CNI International News

ဒမတ်စကတ်၊ မတ်လ ၁၂

ဆီးရီးယားအစိုးရအဖွဲ့သစ်သည် ကာ့ဒ်ဦးဆောင်သည့် ဆီးရီးယားဒီမိုကရက်တစ်တပ်ဖွဲ့ (SDF) နှင့် ပူးပေါင်းရန် သဘောတူစာချုပ် ချုပ်ဆိုခဲ့ကြောင်း ရိုက်တာမှ ဖော်ပြခဲ့သည်။

ဆီးရီးယားသမ္မတရုံးက မတ်လ ၁၀ ရက်တွင် ထုတ်ပြန်သည့် ဗွီဒီယိုထဲ၌ ဆီးရီးယား ယာယီသမ္မတ အာမက် အယ်ရှာရား (Ahmed al-Sharaa) နှင့် SDF တပ်မှူး မာဇလွမ် အဗ္ဗဒီ (Mazloum Abdi) တို့ သဘောတူစာချုပ် လက်မှတ်ရေးထိုးနေပုံကို ဖော်ပြထားသည်။

ထိုသဘောတူစာချုပ်သည် ဆီးရီးယား၏ ၁၄ နှစ်ကြာ ပဋိပက္ခနှင့် ပြီးခဲ့သည့်နှစ် ဒီဇင်ဘာလက အာဆတ် (Bashar al-Assad) ၏ အစိုးရအဖွဲ့ ပြုတ်ကျသွားပြီးနောက် ဆီးရီးယားနိုင်ငံ စည်းလုံးညီညွတ်ရေးကို တည်ဆောက်လိုသည့် ရှာရား၏ ရည်မှန်းချက်အတွက် အဓိက ခြေလှမ်းတစ်ရပ်ဖြစ်သည်။

ထိုသဘောတူညီချက်အရ ရန်လိုမှုများကို အလုံးစုံ အဆုံးသတ်ရေး၊ SDF က ထိန်းချုပ်ထားသည့် လေဆိပ်များ၊ ရေနံစက်ရုံများ၊ ဓာတ်ငွေ့တွင်းများ အပါအဝင် အရပ်ဘက်နှင့် စစ်ဘက်ဌာနများသည် အစိုးရ၏ ထိန်းချုပ်မှု အောက်သို့ ရောက်ရှိမည်ဖြစ်သည်။

ကာ့ဒ်သူပုန် ထောက်ခံသူများကို တွေ့ရစဉ်

ထိုသဘောတူစာချုပ် လက်မှတ်ရေးထိုးပြီးနောက် ဆီးရီးယား၏ အရှေ့မြောက်ပိုင်းရှိ ကာမီရှလီ (Qamishli) မြို့တွင် ဒေသခံများက လမ်းများပေါ်ထွက်ပြီး ပျော်ရွှင်စွာ အောင်ပွဲခံခဲ့ကြသည်။

“လူတွေက ဒီလိုသဘောတူညီချက်ကို လိုအပ်နေတာပါ။ ကမ္ဘာကြီးဟာ စစ်ပွဲတွေကြောင့် ပင်ပန်းနေပါပြီ။ အဲဒါ ကြောင့် ငြိမ်းချမ်းရေးကို ဆောင်ကြဉ်းပြီး ဒီမိုကရေစီစနစ် ကျင့်သုံးတဲ့ ဆီးရီးယားနိုင်ငံတော်သစ်ကို ထူထောင် နိုင်မယ့် ဒီသဘောတူညီချက်ကို ကျနော်တို့က ပျော်ရွှင်စွာ အောင်ပွဲခံနေကြတာပါ”ဟု မြို့ခံတစ်ဦးက ပြောကြား ခဲ့သည်။

အမေရိကန် ထောက်ပံ့ပေးထားသည့် SDF သည် တူရကီက ထောက်ပံ့ပေးထားသော လက်နက်ကိုင်အဖွဲ့များနှင့် ဆီးရီးယားနိုင်ငံ မြောက်ပိုင်းတွင် နှစ်ပေါင်းများစွာကြာ တိုက်ခိုက်မှုများ ဖြစ်ပွားခဲ့သည်။

ထိုသဘောတူညီချက်နှင့်ပတ်သက်ပြီး ရှာရား၏ အနီးကပ် မဟာမိတ်ဖြစ်သည့် တူရကီကမူ ချက်ချင်း မှတ်ချက် ပေးခဲ့ခြင်း မရှိပေ။

အမေရိကန်သမ္မတသစ် ဒေါ်နယ်ထရမ့် (Donald  Trump) ၏ အစိုးရအဖွဲ့သည် SDF ကို ကူညီပေးနေသည့် ဆီးရီးယားနိုင်ငံမှ အမေရိကန်တပ်ဖွဲ့များအား ပြန်လည်ရုပ်သိမ်း နိုင်ခြေရှိသဖြင့် SDF ခေါင်းဆောင်များသည် ဆီးရီးယားအစိုးရနှင့် သဘောတူညီချက်ယူရန် ဆုံးဖြတ်ခဲ့ခြင်းဖြစ်နိုင်သည်ဟု ကျွမ်းကျင်သူများက ပြောကြားခဲ့ သည်။

Source: ရိုက်တာ

CNI International News

မနီလာ၊ မတ်လ ၁၂

နိုင်ငံတကာ ရာဇဝတ်ခုံရုံး(ICC)က ဖိလစ်ပိုင်သမ္မတဟောင်း ဒူတာတေးအား မူးယစ်ဆေးဝါးတိုက်ဖျက်ရေး စစ်ပွဲ တွင် လူသားမျိုးနွယ်ကို ဆန့်ကျင်သည့် ရာဇဝတ်မှုများ ကျူးလွန်မှုဖြင့် ဖမ်းဆီးရန် ဖမ်းဝရမ်းထုတ်ခဲ့ပြီးနောက် နိုင်ငံတကာရဲတပ်ဖွဲ့ (အင်တာပိုလ်) ၏ တောင်းဆိုမှုဖြင့် ဖိလစ်ပိုင်ရဲတပ်ဖွဲ့က ဒူတာတေးအား မတ်လ ၁၁ ရက် တွင် ဖမ်းဆီးခဲ့ကြောင်း ရိုက်တာမှ ဖော်ပြခဲ့သည်။

အင်တာပိုလ် မနီလာရဲတပ်ဖွဲ့သည် ICC ၏ ဖမ်းဝရမ်း မိတ္တူကို မတ်လ ၁၁ ရက် နံနက်ပိုင်းက လက်ခံရရှိခဲ့ကြောင်း ဖိလစ်ပိုင်သမ္မတ၏ ဆက်သွယ်ရေးရုံးက ထုတ်ပြန်ခဲ့သည်။

