CNI International News
နယူးဒေလီ၊ ဖေဖော်ဝါရီ ၁၇

အိန္ဒိယနိုင်ငံမြောက်ပိုင်း ကျေးလက်ဒေသများမှ လယ်သမားများသည် ၎င်းတို့ ကြုံတွေ့နေရသည့် နစ်နာချက် အများအပြားကို ဆန့်ကျင်ဆန္ဒပြရန်အတွက် ဖေဖော်ဝါရီ ၁၆ ရက်က အဝေးပြေးလမ်းမများကို ပိတ်ဆို့ခဲ့သည်။

ထို့နောက် သောင်းနှင့်ချီသော လယ်သမားများသည် လယ်ထွန်စက်များ၊ လှည်းများဖြင့် အန္ဒိယ၏ မြို့တော် နယူးဒေလီ (New Delhi)သို့ ချီတက်ခဲ့ကြသည်ဟု အေပီမှ ဖော်ပြခဲ့သည်။

အိန္ဒိယမြောက်ပိုင်း ပြည်နယ်များဖြစ်သည့် ဟာယာနာ (Haryana) နှင့် ပန်ဂျပ် (Punjab) ပြည်နယ်တို့တွင် လယယ်သမားများသည် အဝေးပြေးလမ်းမများပေါ်တွင် ထိုင်သပိတ်ပြုလုပ်ခဲ့ပြီး ၎င်းတို့ကို အလုပ်သမားသမဂ္ဂ များက အားပေးဝန်းရံခဲ့ကြသည်။ 

အာဏာပိုင်များကမူ ပိတ်ဆို့ထားသည့် လမ်းများကို ရှောင်ရှားပြီး ဂရုတစိုက် သွားလာကြရန် ခရီးသွားပြည်သူများ ကို ညွှန်ကြားထားသည်။

ဆန္ဒပြသူများ ဖြိုခွင်းခံနေရစဉ်

ယခုသီတင်းပတ် အစောပိုင်းမှစပြီး သောင်းနှင့်ချီသည့် လယ်သမားများသည် ၎င်းတို့၏ ကောက်ပဲသီးနှံ စျေးနှုန်း များကို အာမခံချက်ပေးရန် အစိုးရကို တောင်းဆိုသည့် အနေဖြင့် နယူးဒေလီမြို့တော်သို့ ချီတက်လာခဲ့ကြသော် လည်း ၎င်းတို့ကို နယူးဒေလီမြို့တော်သို့ မရောက်မီ ကီလိုမီတာ ၂၀၀ (၁၂၅ မိုင်) အကွာတွင် ရဲတပ်ဖွဲ့က ဟန့်တား ခဲ့သည်။

ထို့နောက် လယ်သမားများသည် ပန်ဂျပ်နှင့် ဟာယာနာပြည်နယ် နယ်စပ်တွင် ယာယီတဲများထိုးကာ စုရုံးဆန္ဒပြခဲ့ ကြပြီး ရဲတပ်ဖွဲ့က ဆန္ဒပြသူအချို့ကို ဖမ်းဆီးခဲ့သည်။

အာဏာပိုင်များက ဟာယာနာပြည်နယ်၏ အချို့နေရာ ဒေသများတွင် မိုဘိုင်း အင်တာနက်လိုင်းများကို ဖြတ်တောက်ထားပြီး ဆန္ဒပြခေါင်းဆောင်အချို့၏ လူမှုမီဒီယာ အကောင့်များကို ပိတ်ပင်ခဲ့ကာ ဆန္ဒပြသူများ အပေါ်သို့ ဒရုန်းများဖြင့် မျက်ရည်ယို ဗုံးများ ကြဲချခဲ့သည်။

ဆန္ဒပြသူများကို တွေ့ရစဉ်

ဝန်ကြီးချုပ် နရင်ဒရာမိုဒီ (Narendra Modi) သည် လယ်သမားများ၏ အလားတူ ဆန္ဒပြမှုများနှင့် ရင်ဆိုင်ခဲ့ရပြီး နောက် နှစ်နှစ်အကြာတွင် ယခု ဆန္ဒပြမှုများပေါ် ပေါက်လာခဲ့ခြင်းဖြစ်သည်။

ထိုအချိန်က လယ်သမားများသည် နယူးဒေလီမြို့တော် ဆင်ခြေဖုံး ရပ်ကွက်များတွင် တဲများထိုးပြီး စိုက်ပျိုးရေး ဥပဒေသစ်ကို ဆန့်ကျင်ကြောင်း ဆန္ဒပြခဲ့ခြင်းဖြစ်ပြီး ထိုဥပေဒကို အစိုးရက ပြန်လည်ရုပ်သိမ်းပေးခဲ့သည်။

လက်ရှိဖြစ်ပွားနေသည့် ဆန္ဒပြမှုတွင် လယ်သမားများက လယ်ယာထွက် ကောက်ပဲသီးနှံအားလုံး၏ စျေးနှုန်းကို ကာကွယ်ပေးမည့် ဥပဒေတစ်ရပ်ကို ပြဋ္ဌာန်းရန် တောင်းဆိုနေခြင်းဖြစ်သည်။

Source: အေပီ

CNI International News

မနီလာ၊ ဖေဖော်ဝါရီ ၁၆

ဖိလစ်ပိုင်ဒုတိယသမ္မတ ဆာရာဒူတာတေးကာပီယို (Sara Duterte-Carpio) သည် ၎င်း၏ဖခင်ဖြစ်သည့် သမ္မတ ဟောင်း ရိုဒရီဂိုဒူတာတေး (Rodrigo Duterte) နှင့် လက်ရှိသမ္မတ ဖာဒီနန်မားကို့စ်ဂျူနီယာ (Ferdinand Marcos Jr.) တို့အကြား မကျေလည်မှုများကို ဖြေရှင်းရန် နည်းလမ်းရှာနေရသည်ဟု အယ်လ်ဂျာဇီးယားမှ ဖော်ပြခဲ့သည်။

