CNI International News

ဘေဂျင်း၊ ဧပြီ ၁၀

အမေရိကန်သို့ တင်ပို့သည့် တရုတ်၏ သွင်းကုန်များအပေါ် စည်းကြပ်ခွန် ၁၀၄ ရာခိုင်နှုန်းအထိ တိုးမြှင့် ကောက်ခံခဲ့သည့် အမေရိကန်၏ လုပ်ဆောင်ချက်ကို တရုတ်က ကြီးမားသည့် အစီအစဉ်များဖြင့် တုန့်ပြန်ရန် စဉ်းစားနေဖွယ်ရှိကြောင်း တရုတ်၏ ဩဇာကြီးမားသော ကျွမ်းကျင်သူအချို့က ပြောကြားခဲ့ကြောင်း South China Morning Post မှ ဖော်ပြခဲ့သည်။

ထိုအစီအစဉ်များထဲတွင် အမေရိကန်နှင့် တရုတ်အကြား သိသိသာသာ လိုငွေပြနေသည့် ကုန်သွယ်ရေးကဏ္ဍကိုပါ ထည့်သွင်းပြီး ကုန်သွယ်ရေး အငြင်းပွားမှုကို ပိုမိုကြီးမား စေလိမ်မည်ဖြစ်ကြောင်း အွန်လိုင်းပေါ်တွင် Chairman Rabbit ဟု လူသိများသည့် ဘလော့ဂါတစ်ဦးဖြစ်သူ ရန်ယိ (Ren Yi) က အမည်မဖော်လိုသော သတင်းရင်းမြစ် များကို ကိုးကားပြီး ပြောဆိုခဲ့သည်။

“ကုန်သွယ်ရေးစစ်ပွဲကို ကုန်စည်ကုန်သွယ်မှုကဏ္ဍ အပေါ်မှာပဲ အာရုံစိုက်ခဲ့တာဟာ ကျိုးကြောင်းသင့်လျှော်မှု မရှိပါဘူး။ ဘာလို့လဲဆိုတော့ အမေရိကန်က ကျနော်တို့ ကုန်ပစ္စည်းတွေကို ဝယ်ယူပြီး ကျနော်တို့ကို ဝန်ဆောင်မှု တွေ ပြန်လည်ရောင်းချနေလို့ပါ” ဟု ရန်က South China Morning Post ကို ပြောကြားခဲ့သည်။

စတော့ဈေးကွက်ကို တွေ့ရစဉ်

တရုတ်၏ မိုက်ခရိုဘလော့ဂ် ပလက်ဖောင်းဖြစ်သည့် Weibo တွင် ဖော်လိုဝါ ၁ သန်းကျော်ရှိသည့် ရန်သည် ဧပြီ ၈ ရက်က ရေးသားခဲ့သော ဆောင်းပါးတစ်ပုဒ်အတွင်း တရုတ်သည် အမေရိကန်၏ ကုန်သွယ်ရေးဖိအားကို တန်ပြန်ရန်အတွက် ကြီးမားသည့် အစီအစဉ်များ ရှိနေဆဲဖြစ်ကြောင်း ပြောကြားခဲ့သည်။

ထိုအစီအစဉ်များထဲတွင် အမေရိကန်ကုမ္ပဏီများ၏ ဝန်ဆောင်မှုများကို ဝယ်ယူခြင်းအပေါ် တားမြစ်ကန့်သတ်မှု များ ပြုလုပ်ခြင်း၊ အမေရိကန်၏ ပဲပိစပ်များအပေါ် အခွန်များ သိသိသာသာ တိုးမြှင့်ကောက်ခံခြင်း၊ အမေရိကန်၏ မွေးမြူရေး ကြက်နှင့်ဘဲများ တင်သွင်းဝယ်ယူမှုကို တားမြစ်ပိတ်ပင်ခြင်၊ တရားမဝင် မူးယစ်ဆေးဝါး ထိန်းချုပ်ရေး တွင် ပူးပေါင်းဆောင်ရွက်မှုကို ဆိုင်းငံ့ခြင်း၊ တရုတ်နိုင်ငံရှိ အမေရိကန်ကုမ္ပဏီများအား အသိဉာဏ်ပစ္စည်းနှင့် ဆက်နွှယ်သည့် အရေးကိစ္စများကို စုံစမ်းစစ်ဆေးခြင်းတို့ ပါဝင်သည်ဟု ရန်က ဆိုသည်။

Weibo လူမှုမီဒီယာတွင် ဖော်လိုဝါ ၄ သန်းကျော်ရှိပြီး Niutanqin ဟု လူသိများသည် အခြားနိုင်ငံရေး ဘလော့ဂါ တစ်ဦးကလည်း အမေရိကန်အား တုန့်ပြန်ဖွယ်ရှိသည့် တရုတ်၏ အစီအစဉ်များကို ရေးသားဖော်ပြခဲ့သည်။

ထိုအကောင့်ကို တရုတ်နိုင်ငံပိုင် ဆင်ဟွာသတင်း အေဂျင်စီ၏ ဝါရင့် ဂျာနယ်လစ်တစ်ဦးက စီမံခန့်ခွဲလျက်ရှိသည်။

တရုတ်သည် အမေရိကန်၏ ဝန်ဆောင်မှု လုပ်ငန်းကဏ္ဍကို နည်းမျိုးစုံဖြင့် ပစ်မှတ်ထားနိုင်ပြီး တရုတ်အစိုးရ၏ ကုန်စည်ဝယ်ယူမှုများတွင် အမေရိကန်ကုမ္ပဏီများ ပါဝင်ပတ်သက်မှုကို ကန့်သန့်ခြင်း သို့မဟုတ် တရုတ်ကုမ္ပဏီ များနှင့် အမေရိကန် တရားရေးကုမ္ပဏီများ၊ အတိုင်ပင်ခံကုမ္ပဏီများကြား ပူးပေါင်းဆောင်ရွက်မှုကို ကန့်သတ်ခြင်း အစရှိသည့် အစီအစဉ်များ လုပ်ဆောင်နိုင်သည်ဟု ရန်က ပြောကြားခဲ့သည်။

