CNI International News

ဘန်ကောက်၊ မေလ ၂၈

မြန်မာနိုင်ငံ၊ ရှမ်းပြည်နယ်အတွင်းက “ဝ”ပြည်သွေးစည်းညီညွတ်ရေးတပ်မတော်(UWSA)၏ မူးယစ်ဆေးဝါး ဖြန့်ဖြူးမှုကို တိုက်ဖျက်မည့် မူးယစ်ဆေးဝါး တိုက်ဖျက်ရေးစစ်ပွဲကို ထိုင်းဝန်ကြီးချုပ်ဟောင်း သက်ဆင်က ၂၀၂၅ ခုနှစ်၊ မေလ ၂၇ ရက်တွင် ကြေညာခဲ့သည်ဟု The Nation မှ ဖော်ပြခဲ့သည်။

ထိုင်းဝန်ကြီးချုပ်ဟောင်း သက်ဆင် (Thaksin Shinawatra) က မူးယစ်ဆေးဝါး တိုက်ဖျက်ရေးစစ်ပွဲ အသစ်တစ်ခု ကြေညာခဲ့ပြီး ထိုင်းနိုင်ငံတစ်ဝန်း မူးယစ်မှောင်ခိုကွန်ရက်ကို တိုက်ဖျက်ရန်နှင့် မူးယစ်ဆေး ရောင်းဝယ်သူများအား ရှာဖွေရန် သန္နိဋ္ဌာန်ချခဲ့ကြောင်း ပြောကြားခဲ့သည်။

သက်ဆင်သည် မူးယစ်ဆေးဝါး ထိန်းချုပ်ရေးဘုတ်အဖွဲ့ရုံးတွင် "မူးယစ်ဆေးဝါး၊ နယ်စပ်ဖြတ်ကျော်ရာဇဝတ်မှုများ၊ ရေရှည်ဖြေရှင်းနည်းများအတွက် သဘောထားများနှင့် စိန်ခေါ်မှုများ" အမည်ရှိ ခေါင်းစဉ်ဖြင့် ပြုလုပ်သည့် အခမ်းအနားတွင် မိန့်ခွန်းပြောကြားချိန်အတွင်း မူးယစ်စစ်ပွဲအသစ် ကြေညာခဲ့ခြင်းဖြစ်သည်။

စိတ်ကြွဆေး ထုတ်လုပ်ရာတွင် အသုံးပြုသည့် ရှေ့ပြေးဓာတုပစ္စည်းများ မှောင်ခိုတင်သွင်းမှုကို ရပ်တန့်ရန် ပျက်ကွက်သည့်အတွက် အကျင့်ပျက် အကောက်ခွန် အရာရှိများကို သက်ဆင်က အပြစ်တင်ခဲ့သည်။

မူးယစ်ဆေးဝါးတွေကို ဖျက်ဆီးဖို့လုပ်နေတဲ့ UWSA ကိုတွေ့ရစဉ်

အဆိုပါ ဓာတုပစ္စည်းများကို 'ဝ'ပြည်သွေးစည်းညီညွတ်ရေးတပ်မတော် (UWSA) ထိန်းချုပ်ထားသည့် မြန်မာနိုင်ငံ ရှမ်းပြည်နယ်သို့ ပို့ဆောင်ပေးသည်။

UWSA သည် ထိုင်းနိုင်ငံအတွင်းသို့ မူးယစ်ဆေးဝါးများ ဝင်ရောက်လာမှုအတွက် တာဝန်ရှိသည်ဟု ၎င်းက စွပ်စွဲခဲ့ သည်။

သက်ဆင်သည် မြန်မာအစိုးရခေါင်းဆောင် ဗိုလ်ချုပ်မှူးကြီးမင်းအောင်လှိုင်နှင့် လာအိုဝန်ကြီးချုပ်တို့ဖြင့် ဆက်ဆံ ရေး ကောင်းမွန်ကြောင်း ကြွားဝါခဲ့ပြီး ထိုင်းနိုင်ငံသို့ မူးယစ်ဆေးဝါး တင်ပို့မှု ရပ်တန့်ရန် ၎င်းတို့၏ ပူးပေါင်း ဆောင်ရွက်မှုကို ရှာဖွေနိုင်ကြောင်း ပြောကြားခဲ့သည်။

သို့သော်လည်း ထိုင်းနိုင်ငံသည် မူးယစ်ဆေးဝါး တိုက်ဖျက်ရေးကို လွတ်လပ်စွာ ကိုင်တွယ်ဖြေရှင်းရမည်ဟု ၎င်းက ပြောသည်။

လက်ရှိတွင် မြန်မာနိုင်ငံအတွင်းရှိ ရှမ်းပြည်နယ်သည် အစိုးရ၏ ထိန်းချုပ်မှု ကင်းမဲ့နေကြောင်း သက်ဆင်က ထောက်ပြသည်။

“မူးယစ်ဆေး ထုတ်လုပ်သူတွေကို အမြန်ကိုင်တွယ်ဖြေရှင်းဖို့ နိုင်ငံတကာက လက်ခံနိုင်တဲ့ နည်းလမ်းတွေရှိရမယ်” ဟု သက်ဆင်က ပြောသည်။

ထိုင်းနိုင်ငံခြားရေးဝန်ကြီးသည် UWSA ကို နှိမ်နှင်းရန် မြန်မာနှင့် မကြာမီ အစီအမံများ ဆွေးနွေးမည်ဖြစ်ကြောင်း ၎င်းက ပြောကြားခဲ့သည်။

