CNI International News

ဆိုးလ်၊ ဇူလိုင် ၁၉

တောင်ကိုရီးယားသမ္မတ ယွန်းဆော့ရွဲ(Yoon Suk Yeol)သည် ဇူလိုင် ၁၈ ရက်က မြောက်ကိုရီးယား သံတမန် ဟောင်းတစ်ဦးကို ဒုဝန်ကြီးရာထူးနေရာ ခန့်အပ်ခဲ့သည်။

ထိုဖြစ်စဉ်သည် မြောက်ကိုရီးယားမှ ထွက်ပြေးပြီး တောင်ကိုရီးယားတွင် နေထိုင်ခဲ့သည့် ထောင်နှင့်ချီသည့် မြောက်ကိုရီးယား နိုင်ငံသားများအနက် ရာထူးအမြင့်ဆုံး ရာထူးခန့်အပ်မှုဖြစ်သည်ဟု အေပီမှ ဖော်ပြခဲ့သည်။

တေးယုံဟို (Tae Yongho) သည် လန်ဒန်မြို့ရှိ မြောက်ကိုရီးယားသံရုံး ဝန်ကြီးတစ်ဦးဖြစ်ပြီး ၂၀၁၆ ခုနှစ်တွင် တောင်ကိုရီးယားဘက်သို့ ဘက်ပြောင်းခိုလှုံခဲ့သူဖြစ်သည်။

သူသည် မကြာသေးမီ နှစ်များအတွင်း တောင်ကိုရီးယားတွင် အခြေချနေထိုင်သည့် ရာထူးအမြင့်ဆုံး မြောက်ကိုရီးယား ပြည်ပြေးတစ်ဦးဖြစ်သည်။

ယွန်းဆော့ရွဲကိုတွေ့ရစဉ်

တေးက သူသည် မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) ၏ အရာရှိများကို ကွက်မျက်မှု များ၊ နျူကလီးယား ရည်မှန်းချက်အပေါ် စိတ်ပျက်ခဲ့ကြောင်း၊ ၎င်း၏ ကလေးများကို မြောက်ကိုရီးယားတွင် ဆင်းဆင်းရဲရဲဖြင့် မနေစေချင်သည့်အတွက် တောင်ကိုရီးယားသို့ ဘက်ပြောင်း ခိုလှုံခဲ့ခြင်းဖြစ်ကြောင်း ပြောကြား ခဲ့သည်။

မြောက်ကိုရီးယားကမူ တေးကို “လူဖျင်း၊လူညံ့” တစ်ဦးဖြစ်ကြောင်း ပြောကြားခဲ့ပြီး အစိုးရ၏ ဘဏ္ဍာငွေများကို အလွဲသုံးစားလုပ်ကာ ရာဇဝတ်မှုများ ကျူးလွန်နေသည်ဟု စွပ်စွဲခဲ့သည်။

တောင်ကိုရီးယားသမ္မတ ယွန်းသည် တေးကို ငြိမ်းချမ်းစွာ ပြန်လည်ပေါင်းစည်းရေး အကြံပေးကောင်စီတွင် အတွင်းရေးမှူးချုပ်အဖြစ် ခန့်အပ်ခဲ့ပြီး ထိုကောင်စီသည် ကိုရီးယားနှစ်နိုင်ငံ ငြိမ်းချမ်းစွာ ပြန်လည်ပေါင်းစည်းရေး အတွက် သမ္မတကို မူဝါဒရေးရာ အကြံပေးရသည့် ကောင်စီဖြစ်သည်။

တေးကို ရာထူးခန့်အပ်မှုသည် မြောက်ကိုရီးယား ပြည်ပြေးတစ်ဦးကို တောင်ကိုရီးယားတွင် ဒုဝန်ကြီးအဆင့် ရာထူးနေရာ ခန့်အပ်မှုဖြစ်သည်။

လက်ရှိတွင် တောင်ကိုရီးယား၌ မြောက်ကိုရီးယား ပြည်ပြေး ၃၄,၀၀၀ ခန့် နေထိုင်လျက်ရှိကြောင်း ပြန်လည် ပေါင်းစည်းရေးဝန်ကြီးဌာနက ထုတ်ပြန်ခဲ့သည်။

မြောက်ကိုရီးယားခေါင်းဆောင် ကင်မ်ဂျုံအန်ကို တွေ့ရစဉ်

တေးသည် ၂၀၂၀ ပြည့်နှစ်က တောင်ကိုရီးယားလွှတ်တော်တွင် ရွေးကောက်ခံခဲ့ရသည်။

ထို့နောက် တောင်ကိုရီးယား၌ လွှတ်တော်အမတ်များအဖြစ် တာဝန်ထမ်းဆောင်နေသည့် အခြားမြောက်ကိုရီးယား ပြည်ပြေးများလည်း ရှိခဲ့သည်။

တေးသည် မြောက်ကိုရီးယားတွင် နေထိုင်ခဲ့သည့် အတွေ့အကြုံများနှင့် တောင်ကိုရီးယားလွှတ်တော်တွင် တာဝန် ထမ်းဆောင်ခဲ့ဖူးသည့် အတွေ့အကြုံများကြောင့် ၎င်းကို ပြန်လည်ပေါင်းစည်းရေး အကြံပေးကောင်စီ၌  ခန့်အပ်မှု သည် မှန်ကန်ကြောင်း တောင်ကိုရီးယားသမ္မတရုံးက ထုတ်ပြန်ခဲ့သည်။

တောင်ကိုရီးယားတွင် နေထိုင်လျက်ရှိသည့် မြောက်ကိုရီးယား ပြည်ပြေးအများစုသည် ၁၉၉၀ ပြည့်နှစ် အလယ်ပိုင်းက အငတ်ဘေးကြောင့် ထွက်ပြေးတိမ်းရှောင် လာကြသူများဖြစ်သည်။

Source: အေပီ

CNI International News

ဘန်ကောက်၊ ဇူလိုင် ၁၈

ထိုင်းနိုင်ငံ၏ ဖွဲ့စည်းပုံအခြေခံဥပဒေဆိုင်ရာ ခုံရုံးက အတိုက်အခံ Move Forward(MFP) ပါတီ၏ စုံစမ်းစစ်ဆေးရန် တောင်းဆိုချက်ကို ငြင်းဆိုခဲ့ပြီး MFP ဖျက်သိမ်းရေးကိစ္စကို သြဂုတ် ၇ ရက်တွင် စီရင်ချက်ချသွားမည်ဟု Thai PBS World မှ ဖော်ပြခဲ့သည်။