Source: South China Morning Post

CNI International News

တိုကျို၊ ဧပြီ ၁၀

ကမ္ဘာလုံးဆိုင်ရာ ကုန်သွယ်ရေးစစ်ပွဲ အရှိန်ပြင်းထန်လာသဖြင့် ဂျပန်၏ ယန်းငွေတန်ဖိုး၊ ရွှေစျေးနှင့် အစိုးရ ငွေတိုက်စာချုပ် စျေးနှုန်းများ မြင့်တက်လာကြောင်း Nikkei Asia မှ ဖော်ပြခဲ့သည်။

အမေရိကန်၏ ကုန်သွယ်ခွန်များ ကောက်ခံမှုမှ စတင်ဖြစ်ပွားလာခဲ့သည့် ကုန်သွယ်ရေးစစ်ပွဲကြောင့် စျေးကွက် မတည်မငြိမ် ဖြစ်လာချိန်တွင် ရင်းနှီးမြှုပ်နှံသူများသည် ရွှေနှင့် ငွေတိုက်စာချုပ်ကဲ့သို့ အာမခံချက်ရှိသည့် အရာ များကို ဝယ်ယူစုဆောင်းရန် ကြိုးပမ်းလာခဲ့ခြင်းဖြစ်သည်။

တရုတ်ကုန်စည်များအပေါ် အခွန် ၁၀၄ ရာခိုင်နှုန်း ကောက်ခံမှု အပါအဝင် အမေရိကန်သမ္မတ ဒေါ်နယ်ထရမ့် (Donald Trump) ၏ အပြန်အလှန် ကုန်သွယ်ခွန် ကောက်ခံမှုများကြောင့် ဧပြီ ၉ ရက်တွင် ဂျပန်၏ Nikkei စတော့ရှယ်ယာစျေးကွက်သည် ၅ ရာခိုင်နှုန်း ကျဆင်းသွားခဲ့သည်။

လက်ရှိတွင် ဂျပန်နိုင်ငံရှိ ရင်းနှီးမြှုပ်နှံသူများသည် ဒေါ်လာများကို ထုတ်ရောင်းပြီး ယန်းငွေများကို ဝယ်ယူနေ သဖြင့် ယန်းငွေတန်ဖိုး မြင့်တက်နေသည်။

ဂျပန်နိုင်ငံသည် ခိုင်မာသည့် ကုန်သွယ်ရေးပိုငွေပြမှု၊ ငွေကြေးဖောင်းပွမှုနှုန်း နည်းပါးခြင်း၊ နိုင်ငံရေးတည်ငြိမ်ခြင်း တို့ကြောင့် ရင်းနှီးမြှုပ်နှံသူများသည် ဆုံးရှုံးနစ်နာမှုများကို သက်သာစေရန် ယန်းငွေများကို ဝယ်ယူနေကြခြင်း ဖြစ်သည်ဟု ကျွမ်းကျင်သူများက သုံးသပ်ခဲ့သည်။

အမေရိကန်နဲ့တရုတ် အလံကို တွေ့ရစဉ်

ဥပမာပြရမည်ဆိုပါက အမေရိကန်- တရုတ် ကုန်သွယ်ရေးစစ်ပွဲ ဖြစ်ပွားခဲ့သည့် ၂၀၁၈ ခုနှစ်နှင့် ၂၀၁၉ ခုနှစ်များ အတွင်း ငွေလဲနှုန်းသည် တစ်ဒေါ်လာလျှင် ၁၁၄ ယန်းမှ ၁၀၅ ယန်းအထိ လျော့ကျသွားခဲ့ကာ ယန်းငွေတန်ဖိုး မြင့်တက်ခဲ့သည်။

ထို့ပြင် ဂျပန်၊ စင်္ကာပူနှင့် တောင်ကိုရီးယား အပါအဝင် စီးပွားရေး တည်ငြိမ်မှုရှိသည့် အာရှနိုင်ငံများတွင် ငွေတိုက် စာချုပ်များသည် ဆုံးရှုံးနစ်နာမည့် အန္တရာယ်များ နည်းပါးသဖြင့် ငွေတိုက်စာချုပ်များ ဝယ်ယူရန် ရင်းနှီးမြှုပ်နှံ သူများက စိတ်ဝင်စားလာကြသည်။

ငွေကြေးဖောင်းပွမှု၊ ကုန်သွယ်ရေးစစ်ပွဲနှင့် စတော့ရှယ်ယာစျေးကွက်များ ပြိုလဲမည့် အခြေအနေကို စိုးရိမ်သည့် ရင်းနှီးမြှုပ်နှံသူများအတွက် ရွှေများဝယ်ယူ စုဆောင်းခြင်းသည်လည်း အကောင်းဆုံး ရွေးချယ်မှုများထဲတွင် ပါဝင်နေသည်။

ဥပမာပြရမည်ဆိုပါက ၂၀၁၈ ခုနှစ်က ရွှေစျေးသည် တစ်အောင်စလျှင် ဒေါ်လာ ၁၂၀၀ ရှိခဲ့ရာမှ ၂၀၁၉ ခုနှစ် နှစ်လယ်ပိုင်းတွင် ရွှေတစ်အောင်စလျှင် ဒေါ်လာ ၁၅၀၀ အထိ မြင့်တက်ခဲ့သည်။

Source: Nikkei Asia

CNI International News

ဘေဂျင်း၊ ဧပြီ ၁၀ 

အိမ်နီးချင်းနိုင်ငံများနှင့် မတူကွဲပြားမှုများကို စီမံခန့်ခွဲခြင်း၊ ထောက်ပံ့ရေး ကွင်းဆက်များအား တိုးမြှင့်ခြင်းဖြင့် မဟာဗျူဟာမြောက် ဆက်ဆံရေးကို ခိုင်မြဲအောင် လုပ်ဆောင်မည်ဟု တရုတ်သမ္မတ ရှီကျင့်ဖျင် (Xi Jinping)က ကတိပြုခဲ့ကြောင်း South China Morning Post မှ ဖော်ပြခဲ့သည်။