သက်ဆင်သည် ၂၀၀၃ ခုနှစ်ကလည်း မူးယစ်ဆေးဝါး တိုက်ဖျက်ရေးစစ်ပွဲ ကြေညာခဲ့ဖူးသည်။

 UWSA တပ်ဖွဲ့ကိုတွေ့ရစဉ်

ထိုစစ်ဆင်ရေးအတွင်း ဥပဒေမဲ့သတ်ဖြတ်မှု ၂၈၀၀ ကျော်ရှိခဲ့ကာ ၂၀၂၅ ခုနှစ်၊ မေလ ၂၇ ရက်တွင်လည်း မူးယစ်စစ်ပွဲသစ် ထပ်မံကြေညာခဲ့ခြင်းဖြစ်သည်။

ယခုတစ်ကြိမ်တွင်လည်း မူးယစ်ဆေးဝါး ရောင်းဝယ်သူများကို ရှာဖွေရန်အတွက် ရပ်ကွက်အလိုက်၊ မြို့နယ် အလိုက် အသေးစိတ် စစ်ဆေးကြရန် သက်ဆင်က ပြည်ထဲရေးဝန်ကြီးဌာနနှင့် ရဲတပ်ဖွဲ့အကြီးအကဲကိုယ်စား ပြောကြားခဲ့သည်။

သက်ဆင်က မူးယစ်ဆေးဝါး ရောင်းဝယ်သူများကို ရှာဖွေရန်အတွက် လူအုပ်စုလိုက် စစ်ဆေးမှုများ ပြုလုပ်ခွင့် ရရှိရန် ၎င်း၏သမီးဖြစ်သူ ပေတုန်တန်(Paetongtarn Shinawatra) ထံမှ ခွင့်ပြုချက်ရရှိရန် ကြိုးပမ်းသွားမည် ဟုဆိုသည်။

လေ့လာတွေ့ရှိချက်များကို ပြည်ထဲရေးဝန်ကြီးဌာနနှင့် အမျိုးသားရဲတပ်ဖွဲ့ အကြီးအကဲတို့ထံ တင်ပြသွားမည် ဖြစ်ကြောင်း ၎င်းက ဆိုသည်။

ထို့ပြင် သက်ဆင်သည် ၂၀၀၃ ခုနှစ်က ပြုလုပ်ခဲ့သည့် မူးယစ်စစ်ပွဲတွင်လည်း အောင်မြင်မှုများ ရရှိခဲ့ကြောင်း ပြောကြားခဲ့ပြီး မူးယစ်ဆေးဝါး မှောင်ခိုကူးမှုများကို တစ်လက်မ မကျန် စေ့စေ့စပ်စပ် စုံစမ်းစစ်ဆေးခဲ့သည်ဟု ဆိုသည်။

Source: The Nation

၂၀၂၅ ခုနှစ်၊ မေလ ၂၈

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် မြန်မာနိုင်ငံတွင် ရွေးကောက်ပွဲ ကျင်းပရေးနှင့်ပတ်သက်ပြီး သူ၏ သဘောထားများကို ထုတ်ဖော် ပြောကြားထားသည်။

အဆိုပါ ပြောစကားများအနက် တချို့သော စကားများကို စုစည်း၍ အပိုင်းလိုက် CNI သတင်းဌာနက ထုတ်နုတ် ဖော်ပြလိုက်ပါသည်။

CNI International News

နယူးဒေလီ၊ မေလ ၂၈

အိန္ဒိယနှင့်ပါကစ္စတန်စစ်တပ်ကြား ဒရုန်းတိုက်ပွဲများသည် မျက်မှောက်ခေတ်တွင် လက်နက်ပြိုင်ဆိုင်မှုအသစ်ကို လေ့လာခွင့်ရခဲ့ကြသည်ဟု ရိုက်တာမှ ဖော်ပြခဲ့သည်။

အိန္ဒိယနှင့်ပါကစ္စတန် စစ်တပ်တို့သည် အတိတ်ကာလက ဖြစ်ပွားခဲ့သည့် တိုက်ခိုက်မှုများအတွင်း ခေတ်မီ တိုက်လေယာဉ်များ၊ သမားရိုးကျ ဒုံးကျည်များနှင့် လက်နက်ကြီးများကိုသာ အသုံးပြုခဲ့သော်လည်း ယခုလ အတွင်း ဖြစ်ပွားခဲ့သည့် ၄ ရက်ကြာ တိုက်ပွဲတွင် နှစ်နိုင်ငံစလုံးသည် ဒရုန်းများကို ပထမဆုံးအကြိမ် အသုံးပြုခဲ့ ကြသည်။

အမေရိကန်၏ ကြားဝင်စေ့စပ်ပေးမှုကြောင့် မေလ ၁၀ ရက်တွင် အပစ်အခတ်သဘောတူညီမှု ရရှိခဲ့သော်လည်း ပြီးခဲ့သည့်နှစ်က ကာကွယ်ရေးအတွက် ဒေါ်လာ ၉၆ ဘီလျံကျော် အသုံးပြုခဲ့သည့် အိန္ဒိယနှင့် ပါကစ္စတန်တို့သည် လက်ရှိတွင် ဒရုန်းလက်နက်ပြိုင်ဆိုင်မှု မြင့်တက်လာခဲ့ကြောင်း ရိုက်တာသတင်းဌာန၏ အင်တာဗျူးတစ်ခုတွင် ဖော်ပြခဲ့သည်။

