CNI International News 

ဒါကာ၊ ဩဂုတ် ၇

ဘင်္ဂလားဒေ့ရှ်နိုင်ငံတွင် သီတင်းပတ် ပေါင်းများစွာကြာ အစိုးရဆန့်ကျင်သည့် ဆန္ဒပြမှုများ ဖြစ်ပွားခဲ့ပြီးနောက် ဝန်ကြီးချုပ် ရှိတ်ဟာဆီနာ(Sheik Hasina)သည် ရာထူးမှနုတ်ထွက်ခဲ့ပြီး ပြည်ပနိုင်ငံသို့ ထွက်ပြေးခဲ့သည့်အတွက် စစ်တပ်က ကြားဖြတ်အစိုးရတစ်ရပ်ကို ထုတ်ပြန်ကြေညာခဲ့သည်ဟု အယ်ဂျားဇီးယားသတင်းတွင် ဖော်ပြထား သည်။

ဘင်္ဂလားဒေ့ရှ်တွင် သီတင်းပတ် ပေါင်းများစွာကြာ ဆန္ဒပြမှုများကြောင့် လူသေဆုံးမှုများရှိခဲ့ပြီး နောက်ထပ် သွေးထွက်သံယိုဖြစ်စဉ်များ ဖြစ်ပွားမှုကိုရှောင်လွှဲရန် ကြိုးပမ်းသည့်အနေဖြင့် ဩဂုတ် ၅ ရက်တွင် ဟာဆီနာသည် ရာထူးမှ နုတ်ထွက်သွားခဲ့သည်။

လက်ရှိတွင် ဘင်္ဂလားဒေ့ရှ်နိုင်ငံကို မည်သူက အုပ်ချုပ်မည့်အပေါ် လူအများက အာရုံစိုက်လျက်ရှိကြသည်။

ကြားဖြတ်အစိုးရတစ်ရပ်က ဘင်္ဂလားဒေ့ရှ်နိုင်ငံကို ဆက်လက် အုပ်ချုပ်သွားမည်ဖြစ်ကာ စိတ်အေးသက်သာစွာ ထားကြရန် စစ်တပ်အကြီးအကဲ ဗိုလ်ချုပ်ကြီး ဝါကာအုဇ်ဇာမန်(Waker-Uz-Zaman)က နိုင်ငံကို ပြောကြားသည့် မိန့်ခွန်းတွင် ကြေညာခဲ့သည်။

ရှိတ်ဟာစီနာကို တွေ့ရစဉ်

လူအုပ်ကြီးသည် ကာဖျူးမိန့်ကို လျစ်လျူရှုကာ ဒါကာမြို့တော်ရှိ ဝန်ကြီးချုပ်ရုံးကို ဝင်ရောက်စီးနင်းရန် ကြိုးပမ်းချိန်တွင် ဘင်္ဂလားဒေ့ရှ်နိုင်ငံကို နှစ်ပေါင်း၂၀ နီးပါး အုပ်ချုပ်ခဲ့သည့် ဟာဆီနာသည်  ဩဂုတ် ၅ ရက်က စစ်တပ်ရဟတ်ယာဉ်ဖြင့် ပြည်ပသို့ ထွက်ပြေးတိမ်းရှောင်ခဲ့ကြောင်း လက်ထောက်တစ်ဦးက အယ်ဂျားဇီးယား သတင်းကို ပြောပြခဲ့သည်။

အိန္ဒိယမီဒီယာများတွင် ဖော်ပြချက်အရ ဟာဆီနာ လိုက်ပါလာသော လေယာဉ်သည် နယူးဒေလီမြို့တော်အနီး ဟင်ဒန်လေတပ်စခန်း(Hindon Air Base) သို့ ဆင်းသက်ခဲ့သည်ဟု ဆိုသည်။

ဟာဆီနာ လိုက်ပါလာသည့် ဘင်္ဂလားဒေ့ရှ် လေတပ်လေယာဉ်သည် အိန္ဒိယနိုင်ငံ၊ ဂါဇီယာဘတ်မြို့ရှိ စစ်စခန်း တစ်ခုတွင် ဆင်းသက်ခဲ့ကြောင်း India Today သတင်း၌ ဖော်ပြခဲ့သည်။

အာဏာပိုင်များက ဖြိုခွင်းရန် ကြိုးပမ်းသော သီတင်းပတ် ပေါင်းများစွာကြာ ဆန္ဒပြမှုများအတွင်းလူ ၃၀၀ နီးပါး သေဆုံးခဲ့ပြီးနောက် ဟာဆီနာက ရာထူးမှ နုတ်ထွက်ခဲ့ခြင်း ဖြစ်သည်။

ဩဂုတ် ၄ ရက် ညအချိန်က ဖြစ်ပွားခဲ့သော ဆန္ဒပြ အဓိကရုဏ်း ဖြစ်စဉ်တစ်ခုအတွင်း လူ ၁၀၀ နီးပါး သေဆုံး ခဲ့သည်။

ဘင်္ဂလားဒေ့ရှ် ဆန္ဒပြသူများကိုတွေ့ရစဉ်

ဩဂုတ်၅ ရက်တွင် လူအုပ်ကြီးသည် ဝန်ကြီးချုပ်နန်းတော်ကို ဝင်ရောက်စီးနင်းခဲ့သည့်အတွက် ဟာဆီနာ၏ မိန့်ခွန်းပြောရန် ရည်ရွယ်ချက်ကို အဟန့်အတား ဖြစ်စေခဲ့သည်။

ဆန္ဒပြသူများသည် အဆောက်အအုံများကို ဝင်ရောက်စီးနင်းချိန်တွင် ဒါကာမြို့တော်၌ ဖြစ်ပွားသည့် အကြမ်းဖက်မှု ဖြစ်စဉ်များအတွင်း လူ ၂၀ထက်မနည်း သေဆုံးခဲ့သည်ဟု ရဲအရာရှိတစ်ဦးက ပြောသည်။

ဩဂုတ် ၅ ရက် နေ့လယ်ခင်းအချိန်တွင် ဟာဆီနာပြည်ပသို့ ထွက်ပြေးသည့်သတင်း ပျံ့နှံ့ခဲ့ပြီးနောက် အကြမ်းဖက်မှုများ ဖြစ်ပွားနေသော်လည်း လမ်းပေါ်ရှိ လူအုပ်ကြီးသည် အောင်ပွဲခံခဲ့ကြသည်။

Source- အယ်ဂျားဇီးယား

CNI International News

တိုကျို၊ ဩဂုတ် ၆

ထိုင်ဝမ်ကို တရုတ်က ကျူးကျော်နိုင်ခြေရှိသည့် စိုးရိမ်မှုများ မြင့်တက်နေချိန်တွင် ဂျပန်သည် ဆာကီရှီးမား (Sakishima) ကျွန်းပေါ်ရှိ ဒေသခံများကို ဘေးလွတ်ရာ ရွှေ့ပြောင်းပေးရန် ပြင်ဆင်မှုများ ပြုလုပ်နေကြောင်း Japan Times မှ ဖော်ပြခဲ့သည်။