တော်ဝင်အသရေဖျက်မှုဆိုင်ရာ ဥပဒေများကို ပြင်ဆင်မည်ဆိုသည့် MFP ပါတီ၏ လှုပ်ရှားမှုကြောင့် ထိုင်းရွေးကောက်ပွဲကော်မရှင်က MFP ပါတီကို ဖျက်သိမ်းရန်နှင့် နိုင်ငံရေးလောကမှ ၁၀ နှစ်ကြာ ပိတ်ပင်ရန် ဖွဲ့စည်းပုံအခြေခံဥပဒေဆိုင်ရာခုံရုံးကို တိုင်ကြားခဲ့ခြင်းဖြစ်သည်။

လက်ရှိတွင် ထိုအမှုကို စီရင်ချက်ချရန် လိုအပ်သည့် သက်သေ အထောက်အထားများ အလုံအလောက် ရှိနေပြီဖြစ်ကြောင်း တရားရုံးက ပြောကြားခဲ့သည်။

မည်သို့ပင်ဆိုစေ MFP နှင့် ရွေးကောက်ပွဲကော်မရှင်တို့အား ဇူလိုင် ၂၄ ရက် မတုင်မီ အချိန်အထိ လျှောက်လှဲချက် များ တင်သွင်းခွင့် ပြုသွားမည်ဖြစ်ကြောင်း၊ သြဂုတ် ၇ ရက် မွန်းလွဲ ၃ နာရီတွင် နောက်ဆုံး စီရင်ချက်ကို ချမှတ် မည်ဖြစ်ကြောင်း တရားရုံးက ထုတ်ပြန်ခဲ့သည်။

MFP ပါတီကိုတွေ့ရစဉ်

ပါတီဖျက်သိမ်းရေးအတွက် ရွေးကောက်ပွဲကော်မရှင်၏ အားထုတ်ကြိုးပမ်းမှုသည် အလျင်စလိုနိုင်ကြောင်း၊ ရွေးကောက်ပွဲကော်မရှင်၏ ကြိုးပမ်းမှုသည် တရားမဝင်ကြောင်း တင်ပြရန် အခွင့်အရေးပင် မပေးကြောင်း MFP ပါတီက ပြောကြားခဲ့သည်။

ထို့ပြင် ရွေးကောက်ပွဲကော်မရှင်သည် ဇန်နဝါရီ ၃၁ ရက်က တရားရုံး၏ စီရင်ချက်ချမှတ်မှုကို ရည်ညွှန်းပြီး ပါတီ ဖျက်သိမ်းရေးကိုသာ တောင်းဆိုနေကြောင်း  MFP ပါတီက ပြောကြားခဲ့သည်။

ဇန်နဝါရီ ၃၁ ရက်က ဖွဲ့စည်းပုံအခြေခံဥပဒေဆိုင်ရာ ခုံရုံးက  MFP ပါတီနှင့် ပါတီခေါင်းဆောင်ဟောင်း ပီတာ လင်မ်ဂျာရွန်ရတ် ( Pita Limjaroenrat) တို့အား တော်ဝင် အသရေဖျက်မှု ဥပဒေအား ပြုပြင်ပြောင်းလဲမည့် လှုပ်ရှားမှုများအားလုံးကို ရပ်တန့်ရန် အမိန့်ချမှတ်ခဲ့သည်။

ထိုလှုပ်ရှားမှုများသည် စည်းမျဉ်းခံ ဘုရင်စနစ်ကို ဖြုတ်ချမည့် လုပ်ရပ်များအဖြစ် သတ်မှတ်နိုင်ကြောင်း တရားရုံးက ပြောကြားခဲ့သည်။

Source: Thai PBS World

CNI International News

ဘန်ကောက်၊ ဇူလိုင် ၁၈

ထိုင်းနိုင်ငံ ဘန်ကောက်မြို့ရှိ ကြယ်ငါးပွင့်ဟိုတယ် တစ်ခုတွင် ဇူလိုင် ၁၆ ရက်က သေဆုံးနေသော ဗီယက်နမ် နိုင်ငံသား ၄ ဦးနှင့် တခြား ပြည်ပနိုင်ငံသား ၂ ဦး စုစုပေါင်းအမှုကို ဗီယက်နမ်သံရုံးက ပူးပေါင်း၍ အမှုမှန် ပေါ်ပေါက်ရေး ဖော်ထုတ်မည်ဟု Thai PBS World မှ ဖော်ပြခဲ့သည်။

၎င်းတို့ သေဆုံးမှုနှင့်ပတ်သက်ပြီး စုံစမ်းစစ်ဆေးမှုတွင် ထိုင်းအာဏာပိုင်များနှင့်အတူ ထိုင်းနိုင်ငံရှိ ဗီယက်နမ်သံရုံး က အနီးကပ် ပူးပေါင်းဆောင်ရွက် သွားမည်ဖြစ်ကြောင်း ထုတ်ပြန်ခဲ့သည်။

ထိုင်းနိုင်ငံဆိုင်ရာ ဗီယက်နမ်သံအမတ်ကြီး ဖန်းဗီယက်ဟွန်း(Pham Viet Hung)က ၎င်း၏သံရုံးအနေဖြင့် သေဆုံးသွားသော ဗီယက်နမ်နိုင်ငံသားများ၏ ကျန်ရစ်သူ မိသားစုကို ထောက်ပံ့ကူညီသွားမည်ဟု ပြောကြားခဲ့ သည်။ 

ထိုင်း၀န်ကြီးချုပ် ဆရီသာကို တွေ့ရစဉ်

ဗီယက်နမ်သံရုံးအနေဖြင့် လျင်မြန်ပြီး ထိရောက်သော စုံစမ်းစစ်ဆေးမှု ဖြစ်စေရန် ပူးပေါင်းကူညီပေးသွားမည် ဖြစ်ကြောင်း Vietnam Plus online တွင် ဖော်ပြထားသည်။

ဘန်ကောက်မြို့တော် ပါသူယန်ဝမ်ခရိုင်ရှိ ဟိုတယ်တွင် ဗီယက်နမ် နိုင်ငံသားလေးဦး အပါအဝင် ပြည်ပနိုင်ငံသား ခြောက်ဦး သေဆုံးနေကြောင်း တွေ့ရှိခဲ့သည်။