ဒရုန်းအရောင်းပြပွဲကို တွေ့ရစဉ်

ရိုက်တာသည် ထိုအကြောင်းအရာနှင့်ပတ်သက်ပြီး လုံခြုံရေးအရာရှိများ၊ စက်မှုလုပ်ငန်းရှင်များနှင့် ကျွမ်းကျင် သူများ အပါအဝင် နှစ်နိုင်ငံစလုံးရှိ လူ ၁၅ ဦးနှင့် အင်တာဗျူး ပြုလုပ်ခဲ့ခြင်းဖြစ်သည်။

ဒရုန်းများသည် လူသားယာဉ်မောင်းများ လိုက်ပါမောင်းနှင်စရာ မလိုဘဲ ပစ်မှတ်ကို တိုက်ခိုက်မှုတွင်  လေယာဉ်မှူးများ၏ အသက်အန္တရာယ်ကို လျှော့ချနိုင်ခြင်းကြောင့် နှစ်နိုင်ငံကြား ဒရုန်းများ အသုံးပြုမှု မြင့်တက်လာဖွယ်ရှိကြောင်း အင်တာဗျူး၌ ပါဝင်ဖြေဆိုသူနှစ်ဦးက ပြောကြားခဲ့သည်။

အိန္ဒိယသည် ပြည်တွင်း စက်မှုလုပ်ငန်းအပေါ် ရင်းနှီးမြှုပ်နှံမှုများစွာ ပြုလုပ်ပြီး လာမည့် ၁၂ လမှ ၂၄ လအတွင်း ဒရုန်းများ ထုတ်လုပ်ရေးအတွက် ဒေါ်လာ သန်း ၄၇၀ ခန့် အသုံးပြုရန် စီစဉ်ထားသည်ဟု အိန္ဒိယဒရုန်းအဖွဲ့ချုပ်၏ ကျွမ်းကျင်သူ စမစ် ရှား (Smit Shah) က ပြောကြားခဲ့သည်။

ဒရုန်းအရောင်းပြပွဲကို တွေ့ရစဉ်

ထိုရင်းနှီးမြှုပ်နှံမှု ငွေပမာဏသည် ပါကစ္စတန်နှင့် စစ်ပွဲမဖြစ်ပွားမီ အချိန်ကထက် သုံးဆခန့် ပိုမိုများပြားခဲ့ကြောင်း ကုမ္ပဏီပေါင်း ၅၅၀ ကျော်ကို ကိုယ်စားပြုသည့် အိန္ဒိယဒရုန်းအဖွဲ့ချုပ်က ပြောကြားခဲ့သည်။

အိန္ဒိယသည် ယခုလ အတွင်းကလည်း အရေးပေါ် စစ်လက်နက်ပစ္စည်း ဝယ်ယူရေး ရန်ပုံငွေအတွက် ဒေါ်လာ ၄ ဒသမ ၆ ဘီလျံကို အတည်ပြုပေးခဲ့သည်။

အိန္ဒိယစစ်တပ်သည် တိုက်ပွဲဝင်ဒရုန်းများနှင့် ကင်းထောက်ဒရုန်း များအတွက် ငွေကြေးပိုမိုသုံးစွဲရန် စီစဉ်လျက် ရှိသည်။

ပါကစ္စတန်လေတပ်ကလည်း တိုက်လေယာဉ်များ ဆုံရှုံးမည့်အရေးကို ရှောင်လွှဲနိုင်ရန်အတွက် ဒရုန်းများကို ပိုမိုရရှိရန် တွန်းအားပေး လုပ်ဆောင်နေသည်ဟု ပါကစ္စတန်သတင်းရင်းမြစ်တစ်ခုက ပြောကြားခဲ့သည်။

ပါကစ္စတန်သည် ဒရုန်းသုတေသနနှင့် ထုတ်လုပ်ရေး စွမ်းဆောင်ရည်များကို မြှင့်တင်ရန် တရုတ်၊ တူရကီတို့နှင့် ပူးပေါင်းဆောင်ရွက်မှုအား မြှင့်တင်ရန် ကြိုးပမ်းနိုင်ကြောင်း Janes ကာကွယ်ရေးထောက်လှမ်းမှုကုမ္ပဏီ၏ ကျွမ်းကျင်သူ အိုရှီး မာဂျမ်ဒါ (Oishee Majumdar) က ပြောကြားခဲ့သည်။

Source: ရိုက်တာ

CNI International News

ကွာလာလမ်ပူ၊ မေလ ၂၈

အာဆီယံနိုင်ငံများသည် အမေရိကန်သမ္မတ ဒေါ်နယ်ထရမ့် (Donald Trump) ၏ ကုန်သွယ်ခွန် တိုးမြှင့်ကောက်ခံ မှုကြောင့် တရုတ်နှင့် ပင်လယ်ကွေ့နိုင်ငံများသို့ တိမ်းစောင်းလာနေသည်ဟု Nikkei Asia မှ ဖော်ပြခဲ့သည်။

