CNI International News

ပြုံယမ်း၊ စက်တင်ဘာ ၉

မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) သည် ရေတပ်စခန်းတစ်ခု ဆောက်လုပ်ရေး လုပ်ငန်းခွင်တစ်ခုသို့ သွားရောက်သည့် ခရီးစဉ်အတွင်း ရေတပ်အင်အားကို မြှင့်တင်မှု၏ အရေးကြီးပုံအား အလေးထား ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

"အခုဆိုရင် ကျနော်တို့ဟာ ကြီးမားတဲ့ စစ်သင်္ဘောတွေနဲ့ ရေငုပ်သင်္ဘောတွေကို မကြာခင် ပိုင်ဆိုင်ရတော့မှာပါ။ ရေတပ်စခန်း ဆောက်လုပ်ရေးဟာ ကြီးမားတဲ့ စစ်သင်္ဘောတွေအတွက် မဖြစ်မနေ လုပ်ဆောင်ရမယ့် တာဝန် တစ်ခု ဖြစ်လာခဲ့ပါပြီ" ဟု ကင်မ်က ပြောကြားခဲ့ကြောင်း နိုင်ငံပိုင် KCNA သတင်းအေဂျင်စီက စက်တင်ဘာ ၈ ရက်တွင် ဖော်ပြခဲ့သည်။

ထိုခရီးစဉ်အတွင်း ကင်မ်က စစ်သင်္ဘောများ၏ လက်နက်စနစ်များကို တပ်ဆင်နိုင်သည့် ရေတပ်ဆိပ်ကမ်းတစ်ခု ဆောက်လုပ်ရန်လည်း လိုအပ်ကြောင်း ပြောဆိုခဲ့သည်။

ထို့နောက် ဆိပ်ကမ်းကို ကာကွယ်ရန် ကမ်းရိုးတန်း ကာကွယ်ရေးစနစ်များနှင့် လေယာဉ်ပစ် လက်နက်စနစ်များ ဖြန့်ကြက်ချထားမည့် အစီအစဉ်များကိုလည်း ထုတ်ဖော်ပြောကြားခဲ့သည်။

နိုင်ငံ၏ အနောက်ဘက်နှင့် အရှေ့ဘက် ပင်လယ်ရေကြောင်း နယ်စပ်များတွင် ထိုကဲ့သို့ စစ်စခန်းများ တည်ဆောက်မှုက ပထဝီနိုင်ငံရေးဆိုင်ရာ အားသာချက်များ ရရှိလိမ့်မည်ဟုလည်း ကင်မ်က ပြောကြားခဲ့သည်။

ရေတပ်ပစ်ခတ်မှုကို ကြည့်နေတဲ့ ကင်မ်ဂျုံအန်ကို တွေ့ရစဉ်

သို့သော် ဆောက်လုပ်ရေးလုပ်ငန်းခွင်၏ တည်နေရာကိုမူ KCNA ကဖော် ပြခဲ့ခြင်းမရှိပေ။

မြောက်ကိုရီးယားသတင်းများကို စောင့်ကြည့်ဖော်ပြပေးနေသည့် 38 North ဝက်ဘ်ဆိုက်က ထုတ်ပြန်သည့် ဂြိုဟ်တုဓာတ်ပုံထဲတွင်မူ Sinpo-C အမျိုးအစား ပဲ့ထိန်းစနစ်တပ် ရေငုပ်သင်္ဘောအသစ်သည် Sinpo South သင်္ဘောကျင်းတွင် အစိတ်အပိုင်းများ တပ်ဆင်နေသည့် မြင်ကွင်းကို တွေ့ရသည်။

ထိုသင်္ဘောကျင်းသို့ သွားရောက်သည့် သီးခြားခရီးစဉ် တစ်ခုတွင်လည်း ကင်မ်က သင်္ဘောများ တည်ဆောက်ရေး လုပ်ငန်း ဖွံ့ဖြိုးတိုးတက်ရန်အတွက် အခြေခံ လိုအပ်ချက်များကို နှစ်ရှည်စီမံကိန်းဖြင့် ချက်ချင်းလုပ်ဆောင်နိုင်ရန် အတွက် ရင်းနှီးမြှုပ်နှံမှုများ တိုးမြှင့်ရန် ညွှန်ကြားခဲ့သည်။

ကင်မ်သည် ကာကွယ်ရေး စက်မှုလုပ်ငန်းတစ်ခုသို့ သွားရောက်ခဲ့ချိန်တွင် လက်နက်ခဲယမ်း ထုတ်လုပ်မှုများကို သိပ္ပံနည်းကျ ပိုမိုခေတ်မီဆန်းသစ်အောင် လုပ်ဆောင်ရန် လိုအပ်ကြောင်းလည်း ပြောကြားခဲ့သည်ဟု KCNA က ဖော်ပြခဲ့သည်။

ထို့ပြင် မကြာသေးမီက အမေရိကန်နှင့် တောင်ကိုရီးယားတို့၏ စစ်ရေးလေ့ကျင့်မှုတို့ကိုလည်း မြောက်ကိုရီးယား က သီးခြား ကြေညာချက်တစ်စောင် ထုတ်ပြန်ပြီး ဝေဖန်ရှုတ်ချခဲ့ကြောင်း KCNA က ဖော်ပြခဲ့သည်။

Source: ဘန်ကောက်ပို့စ်

CNI International News

ကာရာကက်စ်၊ စက်တင်ဘာ ၉

ဗင်နီဇွဲလားနိုင်ငံတွင် သမ္မတရွေးကောက်ပွဲ ဝင်ရောက်ယှဉ်ပြိုင်ခဲ့သည့် အတိုက်အခံများဘက်မှ ကိုယ်စားလှယ် လောင်း အက်ဒ်မန်ဒို ဂွန်ဇာလက် (Edmundo González) သည် စပိန်တွင် ခိုလှုံခွင့်ရရှိခဲ့ပြီးနောက် ဗင်နီဇွဲလား နိုင်ငံအတွင်းမှ ထွက်ပြေးတမ်းရှောင်သွားခဲ့သည်ဟု အေပီမှ ဖော်ပြခဲ့သည်။

