CNI International News

ဝါရှင်တန် ၊ ဇူလိုင် ၁၇

အမေရိကန်သမ္မတ ရွေးကောက်ပွဲဝင် ကိုယ်စားလှယ်လောင်း ဒေါ်နယ်ထရမ့် (Donald Trump)သည် ဒုတိယ သမ္မတ ကိုယ်စားလှယ်လောင်း နေရာအတွက် ဂျေဒီ ဗန့်စ် (JD Vance) ကို တွဲဖက်ကိုယ်စားလှယ်လောင်းအဖြစ် ရွေးချယ်ခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

အသက် ၃၉ နှစ်အရွယ် အိုဟိုင်းယိုး (Ohio) ပြည်နယ်မှ အထက်လွှတ်တော်အမတ် ဗန့်စ်သည် ၂၀၁၆ ခုနှစ်က Hillbilly Elegy အမည်ရှိ ကိုယ်ရေးမှတ်တမ်း စာအုပ်ဖြင့် လူသိများထင်ရှား လာခဲ့သူဖြစ်သည်။

ထိုအချိန်က ထရမ့်သည် ပထမဆုံးအကြိမ် သမ္မတရွေးကောက်ပွဲ ဝင်ရောက်ယှဉ်ပြိုင်နေချိန် ဖြစ်သည်။

ဗန့်စ်သည် ၂၀၂၂ ခုနှစ်က အမေရိကန်အထက်လွှတ်တာ်တွင် ရွေးကောက်ခံခဲ့ရပြီး ထရမ့်၏ Make America Great Again ဆိုသည့် မူဝါဒကို အခိုင်အမာ ယုံကြည်သည့် ရီပတ်ဘလစ်ကန်များထဲတွင် တစ်ဦး အပါအဝင် ဖြစ်ခဲ့သည်။

သို့သော် သူသည် နိုင်ငံရေးနယ်ပယ်တွင် ကြီးမားသည့် စိန်ခေါ်မှုနှင့် ရင်ဆိုင်ခဲ့ရခြင်းမရှိဘဲ ယခုအကြိမ် ထရမ့်နှင့် တွဲပြီး ရွေးကောက်ပွဲဝင်ခြင်းသည် ဗန့်စ်အတွက် အကြီးမားဆုံး စိန်ခေါ်မှုတစ်ခု ဖြစ်လာခဲ့သည်။

ဒေါ်နယ်ထရမ့်နဲ့ ဂျေဒီဗန့်စ်ကို တွေ့ရစဉ်

အိုဟိုင်းယိုးပြည်နယ်၊ မစ်ဒယ်တောင်း (Middletown) မြို့တွင် မွေးဖွားကြီးပြင်းခဲ့သည့် ဗန့်စ်သည် အီရတ် စစ်မြေပြင် အပါအဝင် မရိန်းတပ်ဖွဲ့တွင် တာဝန်ထမ်းဆောင်ခဲ့သူဖြစ်ပြီး အိုဟိုင်းယိုးပြည်နယ် တက္ကသိုလ်နှင့် ယေးလ်ဥပဒေကျောင်းတို့မှ ဘွဲ့ရရှိခဲ့သူဖြစ်သည်။

ဗန့်စ်၏ Hillbilly Elegy စာအုပ်တွင် အမေရိကန် အလယ်ပိုင်းဒေသ၌ ထရမ့်ကို ထောက်ခံမှုများ မြင့်တက်စေခဲ့ သည့် အကြောင်း၊ အထူးသဖြင့် အလုပ်သမား လူတန်းစားများ၊ ကျေးလက်နေ လူဖြူမဲဆန္ဒရှင်များက ၂၀၁၆ ရွေးကောက်ပွဲတွင် ထရမ့်ကို အနိုင်ရရှိအောင် ကူညီပေးခဲ့သည့် အကြောင်းများကို ရေးသားဖော်ပြထားခြင်း ဖြစ်သည်။

ဗန့်စ်သည် ထရမ့်၏ အစောပိုင်း နိုင်ငံရေးလှုပ်ရှားမှုများကို ဝေဖန်ခဲ့သူဖြစ်ပြီး ထရမ့်ကို “အမေရိကန် ဟစ်တလာ” ၊ “ဟန်ဆောင်လိမ်ညာသူ” ၊ “စာရိတ္တ ပျက်ပြားသူ” ဆိုသည့် စကားလုံးများဖြင့် ဝေဖန်ခဲ့ရာမှ နောက်ပိုင်းတွင် ထရမ့်၏ အမာခံထောက်ခံသူ ဖြစ်လာခဲ့ခြင်းဖြစ်သည်။

ထို့ပြင် ဗန့်စ်သည် အစ္စရေးကို ထောက်ခံသူဖြစ်ပြီး ပြီးခဲ့သည့်နှစ် အောက်တိုဘာ ၇ ရက်က အစ္စရေးကို ဟားမာ့စ် အဖွဲ့က ဝင်ရောက်တိုက်ခိုက်ခဲ့သည့် ဖြစ်စဉ်နှင့်ပတ်သက်ပြီး သမ္မတဂျိုးဘိုင်ဒန် (Joe Biden) အစိုးရအဖွဲ့ကို အရင်ဆုံး ဝေဖန်ခဲ့သူဖြစ်သည်။

ဇူလိုင် ၁၃ ရက်က မဲဆွယ်စည်းရုံးပွဲတွင် ထရမ့် ပစ်ခတ်ခံခဲ့ရသည့် ဖြစ်စဉ်သည် ရွေးကောက်ပွဲအကြို မဲဆွယ် စည်းရုံးမှု အခြေအနေကို လှုပ်ခတ်သွားစေခဲ့သည်။

ထရမ့်သည် ထိုဖြစ်စဉ်ကြောင့် လူထုထောက်ခံမှု ပိုမိုမြင့်တက်လာခဲ့သည်ဟု စစ်တမ်းအချို့တွင် ဖော်ပြခဲ့သည်။

Source: အယ်လ်ဂျာဇီးယား

CNI International News

ဝါရှင်တန်၊ ဇူလိုင် ၁၆

ဇူလိုင် ၁၂ ရက်က အမေရိကန်သမ္မတဟောင်း ဒေါ်နယ်ထရမ့် (Donald Trump) ၏ မဲဆွယ်စည်းရုံးပွဲတွင် ပစ်ခတ်မှု ဖြစ်ပွားခဲ့ပြီးနောက် အမေရိကန်သမ္မတ ဂျိုးဘိုင်ဒန် (Joe Biden) နှင့် ၎င်း၏ ရွေးကောက်ပွဲပြိုင်ဘက် ထရမ့်တို့က စည်းလုံးညီညွတ်မှုအကြောင်းကို အလေးထား ပြောဆိုခဲ့ကြသည်ဟု အယ်လ်ဂျာဇီးယားမှ ဖော်ပြခဲ့ သည်။ 

