CNI International News

ဆိုးလ်၊ မတ် ၁၀

တောင်ကိုရီးယားတွင် သမ္မတယွန်းဆော့ရွဲ(Yoon Suk Yeol )သည် ထိန်းသိမ်းခံထားရမှုမှ အံ့အားသင့်ဖွယ် ပြန်လည် လွတ်မြောက်လာခဲ့ပြီးနောက် တစ်ရက်အကြာ၌ ယွန်းအား ဆန့်ကျင်သူများက ဆိုးလ် (Seoul)  မြို့တော်တွင် စုရုံးဆန္ဒပြမှုများ ပြုလုပ်ခဲ့ကြသည်ဟု The Korea Times မှ ဖော်ပြခဲ့သည်။

ကွန်ဆာဗေးတစ် တက်ကြွလှုပ်ရှားသည့် ခရစ်ယာန်ဘုန်းတော်ကြီး ဂျွန်ကွမ်ဟွန်း (Jeon Kwang-hoon) ဦးဆောင် သော Sarang Jeil ဘုရားကျောင်းသည် ဆိုးလ်မြို့တော် အလယ်ပိုင်းရှိ သမ္မတနေအိမ်အနီးတွင် တနင်္ဂနွေဘုရား ဝတ်ပြုမှုကို ဘုရားကျောင်းအပြင်ဘက်တွင် ပြုလုပ်ခဲ့သည်။

ထိုစုရုံးပွဲကို လူပေါင်း ၄၅၀၀ ခန့် ပါဝင်ခဲ့သည်ဟု ဆိုသည်။

သမ္မတယွန်းဆော့ရွဲကို တွေ့ရစဉ်

“သမ္မတယွန်း လွတ်မြောက်လာမှုကြောင့် သူ့ကို စွပ်စွဲပြစ်တင်တဲ့ တရားရင်ဆိုင်မှုက အဓိပ္ပာယ်မရှိသလို ဖြစ်လာခဲ့ ပါတယ်။ အားလုံးပြီးသွားးပါပြီ”ဟု ဘုန်းတော်ကြီး ဂျွန်က ပြောကြားခဲ့သည်။

“အခြေခံဥပဒေဆိုင်ရာခုံရုံးက ရီဖို့ကောင်းတဲ့ ဆုံးဖြတ်ချက်ကို ချမှတ်တဲ့ အချိန်မှာဆိုရင်တော့ ကျနော်တို့ဟာ လည်း တစ်ချက်တည်းနဲ့ သူတို့ကို ရိုက်ချနိုင်မယ့် လူထုရဲ့ ဆန့်ကျင် ကန့်ကွက်ပိုင်ခွင့်ကို ကျင့်သုံးဖို့ပဲ ရှိပါတော့ တယ်”ဟု ၎င်းက ဆိုသည်။

စွပ်စွဲပြစ်တင် ခံထားရသည့် ယွန်းကို ဆိုးလ်ဗဟို ခရိုင်တရားရုံးက ဖမ်းဝရမ်း ပယ်ဖျက်ပေးလိုက်သည့် ဆုံးဖြတ် ချက်ကို အစိုးရရှေ့နေများက အယူခံမဝင်ရန် ဆုံးဖြတ်ခဲ့ပြီးနောက် ယွန်းသည် ပြန်လည် လွတ်မြောက် လာခဲ့ခြင်း ဖြစ်သည်။

ယွန်းသည် ၎င်းအား ထိန်းသိမ်းထားသည့် အဆောက်အအုံမှ သက်သောင့်သက်သာနှင့် ပြုံးရွှင်ကာ လမ်းလျှောက် ထွက်လာခဲ့သည်။

ထို့နောက် သူ၏ ကားပေါ်သို့ တက်ပြီး ၎င်းအား ထောက်ခံသူများကို လက်ပြနှုတ်ဆက်ခဲ့သည်။

သမ္မတယွန်းဆော့ရွဲကို တောင်ကိုရီးယားပြည်သူများ ဆန္ဒပြနေကြစဉ်

ယွန်းသည် ထိန်းသိမ်းမှုမှ လွတ်မြောက်လာသည့်တိုင် ပုန်ကန်မှုစွဲချက်များနှင့် တရားရင်ဆိုင် ရဦးမည်ဖြစ်ပြီး အခြေခံဥပဒေဆိုင်ရာခုံရုံးကလည်း ယွန်းအား ရာထူးမှ ဖယ်ရှားရန် သင့်/မသင့် ဆုံးဖြတ်သွားမည်ဖြစ်သည်။

အဓိက အတိုက်အခံဖြစ်သည့် ဒီမိုကရက်တစ်ပါတီကမူ တရားရုံး၏ ဆုံးဖြတ်ချက်ကို အယူခံမဝင်ခဲ့သည့် အစိုးရ ရှေ့နေများ၏ ဆုံးဖြတ်ချက်သည် နိုင်ငံနှင့် ပြည်သူလူထုကို အကျပ်အတည်းအတွင်းသို့ ပစ်ချခဲ့ခြင်းဖြစ်ကြောင်း ဝေဖန်ခဲ့သည်။

ထို့နောက် အခြေခံဥပဒေဆိုင်ရာ ခုံရုံးအနေဖြင့် ယွန်းအား သမ္မတရာထူးမှ အမြန်ဆုံးဖယ်ရှားရန် တိုက်တွန်းခဲ့ သည်။

ထို့ပြင် သမ္မတယွန်း လွတ်မြောက်လာမှုနှင့် ပတ်သက်ပြီး အစိုးရရှေ့နေချုပ် ရှင်မ်ဝူဂျွန်း (Shim Woo-jung) အနေဖြင့် ရာထူးမှ ချက်ချင်းနှုတ်ထွက်ရန်နှင့် ထိုကိစ္စအတွက် တာဝန်ယူရန် ဒီမိုကရက်တစ်ပါတီက တိုက်တွန်းခဲ့ သည်။