ပြီးခဲ့သည့်လက ဒူတာတေးသည် မားကို့စ်အား မူးယစ်ဆေးဝါးများ သုံးစွဲနေကြောင်း စွပ်စွဲခဲ့ပြီး သမ္မတကို ဖယ်ရှား ရန် စစ်အာဏာသိမ်းမည့် အစီအစဉ်များအကြောင်းကို အရိပ်အမြွက် ပြောကြားခဲ့သည်။

ထို့ပြင် ပြီးခဲ့သည့် သီတင်းပတ် အတွင်းကလည်း ဒူတာတေးသည် ၎င်း၏ မွေးရပ်ဇာတိဖြစ်ပြီး ၎င်း၏ နိုင်ငံရေး ဩဇာ သက်ရောက်သည့် ဖိလစ်ပိုင်တောင်ပိုင်းရှိ မင်ဒါနာအို (Mindanao) ပြည်နယ် ခွဲထွက်ရေးကို အဆိုပြုခဲ့ သည်။

မားကို့စ်ကမူ သူသည် မော်တော်ဆိုင်ကယ် မတော်တဆမှု ဖြစ်ပွားမှုကြောင့် ကျန်းမာရေး ပြန်လည် ကောင်းမွန် စေရန် ဘိန်းပါသည့် ဓာတုဆေးဝါးတစ်မျိုး သုံးစွဲနေမှုကို ဒူတာတေးက ရည်ရွယ်ပြောဆိုခဲ့ခြင်း ဖြစ်သည်ဟု တုန့်ပြန်ခဲ့သည်။ 

ဆာရာဒူတာတေးနဲ့ ဖခင်ဖြစ်သူ ဒူတာတေးကို တွေ့ရစဉ်

ထို့ပြင် မင်ဒါနာအိုပြည်နယ် ခွဲထွက်ရေးလှုပ်ရှားမှုများသည် အကြီးအကျယ် ကျရှုံးလိမ့်မည်ဟုလည်း မားကို့စ်က ပြောကြားခဲ့သည်။

အဆိုပါ ခွဲထွက်ရေး ကြိုးပမ်းမှုများကို အင်အားသုံးပြီး နှိမ်နင်းသွားမည်ဟု မားကို့စ်၏ အမျိုးသားလုံခြုံရေး အကြံပေးပုဂ္ဂိုလ်က သတိပေးခဲ့သည်။

ထို့ကြောင့် ဒုတိယသမ္မတ ဆာရာဒူတာတေးသည် ဖခင်ဖြစ်သူ ဒူတာတေးနှင့် ၂၀၂၂ ခုနှစ် ရွေးကောက်ပွဲတွင် မဟာမိတ်ဖွဲ့ခဲ့သည့် သမ္မတမားကို့စ်အကြား နိုင်ငံရေးအကွဲအပြဲကြားတွင် ရောက်ရှိနေပြီး ချောင်ပိတ်မိနေသည့် အခြေအနေနှင့် ရင်ဆိုင်နေရသည်ဟု ကျွမ်းကျင်သူများက ပြောကြားခဲ့သည်။

ဖိလစ်ပိုင် သမ္မတမားကို့စ်နဲ့ ဖိလစ်ပိုင် ဒုသမ္မတဆာရာဒူတာတေးကို တွေ့ရစဉ်

မကြာသေးမီကလည်း ဆာရာဒူတာတေးသည် ကွန်မြူနစ်သူပုန်များနှင့် ငြိမ်းချမ်းရေး ဆွေးနွေးပွဲများ ပြန်လည် ပြုလုပ်ရန်၊ ဖခင်ဖြစ်သူ ဒူတာတေး လက်ထက်က မူးယစ်စစ်ပွဲအကြောင်း စုံစမ်းစစ်ဆေးမှုပြုလုပ်ရန် အပါအဝင် အရေးကိစ္စအချို့တွင် မားကို့စ်နှင့် သဘောထားကွဲလွဲခဲ့သည်။

အထူးသဖြင့် ဖွဲ့စည်းပုံအခြေခံဥပဒေကို ပြင်ဆင်လိုသည့် မားကို့စ် အစိုးရအဖွဲ့၏ အားထုတ်ကြိုးပမ်းမှုများကြောင့် ဖိလစ်ပိုင်၏ ဩဇာအကြီးမားဆုံး နိုင်ငံရေးမိသားစုနှစ်ခုဖြစ်သည့် ဒူတာတေး မိသားစုနှင့် မားကို့စ် မိသားစုအကြား မဟာမိတ်ဆက်ဆံရေးတွင် အက်ကြောင်းထင်ခဲ့သည်။

မားကို့စ်ကမူ သူသည် ပြည်ပရင်းနှီးမြှုပ်နှံမှုများကို ကန့်သတ်ထားသည့် ဖွဲ့စည်းပုံကို ပြင်ဆင်လိုကြောင်း ပြောကြားခဲ့သော်လည်း ဒူတာတေးကမူ မားကို့စ်သည် နိုင်ငံ၏ လွှတ်တော်စနစ်ကို ပြင်ဆင်ပြီး ၎င်း၏ ညီဝမ်းကွဲ တော်စပ်သူ မာတင် ရိုမူယယ်ဒက်ဇ် (Martin Romualdez) ကို ၎င်းနေရာ ဆက်ခံစေရန် ကြိုးပမ်းနေခြင်း ဖြစ်သည်ဟု စွပ်စွဲခဲ့သည်။

Source: အယ်လ်ဂျာဇီးယား

CNI International News

နယူးယောက်၊ ဖေဖော်ဝါရီ ၁၆

ရုရှားနိုင်ငံသည် အာကာသအတွင်း နျူကလီးယားလက်နက်များ ထားရှိရန်အတွက် ဆွေးနွေးမှုများ ပြုလုပ်နေ သည်ဟု အမေရိကန်ထောက်လှမ်းရေး သတင်းများကို ကိုးကားပြီး ဘန်ကောက်ပို့စ်မှ ဖော်ပြခဲ့သည်။

