CNI International News

ပြုံယမ်း၊ သြဂုတ် ၁

တရုတ်နယ်စပ်နှင့်ထိစပ်နေသော မြောက်ကိုရီးယား၏ ဆီနူအီဂျူ(Sinuiju)နှင့် အူဂျီမြို့(Uiju)တို့တွင် မိုးသည်း ထန်စွာ ရွာသွန်းမှုများကြောင့် နေအိမ် ၄၀၀၀ ကျော် ရေဘေးသင့်ခဲ့၍ မြောက်ကိုရီးယားခေါင်းဆောင်  ကင်မ်ဂျုံအန်(Kim Jong un)က သွားရောက်ကြည့်ရှုစစ်ဆေးခဲ့ကြောင်း နိုင်ငံပိုင် Korea central news agency ၏ ထုတ်ပြန်ချက်ကို ဘန်ကောက်ပို့စ်သတင်းတွင် ဖော်ပြထားသည်။

နေအိမ် အဆောက်အအုံ အများအပြား၊ စက်ရုံများ၊ လမ်းများနှင့်အတူ လယ်ယာမြေဧက ၇၄၀၀ ဝန်းကျင် ရေနစ်မြုပ်ခဲ့သည်။

ထိုအခြေအနေကြောင့် အာဏာရ အလုပ်သမားပါတီ၏ သြဇာကြီးမားသော ပေါလစ်ဗျူရိုအဖွဲ့က ယခု သီတင်းပတ် အစောပိုင်းတွင် နှစ်ရက်ကြာ အရေးပေါ် အစည်းအဝေးတစ်ရပ်ကို ပြုလုပ်ခဲ့သည်။

ခေါင်းဆောင်ကင်မ်က အစည်းအဝေးကို ကြီးမှူးဆောင်ရွက်ခဲ့ပြီး အပျက်အစီးများအပေါ် စိုးရိမ်ကြောင်းနှင့် ရေဘေးသင့် ဒေသများတွင် ပြန်လည်ထူထောင်ရေး လုပ်ငန်းများလုပ်ဆောင်ရန် အားကောင်းသော စီမံချက်များ လုပ်ရန် တိုက်တွန်းခဲ့သည်။

ထိုဒေသသည် မကြာသေးမီ ရက်ပိုင်းက တိုက်ခတ်ခဲ့သော အပူပိုင်းမုန်တိုင်း ဂယ်မီ(Gaemi)ကြောင့် မိုးသည်း ထန်စွာ ရွာသွန်းမှုဒဏ် ကြုံတွေ့ခံစားခဲ့ရခြင်း ဖြစ်သည်။ 

ရေဘေးသင့် ဒေသများကို ကင်မ်သွားရောက် စစ်ဆေးနေစဉ်

ဂယ်မီမုန်တိုင်းကြောင့် တရုတ်တွင် မြေပြိုမှု တစ်ခုဖြစ်ပွားပြီး လူ ၁၂ ဦး သေဆုံးကာ ရေကြီးရေလျှံမှုများ ဖြစ်ပွားခဲ့ သည်။

မြောက်ကိုရီးယားနိုင်ငံပိုင်မီဒီယာတွင် လတ်တလော သီတင်းပတ်များအတွင်း မုတ်သုံရာသီနှင့် ပတ်သက်ပြီး သတိပေးချက်များ ထုတ်ပြန်ခဲ့သည်။

ဆိုးရွားပြင်းထန်သော ရာသီဥတုကြောင့် အပျက်အစီးများ ဖြစ်ပေါ်မှုကို ကာကွယ်ရန် ကြိုးပမ်းဆောင်ရွက်မှု အများအပြား လုပ်ဆောင်လျက်ရှိကြောင်း ဖော်ပြခဲ့သည်။

ဇူလိုင်လသည် ကိုရီးယားကျွန်းဆွယ်တွင် နှစ်စဉ်မုတ်သုံရာသီ ရောက်ရှိသည့် လဖြစ်သော်လည်း လတ်တလောနှစ် များအတွင်း နွေရာသီလများတွင် ပိုမိုဆိုးရွားပြင်းထန်သော ရာသီဥတု ဖြစ်စဉ်များကို ကြုံတွေ့ခံစားခဲ့ရသည်။

တောင်ကိုရီးယားတွင် ယခုလ အစောပိုင်းက မိုးသည်းထန်စွာ ရွာသွန်းမှုများကြောင့် မြေပြိုမှုများ ဖြစ်ပေါ်ခဲ့ကာ မီးရထားပြေးဆွဲမှုများ နှောင့်နှေးခဲ့ပြီး အခြေခံအဆောက်အအုံများ ကြီးကြီးမားမား ပျက်စီးခဲ့သည်။

Source - ဘန်ကောက်ပို့စ်

CNI International News

ကာရာကက်စ်၊ သြဂုတ် ၁

ဗင်နီဇွဲလားနိုင်ငံတွင် ဇူလိုင် ၂၈ ရက်က သမ္မတရွေးကောက်ပွဲ ပြုလုပ်ခဲ့ပြီးနောက် ဇူလိုင် ၃၁ ရက်၌  ဆန္ဒပြသူများ သည် လမ်းများပေါ်သို့ ထွက်လာခဲ့ကြပြီး သမ္မတနီကိုလပ်စ် မာဒူရို (Nicolas Maduro) အား ရွေးကောက်ပွဲ ရှုံးနိမ့် ကြောင်းဝန်ခံရန် တောင်းဆိုခဲ့ကြသည်ဟု ရိုက်တာမှ ဖော်ပြခဲ့သည်။

နိုင်ငံတကာ လေ့လာစောင့်ကြည့်သူများကလည်း ထိုရွေးကောက်ပွဲသည် ဒီမိုကရေစီမဆန်ဘဲ အဆုံးသတ်ခဲ့ ကြောင်း ပြောကြားခဲ့သည်။

ဗင်နီဇွဲလားအစိုးရကမူ ဆန္ဒပြမှုများသည် အာဏာသိမ်းရန် ကြိုးပမ်းမှုဖြစ်ကြောင်း ဝေဖန်ရှုတ်ချခဲ့သည်။

