CNI International News

ဘန်ကောက်၊ သြဂုတ် ၁၂

ထိုင်းနိုင်ငံတောင်ပိုင်းရှိ သူပုန်များသည် ကားဗုံးဖောက်ခွဲ တိုက်ခိုက်ရန်အတွက် ခိုးယူထားသော ကားများအစား အငှားမော်တော်ယာဉ်များကို ပြောင်းလဲအသုံးပြုလာကြသည်ဟု ထိုင်းတောင်ပိုင်းအခြေစိုက် အမှတ် ၄ စစ်တပ် အထူး ဒေသတပ်ဖွဲ့၏ တပ်မှူး ဒုတိယဗိုလ်ချုပ်ကြီး ဆန်တီဆာခွန်တာနက်(Santi Sakuntanark)က ပြောကြားခဲ့ ကြောင်းThai PBS World မှ ဖော်ပြခဲ့သည်။

ပတ္တာနီ (Pattani) မြို့၏ မူအန်း (Mueang) ရပ်ကွက် ငါးဖမ်းဆိပ်ခံတံတား တစ်ခုသို့သွားသော လမ်းပေါ်တွင် သြဂုတ် ၈ ရက်က ကားဗုံးဖောက်ခွဲ တိုက်ခိုက်မှုဖြစ်ပွားခဲ့သည်။

ထိုတိုက်ခိုက်မှုတွင် အသုံးပြုထားသော ကားသည် ဆောင်ခလာ(Songkhla) မြို့ လိုင်စင်နံပါတ်ပြားနှင့်အတူ ဆူဖန်ဘူရီ(Suphan Buri) ပြည်နယ်၏ ဘန်ပလာမာ (Bang Pla Ma) ခရိုင်တွင် နေထိုင်သည့် အမျိုးသားတစ်ဦး ထံမှ ငှားရမ်းထားခြင်း ဖြစ်သည်ဟု ၎င်းက ပြောသည်။

တောင်ပိုင်းအခြေစိုက် အမှတ် ၄ စစ်တပ် အထူး ဒေသတပ်ဖွဲ့၏ တပ်မှူး ဒုတိယဗိုလ်ချုပ်ကြီး ဆန်တီဆာခွန်တာနက်ကို တွေ့ရစဉ်

လုံခြုံရေးအရာရှိများက ခိုးယူထားသောကားများကို ရှာဖွေနေမှု အပါအဝင် ထိုင်းနိုင်ငံ၏ တောင်ပိုင်းပြည်နယ် သုံးခုရှိ စီးပွားရေး အချက်အချာ ဒေသများတွင် လုံခြုံရေး တိုးမြင့်ချထားမှုသည် သူပုန်များအား ခိုးယူထားသော ကားများကို အသုံးပြု၍ ကားဗုံးဖောက်ခွဲအား အကြပ်တွေ့စေမည်ဖြစ်သလို အရင်းအမြစ်အသစ်များ ရှာဖွေရန် တွန်းအားတစ်ခု ဖြစ်စေလိမ့်မည်ဟု ဆာခွန်တာနက်က ပြောကြားခဲ့သည်။

ပတ္တာနီတွင် သြဂုတ် ၈ ရက်က ပေါက်ကွဲမှုဖြစ်စဉ် သုံးခုဖြစ်ပွားခဲ့ပြီး ဖြတ်သန်းသွားလာသူတစ်ဦး ထိခိုက်ဒဏ်ရာ ရရှိကြောင်း သတင်းအရင်းအမြစ်တစ်ခုက ပြောကြားခဲ့သည်။

ထိုတိုက်ခိုက်မှုသည် ယခုသီတင်းပတ်အတွင်း ယာလာ (Yala) ပြည်နယ်တွင် သူပုန် ၃ ဦးကို သတ်ဖြတ်မှုအတွက် လက်စားချေ တိုက်ခိုက်မှု ဖြစ်စဉ်ဖြစ်ကြောင်း ၎င်းက ပြောကြားခဲ့သည်။

Source-Thai PBS World

CNI International News

ကာရာကက်စ်၊ သြဂုတ် ၁၂

အငြင်းပွားဖွယ် ဇူလိုင် ၂၈ ရက်နေ့က ကျင်းပခဲ့သော သမ္မတရွေးကောက်ပွဲအပေါ် အတိုက်အခံညွန့်ပေါင်းအဖွဲ့မှ သက်သေတင်သွင်းရန် ပျက်ကွက်ကြောင်း ဗင်နီဇွဲလားတရားရုံးချုပ်က သြဂုတ် ၁၀ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထို့ပြင် ဗင်နီဇွဲလားတရားရုံးချုပ်က အနိုင်ရရှိသူကို အဆုံးအဖြတ်ပေးရာတွင် ၎င်း၏ဆုံးဖြတ်ချက်သည် အတည်ဖြစ် မည်ဟု သတိပေးပြောကြားခဲ့သည်။

ဗင်နီဇွဲလားရွေးကောက်ပွဲအာဏာပိုင်အဖွဲ့က ရွေးကောက်ပွဲတွင် သမ္မတမာဒူရို( Nicolas Maduro) အနိုင်ရရှိခဲ့ သည်ဟု ပြောကြားခဲ့သော်လည်း အတိုက်အခံအဖွဲ့ကမူ ရွေးကောက်ပွဲအာဏာပိုင်အဖွဲ့သည် မာဒူရို၏ သစ္စာခံ များဟုဆိုကာ ၎င်းတို့၏ ကိုယ်စားလှယ်လောင်း အက်မွန်ဒိုဂွန်ဇာလက်(Edmundo Gonzalez)က အနိုင်ရရှိသည် ဟု ပြောကြားခဲ့သည်။

ရွေးကောက်ပွဲအာဏာပိုင်အဖွဲ့က ရွေးကောက်ပွဲမှ မဲအရေအတွက် အသေးစိတ်ကို ထုတ်ပြန်ထားခြင်း မရှိသည့် အပြင် ဇူလိုင် ၂၉ ရက် အစောပိုင်း အချိန်ကတည်းက ၎င်း၏ဝက်ဘ်ဆိုဒ် ကျသွားခဲ့သည်။

ဗင်နီဇွဲလား အတိုက်အခံ အက်မွန်ဒိုဂွန်ဇာလက်ကို တွေ့ရစဉ်

အတိုက်အခံအဖွဲ့က ၎င်း၏ မဲအရေအတွက်ကို အွန်လိုင်းတွင် တင်ခဲ့ရာ ဂွန်ဇာလက်က မာဒူရို၏ မဲအရေအတွက် ထက် နှစ်ဆပိုများနေကြောင်း တွေ့ရှိခဲ့သည်။