အမေရိကန်ပြည်သူများ အနေဖြင့် နိုင်ငံရေးအရ စိတ်သဘောထား ကွဲလွဲမှုများ ဘေးချိတ်ပြီး စည်းစည်းလုံးလုံး နေထိုင်ကြရန် ဘိုင်ဒန်နှင့် ထရမ့်တို့က တိုက်တွန်းခဲ့ကြခြင်း ဖြစ်သည်။ 

ဇူလိုင် ၁၄ ရက်ညက အိမ်ဖြူတော်ရှိ ဘဲဥပုံရုံးခန်းတွင် ၆ မိနစ်ခွဲကြာမြင့်သည့် မိန့်ခွန်းအတွင်း ဘိုင်ဒန်က နိုင်ငံရေး အကြမ်းဖက်မှုသည် ပုံမှန်အခြေအနေကို ပြန်ဖြစ်နိုင်လိမ့်မည် မဟုတ်ကြောင်း၊ နိုင်ငံရေး အမုန်းတရားများ မြင့်တက်လာချိန်တွင် အခြေအနေကို တည်ငြိမ်အောင် လုပ်ဆောင်ရန် အမေရိကန်ပြည်သူအားလုံး၌ တာဝန်ရှိ ကြောင်း ပြောကြားခဲ့သည်။

"အမေရိကန်ကို ဒီလမ်းကြောင်းအတိုင်း နိမ့်ဆင်းသွားဖို့ ကျနော်တို့ အဖြစ်မခံနိုင်၊ အဖြစ်မခံရပါဘူး။ ကျနော်တို့ တွေဟာ အရင်က ကျနော်တို့ရဲ့ သမိုင်းတစ်လျှောက် လျှောက်လှမ်းခဲ့တဲ့ လမ်းပေါ်မှာပဲ လျှောက်ခဲ့ကြတာပါ။ အကြမ်းဖက်မှုဟာ အဖြေမဟုတ်ပါဘူး" ဟု ဘိုင်ဒန်က ပြောကြားခဲ့သည်။

ဘိုင်ဒန်က ဒီမိုကရက်များနှင့် ရီပတ်ဘလစ်ကန်များအကြားတွင် မတူကွဲပြားမှုများရှိကြောင်း ဝန်ခံခဲ့ပြီး နိုင်ငံရေး အရ သဘောထား မတိုက်ဆိုင်မှုများကို မဲရုံများတွင်သာ အမြဲတမ်း အဖြေရှာခဲ့ကြကြောင်း ပြောကြားခဲ့သည်။ 

 မဲဆွယ်ပွဲမှာ ထရမ့် သေနတ်နဲ့ပစ်ခံရစဉ်

ထရမ့်ကလည်း ဇူလိုင် ၁၃ ရက်တွင် Washington Examiner သတင်းနှင့် အင်တာဗျူး ပြုလုပ်ခဲ့ချိန်တွင် မဲဆွယ် စည်းရုံးပွဲအတွင်း ၎င်း ပစ်ခတ်ခံရသည့် ဖြစ်စဉ်သည် တစ်နိုင်ငံလုံး၊ တစ်ကမ္ဘာလုံးအတွက် စည်းလုံးညီညွတ်စေမည့် အခွင့်အလမ်းတစ်ခုဖြစ်ခဲ့ကြောင်း ပြောကြားခဲ့သည်။

ထိုတိုက်ခိုက်မှုနှင့်ပတ်သက်ပြီး ထရမ့်က အမှန်တရားသည် စတင် အကောင်အထည် ပေါ်လာပြီဖြစ်ကြောင်း ပြောကြားခဲ့သည်။

ထို့ပြင် ထရမ့်က ၎င်း၏ နောက်ထပ် မဲဆွယ်စည်းရုံးပွဲတွင် ပြောကြားမည့် မိန့်ခွန်းသည် ယခင်က ပြောကြားရန် စီစဉ်ထားသည့် မိန့်ခွန်းနှင့် ကွဲပြားခြားထားလိမ့်မည် ဖြစ်ကြောင်းလည်း Washington Examiner ကို ပြောကြားခဲ့ သည်။

ထရမ့်သည် ဇူလိုင် ၁၂ ရက်က ပင်ဆယ်ဗေးနီးယား (Pennsylvania) ပြည်နယ်၊ ဘတ်တလာ (Butler) မြို့တွင် ပြုလုပ်ခဲ့သည့် မဲဆွယ်စည်းရုံးပွဲ၌ သေနတ်ဖြင့် ပစ်ခတ်ခံခဲ့ရပြီး နားရွက်မှာ ဒဏ်ရာရသွားခဲ့သည်။

ထို့နောက် ၎င်းအား ပစ်ခတ်သည့် သေနတ်သမားကို Secret Service အဖွဲ့က အသေ ပစ်ခတ်ဖမ်းဆီးခဲ့သည်။

Source: အယ်လ်ဂျားဇီးယား

CNI International News

အစ္စလာမ်မာဘက်၊ ဇူလိုင် ၁၆

ပါကစ္စတန်အစိုးရ၏ ပြောကြားချက်များအရ ပါကစ္စတန်တွင် ဘာသာရေး လွတ်လပ်ခွင့်နှင့်ပတ်သက်ပြီး မေးခွန်း ထုတ်ခံနေရသည်။

ပါကစ္စတန်အစိုးရသည် နိုင်ငံအတွင်း ဘာသာရေး လွတ်လပ်ခွင့်နှင့်ပတ်သက်ပြီး အဓိပ္ပာယ်နှစ်မျိုးထွက်သည့် ပြောကြားချက်များကို ပြောဆိုနေသည်ဟု Bitter Winter သတင်းဝက်ဘ်ဆိုက်တွင် ဖော်ပြခဲ့သည်။

