လိုင်က ပြောကြားခဲ့သည်။

Source: ရိုက်တာ

CNI International News

ဝါရှင်တန်၊ မတ်လ ၁၄

ရုရှားသည် ယူကရိန်းစစ်ပွဲကို အဆုံးသတ်ရန် သဘောတူညီချက် ပြုလုပ်ရေး အပြင် အမေရိကန်နှင့် ဆက်ဆံရေး များ ပြန်လည်ထူထောင်ရေးတို့အတွက် ၎င်းတို့ဘက်မှ တောင်းဆိုချက်များကို ဖော်ပြထားသည့် စာရင်းတစ်ခုအား အမေရိကန်သို့ တင်ပြခဲ့သည်ဟု ရိုက်တာမှ ဖော်ပြခဲ့သည်။

ရုရှားဘက်မှ တောင်းဆိုမှုများ ရေးသားထားသည့် စာရင်းတွင် မည်သည့် အချက်များ ပါဝင်သည်ကို ရှင်းလင်းစွာ မသိရသေးဘဲ ရုရှားသည် ယူကရိန်းထက် အရင်စောပြီး ငြိမ်းချမ်းရေးဆွေးနွေးမှုများကို ပါဝင်ရန် ဆန္ဒ ရှိ၊မရှိကို လည်း မသိရသေးပေ။

ပြီးခဲ့သည့် သီတင်း ၃ ပတ် အတွင်းက ရုရှားနှင့်အမေရိကန် အရာရှိများသည် လူချင်းတွေ့ပြီး ယူကရိန်းပဋိပက္ခကို ဆွေးနွေးခဲ့ကြသည်။

ယခု ရုရှားဘက်မှ တောင်းဆိုချက်များသည် ယခင်က ယူကရိန်း၊ အမေရိကန်နှင့် နေတိုးတို့ကို တောင်းဆိုခဲ့ဖူးသည့် အချက်များနှင့် တူညီမှုရှိနေသည်ဟု ထိုအကြောင်းအရာနှင့် နီးစပ်သော လူပုဂ္ဂိုလ် ၂ ဦးက ပြောကြားခဲ့သည်။

ယူကရိန်းသမ္မတ ဇာလန်းစကီးနဲ့ နေတိုးအတွင်းရေးမှူးချုပ်ကိုတွေ့ရစဉ်

ယခင်က ရုရှား၏ တောင်းဆိုမှုများထဲတွင် ယူကရိန်းကို နေတိုးအဖွဲ့ဝင် ဖြစ်ခွင့်မပြုရေး၊ ယူကရိန်းတွင် ပြည်ပ တပ်ဖွဲ့ဝင်များ ဖြန့်ကြက်မချထားရေး၊ ခရိုင်းမီးယား (Crimea) ဒေသနှင့် ယူကရိန်းထံမှ သိမ်းပိုက်ထားသည့် ပြည်နယ် ၄ ခုကို ပိုင်ဆိုင်ကြောင်း ကြေညာထားသည့် ရုရှားသမ္မတ ပူတင် (Vladimir Putin) ၏ ကြေညာချက်ကို နိုင်ငံတကာက အသိအမှတ်ပြုရေး အစရှိသည့် အချက်များ ပါဝင်ခဲ့သည်။

မကြာသေးမီ နှစ်များအတွင်း ရုရှားသည် နေတိုး၏ အရှေ့ပိုင်းစစ်နံ ချဲ့ထွင်လာမှု အပါအဝင် ယူကရိန်းစစ်ပွဲ ဖြစ်ပွားရသည့် အခြေခံ အကြောင်းရင်းများအား ဖြေရှင်းပေးရန် အမေရိကန်နှင့် နေတိုးကို တောင်းဆိုခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) အဆိုပြုထားသည့် ယူကရိန်း- ရုရှား ရက်ပေါင်း ၃၀ ကြာ အပစ်အခတ်ရပ်စဲရေး သဘောတူညီချက်ကို လက်ခံမည်ဟု ယူကရိန်းသမ္မတ ဇာလန်းစကီး (Volodymyr Zelenskiy) က မတ်လ ၁၁ ရက်တွင် ပြောကြားခဲ့သည်။