ထိုင်ဝမ်တွင် ပဋိပက္ခဖြစ်ပွားလာပါက ဂျပန်အစိုးရသည် ဆာကီရှီးမားကျွန်းပေါ်၌ နေထိုင်သည့် လူပေါင်း ၁၂၀,၀၀၀ ခန့်ကို ကျူးရှုး (Kyushu) ဒေသနှင့် အနီးနားရှိ ယာမာဂူချီ (Yamaguchi) စီရင်စုနယ်သို့ ရွှေ့ပြောင်း ပေးရန် စီစဉ်ထားသော်လည်း သယ်ယူပို့ဆောင်ရေးကဏ္ဍတွင် အခက်အခဲများ ရှိနေသည်ဟု ဆိုသည်။

တောင်တရုတ်ပင်လယ်နှင့် အရှေ့တရုတ်ပင်လယ်တို့တွင် တရုတ်၏ လှုပ်ရှားမှုများ မြင့်တက်နေချိန်၌ ဂျပန်က အလုံးစုံ တုန့်ပြန်ဆောင်ရွက်ရေး အခြေအနေအတွက် အစီအစဉ်များကို ရေးဆွဲခဲ့ပြီးဖြစ်သည်။

၂၀၂၂ ခုနှစ်၊ ဒီဇင်ဘာလတွင် အစိုးရက ပြန်လည်တည်းဖြတ်ခဲ့သည့် အမျိုးသားလုံခြုံရေး မဟာဗျူဟာ၌ တရုတ်သည် ထိုင်ဝမ်ကို အင်အားသုံး သိမ်းပိုက်နိုင်ခြေရှိသည် ဆိုသည့်အချက်ကို ထည့်သွင်းဖော်ပြထားသည်။

ထိုအခြေအနေမျိုးတွင် ဆာကီရှီးမားကျွန်းစု အပါအဝင် နန်ဆိုင်း (Nansei) ဒေသရှိ ဒေသခံများကို ကာကွယ်ရန် ဂျပန်အနေဖြင့် အစီအစဉ်များ လုပ်ဆောင်ရလိမ့်မည်ဖြစ်ကြောင်း အမျိုးသားလုံခြုံရေး မဟာဗျူဟာတွင် ဖော်ပြခဲ့ သည်။

ဂျပန်နိုင်ငံအတွင်းက လေဆိပ်တစ်ခုကိုတွေ့ရစဉ်

ထိုအစီအစဉ်များတွင် ပုဂ္ဂလိကနှင့် အစိုးရပိုင် သယ်ယူပို့ဆောင်ရေးကဏ္ဍကို စိတ်ချသေချာစေရန်၊ လေဆိပ်များ၊ ဆိပ်ကမ်းများနှင့် အခြား ပြည်သူ့အခြေခံ အဆောက်အအုံများ တည်ဆောက်ရန်၊ ကယ်ဆယ်ရေးစခန်းများ ဆောက်လုပ်ရန်၊ နိုင်ငံတကာအဖွဲ့အစည်းများနှင့် ပူးပေါင်းဆောင်ရွက်ရန် အစရှိသည့် အစီအစဉ်များ ပါဝင်သည်။

ဂျပန်အစိုးရ၏ အစီအစဉ်အရ အီရှီဂါကီ (Ishigaki) မြို့ ၊ မီယာကိုဂျီးမား (Miyakojima) မြို့၊ တာရာမာ (Tarama) ကျေးရွာ၊ တာကီတိုမီ (Yaketomi) နှင့် ယိုနာဂူနီ (Yonaguni) မြို့ အစရှိသည့် နေရာ ၅ နေရာမှ ဒေသခံများနှင့် ခရီသွားများကို ကျူးရှူးကျွန်းပေါ်ရှိ ဖူကူအိုကာ (Fukuoka) နှင့် ကာဂိုရှီးမား (Kagoshima) လေဆိပ်တို့မှတစ်ဆင့် ဘေးလွတ်ရာ ရွှေ့ပြောင်းပေးရန် စီစဉ်ထားသည်။

ထိုသို့ ရွှေ့ပြောင်းပေးရာတွင် မိုးလေဝသ အခြေအနေနှင့် ကျန်းမာရေး အခြေအနေကြောင့် လေယာဉ်မစီးနိုင် သူများအတွက် သင်္ဘောများဖြင့် နေရာရွှေ့ပြောင်းပေးရန်လည်း ဂျပန်အစိုးရက စီစဉ်ထားသည်။

ပြီးခဲ့သည့်နှစ် မတ်လနှင့် ယခုနှစ် ဇန်နဝါရီလကလည်း ဂျပန်ဗဟိုအစိုးရနှင့် အိုကီနာဝါ (Okinawa) ပြည်နယ် အစိုးရတို့သည် တိုက်ခိုက်မှုများ ဖြစ်ပွားသည့် အခြေအနေတွင် ပြည်သူများကို ဘေးလွတ်ရာ ရွှေ့ပြောင်း ကယ်ဆယ်ရေးအတွက် လေ့ကျင်မှုများ ပြုလုပ်ခဲ့သည်။

Source: Japan Times

CNI International News

ပြုံယမ်း၊ ဩဂုတ် ၆

မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) သည် နယ်စပ်ဒေသရှိ တပ်ဖွဲ့များထံသို့ နည်းဗျူဟာမြောက် ပဲ့ထိန်းဒုံးကျည်ပစ်လွှတ်သည့် လောင်ချာအသစ် ၂၅၀ ကို လွှဲပြောင်းပေးပို့သော အခမ်းအနားကို ကြီးကြပ်လုပ်ဆောင်ခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

ဩဂုတ် ၅ ရက်က ပြုံယမ်း (Pyongyang) မြို့တော်တွင် ပြုလုပ်သည့် ထိုအခမ်းအနား၌ ဒုံးပစ်လောင်ချာများ တင်ဆောင်ထားသော ထရပ်ကားများ တန်းစီရပ်ထားပုံများ၊ စစ်သားများက ပုံစံယူ မတ်တပ်ရပ်နေသည့်ပုံများနှင့် မီးရှူးမီးပန်းများ ပစ်ဖောက်နေသည့် ဓာတ်ပုံများကို နိုင်ငံပိုင် KCNA သတင်းအေဂျင်စီက ထုတ်ပြန်ခဲ့သည်။

