CNI International News

မော်စကို၊ ဇူလိုင် ၁၁

အိန္ဒိယအနေဖြင့် ယူကရိန်းပဋိပက္ခအား ငြိမ်းချမ်းစွာ ဖြေရှင်းရေးကို ထောက်ခံကြောင်းနှင့် ထိုလုပ်ငန်းစဉ်ကို ဖြစ်မြောက်စေရန် အသင့်ရှိကြောင်း အိန္ဒိယဝန်ကြီးချုပ် မိုဒီ (Narendra Modi) က ပြောကြားခဲ့သည်ဟု တာ့စ် သတင်းဌာနက ဖော်ပြခဲ့သည်။ 

ကရင်မလင်တွင် ရုရှားနှင့် အိန္ဒိယ ကိုယ်စားလှယ်အဖွဲ့များ၏ တရားဝင် ဆွေးနွေးပွဲမတိုင်မီ မိုဒီက ယခုလို ပြောကြားခဲ့ခြင်း ဖြစ်သည်။

"ပဋိပက္ခကို ဖြေရှင်းဖို့ ဘယ်လိုပဲလုပ်ရလုပ်ရ ကျနော်တို့ဘက်က အသင့်ပါပဲ" ဟု မိုဒီက ပြောကြားခဲ့သည်။

မိုဒီနဲ့ပူတင်ကို တွေ့ရစဉ်

ထို့နောက် ဇူလိုင် ၈ ရက်က မော်စကိုတွင် ရုရှားသမ္မတ ပူတင်(Vladimir Putin) နှင့် အလွတ်သဘော တွေ့ဆုံခဲ့ ချိန်၌ ငြိမ်းချမ်းရေးကို အမြန်ဆုံး ထူထောင်သင့်ကြောင်း ခေါင်းဆောင်နှစ်ဦးစလုံးက သဘောတူညီခဲ့ကြသည်။

ကမ္ဘာပေါ်ရှိ မည်သည့် ပဋိပက္ခကိုမဆို ငြိမ်းချမ်းသည့် ရည်ရွယ်ချက်နှင့်အတူ ဆွေးနွေးပွဲများဖြင့်သာ ဖြေရှင်း နိုင်လိမ့်မည်ဟု အိန္ဒိယက ယုံကြည်ကြောင်း၊ ဒုံးကျည်များ၊ အမြောက်ဆန်များနှင့် သေနတ်များသည် ပြဿနာကို မဖြေရှင်းနိုင်ကြောင်း၊ ငြိမ်းချမ်းရေးကို မဖော်ဆောင်နိုင်ကြောင်း မိုဒီက ပြောကြားခဲ့သည်။

"မျိုးဆက်သစ်တွေရဲ့ အနာဂတ် တောက်ပဖို့အတွက် ငြိမ်းချမ်းရေး လိုအပ်ပါတယ်" ဟု မိုဒီက ပြောကြားခဲ့သည်။

Source: တာ့စ်

CNI International News

ဘန်ကောက်၊ ဇူလိုင် ၁၀ 

ထိုင်ဝန်ကြီးချုပ်ဟောင်း သက်ဆင်ရှာနာဝပ် (Thaksin Shinawatra) သည် အကျဉ်းချခံခဲ့ရချိန်က ရဲတပ်ဖွဲ့ဆေးရုံ တွင် ဆေးဝါးကုသမှုခံယူနေချိန်အတွင်း ရဲတပ်ဖွဲ့အကြီးအကဲဟောင်းနှင့် တွေ့ဆုံခဲ့သည့် သတင်းများကို စုံစမ်း စစ်ဆေးမှုပြုလုပ်ရန် ဒီမိုကရက် လွှတ်တော်အမတ်ဟောင်းတစ်ဦးက တိုက်တွန်းခဲ့သည်ဟု Thai PBS World မှ ဖော်ပြခဲ့သည်။

အငြိမ်းစား ရဲချုပ် ဆာရီးပီဆွတ် တီမီယာဗက်စ် (Sereepisuth Temeeyaves) သည် ရဲတပ်ဖွဲ့ဆေးရုံ၏ ၁၄ လွှာ တွင် ဆေးဝါးကုသမှု ခံယူခဲ့သည့် သက်ဆင်ဆီသို့ သွားရောက်ခဲ့ကြောင်း မီဒီယာနှစ်ခုကို ပြောကြားခဲ့သည်ဟု လွှတ်တော်အမတ်ဟောင်း သက်ပ်တိုင် ဆီအန်နာပွန်း (Theptai Seanapong) က ပြောကြားခဲ့သည်။

၎င်းတို့ ၂ ဦး၏ တွေ့ဆုံမှုတွင် ဝန်ကြီးချုပ် ဆရီသာ သာဗီဆင် (Srettha Thavsin)ကို အမျိုးသား အဂတိလိုက်စား မှုတိုက်ဖျက်ရေးအဖွဲ့ (NACC) ထံ တင်သွင်းထားသည့် တိုင်ကြားစာကို ပြန်လည်ရုပ်သိမ်းပေးရန် သက်ဆင်က ဆာရီးပီဆွတ်အား တိုက်တွန်းခဲ့သည်ဟု ဆီအန်နာပွန်းက ပြောသည်။

ဆရီသာသည် အမျိုးသားရဲတပ်ဖွဲ့ အကြီးအကဲသစ်အဖြစ် ရဲချုပ် တော်ဆက် ဆွတ်ဝီမိုလ် (Torsak Sukvimol) ကို ခန့်အပ်ခဲ့ချိန်တွင် အာဏာအလွဲသုံးစားလုပ်ခဲ့သည်ဟု ဆာရီးပီဆွတ်က NACC ကို တိုင်ကြားခဲ့ခြင်းဖြစ်သည်။

ထိုအမှုသည် NACC ထံ ရောက်ရှိသွားနှင့်ပြီးဖြစ်ကြောင်း ဆာရီးပီဆွတ်က သက်ဆင်ကို ပြောကြားခဲ့သည်။

ထိုင်း၀န်ကြီးချုပ် ဆရီသာကို တွေ့ရစဉ်

သို့သော်လည်း သက်ဆင်က ထိုအမှုကို သူနှင့် NACC အား ကိုင်တွယ်ဖြေရှင်းခွင့်ပေးရန် ပြောကြားခဲ့သည်ဟုလည်း ဆာရီးပီဆွတ်က မီဒီယာများကို ပြန်လည်ပြောကြားခဲ့သည်။

