CNI International News

တိုကျို၊ အောက်တိုဘာ ၈

အိန္ဒိယနိုင်ငံအနေဖြင့် လွဲမှားသည့် နိုင်ငံခြားရေးမူဝါဒကို ကျင့်သုံးမည်ဆိုပါက တောင်အာရှဒေသတွင် မိတ်ဖက် နိုင်ငံများကို ချိတ်ဆက်နိုင်လိမ့်မည် မဟုတ်ကြောင်း ကျွမ်းကျင်သူများက ပြောကြားခဲ့သည်ဟု Nikkei Asia မှ ဖော်ပြခဲ့သည်။

အိန္ဒိယသည် သီရိလင်္ကာ အပါအဝင် အခြားအိမ်နီးချင်းနိုင်ငံများနှင့် ဆက်ဆံရေးကို တိုးမြှင့်ပြီး အာရှထိပ်သီး အင်အားကြီးနိုင်ငံအဖြစ် တရုတ်နှင့် အားပြိုင်ရန် အိန္ဒိယဝန်ကြီးချုပ် မိုဒီ (Narendra Modi) ကြိုးပမ်းနေချိန် ထိုကဲ့သို့ မှတ်ချက်စကားများ ထွက်ပေါ်လာခဲ့ခြင်းဖြစ်သည်။

မည်သို့ပင်ဆိုစေ အိန္ဒိယ၏ လွဲမှားသည့် သံတမန် ပရိယာယ်အချို့နှင့်အတူ အိမ်နီးချင်းနိုင်ငံများတွင် ဖြစ်ပွားနေ သော နိုင်ငံရေး အခြေအနေများက မိုဒီ၏ အားထုတ်ကြိုးပမ်းမှုများကို လျော့နည်းစေခဲ့သည်။

ဥပမာအားဖြင့် သီရိလင်္ကာတွင် စက်တင်ဘာ ၂၁ ရက်က ပြုလုပ်သည့် သမ္မတရွေးကောက်ပွဲ၌ လူမှုရေး၊ စီးပွားရေး၊ နိုင်ငံရေးများ လွှမ်းမိုးထားသည့် အဖွဲ့အစည်းများ၊ အယူအဆများကို ဆန့်ကျင်သည့် ဝါဒီတစ်ဦးဖြစ်သူ လွှတ်တော် အမတ် အနူရာ ကုမာရ ဒစ္စနာယာကီ (Anura Kumara Dissanayake) က အနိုင်ရရှိခဲ့သည်။

သီရိလင်္ကာ သမ္မတရွေးကောက်ပွဲအနိုင်ရ ဒစ္စနာယာကီကို တွေ့ရစဉ်

သို့သော် ၎င်း၏ Janatha Vimukthi Peramuna (JVP) ပါတီ ဦးဆောင်သည့် ညွန့်ပေါင်းအဖွဲ့သည် နေရာ ၂၂၅ နေရာရှိသည့် လွှတ်တော်တွင် ၃ နေရာသာ ရရှိခဲ့သဖြင့် ဒစ္စနာယာကီသည် လွှတ်တော်ကိုဖျက်သိမ်းကာ နိုဝင်ဘာ ၁၄ ရက်တွင် အထွေထွေရွေးကောက်ပွဲ ခေါ်ယူရမည်ဖြစ်သည်။

ထို့ကြောင့် သီရိလင်္ကာသည် ပြည်တွင်းရေး ကိစ္စများနှင့် လုံးပန်းနေရသဖြင့် အိန္ဒိယနှင့် ဆက်ဆံရေးကို ဦးစားမပေး နိုင်ဘဲ ပြည်တွင်းရေးကိစ္စများကိုသာ ဦးစားပေး လုပ်ဆောင်မည်ဖြစ်သည်။

သီရိလင်္ကာကဲ့သို့ အိန္ဒိယ၏ အိမ်နီးချင်း နိုင်ငံအချို့တွင်လည်း ချက်ချင်းဖြေရှင်းရန် လိုအပ်သည့် ပြည်တွင်းရေး ကိစ္စများ ရှိနေသဖြင့် ထိုနိုင်ငံများသည် မိမိတို့ပြည်တွင်းရေးကိုသာ ဦးစားပေး လုပ်ဆောင်ဖွယ် ရှိနေသည်ဟု ကျွမ်းကျင်သူများက သုံးသပ်ခဲ့သည်။

ထို့ပြင် အိန္ဒိယသည် အရှေ့တောင်အာရှတွင်လည်း အဓိပ္ပာယ်ပြည့်ဝသည့် အခန်းကဏ္ဍမှ ပါဝင်ဆောင်ရွက်ရန် ရုန်းကန်နေရသည်ဟု လေ့လာသူများက ပြောသည်။

အိန္ဒိယအစိုးရသည် အာဆီယံဒေသအတွင်း လုံခြုံရေး၊ ကုန်သွယ်ရေးနှင့် ယဉ်ကျေးမှုကဏ္ဍတို့တွင် ၎င်း၏ပုံရိပ်ကို မြှင့်တင်ရန် ရည်ရွယ်ပြီး Look/Act East အမည်ရှိ မူဝါဒကို နှစ်ပေါင်း ၃၀ ကြာ ကျင့်သုံးခဲ့သော်လည်း ထင်ထား သလောက် အရှိန်အဟုန် မရရှိခဲ့ဘဲ အရှေ့တောင်အာရှတွင် အဓိပ္ပာယ်ပြည့်ဝသည့် အခန်းကဏ္ဍမှ ပါဝင်ရန် ရုန်းကန်ခဲ့ရသည်။

Source: Nikkei Asia

CNI International News

ဘန်ကောက်၊ အောက်တိုဘာ ၈

မြန်မာနိုင်ငံတွင် ဖြစ်ပွားနေသည့် ပြည်တွင်းစစ်ကို အဆုံးသတ်ရန် အာဆီယံအနေဖြင့် အဓိကနေရာမှ ပါဝင် ဆောင်ရွက်ရမည်ဟု ထိုင်းဝန်ကြီးချုပ် ပေတုန်တန်(Paetongtarn Shinawatra)က အောက်တိုဘာ ၇ ရက်တွင် ပြောကြားခဲ့ကြောင်း ရိုက်တာမှ ဖော်ပြခဲ့သည်။