ဥပမာအနေဖြင့် ပါကစ္စတန် နိုင်ငံခြားရေးဝန်ကြီးဌာနက ပါကစ္စတန်နိုင်ငံအတွင်း ဘာသာရေး လွတ်လပ်ခွင့် မရှိကြောင်း ပြောဆိုခဲ့သည့် အမေရိကန်၏ ပြောဆိုချက်ကို ငြင်းပယ်ခဲ့ချိန်တွင် ပါကစ္စတန် ကာကွယ်ရေးဝန်ကြီး ဌာနကမူ နိုင်ငံအတွင်း ဘာသာရေး လူနည်းစုများသည် ဘေးကင်းလုံခြုံမှုမရှိကြောင်း ဝန်ခံခဲ့ခြင်းဖြစ်သည်။

မကြာသေးမီက အမေရိကန် နိုင်ငံခြားရေးဝန်ကြီးဌာန၏ ဘာသာရေး လွတ်လပ်ခွင့်ဆိုင်ရာ နှစ်စဉ် ထုတ်ပြန်ချက် တွင် ပါကစ္စတန်ကို ကမ္ဘာပေါ်တွင် ဘာသာရေး လွတ်လပ်ခွင့် ချိုးဖောက်သည့် အဆိုးရွားဆုံး နိုင်ငံများစာရင်းတွင် ထည့်သွင်းဖော်ပြထားသည်။

အဓိကရုန်းဖြစ်နေစဉ်

ထိုထုတ်ပြန်ချက်ကို ပါကစ္စတန်နိုင်ငံခြားရေးဝန်ကြီးဌာနက ချက်ချင်း ဝေဖန်ခဲ့ပြီး အမေရိကန်သည် ပါကစ္စတန် အစိုးရ၏ ဘာသာရေး လွတ်လပ်ခွင့် မြင့်တက်စေရန် ကြိုးပမ်းအားထုတ်မှုများကို လျစ်လျူရှုထားသည်ဟု ပါကစ္စတန် နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မမ်တက်ဇ် ဇာရာ ဘာလို့ချ် (Mumtaz Zahra Baloch) က ပြောကြားခဲ့သည်။

ထို့အပြင် လူ့အခွင့်အရေးကို မြှင့်တင်နေမှုကိုလည်း အထောက်အကူ မပေးကြောင်း ၎င်းက ပြောသည်။

ရက်အနည်းငယ် အကြာတွင်မူ ပါကစ္စတန် ကာကွယ်ရေးဝန်ကြီး ခါဝါဂျာ အာဆစ်ဖ် (Khawaja Asif) က နိုင်ငံခြားရေးဝန်ကြီးဌာန၏ ပြောကြားချက်နှင့် ဆန့်ကျင်ကွဲလွဲသည့် ပြောကြားချက်ကို ထုတ်ပြန်ခဲ့သည်။

ပါကစ္စတန်တွင် ဘာသာရေးကို အကြည်ညိုဖျက်မှုဖြင့် စွပ်စွဲခံရသူများကို အုပ်စုလိုက် ဝိုင်းဝန်းသတ်ဖြတ်သည့် ကိစ္စများနှင့်ပတ်သက်ပြီး အမျိုးသာလွှတ်တော်၌ ပါကစ္စတန် ကာကွယ်ရေးဝန်ကြီး ခါဝါဂျာ အာဆစ်ဖ်က မိန့်ခွန်း ပြောကြားသည်။

ပါကစ္စတန်အမျိုးသမီးတစ်ဦး ဘာသာရေးပွဲတစ်ခုမှာတွေ့ရစဉ်

ထိုသို့ မိန့်ခွန်းပြောကြားခဲ့ချိန်တွင် အာဆစ်ဖ်က "နေ့စဉ်နေ့တိုင်း လူနည်းစုတွေဟာ အသတ်ခံ နေရပါတယ်။ သူတို့ဟာ အစ္စလာမ်ဘာသာဝင်အဖြစ် အယောင်ဆောင်ထားသူတွေရဲ့ လက်ထဲမှာ ဘေးကင်းလုံခြုံမှု မရှိပါဘူး။ ပါကစ္စတန်ဟာ နိုင်ငံတကာမှာ မျက်နှာပျက်နေရပါတယ်။ ပါကစ္စတန်မှာ ဂိုဏ်းဂဏ ကွဲပြားတဲ့ မွတ်ဆလင် လူနည်းစုတွေဟာ ဘေးကင်းလုံခြုံမှု မရှိပါဘူး။ ဒါဟာ ရှက်ဖို့ကောင်းပါတယ်" ဟု ကာကွယ်ရေးဝန်ကြီး အာဆစ်ဖ်က ပြောကြားခဲ့သည်။

ထို့ပြင် ပါကစ္စတန်တွင် ဆွန်နီ (Sunni) မွတ်ဆလင်များက ၉၀ ရာခိုင်နှုန်းရှိပြီး ရှီးယိုက် (Shiites) မွတ်ဆလင် များက ၁၀ ရာခိုင်နှုန်းရှိကာ အာမက်ဒီ (Ahmadis) ဘာသာဝင်များကိုမူ ပါကစ္စတန်ဥပဒေအရ မွတ်ဆလင် မဟုတ်သူများအဖြစ် သတ်မှတ်ထားသည်။

ထို့ပြင် ဘာသာရေး အသရေဖျက်မှုဖြင့် စွပ်စွဲသတ်ဖြတ် ခံရသူအများစုသည် ဘာသာရေးကြောင့် မဟုတ်ဘဲ ပုဂ္ဂိုလ်ရေး ရန်ငြှိုးရန်စများကြောင့် သတ်ဖြတ်ခံရခြင်း ဖြစ်သည်ဟုလည်း အာဆစ်ဖ်က ပြောကြားခဲ့သည်။

Source: Bitter Winter

CNI International News

ပေကျင်း၊ ဇူလိုင် ၁၆

ရှန်ဟိုင်းပူးပေါင်းဆောင်ရွက်ရေးအဖွဲ့(SCO)အတွင်း တရုတ်သည် ဩဇာလွှမ်းမိုးနိုင်ရေးအတွက် အကျိုးစီးပွား များကို ရင်းနှီးမြှုပ်နှံကာ ဖော်ဆောင်နေသည်ဟု Greek City Times မှ ဖော်ပြခဲ့သည်။

ရှန်ဟိုင်းပူးပေါင်းဆောင်ရွက်ရေးအဖွဲ့ (SCO) သည် တရုတ်ကွန်မြူနစ်ပါတီ၏ ပထဝီနိုင်ငံရေးဆိုင်ရာ အကျိုး စီးပွားများကို ပြသရန်အတွက် အဓိကကျသည့် ဖိုရမ်တစ်ခုအဖြစ် ပေါ်ထွက်လာခြင်းဖြစ်သည်။

