CNI International News

နယူးဒေလီ၊ စက်တင်ဘာ ၂

အိန္ဒိယသည် ၎င်း၏ နျူကလီးယားအင်အားကို ချဲ့ထွင်သည့် အနေဖြင့် ပဲ့ထိန်းစနစ်တပ် နျူကလီးယာ ဒုံးကျည် ပစ်လွှတ်နိုင်သော ဒုတိယမြောက် ရေငုပ်သင်္ဘောကို ရေတပ်စစ်သင်္ဘော အုပ်စုအတွင်း ထပ်မံထည့်သွင်းခဲ့သည်ဟု Nikkei Asia မှ ဖော်ပြခဲ့သည်။

INS Arighaat အမည်ရှိ ထိုနျူကလီးယား ရေငုပ်သင်္ဘောသည် ဩဂုတ် ၂၉ ရက်က ဝိသာခါ ပတ္တနမ် (Visakha patnam) မြို့ရှိ အိန္ဒိယရေတပ်တွင် တပ်တော်ဝင် အခမ်းအနားဖြင့် ဝင်ရောက်ခဲ့ခြင်းဖြစ်သည်။

ထိုရေငုပ်သင်္ဘောကို အနည်းငယ်ကြာ စမ်းသပ် အသုံးပြုခဲ့ပြီးနောက် ရေတပ်သို့ လွှဲပြောင်း အပ်နှံခဲ့ခြင်းဖြစ်သည်။ 

INS Arighaat ရေငုပ်သင်္ဘောသည် ၂၀၁၆ ခုနှစ်က တပ်တော်ဝင်ခဲ့သည့် INS Arighant ရေငုပ်သင်္ဘောပြီးလျှင် ဒုတိယမြောက် နျူကလီးယားဒုံးကျည်တပ် ရေငုပ်သင်္ဘောဖြစ်သည်။

Arighant အမျိုးအစား ရေငုပ်သင်္ဘောသည် အိန္ဒိယ၏ နျူကလီးယား အဟန့်အတားကို မြှင့်တင်မှု၊ ဒေသတွင်း မဟာဗျူဟာမြောက် ငြိမ်းချမ်းရေးနှင့် ဟန်ချက်ညီမှုကို ထူထောင်ရာတွင် အကောက်အကူ ဖြစ်စေမှု၊ နိုင်ငံ၏ လုံခြုံရေကဏ္ဍတွင် အဓိကနေရာမှပါဝင်မှု အစရှိသည့် အကျိုးကျေးဇူးများကို မြင့်တက်စေလိမ့်မည်ဖြစ်ကြောင်း အိန္ဒိယကာကွယ်ရေးဝန်ကြီး ရာဂျ်နက်သ် ဆင်း (Rajnath Singh) က ပြောကြားခဲ့သည်။

အိန္ဒိယကာကွယ်ရေးဝန်ကြီး ရာဂျ်နက်သ်ဆင်းကို တွေ့ရစဉ်

အလေးချိန် တန် ၆၀၀၀ ရှိသည့် INS Arighaat ရေငုပ်သင်္ဘောသည် ကီလိုမီတာ ၇၅၀ အကွာအဝေးအထိ ပစ်ခတ် ရောက်ရှိနိုင်သည့် K-15 နျူကလီးယား ပဲ့ထိန်းဒုံးကျည်များကို တပ်ဆင်နိုင်ပြီး အင်ဒို-ပစိဖိတ်ဒေသတွင် ကင်းလှည့် မှုများ ပြုလုပ်မည်ဖြစ်သည်။

ထိုနျူကလီးယား သင်္ဘောများကြောင့် အိန္ဒိယသည် နျူကလီးယား လက်နက်များကို မြေပြင်၊ ရေပြင်နှင့်ဝေဟင်တို့ မှတစ်ဆင့် ပစ်လွှတ်နိုင်မည့် စွမ်းဆောင်ရည်ကို မြင့်တက်စေခဲ့သည်။

ထိုနျူကလီးယား စွမ်းအင်သုံး ပဲ့ထိန်းစနစ်တပ် ရေငုပ်သင်္ဘောနှစ်စင်းသည် အင်ဒို-ပစိဖိတ်ဒေသကို ဗဟိုပြုသည့် ဒေသတွင်း အိန္ဒိယ၏ အခန်းကဏ္ဍကို ပိုမိုမြင့်တက်စေလိမ့်မည်ဖြစ်ပြီး အိန္ဒိယရေတပ်၏ အင်အားကို ပိုမို ကောင်းမွန် လာစေမည်ဖြစ်ကြောင်း Hindustan Times မှ ဖော်ပြခဲ့သည်။

နျူကလီးယား စွမ်းအင်သုံး ပဲ့ထိန်းစနစ်တပ် ရေငုပ်သင်္ဘောများ ပိုမိုများပြားလာမှုသည် အိန္ဒိယ၏ နျူကလီးယား အဟန့်အတားကို မြင့်တက်စေသော်လည်း ထိုကဲ့သို့ ကြီးမားသည့် လက်နက်အင်အားကို ကိုင်စွဲထားမှုအတွက် တာဝန်ယူမှု၊ တာဝန်ခံမှုလည်း ပိုမိုကြီးမားကြောင်း ဘေကျင်း (Beijing) အခြေစိုက် အမည်မဖော်လိုသည့် စစ်ရေးကျွမ်းကျင်သူ တစ်ဦးက ပြောကြားခဲ့သည်။

Source: Nikkei Asia

CNI International News

မနီလာ၊ စက်တင်ဘာ ၂

တောင်တရုတ်ပင်လယ်တွင် တရုတ်ကမ်းခြေစောင့်တပ်ဖွဲ့များသည် သင်္ဘောချင်းတိုက်မိစေရန် လုပ်ဆောင်နေ ကြောင်း ဖိလစ်ပိုင်က ဩဂုတ် ၃၁ ရက်တွင် စွပ်စွဲခဲ့ပြီးနောက် ဂျပန်နှင့် အမေရိကန်တို့က ဖိလစ်ပိုင်ကို ထောက် ခံကြောင်း ပြောကြားခဲ့ကြသည်ဟု ဘန်ကောက်ပို့စ်မှ ဖော်ပြခဲ့သည်။

တောင်တရုတ်ပင်လယ်အတွင်းရှိ ပိုင်ဆိုင်မှု အငြင်းပွားနေသည့် ဆာဘီနာ သောင်ခုံ (Sabina Shoal) အနီးတွင် တရုတ်နှင့်ဖိလစ်ပိုင် သင်္ဘောများ တိုက်မိခဲ့သည်။

ထိုဖြစ်စဉ်အတွက် တရုတ်နှင့်ဖိလစ်ပိုင်တို့က အပြန်အလှန် အပြစ်တင်လျက်ရှိသည်။

ဖိလစ်ပိုင်ကမ်းခြေစောင့်တပ်ဖွဲ့ကမူ ထိုဖြစ်စဉ်တွင် ၎င်းတို့၏ သင်္ဘောတစ်စင်း ထိခိုက်သွားကြောင်း ပြောကြားခဲ့ သည်။