ထိုကဲ့သို့ ပြည်ပသို့ ထွက်ပြေးတိမ်းရှောင် သွားခဲ့သဖြင့် နိုင်ငံအတွင်း တစ်ပါတီစနစ်ဖြင့် ဆယ်စုနှစ် ၂ စုကြာ အုပ်ချုပ်နေသည့် အခြေအနေကို အဆုံးသတ်လိုသော သန်းနှင့်ချီသည့် ပြည်သူများ၏ မျှော်လင့်ချက်ကို လျော့ပါး သွားစေခဲ့သည်။

ဇူလိုင်လအတွင်းက ပြုလုပ်ခဲ့သည့် သမ္မတရွေးကောက်ပွဲတွင် ဂွန်ဇာလက် အနိုင်ရရှိခဲ့သည်ဟု အတိုက်အခံများနှင့် ပြည်ပအစိုးရများက ယူဆခဲ့ကြသည်။

ဂွန်ဇာလက် နိုင်ငံအတွင်းမှ ထွက်ပြေးတိမ်းရှောင်သွားသည့် အကြောင်းကို စက်တင်ဘာ ၇ ရက် ညပိုင်းက ဗင်နီဇွဲလား ဒုတိယသမ္မတ ဒယ်လ်စီ ရိုဒရီဂုဇ် (Delcy Rodríguez) က ကြေညာခဲ့ခြင်းဖြစ်သည်။

စပိန်နိုင်ငံခြားရေးဝန်ကြီး ဟိုဆေး မန်နျူရယ် အယ်လ်ဘာရက်စ်ကို တွေ့ရစဉ်

နိုင်ငံရေးတည်ငြိမ်မှုကို ပြန်လည် ထိန်းသိမ်းရန်အတွက် ဖမ်းဆီးမိန့် ထုတ်ပြန်ခံထားရသည့် ဂွန်ဇာလက်ကို နိုင်ငံအတွင်းမှ ဘေးကင်းလုံခြုံစွာ ထွက်ခွာခွင့်ပြုရန် အစိုးရအဖွဲ့က ဆုံးဖြတ်ခဲ့သည်ဟု ဒယ်လ်စီက ပြောကြားခဲ့ သည်။

ထိုအကြောင်းအရာနှင့် ပတ်သက်ပြီး ဂွန်ဇာလက်ဇ်နှင့် အတိုက်အခံခေါင်းဆောင် မာရီယာ ကိုရီနာ မာချာဒို (Maria Corina Machado) တို့က မှတ်ချက်ပေးခဲ့ခြင်း မရှိပေ။

ထိုအချိန်အတောအတွင်း စပိန်၏ ဗဟိုလက်ဝဲယိမ်းအစိုးရက ဂွန်ဇာလက်သည် ဗင်နီဇွဲလားလေတပ်၏ လေယာဉ် တစ်စင်းဖြင့် နိုင်ငံအတွင်းမှ ထွက်ခွာသွားခဲ့ခြင်းဖြစ်ကြောင်း ပြောကြားခဲ့သည်။

စပိန်နိုင်ငံခြားရေးဝန်ကြီး ဟိုဆေး မန်နျူရယ် အယ်လ်ဘာရက်စ် (José Manuel Albares) က ၎င်းတို့ အစိုးရသည် ဂွန်ဇာလက်၏ တောင်းဆိုချက်ဖြင့် နိုင်ငံရေးခိုလှုံခွင့် ပေးမည်ဖြစ်ကြောင်း ပြောကြားခဲ့သည်။

ဂွန်ဇာလက်သည် ဗင်နီဇွဲလားမှ မထွက်ခွာမီ ကာရာကက်စ် ( Caracas) မြို့တော်ရှိ စပိန်သံရုံးတွင် ရက်အနည်း ငယ် နေထိုင်ခဲ့ကြောင်း အယ်လ်ဘာရက်စ်က ပြောကြားခဲ့သည်။

Source: အေပီ

CNI International News

ဝါရှင်တန်၊ စက်တင်ဘာ ၆

အမေရိကန်သမ္မတ အိမ်ဖြူတော်သည် လာမည့်ရက်ပိုင်းအတွင်း ဂါဇာတွင် အပစ်အခတ်ရပ်စဲရန်နှင့် ဟားမာ့စ်တို့ ဖမ်းဆီးထားသည့် ဓားစာခံများ ပြန်လည်လွတ်မြောက်ရန်အတွက် အဆိုပြုချက် အသစ်တစ်ခုကို တင်ပြရန် ကြိုးပမ်းနေကြောင်း ရိုက်တာမှ ဖော်ပြခဲ့သည်။

ထိုအဆိုပြုချက် အသစ်သည် အမေရိကန်၊ ကာတာနှင့် အီဂျစ်တို့က ကြားဝင်စေ့စပ်ပေးနေသည့် အစ္စရေး-ဟားမာ့စ် အပစ်အခတ်ရပ်စဲရေး သဘောတူညီချက်တွင် သဘောထားချင်း ကွဲလွဲစေသော အချက်များကို ပြင်ဆင်ရေးဆွဲရန် ရည်ရွယ်ခြင်းဖြစ်ကြောင်း အမေရိကန်အရာရှိ ၂ ဦး၊ အီဂျစ်လုံခြုံရေး သတင်းရင်းမြစ် ၂ ခု၊ ထိုအကြောင်းအရာနှင့် နီးစပ်သည့် အရာရှိတစ်ဦးတို့က ရိုက်တာကို ပြောကြားခဲ့သည်။