အာဆီယံသည် စီးပွားရေး ပူးပေါင်းဆောင်ရွက်ရေးကို မြှင့်တင်ရန် ရည်ရွယ်သည့် အနေဖြင့် တရုတ်၊ ပင်လယ်ကွေ့ နိုင်ငံများနှင့် သုံးပွင့်ဆိုင် အစည်းအဝေးကို မေလ ၂၇ ရက်က ပြုလုပ်ခဲ့သည်။

အာဆီယံခေါင်းဆောင်များ၊ တရုတ်နှင့် ပင်လယ်ကွေ့ ပူးပေါင်းဆောင်ရွက်ရေးကောင်စီ (GCC) တို့သည် စီးပွားရေး ပူးပေါင်းဆောင်ရွက်မှုကို မြှင့်တင်ရန် ပူးတွဲအလုပ်ရုံအဖွဲ့ ဖွဲ့စည်းရေး သဘောတူညီလိမ့်မည်ဟု Nikkei Asia သတင်းဌာနက မြင်တွေ့ခဲ့ရသည့် ကြေညာချက်မူကြမ်းတွင် ဖော်ပြထားသည်။

GCC တွင် ဘာရိန်း၊ ကူဝိတ်၊ အိုမန်၊ ကာတာ၊ ဆော်ဒီနှင့် ယူအေအီးနိုင်ငံတို့ ပါဝင်သည့် အဖွဲ့ဖြစ်သည်။

ထရမ့် အစိုးရအဖွဲ့သည် ဧပြီလအတွင်းက အာဆီယံအဖွဲ့ဝင် နိုင်ငံများ အပါအဝင် ကမ္ဘာတစ်ဝန်းမှ နိုင်ငံများအပေါ် ကုန်သွယ်ခွန်များ တိုးမြှင့်ကောက်ခံကြောင်း ကြေညာခဲ့ခြင်းဖြစ်သည်။

အာဆီယံနိုင်ငံများနဲ့ GCC အဖွဲ့ဝင်များကို တွေ့ရစဉ်

ထရမ့်၏ ကုန်သွယ်ခွန် တိုးမြှင့်မှုများအနက် ကမ္ဘောဒီးယားနိုင်ငံအပေါ် ၄၉ ရာခိုင်နှုန်း၊ လာအိုနိုင်ငံအပေါ် ၄၈  ရာခိုင်နှုန်း၊ ဗီယက်နမ်နိုင်ငံအပေါ် ၄၆ ရာခိုင်နှုန်း၊ မြန်မာနိုင်ငံအပေါ် ၄၄ ရာခိုင်နှုန်း၊ ထိုင်းနိုင်ငံအပေါ် ၃၆ ရာခိုင်နှုန်း၊ အင်ဒိုနီးရှားနိုင်ငံအပေါ် ၃၂ ရာခိုင်နှုန်း၊ မလေးရှားနိုင်ငံအပေါ် ၂၄ ရာခိုင်နှုန်း၊ ဖိလစ်ပိုင်နိုင်ငံအပေါ် ၁၇ ရာခိုင်နှုန်းနှင့် စင်္ကာပူနိုင်ငံအပေါ် ၁၀ ရာခိုင်နှုန်း အစရှိသဖြင့် နှုန်းထားအသီးသီး ကောက်ခံခဲ့သည်။

ထို့ကြောင့် အာဆီယံသည် တရုတ်၊ GCC တို့နှင့် စီးပွားရေး ပူးပေါင်းဆောင်ရွက်မှုများကို မြှင့်တင်ရန် ကြိုးပမ်းခဲ့ ခြင်းဖြစ်သည်။

တရုတ်သည် အာဆီယံ၏ အကြီးဆုံး ကုန်သွယ်ဖက် နိုင်ငံဖြစ်လာခဲ့ပြီး ၂၀၂၃ ခုနှစ်အတွင်း အပြန်အလှန် ကုန်သွယ်မှု တန်ဖိုး ဒေါ်လာ ၇၀၂ ဘီလျံအထိ ရှိခဲ့သည်။

GCC သည် အာဆီယံ၏ သတ္တမအကြီးဆုံး ကုန်သွယ်ဖက် အဖွဲ့ဖြစ်ခဲ့ပြီး ၂၀၂၃ ခုနှစ်အတွင်း ကုန်သွယ်မှုတန်ဖိုး ဒေါ်လာ ၁၃၀ ဒသမ ၇ ဘီလျံရှိခဲ့သည်။

မလေးရှားနိုင်ငံ၊ ကွာလာလမ်ပူ (Kuala Lumpur) မြို့တော်တွင် ပြုလုပ်ခဲ့သည့် သုံးပွင့်ဆိုင် အစည်းအဝေးအတွင်း အာဆီယံ၊ တရုတ်နှင့် GCC ခေါင်းဆောင်များသည် အမေရိကန်၏ ကုန်သွယ်ရေးမူဝါဒများ အပါအဝင် ကမ္ဘာလုံး ဆိုင်ရာ စီးပွားရေး မရေရာမှုများကို ကြံ့ကြံ့ခံနိုင်ရန်နှင့် စီးပွားရေး ပူးပေါင်းဆောင်ရွက်မှုများကို တိုးမြှင့်ရန် ဆွေးနွေးခဲ့ကြသည်။

