CNI International News

မနီလာ၊ ဇန်နဝါရီ ၁၆

တောင်တရုတ်ပင်လယ်အတွင်းရှိ ဖိလစ်ပိုင်၏ ရေပိုင်နက်အတွင်း စစ်သားများ စခန်းချနေထိုင်နိုင်မည့် ကျွန်းများ ကို တည်ဆောက်သွားမည်ဟု ဖိလစ်ပိုင် စစ်တပ်အကြီးအကဲ ရိုမီရို ဘရော်နာ (Romeo Brawner)က ဇန်နဝါရီ ၁၅ ရက်တွင် ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။ 

ထိုအစီအစဉ်သည် မဟာဗျူဟာမြောက် အရေးကြီးသည့် ပင်လယ်ကူးသင်္ဘောများ ဖြတ်သန်းသွားလာနေသော တောင်တရုတ်ပင်လယ်၏ ရေပြင်နယ်နိမိတ်များကို ပိုင်ဆိုင်ကြောင်း အငြင်းပွားနေသည့် တရုတ်နှင့် ဖိလစ်ပိုင် အကြား တင်းမာမှုများကို ပိုမိုမြင့်တက်စေမည်ဖြစ်သည်။ 

ဖိလစ်ပိုင်နိုင်ငံတွင် Ayungin ဟု လူသိများသည့် Second Thomas သောင်ခုံမှလွဲပြီး တောင်တရုတ်ပင်လယ် အတွင်းရှိ ရေပြင်နယ်နိမိတ် ၈ ခုကို ဖိလစ်ပိုင်က သိမ်းပိုက်ထားသည်။ ထိုရေပြင်နယ်နိမိတ်များသည် ဖိလစ်ပိုင်၏ အထူးစီးပွားရေးဇုန်အတွင်းတွင် တည်ရှိကြောင်း ပြောကြားခဲ့သည်။

"ကျနော်တို့ဟာ အဲဒီ နယ်နိမိတ်တွေအားလုံးကို ကျွန်းတွေဆောက်လုပ်ပြီး အဆင့်မြှင့်တင် မွမ်းမံသွားမှာပါ" ဟု ဘရော်နာက ဖိလစ်ပိုင်စစ်ဌာနချုပ်တွင် ဖိလစ်ပိုင်သမ္မတ ဖာဒီနန် မားကို့စ် ဂျူနီယာ (Ferdinand Marcos Jr.) ဦးဆောင်ပြုလုပ်သည့် ညီလာခံကို တက်ရောက်အပြီး ပြောကြားခဲ့သည်။

ဖိလစ်ပိုင်စစ်သားကို တွေ့ရစဉ်

ထိုရေပြင်နယ်နိမိတ်များထဲတွင် တောင်တရုတ်ပင်လယ်အတွင်း အကြီးဆုံးနှင့် မဟာဗျူဟာအရ အရေးအပါဆုံး Thitu ကျွန်းလည်း ပါဝင်နေသည်။ ထိုကျွန်းကို ဖိလစ်ပိုင်တွင် Pag-asa ဟု လူသိများကာ ဖိလစ်ပိုင်၏ ပါလာဝမ် (Palawan) ပြည်နယ်မှ အနောက်ဘက် ၄၈၀ ကီလိုမီတာခန့်အကွာတွင် တည်ရှိသည်။

ဖိလစ်ပိုင်စစ်တပ်သည် Second Thomas သောင်ခုံအနီးတွင် ၁၉၉၉ ခုနှစ်ကစပြီး ကျောက်ချရပ်နားထားသည့် အမေရိကန်စစ်သင်္ဘော အဟောင်းတစ်စင်းပေါ်တွင် ဖိလစ်ပိုင်စစ်သားများကို စခန်းချတပ်စွဲထားပြီး နယ်မြေ ပိုင်ဆိုင်ကြောင်း ကြေညာချက်ကို ခိုင်မာစေရန် ကြိုးပမ်းခဲ့သည်။ 

ဖိလစ်ပိုင်စစ်တပ်၏ အဆင့်မြှင့်တင်မွမ်းမံရေး အစီအစဉ်တွင် သင်္ဘောများ၊ ရေဒါများနှင့် လေယာဉ်များ ဝယ်ယူရရှိ ရေး အပါအဝင် နယ်မြေပိုင်ဆိုင်မှုကို အာရုံစိုက်ပြီး ပြည်တွင်းကာကွယ်ရေးကဏ္ဍအား မြှင့်တင်ရန်ဖြစ်သည်ဟု ဘရော်နာက ပြောကြားခဲ့သည်။

တရုတ်သည် နှစ်စဉ် ကုန်သွယ်မှုတန်ဖိုး ဒေါ်လာ ၃ ထရီလျံ တန်ဖိုးရှိသည့် ပင်လယ်ကူးသင်္ဘောများ ဖြတ်သန်း သွားလာရာ လမ်းကြောင်းများရှိသော တောင်တရုတ်ပင်လယ်တွင် နယ်မြေပိုင်ဆိုင်မှုများနှင့် ပတ်သက်ပြီး ဖိလစ်ပိုင်၊ ဘရူနိုင်း၊ မလေးရှား၊ ထိုင်ဝမ်၊ ဗီယက်နမ်တို့နှင့် အငြင်းပွားလျက်ရှိသည်။ 

Source: ဘန်ကောက်ပို့စ်

CNI International News

ဝါရှင်တန်၊ ဇန်နဝါရီ ၁၆

အမေရိကန် သမ္မတရွေးကောက်ပွဲများတွင် ဒီမိုကရက်တစ်ပါတီနှင့် ရီပတ်ဘလစ်ကန်ပါတီတို့အကြား အကြိတ် အနယ် ယှဉ်ပြိုင်ရလေ့ရှိသည့် မဲယိမ်းပြည်နယ်ဟု လူသိများသည့် swing states များတွင် သမ္မတဟောင်း ဒေါ်နယ်ထရမ့် (Donald Trump)က ဦးဆောင်နေကြောင်း Japan Times မှ ဖော်ပြခဲ့သည်။

မဲယိမ်းပြည်နယ်များဆိုသည်မှာ ပါတီတစ်ခုကို သတ်သတ်မှတ်မှတ် ထောက်ခံခြင်းမရှိဘဲ ထောက်ခံမှု ပြောင်းလဲ တတ်သည့် ပြည်နယ်များဖြစ်သဖြင့် သမ္မတရွေးကောက်ပွဲများတွင် အဆုံးအဖြတ်ပေးသည့် ပြည်နယ်များအဖြစ် လည်း လူသိများသည်။