ရှီသည် ဧပြီ ၈ ရက်နှင့် ၉ ရက်တွင် ပြုလုပ်ခဲ့သည့် အိမ်နီးချင်းနိုင်ငံများနှင့် သံတမန် ဆက်ဆံရေးဆိုင်ရာ အလုပ်ရုံ ဆွေးနွေးပွဲ၌ ထိုမှတ်ချက်စကားများကို ပြောကြားခဲ့ခြင်းဖြစ်သည်။

ထိုပြောကြားချက်များသည် အမေရိကန်နှင့် တရုတ်အကြား ကုန်သွယ်ရေးစစ်ပွဲ အရှိန်ပြင်းထန်လာပြီးနောက် ရှီ၏ ပထမဆုံး လူသိရှင်ကြား ထုတ်ပြန်သည့် မိန့်ခွန်းဖြစ်ခဲ့သည်။

အစည်းအဝေးအတွင်း ရှီက အပြန်အလှန် ဖလှယ်မှုရှိသည့် အနာဂတ် အသိုင်းအဝိုင်းကို တည်ဆောက်ခြင်းသည် အိမ်နီးချင်းနိုင်ငံများနှင့် တရုတ်နိုင်ငံ၏ သံတမန်ဆက်ဆံရေးကို ထိပ်တန်းနေရာသို့ ရောက်စေလိမ့်မည်ဖြစ် ကြောင်း ပြောကြားခဲ့သည်။

မြန်မာဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်နဲ့ အိန္ဒိယဝန်ကြီးချုပ် မိုဒီကို တွေ့ရစဉ်

တရုတ်နိုင်ငံနှင့် အိမ်နီးချင်းများ၏ ဆက်ဆံရေးသည် ခေတ်သစ်သမိုင်းတွင် အကောင်းဆုံး အခြေအနေအထိ ရောက်ရှိခဲ့ကြောင်း နိုင်ငံပိုင် ဆင်ဟွာသတင်း အေဂျင်စီက ဧပြီ ၉ ရက်တွင် ထုတ်ပြန်ခဲ့သည်။

တစ်ချိန်တည်းမှာပင် မိမိတို့သည် ဒေသတွင်းနှင့် ကမ္ဘာလုံးဆိုင်ရာ  အခင်းအကျင်းများ ပြောင်းလဲနေသည့် အရေး ကြီးသော အချိန်အခါအတွင်းသို့ ဝင်ရောက်နေကြောင်း ထုတ်ပြန်ချက်တွင် ဖော်ပြခဲ့သည်။

တရုတ်ထိပ်သီး ခေါင်းဆောင်များသည် အိမ်နီးချင်းနိုင်ငံများဖြင့် သံတမန် ဆက်ဆံရေးနှင့်ပတ်သက်ပြီး ၂၀၁၃ ခုနှစ်ကတည်းက ယခုကဲ့သို့ ဆွေးနွေးပွဲများကို ပြုလုပ်ခဲ့ခြင်းဖြစ်သည်။

ထို့ပြင် တရုတ်ခေါင်းဆောင်များသည် အမေရိကန်နှင့် ပြိုင်ဆိုင်မှု ပြင်းထန်လာချိန်တွင် ၂၀၂၃ ခုနှစ်က ဦးစားပေး အစီအစဉ်အဖြစ် လုပ်ဆောင်ခဲ့သည့် အာရှနိုင်ငံများနှင့် ဆက်ဆံရေး ခိုင်မာအောင် တည်ဆောက်မည့် လုပ်ငန်းစဉ် ကို ပိုမိုအာရုံစိုက်လာသော အခြေအနေအား ယခုနှစ် ဆွေးနွေးပွဲက မီးမောင်းထိုး ပြသရာရောက်ခဲ့သည်။

Source: South China Morning Post

CNI International News

ဝါရှင်တန်၊ ဧပြီ ၉

အမေရိကန်သည် အီရန်နှင့် ဆွေးနွေးရန် စီစဉ်ထားကြောင်း အမေရိကန်သမ္မတ ဒေါ်နယ်ထရမ့် (Donald Trump) က ဧပြီ ၇ ရက်တွင် ပြောကြားခဲ့ကြောင်း DW သတင်းဝက်ဘ်ဆိုက်မှ ဖော်ပြခဲ့သည်။

“ကျ‌နော်တို့ ဧပြီ ၁၂ ရက်မှာ အရမ်းကြီးမားတဲ့ အစည်းအဝေးတစ်ခု ပြုလုပ်မှာဖြစ်ပြီး သူတို့နဲ့ တိုက်ရိုက် ဆက်သွယ်နေပါတယ်”ဟု ထရမ့်က ပြောကြားခဲ့သည်။

ထိုဆွေးနွေးပွဲသည် အမြင့်ဆုံးအဆင့် အစည်းအဝေး ဖြစ်နိုင်သည်ဟုလည်း ၎င်းက ထပ်လောင်း ပြောကြားခဲ့သည်။

အီရန်နိုင်ငံခြားရေးဝန်ကြီး အာဘက်စ် အာရက်ချီ (Abbas Araghchi ) ကလည်း အမေရိကန်နှင့် ဆွေးနွေးမှုများ ပြုလုပ်နေကြောင်း အတည်ပြုခဲ့သည်။

အဆိုပါ ဆွေးနွေးမှုများသည် တိုက်ရိုက်မဟုတ်ဘဲ သွယ်ဝိုက်ပြီး ပြုလုပ်သည့် အဆင့်မြင့် ဆွေးနွေးပွဲများဖြစ်ကာ အိုမန်နိုင်ငံတွင် ပြုလုပ်နေခြင်းဖြစ်ကြောင်း ပြောကြားခဲ့သည်။

“ဒါဟာ အခွင့်အလမ်းတစ်ခုလို့ ပြောလို့ရသလို စမ်းသပ်မှု တစ်ခုလို့လည်း ပြောလို့ရပါတယ်။ အမေရိကန်အပေါ်မှာ ပဲ မူတည်ပါတယ်” ဟု အာရက်ချီက X လူမှုမီဒီယာတွင် ပြောကြားခဲ့သည်။

