CNI International News

ကာရာကက်စ်၊ သြဂုတ် ၁၉

ဗင်နီဇွဲလားနိုင်ငံ၊ ကာရာကက်စ် (CARACAS) မြို့တော်တွင် သြဂုတ် ၁၇ ရက်က အတိုက်အခံများက သမ္မတ ရွေးကောက်ပွဲ ရလဒ်များကို ထုတ်ပြန်ပေးရန် ဆန္ဒပြတောင်းဆိုခဲ့ကြပြီး ရွေးကောက်ပွဲ၌ အနိုင်ရခဲ့သည့် သမ္မတ နီကိုလပ်စ် မာဒူရို (Nicolas Maduro) ကို ထောက်ခံသူများကလည်း မာဒူရိုအား ထောက်ခံကြောင်း ဆန္ဒပြခဲ့ကြ သည်ဟု Sputnik သတင်းအေဂျင်စီမှ ဖော်ပြခဲ့သည်။

အတိုက်အခံများဘက်မှ ဆန္ဒပြသူများသည် ကာရာကက်စ်မြို့တော်ရှိ အဓိကလမ်းမတစ်ခုပေါ်တွင် စုရုံးခဲ့ကြသည်။

ထိုဆန္ဒပြမှုကို အတိုက်အခံခေါင်းဆောင် မာရီယာ ကော်ရီနာ မာချာဒို (Maria Corina Machado) လည်း ပူးပေါင်း ပါဝင်ခဲ့သည်။

သို့သော် ရွေးကောက်ပွဲ ဝင်ရောက်ယှဉ်ပြိုင်ခဲ့သည့် အတိုက်အခံများ၏ ကိုယ်စားလှယ်လောင်းဖြစ်သူ အက်ဒ်မန်ဒို ဂွန်ဇာလက်ဇ် (Edmundo Gonzalez) သည် ဆန္ဒပြမှုတွင် ပါဝင်ခဲ့ခြင်းမရှိပေ။

 အတိုက်အခံခေါင်းဆောင် မာရီယာ ကော်ရီနာ မာချာဒိုကို တွေ့ရစဉ်

မာဒူရိုကို ထောက်ခံသူများကလည်း တန်ပြန်သပိတ်ပုံစံဖြင့် သီးခြားတစ်နေရာတွင် စုရုံးဆန္ဒပြခဲ့ကြသည်။

"ဇူလိုင် ၂၈ ရွေးကောက်ပွဲမှာ သမ္မတမာဒူရိုရဲ့ အနိုင်ရမှုနဲ့ မာဒူရိုကို ထောက်ခံကြောင်း ထပ်လောင်း အတည်ပြုတဲ့ အနေနဲ့ ကျနော်တို့ လမ်းပေါ်ထွက်လာခဲ့ကြတာပါ " ဟု အသက် ၂၈ နှစ်အရွယ် ကာရာကက်စ်မြို့ခံတစ်ဦးက ပြောကြားခဲ့သည်။

ဇူလိုင် ၂၈ ရက်က ပြုလုပ်ခဲ့သည့် ဗင်နီဇွဲလားသမ္မတရွေးကောက်ပွဲအပြီး တစ်ရက်အကြာတွင် အမျိုးသား ရွေးကောက်ပွဲကောင်စီက သမ္မတမာဒူရိုသည် မဲရာခိုင်နှုန်း ၅၁ ရာခိုင်နှုန်းရရှိခဲ့ကာ ၂၀၂၅-၂၀၃၁ သက်တမ်း အတွက် ထပ်မံရွေးကောက်ခံခဲ့ရကြောင်း ကြေညာခဲ့သည်။

ထိုကြေညာချက် ထွက်ပေါ်ခဲ့သည့် ဇူလိုင် ၂၉ ရက်မှာပင် ဗင်နီဇွဲလားတွင် ဆန္ဒပြမှုများ ဖြစ်ပွားခဲ့ပြီး ကာရာကက်စ် မြို့တော်၌ ဆန္ဒပြသူများနှင့် ရဲတပ်ဖွဲ့အကြား ခိုက်ရန်ဖြစ်ပွားခဲ့သည်။ 

