CNI International News

ကိယက်၊ ဖေဖော်ဝါရီ ၁၄

ပြီးခဲ့သည့် သီတင်းပတ်အတွင်းက ရုရှားသည် ယူကရိန်း၏ ကိယက်ဗ် (Kyiv) မြို့တော်ကို ဟိုက်ပါဆိုးနစ် အမျိုးအစားဖြစ်သည့် Zircon ဒုံးကျည်ဖြင့် ပစ်ခတ်ခဲ့ကြောင်း ကျွမ်းကျင်သူများက ကနဦး ကောက်ချက် ချခဲ့သည်ဟု ရိုက်တာမှ ဖော်ပြခဲ့သည်။

ထို့ကြောင့် ရုရှားသည် ၂ နှစ်နီးပါးကြာ ဖြစ်ပွားနေသည့် ယူကရိန်းစစ်ပွဲတွင် ထိုဒုံးကျည်ကို ပထမဆုံး အကြိမ် အသုံးပြုခဲ့ခြင်းဖြစ်ပြီး ယူကရိန်းလေကြောင်း ကာကွယ်ရေးတပ်ဖွဲ့အတွက် စိန်ခေါ်မှုအသစ် တစ်ခု ဖြစ်ခဲ့သည်ဟု ကိယက်ဗ်အခြေစိုက် သုတေသနအဖွဲ့တစ်ခုဖြစ်သည့် Kyiv Scientific-Research Institute for Forensic Examinations ၏ အကြီးအကဲ အိုလက်ဇန်းဒါး ရူဗင် (Oleksandr Ruvin) က ဖေဖော်ဝါရီ ၁၂ ရက်တွင် ပြောကြားခဲ့သည်။

ဖေဖော်ဝါရီ ၇ ရက်က ရုရှား၏ တိုက်ခိုက်မှုတစ်ခုတွင် ဒုံးကျည် အပျက်အစီးများကို ကနဦးအဆင့် အနေ ဖြင့် လေ့လာခဲ့ရာတွင် ထိုဒုံးကျည်သည် ဟိုက်ပါဆိုးနစ် အမျိုးအစားဖြစ်သည့် Zircon ဒုံးကျည်ဖြစ် ကြောင်း ၎င်းတို့အဖွဲ့က ကောက်ချက်ချခဲ့သည်ဟု ရူဗင်က ပြောသည်။

“ဒီဖြစ်စဉ်မှာ ကျနော်တို့ဟာ 3M22 Zircon ဒုံးကျည်ရဲ့ တည်ဆောက်ပုံ အခြေအနေတွေကို မြင်တွေ့ခဲ့ရ ပါတယ်။ ဒုံးကျည်အင်ဂျင်ရဲ့ အပျက်အအစီး အစိတ်အပိုင်းတွေနဲ့ ထိန်းချုပ်ရေး ယန္တရားတွေကို လေ့လာ ပြီး အခုလို ကောက်ချက်ချခဲ့တာ ဖြစ်ပါတယ်” ဟု ၎င်းက Telegram တွင် ရေးသားခဲ့သည်။

ယူကရိန်းသုတေသီအဖွဲ့၏ ပြောကြားချက်နှင့် ပတ်သက်ပြီး ရုရှားကာကွယ်ရေးဝန်ကြီးဌာနက မှတ်ချက် ပေးခဲ့ခြင်းမရှိပေ။

Zircon ဒုံးကျည်သည် အသံထက် ၉ ဆမြန်ဆန်သည့် အလျင်ဖြင့် ကီလိုမီတာ ၁၀၀၀ ( ၆၂၅ မိုင်) အကွာ အဝေးအထိ ပျံသန်းနိုင်ကြောင်း ရုရှား၏ ထုတ်ပြန်ချက်များအရ သိရသည်။

စစ်ရေးကျွမ်းကျင်သူများကမူ အသံထက် ၅ ဆကျော် မြန်ဆန်သည့် ထို ဟိုက်ပါဆိုးနစ်ဒုံးကျည် အမျိုးအစားများကို လေကြောင်းကာကွယ်ရေးတပ်ဖွဲ့များက ပစ်ချနိုင်ရန် ခက်ခဲပြီး ထိုဒုံးကျည်များ၏ ပေါက်ကွဲအားသည် အလွန်ပြင်းထန်ကြောင်း ပြောကြားခဲ့သည်။

ယခင်က ရုရှားသည် Zircon ဒုံးကျည်ကို အပြီးသတ် စမ်းသပ်နိုင်ခဲ့ကြောင်း ၂၀၂၂ ခုနှစ်၊ ဇွန်လက ပြောကြားခဲ့ဖူးပြီး ရုရှားသမ္မတ ပူတင် (Vladimir Putin) ကမူ Zircon ဒုံးကျည်သည် မျိုးဆက်သစ် လက်နက်စနစ်များထဲတွင် ပြိုင်ဘက်ကင်းဖြစ်ကြောင်း ပြောကြားခဲ့သည်။

ထို့ကြောင့် ရုရှားအနေဖြင့် ထိုဒုံးကျည်ကို အသုံးပြုခဲ့ကြောင်း အတည်ပြုခဲ့မည်ဆိုပါက ယူကရိန်းစစ်တပ် ၏ လေကြောင်းရန် ကာကွယ်ရေးစနစ်အတွက် ကြီးမားသည့် စိန်ခေါ်မှု ဖြစ်လာနိုင်မည်ဟု ကျွမ်းကျင် သူများက ပြောကြားခဲ့သည်။

Source: ရိုက်တာ

CNI International News

ဘေရွတ်၊ ဖေဖော်ဝါရီ ၁၄

လက်ဘနွန်နှင့် အစ္စရေးအကြား နယ်စပ်ဒေသ အငြင်းပွားမှုများကို ကျေအေးစေရန် အပြင် အစ္စရေးနှင့် ရန်လိုမှု များအား အဆုံးသတ်စေရန်အတွက် ပြင်သစ်က လက်ဘနွန်အစိုးရကို အဆိုပြုစာတစ်စောင် ပေးပို့ခဲ့သည်ဟု ရိုက်တာမှ ဖော်ပြခဲ့သည်။