ထိုအခမ်းအနားတွင် ကင်မ်က မိန့်ခွန်းပြောကြားခဲ့ရာတွင် ထိုဒုံးပစ်လောင်ချာများသည် နောက်ဆုံးပေါ် နည်းဗျူ ဟာမြောက် တိုက်ခိုက်ရေး လက်နက်များဖြစ်ကြောင်းနှင့် သူကိုယ်တိုင် ဒီဇိုင်းရေးဆွဲခဲ့ခြင်းဖြစ်ကြောင်း ပြောကြား ခဲ့သည်။

 မြောက်ကိုရီးယားခေါင်းဆောင် ကင်မ်ကို တွေ့ရစဉ်

မြောက်ကိုရီးယားသည် အမေရိကန်အထိ ရောက်ရှိနိုင်သည့် တိုက်ချင်းပစ် ပဲ့ထိန်းဒုံးကျည်များကို ထုတ်လုပ်နေ ကာ အိမ်နီးချင်း တောင်ကိုရီးယားနိုင်ငံ၏ ဒုံးကျည်ကာကွယ်ရေးစနစ်ကို ကျော်လွှားနိုင်စေရန် တာတိုပစ် လက်နက် အများအပြားကို ထုတ်လုပ်လျက်ရှိသည်။

ပြီးခဲ့သည့်လက စမ်းသပ်ခဲ့သည့် နည်းဗျူဟာမြောက် ပဲ့ထိန်းဒုံးကျည်သည် အလွန်ကြီးမားသည့် လက်နက်ထိပ်ဖူး ကို သယ်ဆောင်နိုင်စွမ်း ရှိသည်ဟုလည်း မြောက်ကိုရီယားက ပြောကြားခဲ့သည်။

"တောင်ကိုရီးယားကို တိုက်ခိုက်ဖို့ ဒါမှမဟုတ် ခြိမ်းခြောက်ဖို့အတွက် ဒီ ဒုံးပစ်လောင်ချာတွေကို နည်းမျိုးစုံနဲ့ အသုံးပြုလိမ့်မယ်လို့ ကျနော်တို့ ယူဆထားပါတယ်။ နယ်စပ်မှာ ဒုံးပစ်လောင်ချာတွေ ဖြန့်ကြက်ချထားတာက တောင်ကိုရီးယားနဲ့ သိပ်မဝေးတော့ဘူးဆိုတဲ့ အဓိပ္ပာယ်ကို ပြသရာရောက်နေပါတယ်" ဟု တောင်ကိုရီးယား ပူးတွဲစစ်ဦးစီးချုပ်များအဖွဲ့ (JCS) ၏ ပြောရေးဆိုခွင့်ရှိသူ လီဆန်ဂျွန်းက ပြောကြားခဲ့သည်။

 မြောက်ကိုရီးယား ဒုံးပစ်လောင်ချာ ပေးအပ်ခြင်း အခမ်းအနားကျင်းပနေစဉ်

အမေရိကန်သည် နျူကလီးယားအခြေပြု စစ်ဘက်ဆိုင်ရာ အဖွဲ့တစ်ခု ဖွဲ့စည်းနေခြင်းကြောင့် မြောက်ကိုရီးယား သည် မိမိတို့ စစ်တပ်၏ စွမ်းဆောင်ရည်များကို မြှင့်တင်ရမည့် အနေအထားသို့ ရောက်ရှိခဲ့ခြင်းဖြစ်သည်ဟု ကင်မ်က ပြောကြားခဲ့သည်။

မြောက်ကိုရီးယားသည် အမေရိကန်နှင့် တောင်ကိုရီးယားတို့၏ ပူးတွဲစစ်ရေး လေ့ကျင့်မှုများကို ဝေဖန်ရှုတ်ချ လေ့ရှိပြီး ထိုစစ်ရေး လေ့ကျင့်မှုများသည် မြောက်ကိုရီးယားကို ကျူးကျော်ဝင်ရောက်ရန် အစမ်းလေ့ကျင့် ပြင်ဆင်နေခြင်း ဖြစ်သည်ဟု ပြောကြားခဲ့သည်။

တောင်ကိုရီးယား၏ ပြန်လည်ပေါင်းစည်းရေးဝန်ကြီးဌာနကမူ မြောက်ကိုရီးယားသည် ကုလသမဂ္ဂ၏ ပိတ်ဆို့မှု များကို ချိုးဖောက်ပြီး နျူကလီးယားနှင့် ဒုံးကျည် စီမံကိန်းများကို ဆက်လက် လုပ်ဆောင်နေခြင်းသည် ကိုရီးယား ကျွန်းဆွယ်၏ ငြိမ်းချမ်းရေးနှင့် တည်ငြိမ်ရေးကို ခြိမ်းခြောက်နေကြောင်း ပြောကြားခဲ့သည်။

Source: အယ်လ်ဂျာဇီးယား

CNI International News

ဂျေရုဆလင်၊ ဩဂုတ် ၆

ဟစ်ဇ်ဘိုလာနှင့် ဟားမာ့စ်ခေါင်းဆောင်များ လုပ်ကြံသတ်ဖြတ်ခံရမှုအတွက် လက်တုန့်ပြန်သည့် အနေဖြင့် အီရန်နှင့် ဒေသတွင်း လက်နက်ကိုင်အဖွဲ့များ၏ ဖြစ်လာနိုင်ခြေရှိသော တိုက်ခိုက်မှုများအတွက် အစ္စရေးက ကြိုတင်ပြင်ဆင်ထားသည်။

အမေရိကန်ကမူ ဂါဇာ အပစ်အခတ်ရပ်စဲရေး သဘောတူညီမှု ပြုလုပ်ရန် တိုက်တွန်းနေချိန်တွင် ဒေသတွင်း အစ္စရေးက ခံစစ်တပ်ကူများကို စေလွှတ်ခဲ့ကြောင်း Japan Times မှ ဖော်ပြခဲ့သည်။

ဩဂုတ် ၄ ရက်က ပြုလုပ်သည့် အစိုးရအဖွဲ့ အစည်းအဝေးအတွင်း အစ္စရေးဝန်ကြီးချုပ် ဘင်ဂျမင် နေတန်ယာဟု (Benjamin Netanyahu) က အစ္စရေးသည် အီရန်၏ မိစ္ဆာဝင်ရိုးစွန်းအဖွဲ့များနှင့် စစ်မျက်နှာပေါင်းစုံ ဖွင့်ထား ကြောင်း ပြောကြားခဲ့သည်။

"ကျနော်တို့ဟာ ဘယ်အဖွဲ့ကိုမဆို ကြီးမားတဲ့ အင်အားနဲ့ တိုက်ခိုက်နေပါတယ်။ ဒါအပြင် ထိုးစစ်အတွက်ရော ခံစစ်အတွက်ပါ ဘယ်လို အခြေအနေမျိုးမှာမဆို ကြိုတင်ပြင်ဆင်ထားပါတယ်" ဟု နေတန်ယာဟုက ပြောကြား ခဲ့သည်။