မာဒူရိုက ရွေးကောက်ပွဲရလဒ်များကို မှန်ကန်ကြောင်း အတည်ပြုရန် တရားရုံးချုပ်ကို တောင်းဆိုခဲ့သည့်အတွက် တရားရုံးက ကိုယ်စားလှယ်လောင်း အားလုံးကို ဆင့်ခေါ်ခဲ့သည်။

ဂွန်ဇာလက်ကမူ တက်ရောက်လာခြင်းမရှိဘဲ ၎င်းလာရောက်လျှင် ဖမ်းဆီးခံရမည့် အန္တရာယ်ရှိကြောင်း ပြောကြား ခဲ့သည်။

အတိုက်အခံ အဖွဲ့ဝင်များက မဲအရေအတွက် အတိအကျကို ထုတ်ပြန်ပေးရန် ရွေးကောက်ပွဲအာဏာပိုင်များကို ဖိအားပေးပြောကြားခဲ့သည်။

ဗင်နီဇွဲလား သမ္မတမာဒူရိုကို တွေ့ရစဉ်

"Unitary Platform(အတိုက်အခံညွန့်ပေါင်းအဖွဲ့)ရဲ့ အဖွဲ့ဝင်တွေက တရားရုံးဆီ ရွေးကောက်ပွဲနဲ့သက်ဆိုင်တဲ့ အထောက်အထားတွေကို တင်ပြတာမျိုး မရှိပါဘူး"ဟု တရားသူကြီးချုပ် ကာရစ်လာ ရိုဒရီဂုဇ်(Caryslia Rodriguez)က သတင်းထောက်များနှင့် သံတမန်များကို ပြောကြားခဲ့သည်။

တရားရုံးက မာဒူရိုနှင့် ရွေးကောက်ပွဲအာဏာပိုင်အဖွဲ့၏ မဲရေတွက်မှုများကို ရရှိခဲ့ကြောင်း ရိုဒရီဂုဇ်က ပြောသည်။

ရွေးကောက်ပွဲ စုံစမ်းစစ်ဆေးမှုကို အဆုံးသတ်သည့်နှင့်တပြိုင်နက် တရားရုံး၏ ဆုံးဖြတ်ချက်သည် အတည် ဖြစ်မည်ဟုလည်း ပြောကြားခဲ့သည်။

ဘရာဇီးလ်၊ ကိုလံဘီယာနှင့် မက္ကဆီနိုင်ငံများ၏ ပူးပေါင်းထုတ်ပြန်ချက်တွင် ရွေးကောက်ပွဲအာဏာပိုင်အဖွဲ့အား အသေးစိတ် မဲအရေအတွက်ကို လူသိရှင်ကြား ချပြပေးရန် တောင်းဆိုထားပြီး တရားရုံးချုပ်သည် ယင်းပြဿနာ အတွက် အဖြေမဟုတ်ကြောင်း ပြောကြားခဲ့သည်။

Source: ရိုက်တာ

CNI International News

မော်စကို၊ ဩဂုတ် ၁၂

ရုရှား၏ အချုပ်အခြာအာဏာပိုင် နယ်နိမိတ်ကို ယူကရိန်းက ဝင်ရောက်တိုက်ခိုက်နေပြီး နယ်စပ်ဒေသတွင် တိုက်ပွဲများ ပြင်းထန်နေချိန်၌ ရုရှားက နယ်စပ်ဒေသ ၃ ခုမှာ လုံခြုံရေးအုပ်ချုပ်မှုစနစ်ကို ကြေညာခဲ့ကြောင်း ရိုက်တာမှ ဖော်ပြခဲ့သည်။

ယူကရိန်းတပ်ဖွဲ့များသည် ဩဂုတ် ၆ ရက်ကတည်းက ရုရှားနယ်စပ်ကို ဝင်ရောက်တိုက်ခိုက်ခဲ့ပြီး ရုရှား၏ ကာ့စ် (Kursk) ဒေသ အနောက်ဘက် နယ်နိမိတ်အချို့ကို သိမ်းယူခဲ့သည်။

ယူကရိန်းအနေဖြင့် အမေရိကန်ရွေးကောက်ပွဲ အပြီးတွင် ရုရှားနှင့် အပစ်အခတ်ရပ်စဲရေး ဆွေးနွေးမှုများအတွက် ရုရှားကို ဖိအားပေးသည့်အနေဖြင့် ထိုကဲ့သို့ အံ့အားသင့်ဖွယ် ဝင်ရောက်တိုက်ခိုက်ခဲ့ခြင်း ဖြစ်နိုင်သည်ဟု ကျွမ်းကျင်သူများက ပြောသည်။

ရုရှားသမ္မတ ပူတင် (Vladimir Putin) ကမူ ယူကရိန်း၏ တိုက်ခိုက်မှုကို အကြီးစား ရန်စမှုအဖြစ် ပြောကြားခဲ့ သည်။

ကာ့ဒ်ဒေသကိုတွေ့ရစဉ်

ထို့နောက် ရုရှား၏ ထိပ်သီးဗိုလ်ချုပ်ကြီး ဗယ်လာရီ ဂရာစီမော့ဗ် (Valery Gerasionv) ကမူ ယူကရိန်း၏ ကျူးကျော်တိုက်ခိုက်မှုကို ရပ်တန့်ခဲ့ကြောင်း ပြောကြားခဲ့သည်။ 

သို့သော် ရုရှားသည် ယူကရိန်းတပ်ဖွဲ့များကို နယ်စပ်ဒေသမှ တိုက်ထုတ်နိုင်ခဲ့ခြင်းမရှိပေ။

"ရန်သူတွေကို ထပ်တက်မလာအောင် ဟန့်တားခဲ့ပါတယ်။ ဒါပေမယ့် အလုံးစုံ တိုက်ထုတ်နိုင်ခြင်းတော့ မရှိသေးပါ ဘူး။ နယ်စပ်ဒေသမှာ တိုက်ပွဲတွေ ဖြစ်နေတုန်းပါပဲ" ဟု ဆိုဗီယက်နှင့် ရုရှားစစ်တပ်တွင် ဒုတိယဗိုလ်ချုပ်ကြီး အဖြစ် တာဝန်ထမ်းဆောင်ခဲ့ပြီး လက်ရှိ အာဏာရပါတီ၏ လွှတ်တော်အမတ်တစ်ဦးဖြစ်သည့် အန်ဒရီ ဂူရူလ်ယော့ဗ် (Andrei Gurulyov) က ပြောကြားခဲ့သည်။