Source: The Korea Times

CNI International News

အိုင်ဇော ၊ မတ်လ ၈

အိန္ဒိယနိုင်ငံ၊ မီဇိုရမ်ပြည်နယ်၏ လွှတ်တော်အမတ် ကေ ဗန်လယ်ဗီနာ (MP K. Vanlalvena) သည် အိန္ဒိယနှင့် နယ်စပ်ချင်း ထိစပ်နေသည့် မြန်မာနိုင်ငံ အနောက်မြောက်ဘက် နေရာဒေသများကို ထိန်းချုပ်ထားသည့် လက်နက်ကိုင်အဖွဲ့ဖြစ်သည့် ချင်းပြည်ကောင်စီ၏ ရုံးခန်းများနှင့် စစ်စခန်းများကို ပြီးခဲ့သည့် သီတင်းပတ်က သွားရောက်ခဲ့သည်ဟု The Hindu သတင်းဝက်ဘ်ဆိုက်တွင် ဖော်ပြထားသည်။

မြန်မာနိုင်ငံတွင် တရားဝင်အစိုးရ မရှိသည့်အချက်ကို ထောက်ရှုပြီး ချင်းပြည်နယ်အား အိန္ဒိယနိုင်ငံနှင့် ပူးပေါင်းရန် ဗန်လယ်ဗီနာက ချင်းပြည်ကောင်စီကို ကမ်းလှမ်းခဲ့ပြီး အိန္ဒိယနှင့် မြန်မာနယ်စပ်၏ နှစ်ဖက်စလုံးတွင် လူမျိုးစု အချင်းချင်း ရင်းနှီးမှု သံယောဇဉ်ရှိကြောင်း  ပြောကြားခဲ့သည်။

မီဇိုအမျိုးသားတပ်ဦး (MNF) ပါတီမှ အထက်လွှတ်တော်အမတ်ဖြစ်သည့် မစ္စတာ ဗန်လယ်ဗီနာက သူသည် ပြီးခဲ့သည့် သီတင်းပတ်က မီဇိုရမ်ပြည်နယ်မှ မြန်မာနိုင်ငံအတွင်းသို့ နယ်စပ်ဖြတ်ကျော်ပြီး ခြေလျင်သွားရောက် ခဲ့ခြင်းမပြုမီ ၎င်း၏ ခရီးစဉ်နှင့်ပတ်သက်ပြီး မီဇိုရမ်ပြည်နယ် အုပ်ချုပ်ရေးမှူး ဗွီကေ ဆင်း (V.K. Singh) နှင့် အာသံရိုင်ဖယ် နယ်ခြားစောင့်တပ်ကို အသိပေး အကြောင်းကြားခဲ့သည်ဟု The Hindu သတင်းဝက်ဘ်ဆိုက်ကို ပြောကြားခဲ့သည်။

သူသည် ချစ်ကြည်ရင်းနှီးမှုနှင့် ညီရင်းအစ်ကို ဆက်ဆံရေးကို ထူထောင်ရန် ချင်းပြည်ကောင်စီဝင်များနှင့် တွေ့ဆုံခဲ့သည်ဟု ဗန်လယ်ဗီနာက ပြောသည်။

မီဇိုရမ်ပြည်နယ်ဝန်ကြီးချုပ်ကို အသိသက်သေထားပြီး ချင်းသူပုန် ၂ ဖွဲ့ ပေါင်းစည်းရေး လက်မှတ်ထိုးကြစဉ်

မီဇိုရမ်ပြည်နယ်နှင့် နယ်စပ်ချင်း ထိစပ်နေသည့် မြန်မာနယ်စပ်ဒေသများကို ချင်းပြည်ကောင်စီ၏ လက်နက်ကိုင် များက လွန်ခဲ့သည့် ၆ လကတည်းက နယ်မြေစိုးမိုးပြီး အုပ်ချုပ်ထားခြင်းဖြစ်သည်။

ချင်းပြည်နယ်ကောင်စီတွင် ချင်းအမျိုးသားတပ်ဦး(CNF/CNA)နှင့် ချင်း PDF များ ပါဝင်ကြသည်။

ချင်းပြည်ကောင်စီသည် မီဇိုမိသားစုဝင်များဖြစ်ပြီး ၎င်း၏ ခရီးစဉ်နှင့် တွေ့ဆုံဆွေးနွေးခဲ့မှု အကြောင်းအရာများကို အိန္ဒိယ ပြည်ထဲရေးဝန်ကြီး၊ နိုင်ငံခြားရေးဝန်ကြီးများကို ရှင်းလင်းတင်ပြ သွားမည်ဟုလည်း ဗန်လယ်ဗီနာက ပြောကြားခဲ့သည်။

ပြီးခဲ့သည့် ရက်ပိုင်းကလည်း မြန်မာနိုင်ငံမှ သူပုန် ၂ ဖွဲ့ဖြစ်သည့် ချင်းပြည်ကောင်စီ(CC) နှင့် ကြားကာလ ချင်းအမျိုးသား အတိုင်ပင်ခံကောင်စီ (Chin National Consultative Council (ICNCC) တို့သည် အိန္ဒိယနိုင်ငံ၊ မီဇိုရမ်ပြည်နယ်ဝန်ကြီးချုပ် လယ်ဒူဟိုမာ (Lalduhoma) ၏ ရှေ့မှောက်တွင် ပေါင်းစည်းရေး သဘောတူစာချုပ်ကို လက်မှတ်ရေးထိုးခဲ့သည်ဟု Hindustan Times မှ ဖော်ပြခဲ့သည်။

Source: The Hindu

CNI International News

ဘရပ်ဆဲလ်၊ မတ်လ ၈

ဥရောပသမဂ္ဂ ခေါင်းဆောင်များသည် ဥရောပတိုက်၏ ကာကွယ်ရေးကဏ္ဍနှင့် လုံခြုံရေးကို မြှင့်တင်ရန် အတူတကွ ပူးပေါင်းဆောင်ရွက်သွားရန်နှင့် လုံခြုံရေးအတွက် ယူရို ဘီလျံချီ သုံးစွဲရန် မတ်လ ၆ ရက်က ကတိပြုခဲ့ကြသည်ဟု အေပီမှ ဖော်ပြခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) သည် ရုရှား၏ ခြိမ်းခြောက်မှုများကို ရင်ဆိုင်နေရသည့် ဥရောပကို ကာကွယ်ပေးထားမှုအား လျှော့ချသွားမည်ဟု မကြာခဏ ပြောကြားခဲ့သဖြင့် ဥရောပခေါင်းဆောင် များက ထိုအရေးကိစ္စကို ခေါင်းချင်းဆိုင်ပြီး အဖြေရှာနေကြခြင်းဖြစ်သည်။