အီရန်ခေါင်းဆောင်ကိုတွေ့ရစဉ်

ယခုလ အစောပိုင်းကမူ အီရန်၏ နျူကလီးယား စီမံကိန်းနှင့်ပတ်သက်ပြီး တိုက်ရိုက် ဆွေးနွေးမှုများ ပြုလုပ်ရန် ထရမ့်၏ ကမ်းလှမ်းမှုကို အီရန်က ငြင်းဆိုခဲ့သည်။

သို့သော် လက်ရှိတွင် အီရန်က သွယ်ဝိုက်ပြုလုပ်သည့် အဆင့်မြင့် ဆွေးနွေးပွဲများကို လက်ခံခဲ့ဖွယ်ရှိသည်။

ထရမ့်ကမူ ဆွေးနွေးပွဲများ အောင်မြင်ခြင်းမရှိပါက အီရန်သည် ကြီးမားသည့် အန္တရာယ်တစ်ခု ဖြစ်လာလိမ့်မည်ဟု ပြောကြားခဲ့သည်။

“အီရန် အနေနဲ့ နျူကလီးယား လက်နက်တွေ ပိုင်လို့မရပါဘူး။ ဆွေးနွေးပွဲတွေသာ မအောင်မြင်ဘူးဆိုရင် အီရန် အတွက် အရမ်းဆိုးတဲ့နေ့ရက် ဖြစ်သွားလိမ့်မယ်လို့ ကျနော်ထင်ပါတယ်” ဟု ထရမ့်က ပြောကြားခဲ့သည်။

ယခင် အမေရိကန်သမ္မတ ဂျိုးဘိုင်ဒန် (Joe Biden) လက်ထက်တွင် အမေရိကန်နှင့် အီရန်အကြား သွယ်ဝိုက် ဆွေးနွေးပွဲများ ပြုလုပ်ခဲ့သော်လည်း တိုးတက်မှုအနည်းငယ်သာ ရရှိခဲ့သည်။

Source: DW

CNI International News

ဘေဂျင်း၊ ဧပြီ ၉

အမေရိကန်သမ္မတ ဒေါ်နယ်ထရမ့် (Donald Trump) က တရုတ်၏ သွင်းကုန်များအပေါ် အခွန် ၅၀ ရာခိုင်နှုန်း ထပ်မံ ကောက်ခံသွားမည်ဟု ခြိမ်းခြောက်ခဲ့ပြီးနောက် ကုန်သွယ်ရေးစစ်ပွဲကို အဆုံးထိ တိုက်ခိုက်သွားမည်ဟု တရုတ်အစိုးရက ပြောကြားခဲ့သည်ဟု အေပီမှ ဖော်ပြခဲ့သည်။

တရုတ်သည် မိမိအကျိုးစီးပွားများ ကာကွယ်ရန် အမေရိကန်အား ဆန့်ကျင်သည့် တန်ပြန်အစီအစဉ်များကို လုပ်ဆောင်မည်ဖြစ်ပြီး အဆုံးထိ တိုက်ခိုက်သွားမည်ဟု ဧပြီ ၈ ရက်က ပြောကြားခဲ့သည်။

တရုတ်အပေါ် အမေရိကန်၏ အပြန်အလှန် အကောက်ခွန် ကြေညာချက်သည် အလုံးစုံ အခြေအမြစ်မရှိဘဲ တစ်ဖက်သတ် အနိုင်ကျင့် ဗိုလ်ကျသည့် လုပ်ဆောင်ချက်ဖြစ်ကြောင်း တရုတ်ကုန်သွယ်ရေးဝန်ကြီးဌာနက ထုတ်ပြန်ခဲ့သည်။

တရုတ်မြို့ပြနဲ့အလုပ်သမားတွေကိုတွေ့ရစဉ်

ကမ္ဘာ့ဒုတိယ စီးပွားရေး အင်အားအကြီးဆုံး တရုတ်နိုင်ငံကလည်း အမေရိကန်အပေါ် တန်ပြန် ကုန်သွယ်ခွန် ကောက်ခံမှုများကို ကြေညာခဲ့ပြီး နောက်ထပ် တုန့်ပြန်မည့် အစီအစဉ်များ ထပ်မံပြုလုပ်မည်ဟုလည်း တရုတ် ကုန်သွယ်ရေးဝန်ကြီးဌာနက ထုတ်ပြန်ချက်တွင် ဖော်ပြခဲ့သည်။

“တရုတ်နိုင်ငံက လုပ်ဆောင်ခဲ့တဲ့ တန်ပြန်အစီအစဉ်တွေဟာ မိမိတို့ရဲ့ အချုပ်အခြာအာဏာ၊ လုံခြုံရေး၊ ဖွံ့ဖြိုးတိုးတက်ရေးနဲ့ မိမိတို့ရဲ့ အကျိုးစီးပွားတွေကို ကာကွယ်ဖို့ရည်ရွယ်ပြီး နိုင်ငံတကာ ကုန်သွယ်မှု စည်းမျဥ်းတွေနဲ့အညီ လုပ်ဆောင်ခဲ့တာကြောင့် အဲဒီလုပ်ဆောင်မှုတွေက အလုံးစုံတရားဝင်ပါတယ်”ဟု တရုတ်ကုန်သွယ်ရေးဝန်ကြီးဌာနက ပြောကြားခဲ့သည်။

တရုတ်အပေါ် ကုန်သွယ်ခွန်များ တိုးမြှင့်မည့် အမေရိကန်၏ ခြိမ်းခြောက်မှုသည် အမှားပေါ်တွင် အမှားဆင့်သည့် လုပ်ဆောင်မှုဖြစ်ပြီး တရုတ်နိုင်ငံက လုံးဝ လက်မခံနိုင်မည့် အမေရိကန်၏ ခြိမ်းခြောက် ငွေညှစ်သည့် သဘော သဘာဝကို နောက်တစ်ကြိမ် ပေါ်လွင်ထင်ရှားစေကြောင်း ထုတ်ပြန်ချက်၌ ဖော်ပြခဲ့သည်။