ထို့နောက် ဆန္ဒပြသူများက လုံခြုံရေးတပ်ဖွဲ့ဝင်များကို ကျောက်ခဲများ၊ ဓာတ်ဆီပုလင်းဗုံးများဖြင့် ပစ်ပေါက်ခဲ့ ကြသည်။

ရုရှားအစိုးရ ပြောရေးဆိုခွင့်ရှိသူ ဒီမီထရီပက်စကော့ဗ်ကိုတွေ့ရစဉ်

အစိုးရရှေ့နေချုပ်ရုံး၏ ထုတ်ပြန်ချက်အရ ဆန္ဒပြသူများ၏ တိုက်ခိုက်မှုကြောင့် လုံခြုံရေးအရာရှိ ၇၇ ဦး ဒဏ်ရာ ရရှိခဲ့ပြီး လူပေါင်း ၁၀၆၂ ဦးကို အကြမ်းဖက်မှု၊ အမုန်းတရား ပျံ့ပွားစေရန် သွေးထိုးလှုံ့ဆော်မှု၊ နိုင်ငံပိုင် အဆောက်အအုံများကို တိုက်ခိုက်ဖျက်ဆီးမှုများဖြင့် ဖမ်းဆီးထားကြောင်း သိရသည်။

ဗင်နီဇွဲလားအစိုးရကမူ ထိုရွေးကောက်ပွဲကို နိုင်ငံအချို့က ဝင်ရောက်စွက်ဖက်ခဲ့ကြောင်း ကြေညာခဲ့သည်။ 

ရုရှားနိုင်ငံကမူ ဗင်နီဇွဲလား အတိုက်အခံများ အနေဖြင့် ရွေးကောက်ပွဲတွင် ရှုံးနိမ့်မှုကို ဝန်ခံရန် တိုက်တွန်းခဲ့ပြီး ဗင်နီဇွဲလားနိုင်ငံ၏ တည်ငြိမ်ရေးကို ဖျက်ဆီးရန် ကြိုးပမ်းနေသည့် တတိယနိုင်ငံများကို ရုရှားအစိုးရ ပြောရေးဆိုခွင့်ရှိသူ ဒီမီထရီပက်စကော့ဗ် (Dmitry Peskov) က သတိပေးခဲ့သည်။

Source: Sputnik

CNI International News

ဘန်ကောက်၊ သြဂုတ် ၁၉

ထိုင်းဘုရင်သည် ဖြူးထိုင်းပါတီခေါင်းဆောင် ပေတုန်တန်ရှင်နာဝပ်ကို ဝန်ကြီးချုပ်အဖြစ် သြဂုတ် ၁၈ ရက်တွင် အတည်ပြု ထောက်ခံပေးခဲ့သည်ဟု Thai PBS World မှ ဖော်ပြခဲ့သည်။

ထို့ကြောင့် ပေတုန်တန်သည် ထိုင်းနိုင်ငံ၏ ၃၁ ဦးမြောက်ဝန်ကြီးချုပ်အဖြစ် တရားဝင်ဖြစ်လာခဲ့သည်။

ဘန်ကောက်မြို့တော်ရှိ ဖြူးထိုင်းပါတီဌာန၏ ရုံးခန်းတည်ရှိသည့် Voice Space အဆောက်အအုံတွင် ပြုလုပ်သော အခမ်းအနား၌ အောက်လွှတ်တော် အတွင်းရေးမှူးချုပ် အာပတ် ဆူခါနွတ် (Arpath Sukhanunth) က ထိုင်းဘုရင် ၏ တော်ဝင်အတည်ပြု ထောက်ခံစာကို ဖတ်ကြားခဲ့သည်။