လက်ရှိတွင် ဥရောပနိုင်ငံများသည် ၎င်းတို့၏ လုံခြုံရေးကို ၎င်းတို့ကိုယ်တိုင် ကာကွယ်ရတော့မည်ဖြစ်သဖြင့် စိုးရိမ်မှုများ မြင့်တက်နေကာ မတ်လ ၆ ရက်က ဘရပ်ဆဲလ် (Brussels) မြို့တွင် အရေးပေါ် အစည်းအဝေး ပြုလုပ်ခဲ့ခြင်းဖြစ်သည်။

 ဥရောပသမဂ္ဂခေါင်း‌ဆောင်များကို တွေ့ရစဉ်

ထိုအစည်းအဝေးတွင် အနာဂတ်၌ ယူကရိန်းအတွက် ကာကွယ်ပေးမှုကို စိတ်ချသေချာစေရန်နှင့် ဥရောပ၏ လုံခြုံရေးကို မြှင့်တင်နိုင်မည့် နည်းလမ်းများကို ရှာဖွေခဲ့ကြသည်။

“ဒီနေ့မှာတော့ သမိုင်းတစ်ခုကို ရေးထိုးနိုင်ခဲ့ပါပြီ” ဟု ဥရောပကော်မရှင်ဥက္ကဋ္ဌ အာဆူလာ ဗွန်ဒါလီယန် (Ursula von der Leyen) က အစည်းအဝေးအပြီးတွင် သတင်းထောက်များကို ပြောကြားခဲ့သည်။

ဥရောပသမဂ္ဂခေါင်းဆောင် ၂၇ ဦးသည် ဥရောပ၏ လုံခြုံရေးအတွက် စိတ်ချာသေချာစေအောင် လုပ်ဆောင်ရန် ဆုံးဖြတ်ခဲ့ကြပြီး စိန်ခေါ်မှုများကို ဖြေရှင်းဖို့ လိုအပ်ချက်နှင့်အညီ အရှိန်မြှင့် လုပ်ဆောင်သွားမည်ဟု ၎င်းက ပြောကြားခဲ့သည်။

ထို့ပြင် ကာကွယ်ရေးကဏ္ဍတွင် ငွေကြေးများ ပိုမိုရင်းနှီးမြှုပ်နှံသွားရန်လည်း ဆုံးဖြတ်ခဲ့ကြောင်း ဗွန်ဒါလီယန်က ပြောသည်။

မတ်လ ၅ ရက်ကလည်း  ဗွန်ဒါလီယန်သည် ယူရို ၈၀၀ ဘီလျံတန်ဖိုးရှိ "ReArm Europe" အမည်ရှိ ကာကွယ်ရေး အသုံးစရိတ် တိုးမြှင့်ရေး အစီအစဉ်ကို ထုတ်ဖော် ပြောကြားခဲ့သည်။

အဖွဲ့ဝင်နိုင်ငံအားလုံး အနေဖြင့် ကာကွယ်ရေး အသုံးစရိတ်ကို ၁ ဒသမ ၅ ရာခိုင်နှုန်းစီ ပိုမိုအသုံးပြုမည်ဆိုပါက လာမည့် (၄)နှစ်အတွင်း စစ်ဘက်ဆိုင်ရာ ရင်းနှီးမြှုပ်နှံမှုအတွက် ယူရို ၆၅၀ ဘီလျံနီးပါး ရှိလာမည်ဖြစ်သည်။

ထို့နောက် ဥရောပသမဂ္ဂ ဘတ်ဂျက်မှ  ယူရို ၁၅၀ ဘီလျံ တန်ကြေးရှိသည့် ချေးငွေယန္တရား တစ်ခုကိုလည်း ထူထောင်သွားမည်ဖြစ်ကြောင်း ဗွန်ဒါလီယန်က ပြောကြားခဲ့သည်။

Source: အေပီ

CNI International News

၂၀၂၅ ခုနှစ်၊ မတ်လ ၈

ပါကစ္စတန်ခွဲထွက်ဝါဒီ လက်နက်ကိုင်အဖွဲ့များသည် နိုင်ငံအတွင်းရှိ တရုတ်၏ စီးပွားရေးလုပ်ငန်းများနှင့် အကျိုး စီးပွားများကို ပစ်မှတ်ထားသည့်အနေဖြင့် စစ်ပွဲသစ်တစ်ခု ဆင်နွှဲရန် ပြင်ဆင်ခဲ့ကြောင်း Nikkei Asia မှ ဖော်ပြခဲ့ သည်။

မတ်လ ၂ ရက်က  Baloch Raji Aajoi Sangar (BRAS) အမည်ရှိ ညွန့်ပေါင်းစစ်သွေးကြွအဖွဲ့သည် ဘာလို့ချ် အမျိုးသားတပ်မတော် အမည်ရှိ စစ်တပ်ကို ပေါင်းစည်းဖွဲ့စည်းရေးအတွက် အစီအစဉ်များကို ကြေညာခဲ့သည်။

BRAS ညွန့်ပေါင်းအဖွဲ့တွင် သယံဇာတ ပေါကြွယ်ဝသည့် ဘာလိုချီစတန်ပြည်နယ်တွင် လွတ်လပ်ရေးအတွက် ခွဲထွက်ရန် တွန်းအားပေး လုပ်ဆောင်နေသော စစ်သွေးကြွအဖွဲ့များ ပူးပေါင်းပါဝင်ထားသည်။

