CNI International News

အစ္စလာမ်မာဘက်၊ ဧပြီ ၃၀

ပါကစ္စတန်နိုင်ငံ၏ နယ်နိမိတ်အတွင်း တရုတ်လုံခြုံရေးတပ်ဖွဲ့များ ဖြန့်ကြက်ချထားခွင့်ပြုရန် တရုတ်က ပါကစ္စတန်ကို မကြုံစဖူး တောင်းဆိုခဲ့သည်။

ထိုသို့ တောင်းဆိုမှုက ပါကစ္စတန်၏ နယ်နိမိတ်ကို တရုတ်က ထိန်းချုပ်လိုသည့်သဘော သက်ရောက်နေသည်ဟု Greek City Times မှ ဖော်ပြခဲ့သည်။

တရုတ်သည် ပါကစ္စတန်နိုင်ငံအတွင်းရှိ တရုတ်လုပ်သား ၁၂၀၀ ခန့်ကို ကာကွယ်ရန် ရည်ရွယ်သည့် အနေဖြင့် ထိုကဲ့သို့ တောင်းဆိုခဲ့ခြင်းဖြစ်သည်။

အဆိုပါ တရုတ်လုပ်သားများသည် ဒေါ်လာ ၆၀ ဘီလျံ တန်ဖိုးရှိ တရုတ်-ပါကစ္စတန် စီးပွားရေး စင်္ကြန့်(CPEC) နှင့် ဆက်နွှယ်သည့် အခြေခံ အဆောက်အအုံများနှင့် ပညာရေး အဆောက်အအုံများကို တည်ဆောက်နေခြင်း ဖြစ်သည်။

ပါကစ္စတန် ဝန်ကြီးချုပ်ဟောင်း နာဝက်ဇ် ရှရှစ်ဖ်ကို တွေ့ရစဉ်

မကြာသေးမီ နှစ်များအတွင်း ပါကစ္စတန်နိုင်ငံအတွင်းရှိ တရုတ်လုပ်သားများကို စစ်သွေးကြွများက ပစ်မှတ်ထား တိုက်ခိုက်လာခဲ့သည်။

ပါကစ္စတန်က တရုတ်၏ ပတ်လမ်း၊ ရပ်ဝန်း စီမံကိန်း (BRI) ၏ CPEC တည်ဆောက်ရေးကို အောင်မြင်အောင် ကူညီပေးမည်ဆိုသည့်တိုင် တရုတ်လုပ်သားများအတွက် လုံခြုံရေးအန္တရာယ်များ ရှိနေဆဲဖြစ်သည်။

ပြီးခဲ့သည့်လက ပါကစ္စတန်နိုင်ငံ ဘာလိုချီစတန် (Balochistan) ပြည်နယ်တွင် အသေခံ ဗုံးခွဲသမားတစ်ဦးသည် ဖောက်ခွဲရေးပစ္စည်းများ တင်ဆောင်လာသည့် ကားဖြင့် တရုတ်အင်ဂျင်နီယာများ လိုက်ပါလာသော ဘတ်စ်ကား ကို ဝင်တိုက်ပြီး အသေခံဗုံးခွဲ တိုက်ခိုက်ခဲ့သဖြင့် လူ ၅ ဦးသေဆုံးခဲ့သည်။

ပါကစ္စတန်အစိုးရကလည်း ဝန်ကြီးချုပ် နာဝက်ဇ် ရှရှစ်ဖ် (Nawaz Sharif) လက်ထက်ဖြစ်သည့် ၂၀၁၆ ခုနှစ်တွင် လုံခြုံရေးတပ်ဖွဲ့ဝင်များ ဖြန့်ကြက်ချထားခွင့်ပြုရန် တရုတ်၏ တောင်းဆိုချက်ကို လက်ခံတော့မည့် အခြေအနေ အထိ ရောက်ရှိခဲ့သည်။

သို့သော် ထိုတောင်းဆိုချက်ကို ထိုအချိန်က စစ်တပ်အကြီးအကဲ ရာဟီးလ် ရှရစ်ဖ် (Raheel Sharif) ဦးဆောင်သည့် ပါကစ္စတန်၏ ဩဇာကြီးမားသော စစ်တပ်က လက်မခံခဲ့သဖြင့် အောင်မြင်ခဲ့ခြင်းမရှိပေ။

ပါကစ္စတန်စစ်တပ် အကြီးအကဲဟောင်း ရာဟီးလ် ရှရစ်ဖ်ကိုတွေ့ရစဉ်

တရုတ်တပ်ဖွဲ့များ ဖြန့်ကြက်ချထားမည့် အစီအစဉ်အစား ရှရစ်ဖ်သည် CPEC ပရောဂျက်များနှင့် ဝန်ထမ်းများကို ကာကွယ်ပေးရန် ကြည်းတပ်နှင့် ရေတပ်မှ တပ်ဖွဲ့ဝင် ၁၂,၀၀၀ ပါသည့် တပ်ဖွဲ့တစ်ခုကို ဖွဲ့စည်းထူထောင်ခဲ့သည်။

သို့သော် ထိုတပ်ဖွဲ့သည် ၎င်းတို့၏ အဓိကတာဝန်ကို ကျေပွန်စွာ ထမ်းဆောင်နိုင်ခဲ့ခြင်းမရှိဘဲ တရုတ်လုပ်သား များအား သယ်ယူပို့ဆောင်ရေးကဏ္ဍကဲ့သို့ အခြားကဏ္ဍများတွင် လစ်ဟင်းမှုများရှိခဲ့ကာ စစ်သွေးကြွများ၏ အလွယ်တကူ ပစ်မှတ်ထား တိုက်ခိုက်မှုကို ခံနေရသည်။
အဓိကပြဿနာမှာ ပါကစ္စတန် အစိုးရနှင့် စစ်တပ်သည် မကြာသေးမီ နှစ်များအတွင်း ပြည်တွင်း နိုင်ငံရေးနှင့် စီးပွားရေး အကျပ်အတည်းများကို ရင်ဆိုင်နေရသဖြင့် CPEC လုံခြုံရေးကိစ္စအား အာရုံသိပ် မစိုက်နိုင်ခြင်းကြောင့် ဖြစ်သည်ဟု လေ့လာစောင့်ကြည့်သူများက ပြောကြားခဲ့သည်။