အမေရိကန်အောက်လွှတ်တော်မှ ရီပတ်ဘလစ်ကန် အမတ်တစ်ဦးက အမျိုးအမည် မဖော်ပြထားသည့် အမျိုးသားလုံခြုံရေး ခြိမ်းခြောက်မှုတစ်ခုအတွက် လူသိရှင်ကြား သတိပေးချက် ထုတ်ပြန်ခဲ့ပြီးနောက် ထိုအကြောင်းအရာနှင့် နီးစပ်သူများက ရုရှား၏အစီအစဉ်ကို ပြောကြားခဲ့ခြင်းဖြစ်သည်။

အမေရိကန်ထောက်လှမ်းရေးက ထုတ်ပြန်ခဲ့သည့် ခြိမ်းခြောက်မှုသည် တည်ရှိနေခြင်း မရှိသေးဘဲ ရုရှားနိုင်ငံ ကလည်း အာကာသအတွင်း နျူကလီးယားလက်နက်များ ဖြန့်ကြက်ထားခြင်း မရှိသေးကြောင်း အမည်မဖော်လို သည့် အမေရိကန်အရာရှိများက ပြောကြားခဲ့သည်။

ထိုသုံးသပ်ချက်များသည် အလွန်အရေးကြီးပြီး အမေရိကန်အရာရှိများကလည်း ထိုအကြောင်းအရာအပေါ် အရေးတကြီး လုပ်ဆောင်နေကြာင်း၊ လက်ရှိအချိန်အထိ အများပြည်သူဆိုင်ရာ သတိပေးနှိုးဆော်ချက် ထုတ်ပြန် ရန် မလိုသေးကြောင်း တာဝန်ရှိသူများက ပြောကြားခဲ့သည်။

အမေရိကန်အမျိုးသားလုံခြုံရေး အကြံပေးပုဂ္ဂိုလ် ဂျိတ်ဆူလေဗန်ကို တွေ့ရစဉ်

အမေရိကန်အမျိုးသားလုံခြုံရေး အကြံပေးပုဂ္ဂိုလ် ဂျိတ်ဆူလေဗန် (Jake Sullivan) ကလည်း သူသည် အမေရိကန်အောက်လွှတ်တော် ခေါင်းဆောင်များနှင့် တွေ့ဆုံမည်ဟု ပြောကြားခဲ့သည်။

ထိုကဲ့သို့ တွေ့ဆုံရန်အတွက် ဖေဖော်ဝါရီ ၁၄ ရက်က အောက်လွှတ်တော် ထောက်လှမ်းရေးကော်မတီဥက္ကဋ္ဌ မိုက်တာနာ (Mike Turner) နှင့် ပြုလုပ်သည့် အစည်းအဝေးတွင် စီစဉ်ခဲ့ခြင်း ဖြစ်သည်ဟု ဆိုသည်။

ဆူလေဗန်သည် အောက်လွှတ်တော် ခေါင်းဆောင်များနှင့် ပြုလုပ်မည့် အစည်းအဝေးတွင် မည်သည့် အကြောင်း အရာများကို ဆွေးနွေးမည်ဆိုခြင်းကို အသေးစိတ် ပြောကြားခဲ့ခြင်းမရှိပေ။

အိုဟိုင်းယိုး (Ohio) ပြည်နယ်၏ ရီပတ်ဘလစ်ကန် အမတ်တစ်ဦးကမူ သမ္မတ ဂျိုးဘိုင်ဒန် (Joe Biden) အနေနှင့် ထိုခြိမ်းခြောက်မှုနှင့် ဆက်နွှယ်သည့် သတင်းအချက်အလက် အားလုံးကို လျှို့ဝှက်အဆင့်မှ ပယ်ဖျက်ပြီး ထုတ်ပြန်ရန် တိုက်တွန်းခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ ဖေဖော်ဝါရီ ၁၆

အကျဉ်းချခံထားရသည့် ထိုင်းဝန်ကြီးချုပ်ဟောင်း သက်ဆင် ရှင်နာဝပ် (Thaksin Shinawatra) ကို ဖေဖော်ဝါရီ ၁၈ ရက်တွင် ရဲတပ်ဖွဲ့ အထွေထွေဆေးရုံမှ စာရိတ္တပြုပြင် ထိန်းသိမ်းရေးဌာန၏ အရာရှိများထံသို့ လွှဲပြောင်း အပ်နှံသွားမည်ဟု Thai PBS World မှ ဖော်ပြခဲ့သည်။

ရဲတပ်ဖွဲ့ အထွေထွေဆေးရုံသည် သက်ဆင် ဆေးရုံမှဆင်းမည့် အချိန်အတိအကျကို စာရိတ္တပြုပြင် ထိန်းသိမ်းရေး ဌာနသို့ အကြောင်းမကြားရသေးဘဲ သက်ဆင်၏ မိသားစုဝင်များကိုပင် အကြောင်းမကြားရသေးကြောင်း ဆေးရုံ၏ပြောရေးဆိုခွင့်ရှိသူ ရဲမှူးကြီး သီရိကူလ် သီရိစန္နာ (Sirikul Srisa-nga) က ပြောကြားခဲ့သည်။

ဖြူးထိုင်းပါတီ ခေါင်းဆောင် ပေတုန်တန် ရှင်နာဝပ် (Paetongtarn Shinawatra) ကမူ ၎င်းတို့ မိသားစုဝင် အားလုံးသည် ခံဝန်ဖြင့် ပြန်လည်လွတ်မြောက်လာမည့် သက်ဆင်အား သက်ဆင်မိသားစု၏ Chan Song La နေအိမ်တွင် ကြိုဆိုသွားမည်ဖြစ်ကြောင်း ဖေဖော်ဝါရီ ၁၅ ရက်က ပြောကြားခဲ့သည်။