Source: Nikkei Asia

CNI International News

ဘန်ကောက်၊ မေလ ၂၇

ထိုင်းဝန်ကြီးချုပ် ပေတုန်တန်(Paetongtarn Shinawatra) သည် မကြာသေးမီက ဗြိတိန်နှင့် မိုနာကိုသို့ သွားရောက်ခဲ့သည့် ခရီးစဉ်များအတွင်း အဒေါ်ဖြစ်သူ ဝန်ကြီးချုပ်ဟောင်း ယင်လတ်(Yingluck Shinawatra) နှင့် တွေ့ဆုံခဲ့ခြင်းမရှိကြောင်း မေလ ၂၅ ရက်က ပြောကြားခဲ့သည်ဟု The Nation မှ ဖော်ပြခဲ့သည်။

ထို့ပြင် ပုဂ္ဂလိက အပန်းဖြေ အားလပ်ရက်အတွင်း သွားရောက်ခဲ့သည့် ထိုခရီးစဉ်များတွင် ပြည်သူ့ဘဏ္ဍာငွေကို အသုံးပြုခဲ့သည်ဆိုသည့် စွပ်စွဲချက်များကိုလည်း ငြင်းဆိုခဲ့သည်။

မကြာသေးမီက အွန်လိုင်းပေါ်တွင် ပျံ့နှံ့ခဲ့သည့် ယင်လတ်နှင့်အတူ ရိုက်ကူးထားသည့် ဓာတ်ပုံသည် ဗြိတိန်နှင့် မိုနာကို ခရီးစဉ်များအတွင်း ရိုက်ကူးခဲ့သည့်ပုံ မဟုတ်ဘဲ ယခင်က ရိုက်ကူးထားသည့်  ပုံအဟောင်းဖြစ်သည်ဟု ပေတုန်တန်က ဘန်ကောက် (Bangkok) မြို့တော် ဒွန်မောင်း (Don Mueang) ရပ်ကွက်ရှိ တော်ဝင်ထိုင်းလေတပ် စခန်းတွင် ပြောကြားခဲ့သည်။

လူမှုမီဒီယာ အသုံးပြုသူများကမူ ထိုဓာတ်ပုံထဲတွင် ပေတုန်တန်၏ ဆံပင်ပုံစံသည် လက်ရှိဆံပင်ပုံစံနှင့် အတူတူ ဖြစ်ကြောင်း နှိုင်းယှဉ်ပြောကြား နေကြသော်လည်း ပေတုန်တန်ကမူ ထိုထင်ကြေးပေးမှုများသည် ရယ်စရာ ကောင်းကြောင်း ပြောကြားခဲ့သည်။

ထိုင်းဝန်ကြီးချုပ် ပေတုန်တန်နဲ့ ထိုင်းဝန်ကြီးချုပ်ဟောင်း ယင်လတ်ကို တွေ့ရစဉ်

“ဆံပင်ပုံစံတူတာနဲ့ပဲ အရာအားလုံးက အမှန်ပဲလို့ ပြောလို့ရပါ့မလား။ ကျမရဲ့ နှာခေါင်းကို ခွဲစိတ်ပြုပြင်မထားလို့ တော်သေးတာပေါ့။ တော်ကြာ လူတွေက နှာခေါင်းကိုကြည့်ပြီး သုံးသပ်ချက်တွေ ထုတ်ပြန်နေကြပါဦးမယ်” ဟု ပေတုန်တန်က ပြောကြားခဲ့သည်။

ယင်လတ်နှင့် တွေ့ဆုံခဲ့ခြင်း ရှိ၊မရှိ မေးမြန်းခံရချိန်တွင်လည်း ပေတုန်တန်က “ဟင့်အင်း ကျမတို့ မတွေ့ခဲ့ပါဘူး” ဟု ဖြေကြားခဲ့သည်။

ပြီးခဲ့သည့် ရက်ပိုင်းအတွင်း တရားရုံးက ယင်လတ်ကို ဆန်စပါး စီမံကိန်းနှင့်ပတ်သက်ပြီး ဒဏ်ငွေ ချမှတ်ခဲ့ပြီး နောက် ၎င်းတို့နှစ်ဦးကြား အဆက်အသွယ် ရှိခဲ့သည်ဟု ပေတုန်တန်က ပြောသည်။

“ဒီလိုအခြေအနေမျိုးမှာတော့ ကျမတို့ ဆွေးနွေးခဲ့ကြတာပေါ့။ ကျမတို့က တစ်ယောက်နဲ့တစ်ယောက် အားပေးကူညီကြတယ်လေ” ဟု ၎င်းက ဆိုသည်။

ဖခင်ဖြစ်သူ သက်ဆင်(Thaksin Shinawatra) သည် ပြည်ပသို့ ထွက်ခွာသွားခြင်း ရှိ၊မရှိ မေးမြန်းခံရချိန်တွင်လည်း ပေတုန်တန်က သက်ဆင်သည် ဘန်ကောက်မြို့တော်ရှိ Chan Song La စံအိမ်မှာပင် နေထိုင်နေဆဲဖြစ်ကြောင်း ပြန်လည်ဖြေကြားခဲ့သည်။