ရုရှားစစ်တပ်၏ ဘလော့ဂါများကမူ ရုရှားသည် ယူကရိန်းတပ်များကို အင်အားသုံးပြီး ဟန့်တားနိုင်ခဲ့ပြီးနောက် အခြေအနေကို တည်ငြိမ်အောင် ထိန်းသိမ်းနိုင်ခဲ့ကြောင်း၊ သို့သော် ယူကရိန်းသည် တပ်များကို လျှင်မြန်စွာ ပြန်လည်စုဖွဲ့နိုင်ခဲ့ပြီး တိုက်ပွဲပြင်းထန်နေကြောင်း ပြောကြားခဲ့သည်။

ဇာလန်းစကီးကိုတွေ့ရစဉ်

ဒုတိယကမ္ဘာစစ်နောက်ပိုင်း ဥရောပတွင် အပြင်းထန်ဆုံး စစ်ပွဲဖြစ်သည့် ရုရှား-ယူကရိန်း စစ်ပွဲအတွင်း ရုရှား၏ ကာ့စ်ဒေသကို တိုက်ခိုက်နိုင်ခဲ့သည့် ယူကရိန်းတပ်များ၏ စွမ်းဆောင်ရည်များနှင့် ရုရှား၏ နယ်မြေကာကွယ်နိုင်မှု စွမ်းဆောင်ရည်အပေါ် မေးခွန်းများ ထွက်ပေါ်ခဲ့သည်။

ယူကရိန်းသည် ယခင်က ထိုတိုက်ခိုက်မှုများနှင့်ပတ်သက်ပြီး တိုက်ရိုက်မှတ်ချက် မပေးခဲ့သော်လည်း ဩဂုတ် ၁၀ ရက်တွင် ယူကရိန်းသမ္မတ ဇာလန်းစကီး(Volodymyr Zelenskyy) က ရုရှား၏ နယ်စပ်ဒေသများကို ယူကရိန်း တပ်များက ထိုးစစ်ဆင် တိုက်ခိုက်နေကြောင်း ပထမဆုံးအကြိမ် ဝန်ခံပြောကြားခဲ့သည်။

"ယူကရိန်းဟာ ကျူးကျော်သူ (ရုရှား) တွေကို မဖြစ်မနေ ဖိအားပေးဖို့နဲ့ တရားမျှတမှုကို ပြန်လည်ထိန်းသိမ်း နိုင်တယ်ဆိုတာ သက်သေပြနေပါတယ်" ဟု ဇာလန်းစကီး ပြောကြားခဲ့သည်။

Source: ရိုက်တာ

CNI International News

ဝါရှင်တန်၊ ဩဂုတ် ၁၀

အမေရိကန်ရွေးကောက်ပွဲဝင် ကိုယ်စားလှယ်လောင်းများဖြစ်သည့် ရီပတ်ဘလစ်ကန် ကိုယ်စားလှယ်လောင်း ဒေါ်နယ်ထရမ့် (Donald Trump) နှင့် ဒီမိုကရက်တစ် ကိုယ်စားလှယ်လောင်း ကာမယ်လာ ဟားရစ် (Kamala Harris) တို့သည် စကားစစ်ထိုးရန် သဘောတူညီမှု ရရှိခဲ့သည်ဟု ရိုက်တာမှ ဖော်ပြခဲ့သည်။

ထရမ့်နှင့် ဟားရစ်တို့သည် စက်တင်ဘာ ၁၀ ရက်တွင် ABC ရုပ်သံ၌ ပထမဆုံးအကြိမ်အဖြစ် မျက်နှာချင်းဆိုင် စကားစစ်ထိုးမည်ဖြစ်ပြီး ထိုစကားစစ်ထိုးပွဲသည် အလွန် အကြိတ်အနယ် ရှိလိမ့်မည်ဟု စစ်တမ်းများတွင် ဖော်ပြခဲ့သည်။

ဩဂုတ် ၈ ရက် မွန်းလွဲပိုင်းတွင် ထရမ့်သည် ဟားရစ်နှင့် စကားစစ်ထိုးပွဲကိစ္စကို ပထမဆုံးအကြိမ် လူသိရှင်ကြား ထုတ်ဖော်ပြောဆိုခဲ့သည်။

စကားစစ်ထိုးပွဲများ ပြုလုပ်ရန် အလွန်အရေးကြီးသည်ဟု ယူဆထားကြောင်း၊ စက်တင်ဘာ ၄ ရက်နှင့် စက်တင်ဘာ ၂၅ ရက်တို့တွင်လည်း Fox နှင့် NBS ရုပ်သံလိုင်းများမှ ထုတ်လွှင့်မည့် နောက်ထပ် စကားစစ်ထိုးပွဲ ၂ ပွဲကို ထပ်မံပြုလုပ်လိုကြောင်း ထရမ့်က ပြောကြားခဲ့သည်။

ဟားရစ်ကို ထောက်ခံသူများအား တွေ့ရစဉ်

လွန်ခဲ့သည့် ၃ ပတ်ခန့်က ဒီမိုကရက်တစ် ရွေးကောက်ပွဲ ကိုယ်စားလှယ်လောင်း နေရာအတွက် သမ္မတဂျိုးဘိုင်ဒန် (Joe Biden) ၏နေရာကို ဟားရစ်နှင့် အစားမထိုးမီက ထရမ့်သည် ABC ရုပ်သံမှထုတ်လွှင့်မည့် စကားစစ်ထိုးပွဲကို လက်ခံမည် မဟုတ်ကြောင်း ပြောကြားခဲ့သည်။

သို့သော် ယခုအခါမှာတော့ ထရမ့်သည် စကားစစ်ထိုးပွဲပြုလုပ်ရန် သဘောတူခဲ့ခြင်းဖြစ်သည်။

ထရမ့်၏ မှတ်ချက်စကားများ ထွက်ပေးခဲ့ပြီးနောက် ဟားရစ်က မီချီဂန် (Michigan) ပြည်နယ်မှ မထွက်ခွာမီ အချိန်တွင် "နောက်ဆုံးတော့ စက်တင်ဘာ ၁၀ ရက်မှာ စကားစစ်ထိုးပွဲ ပြုလုပ်ဖို့ သူ (ထရမ့်) သဘောတူခဲ့တာကို ကျမ ဝမ်းသာပါတယ်" ဟု သတင်းထောက်များကို ပြောကြားခဲ့သည်။