ယခု သီတင်းပတ်အတွင်း လာအိုနိုင်ငံတွင် ပြုလုပ်မည့် အာဆီယံခေါင်းဆောင်များ ညီလာခံမတိုင်မီ ပေတုန်တန် က ထိုကဲ့သို့ ပြောကြားခဲ့ခြင်း ဖြစ်သည်။

မြန်မာနိုင်ငံတွင် တပ်မတော်က အာဏာကို ရယူခဲ့သည့် ၂၀၂၁ ခုနှစ်၊ ဖေဖော်ဝါရီလ ကတည်းက တပ်မတော်နှင့် လက်နက်ကိုင်များကြား တိုက်ပွဲများဖြစ်ပွားခဲ့သည်။

"အာဆီယံ အနေနဲ့ မြန်မာနိုင်ငံမှာ ငြိမ်းချမ်းရေး ပြန်လည်ရရှိဖို့ အရေးကြီးတဲ့နေရာက ပါဝင်ဆောင်ရွက် ပေးရပါ မယ်" ဟု ထိုင်းဝန်ကြီးချုပ် ပေတုန်တန်က ပြောသည်။

မြန်မာ့ပဋိပက္ခကို ဖြေရှင်းရန် ထိုင်းသည် လာမည့်နှစ် အာဆီယံဥက္ကဋ္ဌဖြစ်မည့် မလေးရှားနှင့် သံတမန်နည်းလမ်း အရ ပူးပေါင်းဆောင်ရွက်သွားမည်ဟု ၎င်းက ပြောသည်။ 

ထို့ပြင် အောက်တိုဘာ ၉ ရက်တွင် ပြုလုပ်မည့် အာဆီယံ ခေါင်းဆောင်များ ညီလာခံ၌ ကြေညာချက် တစ်စောင် ထုတ်ပြန်ရန် ကြိုးမ်းသွားမည်ဟု ပေတုန်တန်က ပြောသည်။

ထိုင်းဝန်ကြီးချုပ်ဟောင်း ဆရီသာ သာဗီဆင်ကို တွေ့ရစဉ်

ယခင်ဝန်ကြီးချုပ် ဆရီသာ သာဗီဆင် (Srettha Thavisin) ကမူ မြန်မာ့တပ်မတော်သည် အားနည်းနေသဖြင့် ဆွေးနွေးပွဲများအတွက် လမ်းဖွင့်ပေးရာ ရောက်နေကြောင်း၊ ဆွေးနွေးပွဲများနှင့် သဘောတူညီမှုများ ရရှိလိမ့်မည် ဖြစ်ကြောင်း ဧပြီလအတွင်းက ရိုက်တာသတင်းဌာနသို့ ပြောကြားခဲ့သည်။

အာဆီယံ၏ ၂၀၂၁ ခုနှစ်၊ ဧပြီလက ထုတ်ပြန်ခဲ့သည့် မြန်မာ့အရေး ဘုံသဘောတူညီချက် ၅ ချက်သည်လည်း တိုးတက်မှု အနည်းငယ်သာ ရရှိခဲ့သည်။

မြန်မာ့တပ်မတော်ကမူ လက်နက်ကိုင်အဖွဲ့များနှင့် ဆွေးနွေးရန် ငြင်းဆိုခဲ့ပြီး လက်နက်ကိုင်အဖွဲ့များကို အကြမ်းဖက်အဖွဲ့များအဖြစ် သတ်မှတ်ခဲ့သည်။

မြန်မာနိုင်ငံတွင် ဖြစ်ပွားနေသည့် ပဋိပက္ခများကြောင့် နိုင်ငံလူဦးရေ ၅၅ သန်း၏ ၃ ပုံ ၁ ပုံသည် လူသားချင်း စာနာ ထောက်ထားမှုဆိုင်ရာ အကူအညီ လိုအပ်နေပြီး ထိုအချက်ကို လာအိုတွင် ပြုလုပ်မည့် ညီလာခံ၌ ဆွေးနွေးသွား မည်ဖြစ်သည်။

ပြီးခဲ့သည့် သီတင်းပတ်ကလည်း အင်ဒိုနီးရှားနိုင်ငံသည် ကုလသမဂ္ဂ၊ မြန်မာ့တပ်မတော် အတိုက်အခံများ ပါဝင် သည့် နိုင်ငံတကာ ညီလာခံတစ်ခုကို အိမ်ရှင်အဖြစ် လက်ခံကျင်းပခဲ့သည်။

Source: ရိုက်တာ

CNI International News

ဂျေရုဆလင်၊ အောက်တိုဘာ ၈

ဂါဇာတွင် ဖြစ်ပွားသည့် တစ်နှစ်ကြာ စစ်ပွဲအတွင်း အစ္စရေးက ပစ်မှတ်ပေါင်း ၄၀,၀၀၀ ကျော်ကို ဗုံးကြဲ တိုက်ခိုက်ခဲ့ သည်ဟု ရိုက်တာမှ ဖော်ပြခဲ့သည်။

အစ္စရေးသည် ဥမင်လမ်းကြောင်း ၄၇၀၀ ကို တွေ့ရှိခဲ့ကာ ဒုံးကျည်ပစ်လွှတ်သည့် နေရာ ၁၀၀၀ ကို ဖျက်စီးခဲ့ ကြောင်း အစ္စရေးစစ်တပ်က ဂါဇာစစ်ပွဲ တစ်နှည့်ပြည့်သည့် အောက်တိုဘာ ၇ ရက်တွင် ထုတ်ပြန်ခဲ့သည်။

၂၀၂၃ ခုနှစ်၊ အောက်တိုဘာ ၇ ရက်နောက်ပိုင်း အစ္စရေးစစ်သား ၇၂၆ ဦး သေဆုံးခဲ့ပြီး ၎င်းတို့ထဲမှ ၃၈၀ ခန့်သည် ၂၀၂၃ ခုနှစ်၊ အောက်တိုဘာ ၇ ရက် တိုက်ခိုက်မှုတွင် သေဆုံးခဲ့ကာ ကျန် ၃၄၆ ဦးသည် ၂၀၂၃ ခုနှစ်၊ အောက်တိုဘာ ၂၇ ရက်မှ စတင်ဖြစ်ပွားသည့် ဂါဇာစစ်ပွဲအတွင်း သေဆုံးခဲ့သည်ဟု ဆိုသည်။