Source: The Nation

CNI International News

အဘူဂျာ၊ မေလ ၂၇

နိုက်ဂျီးရီးယားနိုင်ငံ၏ အရှေ့တောင်ပိုင်းတွင် ပိတ်ပင်ခံထားရသော ခွဲထွက်ရေးအဖွဲ့ဖြစ်သည့်  လက်နက်ကိုင်အဖွဲ့ ဖြစ်သော(IPOB)က ဒေသခံများကို နေအိမ်အတွင်း၌သာ နေထိုင်ကြရန် အမိန့်ထုတ်ပြန်ခဲ့မှုကြောင့် လွန်ခဲ့သည့် လေးနှစ်ကျော်အတွင်း ဒေသတွင်း သေဆုံးသူ ၇၀၀ ကျော်ရှိကြောင်း ထောက်လှမ်းရေးအဖွဲ့တစ်ဖွဲ့၏ အစီရင်ခံစာ အသစ်တွင် ဖော်ပြထားသည်ဟု ရိုက်တာမှ ဖော်ပြခဲ့သည်။

နိုက်ဂျီးရီးယားအရှေ့တောင်ပိုင်းဒေသကို ခွဲထွက်ရန် ကြိုးပမ်းနေသည့် IPOB အဖွဲ့ကို နိုက်ဂျီးရီးယားအာဏာပိုင် များက အကြမ်းဖက်အဖွဲ့အဖြစ် သတ်မှတ်ထားသည်။

SBM ထောက်လှမ်းရေးအဖွဲ့၏ အစီရင်ခံစာအရ IPOB အဖွဲ့သည် အပတ်စဉ် တနင်္လာနေ့တိုင်း နေအိမ်အတွင်း၌ သာ နေထိုင်ရန် ထုတ်ပြန်ထားသည့် အမိန့်ကို မလိုက်နာသော အရပ်သားများကို သတ်ဖြတ်ခဲ့ကြောင်း ဖော်ပြထား သည်။

ထို့ပြင် IPOB နှင့် အစိုးရတပ်ဖွဲ့များကြား တိုက်ပွဲများတွင်လည်း အရပ်သားများ သေဆုံးခဲ့သည်ဟု ဆိုသည်။

IPOB ခေါင်းဆောင် နမ်ဒီကာနူကို တွေ့ရစဉ်

“မီးရှို့မှုတွေ၊ လုယက်မှုတွေနဲ့ ပစ်မှတ်ထား လုပ်ကြံသတ်ဖြတ်မှုတွေ အပါအဝင် IPOB ရဲ့ နည်းဗျူဟာတွေက အကြောက်တရားကို ဖန်တီးနေပါတယ်”ဟု SBM ထုတ်ပြန်ချက်တွင် ဖော်ပြထားသည်။

“၂၀၂၁ ခုနှစ်မှာ နေအိမ်အတွင်းမှာသာ နေထိုင်ကြဖို့ ထုတ်ပြန်ထားတဲ့ အမိန့်ကို လိုက်နာမှုနှုန်း ၈၂.၆၁ ရာခိုင်နှုန်း အထိ မြင့်တက်ခဲ့ပေမယ့်လည်း သုတေသန လေ့လာချက်အရ အမှန်တကယ် လိုက်နာမှုနှုန်းက ၂၉ ရာခိုင်နှုန်းပဲရှိ ပြီး အများစုကတော့ အတင်းအကြပ်စေခိုင်းလို့ လိုက်နာနေရတာ ဖြစ်ပါတယ်”ဟု အစီရင်ခံစာတွင် ဖော်ပြထား သည်။

IPOB ပြောရေးဆိုခွင့်ရှိသူ တစ်ဦးကမူ ထိုသေဆုံးမှုများအတွက် ၎င်းတို့အဖွဲ့တွင် တာဝန်မရှိကြောင်း ငြင်းဆိုထား သည်။

အစိုးရကမူ စစ်တမ်းနှင့်ပတ်သက်ပြီး မှတ်ချက်ပြု ထုတ်ပြန်ထားခြင်း မရှိပေ။

၂၀၂၁ ခုနှစ်၊ သြဂုတ်လက နိုင်ငံအရှေ့တောင်ပိုင်းရှိ ပြည်နယ် ၅ ခုတွင် IPOB သည် ဒေသခံများကို နေအိမ် အတွင်းမှာသာ နေထိုင်ရန်နှင့် အပြင်မထွက်ရ အမိန့်ကို ထုတ်ပြန်ခဲ့သည်။

IPOB အဖွဲ့သည် အဘူဂျာ (Abuja) မြို့တော်တွင် အကြမ်းဖက်မှု စွဲချက်များဖြင့် တရားရင်ဆိုင်နေရသည့် ၎င်းတို့၏ ခေါင်းဆောင် နမ်ဒီကာနူ(Nnamdi Kanu)ကို ပြန်လွှတ်ပေးရန်အတွက် အစိုးရကို ဖိအားပေးရန် ထိုအမိန့်ကို ထုတ်ပြန်ခဲ့ခြင်းဖြစ်သည်။

Source: ရိုက်တာ

CNI International News

မော်စကို၊ မေလ ၂၇

ရုရှားက ယူကရိန်းကို ပြင်းထန်သည့် ဒရုန်းတိုက်ခိုက်မှုများ လုပ်ဆောင်ခဲ့သည့်အတွက် အမေရိကန်သမ္မတ ဒေါ်နယ်ထရမ့်(Donald Trump )က ရုရှားသမ္မတ ပူတင်(Vladimir Putin)ကို ရူးသွပ်နေသူဖြစ်ကြောင်း ပြောကြားခဲ့သည်ဟု ရိုက်တာမှ ဖော်ပြခဲ့သည်။