လက်ရှိတွင် ဒေါ်နယ်ထရမ့်သည် ပြစ်မှုဆိုင်ရာ စွဲချက်များနှင့် ရင်ဆိုင်နေရသည့်တိုင် ၂၀၂၄ သမ္မတရွေးကောက်ပွဲ၌ ရီပတ်ဘလစ်ကန်ပါတီ၏ ပြိုင်ဘက်များကို ကျော်ဖြတ်ပြီး ပါတီကိုယ်စားပြုသည့် ရွေးကောက်ပွဲဝင် ကိုယ်စား လှယ်လောင်း ဖြစ်လာလိမ့်မည်ဟု ရေပန်းစားနေသည်။

ဘိုင်ဒန်ကို တွေ့ရစဉ်

ဒေါ်နယ်ထရမ့် ရင်ဆိုင်နေရသည့် အမှုများထဲတွင် ၂၀၂၁ ခုနှစ်၊ ဇန်နဝါရီ ၆ ရက်က ၎င်းအား ထောက်ခံသူများကို လွှတ်တော် အဆောက်အအုံအား ဝင်ရောက်စီးနင်းရန် သွေးထိုးလှုံ့ဆော်မှုလည်း ပါဝင်နေသည်။

အမေရိကန်ရွေးကောက်ပွဲများတွင် ဒီမိုကရက်တစ်ပါတီနှင့် ရီပတ်ဘလစ်ကန်ပါတီအကြား အကြိတ်အနယ် ယှဉ်ပြိုင်ရသည့် ပြည်နယ်များဖြစ်သည့် နီဗားဒါး (Nevada)၊ဂျော်ဂျီယာ (Georgia)၊ အရီဇိုးနား (Arizona) ၊ ပင်ဆယ်ဗေးနီးယား (Pennsylvania)နှင့် မီချီဂန် (Michigan) ပြည်နယ်များတွင် နေထိုင်သည့် ဒေါ်နယ်ထရမ့်အား ထောက်ခံသူများကို သတင်းထောက်များက စစ်တမ်းကောက်ယူမှုများ ပြုလုပ်ခဲ့သည်။

ရွေးကောက်ပွဲမတိုင်မီ ပြုလုပ်သည့် အဆိုပါ လူထုဆန္ဒ သဘောထား ကောက်ယူမှု စစ်တမ်းများအရ ဒေါ်နယ်ထရမ့်သည် မဲယိမ်းပြည်နယ်အချို့တွင် လက်ရှိ ဒီမိုကရက်တစ်သမ္မတ ဂျိုးဘိုင်ဒန် (Joe Biden) ကို အသာစီးရထားသည်။

နစ်ကီဟာလေးကိုတွေ့ရစဉ်

ဒေါ်နယ်ထရမ့်သည် နိုဝင်ဘာလ ရွေးကောက်ပွဲတွင် ဘိုင်ဒန်နှင့် မကြေပွဲနွှဲမည့် ကိုယ်စားလှယ်လောင်း တစ်ဦး အဖြစ် ဖြစ်နိုင်ခြေ အများဆုံးဖြစ်ကြောင်း ရလဒ်များ ထွက်ပေါ်ခဲ့သည်။ 

ရီပတ်ဘလစ်ကန်ပါတီသည် လာမည့် သမ္မတရွေးကောက်ပွဲအတွက် ပါတီကိုယ်စားပြု ဝင်ရောက်ယှဉ်ပြိုင်မည့် ကိုယ်စားလှယ်လောင်း ရွေးချယ်မှုကို ဇန်နဝါရီ ၁၅ ရက်တွင် အိုင်အိုဝါ (Iowa) ပြည်နယ်၌ စတင်ရွေးချယ်မည် ဖြစ်သည်။ 

လက်ရှိတွင် ရီပတ်ဘလစ်ကန်ပါတီအတွက် ကိုယ်စားပြုယှဉ်ပြိုင်ရန် ကိုယ်စားလှယ်လောင်းအဖြစ် ရွေးချယ်ခံ ရမည့် ရေပန်းစား နေသူများစာရင်းတွင် ဒေါ်နယ်ထရမ့်၊ ဖလော်ရီဒါ(Florida)ပြည်နယ် အုပ်ချုပ်ရေးမှူး ရွန် ဒီဆန်းတစ် (Ron DeSantis)၊ တောင်ကာရိုလိုင်းနား (South Carolina) ပြည်နယ် အုပ်ချုပ်ရေးမှူးဟောင်း နစ်ကီ ဟာလေး (Nikki Haley)၊ နည်းပညာ စွန့်ဦးတီထွင်ပညာရှင် ဗီဗက် ရာမာဆွာမိ (Vivek Ramaswamy) နှင့် အာကန်ဆပ် (Arkansas) ပြည်နယ် အုပ်ချုပ်ရေးမှူးဟောင်း အက်ဆာ ဟွတ်ချင်ဆန် (Hutchinson) တို့ ဖြစ် သည်။ 

Source: Japan Times

CNI International News

တိုင်ပေ၊ ဇန်နဝါရီ ၁၆

တရုတ်နှင့်စစ်ပွဲ ဖြစ်ပွားမည်ကို စိုးရိမ်နေသည့်တိုင် ဂျပန်သည် ထိုင်ဝမ်သမ္မတအဖြစ် ရွေးကောက်ခံခဲ့ရသည့် လိုင်ချင်တေး (Lai Ching-te) နှင့် စိတ်တူကိုယ်တူရှိသော မဟာမိတ်အဖြစ် တည်ထောင်ရန် ကြိုးပမ်းသွားလိမ့် မည်ဟု Japan Times မှ ဖော်ပြခဲ့သည်။

လိုင်သည်လည်း ဂျပန်နှင့် ဆက်ဆံရေးကို ပိုမိုခိုင်မာစွာ တည်ထောင်ရန် မျှော်လင့်ထားပြီး လိုင်နှင့် ဂျပန်အစိုးရ တို့က တရုတ်၏ လှုပ်ရှားမှုများကို စိုးရိမ်လျက်ရှိသည်။