“သမ္မတဟောင်းဟာ ကျန်းမာရေးကောင်းမွန်နေပြီး အစိုးရ ဆရာဝန်တွေရဲ့ စစ်ဆေးမှုကို ခံယူပြီးပါပြီ။ ဆရာဝန် တွေကလည်း ဒူတာတေးရဲ့ ကျန်းမာရေး ကောင်းမွန်တယ်လို့ ပြောပါတယ်” ဟု ထုတ်ပြန်ချက်တွင် ဖော်ပြခဲ့သည်။

လက်ရှိတွင် ဒူတာတေးသည် အာဏာပိုင်များ၏ ထိန်းသိမ်းခြင်းကို ခံထားရသည်။

Facebook ပေါ်တွင် ပျံ့နေသည့် ဗွီဒီယိုတစ်ခုတွင် လေယာဉ်ဖြင့် ခေါ်ဆောင်ခံလာခဲ့ရသည့် ဒူတာတေးသည် ရဲအရာရှိများကို စကားပြောနေပုံများအား မြင်တွေ့ရသည်။

အင်တာပိုလ်ရဲတပ်ဖွဲ့ကိုတွေ့ရစဉ်

“ခင်ဗျားက ကျနော့်ကို သတ်လိုက သတ်နိုင်ပါတယ်။ ဒါပေမယ့် ခင်ဗျားက နိုင်ငံခြားသားတွေဘက်က ရပ်တည်မယ်ဆိုရင်တော့ ကျနော်က ခွင့်ပြုမှာမဟုတ်ပါဘူး”ဟု ဒူတာတေးက ပြောကြားခဲ့သည်။

ရဲအရာရှိကမူ ၎င်းတို့သည် လုပ်ထုံးလုပ်နည်းအတိုင်း လုပ်ဆောင်ရခြင်း ဖြစ်သည်ဟု ပြန်လည် ပြောကြားခဲ့ သည်ကို ဗွီဒီယိုထဲတွင် မြင်တွေ့ရသည်။

ဒူတာတေးကို ဗီလာမော် လေတပ်စခန်းသို့ ခေါ်ဆောင်သွားခဲ့ခြင်းဖြစ်ပြီး ထိုလေဆိပ်မှတဆင့် နယ်သာလန်နိုင်ငံ သည်ဟိဂ် (The Hague) မြို့ရှိ ICC သို့ သွားရောက်ဖွယ်ရှိသည်ဟု မီဒီယာများက ဖော်ပြခဲ့သည်။

ဒူတာတေးသည် ဖိလစ်ပိုင်သမ္မတအဖြစ် တာဝန်ထမ်းဆောင်သည့် ၂၀၁၆ ခုနှစ်မှ ၂၀၂၂ ခုနှစ်အတွင်း လူပေါင်း ထောင်ချီ သေဆုံးခဲ့သည့် မူးယစ်ဆေးဝါး တိုက်ဖျက်ရေးစစ်ပွဲကို ဆင်နွှဲခဲ့သဖြင့် ပြည်တွင်း/ပြည်ပ၏ ဝေဖန်ခြင်းကို ခံခဲ့ရသည်။

ထိုမူးယစ်စစ်ပွဲအတွင်း သေဆုံးသွားသူများ၏ ကျန်ရစ်သူ မိသားစုများနှင့် အတိုက်အခံ နိုင်ငံရေးသမားများ၏ တိုင်ကြားစာများကြောင့် ICC က ဒူတာတေး၏ မူးယစ်စစ်ပွဲကို ၂၀၁၈ ခုနှစ်တွင် စုံစမ်းစစ်ဆေးမှုများ ပြုလုပ်ခဲ့ ခြင်းဖြစ်သည်။

Source: ရိုက်တာ

CNI International News

အိုင်ဇော၊ မတ်လ ၁၂

နိုင်ငံခြားသားများသည် အိန္ဒိယနိုင်ငံ၊ မီဇိုရမ်ပြည်နယ်ကို ဖြတ်သန်း၍ မြန်မာနိုင်ငံသို့ ဝင်ရောက်ပြီး ချင်းတောင် တန်းပေါ်က သူပုန်များကို စစ်သင်တန်းများ ပေးနေကြောင်း မီဇိုရမ် (Mizoram) ပြည်နယ်ဝန်ကြီးချုပ် လာဒူဟိုမာ (Lalduhoma) က မတ်လ ၁၀ ရက်တွင် ပြောကြားခဲ့သည်ဟု NDTV မှ ဖော်ပြခဲ့သည်။

အိန္ဒိယ-မြန်မာ နယ်စပ်ဒေသတစ်လျှောက် သွားလာလှုပ်ရှားမှုများကို  စည်းကမ်းချမှတ်ရန်နှင့် Protected Area Permit (PAP) ဟုခေါ်သော အိန္ဒိယနိုင်ငံသား မဟုတ်သူများကို သတ်မှတ်ထားသည့် နေရာများတွင် သွားလာ လှုပ်ရှားခွင့် တင်းကျပ်သည့် စနစ်ကို ပြန်လည်ကျင့်သုံးမည့် ဗဟိုအစိုးရ၏ ဆုံးဖြတ်ချက်ကို ပြည်နယ်အစိုးရက ဆန့်ကျင်မည်မဟုတ်ကြောင်း ၎င်းက ပြောသည်။

ပြည်ပနိုင်ငံသားများသည် မြန်မာနိုင်ငံအတွင်းသို့ ဝင်ရောက်ရန် မီဇိုရမ်ပြည်နယ်ကို ခရီးတစ်ထောက်နားသည့် နေရာအဖြစ် လျှို့ဝှက်အသုံးချနေကြောင်း၊ ထိုအခြေအနေသည် ဗဟိုအစိုးရအတွက် ကြီးမားသည့် စိုးရိမ်စရာကိစ္စ ဖြစ်လာခဲ့သည်ဟု မီဇိုရမ်ပြည်နယ်ဝန်ကြီးချုပ်က ဆိုသည်။

 ချင်းသူပုန် ၂ ဖွဲ့ ပူးပေါင်းမှု မီဇိုရမ်ပြည်နယ်ဝန်ကြီးချုပ် လာဒူဟိုမာက သက်သေအဖြစ် ပါဝင်ခဲ့သည်ကို တွေ့ရစဉ်

အဆိုပါ သင်တန်းများကို အမေရိကန်နှင့် ဗြိတိန်နိုင်ငံသားများက ပေးနေခြင်း ဖြစ်ကြောင်း သိရသည်။

