CNI International News

ဘန်ကောက်၊ ဧပြီ ၂၃ ရက် 

မြန်မာနိုင်ငံ၊ မြဝတီမြို့တွင် ဖြစ်ပွားနေသည့် တိုက်ပွဲများ လျော့ကျလာပြီး ဆွေးနွေးညှိနှိုင်းမှုများ စတင်နေချိန်တွင် ထိုင်းနိုင်ငံ၊ တာ့ခ် (Tak)ခရိုင်၊ မဲဆောက် (Mae Sot) မြို့ရှိ မြန်မာတိုက်ပွဲရှောင် ဒုက္ခသည် အရေအတွက်သည် ဧပြီ ၂၁ ရက်က ၃၀၀၀ ရှိခဲ့ရာမှ ဧပြီ ၂၂ ရက်တွင် ၁၀၀၀ ခန့်သာ ကျန်ရှိတော့ကြောင်း ဘန်ကောက်ပို့စ်မှ ဖော်ပြခဲ့သည်။

မြဝတီမြို့တွင် မြန်မာ့တပ်မတော်နှင့် KNLA-PDF ပူးပေါင်းအဖွဲ့ကြား တိုက်ပွဲများ အပြင်းအထန် ဖြစ်ပွား၍ ဒေသ တွင်းနေ အရပ်သားများသည် ထိုင်းနိုင်ငံ၊ မဲဆောက်မြို့ဘက်သို့ ထွက်ပြေးတိမ်းရှောင်ခဲ့ကြရသည်။

ပဋိပက္ခနှင့်ပတ်သက်ပြီး နှစ်ဘက်အကြား ဆွေးနွေးနေပြီး မြန်မာအစိုးရ၏ စစ်ကူများသည် ကော့ကရိတ်မှ ရောက်ရှိခဲ့ခြင်းမရှိကြောင်း ထိုင်းစစ်တပ်၏ ဒုတိယဗိုလ်ချုပ်ကြီး ပရာဆန် ဆန်သီရီရက် (Prasan Saengsirirak) က Thai PBS ကို ပြောကြားခဲ့သည်။

ထိုင်းဘက်ကို ထွက်ပြေးတိမ်းရှောင်လာတဲ့ မြန်မာတိုက်ပွဲရှောင်တွေကို တွေ့ရစဉ်

တိုက်ပွဲများကြောင့် မြဝတီမှ မဲဆောက်သို့ ထွက်ပြေး တိမ်းရှောင်ခဲ့ကြသူ အများစုသည် လက်ရှိတွင် မဲဆောက်မှ ပြန်လည်ထွက်ခွာနေကြသည်။

အမှတ် ၁ ထိုင်း-မြန်မာ ချစ်ကြည်ရေးတံတားတွင် ခြေကျင်သွားလာရသည့် လူသွားစင်္ကြန့်လမ်းနှင့် ကုန်သွယ်ရေး ယာဉ်လမ်းကြောင်းကို ဖွင့်ထားသလို မိုအီမြစ် (သောင်ရင်းမြစ်) တစ်လျှောက်ရှိ တရားဝင် ဆိပ်ခံတံတားများကို လည်း ဖွင့်ပေးထားကြောင်း ပရာဆန်က ပြောကြားခဲ့သည်။

မြန်မာနိုင်ငံမှ ပစ်ခတ်ခဲ့သည့် ကျည်ဆန်တစ်ခုသည် မဲဆောက်မြို့ရှိ အိမ်တစ်အိမ်ကို ထိမှန်ခဲ့ပြီးနောက် ထိုင်း၏ အမှတ် ၃ တပ်မတော်သည် နယ်စပ်ဒေသတစ်လျောက် အခြေအနေကို အနီးကပ်စောင့်ကြည့်နေကြောင်း ပရာဆန်က ပြောကြားခဲ့သည်

Source: ဘန်ကောက်ပို့စ်

CNI International News

ကာရာကက်စ်၊ ဧပြီ ၂၂

ဗင်နီဇွဲလားနိုင်ငံ၏ အတိုက်အခံများသည် လူထုအကြား ပေါ်ပေါ်ထင်ထင်မနေသည့် သံတမန်ဟောင်း အက်မန်ဒို ဂွန်ဇာလက် (Edmundo Gonzalez) ကို ဇူလိုင်လအတွင်း ကျင်းပမည့် သမ္မတရွေးကောက်ပွဲတွင် လက်ရှိသမ္မတ နီကိုလပ်စ် မာဒူရို (Nicolas Maduro) နှင့် ယှဉ်ပြိုင်မည့် ကိုယ်စားလှယ်လောင်းအဖြစ် ရွေးချယ်ခဲ့သည်ဟု ရိုက်တာ မှ ဖော်ပြခဲ့သည်။

ရွေးကောက်ပွဲသည် အချိန် နီးကပ်နေပြီဖြစ်သဖြင့် ယခင်ကတည်းက လူထုနှင့် ရင်းနှီးကျွမ်းဝင်မှု မရှိသည့် ဂွန်ဇာလက်သည် မဲဆန္ဒရှင်များအကြားတွင် ၎င်း၏ ပုံရိပ်ကို လျင်မြန်စွာ တည်ဆောက်ရန် လိုအပ်နေသည်ဟု နိုင်ငံရေးလေ့လာစောင့်ကြည့်သူများက ပြောကြားခဲ့သည်။

တောင်အမေရိကန်နိုင်ငံဖြစ်သည့် ဗင်နီဇွဲလားအပေါ်  ပိတ်ဆို့မှုများ ဖြေလျှော့ပေးရန်အတွက် တရားမျှတသော ရွေးကောက်ပွဲကျင်းပရန် အမေရိကန်က ပြောကြားထားသဖြင့် ဇူလိုင် ၂၈ ရက်တွင် ပြုလုပ်မည့် ရွေးကောက်ပွဲ သည် အလျော်အစား ကြီးမားသည်ဟု ကျွမ်းကျင်သူများက ပြောသည်။