ထိုအဆိုပြုချက်တွင် ပါဝင်သည့် အချက်အများစုကို သဘောတူညီမှု ရရှိခဲ့ပြီဖြစ်သော်လည်း သဘောတူညီချက် မရစေရန် ဟန့်တားနေသည့် အဓိက အချက် ၂ ချက် ကျန်ရှိနေသေးကြောင်း အမေရိကန်အစိုးရအရာရှိတစ်ဦးက သတင်းထောက်များကို ပြောကြားခဲ့သည်။

ထိုအချက် ၂ ချက်မှာ အီဂျစ်နှင့် ဂါဇာတောင်ပိုင်းတွင် ကြားခံနယ်မြေတစ်ခု ထူထောင်ပေးရန် တောင်းဆိုထားသည့် အစ္စရေး၏ တောင်းဆိုချက်ဖြစ်သည်။

ထို့နောက် ဒုတိယအချက်မှာ အကျဉ်းသား လဲလှယ်မှုတွင် အစ္စရေးဘက်က ဖမ်းဆီးထားသော ပါလက်စတိုင်း အကျဉ်းသားများထဲမှ သတ်မှတ်ထားသည့် အကျဉ်းသားများကိုသာ ပြန်လွှတ်ပေးမည်ဆိုသည့် အစ္စရေး၏ တောင်းဆိုချက်ဖြစ်သည်။

လက်ရှိ ရေးဆွဲနေသည့် အဆိုပြုချက်အသစ်ကို လာမည့်သီတင်းပတ် သို့မဟုတ် မကြာမီ အချိန်အတွင်း အပြီးသတ် ရေးဆွဲတင်ပြဖွယ်ရှိသည်ဟု အမည်မဖော်လိုသော အမေရိကန်အရာရှိတစ်ဦးက ပြောကြားခဲ့သည်။

 ဂါဇာဒေသကို တွေ့ရစဉ်

ဟားမာ့စ်အဖွဲ့သည် ပြီးခဲ့သည့် ရက်ပိုင်းက ၎င်းတို့ ဖမ်းဆီးထားသည့် ဓားစာခံ ၆ ဦးအား သတ်ဖြတ်ခဲ့သော  ဖြစ်စဉ် သည် အပစ်အခတ်ရပ်စဲရေး အားထုတ်ကြိုးပမ်းမှုများကို ရှုပ်ထွေးသွားစေခဲ့သည်ဟုလည်း အမေရိကန်အရာရှိ တစ်ဦးက ပြောကြားခဲ့သည်။

အမေရိကန် စေ့စပ်ညှိနှိုင်းရေးအဖွဲ့ကို ဦးဆောင်သည့် စီအိုင်အေ ညွှန်ကြားရေးမှူး ဝီလျံဘန်းစ် (William Burns) သည် အခြားအမေရိကန်အရာရှိများနှင့် ဂါဇာအပစ်ရပ်ရေး အဆိုပြုချက်အသစ်ကို ရေးဆွဲနေသည်ဟုလည်း သိရသည်။

ပြီးခဲ့သည့်လက အမေရိကန်နိုင်ငံခြားရေးဝန်ကြီး အန်တိုနီ ဘလင်ကင် (Antony Blinken) သည် ဂါဇာ အပစ်အခတ်ရပ်စဲရေးအတွက် အရှေ့အလယ်ပိုင်းသို့ နောက်ဆုံးအကြိမ် သွားရောက်ခဲ့သော်လည်း တိုးတက်မှု တစ်စုံတစ်ရာ ရရှိခဲ့ခြင်းမရှိပေ။

အမေရိကန်သည် အပစ်အခတ်ရပ်စဲရေး သဘောတူညီချက်ကို အကောင်အထည်ဖော်ရန်အတွက် ယခင်ကထက် ပိုပြီး တိုင်ပင်ဆွေးနွေးမှု ပုံစံဆန်သည့် ချဉ်းကပ်မှုဖြင့် ပြောင်းလဲလုပ်ဆောင်နေသည်ဟုလည်း အီဂျစ် သတင်းရင်း မြစ်များက ပြောကြားခဲ့သည်။

Source: ရိုက်တာ

CNI International News

ဘန်ကောက်၊ စက်တင်ဘာ ၆

ထိုင်းဝန်ကြီးချုပ် ပေတုန်တန်ရှင်နာဝပ် (Paetongtarn Shinawatra) က မကြာမီ ထုတ်ပြန်မည့် ၎င်း၏မူဝါဒများ သည် ယခင်ဝန်ကြီးချုပ် ဆရီသာ သာဗီဆင် (Srettha Thavisin) ချမှတ်ခဲ့သည့် မူဝါဒများနှင့်  တူညီနေလိမ့်မည် ဟု ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

သို့သော် ထိုင်းလူမျိုးများအား ဒစ်ဂျစ်တယ်ငွေကြေး ထောက်ပံ့မှု အစီအစဉ်တွင် အချို့အချက်များကို ပြောင်းလဲ မည်ဟု ၎င်းက ပြောသည်။

ပေတုန်တန်သည် ဖြူးထိုင်းပါတီ၏ ယာယီဌာနချုပ်ဖြစ်သည့် Shinawatra Tower 3 တွင် စက်တင်ဘာ ၅ ရက်က ၎င်း၏ မူဝါဒများကို အပြီးသတ်နိုင်အောင် ရေးဆွဲလျက်ရှိသည်။

ထိုအဆောက်အအုံအတွင်း ပေတုန်တန်၏ ဖခင်ဖြစ်သူ ဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) ဝင်ရောက်သွားခဲ့သည်ကို တွေ့ရသော်လည်း သက်ဆင်သည် သတင်းထောက်များနှင့် စကားပြော ရန် ငြင်းဆိုခဲ့သည်။

ပေတုန်တန်ကမူ ၎င်းရေးဆွဲနေသော မူဝါဒ ကြေညာချက်တွင် ပါရှိသည့် အကြောင်းအရာများသည် ယခင်အစိုးရ အဖွဲ့၏ မူဝါဒများနှင့် တူညီလိမ့်မည်ဟု ပြောကြားခဲ့သည်။