တောင်တရုတ်ပင်လယ်မှာ တရုတ်ကမ်းခြေစောင့်တပ်ဖွဲ့နဲ့ ဖိလစ်ပိုင် သင်္ဘောတိုက်မိစဉ်

တောင်တရုတ်ပင်လယ်အရေးတွင် အဓိကနေရာမှ ပါဝင်နေသည့် ဂျပန်အနေဖြင့် ဩဂုတ် ၃၁ ရက်က ဖြစ်ပွားခဲ့ သော သင်္ဘောချင်းတိုက်မိခဲ့သည့် ဖြစ်စဉ် အပါအဝင် ထိုဖြစ်စဉ်များ ထပ်ကာထပ်ကာ ဖြစ်ပွားနေမှုအတွက် အလွန်စိုးရိမ်ကြောင်း ဖိလစ်ပိုင်နိုင်ငံဆိုင်ရာ ဂျပန်သံအမတ် ကာဇူယာ အန်ဒို (Kazuya Endo) က X လူမှုမီဒီယာ တွင် ဖော်ပြခဲ့သည်။

"ဂျပန်အနေနဲ့ ရှိရင်းစွဲ အနေအထားကို အင်အားသုံးပြီး တစ်ဖက်သတ် ပြောင်းလဲမယ့် ဘယ်လိုအားထုတ် ကြိုးပမ်း မှုကိုမဆို ဆန့်ကျင်ကန့်ကွက်ပြီး ပင်လယ်ပြင် တရားဥပဒေစိုးမိုးရေးကို ထိန်းသိမ်းပြီး ဖိလစ်ပိုင်ဘက်က ရပ်တည် နေပါတယ်" ဟု အန်ဒိုက ပြောကြားခဲ့သည်။

အမေရိကန်နိုင်ငံခြားရေးဝန်ကြီးဌာန၏ ဩဂုတ် ၃၁ ရက် ထုတ်ပြန်ချက်တွင်လည်း တရုတ်သည် ဖိလစ်ပိုင်၏ တရားဝင် ပင်လယ်ရေကြောင်း လှုပ်ရှားသွားလာမှုကို ဆန့်ကျင်သည့် အန္တရာယ်များပြီး တင်းမာမှု မြင့်တက်စေ သော လုပ်ရပ်များကို လုပ်ဆောင်နေကြောင်း ဝေဖန်ရှုတ်ချခဲ့သည်။

ဂျပန်၊ ဖိလစ်ပိုင်နဲ့အမေရိကန် ခေါင်းဆောင်များကိုတွေ့ရစဉ်

နယ်မြေပိုင်ဆိုင်မှုများနှင့် ပတ်သက်ပြီး တရုတ်၏ တရားမဝင် ကြေညာချက်များနှင့် ထိုကြေညာချက်များကို တရားဝင်စေရန် ကြိုးပမ်းမှုသည် နိုင်ငံအားလုံး၏ လွတ်လပ်စွာ ရေကြောင်းသွားလာခွင့်နှင့် လေယာဉ်ပျံသန်း ခွင့်များကို ခြိမ်းခြောက်နေကြောင်း အမေရိကန်က ဝေဖန်ခဲ့သည်။

ဖိလစ်ပိုင်နိုင်ငံဆိုင်ရာ အမေရိကန်သံအမတ် မယ်ရီကေး ကာလ်ဆင် (MaryKay Carlson) ကလည်း ဖိလစ်ပိုင် သင်္ဘောကို ရည်ရွယ်ချက်ရှိရှိ ဝင်တိုက်မှု အပါအဝင် နိုင်ငံတကာဥပဒေကို မကြာခဏ ချိုးဖောက်နေသည့် တရုတ် ၏ အန္တရာယ်များသော လုပ်ဆောင်ချက်များကို အမေရိကန်အစိုးရက ရှုတ်ချကြောင်း X လူမှုမီဒီယာတွင် ရေးသား ဖော်ပြခဲ့သည်။

ယခုဖြစ်စဉ် မတိုင်မီ ယခင်က ဖိလစ်ပိုင်ကို ထောက်ခံကြောင်း ပြောကြားခဲ့သည့် ဂျပန်သံအမတ်၏ မှတ်ချက်များ နှင့် ပတ်သက်ပြီး ဖိလစ်ပိုင်နိုင်ငံရှိ တရုတ်သံရုံးက တုန့်ပြန်ရာတွင် တရုတ်ကို အကြောင်းမဲ့ စွပ်စွဲချက်များနှင့် ပတ်သက်ပြီး ဆန့်ကျင်ကန့်ကွက်ကြောင်း သံတမန်ရေးရာ ကန့်ကွက်လွှာကို ဂျပန်သံရုံးအား ပေးပို့ခဲ့ကြောင်း တရုတ်က ပြောကြားခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ စက်တင်ဘာ ၂

ထိုင်းနိုင်ငံတွင် အာဏာရ ဖြူးထိုင်းပါတီ ဦးဆောင်သည့် ညွန့်ပေါင်းအဖွဲ့ကို ဖျက်သိမ်းရန်အတွက် အမည်မဖော် လိုသူတစ်ဦးက တောင်းဆိုခဲ့သည်ဆိုသည့် အသနားခံစာကို မရရှိသေးကြောင်း ရွေးကောက်ပွဲကော်မရှင်ဥက္ကဋ္ဌ အစ်တီပွန်း ဘွန်ပရာကွန် (Ittiporn Boonpracong) က ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

မစ္စတာအစ်တီပွန်းသည် ရတ်ချာဘူရီ (Ratchaburi) ပြည်နယ်သို့ စက်တင်ဘာ ၁ ရက်က သွားရောက်ခဲ့သည့် ခရီးစဉ်အတွင်း ထိုကဲ့သို့ ပြောကြားခဲ့ခြင်း ဖြစ်သည်။ 

အစောပိုင်း ထွက်ပေါ်ခဲ့သည့် သတင်းများအရ ဖြူးထိုင်းပါတီကို ဖျက်သိမ်းရန် တောင်းဆိုမှုရှိကြောင်း ဖော်ပြခဲ့ သော်လည်း ထိုတောင်းဆိုချက်ရှိခဲ့သည်ဟု ရွေးကောက်ပွဲကော်မရှင်ရုံးက ၎င်းအား အကြောင်းကြားခဲ့ခြင်း မရှိကြောင်း အစ်တီပွန်းက ပြောသည်။

အကယ်၍ ထိုကဲ့သို့သော တိုင်ကြားစာ သို့မဟုတ် အသနားခံစာကို ရရှိခဲ့မည်ဆိုပါက ထိုအမှုကို စဉ်းစားသုံးသပ် သွားမည်ဖြစ်ပြီး စုံစမ်းစစ်ဆေးရေးကော်မတီ ဖွဲ့စည်းသွားမည်ဟုလည်း ၎င်းက ဆိုသည်။