ဗင်နီဇွဲလားရွေးကောက်ပွဲ အာဏာပိုင်အဖွဲ့က သမ္မတရွေးကောက်ပွဲတွင် မာဒူရိုသည် မဲရလဒ် ၅၁ ရာခိုင်နှုန်းဖြင့် တတိယသက်တမ်းကို အနိုင်ရကြောင်း ကြေညာခဲ့ပြီးနောက် ဆန္ဒပြမှုများ ဖြစ်ပွားလာခဲ့ခြင်းဖြစ်သည်။

ဗင်နီဇွဲလားသမ္မတ မာဒူရိုကို တွေ့ရစဉ်

အတိုက်အခံများကမူ ရွေးကောက်ပွဲကော်မရှင်သည် အာဏာရှင်အစိုးရ၏ သြဇာလွှမ်းမိုးမှုအောက်တွင် ရှိနေသည် ဟု ယူဆထားပြီး အတိုက်အခံ ကိုယ်စားလှယ်လောင်း အက်ဒ်မွန်ဒို ဂွန်ဇာလက်ဇ် (Edmundo Gonzalez) သည် မာဒူရိုထက် မဲရာခိုင်နှုန်း ၂ ဆ ပိုမိုများပြားစွာရရှိခဲ့ကြောင်း ပြောကြားခဲ့သည်။

ရွေးကောက်ပွဲ စတင်ခဲ့ချိန်ကစပြီး နိုင်ငံတစ်ဝန်း ဖြစ်ပွားနေသည့် ဆန္ဒပြမှုများကြောင့် လက်ရှိတွင် သေဆုံးသူ ၁၁ ဦးထက်မနည်းရှိခဲ့သည်ဟု လူ့အခွင့်အရေးအဖွဲ့ Foro Penal က ပြောကြားခဲ့သည်။

ရွေးကောက်ပွဲကို လေ့လာစောင့်ကြည့်ခဲ့သည့် အမေရိကန်အခြေစိုက် ကာတာစင်တာကလည်း ဗင်နီဇွဲလား သမ္မတရွေးကောက်ပွဲသည် ရွေးကောက်ပွဲဆိုင်ရာ နိုင်ငံတကာ စံချိန်စံနှုန်းများနှင့် ကိုက်ညီမှုမရှိဘဲ ဒီမိုကရေစီ ဆန်သည်ဟု မယူဆနိုင်ကြောင်း ဇူလိုင် ၃၀ ရက်နှောင်းပိုင်းက ထုတ်ပြန်ခဲ့သည်။

ဗင်နီဇွဲလားအတိုက်အခံကို တွေ့ရစဉ်

ဗင်နီဇွဲလားအာဏာပိုင်များ အနေဖြင့် မဲအရေအတွက် စုစုပေါင်းကို လူသိရှင်ကြား ထုတ်ပြန်ကြေညာရန် နိုင်ငံအများစုက တိုက်တွန်းထားပြီး အမေရိကန်ကမူ ထိုရွေးကောက်ပွဲတွင် ပွင့်လင်းမြင်သာမှု မရှိပါက ရွေးကောက်ပွဲနှင့် ဆက်နွှယ်သူများကို ပိတ်ဆို့မှုအသစ်များ ချမှတ်ရန် စဉ်စားနေကြောင်း အမေရိကန် သတင်းရင်းမြစ်များက ပြောကြားခဲ့သည်။

မာဒူရိုနှင့် ၎င်း၏ မဟာမိတ်များကမူ ဂွန်ဇာလက်နှင့် အတိုက်အခံခေါင်းဆောင် မာရီယာ ကော်ရီနာ မာချာဒို (Maria Corina Machado) တို့သည် ရွေးကောက်ပွဲအပြီးတွင် ဆူပူအုံကြွမှုများ ဖြစ်ပွားစေရန် လှုံ့ဆော်ခဲ့ကြောင်း စွပ်စွဲခဲ့သည်။

ရွေးကောက်ပွဲတွင် အနိုင်ရကြောင်း ကြေညာသည့် ရုပ်သံမှထုတ်လွှင့်သည့် မိန့်ခွန်းတွင် မာဒူရိုက အတိုက်အခံ ဆန္ဒပြသူများသည် အရပ်သားများကို ထိခိုက်နာကျင်အောင် လုပ်ဆောင်ခြင်း၊ မီးရှို့ခြင်းတို့ ပြုလုပ်ခဲ့ပြီး ထိုဖြစ်စဉ် များအတွက် ဂွန်ဇာလက်ဇ်နှင့် မာချာဒိုတို့ တာဝန်ယူသင့်ကြောင်း ပြောကြားခဲ့သည်။

Source: ရိုက်တာ

CNI International News

တီဟီရန်၊ သြဂုတ် ၁

အစ္စရေး၏လေကြောင်း တိုက်ခိုက်မှုကြောင့် သေဆုံးသွားခဲ့သော ခေါင်းဆောင် အစ္စမေးလ်ဟာနီရာအတွက် အစ္စရေးကို လက်တုန့်ပြန်ရန် ဟားမာ့စ်အဖွဲ့က ပြင်ဆင်နေကြောင်း ရိုက်တာသတင်းတွင် ဖော်ပြထားသည်။

အီရန်နိုင်ငံ၊ တီဟီရန်မြို့တော်(Tehran)တွင် အစ္စရေး၏လေကြောင်း တိုက်ခိုက်မှုကြောင့် ဟားမာ့စ်ခေါင်းဆောင် အစ္စမေးလ်ဟာနီရာ(Ismail Haniyeh) သေဆုံးခဲ့ကြောင်း ပါလက်စတိုင်းစစ်သွေးကြွအဖွဲ့က ဇူလိုင် ၃၁ ရက်တွင် ပြောကြားခဲ့သည်။

ဟားမာ့စ်အဖွဲ့ခွဲက ဟာနီရာ သေဆုံးမှုအကြောင်း ထုတ်ပြန်ချက်တွင် တီဟီရန်မြို့တော်ရှိ ၎င်း၏နေအိမ်တွင် အစ္စရေးတို့၏ လေကြောင်း တိုက်ခိုက်မှုကြောင့် သေဆုံးခဲ့ရခြင်းဖြစ်ကြောင်း ပြောကြားခဲ့သည်။