ထိုင်းဝန်ကြီးချုပ် ပေတုန်တန်ရှင်နာဝပ်နဲ့ သက်ဆင်ကို တွေ့ရစဉ်

"တည်ဆဲ မူဝါဒတွေကိုပဲ အဓိကထားပြီး ပြန်လည်ထည့်သွင်းသွားမှာပါ။ ဒါပေမယ့် ဒစ်ဂျစ်တယ်ငွေကြေး ထောက်ပံ့မယ့် အစီအစဉ်မှာတော့ အပြောင်းအလဲ အနည်းငယ် ရှိပါလိမ့်မယ်" ဟု ပေတုန်တန်က ရွေးကောက်ပွဲ အကြို မဲဆွယ်စည်းရုံးချိန်ကာလက ကတိကဝတ်ဖြစ်သည့် ထိုင်းလူမျိုးများအား ဒစ်ဂျစ်တယ်ငွေကြေး ထောက်ပံ့ မည့် အစီအစဉ်ကို ရည်ညွှန်းပြောကြားခဲ့သည်။

ဒစ်ဂျစ်တယ် ငွေကြေး ထောက်ပံ့ပေးမည့် အစီအစဉ်တွင် အပြောင်းအလဲ အနည်းငယ်ပြုလုပ်ရန် လိုအပ်ကြောင်း၊ ထိုအစီအစဉ်တွင် အချို့သောသူများကို ဒစ်ဂျစ်တယ်ငွေကြေးအစား ငွေသားများ ထုတ်ပေးမည့် ပြောင်းလဲချက် လည်း ပါဝင်လိမ့်မည်ဖြစ်ကြောင်း လက်ထောက်ဘဏ္ဍာရေးဝန်ကြီး ဂျာလာပန် အမ်မွန်ဗီဗက် ( Julapun Amornvivat) က စက်တင်ဘာ ၄ ရက်တွင် ပြောကြားခဲ့သည်။

ရင်းနှီးမြှုပ်နှံမှုနှင့် ပတ်သက်သည့် မူဝါဒများတွင်လည်း ဆရီသာ၏ မူဝါဒါများအတိုင်း ဆက်လက် လုပ်ဆောင် မည်ဟု ပေတုန်တန်က ပြောကြားခဲ့သည်။

"ဝန်ကြီးချုပ်နေရာ အပြောင်းအလဲ ရှိခဲ့ပေမယ့် ဖြူးထိုင်းပါတီဟာ ညွန့်ပေါင်းအစိုးရရဲ့ အဓိက ပါတီတစ်ခုအဖြစ် ဆက်ရှိနေဆဲဖြစ်ပါတယ်"ဟု ၎င်းက ဆိုသည်။

ထို့ပြင် ယခင်ဝန်ကြီးချုပ် ဆရီသာ လက်ထက်က စတင်ကျင့်သုံးခဲ့သည့် နိုင်ငံတကာ ကုန်သွယ်ရေး မူဝါဒများ ကိုလည်း အပြောင်းအလဲမရှိ ဆက်လက် လုပ်ဆောင်မည်ဟု ပေတုန်တန်က ပြောကြားခဲ့သည်။

Source: ဘန်ကောက်ပို့စ်

CNI International News

မော်စကို၊ စက်တင်ဘာ ၆

တောင်တရုတ်ပင်လယ်အတွင်း ရေနံနှင့်သဘာဝဓာတ်ငွေ့များ တူးဖော်မှုကို ဆက်လက် လုပ်ဆောင်သွားမည်ဟု မလေးရှားဝန်ကြီးချုပ် အန်ဝါ အီဘရာဟင်မ် (Anwar Ibrahim) က စက်တင်ဘာ ၅ ရက်တွင် ပြောကြားခဲ့ကြောင်း CNA မှ ဖော်ပြခဲ့သည်။

တောင်တရုတ်ပင်လယ်အတွင်း မလေးရှား၏ စွမ်းအင်တူးဖော်မှုများကို တရုတ်က ကန့်ကွက်သည့် သံတမန် မှတ်တမ်းတစ်ခု ပေါက်ကြားလာခဲ့ပြီးနောက် အန်ဝါက ထိုကဲ့သို့ ပြောကြားခဲ့ခြင်းဖြစ်သည်။

မလေးရှားနိုင်ငံပိုင် Petronas ရေနံကုမ္ပဏီသည် မလေးရှား၏ အထူးစီးပွားရေးဇုန်အတွင်းတွင် ရေနံနှင့် သဘာဝ ဓာတ်ငွေ့သိုက်များကို တူးဖော်လျက်ရှိသည်။

တရုတ်သည် သယံဇာတပေါကြွယ်ဝသည့် တောင်တရုတ်ပင်လယ်အတွင်းရှိ နယ်နိမိတ်အားလုံး နီးပါးကို ပိုင်ဆိုင် ကြောင်း ကြေညာထားပြီး အိမ်နီးချင်းနိုင်ငံများနှင့် ပိုင်ဆိုင်မှု အငြင်းပွားလျက်ရှိသည်။

"ကျနော်တို့က ကျနော်တို့ရဲ့ ရေပြင်တွေထဲမှာရှိတဲ့ ရေနံတွေကိုပဲ တူးဖော်နေတာ ဖြစ်ပါတယ်" ဟု ရုရှားသို့ တရားဝင် ခရီးစဉ်ဖြင့် ရောက်ရှိနေသည့် အန်ဝါက သတင်းထောက်များကို ပြောကြားခဲ့သည်။

အန်ဝါ အီဘရာဟင်မ်နဲ့ ပူတင်ကို တွေ့ရစဉ်

ထို့ပြင် မိမိတို့၏ သဘောထားကို တရုတ်အား ရှင်းလင်းပြောကြားမည်ဖြစ်ပြီး မိမိတို့တွင် ရန်လိုသည့် ရည်ရွယ် ချက်မျိုး မည်သည့်အခါကမျှ မရှိခဲ့ကြောင်း ၎င်းက ဆက်လက် ပြောကြားခဲ့သည်။