ရွေးကောက်ပွဲကော်မရှင်ဥက္ကဋ္ဌ အစ်တီပွန်း ဘွန်ပရာကွန်ကို တွေ့ရစဉ်

အမည်မဖော်လိုသူတစ်ဦးက အသနားခံစာ တင်သွင်းခဲ့မည်ဆိုသည့်တိုင် စုံစမ်းစစ်ဆေးမှုကို လုပ်ဆောင်မည်ဟု အစ်တီပွန်းက ပြောသည်။

ပြီးခဲ့သည့် သီတင်းပတ်အတွင်း ဖြူးထိုင်းပါတီ လွှတ်တော်အမတ်များ၏ အကြီးအကဲ ဝီဆွတ် ချိုင်နာရမ် (Wisuth Chainarun) က ရွေးကောက်ပွဲကော်မရှင်သည် ဖွဲ့စည်းပုံ အခြေခံဥပဒေဆိုင်ရာခုံရုံးတွင် ဖြူးထိုင်းပါတီကို ဖျက်သိမ်းရန် အသနားခံစာဖြင့် ကြိုးပမ်းနေသည်ကို သတိပြုမိကြောင်း ပြောကြားခဲ့သည်။

ထိုအသနားခံစာကို မည်သူ သို့မဟုတ် မည်သည့်အဖွဲ့က တင်သွင်းခဲ့သည်ဆိုခြင်းကိုမူ ဖော်ပြထားခြင်းမရှိဘဲ ဩဂုတ် ၁၉ ရက်က တင်သွင်းခဲ့ခြင်းဖြစ်သည်။

ဖြူးထိုင်းပါတီသည် ပါတီဝင် မဟုတ်တော့သည့် ဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) ၏ ဩဇာလွှမ်းမိုးမှုကို ခွင့်ပြုထားကြောင်း အသနားခံစာတွင် ဖော်ပြထားသည်ဟု ဆိုသည်။

ထို့ပြင် ထိုအသနားခံစာတွင် ပါတီဝင် မဟုတ်တော့သည့် လူပုဂ္ဂိုလ်တစ်ဦးက ပါတီကို ထိန်းချုပ်နေခြင်းသည် တရားမဝင်ကြောင်း ဖော်ပြထားသည့် နိုင်ငံရေးပါတီများဆိုင်ရာ အခြေခံဥပဒေကို ရည်ညွှန်းပြီး တိုင်ကြားခဲ့ခြင်း ဖြစ်သည်ဟု အစောပိုင်း ထွက်ပေါ်ခဲ့သော သတင်းများ၌ ဖော်ပြထားသည်။

Source: ဘန်ကောက်ပို့စ်

CNI International News

မနီလာ၊ ဩဂုတ် ၃၁

ဖိလစ်ပိုင်နှင့် ဗီယက်နမ်နိုင်ငံတို့သည် ပင်လယ်ရေကြောင်း လုံခြုံရေးအတွက် ပူးပေါင်းဆောင်ရွက်မှုများကို မြှင့်တင်ရေး အပါအဝင် ကာကွယ်ရေးနှင့် စစ်ဘက်ဆက်ဆံရေးများကိုလည်း တိုးမြှင့်ရန် ဩဂုတ် ၃၀ ရက်က သဘောတူခဲ့ကြောင်း ရိုက်တာမှ ဖော်ပြခဲ့သည်။

ဖိလစ်ပိုင်နှင့် ဗီယက်နမ်သည် တောင်တရုတ်ပင်လယ်တွင် တရုတ်၏ လှုပ်ရှားမှုများနှင့် ကာလကြာရှည် ရင်ဆိုင် နေရချိန်၌ ယခုကဲ့သို့ ကြီးမားသည့် စစ်ဘက်ဆက်ဆံရေးများ တိုးမြှင့်ရန် သဘောတူခဲ့ခြင်းဖြစ်သည်။

ဗီယက်နမ် ကာကွယ်ရေးဝန်ကြီး ဖန်ဗန်ဂျီအန် (Phan Van Giang) သည် ဖိလစ်ပိုင်သမ္မတ ဖာဒီနန်မားကို့စ် ဂျူနီယာ (Ferdinand Marcos Jr) ၏ ဖိတ်ကြားချက်ဖြင့် ဖိလစ်ပိုင်သို့ ပထမဆုံးခရီးစဉ်အဖြစ် ရောက်ရှိလာခဲ့ ခြင်းဖြစ်သည်။

ထို့နောက် မနီလာ (Manila) မြို့တော်တွင် ဖိလစ်ပိုင် ကာကွယ်ရေးဝန်ကြီး ဂျီလ်ဘာတို တီအိုဒိုရို (Gilberto Teodoro) နှင့် ဆွေးနွေးမှုများ ပြုလုပ်ခဲ့သည်။

"နှစ်နိုင်ငံ ကာကွယ်ရေးဝန်ကြီးတွေဟာ အလွှာပေါင်းစုံ ထိတွေ့ဆက်ဆံမှုတွေကတစ်ဆင့် ကာကွယ်ရေးနဲ့ စစ်ဘက် ပူးပေါင်းဆောင်ရွက်ရေးကို မြှင့်တင်ဖို့ ကတိပြုခဲ့ကြပါတယ်" ဟု ဖိလစ်ပိုင်ကာကွယ်ရေးဝန်ကြီးဌာနက ထုတ်ပြန်ခဲ့သည်။

ဖိလစ်ပိုင်နဲ့ဗီယက်နမ် ကာကွယ်ရေး၀န်ကြီးများကိုတွေ့ရစဉ်

နှစ်နိုင်ငံအကြား ကာကွယ်ရေး ပူးပေါင်းဆောင်ရွက်မှု စာချုပ်ကို ယခုနှစ်မကုန်မီ ချုပ်ဆိုရန် မျှော်မှန်းထားကြောင်း တီအိုဒိုရိုက ဂျီအန်နှင့် ဆွေးနွေးပွဲအပြီးတွင် ပြောကြားခဲ့သည်။

ထို့ပြင် တောင်တရုတ်ပင်လယ်တွင် ငြိမ်းချမ်းရေး၊ တည်ငြိမ်းရေး၊ ဘေးကင်းလုံခြုံမှုနှင့် လွတ်လပ်စွာ ရေကြောင်း သွားလာမှု အခြေအနေကို ထိန်းသိမ်းခြင်း၏ အရေးကြီးပုံကိုလည်း နှစ်နိုင်ငံစလုံးက သဘောထားခြင်း ဖလှယ်ခဲ့ ကြသည်ဟု ဗီယက်နမ်ကာကွယ်ရေးဝန်ကြီး ဂျီအန်က ပူးတွဲသတင်းစာ ရှင်းလင်းပွဲ၌ ပြောကြားခဲ့သည်။

တောင်တရုတ်ပင်လယ်တွင် တရုတ်နှင့် ဖိလစ်ပိုင်သင်္ဘောများအကြား ဆက်တိုက်ဆိုသလို ထိပ်တိုက်တွေ့မှုများ ဖြစ်ပွားခဲ့သည်မှာ တစ်နှစ်ကျော် ကြာမြင့်လာမှုနှင့်အတူ တင်းမာမှု မြင့်တက်လာနိုင်ခြေနှင့်ပတ်သက်ပြီး နိုင်ငံတကာက စိုးရိမ်နေချိန်တွင် ဗီယက်နမ်နှင့် ဖိလစ်ပိုင်၏ အစည်းအဝေး ပေါ်ပေါက်ခဲ့ခြင်းဖြစ်သည်။