ပြီးခဲ့သည့်နှစ် ဇွန်လမှ ဒီဇင်ဘာလအတွင်း မီဇိုရမ်ပြည်နယ်သို့ ပြည်ပနိုင်ငံသား ၂၀၀၀ ခန့် ရောက်ရှိလာခဲ့သည်။

ထိုအထဲမှ အများစုသည် ကမ္ဘာလှည့် ခရီးသွားများအဖြစ် လာရောက်ကြခြင်း မဟုတ်ဘဲ ပြည်နယ်အတွင်းမှ အကြောင်းမကြားဘဲ ထွက်ခွာသွားကြသည်ဟု မီဇိုရမ်ပြည်နယ်ဝန်ကြီးချုပ် လာဒူဟိုမာက လွှတ်တော်တွင် ပြောကြားခဲ့သည်။

အချို့ ပြည်ပနိုင်ငံသားများသည် မြန်မာနိုင်ငံ၏ ချင်းတောင်တန်းဒေသများတွင် စစ်သင်တန်းများပေးရန်အတွက် အိန္ဒိယ-မြန်မာ နယ်စပ်ကိုဖြတ်ပြီး ချင်းတောင်တန်းဒေသသို့ ဝင်ရောက်သွားခဲ့သည်ဟု ၎င်းက ဆိုသည်။

လက်ရှိ ပထဝီနိုင်ငံရေး အခြေအနေများနှင့် မိမိတို့အိမ်နီးချင်း မြန်မာနိုင်ငံ၏ အခြေအနေများကို အမေရိကန်နှင့် တရုတ် အပါအဝင် နိုင်ငံအများအပြားက အနီးကပ်စောင့်ကြည့်နေကြသည်ဟု လာဒူဟိုမာက ပြောသည်။

ချင်းသူပုန် CNA ဌာနချုပ်ကို မီဇိုရမ်လွှတ်တော်အမတ် ရောက်လာခဲ့စဉ်

ထို့ကြောင့် မီဇိုရမ်ပြည်နယ်သည် ပြည်ပနိုင်ငံသားများ အသုံးပြုသည့် ခရီးတစ်ထောက်  ဖြတ်သန်းသွားလာသော နေရာအဖြစ် အသုံးချခံနေရသဖြင့် ဗဟိုအစိုးရအတွက် ကြီးမားသည့် စိုးရိမ်စရာကိစ္စ ဖြစ်လာခဲ့ကြောင်း ပြည်နယ် ဝန်ကြီးချုပ်က ပြောသည်။

ထိုအခြေအနေ အရပ်ရပ်ကြောင့် ပြည်နယ်အတွင်း သတ်မှတ်ထားသည့် နေရာများကို သွားလာခွင့်ပါမစ် ရရှိရန် လိုအပ်သော စနစ်ကို ပြန်လည်ကျင့်သုံးရမည့် အခြေအနေသို့ ရောက်ရှိစေခဲ့ကြောင်း  ၎င်းက ပြောကြားခဲ့သည်။

မြန်မာနိုင်ငံသို့ ပြည်ပနိုင်ငံသားများ ဖြတ်သန်းဝင်ရောက်လေ့ရှိသည့် အခြားပြည်နယ်များတွင်လည်း PAP စနစ်ကို ပြန်လည်ကျင့်သုံးခဲ့သည်ဟု လာဒူဟိုမာက ပြောသည်။

အစောပိုင်းက PAP စနစ်ကို ပြန်လည်ကျင့်သုံးမည့် ဆုံးဖြတ်ချက်ကို မီဇိုရမ်ပြည်နယ်အစိုးရက ဆန့်ကျင်ကန့်ကွက် ခဲ့သော်လည်း နောက်ပိုင်းတွင် ဗဟိုအစိုးရ၏ သဘောထားကို သိရှိနားလည်သွားခဲ့သည်ဟု ၎င်းက ပြောသည်။

လက်ရှိတွင် PAP စနစ်ကျင့်သုံးသည့် ပြည်နယ်များသည် အာရူနာချယ် ပရာဒေ့ရှ် (Arunachal Pradesh) ၊ ဆစ်ကင်မ် (Sikkim) ၊ မဏိပူရ (Manipur) ၊ နာဂလန်း (Nagaland) ၊ မီဇိုရမ် (Mizoram) ၊ ဂျမူးနှင့် ကက်ရှ်မီးယား (Jammu and Kashmir) ၊ ဟီမာချယ် ပရာဒေ့ရှ် (Himachal Pradesh) ၊ ရာဂျက်စ်သန် (Rajasthan) ၊ ဥတ္တရာခန်း (Uttarakhand) ပြည်နယ်များ ပါဝင်သည်။

Source: NDTV

CNI International News

ဟောင်ကောင်၊ မတ်လ ၁၁

မြန်မာနိုင်ငံတွင် လက်နက်ကိုင်ပဋိပက္ခများ ဖြစ်ပွားနေမှုနှင့်အတူ တောင်သူလယ်သမားများသည် ကောက်ပဲသီးနှံ များအစား အသက်ရှင် ရပ်တည်ရေးအတွက် ဘိန်းပင်များကို စိုက်ပျိုးရသည့် အခြေအနေသို့ ရောက်ရှိစေခဲ့သည်ဟု South China Morning Post မှ ဖော်ပြခဲ့သည်။ 

ပဋိပက္ခကြောင့် အိမ်ပစ်ရာပစ် ထွက်ပြေးတိမ်းရှောင်ခဲ့ရသည့် လယ်သမားတစ်ဦးဖြစ်သူ ဦးအောင်လှကမူ သူသည် အသက်ရှင် ရပ်တည်ရေးအတွက် ဘိန်းပင်များ စိုက်ပျိုးရန်သာ ရွေးချယ်ခဲ့ရသည်ဟု ဆိုသည်။
အသက် ၃၅ နှစ်အရွယ် ဦးအောင်လှသည် ၂၀၂၁ ခုနှစ်တွင် တပ်မတော်က အာဏာကို လွှဲပြောင်းမရယူမီက စပါးစိုက်တောင်သူတစ်ဦးအဖြစ် အသက်မွေးဝမ်းကြောင်း ပြုခဲ့သည်ဟု ဆိုသည်။