သြဂုတ် ၁၇ ရက်က ဘုရင်၏ တော်ဝင်လွတ်ငြိမ်းချမ်းသာခွင့်ဖြင့် ပြစ်ဒဏ်မှ အလုံးစုံလွတ်မြောက်သွားခဲ့သည့် ဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) နှင့် ဖြူးထိုင်းပါတီ၏ ထိပ်သီးတာဝန်ရှိသူများ၊ ဖိတ်ကြားထားသော ဧည့်သည်တော်များက ထိုအခမ်းအနားကို တက်ရောက်ခဲ့ကြသည်။

ပေတုန်တန်နဲ့ ဖခင် သက်ဆင်ကို တွေ့ရစဉ်

တော်ဝင်အတည်ပြု ခန့်အပ်လွှာကို ဖတ်ကြားပြီးနောက် ဝန်ကြီးချုပ်သစ် ဖြစ်လာသည့် ပေတုန်တန်က ဘုရင့်၏ တော်ဝင်အတည်ပြု ခန့်အပ်ခံရမှုအတွက် ဂုဏ်ယူဝမ်းမြောက်ကြောင်း၊ နိုင်ငံနှင့် ပြည်သူများ၏ အကျိုးစီးပွားများ ကို သစ္စာစောင့်သိပြီး ရိုးသားစွာဖြင့် အစွမ်းကုန် တာဝန်ထမ်းဆောင် သွားမည်ဖြစ်ကြောင်း မိန့်ခွန်းပြောကြားခဲ့ သည်။

ထို့ပြင် ကျန်ရှိနေသည့် ဝန်ကြီးချုပ်သက်တမ်း သုံးနှစ်တာ ကာလအတွင်း လွှတ်တော်အမတ်များနှင့် ပူးပေါင်း ဆောင်ရွက်သွားမည်ဖြစ်ပြီး အားလုံး၏ အတွေးအမြင်များ၊ သဘောထားများကို နားထောင်သွားမည်ဖြစ်ကြောင်း လည်း ပေတုန်တန်က ပြောကြားခဲ့သည်။

ထိုင်းပြည်သူများ အားလုံးအတွက် အခွင့်အလမ်းများနှင့် သာတူညီမျှမှုများကို ဖော်ဆောင်ရန် ကြီးမားသည့် တာဝန် ကို ဝန်ကြီးချုပ် တစ်ဦးတည်းဖြင့် လုပ်ဆောင်နိုင်မည် မဟုတ်ဘဲ ထိုင်းလူ့အဖွဲ့အစည်း၏ နယ်ပယ်အသီးသီးမှ ပူးပေါင်းဆောင်ရွက်မှုများကို ရယူလိုကြောင်း ပေတုန်တန်က မေတ္တာရပ်ခံခဲ့သည်။

ပေတုန်တန်ကို တွေ့ရစဉ်

အခမ်းအနား ပြုလုပ်သည့် Voice Space အဆောက်အအုံတွင် ပေတုန်တန်သည် ဝန်ကြီးချုပ်၏ တရားဝင် ယူနီဖောင်းဖြစ်သည့် အဖြူရောင်ယူနီဖောင်းကို ဝတ်ဆင်ထားပြီး ဖြူးထိုင်းပါတီ၏ အဓိကအရာရှိများလည်း တရားဝင် ယူနီဖောင်းများကို ဝတ်ဆင်ထားကြသည်။

ထို့နောက် ပေတုန်တန်၏ ဖခင်ဖြစ်သည့် ဝန်ကြီးချုပ်ဟောင်း သက်ဆင်နှင့် အခြားမိသားစုများလည်း အခမ်းအနား ကို တက်ရောက်လာခဲ့ပြီး သက်ဆင်က သူ့သမီးဖြစ်သူ ပေတုန်တန်အတွက် ဂုဏ်ယူမိကြောင်းနှင့် ပျော်ရွှင်ကြောင်း ပြောကြားခဲ့သည်။

ထို့ပြင် အာဏာရညွန့်ပေါင်းပါတီများမှ အဓိက တာဝန်ရှိသူများကလည်း အခမ်းအနားကို တက်ရောက်ခဲ့ကြပြီး ဝန်ကြီးချုပ်သစ် ပေတုန်တန်ကို ဆုမွန်ကောင်း တောင်းခဲ့ကြသည်။