အိပ်ပျော်နေသော ယူကရိန်းနိုင်ငံသားများသည် သုံးညဆက်တိုက် ရုရှား၏ လေကြောင်းတိုက်ခိုက်မှုနှင့် လန့်နိုးခဲ့ရသောကြောင့် ထရမ့်က Truth Social ပေါ်၌ ယခုကဲ့သို့ မှတ်ချက်ပြု ပြောကြားခဲ့ခြင်းဖြစ်သည်။

ရုရှားသည် ယူကရိန်းကို ညအချိန်တွင် ဒရုန်း ၃၅၅ စင်းနှင့် ခရုစ်ဒုံးကျည် ၉ စင်းတို့ဖြင့် တိုက်ခိုက်ခဲ့ကြောင်း ယူကရိန်းလေတပ်က ပြောကြားခဲ့သည်။

“ပူတင်က တစ်ခုခုတော့ ဖြစ်နေပြီ။ သူက လုံးဝရူးသွပ်သွားတာပဲ”ဟု ထရမ့်က Truth Social တွင် ရုရှားက ယူကရိန်းကို လေကြောင်းတိုက်ခိုက်မှုဖြစ်စဉ်ကို ရည်ညွှန်းပြီး ရေးသားခဲ့သည်။

အမေရိကန်သမ္မတ ဒေါ်နယ်ထရမ့်နဲ့ ယူကရိန်းသမ္မတ ဇာလန်းစကီးကို တွေ့ရစဉ်

“သူက ယူကရိန်းရဲ့ အစိတ်အပိုင်းကို လိုချင်တာမဟုတ်ဘဲ တစ်နိုင်ငံလုံးကို လိုချင်တာပါလို့ ကျနော် အမြဲပြောလေ့ ရှိပါတယ်။ ကျနော် ပြောတဲ့စကားက မှန်ကောင်းမှန်နိုင်ပါတယ်။ ဒါပေမဲ့ သူက ယူကရိန်းတစ်နိုင်ငံလုံးကို ရအောင် လုပ်မယ်ဆိုရင် ဒါက ရုရှားရဲ့ ကျဆုံးခန်းဆီ ဦးတည်သွားပါလိမ့်မယ်”ဟု ထရမ့်က ပြောသည်။

ပူတင်ကို မကြာခဏ ချီးကျူးပြောကြားခဲ့သော ထရမ့်၏ ယခုမှတ်ချက်စကားသည် ပူတင်ကို ရှားရှားပါးပါး ပြစ်တင်ကြိမ်းမောင်းမှုဖြစ်ခဲ့သည်။

ထို့ပြင် ထရမ့်က ယူကရိန်းသမ္မတ ဇာလန်းစကီး(Zelenskiy) ကိုလည်း ဝေဖန်ခဲ့သည်။

ဇာလန်းစကီးအနေဖြင့် စကားများ လျှောက်ပြောနေခြင်းသည် ယူကရိန်းနိုင်ငံကို ဒုက္ခရောက်အောင် လုပ်နေခြင်း ဖြစ်သည်ဟု ထရမ့်က ဝေဖန်ခဲ့သည်။

“သူ့ရဲ့နှုတ်က ထွက်လာတဲ့ စကားတိုင်းက ပြဿနာတွေကို ဖြစ်စေတာပါ။ ကျနော် မကြိုက်ဘူး။ မပြောဘဲ နေတာ ပိုကောင်းပါတယ်”ဟု ထရမ့်က ပြောကြားခဲ့သည်။

Source: ရိုက်တာ

CNI International News

အိုက်ဇော၊ မေ ၂၇

အိန္ဒိယနိုင်ငံ၊ မီဇိုရမ်ပြည်နယ်အစိုးရသည် မြန်မာနိုင်ငံမှ ဝင်ရောက်လာသည့် ဒုက္ခသည် ၃၃,၀၀၀ ကျော်၏ အချက်အလက် အသေးစိတ်ကို ဘိုင်အိုမက်ထရစ် နည်းပညာဖြင့် စုဆောင်း ကောက်ယူသွားမည်ဖြစ်ကြောင်း India Today မှ ဖော်ပြခဲ့သည်။

ဗဟိုအစိုးရသည် မီဇိုရမ်ပြည်နယ်တွင် ခိုလှုံနေထိုင်လျက်ရှိသည့် မြန်မာဒုက္ခသည်များ၏ ဘိုင်အိုမက်ထရစ် အချက်အလက်များကို စုဆောင်းကောက်ယူရေးအတွက် ဝက်ဘ်ဆိုက်တစ်ခုအား အတည်ပြုခဲ့ကြောင်း ပြည်နယ်ဝန်ကြီးချုပ် လာဒူဟိုမာ (Lalduhoma)ကို အိန္ဒိယပြည်ထဲရေးဝန်ကြီး အမစ်ရှား(Amit Shah)က နယူးဒေလီ၌ မေလ ၂၃ ရက်က ပြုလုပ်ခဲ့သည့် အစည်းအဝေးအတွင်း ပြောကြားခဲ့သည်။

အဆိုပါ ဝက်ဘ်ဆိုက်သည် မကြာသေးမီက အွန်လိုင်းပေါ် ရောက်ရှိခဲ့ပြီဖြစ်ပြီး ပြည်ထဲရေးဝန်ကြီးဌာန၏ အတည်ပြုချက်ကို ရရှိခဲ့ပြီဖြစ်သည်။