ဗင်နီဇွဲလား အတိုက်အခံ အက်မန်ဒို ဂွန်ဇာလက်ကို တွေ့ရစဉ်

အတိုက်အခံများအကြား ရွေးကောက်ပွဲဝင် ကိုယ်စားလှယ်လောင်း ရွေးချယ်ရေးအတွက် ခက်ခဲစွာ စဉ်းစားခဲ့ကြ ပြီးနောက် ကိုယ်စားလှယ်လောင်း အမည်စာရင်းတင်သွင်းမှု နောက်ဆုံးရက်မတိုင်မီ တစ်ရက်အလိုဖြစ်သည့် ဧပြီ ၁၈ ရက်တွင် အာဂျင်တီးနားနိုင်ငံဆိုင်ရာ ဗင်နီဇွဲလားသံအမတ်ဟောင်း ဂွန်ဇာလက်ကို ရွေးချယ်ခဲ့ကြခြင်း ဖြစ်သည်။

ထိုရွေးကောက်ပွဲသည် ဗင်နီဇွဲလားနိုင်ငံတွင် ၂၀၁၈ ခုနှစ်နောက်ပိုင်း ပထမဆုံးအကြိမ် သမ္မတရွေးကောက်ပွဲ ဖြစ်သဖြင့် အသက် ၇၄ နှစ်အရွယ် ဂွန်ဇာလက်သည် ခက်ခဲကြမ်းတမ်းသည့် လမ်းကြောင်းပေါ်ကို လျှောက်လှမ်း ရလိမ့်မည်ဖြစ်ကြောင်း ကျွမ်းကျင်သူများက ပြောကြားခဲ့သည်။

“သူက လူသိနည်းတဲ့ ကိုယ်စားလှယ်လောင်း ဖြစ်ပါတယ်။ သူ့ကို လူတွေသိလာအောင် လုပ်ဖို့က သူ့အတွက် စိန်ခေါ်မှုတစ်ခု ဖြစ်ပါတယ်” ဟု Estrategia y Poder အတိုင်ပင်ခံကုမ္ပဏီမှ ညွှန်ကြားရေးမှူး ရီကာဒို ရီယို့စ် (Ricardo Rios) က ပြောကြားခဲ့သည်။

အတိုက်အခံခေါင်းဆောင် ဟိုဆေး ဂွာရာကို တွေ့ရစဉ်

အတိုက်အခံများသည် ရွေးကောက်ပွဲဝင် ကိုယ်စားလှယ်လောင်း တစ်ဦးကို တညီတညွတ်တည်း ရွေးချယ်ရန် မျှော်လင့်ခဲ့ပြီးနောက် ၁၉၉၀ ပြည့်နှစ် ကာလများက နိုင်ငံခြားရေးဝန်ကြီးဌာနတွင် ကာလကြာရှည် တာဝန် ထမ်းဆောင်ခဲ့သည့် ဂွန်ဇာလက်ကို ရွေးချယ်ခဲ့ကြခြင်းဖြစ်သည်။

“အက်မန်ဒိုက အရမ်း ပရော်ဖက်ရှင်နယ် ပီသပြီး သိုသိုသိပ်သိပ် နေထိုင်တတ်သူဖြစ်သလို ဒီမိုကရေစီ ခံယူချက် ခိုင်မာတဲ့သူပါ။ သူက စကား ကြီးကြီးကျယ်ကျယ် ပြောတတ်တဲ့သူမျိုး မဟုတ်ပါဘူး” ဟု အတိုက်အခံတစ်ဦး ဖြစ်သူ ဂျီးဆပ် တိုရီယယ်ဘာ (Jesus Torresalba) က ပြောကြားခဲ့သည်။

ထိုပြင် အတိုက်အခံခေါင်းဆောင် ဟိုဆေး ဂွာရာ (Jose Guerra) ကလည်း နိုင်ငံတကာရေးရာ၊ စီးပွားရေးနှင့် နိုင်ငံရေး ပြဿနာများတွင် ဂွန်ဇာလက်၏ ဗဟုသုတကြွယ်ဝမှုနှင့် ပြင်သစ်၊ အင်္ဂလိပ်နှင့် စပိန်ဘာသာစကားများ ပြောဆိုတတ်မှုကို ချီးကျူးခဲ့သည်။

Source: ရိုက်တာ

CNI International News

ဝါရှင်တန်၊ ဧပြီ ၂၂

အမေရိကန်အောက်လွှတ်တော် ကိုယ်စားလှယ်များသည် ယူကရိန်း၊ အစ္စရေးနှင့် ထိုင်ဝမ်တို့ကို လုံခြုံရေး ကူညီ ထောက်ပံ့မှုများပေးမည့် ဒေါ်လာ ၉၅ ဘီလျံတန်ကြေးရှိ အကူအညီပေးရေးဥပဒေမူကြမ်းအား ဧပြီ ၁၉ ရက်က အတည်ပြု ထောက်ခံခဲ့သည်ဟု ရိုက်တာမှ ဖော်ပြခဲ့သည်။

လက်ရှိတွင် ထိုဥပဒေမူကြမ်းသည် ဒီမိုကရက်များ ထိန်းချုပ်ထားသည့် အထက်လွှတ်တော်သို့ ရောက်ရှိသွားပြီ ဖြစ်ပြီး အထက်လွှတ်တော်ကလည်း ဥပဒေမူကြမ်းကို အတည်ပြုဖွယ် ရှိနေသည်။

အဆိုပါ ဥပဒေမူကြမ်းကို အတည်ပြုပေးရန် ဒီမိုကရက်ခေါင်းဆောင်များဖြစ်သည့် သမ္မတ ဂျိုးဘိုင်ဒန် (Joe Biden) ကအစ အထက်လွှတ်တော် ရီပတ်ဘလစ်ကန်တစ်ဦးဖြစ်သည့် မစ်ချ် မက်ကွန်နယ် (Mitch McConnell) အဆုံး ရီပတ်ဘလစ်ကန် အောက်လွှတ်တော်ဥက္ကဋ္ဌ မိုက် ဂျွန်ဆင် (Mike Johnson) ကို တိုက်တွန်းခဲ့ကြသည်။