လက်နက်ကိုင်ပဋိပက္ခများ ဖြစ်ပွားလာချိန်တွင် ဦးအောင်လှသည် ၎င်းနေထိုင်သည့် မိုးဗြဲကျေးရွာရှိ စိုက်ခင်းကို ဆုံးရှုံးခဲ့ရပြီးနောက် ပြန်လည် အခြေချနေထိုင်ရချိန်၌ စပါးများစိုက်ရန် အခြေအနေ မပေးသဖြင့် စားဝတ်နေရေး အတွက် ဘိန်းစိုက်ရန် ရွေးချယ်ခဲ့ရသည်ဟုဆိုသည်။

မြန်မာနိုင်ငံက ဘိန်းခင်းတစ်ခုကို တွေ့ရစဉ်

“လူတိုင်းကတော့ ချမ်းသာချင်လို့ ဘိန်းစိုက်ကြတာလို့ ထင်မိကြမှာပါ။ ဒါပေမယ့် ကျနော်တို့က အသက်ရှင် ရပ်တည်ဖို့ အတွက် လုပ်နေရတာပါ” ဟု ရှမ်းပြည်နယ်အရှေ့ပိုင်း ဖယ်ခုံမြို့နယ်၏ ကျေးလက်ဒေသတွင် နေထိုင်သည့် ဦးအောင်လှက ပြောသည်။

ဘိန်းစိုက်ပျိုးရသည့်အတွက် စိတ်မကောင်း ဖြစ်မိသော်လည်း ဘိန်းစိုက်ပျိုးမှုမှရရှိသည့် ဝင်ငွေသည် ၎င်းအတွက် ထမင်းမငတ်စေရန် တစ်ခုတည်းသော နည်းလမ်းဖြစ်သည်ဟု ပြောကြားခဲ့သည်။

မြန်မာနိုင်ငံသည် အရှေ့တောင်အာရှ၏ အဆင်းရဲဆုံး နိုင်ငံများထဲတွင် ပါဝင်နေမှုနှင့်အတူ ကျေးလက်ဒေသတွင် နေထိုင်သူများအတွက် ဝင်ငွေအရင်းအမြစ်များမှာ နည်းပါးလှသည်။

ထို့ကြောင့် တောင်သူလယ်သမားများသည် စပါးနှင့် ဟင်းသီးဟင်းရွက်ကဲ့သို့ ကောက်ပဲသီးနှံများထက် ပိုမိုဝင်ငွေ ရရှိနိုင်သည့် ဘိန်းပင်များကို စိုက်ပျိုးရန် ရွေးချယ်လာခြင်းဖြစ်သည်ဟု ကျွမ်းကျင်သူများက ပြောကြားခဲ့သည်။

မြန်မာနိုင်ငံသည် ဘိန်းထုတ်လုပ်မှု အများဆုံး နိုင်ငံများစာရင်းတွင် ပါဝင်နေပြီး ဘိန်းများကို ဘိန်းဖြူအဆင့်သို့ ထုတ်လုပ်ကာ တရုတ်နှင့် အိမ်နီးချင်းနိုင်ငံများသို့ မှောင်ခိုတင်ပို့နေသည်ဟု ကုလသမဂ္ဂက ဖော်ပြခဲ့သည်။

Source: South China Morning Post

CNI International News

ဝါရှင်တန်၊ မတ်လ ၁၁

အမေရိကန်သမ္မတ ဒေါ်နယ်ထရမ့် (Donald Trump) သည် ဂျပန်နှင့် တောင်ကိုရီးယားတို့အား အမေရိကန်၏ အကာအကွယ်ကို ရယူထားသည့်အတွက် လုံခြုံရေးထောက်ပံ့ကြေးများ ပိုမိုပေးဆောင်ရန် တောင်းဆိုဖွယ်ရှိ ကြောင်း South China Morning Post မှ ဖော်ပြခဲ့သည်။

ထို့ကြောင့် ထရမ့်၏ အစိုးရအဖွဲ့သည် အနောက်ပစိဖိတ်ဒေသရှိ အမေရိကန်၏ အနီးကပ်ဆုံး မဟာမိတ်ဖြစ်သည့် ဂျပန်နှင့် တောင်ကိုရီးယားတို့ထံမှ လုံခြုံရေးနှင့်ကုန်သွယ်ရေးဆိုင်ရာ တောင်းဆိုမှုများပြုလုပ်ရန် ပြင်ဆင်နေဖွယ်ရှိ သည်ဟု ကျွမ်းကျင်သူများက ပြောကြားခဲ့သည်။

ဂျပန်နှင့် တောင်ကိုရီးယားတို့တွင် အမေရိကန်စစ်သားများ ဖြန့်ကြက်ချထားပြီး ကာကွယ်ပေးထားရသဖြင့် ထရမ့် သည် ဂျပန်နှင့်တောင်ကိုရီးယားထံမှ အခကြေးငွေများ ပိုမိုတောင်းဆိုဖွယ်ရှိသည်။

ထိုတောင်းဆိုချက်ကို လိုက်နာခြင်းမပြုပါက ထိုနိုင်ငံများတွင် ဖြန့်ကြက်ချထားသည့် အမေရိကန်စစ်သားများကို ဒေါ်နယ်ထရမ့်က ပြန်လည်ရုပ်သိမ်းမည်ဟု ခြိမ်းခြောက်ထားသည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

“အရေးအကြီးဆုံး အချက်ကတော့ အမေရိကန်ဟာ ဂျပန်၊ တောင်ကိုရီးယား ဒါမှမဟုတ် ထိုင်ဝမ်တို့ကို အကာအကွယ်ပေးသွားမယ့် သန္နိဋ္ဌာန်မျိုး မရှိတော့တာကို ထရမ့်ရဲ့ မှတ်ချက်စကားတွေအရ သတိထားမိပါတယ်” ဟု တိုကျိုမြို့တော်ရှိ Temple University မှ မျက်မှောက်ခေတ် အာရှရေးရာလေ့လာရေးဌာနမှ တွဲဖက်ညွှန်ကြား ရေးမှူး ရောဘတ် ဒူဂျာရစ် (Robert Dujarric) က ပြောကြားခဲ့သည်။

“တကယ်လို့ ခင်ဗျားဟာ ဂျပန်အစိုးရအဖွဲ့ထဲက အရာရှိတစ်ဦးဖြစ်နေပြီး အမေရိကန်ရဲ့ လုံခြုံရေးထီးရိပ် (လုံခြုံရေး အကာအကွယ်) ကို ယုံကြည်နေသေးတယ်ဆိုရင်တော့ ထရမ့်ဟာ သူ့ရဲ့ အိမ်ထောင်ရေးမှာ သစ္စာစောင့် သိတဲ့ လူမျိုးဖြစ်တယ်လို့ ယုံကြည်နေတဲ့ လူတွေထဲမှာ ပါဝင်သွားပါလိမ့်မယ်”ဟု ရောဘတ်က South China Morning Post ၏ This Week in Asia အစီအစဉ်ကို ပြောကြားခဲ့သည်။