ထိုအဆိုပြုစာထဲတွင် လက်ဘနွန်နှင့် အစ္စရေးထိစပ်နေသည့် ၁၀ ကီလိုမီတာ (၆ မိုင်) အကွာအဝေးရှိ နယ်စပ် ဒေသမှ ဟစ်ဇ်ဘိုလာတပ်ဖွဲ့များကို ပြန်လည်ရုပ်သိမ်းရန်လည်း အကြံပြုထားသည်။

ထိုအစီအစဉ်သည် အစ္စရေးနှင့် အီရန်က ထောက်ပံ့ပေးထားသည့် ဟစ်ဇ်ဘိုလာအဖွဲ့အကြား တိုက်ခိုက်မှုများကို အဆုံးသတ်စေရန် ရည်ရွယ်ထားခြင်း ဖြစ်သည်။ 

ဂါဇာကမ်းမြောင်ဒေသတွင် အစ္စရေးနှင့် ဟားမာ့စ်အကြား စစ်ပွဲ စတင်ဖြစ်ပွားချိန်ကတည်းက အစ္စရေးနှင့် ဟစ်ဇ်ဘိုလာ အဖွဲ့အကြား ရန်လိုမှုများသည် မီးကုန်ယမ်းကုန် စစ်ပွဲဖြစ်ပွားနိုင်သည့် အခြေအနေသို့ ဦးတည်နိုင် မည့် အခြေအနေကို စိုးရိမ်မှုများ မြင့်တက်စေခဲ့သည်။

ရှေ့တန်းစစ်မျက်နှာတစ်ခုကိုတွေ့ရစဉ်

ပြီးခဲ့သည့် သီတင်းပတ်အတွင်းက ပြင်သစ်ဝန်ကြီးချုပ် စတက်ဖန် ဆီဂျွန် (Stephane Sejourne) က လက်ဘနွန် ဝန်ကြီးချုပ် နာဂျစ် မီကာတီ (Najib Mikati) ကို ပေးပို့ခဲ့သည့် အဆိုပြုစာထဲတွင် ထိန်းမနိုင်သိမ်းမရ ဖြစ်လာနိုင် သော ပဋိပက္ခအား ဟန့်တားရန်နှင့် အပစ်အခတ်ရပ်စဲရန် တိုက်တွန်းထားသည်ဟု ပြင်သစ်နှင့် လက်ဘနွန်အရာရှိ များက ပြောကြားခဲ့သည်။

ဟစ်ဇ်ဘိုလာအဖွဲ့ကမူ ဂါဇာစစ်ပွဲ မပြီးမချင်း အစ္စရေးနှင့် တရားဝင် စေ့စပ်ညှိနှိုင်းမှုများ ပြုလုပ်မည်မဟုတ် ကြောင်း ငြင်းဆိုထားသည်။

ပြင်သစ်၏ အဆိုပြုစာနှင့်ပတ်သက်ပြီး အလားတူ စေ့စပ်ညှိနှိုင်းမှုများကို အမေရိကန်၏ အရှေ့အလယ်ပိုင်းဆိုင်ရာ သံတမန် အာမို့စ်ဟော့ချ်စတိန်း (Amos Hochstein) ကလည်း ထုတ်ပြန်ခဲ့ဖူးသည်။

ပြင်သစ်သည် လက်ဘနွန်ကို ထိုကဲ့သို့ အဆိုပြုစာ ပေးပို့ခဲ့သည်ဆိုသည့် အကြောင်းအရာနှင့်ပတ်သက်ပြီး ယခင်က သတင်းများ ထွက်ပေါ်ခဲ့ခြင်းမရှိပေ။

ပြင်သစ်၏ သံတမန်တစ်ဦးကမူ ထိုအကြံပြုစာကို အစ္စရေးနှင့် လက်ဘနွန် အစိုးရများအပြင် ဟစ်ဇ်ဘိုလာအဖွဲ့ကို ပါ ပေးပို့ခဲ့ခြင်းဖြစ်သည်ဟု ပြောကြားခဲ့သည်။

ပြင်သစ်နိုင်ငံသည် လက်ဘနွန်နိုင်ငံနှင့် သမိုင်းဝင် ဆက်ဆံရေးရှိခဲ့ပြီး လက်ဘနွန်တွင်ရှိသည့် ကုလသမဂ္ဂ ငြိမ်းချမ်းရေး ထိန်းသိမ်းရေး တပ်ဖွဲ့များထဲတွင် ပြင်သစ်စစ်သား ၈၀၀ ခန့်ပါဝင်ပြီး လက်ဘနွန်တွင် ပြင်သစ် နိုင်ငံသား ၂၀၀၀၀ ခန့် နေထိုင်လျက်ရှိသည်။

Source: ရိုက်တာ

CNI International News

ဂူဝါဟတီ၊ ဖေဖော်ဝါရီ ၁၄

ULFA-I အကြီးအကဲ ပါရတ်ရှ် ဘာရူအာ (Paresh Baruah) သည် ဘင်္ဂလားဒေ့ရှ်နိုင်ငံတွင် နေထိုင်ခဲ့ချိန်က လုပ်ကြံ သတ်ဖြတ်ခံရမည့် ကြိုးပမ်းမှု ၄ ကြိမ် ကြုံတွေ့ခဲ့ပြီး အသက်ရှင်လျက် လွတ်မြောက်ခဲ့ကြောင်း Northeast Now မှ ဖော်ပြခဲ့သည်။

ထိုအကြောင်းအရာကို နာမည်ကြီး သတင်းထောက် ရာဂျိဗ် ဘာတာချာယာ  (Rajeev Bhattacharyya) က ၎င်း၏ နောက်ဆုံးထုတ်ဝေသည့် “ULFA: The Mirage of Dawn” အမည်ရှိ စာအုပ်တွင် ရေးသားဖော်ပြခဲ့ခြင်းဖြစ်သည်။