"ကျနော်တို့ဟာ ဘုံခြိမ်းခြောက်မှုကို ရင်ဆိုင်နေရချိန်မှာ စည်းလုံးညီညွတ်တဲ့ အာဆီယံစိတ်ဓာတ်နဲ့အတူ စိန်ခေါ်မှု တွေကို အတူတကွ ရင်ဆိုင်သွားမှာဖြစ်ပါတယ်" ဟု တီအိုဒိုရိုက တရုတ်ကို တိုက်ရိုက် အမည်တပ်ခြင်းမရှိဘဲ ပြောကြားခဲ့သည်။

တရုတ်သည် တောင်တရုတ်ပင်လယ်၏ ရေပြင်နယ်နိမိတ် အားလုံးနီးပါးကို ပိုင်ဆိုင်ကြောင်း ကြေညာထားပြီး ဖိလစ်ပိုင်နှင့် ဗီယက်နမ် အပါအဝင် အာဆီယံနိုင်ငံအချို့နှင့် ပိုင်ဆိုင်မှု အငြင်းပွားလျက်ရှိသည်။

Source: ရိုက်တာ

CNI International News

ဒါကာ၊ ဩဂုတ် ၃၁

ဘင်္ဂလားဒေ့ရှ် လက်နက်ကိုင်တပ်ဖွဲ့များအကြား အသုံးပြုနေသည့် တရုတ်နိုင်ငံမှ ဝယ်ယူခဲ့သော လက်နက်များ၏ အရည်အသွေး ညံ့ဖျင်းမှုနှင့်ပတ်သက်ပြီး မကြာသေးမီက သတင်းများ ထွက်ပေါ်လာခဲ့သည်။

ထိုအရေးသည် ဘင်္ဂလားဒေ့ရှ် အမျိုးသားလုံခြုံရေးကို ထိခိုက်နစ်နာစေပြီး ဘင်္ဂလားဒေ့ရှ်စစ်တပ်၏ အသင့် အနေအထားရှိမှုအတွက် ကြီးမားသည့် ခြိမ်းခြောက်မှုဖြစ်လာခဲ့ကြောင်း Asia Times မှ ဖော်ပြခဲ့သည်။

တရုတ်၏ စစ်လက်နက်ပစ္စည်းများအပေါ် မယုံကြည်ရကြောင်း ဖော်ပြခဲ့သည့် သတင်းများသည် ဘင်္ဂလားဒေ့ရှ် စစ်တပ်(AFB)ကို အဆင့်မြှင့်တင်ရန် အားထုတ်ကြိုးပမ်းမှုများအတွက် စိုးရိမ်စရာကောင်းသော  အကျိုး သက်ရောက်မှုများ ရှိလာနိုင်သည်။

ထို့ကြောင့် ဘင်္ဂလာဒေ့ရှ် စစ်တပ်အနေဖြင့် တရုတ်လက်နက်များအပေါ် အလွန်အမင်း မှီခိုအားထားနေမှုကို အလေးအနက် ဆင်ခြင်စဉ်းစားသင့်သည်ဟုလည်း ကျွမ်းကျင်သူများက ပြောကြားခဲ့သည်။

အမေရိကန်က ယူကရိန်းကို ထောက်ပံ့တဲ့လက်နက်ခဲယမ်းတွေကိုတွေ့ရစဉ်

ထို့ပြင် ဘင်္ဂလားဒေ့ရှ်အနေဖြင့် ၎င်း၏စစ်တပ်ကို အဆင့်မြှင့်တင်ရန် Forces Goal 2030 အမည်ရှိ အစီအစဉ်ကို အကောင်အထည်ဖော်ရန် မတူကွဲပြားသည့် နိုင်ငံများမှ ကာကွယ်ရေးပစ္စည်းများအား တင်သွင်းရန် စဉ်းစားသင့် ကြောင်းလည်း အကြံပြုချက်များ ထွက်ပေါ်နေသည်။

မကြာသေးမီက ဘင်္ဂလားဒေ့ရှ်တွင် အာဏာရှင် ရှိတ်ဟာစီနာ (Sheikh Hasina) ၏ အစိုးရအဖွဲ့ ပြုတ်ကျသွားခဲ့ ပြီးနောက် ငြိမ်းချမ်းရေးနိုဘယ်ဆုရှင် ဒေါက်တာမိုဟာမက်ယူနွတ် (Muhammad Yunus) ဦးဆောင်သည့် ကြားဖြတ်အစိုးရအဖွဲ့သည် အခြားနိုင်ငံများမှ လက်နက်များ ဝယ်ယူတင်သွင်းမှုအတွက် လိုအပ်ချက်ကို အဓိက ဦးစားပေးကိစ္စအဖြစ် လုပ်ဆောင်ခဲ့သည်။

ထို့ကြောင့် ဘင်္ဂလားဒေ့ရှ်၏ မူဝါဒ ချမှတ်သူများသည် တရုတ်ထံမှ လက်နက်များကိုသာ ဝယ်ယူခြင်းထက် အခြား နိုင်ငံများမှ လက်နက်များကို ဝယ်ယူမည့် အစီအစဉ်များအား ချမှတ်လုပ်ဆောင်ရမည်ဖြစ်သည်။ 

လက်ရှိတွင် ဘင်္ဂလားဒေ့ရှ်သည် အိန္ဒိယနှင့် တူရကီနိုင်ငံများကဲ့သို့ မဟာမိတ်နိုင်ငံများထံမှ လက်နက်များ ဝယ်ယူ တင်သွင်းရန် အားထုတ်ကြိုးပမ်းမှုများကို အရှိန်မြှင့်တင်လျက်ရှိသည်။

ထို့ပြင် ဘင်္ဂလားဒေ့ရှ်အနေဖြင့် အမေရိကန်၊ ဗြိတိန်နှင့် ပြင်သစ်နိုင်ငံများကဲ့သို့ ရင်းနှီးသည့် အနောက်နိုင်ငံများထံမှ လက်နက်များကိုလည်း ဝယ်ယူတင်သွင်းရန် လုပ်ဆောင်သင့်သည်။

ဘင်္ဂလားဒေ့ရှ်စစ်သားကို တွေ့ရစဉ်

အလားတူ တောင်ကိုရီးယားနှင့်ဂျပန်တို့ကဲ့သို့ စီးပွားရေးနှင့် နိုင်ငံရေးအရ ရင်းနှီးသည့် ဆက်ဆံရေးများရှိသော နိုင်ငံများမှ လက်နက်ကုမ္ပဏီများနှင့်လည်း ထိတွေ့ဆက်ဆံမှုများ ပြုလုပ်သင့်ကြောင်း ကျွမ်းကျင်သူများက ပြောသည်။