ဟာနီရာသည် ဇူလိုင် ၃၀ ရက်က အီရန်သမ္မတ မာဆွတ်ပီဇက်ရှ်ကီယန်(Masoud Pezeshkian)၏ ကျမ်းသစ္စာ ကျိန်ဆိုပွဲကို တက်ရောက်ရန်အတွက် တီဟီရန်မြို့တော်သို့ ရောက်ရှိနေခဲ့ခြင်းဖြစ်သည်။

ဟာနီရာသည် ၎င်း၏ သက်တော်စောင့်များမှ တစ်ဦးနှင့်အတူ သေဆုံးခဲ့ခြင်းဖြစ်သည်ဟု အီရန်၏တော်လှန်ရေး အစောင့်တပ်ဖွဲ့က ပြောကြားခဲ့သည်။

အစ္စရေးလေကြောင်း တိုက်ခိုက်မှုခံလိုက်ရသော အစ္စမေးလ်ဟာနီရာရဲ့ နေအိမ်ကိုတွေ့ရစဉ်

"တီဟီရန်မှာရှိတဲ့ Hamas Islamic Resistance အဖွဲ့ရဲ့ နိုင်ငံရေးဆိုင်ရာရုံးအဖွဲ့အကြီးအကဲ အစ္စမေးလ်ဟာနီရာရဲ့ နေအိမ်ကို လေကြောင်း တိုက်ခိုက်ခံရတဲ့အတွက် ဟာနီရာနဲ့ သူ့ရဲ့သက်တော်စောင့်တွေထဲက တစ်ဦး သေဆုံးခဲ့ ပါတယ်" ဟု အစ္စလာမ်မစ်တော်လှန်ရေး အစောင့်တပ်ဖွဲ့၏ Sepah သတင်းဝက်ဘ်ဆိုဒ်တွင် ဖော်ပြထားသည်။

ဟာနီရာ မည်သို့မည်ပုံ သေဆုံးခဲ့ကြောင်း အီရန်က အသေးစိတ် ထုတ်ပြန်ထားခြင်းမရှိဘဲ ယင်းတိုက်ခိုက်မှုကို စုံစမ်းစစ်ဆေးနေကြောင်း ပြောကြားခဲ့သည်။

ဟားမာ့စ်ကမူ ထိုလေကြောင်း တိုက်ခိုက်မှုသည် ၎င်းတို့၏ ရည်မှန်းချက်များကို ပြည့်မီသွားနိုင်မည် မဟုတ်ဘဲ တင်းမာမှုများ ပိုမိုမြင့်တက်လာနိုင်သည်ဟု သတိပေးခဲ့သည်။

ဟားမာ့စ်အဖွဲ့၏ အကြီးတန်းတာဝန်ရှိသူ မူဆာအဘူမာဇွတ်(Musa Abu Marzuk)က ဟာနီရာကို သတ်ဖြတ်ခြင်း သည် အဖြေထွက်လာလိမ့်မည် မဟုတ်ကြောင်း ဇူလိုင် ၃၁ ရက်တွင် ပြောကြားခဲ့သည်။

ပါလက်စတိုင်းသမ္မတ မာမွတ်အာဘတ်စ်(Mahmud Abbas)က ယင်းလေကြောင်း တိုက်ခိုက်မှုဖြစ်စဉ်အား သူရဲဘောကြောင်သည့် လုပ်ရပ်ဟု ပြစ်တင်ပြောကြားခဲ့ကာ အစ္စရေးကို ဆန့်ကျင်ရာတွင် ပါလက်စတိုင်း ဒေသခံများအားလုံး စည်းလုံးညီညွတ်ကြရန် တိုက်တွန်းပြောကြားခဲ့သည်။

အီရန်နိုင်ငံပိုင် မီဒီယာတွင် ဟာနီရာ သေဆုံးမှုအကြောင်း ထုတ်ပြန်ခဲ့ပြီးနောက် အစ္စရေးစစ်တပ်က ၎င်းတို့အနေ ဖြင့် ပြည်ပမီဒီယာများ၏ သတင်းဖော်ပြချက်များအပေါ် တုန့်ပြန်သွားမည် မဟုတ်ကြောင်း စီအန်အန်သတင်းဌာန သို့ ပြောကြားခဲ့သည်။

Source – Reuters

CNI International News

ဘန်ကောက်၊ ဇူလိုင် ၃၁

Move Forward Party(MFP)ပါတီ ဖျက်သိမ်းခံရမည်ဆိုပါက အသစ်ပြန်လည်ဖွဲ့စည်းချိန်တွင် ပါတီခေါင်းဆောင် အဖြစ် ခန့်အပ်ခံရလျှင် ထိုင်းနိုင်ငံရေးလောကအတွက် ကဏ္ဍသစ်ဖွင့်လှစ်သွားမည်ဟု MFP ပါတီ၏ ဒုတိယ ခေါင်းဆောင် သီရိကန်ယာ တန်ဆာကူလ် (Sirikanya Tansakul)က  ကတိပြုခဲ့ကြောင်း ဘန်ကောက်ပို့စ်မှ ဖော်ပြခဲ့သည်။ 

MFP ပါတီ ဖျက်သိမ်းသင့်/မသင့်ကို ထိုင်းတရားရုံးက မကြာခင် ဆုံးဖြတ်မည်ဖြစ်သည်။

ထို့နောက် ပါတီဖျက်သိမ်းခံရပြီး ပြန်လည်၍ ပါတီဖွဲ့စည်းမည့် အချိန်မှာ ပါတီခေါင်းဆောင်အဖြစ် အဆိုပြု ရွေးချယ်ခန့်အပ် ခံရမည်ဆိုပါက ထိုင်းနိုင်ငံတွင် အမျိုးသမီး ခေါင်းဆောင်များ ဦးဆောင်သည့် ပါတီများ ပိုမိုများပြားလာမည်ဖြစ်သည်။

ထိုအခြေအနေသည် နိုင်ငံကို ရှေ့ဆက်ချီတက်နိုင်မည့် ခြေလှမ်းတစ်ခု ဖြစ်လာလိမ့်မည်ဟုလည်း သီရိကန်ယာက ပြောသည်။