Vietnam Plus online တွင် ဖော်ပြချက်အရ သံရုံးအနေဖြင့် ထိုင်းအာဏာပိုင်များနှင့် အနီးကပ် ပူးပေါင်း လုပ်ဆောင်လျက်ရှိပြီး သေဆုံးသူများ၏ ကိုယ်ရေးအချက်အလက်များကို ဖော်ထုတ်နိုင်ရန်၊ ၎င်းတို့၏ ကျန်ရစ်သူ မိသားစုဝင်များအား လိုအပ်သော ကူညီထောက်ပံ့မှုများ စီစဉ်ပေးနိုင်ရန်နှင့် လိုအပ်သော နိုင်ငံသား ကာကွယ်ရေး စီမံချက်များ ချမှတ်လုပ်ဆောင်နိုင်ရန်အတွက် ဗီယက်နမ်နိုင်ငံခြားရေးဝန်ကြီးဌာနရှိ သက်ဆိုင်ရာဌာနများနှင့်အတူ ပူးပေါင်းဆောင်ရွက်လျက်ရှိကြောင်း သံအမတ်ကြီးက ပြောကြားခဲ့သည်ဟု ဆိုသည်။

ထိုင်းရဲတပ်ဖွဲ့ကိုတွေ့ရစဉ်

နိုင်ငံကူးလက်မှတ် သတင်းအချက်အလက်များအပေါ် အခြေခံကာ သေဆုံးသူ ဗီယက်နမ်နိုင်ငံသားလေးဦး၏ ကိုယ်ရေးအချက်အလက်များကို ဖော်ထုတ်နိုင်ရန်အတွက် ဗီယက်နမ်၏ လူဝင်မှုကြီးကြပ်ရေးဌာနနှင့် ပူးပေါင်း ဆောင်ရွက်သွားမည်ဖြစ်ကြောင်းလည်း သံအမတ်ကြီးက ပြောကြားခဲ့သည်။

အတည်ပြုပြီးသည်နှင့် တစ်ပြိုင်နက် ၎င်းတို့၏ မိသားစုများကို အကြောင်းကြားကာ အလောင်းများကို ထိုင်း အာဏာပိုင်များထံမှ ပြန်လည်လွှဲပြောင်းရေး လုပ်ငန်းများစဉ်များအား ကူညီဆောင်ရွက်ပေးသွားမည်ဟုလည်း ပြောကြားခဲ့သည်။

ဗီယက်နမ်သံရုံးက ချက်ချင်းတုန့်ပြန် ဆောင်ရွက်မှုအတွက် ထိုင်းဝန်ကြီးချုပ် ဆရီသာ သာဗီဆင်(Srettha Thavisin) နှင့် အခင်းဖြစ်ပွားရာ နေရာရှိ ထိုင်းရဲတပ်ဖွဲ့တာဝန်ရှိသူများကို ကျေးဇူးတင်စကား ပြောကြားခဲ့သည်။

Source: Thai PBS World

CNI International News

ဘေကျင်း၊ ဇူလိုင် ၁၈

တရုတ်နှင့် ရုရှားတို့သည် ယခုသီတင်းပတ်အတွင်း တောင်တရုတ်ပင်လယ်တွင် ကျည်အစစ်များဖြင့် ရေတပ် စစ်ရေး လေ့ကျင့်မှုများ ပူးတွဲပြုလုပ်ခဲ့သည်ဟု ရုရှားနှင့် တရုတ်နိုင်ငံပိုင်မီဒီယာတွင် ဖော်ပြခဲ့ကြောင်း ရိုက်တာ သတင်းမှ ဖော်ပြခဲ့သည်။

သုံးရက်ကြာ စစ်ရေးလေ့ကျင့်မှုအတွင်း နှစ်နိုင်ငံလုံးက သင်္ဘောသုံးစင်းစီထက်မနည်း ဖြန့်ကြက်ချထားခဲ့ကြောင်း တရုတ်နိုင်ငံပိုင် Global Times သတင်းစာတွင် ဇူလိုင် ၁၂ ရက်က ဖော်ပြခဲ့သည်။

“ပင်လယ်ရေကြောင်း ပူးပေါင်းဆောင်ရွက်မှု-၂၀၁၄”ဟု အမည်ပေးထားသည့် ရုရှား-တရုတ် ရေတပ်စစ်ရေး လေ့ကျင့်မှု အဖွင့်အခမ်းအနားကို တရုတ်၏ ကျန့်ကျန်း(Zhanjiang) ဆိပ်ကမ်းမြို့တွင် ပြုလုပ်ခဲ့ကြောင်း ရုရှားကာကွယ်ရေးဝန်ကြီးဌာနက ယခုသီတင်းပတ် အစောပိုင်း၌ ပြောကြားခဲ့သည်။

ရုရှားရဲ့ စစ်သင်္ဘောကိုတွေ့ရစဉ်

ပူးတွဲစစ်ရေး လေ့ကျင့်မှုများအတွင်း ရုရှား၏ ပစိဖိတ်စစ် သင်္ဘောအုပ်စုနှင့် တရုတ်ပြည်သူ့လွတ်မြောက်ရေး တပ်မတော်(ရေ-PLA)မှ သင်္ဘောများနှင့် သင်္ဘောသားများ ပါဝင်ခဲ့ပြီး လေကြောင်းကာကွယ်ရေး ပူးတွဲစစ်ရေး လေ့ကျင့်မှုနှင့်အတူ ရေငုပ်သင်္ဘောဖျက် ရေတပ်စစ်ဆင်ရေး လေ့ကျင့်ခန်းများကို အတူပူးပေါင်း ဆောင်ရွက်ခဲ့ကြ သည်ဟု ရုရှားကာကွယ်ရေးဝန်ကြီးဌာနက ထုတ်ပြန်ထားသည်။

ရုရှားရေတပ်နှင့် တရုတ်ရေတပ်တို့သည် ပူးပေါင်းစစ်ရေး လေ့ကျင့်မှု၏ တစ်စိတ်တစ်ပိုင်းအနေဖြင့် လက်နက်ကြီး ပစ်ခတ်မှုများကိုလည်း လုပ်ဆောင်ခဲ့သည်ဟု ရုရှား၏ ပစိဖိတ်သင်္ဘောအုပ်စု၏ ပြောကြားချက်ကို ကိုးကား၍ ရုရှားနိုင်ငံပိုင် RIA သတင်းတွင် ဇူလိုင် ၁၆ ရက်က ဖော်ပြထားသည်။

ရုရှား၏ စစ်သင်္ဘောအုပ်စုသည် ပစိဖိတ်မြောက်ပိုင်းတွင် သီးခြားပူးတွဲ ရေတပ်ကင်းလှည့်မှုတစ်ခုကို လုပ်ဆောင်ခဲ့ သည်။