Source: Greek City Times

CNI International News

ဝါရှင်တန်၊ ဧပြီ ၂၉

တရုတ်သည် အမေရိကန်တွင် ပြုလုပ်မည့် သမ္မတရွေးကောက်ပွဲကို ဩဇာလွှမ်းမိုးရန်နှင့် ကြားဝင်စွက်ဖက်ရန် ကြိုးပမ်းနေသည့် အထောက်အထားကို အမေရိကန်က တွေ့ရှိခဲ့သည်ဟု အမေရိကန်နိုင်ငံခြားရေးဝန်ကြီး အန်တိုနီ ဘလင်ကင် (Antony Blinken) က ပြောကြားခဲ့ကြောင်း The Print သတင်းဝက်ဘ်ဆိုက်မှ ဖော်ပြခဲ့သည်။

တရုတ်သမ္မတ ရှီကျင့်ဖျင် (Xi Jinping) က တရုတ်သည် ထိုကဲ့သို့ ပြုလုပ်မည်မဟုတ်ဟု ကတိပြုခဲ့သည့်တိုင် တရုတ်သို့ ၃ ရက်ကြာခရီးစဉ် သွားရောက်ခဲ့သည့် ဘလင်ကင်က CNN သတင်းဌာနနှင့် အင်တာဗျူးတွင် ပြောကြားခဲ့သည်။

အမေရိကန်၏ နည်းပညာ ထိန်းချုပ်မှုများမှအစ ရုရှားကို တရုတ်၏ ထောက်ခံမှုအဆုံး နှစ်နိုင်ငံအကြား အရေး ကိစ္စများကို စီမံဆောင်ရွက်ရန် ကြိုးပမ်းနေချိန်တွင် ဘလင်ကင်သည် ၎င်း၏ တရုတ်ခရီးစဉ်အတွင်း ရှီ အပါအဝင် တရုတ်၏ ထိပ်သီးအရာရှိများနှင့် နာရီပေါင်းများစွာကြာ ဆွေးနွေးမှုများ ပြုလုပ်ခဲ့သည်။

အမေရိကန်ရွေးကောက်ပွဲ မဲထည့်နေကြစဉ်

ပြီးခဲ့သည့် နိုဝင်ဘာလက အမေရိကန်နိုင်ငံ၊ ဆန်ဖရန်စစ္စကို (San Francisco)တွင် အမေရိကန်သမ္မတ ဂျိုးဘိုင်ဒန် (Joe Biden) နှင့် ရှီတို့၏ အစည်းအဝေး၌ တရုတ်အနေဖြင့် အမေရိကန်ရွေးကောက်ပွဲကို ဝင်ရောက်စွက်ဖက်ခြင်း မပြုရန် ပြောကြားခဲ့သည့် ဘိုင်ဒန်၏ အမှာစကားကို ဘလင်ကင်က တရုတ်ခရီးစဉ်အတွင်း ထပ်လောင်း ပြောကြားခဲ့သည်။

ထို့နောက် ရှီက တရုတ်သည် ထိုကဲ့သို့ လုပ်ဆောင်လိမ့်မည် မဟုတ်ကြောင်း ကတိပြုခဲ့သည်ဟု CNN မှ ဖော်ပြခဲ့ သည်။

“ဘာပဲဖြစ်ဖြစ် တရုတ်ဟာ အမေရိကန်ရွေးကောက်ပွဲကို ဩဇာလွှမ်းမိုးဖို့နဲ့ ကြားဝင်စွက်ဖက်ဖို့ ကြိုးပမ်းနေတဲ့ အထောက်အထားကို ကျနော်တို့ တွေ့ခဲ့ရပါတယ်။ ကျနော်တို့အနေနဲ့ ဒါကို အမြန်ဆုံး ရပ်တန့်စေချင်ပါတယ်” ဟု ဘလင်ကင်က ရှီ၏ ကတိစကားနှင့်ပတ်သက်ပြီး ၎င်း၏အမြင်ကို မေးမြန်းခံရချိန်တွင် ထိုကဲ့သို့ ဖြေကြားခဲ့ခြင်း ဖြစ်သည်။

ဘလင်ကင်ကိုတွေ့ရစဉ်

“ကျနော်တို့ ရွေးကောက်ပွဲကို တရုတ်ရဲ့ ကြားဝင်စွက်ဖက်မှုဟာ ကျနော်တို့ သတိထားစောင့်ကြည့်ရမယ့်ကိစ္စ ဖြစ်ပြီး ဒါကို လုံးဝ လက်မခံနိုင်ပါဘူး။ သူတို့အနေနဲ့ ဒီအမှာစကားကို နောက်တစ်ကြိမ် ကြားသိစေချင်ပါတယ်” ဟု ဘလင်ကင်က ပြောကြားခဲ့သည်။

တရုတ်နှင့် အခြားနိုင်ငံများသည် အမေရိကန်တွင် ဩဇာလွှမ်းမိုးမှု ရရှိစေရန် လှုပ်ရှားမှုများ၌ အမေရိကန်၏ လူမှု အသိုင်းအဝိုင်းအကြား သဘောထား ကွဲလွဲမှုများအပေါ် ကြိုးကိုင်ခြယ်လှယ်မည့် အရေးကို စိုးရိမ်ရကြောင်းလည်း ဘလင်ကင်က ပြောကြားခဲ့သည်။

တရုတ်ကမူ အမေရိကန်ရွေးကောက်ပွဲကို ကြားဝင်နှောင့်ယှက်မည် မဟုတ်ကြောင်း ထပ်တလဲလဲ ပြောကြားခဲ့ သည့်တိုင် တရုတ်နှင့်ဆက်နွှယ်သည့် အခြားနိုင်ငံများတွင် နိုင်ငံရေးအရ ကြားဝင်စွက်ဖက်မှုများ ပြုလုပ်နေသည် ဟု စွပ်စွဲခံခဲ့ရသည်။

Source: The Print

CNI International News

ကိယက်ဗ်၊ ဧပြီ ၂၉

ဥရောပသမဂ္ဂ (EU) ကို ထောက်ပံ့ပေးနေသည့် ယူကရိန်း၏ အဓိက ဓာတ်ငွေ့စက်ရုံများကို ရုရှားက တိုက်ခိုက်ခဲ့ သည်ဟု ရိုက်တာမှ ဖော်ပြခဲ့သည်။

ထိုတိုက်ခိုက်မှုက ရုရှားသည် ယူကရိန်း၏ စွမ်းအင်ကဏ္ဍကို ပစ်မှတ်ထားလာခဲ့ကြောင်း ယူကရိန်းသမ္မတ ဇာလန်းစကီး (Volodymyr Zelensky) က ပြောကြားခဲ့သည်။