"တရုတ်က မိတ်ဆွေကောင်းဖြစ်ပါတယ်။ ဒါပေမယ့် ကျနော်တို့ကလည်း ကျနော်တို့ နယ်နိမိတ်ထဲမှာရှိတဲ့ ရေနံတွေကို တူးဖော်မှု အပါအဝင် စီးပွားရေး လှုပ်ရှားမှုတွေကို ဆက်လက် လုပ်ဆောင်သွားမှာပါ" ဟု အန်ဝါက ပြောကြားခဲ့သည်။

ပြီးခဲ့သည့် သီတင်းပတ်က ဖိလစ်ပိုင် သတင်းဝက်ဘ်ဆိုက်တစ်ခုဖြစ်သည့်  Inquirer.net ဝက်ဘ်ဆိုက်တွင် မလေးရှားသည် တရုတ်၏ နယ်နမိတ်အတွင်းသို့ ဝင်ရောက်ပြီး ရေနံနှင့် သဘာဝဓာတ်ငွေ့များ တူးဖော်နေ ကြောင်း၊ ထိုတူးဖော်မှုများကို ရပ်တန့်ရန် တရုတ်က တောင်းဆိုထားသည့် သံတမန်မှတ်တမ်းတစ်ခု ပေါက်ကြား ခဲ့သည်။

မလေးရှားနိုင်ငံခြားရေးဝန်ကြီးဌာနကမူ ထိုသံတမန်မှတ်တမ်း ပေါက်ကြားမှုကို စုံစမ်းစစ်ဆေးနေကြောင်း ပြောကြားခဲ့ပြီး ထိုမှတ်တမ်းထဲတွင် ပါရှိသည့် အကြောင်းအရာများကိုမူ ငြင်းဆိုခဲ့ခြင်းမရှိပေ။

Source: CAN

CNI International News

ဂျာကာတာ၊ စက်တင်ဘာ ၅

တရုတ် ဒုစရိုက်အဖွဲ့များနှင့် အဆက်အသွယ်ရှိသည်ဟု စွပ်စွဲခံထားရပြီး ဝရမ်းပြေးတစ်ဦးဖြစ်သည့် ဖိလစ်ပိုင်၏ မြို့တော်ဝန်ဟောင်း အလိုက်စ် ဂို (Alice Guo) ကို အင်ဒိုနီးရှားတွင် ဖမ်းဆီးရမိခဲ့ကြောင်း ဖိလစ်ပိုင် တရားရေး ဝန်ကြီးဌာနက စက်တင်ဘာ ၄ ရက်တွင် ထုတ်ပြန်ခဲ့သည်ဟု South China Morning Post မှ ဖော်ပြခဲ့သည်။

တရုတ်အမည် ဂိုဟွာပင်း (Guo Hua Ping) ဟု လူသိများသည့် ဂိုသည် ပြစ်မှုဆိုင်ရာ အရှုပ်တော်ပုံတစ်ခုအတွက် လွှတ်တော်တွင်း စုံစမ်းစစ်ဆေးမှုကို တက်ရောက်ရန် ငြင်းဆိုခဲ့ပြီးနောက် တိမ်းရှောင်နေသဖြင့် ဖိလစ်ပိုင်အထက် လွှတ်တော်က ဂိုကို ဖမ်းဆီးရန် အလိုရှိကြောင်း ကြေညာခဲ့သည်။

ဂိုကမူ ၎င်းအပေါ် စွဲဆိုထားသည့် စွဲချက်များကို ငြင်းဆိုခဲ့ပြီး သူသည် မနာလိုမုန်းထားသည့် စွပ်စွဲချက်များနှင့် ရင်ဆိုင်နေရသည့် သာမန် ဖိလစ်ပိုင်နိုင်ငံသား တစ်ဦးသာဖြစ်ကြောင်း ပြောကြားခဲ့သည်။

ဖိလစ်ပိုင်၏ မြို့တော်ဝန်ဟောင်း အလိုက်စ်ဂိုကို တွေ့ရစဉ်

လက်ရှိ အခြေအနေကို မိမိတို့၏ မိတ်ဆွေများဖြစ်သည့် အင်ဒိုနီးရှား လူဝင်မှုကြီးကြပ်ရေးဌာနမှ တာဝန်ရှိသူများ က အတည်ပြုခဲ့ကြောင်း၊ လက်ရှိတွင် မစ္စစ်ဂိုသည် ဂျာကာတာ (Jakarta)မြို့တော်ရှိ အင်ဒိုနီးရှားရဲတပ်ဖွဲ့၏ အချုပ်ခန်းတွင်ရှိနေကြောင်း ဖိလစ်ပိုင် တရားရေးဝန်ကြီးဌာနက ထုတ်ပြန်ခဲ့သည်။

ဂိုသည် စက်တင်ဘာ ၃ ရက် ညသန်းခေါင်ယံမတိုင်မီ ဂျာကာတာမြို့တော်၏ တန်ဂါရန် (Tangerang) မြို့တွင် ဖမ်းဆီးရမိခဲ့ခြင်းဖြစ်ကြောင်း ထုတ်ပြန်ချက်၌ ဖော်ပြခဲ့သည်။

ဖိလစ်ပိုင်အစိုးရအနေဖြင့် ဂိုအား သူကျူးလွန်ခဲ့သည့် ရာဇဝတ်မှုများအတွက် တာဝန်ခံမှု၊ တာဝန်ယူမှုရှိစေရန်နှင့် တရားရေး လုပ်ထုံးလုပ်နည်းများအရ ဆက်လက် ဆောင်ရွက်သွားမည်ဖြစ်ကြောင်း တရားရေးဝန်ကြိး ဂျီးဆပ် ခရစ်ပင် ရမ်မူလာ (Jesus Crispin Remulla) က ပြောကြားခဲ့သည်။