ပေတုန်တန်ကို တွေ့ရစဉ်

သက်ဆင်၏ ကျန်းမာရေး အခြေအနေအပေါ် မေးခွန်းထုတ်နေကြသည့် ဆန့်ကျင်သူများရှိနေသဖြင့် သက်ဆင်ထံ သို့ လာရောက်တွေ့ဆုံခွင့်များကို တားမြစ်ပိတ်ပင်ထားကြောင်း ဆေးရုံ၏ ကိုယ်စားလှယ်တစ်ဦးက ပြောကြားခဲ့ သည်။

သက်ဆင်ကို ခံဝန်ဖြင့် ပြန်လွှတ်ပေးမှုကို ဆန့်ကျင်သည့် အဖွဲ့၏ ခေါင်းဆောင်ဖြစ်သူ ဖီချစ် ချိုင်မွန်ခွန် (Phichit Chaimongkhon) ကမူ သက်ဆင်သည် ဆေးရုံမှ ဆင်းချိန်တွင် အကူအညီမပါဘဲ လမ်းလျှောက်နိုင်လိမ့်မည် ဟုတ်၊ မဟုတ်ကို သံသယရှိရကြောင်း ပြောကြားခဲ့သည်။

ထို့ပြင် ၎င်းတို့အဖွဲ့အနေနှင့် သက်ဆင် ဆေးရုံမှ မဆင်းခင်အချိန်အထိ Chamaimaruchet တံတားပေါ်တွင် စုရုံး နေထိုင် သွားမည်ဖြစ်ကြောင်း ဖီချစ်က ပြောသည်။

အသက် ၇၀ ကျော်ရှိပြီဖြစ်သည့် သက်ဆင်သည် ၎င်း၏ ကျန်းမာရေး အခြေအနေကြောင့် ခံဝန်ဖြင့် လွတ်မြောက် သည့် ကာလအတွင်း အီလက်ထရောနစ် ခြေရာခံစောင့်ကြည့်မှု လက်ပတ်ကို ဝတ်ဆင်ရန် မလိုအပ်ကြောင်း တာဝန်ရှိသူများက ပြောကြားခဲ့သည်။

Source: Thai PBS World

CNI International News

လန်ဒန်၊ ဖေဖော်ဝါရီ ၁၆

ဝန်ကြီးချုပ် ရီရှီဆူနက် လက်ထက် ၂၀၂၃ ခုနှစ် ဒုတိယနှစ်ဝက်အတွင်း ဗြိတိန်၏ စီးပွားရေးသည် စီးပွားပျက်ကပ် အတွင်းသို့ ကျဆင်းခဲ့ကြောင်း ရိုက်တာမှ ဖော်ပြခဲ့သည်။ 

အဆိုပါ စီးပွားရေး ကျဆင်းမှုသည် ယခုနှစ်ကုန်ပိုင်းတွင် ပြုလုပ်မည့် ရွေးကောက်ပွဲမတိုင်မီ စီးပွားရေးတိုးတက် အောင် လုပ်ဆောင်မည်ဟု ကတိပြုခဲ့သည့် ဝန်ကြီးချုပ် ရီရှီဆူနက် (Rishi Sunak)အတွက် ထိုးနှက်ချက်တစ်ခု ဖြစ်ခဲ့ကြောင်း ရိုက်တာမှ ဖော်ပြခဲ့သည်။

၂၀၂၃ ခုနှစ် စတုတ္ထသုံးလပတ် ကာလတွင် ဗြိတိန်၏ ဂျီဒီပီသည် မျှော်မှန်းထားသည်ထက် ပိုမိုဆိုးရွားစွာ ၀ ဒသမ ၃ ရာခိုင်နှုန်းအထိ ကျုံ့ဝင်ခဲ့ပြီး တတိယသုံးလပတ် ကာလအတွင်း ဂျီဒီပီသည် ၀ ဒသမ ၁ ရာခိုင်နှုန်း ကျုံ့ဝင်ခဲ့ သည်ဟု တရားဝင် ထုတ်ပြန်ချက်များ၌ ဖော်ပြခဲ့သည်။

ရိုက်တာသတင်းဌာနက ပြုလုပ်ခဲ့သည့် စီးပွားရေးပညာရှင်များ၏ စစ်တမ်းတွင် အောက်တိုဘာမှ ဒီဇင်ဘာအကြား ၀ ဒသမ ၁ ရာခိုင်နှုန်းထက်မနည်းသာ ကျဆင်းခဲ့သည်ဟု ဖော်ပြခဲ့သည်။

ဗြိတိန်၏ ပေါင်စတာလင်သည် ဒေါ်လာ၊ ယူရိုတို့နှင့် နှိုင်းယှဉ်ပါက တန်ဖိုးလျော့ကျခဲ့ပြီး ရင်းနှီးမြှုပ်နှံသူများ ကလည်း ဗြိတိန်ဗဟိုဘဏ်ကို ယခုနှစ်အတွင်း အတိုးနှုန်းများ လျှော့ချရန် မျှော်မှန်းထားသည်။

ဗြိတိန် ဝန်ကြီးချုပ် ရီရှီဆူနက်ကို တွေ့ရစဉ်

ထို့နောက် စီးပွားရေးလုပ်ငန်းများကလည်း မတ်လ ၆ ရက်တွင် စီစဉ်ထားသည့် ဘတ်ဂျက်အစီအစဉ်၌ အစိုးရထံမှ အကူအညီများကို တောင်းခံခဲ့ကြသည်။