အထက်လွှတ်တော်သည် အောက်လွှတ်တော်က အတည်ပြုခဲ့သည့် ထိုဥပဒေမူကြမ်းကို ထပ်မံအတည်ပြုရန် အတွက် ဧပြီ ၂၂ ရက်တွင် စဉ်းစားသုံးသပ်မည်ဖြစ်ပြီး ထိုနေ့ မွန်းလွဲပိုင်းတွင် ပဏာမ မဲခွဲဆုံးဖြတ်မှု ပြုလုပ်မည် ဖြစ်သည်။

အမေရိကန် အောက်လွှတ်တော်ဥက္ကဋ္ဌ မိုက်ဂျွန်ဆင်ကို တွေ့ရစဉ်

ထိုဥပဒေမူကြမ်းကို အတည်ပြုရေးအတွက် နောက်ဆုံးအဆင့် လုပ်ထုံးလုပ်နည်းများအား လာမည့် သီတင်းပတ် တွင် ပြုလုပ်မည်ဖြစ်ပြီး၊ ထို့နောက် သမ္မတဘိုင်ဒန်က ဥပဒေအဖြစ် အတည်ပြု လက်မှတ်ရေးထိုးမည်ဖြစ်သည်။

အဆိုပါ ဥပဒေမူကြမ်းတွင် ယူကရိန်းအား ဒေါ်လာ ၆၀ ဒသမ ၈၄ ဘီလျံ၊ အစ္စရေးကို ၂၆ ဘီလျံနှင့် ထိုင်ဝမ် အပါအဝင် အာရှ-ပစိဖိတ်ဒေသအတွက် ၈ ဒမသ ၁၂ ဘီလျံ ထောက်ပံ့ပေးမည့် အစီအစဉ်များ ပါဝင်သည်။

ယူကရိန်းသမ္မတ ဇာလန်းစကီး (Volodymyr Zelenskiy) ကမူ ထိုဥပဒေမူကြမ်းအား အတည်ပြုခဲ့သည့် အောက်လွှတ်တော်ကို ကျေးဇူးတင်ကြောင်းနှင့် အမေရိကန်လွှတ်တော်အမတ်များသည် သမိုင်းကြောင်းကို လမ်းကြောင်းမှန်ပေါ် ပြန်ရောက်စေရန် လုပ်ဆောင်ခဲ့ခြင်းဖြစ်ကြောင်း ပြောကြားခဲ့သည်။

''ဒီနေ့ အမေရိကန်အောက်လွှတ်တော်က အတည်ပြုခဲ့တဲ့ ဥပဒေမူကြမ်းဟာ စစ်ပွဲကို မကြာရှည်စေဖို့နဲ့ သိန်း/သန်း ချီတဲ့ လူ့အသက်တွေကို ကယ်တင်ဖို့ အထောက်အကူဖြစ်စေပြီး ကျနော်တို့ နိုင်ငံတွေရဲ့ အကူအညီတွေကို ပိုမို ခိုင်မာစေပါတယ်” ဟု ဇာလန်းစကီးက X လူမှုမီဒီယာတွင် ပြောကြားခဲ့သည်။

Source: ရိုက်တာ

CNI International News

မနီလာ၊ ဧပြီ ၂၂

ဖိလစ်ပိုင်နိုင်ငံအနီးတွင် တရုတ်ပြည်သူ့လွတ်မြောက်ရေးတပ်မတော်(PLA)က ပိုင်ဆိုင်သည့် WZ-7 Soaring Dragon  ဒရုန်းတစ်စင်း ပျံသန်းနေသည်ကို ထောက်လှမ်းတွေ့ရှိခဲ့ကြောင်း Times of India မှ ဖော်ပြခဲ့သည်။

ဖိလစ်ပိုင်သည် အိန္ဒိယ၏ BrahMos စူပါဆိုးနစ် ခရုဇ်ဒုံးကျည်များကို လက်ခံရယူရန် ပြင်ဆင်နေချိန်တွင် ထို တရုတ်စစ်တပ်ပိုင် ဒရုန်းတစ်စင်းကို တွေ့ရှိခဲ့ခြင်းဖြစ်ကြောင်း The Eurasian Times မှ သတင်းထုတ်ပြန်ခဲ့သည်။

WZ-7 Soaring Dragon ဒရုန်း၏ တမူထူးခြားသည့် တောင်ပံပုံစံကြောင့် ဖိလစ်ပိုင် သတင်းအဖွဲ့အစည်းဖြစ်သည့် GMA News မှ သတင်းထောက်တစ်ဦးဖြစ်သူ ရက်ဖီ တီမာ (Raffy Tima) က သတိထားမိခဲ့သည်။

 အိန္ဒိယ၏ BrahMos စူပါဆိုးနစ် ခရုဇ်ဒုံးကျည်ကို တွေ့ရစဉ်

ထိုဒရုန်းသည် အနောက်ဖိလစ်ပိုင် ပင်လယ် (West Philippine Sea) အပေါ်တွင် ပျံသန်းခဲ့သည်ကို တွေ့ရှိခဲ့ရသည် ဟု ၎င်းက ပြောသည်။

တောင်တရုတ်ပင်လယ်အတွင်းရှိ Second Thomas သောင်ခုံနှင့် စကာဘိုရော့ချ် (Scarborough) သောင်ခုံ အပါအဝင် နယ်မြေပိုင်ဆိုင်မှုများနှင့် ပတ်သက်ပြီး တရုတ်နှင့် ဖိလစ်ပိုင်အကြား တင်းမာမှုများ မြင့်တက်နေချိန် တွင် တရုတ်၏ ဒရုန်းကို တွေ့ရှိခဲ့ခြင်းဖြစ်သည်။

ထို့ပြင် ဖိလစ်ပိုင်သည် ဒေသတွင်း တရုတ်၏ စစ်ရေးလှုပ်ရှားမှုများကို တန်ပြန်ရန် ကာကွယ်ရေး စွမ်းဆောင်ရည် များကို မြှင့်တင်သည့်အနေဖြင့် အိန္ဒိယနိုင်ငံထံမှ BrahMos စူပါဆိုးနစ် ခရုဇ်ဒုံးကျည်များကို လက်ခံရယူရန် ပြင်ဆင်နေသည့် အချိန်နှင့်လည်း တိုက်ဆိုက်နေသည်။