ဖေဖော်ဝါရီ ၁၁ ရက်က နယူးဒေလီ (New Delhi) တွင် ထုတ်ဝေခဲ့သည့် ထိုစာအုပ်၌ အဆိုပါ လုပ်ကြံသတ်ဖြတ်ရန် ကြိုးပမ်းမှုများအပြင် ဘာတာချာယာက ULFA အဖွဲ့ ၊ ပါကစ္စတန်နှင့် ဘူတန်နိုင်ငံတို့အကြား ဆက်နွှယ်မှုများကို ရေးသားဖော်ပြထားသည်။

ထိုစာအုပ်တွင် ဘင်္ဂလားဒေ့ရှ်နိုင်ငံ၊ ဆက်ချာရီ (Satcherri) ရှိ ULFA ၏ စခန်းတစ်ခုတွင် အာသံ (Asam) ပြည်နယ် ရဲတပ်ဖွဲ့၏ အထူးတပ်ဖွဲ့က စေလွှတ်ခဲ့သူတစ်ဦးသည်  ဘာရူအာကို လုပ်ကြံရန် ကြိုးပမ်းခဲ့ကြောင်း ဖော်ပြခဲ့သည်။

ထိုပထမအကြိမ် လုပ်ကြံသတ်ဖြတ်ရန် ကြိုးပမ်းမှုတွင် ဘာရူအာသည် ထိုစခန်းမှ ထွက်ပြေးလွတ်မြောက်ခဲ့သည်။

သတင်းထောက် ရာဂျိဗ် ဘာတာချာယာ စာအုပ် သတင်းစာ ရှင်းလင်းပွဲ လုပ်နေစဉ် 

ဒုတိယအကြိမ် လုပ်ကြံသတ်ဖြတ်ရန် ကြိုးပမ်းမှုကို ဘင်္ဂလားဒေ့ရှ်နိုင်ငံရှိ ရာဇဝတ်ဂိုဏ်းတစ်ခုနှင့် ဆက်နွှယ်မှုရှိ သည့် အာသံပြည်နယ်၏ ထိပ်သီးရဲအရာရှိတစ်ဦးက ပြုလုပ်ခဲ့ခြင်းဖြစ်သော်လည်း အောင်မြင်မှုမရှိခဲ့ဟု ဆိုသည်။

ထိုရဲအရာရှိသည် ULFA အဖွဲ့ထဲသို့ ထည့်သွင်းထားသည့် သူလျှိုတစ်ဦးဖြစ်သည့် မူနာ မီရှာရာ (Munna Mishra) ကို ဘင်္ဂလားဒေ့ရှ်နိုင်ငံအတွင်းသို့ဝင်ပြီး ဘာရူအာကို ပစ်မှတ်ထားရန် စည်းရုံးသွေးဆောင်ခဲ့သည်ဟု ထိုစာအုပ်တွင် ဖော်ပြထားသည်။

ထို့နောက် တတိယအကြိမ်မြောက် လုပ်ကြံသတ်ဖြတ်ရန် ကြိုးပမ်းမှုတွင်လည်း မီရှာရာသည် ဘင်္ဂလားဒေ့ရှ်နိုင်ငံ အတွင်း ဝင်ရောက်ပြီးနောက် ရဲတပ်ဖွဲ့၏ ဖမ်းဆီးခြင်းကို ခံခဲ့ရသဖြင့် အောင်မြင်ခဲ့ခြင်းမရှိခဲ့ပေ။

သို့သော် မီရှာရာသည် ဒါကာ (Dakha) မြို့တော်ရှိ အိန္ဒိယမဟာမင်းကြီးရုံးမှ ထိပ်သီးအရာရှိတစ်ဦး၏ ကူညီပေးမှု ဖြင့် ပြန်လည်လွတ်မြောက်ခဲ့သည်။

စတုတ္ထအကြိမ်မြောက် လုပ်ကြံသတ်ဖြတ်ရန် ကြိုးပမ်းမှုသည် ဒါကာမြို့တော်တွင်ဖြစ်သည်။

ဒါကာမြို့တော်တွင် ဘာရူအာသည် လူစည်ကားသည့် နေရာတစ်ခု၌ ကားဖြင့် ခရီးသွားနေစဉ် လူတစ်ဦးက ကျောက်ခဲဖြင့် ပစ်ပေါက်ခဲ့သော်လည်း ကား၏ လေကာမှန်ကိုသာထိမှန်ပြီး မှန်ကွဲသွားခဲ့သော်လည်း ဘာရူအာ သည် အသက်အန္တရာယ်မရှိဘဲ လွတ်မြောက်ခဲ့သည်ဟု ဘာတာချာယာ၏ စာအုပ်တွင် ဖော်ပြခဲ့သည်။

Source: Northeast Now

CNI International News 

ဘန်ကောက်၊ ဖေဖော်ဝါရီ ၁၄

အကျဉ်းချခံထားရသည့် ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) သည် ဖေဖော်ဝါရီ ၁၈ ရက်နေ့တွင် အကျဉ်းထောင်မှ ပြန်လည်လွတ်မြောက်လာလိမ့်မည်ဟု Thai PBS World မှ ဖော်ပြခဲ့သည်။

သက်ဆင်သည် ခံဝန်ဖြင့် ပြန်လည်လွတ်မြောက်ခွင့် ရရှိသည့် အကျဉ်းသား ၉၃၉ ဦးတွင် ပါဝင်ခဲ့သည်ဟု ထိုင်း တရားရေးဝန်ကြီး တာဝီဆော့ဒွန် (Tawee Sodsong)က ဖေဖော်ဝါရီ ၁၃ ရက်၌ ပြောကြားခဲ့သည်။

