CNI International News
ဘန်ကောက်၊ ဇန်နဝါရီ ၂၁
ထိုင်းနိုင်ငံ၊ ဘန်ကောက်မြို့တော်ရှိ တရုတ်တန်းတွင် နှစ်နိုင်ငံယဉ်ကျေးမှုကို မြတ်နိုးရန် ရေးသားထားသည့် စာတန်းတစ်ခုနှင့်အတူ တရုတ်နှစ်သစ်ကူးအတွက် အလှဆင်ထားသော မီးပုံးများဖြင့် လှပနေကြောင်း The Nation မှ ဖော်ပြခဲ့သည်။
ထိုင်းနိုင်ငံသည် လာမည့် သီတင်းနှစ်ပတ်အတွင်း တရုတ်နှစ်သစ်ကူး ကာလတွင် ခရီးသွားများ အများအပြား ဝင်ရောက်မည့် အခြေအနေအတွက် ကြိုတင်ပြင်ဆင်ထားသည်။
ထိုင်းနိုင်ငံ၏ ခရီးသွားရာသီတွင် ခရီးသွား အများဆုံး ဝင်ရောက်သည့် တရုတ်နှစ်ကူးကာလကို အလေးထားသည့် အနေဖြင့် Yaowarat လမ်းတွင် ရွှေရောင်နှင့် အနီရောင်မီးပုံးများကို ဇန်နဝါရီ ၁၉ ရက်မှစတင် ထွန်းညှိခဲ့ကြသည်။
ယခုနှစ် ဇန်နဝါရီ ၂၄ ရက်မှ ဖေဖော်ဝါရီ ၂ ရက်အတွင်း ထိုင်းနိုင်ငံသို့ ခရီးသွား ၁ ဒသမ ၃၅ သန်း ဝင်ရောက် လာလိမ့်မည်ဟု ကျွမ်းကျင်သူများက ခန့်မှန်းထားသည်။
ထိုင်းခရီးသွားလာရေး အာဏာပိုင်အဖွဲ့ (TAT) အုပ်ချုပ်ရေးမှူး သာပါနီ ကတ်ဖိုင်ဘူလ် (Thapanee Kiatphaibool) နှင့် တရုတ်သံရုံး၏ ထိပ်သီးအရာရှိ ဝူကျီဝူ (Wu Zhiwu)တို့သည် ထိုင်းနှင့် တရုတ်အကြား သံတမန်ဆက်ဆံရေး နှစ် ၅၀ ပြည့် အထိန်းအမှတ်အဖြစ် ဇန်နဝါရီ ၁၉ ရက်က မီးထွန်းပွဲ အခမ်းအနားကို ကြီးမှူးကျင်းပခဲ့သည်။
ထိုမီးပုံးများကို ဇန်နဝါရီ ၁၉ ရက်မှ ဖေဖော်ဝါရီ ၉ ရက်အထိ နေ့စဉ် ညနေ ၆ နာရီမှ ည ၁၂ နာရီအထိ ထွန်းထားမည်ဖြစ်သည်။
ဇန်နဝါရီ ၂၉ ရက်တွင်လည်း ထိုင်းတော်ဝင် မင်းသမီး မဟာချာကရီ သီရိဒုံ (Maha Chakri Sirindhorn) က Yaowarat လမ်းမပေါ်တွင် တရုတ်နှစ်သစ်ကူး ပျော်ပွဲရွှင်ပွဲများကို ကြီးမှူးကျင်းပသွားမည်ဖြစ်သည်။
တရုတ်နှစ်သစ်ကူး ပွဲတော်အတွင်း ထိုင်းနိုင်ငံ၏ ခရီးသွားကဏ္ဍတွင် ဝင်ငွေ ဘတ် ၄၀ ဒသမ ၆၆ ဘီလျံ ရှိလာနိုင် ပြီး ထိုပမာဏသည် ယခင်နှစ်ကထက် ၁၀ ရာခိုင်နှုန်း ပိုမိုများပြားနိုင်သည်ဟု TAT က ခန့်မှန်းထားသည်။
ထို့ပြင် ဟောင်ကောင်၊ တောင်ကိုရီးယား၊ ထိုင်း၊ မလေးရှား၊ ဗီယက်နမ်၊ စင်္ကာပူနှင့် အင်ဒိုနီးရှားနိုင်ငံတို့မှ ခရီးသွား များသည်လည်း ထိုင်းနိုင်ငံတွင် ပြုလုပ်မည့် တရုတ်နှစ်သစ်ကူး ပွဲတော်ကာလကို လာရောက်လိမ့်မည်ဟု ကျွမ်းကျင်သူများက ခန့်မှန်းထားသည်။
Source: The Nation