ထိုသင်္ဘောအုပ်စုမှ corvettes အမျိုးအစား စစ်သင်္ဘော နှစ်စင်းဖြစ်သည့် Rezky နှင့် Gromky တို့သည် ကင်းလှည့် အုပ်စုမှ ခွဲထွက်ခဲ့ကာ တရုတ်နှင့်ပူးတွဲ စစ်ရေးလေ့ကျင့်မှုတွင် ပါဝင်ခဲ့ကြောင်း ရုရှားကာကွယ်ရေးဝန်ကြီးဌာနက ပြောကြားခဲ့သည်။

တရုတ်နဲ့ ရုရှား ရေတပ်စစ်သားတွေကိုတွေ့ရစဉ်

"တရုတ်-ရုရှား ပူးတွဲကင်းလှည့်မှုဟာ နှစ်နိုင်ငံနယ်ပယ်ကဏ္ဍ အများအပြားမှာ လက်တွေ့ကျတဲ့ ပူးပေါင်း ဆောင်ရွက်မှုတွေကို မြှင့်တင်ပေးနိုင်ပါတယ်"ဟု PLA ရေတပ်၏ တောင်ပိုင်းစစ်နယ်ဝန်းဌာနမှ ဝမ်ကွမ်ကျန်း (Wang Guangzheng)က ပြောကြားခဲ့သည်။

တရုတ်နိုင်ငံတောင်ပိုင်း ကွမ်တုံပြည်နယ်၊ ကျန့်ကျန်းမြို့ရှိ ရေတပ်စစ်စခန်းမှ သင်္ဘောများသည် စစ်ရေးလေ့ကျင့်မှု တွင် ပါဝင်မည်ဖြစ်ကြောင်း PLA ရေတပ်၏ ထုတ်ပြန်ချက်၌ ဖော်ပြထားသော်လည်း ပူးပေါင်းရေတပ်စစ်ရေး လေ့ကျင့်မည့်နေရာ အတိအကျကိုမူ ထုတ်ပြန်ခဲ့ခြင်း မရှိပေ။

ဇူလိုင် ၁၆ ရက်ကလည်း တောင်တရုတ်ပင်လယ်အတွင်းရှိ ရေပြင်များအတွင်း အမေရိကန်နှင့် ဖိလစ်ပိုင် ကမ်းခြေ စောင့်တပ်ဖွဲ့များက ပူးတွဲစစ်ရေးလေ့ကျင့်မှုများ၊ ကယ်ဆယ်ရေးနှင့် ရှာဖွေရေး လေ့ကျင့်ခန်းများ ပြုလုပ်ခဲ့သည်ဟု အမေရိကန်ရေတပ်က ဇူလိုင် ၁၇ ရက်တွင် ပြောကြားခဲ့သည်။

Source: ရိုက်တာ

CNI International News 

ဒါကာ၊ ဇူလိုင် ၁၈

ဘင်္ဂလားဒေ့ရှ်နိုင်ငံတွင် အစိုးရအလုပ်အကိုင်များကို ခွဲတမ်းချပေးသည့် စနစ်အား ဆန့်ကျင်သည့် ကျောင်းသားများ ၏ ဆန္ဒပြမှုများ ဖြစ်ပွားခဲ့ပြီးနောက် နိုင်ငံအတွင်းရှိ အစိုးရပိုင်နှင့် ပုဂ္ဂလိကပိုင် တက္ကသိုလ်များအားလုံးကို ရက် အကန့်အသတ်မရှိ ပိတ်မည်ဟု အာဏာပိုင်များက ကြေညာခဲ့ကြောင်း ရိုက်တာမှ ဖော်ပြခဲ့သည်။

အစိုးရ၏ အလုပ်အကိုင်များ ခွဲတမ်းချသည့် စနစ်အရ ၁၉၇၁ ခုနှစ်တွင် ပါကစ္စတန်လက်အောက်မှ လွတ်လပ်ရေး ရယူသည့် စစ်ပွဲအတွင်း သေဆုံးခဲ့သည့် လွတ်လပ်ရေး သမားများ၏ မိသားစုများအတွက် အလုပ်အကိုင် စုစုပေါင်း ၏ ၃၀ ရာခိုင်နှုန်း ခွဲတမ်းချမှု အပါအဝင် အစိုးရအလုပ်အကိုင်များ ခွဲတမ်းချသည့် စနစ်ကို ဖျက်သိမ်းရန် ကျောင်းသားများက ဆန္ဒပြခဲ့ခြင်းဖြစ်သည်။

ယခုသီတင်းပတ်အတွင်း ဆန္ဒပြမှုများသည် ပိုမိုပြင်းထန်လာကာ လူ  ၆ ဦးသေဆုံးပြီး လူပေါင်းများစွာ ဒဏ်ရာ ရခဲ့ပြီးနောက် အစိုးရက စာသင်ကျောင်းများနှင့် တက္ကသိုလ်များကို ပိတ်မည်ဟု ကြေညာခဲ့ခြင်းဖြစ်သည်။

လုံခြုံရေးတပ်ဖွဲ့နဲ့ ဆန္ဒပြလူအုပ်ကြီးကိုတွေ့ရစဉ်

လူပေါင်း သန်း ၁၇၀ ရှိသည့် ဘင်္ဂလားဒေ့ရှ်တွင် လူငယ် ၃၂ သန်းနီးပါးသည် အလုပ်အကိုင်မရှိခြင်း သို့မဟုတ် ပညာသင်ကြားခွင့် မရခြင်းတို့နှင့်အတူ လူငယ် အလုပ်လက်မဲ့နှုန်း မြင့်တက်လာမှုအပေါ် ကျောင်းသားများက ဒေါသထွက်နေကြခြင်းဖြစ်သည်။

ဘင်္ဂလားဒေ့ရှ်ဝန်ကြီးချုပ် ရှိတ်ဟာစီနာ (Sheikh Hasina) က ဆန္ဒပြသူများ၏ တောင်းဆိုချက်ကို လိုက်လျောရန် ငြင်းဆိုခဲ့သဖြင့် ဆန္ဒပြမှုများသည် ပိုမိုအရှိန်ပြင်းထန်လာခဲ့သည်။

ယခုသီတင်းပတ်အတွင်း အလုပ်အကိုင် ခွဲတမ်းချသည့် စနစ်ကို ဆန့်ကျင်သော ကျောင်းသားများနှင့် ဆန္ဒပြသူများ သည် အာဏာရ Awami League ပါတီမှ ကျောင်းသားလူငယ်များနှင့် ခိုက်ရန်ဖြစ်ပွားခဲ့ပြီး ရဲတပ်ဖွဲ့က ရာဘာ ကျည်များ၊ မျက်ရည်ယို ဓာတ်ငွေ့များ အသုံးပြုပြီး လူစုခွဲခဲ့ရသည်။