ရုရှားသည် ၎င်း၏ Gazprom ကုမ္ပဏီနှင့် ယူကရိန်းအကြား သဘောတူညီချက်အရ ယူကရိန်းမှတဆင့် EU သို့ ဓာတ်ငွေ့များ ဆက်လက် ထောက်ပံ့ပေးလျက်ရှိသည်။

ထိုသဘောတူညီချက်သည် ဒီဇင်ဘာလတွင် သက်တမ်းကုန်ဆုံးမည်ဖြစ်သည်။

ယူကရိန်းက ဓာတ်ငွေ့စက်ရုံ ပေါက်ကွဲနေစဉ်

ထိုကဲ့သို့ ဓာတ်ငွေ့များကို ယူကရိန်းနိုင်ငံမှဖြတ်ပြီး EU သို့ ပို့ဆောင်ပေးရသည့်အတွက် ရုရှားသည် ယူကရိန်းကို အကျိုးဆောင်ခ ပေးနေရသည်။

ယူကရိန်းကမူ ရုရှားနှင့် ထိုသဘောတူညီချက်ကို ဆက်လက် သက်တမ်းတိုးရန် အစီအစဉ်မရှိကြောင်း ယူကရိန်း စွမ်းအင်ဝန်ကြီးက ပြီးခဲ့သည့်လအတွင်း ပြောကြားခဲ့သည်။

“ရုရှားရဲ့ အဓိက ပစ်မှတ်ကတော့ ယူကရိန်းရဲ့ စွမ်းအင်ကဏ္ဍကို ဖြစ်ပါတယ်။ လျှပ်စစ်ဓာတ်အားပေး စက်ရုံတွေနဲ့ ဓာတ်ငွေ့ ပို့ဆောင်ရေးစက်ရုံတွေကို တိုက်ခိုက်နေတာပါ။ အထူးသဖြင့် ဓာတ်ငွေ့စက်ရုံတွေဟာ ဥရောပသမဂ္ဂကို ဓာတ်ငွေ့တွေ ဘေးကင်းလုံခြုံစွာ ပို့ပေးနိုင်ဖို့ အရမ်းအရေးကြီးပါတယ်” ဟု ဇာလန်းစကီးက ပြောကြားခဲ့သည်။

နိုင်ငံတကာ မိတ်ဖက်နိုင်ငံများထံမှ ကာကွယ်ရေးလက်နက်စနစ်များ ထောက်ပံ့ရေးကို လှုပ်ရှားနေသည့် ဇာလန်းစကီးက ယူကရိန်းတပ်ဖွဲ့များသည် ရုရှား၏ ဒုံးကျည် ၃၄ စင်းကို ပစ်ချနိုင်ခဲ့သည်ဟုလည်း ပြောကြားခဲ့ သည်။

 အုပ်ချုပ်ရေးမှူး မက်ဆင် ကိုဇက်စကီးကို တွေ့ရစဉ်

ရုရှား၏ တိုက်ခိုက်မှုများတွင် ပစ်မှတ်ထားခံခဲ့ရသည့် စက်ရုံများနှင့် ထိုစက်ရုံများကို ဒုံးကျည်များ ထိမှန်ခဲ့ခြင်း ရှိ၊ မရှိဆိုသည့် အသေးစိတ် အချက်အလက်များကို ၎င်းက ပြောကြားခဲ့ခြင်း မရှိပေ။

ယူကရိန်းနိုင်ငံပိုင် Naftogaz ဓာတ်ငွေ့ကုမ္ပဏီကမူ ရုရှားသည် ၎င်း၏ စက်ရုံများကို တိုက်ခိုက်ခဲ့သော်လည်း ထိခိုက်ပျက်စီးမှုမရှိဘဲ ယူကရိန်းထံမှ ဓာတ်ငွေ့ဝယ်ယူသူများအား ဓာတ်ငွေ့များ ထောက်ပံ့မှု အပေါ်ကိုလည်း သက်ရောက်မှု မရှိခဲ့ကြောင်း ဖော်ပြခဲ့သည်။

ရုရှား၏ ခရုဇ်ဒုံးကျည်များနှင့် Kinzhal ဟိုက်ပါဆိုးနစ် ဒုံးကျည်များ၏ တိုက်ခိုက်မှုကို ခံခဲ့ရချိန်အတွင်း ယူကရိန်း တပ်ဖွဲ့များက ဒုံးကျည် ၃ စင်းကို ပစ်ချနိုင်ခဲ့ကြောင်း၊ သို့သော်လည်း အခြားဒုံးကျည်များသည် နေရာဒေသအချို့ကို ကျရောက်ခဲ့ကြောင်း ပိုလန်နယ်စပ်ရှိ ယူကရိန်း၏ Lviv(လဗီ) ဒေသမှ အုပ်ချုပ်ရေးမှူး မက်ဆင် ကိုဇက်စကီး (Maksym Kozytskyi) က ပြောကြားခဲ့သည်။

Source: ရိုက်တာ

CNI International News

ဆန်နာ၊ ဧပြီ ၂၉

ယီမင်နိုင်ငံ၏ ဟူရ်သီအဖွဲ့သည် ရေနံတင်သင်္ဘောတစ်စင်းကို တိုက်ခိုက်ခဲ့ပြီး အမေရိကန်၏ MQ-9 Reaper ဒရုန်းတစ်စင်းကို ပစ်ချခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ဂါဇာတွင် အစ္စရေး၏ စစ်ပွဲကို ဆန့်ကျင်သည့်အနေဖြင့် တိုက်ခိုက်မှုများအား ပိုမိုအရှိန်မြှင့်တင်သွားမည်ဟု ဟူရ်သီအဖွဲ့က ပြောကြားနေချိန်၌ ထိုတိုက်ခိုက်မှုများ ဖြစ်ပွားခဲ့ခြင်းဖြစ်သည်။

ဟူရ်သီအဖွဲ့သည် ပင်လယ်နီတွင် ဗြိတိန် ရေနံတင်သင်္ဘော Andromeda Star ကို ဒုံးကျည်များဖြင့် တိုက်ခိုက်ခဲ့သည်။