ထိုကဲ့သို့ ခံဝန်ဖြင့် ပြန်လည်လွတ်မြောက်ခွင့်ရရှိသည့် စာရင်းတွင် ပါဝင်သည့် အကျဉ်းသားများကို ယခင် ကတည်းက အတည်ပြုခဲ့ပြီးဖြစ်သည်ဟု တာဝီက ပြောသည်။

ထိုင်း တရားရေးဝန်ကြီး တာဝီဆော့ဒွန်ကို တွေ့ရစဉ်

၎င်းက “စာရိတ္တပြန်လည်ပြုပြင်ထိန်းရေးဌာနဟာ ခံဝန်နဲ့ ပြန်လည်လွတ်မြောက်ခွင့်ပေးမယ့် အကျဉ်းသားစာရင်း ကို အဆိုပြုခဲ့ပါတယ်။ အဲဒီ အကျဉ်းသား ၉၄၅ ဦးထဲက ၉၃၀ ဟာ ဖျားနာသူတွေ၊ ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ ချွတ်ယွင်းသူတွေနဲ့ အသက် ၇၀ ကျော် အရွယ်တွေဖြစ်ပြီး ခံဝန်နဲ့ပြန်လွတ်ခွင့်ရဖို့ စံသတ်မှတ်ချက်တွေနဲ့ ပြည့်စုံ သူတွေဖြစ်ပါတယ်” ဟု ပြောသည်။

အသက် ၇၄ နှစ်အရွယ် သက်ဆင်သည် ဆိုးရွားစွာ နာမကျန်းဖြစ်နေပြီး ရဲတပ်ဖွဲ့ အထွေထွေဆေးရုံတွင် ဆေးဝါးကုသမှုခံယူနေရသည်။ 

သူသည် ပြီးခဲ့သည့်နှစ် ဩဂုတ်လက အကျင့်ပျက်ခြစားမှု စွဲချက်များဖြင့် အကျဉ်းကျခံခဲ့ရသော်လည်း အကျဉ်းထောင်တွင် နာရီအနည်းငယ်သာ နေထိုင်ခဲ့ရကာ ဆေးရုံသို့ ပို့ဆောင်ခံခဲ့ရသည်။

အာဏာရ ဖြူးထိုင်းပါတီခေါင်းဆောင် ပေတုန်တန် ရှင်နာဝပ် (Paetongtarn Shinawatra) ကမူ ၎င်းတို့မိသားစု သည် သက်ဆင်ကို ထောင်မှလွတ်မြောက်ပြီးနောက်ပိုင်း သက်ဆင်အတွက် ချန်ဆွန်လာ (Chansongla) နေအိမ် တွင် နေထိုင်နိုင်ရန် ပြင်ဆင်ပေးထားကြောင်း ပြောကြားခဲ့သည်။

Source: Thai PBS World

CNI International News

ဂျေရုဆလင်၊ ဖေဖော်ဝါရီ ၁၃

ဂါဇာကမ်းမြောင်ဒေသတွင် ဖြစ်ပွားနေသည့်် အစ္စရေးနှင့် ဟားမာ့စ် စစ်ပွဲကြောင့် အစ္စရေးနှင့် အီဂျစ်အကြား ဆယ်စုနှစ်များစွာ ကြာမြင့်ခဲ့သည့် ငြိမ်းချမ်းရေးသဘောတူစာချုပ်သည် ပျက်ပြယ်ဖွယ်ရှိနေသည်ဟု အေပီမှ ဖော်ပြခဲ့သည်။ 

အီဂျစ်နှင့် အစ္စရေးသည် အမေရိကန်သမ္မတ ဂျင်မီကာတာ (Jimmy Carter) လက်ထက်က ငြိမ်းချမ်းရေး သဘောတူညီမှု ရရှိခဲ့ခြင်းဖြစ်သည်။ 

ထိုစဉ်အချိန်က အီဂျစ်သမ္မတ အန်ဝါဆာဒက် (Anwar Sadat) နှင့် အစ္စရေးဝန်ကြီးချုပ် မီနာချမ် ဘီဂင် (Menachem Begin) တို့သည် အမေရိကန်နိုင်ငံ၊ မေရီလန်း (Maryland) ပြည်နယ်ရှိ Camp David စစ်စခန်းတွင် ငြိမ်းချမ်းရေးသဘောတူညီမှုရရှိခဲ့ပြီး လက်ဆွဲနှုတ်ဆက်ခဲ့ကြသည်။

ဒေသတွင်း တည်ငြိမ်ရေးအတွက် အဓိကကျခဲ့သည့် ထိုငြိမ်းချမ်းရေး သဘောတူစာချုပ်သည် နှစ်ပေါင်း ၄၀ ကျော် ကြာမြင့်ခဲ့ပြီဖြစ်သော်လည်း ယခုအခါတွင် အစ္စရေးနှင့် ဟားမာ့စ်အကြား စစ်ပွဲဖြစ်ပွားမှုနှင့်အတူ ထိုငြိမ်းချမ်းရေး သဘောတူညီချက်လည်း ပျက်ပြယ်ဖွယ် ရှိလာခဲ့သည်ဟု ကျွမ်းကျင်သူများက ပြောကြားခဲ့သည်။

အစ္စရေးဝန်ကြီးချုပ် ဘင်ဂျမင် နေတန်ယာဟု (Benjamin Netanyahu) က အီဂျစ်နှင့် နယ်စပ်ချင်း ထိစပ်နေသည့် ဂါဇာဒေသ၏ ရာဖာ (Rafah) မြို့အတွင်းသို့ စစ်သားများ စေလွှတ်ခဲ့ချိန်မှစပြီး အစ္စရေးနှင့် အီဂျစ်အကြား ငြိမ်းချမ်းရေးစာချုပ်သည် ယိမ်းယိုင်လာခဲ့ခြင်းဖြစ်သည်။

အစ္စရေးနှင့် အီဂျစ် ငြိမ်းချမ်းရေးလက်မှတ်ထိုးစဉ်

အီဂျစ်အစိုးရကိုယ်တိုင်ကလည်း အစ္စရေးနှင့် ငြိမ်းချမ်းရေး သဘောတူညီချက် ပျက်ပြယ်နိုင်ခြေရှိကြောင်း ခြိမ်းခြောက်ခဲ့သည်။ 