ထရမ့်သည် ကာလကြာရှည် တည်ရှိခဲ့သည့် အမေရိကန်-ဂျပန် လုံခြုံရေးစာချုပ်ကို မျှတမှုမရှိကြောင်း ပြောကြား ခဲ့ပြီး တောင်ကိုရီးယားသည်လည်း အမေရိကန်ကို စီးပွားရေးအရ အမြတ်ထုတ်နေကြောင်း စွပ်စွဲခဲ့သည်။

ထို့ကြောင့် ဂျပန်နှင့် တောင်ကိုရီးယားတို့သည် အမေရိကန်၏ လုံခြုံရေး အကူအညီအတွက် ထရမ့်ဘက်မှ တောင်းဆိုမှုများအတွက် ကြိုတင်ပြင်ဆင်ထားရန် လိုအပ်ကြောင်း ကျွမ်းကျင်သူများက ပြောကြားခဲ့သည်။

Source: South China Morning Post

CNI International News

ဘေဂျင်း၊ မတ်လ ၁၁

တရုတ်သည် လွန်ခဲ့သည့် ၅ နှစ်အတွင်း ပြည်ပမှ လက်နက်များကို တင်သွင်းဝယ်ယူမှုသည် ၃ ပုံ ၂ ပုံနီးပါး လျော့ကျခဲ့သဖြင့် ကိုယ့်အားကိုကိုယ်မှုကို ပြသရာ ရောက်ခဲ့သည်ဟု South China Morning Post မှ ဖော်ပြခဲ့ သည်။

အဘယ်ကြောင့်ဆိုသော တရုတ်သည် ပြည်တွင်းလုပ် နည်းပညာများဖြင့် လက်နက်များကို ကိုယ်တိုင် ထုတ်လုပ် နိုင်သည့် အခြေအနေသို့ ရောက်ရှိလာခြင်းကြောင့် ဖြစ်သည်။

ဆွီဒင်နိုင်ငံအခြေစိုက် စတော့ဟုမ်း နိုင်ငံတကာ ငြိမ်းချမ်းရေး သုတေသန အင်စတီကျု (SIPRI) ၏ မတ်လ ၁၀ ရက် ထုတ်ပြန်ချက်အရ ၂၀၂၀ ပြည့်နှစ်မှ ၂၀၂၄ ခုနှစ်ကြား တရုတ်၏ လက်နက်ဝယ်ယူမှုသည် ၂၀၁၅ ခုနှစ်မှ ၂၀၁၉ ခုနှစ်နှင့် နှိုင်းယှဉ်ပါက ၆၄ ရာခိုင်နှုန်း ကျဆင်းသွားကြောင်း ဖော်ပြထားသည်။

ထိပ်သီးသုတေသနပညာရှင်တစ်ဦးဖြစ်သူ ဆီမွန် ဝိဇ်မန်းကို တွေ့ရစဉ်

ထိုအပြောင်းအလဲအရ တရုတ်၏ ပြည်တွင်း လက်နက် ထုတ်လုပ်ရေး လုပ်ငန်းများ ကြီးထွားလာမှုကို ဖော်ပြရာ ရောက်နေသည်ဟု ဆိုသည်။

တရုတ်သည် ယခင်က ရုရှားထံမှ ဝယ်ယူတင်သွင်းနေရသည့် လက်နက်ပစ္စည်း အစိတ်ပိုင်းများကို ပြည်တွင်းမှာပင် ဒီဇိုင်းဆွဲပြီး ထုတ်လုပ်နေသဖြင့် လာမည့်နှစ်များတွင်လည်း တရုတ်သည် ပြည်ပမှ လက်နက်ဝယ်ယူမှုများ လျော့ကျလာလိမ့်မည်ဟု SIPRI ၏ ထုတ်ပြန်ချက်တွင် သုံးသပ်ဖော်ပြထားသည်။

တရုတ်သည် နည်းပညာမြင့် လက်နက်များကို ပြည်ပမှ ဝယ်ယူတင်သွင်းမည့်အစား ပြည်တွင်းမှာပင် ထုတ်လုပ်နိုင် သည့် နည်းပညာကို အောင်မြင်စွာရရှိရန် နှစ်ပေါင်း ၃၀ ခန့် အချိန်ယူခဲ့ရသည်ဟု SIPRI ၏ လက်နက် အရောင်း အဝယ် လေ့လာစောင့်ကြည့်ရေးအစီအစဉ်မှ ထိပ်သီးသုတေသနပညာရှင်တစ်ဦးဖြစ်သူ ဆီမွန် ဝိဇ်မန်း (Siemon Wezeman) က ပြောကြားခဲ့သည်။

“ပြီးခဲ့တဲ့ ၅ နှစ်တာ ကာလအတွင်း တရုတ်က ရုရှားဆီက အများဆုံးဝယ်ယူခဲ့တဲ့ ပစ္စည်း ၂ မျိုးပဲ ရှိခဲ့ပါတယ်။ အဲဒါ တွေကတော့ ရဟတ်ယာဉ်တွေနဲ့ အင်ဂျင်တွေ ဖြစ်ပါတယ်။ အဲဒီအရာတွေကို ထုတ်လုပ်ဖို့အတွက် လုံလောက်တဲ့ နည်းပညာတွေမရှိရင် ပြည်တွင်းမှာ ထုတ်လုပ်ဖို့ ခက်ခဲပါလိမ့်မယ်။ ဒါပေမယ့် တရုတ်ကတော့ အခုချိန်မှာ အစဉ်အလာကို ချိုးဖျက်နိုင်ခဲ့ပါပြီ” ဟု ၎င်းက ဆိုသည်။

တရုတ်စစ်တပ်ကို တွေ့ရစဉ်

လက်ရှိတွင် တရုတ်သည် တိုက်လေယာဉ်များ၊ သယ်ယူပို့ဆောင်ရေး လေယာဉ်များနှင့် သင်္ဘောများအတွက် ၎င်း၏ ကိုယ်ပိုင်အင်ဂျင်များကို ထုတ်လုပ်နိုင်စွမ်းရှိလာသည်ဟု ဝိဇ်မန်းက ဆိုသည်။