အစ္စရေးနိုင်ငံအနီးသို့ လေယာဉ်တင် သင်္ဘောတစ်စီး စေလွှတ်ပြီး အရှေ့အလယ်ပိုင်းဒေသသို့ တိုက်လေယာဉ် အုပ်စုတစ်စု စေလွှတ်ထားသည့် အမေရိကန်ကလည်း ၁၀ လနီးပါး ကြာမြင့်လာပြီဖြစ်သော ဂါဇာစစ်ပွဲကို အပစ်အခတ်ရပ်စဲရေးအတွက် ဆွေးနွေးညှိနှိုင်းမှုများ အရှိန်မြှင့်တင်ရန် နေတန်ယာဟုကို တိုက်တွန်းလျက်ရှိသည်။

အမေရိကန်နိုင်ငံခြားရေး၀န်ကြီး ဘလင်ကင်ကို တွေ့ရစဉ်

စက်မှုထိပ်သီး ၇ နိုင်ငံ (G-7) အဖွဲ့ဝင် နိုင်ငံခြားရေးဝန်ကြီးများကလည်း ဩဂုတ် ၄ ရက်တွင် ဗွီဒီယိုဆက်သွယ်မှုမှ တစ်ဆင့် ပြုလုပ်သည့် ဆွေးနွေးမှု၌ ဒေသတွင်းပဋိပက္ခ ပိုမိုကျယ်ပြန့်လာမည့် အရေးကို စိုးရိမ်ကြောင်း ပြောကြား ခဲ့ကြသည်ဟု အီတလီနိုင်ငံခြားရေးဝန်ကြီးဌာနက ထုတ်ပြန်ခဲ့သည်။

အမေရိကန်နိုင်ငံခြားရေးဝန်ကြီး အန်တိုနီ ဘလင်ကင် (Antony Blinken) က အရှေ့အလယ်ပိုင်းတွင် တင်းမာမှု လျှော့ချရေးကို အရေးတကြီး လိုအပ်ကြောင်းကို G-7 နိုင်ငံခြားရေးဝန်ကြီးများနှင့် ဆွေးနွေးခဲ့သည်ဟု အမေရိကန် နိုင်ငံခြားရေးဝန်ကြီးဌာနက ထုတ်ပြန်ခဲ့သည်။

နေတန်ယာဟုကမူ ဟားမာ့စ်အဖွဲ့၏ တောင်းဆိုမှုများ တစ်ခုပြီးတစ်ခု ပြောင်းလဲနေခြင်းသည် အပစ်အခတ်ရပ်စဲ ရေး ဆွေးနွေးမှုအတွက် ပြဿနာဖြစ်နေကြောင်း ပြောကြားခဲ့သော်လည်း အစ္စရေးသည်လည်း ၎င်း၏တောင်းဆို ချက်များကို ပြောင်းလဲနေသည်ဟု လေ့လာသူများက ဝေဖန်ခဲ့သည်။

အီရန်နှင့် ဟစ်ဇ်ဘိုလာ ခေါင်းဆောင်များကမူ ပြီးခဲ့သည့် သီတင်းပတ်အတွင်း ဟားမာ့စ်အဖွဲ့ခေါင်းဆောင်နှင့် ဟစ်ဇ်ဘိုလာတပ်မှူး လုပ်ကြံသတ်ဖြတ်ခံရမှုကို လက်တုန့်ပြန်သွားမည်ဟု သတိပေးခဲ့သည်။

အစ္စရေးအရာရှိများက ဖြစ်လာနိုင်ခြေရှိသည့် တိုက်ခိုက်မှုများသည် လက်ဘနွန်နိုင်ငံအတွင်းရှိ ဟစ်ဇ်ဘိုလာအဖွဲ့၊ ယီမင်နိုင်ငံရှိ ဟူရ်သီအဖွဲ့နှင့် အီရန်နိုင်ငံတို့ထံမှ စတင်ပေါ်ပေါက်လာနိုင်ကြောင်း ပြောကြားခဲ့သည်။

Source: Japan Times

CNI International News

ဘန်ကောက်၊ ဩဂုတ် ၆

ထိုင်းနိုင်ငံ၏ အတိုက်အခံ Move Forward ပါတီ ဖျက်သိမ်းခံရမည်ဆိုပါက ၂၀၂၅ ခုနှစ်မှ ၂၀၂၇ ခုနှစ်အထိ ကုလသမဂ္ဂ လူ့အခွင့်အရေးကောင်စီ (UNHRC) တွင် နေရာတစ်နေရာ ရရှိရေးအတွက် ထိုင်းနိုင်ငံ၏ တတိယ အကြိမ်မြောက် အားထုတ်ကြိုးပမ်းမှုကို ထိခိုက်စေနိုင်ကြောင်း ဝါရင့်နိုင်ငံရေးလေ့လာသုံးသပ်သူတစ်ဦးက သတိပေးခဲ့ကြောင်း Thai PBS World မှ ဖော်ပြခဲ့သည်။

Future Forward ပါတီ ခေါင်းဆောင်ဟောင်း သာနာသွန်း ဂျူအန်ရွန်ရူအန်ကစ် (Thanathorn Juangroo ngruangkit) ဦးဆောင်သည့် Progressive movement အဖွဲ့၏ အဓိကအဖွဲ့ဝင် တစ်ဦးဖြစ်သည့်  ချမ်နန် ချန်ရူအန် (Chamnan Chanruang) က ဖွဲ့စည်းပုံအခြေခံဥပဒေဆိုင်ရာခုံရုံးကို သတိပေးခဲ့ခြင်းဖြစ်သည်။

ထို့ပြင် ထိုင်းနိုင်ငံသည် စက်တင်ဘာ ၁၇ ရက်မှ ၂၁ ရက်အထိ အာရှ ဖွဲ့စည်းပုံအခြေခံဥပဒေဆိုင်ရာခုံရုံးများနှင့် တူညီသော အင်စတီကျူးရှင်းများအသင်း (AACC) ၏ ဆဋ္ဌမအကြိမ်မြောက် စာတမ်းဖတ်ပွဲကို ဘန်ကောက်မြို့ တော်တွင် လက်ခံကျင်းပ သွားမည်ဟုလည်း ချမ်နန်က ပြောကြားခဲ့သည်။