MFP ပါတီ အဖွဲ့၀င်များကိုတွေ့ရစဉ် 

"အဲဒါဆိုရင် အမျိုးသား ပါတီခေါင်းဆောင် အများစု ကြီးစိုးခဲ့တဲ့ အတိတ်ကာလက အခြေအနေနဲ့ မတူတဲ့ ထိုင်းနိုင်ငံရေး လောကအတွက် ကဏ္ဍအသစ်တစ်ခု ဖြစ်လာပါလိမ့်မယ်" ဟု မစ္စစ် သီရိကန်ယာက ပြောကြားခဲ့ သည်။

ပါတီဖျက်သိမ်းခံရမည့် အခြေအနေနှင့်ပတ်သက်ပြီး ခေါင်းဆောင်သစ်ရာထူးကို ရနိုင်ခြေ ရှိ/မရှိ သတင်းထောက် များ၏ မေးမြန်းခြင်းကို ခံရချိန်တွင် သီရိကန်ယာက ပါတီခေါင်းဆောင်ရာထူး နေရာအတွက် ပါတီ၏ ရွေးချယ်မှု အပေါ်တွင်သာ မူတည်ကြောင်း ပြန်လည်ဖြေကြားခဲ့သည်။

"မမျှော်လင့်ဘဲ ပါတီဖျက်သိမ်း ခံရမယ်ဆိုရင် ပါတီဝင်တွေဟာ ပါတီသစ်တစ်ခုကို ထပ်မံဖွဲ့စည်းဖို့ အဆင်သင့်ပါပဲ။ ဘာပဲဖြစ်လာပါစေ ကျမတို့ ကောင်းကောင်း ပြင်ဆင်ထားပါတယ်" ဟု သီရိကန်ယာက ပြောကြားခဲ့သည်။

MFP ပါတီသည် တော်ဝင်မိသားစုကို အကာအကွယ်ပေးထားသည့် တော်ဝင်အသရေဖျက်မှုဥပဒေကို ပြင်ဆင် ပြောင်းလဲရန် ကြိုးပမ်းမှုဖြင့် ဖွဲ့စည်းပုံအခြေခံဥပဒေဆိုင်ရာ ခုံရုံးတွင် ပါတီဖျက်သိမ်းခံရမည့် အရေးနှင့် ရင်ဆိုင် နေရခြင်းဖြစ်သည်။

MFP ပါတီ၏ ဒုတိယ ခေါင်းဆောင် သီရိကန်ယာ တန်ဆာကူလ်ကို တွေ့ရစဉ်

ထိုအမှုကို ဖွဲ့စည်းပုံအခြေခံဥပဒေဆိုင်ရာ ခုံရုံးက စီရင်ချက်ချမှတ်မည့် ဩဂုတ်လ ၇ ရက်တွင် MFP ပါတီကို ထောက်ခံသူများအား ပါတီလိုဂိုပါသည့် အင်္ကျီများဝတ်ဆင်ပြီး ပါတီဌာနချုပ်ရှေ့၌ လာရောက်စုံရုံးကြရန် MFP ပါတီက Facebook ပေါ်တွင် ရေးသားခဲ့သည်။

ထိုအခြေအနေကို အခွင့်ကောင်းယူပြီး ပါတီ၏ အတွင်းရေးမှူးချုပ် ပီယာဘတ် ဆာအန်ကာနွတ်ကူလ် (Piyabutr Saengkanokkul) က ဖွဲ့စည်းပုံအခြေခံ ဥပဒေဆိုင်ရာခုံရုံးတွင် နိုင်ငံရေးပါတီများ ဖျက်သိမ်းမှုနှင့် ပတ်သက်သည့် အကြောင်းအရာများကို ဟောပြောသွားမည်ဟု MFP ပါတီက ထုတ်ပြန် ပြောကြားခဲ့သည်။

MFP ပါတီသည် ယခင်ဖျက်သိမ်းခံခဲ့ရသည့် Future Forward ပါတီ (FFP) ကို အမည်ပြောင်းလဲပြီး အသစ်ဖွဲ့စည်း ထားသည့် ပါတီဖြစ်ကာ ယခု MFP ပါတီ ဖျက်သိမ်းခံခဲ့ရပါက အသစ်ပြန်လည် ဖွဲ့စည်းမည့်အမည်ကို မရွေးချယ်ရ သေးကြောင်း သီရိကန်ယာက ပြောကြားခဲ့သည်။

Source: ဘန်ကောက် ပို့စ်

CNI International News

ဗီယန်ကျင်း၊ ဇူလိုင် ၃၁

တိုက်ပွဲများ ပြင်းထန်စွာ ဖြစ်ပွားနေသည့် မြန်မာနိုင်ငံတွင် အပစ်အခတ်ရပ်စဲရေး ရရှိစေရန် မြန်မာနိုင်ငံ၏ အိမ်နီးချင်းနိုင်ငံများအနေဖြင့် ပူးပေါင်းဆောင်ရွက်မှုများကို တိုးမြှင့်လုပ်ဆောင်သင့်ကြောင်း ထိုင်းနိုင်ငံခြားရေး ဝန်ကြီး မာရစ် ဆန်ဂီယမ်ပွန်ဆာ (Maris Sangiampongsa) က တိုက်တွန်းခဲ့ကြောင်း ဘန်ကောက်ပို့စ်မှ ဖော်ပြခဲ့ သည်။

ယခုလ အစောပိုင်းက အိန္ဒိယနိုင်ငံ၊ နယူးဒေလီမြို့တော်တွင် ပြုလုပ်ခဲ့သည့် တောင်အာရှနှင့် အရှေ့တောင်အာရှ အစည်းအဝေးများ၌ မြန်မာနှင့် အိမ်နီးချင်းနိုင်ငံများမှ နိုင်ငံခြားရေးဝန်ကြီးများ အလွတ်သဘောတွေ့ဆုံခဲ့စဉ် မြန်မာ့အရေးကို ဆွေးနွေးခဲ့သည်ဟု ဇူလိုင် ၂၈ ရက်က လာအိုနိုင်ငံ၊ ဗီယန်ကျင်း (Vientiane) မြို့တော်၌ Kyodo News နှင့် ထိုင်းမီဒီယာတစ်ခုကို မစ္စတာမာရစ်က ပြောကြားခဲ့သည်။