ဘင်္ဂလားဒေ့ရှ်သည် တရုတ်၏ လက်နက်များကို ဝယ်ယူမှု ဒုတိယအများဆုံး နိုင်ငံဖြစ်ကြောင်း စတော့ဟုမ်း နိုင်ငံတကာ ငြိမ်းချမ်းရေး သုတေသန အင်စတီကျု (SIPRI) မှ ထုတ်ပြန်သည့် နောက်ဆုံးရ အချက်အလက် များတွင် ဖော်ပြခဲ့သည်။

ဘင်္ဂလားဒေ့ရှ်စစ်တပ်၏ လက်နက်တိုက်အတွင်းရှိသည့် လက်နက် စုစုပေါင်း၏ ၃ ပုံ ၂ ပုံကျော်သည် တရုတ် လက်နက်များဖြစ်ပြီး ထိုလက်နက်များအတွင်း Ming-class ရေငုပ်သင်္ဘောများ၊ MBT-2000 တင့်ကားများလည်း ပါဝင်သည်။

ဘင်္ဂလားဒေ့ရှ်သည် တရုတ်၏ လက်နက်များကို စျေးပေါပေါဖြင့် ဝယ်ယူရနိုင်ခြင်းကြောင့် အများဆုံး ဝယ်ယူနေ ခြင်းဖြစ်ပြီး တရုတ်နိုင်ငံပြီးပါက ဘင်္ဂလားဒေ့ရှ်သို့ လက်နက်များ ရောင်းချနေသည့် နိုင်ငံများထဲတွင် တူရကီ၊ ဗြိတိန်နှင့် ရုရှားနိုင်ငံတို့လည်း ပါဝင်သည်။

Source: Asia Times

CNI International News

ဘန်ကောက်၊ ဩဂုတ် ၃၁

အရှေ့တောင်အာရှတွင် အမေရိကန်-တရုတ် အားပြိုင်မှု မြင့်တက်လာပြီး မြန်မာနိုင်ငံတွင် ဖြစ်ပွားနေသည့် ပဋိပက္ခ၏ သက်ရောက်မှုများနှင့် ရင်ဆိုင်နေရချိန်၌ ၎င်း၏ စစ်တပ်ကို အဆင့်မြှင့်တင် မွမ်းမံရေးနှင့် လေကြောင်း ကာကွယ်ရေးကို မြှင့်တင်ရန် Saab Gripen E/F တိုက်လေယာဉ်များ ဝယ်ယူရန် စီစဉ်နေကြောင်း Asia Times မှ ဖော်ပြခဲ့သည်။

ကာကွယ်ရေး သတင်းများကို ဖော်ပြနေသည့် The War Zone သတင်းဝက်ဘ်ဆိုက်မှ ယခုသီတင်းပတ်အတွင်း ထုတ်ပြန်ခဲ့သည့် သတင်းတစ်ရပ်တွင် ထိုင်းတော်ဝင်လေတပ် (RTAF) သည် ဆွီဒင်နိုင်ငံ၏ ခေတ်မီတိုက်လေယာဉ် များဖြစ်သည့် Saab Gripen E/F တိုက်လေယာဉ်များကို ဝယ်ယူရန် ဆန္ဒရှိကြောင်း ကြေညာခဲ့သည်။

ထိုလေယာဉ်များဖြင့် လက်ရှိ RTAF တွင် အသုံးပြုနေသည့် Gripen C/D မော်ဒယ် လေယာဉ်အုပ်စုကို အဆင့်မြှင့် တင်ရန် စီစဉ်နေကြောင်း ဖော်ပြခဲ့သည်။

ထိုတိုက်လေယာဉ်များ ဝယ်ယူရေးအတွက် ၁၀ လကြာ အကဲဖြတ်ချင့်တွက်မှုများ ပြုလုပ်ခဲ့ပြီးနောက် လက်ရှိတွင် RTAF သည် တိုက်လေယာဉ်အသစ် ၁၂ စင်းမှ ၁၄ စင်းအထိ ဝယ်ယူရန်စီစဉ်ခဲ့သည်။

မြန်မာ့တပ်မတော်ကို ဆန့်ကျင်နေကြစဉ်

အဆိုပါ လေယာဉ်များကို ၂၀၂၈ ခုနှစ်မှစပြီး လက်ခံရယူရန် မျှော်မှန်းထားသည်ဟု The War Zone သတင်း ဝက်ဘ်ဆိုက်မှ ဖော်ပြခဲ့သည်။

Gripen E/F တိုက်လေယာဉ်များသည် နိုင်ငံတကာတွင် အသုံးပြုနေသည့် တိုက်လေယာဉ်များ၊ အထူးသဖြင့် အမေရိကန်လုပ် F-35 နှင့် F-16 လေယာဉ်များနှင့် နှိုင်းယှဉ်ပါက စစ်မြေပြင် အသာစီးရမှု ကြီးကြီးမားမား မရှိခဲ့ကြောင်း ထိုသတင်းဝက်ဘ်ဆိုက်တွင် ရေးသားထားသည်။

လက်ရှိ RTAF တွင် သက်တမ်း အိုဟောင်းနေပြီဖြစ်သည့် အမေရိကန်လုပ်  F-16s နှင့် F-5 Tiger II တိုက်လေယာဉ် များနှင့်အတူ Gripen C/D တိုက်လေယာဉ် ၁၁ စင်းကို အသုံးပြုလျက်ရှိသည်။

လက်တလော ကာလတွင် မြန်မာ့တပ်မတော် (လေ)သည် လက်နက်ကိုင်အဖွဲ့များကို လေကြောင်းမှ တိုက်ခိုက်ရန် တရုတ်၊ ရုရှားတို့၏ အကူအညီဖြင့် ၎င်း၏ လေတပ်ကို အဆင့်မြှင့်တင်မွမ်းမံမှုများ ဆက်တိုက် ပြုလုပ်နေသည်။

ထိုင်းနိုင်ငံသည် ၎င်း၏ လေပိုင်နက်အတွင်းသို့ မြန်မာ့တပ်မတော် (လေ) ၏ လေယာဉ်များ ဝင်ရောက်ပျံသန်းမှု များ ရှိနေသည့် အခြေအနေနှင့် ရင်ဆိုင်နေရသည်။

 မြန်မာ့တပ်မတော် (လေ) ၏ MiG-29 တိုက်လေယာဉ်ကို တွေ့ရစဉ်

၂၀၂၃ ခုနှစ်၊ ဇန်နဝါရီလက Asia Times သတင်းစာတွင် ဖော်ပြခဲ့သည့် အန်သိုနီ ဒေးဗစ် (Anthony Davis) ၏ ဆောင်းပါးတစ်ပုဒ်၌ မြန်မာ့တပ်မတော် (လေ) သည် ရုရှားထံမှ Sukhoi SU-30 တိုက်လေယာဉ်များနှင့် တရုတ် ထံမှ FTC-2000G တိုက်လေယာဉ်များ အပါအဝင် လေတပ်စွမ်းဆောင်ရည်များသည် နစက၏ မဟာဗျူဟာတွင် အဓိကကျသည့် နေရာမှ ပါဝင်နေကြောင်း ဖော်ပြခဲ့သည်။