"စီးပွားရေးလုပ်ငန်းတွေဟာ သူတို့ရင်ဆိုင်နေရတဲ့ အခက်အခဲတွေနဲ့ပတ်သက်ပြီး ယောင်ဝါးဝါး ဖြစ်နေခဲ့ပါတယ်။ ဒီသတင်းက အစိုးရအတွက် အချက်ပေး ခေါင်းလောင်းတစ်ခု ဖြစ်လာမှာ သေချာပါတယ်" ဟု ဗြိတိန်ကုန်သည် ကြီးများအသင်း၏ မူဝါဒရေးရာ ညွှန်ကြားရေးမှူး အဲလက်စ်ဗစ်ချ် (Alex Veitch) က ပြောကြားခဲ့သည်။

ဝန်ကြီးချုပ်အနေဖြင့် ကုမ္ပဏီများနှင့် စီးပွားရေး ဖွံ့ဖြိုးတိုးတက်ရေးအတွက် ရှင်းလင်းသေချာသည့် လမ်းကြောင်း ကို ဖော်ဆောင်ရန် သီတင်းသုံးပတ်အတွင်း ၎င်း၏ ဘတ်ဂျက်ကို အသုံးပြုရမည်ဟုလည်း ဗစ်ချ်က ပြောသည်။

ဘဏ္ဍာရေးဝန်ကြီး ဂျရမီးဟန့် (Jeremy Hunt) ကမူ ဗြိတိန်၏ စီးပွားရေးသည် ပြန်လည်ဖွံ့ဖြိုးလာသည့် အရိပ် လက္ခဏာများကို မြင်တွေ့နေရကြောင်း ပြောသည်။

ထို့အပြင် မိမိတို့အနေနှင့် စီမံချက်များအတိုင်း ဆက်လက် လုပ်ဆောင်ရမည်ဖြစ်သလို ပိုမိုခိုင်မာသည့် စီးပွားရေး ကို ထူထောင်ရန် အလုပ်များနှင့် စီးပွားရေးလုပ်ငန်းများအား အခွန်များ လျှော့ချနေကြောင်း ၎င်းက ပြောကြားခဲ့ သည်။

ဗြိတိန်နိုင်ငံကိုတွေ့ရစဉ်

ဟန့်သည် ၎င်း၏ ဘတ်ဂျက်အတွင်း ရွေးကောက်ပွဲအကြို အခွန်လျှော့ချမှုများအတွက် ငွေကြေးရရှိစေရန် အစိုးရ၏ ထောက်ပံ့မှု အစီအစဉ်များထဲမှ ဘီလျံနှင့်ချီသည့် စတာလင်ပေါင်များကို ဖြတ်တောက်ရန် ကြိုးပမ်း နေသည်ဟု မီဒီယာများက ဖော်ပြခဲ့သည်။

ဗြိတိန်အမျိုးသား စာရင်းဇယားရုံး (ONS) ကလည်း ၂၀၂၃ ခုနှစ်က စီးပွားရေးဖွံ့ဖြိုးတိုးတက်မှုသည် ၂၀၂၂ ခုနှစ်နှင့် နှိုင်းယှဉ်ပါက ၀ ဒသမ ၁ ရာခိုင်နှုန်း မြင့်တက်လာကြောင်း ဖော်ပြခဲ့သည်။

ဗြိတိန်ဗဟိုဘဏ်ကမူ ၂၀၂၄ ခုနှစ်အတွင်း စီးပွားရေး ဖွံ့ဖြိုးတိုးတက်မှု ၀ ဒသမ ၂၅ ရာခိုင်နှုန်းသာရှိနိုင်ကြောင်း ခန့်မှန်းထုတ်ပြန်ခဲ့သည်။

Source: ရိုက်တာ

CNI International News

တယ်လင်း၊ ဖေဖော်ဝါရီ ၁၅

အက်စတိုးနီးယား ဝန်ကြီးချုပ် ကာဂျာ ကယ်လက်စ် (Kaja Kallas) သည် နိုင်ငံအတွင်းရှိ ဆိုဗီယက်ခေတ် ဒုတိယကမ္ဘာစစ် အထိမ်းအမှတ် အဆောက်အအုံများကို ဖယ်ရှားရန် ကြိုးပမ်းနေသဖြင့် ရုရှားက ၎င်းအား ဖမ်းဆီးရန် အလိုရှိသူများစာရင်းတွင် ထည့်သွင်းခဲ့သည်ဟု အေပီမှ ဖော်ပြခဲ့သည်။

ယူကရိန်းစစ်ပွဲနှင့် ပတ်သက်ပြီး အနောက်နိုင်ငံများနှင့် ရုရှားအကြား တင်းမာမှုများ မြင့်တက်နေချိန်တွင် ရုရှားက အက်စတိုးနီးယား ဝန်ကြီးချုပ်ကို ဖမ်းဆီးရန် အလိုရှိသူများစာရင်းတွင် ထည့်သွင်းခဲ့ခြင်းဖြစ်သည်ဟု ရုရှားအရာရှိ တစ်ဦးက ဖေဖော်ဝါရီ ၁၃ ရက်၌ ပြောကြားခဲ့သည်။ 

ရုရှားပြည်ထဲရေးဝန်ကြီးဌာန၏ ဝက်ဘ်ဆိုက်တွင် တင်ထားသည့် ဖမ်းဆီးရန် အလိုရှိသူများစာရင်း၌ အက်စတိုးနီးယား ဝန်ကြီးချုပ်၏ အမည်ကို အထူးဖော်ပြထားခြင်း မရှိသော ပြစ်မှုဆိုင်ရာစွဲချက်များဖြင့် ထည့်သွင်းဖော်ပြခဲ့သည်။

 ဆိုဗီယက်ခေတ် ရုပ်တုတွေကို ဖယ်ရှားနေစဉ်

ရုရှား၏ လွတ်လပ်သည့် သတင်းမီဒီယာတစ်ခုဖြစ်သော Mediazona က အက်စတိုးနီးယားဝန်ကြီးချုပ်သည် ရုရှား၏ ဖမ်းဆီးရန် အလိုရှိသူများစာရင်းတွင် ပါဝင်နေကြောင်း ဖေဖော်ဝါရီ ၁၃ ရက်တွင် ပထမဆုံး သတင်း ဖော်ပြခဲ့ခြင်းဖြစ်သည်။