ထို့ပြင် တရုတ်သည် ၎င်း၏ ကိုယ်ပိုင် ရဟတ်ယာဉ်များကိုလည်း တရုတ်ပြည်တွင်းမှာပင် ထုတ်လုပ်နိုင်လာသဖြင့် ရုရှားနှင့် ဥရောပနိုင်ငံများ၏ ဒီဇိုင်းများနှင့် ရဟတ်ယာဉ်များကို တင်သွင်းဝယ်ယူမှုအား လျှော့ချနိုင်ခဲ့ပြီဖြစ်သည်ဟု ဝိဇ်မန်းက ပြောကြားခဲ့သည်။

ထို့ပြင် တရုတ်သည် ကမ္ဘာပေါ်တွင် လက်နက်တင်ပို့ ရောင်းချမှုအများဆုံး ထိပ်သီး ၅ နိုင်ငံစာရင်း၌ ပါဝင်လာခဲ့ပြီး တရုတ်လုပ်လက်နက်များကို ပါကစ္စတန်၊ မြန်မာနှင့် အယ်လ်ဂျီးရီးယား အပါအဝင် နိုင်ငံအများအပြားသို့ ရောင်းချ နေသည်ဟုလည်း SIPRI က ဖော်ပြခဲ့သည်။

Source: South China Morning Post

CNI International News

အင်ဖာ၊ မတ်လ ၁၀

အိန္ဒိယနိုင်ငံတွင် လူမျိုးစုပဋိပက္ခ ဖြစ်ပွားခဲ့သည့် မဏိပူရပြည်နယ်၏ နယ်မြေအားလုံးတွင် လုံခြုံရေးတပ်ဖွဲ့များနှင့် ဆန္ဒပြသူများအကြား အဓိကရုဏ်းများ ဖြစ်ပွားခဲ့ကြောင်း Deccan Herald သတင်းဝက်ဘ်ဆိုက်မှ ဖော်ပြခဲ့သည်။

မဏိပူရပြည်နယ်၏ ကန်းပေါ့ပီ (Kangpokpi) ခရိုင်တွင် မတ်လ ၉ ရက် မနက်ပိုင်းက ကူကီး-ဇိုအဖွဲ့များက လမ်းများကို အလုံးစုံပိတ်ပစ်ရန် တိုက်တွန်းချက်ကြောင့် အခြေအနေမှာ အနည်းငယ် တည်ငြိမ်သွားခဲ့သည်ဟု ဆိုသည်။

မတ်လ ၈ ရက်က ထိုခရိုင်၏ နယ်မြေဒေသများတွင် ကူကီး ဆန္ဒပြသူများနှင့် လုံခြုံရေးတပ်ဖွဲ့များအကြား ခိုက်ရန် ဖြစ်ပွားခဲ့ပြီး ဆန္ဒပြသူ ၁ ဦးသေဆုံးသည်။

ထို့နောက် အမျိုးသမီးများနှင့် ရဲတပ်ဖွဲ့ဝင်များ အပါအဝင် လူပေါင်း ၄၀ ကျော် ဒဏ်ရာ ရရှိခဲ့ကြောင်း တာဝန်ရှိ သူများက ပြောကြားခဲ့သည်။

လုံခြုံရေးတပ်ဖွဲ့နဲ့ ကူကီးများ အဓိကရုဏ်းဖြစ်နေစဉ်

အိန္ဒိယပြည်ထဲရေးဝန်ကြီး အမစ်ရှား (Amit Shah) က ပြည်နယ်အတွင်း လွတ်လပ်စွာ လှုပ်ရှားသွားလာခွင့် ရှိစေရန် အမိန့်ထုတ်ပြန်ခဲ့ပြီးနောက် ထိုအမိန့်ကို ဆန့်ကျင်သူများက ဆန္ဒပြခဲ့ခြင်းဖြစ်သည်။

ရဲတပ်ဖွဲ့က ဆန္ဒပြသူများကို မျက်ရည်ယိုဗုံးများ အသုံးပြုပြီး လူစုခွဲခဲ့ချိန်တွင် ကူကီးများ လွှမ်းမိုးထားသည့် ရပ်ကွက်များ၌ ဆန္ဒပြသူများနှင့် လုံခြုံရေးတပ်ဖွဲ့များ ခိုက်ရန်ဖြစ်ပွားခဲ့ခြင်းဖြစ်သည်။

အာဏာပိုင်များက ဂမ်ဂီဖီ (Gamghiphai) ကျေးရွာနှင့် အင်ဖာ-ဒီမာပူလမ်းမကြီး (Imphal-Dimapur Road) ဖြစ်သည့် NH-2 လမ်းမပေါ်တွင် လုံခြုံရေးတပ်ဖွဲ့များ ဖြန့်ကြက်ချထားခဲ့ပြီး တရားဥပဒေစိုးမိုးမှုကို စိတ်ချ သေချာစေရန် ကင်းလှည့်မှုများ ပြုလုပ်လျက်ရှိသည်ဟု ခရိုင်အရာရှိတစ်ဦးက ပြောကြားခဲ့သည်။

ဆန္ဒပြသူများသည် မတ်လ ၈ ရက် ညပိုင်းအထိ လုံခြုံရေးတပ်ဖွဲ့များနှင့် အဓိကရုဏ်း ဖြစ်ပွားခဲ့ပြီး လုံခြုံရေး တပ်ဖွဲ့ဝင်များ၏ ကား ၅ စီးက လေကာမှန်များ ထိခိုက်ပျက်စီးခဲ့သည်ဟု ဆိုသည်။

ကူကီး-ဇို အဖွဲ့ဖြစ်သည့် တိုင်းရင်းသားလူမျိုးစု ခေါင်းဆောင်များဖိုရမ် (ITLF) ကမူ လုံခြုံရေးတပ်ဖွဲ့များ၏ အင်အားသုံးဖြိုခွင်းမှုကို ဆန့်ကျင်သည့် အနေဖြင့် ပြည်နယ်အတွင်းရှိ ကူကီးများ အခြေချနေထိုင်သော နေရာ ဒေသအားလုံးတွင် လမ်းများပိတ်ဆို့မှု ပြုလုပ်ရန် တိုက်တွန်းခဲ့သည့် ကူကီး-ဇိုကောင်စီ (KZC) ၏ တိုက်တွန်း ချက်ကို ထောက်ခံခဲ့သည်။

