CNI International News

ဘန်ကောက်၊ နိုဝင်ဘာ ၂၆

မြန်မာနိုင်ငံတွင် ဖွင့်လှစ်ထားသည့် ကျားဖြန့်လုပ်ငန်းစင်တာတစ်ခုမှ ပြည်ပနိုင်ငံသား ၃၉ ဦးသည် နယ်စပ်ကို ဖြတ်ကာ  ထိုင်းနိုင်ငံအတွင်းသို့ ထွက်ပြေးဝင်ရောက်ခဲ့ကြောင်း ထိုင်းရဲတပ်ဖွဲ့က နိုဝင်ဘာ ၂၅ ရက်တွင် ပြောကြား ခဲ့သည်ဟု CNA မှ ဖော်ပြခဲ့သည်။

မြန်မာနိုင်ငံ၏ နယ်စပ်ဒေသများတွင် ကျားဖြန့်လုပ်ငန်းများ အလွန်များပြားနေကြောင်း၊  ပြည်ပနိုင်ငံသားများ သည် လိမ်ညာခေါ်ဆောင်ခံရပြီး ကျားဖြန့်စင်တာများတွင် ဝင်ရောက်လုပ်ကိုင်ရန် အတင်းအဓမ္မ စေခိုင်းခံခဲ့ရ သည်ဟု လေ့လာသူများက ပြောကြားခဲ့သည်။

ထိုသို့ အတင်းအဓမ္မ စေခိုင်းခံရသူများသည် လူသစ်စုဆောင်းသည့် အနေဖြင့် အခြားသူများကိုလည်း ဝင်ငွေသန်းချီ ရရှိမည်ဟု အွန်လိုင်းပေါ်မှ လိမ်ညာခေါ်ယူနေကြောင်း တာဝန်ရှိသူများက ပြောကြားခဲ့သည်။

ထိုင်းနိုင်ငံ၏ တာ့ခ် (Tak) ပြည်နယ်အတွင်းသို့ ဝင်ရောက်လာခဲ့သည့် ထိုပြည်ပနိုင်ငံသားများထဲတွင် သီရိလင်္ကာ၊ နီပေါ၊ မလေးရှားနှင့် ရုရှားနိုင်ငံသားများ ပါဝင်ကြောင်း မဲဆောက်(Mae Sot)မြို့ ရဲတပ်ဖွဲ့အကြီးအကဲ  ရဲမှူးကြီး ပိတ္တယကွန်း ပက်ချာရက် (Pittayakorn Petcharat) က ပြောကြားခဲ့သည်။

 မြန်မာ-ထိုင်းနယ်စပ်ကိုတွေ့ရစဉ်

၎င်းတို့သည် မြန်မာနိုင်ငံ၏ မြဝတီမြို့မှ နယ်စပ်ကိုဖြတ်ကာ ထိုင်းသို့ ဝင်ရောက်ခဲ့ခြင်းဖြစ်ကြောင်း ရဲမှူးကြီး ပက်ချာရက်က ပြောသည်။

ဘန်ကောက်မြို့တော်ရှိ သီရိလင်္ကာသံရုံးကမူ မြန်မာနိုင်ငံတွင် ပိတ်မိနေသည့် သီရိလင်္ကာနိုင်ငံသား ၃၂ ဦးကို ကူညီပေးရန် ထိုင်းအာဏာပိုင်များအား တိုက်တွန်းခဲ့သည်ဟု ပက်ချာရက်က ပြောကြားခဲ့သည်။

မြန်မာနိုင်ငံမှ ထိုင်းနိုင်ငံအတွင်းသို့ ထွက်ပြေး ဝင်ရောက်ခဲ့သည့် ထိုအဖွဲ့ထဲတွင် နီပေါနိုင်ငံသား ၅ ဦး၊ မလေးရှား နိုင်ငံသား ၁ ဦးနှင့် ရုရှားနိုင်ငံသား ၁ ဦး ပါဝင်ခဲ့ သည်။

၎င်းတို့အဖွဲ့သည် နိုဝင်ဘာ ၂၄ ရက် ညပိုင်းက ထိုင်းနိုင်ငံအတွင်းသို့ ထွက်ပြေးဝင်ရောက် ခဲ့ခြင်းဖြစ်ကြောင်း မဲဆောက်မြို့ရှိ အမည်မဖော်လိုသည့် လုံခြုံရေးတပ်ဖွဲ့ဝင် ၁ ဦးက ပြောကြားခဲ့သည်။

၂၀၂၃ ခုနှစ်အတွင်း မြန်မာနိုင်ငံရှိ ကျားဖြန့်လုပ်ငန်းများတွင် လုပ်ကိုင်ခဲ့သည်ဟု သံသယရှိသူ ၄၀,၀၀၀ ကျော်ကို တရုတ်သို့ လွှဲပြောင်းအပ်နှံခဲ့ကြောင်း တရုတ်နိုင်ငံပိုင် ဆင်ဟွာသတင်းအေဂျင်စီက ဖော်ပြခဲ့သည်။

Source: CNA

CNI International News

ဘေကျင်း၊ နိုဝင်ဘာ ၂၃

မြန်မာနိုင်ငံမြောက်ပိုင်း တရုတ်-မြန်မာ နယ်စပ်အနီးရှိ ကျားဖြန့်ဟု လူသိများသည့် အွန်လိုင်းငွေလိမ် လုပ်ငန်းများ လုပ်ကိုင်နေသည့် စင်တာအားလုံးကို ချေမှုန်းနိုင်ခဲ့ကြောင်း တရုတ်ပြည်သူ့လုံခြုံရေးဝန်ကြီးဌာနက နိုဝင်ဘာ ၂၁ ရက်က ကြေညာခဲ့သည်ဟု Communications Today သတင်းဝက်ဘ်ဆိုက်တွင် ဖော်ပြခဲ့သည်။