ထိုစာတမ်းဖတ်ပွဲကို နိုင်ငံ ၁၉ နိုင်ငံမှ ဖွဲ့စည်းပုံအခြေခံဥပဒေဆိုင်ရာ ခုံရုံးများနှင့် တူညီသော အင်စတီကျူးရှင်း များ၏ ဥက္ကဋ္ဌများ တက်ရောက်လိမ့်မည်ဖြစ်ပြီး MFP ဖျက်သိမ်းခံရမည်ဆိုပါက ထိုနိုင်ငံများမှ ဖွဲ့စည်းပုံအခြေခံ ဥပဒေဆိုင်ရာခုံရုံး ဥက္ကဋ္ဌများ၏ မေးခွန်းများကို ထိုင်းဖွဲ့စည်းပုံအခြေခံဥပဒေဆိုင်ရာခုံရုံးဥက္ကဋ္ဌက မည်ကဲ့သို့ အဖြေပေးမည်ကို သိချင်သည်ဟုလည်း ချမ်နန်က ပြောကြားခဲ့သည်။

UNHRC ကိုတွေ့ရစဉ်

ထိုင်းသည် UNHRC တွင် နေရာ တစ်နေရာရရန် ယခင်ကလည်း ကြိုးပမ်းခဲ့ဖူးသော်လည်း ၂၀၁၄ အာဏာသိမ်းမှု နှင့် လူ့အခွင့်အရေး ချိုးဖောက်မှု အခြေအနေများကြောင့် UNHRC တွင် နေရာရခဲ့ခြင်းမရှိပေ။

ဖွဲ့စည်းပုံအခြေခံဥပဒေဆိုင်ရာခုံရုံးသည် MFP အား ဖျက်သိမ်းရန် တောင်းဆိုထားသည့် ရွေးကောက်ပွဲကော်မရှင် ၏ အသနားခံစာကို ပယ်ချပြီး MFP ကို လွတ်ငြိမ်းခွင့် ပေးဖွယ်ရှိနေသည်ဟုလည်း ယုံကြည်ကြောင်း ချမ်နန်က ပြောကြားခဲ့သည်။

ဖွဲ့စည်းပုံအခြေခံဥပဒေဆိုင်ရာခုံရုံးသည် MFP အား တော်ဝင်အသရေဖျက်မှုဥပဒေကို ပြင်ဆင်မည့် လှုပ်ရှားမှု များအား ရပ်တန့်ရန် ဇန်နဝါရီလက စီရင်ချက်ချခဲ့ပြီးနောက် MFP နှင့် MFP ခေါင်းဆောင်ဟောင်း ပီတာ လင်ဂျာရွန်ရတ် (Pita Limjaroenrat) သည် တော်ဝင်အသရေဖျက်မှု ဥပဒေနှင့်ပတ်သက်သည့် ၎င်းတို့၏ လှုပ်ရှားမှုများကို ရပ်တန့်ခဲ့သည်။

အကယ်၍ တရားရုံးက MFP ကို ဖျက်သိမ်းရန် ဆုံးဖြတ်ခဲ့ပါက MFP ပါတီဝင်များနှင့် လွှတ်တော်အမတ်များသည် ပါတီအသစ်တစ်ခုကို ထပ်မံထူထောင်လိမ့်မည်ဖြစ်ပြီး တော်ဝင်အသရေဖျက်မှုဥပဒေကို ပြုပြင်ပြောင်းလဲရန် ဆက်လက် ကြိုးပမ်းသွားလိမ့်မည်ဟု ချမ်နန်က ပြောကြားခဲ့သည်။

Source: Thai PBS World

CNI International News

အဘူဂျာ၊ သြဂုတ် ၅

နိုက်ဂျီးရီးယားသမ္မတ ဘိုလာ တင်နျူဘူ (Bola Tinubu) က နိုင်ငံအတွင်း ဖြစ်ပွားနေသည့် ဆန္ဒပြမှုများကို ရပ်တန့်ရန်နှင့် ဆွေးနွေးညှိနှိုင်းရေး အခြေအနေကို ဖန်တီးရန် သြဂုတ် ၄ ရက်က တိုက်တွန်းခဲ့သည်ဟု ရိုက်တာမှ ဖော်ပြခဲ့သည်။

နိုင်ငံအတွင်း ကုန်ဈေးနှုန်းများ မြင့်တက်မှုကို ဆန့်ကျင်သည့် ဆန္ဒပြမှုများ ပြီးခဲ့သည့် သီတင်းပတ်မှစပြီး ဖြစ်ပွား ခဲ့ချိန် ကတည်းက ပြည်သူလူထုကို ပထမဆုံး မိန့်ခွန်းပြောကြားရာမှာ တင်နျူဘူက ထိုကဲ့သို့ တိုက်တွန်းခဲ့ခြင်း ဖြစ်သည်။

ဆန္ဒပြမှုများ စတင်ဖြစ်ပွားခဲ့သည့် ပထမဆုံးနေ့ဖြစ်သည့် ဩဂုတ် ၁ ရက်တွင် ဆန္ဒပြသူများနှင့် လုံခြုံရေး တပ်ဖွဲ့ဝင်များအကြား ခိုက်ရန်ဖြစ်ပွားခဲ့သဖြင့် လူ ၁၃ ဦးထက်မနည်း သေဆုံးခဲ့ကြောင်း နိုင်ငံတကာ လွတ်ငြိမ်းချမ်းသာခွင့်အဖွဲ့က ထုတ်ပြန်ခဲ့သည်။

နိုက်ဂျီးရီးယားသမ္မတ ဘိုလာ တင်နျူဘူကို တွေ့ရစဉ်

ရဲတပ်ဖွဲ့ကမူ အင်အားသုံး ဖြိုခွင်းခြင်းမရှိကြောင်း ငြင်းဆိုထားပြီး ဩဂုတ် ၃ ရက်တွင် နိုင်ငံအရှေ့မြောက်ပိုင်း ဘော်နို (Borno) ပြည်နယ်၌ ချီတက်ဆန္ဒပြမှုအတွင်း ပေါက်ကွဲမှုတစ်ခု ဖြစ်ပွားခဲ့သဖြင့် လူ ၄ ဦး သေဆုံးကာ လူ ၂ ဦးသည် ကားတိုက်ခံရသဖြင့် သေဆုံးခဲ့ကြောင်း ရဲတပ်ဖွဲ့က ပြောကြားခဲ့သည်။

ထို့ပြင် ဆန္ဒပြသူများသည် စတိုးဆိုင်တစ်ဆိုင်ကို ဝင်ရောက်လုယက်ချိန်တွင် အစောင့်တစ်ဦး၏ ပစ်ခတ်မှုကြောင့် လူ ၁ ဦး သေဆုံးခဲ့သည်ဟု ရဲတပ်ဖွဲ့က ပြောကြားခဲ့သည်။

နိုက်ဂျီးရီးယားသမ္မတ တင်နျူဘူကမူ ဆန္ဒပြမှုများ ဖြစ်ပွားချိန်ကတည်းက ပြည်နယ်အချို့တွင် ဖြစ်ပွားနေသည့် အကြမ်းဖက်မှုကို အဆုံးသတ်ရန် တိုက်တွန်းခဲ့ပြီး ဆွေးနွေးရန် လမ်းဖွင့်ပေးထားကြောင်း ပြောကြားခဲ့သည်။