ကယ်လက်စ်သည် ထိုစာရင်းတွင် ပါဝင်နေသည်မှာ လနှင့်ချီ ကြာမြင့်နေပြီဖြစ်ပြီး အခြား ဘော်လ်တစ်နိုင်ငံများမှ အရာရှိများ၊ လွှတ်တော်အမတ်များလည်း ပါဝင်နေသည်ဟု Mediazona က ဖော်ပြခဲ့သည်။

ရုရှားအရာရှိများကမူ ကယ်လက်စ်သည် ဒုတိယကမ္ဘာစစ် အထိမ်းအမှတ် အဆောက်အအုံများကို ဖယ်ရှားရန် အားထုတ်ကြိုးပမ်းမှုများကြောင့် ဖမ်းဆီးရန် အလိုရှိသူများစာရင်းထဲတွင် ပါဝင်နေခြင်းဖြစ်သည်ဟု ပြောကြား ခဲ့သည်။

ယူကရိန်းသမ္မတ ဇာလန်းစကီးနဲ့ အက်စတိုးနီးယား ဝန်ကြီးချုပ် ကာဂျာကယ်လက်စ်ကို တွေ့ရစဉ်

ကယ်လက်စ်ကမူ ရုရှား၏ ထိတ်လန့်ကြောက်ရွံ့မှုကို အသုံးပြုသည့် နည်းဗျူဟာကို အရေးမထားလောက်ကြောင်း ပြောကြားခဲ့သည်။

“ရုရှားအနေနဲ့ ဖမ်းဆီးဖို့ အလိုရှိတဲ့ စာရင်းမှာ ထည့်သွင်းလိုက်ရုံနဲ့ အက်စတိုးနီးယားကို နုတ်ဆိတ်အောင် လုပ်နိုင် လိမ့်မယ်လို့ ယုံကြည်နေပါတယ်။ ဒါပေမယ့် ကျမကတော့ ရေငုံနှုတ်ပိတ် မနေပါဘူး။ ကျမအနေနဲ့ ယူကရိန်းကို ထောက်ခံကြောင်း ဆက်လက် ပြောကြားနေပြီး ဥရောပရဲ့ ကာကွယ်ရေးကို မြှင့်တင်ဖို့ ဆက်လက် လုပ်ဆောင် သွားမှာပါ”ဟု ကယ်လက်စ်က ပြောကြားခဲ့သည်။

နေတိုးအဖွဲ့ဝင် နိုင်ငံများဖြစ်သည့် လစ်ဗီးယားနှုင့် လစ်သူယေးနီးယားနိုင်ငံများသည် ၎င်းတို့ နိုင်ငံအတွင်းရှိ ဆိုဗီယက်ခေတ် အထိမ်းအမှတ် အဆောက်အအုံများကို ဖယ်ရှားခဲ့ပြီးနောက် အက်စတိုးနီးယားနိုင်ငံကလည်း ထိုကဲ့သို့ လုပ်ဆောင်ရန် ကြိုးပမ်းခဲ့ခြင်းဖြစ်သည်။

Source: အေပီ

CNI International News

၂၀၂၄ ခုနှစ်၊ ဖေဖော်ဝါရီ ၁၅

အင်ဒိုနီးရှားနိုင်ငံတွင် ဖေဖော်ဝါရီ ၁၄ ရက်က ကျင်းပခဲ့သည့် သမ္မတရွေးကောက်ပွဲ၌ တရားဝင်ကြေညာခြင်း မရှိသေးသော မဲရလဒ်များအရ ကာကွယ်ရေးဝန်ကြီး ပရာဘိုဝို ဆူဘီယန်တို (Prabowo Subianto)က မိမိ အနိုင်ရရှိကြောင်း ကြေညာခဲ့သည်ဟု ရိုက်တာမှ ဖော်ပြခဲ့သည်။

နိုင်ငံရေး အတွေ့အကြုံ ရင့်ကျက်ပြီး အထူးတပ်ဖွဲ့၏ တပ်မှူးဟောင်းဖြစ်သည့် ပရာဘိုဝိုသည် နိုင်ငံတစ်ဝန်းရှိ မဲရုံများတွင် မဲရေတွက်မှုများအပေါ် အခြေခံပြီး ထောက်ခံမဲ စုစုပေါင်း ၅၈ ရာခိုင်နှုန်း ရရှိခဲ့သည်ဟု ရွေးကောက်ပွဲ မဲရလဒ်များ စစ်တမ်းကောက်ယူသည့် အဖွဲ့ ၄ ဖွဲ့က ဖော်ပြခဲ့သည်။

အင်ဒိုနီးရှား သမ္မတရွေးကောက်ပွဲ ကိုယ်စားလှယ်လောင်းများကို တွေ့ရစဉ်

ဂရင်းနစ်စံတော်ချိန် အနေဖြင့် ဖေဖော်ဝါရီ ၁၄ ရက် မွန်းလွဲ ၁၂ နာရီ ၃၃ မိနစ်အချိန်အထိ မဲရုံများတွင် မဲအရေ အတွက် ၇၈ ရာခိုင်နှုန်းမှ ၉၃ ရာခိုင်နှုန်းအကြား ရေတွက်ပြီးစီးခဲ့ပြီဖြစ်သည်။

သို့သော် ရွေးကောက်ပွဲ အနိုင်ရရှိကြောင်း ကြေညာထားသည့် ပရာဘိုဝိုကမူ အကောင်းဆုံး အင်ဒိုနီးရှားနိုင်ငံသား များ ပါဝင်သည့် အစိုးရအဖွဲ့ကို ဖွဲ့စည်းသွားမည်ဖြစ်ကြောင်း ထောက်ခံသူများကို ကတိပြုပြောကြားခဲ့သည်။