ထိုင်းသည် ၎င်း၏ လေပိုင်နက်အတွင်း မြန်မာတိုက်လေယာဉ်များ ဝင်ရောက်ခဲ့သည့် ဖြစ်စဉ်များကို ထိန်းထိန်း သိမ်းသိမ်း တုန့်ပြန်ခဲ့ပြီး ထိုသို့ ထိန်းထိန်းသိမ်းသိမ်း လုပ်ဆောင်နေခြင်းက ကြားဖြတ်ဟန့်တားနိုင်စွမ်း အားနည်းမှု ကြောင့် မဟုတ်ဘဲ နိုင်ငံရေးအရ ထည့်သွင်းစဉ်းစားခြင်းကြောင့်ဖြစ်ကြောင်း Asia Times မှ ဖော်ပြခဲ့သည်။

၂၀၂၂ ခုနှစ်၊ ဒီဇင်ဘာလက ဖော်ပြခဲ့သည့် Asian Journal of Comparative Politics ၏ ဆောင်းပါးတစ်ပုဒ်တွင်မူ ၂၀၂၂ ခုနှစ်၊ ဇွန်လက ထိုင်းလေပိုင်နက်အတွင်းသို့ မြန်မာ့တပ်မတော် (လေ) ၏ MiG-29 တိုက်လေယာဉ် ဝင်ရောက် ပျံသန်းမှုအပေါ် ထိုင်းအစိုးရက နှုတ်ဆိပ်နေခဲ့သည့်အတွက် ထိုင်းအစိုးရအပေါ် ဝေဖန်မှုများ  ထွက်ပေါ် ခဲ့ကြောင်း ဖော်ပြခဲ့သည်။

Source: Asia Times

CNI International News

ဘေကျင်း၊ ဩဂုတ် ၃၁

တရုတ်သည် အရှေ့တီမောနိုင်ငံနှင့် ပြည့်စုံကျယ်ပြန့်သည့် မဟာဗျူဟာမြောက် မိတ်ဖက်ဆက်ဆံရေးကို ပိုမို တိုးမြှင့်ရန် သဘောတူညီချက်ကို လက်မှတ်ရေးထိုးခဲ့သည်။

ထို့နောက် သီတင်းနှစ်ပတ်အကြာတွင် ကာကွယ်ရေး ပူးပေါင်းဆောင်ရွက်မှုများကို ဆွေးနွေးရန်အတွက် အရှေ့တီမောနိုင်ငံသို့ စစ်ဘက်ဆိုင်ရာ ကိုယ်စားလှယ်အဖွဲ့တစ်ဖွဲ့ စေလွှတ်ခဲ့ကြောင်း South China Morning Post မှ ဖော်ပြခဲ့သည်။

ထိုသဘောတူညီချက်နှင့်ပတ်သက်ပြီး ၂၀၀၂ ခုနှစ်က အင်ဒိုနီးရှားထံမှ လွတ်လပ်ရေးရခဲ့သည့် အရှေ့တီမောနိုင်ငံ ၏ လုံခြုံရေးမိတ်ဖက် နိုင်ငံများဖြစ်သော အမေရိကန်၊ ဩစတြေးလျနှင့် နယူးဇီလန်နိုင်ငံတို့က အနီးကပ် စောင့်ကြည့်လျက်ရှိသည်။

မကြာသေးမီ နှစ်များအတွင်း တရုတ်သည် သမုဒ္ဒရာပိုင်းဇုန်နှင့် အရှေ့တောင်အာရှ နယ်နိမိတ်မျဉ်းပေါ်တွင် ရှိနေပြီး ဩစတြေးလျ၏ မြောက်ဘက်ကမ်းရိုးတန်းနှင့် သိပ်မဝေးသည့် အရှေ့တီမောကဲ့သို့ ကျွန်းနိုင်ငံငယ်များနှင့် ကာကွယ်ရေး ဆက်ဆံမှုများကို မြှင့်တင်ခဲ့သည်။

အမေရကိန်နဲ့တရုတ် စစ်အင်အားပြထားစဉ်

ဖွံ့ဖြိုးတိုးတက်ရေးနှင့် ရာသီဥတု ဖောက်ပြန်ပြောင်းလဲမှုဆိုင်ရာ စိန်ခေါ်မှုများကို ရင်ဆိုင်နေရချိန်တွင် ထိုကျွန်းနိုင်ငံငယ်များသည် တရုတ်နှင့် အမေရိကန်အကြား ပထဝီနိုင်ငံရေးဆိုင်ရာ အားပြိုင်မှု၏ အဓိကဆုံချက် နေရာများ ဖြစ်လာခဲ့သည်။

အဘယ်ကြောင့်ဆိုသော် ထိုကျွန်းနိုင်ငံငယ်များသည် အဓိကကျသော ပင်လယ်ရေကြောင်း သွားလာသည့် နေရာများတွင် တည်ရှိပြီး သမုဒ္ဒရာ သယံဇာတများ ပေါကြွယ်ဝသော နေရာများ၌  တည်ရှိနေသောကြောင့် ဖြစ်သည်။

၂၀၂၂ ခုနှစ်က တရုတ်နှင့် ဆော်လ်မွန်ကျွန်းစုအကြား လုံခြုံရေးသဘောတူစာချုပ် ချုပ်ဆိုခဲ့ပြီး ထိုလုံခြုံရေး သဘောတူစာချုပ်တွင် ပါရှိသည့် အချက်အလက်များကို ထုတ်ပြန်ခဲ့ခြင်းမရှိသည့်တိုင် ဆော်လ်မွန်ကျွန်းစု၏ ဆိပ်ကမ်းများအား တရုတ်ရေတပ်က ဝင်ရောက်ခွင့် ရှိလာနိုင်သဖြင့် ဩစတြေးလျနှင့် အမေရိကန်တို့က စိုးရိမ် ကြောင်း ဖော်ပြခဲ့ကြသည်။

အမေရိကန် သမ္မတဘိုင်ဒန်နဲ့ တရုတ် သမ္မတရှီကျင့်ဖျင်ကိုတွေ့ရစဉ်

ယခုနှစ် ဖေဖော်ဝါရီလကလည်း ဆော်လ်မွန်ကျွန်းစု၏ အာဏာရပါတီက တရုတ်နှင့် ဆက်ဆံရေးများကို မြှင့်တင် မည်ဟု ကတိပြုခဲ့ပြီး ဩစတြေးလျကဲ့သို့ ထုံးတမ်းစဉ်လာ မိတ်ဖက်နိုင်ငံများနှင့် ဆက်ဆံရေးများကိုလည်း ဆက်လက် ထိန်းသိမ်းထားခဲ့သည်။