“အရင်ဝန်ကြီးချုပ် ခွန် ယင်းလပ် (Khun Yingluck) ကလည်း သူ့အစ်ကို သက်ဆင်လိုပဲ ကျနော့်ကို တယ်လီဖုန်း ဆက်ပြီး တိုင်ကြားစာကို ရုပ်သိမ်းပေးဖို့ တောင်းဆိုခဲ့ပါတယ်” ဟု ဆာရီးပီဆွတ်က ပြောသည်။

ဆာရီးပီဆွတ်၏ ပြောကြားချက်များအရ သက်ဆင်သည် အကျဉ်းချခံထားရစဉ် ကျန်းမာရေး အကြောင်းပြချက် ဖြင့် ရဲတပ်ဖွဲ့ဆေးရုံတွင် ကုသမှုခံယူခဲ့ရသော်လည်း ထိုအချိန်က သက်ဆင်သည် အလွန် နာမကျန်းဖြစ်နေပုံ မပေါ်ကြောင်း ဆီအန်နာပွန်းက ပြောသည်။

“ဒီဖြစ်စဉ်အရ သက်ဆင်နဲ့ ယင်းလပ်တို့ဟာ ဒီအစိုးရနောက်ကွယ်မှာ ဩဇာလွှမ်းမိုးနေတဲ့ ခေါင်းဆောင်တွေ ဖြစ်တယ်ဆိုတာကို ဖော်ပြရာ  ရောက်နေပါတယ်။ သူတို့က ဒီအစိုးရကို ထိန်းချုပ်နေသူတွေပါ” ဟု ဆီအန်နာပွန်း က ပြောကြားခဲ့သည်။

ဆရီသာသည် သက်ဆင်မိသားစု၏ လက်အောက်ခံတစ်ဦးမျှသာဖြစ်သည်ဟုလည်း ဆီအန်နာပွန်းက ပြောကြား ခဲ့သည်။

Source: Thai PBS World

CNI International News

ဘေကျင်း၊ ဇူလိုင် ၁၀

အလွန်ရှေးကျသည့် စစ်ဘက်ဆိုင်ရာ အတွေးအခေါ်များထဲတွင် နက်ရှိုင်းစွာ အမြစ်တွယ်နေသော တရုတ်ပြည်သူ့ လွတ်မြောက်ရေးတပ်မတော်(PLAကို ပြုပြင်ပြောင်းလဲရန် ပျက်ကွက်မှုသည် မျက်မှောက်ခေတ် စစ်ဘက်ဆိုင်ရာ လိုအပ်ချက်များနှင့် အံဝင်ခွင်ကျမှုမရှိကြောင်း ကျွမ်းကျင်သူများက ယူဆထားကြသည်ဟု Asia Times မှ ဖော်ပြခဲ့ သည်။

လတ်တလောတွင် PLA သည် မျက်မှောက်ခေတ် စစ်ပွဲကို တိုက်ခိုက်နိုင်မည်လား၊ မည်ကဲ့သို့ တိုက်ခိုက်သွားမည် နည်း၊ ကိုရီးယားစစ်ပွဲတွင် လူအင်အားလှိုင်းလုံးဖြင့် ဝင်ရောက်တိုက်ခိုက်သည့် တရုတ်သည် ဗီယက်နမ်စစ်ပွဲ၌ ပျောက်ကြားစစ်ဆင်ရေးဖြင့် တိုက်ခိုက်ရန် ဗီယက်နမ်စစ်သားများကို အကြံပေးခဲ့သော်လည်း မျက်မှောက်ခေတ် စစ်ပွဲတွင် မည်ကဲ့သို့ စွမ်းဆောင်နိုင်မည်နည်း အစရှိသည့် မေးခွန်းများ ထွက်ပေါ်လျက်ရှိသည်။

တရုတ်ဗဟိုစစ်ကော်မရှင်၏ ဒုတိယဥက္ကဋ္ဌဖြစ်သည့် တရုတ်စစ်ဗိုလ်ချုပ်ကြီး ဟီဝေတုံ (He Weidong) က စစ်တပ် အတွင်း ဟန်ပြတိုက်ခိုက်ရေး စွမ်းဆောင်ရည်များကို ဝေဖန်ရှုတ်ချခဲ့သည်ဟု သတင်းများလည်း ထွက်ပေါ်လျက်ရှိ သည်။

တရုတ်စစ်ဗိုလ်ချုပ်ကြီး ဟီဝေတုံကို တွေ့ရစဉ်

ထို့ပြင် မကြာသေးမီက တရုတ် ကာကွယ်ရေးဝန်ကြီးဟောင်း ၂ ဦး၏ အဂတိလိုက်စားမှု အရှုပ်တော်ပုံကလည်း PLA ၏ ဂုဏ်သိက္ခာအတွက် အမည်းစက်ဖြစ်ခဲ့သည်။

ကန်နက်သ် အလန် (Kenneth Allen) ကဲ့သို့ ပြည်ပမှ စစ်ရေးကျွမ်းကျင်သူများကမူ PLA တွင် အားနည်းချက်များ ရှိနေသည်ဟု ယူဆထားကြသည်။ 

အလန်ကမူ PLA နှင့်ပတ်သက်ပြီး ၎င်း၏ လေ့လာတွေ့ရှိချက်များကို တင်ပြခဲ့သည်။

PLA သည် တက္ကသိုလ်ကျောင်းသားများနှင့် ဘွဲ့ရများကို ၂ နှစ်ကြာ စစ်မှုထမ်းကာလအဖြစ် ခေါ်ယူခဲ့ပြီး ကျွမ်းကျင် ပညာရှင်များကိုလည်း တိုက်ရိုက်ခေါ်ယူကာ တပ်သားသစ် စုဆောင်းခဲ့သည်ဟု အလန်က ပြောသည်။