ဖိလစ်ပိုင်သည် Horizon 2 Priority Projects အမည်ရှိ စီမံကိန်းများအောက်တွင် လက်နက်ကိုင်တပ်ဖွဲ့များကို အဆင့်မြှင့်တင်ရန် ရည်ရွယ်ထားပြီး အိန္ဒိယ၏ BraMos ဒုံးကျည်စနစ်များသည် ဧပြီ ၁၉ ရက်၌ မနီလာ (Manila) မြို့တော်သို့ ရောက်ရှိခဲ့သည်။

တရုတ်ဒရုန်းကိုတွေ့ရစဉ်

ထိုဒုံးကျည်များ ပေးပို့မှုသည် အစိုးရအချင်းချင်း (G2G) ပူးပေါင်းဆောင်ရွက်သည့် သဘောတူညီချက်ကြောင့် ပိုမို အဆင်ပြေ ချောမွေ့ခဲ့ပြီး ထိုသဘောတူညီချက်တွင် ဒုံးကျည်အမြောက် အတွဲ ၃ တွဲ၊ အော်ပရေတာနှင့် ပေါင်းစပ် သယ်ယူပို့ဆောင်ရေး အထောက်အကူပြုအစီအစဉ် (ILS) များလည်း ပါဝင်သည်။

ဖိလစ်ပိုင်သို့ BrahMos ဒုံးကျည်များ သယ်ဆောင်လာသည့် အိန္ဒိယ၏ သယ်ယူပို့ဆောင်ရေး လေယာဉ်များ ရောက်ရှိ လာမှုနှင့်အအတူ အနောက်ဖိလစ်ပိုင် ပင်လယ်ပေါ်တွင် WZ-7 ဒရုန်းကို မြင်တွေ့ခဲ့ရခြင်းဖြစ်သည်။

တရုတ်ပြည်သူ့လွတ်မြောက်ရေးတပ်မတော်-လေတပ် (PLAAF) က ထိန်းချုပ်မောင်းနှင်သည့် WZ-7 ဒရုန်းသည် အမြင့်ပေ ၆၀,၀၀၀ ကျော်တွင် အကွာအဝေး ၄၃၅၀ မိုင်အထိ ပျံသန်းနိုင်ကြောင်း သိရသည်။

Source: Times of India

CNI International News

ဒွန်းနက်၊ ဧပြီ ၁၂

ယူကရိန်းစစ်ပွဲတွင် ပေါက်ကွဲမှုများ၊ ကျည်ထိမှန်မှုများကဲ့သို့ ဒဏ်ရာ အပြင်းအထန်ရရှိပြီး ခြေပြတ်၊ လက်ပြတ် ဖြစ်ခဲ့ရသည့် စစ်မှုထမ်းများသည် ဆေးဝါးကုသမှု ခံယူခဲ့ပြီးနောက် စစ်မြေပြင်များသို့ ပြန်လည်သွားရောက်၍ တတ်နိုင်သည့်ဘက်မှ စစ်မှုထမ်းလျက်ရှိကြောင်း ရိုက်တာမှ ဖော်ပြခဲ့သည်။

"အိုဒက်ဆာ (Odesa) မြို့မှာရှိတဲ့ စစ်မှုထမ်းသစ် စုဆောင်းရေးရုံးမှာ နည်းပြဆရာအဖြစ် လုပ်ဆောင်ပေးဖို့ သက်ဆိုင်ရာက ကျနော့်ကို ကမ်းလှမ်းခဲ့ပါတယ်" ဟု အသက် ၃၂ နှစ်အရွယ် အမှတ် ၂၈ သီးခြားယန္တရားတပ်ရင်းမှ တပ်မှူးတစ်ဦးဖြစ်သူ အိုဒင်က ပြောကြားခဲ့သည်။ 

သူသည် ပြီးခဲ့သည့်နှစ်က မိုင်းနင်းမိပြီး ခြေထောက်တစ်ဖက် ဆုံးရှုံးခဲ့ရသူဖြစ်သည်။

 မာရီယူပိုးလ်မြို့ တိုက်ခိုက်ခံရစဉ်

ယူကရိန်း အမြောက်တပ်သားတစ်ဦးဖြစ်သူ မန်ဂို (Mango) သည်လည်း ပြီးခဲ့သည့် ၂ နှစ်က မာရီယူပိုးလ် (Mariupol) မြို့ တိုက်ပွဲအတွင်း လက်နက်ကြီးကျည်၏ အပိုင်းအစများ ထိမှန်မှုကြောင့် လက်တစ်ဖက် ဆုံးရှုံးခဲ့ရ သည်။ 

သူသည်လည်း အဇော့ဗ် တပ်မဟာ (Azov Brigade) တွင် သယ်ယူပို့ဆောင်ရေးတပ်ဖွဲ့၏ အကြီးအကဲအဖြစ် တာဝန် ပြန်လည်ခန့်အပ်ခြင်း ခံခဲ့ရပြီး ရှေ့တန်းသို့ ပြန်လည်ရောက်ရှိခဲ့သည်။

ယူကရိန်းစစ်တပ်သည် တပ်သားသစ်များ လျော့ကျမှုကြောင့် တတ်နိုင်သည့်ဘက်မှ နည်းလမ်းမျိုးစုံသုံးပြီး စစ်မှုထမ်းများကို ရှာဖွေလျက်ရှိသည်။ 

နိုင်ငံအရှေ့ပိုင်း အက်ဗ်ဒိဗ်ကာ (Avdiivka) မြို့အနီး စစ်မြေပြင်များတွင် အင်အားကြီးမားသည့် ရုရှားတပ်ဖွဲ့များနှင့် ရင်ဆိုင်ရချိန်တွင် ယူကရိန်းစစ်တပ်၏ အင်အားလျော့နည်းမှုသည် ဖိအားများအောက်သို့ ရောက်ရှိလာခဲ့သည်။

မာရီယူပိုးလ်မြို့ကို ရုရှားတပ်ဖွဲ့များ ထိန်းချုပ်ခဲ့ပြီးနောက် မန်ဂိုသည် ရုရှားတပ်ဖွဲ့များ၏ ဖမ်းဆီးခြင်းကို ခံခဲ့ရ သည်။