ဇန်နဝါရီ ၁၃ ရက်က ထိုင်ဝမ်သမ္မတရွေးကောက်ပွဲတွင် အနိုင်ရရှိခဲ့သည့် လိုင်က ၎င်း၏ အနိုင်ရရှိမှုသည် ဒီမိုကရေစီ အသိုင်းအဝိုင်းအတွက် အောင်ပွဲတစ်ရပ်ဖြစ်သည်ဟု ပြောကြားခဲ့သည်။

ထို့နောက် ၎င်း(လိုင်ချင်တေး)၏ အစိုးရအဖွဲ့သည် ဂျပန်နှင့် ပူးပေါင်းဆောင်ရွက်မှုကို ပိုမိုတိုးမြှင့်သွားမည့် လက္ခဏာများကို ပြသခဲ့သည်။

လိုင်သည် ရွေးကောက်ပွဲအပြီး တစ်ရက်အကြာ ဇန်နဝါရီ ၁၄ ရက်တွင် ဂျပန်လွှတ်တော်အမတ်တစ်ဦးနှင့် အစည်းအဝေး ပြုလုပ်ခဲ့ခြင်းအားဖြင့် ဂျပန်နှင့် ဆက်ဆံရေးကို ပိုမိုခိုင်မာအောင် လုပ်ဆောင်မည့် လက္ခဏာများကို ပြသခဲ့သည်။

ထိုင်ဝမ်ဒုသမ္မတလောင်း ဟီရှောင်ပီကင်ကို တွေ့ရစဉ်

ဂျပန်-ထိုင်ဝမ် ဆက်ဆံရေးအသင်း၏ အကြီးအကဲ မစ်ဆူအို အိုဟာရှီ (Mitsuo Ohashi) သည် လိုင်နှင့်တကွ ထိုင်ဝမ်ဒုသမ္မတလောင်း ဟီရှောင်ပီကင် (Hsiao Bi-khim) တို့နှင့် ထိုင်ဝမ်၏ အာဏာရပါတီဖြစ်သည့် ဒီမိုကရက်တစ်တိုးတက်ရေးပါတီ (DPP) ဌာနချုပ်တွင် အစည်းအဝေး ပြုလုပ်ခဲ့ခြင်းဖြစ်သည်။

ထိုအစည်းအဝေးတွင် လိုင်က ဒေသတွင်း ငြိမ်းချမ်းရေး၊ တည်ငြိမ်းရေးတို့နှင့် ပတ်သက်ပြီး ထိုင်ဝမ်နှင့် ဂျပန်တို့က စိုးရိမ်နေကြောင်း ပြောကြားခဲ့သည်ဟု DPP က ထုတ်ပြန်ခဲ့သည်။

တရုတ်သည် ထိုင်ဝမ်ကို ၎င်း၏ နယ်နိမိတ်တစ်ခုအဖြစ် သတ်မှတ်ထားပြီး လိုအပ်လာပါက အင်အားသုံး၍ သိမ်းယူ သွားမည်ဟု မကြာခဏ ပြောကြားခဲ့သည်။ ထို့ကြောင့် တရုတ်သည် ထိုင်ဝမ်ကို ကျူးကျော်နိုင်မည့် အလားအလာ အပေါ် စိုးရိမ်မှုများ မြင့်တက်စေခဲ့သည်။

အမေရိကန်သမ္မတ ဂျိုးဘိုင်ဒန် (Joe Biden) ကမူ ထိုင်ဝမ်အနေဖြင့် တိုက်ခိုက်ခံရမည်ဆိုပါက အမေရိကန်သည် ထိုင်ဝမ်ကို ကူညီပေးသွားမည်ဖြစ်ကြောင်း အရိပ်အမြွက်ပြောကြားထားသည်။

ဇန်နဝါရီ ၁၅ ရက်ကလည်း လိုင်သည် ထိုင်ဝမ်သို့ ရောက်ရှိလာသည့် အမေရိကန်အရာရှိဟောင်းများ ဦးဆောင် သော ကိုယ်စားလှယ်အဖွဲ့နှင့် တွေ့ဆုံခဲ့သည်။

အမေရိကန်သည် ထိုင်ဝမ်ကို ဆက်လက် ထောက်ခံသွားလိမ့်မည်ဟု မျှော်လင့်ကြောင်း လိုင်က အမေရိကန် ကိုယ်စားလှယ်များကို ပြောကြားခဲ့သည်။

Source: Japan Times

CNI International News

ဆိုးလ်၊ ဇန်နဝါရီ ၁၅

မြောက်ကိုရီးယားသည် ဇန်နဝါရီ ၁၅ ရက်က သံသယဖြစ်ဖွယ် တာလတ်ပစ် ပဲ့ထိန်းဒုံးကျည်တစ်စင်းကို ပင်လယ် အတွင်းသို့ ပစ်လွှတ်ခဲ့ကြောင်း တောင်ကိုရီးယားစစ်တပ်က ပြောကြားခဲ့သည်ဟု အေပီမှ ဖော်ပြခဲ့သည်။

မြောက်ကိုရီးယားသည် ဒေသတွင်းရှိ အမေရိကန်စစ်စခန်းများကို တိုက်ခိုက်နိုင်စွမ်းရှိပြီး ရေဒါဖြင့် ဖမ်းယူရန် ခက်ခဲသည့် ဒုံးကျည်အင်ဂျင်များကို စမ်းသပ်ခဲ့ပြီး နှစ်လအကြာတွင် ယခုကဲ့သို့ ဒုံးကျည်တစ်စင်း ပစ်လွှတ်ခဲ့ခြင်း ဖြစ်သည်။

ယခုဒုံးကျည် ပစ်လွှတ်မှုသည် ယခုနှစ်အတွင်း မြောက်ကိုရီးယား၏ ပထမဆုံးအကြိမ် ဒုံးကျည်ပစ်လွှတ်မှု ဖြစ် သည်။ 

ကျွမ်းကျင်သူများကမူ မြောက်ကိုရီးယားသည် ဧပြီလတွင် ကျင်းပမည့် တောင်ကိုရီးယား လွှတ်တော်ရွေးကောက်ပွဲ နှင့် နိုဝင်ဘာလတွင် ကျင်းပမည့် အမေရိကန်သမ္မတ ရွေးကောက်ပွဲများမတိုင်မီ ဒုံးကျည်စမ်းသပ်မှုများ ပြုလုပ်ပြီး ဖိအားများပေးရန် ကြိုးပမ်းနေခြင်း ဖြစ်နိုင်သည်ဟု ပြောကြားခဲ့သည်။