ပြီးခဲ့သည့်နှစ်က မြန်မာနိုင်ငံမြောက်ပိုင်းရှိ ကျားဖြန့်လုပ်ငန်းများကို နှိမ်နင်းမှုများ စတင်ပြုလုပ်ခဲ့ချိန်ကစပြီး တရုတ်နှင့် မြန်မာရဲတပ်ဖွဲ့တို့၏ ပူးတွဲစစ်ဆင်ရေးများအတွင်း ကျားဖြန့်လုပ်ငန်းများ လုပ်ကိုင်သည်ဟု သံသယရှိ သည့် တရုတ်နိုင်ငံသား ၅၃,၀၀၀ ကျော်ကို ဖမ်းဆီးရမိခဲ့ကြောင်း တရုတ်ပြည်သူ့လုံခြုံရေးဝန်ကြီးဌာနက ကြေညာချက် ထုတ်ပြန်ခဲ့သည်။

မကြာသေးမီ ရက်ပိုင်းအတွင်းက ပြုလုပ်ခဲ့သည့် စီးနင်းမှု တစ်ခုအတွင်း မြန်မာနိုင်ငံမြောက်ပိုင်း တန့်ယန်း (Tangyan) မြို့ တစ်မြို့တည်းမှာပင် သံသယရှိသူ ၁၀၇၉ ဦးကို ပထမဆုံးအကြိမ် ဖမ်းဆီးရမိခဲ့သည်ဟု ဆိုသည်။

ကိုးကန့်ခေါင်းဆောင် လျိုမိသားစု အကြီးအကဲကို တရုတ်က မြန်မာနိုင်ငံကနေ ဖမ်းသွားစဉ်

တရုတ်၏ ယူနန်ပြည်နယ် ရဲတပ်ဖွဲ့နှင့် မြန်မာလုံခြုံရေး တပ်ဖွဲ့များအကြား ပူးတွဲစစ်ဆင်ရေးအတွင်း ထိုသံသယရှိ သူများကို ဖမ်းဆီးရမိခဲ့ခြင်းဖြစ်သည်။

ဖမ်းဆီးခံရသူများအနက် ၇၆၃ ဦးမှာ တရုတ်နိုင်ငံသားများဖြစ်ပြီး ၎င်းတို့ကို တရုတ်နိုင်ငံသို့ လွှဲပြောင်းအပ်နှံခဲ့ သည်ဟု ထုတ်ပြန်ချက်တွင် ဖော်ပြခဲ့သည်။

ထို့ပြင် နယ်စပ်ဖြတ်ကျော် ကျားဖြန့်လုပ်ငန်းများ နှိမ်နင်းရေးကို ဆက်လက် လုပ်ဆောင်သွားမည်ဖြစ်ပြီး အထူးသဖြင့် ကျားဖြန့်လုပ်ငန်းများ အမြစ်တွယ်နေသည့် နေရာဒေသများကို အာရုံစိုက် လုပ်ဆောင်သွားမည်ဟု ထုတ်ပြန်ချက်တွင် ဖော်ပြခဲ့သည်။

တရုတ်နှင့် မြန်မာရဲတပ်ဖွဲ့အကြား တရားဥပဒေစိုးမိုးရေး ပူးပေါင်းဆောင်ရွက်မှုကို တိုးမြှင့်သွားမည်ဖြစ်ပြီး လူထု အနေနှင့်လည်း ကျားဖြန့်လုပ်ငန်းများတွင် ဝင်ရောက် အလုပ်လုပ်ရန် လိမ်ညာ ခေါ်ယူမှုများကို သတိထားရန် တရုတ်ပြည်သူ့လုံခြုံရေးဝန်ကြီးဌာနက အကြံပြုထားသည်။

Source: Communications Today

CNI International News

တဲလ်အဗစ်၊ နိုဝင်ဘာ ၂၃

နိုင်ငံတကာရာဇဝတ်မှုတရားရုံး (ICC) ၏ ဖမ်းဝရမ်းထုတ်မှုသည် အစ္စရေးကို ခုခံကာကွယ်ပေးနေသည့် မိမိအား တားဆီးနိုင်မည်မဟုတ်ကြောင်း အစ္စရေးဝန်ကြီးချုပ် ဘင်ဂျာမင် နေတန်ယာဟု (Benjamin Netanyahu)က နိုဝင်ဘာ  ၂၁ ရက်တွင် ပြောကြားခဲ့ကြောင်း NDTV မှ ဖော်ပြခဲ့သည်။

ICC ၏ တရားသူကြီးများက အစ္စရေးဝန်ကြီးချုပ် နေတန်ယာဟု၊ ကာကွယ်ရေးဝန်ကြီးဟောင်း ယိုအက်ဗ် ဂဲလန့် (Yoav Gallant) နှင့် ဟားမာ့စ်တပ်မှူး မိုဟာမက် ဒီအက်စ်ဖ် (Mohammed Deif ) တို့ကို ဖမ်းဝရမ်းများ ထုတ်ခဲ့ပြီး နောက် နေတန်ယာဟု၏ ပြောကြားချက် ထွက်ပေါ်လာခြင်းဖြစ်သည်။