တရုတ်၏ မြင့်တက်လာသည့် ဩဇာလွှမ်းမိုးမှုကြောင့် ဒေသတွင်း တရုတ်အစိုးရ၏ မဟာဗျူဟာမြောက် အလားအလာကို ပိုမိုချဲ့ထွင်နိုင်စွမ်း ရှိလာသကဲ့သို့ တစ်ဖက်တွင်လည်း အရှေ့တီမောနှင့် အသေးစား ကျွန်းနိုင်ငံငယ်များသည် တရုတ်နှင့် ဆက်ဆံရေးမှတစ်ဆင့် ၎င်းတို့၏ ကိုယ်ပိုင် အကျိုးစီးပွားများကို ရရှိရန် ကြိုးပမ်းနေသည်ဟု ကျွမ်းကျင်သူများက ပြောကြားခဲ့သည်။

အာရှ၏ အဆင်းရဲဆုံး နိုင်ငံများထဲတွင် ပါဝင်နေသည့် အရှေ့တီမောသည် လွတ်လပ်ရေးမရမီက ပဋိပက္ခများ ကြောင့် အဖက်ဖက်က ယိုယွင်းနေသည့် ကဏ္ဍများကို ပြန်လည်ထူထောင်ရန် ရုန်းကန်နေရဆဲဖြစ်၍ တရုတ်၏ အကူအညီကို ရယူရန် ကြိုးပမ်းနေသည်ဟု စင်္ကာပူအမျိုးသားတက္ကသိုလ်မှ နိုင်ငံရေးသိပ္ပံ တွဲဖက်ပါမောက္ခ ဟွမ်ချင်ဟို (Huang Chin-Hao) က ပြောကြားခဲ့သည်။

Source: SCMP

CNI International News

အေဒင်၊ ဩဂုတ် ၃၀

ပင်လယ်နီတွင် တိုက်ခိုက်ခံခဲ့ရသည့် ရေနံတင် သင်္ဘောတစ်စင်းပေါ်ရှိ သင်္ဘောသားမျာကို ကယ်တင်ရန်နှင့် ရေနံများ ယိုဖိတ်မှုကို ကာကွယ်တားဆီးရန် ဆွဲသင်္ဘောများနှင့် ကယ်ဆယ်ရေးသင်္ဘောများကို ထိုရေနံတင် သင်္ဘောထံ သွားရောက်ခွင့်ပြုရန် ယီမင်နိုင်ငံ၏ ဟူရ်သီအဖွဲ့က သဘောတူခဲ့သည်ဟု ကုလသမဂ္ဂဆိုင်ရာ အီရန်အထူးတာဝန်အဖွဲ့က ပြောကြားခဲ့ကြောင်း ရိုက်တာမှ ဖော်ပြခဲ့သည်။

ပြီးခဲ့သည့် သီတင်းပတ်အတွင်းက ဟူရ်သီလက်နက်ကိုင်အဖွဲ့သည် ပင်လယ်နီအတွင်းရှိ ဂရိအလံတင် ရေနံတင် သင်္ဘောကို တိုက်ခိုက်ခဲ့ခြင်းဖြစ်သည်။

MV Sounion အမည်ရှိ ထိုသင်္ဘောပေါ်တွင် ရေနံစိမ်း တန်ချိန်ပေါင်း ၁၅၀,၀၀၀ တင်ဆောင်ထားသဖြင့် ထိုရေနံများ ယိုဖိတ်ခဲ့ပါက သဘာဝပတ်ဝန်းကျင်အတွက် အန္တရာယ်ရှိစေနိုင်ကြောင်း သင်္ဘောကုမ္ပဏီမှ တာဝန်ရှိသူများက ပြောကြားခဲ့သည်။

"အဲဒီရေနံတင် သင်္ဘောဆီကို ဆွဲသင်္ဘောတွေနဲ့ ကယ်ဆယ်ရေးသင်္ဘောတွေ သွားရောက်နိုင်ဖို့အတွက် ယာယီ အပစ်ရပ်ပေးထားဖို့ နိုင်ငံအချို့က ဟူရ်သီအဖွဲ့ကို တောင်းဆိုခဲ့ပါတယ်။ ဟူရ်သီအဖွဲ့ကလည်း လူသားချင်း စာနာ ထောက်ထားမှုဆိုင်ရာ အခြေအနေနဲ့ သဘာဝပတ်ဝန်းကျင်ဆိုင်ရာ စိုးရိမ်မှုတွေကြောင့် တောင်းဆိုချက်ကို လက်ခံ ခဲ့ပါတယ်" ဟု နယူးယောက် (New York) ရှိ အီရန်၏ ကုလအထူးတာဝန်အဖွဲ့က ပြောကြားခဲ့သည်။

ပင်လယ်နီမှာ ရေနံတင်သင်္ဘော တိုက်ခိုက်ခံရစဉ်

ဟူရ်သီအဖွဲ့၏ ပြောရေးဆိုခွင့်ရှိသူ မိုဟာမက် အဗ္ဗဒူဆာလမ် (Mohammed Abdulsalam) ကမူ နိုင်ငံတကာ အဖွဲ့အစည်းအချို့က မိမိတို့အဖွဲ့ကို ဆက်သွယ်လာခဲ့သဖြင့် ထိုရေနံတင်သင်္ဘောကို ဆွဲယူဖို့ ကယ်ဆယ်ရေး သင်္ဘောများကို သွားရောက်ခွင့်ပြုရန်သာ သဘောတူညီခဲ့ကြောင်းနှင့် ယာယီအပစ်အခတ်ရပ်စဲခြင်းမရှိကြောင်း ရိုက်တာသတင်းဌာနသို့ ဩဂုတ် ၂၈ ရက်က ပြောကြားခဲ့သည်။

MV Sounion သင်္ဘောသည် ပြီးခဲ့သည့် သီတင်းပတ်က ယီမင်၏ ဟိုဒိုင်ဒါ (Hodeidah) ဆိပ်ကမ်းမြို့၏ ကမ်းလွန် ရေပြင်တွင် ဒုံးလက်နက်များဖြင့် ပစ်ခတ်တိုက်ခိုက်ခံခဲ့ရပြီး လက်ရှိတွင် သင်္ဘောပေါ်မှ ရေနံများ ယိုစိမ့်ထွက် နေသည့် သတင်းများလည်း ထွက်ပေါ်နေသည်။

ရိုက်တာသတင်းဌာနကမူ သင်္ဘောပေါ်မှ ရေနံများ ယိုစိမ့်ထွက်နေသည့် သတင်းများကို လွတ်လပ်စွာ အတည်မပြု နိုင်ကြောင်း ဖော်ပြခဲ့သည်။

ပင်လယ်နီမှာ ရေနံတင်သင်္ဘော တိုက်ခိုက်ခံရစဉ်

ယီမင်၏ နယ်နိမိတ် အများစုကို ထိန်းချုပ်ထားသည့် ဟူရ်သီအဖွဲ့ကမူ MV Sounion သင်္ဘောကို ၎င်းတို့ တိုက်ခိုက် ခဲ့ခြင်းဖြစ်ကြောင်း ပြောကြားခဲ့သည်။ 