ထိုဒုံးကျည်များသည် ပစ်မှတ်ကို တိုက်ရိုက်ထိမှန်ခဲ့သည်ဟု ဟူရ်သီအဖွဲ့၏ ပြောရေးဆိုခွင့်ရှိသူ ယာယာဆာရီ (Yahya Saree) က ပြောကြားခဲ့သည်။

အမေရိကန်စစ်တပ်ကလည်း ဟူရ်သီအဖွဲ့သည် ပင်လယ်နီအတွင်းရှိ ပစ်မှတ်များကို သင်္ဘောဖျက် ပဲ့ထိန်းဒုံးကျည် ၃ စင်းဖြင့် ပစ်ခတ်ခဲ့ပြီး MV Andromeda Star သင်္ဘော ထိခိုက်ခဲ့ကြောင်း အတည်ပြုခဲ့သည်။

ရေနံတင်သင်္ဘောကို တွေ့ရစဉ်

ထိုသင်္ဘောသည် မကြာသေးမီက ဗြိတိန်က ဆေးချဲလ် (Seychelles) ကျွန်းနိုင်ငံတွင် မှတ်ပုံတင်ထားသည့် ကုမ္ပဏီတစ်ခုကို ရောင်းချခဲ့သည့် သင်္ဘောဖြစ်သည်ဟု ဆိုသည်။

“MV Andromeda Star သင်္ဘောဟာ အနည်းငယ် ထိခိုက်သွားခဲ့ပေမယ့် သူ့လမ်းကြောင်းအတိုင်း ဆက်လက် မောင်းနှင် နေပါတယ်”ဟု အမေရိကန်ဗဟိုစစ်ဌာနချုပ် CENTCOM က X လူမှုမီဒီယာတွင် ရေးသားခဲ့သည်။

ထိုတိုက်ခိုက်မှုများတွင် အမေရိကန်ဦးဆောင်သည့် ပင်လယ်ရေကြောင်း ညွန့်ပေါင်းအဖွဲ့များ၌ ထိခိုက်ဒဏ်ရာ ရမှုများမရှိကြောင်း ပြောကြားခဲ့သည်။

ဟူရ်သီအဖွဲ့၏ နောက်ထပ် ထုတ်ပြန်ချက်တစ်ခုတွင် ဟူရ်သီလေကြောင်း ကာကွယ်ရေးတပ်ဖွဲ့များသည် ယီမင်၌ အမေရိကန်စစ်တပ်၏ MQ-9 Reaper တိုက်ခိုက်ရေး ဒရုန်းတစ်စင်းကို ဒုံးကျည်ဖြင့် ပစ်ချခဲ့ကြောင်း ဖော်ပြခဲ့သည်။

ထိုဒရုန်းသည် ယီမင်၏ ဆာဒါး (Saada)မြို့ လေပိုင်နက်အတွင်းတွင် ပစ်ချခံခဲ့ရခြင်း ဖြစ်သည်ဟု ဆာရီက ပြောကြားခဲ့သည်။

ဟူရ်သီသူပုန်ကို တွေ့ရစဉ်

ထိုအကြောင်းအရာနှင့်ပတ်သက်ပြီး အမေရိကန်စစ်တပ်က မှတ်ချက် မပေးခဲ့သော်လည်း အမေရိကန်၏ CBS News ရုပ်သံလိုင်းကမူ ဒေါ်လာ သန်း ၃၀ တန်ကြေးရှိသည့် MQ-9 ဒရုန်းသည် ဧပြီ ၂၇ ရက်က ယီမင်နိုင်ငံ အတွင်း တွင် ပျက်ကျခဲ့သည်။

ထို့နောက် တာဝန်ရှိသူများက စုံစမ်းစစ်ဆေးနေကြောင်း ဖော်ပြခဲ့သည်။

ထိုဒရုန်းသည် ဂါဇာတွင် အစ္စရေး-ဟားမာ့စ် စစ်ပွဲ စတင်ပြီးနောက်ပိုင်း ဟူရ်သီအဖွဲ့၏ ပစ်ချခြင်း ခံခဲ့ရသည့် တတိယမြောက် အမေရိကန် ဒရုန်းဖြစ်ပြီး ပထမဒရုန်းသည် ပြီးခဲ့သည့်နှစ် နိုဝင်ဘာလက ပစ်ချခံခဲ့ရကာ ဒုတိယမြောက် ဒရုန်းသည် ယခုနှစ် ဖေဖော်ဝါရီလက ပစ်ချခံခဲ့ရသည်။

Source: အယ်လ်ဂျာဇီးယား

CNI International News

ဘန်ကောက်၊ ဧပြီ ၂၇

မြန်မာနိုင်ငံတွင် မြန်မာ့တပ်မတော်နှင့် လက်နက်ကိုင်တပ်ဖွဲ့များအကြား အပြည့်အဝ ထိန်းချုပ်ရန် ကြိုးပမ်းနေ သည့် မြဝတီမြို့အရေးကိစ္စ၌ BGF မှ အသွင်းပြောင်းသွားသော ကရင်အမျိုးသားတပ်မတော်(KNA) အကြီးအကဲ ဗိုလ်မှူးကြီးစောချစ်သူက အဓိကကျသည့် အခန်းကဏ္ဍမှ ပါဝင်နေသည်ဟု ဘန်ကောက်ပို့စ်မှ ဖော်ပြခဲ့သည်။

ဗိုလ်မှူးကြီးစောချစ်သူ ဦးဆောင်သည့် လက်နက်ကိုင်အဖွဲ့သည် ၂၀၁၀ ပြည့်နှစ်က KNU မှ ခွဲထွက်လာခြင်းဖြစ်ပြီး KNU ၏ လက်နက်ကိုင်တပ်ဖွဲ့ KNLA အပါအဝင် အခြားလက်နက်ကိုင်အဖွဲ့များကို တိုက်ခိုက်နေသည့် မြန်မာ့တပ်မတော်ဘက်က ကူညီပေးခဲ့သည်။

၂၀၁၇ ခုနှစ်တွင် ဗိုလ်မှူးကြီးစောချစ်သူသည် ထိုင်း-မြန်မာနယ်စပ်တစ်လျှောက် အထူးစီးပွားရေးဇုန်ဟု အမည်ပေး ထားသည့် ရွှေကုက္ကိုမြို့ ထူထောင်မှုတွင် ပါဝင်ခဲ့သည်။