"လက်ခံနိုင်စရာမရှိတဲ့ အစ္စရေးဆန့်ကျင်တဲ့ ဆုံးဖြတ်ချက်ဟာ ကျနော်တို့နိုင်ငံကို ဆက်လက် ကာကွယ်သွားမယ့် အခြေအနေကို တားဆီးနိုင်မှာ မဟုတ်ပါဘူး။ ကျနော့်ကိုလည်း တားဆီးနိုင်မှာ မဟုတ်ပါဘူး။ ဒီဖိအားတွေကို ကျနော်တို့ အလျှော့ပေးသွားမှာ မဟုတ်ပါဘူး"ဟု နေတန်ယာဟုက ပြောကြားခဲ့သည်။

ထို့ပြင် ICC ၏ ဆုံးဖြတ်ချက်သည် နိုင်ငံများ၏သမိုင်းတွင် မှောင်မိုက်သည့်နေ့ရက် တစ်ရက်ဖြစ်ကြောင်းလည်း နေတန်ယာဟုက ပြောကြားခဲ့သည်။

ICC ၏ အဖွဲ့ဝင် ၁၂၄ နိုင်ငံအနေဖြင့် နေတန်ယာဟု၊ ဂဲလန့်နှင့် ဒီအစ်ဖ်တို့ကို ဖမ်းဆီးရေးအတွက် လွတ်လပ်စွာ ဆုံးဖြတ်ပိုင်ခွင့်ရှိသည်။

ICC တရားရုံကိုတွေ့ရစဉ်

ထို့ပြင် နေတန်ယာဟုကို ICC က ဖမ်းဝရမ်း ထုတ်ထားသော်လည်း ကုလသမဂ္ဂ တာဝန်ရှိသူများအနေဖြင့် ၎င်းတို့ ၏ လုပ်ထုံးလုပ်နည်းများအတိုင်း နေတန်ယာဟုနှင့် တွေ့ဆုံမှုကို တားမြစ်နိုင်ခြင်းမရှိကြောင်း ကုလသမဂ္ဂက ထုတ်ပြန်ခဲ့သည်။

၂၀၂၃ ခုနှစ်၊ အောက်တိုဘာ ၇ ရက်တွင် အစ္စရေးကို ဟားမာ့စ်က ဝင်ရောက် တိုက်ခိုက်ခဲ့သောကြောင့် စစ်ပွဲ စတင် ဖြစ်ပွားကတည်းက ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ် (Antonio Guterres) နှင့် နေတန်ယာဟုတို့ စကားပြောဆိုခြင်း မရှိသေးပေ။

သို့သော် ဒေသတွင်း တာဝန်ထမ်းဆောင်နေသော ကုလသမဂ္ဂ တာဝန်ရှိသူများသည် ICC ၏ ဖမ်းဝရမ်း ထုတ်ထား သည့်တိုင် အစ္စရေးခေါင်းဆောင် နေတန်ယာဟုနှင့် ဆက်သွယ်မှုများ၊ တွေ့ဆုံမှုများ ပြုလုပ်နိုင်သည်ဟု ကုလသမဂ္ဂက ပြောကြားခဲ့သည်။

ဂူတာရက်စ်သည် ပါလက်စတိုင်းများကို မျက်နှာသာပေးသည်ဟု အစ္စရေးက စွပ်စွဲပြောကြားခဲ့ပြီး ပြည်ဝင်ခွင့် ပိတ်ပင်ထားသည်။

Source: NDTV

CNI International News

မော်စကို၊ နိုဝင်ဘာ ၂၃

ယူကရိန်းစစ်ပွဲသည် ကမ္ဘာလုံးဆိုင်ရာစစ်ပွဲ ဖြစ်လာသည့် ဝိသေသ လက္ခဏာများရှိလာကြောင်း ရုရှားသမ္မတ ဗလာဒီမာ ပူတင် (Vladimir Putin)က နိုဝင်ဘာ ၂၁ ရက်တွင် ပြောကြားခဲ့သည်။

ထို့နောက် အနောက်နိုင်ငံများ၏ တိုက်ခိုက်မှုများကို လျစ်လျူရှုထားမည် မဟုတ်ကြောင်းလည်း ပူတင်က သတိပေးခဲ့သည်ဟု ရိုက်တာမှ ဖော်ပြခဲ့သည်။

ရုရှားသည် ယူကရိန်းအား မျိုးဆက်သစ် တာလတ်ပစ် ဒုံးကျည် အသစ်တစ်စင်းဖြင့် ပစ်ခတ်ခဲ့မှုကြောင့် နိုင်ငံတကာ၏ စိုးရိမ်ပူပန်မှုများ မြင့်တက်နေချိန်တွင် ပူတင်၏ မှတ်ချက်စကားများ ထွက်ပေါ်လာခြင်းဖြစ်သည်။

ယူကရိန်းသမ္မတ ဗိုလိုဒီမာ ဇာလန်းစကီး (Volodymyr Zelensky) က ရုရှား၏ တိုက်ခိုက်မှုကြောင့် စစ်ပွဲ၏ အရှိန် နှင့် ရက်စက်ကြမ်းကြုတ်မှုသည် သိသိသာသာ မြင့်တက်လာခဲ့ကြောင်း ပြောကြားခဲ့သည်။

ယူကရိန်း၏မဟာမိတ် အမေရိကန်ကလည်း စစ်ပွဲ၏ အချိုးအကွေ့တိုင်းတွင် တင်းမာမှုများ မြင့်တက်မှုများ အတွက် ရုရှားကို ပြစ်တင် ဝေဖန်ခဲ့သည်။