Source: ဘန်ကောက်ပို့စ်

CNI International News

ဘေကျင်း၊ ဩဂုတ် ၁၇

အမေရိကန်နှင့် ဂျပန်အကြား လုံခြုံရေးပူးပေါင်း ဆောင်ရွက်မှုကို မြှင့်တင်ကြောင်း ကြေညာရန်အတွက် ပြီးခဲ့သည့် ဇူလိုင်လ နောက်ဆုံးသီတင်းပတ်အတွင်း ဂျပန်နိုင်ငံ တိုကျို (Tokyo) မြို့တော်တွင် အမေရိကန်နှင့် ဂျပန် နိုင်ငံခြား ရေးဝန်ကြီးများ၊ ကာကွယ်ရေးဝန်ကြီးများ တွေ့ဆုံမှုကို ဒေါသတကြီး စောင့်ကြည့်ခဲ့သည်ဟု Asia Times မှ ဖော်ပြခဲ့သည်။

ထိုတွေ့ဆုံမှုတွင် အမေရိကန်အစိုးရက ဂျပန်ရှိ ၎င်း၏ စစ်တပ်ကွပ်ကဲရေးဌာနကို ပူးတွဲတပ်ဖွဲ့ဌာနချုပ်အဖြစ် အဆင့်မြှင့်တင်သွားမည်ဖြစ်သည်။

ထိုဌာနချုပ်သည် ဂျပန်စစ်တပ်၏ အသစ်တည်ထောင်ခဲ့သည့် ပူးတွဲစစ်ဆင်ရေးဌာနနှင့် အနီးကပ်ပူးပေါင်း ဆောင်ရွက်သွားမည်ဖြစ်ကြောင်း ပြောကြားခဲ့ကာ တရုတ်ကို ဝေဖန်ထားသော ပူးတွဲ အစီရင်ခံစာကို ထုတ်ပြန်ခဲ့ သည်။

ထို့နောက် တရုတ်နိုင်ငံခြားရေးဝန်ကြီးဌာနက တရုတ်၏ ပြည်တွင်းရေးကို ဝင်ရောက် စွက်ဖက်နေမှုအား ချက်ချင်း ရပ်တန့်ရန်၊ ထိပ်တိုက်တွေ့မည့် အခြေအနေ ဖန်တီးနေမှုကို ရပ်တန့်ရန်၊ စစ်အေးတိုက်ပွဲအသစ် ဖန်တီးနေခြင်း အား ရပ်တန့်ရန် အမေရိကန်နှင့် ဂျပန်ကို တိုက်တွန်းကြောင်း ပြောကြားခဲ့သည်။

အမေရိကန်နှင့် ဂျပန်အကြား ကာကွယ်ရေး ပူးပေါင်းဆောင်ရွက်မှုသည် တရုတ်အတွက် ၎င်း၏ အာရှမဟာမိတ် ဖြစ်သည့် ဂျပန်၏ လိုအင်ဆန္ဒများကို တားဆီးနိုင်စွမ်းမရှိသော ဖြစ်စဉ်တစ်ခု ဖြစ်ခဲ့သည်။ 

တရုတ်သည် ၎င်း၏ အလိုဆန္ဒများအတိုင်း ဂျပန်က လိုက်လျောစေရန် ကြိုးပမ်းခဲ့သည်။

ပထမအချက်မှာ ဂျပန်အနေဖြင့် အခြားအစိုးရများနှင့်အတူ တရုတ်နှင့် တရုတ်၏ မူဝါဒများကို ဝေဖန်ခြင်း မရှိစေရန် တရုတ်အစိုးရက လိုလားသည်။