နိုက်ဂျီးရီးယား ဆန္ဒပြသူများကိုတွေ့ရစဉ်

"ချစ်ခင်လေးစားရပါသော နိုက်ဂျီးရီးယား နိုင်ငံသားများခင်ဗျား။ သင်တို့ရဲ့ ကျယ်လောင်ပြီး ပြတ်သားတဲ့အသံတွေ ကို ကျနော် ကြားရပါတယ်။ ဒီဆန္ဒပြမှုကို ဖြစ်စေခဲ့တဲ့ နာကျင်မှုတွေ၊ စိတ်ပျက်မှုတွေကို နားလည်ပါတယ်။ ကျနော်တို့အစိုးရဟာ ပြည်သူတွေရဲ့ စိုးရိမ်မှုတွေကို နားထောင်ပြီး ဖြေရှင်းပေးသွားမယ်ဆိုတာ ပြောကြားလိုပါ တယ်" ဟု တင်နျူဘူက ပြောကြားခဲ့သည်။

သို့သော် မိမိတို့နိုင်ငံအား ပြိုကွဲသွားစေမည့် အကြမ်းဖက်မှုများ၊ ဖျက်ဆီးမှုများကိုမူ ခွင့်ပြုမည် မဟုတ်ကြောင်း ၎င်းက ထပ်လောင်းပြောကြားခဲ့သည်။

နိုက်ဂျီးရီးယားတွင် လောင်စာဆီစျေးများ၊ မီတာခများကို လျှော့ချရန် ဆန္ဒပြသူများက တောင်းဆိုနေကြပြီး အစိုးရ၏ အုပ်ချုပ်ပုံညံ့ဖျင်းမှုနှင့် စီးပွားရေး အကျပ်အတည်းကို ဒေါသထွက်ခဲ့ကာ အွန်လိုင်းပေါ်မှတစ်ဆင့် ဆန္ဒပြမှုများပြုလုပ်ရန် လှုံ့ဆော်ခဲ့ကြခြင်းဖြစ်သည်။

Source: ရိုက်တာ

CNI International News

လန်ဒန်၊ သြဂုတ် ၅

ဗြိတိန်တွင် ဓားဖြင့်တိုက်ခိုက်မှုအတွင်း မိန်းကလေးငယ် ၃ ဦး သေဆုံးခဲ့ကြောင်း သတင်းမှားများနှင့် ဆက်နွှယ် သည့် မငြိမ်မသက်မှုများ နိုင်ငံတစ်ဝန်း ပျံ့နှံ့ခဲ့သောကြောင့် ချီတက်ဆန္ဒပြမှုတွင် ရဲတပ်ဖွဲ့နှင့် လက်ယာယိမ်း ဆန္ဒပြသူများကြား အဓိကရုဏ်းဖြစ်ပွားခဲ့သည်ဟု အယ်ဂျားဇီးယားမှ ဖော်ပြခဲ့သည်။

ဇူလိုင် ၂၉ ရက်က ဆောက်ပို့(Southport)မြို့တွင် ကလေးငယ်များအတွက် အကသင်တန်းတစ်ခုအတွင်း ဓားဖြင့် တိုက်ခိုက်ခဲ့သည့် သံသယရှိသူသည် မွတ်စလင် ရွှေ့ပြောင်းနေထိုင်သူ တစ်ဦးဖြစ်ကြောင်း လူမှုမီဒီယာတွင် သတင်းအမှားများ လျင်လျင်မြန်မြန် ပျံ့နှံ့လာခဲ့သည်။

ထို့နောက် လတ်တလော ရက်များအတွင်း မြို့အများအပြားတွင် ရွှေ့ပြောင်းနေထိုင်သူများကို ဆန့်ကျင်သည့် ဆန္ဒပြသူ ရာချီပါဝင်သော ဆန္ဒထုတ်ဖော်မှုများ ဖြစ်ပွားခဲ့သည်။

ဓားဖြင့် တိုက်ခိုက်သည်ဟု သံသယရှိသူ အသက် ၁၇ နှစ်အရွယ် အက်ဇဲလ် ရူဒါကူဘာနာ(Axel Rudakubana)ကို ဝေးလ်စ်နိုင်ငံ၊ ကာဒစ်ဖ်မြို့တော် (Cardiff)တွင် မွေးဖွားခဲ့သည်ဟု ရဲတပ်ဖွဲ့က ပြောကြားခဲ့သည်။

ရဲတပ်ဖွဲ့နဲ့ ဆန္ဒပြသူ ထိပ်တိုက်တွေ့စဉ်

သို့သော် ရွှေ့ပြောင်းနေထိုင်သူများ ဆန့်ကျင်ရေးနှင့် မွတ်စလင် ဆန့်ကျင်သည့် ဆန္ဒပြသူများက သြဂုတ် ၂ ရက် ညနေခင်းအချိန်တွင် ဆန်းဒါးလန်းမြို့(Sunderland)အပါအဝင် နေရာအနှံ့အပြားမှာ ဆန္ဒပြမှုများကို ဆက်လက် လုပ်ဆောင်ခဲ့သည်။

ထို့နောက် ဆန္ဒပြမှုများသည် အကြမ်းဖက်မှုနှင့် အဓိကရုဏ်းအသွင်သို့ တဖြည်းဖြည်း ကူးပြောင်းလာခဲ့သည်။

အင်္ဂလန်အနောက်မြောက်ပိုင်း လီဗာပူးလ်(Liverpool)မြို့တွင် ဆန္ဒပြသူများသည် ရဲအရာရှိများကို ထိုင်ခုံများ၊ အချက်ပြမီးများ၊ အုတ်ခဲများဖြင့် ပစ်ပေါက်ခဲ့သည်။ 

အလားတူ မန်ချက်စတာ(Manchester)မြို့အနီးတွင်လည်း ရဲတပ်ဖွဲ့နှင့် ဆန္ဒပြသူများအကြား အဓိကရုဏ်းများ ဖြစ်ပွားခဲ့သည်။

“လီဗာပူးလ်မြို့တော်ခန်းမမှာ ရန်လိုနေတဲ့ ဆန္ဒပြသူတွေနဲ့ ထိပ်တိုက် ရင်ဆိုင်ရချိန် အရာရှိ အများအပြား ဒဏ်ရာ ရခဲ့ပါတယ်”ဟု မာဆေးဆိုက်(Merseyside)ကောင်တီ ရဲတပ်ဖွဲ့က ပြောကြားခဲ့သည်။