ဘင်္ဂလားဒေ့ရှ်မှာ လူငယ်တွေ ဆန္ဒပြနေကြစဉ်

ဇူလိုင် ၁၆ ရက်က အစိုးရဆန့်ကျင်သည့် ကျောင်းသားများ၊ ဆန္ဒပြသူများနှင့် အစိုးရကို ထောက်ခံသည့် ကျောင်းသားများအကြား ခိုက်ရန်ဖြစ်ပွားမှုကြောင့် ကျောင်းသား ၃ ဦး အပါအဝင် လူ ၆ ဦး သေဆုံးခဲ့ကြောင်း ရဲတပ်ဖွဲ့က ပြောကြားခဲ့သည်။

အာဏာပိုင်များသည် တရားဥပဒေစိုးမိုးရေးကို ထိန်းသိမ်းရန် နိုင်ငံတစ်ဝန်းရှိ တက္ကသိုလ်ဝင်များတွင် အဓိကရုဏ်း နှိမ်နင်းရေး ရဲတပ်ဖွဲ့၊ နယ်စပ်လုံခြုံရေး အရံတပ်ဖွဲ့များကို ဖြန့်ကြက်ချထားခဲ့သည်။

ဇူလိုင် ၁၆ ရက် နှောင်းပိုင်းတွင် တက္ကသိုလ် ထောက်ပံ့ရေးကော်မရှင်က လုံခြုံရေး အခြေအနေကြောင့် နိုင်ငံ အတွင်းရှိ အထက်တမ်းကျောင်းများ၊ ကောလိပ်များနှင့် အခြား ပညာရေးဌာနများ အပါအဝင် တက္ကသိုလ်အားလုံး ကို ရက်အကန့်အသတ်မရှိ ပိတ်ကြောင်း အမိန့်ထုတ်ပြန်ခဲ့သည်။

Source: ရိုက်တာ

CNI International News

နယူးဒေလီ၊ ဇူလိုင် ၁၇

ဇူလိုင် ၁၃ ရက်က အမေရိကန်တွင် ပြုလုပ်ခဲ့သည့် မဲဆွယ်စည်းရုံးပွဲ၌ သမ္မတရွေးကောက်ပွဲဝင် ကိုယ်စားလှယ် လောင်း ဒေါ်နယ်ထရမ့် (Donald Trump) ပစ်ခတ်ခံခဲ့ရသည့် ဖြစ်စဉ်သည် ကမ္ဘာပေါ်ရှိ နိုင်ငံရေး ခေါင်းဆောင်များ အတွက် သတိပေးခေါင်းလောင်းသံဖြစ်သည်ဟု Khalsa Vox သတင်းဝက်ဘ်ဆိုက်မှ ဖော်ပြခဲ့သည်။

ထိုဖြစ်စဉ်သည် ကနေဒါနိုင်ငံရေးသမားများအတွက် ပြည်တွင်းရှိ စိတ်မချမ်းမြေ့ဖွယ် အရှိတရားအချို့ကို တင်းကျပ်စွာ ကိုယ်တွယ်ဖြေရှင်းရမည့် အခြေအနေသို့ တွန်းပို့ရာရောက်သည့် စေ့ဆော်မှုတစ်ခု ဖြစ်သင့်ကြောင်း အိန္ဒိယနိုင်ငံရေး ဆောင်းပါးရှင် ပါမင်ဒါ ဆင်း ဆိုဒီ (Parminder Singh Sodhi) က ရေးသားခဲ့သည်။

အထူးသဖြင့် ကနေဒါနိုင်ငံအတွင်း ခါလစ္စတန်ခွဲထွက်ရေး ထောက်ခံသူများနှင့် ၎င်းတို့၏ လုပ်ဆောင်ချက်များမှ ဖြစ်ပေါ်လာသည့် ပြဿနာများကို အရေးတယူ ဖြေရှင်းရမည့် အချိန်သို့ ကျရောက်လာပြီ ဖြစ်ကြောင်းလည်း ဆိုဒီက ပြောကြားခဲ့သည်။

အိန္ဒိယဝန်ကြီးချုပ် အင်ဒီယာ ဂန္ဒီ (Indira Gandhi) အား ၎င်း၏ ဆစ်ခ်ဘာသာဝင် သက်တော်စောင့်များက လုပ်ကြံသတ်ဖြတ်မှုကို လူသိရှင်ကြား အောင်ပွဲခံနေခြင်းသည် မနှစ်မြို့ဖွယ်ကောင်းရုံသာမက ယဉ်ကျေးသည့် လူ့အဖွဲ့အစည်းအတွင်း နေရာမရှိသော အကြမ်းဖက်မှုကို ဂုဏ်တင်ရာ ရောက်နေသည်ဟု ၎င်းက ဆိုသည်။

အင်ဒီယာ ဂန္ဒီ လုပ်ကြံသတ်ဖြတ်ခံရမှုသည် သမိုင်းတွင် ဝမ်းနည်းစရာကောင်းသည့် အခိုက်အတန့်ဖြစ်ပြီး ထိုဖြစ်စဉ်ကို အောင်ပွဲခံနေခြင်းသည် လူ့အဖွဲ့အစည်းအတွင်း သဘောထားကွဲလွဲမှုများကို နက်ရှိုင်းစေသလို အမုန်းတရားများကိုလည်း ပျံ့နှံ့စေကြောင်း ဆိုဒီက ပြောကြားခဲ့သည်။

အကြမ်းဖက်မှု သရုပ်ပြကိုတွေ့ရစဉ်

ထို့ကြောင့် ကနေဒါ ခေါင်းဆောင်များအနေဖြင့် ထိုကဲ့သို့ အောင်ပွဲခံမှုများကို တညီတညွတ်တည်း ရှုတ်ချရမည် ဖြစ်ကာ အကြမ်းဖက်မှုကို အောင်ပွဲခံနေမှုအပေါ် လက်မခံနိုင်ကြောင်း ပြတ်သားစွာ အရေးယူဆောင်ရွက်ရမည် ဟုလည်း ဆိုဒီက တိုက်တွန်းခဲ့သည်။