ဇန်နဝါရီ ၁၄ ရက်နေ့ မွန်းလွဲပိုင်းတွင် မြောက်ကိုရီးယား၏ ပြုံယမ်းမြို့တော်မှ တာလတ်ပစ် ပဲ့ထိန်းဒုံးကျည် တစ်စင်း ပစ်လွှတ်ခဲ့သည်ကို ထောက်လှမ်းတွေ့ရှိခဲ့သည်။

မြောက်ကိုရီးယားက ပစ်လွှတ်လိုက်တဲ့ ဒုံးကျည်ကို တွေ့ရစဉ်

ထိုဒုံးကျည်သည် မြောက်ကိုရီးယား၏ အရှေ့ဘက် ပင်လယ်အတွင်းသို့ ပျံသန်းသွားခဲ့ကြောင်း တောင်ကိုရီးယား ပူးတွဲစစ်ဦးစီးချုပ်များအဖွဲ့ (JCS) က ထုတ်ပြန်ခဲ့သည်။

အဆိုပါ ဒုံးကျည်ပစ်လွှတ်မှုနှင့်ပတ်သက်ပြီး တောင်ကိုရီးယားစစ်တပ်က အသင့်အနေအထား ပြင်ဆင်ခဲ့ကာ အမေရိကန်၊ ဂျပန်တို့နှင့်အတူ အသေးစိတ် အချက်အလက်များကို လေ့လာနေကြောင်း JCS ၏ ထုတ်ပြန်ချက် တွင် ဖော်ပြထားသည်။

ဂျပန်ကာကွယ်ရေးဝန်ကြီးဌာနကလည်း မြောက်ကိုရီးယား၏ ဖြစ်နိုင်ခြေရှိသည့် ပဲ့ထိန်းဒုံးကျည် ပစ်လွှတ်မှုကို ထောက်လှမ်းသိရှိခဲ့ကြောင်း ထုတ်ပြန်ခဲ့သည်။ 

ထိုဒုံးကျည်သည် သမုဒ္ဒရာအတွင်းသို့ ကျရောက်သွားခဲ့သည်ဟု ယူဆရကြောင်း ဂျပန်ကမ်းခြေစောင့်တပ်ဖွဲ့က ပြောကြားခဲ့သည်။

မြောက်ကိုရီးယား ဒုံးကျည်ပစ်လွှတ်လိုက်ကြောင်း သတင်းဖော်ပြထားစဉ်

ပြီးခဲ့သည့်နှစ် နိုဝင်ဘာလကလည်း မြောက်ကိုရီးယားသည် တာလတ်ပစ် ပဲ့ထိန်းဒုံးကျည်များအတွက် လောင်စာ တောင့်သုံး ဒုံးအင်ဂျင်အသစ်များကို အောင်မြင်စွာ စမ်းသပ်နိုင်ခဲ့ကြောင်း နိုင်ငံပိုင် KCNA သတင်းအေဂျင်စီက ဖော်ပြခဲ့သည်။ 

မြောက်ကိုရီးယားသည် ထိုဒုံးအင်ဂျင် အသစ်များကို အသုံးပြုပြီး ဂျပန်နိုင်ငံ၊ အိုကီနာဝါ (Okinawa) ကျွန်းနှင့် အမေရိကန်၏ ဂူအမ် (Guam) ကျွန်းပေါ်ရှိ အမေရိကန်စစ်စခန်းများကို ပစ်မှတ်ထား တိုက်ခိုက်ရန် ရည်ရွယ်ထား ခြင်းဖြစ်နိုင်ကြောင်း လေ့လာစောင့်ကြည့်သူများက ပြောကြားခဲ့သည်။

လောင်စာတောင့်သုံး ဒုံးကျည်များသည် လောင်စာအရည်သုံး ဒုံးကျည်များထက် ရွှေ့ပြောင်းသယ်ဆောင်မှုနှင့် ပစ်ခတ်မှုများတွင် ပိုမိုလွယ်ကူကြောင်း လက်နက်ကျွမ်းကျင်ပညာရှင်များက ပြောကြားခဲ့သည်။

Source: အေပီ

CNI International News

တိုင်ပေ၊ ဇန်နဝါရီ ၁၅

ထိုင်ဝမ်၏ လွတ်လပ်ရေးကို အမေရိကန်က ထောက်ခံခြင်းမရှိကြောင်း အမေရိကန်သမ္မတ ဂျိုးဘိုင်ဒန်က ဇန်နဝါရီ ၁၃ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထိုင်ဝမ်တွင် ဇန်နဝါရီ ၁၃ ရက်က ကျင်းပခဲ့သည့် ရွေးကောက်ပွဲ၌ ထိုင်ဝမ်မဲဆန္ဒရှင်များသည် တရုတ်၏ ဖိအားများ ကို ဖီဆန်ပြီး လက်ရှိ အာဏာရပါတီ ကိုယ်စားလှယ်လောင်း လိုင်ချင်တေး (Lai Ching-te)အား သမ္မတအဖြစ် ရွေးကောက်တင်မြှောက်ခဲ့ပြီးနောက် ဘိုင်ဒန်၏ မှတ်ချက်စကား ထွက်ပေါ်လာခြင်း ဖြစ်သည်။ 

ထိုင်ဝမ်အာဏာရပါတီဖြစ်သည့် ဒီမိုကရက်တစ် တိုးတက်ရေးပါတီ (DPP) ၏ သမ္မတလောင်း လိုင်သည် တရုတ်၏ ဖိအားများကို ပြင်းထန်စွာ ကန့်ကွက်ကြောင်း၊ တရုတ်ကို ရင်ဆိုင်မှုနှင့် ဆွေးနွေးမှု အစရှိသည့် နှစ်မျိုးစလုံးကို လုပ်ဆောင်မည်ဖြစ်ကြောင်း ကတိပြုခဲ့သည်။

ဘိုင်ဒန်ကတော့ ဇန်နဝါရီ ၁၃ ရက်က ထိုင်ဝမ် ရွေးကောက်ပွဲနှင့်ပတ်သက်ပြီး ၎င်း၏ တုန့်ပြန်မှု မည်သို့ရှိသနည်း ဆိုခြင်းကို မေးမြန်းခံရချိန်တွင် ထိုင်ဝမ်လွတ်လပ်ရေးကို မိမိတို့ မထောက်ခံကြောင်း ဖြေကြားခဲ့သည်။ 