အီဂျစ်နှင့် အစ္စရေးအကြား အကြီးစား စစ်ပွဲ ၄ ကြိမ် ဖြစ်ပွားခဲ့ပြီး နောက်ဆုံးအကြိမ် ဖြစ်ပွားခဲ့သည့် စစ်ပွဲမှာ ၁၉၇၃ ခုနှစ်က ဖြစ်သည်။

ထို့နောက် အီဂျစ်သမ္မတ အန်ဝါဆာဒက်သည် အခြားအာရပ် ခေါင်းဆောင်များနှင့် ဆွေးနွေးခဲ့ပြီးနောက် အစ္စရေး နှင့် ပြန်လည် စေ့စပ်ညှိနှိုင်းရန် ဆုံးဖြတ်ခဲ့သဖြင့် ကမ္ဘာကို အံ့အားသင့်စေခဲ့သည်။ 

ဆွေးနွေးပွဲများကို ၁၉၇၈ ခုနှစ်၊ စက်တင်ဘာလတွင် ပြုလုပ်ခဲ့ပြီးနောက် ၁၉၈၉ ခုနှစ်တွင် အီဂျစ်နှင့် အစ္စရေး အကြား ငြိမ်းချမ်းရေးသဘောတူစာချုပ် ချုပ်ဆိုနိုင်ခဲ့ခြင်း ဖြစ်သည်။

Source: အေပီ

CNI International News

ဝါဆော၊ ဖေဖော်ဝါရီ ၁၃ 

အမေရိကန်သမ္မတဟောင်း ဒေါ်နယ်ထရမ့် (Donald Trump) သည် အမေရိကန်စစ်သားများနှင့် မဟာမိတ်များ၏ လုံခြုံရေးကို အန္တရာယ်ဖြစ်စေရန် လုပ်ဆောင်နေသည်ဟု နေတိုးအဖွဲ့အကြီးအကဲက ပြောကြားခဲ့ကြောင်း အေပီမှ ဖော်ပြခဲ့သည်။

ရုရှားသည် နေတိုးအဖွဲ့ဝင်များအပေါ် ၎င်းတို့ လုပ်ချင်တာမှန်သမျှကို လုပ်ဆောင်နိုင်စွမ်းရှိသင့်သည်ဟု ထရမ့်က ပြောကြားခဲ့ပြီးနောက် နေတိုးအတွင်းရေးမှူးချုပ် ဂျန်းစ်စတိုတန်ဘာ့ချ် (Jens Stoltenberg)က အထက်ပါအတိုင်း ပြောကြားခဲ့ခြင်းဖြစ်သည်။ 

"မဟာမိတ်နိုင်ငံတွေအကြား အချင်းချင်း ကာကွယ်မပေးဘူးဆိုတဲ့ မှတ်ချက်စကားတွေဟာ အမေရိကန် အပါအဝင် ကျနော်တို့ရဲ့ လုံခြုံရေးကို လျော့ပါးစေနိုင်ပြီး အမေရိကန်နဲ့ ဥရောပစစ်သားတွေကို အန္တရာယ်ရှိ စေနိုင်ပါတယ်" ဟု စတိုတန်ဘာ့ချ်က ပြောသည်။

တောင်ကာရိုလိုင်းနား (South Carolina) ပြည်နယ်၊ ကွန်းဝေး (Conway) မြို့တွင် ဖေဖော်ဝါရီ ၁၀ ရက်က ပြုလုပ်ခဲ့သည့်် လူထုတွေ့ဆုံပွဲမှာ အပြစ်ကျူးလွန်သော နေတိုးမဟာမိတ်အဖွဲ့ဝင်များ၏ အရေးကိစ္စ၌ ရုရှားသည် ၎င်းတို့ဆန္ဒရှိသလို လုပ်ဆောင်ရန် တိုက်တွန်းသွားမည်ဖြစ်ကြောင်း ထရမ့်က ပြောသည်။

 နေတိုးအတွင်းရေးမှူးချုပ် ဂျန်းစ်စတိုတန်ဘာ့ချ်နဲ့ ဒေါ်နယ်ထရမ့်ကို တွေ့ရစဉ်

ထိုစကားကို ထရမ့်သည် သမ္မတတာဝန်ယူစဉ်အခါက နေတိုးအဖွဲ့ဝင် နိုင်ငံတစ်နိုင်ငံကို ပြောကြားခဲ့ဖူးကြောင်း ပြန်လည် ပြောပြခဲ့သည်။

"သင်အပြစ်လုပ်ထားရင် ပြန်ပေးဆပ်ရမှာပဲလေ။ ကျနော်က ကာကွယ်ပေးမှာ မဟုတ်ပါဘူး။ အဲဒီအစား (ရုရှားကို) ဆန္ဒရှိသလို လုပ်ဖို့ ကျနော်က တိုက်တွန်းသွားဦးမှာပါ။ သင်လုပ်ခဲ့တာအတွက် သင်ပြန်ပေးဆပ်ရမယ်လေ" ဟု ထရမ့်က ပြောကြားခဲ့သည်။

ထရမ့်၏ မှတ်ချက်စကားများကြောင့် ပြီးခဲ့သည့်် ရာစုနှစ်များအတွင်း ရုရှား၏ ထိန်းချုပ်မှုကို ခံခဲ့ရသည့် ပိုလန်နိုင်ငံ ကို စိုးရိမ်မှုများ မြင့်တက်စေခဲ့ပြီး ပိုလန်နှင့် နယ်စပ်ချင်း ထိစပ်နေသော ယူကရိန်းတွင် ဖြစ်ပွားနေသည့် ရုရှား၏ စစ်ပွဲဆင်နွှဲမှုအပေါ် ပူပင်သောကများ ထွက်ပေါ်စေခဲ့သည်။