တရုတ်မှာ အခြေစိုက်တဲ့ Apple ကုမ္ပဏီကိုတွေ့ရစဉ်

အကယ်၍ အမေရိကန်အနေဖြင့် ထိုသို့ လုပ်ဆောင်မည်ဆိုပါက တရုတ်သည် အဆုံးအထိ တိုက်ပွဲဝင် သွားမည် ဖြစ်ကြောင်းလည်း တရုတ်ကုန်သွယ်ရေးဝန်ကြီးဌာနက ပြောကြားခဲ့သည်။

တရုတ်အပေါ် နောက်ထပ် ကုန်သွယ်ခွန်များ တိုးမြှင့်ကောက်ခံမည့် ထရမ့်၏ ဧပြီ ၇ ရက်က ခြိမ်းခြောက်မှုကြောင့် ဘဏ္ဍာရေးအရ ဆုံးရှုံးနစ်နာမှုများသည့် ကုန်သွယ်ရေးစစ်ပွဲ အရှိန်ပြင်းထန်လာမည့် အခြေအနေအတွက် စိုးရိမ်မှု များ မြင့်တက်စေခဲ့သည်။

ကုန်သွယ်ခွန်စစ်ပွဲ ပိုမိုဆိုးရွားလာသဖြင့် တိုကျို (Tokyo) မှ နယူးယောက် (New York) အထိ ကမ္ဘာတစ်ဝန်းက စတော့ရှယ်ယာ စျေးကွက်များလည်း ကမောက်ကမ ဖြစ်ခဲ့ရသည်။

ထရမ့်သည် ပြီးခဲ့သည့် သီတင်းပတ်က တရုတ်အပေါ် ကုန်သွယ်ခွန် တိုးမြှင့်ကြောင်း ကြေညာခဲ့ပြီး တရုတ်က အမေရိကန်ကို တုန့်ပြန်သွားမည်ဟု ပြောကြားခဲ့ပြီးနောက် ယခုသီတင်းပတ်တွင်လည်း ထရမ့်က တရုတ်အပေါ် နောက်ထပ်ကုန်သွယ်ခွန်များ ထပ်မံတိုးမြှင့်မည်ဟု ခြိမ်းခြောက်ခဲ့ခြင်းဖြစ်သည်။

Source: အေပီ

CNI International News

ဆိုးလ်၊ ဧပြီ ၉

တောင်ကိုရီးယားသမ္မတ ရွေးကောက်ပွဲကို ဇွန်လ ၃ ရက်တွင် ကျင်းပမည်ဟု ယာယီသမ္မတ ဟန်ဒွတ်ဆူး (Han Duck-Soo) က ကြေညာခဲ့သည်ဟု အေပီမှ ဖော်ပြခဲ့သည်။

ဧပြီ ၄ ရက်က ယခင်သမ္မတ ယွန်းဆော့ရွဲ(Yoon Suk Yeol) ကို အခြေခံဥပဒေဆိုင်ရာတရားရုံးက ရာထူးမှ ဖယ်ရှားခဲ့ပြီးနောက် သမ္မတသစ် ရွေးချယ်ရန် ရွေးကောက်ပွဲ ပြုလုပ်မည့်နေ့ကို ကြေညာခဲ့ခြင်းဖြစ်သည်။

ယွန်းသည် ပြီးခဲ့သည့်နှစ် ဒီဇင်ဘာ ၃ ရက်က စစ်အုပ်ချုပ်ရေးအမိန့် ကြေညာခဲ့သဖြင့် လွှတ်တော်က ထိုအမိန့်ကို မဲခွဲပြီးပယ်ချခဲ့သည်။

ထို့နောက် ယွန်းသည် နာရီပိုင်းအတွင်း စစ်အုပ်ချုပ်ရေးအမိန့်ကို ရုပ်သိမ်းခဲ့သော်လည်း လွှတ်တော်က ၎င်းအား စွပ်စွဲပြစ်တင်ခဲ့ကာ သမ္မတတာဝန်မှ ဆိုင်းငံ့ခဲ့သည်။

ထို့နောက် အခြေခံဥပဒေဆိုင်ရာခုံးရုံးက လွှတ်တော်၏ စွပ်စွဲပြစ်တင်မှုကို အတည်ပြုခဲ့ပြီး ယွန်းအား ရာထူးမှ ဖယ်ရှားခဲ့ခြင်းဖြစ်သည်။

လက်ရှိတွင် ယွန်း၏ ပြည်သူ့အင်အားပါတီနှင့် အင်အားကြီး ပြိုင်ဘက်ပါတီဖြစ်သည့် ဒီမိုကရက်တစ်ပါတီတို့ အကြား အားပြိုင်မှုများက ရွေးကောက်ပွဲကို လွှမ်းမိုးသွားမည်ဖြစ်သည်။

ပြည်သူ့အင်အားပါတီကို တွေ့ရစဉ်

ပြည်သူ့အင်အားပါတီသည် အာဏာရပါတီ ဖြစ်ခဲ့သော်လည်း လွှတ်တော်ကို အတိုက်အခံဖြစ်သည့် ဒီမိုကရက်တစ် ပါတီက ထိန်းချုပ်ခဲ့သည်။

လာမည့် ရွေးကောက်ပွဲတွင် ဒီမိုကရက်တစ်ပါတီဘက်မှ ဩဇာကြီးမားသည့် လီဂျေမြောင် (Lee Jae-myung) သည် ပါတီကိုယ်စားပြု ကိုယ်စားလှယ်လောင်း ဖြစ်လာနိုင်ကြောင်း ကျွမ်းကျင်သူများက ပြောကြားခဲ့သည်။

ပြည်သူ့အင်အားပါတီတွင်မူ ပါတီကိုယ်စားပြု ကိုယ်စားလှယ်လောင်းအဖြစ် ရွေးချယ်ခံရရန် ကြိုးပမ်းမည့် နိုင်ငံရေးသမား ၁၀ ဦးခန့် ရှိလာလိမ့်မည်ဟု ခန့်မှန်းချက်များ ထွက်ပေါ်နေသည်။