ထိုင်ဝမ်သမ္မတဖြစ်လာမည့် လိုင်ချင်တေးကို တွေ့ရစဉ်

အမေရိကန်သည် ၁၉၇၉ ခုနှစ်တွင် သံတမန်ရေးအရ အသိအမှတ်ပြုမှုကို ထိုင်ဝမ်မှ တရုတ်သို့ ပြောင်းလဲ အသိ အမှတ်ပြုခဲ့ပြီး ထိုင်ဝမ်လွတ်လပ်ရေးကို ထောက်ခံကြောင်း တရားဝင်ကြေညာခဲ့ခြင်း မရှိပေ။

မည်သို့ပင်ဆိုစေ အမေရိကန်သည် ထိုင်ဝမ်နှင့် တရားဝင် မဟုတ်သည့် ဆက်ဆံရေးကို ထိန်းသိမ်းထားကာ ထိုင်ဝမ်ကို ထောက်ခံမှု အရှိဆုံးနှင့် လက်နက်ထောက်ပံ့မှု အများဆုံးနိုင်ငံဖြစ်သည်။

တရုတ်ကမူ ထိုင်ဝမ်ကို ၎င်း၏ နယ်နိမိတ်တစ်ခုအဖြစ် ကြေညာထားပြီး လိုအပ်လာမည်ဆိုပါက အင်အားသုံး ထိန်းချုပ်သွားမည်ဟု ပြောကြားခဲ့သည်။ 

ထို့ပြင် လိုင်သည် ထိုင်ဝမ်လွတ်လပ်ရေး ကြေညာမည့်အရေးကို တရုတ်က စိုးရိမ်နေသော်လည်း လိုင်ကမူ သူသည် ထိုကဲ့သို့ လုပ်ဆောင်မည် မဟုတ်ကြောင်း ပြောကြားခဲ့သည်။

ထိုင်ဝမ် တိုက်ခိုက်ခံရမည်ဆိုပါက အမေရိကန်သည် ထိုင်ဝမ်ကို ကာကွယ်ပေးသွားမည်ဟု မကြာသေးမီက ဘိုင်ဒန်၏ ပြောကြားမှုများသည် တရုတ်ကို ဒေါသထွက်စေခဲ့သည်။

သို့သော် ဇန်နဝါရီ ၁၃ ရက်က ထိုင်ဝမ်လွတ်လပ်ရေးကို မထောက်ခံကြောင်း ပြောကြားခဲ့သည့်် ဘိုင်ဒန်၏ မှတ်ချက်စကားသည် တရုတ်ကို ချွေးသိပ်သည့် သဘောမျိုး ဖြစ်နိုင်သည်ဟု ကျွမ်းကျင်သူများက ပြောကြား ခဲ့သည်။

Source: ရိုက်တာ

CNI International News

ဝါရှင်တန်၊ ဇန်နဝါရီ ၁၅

ယီမင်နိုင်ငံတွင် အမေရိကန်၏ ဒုံးကျည်တိုက်ခိုက်မှုများကို ပြင်းထန်စွာနှင့် ထိထိရောက်ရောက် တုန့်ပြန်သွား မည်ဖြစ်ကြောင်း ဟူရ်သီသူပုန်အဖွဲ့က သတိပေးခဲ့သည်ဟု ရိုက်တာမှ ဖော်ပြခဲ့သည်။

အမေရိကန်သည် ကုန်တင်သင်္ဘောများကို အီရန်နှင့် အဆက်အသွယ်ရှိသည့် ဟူရ်သီသူပုန်၏ တိုက်ခိုက်မှုများမှ ကာကွယ်ပေးမည်ဟု သန္နိဋ္ဌာန်ချမှတ်ထားချိန်တွင် ထိုတိုက်ခိုက်မှုများကြောင့် ဒေသတွင်း တင်းမာမှုများ မြင့်တက်ခဲ့သည်။

ဟူရ်သီသူပုန်များ၏ တိုက်ခိုက်မှုများနှင့် အမေရိကန်၏ တိုက်ခိုက်မှုများကြောင့် အစ္စရေးနှင့် ဟားမာ့စ်အကြား စစ်ပွဲဖြစ်ပွားခဲ့ပြီးနောက် ပဋိပက္ခသည် အရှေ့အလယ်ပိုင်းဒေသသို့ ပျံ့နှံ့သွားနိုင်ခြေရှိသည့် စိုးရိမ်မှုများကို မြင့်တက်စေခဲ့သည်။ 

 အမေရိကန်တိုက်လေယာဉ်ကိုတွေ့ရစဉ်

လက်ဘနွန်၊ ဆီးရီးယားနှင့် အီရတ်နိုင်ငံများရှိ အီရန်၏ မဟာမိတ် လက်နက်ကိုင်အဖွဲ့များကလည်း အစ္စရေးနှင့် ဒေသတွင်း အမေရိကန်တပ်ဖွဲ့များကို တိုက်ခိုက်မှုများ ပြုလုပ်လျက်ရှိသည်။

အမေရိကန်သမ္မတ ဂျိုးဘိုင်ဒန် (Joe Biden) ကလည်း ဟူရ်သီသူပုန်များ၏ တိုက်ခိုက်မှုများနှင့် ပတ်သက်ပြီး အမေရိကန်က အီရန်ကို ပုဂ္ဂိုလ်ရေးအရ အမှာစကား ပြောကြားခဲ့သည်ဟု ပြောသည်။ 

"ကျနော်တို့ဘက်က ကောင်းမွန်စွာ ပြင်ဆင်ထားတယ်ဆိုတဲ့ အကြောင်းကို အီရန်နိုင်ငံဆီ သီးသန့် အမှာစကား ပါးခဲ့ပါတယ်"ဟု ဘိုင်ဒန်က သတင်းထောက်များကို ပြောကြားခဲ့သော်လည်း အသေးစိတ် အချက်အလက်များကို ထုတ်ပြန်ခဲ့ခြင်း မရှိပေ။

ဇန်နဝါရီ ၁၂ ရက်က အမေရိကန်၏ ဒုံးကျည်တိုက်ခိုက်မှုသည် ဟူရ်သီသူပုန်များ၏ ရေဒါစခန်းကို ထိမှန်ခဲ့သည်။ 