သို့သော် ဘာလို့ချ်အမျိုးသားတပ်မတော်တွင် ထိုညွန့်ပေါင်းအဖွဲ့ထဲမှ လက်နက်ကိုင် အင်အားမည်မျှ ပါဝင်မည် ဆိုခြင်းကို တိကျစွာ မသိရသေးပေ။

BRAS ၏ ဦးဆောင်မှုအောက်တွင် ပါဝင်သည့် အဖွဲ့များသည် ပါကစ္စတန်နှင့် တရုတ်ကို ဆန့်ကျင်သော ထိုးစစ် အသစ်တစ်ခုကို ပြင်းထန်စွာ ဆင်နွှဲသွားမည်ဟုလည်း ကြေညာခဲ့သည်။

ပါကစ္စတန်လုံခြုံရေးတပ်ဖွဲ့ကို တွေ့ရစဉ်

လက်ရှိတွင် BRAS ညွန့်ပေါင်းအဖွဲ့၌ ဘာလို့ချ်လွတ်မြောက်ရေးတပ်မတော်၊ ဘာလိုချီစတန် လွတ်မြောက်ရေး တပ်ဦး၊ ဘာလို့ချ်သမ္မတ အစောင့်တပ်ဖွဲ့၊ ဆင်ဒီလွတ်မြောက်အဖွဲ့အစည်းနှင့် ဆင်ဒူဒက်ရှ် တော်လှန်ရေး တပ်မတော် အစရှိသည့် လက်နက်ကိုင်အဖွဲ့များ ပါဝင်သည်။

ထိုအဖွဲ့များသည် ဘာလို့ချ်အမျိုးသားတပ်မတော် ထူထောင်ရေးအတွက် အဖွဲ့အစည်းကို ပိုမိုအင်အားခိုင်မာစေရန်၊ ဒေသအားလုံးတွင် စစ်ဘက်ဆိုင်ရာ အခြေခံ အချက်များကို ပြန်လည်ဖွဲ့စည်းရန်နှင့် တပ်များကို ချက်ချင်းစုစည်း ရန် ညွန့်ပေါင်းအဖွဲ့ ခေါင်းဆောင်များက ပြောကြားခဲ့သည်။

၎င်းတို့၏ အဓိကရည်ရွယ်ချက်မှာ တစ်ကွဲတစ်ပြားစီ ဖြစ်နေသည့် ဘာလို့ချ် တော်လှန်ရေးအဖွဲ့များကို တပ်ပေါင်းစု အဖြစ် စုစည်းရန်၊ ပါကစ္စတန်အစိုးရနှင့် ပါကစ္စတန်နိုင်ငံအတွင်းရှိ တရုတ်၏ အကျိုးစီးပွားများကို တိုက်ခိုက်ရန် ဖြစ်ကြောင်း ကြေညာခဲ့သည်။

ဘာလိုချီစတန်ပြည်နယ်ရှိ လက်နက်ကိုင်အဖွဲ့များသည် သယံဇာတပေါကြွယ်ဝသည့် ၎င်းတို့ ပြည်နယ်အတွင်းရှိ တရုတ်လုပ်ငန်းများကို မကြာခဏ တိုက်ခိုက်လေ့ရှိသည်။

Source: Nikkei Asia

CNI International News

ပေကျင်း၊ မတ် ၈

အမေရိကန်၏ တစ်ဖက်သတ်ဆန်သည့် အခွန်တိုးကောက်မှုများကို တရုတ်က ဆက်လက် တုန့်ပြန်သွားမည် ဖြစ်ပြီး အမေရိကန်သည် စေတနာကို ဝေဒနာဖြင့် တုန့်ပြန်နေကြောင်း တရုတ်နိုင်ငံခြားရေးဝန်ကြီး ဝမ်ယိ (Wang Yi) က မတ်လ ၇ ရက်တွင် ပြုလုပ်ခဲ့သည့် သတင်းစာရှင်းလင်းပွဲ၌ ပြောကြားခဲ့သည်ဟု Time မှ ဖော်ပြခဲ့သည်။

တရုတ်သည် အမေရိကန်၏ ဖန်တနိုင်း (fentanyl) မူးယစ်ဆေးပြဿနာ ဖြေရှင်းမှုကို ကူညီဖြေရှင်းပေးခဲ့သော် လည်း အမေရိကန်က တရုတ်ကို အခွန်တိုးကောက်ခဲ့သဖြင့် နှစ်နိုင်ငံဆက်ဆံရေးများ တင်းမာခဲ့ရသည်ဟု ဝမ်က ပြောသည်။

“တစ်ချိန်တည်းမှာပဲ တရုတ်ကို ဖိနှိပ်ပြီး တရုတ်နဲ့ ဆက်ဆံရေး ကောင်းမွန်အောင် ထိန်းသိမ်းနိုင်လိမ့်မယ်လို့ ဘယ်နိုင်ငံကမှ စိတ်ကူးမယဉ်သင့်ပါဘူး။ လိုတစ်မျိုး၊ မလိုတစ်မျိုးပြုမူတဲ့ လုပ်ဆောင်ချက်တွေဟာ နှစ်နိုင်ငံ ဆက်ဆံရေးတည်ငြိမ်မှုနဲ့ အပြန်အလှန် ယုံကြည်မှုတွေအတွက် မကောင်းပါဘူး”ဟု ဝမ်က ပြောသည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

မတ်လ ၄ ရက်က တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူက အမေရိကန်နှင့်ပတ်သက်ပြီး တင်းမာသည့် မှတ်ချက်စကားကို ပြောကြားခဲ့ပြီးနောက် ဝမ်၏ ပြောကြားချက်များ ထွက်ပေါ်လာခြင်းဖြစ်သည်။

“တကယ်လို့ အမေရိကန်က တခြား အစီအစဉ်တစ်ခု ရှိနေမယ်ဆိုရင်၊ အမေရိကန်ရဲ့ ဆန္ဒက စစ်ဖြစ်ဖို့ဆိုရင် အခွန်စစ်ပွဲပဲဖြစ်ဖြစ်၊ ကုန်သွယ်ရေးစစ်ပွဲပဲဖြစ်ဖြစ် ဘယ်လိုစစ်ပွဲမျိုးကိုမဆို ကျနော်တို့က အဆုံးအထိ တိုက်သွားဖို့ အဆင်သင့်ပါပဲ”ဟု တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူက မတ်လ ၄ ရက်တွင် ပြောကြားခဲ့ သည်။