ထိုစီမံကိန်းသည် နိုင်ငံဖြတ်ကျော် ရာဇဝတ်မှုများနှင့် တရုတ် ဒုစရိုက်ဂိုဏ်းများက ထောက်ပံ့ပေးထားသည့် လောင်းကစား ရပ်ဝန်းတစ်ခုဖြစ်လာခဲ့ပြီး KNA သည် တစ်နှစ်လျှင် ဒေါ်လာ သန်း ၁၉၀ ခန့် ရရှိနေကြောင်း ကျွမ်းကျင်သူများက ပြောကြားခဲ့သည်။

 မြဝတီမြို့စီးပွားရေးဇုန်ကိုတွေ့ရစဉ်

တရုတ်ပြည်မကြီးတွင် လောင်းကစားလုပ်ငန်းသည် တရားမဝင်ပေ။ အွန်လိုင်းလောင်းကစား လုပ်ငန်းများသည် တရုတ် လောင်းကစားသမား အများစုကို ပစ်မှတ်ထားကာ မကြာသေးမီ နှစ်များအတွင်း မြန်မာနိုင်ငံ အပါအဝင် အရှေ့တောင်အာရှ၏ နေရာဒေသများတွင် ပျံ့နှံ့ခဲ့သည်။

ပြီးခဲ့သည့် နှစ်ကုန်ပိုင်းက ဗြိတိန်အစိုးရက ဗိုလ်မှူးကြီးစောချစ်သူကို လူ့အခွင့်အရေးကို ကြီးလေးစွာ ချိုးဖောက်မှု အတွက် ပိတ်ဆို့မှုများချမှတ်ခဲ့သလို လူမှောင်ခိုကူးမှုများတွင် ပါဝင်ပတ်သက်ခဲ့ကြောင်းလည်း စွပ်စွဲခဲ့သည်။

မှောင်ခိုကူးခဲ့သည့် လူများကို ရွှေကုက္ကိုသို့ ခေါ်ဆောင်လာခဲ့ပြီး ၎င်းတို့အား အွန်လိုင်းမှ လိမ်လည်မှုများ ပြုလုပ် ခြင်း၊ လူမဆန်စွာ ပြုမူဆက်ဆံမှုများ ပြုလုပ်ခဲ့ကြောင်း ဗြိတိန်အစိုးရက ပြီးခဲ့သည့် ဒီဇင်ဘာလတွင် ထုတ်ပြန်ခဲ့ သည်။

မကြာသေးမီက တရုတ်သည် မြန်မာနယ်စပ်တစ်လျှောက်ရှိ ကျားဖြန့် လုပ်ငန်းများကို နှိမ်နင်းခဲ့သဖြင့် ထိုကျားဖြန့် လုပ်ငန်းများသည် ဗိုလ်မှူးကြီးစောချစ်သူ ထိန်းချုပ်ထားသည့် နယ်မြေများ အပါအဝင် ထိုင်း-မြန်မာနယ်စပ်သို့ ရောက်ရှိလာခဲ့ကြောင်း အမေရိကန် ငြိမ်းချမ်းရေး အင်စတီကျု (USIP) က ပြောကြားခဲ့သည်။

KNLA ရဲဘော်ကို တွေ့ရစဉ်

"စောချစ်သူဟာ သူ့ရဲ့ ဒုစရိုက် နယ်မြေကို ပိုမို အင်အားဖြည့်တင်းနေပြီး လုံခြုံရေး၊ ဆက်သွယ်ရေးနဲ့ လျှပ်စစ်မီး တွေလို အရေးကြီးတဲ့ ဝန်ဆောင်မှုတွေကို ရရှိဖို့ အာရုံစိုက် လုပ်ဆောင်နေပါတယ်" ဟု USIP က ထုတ်ပြန်ခဲ့သည်။

မကြာသေးမီက ဗိုလ်မှူးကြီးစောချစ်သူ၏ KNA တပ်ဖွဲ့များသည် မြန်မာ့တပ်မတော်၏ စစ်သားများနှင့် ပူးပေါင်း တပ်စွဲထားသည့် စခန်းများမှ ပြန်လည်ဆုတ်ခွာခဲ့ပြီး မိမိတို့သည် ကရင်လူမျိုး အချင်းချင်း တိုက်ခိုက်လိုခြင်း မရှိကြောင်း ဗိုလ်မှူးကြီးစောချစ်သူက ဇန်နဝါရီလအတွင်း ပြောကြားခဲ့သည်။

သို့သော် KNA သည် မြန်မာ့တပ်မတော်အပေါ် အပြည့်အဝ သစ္စာခံခြင်းလည်းမရှိ၊ လက်နက်ကိုင်သူပုန်များနှင့် လည်း မဟာမိတ်ဖွဲ့ခြင်းမရှိပေ။ 

Source: ဘန်ကောက်ပို့စ်

CNI International News

တိုင်ပေ၊ ဧပြီ ၂၇

တရုတ်စစ်တပ်မှ လေယာဉ်များကို ထိုင်ဝမ်မြောက်ပိုင်း ကီလန်း (Keelung) မြို့မှ ၇၆ မိုင်အကွာအဝေးတွင် တွေ့ရှိခဲ့ပြီးနောက် တရုတ်စစ်လေယာဉ်များသည် ထိုနေရာမှ ထိုင်ဝမ်သမ္မတရုံးသို့ ၅ မိနစ်အတွင်း ပျံသန်း ရောက်ရှိလာနိုင်သည်ဟု ထိုင်ဝမ်လေတပ်၏ လက်ထောက်တပ်မှူးဟောင်းဖြစ်သူ ချန်းယန်တင်း (Chang Yen-ting) က ပြောကြားခဲ့သည်ဟု Eur Asian Times မှ ဖော်ပြခဲ့သည်။

ဧပြီ ၂၁ ရက်နေ့က ထိုင်ဝမ်၏ ကီလန်းမြို့မှ ၇၆ ကီလိုမီတာအကွာတွင် တရုတ်စစ်လေယာဉ်တစ်စင်းကို တွေ့ရှိ ကြောင်း ထိုင်ဝမ်ကာကွယ်ရေးဝန်ကြီးဌာနက ထုတ်ပြန်ခဲ့ပြီးနောက် ချန်း၏ ပြောကြားချက် ထွက်ပေါ်ခဲ့ခြင်း ဖြစ်သည်။