ဂျပန်နဲ့ တရုတ်အလံကို တွေ့ရစဉ်

ဒုတိယအချက်မှာ ဒုတိယကမ္ဘာစစ်အတွင်းက ဂျပန်၏ ကြီးမားသည့် အပြစ်များကြောင့် နိုင်ငံတကာက ဂျပန်ကို ဒေသတွင်း အရေးမပါသည့် ကဏ္ဍတွင်ထားရှိစေရန် တရုတ်က လိုလားသည်။

တတိယအချက်မှာ ဂျပန်အနေဖြင့် နယ်နိမိတ် အငြင်းပွားမှုများတွင် တရုတ်၏ ကြေညာချက်အားလုံးကို လိုက်လျောစေရန် တရုတ်က လိုလားသည်။

စတုတ္ထအချက်မှာ ဂျပန်၏ စစ်တပ်အင်အား အားနည်းစေရန်၊ အမေရိကန်နှင့် ပူးပေါင်းခြင်း မရှိစေရန်နှင့် ဒေသတွင်း တရုတ်ကို စိန်ခေါ်နိုင်စွမ်း မရှိသည့်အခြေအနေကို တရုတ်က လိုလားသည်။

နောက်ဆုံးအချက်မှာ ဂျပန်အနေဖြင့် တရုတ်ကို အဆင့်မြင့်န ည်းပညာများနှင့် ကျွမ်းကျင်ပညာရပ်များ ထောက်ပံ့ပေးရန်၊ တရုတ်၏ နည်းပညာကဏ္ဍကို ကူညီပေးစေရန် တရုတ်က လိုလားသည်။

သို့သော်လည်း ဂျပန်သည် တရုတ်၏ လိုအင်ဆန္ဒများအတိုင်း လိုက်လုပ်ခြင်းမရှိဘဲ ထိုလိုအင်ဆန္ဒများနှင့် ဆန့်ကျင်ဘက် လမ်းကြောင်းကိုသာ လျှောက်လှမ်းနေသဖြင့် တရုတ်က ဂျပန်အပေါ် ဒေါသထွက်နေခြင်း ဖြစ်သည်ဟုလည်း ကျွမ်းကျင်သူများက ပြောကြားခဲ့သည်။

Source: Asia Times

CNI International News

မွမ်ဘိုင်း၊ သြဂုတ် ၁၇

အိန္ဒိယတွင် မကြာသေးမီက အမျိုးသမီးဆရာဝန်တစ်ဦး အဓမ္မပြုကျင့်ခံရပြီး သတ်ဖြတ်ခံခဲ့ရသည့် ဖြစ်စဉ်ကို ဆန့်ကျင်သည့်အနေဖြင့် အိန္ဒိယဆရာဝန်များအသင်းက နိုင်ငံတစ်ဝန်းရှိ သန်းနှင့်ချီသော ဆရာဝန်များကို ဆန္ဒပြမှုများပြုလုပ်ရန်နှင့် မဖြစ်မနေကုသရမည့် ရောဂါများကိုသာ ကုသပေးရန် တိုက်တွန်းခဲ့သည်ဟု ရိုက်တာမှ ဖော်ပြခဲ့သည်။

အိန္ဒိယနိုင်ငံအရှေ့ပိုင်း ကိုးလ်ကတ္တား (Kolkata) မြို့ရှိ ဆေးပညာကောလိပ်တွင် အလုပ်လုပ်နေသည့် အသက် ၃၁ နှစ်အရွယ် အမျိုးသမီးတစ်ဦးသည် သွေးစွန်းနေသည့် မွေ့ယာပေါ်၌ သေဆုံးနေသည်ကို တွေ့ရှိခဲ့ပြီးနောက် သီတင်းတစ်ပတ်ကြာသည့် အချိန်အထိ ထိုအမှုနှင့်ပတ်သက်ပြီး လူထုက ဒေါသထွက်နေကြခြင်းဖြစ်သည်။