အမေရိကန်နှင့် ဗြိတိန်သည် ဇန်နဝါရီ ၁၁ ရက်ကလည်း ယီမင်နိုင်ငံအတွင်းရှိ ဟူရ်သီသူပုန်များ၏ စခန်းများကို လေကြောင်းတိုက်ခိုက်မှုများ ပြုလုပ်ခဲ့သည်။

ဟူရ်သီသူပုန်အဖွဲ့၀င်ကို တွေ့ရစဉ်

"အခုနောက်ဆုံးဖြစ်ပွားခဲ့တဲ့ တိုက်ခိုက်မှုကို ပြင်းထန်ပြီး ထိရောက်မှုရှိစွာ ပြန်လည်တုန့်ပြန်သွားမှာပါ" ဟု ဟူရ်သီအဖွဲ့၏ ပြောရေးဆိုခွင့်ရှိသူ နက်စ်ရူလ်ဒင်း အမ်မာ (Nasrudeen Amer) က အယ်လ်ဂျာဇီးယား သတင်းဌာနကို ပြောကြားခဲ့သည်။

ထိုတိုက်ခိုက်မှုကြောင့် ထိခိုက်ဒဏ်ရာရခြင်းနှင့် ပစ္စည်းများ ပျက်စီးခြင်း မရှိခဲ့ကြောင်း ၎င်းက ထပ်လောင်း ပြောကြားခဲ့သည်။ 

ထို့ပြင် ဆန်နာ (Sanaa) မြို့တော်ရှိ စစ်စခန်း တိုက်ခိုက်ခံရမှုသည် ပင်လယ်နီ (Red sea) နှင့် အာရေဗျ ပင်လယ် (Arabian Sea) အတွင်းရှိ အစ္စရေးနှင့် ဆက်နွှယ်မှုရှိသည့် သင်္ဘောများကို တိုက်ခိုက်မည့် ဟူရ်သီသူပုန်၏ လုပ်နိုင် စွမ်းများအပေါ် ကြီးကြီးမားမား သက်ရောက်မှု မရှိကြောင်းလည်း ဟူရ်သီသူပုန်၏ နောက်ထပ် ပြောရေးဆိုခွင့်ရှိသူ မိုဟာမက် အဗ္ဗဒူဆာလမ် (Mohammed Abdulsalam) က ပြောကြားခဲ့သည်။ 

Source: ရိုက်တာ

CNI International News

သည်ဟိဂ်၊ ဇန်နဝါရီ ၁၃

အစ္စရေးသည် ဂါဇာကမ်းမြောင်ဒေသတွင် လူမျိုးသုဉ်း သတ်ဖြတ်မှုများ ပြုလုပ်နေကြောင်း နိုင်ငံတကာခုံရုံး (ICJ) တွင် တောင်အာဖရိကနိုင်ငံ၏ စွပ်စွဲမှုများကို အစ္စရေးက ငြင်းပယ်ခဲ့ပြီး ထိုစွပ်စွဲမှုများသည် မှန်ကန်မှုမရှိဘဲ လိုရာ ဆွဲ ပြောဆိုမှုများဖြစ်သည်ဟု ပြောကြားခဲ့ကြောင်း ရိုက်တာမှ ဖော်ပြခဲ့သည်။

ထို့ပြင် ဂါဇာကမ်းမြောင်ဒေသတွင် အစ္စရေး၏ ထိုးစစ်ကို ရပ်တန့်ရန် တောင်အာဖရိကနိုင်ငံ၏ တောင်းဆိုချက် များကို ပယ်ချရန် အစ္စရေးက ICJ တရားသူကြီးများအား တိုက်တွန်းခဲ့ပြီး ဂါဇာထိုးစစ်ကို ရပ်တန့်မည်ဆိုပါက အစ္စရေးသည် အကာအကွယ်မဲ့ ဖြစ်သွားနိုင်ကြောင်း ပြောကြားခဲ့သည်။

၂၀၂၃ ခုနှစ်၊ ဒီဇင်ဘာလအတွင်းက တောင်အာဖရိကသည် ICJ တွင် အစ္စရေးကို လူမျိုးသုဉ်း သတ်ဖြတ်မှု စွဲချက် တင်ခဲ့ပြီး ဇန်နဝါရီ ၁၁ ရက်၌ ဂါဇာမှာ အစ္စရေး၏ စစ်ဆင်ရေးကို ရပ်တန့်ပေးရန် ICJ တရားသူကြီးများကို တိုက်တွန်းခဲ့သည်။

အစ္စရေး၏ လေကြောင်းနှင့် မြေပြင်စစ်ဆင်ရေးများကြောင့် ဂါဇာတွင် လူပေါင်း ၂၃,၀၀၀ ကျော် သေဆုံးခဲ့ကြောင်း ဂါဇာကျန်းမာရေးဝန်ကြီးဌာနက ထုတ်ပြန်ခဲ့သည်။ ထိုအခြေအနေသည် ဂါဇာဒေသခံများကို ပျက်သုဉ်းစေမည့် အလားအလာ တစ်ခုဖြစ်ကြောင်း တောင်အာဖရိကက ပြောကြားခဲ့သည်။

အစ္စရေးနိုင်ငံခြားရေးဝန်ကြီးဌာန၏ တရားရေးအကြံပေး တယ်လ် ဘက်ကာ (Tal Becker) ကမူ ဂါဇာပဋိပက္ခနှင့် ပတ်သက်ပြီး တောင်အာဖရိက၏ တင်ပြမှုသည် ဟုတ်မှန်ခြင်းမရှိဘဲ လိုရာဆွဲပြီး ပြောဆိုမှုများဖြစ်သည်ဟု ICJ ကို လျှောက်လှဲခဲ့သည်။

"တကယ်လို့ လူမျိုးသုဉ်း သတ်ဖြတ်မှုတွေ ရှိခဲ့မယ်ဆိုရင်တောင်မှ သူတို့ (ဟားမာ့စ်) က အရင်ဆုံး အစ္စရေးကို ထိုးဖောက်ဝင်ရောက် တိုက်ခိုက်ခဲ့တာ ဖြစ်တယ်။ ဟားမာ့စ်တွေကသာ အစ္စရေးကို လူမျိုးသုဉ်း သတ်ဖြတ်ဖို့ ကြိုးပမ်းခဲ့တာ ဖြစ်ပါတယ်" ဟု ဘက်ကာက ပြောကြားခဲ့သည်။