တရုတ်ပြည်သူ့လွတ်မြောက်ရေးတပ်မတော် (လေ-PLAAF) နှင့် တရုတ်ပြည်သူ့လွတ်မြောက်ရေးတပ်မတော် (ရေ- PLAN)မှ လေယာဉ်များသည် ထိုင်ဝမ်အား ပိုင်ဆိုင်ကြောင်း ထွက်ဆိုထားသည့် တရုတ်၏ ကြေညာချက်ကို ပိုမို ခိုင်မာစေရန် ထိုင်ဝမ်၏ အထူးလေကြောင်းသတ်မှတ်ဇုန် (ADIZ) အတွင်းသို့ မကြာခဏ ဝင်ရောက်ပျံသန်းလျက် ရှိသည်။

 တရုတ်က တိုင်ပေကို တိုက်မည့် မြေပုံကို ညွန်းပြထားစဉ်

ပြီးခဲ့သည့်နှစ်ကတည်းက တရုတ်လေယာဉ်များသည် ထိုင်ဝမ်ကျွမ်းအနီးတွင် ပုံမှန်ချဉ်းကပ် ပျံသန်းခဲ့ပြီး တရုတ်နှင့်ထိုင်ဝမ်အကြား ပိုင်းခြားထားသည့် ထိုင်ဝမ်ရေလက်ကြား၏ အလယ်စည်းကို ဖြတ်သန်းခဲ့ကြသည်။

မကြာသေးမီက အွန်လိုင်းပေါ်တွင် ထွက်ပေါ်ခဲ့သည့် ဓာတ်ပုံတစ်ပုံ၌ တရုတ်ပြည်မကြီး၏ တစ်နေရာ၌ ထိုင်ဝမ် သမ္မတရုံးပုံစံ ဖန်တီးထားသည့် အဆောက်အအုံတစ်ခု တိုက်ခိုက်ခံရပုံကို မြင်တွေ့ရသည်။

ထိုဓာတ်ပုံကြောင့် တရုတ်သည် ထိုင်ဝမ်ကို ကမ်းတက်တပ်သားများဖြင့် မြေပြင်တွင် မြို့ပြတိုက်ပွဲ ဆင်နွှဲကာ ထိုင်ဝမ်၏ နိုင်ငံရေးနှင့် အုပ်ချုပ်ရေးရုံးများအား ထိန်းချုပ်ပြီး ထိုင်ဝမ်ခေါင်းဆောင်များကို တရုတ်လက်အောက်သို့ ဝင်ရောက်စေရန် ပြင်ဆင်နေဖွယ်ရှိကြောင်း ထင်ကြေးပေးမှုများ ထွက်ပေါ်ခဲ့သည်။

တရုတ်နဲ့ ထိုင်ဝမ် နယ်နိမိတ်ကို တွေ့ရစဉ်

ချန်းကမူ တရုတ်စစ်လေယာဉ်များသည် ကီလန်းမြို့အနီး ရောက်ရှိချိန်တွင် ထိုနေရာမှ တိုင်ပေ (Taipei) မြို့တော် ရှိ သမ္မတရုံးသို့ လာရောက်ရန် အချိန် ၅ မိနစ်သာ ကြာမြင့်နိုင်ကြောင်း မြေပုံနှင့်တစ်ကွ ထောက်ပြပြောဆိုခဲ့သည်။

ကာကွယ်ရေးဝန်ကြီးဌာနက တွေ့ရှိခဲ့သည့် တရုတ်လေယာဉ်၏ တည်နေရာအရ ထိုလေယာဉ်သည် တိုင်ပေ မြို့တော်သို့ ရုတ်တရက် ဦးတည်ပျံသန်း လာမည်ဆိုပါက မိနစ်ပိုင်းသာ အချိန်ရလိမ့်မည်ဟု ချန်းက ပြောသည်။

မဟာဗျူဟာရေးရာ ပညာရှင်များကလည်း တရုတ်လေယာဉ်များသည် ထိုကဲ့သို့ ထိုင်ဝမ်မြောက်ဘက် ကမ်းရိုး တန်းမှ တိုင်ပေမြို့တော်ရှိ သမ္မတရုံးသို့ ရုတ်တရက် ဝင်ရောက် တိုက်ခိုက်မည်ဆိုလျှင် ထိုင်ဝမ်အနေဖြင့် ခုခံကာကွယ်ရန် အခက်တွေ့စေလိမ့်မည်ဟု ပြောကြားခဲ့သည်။

Source: Eur Asian Times

CNI International News

ဘန်ကောက်၊ ဧပြီ ၂၇

ထိုင်းနိုင်ငံတွင် အစိုးရအဖွဲ့ ပြန်လည်ဖွဲ့စည်းရေးနှင့်ပတ်သက်ပြီး ထင်ကြေးပေးမှုများ ထွက်ပေါ်နေချိန်၌ ဧပြီ ၂၆ ရက် ထိုင်းဝန်ကြီးချုပ် ဆရီသာ သာဗီဆင် (Srettha Thavisin) သည် ဝန်ကြီးချုပ်ဟောင်း သက်ဆင်(Thaksin Shinawatra) နှင့် ဘန်ကောက်မြို့တော်ရှိ ဟိုတယ်တစ်ခုတွင် တွေ့ဆုံကာ နေ့လည်စာ စားခဲ့ကြသည်ဟု Thai PBS World မှ ဖော်ပြခဲ့သည်။

ဆရီသာနှင့်အတူ ၎င်း၏ လက်ထောက်ဖြစ်သည့် ဖွမ်သမ် ဝီချာယာချိုင်း (Phumtham Wechayachai) နှင့် အတွင်းရေးမှူးချုပ် ပရွမ်မင် လတ်ဆူရီဒက် (Prommin Lertsuridej) တို့လည်း လိုက်ပါလာခဲ့သည်ဟု ဆိုသည်။

အကျင့်ပျက်ခြစားမှု စွဲချက်များဖြင့် ထောင်ဒဏ်ချမှတ်ခံရပြီးနောက် ခံဝန်ဖြင့် ပြန်လည်လွတ်မြောက်လာသော သက်ဆင်သည် လက်ရှိ ထိုင်းနိုင်ငံရေး အခင်းအကျင်းတွင် အဓိကကျသည့် အခန်းကဏ္ဍမှ ပါဝင်လာဖွယ်ရှိကြောင်း ထင်ကြေးပေးခံထားရသည်။

ဆရီသာသည် သက်ဆင် ထူထောင်ခဲ့သည့် ဖြူးထိုင်းပါတီမှ ဝန်ကြီးချုပ် ဖြစ်လာခဲ့သူဖြစ်ပြီး သက်ဆင်၏ သမီးဖြစ် သူ ပေတုန်တန် ရှင်နာဝပ် (Paetongtarn Shinawatra) သည် ဖြူးထိုင်းပါတီ ခေါင်းဆောင်ဖြစ်သည်။