၂၀၀၁ ခုနှစ်က စတင်တည်ထောက်ခဲ့သည့် SCO တွင် ဗဟိုအာရှမှ အဓိကနိုင်ငံများပါဝင်ပြီး ဒေသတွင်း လုံခြုံရေးနှင့် စီးပွားရေး ဖွံ့ဖြိုးတိုးတက်ရေးကို အာရုံစိုက် လုပ်ဆောင်ရန် ရည်ရွယ်ခဲ့သည်။

သို့သော် SCO တွင် တရုတ်၏ ဗဟိုချုပ်ကိုင်မှုသည် သိသာထင်ရှားလာချိန်၌ ဖိုရမ်အတွင်း ပါဝင်သည့် အိန္ဒိယနှင့် ရုရှားတို့ကဲ့သို့ အဖွဲ့ဝင်နိုင်ငံများကို ကန့်သတ်ရာ ရောက်ခဲ့သည်ဟု ကျွမ်းကျင်သူများက ပြောကြားခဲ့သည်။

တရုတ်သည် SCO ကို အချက်နှစ်ချက်ဖြင့် မဟာဗျူဟာချပြီး ချဉ်းကပ်ဆောင်ရွက်နေသည်ကို တွေ့ရပြီး ပထမ အချက်မှာ ၎င်း၏ ပတ်လမ်း ရပ်ဝန်းစီမံကိန်း (BRI)ကို ဒေသတွင်း ချဲ့ထွင်ရန် အဖွဲ့ဝင်နိုင်ငံများ၏ စီးပွားရေးအား ခြေကုပ်တစ်ခုအဖြစ် အသုံးချရန် ကြိုးပမ်းနေခြင်းဖြစ်သည်။

SCO အဖွဲ့၀င် နိုင်ငံများရဲ့အလံကို လွှင့်ထူထားစဉ်

ဒုတိယအချက်မှာ တရုတ်သည် ၎င်း၏ သံတမန် လုပ်ထုံးလုပ်နည်းများကို မြှင့်တင်ခြင်းအားဖြင့် ကမ္ဘာလုံးဆိုင်ရာ တွင် ၎င်း၏ သြဇာလွှမ်းမိုးမှုကို ပိုမိုခိုင်မာစေရန် SCO ကို အကျိုးရှိရှိ အသုံးချခဲ့သည်ဟု လေ့လာသူများက ပြောကြားခဲ့သည်။ 

တရုတ်သည် ဗဟိုအာရှတွင် အခြေခံ အဆောက်အအုံ စီမံကိန်းများ၌ ငွေကြေးရင်းနှီးမြှုပ်နှံမှုများကို အများအပြား လုပ်ဆောင်ခြင်းဖြင့် ထိုနိုင်ငံများအား တရုတ်အပေါ် မှီခိုအားထားရသည့် အခြေအနေကို ဖန်တီးခဲ့သည်။ 

အထူးသဖြင့် အခြေခံ အဆောက်အအုံ ကဏ္ဍများတွင် တရုတ်က ထုတ်ပေးသည့် ချေးငွေများသည် ဒေသတွင်း စီးပွားရေးရှင်သန်နိုင်မှု အလားအလာအပေါ် သက်ရောက်စေခဲ့သည်ဟုလည်း ကျွမ်းကျင်သူများက ပြောသည်။

တရုတ်သည် ဖွံ့ဖြိုးဆဲနိုင်ငံများတွင် ဖွံ့ဖြိုးတိုးတက်မှုဆိုင်ရာ ငွေကြေးကဏ္ဍ၌ တစ်ဦးတည်းသော အကြီးမားဆုံး ချေးငွေထုတ်ပေးသည့် နိုင်ငံဖြစ်နေရုံသာမက ကမ္ဘာ့ဖွံ့ဖြိုးဆဲနိုင်ငံများ၏ ကြွေးမြီစုစုပေါင်း၏ များပြားသော ကြွေးမြီပမာဏကို ပြန်လည်ရရှိမည့် မြီရှင်နိုင်ငံလည်း ဖြစ်လာခဲ့သည်။

ထိုအခြေအနေများအရ တရုတ်သည် SCO ကို မောင်ပိုင်စီးသည့် ခေါင်းဆောင်တစ်ဦးအဖြစ် မဟာဗျူဟာချကာ ပုံဖော်နေပြီး ၎င်း၏ အကျိုးစီးပွားကို မြှင့်တင်နေချိန်တွင် ကျန်အဖွဲ့ဝင်နိုင်ငံများအနေဖြင့် ကြုံတွေ့လာရနိုင်သည့် စိန်ခေါ်မှုများကို ဖြေရှင်းရန် နည်းလမ်းများရှာဖွေရမည်ဟု ကျွမ်းကျင်သူများက ပြောကြားခဲ့သည်။

Source: Greek City Times

CNI International News

ဘေကျင်း၊ ဇူလိုင် ၁၅

တရုတ်နိုင်ငံတွင် ဖမ်းဆီးထိန်းသိမ်းမှုဆိုင်ရာ ဥပဒေများကို ပြောင်းလဲရန်နှင့် လက်ရှိ ကျင့်သုံးနေသည့် ပုံစံသည် အာဏာပိုင်များ၏ အနိုင်ကျင့်စော်ကားမှုများကဲ့သို့ ဖြစ်နေသည်ဟု တရုတ်တရားရေး ကျွမ်းကျင်သူများက တိုက်တွန်းခဲ့ကြောင်း SCMP မှ ဖော်ပြခဲ့သည်။

လက်ရှိကျင့်သုံးနေသည့် RSDL အမည်ရှိ ဖမ်းဆီးထိန်းသိမ်းမှုဆိုင်ရာ ပုံစံများသည် အလွန်ပြင်းထန်မှု မရှိသည့် ဥပဒေချိုးဖောက်မှုဖြင့် သံသယဖြစ်ခြင်း ခံထားရသူများအတွက် ပုဂ္ဂိုလ်ရေးဆိုင်ရာ လွတ်လပ်ခွင့်များကို အနည်းငယ်သာ ကန့်သတ်ရန် ရည်ရွယ်လုပ်ဆောင်ခဲ့ခြင်းဖြစ်သည်။