စစ်တပ်အတွင်း စစ်မှုထမ်းများ အဝင်/အထွက် နှုန်းထားသည် နှစ်စဉ်ပြုလုပ်သည့် စစ်သင်တန်းပေးသော ကာလကို ထိခိုက်စေခဲ့ပြီး တပ်ရင်းတပ်ဖွဲ့များသည် တစ်ခါတစ်ရံတွင် စစ်မှုထမ်း အများအပြားအား သင်တန်းသို့ ပို့ဆောင်ထားရသဖြင့် တန်းပြည့်စစ်မှုထမ်းမရှိသော အခြေအနေနှင့် ရင်ဆိုင်ခဲ့ရသည်ဟု ဆိုသည်။

တရုတ်စစ်တပ်ကိုတွေ့ရစဉ်

၁၉၉၉ ခုနှစ်တွင် အမျိုးသားကာကွယ်ရေး ကျောင်းသားအစီအစဉ်ကို ပယ်ဖျက်ခဲ့ပြီး အရာရှိ အင်အားကို ပြောင်းလဲ ခဲ့သဖြင့် ၂၀၁၇ ခုနှစ်တွင် ဗိုလ်သင်တန်းကဲ့သို့ ပညာရေးအင်စတီကျူးရှင်းများမှ ကျောင်းဆင်းသည့် အရာရှိ အရေအတွက်သည် ၆၃ ဦးမှ ၃၄ ဦးအထိ ကျဆင်းသွားခဲ့သည်ဟု အလန်က ပြောသည်။

စစ်မှုထမ်း အမျိုးသားများသည် အသက် ၂၅ နှစ်၊ အမျိုးသမီးများသည် အသက် ၂၃ နှစ်မှသာ လက်ထပ်ကြလေ့ ရှိသဖြင့် တရုတ်၏ တပ်သားသစ်စုဆောင်းမှုတွင် ပါဝင်သူ အားလုံးနီးပါးသည် လက်မထပ်ရသေးသည့် စစ်မှုထမ်းများဖြစ်သည်ဟု ၎င်းက ဆိုသည်။

ထိုအချက်များအပြင် လက်နက်ခဲယမ်းနှင့် စစ်တပ်၏ပုံစံကို အဆင့်မြှင့်တင် မွမ်းမံမှုများတွင် ပြဿနာအချို့ ရှိနေ သဖြင့် လာမည့် ဆယ်စုနှစ်၌ PLA သည် ကြီးမားသည့် အပြောင်းအလဲများကို လုပ်ဆောင်ဖွယ်ရှိနေသည်ဟု အလန်က ပြောကြားခဲ့သည်။

Source: Asia Times

CNI International News

မော်စကို၊ ဇူလိုင် ၁၀

အိန္ဒိယဝန်ကြီးချုပ် မိုဒီ (Modi) သည် ဇူလိုင် ၉ ရက်တွင် ရုရှားနိုင်ငံသို့ သွားရောက်ခဲ့ပြီး ရုရှားသမ္မတ ပူတင် (Putin) နှင့် ကာကွယ်ရေး၊ ယဉ်ကျေးမှု၊ စီးပွားရေး၊ ပထဝီနိုင်ငံရေး အခြေအနေတို့နှင့်ပတ်သက်ပြီး ဆွေးနွေး သွားမည်ဟု ရုရှား၏ United Russia ပါတီ ဒုတိယအကြီးအကဲ အက်ဘ်ဟေး ကူမာ ဆင်း (Abhay Kumar Singh) က ပြောကြားခဲ့ကြောင်း economic times မှ ဖော်ပြခဲ့သည်။

ဝန်ကြီးချုပ် မိုဒီ၏ ရုရှားခရီးစဉ်ကို အချိန်အကြာကြီး စောင့်ဆိုင်းခဲ့ရကြောင်း၊ လွန်ခဲ့သည့် ၂ နှစ်ကတည်းက စောင့်ဆိုင်းခဲ့ရသော်လည်း ခရီးစဉ် မဖြစ်မြောက်ခဲ့ကြောင်း၊ မိုဒီကို သမ္မတပူတင် သာမက ရုရှားပြည်သူများကပါ စောင့်ဆိုင်းနေကြောင်း ဆင်းက ပြောသည်။

“ပြည်သူတွေက သူ့ရဲ့ ခရီးစဉ်ကို ရင်ခုန်စိတ်လှုပ်ရှားစွာနဲ့ စောင့်ဆိုင်းခဲ့တာပါ”ဟု ရုရှား၏ ကာ့စ် (Kursk) မြို့ ကိုယ်စားပြု လွှတ်တော်ကိုယ်စားလှယ်လောင်းဖြစ်သည့် အိန္ဒိယဖွား ရုရှားနိုင်ငံသား ဆင်းက ပြောကြားခဲ့သည်။

အက်ဘ်ဟေးကူမာဆင်းကို တွေ့ရစဉ်

ခေါင်းဆောင်နှစ်ဦး၏ ဆွေးနွေးပွဲအတွင်း ကာကွယ်ရေး သဘောတူညီချက်များ အပါအဝင် ကြီးမားသည့် ကမ္ဘာလုံး ဆိုင်ရာ အရေးကိစ္စများ လွှမ်းခြုံပါဝင်မည့် ဆွေးနွေးမှုများနှင့် သဘောတူညီမှုများကို အာရုံစိုက် ဆွေးနွေးသွားလိမ့် မည်ဟု ဆင်းက ပြောကြားခဲ့သည်။

“ရုရှားရဲ့ ပူးပေါင်းဆောင်ရွက်မှုနဲ့ BrahMos (စူပါဆောနစ် ခရုဇ်ဒုံးကျည် အမျိုးအစား) စီမံကိန်းဟာ ကောင်းမွန်တဲ့ ရလဒ်တွေ ထွက်ပေါ်ခဲ့နေပါတယ်။ အလားတူပဲ အိန္ဒိယမှာ ရုရှားလက်နက်တွေကို ထုတ်လုပ်ပြီးတဲ့နောက် ကာကွယ်ရေးသဘောတူ စာချုပ်အချို့ ချုပ်ဆိုပါလိမ့်မယ်” ဟု ဆင်းက ပြောကြားခဲ့သည်။