ထိုအချိန်မှ စတင်ပြီး ဒဏ်ရာရစစ်သား အရေအတွက် ၄၅၇၆ ဦး ရှိသည်။ 

အစ္စရေးရဲ့ လေကြောင်းတိုက်ခိုက်မှုကြောင့် ပျက်စီးနေမှုကို တွေ့ရစဉ်

စစ်ဆင်ရေး မတော်တဆမှုအတွင်း စစ်သား ၅၆ ဦး သေဆုံးခဲ့သော်လည်း မတော်တဆမှု ဖြစ်စဉ်အသေးစိတ်ကိုမူ အစ္စရေးစစ်တပ်က ထုတ်ပြန်ထား ခြင်း မရှိပေ။

အစ္စရေးစစ်တပ်သည် စစ်ပွဲစတင် ဖြစ်ပွားချိန်ကတည်းက အရန်စစ်သား ၃၀၀,၀၀၀ စုဆောင်းခဲ့ပြီး ၎င်းတို့ထဲမှ ၈၂ ရာခိုင်နှုန်းသည် အမျိုးသားများဖြစ်ကာ ၁၈ ရာခိုင်နှုန်းသည် အမျိုးသမီးများဖြစ်သည်။

၎င်းတို့ထဲမှ ထက်ဝက်နီးပါးသည် အသက် ၂၀ မှ ၂၉ နှစ်ကြား အရွယ်များဖြစ်သည်ဟု ထုတ်ပြန်ထားသည်။

စစ်ပွဲ စတင်ဖြစ်ပွားချိန်ကတည်းက ဂါဇာမှ အစ္စရေးသို့ ဒုံးကျည်အစင်းရေ ၁၃,၂၀၀ ဖြင့် ပစ်ခတ်ခဲ့ပြီး လက်ဘနွန်မှ ၁၂,၄၀၀ ၊ ဆီးရီးယားမှ ၆၀၊ ယီမင်မှ ၁၈၀ နှင့် အီရန်မှ ၄၀၀ ပစ်လွှတ်ခဲ့ကြောင်း အစ္စရေးစစ်တပ်က ပြောသည်။

အစ္စရေးစစ်တပ်က လက်ဘနွန်တွင် လက်နက်ကိုင် ၈၀၀ ကျော်ကို သတ်ဖြတ်နိုင်ခဲ့ပြီး လေကြောင်းမှ ပစ်မှတ် ပေါင်း ၄၉၀၀ ကို တိုက်ခိုက်ခဲ့သလို မြေပြင်ပစ်မှတ် ၆၀၀၀ ခန့်ကို တိုက်ခိုက်ခဲ့ကြောင်း ထုတ်ပြန်ထားသည်။

အစ္စရေးရဲ့ လေကြောင်းတိုက်ခိုက်မှုကြောင့် ပျက်စီးနေမှုကို တွေ့ရစဉ်

တစ်နှစ်အတွင်း အစ္စရေးသည် အနောက်ဘက် ကမ်းခြေဒေသနှင့် ဂျော်ဒန် တောင်ကြားတွင် သံသယရှိသူ ၅၀၀၀ ကျော်ကို ဖမ်းဆီးခဲ့သည်။

၂၀၂၃ ခုနှစ်၊ အောက်တိုဘာ ၇ ရက်က ဟားမာ့စ် စစ်သွေးကြွအဖွဲ့သည် အစ္စရေးတောင်ပိုင်းသို့ တိုက်ခိုက်ခဲ့ရာမှ ဂါဇာစစ်ပွဲ ဖြစ်ပွားလာခဲ့ပြီး ဟားမာ့စ်၏ တိုက်ခိုက်မှုကြောင့် လူ ၁၂၀၀ ခန့်သေဆုံးကာ လူ ၂၅၀ ခန့် ပြန်ပေးဆွဲ ဖမ်းဆီး ခေါ်ဆောင်ခံခဲ့ရသည်။ 

လက်ရှိတွင် ဟားမာ့စ်တို့က ထိန်းသိမ်းထားသော ဓားစာခံ ၁၀၀ ကျော် ဆက်လက် ကျန်ရှိနေသည်။

ဂါဇာတွင် အစ္စရေး၏ လက်တုန့်ပြန် တိုက်ခိုက်မှုကြောင့် ပါလက်စတိုင်းဒေသခံ ၄၂,၀၀၀ နီးပါး သေဆုံးခဲ့ကြောင်း ဂါဇာကျန်းမာရေးဝန်ကြီးဌာနက ထုတ်ပြန်ထားသည်။

Source- ရိုက်တာ

CNI International News

ဘေရွတ်၊ အောက်တိုဘာ ၇

အစ္စရေးသည် ဟစ်ဇ်ဘိုလာအဖွဲ့ကို ပစ်မှတ်ထားပြီး လေကြောင်းတိုက်ခိုက်မှုများကို အရှိန်မြှင့်နေစဉ် အောက်တိုဘာ ၆ ရက် နံနက်အစောပိုင်းက လက်ဘနွန်၏ မြို့တော် ဘေရွတ် (Beirut) တောင်ပိုင်းတွင် မီးလောင်ပေါက်ကွဲမှုများ ဖြစ်ပွားခဲ့ကြောင်း South China Morning Post မှ ဖော်ပြခဲ့သည်။

ပြီးခဲ့သည့်နှစ် အောက်တိုဘာ ၇ ရက်က အစ္စရေးကို ဟားမာ့စ်အဖွဲ့က တိုက်ခိုက်ခဲ့သည့် တစ်နှစ်ပြည့် နှစ်ပတ်လည်မတိုင်မီ အစ္စရေးက စစ်တပ်ကို တပ်လှန့်နှိုးဆော်မှု မြှင့်တင်ထားသည်။