Source: SCMP

CNI International News

ဘေကျင်း၊ စက်တင်ဘာ ၅

အနာဂတ်တွင် ဖြစ်ပွားလာနိုင်သည့် စစ်ပွဲများနှင့် ထိုင်ဝမ်အရေးတွင် ဒရုန်းများသည် အဓိကကျသော အခန်းကဏ္ဍ မှ ပါဝင်လာနိုင်သဖြင့် တရုတ်နှင့် အမေရိကန်သည် ဒရုန်းစစ်ဆင်ရေးများနှင့်ပတ်သက်ပြီး ပြိုင်ဆိုင်မှုများ မြင့်တက် နေသည်ဟု South China Morning Post မှ ဖော်ပြခဲ့သည်။

မကြာသေးမီက တရုတ်စစ်တပ်သည် ဒရုန်း အများအပြား ပါဝင်သည့် ဒရုန်းအုပ်စုလိုက် တိုက်ခိုက်မှုများကို ခုခံ တွန်းလှန်နိုင်သော ၎င်း၏ စွမ်းဆောင်ရည်ကို စမ်းသပ်ရန်အတွက် လေကြောင်းကာကွယ်ရေး စစ်ရေးလေ့ကျင့်မှု များကို ပြုလုပ်ခဲ့သည်။

ထိုစစ်ရေး လေ့ကျင့်မှုတွင် အရွယ်အစားသေးငယ်ပြီး ပျံသန်းနေသည့် ဒရုန်းများကို တိကျစွာ ပစ်မှတ်ထား တိုက်ခိုက်ရန် စိန်ခေါ်မှုများရှိနေကြောင်း ရလဒ်များ ထွက်ပေါ်ခဲ့သည်။

စစ်ဘက်သုံး ဒရုန်းများကိုတွေ့ရစဉ်

တရုတ်နိုင်ငံပိုင် CCTV ရုပ်သံ၏ ဖော်ပြချက်အရ ထိုစစ်ရေး လေ့ကျင့်မှုတွင် တရုတ်ပြည်သူ့ လွတ်မြောက်ရေး တပ်မတော် (PLA) သည် ပထမအသုတ် ဒရုန်းအုပ်စုလိုက် တိုက်ခိုက်မှုကို လေယာဉ်ပစ် သေနတ်များဖြင့် တိုက်ခိုက်ခဲ့ရာ၌ ၄၀ ရာခိုင်နှုန်းသာ ထိရောက်မှုရှိခဲ့ကြောင်း သိရသည်။

PLA မြေပြင်တပ်ဖွဲ့၏ အမှတ် ၇၇ တပ်ဖွဲ့မှ အရာရှိတစ်ဦးဖြစ်သည့် တန်ရှောင်လုံ (Duan Xiaolong) က ဒရုန်း များ၏ အရွယ်အစား သေးငယ်မှု၊ လျင်မြန်စွာ ပျံသန်းမှုနှင့် လမ်းကြောင်းပြောင်း ပျံသန်းမှုများကြောင့် ထိုဒရုန်း များကို ထိမှန်အောင်ပစ်ခတ်ရန် ခက်ခဲခဲ့ကြောင်း ပြောကြားခဲ့သည်။

တရုတ်သည် ဆန်းသစ်တီထွင်မှုရှိပြီး ပိုမိုလျင်မြန်သည့် ဒရုန်းများကို ထုတ်လုပ်ရန် ရင်းနှီးမြှုပ်နှံမှုများမှတစ်ဆင့် လုပ်ဆောင်နေချိန်တွင် ဒရုန်းများ၏ ခြိမ်းခြောက်မှုအန္တရာယ်ကို ကာကွယ်ရန်လည်း လုပ်ဆောင်နေကြောင်း South China Morning Post မှ ဖော်ပြခဲ့သည်။

 ဒရုန်းတစ်စင်းကိုတွေ့ရစဉ်

ထို့အတူ အမေရိကန်ကလည်း ဒရုန်းများ၏ ခြိမ်းခြောက်မှုကို ကာကွယ်ရန် နည်းလမ်းအသစ်များ ရှာဖွေနေပြီး ကုန်ကျစရိတ်များကို ချိန်ညှိရန် စီစဉ်နေသည်ဟု Proceedings သတင်းဝက်ဘ်ဆိုက်တွင် ဩဂုတ်လက ရေးသား ခဲ့သည့် ဆောင်းပါးရှင် ကားလ်ဖလင်း၏ ဆောင်းပါးထဲ၌ ဖော်ပြခဲ့သည်။

အထူးသဖြင့် စျေးပေါပြီး အရေအတွက် အများအပြား ထုတ်လုပ်ထားသည့် ဒရုန်းများကို မြေပြင်မှ ဝေဟစ်ပစ် ဒုံးကျည် (SAM) များအသုံးပြုပြီး ပစ်ခတ်ရာတွင် ကုန်ကျစရိတ် အလွန်များပြားနေကြောင်း ကားလ်ဖလင်းက ပြောသည်။

လက်ရှိ ယူကရိန်းစစ်ပွဲတွင် ဖြစ်ပွားနေသည့် အခြေအနေများအရ ကင်မရာများ တပ်ဆင်ထားသော  အသေးစား ဒရုန်းများသည် ဒေါ်လာ ရာဂဏန်းသာ ကုန်ကျမည်ဖြစ်သော်လည်း ရုရှားတပ်များ အသုံးပြုနေသည့် အီရန်လုပ် တိုက်ပွဲဝင် Shahed-136 ဒရုန်းများသည် တစ်စင်းလျှင် ဒေါ်လာ ၂ သောင်းအထိ ကုန်ကျမည်ဖြစ်သည်။