သေဆုံးခဲ့သည့် ဆရာဝန်သည် အလုပ်ချိန် ၃၆ နာရီ အဆိုင်းကို တာဝန်ကျခဲ့ပြီး နာရီ ၂၀ နီးပါးကြာ အလုပ်လုပ်ခဲ့ ပြီးနောက် ကောလိပ်၏ စာသင်ခန်းကျယ်တစ်ခုအတွင်းရှိ ကောဇောပေါ်တွင် တရေးတမော အနားယူအိပ်စက် ခဲ့ကြောင်း  R G Kar Medical College မှ ဝန်ထမ်းတစ်ဦးက ရိုက်တာသတင်းဌာနသို့ ပြောကြားခဲ့သည်။

ထိုကဲ့သို့ အမျိုးသမီးများကို ဆန့်ကျင်သည့် အကြမ်းဖက်မှုများ မြင့်တက်လာမှုအား တားဆီးရန် တင်းကြပ်သည့် ဥပဒေများ ထုတ်ပြန်ခဲ့ခြင်း မရှိသည့်အတွက် ဆရာဝန်များနှင့် အမျိုးသမီးအခွင့်အရေးအဖွဲ့များက ဦးဆောင်ပြီး ဆန္ဒပြမှုများ ပြုလုပ်ခဲ့ကြသည်။

ဆန္ဒပြသူများကိုတွေ့ရစဉ်

"ဒီအချိန်မှာ စိတ်ခံစားမှုတွေက ပြောင်းလဲသွားပါပြီ။ ဒီနိုင်ငံရဲ့ ဆရာဝန်လောကမှာ အမျိုးသမီးတွေက အများစု ဖြစ်ပါတယ်။ သူတို့အတွက် ဘေးကင်းလုံခြုံမှုရှိစေဖို့ တောင်းဆိုသွားမှာပါ" ဟု အဖွဲ့ဝင် အင်အား ၄၀၀,၀၀၀ ရှိ သည့် အိန္ဒိယဆေးပညာအသင်း (IMA)၏ ဥက္ကဋ္ဌ အာရ်ဗွီ အဆိုကန် (R V Asokan) က ပြောကြားခဲ့သည်။

သြဂုတ် ၁၇ ရက်မှစပြီး အရေးပေါ် ကုသရေးဌာနများမှလွဲ၍ ကျန်သည့် ဆေးကုသရေးဝန်ဆောင်မှုများအားလုံးကို ပိတ်ပစ်ရန် နိုင်ငံအတွင်းရှိ ဆရာဝန်များအား IMA က သြဂုတ် ၁၂ ရက် နှောင်းပိုင်းတွင် တိုက်တွန်းခဲ့သည်။

အိန္ဒိယဝန်ကြီးချုပ်မိုဒီ (Narendra Modi)၏ အာဏာရ BJP ပါတီ အပါအဝင် နိုင်ငံရေးပါတီများကလည်း ဆန္ဒပြမှုများ ပြုလုပ်မည်ဖြစ်ကြောင်း ထုတ်ပြန်ခဲ့သည်။

ဆန္ဒပြသူများကိုတွေ့ရစဉ်

ဘောလီးဝုဒ် သရုပ်ဆောင်များ၊ အခြားထင်ရှား ကျော်ကြားသူများနှင့် နိုင်ငံရေးသမားများကမူ ထိုရာဇဝတ်မှုကို ထိတ်လန့်တုန်လှုပ်ကြောင်း ပြောကြားခဲ့ပြီး ပြစ်မှုကျူးလွန်သူများကို ပြင်းထန်စွာ အပြစ်ပေးရန် တိုက်တွန်းခဲ့ သည်။

ထိုဖြစ်စဉ်နှင့်ပတ်သက်ပြီး ဒေသခံရဲအရာရှိများနှင့် ၎င်းတို့၏ မိသားစုများကို ဆေးရုံတင်ရာတွင် ကူညီဆောင်ရွက် ပေးရသည့် လစာနည်းပါးသော စေတနာ့ဝန်ထမ်းရဲတပ်ဖွဲ့ အကူတစ်ဦးကို ဖမ်းဆီး၍ တရားစွဲဆိုထားသော်လည်း ဆန္ဒပြသူများကမူ ထိုလုပ်ဆောင်မှုသည် လုံလောက်ခြင်း မရှိကြောင်း၊ ပြင်းထန်စွာ အရေးယူပေးရန် တောင်းဆို နေကြသည်။