ထို့နောက် ယခုအောင်ပွဲသည် ပြည်သူအားလုံး၏ အောင်ပွဲဖြစ်ကြောင်း ၎င်းက ပြောကြားခဲ့သည်။

Source: ရိုက်တာ

CNI International News

ဝါရှင်တန်၊ ဖေဖော်ဝါရီ ၁၅

အမေရိကန်သမ္မတ ဂျိုးဘိုင်ဒန် (Joe Biden) သည် နေတိုးအဖွဲ့အား ဝေဖန်ခဲ့သည့် သမ္မတဟောင်း ဒေါ်နယ်ထရမ့် (Donald Trump) ၏ မှတ်ချက်စကားများကို ရှုတ်ချခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ဘိုင်ဒန်က ၂၀၂၄ ခုနှစ် သမ္မတရွေးကောက်ပွဲတွင် ၎င်း၏ ပြိုင်ဘက် ဖြစ်လာနိုင်ခြေရှိသည့် ထရမ့်သည် အန္တရာယ် ကြီးမားပြီး အမေရိကန် မဆန်သူဖြစ်ကြောင်း ပြောကြားခဲ့သည်။

ထို့ကြောင့် လွှတ်တော်တွင် ယူကရိန်းအား အကူအညီပေးမည့် ဥပဒေမူကြမ်းနှင့်ပတ်သက်ပြီး သဘောထား ကွဲလွဲနေသည့် ၎င်းတို့နှစ်ဦးအကြား တင်းမာမှုများကို ပိုမိုမြင့်တက်စေခဲသည်။

နေတိုးမဟာမိတ်များ တိုက်ခိုက်ခံရမည်ဆိုပါက အမေရိကန်က ထောက်ပံ့ပေးမည် ဟုတ်၊ မဟုတ်ကို မေးခွန်းထုတ် စရာဖြစ်နေကြောင်း ထရမ့်က ပြီးခဲ့သည့် သီတင်းပတ်ကုန်တွင် ပြောကြားခဲ့သည်။

 ထိုပြောကြားချက်ကို ဘိုင်ဒန်က ဖေဖော်ဝါရီ ၁၃ ရက်တွင် ရှုတ်ချခဲ့ခြင်းဖြစ်သည်။

နေတိုးကို တွေ့ရစဉ်

ထရမ့်၏ မှတ်ချက်စကားများကြောင့် ရုရှားကို တိုက်ခိုက်နေသည့် ယူကရိန်းအား အကူအညီပေးရန် တောင်းဆို ထားသော ထောက်ပံ့ရေး အစီအစဉ်ကို လွှတ်တော်က အတည်ပြုရေးသည် ပိုမိုအရေးကြီး လာစေခဲ့သည်ဟု ဘိုင်ဒန်က ပြောသည်။ 

“ဒီဥပဒေမူကြမ်းကို အထက်လွှတ်တော်က အတည်မပြုခင်မှာ အမေရိကန်ရဲ့ လုံခြုံရေးအတွက် လောင်းကြေးတွေ ဟာ မြင့်မားနေခဲ့ပါတယ်။ ဒါပေမယ့် မကြာသေးခင် ရက်တွေမှာတော့ အဲဒီလောင်းကြေးတွေဟာ ပိုပြီး မြင့်မားလာ ခဲ့ပါတယ်။ ဘာလို့လဲဆိုတော့ သမ္မတဟောင်း (ထရမ့်)ဟာ အန္တရာယ်ကြီးပြီး အမေရိကန်မဆန်တဲ့ မှတ်ချက်စကား တွေကို ကမ္ဘာကသိအောင် ပြောကြားခဲ့လို့ပါပဲ” ဟု ဘိုင်ဒန်က ပြောသည်။

ဘိုင်ဒန်သည် ဖေဖော်ဝါရီ ၁၀ ရက်က တောင်ကာရိုလိုင်းနား (South Carolina) ပြည်နယ်တွင် ပြုလုပ်ခဲ့သည့် လူထုစည်းရုံးတွေ့ဆုံပွဲ၌ နေတိုးအဖွဲ့ဝင်ထဲမှ ဆိုးသွမ်းသော နိုင်ငံများကို ရုရှားက တိုက်ခိုက်ခဲ့မည်ဆိုပါက ၎င်း အနေဖြင့် ကာကွယ်ပေးမည် မဟုတ်ကြောင်း ပြောကြားခဲ့သည်။

အမေရိကန်သမ္မတဟောင်း ဒေါ်နယ်ထရမ့်ကို တွေ့ရစဉ်

“ကျနော် သင့်ကို ကာကွယ်ပေးမှာ မဟုတ်ပါဘူး။ ဒါအပြင် သူတို့ (ရုရှား)ကို သူတို့စိတ်ကြိုက် တိုက်ခိုက်ဖို့ကို တောင် အားပေးသွားဦးမှာပါ။ သင်အပြစ်လုပ်ထားရင် ပြန်ပေးဆပ်ရမှာပဲ”ဟု ထရမ့်က ပြောကြားခဲ့သည်။

ဘိုင်ဒန်ကမူ ထရမ့်၏ အဆိုပါ မှတ်ချက်စကားများသည် အမေရိကန်၏ မဟာမိတ်များကို ကျူးကျော်တိုက်ခိုက်ရန် ရုရှားအား ဖိတ်ခေါ်နေသလို ဖြစ်နေသည်ဟု ပြောကြားခဲ့သည်။