Source: Asia Times

CNI International News

ကာရာကက်စ်၊ စက်တင်ဘာ ၅

ဗင်နီဇွဲလားလုံခြုံရေးတပ်ဖွဲ့များနှင့် အစိုးရလိုလားသည့် လက်နက်ကိုင်အဖွဲ့များသည် ဇူလိုင်လအတွင်းက ပြုလုပ် ခဲ့သည့် သမ္မတရွေးကောက်ပွဲအပြီးတွင် ဖြစ်ပွားခဲ့သော ဆန္ဒပြမှုများကို ပြင်းထန်စွာ နှိမ်နင်းခဲ့ပြီး နိုင်ငံတစ်ဝန်း လူ့အခွင့်အရေးချိုးဖောက်မှုများရှိခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

အမျိုးသားအစောင့်တပ်ဖွဲ့၊ ရဲတပ်ဖွဲ့၊ colectivos ဟု လူသိများသည် လက်နက်ကိုင်အဖွဲ့များသည် ဇူလိုင် ၂၈ ရက် က ရွေးကောက်ပွဲအပြီး ဖြစ်ပွားခဲ့သည့် ဆန္ဒပြမှုများအတွင်း ဆန္ဒပြသူ ၂၃ ဦးကို သတ်ဖြတ်ခဲ့သည်ဟု လူ့အခွင့် အရေးစောင့်ကြည့်ရေးအဖွဲ့ (HRW) က စက်တင်ဘာ ၄ ရက်တွင် ထုတ်ပြန်သည်။

လူငယ်များ အပါအဝင် ထောင်နှင့်ချီသည့် ဆန္ဒပြသူများသည် ရွေးကောက်ပွဲအာဏာပိုင်အဖွဲ့က သမ္မတ နီကိုလပ်စ် မာဒူရိုကို ရွေးကောက်ပွဲ အနိုင်ရကြောင်း ကြေညာခဲ့ပြီးနောက် နာရီပိုင်းအကြာမှာပင် လမ်းများပေါ်သို့ထွက်ပြီး ဆန္ဒပြခဲ့ခြင်းဖြစ်သည်။

colectivos ဟု လူသိများသည် လက်နက်ကိုင်အဖွဲ့ကိုတွေ့ရစဉ်

ထိုဆန္ဒပြသူများကို မာဒူရိုနှင့် ၎င်း၏  United Socialist ပါတီ၏ မဟာမိတ်များက အင်အားသုံး၍ ဖြိုခွင်းခဲ့ကာ တစ်ဖက်သတ် ဖမ်းဆီးထိန်းသိမ်းမှုများ၊ တရားစွဲဆိုမှုများ ပြုလုပ်ခဲ့သလို Operation Knock Knock အမည်ရှိ စစ်ဆင်ရေးဖြင့် ဆန္ဒပြမှုများတွင် ပါဝင်သူများကို အစိုးရအား သတင်းပေးရန် အစိုးရသစ္စာခံများကို တိုက်တွန်းခဲ့ သည်။

"ဗင်နီဇွဲလားမှာ ကျနော်တို့ မြင်တွေ့နေရတဲ့ အဲဒီလို ဖိနှိပ်မှုတွေက တုန်လှုပ်ဖို့ ကောင်းလောက်အောင် ရက်စက် ကြမ်းကြုတ်လှပါတယ်။ ပြည်ပနိုင်ငံတွေ အနေနဲ့ ဗင်နီဇွဲလားပြည်သူတွေ ငြိမ်းချမ်းစွာ ဆန္ဒပြနိုင်အောင် လိုအပ်တဲ့ အစီအစဉ် လုပ်ဆောင်ပေးဖို့ တိုက်တွန်းပါတယ်" ဟု HRW ၏ အမေရိကနိုင်ငံများဆိုင်ရာ ညွှန်ကြားရေးမှူး ဟွမ်နီတာ ဂိုဘာတပ်စ် (Juanita Goebertus) က ပြောကြားခဲ့သည်။

ဆန္ဒပြသူ ၂၃ ဦးနှင့် ဘိုလစ်ဗီးယား အမျိုးသား အစောင့်တပ်ဖွဲ့ဝင်တစ်ဦး သေဆုံးမှုနှင့်ပတ်သက်သည့်  သက်သေ အထောက်အားများကို ဗင်နီဇွဲလားနိုင်ငံအတွင်းရှိ ဒေသခံ လူ့အခွင့်အရေးအဖွဲ့များထံမှ ရရှိခဲ့ကြောင်း HRW က ပြောကြားခဲ့သည်။

ဗင်နီဇွဲလား ဆန္ဒပြသူများနဲ့ လုံခြုံရေးတပ်ဖွဲ့ အဓိကရုန်းဖြစ်နေစဉ်

ဆန္ဒပြသူ အများစု သတ်ဖြတ်ခံခဲ့ရသည့် ကာလမှာ ဇူလိုင် ၂၉ ရက်နှင့် ဇူလိုင် ၃၀ ရက်များတွင်ဖြစ်ကြောင်း HRW က ထုတ်ပြန်ခဲ့သည်။

ဆန္ဒပြသူများ သတ်ဖြတ်ခံခဲ့ရသည့် ဖြစ်စဉ်များအနက် ဖြစ်စဉ် ၁၁ ခုကို HRW က သီးခြား မှတ်တမ်းတင်နိုင်ခဲ့သည်။

ထို့နောက် သေဆုံးကြောင်း အတည်ပြုချက်များ၊ အတည်ပြုထားသည့် ဗွီဒီယိုများနှင့်ဓာတ်ပုံများကို စိစစ်သုံးသပ်ခဲ့ သလို မျက်မြင် သက်သေများ၊ ဒေသခံသတင်းရင်းမြစ် ၂၀ ဦးနှင့် အင်တာဗျူး ပြုလုပ်ခဲ့သည်ဟု ထုတ်ပြန်ချက်တွင် ဖော်ပြခဲ့သည်။

ထို့ပြင် သေမှုသေခင်း စုံစမ်းသည့် မှုခင်းပညာရှင်များ၊ ဒဏ်ရာများနှင့် လက်နက်များကို လေ့လာသည့် လက်နက် ကျွမ်းကျင်သူများနှင့်လည်း တိုင်ပင်ဆွေးနွေးမှုများ ပြုလုပ်ခဲ့သည်ဟု HRW က ပြောကြားခဲ့သည်။