ကူကီး-ဇို လူမျိုးများ နေထိုင်သည့်ဒေသများတွင် ကသည်းလူမျိုးများအား ဖြတ်သန်းသွားလာခွင့် ပြုခဲ့သည့် အိန္ဒိယ အစိုးရ၏ ဆုံးဖြတ်ချက်ကြောင့် ကန်းပေါ့ပီခရိုင်တွင် ဆန္ဒပြမှုများ ဖြစ်ပွားခဲ့ပြီး လုံခြုံရေးတပ်ဖွဲ့များက အင်အား သုံး ဖြိုခွင်းခဲ့ကြောင်း ထို့ကြောင့် ကူကီး-ဇို လူမျိုးများနေထိုင်သည့် နေရာဒေသများ အားလုံးကို သွားရေးလာရေး ပိတ်ဆို့ပစ်ရန် တောင်းဆိုချက်အား ထောက်ခံကြောင်း ITLF က ထုတ်ပြန်ခဲ့သည်။

ထို့ပြင် မတ်လ ၈ ရက်က ဆန္ဒပြမှုများတွင် ပါဝင်ခဲ့သူတိုင်းကိုလည်း မိမိတို့က လေးစားကြောင်း ထုတ်ပြန်ချက်၌  ဖော်ပြခဲ့သည်။

Source: Daccan Herald

CNI International News

တီဟီရန်၊ မတ်လ ၁၀

အီရန်အနေဖြင့် အမေရိကန်၏ အနိုင်ကျင့် ဗိုလ်ကျမှုများအောက်တွင် ဆွေးနွေးညှိနှိုင်းမှုများ ပြုလုပ်သွားမည် မဟုတ်ကြောင်း အီရန်၏ အမြင့်ဆုံးခေါင်းဆောင် အယာတိုလာ အလီခါမေနီ ( Ayatollah Ali Khamenei) က ပြောကြားခဲ့သည်ဟု ရိုက်တာမှ ဖော်ပြခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) က သူသည် အီရန် နျူကလီးယား သဘောတူညီချက်ကို ဆွေးနွေးရန် အီရန်၏ အမြင့်ဆုံးခေါင်းဆောင်ထံ စာတစ်စောင် ရေးသားပေးပို့ခဲ့ကြောင်း ပြောကြားခဲ့ပြီးနောက် ခါမေနီ၏ မှတ်ချက်စကား ထွက်ပေါ်ခဲ့ခြင်းဖြစ်သည်။

ထရမ့်သည့် Fox Business နှင့် ပြုလုပ်ခဲ့သည့် အင်တာဗျူးတွင် “အီရန်လုပ်နိုင်တာ ၂ ခုရှိပါတယ်။ စစ်ရေးအရ အရေးယူခံမလား ဒါမှမဟုတ် သဘောတူညီချက်အတွက် ဆွေးနွေးမလား ဆိုတာပါပဲ” ဟု ပြောကြားခဲ့သည်။

ခါမေနီကမူ အီရန်အစိုးရ အရာရှိများနှင့် ပြုလုပ်သည့် အစည်းအဝေးတွင် အမေရိကန်သည် ၎င်းတို့၏ တစ်ဖက် သတ် ထင်မြင်ယူဆချက်များကို အကောင်အထည်ဖော်ရန်သာ ရည်ရွယ်ထားကြောင်း ပြောကြားခဲ့သည်။

“ဆွေးနွေးညှိနှိုင်းမှုတွေနဲ့ ပတ်သက်ပြီး အနိုင်ကျင့်ဗိုလ်ကျတဲ့ အစိုးရအချို့ရဲ့ တောင်းဆိုမှုတွေဟာ ပြဿနာတွေကို မဖြေရှင်းနိုင်ပါဘူး။ သူတို့ရဲ့ တောင်းဆိုချက်တွေက အီရန်ရဲ့ နျူကလီးယား စီမံကိန်းအတွက်သာ မဟုတ်ဘဲ လုံးဝ လက်ခံလို့မရတဲ့ သူတို့ရဲ့ ထင်မြင်ယူဆချက်တွေကို ဖော်ပြနေတာဖြစ်ပါတယ်”ဟု ခါမေနီက ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်နဲ့ အီရန်ခေါင်းဆောင် အလီခါမေနီကို တွေ့ရစဉ်

ခါမေနီ၏ မှတ်ချက်စကားများကို တုန့်ပြန်သည့် အနေဖြင့် အိမ်ဖြူတော် အမျိုးသားလုံခြုံရေးကောင်စီ ပြောရေးဆိုခွင့်ရှိသူ ဘရိုင်ယန် ဟုချ် (Brian Hughes) ကလည်း အီရန်အပေါ် သမ္မတထရမ့်၏ ပြောကြားချက် ကဲ့သို့ တင်းမာသည့် စကားလုံးများဖြင့် ပြောကြားခဲ့သည်။

“အီရန် အစိုးရအနေနဲ့ ကြောက်မက်ဖွယ် အခြေအနေတွေထက် သူ့ပြည်သူတွေနဲ့ အကောင်းဆုံး အကျိုးစီးပွားတွေ ကို ရှေ့တန်းတင်ဖို့ ကျနေည်တို့ မျှော်လင့်ပါတယ်”ဟုချ်က ပြောကြားခဲ့သည်။

မတ်လ ၇ ရက်တွင် ထရမ့်က သူသည် အီရန်၏ အမြင့်ဆုံးခေါင်းဆောင်ထံ စာတစ်စောင် ရေးသားပေးပို့ခဲ့ပြီး အီရန်၏ နျူကလီးယား စီမံကိန်းနှင့်ပတ်သက်ပြီး ဆွေးနွေးပွဲအသစ်များ ပြုလုပ်ရန် တိုက်တွန်းခဲ့ကြောင်း၊ သို့သော် အီရန်အနေဖြင့် ငြင်းဆိုမည်ဆိုပါက  စစ်ရေးဖြင့် အရေးယူသွားမည်ဟု သတိပေးခဲ့ကြောင်း ပြောကြားခဲ့သည်။

အီရန်နိုင်ငံခြားရေးဝန်ကြီး အာဘက်စ် အာရက်ချီ (Abbas Araghchi) ကမူ အီရန်သည် မတ်လ ၈ ရက်အထိ အမေရိကန်သမ္မတထံမှ ပေးပို့သည့်စာကို လက်ခံရရှိခြင်း မရှိသေးကြောင်း ပြောကြားခဲ့သည်။

Source: ရိုက်တာ

CNI International News

ဝါရှင်တန်၊ မတ်လ ၁၀

တရုတ်သည် အမေရိကန်နှင့် ဖြစ်ပွားနေသော ကုန်သွယ်ရေးစစ်ပွဲတွင် ယခင်လက်ထက်က အခြေအနေများကို သုံးသပ်၍ နည်းဗျူဟာ ပြောင်းလဲဖွယ်ရှိကြောင်း အေပီသတင်းဌာနမှ ဖော်ပြခဲ့သည်။