သို့သော် ဆယ်စုနှစ်များအကြာတွင် ထိုဖမ်းဆီး ထိန်းသိမ်းမှုပုံစံသည် အကြမ်းဖက်မှု အပါအဝင် နိုင်ငံတော်လုံခြုံ ရေး ကိစ္စများ၌ အသုံးပြုသည့် အကြမ်းတမ်းဆုံးနှင့် အပြင်းထန်ဆုံး ဖမ်းဆီးထိန်းသိမ်းမှုပုံစံ ဖြစ်လာခဲ့သည်။

လာမည့်နှစ်များအတွင်း ပြင်ဆင်မှုများပြုလုပ်ရန် စီစဉ်ထားသည့် ပြစ်မှုဆိုင်ရာ လုပ်ထုံးလုပ်နည်း ဥပဒေကို ဖျက်သိမ်းရန် သို့မဟုတ် RSDL ကို အလွဲသုံးမှုများ၊ လူ့အခွင့်အရေး ချိုးဖောက်မှုများနှင့် မှားယွင်းပြီး တရားစွဲဆိုမှု များမရှိစေဖို့ ပြောင်းလဲမှုများပြုလုပ်ရန် တရားရေးပညာရှင်များက ပြောကြားခဲ့သည်။

တရုတ်ရဲများကိုတွေ့ရစဉ်

ဧပြီလအတွင်းက ဘေကျင်း နည်းပညာကုမ္ပဏီ မန်နေဂျာ ရှင်းယန်ကျွင်း (Xing Yanjun) ၏ ဖြစ်စဉ်သည် ပြည်သူများအကြား ပျံ့နှံ့သွားခဲ့သည်။

သူသည် RSDL အရ သံသယတရားခံအဖြစ် ရဲတပ်ဖွဲ့၏ ဖမ်းဆီးခြင်းကို ခံခဲ့ရပြီးနောက် သေဆုံးသွားခဲ့ခြင်း ဖြစ်သည်။

ရှင်းသည် သူ့ကိုယ်သူ ကြိုးဆွဲချ သေဆုံးသွားခဲ့ခြင်းဖြစ်ကြောင်း ရဲတပ်ဖွဲ့က ကျန်ရစ်မိသားစုကို အကြောင်းကြား ခဲ့သော်လည်း ၎င်းတို့ မိသားစုသည် ရဲတပ်ဖွဲ့၏ ပြောကြားချက်ကို မယုံကြည်ဘဲ အမှန်တရားကိုသာ ဖော်ထုတ်လို ကြောင်း ရှင်း၏ အစ်ကိုက Weibo လူမှုမီဒီယာတွင် ရေးသားဖော်ပြခဲ့သည်။

RSDL အစီအစဉ်ကို ၁၉၉၆ ခုနှစ်တွင် စတင် အကောင်အထည်ဖော် ပြဋ္ဌာန်းခဲ့ပြီး သံသယဖြစ်ခံထားရသူများကို ဖမ်းဆီးထိန်းသိမ်းမှုနှင့် ပတ်သက်သည့် ပြစ်မှုဆိုင်ရာ လုပ်ထုံးလုပ်နည်းဥပဒေကို ပြန်လည် ပြင်ဆင်ချိန်က စတင် အကောင်အထည်ဖော်ခဲ့ခြင်းဖြစ်သည်။

ပြစ်မှုဆိုင်ရာ လုပ်ထုံးလုပ်နည်းဥပဒေကို အဆင့်မြှင့်တင် မွမ်းမံမှုများကို ယခုနှစ် စက်တင်ဘာတွင် ၁၄ ကြိမ် မြောက် အမျိုးသားပြည်သူ့လွှတ်တော် အမြဲတမ်းကော်မတီ၏ ဥပဒေပြုရေး အစီအစဉ်များ၌ ထည့်သွင်း ရေးဆွဲသွားမည်ဖြစ်သည်။

Source: SCMP

CNI International News    

ဂါဇာ၊ ဇူလိုင် ၁၅

ဂါဇာကမ်းမြောင်ဒေသရှိ အယ်လ် မာဝါစီ (Al-Mawasi) ဒုက္ခသည်စခန်းကို အစ္စရေးက တိုက်ခိုက်ခဲ့သဖြင့် အမျိုးသမီးများနှင့်ကလေးများ အပါအဝင် လူပေါင်း ၉၂ ဦးထက်မနည်း သေဆုံးကာ ၃၀၀ ကျော် ဒဏ်ရာရခဲ့ ကြောင်း ဂါဇာကျမ်းမာရေးဝန်ကြီးဌာနက ပြောကြားခဲ့သည်ဟု ရိုက်တာမှ ဖော်ပြခဲ့သည်။

အစ္စရေးစစ်တပ်ကမူ ဇူလိုင် ၁၃ ရက်က ပြုလုပ်ခဲ့သည့် တိုက်ခိုက်မှုသည် ဟားမာ့စ်အဖွဲ့၏ လက်နက်ကိုင်တပ်ဖွဲ့ ဖြစ်သည့် Al-Qassam Brigades အကြီးအကဲ ဒီအစ်ဖ် (Deif) နှင့် တပ်မှူး ရာဖာ ဆလာမာ (Rafa Salama) တို့ကို ပစ်မှတ်ထားခဲ့ခြင်းဖြစ်ကြောင်း ပြောကြားခဲ့သည်။

သို့သော် ထိုတိုက်ခိုက်မှုတွင် အစ္စရေးစစ်တပ်က ပစ်မှတ်ထားခဲ့သည့် ဟားမာ့စ် စစ်ခေါင်းဆောင်များ သေဆုံးခြင်း ရှိ/မရှိ မသေချာကြောင်း အစ္စရေးဝန်ကြီးချုပ် ဘင်ဂျမင် နေတန်ယာဟု (Benjamin Netanyahu) က ပြောကြားခဲ့ သည်။

ဒီအစ်ဖ်သည် အစ္စရေး၏ ဖမ်းဆီးရန် အလိုအရှိဆုံး လူပုဂ္ဂိုလ်တစ်ဦးဖြစ်ပြီး အစ္စရေးတွင် အရပ်သားများနှင့် စစ်သားများ သတ်ဖြတ်ခံခဲ့ရသည့် ဖြစ်စဉ်များအတွက် တာဝန်ရှိသူဖြစ်ကြောင်း အစ္စရေးအာဏာပိုင်များက ပြောကြားခဲ့သည်။