တောင်ကိုရီးယား၏ အခြားနိုင်ငံရေး ပါတီများသည်လည်း ၎င်းတို့ပါတီ ကိုယ်စားပြုပြီး ယှဉ်ပြိုင်မည့် ကိုယ်စားလှယ်လောင်းများကို လာမည့် သီတင်းပတ်များအတွင်း ရွေးချယ်သွားမည်ဖြစ်သည်။

Source: အေပီ

CNI International News

နယူးဒေလီ၊ ဧပြီ ၈

အမေရိကန်က ကမ္ဘာလုံးဆိုင်ရာ အပြန်အလှန် ကုန်သွယ်ခွန်များ တိုးမြှင့်ကောက်ခံကြောင်း ကြေညာခဲ့သဖြင့် ကုန်သွယ်ရေးစစ်ပွဲနှင့် စီးပွားရေးပျက်ကပ် ဖြစ်ပွားလာမည့် အခြေအနေများကို စိုးရိမ်နေရချိန်တွင် ဧပြီ ၇ ရက်က အိန္ဒိယ၏ ရှယ်ယာဈေးကွက်သည် သိသိသာသာ ကျဆင်းသွားခဲ့ကြောင်း ရိုက်တာမှ ဖော်ပြခဲ့သည်။

ကမ္ဘာလုံးဆိုင်ရာ ရှယ်ယာဈေးကွက်များ ကမောက်ကမ ဖြစ်နေမှုနှင့်အတူ အိန္ဒိယ၏ Nifty 50 စတော့ ရှယ်ယာ ဈေးကွက် ညွှန်းကိန်းသည် ၄ ဒသမ ၀၃ ရာခိုင်နှုန်းအထိ ကျဆင်းသွားခဲ့သည်။

ထိုနှုန်းထားသည် ၂၀၂၀ ပြည့်နှစ် မတ်လနောက်ပိုင်း အနိမ့်ဆုံးအဆင့်ထိ ထိုးကျသွားခဲ့ကာ ၁၀ လအတွင်း နေ့အလိုက် အဆိုးရွားဆုံး ကျဆင်းမှုဖြစ်ခဲ့သည်။

အိန္ဒိယရဲ့ စတော့ဈေးကွက်ကို ကြည့်နေကြစဉ် 

အိန္ဒိယ၏ အခြား စတော့ရှယ်ယာ ဈေးကွက်ဖြစ်သည့် BSE Sensex ၏ ညွှန်းကိန်းသည်လည်း ၃ ဒသမ ၈၆ ရာခိုင်နှုန်း ကျဆင်းသွားခဲ့ကာ အခြား အာရှစတော့ ဈေးကွက်များလည်း ကျဆင်းခဲ့သည်။

MSCI Asia ex-Japan index သည် ၇ ဒသမ ၆ ရာခိုင်နှုန်း၊ ဂျပန်၏ Nikkei 225 သည် ၇ ရာခိုင်နှုန်းအထိ ကျဆင်းခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) ကြေညာခဲ့သည့် ကုန်သွယ်ခွန်များ တိုးမြှင့်ကောက်ခံသော အစီအစဉ်သည် မျှော်မှန်းထားသည့် ပမာဏထက် ပိုမိုကြီးမားခဲ့ပြီး ငွေကြေးဖောင်းပွားမှုနှင့် ဖွံ့ဖြိုးတိုးတက်မှုတို့ အပေါ် စီးပွားရေးအရ သက်ရောက်မှုများ ရှိလာနိုင်ကြောင်း အမေရိကန် ဗဟိုဘဏ်ဥက္ကဋ္ဌ ဂျရုန်း ပါဝဲလ် (Jerome Powell ) က ဧပြီ ၄ ရက်တွင် ပြောကြားခဲ့သည်။

အမေရိကန်၏ Nasdaq စတော့ရှယ်ယာ ညွှန်းကိန်းတွင်လည်း ဧပြီ ၇ ရက်က ၅ ဒသမ ၈၂ ရာခိုင်နှုန်း ကျဆင်းခဲ့ပြီး ရေနံနှင့် အခြားကုန်စည်များ၏ ရှယ်ယာတန်ဖိုးများလည်း ကျဆင်းခဲ့သည်။

စျေးကွက်ဖွင့်တဲ့ BSE Sensex အဆောက်အအုံကိုတွေ့ရစဉ်

တရုတ်က အမေရိကန်ကို  အပြန်အလှန် အခွန်စည်းကြပ်မှုများနှင့် တုန့်ပြန်သည့် အစီအမံများကို ကြေညာခဲ့ပြီး နောက် ကုန်သွယ်ရေးစစ်ပွဲ အရှိန်မြင့်လာချိန်တွင် ရင်းနှီးမြှုပ်နှံသူများ၏ ယုံကြည်မှုသည် ကျဆင်းခဲ့သည်ဟု ကျွမ်းကျင်သူများက ပြောကြားခဲ့သည်။

“အပြန်အလှန် ကုန်သွယ်ခွန် ကောက်ခံတာဟာ ယာယီဆိုရင်တောင် ကုမ္ပဏီတွေနဲ့ ရင်းနှီးမြှုပ်နှံမှုတွေအတွက် မသေချာ မရေရာမှုတွေ မြင့်တက်လာစေခဲ့ပါတယ်”ဟု ကိုတက် Kotak Institutional Equities ၏ လေ့လာသူ ဆန်ဂျိဗ် ပရာဆက် (Sanjeev Prasad) က ပြောကြားခဲ့သည်။

“လာမယ့် သီတင်းပတ် အနည်းငယ်အတွင်း အိန္ဒိယဈေးကွက်တွေရဲ့ စွမ်းဆောင်ရည်ဟာ အိန္ဒိယရဲ့ လက်လီ ရောင်းချမှု၊ ပြည်တွင်း အဖွဲ့အစည်းဆိုင်ရာ ရင်းနှီးမြှုပ်နှံသူတွေရဲ့ အခွန်နှုန်းထား အခြေအနေအရ အမေရိကန်နဲ့ အဆင်ပြေအောင် ညှိနိုင်မလား ဒါမှမဟုတ် အမေရိကန်ကို အခွန်တိုးကောက်ပြီး တုန့်ပြန်မလားဆိုတဲ့ အခြေအနေ ပေါ်မှာ မူတည်နေပါလိမ့်မယ်”ဟု ပရာဆက်က ပြောကြားခဲ့သည်။