မိုဒီနှင့်ပူတင်တို့သည် ယဉ်ကျေးမှုဆိုင်ရာ ကိစ္စရပ်များကိုလည်း ဆွေးနွေးသွားမည်ဖြစ်ကြောင်း၊ ဟိန္ဒူရုပ်ရှင်ကား များသည် အတိတ်ကာလက ဆိုဗီယက်ယူနီယံနှင့် လက်ရှိ ရုရှားနိုင်ငံတွင် အလွန်လူကြိုက်များခဲ့ကြောင်း၊ ပြီးခဲ့သည့် ၂ နှစ်အတွင်း ရုရှားတွင် အိန္ဒိယရုပ်ရှင်ကားများ ပျံ့နှံ့ဝင်ရောက်ခဲ့ကြောင်း ဆင်းက ပြောကြားခဲ့သည်။

စီးပွားရေးကဏ္ဍတွင်လည်း ရူပီး-ရူဘယ် ကုန်သွယ်ရေးနှင့်ပတ်သက်ပြီး ဆွေးနွေးမှုများ ပြုလုပ်သွားမည်ဖြစ် ကြောင်း ၎င်းက ပြောသည်။

မိုဒီနဲ့ ပူတင်ကို တွေ့ရစဉ်

သီရိလင်္ကာ၊ ဘင်္ဂလားဒေ့ရှ်နှင့် နီပေါကဲ့သို့ အိန္ဒိယ၏ အိမ်နီးချင်းနိုင်ငံများသည် အိန္ဒိယရူပီးကို လက်တွေ့ကျကျနှင့် ထိရောက်စွာ အသုံးပြုလိမ့်မည်ဖြစ်သည်။

ထို့နောက် ဘယ်လာရုစ်နှင့် ကာဇက်စတန်ကဲ့သို့ ရုရှား၏ အနိမ်နီးချင်း နိုင်ငံများသည်လည်း ရုရှား၏ ရူဘယ် ငွေကြေးကို လက်တွေ့ကျကျ ထိရောက်စွာ အသုံးပြုလိမ့်မည်ဟု ဆင်းက ပြောသည်။

ထို့ပြင် မိုဒီနှင့် ပူတင်တို့၏ ဆွေးနွေးမှုကို တစ်ကမ္ဘာလုံးက စောင့်ကြည့်နေပြီး ဆွေးနွေးပွဲ ရလဒ်များသည် တစ်ကမ္ဘာလုံးက အခြေအနေကို ပြောင်းလဲနိုင်လိမ့်မည်ဟု ထင်ရကြောင်း ဆင်းက ပြောကြားခဲ့သည်။

Source: Economic Times 

CNI International News

ပဲရစ်၊ ဇူလိုင် ၉

ပြင်သစ်နိုင်ငံတွင် လက်ဝဲယိမ်းပါတီတစ်ခုက မာရင်း လီ ပန် (Marine Le Pen) ၏ တောင်းဆိုချက်ဖြစ်သော လက်ယာယိမ်းအစိုးရဖွဲ့ရန် ကြိုးပမ်းမှုကို ပိတ်ပင်ခဲ့ပြီးနောက် ဇူလိုင် ၈ ရက်မှစပြီး လွှတ်တော်၌ အစိုးရဖွဲ့ရန် ဆွေးနွေးညှိနှိုင်းမှုများသည် ရလဒ်ထွက်ပေါ်ခဲ့ခြင်းမရှိဘဲ မတိုးသာမဆုတ်သာ အခြေအနေနှင့် ရင်ဆိုင်နေရသည်ဟု ရိုက်တာမှ ဖော်ပြခဲ့သည်။

လက်ဝဲယိမ်း New Popular Front (NFP) သည် ဇူလိုင် ၇ ရက် ရွေးကောက်ပွဲအပြီးတွင် လွှတ်တော်၌ သြဇာ လွှမ်းမိုးနိုင်သည့် အင်အားစုတစ်ခု ဖြစ်လာခဲ့သော်လည်း NFP ပါတီ အပါအဝင် မည်သည့်ပါတီကမျှ နေရာအများစု ကို မရခဲ့သဖြင့် သီးသန့်အစိုးရဖွဲ့နိုင်ခဲ့ခြင်း မရှိပေ။

ထိုရွေးကောက်ပွဲ ရလဒ်သည် ပဲရစ် (Paris) မြို့တော်၌ အိုလံပစ်ပြိုင်ပွဲကို အိမ်ရှင်အဖြစ် လက်ခံမကျင်းပမီ သီတင်းပတ် အနည်းငယ်အလိုတွင် ပြင်သစ်နိုင်ငံ၏ နိုင်ငံရေး မတည်ငြိမ်မှုကို ဖော်ပြရာရောက်ရှိခဲ့သလို လက်ရှိသမ္မတ အီမန်နျူယယ် မက်ခရွန် (Emmanuel Macron) အတွက် ထိုးနှက်ချက်ဖြစ်ခဲ့သည်။

ပြင်သစ် ပြည်သူများကို တွေ့ရစဉ်

ထို့ပြင် ဥရောပဇုန်၏ ဒုတိယစီးပွားရေး အင်အားအကြီးဆုံးဖြစ်သည့် ပြင်သစ်၏ သေချာရေရာမှု မရှိသည့် အနေအထားသည် ဥရောပသမဂ္ဂအတွင်း ၎င်း၏ အခန်းကဏ္ဍကို အားနည်းစေခဲ့သည်။

ဇူလိုင် ၇ ရက်က ရွေးကောက်ပွဲတွင် လက်ယာယိမ်းအုပ်စုက ၁၈၂ နေရာ အနိုင်ရခဲ့ပြီး မက်ခရွန်၏ ဗဟိုမဟာမိတ် အင်အားစုက ၁၆၈ နေရာ အနိုင်ရခဲ့ကာ လီပန်၏ RN ပါတီနှင့် မဟာမိတ်များက ၁၄၃ နေရာ ရရှိခဲ့ကြောင်း ပြင်သစ်ပြည်ထဲရေးဝန်ကြီးဌာနက ထုတ်ပြန်ခဲ့သည်။

မိမိတို့၏ ဖွဲ့စည်းပုံအခြေခံဥပဒေအရ သမ္မတမက်ခရွန် အနေဖြင့် ဝန်ကြီးချုပ်သစ် တစ်ဦးကို အမည်စာရင်း တင်သွင်းရန် NPF ပါတီကို တရားဝင် ဖိတ်ခေါ်သင့်သည်ဟု NFP ပါတီ အကြီးအကဲတစ်ဦးဖြစ်သည့် မာရင်း တွန်ဒယ်လီယာ (Marine Tondelier) က ပြောကြားခဲ့သည်။