 သက်ဆင်နဲ့ ဆရီသာကို တွေ့ရစဉ်

နေ့လည်စာစားပွဲတွင် ပါဝင်သူအားလုံးသည် သက်ဆင်၏ ယုံကြည်မှုကို ကာလကြာရှည် ရရှိထားသည့် ဖြူးထိုင်းပါတီ၏ အကြီးအကဲများဖြစ်သည်။

ဆရီသာသည် အစိုးရပြန်လည်ဖွဲ့စည်းမည့် စာရင်းကို အပြီးသတ် ရေးဆွဲခဲ့ပြီးနောက် ထိုစာရင်းကို သက်ဆင်၏ အတည်ပြုချက် တောင်းခံရန်အတွက် နေ့လည်စာ အတူစားရန် စီစဉ်ခဲ့ခြင်းဖြစ်သည်ဟုလည်း ကောလာဟလများ ထွက်ပေါ်နေသည်။

အသစ်ပြန်လည်ဖွဲ့စည်းမည့် အစိုးရအဖွဲ့အတွင်း ပြည်သူ့ကျန်းမာရေးဝန်ကြီး ချိုလ်နန် သီရိကော (Cholnan Srikaew) ၊ ကာကွယ်ရေးဝန်ကြီး ဆူတင် ကလန်ဆန် (Sutin Klungsang) နှင့် စိုက်ပျိုးမွေးမြူရေးဝန်ကြီး ချိုင်ယာ ပရွမ်မာ (Chaiya Promma) တို့အပါအဝင် ရာထူးနေရာအချို့ အပြောင်းအလဲ လုပ်ဖွယ်ရှိသည်ဟု ထင်ကြေးပေး မှုများ ထွက်ပေါ်နေသည်။

Source: Thai PBS World

CNI International News

နယူးဒေလီ၊ ဧပြီ ၂၇ 

အိန္ဒိယနိုင်ငံတွင် ဧပြီ ၁၁ ရက်မှ မေ ၁၉ ရက်အထိ ရွေးကောက်ပွဲများကို အဆင့် ၇ ဆင့်ခွဲပြီး ကျင်းပမည်ဖြစ်ရာ ထိုရွေးကောက်ပွဲများ၌ ပါဝင်မဲပေးခွင့်ရှိသူ သန်း ၉၀၀ အထိရှိခဲ့သဖြင့် ကမ္ဘာ့အကြီးဆုံး ရွေးကောက်ပွဲဟု ခေါ်ဆို နိုင်ကြောင်း News Bomb  သတင်းဝက်ဘ်ဆိုက်မှ ဖော်ပြခဲ့သည်။

မဲရုံစုစုပေါင်း ၁ သန်းခန့် ရှိမှုနှင့်အတူ မဲပေးပိုင်ခွင့်ရှိသူ အရေအတွက် သန်း ၉၀၀ ရှိသဖြင့် ထိုအရေအတွက်သည် ဥရောပတိုက်နှင့် သြစတြေးလျတိုက် နှစ်ခုတွင် နေထိုင်သည့် လူဦးရေ စုစုပေါင်းထက် ပိုမိုများပြားနေသည်ကို တွေ့ရမည်ဖြစ်သည်။

 မေလ ၂၃ ရက်တွင် မဲရေတွက်မှုများကို ပြုလုပ်မည်ဖြစ်ပြီး ထိုနေ့မှာပင် မဲရလဒ်ကို ကြေညာမည် ဖြစ်သည်။

လွှတ်တော်ဆိုင်ရာ ဒီမိုကရေစီသည် အိန္ဒိယကို အုပ်ချုပ်နေသည့် အဓိကကျသည့် နိုင်ငံရေး ယန္တရားတစ်ခု ဖြစ်သည်။ 

ရွေးကောက်ပွဲမှာ မိုဒီ မဲဆွယ်ထားစဉ်

၅ နှစ်လျှင် ၁ ကြိမ် တစ်နိုင်ငံလုံး၌ ကျင်းပနေသည့် အောက်လွှတ်တော် (Lok Sabha) ရွေးကောက်ပွဲတွင် ကိုယ်စားလှယ်လောင်းများကို မဲပေးရွေးချယ်ခြင်းဖြစ်သည်။ 

အိန္ဒိယ၏ ဖက်ဒရယ်တည်ဆောက်မှု အဆင့်ဆင့်ကို စီမံခန့်ခွဲပြီး ရွေးကောက်ပွဲများ ပြုလုပ်ခြင်းသည် အိန္ဒိယ ဒီမိုကရေစီ၏ အနှစ်သာရကို ပုံဖော်ခြင်းဖြစ်သည်ဟု လေ့လာစောင့်ကြည့်သူများက ပြောကြားခဲ့သည်။

လွှတ်တော်ကိုယ်စားလှယ် ၅၄၅ ဦးရှိသည့် အောက်လွှတ်တော်တွင် ၅၄၃ ဦးကို လူထုက တိုက်ရိုက်မဲပေး ရွေးချယ် တင်မြှောင်ခြင်းဖြစ်ပြီး ကျန် ၂ ဦးကို အိန္ဒိယသမ္မတက ဗြိတိန်-အိန္ဒိယနွယ်ဖွား အသိုင်းအဝိုင်းအတွင်းမှ ရွေးချယ် ခန့်အပ်ခြင်း ဖြစ်သည်။

 မိုဒီကို တွေ့ရစဉ်

လွတ်လပ်ပြီး တရားမျှတမှုရှိသည့် ရွေးကောက်ပွဲများသည် (၁) ရွေးကောက်ပွဲကို စီမံလုပ်ဆောင်ရန် လွတ်လပ် သည့် ရွေးကောက်ပွဲဆိုင်ရာ စီမံဆောင်ရွက်ရေးအဖွဲ့၊ (၂) ရွေးကောက်ပွဲ လုပ်ငန်းစဉ်ဆိုင်ရာ စည်းမျဉ်းစည်းကမ်း များ၊ (၃) ရွေးကောက်ပွဲဆိုင်ရာ အငြင်းပွားမှုကို ထိရောက်သည့် ဖြေရှင်းမှုယန္တရား အစရှိသည့် အချက် သုံးချက် ရှိရမည်ဖြစ်သည်။