ယခင်ကလည်း ဒီအစ်ဖ်ကို လုပ်ကြံသတ်ဖြတ်ရန် ကြိုးပမ်းမှုပေါင်း ခြောက်ကြိမ်ရှိခဲ့သော်လည်း ဒီအစ်ဖ်သည် အသက်ရှင်လျက် လွတ်မြောက်ခဲ့သည်။

 အစ္စရေးရဲ့ တိုက်ခိုက်မှုကိုတွေ့ရစဉ်

ထိုကဲ့သို့ ယခုသီတင်းပတ်အတွင်း လူသေဆုံးမှု အများဆုံး တိုက်ခိုက်မှုဖြစ်သည့် ဇူလိုင် ၁၃ ရက် တိုက်ခိုက်မှု ဖြစ်ပွားခဲ့သော်လည်း ဟားမာ့စ်အဖွဲ့က အစ္စရေးနှင့် အပစ်အခတ် ရပ်စဲရေးဆွေးနွေးပွဲများမှ နုတ်ထွက်မည် မဟုတ်ကြောင်း ပြောကြားခဲ့သည်။

အစောပိုင်းက အစ္စရေး၏ တိုက်ခိုက်မှုကြောင့် အပစ်အခတ်ရပ်စဲရေး ဆွေးနွေးမှုများကို ရပ်တန့်ရန် ဆုံးဖြတ်ကြောင်း ဟားမာ့စ်အဖွဲ့၏ ကာတာ (Qatar) အခြေစိုက် နိုင်ငံရေးအကြီးအကဲ အစ္စမေးလ် ဟာနီယာ (Ismail Haniyeh) က ပြောကြားခဲ့ပြီးနောက် နာရီပိုင်းအကြာတွင် ဟားမာ့စ်အဖွဲ့က ထိုပြောကြားချက်ကို ငြင်းဆိုခဲ့ခြင်းဖြစ်သည်။

ဟားမာ့စ်အဖွဲ့အနေဖြင့် အပစ်အခတ်ရပ်စဲရေး ဆွေးနွေးပွဲမှ နုတ်ထွက်မည် မဟုတ်ကြောင်း အစ္စရေးဝန်ကြီးချုပ် နေတန်ယာဟုသည် အပစ်အခတ်ရပ်စဲရေး ဆွေးနွေးမှုများကို လမ်းလွဲစေရန် ကြိုးပမ်းနေခြင်းဖြစ်ကြောင်း ဟားမာ့စ်အဖွဲ့၏ နိုင်ငံရေးရုံးမှ ထိပ်သီးအရာရှိ အစ်ဇက် အယ်လ် ရက်ရှစ် (Izzat El-Reshiq) က ထုတ်ပြန်ခဲ့သည်။

ဂါဇာကမ်းမြောင်ဒေသတွင် ဖြစ်ပွားနေသည့် စစ်ပွဲကို အဆုံးသတ်စေရန် အစ္စရေးနှင့် ဟားမာ့စ်အကြား အပစ်အခတ်ရပ်စဲရေး ဆွေးနွေးမှုများကို အမေရိကန်၏ ထောက်ခံမှုနှင့်အတူ ကာတာနှင့် အီဂျစ်တို့က ကြားဝင်စေ့စပ်ညှိနှိုင်းပေးလျက်ရှိသည်။

Source: ရိုက်တာ

CNI International News

မော်စကို၊ ဇူလိုင် ၁၅

ဇူလိုင် ၁၃ ရက်က အမေရိကန်သမ္မတရွေးကောက်ပွဲဝင် ကိုယ်စားလှယ်လောင်း ဒေါ်နယ်ထရမ့် (Donald Trump) အား လုပ်ကြံသတ်ဖြတ်ရန် ကြိုးပမ်းမှုတစ်ခုတွင် လက်ရှိ အမေရိကန်အစိုးရ၌ တာဝန်ရှိသည်ဟု ရုရှားက မယူဆ ထားသော်လည်း ထိုအခြေအနေမျိုး ရောက်ရှိစေရန် ဖန်တီးခဲ့ခြင်းဖြစ်သည်ဟု ကရင်မလင်ပြောရေးဆိုခွင့်ရှိသူ ဒီမီထရီ ပက်စ်ကော့ဗ် (Dmitry Peskov) က ပြောကြားခဲ့ကြောင်း ရိုက်တာမှ ဖော်ပြခဲ့သည်။

ထရမ့်သည် ပင်ဆယ်ဗေးနီးယား (Pennsylvania) ပြည်နယ်၊ ဘတ်တလာ (Butler) မြို့တွင် မဲဆွယ်စည်းရုံးပွဲ ပြုလုပ်နေချိန်၌ ပစ်ခတ်ခံခဲ့ရခြင်းဖြစ်သည်။

ထို့နောက် နားရွက်မှာ ဒဏ်ရာရရှိသွားခဲ့ကြောင်း၊ သို့သော်လည်း ဒဏ်ရာပြင်းပြင်းထန်ထန် မရခဲ့ပေ။ 

ပစ်ခတ်မှုကို ကျူးလွန်သူသည် ထရမ့်၏ မဲဆွယ်စည်းရုံးပွဲ ကျင်းပရာနေရာနှင့် မီတာ ၁၅၀ အကွာ အဝေးအတွင်းရှိ စက်ရုံခေါင်မိုးတစ်ခုအပေါ်မှ ပစ်ခတ်ခဲ့ခြင်းဖြစ်ပြီး Secret Service လုံခြုံရေးအဖွဲ့က သေနတ်သမားကို ပစ်ခတ် နှိမ်နင်းခဲ့သည်။

ကရင်မလင်ပြောရေးဆိုခွင့်ရှိသူ ဒီမီထရီ ပက်စ်ကော့ဗ်ကို တွေ့ရစဉ်

ထိုပစ်ခတ်မှုတွင် မဲဆွယ်စည်းရုံးပွဲကို တက်ရောက်လာသူ ၁ ဦး သေဆုံးပြီး ၂ ဦး  ဒဏ်ရာရခဲ့သည်။

ထို့နောက် Secret Service အဖွဲ့၏ ပစ်ခတ်သတ်ဖြတ်ခံရသည့် သေနတ်သမားသည် ပင်ဆယ်ဗေးနီးယားပြည်နယ် ဘီသယ် ပါ့ခ် (Bethel Park) မြို့တွင် နေထိုင်သည့် အသက် ၂၀ အရွယ် သောမတ်စ် မက်သူး ကရွတ် (Thomas Mattew Crooks) ဆိုသူ ဖြစ်ကြောင်း FBI က ထုတ်ပြန်ခဲ့သည်။