 ပြင်သစ် ပြည်သူများကို တွေ့ရစဉ်

လက်ရှိဝန်ကြီးချုပ် ဂေဘရီယယ် အက်တယ်လ် (Gabriel Attal) ကမူ သူသည် ဇူလိုင် ၇ ရက်တွင် ရာထူးမှ နုတ်ထွက်မည်ဖြစ်ကြောင်း ပြောကြားခဲ့သော်လည်း သမ္မတမက်ခရွန်က ၎င်း၏နုတ်ထွက်မှုကို ချက်ချင်း လက်ခံရန် ရှိ/မရှိ တိကျစွာ မသိရသေးပေ။

အစိုးရဖွဲ့ရန် အခက်အခဲများနှင့် ရင်ဆိုင်နေရချိန်တွင် အက်တယ်လ်က သူသည် ယာယီဝန်ကြီးချုပ်အဖြစ် တာဝန်ထမ်းဆောင်ပေးရန် ဆန္ဒရှိကြောင်း ပြောကြားခဲ့သည်။

NFP ပါတီ ခေါင်းဆောင်များသည် ဇူလိုင် ၇ ရက် ညပိုင်းက အစိုးရဖွဲ့ရေးအတွက် လုပ်ထုံးလုပ်နည်းများနှင့် ပတ်သက်ပြီး ပထမအကြိမ် တွေ့ဆုံဆွေးနွေး ခဲ့ကြသော်လည်း မီဒီယာများကို အသေးစိတ် ထုတ်ပြန်ခဲ့ခြင်း မရှိပေ။

Source: ရိုက်တာ

CNI International News

ဟောင်ကောင်၊ ဇူလိုင် ၉

ကာကွယ်ရေးဝန်ကြီးဟောင်းများဖြစ်သည့် လီရှန်ဖူ (Li Shangfu) နှင့် ဝေ့ဖန်ဂီ (Wei Fenghe) တို့အပေါ် စွဲဆို သည့် အဂတိလိုက်စားမှု စွပ်စွဲချက်များသည် တရုတ်၏နိုင်ငံရေးနှင့် စစ်ရေးကဏ္ဍတည်ဆောက်မှုကို ထိခိုက်စေခဲ့ သည်ဟု ဟောင်ကောင်ပို့စ်မှ ဖော်ပြခဲ့သည်။

မကြာသေးမီက တရုတ်ကွန်မြူနစ်ပါတီသည် ကာကွယ်ရေးဝန်ကြီးဟောင်းနှစ်ဦးကို အဂတိလိုက်စားမှု စွဲချက်များ ဖြင့် ပါတီမှ ထုတ်ပယ်ခဲ့သည့် ဖြစ်စဉ်သည် တရုတ်၏ စစ်ရေးအတွင်းစည်းတွင် ခြံစားမှုများလှိုက်စားနေသော အခြေအနေကို မီးမောင်းထိုး ပြသရာရောက်ခဲ့သည်။

ထိုဖြစ်စဉ်သည် တရုတ်စစ်တပ်၏ တိုက်ပွဲဝင်ရန် အဆင်သင့်ဖြစ်နေမှု အခြေအနေနှင့် သမ္မတရှီကျင့်ဖျင် (Xi Jinping) ၏ ဆယ်စုနှစ်ကြာ ကြာမြင့်လာခဲ့သည့် အဂတိလိုက်စားမှု တိုက်ဖျက်ရေး အားထုတ်ကြိုးပမ်းမှုများကို ယုတ်လျော့စေခဲ့သည်ဟု ကျွမ်းကျင်သူများက ပြောသည်။

တစ်ချိန်က ကမ္ဘာ့စင်မြင့်ထက်တွင် သြဇာကြီးမားခဲ့သည့် လီနှင့်ဝေ့တို့သည် လက်ရှိမှာတော့ တရုတ်နိုင်ငံရေး စက်ဝိုင်းအတွင်း အဂတိလိုက်စားမှုဆိုသော စကားလုံးကို သွယ်ဝိုက်ဖော်ပြသည့် "ကြီးလေးသည့် စည်းကမ်းချိုး ဖောက်မှု" တို့ဖြင့် စစ်တပ်ရှေ့နေများ၏ စွဲချက်များနှင့် ရင်ဆိုင်နေရသည်။

အဂတိလိုက်စားမှုက တရုတ်၏ စစ်ရေးရည်မှန်းချက်များကို ယုတ်လျော့စေ

၎င်းတို့ ၂ ဦး၏ ကျဆုံးခန်းသည် ပုဂ္ဂိုလ်ရေးအရ ဝမ်းနည်းစရာ တစ်ခုသာမကဘဲ တရုတ်ပြည်သူ့လွတ်မြောက်ရေး တပ်မတော် (PLA) ကို ထိခိုက်စေခဲ့သည့် ဖြစ်စဉ်လည်းဖြစ်သည်။

ထိုကဲ့သို့ အဆင့်မြင့်အရာရှိများကို စွဲဆိုသည့် စွဲချက်များသည် အထူးသဖြင့် တရုတ်၏ ရည်မှန်းချက်ကြီးမားသော စစ်ဘက်ဆိုင်ရာ အဆင့်မြှင့်တင်မွမ်းမံရေး အားထိုးကြိုးပမ်းမှုတွင် အဓိကနေရာက ပါဝင်နေသည့် ရာထူးနေရာ များ၏ ဂုဏ်သိက္ခာကို ကျဆင်းစေခဲ့သည်။

ယခင်က PLA ၏ လက်နက်ထုတ်လုပ်ရေးဌာနကို ဦးဆောင်ခဲ့ရသည့် လီသည် ကာကွယ်ရေးဝန်ကြီးအဖြစ် ၇ လ သာ တာဝန်ထမ်းဆောင်ခဲ့ရပြီးနောက် ပြည်သူ့မြင်ကွင်းမှ ပျောက်ကွယ်သွားခဲ့ကာ ထုတ်ပယ်ခံခဲ့ရခြင်းဖြစ်သည်။