အစ္စရေးသည် ဂါဇာတွင် တစ်နှစ်နီးပါးကြာ စစ်ပွဲဆင်နွှဲခဲ့ပြီးနောက် လက်ရှိမှာ အစ္စရေးသည် ၎င်း၏ အာရုံကို ပြောင်းလဲခဲ့ပြီး  ဟားမာ့စ်အဖွဲ့၏ မဟာမိတ်ဖြစ်သည့် လက်ဘနွန်နိုင်ငံရှိ ဟစ်ဇ်ဘိုလာအဖွဲ့ကို တိုက်ခိုက်ခဲ့သည်။

အစ္စရေးသည်  ဟစ်ဇ်ဘိုလာအဖွဲ့ ခြေကုပ်ယူထားသည့် ဘေရွတ်မြို့တော် တောင်ပိုင်းတွင် လေကြောင်း တိုက်ခိုက်မှု အကြိမ် ၃၀ ကျော် ပြုလုပ်ခဲ့သည်။

အစ္စရေး၏ ပစ်မှတ်များထဲတွင် ဓာတ်ဆီဆိုင် တစ်ဆိုင်လည်း ပါဝင်ခဲ့ကြောင်း လက်ဘနွန်၏ တရားဝင် သတင်းအေဂျင်စီဖြစ်သည့် NNA မှ ဖော်ပြခဲ့သည်။

စစ်ရှောင်များကို တွေ့ရစဉ်

အစ္စရေးစစ်တပ်ကမူ ဟစ်ဇ်ဘိုလာအဖွဲ့၏ လက်နက် သိုလှောင်ရုံများနှင့် အခြေခံ အဆောက်အအုံများကို ပစ်မှတ်ထား တိုက်ခိုက်ခဲ့ခြင်းဖြစ်ပြီး အရပ်သားများ ထိခိုက်ဒဏ်ရာရမည့် အန္တရာယ်ကို အနည်းဆုံးဖြစ်စေရန် လုပ်ဆောင်ခဲ့ကြောင်း ထုတ်ပြန်ခဲ့သည်။

အစ္စရေး၏ တိုက်ခိုက်မှုများ ပြင်းထန်လာသဖြင့် ဘေရွတ်မြို့တော် တောင်ဘက် ဆာဘရာ (Sabra) ဒေသတွင် ဒေသခံများသည် အိတ်များကိုလွယ်ပြီး ခြေကျင်ထွက်ပြေးခဲ့ကြသလို အချို့ကလည်း ဆိုင်ကယ်များဖြင့် ဘေးလွတ်ရာ ပြောင်းရွှေ့ခဲ့ကြသည်။

ဟစ်ဇ်ဘိုလာအဖွဲ့ကမူ လက်ဘနွန်တောင်ပိုင်း ဘလီဒါ (Blida) ကျေးရွာသို့ ဝင်ရောက်ရန် ကြိုးပမ်းခဲ့သည့် အစ္စရေးတပ်ဖွဲ့ဝင်များကို ပစ်မှတ်ထား တိုက်ခိုက်ခဲ့ကြောင်း ပြောကြားခဲ့သည်။

ထို့ပြင် အစ္စရေး စစ်စခန်း တစ်ခုကိုလည်း တိုက်ခိုက်ရေး ဒရုန်းများဖြင့် တိုက်ခိုက်ခဲ့ကြောင်း ဟစ်ဇ်ဘိုလာအဖွဲ့က ပြောကြားခဲ့သည်။

အစ္စရေးစစ်တပ်ကမူ လက်ဘနွန်နယ်စပ်ရှိ ဟစ်ဇ်ဘိုလာ တပ်ဖွဲ့ဝင်များကို အားနည်းစေရန်နှင့် နယ်စပ်အနီးမှ မောင်းထုတ်ရန် တိုက်ခိုက်မှုများအား ဆက်လက် လုပ်ဆောင်သွားမည်ဟု ကြေညာခဲ့သည်။

Source: SCMP

CNI International News

ဝါဆော၊ အောက်တိုဘာ ၇

ပိုလန်နိုင်ငံအနေဖြင့် ယခုမျိုးဆက်တွင် စစ်ပွဲဖြစ်ပွားလာပါက မိမိကိုယ်ကိုယ် ကာကွယ်ရန် စစ်အင်အား မြှင့်တင်ရန်လိုအပ်ကြောင်း ပိုလန်စစ်ဦးစီးချုပ် ဗိုလ်ချုပ်ကြီး ကူကူလာ (Wieslaw Kukula)က ပြောကြားခဲ့ ကြောင်း ရိုက်တာမှ ဖော်ပြခဲ့သည်။

သို့သော် ပိုလန်တွင် သက်ကြီးပိုင်း လူဦးရေ များပြားနေသဖြင့် စစ်အင်အား မြှင့်တင်ရန် တပ်သားသစ် စုဆောင်းမှု သည် ခက်ခဲနိုင်ကြောင်း ကျွမ်းကျင်သူများက ပြောကြားခဲ့သည်။

"ကျနော်တို့ မျိုးဆက်ဟာ ကျနော်တို့နိုင်ငံကို ကာကွယ်သွားမှာပါ။ ကျနော်ရော ခင်ဗျားတို့ပါ စစ်ပွဲကို ရှုံးနိမ့်ချင်မှာ မဟုတ်ပါဘူး"ဟု ကူကူလာက ၀ရိုကလော (Wroclaw) မြို့ရှိ Land Forces စစ်တက္ကသိုလ်တွင် မိန့်ခွန်း ပြောကြား ခဲ့သည်။ 

"ကျနော်တို့ စစ်ပွဲကို အနိုင်ရမှာပါ။ ပိုလန်ကို ဆက်လက် တည်ဆောက်သွားမှာပါ။ ဒါပေမယ့် တစ်ခုခုဖြစ်လာခဲ့ မယ်ဆိုရင် အဲဒီအခြေအနေအတွက် လက်နက်ကိုင်တပ်ဖွဲ့ အင်အားကို မြှင့်တင်ဖို့ ပြင်ဆင်ရပါလိမ့်မယ်" ဟု ၎င်းက ပြောကြားခဲ့သည်။