အမေရိကန်ရှိ တရုတ်သံရုံးကလည်း ထိုထုတ်ပြန်ချက်ကို လူမှုမီဒီယာပေါင်းစုံတွင် တင်ခဲ့သည်။

ထို့နောက် တရုတ်၏ ထုတ်ပြန်ချက်ကို အမေရိကန်ကာကွယ်ရေးဝန်ကြီး ပိ ဟက်ဆက် (Pete Hegseth)ကလည်း မတ်လ ၅ ရက်တွင် ပြန်လည်တုန့်ပြန်ခဲ့သည်။

“ကျနော်တို့က ပြင်ဆင်ပြီးသားပါ။ ငြိမ်းချမ်းရေးအတွက် စစ်ပွဲကို ပြင်ဆင်ထားရပါမယ်” ဟု ဟက်ဆက်က  Fox News သတင်းဌာနကို ပြောကြားခဲ့သည်။

ယခုသီတင်းပတ်ကစပြီး အမေရိကန်သည် တရုတ်၊ ကနေဒါနှင့် မက္ကဆီကို နိုင်ငံများအပေါ် အခွန်များ တိုးမြှင့် ကောက်ခံခဲ့သဖြင့် အမေရိကန်နှင့် ထို ၃ နိုင်ငံအကြား အခွန်(ကုန်သွယ်ရေး)စစ်ပွဲတစ်ခု ပေါ်ပေါက်လာခဲ့သည်။

အမေရိကန်က တရုတ်၏ ပို့ကုန်အားလုံးကို အခွန် ၂၀ ရာခိုင်နှုန်း ကောက်ခံခဲ့ပြီး တရုတ်ကလည်း အမေရိကန်က တင်ပို့သည့် ပို့ကုန်များအပေါ် အခွန် ၁၅ ရာခိုင်နှုန်း ပြန်လည်တိုးမြှင့်ခဲ့သည်။

Source: Time

CNI International News

ဆိုးလ်၊ မတ်လ ၈

တောင်ကိုရီးယားတရားရုံးက စွပ်စွဲပြစ်တင်ခံထားရသည့် သမ္မတယွန်းဆော့ရွဲ(Yoon Suk-yeol) အား ထုတ်ထား သော ဖမ်းဝရမ်းကို မတ်လ ၇ ရက်က ပယ်ဖျက်ပေးခဲ့ကြောင်း South China Morning Post မှ ဖော်ပြခဲ့သည်။

သို့သော် တရားရုံး၏ ဆုံးဖြတ်ချက်ကို အစိုးရရှေ့နေများက အစီရင်ခံဖွယ် ရှိနေသဖြင့် ယွန်းသည် ဆက်လက်ပြီး ထိန်းသိမ်းခံထားရဦးမည် ဖြစ်သည်။

ယွန်း၏ ရှေ့နေများသည် ယွန်းအား ထုတ်ထားသည့် ဖမ်းဝရမ်းကို ပယ်ဖျက်ပေးရန် ပြီးခဲ့သည့်လက တရားရုံးကို လျှောက်ထားခဲ့ပြီး တရားစီရင်ရေးကာလသည် အလွန်ကြာမြင့်နိုင်သဖြင့် ယွန်းအား ထိန်းသိမ်းထားမှုသည် တရား မဝင်ကြောင်း စောဒကတက်ခဲ့သည်။

ယွန်းအား ထိန်းသိမ်းထားသည့်ကာလ သက်တမ်းကုန်သွားပြီးနောက် အစိုးရရှေ့နေများက တရားစွဲဆိုမှုကို တင်ခဲ့ခြင်းဖြစ်သည်ဟု ကောက်ချက်ချရန် ကျိုးကြောင်းသင့်လျှော်ကြောင်း ဆိုးလ်ဗဟိုခရိုင်တရားရုံးက ပြောကြားခဲ့သည်။

တောင်ကိုရီးယားသမ္မတကို ကန့်ကွက်နေကြစဉ်

စုံစမ်းစစ်ဆေးမှု လုပ်ငန်းစဉ်၏ တရားဝင်မှုနှင် စပ်လျဉ်းပြီး ကျင့်ထုံးဆိုင်ရာ ရှင်းလင်းပြတ်သားမှုကို စိတ်ချာ သေချာမှုရှိစေရန်နှင့် သံသယများ ကင်းရှင်းစေရန် ယွန်းအား ထိန်းသိမ်းထားမှုကို ဖျက်သိမ်းရန် ဆုံးဖြတ်ချက်ချ ခြင်းသည် လျှော်ကန်သင့်မြတ်ကြောင်း တရားရုံးက ထုတ်ပြန်ခဲ့သည်။

ယွန်းအား ထိန်းသိမ်းသည့် ကာလသည် ဇန်နဝါရီ ၂၆ ရက် ဒေသစံတော်ချိန် နံနက် ၉ နာရီ ၇ မိနစ်တွင် သက်တမ်း ကုန်သွားခဲ့ပြီး အစိုးရရှေ့နေများကမူ တရားစွဲဆိုမှုကို သက်တမ်းကုန်ဆုံးပြီးနောက် ၉ နာရီကျော်ကြာမှ တင်သွင်းခဲ့ ခြင်းဖြစ်သည်ဟု တရားရုံးက ပြောသည်။

ထို့ကြောင့် ယွန်းအား တရားဝင် ဖမ်းဆီးခြင်းမပြုမီ ထိန်းသိမ်းထားခြင်းသည် ယွန်း၏ ပုန်ကန်မှု စွဲချက်များကို စုံစမ်းစစ်ဆေးရန် တရားဝင်သည့် အခွင့်အရေးမရှိကြောင်း တရားရုံးက ပြောကြားခဲ့သည်။
တရားရုံးက ယွန်းအား ထိန်းသိမ်းမှုကို ဖျက်သိမ်းခဲ့သော်လည်း ယွန်းသည် ချက်ချင်း ပြန်လွတ်လာမည် မဟုတ်ပေ။