Source: ရိုက်တာ

CNI International News

ဘန်ကောက်၊ ဩဂုတ် ၁၇

ထိုင်းလွှတ်တော်သည် ဩဂုတ် ၁၇ ရက်က ဖြူးထိုင်းပါတီခေါင်းဆောင် ပေတုန်တန် ရှင်နာဝပ် (Paetongtarn Shinawatra) ကို ထိုင်းနိုင်ငံ၏ ၃၁ ဦးမြောက် ဝန်ကြီးချုပ်အဖြစ် ရွေးကောက်တင်မြှောက်ခဲ့သဖြင့် ပေတုန်တန် သည် ၎င်း၏ဖခင် သက်ဆင်ရှင်နာဝပ် (Thaksin Shinawatra) နှင့် အဒေါ်ဖြစ်သူ (Yingluck 

Shhinawatra) တို့ ပြီးလျှင် ဝန်ကြီးချုပ်ရာထူးကို ရရှိခဲ့သည့် တတိယမြောက် ရှင်နာဝပ် မိသားစုဝင် ဖြစ်လာခဲ့သည်ဟု Thai PBS World မှ ဖော်ပြခဲ့သည်။

ပေတုန်တန်သည် ယခုသီတင်းပတ်အတွင်းက ဖွဲ့စည်းပုံအခြေခံဥပဒေဆိုင်ရာခုံရုံးက ဝန်ကြီးချုပ်ရာထူးမှ ဖယ်ရှားခဲ့သည့် ဆရီသာ သာဗီဆင် (Srettha Thavisin) နေရာတွင် အစားထိုး တာဝန်ထမ်းဆောင်ရမည် ဖြစ်သည်။

သူသည် ဝန်ကြီးချုပ်ရာထူး နေရာအတွက် အမည်စာရင်း တင်သွင်းခံရသည့် တစ်ဦးတည်းသော ကိုယ်စားလှယ် လောင်းဖြစ်ပြီး လွှတ်တော်တွင် ၎င်းအား မဲပေးရွေးချယ်ရာတွင် ထောက်ခံမဲ ၃၁၉ မဲ၊ ဆန့်ကျင်မဲ ၁၄၅ မဲရရှိခဲ့ သည်။

 ပေတုန်တန်နဲ့ သက်ဆင်ကိုတွေ့ရစဉ်

ပေတုန်တန်အနေဖြင့် ဝန်ကြီးချုပ် နေရာအတွက် ထောက်ခံမဲ ၂၄၈ မဲ ရရှိရန်လိုအပ်သဖြင့် လိုအပ်သည့် မဲအရေ အတွက်ထက် ပိုမိုရရှိခဲ့ခြင်းလည်းဖြစ်သည်။

အမည်ပြောင် အွန်အင် (Ung Ing) ဖြစ်သည့် အသက် ၃၇ နှစ်အရွယ် ပေတုန်တန်သည် ထိုင်း၏ အသက်အငယ်ဆုံး ဝန်ကြီးချုပ်ဖြစ်သလို ဒုတိယမြောက် အမျိုးသမီးဝန်ကြီးချုပ်လည်း ဖြစ်ခဲ့သည်။

ပေတုန်တန်သည် သက်ဆင်နှင့် ခွန်ယင်း ပေါ့ဂျာမန် နာ ပွန်ဘီရာ (Khunying Potjaman Na Pombejra) တို့၏ တတိယမြောက် သားသမီးဖြစ်သည်။ ပြီးခဲ့သည့်နှစ် မေလက ရွေးကောက်ပွဲ မဲဆွယ်စည်းရုံးသည့် ကာလအတွင်း ၎င်း၏ ဒုတိယမြောက်ရင်သွေးကို မွေးဖွားခဲ့သည်။