ရုရှားက ယူကရိန်းကို ပစ်ခတ်ခဲ့သည့် တာလတ်ပစ် ဒုံးကျည်များသည် ကီလိုမီတာ ၅၅၀၀ (မိုင် ၃၄၀) အထိ ပစ်ခတ် ရောက်ရှိနိုင်သည်။

ရုရှားသမ္မတ ပူတင်ကို တွေ့ရစဉ်

ပူတင် အနေဖြင့် ထိုဒုံးကျည်များကို အသုံးပြု၍ အနောက်နိုင်ငံများကို တိုက်ခိုက်မည်ဟု ခြိမ်းခြောက် ပြောဆို နိုင်စွမ်းရှိကြောင်း ကျွမ်းကျင်သူများက ပြောကြားခဲ့သည်။

ပူတင်၏ နိုင်ငံတော်မိန့်ခွန်းတွင် ယူကရိန်း၏ မဟာမိတ်များသည် ယူကရိန်းအား ၎င်းတို့ထောက်ပံ့ ပေးထားသည့် လက်နက်များဖြင့် ရုရှားနယ်နိမိတ်အတွင်းရှိ ပစ်မှတ်များကို တိုက်ခိုက်ခွင့် ပြုနေမှုအပေါ် ပြင်းထန်စွာ ဝေဖန်ခဲ့ သည်။

မကြာသေးမီ ရက်များအတွင်း ယူကရိန်းသည် အမေရိကန်နှင့် ဗြိတိန်တို့က ထောက်ပံ့ပေးခဲ့သည့် ဒုံးကျည်များဖြင့် ရုရှားနယ်နိမိတ်အတွင်းရှိ ပစ်မှတ်များကို ပထမဆုံးအကြိမ် ပစ်ခတ်တိုက်ခိုက်ခဲ့သည်။

ရုရှားလေကြောင်း ကာကွယ်ရေးတပ်ဖွဲ့ကမူ ထိုဒုံးကျည်များကို ပစ်ချနိုင်ခဲ့ကြောင်း ပူတင်က ပြောကြားခဲ့သည်။

"ရန်သူတွေရဲ့ ရည်မှန်းချက်တွေဟာ ပြည့်မြောက်အောင်မြင်ခြင်း မရှိဘူးဆိုတာ ထင်ရှားနေပါတယ်"ဟု ၎င်းက ပြောသည်။

ထို့ပြင် မိမိတို့ အဆောက်အအုံများကို တိုက်ခိုက်ရန် ၎င်းတို့၏ လက်နက်များ အသုံးပြုခွင့် ပေးထားသည့် နိုင်ငံများ ၏ စစ်ရေး အဆောက်အအုံများကို မိမိတို့က ပြန်လည်တိုက်ခိုက် ပိုင်ခွင့်ရှိသည်ဟု ယူဆထားကြောင်းလည်း ပူတင်က ပြောကြားခဲ့သည်။

Source: ရိုက်တာ

CNI International News

ဘရာစီလီယာ၊ နိုဝင်ဘာ ၂၂

တရုတ်သမ္မတ ရှီကျင့်ဖျင် (Xi Jinping) သည် ဘရာဇီးvfနိုင်ငံသို့ သွားရောက်သည့် ခရီးစဉ်အတွင်း ယူကရိန်းစစ်ပွဲ အဆုံးသတ်ရန်နှင့် ဂါဇာတွင် အပစ်အခတ်ရပ်စဲရန် တိုက်တွန်းမှုများ ပိုမိုလိုအပ်ကြောင်း ပြောကြားခဲ့သည်ဟု NDTV မှ ဖော်ပြခဲ့သည်။

ဘရာဇီးလ်နိုင်ငံ၊ ဘရာစီလီယာ (Brasilia) မြို့တော်သို့ ရောက်ရှိလာသည့် ရှီကို ဘရာဇီးလ်သမ္မတ လူလာ ဒါဆေးလ်ဗား (Luiz Inacio Lula da Silva) က ကော်ဇောနီဖြင့် ကြိုဆိုခဲ့ပြီး ရှီနှင့် တွေ့ဆုံဆွေးနွေးခဲ့သည်ဟု တရုတ်နိုင်ငံပိုင် ဆင်ဟွာသတင်းအေဂျင်စီက ဖော်ပြခဲ့သည်။

၎င်းတို့ ၂ ဦးသည် ယူကရိန်းငြိမ်းချမ်းရေးအတွက် အဆိုပြုထားသည့် ပူးတွဲလမ်းပြမြေပုံ၏ အရေးကြီးပုံကိုလည်း အလေးထား ဆွေးနွေးခဲ့ကြသည်။

 ရှီကျင့်ဖျင်နဲ့ ဘရာဇီးလ်သမ္မတ လူလာ ဒါဆေးဗားကို တွေ့ရစဉ်

လက်နက်ကိုင်ပဋိပက္ခများ၊ နိုင်ငံရေး အကျပ်အတည်းများဖြင့် ပြည့်နှက်နေသည့် ကမ္ဘာကြီးတွင် တရုတ်နှင့်ရုရှား သည် ငြိမ်းချမ်းရေး၊ သံတမန်ရေးနှင့် ဆွေးနွေးညှိနှိုင်းရေးများကို ရှေ့တန်းတင်ထားကြောင်း လူလာက ပြောကြား ခဲ့သည်။