“ထရမ့်ကို လုပ်ကြံသတ်ဖြတ်ဖို့ ကြိုးပမ်းမှုကို လက်ရှိ အမေရိကန်အစိုးရက စီမံလုပ်ဆောင်ခဲ့တယ်လို့ ကျနော်တို့ မယူဆပါဘူး။ ဒါပေမယ့် ထရမ့်ကို တိုက်ခိုက်ခံရမယ့် အခြေအနေကိုတော့ ဖန်တီးခဲ့ပါတယ်” ဟု ပက်စကော့ဗ်က ပြောကြားခဲ့သည်။

ဒေါ်နယ်ထရမ့် မဲဆွယ်စဉ် သေနတ်ပစ်ခံရ

တရားရေးဆိုင်ရာ အမှုအခင်းများ၊ တရားရုံးများ၊ အစိုးရရှေ့နေများကို အသုံးပြုပြီး ထရမ့်ကို နိုင်ငံရေးနယ်ပယ်တွင် ကိုယ်စားလှယ်လောင်းအဖြစ်မှ ဖယ်ရှားရန် ကြိုးပမ်းမှုများပြု ရှိခဲ့ပြီးနောက် ထိုအခြေအနေများ အားလုံးသည် ထရမ့်ကို အသက်အန္တရာယ်ရှိစေသည့် အခြေအနေသို့ ရောက်ရှိစေခဲ့သည်ဟု ပက်စ်ကော့ဗ်က ပြောသည်။

အမေရိကန်သမ္မတ ဂျိုးဘိုင်ဒန် (Joe Biden) ကမူ ထိုတိုက်ခိုက်မှုကို ရှုတ်ချခဲ့ပြီး အမေရိကန်တွင် ထိုကဲ့သို့ အကြမ်းဖက်မှုများအတွက် နေရာမရှိကြောင်း ပြောကြားခဲ့သည်။ 

ထို့ပြင် ကမ္ဘာတစ်ဝန်းမှ ခေါင်းဆောင်များကလည်း ထိုတိုက်ခိုက်မှုကို ရှုတ်ချခဲ့ပြီး ထရမ့်ဘက်မှ ရပ်တည်ပြောကြား ခဲ့ကြသည်။

သို့သော် ရုရှားသမ္မတ ပူတင် (Putin) အနေဖြင့် ထိုတိုက်ခိုက်မှု ဖြစ်စဉ်နှင့်ပတ်သက်ပြီး ထရမ့်ကို ဖုန်းခေါ်ဆိုရန် အစီအစဉ်မရှိကြောင်း ပက်စ်ကော့ဗ်က ပြောကြားခဲ့သည်။

Source: ရိုက်တာ

CNI International News
ပဲရစ်၊ ဇူလိုင် ၁၃ 

တရုတ်သည် ပါကစ္စတန်နိုင်ငံထံမှ တရားမဝင် ရယူခဲ့သည့် ရှက်စ်ဂမ် (Shaksgam) တောင်ကြားကို အသုံးပြုပြီး တောင်အာရှ၏ ရှိရင်းစွဲ အခြေအနေကို တစ်ဖက်သတ် ပြောင်းလဲရန်ကြိုးပမ်းနေသည်ဟု institut-ega ဝက်ဘ်ဆိုက်မှ ဖော်ပြခဲ့သည်။

ထိုအကြောင်းအရာနှင့် ပတ်သက်ပြီး ပြင်သစ်နိုင်ငံ၊ ပဲရစ်မြို့တော်ရှိ CRISIS24 အမည်ရှိ ကျွမ်းကျင်ပညာရှင်များ အဖွဲ့၏ သတင်းအချက်အလက် ညွှန်ကြားရေးမှူး အိုလီဗီယာ ဂီလာ့ဒ် (Olivier Guillard) က ၎င်း၏ အတွေးအမြင် ကို ရေးသားဖော်ပြခဲ့သည်။

၁၉၆၃ ခုနှစ် တရုတ်-ပါကစ္စတန် သဘောတူညီချက် (China-Pakistan Agreement 1963) အရ ပါကစ္စတန်သည် ရှက်စ်ဂမ်တောင်ကြားကို တရုတ်အား ၁၉၆၃ ခုနှစ်တွင် တရားမဝင် လက်ဆောင်ပေးခဲ့သည်ဟု ဆိုသည်။

ထိုအချိန်က ပါကစ္စတန် စစ်ဗိုလ်ချုပ်ကြီး အာယွတ်ခန်း (Ayub Khan) သည် ပါကစ္စတန်က သိမ်းပိုက်ထားသည့် ကက်ရှ်မီးယားဒေသ (PoK) ၏ နယ်မြေအစိတ်အပိုင်းအချို့ကိုလည်း တရုတ်အား ပေးအပ်ခဲ့သည်။

တရုတ်-ပါကစ္စတန်- အိန္ဒိယ နယ်နိမိတ်ကိုတွေ့ရစဉ်

၎င်းတို့၏ သဘောတူညီချက်သည် တရုတ်၏ ရှင်ကျန်း (Xinjiang) ဒေသနှင့် PoK အကြား နယ်မြေသတ်မှတ်ချက် မျဉ်းတစ်ခု ရေးဆွဲထူထောင်ရန်ဖြစ်ပြီး တောင်စောင်းများနှင့် မြစ်များကို ချိတ်ဆက်ရန် ရည်ရွယ်ခဲ့ခြင်းဖြစ်သည်။ 

သို့သော် ရှက်စ်ဂမ်တောင်ကြားတွင် ပါကစ္စတန်၏ သိမ်းပိုက်မှုအောက်၌ ရှိနေသည့် အိန္ဒိယ၏ နယ်နိမိတ်တစ်ခု ဖြစ်သဖြင့် တရုတ်၏ လုပ်ဆောင်မှုများသည် တရားမဝင်ကြောင်း ဂီလာ့ဒ်က ရေးသားခဲ့သည်။

ထိုနောက်ခံ ဇာတ်ကြောင်းများအရ တရုတ်သည် ရှက်စ်ဂမ်တောင်ကြားလမ်း ၃ လမ်းကို တရားမဝင် ဖောက်လုပ် ခဲ့ပြီး ၂၀၂၄ ခုနှစ်၊ မတ်လကလည်း ထိုဒေသတွင် ဆောက်လုပ်ရေးစခန်းအ သစ်များကို တည်ဆောက်ခဲ့သည်။