အိန္ဒိယသည် ထိုအချက်များအားလုံးနှင့် ကိုက်ညီနေသည်။

ဗဟိုရွေးကောက်ပွဲကော်မရှင်သည် ရွေးကောက်ပွဲတွင် အကျင့်ပျက်ခြစားမှုနှင့် ဆက်နွှယ်သည့် အဓိကဖြစ်စဉ်များ ကို ကိုင်တွယ်ဖြေရှင်းနိုင်ရန် ခိုင်မာသည့် လုပ်ပိုင်ခွင့်ကို ရရှိထားသည်။

ထို့ကြောင့် ပါတီများအနေဖြင့် ရွေးကောက်ပွဲ မဲရလဒ်များကို ကြိုးကိုင်ချယ်လှယ်ခြင်း၊ ရွေးကောက်ပွဲကော်မရှင်၏ ထိန်းချုပ်မှုကို ဆန့်ကျင်ပြိး ရွေးကောက်ပွဲကို အနိုင်ယူခြင်း၊ ရွေးကောက်ပွဲဆိုင်ရာ လုပ်ငန်းစဉ်များကို စနစ်တကျ ကြားဝင်စွက်ဖက်ခြင်းတို့ ပြုလုပ်နိုင်ခြင်းမရှိကြောင်း ဒေသခံမီဒီယာများက ဖော်ပြခဲ့သည်။

Source: News Bomb

CNI International News

မော်စကို၊ ဧပြီ ၂၆

ရုရှားနိုင်ငံတွင် ဒုတိယကာကွယ်ရေးဝန်ကြီး တီမာ အိုင်ဗန်နော့ဗ် (Timur Ivanov) ကို အခြေတည်သည့် လာဘ်ပေးလာဘ်ယူ စုံစမ်းစစ်ဆေးမှုတစ်ခု၌ တတိယမြောက်အနေဖြင့် ဆောက်လုပ်ရေးလုပ်ငန်းရှင် အမျိုးသားတစ်ဦး ဖမ်းဆီးခံခဲ့ရကြောင်း ရိုက်တာမှ ဖော်ပြခဲ့သည်။

ထိုလာဘ်ပေးလာဘ်ယူမှု အရှုပ်တော်ပုံသည် ယူကရိန်းစစ်ပွဲ စတင်ခဲ့ပြီးနောက်ပိုင်း ရုရှားကာကွယ်ရေးဝန်ကြီးဌာန အတွက် အဆိုးရွားဆုံး ထိုးနှက်ချက် ဖြစ်လာခဲ့သည်။

ရုရှားသမ္မတ ပူတင် (Vladimir Putin)သည် အစိုးရအဖွဲ့အား ပြုပြင်ပြောင်းလဲမှုများ ပြုလုပ်ဖွယ်ရှိကြောင်း မီဒီယာများက ဖော်ပြခဲ့သည်။

Olimpsitistroy အမည်ရှိ ဆောက်လုပ်ရေးကုမ္ပဏီကို ပူးတွဲတည်ထောင်သည့် အလက်န္ဒား ဖိုမင် (Alexander Fomin) သည် အိုင်ဗန်နော့ဗ်ကို လာဘ်ပေးခဲ့ကြောင်း စွပ်စွဲခံခဲ့ရပြီး ဖမ်းဆီးထိန်းသိမ်း ခံထားရသည်ဟု တရားရုံး က ထုတ်ပြန်ခဲ့သည်။

အိုင်ဗန်နော့ဗ်သည် ၎င်း၏ တွဲဖက်တစ်ဦးဖြစ်သည့် ဆာဂျေ ဘိုရိုဒင် (Sergey Borodin) နှင့်အတူ ဧပြီ ၂၄ ရက်က ဖမ်းဆီးခံထားရသည်။

 ရုရှားဒုတိယကာကွယ်ရေးဝန်ကြီး တီမာ အိုင်ဗန်နော့ဗ်နဲ့ ရုရှားကာကွယ်ရေးဝန်ကြီး ဆာဂျေ ရွိူင်ဂူကို တွေ့ရစဉ်

ဖိုမင်သည် အိုင်ဗန်နော့ဗ်နှင့် ခိုင်မာသည့် ဆက်ဆံရေးရှိပြီး အိုင်ဗန်နော့ဗ်၊ ဘိုရိုဒင်နှင့် အခြားသူများကို အခမဲ့ ဝန်ဆောင်မှုများ ထောက်ပံ့ပေးခဲ့သည်ဟု သံသယဖြစ်ခံထားရသည်။

အပြန်အလှန်အနေဖြင့် အိုင်ဗန်နော့ဗ်သည် ဒေါ်လာ သန်းချီ တန်ကြေးရှိသည့် ကန်ထရိုက်များကို ဖိုမင်၏ ကုမ္ပဏီ က ရရှိစေရန် ကူညီပေးခဲ့သည်ဟု စုံစမ်းစစ်ဆေးသူများက ယူဆထားကြောင်း စီးပွားရေးသတင်းစာဖြစ်သည့် Kommersant က ဖော်ပြခဲ့သည်။

အိုင်ဗန်နော့ဗ်ကို ဆိုဗီယက်ခေတ်က  KGB ထောက်လှမ်းရေးအဖွဲ့ နေရာကို ဆက်ခံဖွဲ့စည်းထားသည့် ဖက်ဒရယ် ထောက်လှမ်းရေးဌာနက ဖမ်းဆီးခဲ့ခြင်းဖြစ်သည်။

သူသည် ပြစ်မှုထင်ရှား စီရင်ခံရမည်ဆိုပါက ထောင်ဒဏ် ၁၅ နှစ်အထိ ချမှတ်ခံရနိုင်သည်။

အိုင်ဗန်နော့ဗ်ကမူ သူသည် အပြစ်ကင်းစင်ကြောင်း ပြောကြားထားပြီး ဖိုမင်နှင့် ဘိုရိုဒင်တို့ကမူ ထိုအကြောင်းအရာ နှင့်ပတ်သက်ပြီး မှတ်ချက်ပေးခြင်း မရှိသေးပေ။

အိုင်ဗန်နော့ဗ်သည် ရုရှားကာကွယ်ရေးဝန်ကြီး ဆာဂျေ ရွိူင်ဂူ (Sergei Shoigu) ၏ နီးစပ်သည့် မဟာမိတ်တစ်ဦး ဖြစ်သည်။

Source: ရိုက်တာ