ရှီကလည်း ယူကရိန်း အကျပ်အတည်းကို နိုင်ငံရေးအရ အဖြေရှာပြီး ငြိမ်းချမ်းရေးယူရန်၊ ဂါဇာတွင် အပစ်အခတ် ရပ်စဲရေးနှင့် စစ်ပွဲအဆုံးသတ်ရန် တိုက်တွန်းပြောကြားခဲ့သည်။

ယူကရိန်းငြိမ်းချမ်းရေး အစီအစဉ်နှင့်ပတ်သက်ပြီး တရုတ်နှင့် ဘရာဇီးလ်တို့၏ ပူးတွဲအဆိုပြုချက်ကို ရုရှားက ထောက်ခံခဲ့သော်လည်း ယူကရိန်းနှင့် အနောက်နိုင်ငံများက ငြင်းပယ်ခဲ့သည်။

နိုဝင်ဘာ ၂၀ ရက်ကလည်း ကုလသမဂ္ဂလုံခြုံရေးကောင်စီတွင် ဂါဇာ၌ ထာဝရအပစ်ခတ်ရပ်စဲရေးကို တောင်းဆို ထားသည့် ကြေညာချက် ထုတ်ပြန်ရန် မဲပေးခဲ့သော်လည်း အစ္စရေး၏ မဟာမိတ်ဖြစ်သော အမေရိကန်က ဗီတို အာဏာဖြင့် ပယ်ချခဲ့သည်။

ရှီနှင့် လူလာတို့သည် စိုက်ပျိုးရေး၊ ကုန်သွယ်ရေး၊ နည်းပညာနှင့် သဘာဝပတ်ဝန်းကျင်အရေးတို့ အပါအဝင် နယ်ပယ် အများအပြားတွင် ပူးပေါင်းဆောင်ရွက်ရေး သဘောတူစာချုပ် ၃၅ ခု ချုပ်ဆိုခဲ့သည်။

Source: NDTV

CNI International News

သည်ဟိဂ်၊ နိုဝင်ဘာ ၂၂

နိုင်ငံတကာ ရာဇဝတ်မှုဆိုင်ရာခုံရုံး (ICC) သည် အစ္စရေးဝန်ကြီးချုပ် နေတန်ယာဟု (Benjamin Netanyahu) ၊ အစ္စရေး ကာကွယ်ရေးဝန်ကြီးဟောင်း ယိုအက်ဗ် ဂဲလန့် (Yoav Gallant) နှင့် ဟားမာ့စ်အဖွဲ့တပ်မှူး မိုဟာမက် ဒီအစ်ဖ်တို့ကို ဖမ်းဝရမ်း ထုတ်လိုက်ကြောင်း ဘီဘီစီမှ ဖော်ပြခဲ့သည်။

၎င်းတို့ ၃ ဦးအား ဂါဇာစစ်ပွဲအတွင်း စစ်ရာဇဝတ်မှုများ၊ လူသားမျိုးနွယ်ကို ဆန့်ကျင်သည့် ရာဇဝတ်မှုစွဲချက်များ အတွက် ပြစ်မှုဆိုင်ရာ တာဝန်ရှိကြောင်း အထောက်အထားများ တွေ့ရှိခဲ့သည်ဟု တရားသူကြီးများက ပြောကြားခဲ့ သည်။

ဟားမာ့စ်တပ်မှူး ဒီအစ်ဖ်သည် ဇူလိုင်လအတွင်းက ဂါဇာတွင် အစ္စရေး၏ လေကြောင်း တိုက်ခိုက်မှုအတွင်း သေဆုံးခဲ့ကြောင်း အစ္စရေးစစ်တပ်က ပြောကြားခဲ့သည့်တိုင် ICC က ဒီအစ်ဖ်ကို ဖမ်းဝရမ်း ထုတ်ခဲ့ခြင်းဖြစ်သည်။

ICC ကမူ ဒီအစ်ဖ်သည် အမှန်တကယ် သေဆုံးခြင်း ဟုတ်/မဟုတ် အတည်မပြုနိုင်သဖြင့် ဖမ်းဝရမ်း ထုတ်ခြင်း ဖြစ်ကြောင်း ပြောကြားခဲ့သည်။

ICC ၏ အဖွဲ့ဝင် ၁၂၄ နိုင်ငံအနေဖြင့် နေတန်ယာဟု၊ ဂဲလန့်နှင့် ဒီအစ်ဖ်တို့ကို ဖမ်းဆီးရေးအတွက် လွတ်လပ်စွာ ဆုံးဖြတ်ပိုင်ခွင့်ရှိသည်။

ICC ရှေ့နေ ကာရင်ခမ်းကို တွေ့ရစဉ်

မေလအတွင်းကလည်း ICC ရှေ့နေ ကာရင်ခမ်း(Karim Khan) သည် နေတန်ယာဟု၊ ဂဲလန့်၊ ဒီအစ်ဖ်နှင့် အခြား ဟားမာ့စ်ခေါင်းဆောင် ၂ ဦးကို ဖမ်းဝရမ်းများထုတ်ရန် ကြိုးပမ်းခဲ့သည်။

ထိုဟားမာ့စ်ခေါင်းဆောင် ၂ ဦးမှာ အစ္စမေးလ် ဟာနီယာ (Ismail Haniyeh) နှင့် ယာယာဆင်ဝါ (Yahya Sinwar) တို့ဖြစ်ပြီး ၎င်းတို့ ၂ ဦးစလုံးမှာ အစ္စရေး၏ တိုက်ခိုက်မှုများအတွင်း သေဆုံးခဲ့ပြီးဖြစ်သည်။