ထို့ကြောင့် ရှက်စ်ဂမ်တောင်ကြားတွင် တရုတ်၏ တရားမဝင် ဆောက်လုပ်မှုများသည် တောင်အာရှဒေသ၏ ရှိရင်းစွဲ အခြေအနေကို တစ်ဖက်သတ် ပြောင်းလဲရန်ဖြစ်ပြီး နိုင်ငံတကာဥပဒေများနှင့် သဘောတူညီမှုများကို လျစ်လျူရှုရာ ရောက်နေကြောင်း ဝေဖန်မှုများ ထွက်ပေါ်ခဲ့သည်။

ထို့ကြောင့် ဘူတန်၊ နီပေါနှင့် အိန္ဒိယကဲ့သို့ တောင်အာရှနိုင်ငံများက တရုတ်၏ လှုပ်ရှားမှုများကို ဝေဖန်ခဲ့ကြပြီး အထူးသဖြင့် အင်အားကြီးနိုင်ငံများဖြစ်သည့် တရုတ်နှင့် အိန္ဒိယအကြား အချုပ်အခြာ အာဏာပိုင်မှုဆိုင်ရာ အငြင်းပွားမှုများကို ပိုမိုမြင့်တက်စေခဲ့သည်။

Source: Institut-ega

CNI International News
ဝါရှင်တန်၊ ဇူလိုင် ၁၃

အမေရိကန်သမ္မတ ဂျိုးဘိုင်ဒန် (Joe Biden) သည် ဇူလိုင် ၁၁ ရက်က ဝါရှင်တန်တွင် ပြုလုပ်သည့် နေတိုး အစည်းအဝေးပွဲ၏ သတင်းစာရှင်းလင်းပွဲ၌ ယူကရိန်းသမ္မတ ဗိုလိုဒီမာ ဇာလန်းစကီး (Volodymyr Zelenskiy) ၏ အမည်ကို ရုရှားသမ္မတ ဗလာဒီမာ ပူတင် (Vladimir Putin) နှင့် မှားယွင်းပြောဆိုခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ထိုသတင်းစာ ရှင်းလင်းပွဲတွင် ဘိုင်ဒန်က "အခုစကားပြောဖို့ အလှည့်ပေးချင်တဲ့ သူကတော့ ယူကရိန်းသမ္မတပါ။ ရဲစွမ်းသတ္တိနဲ့ ပြည့်စုံတဲ့သူပေါ့။ ဂုဏ်သရေရှိ လူကြီးမင်းများခင်ဗျား။ သူကတော့ သမ္မတ ပူတင်ပဲ ဖြစ်ပါတယ်" ဟု ပြောကြားခဲ့ပြီးနောက် လှည့်ထွက်ရန်ပြင်ခဲ့သည်။

ထို့နောက် ၂ စက္ကန့်အကြာမှာပင် မိုက်ခရိုဖုန်းထံ ပြန်လှည့်လာခဲ့ပြီး "သမ္မတပူတင်လေ။ ခင်ဗျားက သမ္မတပူတင် ကို အနိုင်ယူရမှာ သမ္မတ ဇာလန်းစကီးရဲ့။ ကျနော်က ပူတင်ကို အနိုင်ယူဖို့ပဲ အရမ်းအာရုံစိုက်ခဲ့ပါတယ်" ဟု ဘိုင်ဒန်က သူ့အမှားကို ပြန်လည်ပြင်ဆင်ပြောကြားခဲ့သည်။

ဘိုင်ဒန်၏ မှားယွင်းပြောဆိုခဲ့ချိန်တွင် သတင်းစာ ရှင်းလင်းပွဲ ပြုလုပ်သည့် တစ်ခန်းလုံး အံ့အားသင့်သွားခဲ့သည်။

ထို့နောက် ဇာလန်းစကီးက ဘိုင်ဒန်၏ မှားယွင်းပြောဆိုမှုကို တုန့်ပြန်သည့်အနေဖြင့် "ကျနော်က (ပူတင်ထက်) ပိုကောင်းပါတယ်" ဟု ရယ်မောပြီး အရွှန်းဖောက် ပြောဆိုခဲ့သည်။

ဘိုင်ဒန်ကလည်း "ဟုတ်တာပေါ့။ ခင်ဗျားက အများကြီး ပိုကောင်းတာပေါ့" ဟု ပြန်ပြောချိန်တွင် စင်အောက်မှ ရယ်သံအချို့ ထွက်ပေါ်လာခဲ့သည်။

ဘိုင်ဒန်သည် ပြီးခဲ့သည့်လက ဒေါ်နယ်ထရမ့် (Donald Trump) နှင့် ပြုလုပ်ခဲ့သည့် စကားစစ်ထိုးပွဲတွင် စကား ထစ်ခြင်း၊ အသံဝင်ခြင်းနှင့် ထရမ့်၏ ထိုးနှက်ချက်များကို ကောင်းမွန်စွာ မချေပနိုင်ခြင်းတို့ကြောင့် ၎င်း၏ အသက်အရွယ်နှင့် စိတ်ပိုင်းဆိုင်ရာ ကြံ့ခိုင်မှုတို့အပေါ် မေးခွန်းများ ထွက်ပေါ်ခဲ့ကာ ဖိအားများနှင့် ရင်ဆိုင်နေရသည်။

ဘိုင်ဒန်၏ အသက်အရွယ်သည် ရွေးကောက်ပွဲ ဝင်ရောက်ယှဉ်ပြိုင်ရန် သင့်/မသင့်အပေါ် ဒီမိုကရက်များအကြား စိုးရိမ်မှုများ မြင့်တက်နေချိန်တွင် ယခုကဲ့သို့ ဇာလန်းစကီး အမည်နှင့် ပူတင်၏ အမည်ကို မှားယွင်းပြောဆိုခဲ့ခြင်း ဖြစ်သည်။

ဘိုင်ဒန်ကမူ သူသည် ရွေးကောက်ပွဲမှ နုတ်ထွက်မည် မဟုတ်ကြောင်းနှင့် နိုဝင်ဘာ ၅ ရက်တွင် ပြုလုပ်မည့် သမ္မတရွေးကောက်ပွဲ၌ ထရမ့်ကို အနိုင်ယူရန် အကောင်းဆုံး အနေအထားတွင် ရှိနေကြောင်း ပြောကြားခဲ့သည်။

Source: ဘန်ကောက်ပို့စ်