Ipsos မှပြုလုပ်သည့် ရွေးကောက်ပွဲအကြို လူထုသဘောထားဆန္ဒ စစ်တမ်းများတွင် ဟားရစ်သည် ထရမ့်ထက် လူကြိုက်များမှု ပိုမိုများပြားနေသည်။

ထရမ့်နဲ့ ဟားရစ်ကို တွေ့ရစဉ်

ဇူလိုင်လက လူထုစစ်တမ်းများတွင် ထရမ့်သည် ၃၄ ရာခိုင်နှုန်းရရှိပြီး ဟားရစ်သည် ၃၇ ရာခိုင်နှုန်းဖြင့် အသာစီး ရခဲ့ကာ နောက်ဆုံးအကြိမ် ပြုလုပ်သည့် စစ်တမ်းတွင် ဟားရစ်က ၄၂ ရာခိုင်နှုန်းနှင့် ထရမ့်က ၃၇ ရာခိုင်နှုန်း ရှိခဲ့ကာ ဟားရစ်၏ အသာစီးရမှုများ ပိုမိုမြင့်တက်လာခဲ့သည်။

ထရမ့်ကမူ ဟားရစ်သည် ဘိုင်ဒန်၏ နေရာကို အစားထိုး ဝင်ရောက်ချိန်ကတည်းက မီဒီယာများနှင့် အင်တာဗျူး ပြုလုပ်ခဲ့ခြင်း မရှိသည့်အတွက် ဝေဖန်တိုက်ခိုက်ခဲ့သည်။ 

"သူ (ဟားရစ်) က အင်တာဗျူး မလုပ်နိုင်ပါဘူး။ သူ့ကို မဖြစ်မနေ အင်တာဗျူး လုပ်ခိုင်းဖို့ပဲ ရှိပါတယ်" ဟု ထရမ့်က ပြောကြားခဲ့သည်။

ထရမ့်သည် မီဒီယာများနှင့် ပုံမှန် အင်တာဗျူး ပြုလုပ်လေ့ရှိပြီး အများအားဖြင့် လက်ယာယိမ်း မီဒီယာများ၊ လက်ယာယိမ်း သတင်းထောက်များနှင့် ခင်မင်ရင်းနှီးသည့် ဆက်ဆံရေးရှိသည်။

Source: ရိုက်တာ

CNI International News

ပရာဟာ၊ ဩဂုတ် ၁၀

အရှေ့ဥရောပနိုင်ငံများသည် လူငယ်တပ်သားသစ်များ စုဆောင်းရန် ရုန်းကန်နေရပြီး ယူကရိန်းနှင့် နယ်စပ်ချင်း ထိနေသည့် ပိုလန်၊ ဟန်ဂေရီ၊ ရိုမေးနီးယားနှင့် ဆလိုဗက်ကီးယားနိုင်ငံများကဲ့သို့ ဒေသတွင်း နိုင်ငံများတွင် စစ်သားအသစ်များ စုဆောင်းရန် စိန်ခေါ်မှုများနှင့်ရင်ဆိုင်နေရသည်ဟု ရိုက်တာမှ ဖော်ပြခဲ့သည်။

ထို့ပြင် နေတိုးအဖွဲ့ဝင် နိုင်ငံများဖြစ်သည့် အနောက်ဥရောပနိုင်ငံများသည်လည်း အလားတူ စိန်ခေါ်မှုမျိုးနှင့် ရင်ဆိုင်နေရသည်။ 

ဇူလိုင်လအတွင်း ရိုက်တာသတင်းဌာန၏ ဖော်ပြချက်တွင် နေတိုးအဖွဲ့သည် ၎င်းတို့၏ မဟာမိတ်နိုင်ငံတစ်နိုင်ငံ နယ်နိမိတ်ကို ရုရှား၏ တိုက်ခိုက်မှုမှ ကာကွယ်နိုင်ရန်အတွက် နောက်ထပ် တပ်မဟာ ၃၅ ခုမှ ၅ဝ အတွင်း လိုအပ်ကြောင်း ဖော်ပြခဲ့သည်။

သို့သော် ဆိုဗီယက်၏ လွှမ်းမိုးမှုအောက်တွင် ဆယ်စုနှစ် လေးစုခန့် ရောက်ရှိခဲ့သည့် အရှေ့ဥရောပနိုင်ငံများ အတွက် သမ္မတ ပူတင် (Vladimir Putin) လက်အောက်မှ ရုရှားနိုင်ငံ၏ ခြိမ်းခြောက်မှုများနှင့်ပတ်သက်ပြီး စိုးရိမ်မှုများ မြင့်တက်နေသည်။

လူငယ်စစ်သားများကို တွေ့ရစဉ်

"ရုရှားရဲ့ ရန်လိုမှုတွေ ဖြစ်လာနိုင်ခြေရှိတာကို ကျနော်တို့ မြင်နေရပါတယ်။ ဒါပေမယ့် နှစ်အနည်းငယ်အတွင်း မှာတော့ မဖြစ်နိုင်သေးပါဘူး" ဟု ယူကရိန်းနိုင်ငံ ပြန်လည်တည်ထောင်ရေးဆိုင်ရာ ချက်သံတမန် ဖြစ်သည့် ချက်ဒုတိယကာကွယ်ရေးဝန်ကြီးဟောင်း တိုမက်စ် ကိုပက်နီ (Tomas Kopecny) က ပြောကြားခဲ့သည်။

"တကယ်လို့ ရုရှားက တိုက်ခိုက် လာတဲ့အချိန်မှာ ကျနော်တို့အနေနဲ့ စစ်သားအင်အား ဘယ်လောက်နဲ့ ဘယ်လို စွမ်းဆောင်ရည်တွေ ရှိရမလဲဆိုတာ သိထားဖို့လိုပါတယ်" ဟု ၎င်းက ပြောသည်။

လက်ရှိတွင် အစိုးရများသည် တပ်သားသစ်များ စုဆောင်းရန် အပိုဆုကြေးများကို မြှင့်တင်ပြီး ဒစ်ဂျစ်တယ် မားကက်တင်း လှုပ်ရှားမှုဘက်သို့ ပြောင်းလဲလုပ်ဆောင်လာခဲ့သည်။