ပိုလန်စစ်ဦးစီးချုပ် ဗိုလ်ချုပ်ကြီး ကူကူလာကို တွေ့ရစဉ်

နိုင်ငံအတွင်း သက်ကြီးပိုင်း လူဦးရေ များပြားနေမှု ပြဿနာသည် တပ်သားသစ် စုဆောင်းရေးအတွက် စိန်ခေါ်မှု ဖြစ်လာနိုင်ပြီး ရန်သူ၏ အင်အားသည် ကြီးမားနိုင်သဖြင့် မိမိတို့အနေဖြင့် အခြေခံ စံနှုန်းတစ်ခုဖြင့် စစ်တပ်ကို ပို၍ ကြီးမားအောင် တည်ထောင်ရမည်ဖြစ်ကြောင်း ကူကူလာက လက်ရှိတွင် ပြဋ္ဌာန်းထားခြင်း မရှိသေးသည့် မဖြစ် မနေ စစ်မှုထမ်းဥပဒေကို ရည်ညွှန်းပြောဆိုခဲ့သည်။

ပိုလန်စစ်တပ်သည် ယခုနှစ်ကုန်ပိုင်းတွင် စစ်သားအင်အား ၂၀၇,၅၀၀ ကျော် ရှိလာမည်ဖြစ်ပြီး ထိုပမာဏသည် နေတိုးအဖွဲ့အတွင်း အမေရိကန်နှင့် တူရကီနိုင်ငံတို့ပြီးပါက တတိယမြောက် စစ်အင်အား အများဆုံး နေတိုး အဖွဲ့ဝင်နိုင်ငံ ဖြစ်လာလိမ့်မည်ဟု ပိုလန်ကာကွယ်ရေးဝန်ကြီးဌာနက ထုတ်ပြန်ခဲ့သည်။

ဇူလိုင်လအတွင်းကလည်း ကူကူလာက ပိုလန်အနေဖြင့် အင်ပြည့်အားပြည့် စစ်ပွဲအတွက် ပြင်ဆင်ထားရမည် ဖြစ်ကြောင်း ပြောကြားခဲ့သည်။

ယူကရိန်းကို ရုရှားက ဝင်ရောက် တိုက်ခိုက်ခဲ့သည့် ၂၀၂၂ ခုနှစ်၊ ဖေဖော်ဝါရီလ ကတည်းက ပိုလန်နှင့် ရုရှား၊ ဘယ်လာရုစ်တို့၏ ဆက်ဆံရေးသည် သိသာစွာ ယိုယွင်းလာခဲ့သည်။

Source: ရိုက်တာ

CNI International News

ဘတ္တလာ၊ အောက်တိုဘာ ၇

အမေရိကန်သမ္မတ ရွေးကောက်ပွဲဝင် ရီပတ်ဘလစ်ကန် ကိုယ်စားလှယ်လောင်း ဒေါ်နယ်ထရမ့် (Donald Trump) သည် သေနတ်ဖြင့် ပစ်ခတ်လုပ်ကြံခံခဲ့ရသည့် ပင်ဆယ်ဗေးနီးယား (Pennsylvania) ပြည်နယ်၊ ဘတ္တလာ (BUTLER) မြို့တွင် အောက်တိုဘာ ၅ ရက်က နောက်တစ်ကြိမ် မဲဆွယ်စည်းရုံးပွဲ ပြုလုပ်ခဲ့သည်ဟု ရိုက်တာမှ ဖော်ပြခဲ့သည်။

ထရမ့်သည် ဇူလိုင် ၁၃ ရက်က ထိုမြို့တွင် မဲဆွယ်စည်းရုံးပွဲ ပြုလုပ်ခဲ့ချိန်က သေနတ်သမားတစ်ဦး၏ လုပ်ကြံ သတ်ဖြတ်ရန် ကြိုးပမ်းမှုနှင့် ရင်ဆိုင်ခဲ့ရပြီး နားရွက်ကို ကျည်ဆန်မှန်သွားခဲ့သည်။

ထိုကဲ့သို့ ပစ်ခတ်ခံရသည့် နေရာမှာပင် ယခု ဒုတိယအကြိမ် မဲဆွယ်စည်းရုံးပွဲကို ပြုလုပ်ခဲ့ခြင်းဖြစ်သည်။

ထရမ့်သည် ထိုမဲဆွယ်စည်းရုံးပွဲတွင် မိန့်ခွန်းပြောကြား နေချိန်အတွင်း မိန့်ခွန်းပြောကြားမှု အလယ်ပိုင်းလောက် တွင် Tesla စီအီးအိုနှင့် X လူမှုမီဒီယာ ပလက်ဖောင်းပိုင်ရှင် အီလွန်မာ့စ် (Elon Musk) ကို စင်မြင့်ပေါ် ဖိတ်ကြား ခဲ့သည်။

၂၀၂၄ ခုနှစ်၊ ဇူလိုင် ၁၃ ရက်နေ့က ဒေါ်နယ်ထရမ့် လုပ်ကြံခံရစဉ်

ဩဇာကြီးမားသည့် မာ့စ်သည် ဇူလိုင် ၁၃ ရက်က သမ္မတဟောင်း ထရမ့်ကို ရီပတ်ဘလစ်ကန် ကိုယ်စားလှယ် လောင်းအဖြစ် ထောက်ခံခဲ့ပြီးနောက် ပထမဆုံးအကြိမ်အဖြစ် ထရမ့်၏ မဲဆွယ်စည်းရုံးပွဲတွင် ပါဝင်လာခဲ့ခြင်း ဖြစ်သည်။

"လူတစ်ယောက်ရဲ့ စရိုက်ကို စမ်းသပ်တဲ့ အမှန်ဆုံး စမ်းသပ်ချက်ကတော့ သေနတ်နဲ့ ပစ်ခတ်ခံရချိန်မှာ ဘယ်လို ပြုမှုခဲ့သလဲဆိုတာပဲ ဖြစ်ပါတယ်"ဟု မာ့စ်က ပြောကြားခဲ့ပြီး ထရမ့်အား မဲပေးရန် ပရိသတ်များအား တိုက်တွန်း ခဲ့သည်။

ဇူလိုင် ၁၃ ရက်က ပစ်ခတ်မှု ဖြစ်စဉ်တွင် သေဆုံးသွားသည့် မီးသတ်သမားတစ်ဦးဖြစ်သူ ကော်ရေး ကွမ်ပရေတော (Corey Comperatore) နှင့် ဒဏ်ရာရသူ အခြားနှစ်ဦးကို ထရမ့်က ဂုဏ်ပြုခဲ့သည်။