မကြာသေးမီက ကနေဒါနိုင်ငံ ဗန်ကူးဗား (Vancouver) မြို့တွင် ခါလစ္စတန်ခွဲထွက်ရေး ထောက်ခံသူများသည် အိန္ဒိယဝန်ကြီးချုပ် အင်ဒီယာဂန္ဒီ၏ ရုပ်ပုံကို ကျည်ဆန်ရာများ မှန်ထားသည့်ပုံစံဖြင့် အပေါက်များ ဖောက်ထား သည့် ပိုစတာများကို ကိုင်ဆောင်ကာ အောင်ပွဲခံမှုများ ပြုလုပ်ခဲ့သဖြင့် ဝေဖန်မှုများ ထွက်ပေါ်လာခဲ့သည်။

ထို့ပြင် ကနေဒါနိုင်ငံသမိုင်းတွင် လူသေဆုံးမှုအများဆုံး လေကြောင်း အကြမ်းဖက်မှုဖြစ်သည့် Air India လေကြောင်းလိုင်း ဗုံးခွဲခံခဲ့ရသော ဖြစ်စဉ်သည် အကြမ်းဖက်မှု၏ ဆိုးရွားသော သက်ရောက်မှုကို အမှတ်ရစေသည့် ဖြစ်စဉ်တစ်ခု ဖြစ်သင့်ကြောင်း ဆိုဒီက ပြောကြားခဲ့သည်။

၁၉၈၉ ခုနှစ်၊ ဇွန်လ ၂၃ ရက်က မွန်ထရီယယ်-လန်ဒန်-ဒေလီ-မွမ်ဘိုင်း ( Montreal-London-Delhi-Mumbai) သို့ ပြေးဆွဲသည့် Air India လေကြောင်းလိုင်းမှ လေယာဉ်တစ်စင်းသည် အတ္တလန္တိတ်သမုဒ္ဒရာပေါ်တွင် ဆစ်ခ် အကြမ်းဖက်သမားများ၏ ဗုံးခွဲတိုက်ခိုက်ခြင်း ခံခဲ့ရသဖြင့် ကနေဒါ နိုင်ငံသား ၂၆၈ ဦး အပါအဝင် လေယာဉ်ပေါ် လိုက်ပါသွားသည့် လူပေါင်း ၃၂၉ ဦးစလုံး သေဆုံးခဲ့သည်။

Source: Khalsa Vox

CNI International News

တိုကျို၊ ဇူလိုင် ၁၇

ဂျပန်နှင့် ဖိလစ်ပိုင်အကြား အင်ဒို-ပစိဖိတ်ဒေသရှိ လုံခြုံရေးအခင်းအကျင်းကို ပုံဖော်နိုင်ရန် Reciprocal Access Agreement (RAA) အမည်ရှိ စစ်ရေးသဘောတူစာချုပ် ချုပ်ဆိုခဲ့မှုအပေါ် တရုတ်က စိုးရိမ်နေကြောင်း  TruthMV သတင်းဝက်ဘ်ဆိုက်မှ ဖော်ပြခဲ့သည်။

တောင်တရုတ်ပင်လယ်တွင် တရုတ်၏ လှုပ်ရှားမှုများ မြင့်တက်နေသည့် အခြေအနေကို တန်ပြန်ရန် ဂျပန်နှင့် ဖိလစ်ပိုင်တို့က ထိုကဲ့သို့ စစ်ရေးသဘောတူစာချုပ် ချုပ်ဆိုခဲ့ခြင်းဖြစ်သည်ဟု ကျွမ်းကျင်သူများက ပြောကြားခဲ့ သည်။

ဇူလိုင် ၈ ရက်က ဖိလစ်ပိုင်၏ မြို့တော် မနီလာ (Manila)တွင် လက်မှတ်ရေးထိုးခဲ့သည့် ထိုသဘောတူညီချက်အရ ဂျပန်နှင့် ဖိလစ်ပိုင်အကြား သက်ဆိုင်ရာ နိုင်ငံများ၌ စစ်သားများ ထားရှိခြင်း၊ တစ်ဖက်နှင့်တစ်ဖက် စစ်စခန်းများ အသုံးပြုခွင့်ရှိခြင်း၊ ပူးတွဲစစ်ရေးလေ့ကျင့်မှုနှင့် ဘေးအန္တရာယ် ကယ်ဆယ်ရေး လေ့ကျင့်ခန်းများ ဆောင်ရွက်ခြင်း တို့ ပြုလုပ်နိုင်မည် ဖြစ်သည်။

 ဂျပန်နဲ့ဖိလစ်ပိုင် စစ်ရေးသဘောတူစာချုပ် ချုပ်ဆိုစဉ်

ဩစတြေးလျနှင့် ဗြိတိန်တို့ ပြီးပါက ဖိလစ်ပိုင်သည် ဂျပန်နှင့် RAA စာချုပ်ကို ချုပ်ဆိုသည့် တတိယမြောက်နိုင်ငံ ဖြစ်လာခဲ့ပြီး တရုတ်ကမူ ထိုစာချုပ်ချုပ်ဆိုမှုအား အလွန်စိုးရိမ်ကြောင်း ဖော်ပြခဲ့သည်။

“နိုင်ငံတွေအချင်းချင်း ပူးပေါင်းဆောင်ရွက်မှုနဲ့ ဖလှယ်မှုဟာ ဒေသတွင်း ငြိမ်းချမ်းရေးနဲ့ တည်ငြိမ်ရေးကို ခြိမ်းခြောက်နေတာမျိုး မဖြစ်သင့်ပါဘူး။ အခြားနိုင်ငံတွေရဲ့ အကျိုးစီးပွားကို ထိခိုက်စေတာ ဒါမှမဟုတ် အခြား နိုင်ငံတွေကို ပစ်မှတ်ထားတာမျိုး မဖြစ်သင့်ပါဘူး” ဟု တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ လင်ကျန်း (Lin Jian) က ပြောကြားခဲ့သည်။

ဂျပန်နိုင်ငံခြားရေးဝန်ကြီးဌာနကမူ မဟာဗျူဟာမြောက် ဖိလစ်ပိုင်နိုင်ငံနှင့် လုံခြုံရေးဆိုင်ရာ သဘောတူ စာချုပ် ချုပ်ဆိုမှုသည် အရေးကြီးကြောင်း၊ ထိုစာချုပ်သည် အင်ဒို-ပစိဖိတ် ဒေသတည်ငြိမ်ရေးနှင့် လုံခြုံရေးကို အထောက် အကူ ပေးနိုင်ကြောင်း၊ ကာကွယ်ရေးနှင့် လုံခြုံရေး ပူးပေါင်းဆောင်ရွက်မှုများကို ထပ်မံတိုးမြှင့်သွားမည်ဖြစ် ကြောင်း ထုတ်ပြန်ခဲ့ သည်။