တရားရုံး၏ ဆုံးဖြတ်ချက်ကို အစိုးရရှေ့နေများက အယူခံမဝင်ခြင်း သို့မဟုတ် အယူခံဝင်ခွင့် သတ်မှတ်ကာလ ကုန်ဆုံးသည့် အချိန်မှသာ ယွန်းသည် ပြန်လည်လွတ်မြောက် လာလိမ့်မည်ဟု ယွန်း၏ရှေ့နေများက ပြောကြားခဲ့ သည်။

Source: South China Morning Post

CNI International News

အိုင်ဇော ၊ မတ်လ ၇

မြန်မာနိုင်ငံ ချင်းပြည်နယ်မှ ဒီမိုကရေစီလိုလားသည့် ချင်းပြည်ကောင်စီ(CC) နှင့် ကြားကာလချင်းအမျိုးသား အတိုင်ပင်ခံကောင်စီ (Chin National Consultative Council (ICNCC) တို့သည် အိန္ဒိယနိုင်ငံ၊ မီဇိုရမ်ပြည်နယ် ဝန်ကြီးချုပ် မကြာသေးမီက လယ်ဒူဟိုမာ (Lalduhoma) ၏ ရှေ့မှောက်တွင် ပေါင်းစည်းရေး သဘောတူစာချုပ်ကို လက်မှတ်ရေးထိုးခဲ့သည်ဟု Hindustan Times မှ ဖော်ပြခဲ့သည်။

အဆိုပါ သဘောတူညီချက်ကို အိန္ဒိယ၏ မီဇိုရမ် (Mizoram) ပြည်နယ်၊ အိုင်ဇော (Aizawl) မြို့တော်တွင် ရယူခဲ့ကြ ခြင်းဖြစ်သည်။

အဆိုပါ ချင်းကောင်စီ ၂ ခုအကြား ရန်လိုမှုများအား အဆုံးသတ်ရေးအတွက် ပေါင်းစည်းရေး သဘောတူစာချုပ်ကို ဖေဖော်ဝါရီ ၂၆ ရက်က လက်မှတ် ရေးထိုးခဲ့ခြင်းဖြစ်သည်။

ထိုအဖွဲ့ ၂ ဖွဲ့သည် ချင်းအမျိုးသားကောင်စီ (CNC) အမည်ရှိ တစ်ခုတည်းသော ချင်းအဖွဲ့အစည်း ထူထောင်ရန် ပေါင်းစည်းခဲ့ခြင်းဖြစ်သည်ဟု မီဇိုရမ်ပြည်နယ် အုပ်ချုပ်ရေးမှူးရုံးမှ အရာရှိများနှင့် ချင်းကောင်စီ ၂ ခုမှ အဖွဲ့ဝင် များက အတည်ပြုခဲ့သည်။

ထိုသဘောတူ စာချုပ်ချုပ်ဆိုမှုသည် အိန္ဒိယနိုင်ငံခြားရေးဝန်ကြီးဌာန၏ မေတ္တာရပ်ခံချက်အရ ချင်းလက်နက်ကိုင် အဖွဲ့များ ပေါင်းစည်းညီညွတ်စေရန် မဏိပူရပြည်နယ်ဝန်ကြီးချုပ်က အားထုတ် ကြိုးပမ်းခဲ့ခြင်း ဖြစ်သည်ဟု မီဇိုရမ်ပြည်နယ် အုပ်ချုပ်ရေးမှူး၏ နိုင်ငံရေးအကြံပေးပုဂ္ဂိုလ် မီဇိုရမ်ပြည်နယ်လွှတ်တော်အမတ် လယ်မူအန်ပူဂျာ ပွန်တီ (Lalmuanpuia Punte) က Hindustan Times ကို ပြောကြားခဲ့သည်။

အိန္ဒိယနိုင်ငံ၊ မီဇိုရမ်ပြည်နယ်ဝန်ကြီးချုပ်ကို သက်သေထားပြီး ချင်းလက်နက်ကိုင် ၂ ဖွဲ့ ပူးပေါင်း၍ သဘောတူကြစဉ်

ချင်းပြည်နယ်၏ နိုင်ငံရေးအခြေအနေ မတည်ငြိမ်ပါက မီဇိုရမ်ပြည်နယ်အတွက် လုံခြုံရေးခြိမ်းခြောက်မှု ဖြစ်လာ နိုင်ပြီး ချင်းလက်နက်ကိုင်အဖွဲ့များ ပေါင်းစည်းရေးသည် မိမိတို့၏ ရည်မှန်းချက်ဖြစ်ခဲ့ကြောင်း၊ ချင်းတော်လှန်ရေး သည် နောက်ထပ် အဆင့်သစ် တစ်ခုအထိ မြင့်မားစွာ ရောက်ရှိလိမ့်မည်ဟု ယုံကြည်ကြောင်း ပွန်တီက ပြော သည်။

ချင်းပြည်ကောင်စီ၏ လက်နက်ကိုင်အဖွဲ့ဖြစ်သည့် ချင်းအမျိုးသားတပ်မတော်(CNA/CNF)နှင့် ကြားကာလ ချင်းအမျိုးသား အတိုင်ပင်ခံကောင်စီ၏ လက်နက်ကိုင်အဖွဲ့ဖြစ်သည့် ချင်းညီအစ်ကိုများအဖွဲ့(Chin Brotherhood-CB) တို့မှ ကိုယ်စားလှယ်များလည်း ပေါင်းစည်းရေး သဘောတူညီချက် လက်မှတ်ရေးထိုးပွဲကို တက်ရောက်ခဲ့ သည်ဟု ဆိုသည်။