Source: ရိုက်တာ

CNI International News

ဘဂ္ဂဒက်၊ ဧပြီ ၈

အမေရိကန်သမ္မတ ဒေါ်နယ်ထရမ့် (Donald Trump)အစိုးရ၏ ခြိမ်းခြောက်မှုကြောင့် အီရတ်ရှိ အီရန် ကျောထောက် နောက်ခံပြု အင်အားကြီး ပြည်သူ့စစ်အဖွဲ့များက ပထမဆုံးကြိမ်အဖြစ် လက်နက်ချရန် ပြင်ဆင်နေသည်ဟု အကြီးတန်းတပ်မှူး ၁၀ ဦးနှင့် အီရတ်တာဝန်ရှိသူများက ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထရမ့် သမ္မတအဖြစ် တာဝန်ထမ်းဆောင်ခဲ့သည့် ဇန်နဝါရီလကတည်းက အမေရိကန် တာဝန်ရှိသူများသည် အီရတ်အစိုးရကို သီးသန့်သတိပေးချက်များ ထုတ်ပြန်ခဲ့ပြီးနောက်ပိုင်း တင်းမာမှုများကို ဖြေလျှော့ရန် ကြိုးပမ်း နေကြခြင်းဖြစ်သည်ဟု အဓိကပြည်သူ့စစ်တပ်ဖွဲ့လေးဖွဲ့မှ ဒေသခံတပ်မှူး ၆ ဦး အပါအဝင် သတင်းအရင်းအမြစ် များက ပြောကြားခဲ့သည်။

အီရတ်မြေပေါ်တွင် ပြည်သူ့စစ်များအနေဖြင့် လက်နက်မချလျှင် အမေရိကန်က ထိုအဖွဲ့များကို လေကြောင်း တိုက်ခိုက်ရန် ပစ်မှတ်ထားနိုင်ကြောင်း အမေရိကန်တာဝန်ရှိသူများက ပြောကြားခဲ့သည်ဟု ဆိုသည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ် 

အီရတ်ဝန်ကြီးချုပ် မိုဟာမယ် ရှီရာ အယ် ဆူဒါနီ(Mohammed Shia al-Sudani)နှင့် ပြည်သူ့စစ်ခေါင်းဆောင် အများအပြားက အသေးစိတ် ဆွေးနွေးမှုများ လုပ်ဆောင်ခဲ့ကြောင်း အီရတ်၏ အာဏာရ မဟာမိတ်အဖွဲ့နှင့် နီးစပ်သည့် အကြီးတန်း ရှီးယားနိုင်ငံရေးသမား တစ်ဦးဖြစ်သူ အစ်ဇ်ဇက် အယ် ရှားဘန်ဒါ(Izzat al-Shahbndar) က ရိုက်တာသတင်းကို ပြောပြခဲ့သည်။

လက်နက်ကိုင် ပြည်သူ့စစ်အဖွဲ့များ အနေဖြင့် လက်နက်ချရန် အမေရိကန်၏ တောင်းဆိုချက်အတိုင်း လိုက်လျော ရန် အဆင်သင့် ရှိနေသည်ဟု ၎င်းက ဆိုသည်။

“ဒီအဖွဲ့တွေက ခေါင်းမာတဲ့ အပြုအမူမျိုး ဒါမှမဟုတ် လက်ရှိ အနေအထားကို ဆက်လက်ထားရှိဖို့ ငြင်းဆန်တာမျိုး မရှိပါဘူး’ဟု ၎င်းက ဆိုသည်။

အီရတ်နိုင်ငံအတွင်းက ပြည်သူ့စစ်ရဲဘော် ၂ ဦးကို တွေ့ရစဉ်

ပြည်သူ့စစ်အဖွဲ့များသည် အမေရိကန်၏ ပစ်မှတ်ထားလာနိုင်သည့် အခြေအနေကို အပြည့်အဝ နားလည် လက်ခံ ထားသည်ဟုလည်း ၎င်းက ထပ်မံပြောကြားခဲ့သည်။

ထိုအခြေအနေကို ဆွေးနွေးရန် ဘဂ္ဂဒတ်မြို့တော်နှင့် တောင်ပိုင်းပြည်နယ်တစ်ခုမှ အမည်မဖော်လိုသည့် ပြည်သူ့စစ်တပ်မှူး ၆ ဦးကို အင်တာဗျူးခဲ့ခြင်းဖြစ်ကာ ၎င်းတို့သည်  ကာ့ဒ်တိုင် ဟစ်ဘိုလာ(Kataib Hezbollah)၊ နုဂျာဘာစ်(Nujabaa)၊ ကာ့ဒ်တိုင် ဆေရိဒ့် အယ်စ် ရှားဟဒါ (Kataib Sayyed al-Shuhada) နှင့် အန်ဆာအူလာ အယ်စ် အာဝီဖီရာ (Ansarullah al-Awfiyaa)အဖွဲ့များမှ တပ်မှူးများဖြစ်သည်။

“ထရမ့်က အဆိုးဆုံး အခြေအနေအထိ စစ်ပွဲဖြစ်ဖို့ အသင့်ဖြစ်နေပြီဆိုတာ ကျနော်တို့ သိထားပါတယ်။ ဒီအခြေအနေကို ရှောင်လွှဲချင်ပါတယ်”ဟု အင်အားကြီး ရှီးယားပြည်သူ့စစ် အဖွဲ့ဖြစ်သည့် ကာ့ဒ်တိုင် ဟစ်ဘိုလာ( Kataib Hezbollah)မှ တပ်မှူးတစ်ဦးက ပြောကြားခဲ့သည်။