ချက်ကာကွယ်ရေးဝန်ကြီးဌာနသည် စစ်သားများ၊ အရံစစ်သားများနှင့် တပ်သားသစ်များအတွက် ကျန်းမာရေး သတ်မှတ်ချက် စည်းကမ်းများကို စက်တင်ဘာ ၁ ရက်မှစပြီး ဖြေလျှော့ပေးမည်ဖြစ်သည်။

လူငယ်စစ်သားများကို တွေ့ရစဉ်

သို့သော် အရှေ့ဥရောပတွင် အလုပ်လက်မဲ့နှုန်း နည်းပါးနေပြီး အလုပ်အကိုင် အခွင့်အလမ်းများ ပေါများနေ ခြင်းသည် လူငယ်များကို စစ်ထဲဝင်ရန် စည်းရုံးရာတွင် အဓိကစိန်ခေါ်မှုဖြစ်နေပြီး လူငယ်များသည် ဝင်ငွေ ပိုမိုများပြားသည့် ပုဂ္ဂလိကအလုပ်များကိုသာ ရွေးချယ်လျက်ရှိသည်။

"ကျနော်တို့မှာ စိန်ခေါ်မှုတွေ ရှိနေပါတယ်။ ဒီမှာက အလုပ်သမားစျေးကွက်ဟာ အရမ်းကို ပြိုင်ဆိုင်မှု မြင့်မားနေ ပါတယ်" ဟု ပိုလန်စစ်တပ်၏ ဒုတိယစစ်ဦးစီးချုပ် ဗိုလ်ချုပ်ကာရိုးလ် ဒိုင်မာနောင်းစကီး (Karol Dymanowski) က ပြောကြားခဲ့သည်။

ပိုလန်နိုင်ငံတွင်လည်း အစိုးရနှင့် စစ်တပ်အရာရှိများသည် တပ်သားသစ်များကို ရည်မှန်းချက်ပြည့်မီရန် စုဆောင်း နေသော်လည်း စစ်သား ၃၀၀,၀၀၀ ရှိသည့် စစ်တပ်တစ်ခု ထူထောင်ရေး ရည်မှန်းချက်သည် လက်တွေ့တွင် ဖြစ်လာနိုင်မည် ဟုတ်/မဟုတ်ကို ဝေဖန်ရေးသမားများက မေးခွန်းထုတ်နေကြသည်။

Source: ရိုက်တာ

CNI International News

ဘန်ကောက်၊ ဩဂုတ် ၁၀

ထိုင်းနိုင်ငံတွင် ဖျက်သိမ်းခံခဲ့ရသည့် Move Forward Party (MFP)၏ ပါတီဝင်များက အသစ်ထပ်မံ ဖွဲ့စည်းခဲ့သော ပြည်သူ့ပါတီ(PP)က ၂၀၂၇ ရွေးကောက်ပွဲတွင် သောင်ပြိုကမ်းပြိုအနိုင်ရဖို့ ရည်မှန်ထားကြောင်း PP ပါတီခေါင်း ဆောင် နတ်သာဖွန် ရူအန်ပန်ယာဝပ် (Natthaphong Ruengpanyawut)က ပြောသည်ဟု Thai PBS မှ ဖော်ပြ ခဲ့သည်။ 

ဩဂုတ် ၈ ရက်နေ့က MFP လွှတ်တော်အမတ်များ ပြုလုပ်သည့် အစည်းအဝေးတွင် နတ်သာဖွန်ကို အသစ်ဖွဲ့စည်း သည့် ပြည်သူ့ပါတီ ခေါင်းဆောင်အဖြစ် ရွေးချယ်ခဲ့ခြင်းဖြစ်သည်။

ထို့ပြင် ပါတီ၏ အဖွဲ့ဝင် ၅ ဦးပါ အလုပ်အမှုဆောင်ကော်မတီကိုလည်း ရွေးချယ်ခန့်အပ်ခဲ့ပြီး MFP ၏ လွှတ်တော် အမတ် ၁၄၃ ဦးစလုံးသည် အသစ်ဖွဲ့စည်းလိုက်သည့် ပြည်သူ့ပါတီကို ဝင်ရောက်ခဲ့ကြသည်။

ပါတီခေါင်းဆောင်သစ်ဖြစ်သည့် နတ်သာဖွန်က ၎င်းတို့သည် တော်ဝင်အသရေဖျက်မှုဥပဒေကို ပြုပြင်ပြောင်းလဲ ရေးအတွက် ဆက်လက် ကြိုးပမ်းသွားမည်ဟု ပြောသည်။

ထို့နောက် ဖွဲ့စည်းပုံအခြေခံဥပဒေဆိုင်ရာ တရားရုံးက ၎င်းတို့ပါတီ၏ လုပ်ဆောင်မှုကို တားမြစ်ခြင်း မရှိခဲ့ကြောင်း ၎င်းက ပြောကြားခဲ့သည်။ 

ပြည်သူ့ပါတီခေါင်းဆောင် နတ်သာဖွန်ကိုတွေ့ရစဉ်

ထို့ပြင် ယခုတစ်ကြိမ်တွင် ပိုပြီးသတိကြီးစွာထားပြီး ချဉ်းကပ်လုပ်ဆောင်သွားမည်ဟုလည်း နတ်သာဖွန်က ဆိုသည်။

တော်ဝင်အသရေဖျက်မှုဥပဒေကို ပြုပြင်ပြောင်းလဲရေးသည် MFP က ကြေညာခဲ့သည့် မူဝါဒ ၃၀၀ ထဲတွင် တစ်ခု အပါအဝင်ဖြစ်ပြီး ဖျက်သိမ်းခံခဲ့ရသည့် ယခင်ပါတီနှစ်ခုဖြစ်သည့် Future Forward Party (FFP) ၏ မူဝါဒများကို MFP က ဆက်လက် ကျင့်သုံးခဲ့သည့်ပုံစံအတိုင်း ယခု ပြည်သူ့ပါတီကလည်း MFP ၏ အားထုတ်ကြိုးပမ်းမှုများကို ဆက်လက် လုပ်ဆောင်သွားမည်ဟု နတ်သာဖွန်က ပြောကြားခဲ့သည်။

မည်သို့ပင်ဆိုစေ မိမိတို့အနေဖြင့် ပါတီ၏ သဘောထားနှင့် လူထု၏ အကျိုးစီးပွားကို အထိခိုက်မခံဘဲ အစိုးရအဖွဲ့ အတွင်း နေရာများ ရရှိရေးအတွက် အခြားပါတီများနှင့်လည်း ပွင်းလင်းစွာ ဆွေးနွေးသွားမည်ဟု လူငယ်ပါတီ ခေါင်းဆောင် တစ်ဦးဖြစ်သည့် နတ်သာဖွန်က ပြောသည်။