ထို့ကြောင့် ထရမ့်သည် ၎င်း၏ ရက်ပေါင်း ၃၀ ကြာ အပစ်အခတ်ရပ်စဲရေး သဘောတူညီချက်နှင့် ပတ်သက်ပြီး ပူတင်၏ အဖြေကို စောင့်ဆိုင်းနေသည်။

ပူတင်သည့် အပစ်အခတ်ရပ်စဲရေး သဘောတူညီချက်ကို အသုံးချပြီး အမေရိကန်၊ ယူကရိန်းနှင့် ဥရောပအကြား သွေးကွဲစေရန် လုပ်ဆောင်မည့် အခြေအနေအား အမေရိကန်အရာရှိများ၊ လွှတ်တော်အမတ်များနှင့် ကျွမ်းကျင် သူများက စိုးရိမ်နေသည်။

ထိုအကြောင်းအရာနှင့် ပတ်သက်ပြီး ဝါရှင်တန်ရှိ ရုရှားသံရုံးနှင့် အိမ်ဖြူတော်တို့ကမူ မှတ်ချက်ပေးရန် တောင်းဆို သည့် ရိုက်တာသတင်းဌာန၏ တောင်းဆိုချက်ကို ချက်ချင်း တုန့်ပြန်ခဲ့ခြင်းမရှိပေ။

Source: ရိုက်တာ

CNI International News

ဘေဂျင်း၊ မတ်လ ၁၄

ပြီးခဲ့သည့် သီတင်းပတ်က ပြုလုပ်ခဲ့သည့် တရုတ်၏ two sessions အစည်းအဝေးများအတွင်း ချပြခဲ့သော တရုတ်နိုင်ငံ၏ အဓိကရည်မှန်းချက်များကို အောင်မြင်စွာ အကောင်အထည်ဖော်ရန် နည်းလမ်းပေါင်းစုံ အသုံးပြုပြီး လုပ်ဆောင်ကြဖို့ တရုတ်ဝန်ကြီးချုပ် လီချင် (Li Qiang) က အရာရှိများကို တိုက်တွန်းခဲ့သည်ဟု South China Morning Post မှ ဖော်ပြခဲ့သည်။

ပြီးခဲ့သည့် သီတင်းပတ်က တရုတ်၏ အမျိုးသားပြည်သူ့လွှတ်တော် အစည်းအဝေးနှင့် တရုတ်ပြည်သူ့ နိုင်ငံရေး အတိုင်ပင်ခံ ညီလာခံတို့တွင် ချပြခဲ့သည့် ရည်မှန်းချက်များထဲ၌ နိုင်ငံ့စီးပွားရေး ဖွံ့ဖြိုးတိုးတက်မှုကို ၅ ရာခိုင်နှုန်း မှာ ထိန်းသိမ်းထားရန်လည်း ပါဝင်ခဲ့သည်။

“မသေချာ မရေရာမှုတွေ အများကြီးရှိနေတဲ့ အချိန်မှာ ကျနော်တို့အနေနဲ့ ရည်မှန်းချက်တွေကို အမြန်ဆုံး ပြည့်မြောက်စေဖို့ ရှိသမျှ နည်းလမ်းပေါင်းစုံကို အသုံးပြုရပါလိမ့်မယ်။ အလုပ်ကိုလည်း လျင်လျင်မြန်မြန်နဲ့ တက်တက်ကြွကြွ လုပ်ဆောင်ရပါမယ်”ဟု လီက မတ်လ ၁၂ ရက်တွင် နိုင်ငံတော်ကောင်စီ အစည်းအဝေး၌ ပြောကြားခဲ့သည်။

တရုတ်သမ္မတ ရှီကျင့်ဖျင်နဲ့ တရုတ်ဝန်ကြီးချုပ် လီချင်ကိုတွေ့ရစဉ်

အစိုးရအေဂျင်စီများ အားလုံးအနေဖြင့် မိမိတို့၏ တာဝန်ဝတ္တရားများကို ကျေပွန်စွာ ထမ်းဆောင်ရန်နှင့် မိမိတို့၏ တာဝန်များအား အလုံးစုံပြည်မြောက်စေရန် ယခုထက်ပိုပြီး အပြုသဘောဆောင်သည့် လုပ်ရပ်များဖြင့် လုပ်ဆောင်သင့်ကြောင်း လီက ပြောကြားခဲ့သည်။