တရုတ်၏ ဒုံးကျည်တပ်ဖွဲ့ (Rocket Force) ကို ပထမဆုံး ဦးဆောင်ခဲ့ရသည့် လီ မတိုင်မီ ကာကွယ်ရေးဝန်ကြီး ဟောင်း ဝေ့သည်လည်း စည်းကမ်းချိုးဖောက်မှုများဖြင့် စွပ်စွဲခံခဲ့ရသည်။

ထို့ကြောင့် သမ္မတရှီ လက်ထက်တွင် အဂတိလိုက်စားမှုများကို တိုက်ဖျက်နေသည့်တိုင် ထိုကဲ့သို့ ထိပ်သီး ကာကွယ်ရေးအရာရှိများ၏ အဂတိလိုက်စားမှု စွဲချက်များသည် တရုတ်၏ ရည်မှန်းချက်ကြီးမားသည့် စစ်ရေး တည်ဆောက်မှုများအား လျော့ပါးစေခဲ့သည်ဟု ကျွမ်းကျင်သူများက ပြောကြားခဲ့သည်။

Source: ဟောင်ကောင်ပို့စ်

CNI International News

ဘာရီနက်စ်၊ ဇူလိုင် ၈

ဗင်နီဇွဲလားနိုင်ငံတွင် အတိုက်အခံပါတီဖြစ်သည့် Democratic Unity Roundtable ပါတီဝင်များသည် ဇူလိုင် ၆ ရက်က ဘာရီနက်စ် (Barinas) မြို့၌ စုရုံးခဲ့ကြပြီး အတိုက်အခံ သမ္မတရွေးကောက်ပွဲဝင် ကိုယ်စားလှယ်လောင်း အက်ဒ်မန်ဒို ဂွန်ဇာလက် အာရူရှား (Edmundo Gonzalez Urrutia) ကို ထောက်ခံကြောင်း ပြသခဲ့ကြသည်ဟု အေပီမှ ဖော်ပြခဲ့သည်။

ဗင်နီဇွဲလားတွင် ဇူလိုင် ၂၈ ရက်၌ သမ္မတရွေးကောက်ပွဲ ပြုလုပ်မည်ဖြစ်ပြီး တရားဝင် မဲဆွယ်စည်းရုံးမှုများကို ယခုသီတင်းပတ်အတွင်း စတင်ခဲ့ကာ အတိုက်အခံများက ကွယ်လွန်သွားသည့် သမ္မတဟောင်း ဟူဂိုချာဗက်ဇ် (Hugo Chavez) ၏ မွေးရပ်ဇာတိဖြစ်သည့် ဘာရီနက်စ်ပြည်နယ် ဘာရီနက်စ်မြို့တွင် စုရုံးခဲ့ကြသည်။

ထိုစုရုံးပွဲကို ကျောင်းသားများ၊ ပြည်နယ်အစိုးရဝန်ထမ်းများ၊ အငြိမ်းစားယူပြီးသူများ၊ စိုက်ပျိုးရေး လုပ်သားများနှင့် စီးပွားရေး လုပ်ငန်းရှင်များ ပါဝင်ခဲ့ပြီး နိုင်ငံကို ၂၅ နှစ်ကြာ အုပ်ချုပ်ခဲ့သည့် ဆိုရှယ်လစ် အစိုးရများ၏ လက်အောက်မှ လွတ်လပ်ခွင့်ပေးရန် တောင်းဆိုဟစ်ကြွေးခဲ့ကြသည်။

အထူးသဖြင့် ဗင်နီဇွဲလားတွင် စိုးရိမ်ပူပန်မှု ကင်းစွာဖြင့် လူမှုမီဒီယာများ၌ အစိုးရကို ဝေဖန်ပိုင်ခွင့် အပါအဝင် အခြား လွတ်လပ်ခွင့်များကိုလည်း ရရှိရန် အတိုက်အခံများက ကြိုးပမ်းလျက်ရှိသည်။

 ဗင်နီဇွဲလား အတိုက်အခံက လူထုစုရုံးမှုလုပ်နေစဉ်

“ကျမ စီးပွားရေးလွတ်လပ်ခွင့်၊ လွတ်လပ်စွာ ဝယ်ယူခွင့် လိုချင်ပါတယ်။ ကျမတို့ ပိတ်လှောင်ခံထားသလို ခံစား နေရပါတယ်။ ကျမတို့ ဆန္ဒတွေ၊ အိပ်မက်တွေကို အကောင်အထည် မဖော်နိုင်ခဲ့ပါဘူး” ဟု အသက် ၄၁ နှစ်အရွယ် အမျိုးသမီးတစ်ဦးဖြစ်သည့် ဗာဂျီးနီးယား လင်းဂရက် (Virginia Linares) က ပြောကြားခဲ့သည်။
ဗင်နီဇွဲလားတွင် ယခုရက်ပိုင်းအတွင်း အစိုးရ ဝန်ထမ်းများ၏ အနိမ့်ဆုံး လုပ်ခလစာသည် ၃ ဒသမ ၆၀ ဒေါ်လာနှင့် အပိုဆုကြေးငွေ ဒေါ်လာ ၁၃၀ သာရရှိနေပြီး ပုဂ္ဂလိကကဏ္ဍများ၌ လုပ်ကိုင်သူများသည် တစ်လလျှင် ဒေါ်လာ ၂၁၀ အထိ ပျမ်းမျှရရှိနေသည်။ 

သို့သော် ထိုလစာငွေများသည် မိသားစု တစ်စုအတွက် လုံလောက်သည့် အစားအစာများကို ဝယ်ယူနိုင်ခြင်းမရှိဘဲ ဗင်နီဇွဲလားမိသားစုတစ်စု၏ ပျမ်းမျှ တစ်လကုန်ကျစရိတ်သည် ဒေါ်လာ ၃၈၀ ဖြစ်သည်။

ဇူလိုင် ၂၈ ရက် ရွေးကောက်ပွဲသည် လက်ရှိ ဗင်နီဇွဲလား သမ္မတဟောင်း ချာဗက်ဇ် သမ္မတဖြစ်လာခဲ့သည့် ၁၉၉၉ ခုနှစ်မှစပြီး ယနေ့အချိန်အထိ အာဏာရ United Socialist Party of Venezuela (PSUV) ပါတီအတွက် အကြီးမား ဆုံး စိန်ခေါ်မှုဖြစ်လာမည် ဖြစ်သည်။