အမေရိကန်၏ အခွန်များ တိုးမြှင့်ကောက်ခံမှုနှင့်ပတ်သက်ပြီး အငြင်းပွားမှုများကို အဖြေရှာရန် ကနေဒါနှင့် မက္ကဆီ ကို ခေါင်းဆောင်များက အမေရိကန်သမ္မတ ဒေါ်နယ်ထရမ့် (Donald Trump) နှင့် ဖုန်းဆက်သွယ်ဆွေးနွေးမှုများ ပြုလုပ်ခဲ့သော်လည်း တရုတ်သမ္မတ ရှီကျင့်ဖျင် (Xi Jinping) ကမူ ထိုကဲ့သို့ လုပ်ဆောင်ဖွယ်မရှိကြောင်း ပြော သည်။

တရုတ်သည် အမေရိကန်နှင့် ဆက်ဆံရေးတွင် ကနေဒါ၊ မက္ကဆီကိုတို့နှင့် မတူဘဲ အမေရိကန်နှင့်လည်း နှစ်ပေါင်း များစွာကြာ ကုန်သွယ်ရေးနှင့်နည်းပညာစစ်ပွဲ ဖြစ်ပွားခဲ့သည်။

တရုတ်သမ္မတ ရှီကျင့်ဖျင်ကို တွေ့ရစဉ်

ထို့ကြောင့် ကနေဒါနှင့် မက္ကဆီကိုတို့က ထရမ့်နှင့် ဖုန်းဆက်သွယ် ဆွေးနွေးမှုများ ပြုလုပ်နေချိန်တွင် တရုတ်က မတူကွဲပြားသည့် ချဉ်းကပ်မှုကို လုပ်ဆောင်ခဲ့ပြီး မည်သည့် ဆွေးနွေးညှိနှိုင်းမှုမဆို သာတူညီမျှ လုပ်ဆောင်သင့် ကြောင်း ရှင်းလင်းစွာ ပြောကြားခဲ့သည်။

တရုတ်ခေါင်းဆောင်များကလည်း အမေရိကန်နှင့် ဆွေးနွေးပွဲများအတွက် လမ်းဖွင့်ထားကြောင်း ပြောကြားခဲ့ သော်လည်း အမေရိကန်၏ အခွန်တိုးကောက်မှု အတွက်လည်း ပြင်ဆင်မှုများ ပြုလုပ်ထားကြောင်း ပြောကြား ခဲ့သည်။

အမေရိကန်သမ္မတ ထရမ့်သည် တရုတ်၏ ပို့ကုန်များအပေါ် အခွန် ၂၀ ရာခိုင်နှုန်း တိုးမြှင့် ကောက်ခံခဲ့ပြီးနောက် တရုတ်ကလည်း ပြီးခဲ့သည့် သီတင်းပတ်မှစပြီး အမေရိကန်၏ ကုန်စည်များကို အခွန်များ ပြန်လည် တိုးမြှင့် ကောက်ခံခဲ့သည်။

“အမေရိကန်က အခွန်တိုးကောက်မယ်ဆိုရင် ကျနော်တို့ဘက်ကလည်း လက်တုန့်ပြန်ဖို့ကလွဲပြီး ကျန်တာ ရွေးစရာမရှိပါဘူး။ တရုတ်က ဆွေးနွေးချင်စိတ်မရှိတာ မဟုတ်ပါဘူး။ ဒါပေမယ့် ဆွေးနွေးဖို့အတွက်လည်း အသနားခံတာမျိုးတွေ လုပ်မှာမဟုတ်ပါဘူး”ဟု ဝါရှင်တန်အခြေစိုက် Stimson Center မှ တရုတ်ရေးရာ ညွှန်ကြားရေးမှူး ဆွန်းယန်း (Sun Yun) က ပြောကြားခဲ့သည်။

 အမေရိကန်သမ္မတ ဒေါ်နယ်ထရမ့်ကို တွေ့ရစဉ်

“ရှီကတော့ နိုင်ငံရေးနဲ့ မဟာဗျူဟာ အကြောင်းတရားတွေအရ သူ့အတွက် ထိခိုက်နစ်နာမယ့်အရာကို လုပ်မှာ မဟုတ်ပါဘူး။ အမေရိကန်နဲ့ ကုန်သွယ်ရေးစစ်ပွဲမှာ ရှီက အသနားခံမယ့် နေရာမှာ နေမှာမဟုတ်ပါဘူး။ အဲဒီအစား အမေရိကန်ကို ပြန်လည် ထိုးနှက်သွားပါလိမ့်မယ်” ဟု အာရှ လူမှုရေးမူဝါဒ အင်စတီကျုမှ နိုင်ငံတကာ လုံခြုံရေး နှင့်သံတမန်ရေး ဒုဥက္ကဋ္ဌ ဒန်နီယယ် ရပ်ဆဲလ် ( Daniel Russel) က ပြောကြားခဲ့သည်။

တရုတ်သည် ကမ္ဘာ့ဒုတိယစီးပွားရေး အင်အားအကြီးဆုံး နိုင်ငံဖြစ်သည်နှင့်အညီ ဒေသတွင်းနှင့် ကမ္ဘာလုံးဆိုင်ရာ စင်မြင့်ထက်တွင် ကြီးမားသည့် အင်အားစုတစ်ခုဖြစ်ပြီး အမေရိကန် အပါအဝင် နိုင်ငံအားလုံး၏ လေးစားမှုကို ရရှိထားသည်။

မတ်လ ၄ ရက်က တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူက အမေရိကန်နှင့်ပတ်သက်ပြီး တင်းမာ သည့် မှတ်ချက်စကားကို ပြောကြားခဲ့ခြင်းဖြင့် အမေရိကန်၏ အခွန်တိုးကောက်မှုကို ပြင်းထန်စွာတုန့်ပြန်ခဲ့သည်။

“တကယ်လို့ အမေရိကန်က တခြား အစီအစဉ်တစ်ခု ရှိနေမယ်ဆိုရင်၊ အမေရိကန်ရဲ့ ဆန္ဒက စစ်ဖြစ်ဖို့ဆိုရင် အခွန် စစ်ပွဲပဲဖြစ်ဖြစ်၊ ကုန်သွယ်ရေးစစ်ပွဲပဲဖြစ်ဖြစ် ဘယ်လိုစစ်ပွဲမျိုးကိုမဆို ကျနော်တို့က အဆုံးအထိ တိုက်သွားဖို့ အဆင်သင့်ပါပဲ”ဟု တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူက မတ်လ ၄ ရက်တွင် ပြောကြားခဲ့ သည်။

Source: အေပီ