"ကျနော်တို့ရဲ့ နယ်စပ်ဒေသက အခြေအနေက စစ်ဖြစ်မယ့် အန္တရာယ်နဲ့ ရင်ဆိုင်နေရပါတယ်" ဟု ပိုလန် ဝန်ကြီးချုပ် ဒေါ်နယ်တာ့စ် (Donald Tusk) က ဖေဖော်ဝါရီ ၁၁ ရက်တွင် ပြောကြားခဲ့သည်။

ထို့ပြင် ဥရောပသမဂ္ဂသည် ကာကွယ်ရေးကဏ္ဍကို အာရုံစိုက်လာမည်ဆိုပါက စီးပွားရေးနှင့် ယဉ်ကျေးမှုကဏ္ဍ တို့တွင် အားနည်းသွားနိုင်ကြောင်း၊ အဘယ်ကြောင့်ဆိုသော် ကမ္ဘာကြီးသည် ပြောင်းလဲနေခြင်းကြောင့်ဖြစ်ကြောင်း တာ့စ်က ပြောကြားခဲ့သည်။

Source: အေပီ

CNI International News

ဂျာကာတာ၊ ဖေဖော်ဝါရီ ၁၃

အင်ဒိုနီးရှားနိုင်ငံတွင် ရာထူးမှ ထွက်ခွာရတော့မည့် သမ္မတ ဂျိုကိုဝီဒိုဒို (Joko Widodo)သည် အာဏာအလွဲသုံးစား လုပ်ပြီး ယခုသီတင်းပတ်၌ ကျင်းပမည့် ရွေးကောက်ပွဲကို ဝင်ရောက်စွက်ဖက်ရန် ကြိုးပမ်းနေသည်ဆိုသည့် စွပ်စွဲချက်ဖြင့် ရာနှင့်ချီသည့် ကျောင်းသားများက စုရုံးဆန္ဒပြခဲ့ကြသည်ဟု ရိုက်တာမှ ဖော်ပြခဲ့သည်။

အင်ဒိုနီးရှားနိုင်ငံတွင် ဖေဖော်ဝါရီ ၁၄ ရက်၌ ကျင်းပမည့် ရွေးကောက်ပွဲ၌ အင်ဒိုနီးရှားကာကွယ်ရေးဝန်ကြီး ပရာဘိုဝို ဆူဘီယန်တို (Prabowo Subianto)က အနိုင်ရရှိရန် ရေပန်းစားနေပြီး ဝီဒိုဒို၏ အစိုးရအဖွဲ့သည် မဲဆန္ဒရှင်များကို လွှမ်းမိုးခြယ်လှယ်ရန် ကြိုးပမ်းနေသည်ဟု ကျောင်းသားများက စွပ်စွဲခဲ့သည်။

ဝီဒိုဒိုသည် ထိုရွေးကောက်ပွဲတွင် ၎င်း၏ သားအကြီးဆုံးနှင့်အတူ ရွေးကောက်ပွဲ ဝင်ရောက်ယှဉ်ပြိုင်မည့် ပရာဘိုဝို ဘက်မှ ထောက်ခံကြောင်း လူသိရှင်ကြား ဖော်ပြခဲ့ပြီး ကျန်သည့် ကိုယ်စားလှယ်လောင်းသုံးဦးကိုမူ ထောက်ခံ ကြောင်း ဖော်ပြခဲ့ခြင်း မရှိပေ။

ရွေးကောက်ပွဲစွက်ဖက်၍ သမ္မတဂျိုကိုဝီဒိုဒိုကို ဆန္ဒပြနေကြစဉ်

ဘရာဘိုဝိုသည် ရွေးကောက်ပွဲတွင် သမ္မတ ကိုယ်စားလှယ်လောင်းအဖြစ် ဝင်ရောက်ယှဉ်ပြိုင်မည်ဖြစ်ပြီး ၎င်း၏ တွဲဖက်ကိုယ်စားလှယ်လောင်းဖြစ်သည့် ဝီဒိုဒို၏ သားဖြစ်သူ ဂစ်ဘရန် ရာကာဘူမင် ရက်ကာ (Gibran Rakabuming Widodo) ကမူ ဒုတိယသမ္မတ နေရာအတွက် ဝင်ရောက်ယှဉ်ပြိုင်မည် ဖြစ်သည်။

ပြီးခဲ့သည့် သီတင်းပတ်အတွင်းက ကျင်းပခဲ့သည့် ရွေးကောက်ပွဲအကြို လူထုသဘောထားဆန္ဒ ကောက်ယူမှု စစ်တမ်းနှစ်ခုတွင် ပရာဘိုဝိုသည် ရွေးကောက်ပွဲ၌ အနိုင်ရရှိရန် မဲရလဒ် ၅၀ ရာခိုင်နှုန်းကျော် ရရှိခဲ့ပြီး ပြိုင်ဘက် များဖြစ်သည့် အန်နိစ် ဘက်စ်ဝက်ဒန် (Anies Baswedan) နှင့် ဂန်ဂျာ ပရာနိုဝို (Ganjar Pranowo) တို့က မဲရလဒ် ၂၇ ရာခိုင်နှုန်းနှင့် ၃၁ ရာခိုင်နှုန်း အသီးသီးရရှိခဲ့သည်။

မဲဆန္ဒရှင်အချို့ကမူ ရွေးကောက်ပွဲတွင် သမ္မတဝီဒိုဒို၏ ကြားနေရပ်တည်မှု ယိမ်းယိုင်နေမှုကို ဝေဖန်နေပြီး ကိုယ်စားလှယ်လောင်း တစ်ဦးတည်းကိုသာ အသားပေး ထောက်ခံနေမှုသည် အင်ဒိုနီးရှား၏ ဒီမိုကရေစီကို လျော့ပါးစေကြောင်း ပြောကြားခဲ့သည်။