ချင်းလူမျိုးများအတွက် သီးခြားအုပ်ချုပ်နေသည့် အဖွဲ့ ၂ ဖွဲ့သည် အကျိုးရှိစေသဖြင့် ပေါင်းစည်းရန် သဘောတူညီ ခဲ့ခြင်းဖြစ်သည်ဟု ချင်းပြည်ကောင်စီ၏ ကော်မတီအဖွဲ့ဝင်ဖြစ်ပြီး ညှိနှိုင်းရေးအဖွဲ့၏ တွဲဖက်ညှိနှိုင်းရေးမှူး ဂျက်ကော့ဘ် ဗွီ ဇော်မာ (Jacob V Zawma) က ပြောသည်။

ထိုချင်းလက်နက်ကိုင် အဖွဲ့နှစ်ဖွဲ့သည် လက်ရှိတွင် ချင်းပြည်နယ် ကာကွယ်ရေးအတွက် စည်းလုံးသည့် ချင်းတော်လှန်ရေးတပ်ဖွဲ့ ထူထောင်ရန် မဟာဗျူဟာများကို ဆွေးနွေးနေသည်ဟု ဆိုသည်။

လက်ရှိတွင် ချင်းတော်လှန်းရေး တပ်ဖွဲ့များသည် ချင်းပြည်နယ်၏ ၈၀ ရာခိုင်နှုန်းကျော်ကို ထိန်းချုပ်ထား ကြောင်းလည်း ဇော်မာက ပြောကြားခဲ့သည်။

Source: Hindustan Times

CNI International News

ဘရပ်ဆဲလ်၊ မတ်လ ၇

အမေရိကန်သမ္မတ ဒေါ်နယ်ထရမ့် (Donald Trump) လက်ထက်တွင် ဥရောပအတွက် အမေရိကန်၏ လုံခြုံရေး အာမခံချက်များ မသေချာတော့ကြောင်း ခန့်မှန်းချက်များ ထွက်ပေါ်ခဲ့သဖြင့် ဥရောပနိုင်ငံများသည် ကိုယ်ပိုင် လုံခြုံရေး အာမခံချက်အပေါ် စစ်အသုံးစရိတ်များကို တိုးမြှင့်ရန် ပြင်ဆင်လာကြသည်ဟု DW သတင်းဝက်ဘ်ဆိုက် တွင် ဖော်ပြခဲ့သည်။

ဥရောပကော်မရှင်ဥက္ကဋ္ဌ အာဆူလာ ဗွန်ဒါလီယန် (Ursula von der Leyen) ကမူ ယူရို ၈၀၀ ဘီလျံ တန်ဖိုးရှိ "ReArm Europe" အမည်ရှိ ကာကွယ်ရေးအသုံးစရိတ် တိုးမြှင့်ရေး အစီအစဉ်ကို ထုတ်ဖော် ပြောကြားခဲ့သည်။

ထိုအစီအစဉ်ကို မတ်လ ၆ ရက်တွင် ပြုလုပ်မည့် ဥရောပသမဂ္ဂ(EU) ညီလာခံတွင် အဓိကထား ဆွေးနွေးသွား မည်ဖြစ်သည်။

ဥရောပကော်မရှင်ဥက္ကဋ္ဌ အာဆူလာ ဗွန်ဒါလီယန်ကို တွေ့ရစဉ်

မတ်လ ၂ ရက်က ပြင်သစ်သမ္မတ မက်ခရွန် (Emmanuel Macron) ၏ အစည်းအဝေး ခေါ်ယူမှုဖြင့် လန်ဒန်တွင် ဗြိတိန်ဝန်ကြီးချုပ် ကီယာ စတာမာ (Keir Starmer) က သဘာပတိအဖြစ် ကြီးမှူးကျင်းပခဲ့သည့် ဥရောပ ခေါင်းဆောင်များ အစည်းအဝေး အပြီး၌ ယခုအစည်းအဝေးသည် အီးယူ၏ နောက်ဆုံးခေါ်ယူသည့် အစည်းအဝေး ဖြစ်သည်။

အမေရိကန်သည် ယူကရိန်းအတွက် စစ်ရေးနှင့်ငွေကြေး အကူအညီများ ဆိုင်းငံ့မှုနှင့်အတူ ဥရောပအတွက် လုံခြုံရေး ကတိကဝတ်မှာလည်း မရေရာသဖြင့် ဥရောပသမဂ္ဂသည် မိမိကိုယ်ကိုယ် အားကိုးပြီး လုံခြုံရေးကို တိုးမြှင့်ရမည့် အခြေအနေသို့ ရောက်ရှိစေခဲ့သည်။

ဗွန်ဒါလီယန်သည် အခြေအနေများ ဆိုးရွားနေသည်ကို မီးမောင်းထိုး ပြသရန်အတွက် ဥရောပခေါင်းဆောင်များထံ စာတစ်စောင် ရေးသားပေးပို့ခဲ့သည်ဟု ဆိုသည်။

ဥရောပမှာ ယူကရိန်းလုံခြုံရေးအတွက် တောင်းဆိုနေကြစဉ်

ထိုစာထဲတွင် ဥရောပတိုက်သည် မိမိတို့ တစ်သက်တွင် တစ်ခါမျှ မမြင်တွေ့ရဖူးသည့် ကြီးမားသည့် အန္တရာယ်ကို ရင်ဆိုင်နေရကြောင်း၊ ယူကရိန်း၏ အနာဂတ် လွတ်လပ်မှုနှင့် အချုပ်အခြာ အာဏာပိုင်မှုသည် ဥရောပ၏ လုံခြုံရေးနှင့် သာယာဝပြောရေးအတွက် အဓိကကျကြောင်း ရေးသားဖော်ပြခဲ့သည်။

ယခု အဆိုပြုမည့် ReArm Europe အစီအစဉ်သည် အတိတ်ကာလက ဥရောပ အစိုးရများအတွက် စီးပွားရေး အကြောင်းပြချက်များဖြင့် ကာကွယ်ရေး အသုံးစရိတ်ကို လျှော့ချခွင့်ပြုထားသည့် အခြေအနေကို ရှောင်လွှဲနိုင်စေ ရန် မျှော်လင့်ထားကြောင်း ဗွန်ဒါလီယန်က ပြောသည်။