Source: အေပီ

CNI International News

ဘန်ကောက်၊ ဇူလိုင် ၈

ပြီးခဲ့သည့်လက အသက် ၅၇ နှစ်ပြည့်သွားခဲ့သည့် ထိုင်းဝန်ကြီးချုပ်ဟောင်း ယင်းလပ်ရှင်နာဝပ် (Yingluck Shinawatra) သည် လာမည့် ၁၂ လအတွင်း ထိုင်းသို့ ပြန်လာဖွယ်ရှိကြောင်း Thai PBS World မှ ဖော်ပြခဲ့သည်။

“ကျမမှာသာ အခွင့်အလမ်း ရှိခဲ့မယ်ဆိုရင် နောက်နှစ် မွေးနေ့ပွဲကို သင်တို့နဲ့အတူ ကျင်းပချင်ပါတယ်။ အဲဒီလို ကျင်းပနိုင်ပါ့မလား” ဟု ယင်းလပ်က ဇွန်လ ၂၁ ရက်တွင် ဘန်ကောက် (Bangkok) မြို့သို့ ဗွီဒီယိုကော ခေါ်ဆိုမှု တွင် ၎င်း၏ ထောက်ခံသူများကို မေးမြန်းခဲ့သည်။

ပြီးခဲ့သည့်လက ဘန်ကောက်မြို့တော်ရှိ သက်ဆင်မိသားစု၏ စံအိမ်အနီးရှိ ရပ်ကွက်တစ်ခုတွင် မွေးနေ့ရှင် ယင်းလပ် မပါဘဲ မွေးနေ့ပွဲကို ကျင်းပခဲ့သည်။ 

ယင်းလပ်သည် လက်ရှိတွင် လန်ဒန်မြို့(ဗြိတိန်နိုင်ငံ)၌ နေထိုင်လျက်ရှိကြောင်း ၎င်း၏ လူမှုမီဒီယာပို့စ်များအရ သိရသည်။

 သက်ဆင်နဲ့ ယင်းလပ်ကို တွေ့ရစဉ်

ယင်းလပ်၏ တူမဖြစ်ပြီး အာဏာရဖြူးထိုင်းပါတီ ခေါင်းဆောင် ပေတုန်တန် ရှင်နာဝပ် (Paetongtarn Shinawatra)က ယင်းလပ်ဆီသို့ လာရောက်လည်ပတ်မည်ဟု ကတိပြုထားသည့် Instagram မွေးနေ့ မက်ဆေ့ချ်ကို တင်ခဲ့သည်။

“ဒါပေမယ့် ကျမတို့ ထိုင်းကိုပြန်ရင် အန်တီလည်း အတူတူပြန်လိုက်ခဲ့ပြီး ကျမတို့နဲ့ အတူနေရင် အကောင်းဆုံး ဖြစ်ပါလိမ့်မယ်”ဟု ယင်းလပ်၏ အစ်ကို သက်ဆင် (Thaksin) ၏ သမီးအငယ်ဆုံးဖြစ်သည့် ပေတုန်တန်က Instagram တွင် ရေးသားခဲ့သည်။

ဧပြီလအတွင်းက ထိုင်းနှစ်သစ်ကူး ဆုတောင်းတွင် သက်ဆင်က လာမည့်နှစ် ဆောင်ခရမ်ရေကစားပွဲတော်တွင် ယင်းလပ်နှင့်အတူ ၎င်းတို့၏ မွေးရပ်ဇာတိဖြစ်သည့် ချင်းမိုင်တွင် ကောင်းမှုကုသိုလ်များ ပြုလုပ်လိုကြောင်း ပြောကြားခဲ့သည်။

အာဏာရဖြူးထိုင်းပါတီ ခေါင်းဆောင် ပေတုန်တန် ရှင်နာဝပ်နဲ့ ယင်းလပ်ကို တွေ့ရစဉ်

“ယင်းလပ်က ဒီနှစ်ထဲမှာ ပြန်လာချင်နေတာပါ။ ဒါပေမယ့် သူ ဘယ်အချိန် ပြန်လာမလဲဆိုတာ ကျနော် မသိပါဘူး” ဟု သက်ဆင်က ပြောကြားခဲ့သည်။

ဧပြီ ၁၄ ရက်က မိသားစုနေ့တွင်လည်း သက်ဆင်က သူ ထိုင်းသို့ ပြန်လာပြီး မိသားစုနှင့်အတူ နေထိုင်ရခြင်းသည် ပြည်ပြေးဘဝဖြင့် ပြည်ပတွင် နေထိုင်ရခြင်းထက် ပိုပြီး ပျော်ရွှင်စရာကောင်းကြောင်း ပြောကြားခဲ့သည်။

အာဏာသိမ်းခံခဲ့ရသည့် သက်ဆင်သည် ပြည်ပြေးဘဝဖြင့် ပြည့်ပတွင် ၁၅ နှစ်ကြာ နေထိုင်ခဲ့ပြီးနောက် ပြီးခဲ့သည့် နှစ် ဩဂုတ်လ၌ ထိုင်းနိုင်ငံသို့ ပြန်လည်ရောက်ရှိခဲ့သည်။

ထို့နောက် ထောင်ဒဏ် ၈ နှစ် ချမှတ်ခံခဲ့ရသော်လည်း ဘုရင်၏ ပြစ်ဒဏ်လျှော့ပေါ့မှု၊ ခံဝန်ကတိတို့ဖြင့် ယခုနှစ် အစောပိုင်းတွင် ပြန်လွတ်မြောက်လာခဲ့သည်။

Source: Thai PBS World

CNI International News

မက်ဒီဆင်၊ ဇူလိုင် ၈

အမေရိကန်သမ္မတ ဂျိုးဘိုင်ဒန် (Joe Biden) သည် ဒေါ်နယ်ထရမ့် (Donald Trump) နှင့် ပြုလုပ်ခဲ့သည့် စကား စစ်ထိုးပွဲတွင် စွမ်းဆောင်ရည် ညံ့ဖျင်းမှုကြောင့် ၎င်းအား သမ္မတရွေးကောက်ပွဲမှ နုတ်ထွက်စေရန် ဒီမိုကရက်အချို့ ၏ ဖိအားပေးခြင်းကို ခံနေရချိန်၌ သူ့အနေဖြင့် ရွေးကောက်ပွဲကို ဆက်လက်ယှဉ်ပြိုင်မည်ဟု ပြောကြားခဲ့ကြောင်း ရိုက်တာမှ ဖော်ပြခဲ့သည်။