Source: အယ်လ်ဂျာဇီးယား

CNI International News

ကိယက်ဗ်၊ စက်တင်ဘာ ၅

ယူကရိန်း၏ နိုင်ငံတကာဆက်ဆံရေးတွင် အဓိကနေရာမှ ပါဝင်ထမ်းဆောင်ခဲ့သည့် နိုင်ငံခြားရေးဝန်ကြီး ဒီမီထရို ကူလီဘာ (Dmytro Kuleba) သည် အစိုးရအဖွဲ့ ပြန်လည်ဖွဲ့စည်းမှုမတိုင်မီ စက်တင်ဘာ ၄ ရက်တွင် ရာထူးမှ နုတ်ထွက်စာ တင်သွင်းခဲ့သည်ဟု အေပီမှ ဖော်ပြခဲ့သည်။

အသက် ၄၃ နှစ်အရွယ် ကူလီဘာသည် ရာထူးမှ နုတ်ထွက်ရသည့် အကြောင်းရင်းကို ပြောကြားခြင်းမရှိခဲ့ပေ။

ထို့နောက် ကူလီဘာ နုတ်ထွက်မှုကို လွှတ်တော်အမတ်များက အစည်းအဝေးအတွင်း ဆွေးနွေးသွားမည် ဖြစ်ကြောင်း လွှတ်တော်ဥက္ကဋ္ဌ ရုစလမ် စတက်ဖန်ချော့ (Ruslan Stefanchuk) က ၎င်း၏ Facebook စာမျက်နှာတွင် ရေးသားခဲ့သည်။

ယူကရိန်းစစ်ပွဲ ဖြစ်ပွားနေသည်မှာ ၂ နှစ်ခွဲခန့် ကြာမြင့်လာချိန်တွင် အစိုးရအဖွဲ့ကို ပိုမိုခိုင်မာစေရန်အတွက် ပြန်လည်ဖွဲ့စည်းမည့် အခြေအနေကို ယူကရိန်းသမ္မတ ဇာလန်းစကီး (Volodymyr Zelenskyy) က ပြီးခဲ့သည့် သီတင်းပတ်အတွင်း အရိပ်အမြွက် ပြောကြားခဲ့သည်။

ယူကရိန်းတွင် ဆင်နွှဲနေသည့် ရုရှား၏ စစ်ပွဲကာလအတွင်း ကူလီဘာသည် ဇာလန်းစကီး ပြီးပါက ယူကရိန်း သတင်းစကားများကို နိုင်ငံတကာသို့ ပေးပို့နေသည့် ဒုတိယမြောက် ထိပ်သီးအရာရှိဖြစ်ပြီး နိုင်ငံတကာနှင့် ထိတွေ့ဆက်ဆံမှုများစွာ ပြုလုပ်ခဲ့သူဖြစ်သည်။

ရုရှားတိုက်ခိုက်မှုကြောင့် ယူကရိန်းနိုင်ငံအတွင်းက ပျက်စီးမှုကိုတွေ့ရစဉ်

၂၀၂၂ ခုနှစ်၊ ဖေဖော်ဝါရီလက ရုရှား၏ ကျူးကျော် ဝင်ရောက်တိုက်ခိုက်မှု ဖြစ်ပွားခဲ့ပြီးနောက် ယခုနှစ် ဇူလိုင်လ ထဲတွင် ကူလီဘာသည် တရုတ်သို့ ရောက်ရှိခဲ့သည့် ရာထူးအမြင့်ဆုံး ယူကရိန်းအရာရှိတစ်ဦး ဖြစ်လာခဲ့သည်။

လက်ရှိ အစိုးရအဖွဲ့ထဲမှ ရာထူးနေရာ ထက်ဝက်ကျော်ကို အပြောင်းအလဲများ ပြုလုပ်သွားမည်ဖြစ်ကြောင်း ဇာလန်းစကီး၏ အာဏာရပါတီမှ ခေါင်းဆောင်ဖြစ်သူ ဒါဗုသ် အာရာခါမီယာ (Davyd Arakhamiia) က ပြောကြားခဲ့သည်။

အစိုးရအဖွဲ့ဝင်ဝန်ကြီးများသည် စက်တင်ဘာ ၄ ရက်တွင် ရာထူးမှ နုတ်ထွက်မည်ဖြစ်ပြီး စက်တင်ဘာ ၅ ရက်၌ လူသစ်များကို ရာထူးခန့်အပ် သွားမည်ဖြစ်ကြောင်း ၎င်းက ပြောသည်။

ထိုအချိန်အတောအတွင်း လီဗျူ (Lviv) မြို့တွင် ရုရှား၏ ညအချိန် တိုက်ခိုက်မှုတစ်ခုကြောင့် လူ ၇ ဦးထက်မနည်း သေဆုံးကာ လူပေါင်း ၃၅ ဦး ဒဏ်ရာရရှိခဲ့ကြောင်း မြို့တော်ဝန် အန်ဒရီ ဆာဒေ့ါဗ်ယီ (Andrii Sadovyi) က စက်တင်ဘာ ၄ ရက်တွင် ပြောကြားခဲ့သည်။

ထို့ပြင် ဇာလန်စကီး၏ မွေးရပ်မြို့ဖြစ်သည့် ခရစ်ဗီရီ (Kryvyi Rih) မြို့တွင်လည်း ရုရှား၏ တိုက်ခိုက်မှုကြောင့် လူ ၅ ဦး သေဆုံးခဲ့ကြောင်း ဒေသအကြီးအကဲ ဆာဟီ လုဆက် (Serhii Lysak) က စက်တင်ဘာ ၄ ရက် နံနက်ပိုင်း တွင် ပြောကြားခဲ့သည်။

Source: အေပီ