ခြေပြတ်သွားသော ယူကရိန်းစစ်သားတစ်ဦးကို တွေ့ရစဉ်

"ကျနော် အဖမ်းခံရပြီး ပြန်လွတ်လာတော့ စစ်ပွဲမပြီးသေးဘူးဆိုတာ သိခဲ့ပါတယ်" ဟု အိုဒင်နှင့် အခြား ဒုက္ခိတ စစ်သား အများစုကဲ့သို့ပင် လုံခြုံရေး အကြောင်းပြချက်များဖြင့် စစ်မှုထမ်းဆောင်ရန် ပြန်လည်ခေါ်ယူခံခဲ့ရသည့် မန်ဂိုက ပြောကြားခဲ့သည်။

အိုဒင်နှင့် မန်ဂိုတို့သည် ၂၀၂၂ ခုနှစ်၊ ဖေဖော်၀ါရီ အစောပိုင်းတွင် ရုရှားက ယူကရိန်းကို ဝင်ရောက် တိုက်ခိုက်ခဲ့ပြီး ကတည်းက ခြေ/လက်များ ဆုံးရှုံးခဲ့ရသည့် ထောင်နှင့်ချီသော ယူကရိန်းစစ်သားများထဲတွင် ပါဝင်ခဲ့သည်။

ယူကရိန်းအစိုးရသည် စစ်ပွဲအတွင်း ယူကရိန်းစစ်သားများ၏ ထိခိုက်၊ သေဆုံးမှုစာရင်းကို ထုတ်ပြန်ရန် ငြင်းဆိုခဲ့ သော်လည်း ယူကရိန်းစစ်မှုထမ်းများအား ကိုယ်စားပြုသည့် လူ့အခွင့်အရေးအဖွဲ့ Pryncyp ကမူ စစ်ပွဲအတွင်း ခြေပြတ်၊လက်ပြတ် ဖြစ်ခဲ့ရသော ယူကရိန်းစစ်မှုထမ်း အရေအတွက် ၂၀,၀၀၀ မှ ၅၀,၀၀၀ အကြားရှိကြောင်း ထုတ်ပြန်ခဲ့သည်။

စစ်မြေပြင်များတွင် မိုင်းများပေါများမှု၊ လက်နက်ကြီးကျည်များ ကျရောက်မှုနှင့် ဒရုန်းတိုက်ခိုက်မှုများကြောင့် ထိခိုက်သေဆုံးသူ အရေအတွက်လည်း တစ်စထက်တစ်စ ပိုမိုမြင့်တက်လာနိုင်သည်ဟု ထုတ်ပြန်ချက်တွင် ဖော်ပြခဲ့သည်။

Source: ရိုက်တာ

CNI International News

နယူးဒေလီ၊ ဧပြီ ၁၂

အိန္ဒိယနှင့် တရုတ်နိုင်ငံအကြား ကာလကြာရှည် ဖြစ်ပွားနေသည့် နယ်စပ်ဒေသအရေးကို ချက်ချင်း ဖြေရှင်းသင့်‌ ကြောင်း အိန္ဒိယဝန်ကြီးချုပ် မိုဒီ (Modi)က ပြောသည်ဟု MSN သတင်းဝက်ဘ်ဆိုက်မှ ဖော်ပြခဲ့သည်။

မိုဒီသည် နျူကလီးယား လက်နက်ပိုင်ဆိုင်သည့် အိမ်နီးချင်း နှစ်နိုင်ငံအကြား နယ်စပ်ဒေသ အငြင်းပွားမှု ပြဿနာနှင့်ပတ်သက်ပြီး လေသံကိုလျှော့ပြီး ထိုကဲ့သို့ ပြောကြားခဲ့ခြင်း ဖြစ်နိုင်သည်ဟု ကျွမ်းကျင်သူများက ပြောကြားခဲ့သည်။

"ကျနော်တို့ နယ်စပ်ဒေသတွေမှာ ကာလကြာရှည် ဖြစ်ပွားနေတဲ့ ပြဿနာကို ချက်ချင်း ဖြေရှင်းသင့်တယ်လို့ ကျနော် ယုံကြည်ပါတယ်။ အဲဒါမှ ကျနော်တို့ကြား ဆက်ဆံရေးတွေကို ပုံမှန်ပြန်ဖြစ်စေမှာ ဖြစ်ပါတယ်"ဟု မိုဒီက Newsweek မဂ္ဂဇင်းနှင့် ပြုလုပ်သည့် အင်တာဗျူးတွင် ပြောကြားခဲ့သည်။

အိန္ဒိယနှင့် တရုတ်အကြား ပိုင်ဆိုင်မှု အငြင်းပွားနေသည့် ဟိမဝန္တာနယ်စပ်ဒေသ(အာရုနာချယ်ပရာဒေ့ရှ်ပြည်နယ်) တွင် ၂၀၂၀ ပြည့်နှစ်က နှစ်နိုင်ငံစစ်သားများအကြား ခိုက်ရန်ဖြစ်ပွားခဲ့သဖြင့် စစ်သား ၂၄ ဦး သေဆုံးခဲ့ပြီးနောက် နှစ်နိုင်ငံဆက်ဆံရေးများ တင်းမာခဲ့သည်။

တရုတ်နဲ့ အိန္ဒိယ အလံကို တွေ့ရစဉ်

ပြီးခဲ့သည့်နှစ် မေလကလည်း မိုဒီက တရုတ်နှင့် ဆက်ဆံရေး ပုံမှန်ပြန်ဖြစ်အောင် လုပ်ဆောင်ရေးသည် အရေးကြီး ကြောင်းနှင့် အိန္ဒိယသည် မိမိတို့၏ အချုပ်အခြာအာဏာနှင့် ဂုဏ်သိက္ခာကို ကာကွယ်သွားမည်ဖြစ်ကြောင်း ထပ်လောင်း ပြောကြားခဲ့သည်။