အောက်တိုဘာ ၇ ရက်က ဟားမာ့စ်အဖွဲ့သည် အစ္စရေးနိုင်ငံတောင်ပိုင်းကို ဝင်ရောက်တိုက်ခိုက်ခဲ့ပြီး လူပေါင်း ၁၂၀၀ ကျော်ကို သတ်ဖြတ်ခဲ့ကာ လူပေါင်း ၂၄၀ ခန့်ကို ဓားစာခံအဖြစ် ဖမ်းဆီးခေါ်ဆောင်သွားခဲ့ပြီးနောက် အစ္စရေးက ဂါဇာဒေသကို ပြင်းထန်စွာ တိုက်ခိုက်ခဲ့ကာ စစ်ပွဲဖြစ်ပွားခဲ့ခြင်းဖြစ်သည်။

"နှစ်ဖက်စလုံးက အရပ်သားတွေ သေကြေပျက်စီးတဲ့ အခြေအနေအထိ ရောက်ရှိစေတာဟာ ဟားမာ့စ်အဖွဲ့ရဲ့ မဟာဗျူဟာ ဖြစ်ပါတယ်"ဟု ဘက်ကာက ပြောကြားခဲ့ပြီး အစ္စရေးအနေဖြင့် မိမိကိုယ်ကိုယ် ခုခံကာကွယ်ပိုင်ခွင့် ရှိကြောင်း ICJ တွင် လျှောက်လှဲခဲ့သည်။

Source: ရိုက်တာ

CNI International News

မော်စကို၊ ဇန်နဝါရီ ၁၃

အမေရိကန်သည် ယီမင်နိုင်ငံ၏ နယ်မြေများကို တိုက်ခိုက်ခြင်းအားဖြင့်် နိုင်ငံတကာဥပဒေများကို မထီမဲ့မြင် လုပ်နေကြောင်းနှင့် ဒေသတွင်း တင်းမာမှုများကို မြင့်တက်စေရန် ရည်ရွယ်ထားကြောင်း ရုရှားနိုင်ငံခြားရေး ဝန်ကြီးဌာန၏ ပြောရေးဆိုခွင့်ရှိသူ မာရီယာ ဇာခါရိုဗာ (Maria Zakharova) က ပြောကြားခဲ့ကြောင်း တာ့စ် သတင်းဌာနမှ ဖော်ပြခဲ့သည်။

ယီမင်အပေါ် အမေရိကန်၏ တိုက်ခိုက်မှုသည် အနောက်နိုင်ငံများက ကုလသမဂ္ဂလုံခြုံရေးကောင်စီ၏ ပြဋ္ဌာန်းချက် များကို မည်ကဲ့သို့ ပုံဖျက်နေသည်ဆိုခြင်းအား ပြသသည့် နောက်ထပ် ဖြစ်စဉ်တစ်ခုဖြစ်ပြီး ဒေသတွင်း တင်းမာမှု များ မြင့်တက်စေရန် ရည်ရွယ်ချက်ဖြင့် နိုင်ငံတကာဥပဒေများကို မထီမဲ့မြင်ပြုနေခြင်းဖြစ်ကြောင်း ဇာခါရိုဗာက ပြောကြားခဲ့သည်။

ဇန်နဝါရီ ၁၁ ရက် ညပိုင်းက အမေရိကန်နှင့် ဗြိတိန်တပ်ဖွဲ့များသည် ယီမင်နိုင်ငံ၏ မြို့များအတွင်းရှိ ဟူရ်သီသူပုန် များ၏ စခန်းများကို လေကြောင်းတိုက်ခိုက်ခဲ့ခြင်း ဖြစ်သည်။

ပင်လယ်နီတွင် ကုန်တင်သင်္ဘောများကို ဟူရ်သီသူပုန်များ၏ မကြုံစဖူး တိုက်ခိုက်မှုများကို တုန့်ပြန်သည့်အနေဖြင့် ထိုကဲ့သို့ စစ်ရေးအရ အရေးယူရန် အမိန့်ပေးခဲ့ခြင်းဖြစ်ကြောင်း အမေရိကန်သမ္မတ ဂျိုးဘိုင်ဒန် (Joe Biden) က ပြောကြားခဲ့သည်။

ထိုလေကြောင်း တိုက်ခိုက်မှုများသည် ဟူရ်သီသူပုန်အဖွဲ့၏ အဆောက်အအုံ ၁၆ ခုရှိ ပစ်မှတ်ပေါင်း ၆၀ ကျော်ကို ထိမှန်ခဲ့ကြောင်း အမေရိကန် ကာကွယ်ရေးဝန်ကြီးဌာန၏ ဗဟိုစစ်ဌာနချုပ် (CENTCOM) က ထုတ်ပြန်ခဲ့သည်။

ဂါဇာကမ်းမြောင်ဒေသတွင် ပါလက်စတိုင်း-အစ္စရေး ပဋိပက္ခဖြစ်ပွားခဲ့ပြီးနောက် ဟူရ်သီသူပုန်များသည် အစ္စရေး နယ်မြေများကို တိုက်ခိုက်မှုများ ပြုလုပ်ပြီး ပင်လယ်နီအတွင်းရှိ အစ္စရေးနှင့်ဆက်နွှယ်မှုရှိသည့် သင်္ဘောများကို တိုက်ခိုက်မှုများ ပြုလုပ်ခဲ့သည်။

အစ္စရေးအနေဖြင့် ဂါဇာကမ်းမြောင်ဒေသတွင် ဟားမာ့စ်အဖွဲ့ကို တိုက်ခိုက်နေသည့် စစ်ဆင်ရေးကို မရပ်တန့်မချင်း ထိုတိုက်ခိုက်မှုများအား လုပ်ဆောင်မည်ဟုလည်း ဟူရ်သီသူပုန်အဖွဲ့က ပြောကြားခဲ့သည်။

နိုဝင်ဘာလလယ်ပိုင်းကတည်းက ဟူရ်သီသူပုန်အဖွဲ့သည် ပင်လယ်နီတွင် အရပ်ဖက် သင်္ဘောများနှင့် ကုန်တင် သင်္ဘော အစင်း ၂၀ ကျော်ကို တိုက်ခိုက်ခဲ့သည်ဟု CENTCOM က  ခန့်မှန်းထုတ်ပြန်ခဲ့သည်။