 ရွေးကောက်ပွဲစွက်ဖက်၍ သမ္မတဂျိုကိုဝီဒိုဒိုကို ဆန္ဒပြနေကြစဉ်

ဆန့်ကျင်ဆန္ဒပြသူများသည် ဖေဖော်ဝါရီ ၁၂ ရက်က ဂျာဗား(Java)ကျွန်း၏ ယော့ဂ်ယာကာတာ (Yogyakarta) မြို့တွင် စုရုံးခဲ့ကြပြီး ဝါးဖြင့်ပြုလုပ်ထားသည့် တူရိယာများကို တီးခတ်ခဲ့ကာ ဝီဒိုဒိုကို ဆန့်ကျင်သော လက်ကိုင် ပိုစတာများအား ကိုင်ဆောင်ခဲ့ကြသည်။

"တစ်ချိန်တုန်းကတော့ ဝီဒိုဒိုကို မျှော်လင့်ချက် အသစ်တစ်ခုအဖြစ် ခေါ်ဆိုခဲ့ကြပါတယ်။ အခုတော့ သူ့ကို ကျနော် တို့က ဘေးအန္တရာယ်အသစ်လို့ ခေါ်ဆိုချင်ပါတယ်" ဟု ဆန္ဒပြသူတစ်ဦးက ပြောကြားခဲ့သည်။ 

ထိုဆန္ဒပြမှုကို စီစဉ်ခဲ့သည့် အက်ခ်စီ ဂျီဂျာယန် မီမန်ဂျီလ် (Aksi Gejayan Memanggil) ကမူ ဝီဒိုဒို၏ ကျင့််ဝတ် သိက္ခာပိုင်းနှင့် စာရိတ္တပိုင်း ချိုးဖောက်မှုများက သူသည် ပြည်သူ့အသံများကို ဆန့်ကျင်သူဖြစ်ကြောင်း ပြသရာ ရောက်သည်ဟု Instagram လူမှုမီဒီယာတွင် ပြောကြားခဲ့သည်။

Source: ရိုက်တာ

CNI International News

အင်ဖာ၊ ဖေဖော်ဝါရီ ၁၀

အိန္ဒိယ-မြန်မာနယ်စပ်အနီးရှိ မဏိပူရ်ပြည်နယ်၏ တောင်ဘက်ခြမ်းဒေသများကို ဗဟိုနှင့်ပြည်နယ် လုံခြုံရေး တပ်ဖွဲ့များက ရှာဖွေမှုစစ်ဆင်ရေးများ ပြုလုပ်ခဲ့ရာတွင် ငွေစက္ကူအတုများ၊ စစ်ပွဲတွင်အသုံးပြုသည့် လက်နက်များ၊ ခဲယမ်းများနှင့် ဖောက်ခွဲရေးပစ္စည်းများကို ရှာဖွေတွေ့ရှိခဲ့သည်ဟု Northeast Now မှ ဖော်ပြခဲ့သည်။

မဏိပူရ်ပြည်နယ်ရှိ ကူကီးလူမျိုးစုများ အများဆုံးနေထိုင်သည့် ချူရာချန်ပူရ (Churachandpur)ခရိုင်၏ ဒမ်ပီ (Dampi) ကျေးရွာရှိ စစ်သွေးကြွများ၏ စခန်းတစ်ခုကို မဏိပူရ်ပြည်နယ် ရဲတပ်ဖွဲ့နှင့် အာသံရိုင်ဖယ်တပ်ဖွဲ့တို့က ပူးပေါင်းရှာဖွေခဲ့ချိန်တွင် ၂၀၀ တန် ရင်းဂစ်ငွေစက္ကူ ခြောက်ရွက်ကို တွေ့ရှိခဲ့သည်ဟု ဆိုသည်။

ထို့ပြင် မဏိပူရ်ပြည်နယ်၏ ကူကီးလူမျိုးစုများ ကြီးစိုးသည့် တန်နျူပယ်(Tengnoupal)ခရိုင်၏ ပီလိုင်ဂျန် (P Laijang) ကျေးရွာတွင် မိုရေး(Moreh) ရဲစခန်း၏ ညွှန်ကြားချက်ဖြင့် ထိုပူးပေါင်းတပ်ဖွဲ့က ရှာဖွေမှုများ ပြုလုပ်ခဲ့ သည်။

ထိုရှာဖွေမှု စစ်ဆင်ရေးများအတွင်း ၄၀ မမ လက်လုပ်ပိုက်သေနတ် အများအပြား၊ ပြည်တွင်းလုပ် လက်ပစ်ဗုံး ၅ လုံး၊ ပြောင်း ၂ ခုပါဝင်သည့် ၁၂ မမ သေနတ် ၂ လက်နှင့် ကျည်ဆန် ၃ တောင့်၊ ၉ မမ ပစ္စတိုတစ်လက်၊ PT 303 ရိုင်ဖယ်တစ်လက်၊ ၇ ဒသမ ၆၂ မမ ကျည်ဆန် ၂ တောင့်၊ ၆ ပေ အရှည်ရှိ လက်လုပ် တာဝေးပစ် မော်တာ တစ်လက်နှင့် မော်တာကျည် ၂ တောင့်၊ ရင်းဂစ် ၁၂၀၀ တန်ဖိုးရှိ ငွေစက္ကူအတုများ၊ ဖိနပ်တစ်စုံနှင့် အိတ်တစ်လုံး တို့ကို တွေ့ရှိခဲ့သည်ဟု တာဝန်ရှိသူများက ပြောကြားခဲ့သည်။

Source: Northeast Now

CNI International News

မော်စကို၊ ဖေဖော်ဝါရီ ၁၀

ရုရှားနိုင်ငံအနေဖြင့် မိမိတို့၏ အကျိုးစီးပွားများအတွက် အဆုံးအထိ တိုက်ခိုက်သွားမည် ဖြစ်သော်လည်း ယူကရိန်း စစ်ပွဲကို ချဲ့ထွင်ပြီး ပိုလန်နှင့် လစ်ဗီးယားနိုင်ငံတို့ကို တိုက်ခိုက်ရန် စိတ်မဝင်စားကြောင်း ရုရှားသမ္မတ ပူတင် (Vladimir Putin) က ပြောကြားခဲ့သည်ဟု ရိုက်တာမှ ဖော်ပြခဲ့သည်။