တရုတ်၏ စီးပွားရေးတွင် စိန်ခေါ်မှုများနှင့် ရင်ဆိုင်နေရချိန်၌ စီးပွားရေး ဖွံ့ဖြိုးတိုးတက်မှုကို မြှင့်တင်ရန်အတွက် တရုတ်အစိုးရက မူဝါဒများ ချမှတ်လုပ်ဆောင်လျက်ရှိသည်။

တရုတ်ခေါင်းဆောင်များသည် ကမ္ဘာ့ ဒုတိယစီးပွားရေး အင်အားအကြီးဆုံး တရုတ်နိုင်ငံ၏ အနာဂတ်အတွက် ၎င်းတို့၏ ယုံကြည်ချက်များကို ဖော်ပြခဲ့ကြသော်လည်း စိန်ခေါ်မှုများကိုလည်း အလေးထား ပြောဆိုခဲ့ကြသည်။

တရုတ်သမ္မတ ရှီကျင့်ဖျင်နဲ့ တရုတ်ဝန်ကြီးချုပ် လီချင်ကိုတွေ့ရစဉ်

ပြီးခဲ့သည့် သီတင်းပတ်က ပြုလုပ်ခဲ့သည့် two sessions အစည်းအဝေးများအတွက် တရုတ်ခေါင်းဆောင်များ အလေးထား ပြောကြားခဲ့သော စိန်ခေါ်မှုများထဲတွင် အမေရိကန်နှင့် ကုန်သွယ်ရေးပဋိပက္ခ အရှိန်ပြင်းထန်လာ မှုနှင့် ပြည်တွင်းဝယ်လိုအား အားနည်းနေသည့် ပြဿနာများ ပါဝင်ခဲ့သည်။

သက်ဆိုင်ရာ အရာရှိများ အနေဖြင့် အပြောင်းအလဲများကို အနီးကပ် စောင့်ကြည့်ရန်နှင့် ကောင်းမွန်သည့် မူဝါဒ ပြင်ဆင်မှုများအား ပြုလုပ်ရန်၊ ထိုသို့ ပြုလုပ်ခြင်းဖြင့် ရည်မှန်းချက်များကို အမြန်ဆုံး အကောင်အထည်ဖော်ကြရန် လီက တိုက်တွန်းခဲ့သည်ဟု ဆင်ဟွာသတင်းအေဂျင်စီက ဖော်ပြခဲ့သည်။

ပြီးခဲ့သည့် သီတင်းပတ်က လီ၏ အလုပ်တာဝန် အစီရင်ခံစာတွင် ၂၀၂၅ ခုနှစ်အတွက် တရုတ်၏ ဖွံ့ဖြိုးတိုးတက်မှု ရည်မှန်းချက်ကို ၅ ရာခိုင်နှုန်းဝန်းကျင်ဟု သတ်မှတ်ဖော်ပြထားပြီး နိုင်ငံ့ခေါင်းဆောင်များ ရင်ဆိုင်ဖြေရှင်းနေရ သည့် အခက်အခဲများကို ဖော်ပြခဲ့သည်။

Source: South China Morning Post

CNI International News

ဒမတ်စကတ်၊ မတ်လ ၁၂

ဆီးရီးယားအစိုးရအဖွဲ့သစ်သည် ကာ့ဒ်ဦးဆောင်သည့် ဆီးရီးယားဒီမိုကရက်တစ်တပ်ဖွဲ့ (SDF) နှင့် ပူးပေါင်းရန် သဘောတူစာချုပ် ချုပ်ဆိုခဲ့ကြောင်း ရိုက်တာမှ ဖော်ပြခဲ့သည်။

ဆီးရီးယားသမ္မတရုံးက မတ်လ ၁၀ ရက်တွင် ထုတ်ပြန်သည့် ဗွီဒီယိုထဲ၌ ဆီးရီးယား ယာယီသမ္မတ အာမက် အယ်ရှာရား (Ahmed al-Sharaa) နှင့် SDF တပ်မှူး မာဇလွမ် အဗ္ဗဒီ (Mazloum Abdi) တို့ သဘောတူစာချုပ် လက်မှတ်ရေးထိုးနေပုံကို ဖော်ပြထားသည်။