Source: တာ့စ်

CNI International News

ဘဲလ်ဂရိတ်၊ ဇန်နဝါရီ ၁၃

အမေရိကန်သည် Javelin တင့်ကားဖျက် ဒုံးကျည်များဝယ်ယူလိုသည့် ကိုဆိုဗို၏ တောင်းဆိုချက်ကို လက်ခံရရှိခဲ့ ကြောင်း ဆားဘီးယားနိုင်ငံဆိုင်ရာ အမေရိကန်သံအမတ်က ဆားဘီးယားသမ္မတ အလက်န္ဒား ဗူစစ် (Aleksandar Vucic)ကို ဇန်နဝါရီ ၁၁ ရက်တွင် ပြောကြားခဲ့သည်ဟု အေပီမှ ဖော်ပြခဲ့သည်။

ထိုအခြေအနေနှင့် ပတ်သက်ပြီး ဆားဘီးယားနိုင်ငံက အလွန်စိတ်ပျက်မိကြောင်း ဗူစစ်က ပြောကြားခဲ့သည်။

ကိုဆိုဗိုကို ဒေါ်လာ ၇၅ သန်းတန်ဖိုးရှိ ဒုံးကျည် ၂၄၆ စင်းနှင့် ဆက်စပ်ပစ္စည်းများ ရောင်းချမည့် အလားအလားကို ဇန်နဝါရီ ၁၁ ရက်တွင် အမေရိကန်နိုင်ငံခြားရေးဝန်ကြီးဌာနက အတည်ပြုကြောင်း ထုတ်ပြန်ခဲ့သည်။

"အခု လက်နက်ရောင်းချမယ့် အဆိုပြုချက်ဟာ ဥရောပမှာ နိုင်ငံရေးနဲ့ စီးပွားရေး တည်ငြိမ်ရေးအတွက် အရေး ကြီးတဲ့ အင်အားစုတစ်ခုဖြစ်တဲ့ ဥရောပမိတ်ဖက် (ကိုဆိုဗို)ရဲ့ လုံခြုံရေးကို မြှင့်တင်ပေးခြင်းအားဖြင့် အမေရိကန်ရဲ့ အမျိုးသား လုံခြုံရေးနဲ့ နိုင်ငံခြားရေးမူဝါဒတွေကို အထောက်အကူ ဖြစ်စေပါလိမ့်မယ်"ဟု အမေရိကန်နိုင်ငံခြား ရေးဝန်ကြီးဌာန၏ နိုင်ငံရေး-စစ်ရေး ဗျူရိုက ပြောကြားခဲ့သည်။

ဆားဘီးယားနိုင်ငံဆိုင်ရာ အမေရိကန်သံအမတ် ခရစ္စတိုဖာဟေးကလည်း အမေရိကန်နိုင်ငံခြားရေးဝန်ကြီးဌာန သည် ကိုဆိုဗို၏ လက်နက်ဝယ်ယူရေး အဆိုပြုချက်ကို လွှတ်တော်သို့ တင်သွင်းလိမ့်မည်ဟု ဗူစစ်ကို ပြောကြားခဲ့ ကြောင်း ဆားဘီးယားသမ္မတရုံးက ထုတ်ပြန်ခဲ့သည်။

ကိုဆိုဗိုသည် ယခင်က ဆားဘီးယားနိုင်ငံ၏ ပြည်နယ်တစ်ခုဖြစ်ခဲ့ပြီး ၂၀၀၈ ခုနှစ်တွင် လွတ်လပ်ရေး ကြေညာခဲ့ သည်။ အမေရိကန်နှင့် အနောက်နိုင်ငံများက ကိုဆိုဗိုကို နိုင်ငံအဖြစ် အသိအမှတ် ပြုထားသော်လည်း ဆားဘီး ယား၊ ရုရှားနှင့် တရုတ်နိုင်ငံတို့ကမူ ကိုဆိုဗိုကို နိုင်ငံအဖြစ် အသိအမှတ်ပြုခဲ့ခြင်းမရှိပေ။

ဆားဘီးယားသမ္မတ ဗူစစ်ကမူ ထိုလက်နက်ရောင်းဝယ်မှု အလားအလာသည် မိမိတို့အတွက် ဒေသတွင်း ငြိမ်းချမ်းရေး မပျက်စီးစေရန် အလွန်အရေးကြီးသည့် ကိစ္စတစ်ခုဖြစ်ကြောင်းနှင့် ဆားဘီးယားသည် ဘော်လ်ကန် ဒေသတွင် တည်ငြိမ်ရေးကို လုပ်ဆောင်နေပြီး တာဝန်သိသိဖြင့် ဆက်လက် လုပ်ဆောင်သွားမည်ဖြစ်ကြောင်း ပြောကြားခဲ့သည်။

ဒေသတွင်း တင်းမာမှုများ မြင့်တက်နေချိန်တွင် ကိုဆိုဗိုက အမေရိကန်ထံမှ လက်နက်စနစ်များ ဝယ်ယူရန် အဆိုပြုခဲ့ခြင်း ဖြစ်သည်။

မကြာသေးမီလများအတွင်း ဆားဘီးယားသည် နေတိုးဦးဆောင်သည့် ငြိမ်းချမ်းရေး ထိန်းသိမ်းရေး တပ်ဖွဲ့ဝင်များ ၏ စောင့်ကြပ်မှုဖြင့် ကိုဆိုဗိုနယ်စပ်ကို စစ်သားများ စေလွှတ်ခဲ့သည်။

ဆားဘီးယားသည် ဘော်လ်ကန်ဒေသတွင် အင်အားအကြီးဆုံး စစ်တပ်များထဲတွင် ပါဝင်နေကြောင်း ဗူစစ်က ယခု လအတွင်း ပြောကြားခဲ့ပြီး ရုရှားနိုင်ငံထံမှ တင့်ကားများ အများအပြား ရရှိထားကြောင်း ထောက်ပြပြောဆိုခဲ့သည်။

ထို့ပြင် ဆားဘီးယားသည် လေယာဉ်ပစ် လက်နက်များ၊ တိုက်လေယာဉ်များနှင့် ဒရုန်းများ အပါအဝင် လက်နက် အများအပြားကို တရုတ်နှင့် အခြားနိုင်ငံများထံမှ ဝယ်ယူသွားမည်ဟုလည်း ဗူစစ်က ကတိပြုခဲ့သည်။

Source: အေပီ