ပြည်သူ့ပါတီခေါင်းဆောင်များကို တွေ့ရစဉ် 

မိမိတို့ပါတီ၏ ပထမဦးစားပေးကိစ္စမှာ ပါတီဝင် ၁၀၀,၀၀၀ သို့မဟုတ် ပါတီဝင် ၁၀ သန်းအထိ ရှိလာစေရန်အတွက် ပါတီဝင်ဖြစ်ခွင့် လျှောက်ထားမှုများကို ဖွင့်ပေးထားရန်ဖြစ်ပြီး ဩဂုတ် ၁၀ ရက်မှ စတင်ကာ ပါတီဝင်ဖြစ်ခွင့်နှင့် ရန်ပုံငွေမြှင့်တင်ရေး လှုပ်ရှားမှုများကို စတင်ဆောင်ရွက်သွားမည်ဟု ဆိုသည်။

ပါတီ၏ အမည်ကို ပြည်သူ့ပါတီဟု ရွေးချယ်ရသည့် အကြောင်းရင်းမှာ ပြည်သူများအတွက် ပြည်သူ့များက ကိုယ်စားပြုသည့် ပါတီတစ်ခုအဖြစ် ဖြစ်စေလိုကြောင်းနှင့် ပြည်သူများသည် ဒီမိုကရေစီစနစ်ကို ယုံကြည်ထား ခြင်းကြောင့်ဖြစ်ကြောင်း နတ်သာဖွန်က ရှင်းလင်းပြောကြားခဲ့သည်။

ပါတီ၏ အလုပ်အမှုဆောင်ကော်မတီဝင် ၅ ဦးမှာ ပါတီခေါင်းဆောင် နတ်သာဖွန် (Natthaphong)၊ ပါတီအတွင်း ရေးမှူးချုပ် ဆာရာယွတ် ဂျိုင်လက် (Sarayuth Jailak)၊ ပါတီမော်ကွန်းထိန်း နတ်သာဝပ် ဘူအာပရာသမ် (Nutthawut Buaprathum) ၊ ဘဏ္ဍာရေးအရာရှိ ချူတီမာ ကော့ချာပန် (Chutima Kotchapan) နှင့် ဖီချန် ချာအိုဝါပတ္တနဝေါင် (Phicharn Chaowapatanawong) တို့ဖြစ်သည်။

Source: Thai PBS World

CNI International News

ကင်ရှာဆာ၊ ဩဂုတ် ၁၀

ကွန်ဂို ဒီမိုကရက်တစ် သမ္မတနိုင်ငံ (ဒီအာရ် ကွန်ဂို) စစ်ခုံရုံးသည် M23 လက်နက်ကိုင်အဖွဲ့ အပါအဝင် လက်နက်ကိုင်အဖွဲ့များတွင် ပါဝင်သည်ဟု စွပ်စွဲခံခဲ့ရသူ ၂၆ ဦးကို သေဒဏ်ချမှတ်ခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

ပုန်ကန်မှုနှင့် နိုင်ငံတော် သစ္စာဖောက်မှုတွင် ပါဝင်သည့် Alliance Fleuve Congo (AFC) လက်နက်ကိုင်အဖွဲ့ ခေါင်းဆောင် ကော်နီယယ်လီ နန်ဂါ (Corneille Nangaa) သည် စစ်ရာဇဝတ်မှုကျူးလွန်မှုဖြင့် ပြစ်မှုထင်ရှား တွေ့ရှိခဲ့သည်။

နန်ဂါနှင့် အခြားတရားခံ ၂၀ သည် ဩဂုတ် ၈ ရက်က မျက်ကွယ်ပြစ်ဒဏ်အဖြစ် သေဒဏ်ချမှတ်ခံခဲ့ရပြီး လက်ရှိတွင် ထိုတရားခံများ အားလုံးသည် ထွက်ပြေးတိမ်းရှောင်နေဆဲ ဖြစ်သည်။

နောက်ထပ် တရားခံ ၅ ဦးသည် တရားခွင်တွင် ထွက်ပေါ်ခဲ့ပြီး ၎င်းတို့၏ ပြစ်ဒဏ်များကို အယူခံဝင်ရန် ၅ ရက် အချိန်ပေးထားကြောင်း တရားရုံးက ပြောကြားခဲ့သည်။

ဇူလိုင် ၂၄ ရက်က စတင်ခဲ့သည့် ကြားနာစစ်ဆေးမှုတွင် အစိုးရရှေ့နေတစ်ဦးက တရားခံ ၂၅ ဦးကို သေဒဏ် ချမှတ်ရန်နှင့် နောက်ထပ် တရားခံတစ်ဦးကို ထောင်ဒဏ် အနှစ် ၂၀ ချမှတ်ရန် တိုက်တွန်းခဲ့သည်။

ဒီအာရ်ကွန်ဂို ရွေးကောက်ပွဲကော်မရှင် ဥက္ကဋ္ဌဟောင်းဖြစ်သည့် နန်ဂါသည် အစိုးရကို ဆန့်ကျင်သည့် လက်နက် ကိုင်အဖွဲ့များ၊ နိုင်ငံရေးပါတီများနှင့် အရပ်ဖက်လူ့အဖွဲ့အစည်းများကို တစ်စုတစ်စည်းတည်း ဖြစ်စေရန် AFC နိုင်ငံရေး-စစ်ရေး လှုပ်ရှားမှုကို ဒီဇင်ဘာလတွင် စတင်လုပ်ဆောင်ခဲ့သည်။

ကွန်ဂိုစစ်ခုံရုံးကိုတွေ့ရစဉ်

AFC အဖွဲ့ထဲတွင် ဒီအာရ်ကွန်ဂို၏ အရှေ့ပိုင်းတွင် ဆယ်စုနှစ်များစွာကြာ ဖြစ်ပွားနေသည့် ပဋိပက္ခအတွင်း လူပေါင်းများစွာကို သတ်ဖြတ်ခဲ့သည်ဟု စွပ်စွဲခံခဲ့ရသည့် M23 သူပုန်အဖွဲ့လည်း ပါဝင်နေသည်။