မိုဒီသည် တတိယသက်တမ်းအတွက် မဲဆွယ်စည်းရုံးသည့် ကာလတွင် ပြည်တွင်းလုံခြုံရေးနှင့် ခိုင်မာသည့် နိုင်ငံခြားရေးမူဝါဒကို အဓိကထား ပြောကြားကာ မဲဆွယ်ခဲ့သည်။

အိန္ဒိယတွင် လာမည့် သီတင်းပတ်မှစပြီး ၂ လနီးပါးကြာ အထွေထွေရွေးကောက်ပွဲများ ပြုလုပ်မည်ဖြစ်သည်။

"အိန္ဒိယအတွက် တရုတ်နဲ့ ဆက်ဆံရေးဟာ အရေးကြီးပြီး အဓိပ္ပာယ်ပြည့်ဝပါတယ်"ဟု မိုဒီက ပြောကြားခဲ့သည်။

ထို့နောက် နှစ်နိုင်ငံအကြား ငြိမ်းချမ်းသည့် ဆက်ဆံရေးသည် ဒေသတွင်းနှင့် နိုင်ငံတကာအတွက် အရေးကြီး ကြောင်း ထပ်လောင်း ပြောကြားခဲ့သည်။

အိန္ဒိယနှင့် တရုတ်သည် ကီလိုမီတာ ၃၈၀၀ (မိုင် ၂၄၀၀) အရှည်ရှိသည့် နယ်စပ်ချင်း ထိစပ်နေပြီး ၁၉၆၂ ခုနှစ်က နယ်စပ်အငြင်းပွားမှုနှင့် ပတ်သက်၍ သွေးစွန်းသည့် စစ်ပွဲဖြစ်ပွားခဲ့သည်။

Source: MSN

CNI International News

အော့တဝါ၊ ဧပြီ ၁၁ 

ကနေဒါထောက်လှမ်းရေးအေဂျင်စီက ဧပြီ ၈ ရက်တွင် ကြားနာခဲ့သည့် တရားဝင် စုံစမ်းစစ်ဆေးမှု တစ်ခုတွင် နောက်ဆုံးရွေးကောက်ပွဲနှစ်ခု၌ တရုတ်သည် ဝင်ရောက်စွက်ဖက်ခဲ့ကြောင်း တွေ့ရှိခဲ့သည်ဟု ရိုက်တာမှ ဖော်ပြခဲ့သည်။

ထိုတွေ့ရှိချက်သည် ကနေဒါနိုင်ငံရေးတွင် သံသယဖြစ်ဖွယ် တရုတ်၏ ဝင်ရောက်စွက်ဖက်မှုနှင့် ပတ်သက်၍ အခိုင်မာဆုံး သက်သေ အထောက်အထားဖြစ်ကြောင်း ကနေဒါထောက်လှမ်းရေးအေဂျင်စီက ပြောကြားခဲ့သည်။

၂၀၁၉ ခုနှစ်နှင့် ၂၀၂၁ ခုနှစ်တွင် ကျင်းပခဲ့သော ရွေးကောက်ပွဲ နှစ်ရပ်လုံးတွင် ဝန်ကြီးချုပ် ဂျက်စတင်ထရူးဒိုး (Justin Trudeau)၏ လစ်ဘရယ်ပါတီ အနိုင်ရရှိခဲ့သည်။

တရုတ်၏ ရွေးကောက်ပွဲအပေါ် ဝင်ရောက် စွက်ဖက်မှုနှင့်ပတ်သက်၍ မီဒီယာများ၏ ဖော်ပြချက်ကို စိတ်တို ဒေါသဖြစ်နေသော အတိုက်အခံ လွှတ်တော်အမတ်များ၏ ဖိအားအောက်တွင် ထရူးဒိုးက နိုင်ငံခြားဝင်ရောက် စွက်ဖက်မှုဆိုင်ရာကော်မရှင် တစ်ရပ်ကို ဖွဲ့စည်းတည်ထောင်ခဲ့သည်။

ကော်မရှင်က ကနေဒါ လုံခြုံရေးထောက်လှမ်းရေးအဖွဲ့ (CSIS) မှ ၂၀၂၃ ခုနှစ်၊ ဖေဖော်ဝါရီလ အကျဉ်းချုပ် ကောက်နုတ်ချက် ပါဝင်သော ရုပ်ပုံဆလိုက် တစ်ခုကို ဧပြီ ၈ ရက်တွင် ပြသခဲ့သည်။

 ကနေဒါနိုင်ငံကို တွေ့ရစဉ်

"PRC(တရုတ်ပြည်သူ့သမ္မတနိုင်ငံ)ဟာ ၂၀၁၉ ခုနှစ်နဲ့ ၂၀၂၁ ရွေးကောက်ပွဲ နှစ်ရပ်လုံးမှာ လျှို့ဝှက်စွာ လိမ်လည် ဝင်ရောက် စွက်ဖက်တယ်ဆိုတာကို ကျနော်တို့ တွေ့ရှိခဲ့ပါတယ်" ဟု ၎င်းက ပြောကြားခဲ့သည်။

"ရွေးကောက်ပွဲနှစ်ရပ်လုံးမှာ ဒီ FI(ပြည်ပဝင်ရောက်စွက်ဖက်မှု)လှုပ်ရှားမှုတွေဟာ လက်တွေ့ဆန်ပြီး တရုတ်အစိုးရ ရဲ့ အကျိုးစီးပွားအတွက် တရုတ်အစိုးရကို လိုလားသူ ဒါမှမဟုတ် ကြားနေသူလို့ ရှုမြင်သူတွေ အားလုံးကို အဓိက အာရုံစိုက် ထောက်ပံ့ကူညီခဲ့ပါတယ်"ဟု ပြောသည်။

အကဲဖြတ်မှု အခြေအနေကို Global News တွင် အစောပိုင်းက ဖော်ပြခဲ့ပြီး ဖြစ်သည်။ တရုတ်ကမူ ကနေဒါနိုင်ငံ ရေးတွင် ကြားဝင်စွက်ဖက်ခဲ့သည်ဟူသည့် စွပ်စွဲချက်ကို ငြင်းဆိုခဲ့သည်။