“အမေရိကန်သမ္မတဟောင်း တစ်ယောက်က အဲဒီလိုပြောလိမ့်မယ်လို့ သင်တို့အနေနဲ့ တွေးတောင် တွေးကြည့်ဖူးပါ့ မလား။ အဲဒီစကားကို တစ်ကမ္ဘာလုံးက ကြားသွားခဲ့ပါပြီ။ သူပြောတဲ့ အဓိပ္ပာယ်က အဆိုးရွားဆုံးပါပဲ”ဟု ဘိုင်ဒန်က ပြောကြားခဲ့သည်။

Source: အယ်လ်ဂျာဇီးယား

CNI International News

ကိယက်ဗ်၊ ဖေဖော်ဝါရီ ၁၅

ပင်လယ်နက် (Black Sea)အတွင်းရှိ ရုရှား၏ ကမ်းတက်သင်္ဘောတစ်စင်းကို ရေတပ်ဒရုန်းတစ်စင်းဖြင့် တိုက်ခိုက် ပြီး နှစ်မြှုပ်ပစ်နိုင်ခဲ့သည်ဟု ယူကရိန်းစစ်တပ်က ဖေဖော်ဝါရီ ၁၄ ရက်တွင် ပြောကြားခဲ့ကြောင်း အေပီမှ ဖော်ပြခဲ့ သည်။

၂၀၁၄ ခုနှစ်က ရုရှားတို့ သိမ်းပိုက်ခဲ့သည့် ခရိုင်းမီးယားကျွန်းဆွယ် (Crimean Peninsula) ၏ တောင်ဘက်စွန်း အလူပကာ (Alupka) မြို့အနီးတွင် ရုရှား၏ Ceasar Kunikov ကုန်း/ရေ နှစ်သွယ်သုံးသင်္ဘောကို တိုက်ခိုက် နှစ်မြှုပ်ခဲ့ခြင်းဖြစ်ကြောင်း ယူကရိန်းစစ်ဦးစီးချုပ်က ပြောကြားခဲ့သည်။

သို့သော်လည်း ရုရှားအာဏာပိုင်များကမူ ယူကရိန်း၏ ပြောကြားချက်ကို အတည်ပြုခဲ့ခြင်းမရှိပေ။

ယူကရိန်းစစ်တပ်ကို တွေ့ရစဉ်

ယူကရိန်း၏ ပြောကြားချက်အရ နစ်မြုပ်သွားခဲ့သည့် ရုရှားသင်္ဘောသည် သင်္ဘောသား ၈၇ ဦးကို တင်ဆောင်နိုင် ကြောင်း သိရသည်။

သင်္ဘောနှစ်မြှုပ်ခံရမှုသည် ရုရှား၏ ပင်လယ်နက် စစ်သင်္ဘောအုပ်စုအတွက် ကြီးမားသည့် ထိုးနှက်ချက်တစ်ခု ဖြစ်ပြီး ရုရှား၏ ကျူးကျော်စစ် စတင်ခဲ့သည့် ၂၀၂၂ ခုနှစ်၊ ဖေဖော်ဝါရီ ၂၄ ရက်တွင် ကျရောက်မည့် ၂ နှစ်ပြည့် နှစ်ပတ်လည်မတိုင်မီ ၁၀ ရက်အလို၌ ယူကရိန်း၏ ကြီးမားသည့် အောင်မြင်မှု တစ်ခုဖြစ်သည်။

ယူကရိန်းသည် လက်နက်ခဲယမ်းများနှင့် စစ်မှုထမ်းအင်အား နည်းပါးလာသဖြင့် လက်ရှိတွင် ခံစစ်အနေအထားဖြင့် တိုက်ခိုက်နေရသော်လည်း ကီလိုမီတာ ၁၅၀၀ (မိုင် ၉၃၀) အရှည်ရှိသည့် ရှေ့တန်းစစ်မြေပြင်၌  တိုက်ခိုက်မှုများ ကို ဆက်လက် လုပ်ဆောင်လျက်ရှိသည်။
ပင်လယ်နက်တွင် ရုရှားသင်္ဘောတစ်စင်းကို နှစ်မြှုပ်နိုင်ခဲ့ကြောင်း ယူကရိန်း၏ ပြောကြားချက်သည် သီတင်း နှစ်ပတ်အတွင်း ဒုတိယအကြိမ်မြောက် ဖြစ်သည်။

ကမ်းခြေ လေ့ကျင့်မှု တစ်ခုကိုတွေ့ရစဉ်

ပြီးခဲ့သည့် သီတင်းပတ်ကလည်း ယူကရိန်းသည် ရုရှား၏ ဒုံးကျည်တပ်ဆင်ထားသည့် Ivanovets သင်္ဘောကို ရေတပ်ဒရုန်းတစ်စင်းဖြင့် ပစ်ခတ်နှစ်မြှုပ်ခဲ့သည့် ဗွီဒီယိုဖိုင်ကို အင်တာနက်တွင် ဖော်ပြခဲ့သည်။ 

ယူကရိန်း စစ်ထောက်လှမ်းရေးအဖွဲ့ (GUR) ၏ ထုတ်ပြန်ချက်တွင် ယူကရိန်း၏ အထူးစစ်ဆင်ရေးအဖွဲ့ဖြစ်သည့် Group 13 သည် ဖေဖော်ဝါရီ ၁၄ ရက်က Magura V5 ရေကြောင်းတိုက်ခိုက်ရေး ဒရုန်းများကို အသုံးပြုပြီး ရုရှား၏ Ceasar Kunikov သင်္ဘောအား တိုက်ခိုက်ခဲ့ကြောင်း ဖော်ပြခဲ့သည်။

ဖေဖော်ဝါရီ ၁ ရက်က ရုရှား၏ Ivanovets စစ်သင်္ဘောကို တိုက်ခိုက်မှုကိုလည်း ထိုအဖွဲ့ကပင် လုပ်ဆောင်ခဲ့ခြင်း ဖြစ်သည်ဟု ယူကရိန်းအာဏာပိုင်များက ထုတ်ပြန်ခဲ့သည်။

Source: အေပီ