အမှုတွဲတွင် ပါဝင်သည့် M23 ခေါင်းဆောင်များထဲတွင် ထိုအဖွဲ့၏ ဥက္ကဋ္ဌ ဘာထရန် ဘီစီမွာ (Bertrand Bisimwa) ၊ စစ်ရေးအကြီးအကဲ ဆူလ်တာနီ မာကန်ဂါ (Sultani Makenga)နှင့် ပြောရေးဆိုခွင့်ရှိသူများဖြစ်သည့် ဝီလီ အန်ဂိုမာ (Willy Ngoma) နှင့် လောရန့်စ် ကန်ယူကာ (Lawrence Kanyuka) တို့ ပါဝင်သည်။

မျက်ကွယ်ပြစ်ဒဏ် ချမှတ်ခံခဲ့ရသည့် နန်ဂါကမူ စစ်ခုံရုံး၏ ပြစ်ဒဏ်ချမှတ်မှုသည် ၎င်းတို့၏ ဒီမိုကရေစီ လှုပ်ရှား မှုများအတွက် ရုန်းကန်နေမှုကို ခွန်အားဖြစ်စေခဲ့ကြောင်း အေပီသတင်းဌာနသို့ မက်ဆေ့ချ်ပေးပို့ခဲ့ပြီး လက်ရှိတွင် သူသည် မည်သည့်နေရာ၌ ရှိနေသည်ဆိုခြင်းကိုမူ ရှင်းလင်းစွာ မသိရပေ။

Source: အယ်လ်ဂျာဇီးယား

CNI International News

တူးနစ်၊ ဩဂုတ် ၉

တူနီးရှားသမ္မတ ကာအစ် ဆာအိဒ် (Kais Saied) သည် တရားဝင် အကြောင်းပြချက် တစ်စုံတစ်ရာမပေးဘဲ ဝန်ကြီးချုပ် အာမက် ဟာချနီ (Armed Hachani) ကို ရာထူးမှထုတ်ပယ်ခဲ့ကာ သူ့နေရာတွင် ကာမယ် မာဒူရီ (Kamel Madouri)အား အစားထိုးခန့်အပ်ခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ဟာချနီသည် ပြီးခဲ့သည့်နှစ် ဩဂုတ်လ ၁ ရက်တွင် ၎င်းကဲ့သို့ အကြောင်းပြချက် တစ်စုံတစ်ရာမပေးဘဲ ထုတ်ပယ် ခံခဲ့ရသည့် ဝန်ကြီးချုပ် နက်ဂျ်လာ ဘူဒန် (Najla Bouden) နေရာတွင် အစားထိုးခန့်အပ်ခံခဲ့ရခြင်းဖြစ်သည်။

သို့သော် သူလည်း ဖြစ်ကာ ဝန်ကြီးချုပ်နက်ဂျ်လာဘူဒန် ကဲ့သို့ပင် အကြောင်းပြချက်မရှိဘဲ ထုတ်ပယ်ခံခဲ့ရသည်။

ကမ္ဘာလုံးဆိုင်ရာ စိန်ခေါ်မှုများ ရှိနေသည့်တိုင် ဟာချနီသည် ရာထူးမှ ထုတ်ပယ်မခံရမီ နာရီအနည်းငယ်အလိုက တူနီးရှားနိုင်ငံ၏ အစားအစာနှင့် စွမ်းအင်လိုအပ်ချက်များ ပြည့်စုံမှုရှိသည့် အကြောင်းအရာ အပါအဝင် နိုင်ငံ၏ ပြဿနာ အများအပြားတွင် အစိုးရက တိုးတက်မှုများရှိစေရန် လုပ်ဆောင်ခဲ့ကြောင်း ဗွီဒီယိုမက်ဆေ့ချ်တစ်ခုတွင် ပြောကြားခဲ့သည်။

ဝန်ကြီးချုပ် အာမက် ဟာချနီနဲ့ တူနီးရှားသမ္မတ ကာအစ် ဆာအိဒ်ကို တွေ့ရစဉ်

သူ့နေရာကို အစားထိုးခန့်အပ်ခဲ့သည့် မာဒူရီသည် မေလကမှ လူမှုရေးရာဝန်ကြီး ရာထူးနေရာတွင် တာဝန် ထမ်းဆောင်ခဲ့သူဖြစ်သည်။

သမ္မတရုံးက ထုတ်ပြန်သည့် လူမှုမီဒီယာပို့စ် တစ်ခုတွင် ဆာအိဒ်သည် မာဒူရီနှင့် လက်ဆွဲနုတ်ဆက်နေပုံနှင့် မာဒူရီကို အစိုးရအဖွဲ့အား ဦးဆောင်ရန် တာဝန်အပ်နှင်းသည့်အကြောင်းကို ထုတ်ပြန်ခဲ့သည်။

တူနီးရှားနိုင်ငံတွင် အောက်တိုဘာ ၆ ရက် သမ္မတရွေးကောက်ပွဲမတိုင်မီ ဝန်ကြီးချုပ်နေရာ အပြောင်းအလဲ ပြုလုပ်ခဲ့ခြင်း ဖြစ်သည်။

နိုင်ငံ၏ နေရာဒေသ အများအပြားတွင် သောက်သုံးရေနှင့် လျှပ်စစ်ဓာတ်အား ပြတ်တောက်မှုကြောင့် လူထု အကြား မကျေနပ်ချက်များ မြင့်တက်နေချိန်တွင် ဆာအိဒ်သည် နောက်ထပ် သမ္မတသက်တမ်းကို ရရှိရန် ကြိုးပမ်းလျက်ရှိသည်။

ဝန်ကြီးချုပ်ဟောင်း နက်ဂျ်လာဘူဒန်ကို တွေ့ရစဉ်

ဆာအိဒ်သည် ၂၀၁၉ ခုနှစ်က ဒီမိုကရေစီနည်းကျ ရွေးကောက်ခံခဲ့ရသော်လည်း ၂၀၂၁ ခုနှစ်တွင် အာဏာကို ဆက်လက် ကိုင်ဆွဲနိုင်ရန် အကွက်ချ လုပ်ဆောင်ခဲ့သည်။

ထို့နောက် ဒုတိယသက်တမ်းကို အနိုင်ရရှိစေရန် ပြိုင်ဘက်များအား ခြိမ်းခြောက်ခဲ့ကြောင်း အတိုက်အခံများ၊ လူ့အခွင့်အရေးအဖွဲ့များ၏ ဝေဖန်မှုများကို ရင်ဆိုင်နေရသည်။