ဟူရ်သီအဖွဲ့သည် ဂါဇာကမ်းမြောင်ဒေသတွင် အစ္စရေးနှင့် ဟားမာ့စ်အကြား ဖြစ်ပွားနေသည့် စစ်ပွဲအတွင်း ပါလက်စတိုင်းများနှင့် စည်းလုံးညီညွတ်စွာရှိကြောင်း ပြသရန်အတွက် ပြီးခဲ့သည့်နှစ် နိုဝင်ဘာလကတည်းက ပင်လယ်နီတွင် သင်္ဘောများကို ဒရုန်းများ၊ ဒုံးကျည်များဖြင့် တိုက်ခိုက်ခဲ့ခြင်းဖြစ်သည်။

ဟူရ်သီအဖွဲ့၏ တိုက်ခိုက်မှုပေါင်း အကြိမ် ၇၀ ကျော်အတွင်း သင်္ဘောနှစ်စင်း နစ်မြုပ်ခဲ့ပြီး သင်္ဘောတစ်စင်းကို စီးနင်းခံခဲ့ရကာ သင်္ဘောသား ၃ ဦး ထက်မနည်း သေဆုံးခဲ့သည်။

တတိယအဖွဲ့အစည်းတစ်ခုသည် MV Sounion သင်္ဘောကို ဆွဲယူရန် ဆွဲသင်္ဘောနှစ်စင်း စေလွှတ်ခဲ့သော်လည်း ဟူရ်သီအဖွဲ့က ထိုဆွဲသင်္ဘောများကို တိုက်ခိုက်မည်ဟု ခြိမ်းခြောက်ခဲ့ကြောင်း အမေရိကန်ကာကွယ်ရေးဝန်ကြီး ဌာနက ဩဂုတ် ၂၇ ရက်တွင် ပြောကြားခဲ့သည်။

Source: ရိုက်တာ

CNI International News

ဆိုးလ်၊ ဩဂုတ် ၃၀

တောင်ကိုရီးယားသမ္မတ ယွန်းဆော့ရွဲ(Yoon Suk Yeol) က ဒေါ်လာ ၈၆၀ ဘီလျံ တန်ဖိုးရှိပြီး ကမ္ဘာ့အကြီးဆုံး ပင်စင်လစာ ရန်ပုံငွေများထဲတွင် တစ်ခု အပါအဝင်ဖြစ်သည့် နိုင်ငံတော် ပင်စင်လစာရန်ပုံငွေကို အရေးတကြီး ပြုပြင်ပြောင်းလဲသွားမည်ဟု ကတိပြုခဲ့ကြောင်း ရိုက်တာမှ ဖော်ပြခဲ့သည်။

နိုင်ငံအတွင်း သက်ကြီးပိုင်း လူဦးရေအတွက် ဝင်ငွေလုံခြုံမှုကို စိတ်ချသေချာစေရန်နှင့် ပိုမိုမျှတမှုရှိသည့် ပင်စင် လစာ ရန်ပုံငွေဖြစ်စေရန် ပြုပြင်ပြောင်းလဲမည်ဖြစ်ကြောင်း ယွန်းက ပြောကြားခဲ့သည်။

ပြီးခဲ့သည့် မျိုးဆက်များအတွင်း ပင်စင်လစာငွေပေးသည့် စနစ်အပေါ် လူထု၏ ယုံကြည်မှု ဆုံးရှုံးခဲ့ကြောင်း၊ အလုပ်မှ အငြိမ်းစားယူခဲ့သည့် ဝန်ထမ်းဟောင်းများ၏ ယုံကြည်ချက်ကို ပြန်လည်ထိန်းသိမ်းရန် လိုအပ်ကြောင်း ယွန်းက ပြောသည်။

"သက်ကြီးပိုင်းတွေသာမက လူငယ်တွေကပါ ယုံကြည်မှုရှိတဲ့ နိုင်ငံတော်အဆင့် ပင်စင်လစာ စနစ်ကို အခြေခံ ကနေစပြီး ပြုပြင်ပြောင်းလဲဖို့ အချိန်ကျပါပြီ"ဟု ယွန်းက သတင်းစာ ရှင်းလင်းပွဲတွင် ပြောကြားခဲ့သည်။

ပင်စင်ထောက်ပံ့ငွေကို ပိုမိုတိုးမြှင့်ရမည်ဖြစ်ပြီး မတူညီသည့် အသက်အရွယ် အပိုင်းအခြားအလိုက် ပင်စင်လစာ ငွေ ပေးအပ်မှုကို ပိုပြီးမျှတမှုရှိစေရန် ပင်စင်ထောက်ပံ့ငွေပေးမည့် လူအရေအတွက်ကိုလည်း တိုးမြှင့်ရမည် ဖြစ်ကြောင်း ၎င်းက ပြောကြားခဲ့သည်။

တောင်ကိုရီးယား အသက်ကြီးရွယ်အိုများ ပင်စင်လစာ ထုတ်နေကြစဉ်

"သက်ကြီးပိုင်းတွေကို ဆင်းရဲချို့တဲ့စေပြီး လူငယ်တွေအကြား သံသယတွေ ဖြစ်စေခဲ့တဲ့ ပင်စင်စနစ်ကို အောက်ခြေကနေစပြီး ပြုပြင်ပြောင်းလဲရပါမယ်" ဟု ယွန်းက ပြောကြားခဲ့သည်။

တောင်ကိုရီးယား၏ ပြည်သူ့ပင်စင်လစာ ရန်ပုံငွေစနစ်ကို ၁၉၈၈ ခုနှစ်က စတင်တည်ထောင်ခဲ့ပြီး တန်ဖိုးအားဖြင့် ဒေါ်လာ ၈၆၀ ဘီလျံရှိနေမှုနှင့်အတူ လက်ရှိတွင် ကမ္ဘာ့တတိယအကြီးဆုံး ပင်စင်လစာ ရန်ပုံငွေအဖြစ် ရပ်တည် နေသည်။

ထိုစနစ်အရ တောင်ကိုရီးယားတွင် အရပ်သားပြည်သူ ဝန်ထမ်းများသည် အလုပ်လုပ်နေချိန်အတွင်း မိမိတို့ရရှိ သည့် လစာငွေ ထဲမှ ရာခိုင်နှုန်းအချို့ကို နိုင်ငံတော် ပင်စင်လစာ ရန်ပုံငွေအဖြစ် စုဆောင်းရခြင်းဖြစ်ပြီး အလုပ်မှ အနားယူချိန်တွင် သတ်မှတ်ထားသည့် အတိုးနှုန်းများအလိုက် လစဉ်ထောက်ပံ့ငွေအဖြစ် ပြန်လည်ထုတ်ယူနိုင်ခြင်း ဖြစ်သည်။

တောင်ကိုရီးယား၏ ပင်စင်လစာငွေ စုဆောင်းသည့် စနစ်အရ လစာငွေ၏ ၉ ရာခိုင်နှုန်းကို လစဉ်စုဆောင်းရမည် ဖြစ်ပြီး အမေရိကန်တွင်မူ ၁၀ ဒသမ ၆ ရာခိုင်နှုန်း ဂျပန်တွင် ၁၈ ဒသမ ၃ ရာခိုင်နှုန်းကို စုဆောင်းရန် သတ်မှတ် ပြဋ္ဌာန်းထားသည်။

Source: ရိုက်တာ