နေတန်ယာဟု၊ ဂဲလန့်တို့သည် ၂၀၂၃ ခုနှစ်၊ အောက်တိုဘာ ၇ ရက်က စတင်ဖြစ်ပွားခဲ့သည့်  ဂါဇာစစ်ပွဲအတွင်း စစ်ရာဇဝတ်မှုများ၊ လူသားမျိုးနွယ်ကို ဆန့်ကျင်သော ရာဇဝတ်မှုများကို ကျူးလွန်ခဲ့သည်ဟု ခမ်းက ပြောသည်။

ထို့ပြင် ဟားမာ့စ် ခေါင်းဆောင်များသည်လည်း လူသတ်မှု၊ ပြန်ပေးဆွဲဖမ်းဆီးမှု၊ အဓမ္မပြုကျင့်မှု၊ ညှင်းပန်းနှိပ်စက်မှု များ အပါအဝင် စစ်ရာဇဝတ်မှုများ၊ လူသားမျိုးနွယ်ကို ဆန့်ကျင်သည့် ရာဇဝတ်မှုများကို ကျူးလွန်ခဲ့သည်ဟု ခမ်း က ပြောကြားခဲ့သည်။

Source: ဘီဘီစီ

CNI International News

နယူးဒေလီ၊ နိုဝင်ဘာ ၂၂

အိန္ဒိယနိုင်ငံ၏ သြဇာတိက္ကမ ကြီးမားသည့် စီးပွားရေးလုပ်ငန်းရှင် အဒါနီ(Gautam Adani)ကို ဒေါ်လာ သန်း ၂၅၀ လာဘ်ပေးမှု အရှုပ်တော်ပုံတွင် ပါဝင်မှုဖြင့် အမေရိကန်အစိုးရရှေ့နေများက တရားစွဲဆိုခဲ့ကြောင်း ရိုက်တာမှ ဖော်ပြခဲ့သည်။

ကမ္ဘာ့အချမ်းသာဆုံး ပုဂ္ဂိုလ်များထဲတွင် တစ်ဦး အပါအဝင်ဖြစ်သည့် အဒါနီနှင့် အခြား အပေါင်းပါများသည် ဆိုလာစွမ်းအင် ကန်ထရိုက်များရရှိရန် အိန္ဒိယအစိုးရအရာရှိများကို ဒေါ်လာ သန်း ၂၅၀ ကျော် လာဘ်ထိုးရန် ကတိပေးခဲ့ကြောင်း အမေရိကန်ဖက်ဒရယ် အစိုးရရှေ့နေများက နိုဝင်ဘာ ၂၀ ရက်က စွပ်စွဲခဲ့သည်။

ထို့ပြင် အဒါနီတို့ အုပ်စုသည် အမေရိကန် ရင်းနှီးမြှုပ်နှံသူများထံမှ ငွေကြေးများရရှိရန် ကြိုးပမ်းနေချိန်တွင် လာဘ်ထိုးသည့်ကိစ္စကို ဖုံးကွယ်ခဲ့ကြောင်း ရှေ့နေများက ပြောကြားခဲ့သည်။

အမေရိကန်တရားရုံး ၅ ရုံးကလည်း အဒါနီ၏ တူဖြစ်သည့် ဆာဂါ အာရ် အဒါနီနှင့် ဗီနက် အက်စ် ဂျာအင်တို့ကို ဖက်ဒရယ်ဥပဒေများ ချိုးဖောက်မှုဖြင့် စွပ်စွဲခဲ့သည်။

၎င်းတို့နှစ်ဦးစလုံးသည် အိန္ဒိယ၏ ပြန်လည် သန့်စင်နိုင်သည့် စွမ်းအင်ကုမ္ပဏီတစ်ခု၏ အလုပ်အမှုဆောင်များ ဖြစ်သည်။ 

အဒါနီကိုတွေ့ရစဉ်

"တရားစွဲခံရသူတွေဟာ ဒေါ်လာဘီလျံချီ တန်ဖိုးရှိတဲ့ ကန်ထရိုက်တွေ ရဖို့အတွက် အိန္ဒိယအစိုးရကို လာဘ်ပေးဖို့ ပူးပေါင်းကြံစည်ခဲ့ကြပါတယ်"ဟု နယူးယောက် အရှေ့ပိုင်းခရိုင်တရားရုံး၏ ရှေ့နေ ဘရီယွန်ပိစ်က ပြောကြားခဲ့ သည်။

အမေရိကန်၏ တရားဥပဒေအရ အမေရိကန် ရင်းနှီးမြှုပ်နှံသူများ သို့မဟုတ် ဈေးကွက်များနှင့် အဆက်အသွယ်ရှိ နေသည့် လုပ်ငန်းများတွင် ပါဝင်နေသူများကို အကျင့်ပျက်ခြစားမှု စွဲချက်များဖြင့် သံသယရှိပါက တရားစွဲဆိုခွင့် ရှိသည်။

ဂူဂျာရက်ပြည်နယ် အာမက်ဒါဘက်မြို့တွင် မွေးဖွားခဲ့သည့် အဒါနီသည် လူလတ်တန်းစား မိသားစုမှ မွေးဖွားခဲ့သူ ဖြစ်သော်လည်း အသက် ၁၆ နှစ်၌ ကျောင်းထွက်ခဲ့ကာ မွမ်ဘိုင်းမြို့၏ ကျောက်မျက်ရတနာ ကုန်သွယ်ရေး ဈေးကွက်မှာ အလုပ်ရှာရန် မွမ်ဘိုင်းသို့ ပြောင်းရွှေ့ခဲ့သူဖြစ်သည်။