ယခုသီတင်းပတ် အစောပိုင်းကလည်း တူနီရှားနိုင်ငံ၏ အတိုက်အခံ ခေါင်းဆောင်တစ်ဦးဖြစ်ပြီး သမ္မတရွေးကောက်ပွဲဝင် ကိုယ်စားလှယ်လောင်းအဖြစ် အလားအလာရှိသည့် အဘီယာ မွတ်စီ (Abbir Moussi) သည် ထောင်ဒဏ် ၂ နှစ် ချမှတ်ခံခဲ့ရသည်။

ရှေ့နေတစ်ဦးဖြစ်သူ မွတ်စီသည် ရွေးကောက်ပွဲ လုပ်ငန်းစဉ်ကို ဝေဖန်ခဲ့ပြီးနောက် ပြီးခဲ့သည့်နှစ်တွင် ဖမ်းဆီးခံခဲ့ ရကာ ဆိုက်ဘာရာဇဝတ်မှုဖြင့် စုံစမ်းစစ်ဆေးခံခဲ့ရပြီး ထောင်ဒဏ်ချမှတ်ခံခဲ့ရသည်။

Source: အယ်လ်ဂျာဇီးယား

CNI International News

ဘာစီလိုနာ၊ ဩဂုတ် ၉

စပိန်နိုင်ငံတွင် ဖမ်းဝရမ်းထုတ်ခံထားရသည့် ကတ္တလန်ခွဲထွက်ခေါင်းဆောင် ကားလက်စ် ပွီးဒီးမန့် (Carles Puigdemont) သည် ပြည်ပြေးဘဝဖြင့် ပြည်ပတွင် ၇ နှစ်ကြာ နေထိုင်ခဲ့ပြီးနောက် ဩဂုတ် ၈ ရက်၌ စပိန်နိုင်ငံသို့ ပြန်လည်ရောက်ရှိလာခဲ့ပြီး လူထုမြင်ကွင်းသို့ ထွက်ပေါ်ခဲ့သည်ဟု ရိုက်တာမှ ဖော်ပြခဲ့သည်။

ပွီးဒီးမန့်သည် ဩဂုတ် ၈ ရက်က ဘာစီလိုနာတွင် ၎င်း၏ ထောက်ခံသူများရှေ့မှောက်သို့ ထွက်ပေါ်လာခဲ့ပြီး ကတ္တလန် လွှတ်တော်အနီးရှိ Arc de Triomf အထိမ်းအမှတ် အဆောက်အအုံရှေ့၌ ၎င်း၏ပါတီဖြစ်သည့် Junts ပါတီမှ အရာရှိများခြံရံပြီး စင်မြင့်ထက်သို့ တက်လာခဲ့သည်။

"ကျနော်တို့ ဒီမှာ ရှိနေသေးတယ်ဆိုတဲ့ အကြောင်းကို ခင်ဗျားတို့ကို သတိရစေချင်လို့ ကျနော် ဒီနေ့ ရောက်လာခဲ့ တာဖြစ်တယ်။ ကာတာလိုနီးယား (Catalonia) ဒေသ အဓွန့်ရှည်ပါစေ" ဟု ပွီးဒီးမန့်က ထောင်နှင့်ချီသည့် ၎င်း၏ ထောက်ခံသူများကို ပြောကြားခဲ့သည်။

ထောက်ခံသူအများစုသည် ကာတာလိုနီးယားဒေသ၏ အလံဖြစ်သည့် အနီရောင်၊ အဝါရောင်နှင့် အပြာရောင် ရောစပ်ထားသည့် အလံကို ဝှေ့ယမ်းခဲ့ပြီး ကာတာလိုနီးယားဒေသကို စပိန်လက်အောက်မှ ခွဲထွက်ခွင့်ပေးရန် တောင်းဆိုသည့် ဆောင်ပုဒ်များအား ဟစ်ကြွေးခဲ့ကြသည်။

စပိန်ရဲတွေ လမ်းပိတ်စစ်ဆေးနေစဉ်

ပွီးဒီးမန့်သည် ချမ်းသာကြွယ်ဝသည့် ကာတာလိုနီးယားဒေသကို လွတ်လပ်ရေးရယူရန် ၂၀၁၇ ခုနှစ်က ကြိုးပမ်း ခဲ့သော်လည်း အောင်မြင်ခြင်း မရှိခဲ့သဖြင့် စပိန်နိုင်ငံမှ ထွက်ပြေးတိမ်းရှောင်ခဲ့သည်။

ပွီးဒီးမန့်သည် ဩဂုတ် ၈ ရက်က လူထုရှေ့မှောက်တွင် မိန့်ခွန်း အကျဉ်းချုံး ပြောကြားခဲ့ပြီးနောက် ချက်ချင်း ပြန်လည် ပျောက်ကွယ်သွားခဲ့သည်။

လက်ရှိတွင် သူ မည်သည့်နေရာတွင် ရှိနေသည်ဆိုခြင်းကို ရှင်းလင်းစွာ မသိရသေးပေ။

ရဲတပ်ဖွဲ့သည် ဘာစီလိုနာမြို့အတွင်းနှင့် ထိုမြို့သို့ ရောက်ရှိသည့် လမ်းများပေါ်တွင် အတားအဆီးများ ချထားကြောင်း ပြည်ထဲရေးဝန်ကြီးဌာန၏ ပြောရေးဆိုခွင့်ရှိသူက ပြောကြားခဲ့သည်။

ဘာစီလိုနာမြို့လယ်ခေါင်တွင် တည်ရှိသည့် လွှတ်တော် အဆောက်အအုံကိုလည်း အတားအဆီးများ ကာရံထားပြီး ရဲတပ်ဖွဲ့က ပတ်ပတ်လည် စောင့်ကြပ်ခဲ့သည်။

ရဲတပ်ဖွဲ့သည် ပွီးဒီးမန့်ကို ရှာဖွေရန် ဘာစီလိုနာမြို့ထဲတွင် ကားများကို စစ်ဆေးနေကြောင်း စပိန်မီဒီယာများက ဖော်ပြခဲ့သော်လည်း ထိုကဲ့သို့ ရှာဖွေမှုများ ပြုလုပ်နေသည်ဆိုသည့် သတင်းများနှင့်ပတ်သက်ပြီး အေအက်ဖ်ပီ သတင်းဌာန၏ မှတ်ချက်ပေးရန် တောင်းဆိုမှုကို ရဲတပ်ဖွဲ့က ငြင်းဆိုခဲ့သည်။

Source: ရိုက်တာ