တရုတ်၏ ကြားဝင်စွက်ဖက်မှုသည် ၎င်းပါတီကို အမတ်နေရာ ကိုးနေရာအထိ ဆုံးရှုံးမှုဖြစ်စေသော်လည်း ရွေးကောက်ပွဲလမ်းကြောင်းအား ပြောင်းလဲနိုင်ခဲ့ခြင်း မရှိကြောင်း ၂၀၂၁ ခုနှစ် မဲဆွယ်လှုပ်ရှားမှုအတွင်း ကွန်ဆာဗေးတစ်ပါတီကို ဦးဆောင်ခဲ့သည့် အီရင်အိုတူးလီ(Erin O'Toole) က ပြောကြားခဲ့သည်။

"တရားဝင် ဒါမှမဟုတ် နိုင်ငံရေးဆိုင်ရာ အကျိုးဆက် အနည်းငယ်ပဲ ရှိတဲ့အတွက် ကနေဒါမှာ တရုတ်စပိုင်တွေဟာ ကြားဝင်စွက်ဖက်မှုတွေကို အောင်မြင်စွာ လုပ်ဆောင်နိုင်ခဲ့ပါတယ်။ အဲဒါကြောင့် FI (ပြည်ပဝင်ရောက်စွက်ဖက်မှု) လှုပ်ရှားမှုဟာ အန္တရာယ်နည်းပြီး ရလဒ်ကြီးကြီးရရှိတာ ဖြစ်ပါတယ်" CSIS က အကဲဖြတ် ပြောကြားခဲ့သည်။ 

Source: ရိုက်တာ

CNI International News

အင်ဖာ၊ ဧပြီ ၁၁

အိန္ဒိယ၏ ဗဟိုအစိုးရနှင့် မဏိပူရပြည်နယ်အစိုးရတို့၏ အချိန်မီ ကြားဝင်ဖြေရှင်းပေးမှုတို့ကြောင့် ပဋိပက္ခများ ဖြစ်ပွားနေသည့် မဏိပူရပြည်နယ်၏ အခြေအနေမှာ တိုးတက်ကောင်းမွန်လာပြီဖြစ်၍ နာဂလက်နက်ကိုင်နှင့် ငြိမ်းချမ်းရေးကိုလည်း အရှိန်မြင့် လုပ်ဆောင်သွားမည်ဟု အိန္ဒိယဝန်ကြီးချုပ် မိုဒီ (Modi)က ပြောကြားခဲ့သည်ဟု E-PAP သတင်းဝက်ဘ်ဆိုက်မှ ဖော်ပြခဲ့သည်။

မဏိပူရပြည်နယ်တွင် ပဋိပက္ခများ ဖြစ်ပွားမှု အရှိန်အမြင့်ဆုံး ကာလအတွင်း ပြည်ထဲရေးဝန်ကြီး အမစ်ရှား (Amit Shah) သည် သက်ဆိုင်ရာ အဖွဲ့အစည်းများ၊ လူပုဂ္ဂိုလ်များနှင့် ပုဂ္ဂိုလ်ရေးအရ ထိတွေ့ဆက်ဆံခဲ့ပြီး အစည်းအဝေး ၁၅ ကြိမ် ပြုလုပ်ခဲ့မှုအပေါ် မိုဒီက ချီးကျူးခဲ့သည်။

မိုဒီက အရှေ့မြောက်ဒေသရှိ လူငယ်များအပေါ် ၎င်း၏ လျော့နည်းသွားခြင်းမရှိသည့် ယုံကြည်မှုကို ဖော်ပြခဲ့သည်။

မဏိပူရပြည်နယ်အတွင်းက အဓိကရုဏ်းဖြစ်ပွားမှုကိုတွေ့ရစဉ်

ထို့နောက် ဒေသတွင်း အလုံးစုံဖွံ့ဖြိုးတိုးတက်ရေးတွင် လူငယ်များ၏ အခန်းကဏ္ဍသည် မရှိမဖြစ် အရေးကြီး ကြောင်းကိုလည်း ဒေလီ (Delhi) မြို့တော်ရှိ ဝန်ကြီးချုပ်၏ နေအိမ်တွင် The Assam Tribune သတင်းစာနှင့် ပြုလုပ်သည့် အင်တာဗျူး၌ ပြောကြားခဲ့သည်။

အိန္ဒိယနိုင်ငံ လွတ်လပ်ရေး ရပြီးကတည်းက အရှေ့မြောက်ဒေသသည် လျစ်လျူရှုခံခဲ့ရသည်။

လက်ရှိမှာတော့ ထိုအခြေအနေကနေ အကူအပြောင်းကာလသို့ ရောက်ရှိနေပြီးဖြစ်သည်။

ထို့ကြောင့် လက်ရှိ ပေါ်ပေါက်နေသည့် စိန်ခေါ်မှုများကို ဖြေရှင်းရန် ရှုထောင့်ပေါင်းစုံ ပါဝင်သည့် ချဉ်းကပ် ဆောင်ရွက်မှုသည် အရေးကြီးကြောင်း မိုဒီက ပြောကြားခဲ့သည်။

NSCN-IM တပ်ဖွဲ့ကိုတွေ့ရစဉ်

မဏိပူရပြည်နယ်တွင် ကယ်ဆယ်ရေးနှင့် ပြန်လည်ထူထောင်ရေး အစီအစဉ်များကို ဆက်လက် လုပ်ဆောင်လျက် ရှိပြီး ထိုအစီအစဉ်များအနက် ယာယီကယ်ဆယ်ရေး စခန်းများတွင် နေထိုင်နေရသူများကို ငွေကြေးအရ ကူညီ ထောက်ပံ့ရေး အစီအစဉ်လည်း ပါဝင်သည်။
ပြည်နယ်အစိုးရက လိုအပ်သည့် အရာများကို ဗဟိုအစိုးရမှ ထောက်ပံ့ပေးသွားမည် ကတိကဝတ်များကိုလည်း မိုဒီက ထပ်မံအတည်ပြု ပြောကြားခဲ့သည်။ 