သူသည် သူ့အစ်ကို၏ ပလပ်စတစ်လုပ်ငန်းတွင် ယာယီဝင်ရောက် လုပ်ကိုင်ခဲ့ပြီးနောက် ၁၉၈၈ ခုနှစ်တွင် ပို့ကုန် လုပ်ငန်းကို ချဲ့ထွင်ကာ မိသားစုအမည်ဖြင့် စီးပွားရေး လုပ်ငန်းစုအား တည်ထောင်ခဲ့ပြီး ကန်ထရိုက်များရရှိကာ လျှင်မြန်စွာ ကြီးပွားချမ်းသာလာခဲ့သည်။

Source: ရိုက်တာ

CNI International News

ကိယက်ဗ်၊ နိုဝင်ဘာ ၂၂

ယူကရိန်းသည် နိုဝင်ဘာ ၂၀ ရက်တွင် ဗြိတိန်-ပြင်သစ်လုပ် Storm Shadow ခရုစ်ဒုံးကျည်များဖြင့် ပထမဆုံး အကြိမ် ရုရှားနိုင်ငံတွင်းသို့ ပစ်ခတ်ခဲ့ကြောင်း CNN မှ ဖော်ပြသည်။

ယူကရိန်းသည် ရုရှားနိုင်ငံတွင်းသို့ အမေရိကန်ထုတ် ATACM ဒုံးကျည်များဖြင့် ပစ်ခတ်ခဲ့ပြီးနောက် တစ်ရက် အကြာတွင် ထိုကဲ့သို့ ပစ်ခတ်ခဲ့ခြင်းဖြစ်သည်။

ဗြိတိန်က ထောက်ပံ့သော ဒုံးကျည်များဖြင့် ရုရှားနယ်မြေအတွင်းသို့ ယူကရိန်းက ပစ်ခတ်ခဲ့သည့်သတင်းကို အမည်မဖော်လိုသူ တာဝန်ရှိသူတစ်ဦးက ရိုက်တာသတင်းဌာနသို့ အတည်ပြု ပြောကြားခဲ့သည်။

ဗြိတိန်မီဒီယာကလည်း နိုဝင်ဘာ ၂၀ ရက်က ခရုစ်ဒုံးကျည် အသုံးပြုခဲ့သည့် သတင်းကို သူ၏ သတင်းအရင်းအမြစ် များ ပြောကြားချက်ကို ကိုးကားပြီး ဖော်ပြခဲ့သည်။

CNN သတင်းဌာနက ယူကရိန်းကာကွယ်ရေးဝန်ကြီး ရက်စ်တမ်အူမာရော့ဗ်(Rustem Umerov)ကို ရုရှားနိုင်ငံတွင်း သို့ Storm Shadow ဒုံးကျည်ဖြင့် ပစ်ခတ်ခဲ့ခြင်း ရှိ/မရှိ မေးမြန်းမှုတွင် အူမာရော့ဗ်က ၎င်းတို့နိုင်ငံကို ကာကွယ်ရန် လိုအပ်သည်များအားလုံးကို အသုံးပြုနေသည့်အတွက် အသေးစိတ်ကို ထုတ်ဖော်ပြောကြားသွားမည် မဟုတ် ကြောင်း ပြန်လည်ဖြေကြားခဲ့သည်။

ဗြိတိန်ရဲ့ Storm Shadow ဒုံးကျည်ကိုတွေ့ရစဉ်

ဗြိတိန်ဝန်ကြီးဌာန၏ ပြောရေးဆိုခွင့်ရှိသူက CNN သတင်းဌာန၏ မေးမြန်းမှုကို ပြန်လည်ဖြေကြားခဲ့ခြင်းမရှိဘဲ ပြင်သစ်ကာကွယ်ရေးဝန်ကြီးဌာနကိုလည်း ဆက်လက် မေးမြန်းထားကြောင်း သတင်းတွင် ဖော်ပြထားသည်။

ရုရှားကမူ ၎င်းတို့၏နယ်မြေကို တိုက်ခိုက်ရန် အနောက်အုပ်စု၏ လက်နက်များကို အသုံးပြုခြင်းသည် ယူကရိန်း စစ်ပွဲတွင် ပဋိပက္ခဖြစ်ပွားမှုအား အရှိန်မြင့်တက် လာစေမည်ဖြစ်ကြောင်း သတိပေးထားသည်။

ရုရှားလိုလားသော တယ်လီဂရမ် ချန်နယ်နှစ်ခုက ယူကရိန်းသည် ကာ့ရှ်ဒေသကို Storm Shadow ခရုစ်ဒုံးကျည် ၁၂ စင်းအထိ ပစ်လွှတ်ခဲ့ကြောင်း ဖော်ပြထားသည်။

ဗြိတိန်သည် အကွာအဝေး ကီလိုမီတာ ၂၅၀ ကျော်အထိ ရောက်ရှိနိုင်သော Storm Shadow ဒုံးကျည်များကို ယခင်က ယူကရိန်းအား အသုံးပြုခွင့် ပေးထားပြီးဖြစ်သည်။

Source: CNN

CNI International News

ဆိုးလ်၊ နိုဝင်ဘာ ၂၁

မြောက်ကိုရီးယားသည် ယူကရိန်းကို စစ်ပွဲဆင်နွှဲနေသည့် ရုရှားအား လက်နက်ကြီးစနစ်များ ထပ်မံထောက်ပံ့ပေး ခဲ့ကြောင်း တောင်ကိုရီးယားက ပြောကြားခဲ့သည်ဟု အေပီမှ ဖော်ပြခဲ့သည်။