အိုင်ယာလန်မြောက်ပိုင်း(Northern Ireland) ဘယ်ဖတ်မြို့(Belfast)တွင် မွတ်စလင် ဆန့်ကျင်သည့်အဖွဲ့နှင့် လူမျိုးရေခွဲခြားမှု ဆန့်ကျင်ရေး ဆန္ဒပြသူများအကြား တင်းမာမှုဖြစ်ပွားချိန် မီးရှုးမီးပန်းများ ပစ်ဖောက်ခဲ့သည်။

ရဲတပ်ဖွဲ့နဲ့ ဆန္ဒပြသူ ထိပ်တိုက်တွေ့စဉ်

မြို့အတွင်းရှိ စီးပွားရေး လုပ်ငန်းအချို့တွင် အဆောက်အအုံ အပျက်အစီးအချို့ရှိခဲ့သည်။

လိဒ်မြို့(Leeds)တွင် လူပေါင်း ၁၅၀ ခန့်က ဗြိတိန်အလံများကို ကိုင်ဆောင်ကာ “ခင်ဗျားတို့ အင်္ဂလန်နိုင်ငံသားတွေ မဟုတ်ဘူး”ဟု အော်ဟစ်ကြွေးကြော်ခဲ့ကြပြီး ၎င်းတို့ကို တန်ပြန်ဆန္ဒပြသူများက “နာဇီ ဆန်ကုန်မြေလေးတွေ”ဟု ကြွေးကြော်ဆန္ဒပြခဲ့ကြသည်။

ဆန့်ကျင်ဘက် ဆန္ဒပြအဖွဲ့များသည် နော်တင်ဟန်မြို့လယ်တွင် ထိပ်တိုက်တွေ့ဆုံခဲ့ကြသည်။

ဝန်ကြီးချုပ် ကီယာစတာမာ(Keir Starmer)က အကြမ်းဖက်မှုများအတွက် လက်ယာယိမ်းများကို ပြစ်တင် ရှုတ်ချ ခဲ့ပြီး ပြင်းထန်သော အရေးယူဆောင်ရွက်မှုများ ပြုလုပ်ရန် ရဲတပ်ဖွဲ့ကို ညွှန်ကြားခဲ့သည်။

Source - အယ်ဂျားဇီးယား

CNI International News

ကာရာကက်စ်၊ သြဂုတ် ၅

ဗင်နီဇွဲလားနိုင်ငံတစ်ဝန်းတွင် အငြင်းပွားဖွယ် ရွေးကောက်ပွဲရလဒ်အပေါ် ထောင်နှင့်ချီသည့် နိုင်ငံသားများက သြဂုတ် ၃ ရက်၌ ဆန့်ကျင်ဆန္ဒ ထုတ်ဖော်ခဲ့ကြသည်ဟု ရိုက်တာမှ ဖော်ပြခဲ့သည်။

ထို့နောက် သမ္မတမာဒူရို(Nicolas Maduro)က ရွေးကောက်ပွဲရလဒ်အား ဆန္ဒပြမှုများအတွင်း လူ ၂၀၀၀ ကို ဖမ်းဆီးခဲ့သည်ဟု သူ၏ ထောက်ခံသူများကို ပြောကြားခဲ့သည်။

အစိုးရအဖွဲ့နှင့် ပူးပေါင်းထားသော အမျိုးသားရွေးကောက်ပွဲကောင်စီက ဇူလိုင် ၂၈ ရက် ရွေးကောက်ပွဲတွင် မာဒူရိုက အနိုင်ရရှိကြောင်း ထုတ်ပြန်ခဲ့သည်။

မာဒူရိုသည် မဲအရေအတွက် ၅၁ ရာခိုင်နှုန်းရရှိခဲ့ပြီး အတိုက်အခံ ကိုယ်စားလှယ်လောင်း အက်ဒ်မွန်ဒို ဂွန်ဇာလက်(Edmundo Gonzalez)က မဲအရေအတွက် ၄၆ ရာခိုင်နှုန်း ရရှိခဲ့သည်ဟု ဇူလိုင် ၂၉ ရက်တွင် အမျိုးသားရွေးကောက်ပွဲကောင်စီက ထုတ်ပြန်ခဲ့သည်။

ဗင်နီဇွဲလားမှာ ရွေးကောက်ပွဲရလဒ်ကို ဆန့်ကျင်နေကြစဉ်

ရွေးကောက်ပွဲရလဒ်သည် မဟုတ်မမှန် လုပ်ကြံထားကြောင်း စွပ်စွဲချက်များ ကျယ်ကျယ်ပြန့်ပြန့် ထွက်ပေါ်လာကာ ဆန္ဒပြမှုများဖြစ်ပွားခဲ့သည်။ 

မာဒူရို၏အစိုးရက အမေရိကန် ကျောထောက်နောက်ခံပြု အာဏာသိမ်းရန် ကြိုးပမ်းမှု တစ်စိတ်တစ်ပိုင်းဟု ခေါင်းစဉ်တပ်ထားသော ယင်းဆန္ဒပြမှုများကို လုံခြုံရေးတပ်ဖွဲ့များက ဖြိုခွင်းခဲ့သည်။

“အခုတစ်ကြိမ်တော့ ခွင့်လွှတ်ပေးသွားမှာ မဟုတ်ပါဘူး”ဟု မာဒူရိုက ကာရာကက်စ် (Caracas) မို့တွင် ပြုလုပ်သည့် လူထုစည်းဝေးပွဲ၌ ထောက်ခံသူများကို ပြောကြားခဲ့သည်။

ထို့နောက် ဆန္ဒပြမှုများအတွင်း ရာဇဝတ်မှုများနှင့် ဆက်နွှယ်၍ လူ ၂၀၀၀ ခန့်ကို ဖမ်းဆီးထိန်းသိမ်းခဲ့သည်ဟု ၎င်းက ပြောကြားခဲ့သည်။

မာဒူရိုကို ထောက်ခံသူများက ၎င်းတို့သည် ဒီမိုကရေစီကို ကာကွယ်ပေးနေခြင်းဖြစ်ကြောင်း ပြောကြားခဲ့သည်။ 

“ဒီနေ့ ကျနော်တို့တွေအနေနဲ့ ဒီမိုကရေစီကို ကာကွယ်ဖို့ ကျနော်တို့ သမ္မတကြီးရဲ့ ဖိတ်ခေါ်ချက်အတိုင်း ရောက်ရှိ နေတာ ဖြစ်ပါတယ်” ဟု ကာရာကက်စ်မြို့တွင် အစိုးရလိုလားသော လူထုစုဝေးမှု၏ တစ်စိတ်တစ်ပိုင်းကို ဦးဆောင်သည့် ဗင်နီဇွဲလား၏ Fontur သမဂ္ဂဥက္ကဋ္ဌ အယ်ဖရက်ဒိုဗာလီရာ(Alfredo Valera)က ပြောကြားခဲ့သည်။