ပစ်ခတ်မှုဖြစ်ပွားသည့် ညနေ ၆ နာရီ ၁၁ မိနစ်တွင် ထရမ့်က ဝမ်းနည်းကြောင်း အသံတိတ်ဖော်ပြရန် ငြိမ်သက်ခဲ့ ပြီး ငြိမ်သက်မှုအပြီးတွင် ထရမ့် အပါအဝင် သေနတ်ထိမှန်သူ ၄ ဦးအတွက် ခေါင်းလောင်းသံ ၄ ချက်ထိုးခဲ့သည်။

ဒေါ်နယ်ထရမ့်နဲ့ အီလွန်မာ့စ်ကို တွေ့ရစဉ်

ထို့နောက် ထရမ့်က ၎င်း၏ မိန့်ခွန်းအတွင်း ပြည်တွင်းရန်သူသည် ပြည်ပရန်သူထက်ပိုပြီး အန္တရာယ်များကြောင်း သက်သေမပြဘဲ အရိပ်အမြွက်ပြောကြားခဲ့သည်။

၎င်းအား ပစ်ခတ်ခဲ့သည့် သေနတ်သမားသည် သွေးအေးသည့် လုပ်ကြံသတ်ဖြတ်သူဖြစ်ပြီး မိမိအား နှုတ်ပိတ်ရန် ရည်ရွယ်ခဲ့ကြောင်း၊ သို့သော် မိမိတို့၏ လှုပ်ရှားမှုကို ရပ်တန့်ခဲ့ခြင်းမရှိကြောင်း ထရမ့်က ပြောကြားခဲ့သည်။

လူပေါင်းသောင်းချီရှိသည့် ပရိသတ်များကလည်း ထရမ့်၏ မိန့်ခွန်းကို အင်တိုက်အားတိုက် ဟစ်ကြွေး ထောက်ခံခဲ့ ကြပြီး ပရိသတ်အချို့ကမူ ထရမ့် ပစ်ခတ်ခံရချိန်က ဆောင်ပုဒ်ဖြစ်သည့် Fight ဆိုသည့် စကားလုံးကို ဟစ်ကြွေးခဲ့ ကြသည်။

Source: ရိုက်တာ

CNI International News

တိုင်ပေ၊ အောက်တိုဘာ ၇

တရုတ်နိုင်ငံသည် ထိုင်ဝမ်၏ အမိမြေတစ်ခု မဖြစ်နိုင်ကြောင်း ထိုင်ဝမ်သမ္မတ လိုင်ချင်တေ (Lai Ching-te) က အောက်တိုဘာ ၅ ရက်တွင်ပြောကြားခဲ့ကြောင်း Nikkei Asia မှ ဖော်ပြခဲ့သည်။

အဘယ်ကြောင့်ဆိုသော် ထိုင်ဝမ်သည် ပိုမိုသက်တမ်းရင့်သည့် နိုင်ငံရေး အမြစ်တွယ်မှုများ ရှိနေခြင်းကြောင့် ဖြစ်ကြောင်း ၎င်းက ပြောသည်။

မေလက သမ္မတအဖြစ် စတင်ရုံးထိုင်ခဲ့သည့် လိုင်ကို တရုတ်က ခွဲထွက်ဝါဒီ တစ်ဦးဖြစ်ကြောင်း ဝေဖန်ရှုတ်ချ ခဲ့သည်။

လိုင်ကမူ တရုတ်၏ အချုပ်အခြာ အာဏာပိုင်ကြောင်း ထွက်ဆိုချက်ကို ငြင်းပယ်ခဲ့ပြီး တရုတ်၏ နောက်ဆုံး မင်းဆက်ကို ဖြုတ်ချခဲ့သည့် ၁၉၁၁ ခုနှစ်ကာလများက ထိုင်ဝမ်ကို တရုတ်သမ္မတနိုင်ငံအဖြစ် ခေါ်ဆိုခဲ့ဖူးကြောင်း လိုင်က ပြောကြားခဲ့သည်။

တရုတ်သမ္မတနိုင်ငံ အစိုးရသည် တရုတ်ပြည်သူ့သမ္မတနိုင်ငံကို ထူထောင်ခဲ့သည့် မော်စီတုန်း (Mao Zedong) ၏ ကွန်မြူနစ်များနှင့်ဖြစ်ပွားသည့် ပြည်တွင်းစစ်တွင် ရှုံးနိမ့်ခဲ့ပြီးနောက် ၁၉၄၉ ခုနှစ်၌ ထိုင်ဝမ်သို့ ထွက်ပြေးသွား ခဲ့ခြင်းဖြစ်သည်။

အောက်တိုဘာ ၁၀ ရက်တွင် ကျရောက်မည့် ထိုင်ဝမ်အမျိုးသားနေ့ အထိမ်းအမှတ် အခမ်းအနားများ မတိုင်မီ ဖျော်ဖြေပွဲ တစ်ခုတွင် လိုင်က အမှာစကားပြောကြားခဲ့သည်။

ထိုင်ဝမ်အလံကို ကိုင်ထားသူကို တွေ့ရစဉ်

ထိုသို့ အမှာစကားပြောကြားရာတွင် တရုတ်ပြည်သူ့သမ္မတနိုင်ငံ (PRC) သည် အောက်တိုဘာ ၁ ရက်တွင် ၎င်းတို့ နိုင်ငံထူထောင်သည့် ၇၅ နှစ်ပြည့် နှစ်ပတ်လည်ကို အောင်ပွဲခံခဲ့ပြီး ရက်အနည်းငယ် အကြာတွင်မူ တရုတ်သမ္မတ နိုင်ငံ (ROC)၏ ၁၁၃ နှစ်ပြည့် နှစ်ပတ်လည်ကို ကျင်းပမည်ဖြစ်ကြောင်း ပြောကြားခဲ့သည်။

ထို့ကြောင့် နှစ်သက်တမ်းများကို သုံးသပ်ရမည်ဆိုပါက PRC သည် ROC ၏ အမိမြေဖြစ်ရန် လုံး၀မဖြစ်နိုင်ကြောင်း၊ ဆန့်ကျင်ဘက် ပြောရမည်ဆိုပါက ၇၅ နှစ် သက်တမ်းသာရှိသေးသည့် PRC ၏ အမိမြေမှာ ROC ဟု ပြောနိုင် ကြောင်း လိုင်က ပြောကြားခဲ့သည်။