ထို့ပြင် နာဂအမျိုးသားဆိုရှယ်လစ်ကောင်စီ-အိုက်ဇက်ရှီချီဆူ/ဗွီးဗား (NSCN-IM) နှင့် အိန္ဒိယဗဟိုအစိုးရကြား ၂၀၁၅ ခုနှစ်၊ သြဂုတ် ၃ ရက်က ငြိမ်းချမ်းရေးမူဘောင် သဘောတူညီချက် လက်မှတ်ရေးထိုးမှုသည်လည်း ဆယ်စုနှစ်များစွာ ကြာမြင့်နေသည့် နာဂနိုင်ငံရေးပြဿနားများကို ဖြေရှင်းရေးအတွက် သိသားထင်ရှားသည့် သဘောတူညီချက်ဖြစ်သည်ဟု မိုဒီက အမွှမ်းတင်ပြောကြားခဲ့သည်။

အိန္ဒိယအစိုးရသည် NSCN-IM အပါအဝင် အခြားနာဂအဖွဲ့များ၊ ကိုယ်စားလှယ်များနှင့်လည်း ငြိမ်းချမ်းရေး ဆွေးနွေးပွဲများတွင် တက်ကြွစွာ ပါဝင်ခဲ့ကြောင်း မိုဒီက ပြောကြားခဲ့သည်။

Source: E-PAO

CNI International News

ပေကျင်း၊ ဧပြီ ၁၀

ဆွီဒင်နိုင်ငံသည် ၎င်း၏ လုံခြုံရေးအတွက် ကြီးမားစွာ ခြိမ်းခြောက်နေသည်ဟု ယူဆထားသည့် တရုတ် ဂျာနယ်လစ်တစ်ဦးကို နိုင်ငံအတွင်းမှ နှင်ထုတ်ခဲ့ကြောင်း South China Morning Post(SCMP)မှ ဖော်ပြခဲ့သည်။

အမည်ဖော်ပြမထားသည့် အသက် ၅၇ နှစ်အရွယ် တရုတ်အမျိုးသမီး ဂျာနယ်လစ်တစ်ဦးသည် ပြီးခဲ့သည့်နှစ် အောက်တိုဘာလက ဆွီဒင်လုံခြုံရေးအဖွဲ့၏ ဖမ်းဆီးခြင်းကို ခံခဲ့ရပြီး ပြီးခဲ့သည့် သီတင်းပတ်တွင် နှင်ထုတ်ခံခဲ့ ရသည်။

ထိုအမျိုးသမီးဂျာနယ်လစ်ကို ဆွီဒင်နိုင်ငံအတွင်းသို့ ပြန်လည်ဝင်ရောက်ခွင့်ကိုလည်း တားမြစ်ပိတ်ပင်ခဲ့သည်။

အဆိုပါ အမျိုးသမီးသည် လွန်ခဲ့သည့်နှစ် ၂၀ ခန့်ကတည်းက ဆွီဒင်နိုင်ငံသို့ ရောက်ရှိခဲ့ခြင်းဖြစ်ပြီး နေထိုင်ခွင့် ပါမစ် ရရှိထားကာ ဆွီဒင်အမျိုးသားတစ်ဦးနှင့် လက်ထပ်ပြီး ကလေးများ မွေးဖွားခဲ့ကြောင်း၊ ထိုအမျိုးသမီး၏ ရှေ့နေ ဖြစ်သူ လော်ထရင်မ် ကာဒရီယူ (Leutrim Kadriu) က ပြောကြားခဲ့သည်။

ထိုအမျိူးသမီးအပေါ် စွဲဆိုထားသည့် အမျိုးသားလုံခြုံရေးဆိုင်ရာ စွဲချက်များနှင့်ပတ်သက်သည့် အသေးစိတ် အချက်အလက်များကို မသိရဘဲ ထိုအမှုကို လျှို့ဝှက်အဆင့်အဖြစ် သတ်မှတ်ထားသည်ဟု ကာဒရီယူက ပြော သည်။

ဆွီဒင်လုံခြုံရေးတပ်ဖွဲ့ကို တွေ့ရစဉ်

"ကျနော့်ရဲ့ အမှုသည်က ကြီးမားတဲ့ လုံခြုံရေးခြိမ်းခြောက်မှု ဖြစ်စေနိုင်တယ်လို့ ယူဆရကြောင်း လုံခြုံရေးရဲတပ်ဖွဲ့ က ပြောပါတယ်။ အဲဒီလို ယူဆဖို့ကိုလည်း လူဝင်မှုရေးရာ အေဂျင်စီ၊ လူဝင်မှုရေးရာ တရားရုံးနဲ့ အစိုးရအဖွဲ့တွေက သဘောတူခဲ့ပါတယ်" ဟု ကာဒရီယူက ပြောသည်။

ထိုအကြောင်းအရာနှင့်ပတ်သက်ပြီး လူဝင်မှုရေးရာအေဂျင်စီက မှတ်ချက်ပေးခဲ့ခြင်းမရှိပေ။

ဆွီဒင်ရုပ်သံဖြစ်သည့် SVT ကလည်း စွဲချက်များနှင့်ပတ်သက်သည့် အသေးစိတ် အချက်အလက်များကို ထုတ်ပြန် ခဲ့ခြင်း မရှိသော်လည်း ထိုအမျိုးသမီးသည် ၎င်း၏ ဝက်ဘ်ဆိုက်တွင်သတင်းဆောင်းပါးများ ရေးသားနေပြီး ဆွီဒင် နိုင်ငံ၊ စတော့ဟုမ်း (Stockholm) မြို့ရှိ တရုတ်သံရုံးထံမှ ငွေကြေးများ ရရှိခဲ့ကြောင်း အမည်မဖော်ပြထားသည့် သတင်းရင်းမြစ်များကို ကိုးကားပြီး ဖော်ပြခဲ့သည်။

ထိုအမျိုးသမီးသည် ဆွီဒင်သို့ လာရောက်သည့် တရုတ်အာဏာပိုင်များ၊ စီးပွားရေး ကိုယ်စားလှယ်အဖွဲ့များကို ကြိုဆိုလက်ခံပြီး ဆွီဒင်အရာရှိများနှင့် အစည်းအဝေးများ ဖြစ်မြောက်စေရန် ဆောင်ရွက်ပေးခဲ့ကြောင်း SVT က ဖော်ပြခဲ့သည်။

Source: SCMP