မစ္စတာမာရစ်သည် အမေရိကန်၊ ဂျပန်နှင့် တရုတ်နိုင်ငံတို့ အပါအဝင် အာဆီယံ၏ မိတ်ဖက်နိုင်ငံများနှင့် အာဆီယံ အဖွဲ့ဝင်နိုင်ငံများ တက်ရောက်သည့် နိုင်ငံခြားရေးဝန်ကြီးအဆင့် အစည်းအဝေးပွဲများအတွက် ပြီးခဲ့သည့် သီတင်းပတ်က လာအိုနိုင်ငံ၊ ဗီယန်ကျင်းမြို့တော်သို့ ရောက်ရှိနေခြင်းဖြစ်သည်။

ထိုင်းနှင့်အိန္ဒိယသည် မြန်မာ့တပ်မတော်နှင့် လက်နက်ကိုင်အဖွဲ့များအကြား ဖြစ်ပွားနေသော တိုက်ပွဲများကြောင့် ထွက်ပြေးတိမ်းရှောင်နေရသည့် စစ်ဘေးဒုက္ခသည် အများအပြား ဝင်ရောက်လာသော အခြေအနေနှင့် ကြုံတွေ့နေ ရသည်။

လားရှိုးမြို့ကို တိုက်နေသော MNDAA တပ်ဖွဲ့ကို တွေ့ရစဉ်

"မြန်မာ့အရေးနဲ့ ပတ်သက်ပြီး နိုင်ငံအများအပြားဟာ အရင်ကထက်ပိုပြီး ပွင့်လင်းတဲ့ သဘောထားတွေနဲ့အတူ မြန်မာနိုင်ငံရဲ့ အခြေအနေကို တိုးတက်အောင် လုပ်ဆောင်ဖို့ အခွင့်ကောင်းရှိနေတယ်လို့ ကျနော် ယုံကြည်ပါ တယ်" ဟု မစ္စတာ မာရစ်က ပြောကြားခဲ့သည်။

အိန္ဒိယ၊ မြန်မာ၊ ထိုင်း သုံးပွင့်ဆိုင် နိုင်ငံခြားရေးဝန်ကြီးများ ပြုလုပ်သည့် ဆွေးနွေးမှုများတွင် မြန်မာနိုင်ငံ၌ ပိုမို ပွင့်လင်းသော သဘောထားရှိသည်ဟု ခံစားခဲ့ရကြောင်း မစ္စတာမာရစ်က ပြောသည်။

မြန်မာနိုင်ငံသည် ထိုင်း၊ အန္ဒိယ၊ တရုတ်၊ လာအို၊ ဘင်္ဂလားဒေ့ရှ်နိုင်ငံတို့နှင့် နယ်စပ်ချင်း ထိစပ်နေသည်။

Source: ဘန်ကောက်ပို့စ်

CNI International News

တိုင်ပေ၊ ဇူလိုင် ၃၁

ထိုင်ဝမ်အနေဖြင့် မိမိကိုယ်ကိုယ် အားကိုးသည့် ကာကွယ်ရေးကဏ္ဍကို မြှင့်တင်သွားမည်ဖြစ်ပြီး ပြည်ပမှ လက်နက်များကိုလည်း ဆက်လက်ဝယ်ယူသွားမည်ဟု ထိုင်ဝမ်သမ္မတ လိုင်ချင်တေ(Lai Ching-te)က ဇူလိုင် ၃၀ ရက်တွင် ပြောကြားခဲ့ကြောင်း ရိုက်တာမှ ဖော်ပြခဲ့သည်။

တရုတ်သည် အခြားနိုင်ငံတစ်နိုင်ငံကို ခြိမ်းခြောက်နေခြင်းသည် ကမ္ဘာကြီးအတွက် ခြိမ်းခြောက်မှုဖြစ်ကြောင်း လိုင်က ပြောသည်။

ထိုင်ဝမ်သည် ဒေသတွင်း ငြိမ်းချမ်းရေးနှင့် တည်ငြိမ်ရေးကို မြှင့်တင်ရန် အားထုတ်ကြိုးပမ်း သွားမည်ဟုလည်း လိုင်က တိုင်ပေ (Taipei) မြို့တော်တွင် ပြုလုပ်သည့် ညီလာခံတစ်ခုတွင် ပြောကြားခဲ့သည်။

ထိုင်ဝမ်ကို ၎င်း၏ နယ်နိမိတ်တစ်ခုအဖြစ် ရှုမြင်ထားသည့် တရုတ်သည် ထိုင်ဝမ်အပေါ် အချုပ်အခြာအာဏာ ပိုင်ကြောင်း ၎င်း၏ကြေညာချက်ကို ထိုင်ဝမ်က လက်ခံစေရန် စစ်ရေးလေ့ကျင့်မှုများ ပုံမှန်ပြုလုပ်ခဲ့ပြီး ဖိအားများ တိုးမြှင့်ခဲ့သည်။

တရုတ်နဲ့ ထိုင်ဝမ်ကို တွေ့ရစဉ်

"တရုတ်က ဘယ်နိုင်ငံကိုပဲ ခြိမ်းခြောက်နေပါစေ၊ အဲဒါဟာ ကမ္ဘာကြီးအတွက် ခြိမ်းခြောက်မှုပဲဖြစ်ပါတယ်" ဟု လိုင်က တိုင်ပေမြို့တော်ရှိ တရုတ်နိုင်ငံဆိုင်ရာ လွှတ်တော်အချင်းချင်း မဟာမိတ် (IPAC) ညီလာခံတွင် ပြောကြား ခဲ့သည်။

IPAC သည် တရုတ်နိုင်ငံကို ဝေဖန်သည့် ရာနှင့်ချီသော နိုင်ငံရေးသမားများ စုဖွဲ့ထားသည့် နိုင်ငံတကာကွန်ရက် နှင့် ချိတ်ဆက်ထားသော အဖွဲ့ဖြစ်သည်။

"ထိုင်ဝမ်ဟာ အာဏာရှင်စနစ်ရဲ့ ခြိမ်းခြောက်မှုတွေရန်က ကင်းဝေးအောင် မိမိတို့ရဲ့ ဒီမိုကရေစီ မိတ်ဖက်တွေနဲ့ အတူ ဒီမိုကရေစီ ကာကွယ်ရေး ထီးရိပ်တစ်ခု ထူထောင်ဖို့ အကောင်းဆုံး ကြိုးပမ်းဆောင်ရွက်သွားမှာပါ" ဟု လိုင်က ပြောကြားခဲ့သည်။