ဂျပန်နဲ့ဖိလစ်ပိုင် စစ်ရေးသဘောတူစာချုပ် ချုပ်ဆိုစဉ်

မည်သို့ပင်ဆိုစေ RAA စာချုပ်သည် စစ်အေးတိုက်ပွဲအသစ် သို့မဟုတ် အုပ်စုလိုက် ထိပ်တိုက်တွေ့မှုကို ဖြစ်စေနိုင် သည့် ရန်လိုသော လုပ်ရပ်ဖြစ်ကြောင်း ရှုမြင့်ခဲ့သည်။

ထိုစာချုပ်သည် ဒုတိယကမ္ဘာစစ် နောက်ပိုင်း စစ်ရေးအင်အားကို ကန့်သတ်ထားသည့် ဂျပန်ကာကွယ်ရေးကဏ္ဍ၏ သမိုင်းကြောင်းနှင့် ကွဲလွဲဆန့်ကျင်နေကြောင်း တရုတ်အစိုးရက ပြောကြားခဲ့သည်။

၂၀၂၀ ပြည့်နှစ် စက်တင်ဘာလကလည်း ဂျပန်နှင့် အိန္ဒိယသည် အလားတူ စစ်ရေးစာချုပ်ဖြစ်သည့် Acquisition and Cross-Servicing Agreement (ACSA) အမည်ရှိ သဘောတူစာချုပ်ကို လက်မှတ်ရေးထိုးခဲ့သည်။

Source: Truth MV

CNI International News

ဝါရှင်တန် ၊ ဇူလိုင် ၁၇

အမေရိကန်သမ္မတ ရွေးကောက်ပွဲဝင် ကိုယ်စားလှယ်လောင်း ဒေါ်နယ်ထရမ့် (Donald Trump)သည် ဒုတိယ သမ္မတ ကိုယ်စားလှယ်လောင်း နေရာအတွက် ဂျေဒီ ဗန့်စ် (JD Vance) ကို တွဲဖက်ကိုယ်စားလှယ်လောင်းအဖြစ် ရွေးချယ်ခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

အသက် ၃၉ နှစ်အရွယ် အိုဟိုင်းယိုး (Ohio) ပြည်နယ်မှ အထက်လွှတ်တော်အမတ် ဗန့်စ်သည် ၂၀၁၆ ခုနှစ်က Hillbilly Elegy အမည်ရှိ ကိုယ်ရေးမှတ်တမ်း စာအုပ်ဖြင့် လူသိများထင်ရှား လာခဲ့သူဖြစ်သည်။

ထိုအချိန်က ထရမ့်သည် ပထမဆုံးအကြိမ် သမ္မတရွေးကောက်ပွဲ ဝင်ရောက်ယှဉ်ပြိုင်နေချိန် ဖြစ်သည်။

ဗန့်စ်သည် ၂၀၂၂ ခုနှစ်က အမေရိကန်အထက်လွှတ်တာ်တွင် ရွေးကောက်ခံခဲ့ရပြီး ထရမ့်၏ Make America Great Again ဆိုသည့် မူဝါဒကို အခိုင်အမာ ယုံကြည်သည့် ရီပတ်ဘလစ်ကန်များထဲတွင် တစ်ဦး အပါအဝင် ဖြစ်ခဲ့သည်။

သို့သော် သူသည် နိုင်ငံရေးနယ်ပယ်တွင် ကြီးမားသည့် စိန်ခေါ်မှုနှင့် ရင်ဆိုင်ခဲ့ရခြင်းမရှိဘဲ ယခုအကြိမ် ထရမ့်နှင့် တွဲပြီး ရွေးကောက်ပွဲဝင်ခြင်းသည် ဗန့်စ်အတွက် အကြီးမားဆုံး စိန်ခေါ်မှုတစ်ခု ဖြစ်လာခဲ့သည်။

ဒေါ်နယ်ထရမ့်နဲ့ ဂျေဒီဗန့်စ်ကို တွေ့ရစဉ်

အိုဟိုင်းယိုးပြည်နယ်၊ မစ်ဒယ်တောင်း (Middletown) မြို့တွင် မွေးဖွားကြီးပြင်းခဲ့သည့် ဗန့်စ်သည် အီရတ် စစ်မြေပြင် အပါအဝင် မရိန်းတပ်ဖွဲ့တွင် တာဝန်ထမ်းဆောင်ခဲ့သူဖြစ်ပြီး အိုဟိုင်းယိုးပြည်နယ် တက္ကသိုလ်နှင့် ယေးလ်ဥပဒေကျောင်းတို့မှ ဘွဲ့ရရှိခဲ့သူဖြစ်သည်။

ဗန့်စ်၏ Hillbilly Elegy စာအုပ်တွင် အမေရိကန် အလယ်ပိုင်းဒေသ၌ ထရမ့်ကို ထောက်ခံမှုများ မြင့်တက်စေခဲ့ သည့် အကြောင်း၊ အထူးသဖြင့် အလုပ်သမား လူတန်းစားများ၊ ကျေးလက်နေ လူဖြူမဲဆန္ဒရှင်များက ၂၀၁၆ ရွေးကောက်ပွဲတွင် ထရမ့်ကို အနိုင်ရရှိအောင် ကူညီပေးခဲ့သည့် အကြောင်းများကို ရေးသားဖော်ပြထားခြင်း ဖြစ်သည်။

ဗန့်စ်သည် ထရမ့်၏ အစောပိုင်း နိုင်ငံရေးလှုပ်ရှားမှုများကို ဝေဖန်ခဲ့သူဖြစ်ပြီး ထရမ့်ကို “အမေရိကန် ဟစ်တလာ” ၊ “ဟန်ဆောင်လိမ်ညာသူ” ၊ “စာရိတ္တ ပျက်ပြားသူ” ဆိုသည့် စကားလုံးများဖြင့် ဝေဖန်ခဲ့ရာမှ နောက်ပိုင်းတွင် ထရမ့်၏ အမာခံထောက်ခံသူ ဖြစ်လာခဲ့ခြင်းဖြစ်သည်။

ထို့ပြင် ဗန့်စ်သည် အစ္စရေးကို ထောက်ခံသူဖြစ်ပြီး ပြီးခဲ့သည့်နှစ် အောက်တိုဘာ ၇ ရက်က အစ္စရေးကို ဟားမာ့စ် အဖွဲ့က ဝင်ရောက်တိုက်ခိုက်ခဲ့သည့် ဖြစ်စဉ်နှင့်ပတ်သက်ပြီး သမ္မတဂျိုးဘိုင်ဒန် (Joe Biden) အစိုးရအဖွဲ့ကို အရင်ဆုံး ဝေဖန်ခဲ့သူဖြစ်သည်။