ပူတင်သည် ဖေဖော်ဝါရီ ၈ ရက်က ထုတ်လွှင့်ခဲ့သည့် အမေရိကန်သတင်းထောက် တပ်ကာ ကာလ်ဆန် (Tucker Carlson) နှင့် ပြုလုပ်သည့် အင်တာဗျူးတွင် ထိုကဲ့သို့ ပြောကြားခဲ့ခြင်းဖြစ်သည်။

ထိုအင်တာဗျူးသည် ယူကရိန်းကို ဝင်ရောက် တိုက်ခိုက်ပြီးနောက်ပိုင်း ပူတင်အတွက် အမေရိကန် သတင်းထောက်တစ်ဦးနှင့် ပထမဆုံးပြုလုပ်သည့် အင်တာဗျူးဖြစ်သည်။

ရုရှားကို မဟာဗျူဟာမြောက် အနိုင်ရရှိရန် မဖြစ်နိုင်ကြောင်း အနောက်နိုင်ငံများမှ ခေါင်းဆောင်များက နားလည် သဘောပေါက်လာကြပြီး ရုရှား နောက်ထပ် လုပ်ဆောင်မည့် အစီအစဉ်များကို သိချင်နေကြကြောင်း ပူတင်က ပြောသည်။

"ကျနော်တို့ဘက်က ဆွေးနွေးဖို့ အသင့်ပါပဲ" ဟု ရုရှားသမ္မတက ပြောသည်။

ထို့ပြင် ရုရှားနိုင်ငံတွင် တစ်နှစ်နီးပါးကြာ ဖမ်းဆီးထိန်းသိမ်းခံထားရပြီး သူလျှိုမှုစွဲချက်များဖြင့် တရားရင်ဆိုင်ရန် စောင့်ဆိုင်းနေသည့် Wall Street Journal မှ အမေရိကန် သတင်းထောက် အီဗန် ဂျာရှ်ကိုဗစ် (Evan Gershkovich) ပြန်လွှတ်ပေးရန် သဘောတူညီမှု ရရှိရေးသည် ဖြစ်နိုင်သည်ဟု ယုံကြည်ကြောင်း ပူတင်က ပြောသည်။

ရုရှားအနေဖြင့် နေတိုးအဖွဲ့ဝင်ဖြစ်သည့် ပိုလန်နိုင်ငံကို ရုရှားစစ်သားများ စေလွှတ်မည့် စိတ်မှန်းဖြစ်နိုင်ခြေနှင့် ပတ်သက်ပြီး မေးမြန်းခံရချိန်တွင် ပူတင်က "တစ်ခုတော့ ရှိပါတယ်။ ပိုလန်က ရုရှားကို တိုက်ခိုက်ခဲ့မယ်ဆိုရင်ပေါ့။ ကျနော်တို့ဟာ ပိုလန်၊ လစ်ဗီးယားနဲ့ အခြားနိုင်ငံတွေကို တိုက်ခိုက်ဖို့ စိတ်မဝင်စားပါဘူး။ ဘာလို့ တိုက်ရမှာလဲ။ စိတ်မဝင်စားပါဘူး" ဟု ပြန်လည် ဖြေကြားခဲ့သည်။

၂ နာရီခန့် ကြာမြင့်ခဲ့သည့် ထိုအင်တာဗျူးတွင် ပူတင်သည် ရုရှားဘာသာစကားဖြင့် ပြောကြားခဲ့ပြီး ၎င်း၏ ပြောကြားချက်များကို အင်္ဂလိပ်ဘာသာဖြင့် ဖော်ပြခဲ့သည်။

ထို့နောက် သူသည် ရုရှားနှင့် ယူကရိန်း၊ ပိုလန်၊ အခြားနိုင်ငံများအကြား ဆက်ဆံရေးများနှင့် ပတ်သက်ပြီး ရှည်လျားသည့် မှတ်ချက်များ ပြောကြားခဲ့သည်။

၂၀၂၂ ခုနှစ်၊ ဧပြီလက တူရကီနိုင်ငံ၊ အစ္စတန်ဘူလ် (Istanbul) မြို့တွင် ပြုလုပ်သည့် ဆွေးနွေးပွဲများ၌ ရုရှားနှင့် ယူကရိန်းအကြား ရန်လိုမှုများ အဆုံးသတ်ရန် သဘောတူညီမှု ရလုနီးပါးရှိခဲ့ကြောင်း၊ သို့သော် ယူကရိန်း၏ မြို့တော် ကိယက်ဗ် (Kyiv) အနီးမှ ရုရှားတပ်ဖွဲ့များ ရုပ်သိမ်းသွားချိန်တွင် ယူကရိန်းဘက်မှ သဘောတူညီမှုကို ကျောခိုင်းသွားခဲ့ကြောင်း ပူတင်က ပြောသည်။

"အခုတော့ အခြေအနေတွေ ဘယ်လိုဖြစ်လာပြီလဲဆိုတာ သူတို့သိလာပါပြီ။ အဲဒီသဘောတူညီချက်ကို ကျနော်တို့ မဆန့်ကျင်ခဲ့ပါဘူး။ အဲဒီအခြေအနေ အတွက်လည်း ဝမ်းမနည်းပါဘူး။ ယူကရိန်းမှာ မဆုံးနိုင်တဲ့ စစ်စည်းရုံးမှုတွေ၊ ဆောက်တည်ရာမရဖြစ်မှုတွေ၊ ပြည်တွင်းရေး ပြဿနာတွေကြောင့်် အနှေးနဲ့အမြန်ဆိုသလို သဘောတူညီချက် တစ်ခု ရလာပါလိမ့်မယ်" ဟု ပူတင်က ပြောကြားခဲ့သည်။

Source: ရိုက်တာ