IPAC အဖွဲ့အတွင်းရှိ နိုင်ငံ ၅ နိုင်ငံမှ လွှတ်တော်အမတ် ၈ ဦးကို ထိုင်ဝမ်မှ ထွက်ခွာသွားရန် တရုတ်အရာရှိများက အီးမေးလ်များပေးပို့ခြင်း၊ ဖုန်းခေါ်ဆိုမှုများ ပြုလုပ်ခြင်းတို့ ရှိခဲ့သည်ဟု IPAC က ထုတ်ပြန်ခဲ့သည်။

မိမိတို့၏ နှစ်ပတ်လည် ညီလာခံကို တရုတ်က ကြားဝင်စွက်ဖက်ရန် ကြိုပမ်းနေခြင်းကို ရှုတ်ချကြောင်း၊ ဒီမိုကရေစီ နည်းကျ ရွေးကောက်ခံထားရသည့် လွှတ်တော်အမတ်များသည် လွတ်လပ်စွာ သွားလာလည်ပတ်ခွင့်ရှိကြောင်း၊ ထိုကဲ့သို့ သွားလာခြင်းသည် ရွေးကောက်ခံအရာရှိများ၏ အခွင့်အရေးနှင့် တာဝန်ဝတ္တရားများအတွက် ပုံမှန် အနေ အထားဖြစ်ကြောင်း IPAC က ထုတ်ပြန်ခဲ့သည်။

Source: ရိုက်တာ

CNI International News

ဝါရှင်တန်၊ ဇူလိုင် ၃၀

ပြီးခဲ့သည့် ရက်ပိုင်းက အစ္စရေးတို့ သိမ်းပိုက်ထားသည့် ဂိုလန်ကုန်းမြင့် (Goland Heights) တိုက်ခိုက်မှုနှင့် ပတ်သက်ပြိး အမေရိကန်ဒုတိယသမ္မတ ကာမယ်လာ ဟားရစ် (Kamala Harris) က အစ္စရေး၏လုံခြုံရေး စီမံကာကွယ်မှုကို ထောက်ခံကြောင်း ဟားရစ်၏ အမျိုးသားလုံခြုံရေးအကြံပေးပုဂ္ဂိုလ် ဖီးလ် ဂေါ်ဒွန် (Phil Gordon)မှ ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဇူလိုင် ၂၇ ရက်က ဂိုလန်ကုန်းမြင့်ရှိ ဘောလုံးကွင်းတစ်ကွင်း ဒုံးကျည်ဖြင့် တိုက်ခိုက်ခံရမှုကြောင့် လူ ၁၂ ဦး သေဆုံးသွားခဲ့သည်။ ထိုဖြစ်စဉ်ကို ဟားရစ်က အနီးကပ်စောင့်ကြည့်ခဲ့ကြောင်း ဂေါ်ဒွန်က ပြောသည်။

"ဒုတိယသမ္မတဟာ အစ္စရေးနိုင်ငံမြောက်ပိုင်း မက်ဂျ်ဒဲလ် ရှမ်းစ် (Majdal Shams) မြို့မှာရှိတဲ့ ဘောလုံးကွင်းကို ဟစ်ဇ်ဘိုလာအဖွဲ့ရဲ့ ကြောက်မက်ဖွက်ကောင်းတဲ့ တိုက်ခိုက်မှု အခြေအနေကို အနီးကပ် စောင့်ကြည့်ခဲ့ပါတယ်။ အဲဒီတိုက်ခိုက်မှုမှာ ကလေးတွေနဲ့ ဆယ်ကျော်သက် လူငယ်တွေ သေဆုံးခဲ့ပါတယ်။ ဒုတိယသမ္မတဟာ အဲဒီလို ကြောက်မက်ဖွယ်ကောင်းတဲ့ တိုက်ခိုက်မှုကို ရှုတ်ချခဲ့ပြီး သေဆုံးသူတွေနဲ့ ဒဏ်ရာရသွားသူတွေအတွက် ဝမ်းနည်း ခဲ့ပါတယ်" ဟုဂေါ်ဒွန်က ပြောကြားခဲ့သည်။

အစ္စရေးအနေဖြင့် ၎င်း၏ လုံခြုံရေးကဏ္ဍတွင် ခြိမ်းခြောက်မှုများကို ဆက်လက် ရင်ဆိုင်နေရပြီး ဒုတိယသမ္မတ သည် အစ္စရေး၏ လုံခြုံရေးစီမံကာကွယ်မှုကို အခိုင်အမာ ထောက်ခံကြောင်းလည်း ဂေါ်ဒွန်က ပြောကြားခဲ့သည်။

ဟားမာ့စ်တိုက်ခိုက်မှုကိုတွေ့ရစဉ်

အစ္စရေးစစ်တပ်ကမူ ဂိုလန်ကုန်းမြင့်ပေါ်ရှိ ဘောလုံးကွင်းတွင် ဒုံးကျည်ဖြင့် တိုက်ခိုက်ခံရပြီးနောက် လက်ဘနွန် နိုင်ငံအတွင်းရှိ ဟစ်ဇ်ဘိုလာအဖွဲ့၏ ပစ်မှတ်များကို တိုက်ခိုက်ခဲ့ကြောင်း ပြောကြားခဲ့သည်။

ထိုဘောလုံးကွင်း တိုက်ခိုက်မှုကို လက်ဘနွန်နိုင်ငံအတွင်းရှိ အီရန်က ကျောထောက်နောက်ခံ ပြုထားသည့် ဟစ်ဇ်ဘိုလာအဖွဲ့က ပြုလုပ်ခဲ့ခြင်းဖြစ်ကြောင်း အစ္စရေးလေတပ်က ပြစ်တင်ပြောကြားခဲ့သော်လည်း ဟစ်ဇ်ဘိုလာ အဖွဲ့ကမူ ထိုတိုက်ခိုက်မှုကို ၎င်းတို့ လုပ်ဆောင်ခဲ့ခြင်း မရှိကြောင်း ငြင်းဆိုခဲ့သည်။