"အဲဒီလို အောင်ပွဲခံမှုတွေရဲ့ အရေးအကြီးဆုံး အဓိပ္ပာယ်တွေထဲက တစ်ခုကတော့ ကျနော်တို့ဟာ အချုပ်အခြာ အာဏာပိုင်ပြီး လွတ်လပ်တဲ့နိုင်ငံ ဖြစ်တယ်ဆိုတာကို ကျနော်တို့ သတိရနေရမှာ ဖြစ်ပါတယ်" ဟု ၎င်းက ပြော သည်။

လိုင်၏ ပြောကြားချက်များနှင့်ပတ်သက်ပြီး တရုတ်၏ ထိုင်ဝမ်ရေးရာရုံးကမူ မှတ်ချက်ပေးရန် တောင်းဆိုချက်ကို ဖြေကြားခဲ့ခြင်းမရှိပေ။

တရုတ်သမ္မတ ရှီကျင့်ဖျင်ကမူ အမျိုးသားနေ့အကြို မိန့်ခွန်းပြောကြားမှုတွင် တရုတ်အစိုးရသည် ထိုင်ဝမ်ကို မိမိတို့ နယ်နိမိတ်တစ်ခုအဖြစ် ရှုမြင်ထားကြောင်း ထပ်လောင်း ပြောကြားခဲ့သည်။

Source: Nikkei Asia

CNI International News

ပြုံယမ်း၊ အောက်တိုဘာ ၅

ရန်သူများအနေဖြင့် မိမိတို့၏ အချုပ်အခြာအာဏာကို အင်အားသုံးပြီး ထိပါးလာမည်ဆိုပါက နျူကလီးယား လက်နက်များနှင့် ထိုးစစ်ဆင် တိုက်ခိုက်ရေးတပ်ဖွဲ့များ အားလုံးကို အသုံးပြုရန် တွန့်ဆုတ်နေမည် မဟုတ်ကြောင်း မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) က ပြောကြားခဲ့သည်ဟု ရိုက်တာမှ ဖော်ပြခဲ့သည်။

စက်တင်ဘာ ၃၀ ရက်က ပြုလုပ်ခဲ့သည့် တောင်ကိုရီးယား စစ်ရေးပြ အခမ်းအနားအတွင်း မြောက်ကိုရီးယား အစိုးရ၏ အဆုံးသတ် ဖြစ်လာလိမ့်မည်ဟု ခြိမ်းခြောက်ခဲ့သည့် တောင်ကိုရီးယားသမ္မတ ယွန်းဆော့ရွဲ(Yoon Suk Yeol) ကို ကင်မ်က ဝေဖန်ရှုတ်ချခဲ့သည်။

ယွန်း၏ မှတ်ချက် စကားများသည် ဒေသတွင်းလုံခြုံရေးနှင့် ငြိမ်းချမ်းရေးကို ဖျက်ဆီးနေသည့် အခြေအနေအား ပြသရာရောက်သည်ဟု ကင်မ်က ပြောကြားခဲ့သည်။

ကင်မ်ဂျုံအန် ဒုံးကျည်ပစ်လွှတ်မှုကို ကြည့်ရှုနေစဉ်

ထို့ပြင် ယွန်းသည် နျူကလီးယားလက်နက် ပိုင်ဆိုင်ထားသည့် နိုင်ငံရှေ့တွင် စစ်အင်အားပြပြီး လေလုံးထွား ပြောဆိုနေကြောင်း၊ ထိုလုပ်ဆောင်မှုများသည် ရယ်စရာကောင်းပြီး ယွန်းသည် ပုံမှန်မဟုတ်သည့် အမျိုးသား တစ်ဦးဖြစ်ကြောင်း ကင်မ်က ပြောကြားခဲ့သည်ဟု မြောက်ကိုရီးယားနိုင်ငံပိုင် KCNA သတင်းအေဂျင်စီက ဖော်ပြခဲ့သည်။

"မြောက်ကိုရီးယားရဲ့ အချုပ်အခြာအာဏာကို ရန်သူတွေက ရူးမိုက်ပြီး မဆင်မခြင် ဝင်ရောက်တိုက်ခိုက်ဖို့ ကြိုးပမ်းမယ်ဆိုရင် မြောက်ကိုရီးယား အစိုးရကလည်း နျူကလီးယား လက်နက်တွေ အပါအဝင် ထိုးစစ်ဆင် တိုက်ခိုက်ရေး တပ်ဖွဲ့တွေအားလုံးကို အသုံးပြုဖို့ ဝန်လေးမှာ မဟုတ်ပါဘူး" ဟု ကင်မ်က ပြောကြားခဲ့ကြောင်း KCNA မှ ဖော်ပြခဲ့သည်။

ကင်မ်သည် အောက်တိုဘာ ၂ ရက်က မြောက်ကိုရီးယားစစ်တပ်၏ အထူးစစ်ဆင်ရေးတပ်ဖွဲ့များအား လေ့ကျင့် သင်တန်းပေးနေသည့် လေ့ကျင့်ရေးစခန်းသို့ သွားရောက် စစ်ဆေးကြည့်ရှုခဲ့ချိန်က အထက်ပါ မှတ်ချက် စကားများကို ပြောကြားခဲ့ခြင်းဖြစ်သည်။

ကင်မ်ဂျုံအန်နဲ့ မြောက်ကိုရီးယား စစ်တပ်ကိုတွေ့ရစဉ်

မြောက်ကိုရီးယားသည် နျူကလီးယား လက်နက်စီမံကိန်းကို ဆယ်စုနှစ်များစွာကြာ လုပ်ဆောင်ခဲ့ပြီး လက်ရှိတွင် ဒါဇင်နှင့်ချီသည့် နျူကလီးယား လက်နက်များကို ထုတ်လုပ်ရန် လိုအပ်သည့် ကုန်ကြမ်းပစ္စည်းများအား ရရှိထား ပြီဟု ကျွမ်းကျင်သူများက ယူဆခဲ့သည်။