ဗင်နီဇွဲလားမှာ ရွေးကောက်ပွဲရလဒ်ကို ဆန့်ကျင်နေကြစဉ်

အတိုက်အခံဘက်မှ ထောက်ခံသူများသည် ပုန်းအောင်းနေရာမှ ကာရာကက်စ်မြို့၏ လမ်းများပေါ်တွင် ဆန္ဒပြမှု များနှင့် ပူးပေါင်းပါဝင်ရန် ထွက်ပေါ်လာသည့် ခေါင်းဆောင် မာရီယာ ကိုရီနာ မာချာဒို(Maria Corina Machado) နှင့်အတူ တရားမျှတမှုကို တောင်းဆိုရန် ချီတက်ခဲ့ကြသည်။

မာချာဒိုက သူသည် အသက်အန္တရာယ် စိုးရိမ်သည့်အတွက် ပုန်းအောင်း နေထိုင်ခဲ့ရခြင်းဖြစ်ကြောင်း  Wall Street ဂျာနယ်ကို ပြောကြားခဲ့ပြီးနောက် အတိုက်အခံဘက်မှ ထောက်ခံသူများက မာချာဒိုကို လမ်းပေါ်တွင် မြင်တွေ့ခဲ့ရ သည့်အပေါ် အလွန်ပျော်ရွှင်ခဲ့ကြသည်။

ကာရာကက်စ်အပြင် ဗလန်စီယာ(Valencia)၊ မာရာကိုင်ဘို(Maracaibo)နှင့် ဆန်ခရစ်စတိုဘယ်(San Cristobal) အပါအဝင် မြို့အများအပြားတွင် ဆန္ဒပြမှုများ ဖြစ်ပွားခဲ့သည်။

ရွေးကောက်ပွဲအပြီး ပေါ်ပေါက်လာသော ဆန္ဒပြပွဲများတွင် အနည်းဆုံးလူ ၂၀ သေဆုံးခဲ့ပြီး လူ ၁၂၀၀ ခန့် ဖမ်းဆီး ထောင်ချ ခံထားရသည်ဟု အမေရိကန်အခြေစိုက် လူ့အခွင့်အရေး စောင့်ကြည့်အဖွဲ့ အပါအဝင် တက်ကြွလှုပ်ရှား သူများ အဖွဲ့များက ထုတ်ပြန်ထားသည်။

Source - ရိုက်တာ

CNI International News

ဘန်ကောက်၊ သြဂုတ် ၅

Move Forward Party(MFP)မှ လွှတ်တော်အမတ်များကို အစိုးရညွှန့်ပေါင်းအဖွဲ့အတွင်းရှိ အချို့ပါတီများက ၎င်းတို့၏ ပါတီများထဲသို့ဝင်ရန် စည်းရုံးသွေးဆောင်နေသည်ဟု MFP  ခေါင်းဆောင် ချိုင်သာဝပ် တူလာသွန်း (Chaithawat Tulathon) က ပြောကြားခဲ့ကြောင်း Thai PBS World မှ ဖော်ပြခဲ့သည်။

အကယ်၍ MFP ကို ဖွဲ့စည်းပုံအခြေခံဥပဒေဆိုင်ရာ ခုံရုံးက သြဂုတ် ၇ ရက်တွင် ဖျက်သိမ်းခဲ့မည်ဆိုပါက ပါတီ လက်မဲ့ဖြစ်သွားမည့် MFP မှ လွှတ်တော်အမတ်များကို အခြားပါတီများက စည်းရုံးခြေင်းဖြစ်သည်ဟု ချိုင်သာဝပ် က ပြောကြားခဲ့သည်။

မည်သို့ပင်ဆိုစေ MFP သည် မဲဆန္ဒရှင်များ၏ ယုံကြည်မှုကို သစ္စာဖောက်မည် မဟုတ်ကြောင်း၊ ပါတီ၏ အနာဂတ်နှင့် ပတ်သက်ပြီး သေချာရေရာမှုမရှိသည့် အခြေအနေတွင် လွှတ်တော်အမတ်များကို အထူးညွှန်ကြား ချက်များ ပေးခဲ့ခြင်းမရှိကြောင်း ၎င်းက ဆိုသည်။

MFP  ခေါင်းဆောင် ချိုင်သာဝပ် တူလာသွန်းကို တွေ့ရစဉ်

လွှတ်တော်အမတ်များအကြား သဘောထား ကွဲလွဲမှုများသည် ပါတီကို ထိခိုက်စေမည်ဖြစ်သဖြင့် ထိုအခြေအနေ မျိုးကို မဖန်တီးလိုကြောင်း ချိုင်သာဝပ်က ပြောသည်။

MFP သည် ဖွဲ့စည်းပုံအခြေခံဥပဒေဆိုင်ရာ ဒီမိုကရေစီကို ပျက်ပြယ်စေရန် လုပ်ဆောင်မှုဖြင့် ရွေးကောက်ပွဲ ကော်မရှင်က MFP ကို ဖျက်သိမ်းရန် ဖွဲ့စည်းပုံအခြေခံဥပဒေဆိုင်ရာ ခုံရုံးတွင် တရားစွဲဆိုခဲ့သော်လည်း ပါတီ ဖျက်သိမ်းခံရလိမ့်မည် မဟုတ်ကြောင်း ယုံကြည်ထားဆဲဖြစ်သည်ဟု ချိုင်သာဝပ်က ပြောသည်။

MFP ပါတီ ခေါင်းဆောင် ၂ ဦးကိုတွေ့ရစဉ်

MFP ၏ လွှတ်တော်အမတ်အချို့သည် ပါတီဖျက်သိမ်းခံမည့် အခြေအနေနှင့်ပတ်သက်ပြီး အခြားပါတီထဲသို့ဝင်ရန် ချဉ်းကပ်မှုများ ရှိနေသည်ဆိုသည့် ကောလာဟလများနှင့်ပတ်သက်ပြီး ချိုင်သာဝပ်က မှတ်ချက်ပေးရာတွင် ထိုသတင်းများသည် သေချာရေရာမှုမရှိကြောင်း ပြောကြားခဲ့သည်။

မီဒီယာများနှင့် ပြည်သူများအနေဖြင့် ဖွဲ့စည်းပုံအခြေခံဥပဒေဆိုင်ရာ ခုံရုံး၏ စီရင်ချက်ကို အာရုံစိုက် စောင့်ကြည့် ရန်နှင့် ထိုစီရင်ချက်သည် MFP အတွက် သာမကဘဲ ထိုင်းနိုင်ငံရေး လောကအပေါ်တွင်ပါ သက်ရောက်လိမ့်မည် ဖြစ်ကြောင်း ချိုင်သာဝပ်က ပြောကြားခဲ့သည်။

Source: Thai PBS World