ဇူလိုင် ၁၃ ရက်က မဲဆွယ်စည်းရုံးပွဲတွင် ထရမ့် ပစ်ခတ်ခံခဲ့ရသည့် ဖြစ်စဉ်သည် ရွေးကောက်ပွဲအကြို မဲဆွယ် စည်းရုံးမှု အခြေအနေကို လှုပ်ခတ်သွားစေခဲ့သည်။

ထရမ့်သည် ထိုဖြစ်စဉ်ကြောင့် လူထုထောက်ခံမှု ပိုမိုမြင့်တက်လာခဲ့သည်ဟု စစ်တမ်းအချို့တွင် ဖော်ပြခဲ့သည်။

Source: အယ်လ်ဂျာဇီးယား

CNI International News

ဝါရှင်တန်၊ ဇူလိုင် ၁၆

ဇူလိုင် ၁၂ ရက်က အမေရိကန်သမ္မတဟောင်း ဒေါ်နယ်ထရမ့် (Donald Trump) ၏ မဲဆွယ်စည်းရုံးပွဲတွင် ပစ်ခတ်မှု ဖြစ်ပွားခဲ့ပြီးနောက် အမေရိကန်သမ္မတ ဂျိုးဘိုင်ဒန် (Joe Biden) နှင့် ၎င်း၏ ရွေးကောက်ပွဲပြိုင်ဘက် ထရမ့်တို့က စည်းလုံးညီညွတ်မှုအကြောင်းကို အလေးထား ပြောဆိုခဲ့ကြသည်ဟု အယ်လ်ဂျာဇီးယားမှ ဖော်ပြခဲ့ သည်။ 

အမေရိကန်ပြည်သူများ အနေဖြင့် နိုင်ငံရေးအရ စိတ်သဘောထား ကွဲလွဲမှုများ ဘေးချိတ်ပြီး စည်းစည်းလုံးလုံး နေထိုင်ကြရန် ဘိုင်ဒန်နှင့် ထရမ့်တို့က တိုက်တွန်းခဲ့ကြခြင်း ဖြစ်သည်။ 

ဇူလိုင် ၁၄ ရက်ညက အိမ်ဖြူတော်ရှိ ဘဲဥပုံရုံးခန်းတွင် ၆ မိနစ်ခွဲကြာမြင့်သည့် မိန့်ခွန်းအတွင်း ဘိုင်ဒန်က နိုင်ငံရေး အကြမ်းဖက်မှုသည် ပုံမှန်အခြေအနေကို ပြန်ဖြစ်နိုင်လိမ့်မည် မဟုတ်ကြောင်း၊ နိုင်ငံရေး အမုန်းတရားများ မြင့်တက်လာချိန်တွင် အခြေအနေကို တည်ငြိမ်အောင် လုပ်ဆောင်ရန် အမေရိကန်ပြည်သူအားလုံး၌ တာဝန်ရှိ ကြောင်း ပြောကြားခဲ့သည်။

"အမေရိကန်ကို ဒီလမ်းကြောင်းအတိုင်း နိမ့်ဆင်းသွားဖို့ ကျနော်တို့ အဖြစ်မခံနိုင်၊ အဖြစ်မခံရပါဘူး။ ကျနော်တို့ တွေဟာ အရင်က ကျနော်တို့ရဲ့ သမိုင်းတစ်လျှောက် လျှောက်လှမ်းခဲ့တဲ့ လမ်းပေါ်မှာပဲ လျှောက်ခဲ့ကြတာပါ။ အကြမ်းဖက်မှုဟာ အဖြေမဟုတ်ပါဘူး" ဟု ဘိုင်ဒန်က ပြောကြားခဲ့သည်။

ဘိုင်ဒန်က ဒီမိုကရက်များနှင့် ရီပတ်ဘလစ်ကန်များအကြားတွင် မတူကွဲပြားမှုများရှိကြောင်း ဝန်ခံခဲ့ပြီး နိုင်ငံရေး အရ သဘောထား မတိုက်ဆိုင်မှုများကို မဲရုံများတွင်သာ အမြဲတမ်း အဖြေရှာခဲ့ကြကြောင်း ပြောကြားခဲ့သည်။ 

 မဲဆွယ်ပွဲမှာ ထရမ့် သေနတ်နဲ့ပစ်ခံရစဉ်

ထရမ့်ကလည်း ဇူလိုင် ၁၃ ရက်တွင် Washington Examiner သတင်းနှင့် အင်တာဗျူး ပြုလုပ်ခဲ့ချိန်တွင် မဲဆွယ် စည်းရုံးပွဲအတွင်း ၎င်း ပစ်ခတ်ခံရသည့် ဖြစ်စဉ်သည် တစ်နိုင်ငံလုံး၊ တစ်ကမ္ဘာလုံးအတွက် စည်းလုံးညီညွတ်စေမည့် အခွင့်အလမ်းတစ်ခုဖြစ်ခဲ့ကြောင်း ပြောကြားခဲ့သည်။

ထိုတိုက်ခိုက်မှုနှင့်ပတ်သက်ပြီး ထရမ့်က အမှန်တရားသည် စတင် အကောင်အထည် ပေါ်လာပြီဖြစ်ကြောင်း ပြောကြားခဲ့သည်။

ထို့ပြင် ထရမ့်က ၎င်း၏ နောက်ထပ် မဲဆွယ်စည်းရုံးပွဲတွင် ပြောကြားမည့် မိန့်ခွန်းသည် ယခင်က ပြောကြားရန် စီစဉ်ထားသည့် မိန့်ခွန်းနှင့် ကွဲပြားခြားထားလိမ့်မည် ဖြစ်ကြောင်းလည်း Washington Examiner ကို ပြောကြားခဲ့ သည်။

ထရမ့်သည် ဇူလိုင် ၁၂ ရက်က ပင်ဆယ်ဗေးနီးယား (Pennsylvania) ပြည်နယ်၊ ဘတ်တလာ (Butler) မြို့တွင် ပြုလုပ်ခဲ့သည့် မဲဆွယ်စည်းရုံးပွဲ၌ သေနတ်ဖြင့် ပစ်ခတ်ခံခဲ့ရပြီး နားရွက်မှာ ဒဏ်ရာရသွားခဲ့သည်။

ထို့နောက် ၎င်းအား ပစ်ခတ်သည့် သေနတ်သမားကို Secret Service အဖွဲ့က အသေ ပစ်ခတ်ဖမ်းဆီးခဲ့သည်။

Source: အယ်လ်ဂျားဇီးယား