ထိုတိုက်ခိုက်မှု ဖြစ်ပွားပြီးနောက် အစ္စရေးစစ်တပ်သည် လက်ဘနွန်နိုင်ငံအတွင်းရှိ ဟားမာ့စ်အဖွဲ့၏ ပစ်မှတ်နေရာ ၇ ခုကို လေကြောင်းတိုက်ခိုက်မှုများ ပြုလုပ်ခဲ့ကြောင်း အစ္စရေးစစ်တပ်က ဇူလိုင် ၂၈ ရက်တွင် ထုတ်ပြန်ခဲ့သည်။

Source: ရိုက်တာ

CNI International News

မနီလာ၊ ဇူလိုင် ၃၀

ဖိလစ်ပိုင်နိုင်ငံသည် ၂၀၂၅ ခုနှစ်အတွက် ကာကွယ်ရေးအသုံးစရိတ်ကို ပီဆို ၂၅၆ ဒသမ ၁ ဘီလျံ (ဒေါ်လာ ၄ ဒသမ ၃၈ ဘီလျံ) အသုံးပြုရန် လျာထားကြောင်း ဘတ်ဂျက်ဝန်ကြီးဌာနက ဇူလိုင် ၂၉ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဖိလစ်ပိုင်သည် ပြည်ပရန် ကာကွယ်ရေးကဏ္ဍကို အဆင်မြှင့်တင်ရန် ကြိုးပမ်းနေချိန်တွင် ထိုအသုံးစရိတ် ပမာဏသည် ယခုနှစ် ကာကွယ်ရေး အသုံးစရိတ်ထက် ၆ ဒသမ ၄ ရာခိုင်နှုန်း မြင့်တက်လာခဲ့ခြင်း ဖြစ်သည်။

ထို့ပြင် တောင်တရုတ်ပင်လယ်တွင် တရုတ်နှင့် နယ်မြေပိုင်ဆိုင်ရေး အငြင်းပွားမှုများနှင့် နှစ်နိုင်ငံ ကမ်းခြေစောင့် တပ်ဖွဲ့ သင်္ဘောများအကြား ထိပ်တိုက်တွေ့မှုများ မြင့်တက်နေချိန်၌ ကာကွယ်ရေးအသုံးစရိတ်ကို မြှင့်တင်ရန် ဖိလစ်ပိုင်အစိုးရက အဆိုပြုခဲ့ခြင်းဖြစ်သည်။

ထိုကာကွယ်ရေး အသုံးစရိတ်သည် ၂၀၂၅ ခုနှစ်အတွက် အစိုးရ၏ အသုံးစရိတ် စုစုပေါင်း ပီဆို ၆ ဒသမ ၃၅ ထရီလျံ ၏ ၄ ရာခိုင်နှုန်းဖြစ်ပြီး ထိုအသုံးစရိတ် လျာထားမှုကို အတည်ပြုချက်ရရှိရန် ဘတ်ဂျက်ဝန်ကြီးဌာနက ဇူလိုင် ၂၉ ရက်တွင် လွှတ်တော်ကို တင်သွင်းခဲ့သည်။

ဖိလစ်ပိုင်သမ္မတကို တွေ့ရစဉ်

ကာကွယ်ရေး အသုံးစရိတ် စုစုပေါင်းအနက် ပီဆို ၂၀၄ ဒသမ ၄ ဘီလျံကို ကြည်း၊ ရေ၊ လေ တပ်ဖွဲ့များ၏ ကာကွယ်ရေး အစီအစဉ်များအတွက် အသုံးပြုမည်ဖြစ်ပြီး ပီဆို ဘီလျံ ၅၀ ကို စစ်တပ်၏ အဆင်မြှင့်တင် မွမ်းမံရေး အစီအစဉ်အတွက် အသုံးပြုသွားမည်ဟု ဘတ်ဂျက်ဝန်ကြီးဌာနက ပြောကြားခဲ့သည်။

ကာကွယ်ရေး အသုံးစရိတ် မြှင့်တင်မှုသည် မိမိတို့၏ အချုပ်အခြာအာဏာနှင့် နယ်မြေတည်တံ့ခိုင်မြဲရေးကို ထိန်းသိမ်းရန်ဖြစ်ကြောင်း ဘတ်ဂျက်ဝန်ကြီး အမ်မီနာ ပန်ဂန်ဒါမန် (Amenah Pangandaman) က လွှတ်တော် အမတ်များကို ပြောကြားခဲ့သည်။

အဆိုပြုထားသည့် ၂၀၂၅ ဘတ်ဂျက်အရ တောင်တရုတ်ပင်လယ်အတွင်းရှိ ကင်းလှည့်မစ်ရှင်များ၊ ထောက်ပို့မစ်ရှင် များကို လိုက်ပါစောင့်ကြပ်ပေးနေရသည့် ဖိလစ်ပိုင် ကမ်းခြေစောင့်တပ်ဖွဲ့သည် လက်ရှိ ဘတ်ဂျက်ထက် ၆ ရာခိုင်နှုန်း တိုးမြင့်ရရှိမည်ဖြစ်ပြီး တန်ဖိုးအားဖြင့် ၃၁ ဒသမ ၄ ဘီလျံ ရရှိမည်ဖြစ်သည်။

လာမည့်နှစ် အစိုးရ၏ အလုံးစုံ အသုံးစရိတ်သည် နိုင်ငံ့ဂျီဒီပီ၏ ၂၂ ရာခိုင်နှုန်းနှင့် ညီမျှနေကာ လက်ရှိ ဘတ်ဂျက် ထက် ၁၀ ဒသမ ၁ ရာခိုင်နှုန်း  မြင့်တက်ခဲ့ခြင်းဖြစ်သည်။

ထို့ပြင် အစိုးရ၏ အသုံးစရိတ် စုစုပေါင်းအနက် ပညာရေးကဏ္ဍအတွက် အသုံးစရိတ်ကို ပီဆို ၉၇၇ ဒသမ ၆ ဘီလျံ အထိ လျာထားကြောင်း သိရသည်။

