CNI International News
ဘေကျင်း၊ ဖေဖော်ဝါရီ ၂၈
ထိုင်ဝမ်ကမ်းလွန်တွင် ပြုလုပ်သည့် တရုတ်၏ စစ်ရေးလေ့ကျင့်မှုများသည် လုပ်ရိုးလုပ်စဉ် အရသာဖြစ်ပြီး ထိုင်ဝမ်အနေဖြင့် စောဒကမတက်သင့်ကြောင်း တရုတ်ကာကွယ်ရေးဝန်ကြီးဌာနက ပြောကြားခဲ့သည်ဟု ရိုက်တာမှ ဖော်ပြခဲ့သည်။
တရုတ်၏ စစ်ရေးလေ့ကျင့်မှုများတွင် ကျည်အစစ်များ အသုံးမပြုခဲ့သော်လည်း တရုတ်၏ စစ်ရေးလှုပ်ရှားမှုများ မြင့်တက်နေကြောင်း ထိုင်ဝမ်က ထုတ်ပြန်ခဲ့သည်။
ထိုထုတ်ပြန်ချက် ထွက်လာပြီးနောက် တရုတ်ကာကွယ်ရေးဝန်ကြီးဌာနက စောဒကမတက်သင့်ကြောင်း ထိုင်ဝမ်ကို ပြန်လည် တုန့်ပြန်ပြောကြားခဲ့ခြင်း ဖြစ်သည်။
တရုတ်စစ်တပ်သည် ထိုင်ဝမ်ရေလက်ကြား၏ အနောက်တောင်ဘက် ထိုင်ဝမ်၏ ကောင်းရှောင် (Kaohsiung) နှင့် ပင်တန် (Pingtung) ကျွန်းများ၏ ကမ်းလွန်ရေပြင်တွင် လက်နက်များ ပစ်ခတ်သည့် စစ်ရေးလေ့ကျင့်မှုများ ပြုလုပ်ခဲ့ကြောင်း ထိုင်ဝမ်က ပြောကြားခဲ့သည်။
ထိုစစ်ရေး လေ့ကျင့်မှုများသည် အလွန်အန္တရာယ်များပြီး ရန်လိုသည့် လုပ်ဆောင်ချက်ဖြစ်ကြောင်းနှင့် ကုန်တင် သင်္ဘောများ၊ ခရီးသည်တင် လေယာဉ်များကို ခြိမ်းခြောက်နေကြောင်း၊ တရုတ်သည် ထိုစစ်ရေးလေ့ကျင့်မှုနှင့် ပတ်သက်ပြီး ကြိုတင်အသိပေးချက်များ ထုတ်ပြန်ခဲ့ခြင်း မရှိကြောင်း ထိုင်ဝမ်အစိုးရက ပြောသည်။
ထိုင်ဝမ်နဲ့ တရုတ်အလံကို တွေ့ရစဉ်
ထိုင်ဝမ်သည် အခြားနိုင်ငံများ၏ အာရုံစိုက်မှုကို ရယူရန် ကြိုးပမ်းနေခြင်းဖြစ်ကြောင်း တရုတ်ကာကွယ်ရေး ဝန်ကြီးဌာန၏ ပြောရေးဆိုခွင့်ရှိသူ ဝူချင် (Wu Qian)က ဘေကျင်းမြို့တော်တွင် ပြုလုပ်သည့် သတင်းစာ ရှင်းလင်းပွဲ၌ ပြောကြားခဲ့သည်။
“ထိုင်ဝမ်အာဏာပိုင်တွေရဲ့ မှတ်ချက်စကားတွေဟာ တရုတ်ပြည်သူ့လွတ်မြောက်ရေးတပ်မတော်ရဲ့ လုပ်ရိုး လုပ်စဉ် စစ်ရေးလေ့ကျင့်မှုတွေကို ချဲ့ကားပြောဆိုနေတာ ဖြစ်တယ်။ ထိုင်ဝမ်အနေနဲ့ အများရဲ့ အာရုံစိုက်တာကို ခံချင်တဲ့အတွက် အခုလိုမျိုး လှည့်ကွက်တွေကို ရပ်တန်းကရပ်ဖို့ လိုပါတယ်” ဟု ဝူက ပြောကြားခဲ့သည်။
ဖေဖော်ဝါရီ ၂၇ ရက် နံနက် အစောပိုင်းက ထိုင်ဝမ်ကာကွယ်ရေးဝန်ကြီးဌာန၏ ထုတ်ပြန်ချက်တွင် ပြီးခဲ့သည့် ၂၄ နာရီအတွင်း ထိုင်ဝမ်ကျွန်းအနီး ဝန်းကျင်၌ တရုတ်စစ်လေယာဉ် ၄၅ စင်းနှင့် ရေတပ်သင်္ဘော ၁၄ စင်းတို့ကို ထောက်လှမ်းတွေ့ရှိကြောင်း ဖော်ပြခဲ့သည်။
ထိုသင်္ဘောများထဲမှ သင်္ဘော ၇ စင်းသည် တရုတ်ဘက်က စစ်ရေးလေ့ကျင့်သည့်ဇုန်ဟု ကြေညာခဲ့သည့် ရေပြင် အတွင်း ဝင်ရောက်ခဲ့သည်။ ထိုရေပြင်သည် ထိုင်ဝမ်ကမ်းလွန်နှင့် ရေမိုင် ၄၀ သာ ကွာဝေးသည်။
တရုတ်စစ်တပ်သည် အဆိုပါ စစ်ရေးလေ့ကျင့်မှုအတွင်း ကျည်အစစ်များကို အသုံးပြုခဲ့ခြင်း မရှိခဲ့သော်လည်း စစ်ရေးအရ တင်းမာမှုများကို မြင့်တက်စေခဲ့သည်ဟု အမည်မဖော်လိုသည့် ထိုင်ဝမ် အရာရှိနှစ်ဦးက ပြောကြားခဲ့ သည်။
Source: ရိုက်တာ