ရုရှားသို့ စေလွှတ်ထားသော ထောင်နှင့်ချီသည့် မြောက်ကိုရီးယား စစ်သားများသည် ယူကရိန်းစစ်ပွဲတွင် ပါဝင် တိုက်ခိုက်နေချိန်၌ လက်နက်ကြီးများ ထပ်မံထောက်ပံ့ ပေးခဲ့ခြင်းဖြစ်သည်ဟု တောင်ကိုရီးယားထောက်လှမ်းရေး အေဂျင်စီ(NIS)က နိုဝင်ဘာ ၂၀ ရက်တွင် သတင်းထောက်များကို ပြောကြားခဲ့သည်။

ရုရှားနိုင်ငံအတွင်းရှိ ပစ်မှတ်များကို တိုက်ခိုက်ရန် ယူကရိန်းအား အမေရိကန်လုပ် တာဝေးပစ် ဒုံးကျည်များ အသုံးပြုခွင့်ပေးခဲ့သည့် အမေရိကန်၏ ဆုံးဖြတ်ချက်သည် စစ်မီးကို လောင်စာထပ်ထည့်သော လုပ်ဆောင်ချက် ဖြစ်သည်ဟု ရုရှားက သတိပေးခဲ့ပြီးနောက် တောင်ကိုရီးယား ထောက်လှမ်းရေးအေဂျင်စီ၏ သတိပေးချက် ထွက်ပေါ်လာခြင်းဖြစ်သည်။

ရုရှားရောက် မြောက်ကိုရီးယား စစ်သားတွေသတင်းကို ကြေညာနေစဉ်

အမေရိကန်အရာရှိများကမူ ယူကရိန်းစစ်ပွဲတွင် မြောက်ကိုရီးယားက အပြည့်အဝနီးပါး ပါဝင်လာမှုကြောင့် အမေရိကန်သမ္မတ ဂျိုးဘိုင်ဒန် (Joe Biden) သည် ယူကရိန်းအား အမေရိကန်လုပ် လက်နက်များ အသုံးပြုပြီး ရုရှားနိုင်ငံအတွင်းရှိ ပစ်မှတ်များကို တိုက်ခိုက်ခွင့်ပြုရန် ဆုံးဖြတ်ခဲ့ခြင်းဖြစ်သည်ဟု ပြောကြားခဲ့သည်။

မြောက်ကိုရီးယား ရုရှားအား ၁၇၀ မမ အမြောက်များနှင့် ၂၄၀ မမ အတွဲလိုက် ဒုံးပစ်လောင်ချာစနစ်များ ပေးပို့ခဲ့ သည်ဟု တောင်ကိုရီးယားလွှတ်တော်တွင် တံခါးပိတ်ပြုလုပ်သည့် အစည်းအဝေး၌ NIS က ပြောကြားခဲ့သည်ဟု ထိုအစည်းအဝေးကို တက်ရောက်ခဲ့သည့် လွှတ်တော်အမတ် လီဆောင်ကွမ် (Lee Seong Kweun) က သတင်းထောက်များအား ပြောကြားခဲ့သည်။

ထိုလက်နက်ကြီး စနစ်မျိုးကို ရုရှားစစ်တပ်က အသုံးမပြုတတ်သဖြင့် မြောက်ကိုရီးယားသည် ထိုလက်နက်ကြီး များ အသုံးပြုပုံနှင့် ပြုပြင်ထိန်းသိမ်းပုံ နည်းစနစ်များအား သင်ကြားပြသပေးရန် သင်တန်းနည်းပြများလည်း စေလွှတ်ခဲ့သည်ဟု NIS က ခန့်မှန်းခဲ့ကြောင်း လီက ပြောသည်။

မြောက်ကိုရီးယားခေါင်းဆောင် ကင်မ်ဂျုံအန်ကို တွေ့ရစဉ်

ပြီးခဲ့သည့် သီတင်းပတ်က ရုရှား Telegram ချန်နယ်များနှင့် အခြားလူမှုမီဒီယာများတွင် ပျံ့နှံ့ခဲ့သော ဓာတ်ပုံများ အရ မြောက်ကိုရီးယား၏ ၁၇၀ မမ Koksan အမြောက်များကို ရုရှားနိုင်ငံအတွင်းသို့ တင်ပို့နေပုံများအား တွေ့ရ သည်။

မကြာသေးမီ သီတင်းပတ်များအတွင်း မြောက်ကိုရီးယားသည် ပြည်တွင်းလုပ် ၁၇၀ မမ ဟောင်ဝဇ္ဇာအမြောက် ၅၀၊ အတွဲလိုက် ဒုံးပစ်လောင်ချာစနစ် ၂၀ ကို ရုရှားသို့ ပေးပို့ခဲ့ကြောင်း  Financial Times သတင်းစာက နိုဝင်ဘာ ၁၇ ရက်တွင် ဖော်ပြခဲ့သည်။

ထို့ပြင် မြောက်ကိုရီးယားသည် ၂၀၂၃ ခုနှစ်၊ ဩဂုတ်လကတည်းက ရုရှားအား အမြောက်များ၊ ဒုံးကျည်များနှင့် အခြား သမားရိုးကျ လက်နက်များ ပါဝင်သည့် ကွန်တိန်နာ အလုံးပေါင်း ၁၃,၀၀၀ ကျော်ကို ပေးပို့ခဲ့ကြောင်း ပြီးခဲ့သည့်လအတွင်း NIS က ပြောကြားခဲ့သည်။

Source: AP