မြောက်ကိုရီးယားသည် ယခင်ကလည်း မြေအောက်တွင် နျူကလီးယား စမ်းသပ်ဖောက်ခွဲမှုများကို ၆ ကြိမ် ပြုလုပ်ခဲ့သည်။

စက်တင်ဘာ ၃၀ ရက်က ဆိုးလ်မြို့တော်တွင် ပြုလုပ်သည့် တောင်ကိုရီးယား စစ်ရေးပြ အခမ်းအနား၌ ကြီးမားသော လက်နက်ထိပ်ဖူး တပ်ဆင်နိုင်သည့် ပဲ့ထိန်းဒုံးကျည် တစ်စင်းကို ပြသခဲ့ပြီး အမေရိကန်ဗုံးကြဲ လေယာဉ်ကလည်း ဝေဟင်မှာ ပျံသန်းခဲ့သည်။

ထိုစစ်ရေးပြ အခမ်းအနားအတွင်း ယွန်းက မြောက်ကိုရီးယား အနေဖြင့် နျူကလီးယား လက်နက်များ အသုံးပြု မည်ဆိုပါက ကင်မ်ဂျုံအန် အစိုးရ၏ အဆုံးသတ် ဖြစ်လာလိမ့်မည်ဟု မိန့်ခွန်းပြောကြားခဲ့သည်။

Source: ရိုက်တာ

CNI International News

ဂျေရုဆလင်၊ အောက်တိုဘာ ၅

လက်ဘနွန်နိုင်ငံ၊ ဘေရွတ်မြို့တော်၏ တောင်ပိုင်းဆင်ခြေဖုံးတွင် အစ္စရေးက ပြင်းပြင်းထန်ထန် ထိုးစစ်ဆင် တိုက်ခတ်ခဲ့ပြီးနောက် နာရီပိုင်အကြာ အောက်တိုဘာ ၄ ရက် အစောပိုင်းတွင် အစ္စရေးလေကြောင်း တိုက်ခိုက်မှု များသည် လက်ဘနွန်နှင့် ဆီးရီးယားကြား အဓိကနယ်စပ်ဖြတ်ကျော်ရေး လမ်းကြောင်းများကို ပိတ်ဆို့သွား ခဲ့ကြောင်း ရိုက်တာမှ ဖော်ပြခဲ့သည်။

ထိုလေကြောင်း တိုက်ခိုက်မှုများသည် လက်ဘနွန်နိုင်ငံအတွင်း အီရန်ကျောထောက် နောက်ခံပြု လက်ဘနွန် ဟစ်ဇ်ဘိုလာ စစ်သွေးကြွများနှင့် အစ္စရေးကြား အပြည့်အဝ စစ်ပွဲတစ်ရပ် ဖြစ်လာနိုင်မည့် အရေးကိစ္စအပေါ် စိုးရိမ်မှုများ မြင့်တက်စေခဲ့သည်။

အစ္စရေး အနေဖြင့်လည်း ၎င်း၏နယ်မြေအတွင်း အီရန်၏ဒုံးကျည်ဖြင့် တိုက်ခိုက်မှုများကို ကြုံတွေ့ရလျက်ရှိသည်။

အီရန်ထိပ်သီးခေါင်းဆောင် အယာတိုလာ အလီ ခါမေနီ (Ayatollah Ali Khamenei) က  "အရင်ညတွေတုန်းက ကျနော်တို့ တပ်ဖွဲ့တွေရဲ့ ရဲစွမ်းသတ္တိရှိတဲ့ တိုက်ခိုက်မှုဟာ အပြည့်အဝ တရားဝင်ဖြစ်ပြီး သဘာဝကျပါတယ်"ဟု ပြောကြားခဲ့သည်။

ခါမေနီက အာဖဂန်နစ္စတန်မှ ယီမင်အထိ မွတ်စလင်နိုင်ငံများအနေဖြင့် အစ္စရေးကို ခုခံမှုတွင် အတူပါဝင်ကြရန် တိုက်တွန်း ပြောကြားခဲ့သည်။

အစ္စရေးရဲ့ တိုက်ခတ်မှုကြောင့် ပျက်စီးသွားစဉ်

အစ္စရေး၏ လက်တုန့်ပြန်မှုတွင် အီရန်၏ ရေနံစက်ရုံများလည်း ပါဝင်နိုင်ကြောင်း အမေရိကန်သမ္မတ ဂျိုးဘိုင်ဒန် က အောက်တိုဘာ ၃ ရက်တွင် ပြောကြားခဲ့သည်။

ဆီးရီးယား နယ်စပ်အနီး လက်ဘနွန် နယ်မြေအတွင်းတွင် အောက်တိုဘာ ၄ ရက်က အစ္စရေး၏ လေကြောင်း တိုက်ခိုက်မှုကြောင့် လေးမီတာ(၁၂ ပေ)အကျယ်ရှိ ချိုင့်ကြီးဖြစ်ပေါ်ခဲ့ကြောင်း လက်ဘနွန် ပို့ဆောင်ဆက်သွယ်ရေး ဝန်ကြီး အလီဟာမီယာ(Ali Hamieh) က ရိုက်တာသို့ ပြောကြားခဲ့သည်။

အစ္စရေးကာကွယ်ရေးတပ်ဖွဲ့ (IDF) က ဟစ်ဇ်ဘိုလာအဖွဲ့သည် ဆီးရီးယားနယ်စပ်ကို အသုံးပြုပြီး လက်ဘနွန်နိုင်ငံ တွင်းသို့ စစ်လက်နက်ပစ္စည်းများ ပို့ဆောင်နေသည်ဟု စွပ်စွဲပြောကြားခဲ့သည်။

"IDF အနေနဲ့ ဒီလို လက်နက်တွေ မှောင်ခိုသွင်းနေတာကို ခွင့်ပြုသွားမှာ မဟုတ်တဲ့အပြင် ဒီလို အတင်းအကျပ် ဆက်လုပ်နေမယ်ဆိုရင်တော့ တွန့်ဆုတ်နေမှာ မဟုတ်ပါဘူး"ဟု IDF ပြောရေးဆိုခွင့်ရှိသူ အဗီချေးအေဒရာရီ (Avichay Adraee)က ပြောကြားခဲ့သည်။

Source - ရိုက်တာ