ထို့ကြောင့် ထိုဝက်ဘ်ဆိုက်ပေါ်တွင် ဘိုင်အိုမက်ထရစ် အချက်အလက် ကောက်ခံမှုများကို စတင်ပြုလုပ်မည် ဖြစ်ကြောင်း အမည်မဖော်လိုသည့် အရာရှိတစ်ဦးက PTI သတင်းစာကို ပြောကြားခဲ့သည်။

မီဇိုရမ်ပြည်နယ်ဝန်ကြီးချုပ် လာဒူဟိုမာနဲ့ အိန္ဒိယပြည်ထဲရေးဝန်ကြီး အမစ်ရှားကို တွေ့ရစဉ်

ဘိုင်အိုမက်ထရစ်စနစ်ဖြင့် အချက်အလက် ကောက်ယူမှုသည် လက်ဗွေများ၊ မျက်လွှာ၊ မျက်ဝန်း၊ စကားသံ၊ မျက်နှာပုံပန်းသဏ္ဍာန် အစရှိသည့် အချက်အလက်များကို မှတ်တမ်းကောက်ယူခြင်းဖြစ်သည်။

ဒုက္ခသည်များသည် မြန်မာနိုင်ငံသားများဖြစ်သဖြင့် အိန္ဒိယ၏ မူလဘိုင်အိုမက်ထရစ် ကောက်ခံသည့်စနစ်နှင့် မှတ်တမ်းကောက်ယူနိုင်ခဲ့ခြင်းမရှိဘဲ နှောင့်နှေးကြန့်ကြာခဲ့ရသည်ဟု တာဝန်ရှိသူတစ်ဦးက ပြောကြားခဲ့သည်။

ထို့နောက် ပုံစံသစ်ပြောင်းလဲပြီး စနစ်သစ်တစ်ခု ရေးဆွဲကာ ဝက်ဘ်ဆိုက် ထောင်နေရသဖြင့် နှောင့်နှေး ကြန့်ကြာမှုရှိခဲ့ကြောင်း အမည်မဖော်လိုသည့် ထိုအရာရှိက ပြောကြားခဲ့သည်။

အိန္ဒိယအစိုးရ၏ မှတ်တမ်းများအရ မီဇိုရမ်ပြည်တွင် ခိုလှုံနေထိုင်နေသည့် မြန်မာဒုက္ခသည်ပေါင်း ၃၃,၀၂၃ ဦးရှိပြီး ၎င်းတို့အနက် ကလေးငယ် ၁၂,၆၆၁ ဦးပါဝင်ကြောင်း ဖော်ပြထားသည်။

ဒုက္ခသည်အများစုမှာ မီဇိုများနှင့် လူမျိုးစု ဆက်နွှယ်သည့် မြန်မာနိုင်ငံ၏ ချင်းပြည်နယ်မှ ချင်းလူမျိုးများဖြစ်သည်။

ထိုချင်းလူမျိုးများသည် ၂၀၂၁ ခုနှစ်၊ ဖေဖော်ဝါရီလတွင် မြန်မာ့တပ်မတော်က အာဏာရယူခဲ့ပြီးကတည်းက မီဇိုရမ်ပြည်နယ်၌ ခိုလှုံနေထိုင်ခဲ့သူများဖြစ်သည်။

၂၀၂၃ ခုနှစ်၊ ဧပြီလကလည်း ပြည်ထဲရေးဝန်ကြီးဌာနသည် မြန်မာနှင့် နယ်စပ်ချင်း ထိစပ်နေသည့် မီဇိုရမ်နှင့် မဏိပူရ ပြည်နယ်အစိုးရများကို ၎င်းတို့ပြည်နယ်များအတွင်း ခိုလှုံနေထိုင်နေသော တရားမဝင် ရွှေ့ပြောင်း နေထိုင်သူများ၏ အသေးစိတ် အချက်အလက်များကို ကောက်ယူရန် ညွှန်ကြားခဲ့သည်။

Source: India Today

CNI News

၂၀၂၅ ခုနှစ်၊ မေလ ၂၆

မလေးရှားနိုင်ငံ၊ ကွာလာလမ်ပူမြို့ရှိ ကွန်ဗင်းရှင်းစင်တာတွင် (၄၆)ကြိမ်မြောက် အာဆီယံထိပ်သီး ခေါင်းဆောင် များ အစည်းအဝေးကို ၂၀၂၅ ခုနှစ်၊ မေလ ၂၆ ရက်က ကျင်းပနေကြသည်။

အဆိုပါ အစည်းအဝေးသို့ မြန်မာနိုင်ငံက နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကို တက်ရောက်ခွင့် မပြုဘဲ နိုင်ငံခြားရေးဝန်ကြီးဌာနက အမြဲတမ်းအတွင်းဝန်  ဦးဆောင်သည့် ကိုယ်စားလှယ်အဖွဲ့သာ တက်ရောက်ခဲ့သည်။

ယနေ့ ကျင်းပသည့် အာဆီယံထိပ်သီး အစည်းအဝေးတွင် မြန်မာ့နိုင်ငံရေး အကျပ်အတည်း ဖြေရှင်းရန် အာဆီယံ ၏ ဘုံသဘောထား ၅ ချက်နှင့် ပတ်သက်ပြီး ပြန်လည်သုံးသပ်ကြမည်ဖြစ်ကြောင်း သိရသည်။