အဖွဲ့ဝင်နိုင်ငံ အားလုံးအနေဖြင့် ကာကွယ်ရေး အသုံးစရိတ်ကို ၁ ဒသမ ၅ ရာခိုင်နှုန်းစီ ပိုမိုအသုံးပြုမည်ဆိုပါက လာမည့် ၄ နှစ်အတွင်း စစ်ဘက်ဆိုင်ရာ ရင်းနှီးမြှုပ်နှံမှုအတွက် ယူရို ၆၅၀ ဘီလျံနီးပါး ရှိလာမည်ဖြစ်ပြီး ဥရောပသမဂ္ဂ(EU) ဘတ်ဂျက်မှ  ယူရို ၁၅၀ ဘီလျံ တန်ကြေးရှိသည့် ချေးငွေယန္တရား တစ်ခုကိုလည်း ထူထောင် သွားမည်ဖြစ်ကြောင်း ပြောကြားခဲ့သည်။

Source: DW

CNI International News

ဝါရှင်တန်၊ မတ်လ ၇

အစ္စရေးနှင့် ဟားမာ့စ်အဖွဲ့အကြား အပစ်အခတ်ရပ်စဲရေး သဘောတူညီချက် နှောင့်နှေးကြန့်ကြာနေချိန်တွင် အမေရိကန်သည် ဟားမာ့စ်အဖွဲ့နှင့် တိုက်ရိုက်ဆွေးနွေးခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

“ဆွေးနွေးမှုတွေ ဆက်ပြီး ပြုလုပ်နေပါတယ်။ အသေးစိတ်ကိုတော့ ကျမ ပြောမှာမဟုတ်ပါဘူး” ဟု အိမ်ဖြူတော် သတင်းပြန်ကြားရေးအရာရှိ ကာရိုလိုင်း လက်ဗစ် (Karoline Leavitt) က မတ်လ ၅ ရက်တွင် ပြောကြားခဲ့သည်။

“ကမ္ဘာတစ်ဝန်းက လူတွေနဲ့ ဆွေးနွေးမှုတွေ၊ ညှိနှိုင်းမှုတွေ ပြုလုပ်တာဟာ အမေရိကန် ပြည်သူတွေရဲ့ အကျိုး စီးပွားအတွက် အကောင်းဆုံး လုပ်ဆောင်ချက် ဖြစ်ပါတယ်။ သမ္မတကြီးကလည်း ယုံကြည်ချက်ရှိပြီး အမေရိကန် ပြည်သူတွေအတွက် မှန်ကန်တဲ့အရာတွေကို လုပ်ဆောင်နေတာ ဖြစ်ပါတယ်” ဟု လက်ဗစ်က ပြောသည်။

အစ္စရေးတွင် ဟားမာ့စ်တို့၏ ဖမ်းဆီးခြင်းခံထားရသည့် ဓားစာခံများနှင့်ပတ်သက်ပြီး အထူးသံတမန်အဖြစ် သမ္မတ ဒေါ်နယ်ထရမ့် (Donald Trump) ၏ အဆိုပြုခံထားရသူ အဒမ် ဘူလာ (Adam Boehler) သည် ဟားမာ့စ်တို့နှင့် ပြုလုပ်သော တိုက်ရိုက် ဆွေးနွေးမှုများတွင် ပါဝင်ခဲ့သည်။

 ဟားမာ့စ်အဖွဲ့ကို တွေ့ရစဉ်

ဟားမာ့စ် အရာရှိတစ်ဦးကမူ ဂါဇာတွင် ဖမ်းဆီးထိန်းသိမ်း ခံထားရသည့် အစ္စရေး-အမေရိကန် ဓားစာခံများနှင့် ပတ်သက်ပြီး ဆွေးနွေးညှိနှိုင်းမှုများလည်း ပြုလုပ်ခဲ့သည်ဟု AFP သတင်းဌာနကို အတည်ပြု ပြောကြားခဲ့သည်။

အမေရိကန်သည်  ၁၉၉၇ ခုနှစ်က ဟားမာ့စ်အဖွဲ့ကို အကြမ်းဖက်အဖွဲ့ စာရင်းသွင်းပြီး တားမြစ်ပိတ်ပင်ခဲ့ပြီး ကတည်းက ထိုအဖွဲ့နှင့် တိုက်ရိုက် ဆွေးနွေးမှုများ မရှိခဲ့ကြောင်း ယခင်က လူသိရှင်ကြား ငြင်းဆိုခဲ့ဖူးသည်။
အစ္စရေးကမူ ဟားမာ့စ်နှင့် တိုက်ရိုက် ဆွေးနွေးမှုများအတွက် အမေရိကန်နှင့် တိုင်ပင်ဆွေးနွေးမှုများ ပြုလုပ် ခဲ့သည်ဟု ဆိုသည်။

အစ္စရေးအရာရှိများကမူ အမေရိကန်နိုင်ငံသား အီဒန် အလက်ဇန်းဒါး (Edan Alexander) အပါအဝင် အသက်ရှိနေ သေးသည့် ဓားစာခံ ၂၄ ဦးနှင့် သေဆုံးခဲ့သည့် ဓားစာခံများ၏ ရုပ်အလောင်း ၃၅ လောင်းသည် ဂါဇာတွင် ထိန်းသိမ်း ခံထားရဆဲဖြစ်ကြောင်း ပြောကြားခဲ့သည်။

ပြီးခဲ့သည့် ရက်ပိုင်းက အဆုံးသတ်သွားသည့် အစ္စရေး-ဟားမာ့စ် အပစ်အခတ်ရပ်စဲရေး သဘောတူညီချက် ကာလအတွင်း ဟားမာ့စ်အဖွဲ့က ဓားစာခံ ၃၃ ဦးကို ပြန်လွှတ်ပေးခဲ့ကာ အစ္စရေးက ပါလက်စတိုင်း ၂၀၀၀ ကျော် ကို ပြန်လွှတ်ပေးခဲ့သည်။

Source: Al Jazeera