Source: ရိုက်တာ

CNI International News

ကွာလာလမ်ပူ၊ ဧပြီ ၈

အမေရိကန်သမ္မတ ဒေါ်နယ်ထရမ့် (Donald Trump) ၏ အပြန်အလှန် ကုန်သွယ်ခွန် တိုးမြှင့်မှုနှင့်ပတ်သက်ပြီး အာဆီယံအဖွဲ့အနေဖြင့် စည်းလုံးညီညွတ်စွာ တုန့်ပြန်ရေးအတွက် အားထုတ်ကြိုးပမ်းမှုများကို မလေးရှားနိုင်ငံက ဦးဆောင်သွားမည်ဖြစ်ကြောင်း မလေးရှားဝန်ကြီးချုပ် အန်ဝါ အီဘရာဟင် (Anwar Ibrahim) က ပြောကြားခဲ့ သည်ဟု Nikkei Asia မှ ဖော်ပြခဲ့သည်။

“အာဆီယံဥက္ကဋ္ဌ အနေနဲ့ မလေးရှားဟာ စည်းလုံးညီညွတ်တဲ့ ဒေသတွင်းတပ်ဦးတစ်ခု ပေါ်ပေါက်လာစေဖို့၊ ပွင့်လင်းပြီး ခံနိုင်ရည်ရှိတဲ့ ထောက်ပံ့ရေး ကွင်းဆက်တွေကို ထိန်းသိမ်းဖို့နဲ့ အာဆီယံရဲ့ စုပေါင်းအသံကို နိုင်ငံတကာက ရှင်းလင်းပြတ်သားစွာ ကြားသိနိုင်ဖို့ အားထုတ်ကြိုးပမ်းမှုတွေကို ဦးဆောင်သွားမှာပါ” ဟု အန်ဝါက ဧပြီ ၆ ရက်ညပိုင်းက Facebook အပါအဝင် ၎င်း၏ လူမှုမီဒီယာ ချန်နယ်များတွင် တင်ခဲ့သည့် ဗွီဒီယိုမိန့်ခွန်း၌ ပြောကြားခဲ့သည်။ 

သီးခြား ပို့စ်တစ်ခုတွင်လည်း အန်ဝါက ဒေသတွင်း စုပေါင်းတုန့်ပြန်မှုနှင့်ပတ်သက်ပြီး ဗီယက်နမ်ဝန်ကြီးချုပ် ဖမ်မင်ချင်း (Pham Minh Chinh) နှင့် ဖုန်းဆက်သွယ် ပြောဆိုခဲ့သည်ဟု ဆိုသည်။

အာဆီယံခေါင်းဆောင်များကိုတွေ့ရစဉ်

အန်ဝါသည် ဧပြီ ၆ ရက်က မလေးရှားနိုင်ငံသို့ ရောက်ရှိလာသည့် အင်ဒိုနီးရှားသမ္မတ ပရာဘိုဝို ဆူဘီယန်တို (Prabowo Subianto) နှင့်လည်း ကုန်သွယ်ခွန်ကိစ္စများကို ဆွေးနွေးခဲ့သည်ဟု အခြား Facebook ပို့စ်တစ်ခုတွင် ပြောကြားခဲ့သည်။

အဖွဲ့ဝင် ၁၀ နိုင်ငံ ပါဝင်သည့် အာဆီယံနိုင်ငံများသည် အမေရိကန်၏ အပြန်အလှန် ကုန်သွယ်ခွန်ကို အဆိုးရွားဆုံး ခံစားခဲ့ရသည့် နိုင်ငံများထဲတွင် ပါဝင်ခဲ့သည်။

ဗီယက်နမ်သည် အခွန်နှုန်းထား ၄၆ ရာခိုင်နှုန်း၊ ကမ္ဘောဒီးယားက ၄၉ ရာခိုင်နှုန်း၊ မလေးရှားက ၂၄ ရာခိုင်နှုန်းစီဖြင့် အမေရိကန်နှင့် အပြန်အလှန် ကုန်သွယ်ခွန်များ တိုးမြှင့်ခံခဲ့ရသည်။

မလေးရှားဝန်ကြီးချုပ် အန်ဝါ အီဘရာဟင်နဲ့ အင်ဒိုနီးရှားသမ္မတ ပရာဘိုဝို ဆူဘီယန်တိုကို တွေ့ရစဉ်

အခြားဒေသတွင်း နိုင်ငံများကဲ့သို့ပင် မလေးရှားသည် အမေရိကန်ကို လက်တုန့်ပြန်သည့် အစီအစဉ်များကို ရွေးချယ်ခဲ့ခြင်းမရှိခဲ့ပေ။

ထို့ပြင် မလေးရှားသည် အမေရိကန် ကုန်စည်များအပေါ် စည်းကြပ်ခွန် ၄၇ ရာခိုင်နှုန်း တိုးမြှင့်ခဲ့သည်ဆိုသည့် ထရမ့် အစိုးရအဖွဲ့၏ ပြောကြားချက်များကိုလည်း ငြင်းဆိုခဲ့သည်။

မလေးရှားဗဟိုဘဏ် (Bank Negara Malaysia ) အုပ်ချုပ်ရေးမှူး  အဗ္ဗဒူ ရာရှိဒ် ဂက်ဖော် (Abdul Rasheed Ghaffour) ကလည်း မလေးရှားနိုင်ငံသည် ကုန်သွယ်ခွန် ကိစ္စနှင့်ပတ်သက်ပြီး အမေရိကန်နှင့် ညှိနှိုင်းနိုင်သည့် အခြေအနေတွင် ရှိနေဆဲဖြစ်ကြောင်း၊ အမေရိကန်နှင့် ဆွေးနွေးမှုများ ပြုလုပ်ပြီးမှသာလျှင် ကုန်သွယ်ခွန်ကြောင့် ငွေကြေးဖောင်းပွမှုအပေါ် သက်ရောက်မှုများကို လေ့လာဆန်းစစ်နိုင်မည်ဖြစ်ကြောင်း ပြောကြားခဲ့သည်။

Source: Nikkei Asia