Source: ရိုက်တာ

CNI International News

တိုကျို ဇူလိုင် ၃၀

Quad အဖွဲ့ဝင်နိုင်ငံများဖြစ်သည့် ဩစတြေးလျ၊ အိန္ဒိယ၊ ဂျပန်နှင့် အမေရိကန်တို့မှ နိုင်ငံခြားရေးဝန်ကြီးများသည် တောင်တရုတ်ပင်လယ်အတွင်း ခြိမ်းခြောက်မှုများ၊ အန္တရာယ်ရှိသည့် ချဉ်းကပ်လုပ်ဆောင်ပုံများနှင့် ပတ်သက်ပြီး အလွန်စိုးရိမ်ကြောင်း ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဂျပန်နိုင်ငံ၊ တိုကျိုမြို့တော်တွင် ပြုလုပ်သည့် Quad အစည်းအဝေးအပြီး ပူးတွဲထုတ်ပြန်ချက်တွင် အဖွဲ့ဝင်နိုင်ငံများ အနေဖြင့် ဒေသတွင်း ပင်လယ်ရေကြောင်း လုံခြုံရေးကို မြှင့်တင်ရန်လည်း ကတိပြုခဲ့ကြသည်။

ထိုအစည်းအဝေးကို ဩစတြေးလျနိုင်ငံခြားရေးဝန်ကြီး ပန်နီ ဝေါင် (Penny Wong) ၊ အိန္ဒိယနိုင်ငံခြားရေးဝန်ကြီး ဆူဘရာမန်ယမ် ဂျိုင်ရှန်ကာ (Subrahmanyam Jaishankar) ၊ ဂျပန်နိုင်ငံခြားရေးဝန်ကြီး ယိုကို ကာမီကာဝါ (Yoko Kamikawa) နှင့် အမေရိကန်နိုင်ငံခြားရေးဝန်ကြီး အန်တိုနီ ဘလင်ကင် (Antony Blinken) တို့ တက် ရောက်ခဲ့သည်။

ဇူလိုင် ၂၈ ရက်က အမေရိကန်နှင့် ဂျပန်အကြား ပြုလုပ်ခဲ့သည့် လုံခြုံရေးဆွေးနွေးပွဲများတွင်လည်း မဟာမိတ် နှစ်နိုင်ငံက တရုတ်သည် ဒေသတွင်း ရင်ဆိုင်နေရသည့် အကြီးမားဆုံး မဟာဗျူဟာမြောက် စိန်ခေါ်မှုဖြစ်ကြောင်း တံဆိပ်ကပ်ခဲ့သည်။

Quad အဖွဲ့၀င်များ ဆွေးနွေးနေစဉ်

"အရှေ့တရုတ်ပင်လယ်နဲ့ တောင်တရုတ်ပင်လယ်တွေက အခြေအနေတွေကို ကျနော်တို့ အရမ်းစိုးရိမ်ပါတယ်။ အင်အားသုံးမှု ဒါမှမဟုတ် ခြိမ်းခြောက်မှုတွေနဲ့ ရှိရင်းစွဲ အခြေအနေကို ပြောင်းလဲမယ့် တစ်ဖက်သတ် လုပ်ဆောင် ချက်တွေကို ပြင်းပြင်းထန်ထန်ဆန့်ကြောင်း ထပ်လောင်း အတည်ပြုသည်”ဟု နိုင်ငံခြားရေးဝန်ကြီးများက တရုတ် ကို တိုက်ရိုက် အမည်တပ်ခြင်းမရှိဘဲ ထုတ်ပြန်ခဲ့သည်။

ထို့ပြင် တောင်တရုတ်ပင်လယ်တွင် ကမ်းခြေစောင့်တပ်ဖွဲ့ သင်္ဘောများနှင့် ပင်လယ်ရေကြောင်း ပြည်သူ့စစ် သင်္ဘောများကို အန္တရာယ်ရှိစွာ အသုံးပြုမှု အပါအဝင် ခြိမ်းခြောက် အကျပ်ကိုင်သည့် လုပ်ဆောင်ချက်များ၊ အငြင်းပွားဖွယ် စစ်ရေး အသွင်ဆောင်မှုများနှင့် ပတ်သက်ပြီး စိုးရိမ်ကြောင်းလည်း Quad နိုင်ငံခြားရေးဝန်ကြီးများ က ပြောကြားခဲ့သည်။

Quad နိုင်ငံခြားရေးဝန်ကြီးများ၏ ထုတ်ပြန်ချက်နှင့်ပတ်သက်ပြီး တရုတ်နိုင်ငံခြားရေးဝန်ကြီးဌာန၏ ပြောရေးဆို ခွင့်ရှိသူ လင်ကျန်း (Lin Jian) က တုန့်ပြန်ခဲ့ရာတွင် Quad အဖွဲ့သည် တင်းမာမှုများ မြင့်တက်စေရန် လုပ်ဆောင် နေခြင်း၊ ထိပ်တိုက်တွေ့ရန် လှုံ့ဆော်နေခြင်း၊ အခြားနိုင်ငံများ၏ ဖွံ့ဖြိုးတိုးတက်မှုကို ဟန့်တားခြင်းတို့ လုပ်ဆောင် ခဲ့သည်ဟု ပြောကြားခဲ့သည်။

ဘလင်ကင်ကိုတွေ့ရစဉ်

မကြာသေးမီက တရုတ်သင်္ဘောများသည် တောင်တရုတ်ပင်လယ်အတွင်းရှိ ပိုင်ဆိုင်မှု အငြင်းပွားနေသည့် Second Thomas သောင်ခုံအနီးတွင် ဖိလစ်ပိုင်သင်္ဘောများနှင့် ထိပ်တိုက်တွေ့မှုများ ဖြစ်ပွားခဲ့ပြီး ဇူလိုင်လ အတွင်းက တရုတ်နှင့်ဖိလစ်ပိုင်အကြား တင်းမာမှုများ လျှော့ချရန် သဘောတူညီခဲ့သည့်တိုင် တင်းမာမှုများ ရှိနေဆဲဖြစ်သည်။

Quad အဖွဲ့ကမူ ၎င်းတို့အနေဖြင့် ဂြိုဟ်တု ဆက်သွယ်ရေး အချက်အလက်များ၊ သက်ဆိုင်ရာ လေ့ကျင့် သင်ကြား မှုများမှတစ်ဆင့် မိတ်ဖက်နိုင်ငံအချင်းချင်း ကူညီပေးမှု အပါအဝင် လွတ်လပ်ပွင့်လင်းသည့် ပင်လယ်ရေကြောင်း အခင်းအကျင်းကို ထိန်းသိမ်းရန် အစီအစဉ်များ လုပ်ဆောင်နေကြောင်း ပြောကြားခဲ့သည်။

Source: ရိုက်တာ