ထိုသဘောတူစာချုပ်သည် ဆီးရီးယား၏ ၁၄ နှစ်ကြာ ပဋိပက္ခနှင့် ပြီးခဲ့သည့်နှစ် ဒီဇင်ဘာလက အာဆတ် (Bashar al-Assad) ၏ အစိုးရအဖွဲ့ ပြုတ်ကျသွားပြီးနောက် ဆီးရီးယားနိုင်ငံ စည်းလုံးညီညွတ်ရေးကို တည်ဆောက်လိုသည့် ရှာရား၏ ရည်မှန်းချက်အတွက် အဓိက ခြေလှမ်းတစ်ရပ်ဖြစ်သည်။

ထိုသဘောတူညီချက်အရ ရန်လိုမှုများကို အလုံးစုံ အဆုံးသတ်ရေး၊ SDF က ထိန်းချုပ်ထားသည့် လေဆိပ်များ၊ ရေနံစက်ရုံများ၊ ဓာတ်ငွေ့တွင်းများ အပါအဝင် အရပ်ဘက်နှင့် စစ်ဘက်ဌာနများသည် အစိုးရ၏ ထိန်းချုပ်မှု အောက်သို့ ရောက်ရှိမည်ဖြစ်သည်။

ကာ့ဒ်သူပုန် ထောက်ခံသူများကို တွေ့ရစဉ်

ထိုသဘောတူစာချုပ် လက်မှတ်ရေးထိုးပြီးနောက် ဆီးရီးယား၏ အရှေ့မြောက်ပိုင်းရှိ ကာမီရှလီ (Qamishli) မြို့တွင် ဒေသခံများက လမ်းများပေါ်ထွက်ပြီး ပျော်ရွှင်စွာ အောင်ပွဲခံခဲ့ကြသည်။

“လူတွေက ဒီလိုသဘောတူညီချက်ကို လိုအပ်နေတာပါ။ ကမ္ဘာကြီးဟာ စစ်ပွဲတွေကြောင့် ပင်ပန်းနေပါပြီ။ အဲဒါ ကြောင့် ငြိမ်းချမ်းရေးကို ဆောင်ကြဉ်းပြီး ဒီမိုကရေစီစနစ် ကျင့်သုံးတဲ့ ဆီးရီးယားနိုင်ငံတော်သစ်ကို ထူထောင် နိုင်မယ့် ဒီသဘောတူညီချက်ကို ကျနော်တို့က ပျော်ရွှင်စွာ အောင်ပွဲခံနေကြတာပါ”ဟု မြို့ခံတစ်ဦးက ပြောကြား ခဲ့သည်။

အမေရိကန် ထောက်ပံ့ပေးထားသည့် SDF သည် တူရကီက ထောက်ပံ့ပေးထားသော လက်နက်ကိုင်အဖွဲ့များနှင့် ဆီးရီးယားနိုင်ငံ မြောက်ပိုင်းတွင် နှစ်ပေါင်းများစွာကြာ တိုက်ခိုက်မှုများ ဖြစ်ပွားခဲ့သည်။

ထိုသဘောတူညီချက်နှင့်ပတ်သက်ပြီး ရှာရား၏ အနီးကပ် မဟာမိတ်ဖြစ်သည့် တူရကီကမူ ချက်ချင်း မှတ်ချက် ပေးခဲ့ခြင်း မရှိပေ။

အမေရိကန်သမ္မတသစ် ဒေါ်နယ်ထရမ့် (Donald  Trump) ၏ အစိုးရအဖွဲ့သည် SDF ကို ကူညီပေးနေသည့် ဆီးရီးယားနိုင်ငံမှ အမေရိကန်တပ်ဖွဲ့များအား ပြန်လည်ရုပ်သိမ်း နိုင်ခြေရှိသဖြင့် SDF ခေါင်းဆောင်များသည် ဆီးရီးယားအစိုးရနှင့် သဘောတူညီချက်ယူရန် ဆုံးဖြတ်ခဲ့ခြင်းဖြစ်နိုင်သည်ဟု ကျွမ်းကျင်သူများက ပြောကြားခဲ့ သည်။

Source: ရိုက်တာ