ဇူလိုင် ၆ ရက်က ဝစ္စကွန်ဆင် (Wisconsin) ပြည်နယ်တွင် အေဘီစီသတင်းဌာနနှင့် ပြုလုပ်ခဲ့သည့် အင်တာဗျူး အတွင်း ဘိုင်ဒန်က သူသည် နိုဝင်ဘာ ၅ ရက်၌ ကျင်းပမည့် သမ္မတရွေးကောက်ပွဲမှာ ဒေါ်နယ်ထရမ့်နှင့် ယှုဉ်ပြိုင် နိုင်မည့် အကောင်းဆုံး ကိုယ်စားလှယ်လောင်းဖြစ်သည်ဟု ပြောကြားခဲ့သည်။

ဇွန်လ ၂၇ ရက်က ဒေါ်နယ်ထရမ့်နှင့် ပြုလုပ်ခဲ့သည့် စကားစစ်ထိုးပွဲတွင် ဘိုင်ဒန်၏ ညံ့ဖျင်းသည့် စွမ်းဆောင်ရည် နှင့် ၈၁ နှစ်အရွယ်ရှိပြီဖြစ်သည့် ၎င်း၏ အသက်အရွယ်တို့ကြောင့် စိတ်ပိုင်းဆိုင်ရာနှင့် ရုပ်ပိုင်းဆိုင်ရာ ကြံ့ခိုင်မှု ရှိ/မရှိအပေါ် ဒီမိုကရက်အချို့က စိုးရိမ်လျက်ရှိသည်။

ဘိုင်ဒန်နဲ့ ဒေါ်နယ့်ထရမ့်ကို တွေ့ရစဉ်

ဘိုင်ဒန်သည် ရွေးကောက်ပွဲတွင် ရှုံးနိမ့်ရန် သေချာသလောက်နီးပါး ဖြစ်နေပြီး သူနှင့်အတူ အခြား ဒီမိုကရက်များပါ အရှုံးနှင့် ရင်ဆိုင်ရနိုင်ကြောင်း ဝေဖန်ရေးသမားများက သတိပေးနေမှုနှင့်အတူ ဒီမိုကရက်တစ်ပါတီအတွင်း စိုးရိမ်မှုများ မြင့်တက်နေသည်။

ထိုအကြောင်းအရာနှင့်ပတ်သက်ပြီး အောက်လွှတ်တော် ဒီမိုကရက်များနှင့် အထက်လွှတ်တော် အမတ်များသည် လာမည့် သီတင်းပတ်၌ ဝါရှင်တန်တွင် အစည်းအဝေး ပြုလုပ်ကြမည်ဖြစ်သည်။

ပြည်သူ့သဘောထား စစ်တမ်းအချို့တွင် ဒေါ်နယ်ထရမ့်သည် ဘိုင်ဒန်ထက် လူကြိုက်များနေပြီး ရိုက်တာ သတင်းဌာနက ပြုလုပ်ခဲ့သည့် စစ်တမ်းတစ်ခုတွင်လည်း ဒီမိုကရက် ၃ ဦးလျှင် ၁ ဦးသည် ဘိုင်ဒန်ကို ရွေးကောက်ပွဲမှ နုတ်ထွက်စေလိုသည့် ဆန္ဒရှိကြောင်း လေ့လာတွေ့ရှိခဲ့သည်။

ဘိုင်ဒန်ကမူ ထိုအခြေအနေများနှင့် ပတ်သက်ပြီး ငြင်းဆိုခဲ့သည်။

ဘိုင်ဒန်ကိုတွေ့ရစဉ်

“ကျနော်တို့ ပြီးခဲ့တဲ့ အပတ်က စကားစစ်ထိုးပွဲမှာ စကားအနည်းငယ်ပဲ ပြောနိုင်ခဲ့ပါတယ်။ ဒါပေမယ့် အဲဒါဟာ ကျနော့်ရဲ့ အကောင်းဆုံး စွမ်းဆောင်ရည်လို့ မပြောနိုင်ပါဘူး။ ကျနော်အပေါ် အများကြီး မျှော်လင့်ထားကြပါ တယ်။ ဘိုင်ဒန် ဘာလုပ်မှာလဲ၊ ရွေးကောက်ပွဲကို ဆက်ပြိုင်မလား၊ ဒါမှမဟုတ် ထွက်မှာလားဆိုပြီး မေးခွန်းတွေ လည်း ရှိနေပါတယ်။ အဲဒီမေးခွန်းတွေအတွက် အဖြေကတော့ ကျနော် ဆက်ပြိုင်မှာ။ နောက်တစ်ကြိမ် အနိုင်ရ မှာပါလို့ ဖြေချင်ပါတယ်” ဟု ဘိုင်ဒန်က ပြောကြားခဲ့သည်။

ဘိုင်ဒန်သည် အေဘီစီ သတင်းဌာနနှင့် ပြုလုပ်သည့် အင်တာဗျူးတွင် လူထု သဘောထားဆန္ဒ စစ်တမ်းများ၌ သူသည် ဒေါ်နယ်ထရမ့် နောက်တွင် ပြတ်ကျန်နေခဲ့သည်ဆိုသော ရလဒ်များကို ငြင်းဆိုခဲ့ပြီး သူအသာစီးရသည့် စစ်တမ်းများလည်းရှိကြောင်း ပြောကြားခဲ့သည်။

ထို့ပြင် သူသည် ဒေါ်နယ်ထရမ့်နှင့် ယှဉ်ပြိုင်နိုင်မည့် အကောင်းဆုံး ကိုယ်စားလှယ်လောင်းဖြစ်ပြီး ဒေါ်နယ်ထရမ့်ကို ရွေးကောက်ပွဲတွင် အနိုင်ယူနိုင်သည့် တစ်ဦးတည်းသောသူဖြစ်ကြောင်း ပြောကြားခဲ့သည်။

Source: ရိုက်တာ