 ပေတုန်တန်နဲ့ သူ၏ ရင်သွေးကို တွေ့ရစဉ်

ပေတုန်တန်သည် ပါတီခေါင်းဆောင် တစ်ဦးသာဖြစ်ပြီး လွှတ်တော်အမတ် မဟုတ်သဖြင့် မဲခွဲဆုံးဖြတ်ချိန်တွင် လွှတ်တော်ထဲ၌ ရှိမနေခဲ့ဘဲ မဲခွဲဆုံးဖြတ်မှုကို Voice TV ရုပ်သံဌာနမှတစ်ဆင့် ကြည့်ရှုခဲ့ခြင်းဖြစ်သည်။

ဩဂုတ် ၁၅ ရက် ညပိုင်းတွင် ဖြူးထိုင်းပါတီ ဦးဆောင်သည့် ညွန့်ပေါင်းပါတီ ၉ ခုသည် ပေတုန်တန်အား ဝန်ကြီးချုပ်နေရာအတွက် အဆိုပြု တင်သွင်းခဲ့ချိန်ကတည်းက သူသည် ဝန်ကြီးချုပ်ဖြစ်ရန် သေချာသလောက် ဖြစ်ခဲ့သည်။

ညွန့်ပေါင်းပါတီ ခေါင်းဆောင်များက ပေတုန်တန်ကို ထောက်ခံကြောင်း တညီတညွတ်တည်း ပြောကြားခဲ့ကြပြီး ပေတုန်တန်နှင့် ယှဉ်ပြိုင် ရွေးကောက်ခံမည့် ကိုယ်စားလှယ်လောင်းများကို အမည်စာရင်း တင်သွင်းမည် မဟုတ် ကြောင်း အတည်ပြုခဲ့သည်။

Source: Thai PBS World

CNI International News

ဘန်ကောက်၊ ဩဂုတ် ၁၆

ရာထူးမှဖယ်ရှားခြင်းခံခဲ့ရသည့် ထိုင်းဝန်ကြီးချုပ် ဆရီသာ သာဗီဆင် (Srettha Thavisin) ၏ နေရာကို အစားထိုး ရန်အတွက် သက်ဆင်၏ သမီးဖြစ်သူ ပေတုန်တန်ကို ဝန်ကြီးချုပ်သစ်အဖြစ် ရွေးချယ်လိုက်ကြောင်း ဖြူးထိုင်းပါတီ က ကြေညာခဲ့သည်။

ပေတုန်တန်နှင့် ချိုင်ကာဆမ်တို့ နှစ်ဦးထဲမှ တစ်ဦးကို  ထိုင်းဝန်ကြီးချုပ်အသစ် ခန့်အပ်ရေးအတွက် ဖြူးထိုင်းပါတီ အတွင်း ဩဂုတ် ၁၅ ရက်က အစည်းအဝေး ပြုလုပ်ခဲ့သည်ဟု Thai PBS World မှ ဖော်ပြခဲ့သည်။

အာဏာရ ဖြူးထိုင်းပါတီမှ လွှတ်တော်အမတ်အချို့သည် ပါတီခေါင်းဆောင် ပေတုန်တန် ရှင်နာဝပ် (Paetongtarn Shinawatra) ကို ဝန်ကြီးချုပ်သစ်အဖြစ် အမည်တင်သွင်းခဲ့သည်။

ပေတုန်တန်၊ ဆရီသာ၊ ချိုင်ကာဆမ်ကို တွေ့ရစဉ်

လွှတ်တော်သည်လည်း ဆရီသာ၏ နေရာကို အစားထိုးမည့် ဝန်ကြီးချုပ်သစ်ကို ရွေးချယ်ရန် ဩဂုတ် ၁၆ ရက်တွင် အစည်းအဝေး ပြုလုပ်မည်ဖြစ်သည်။

ပေတုန်တန်ကို ဝန်ကြီးချုပ်ရာထူးနေရာ လျာထားမှုသည် ဩဂုတ် ၁၅ ရက် ညပိုင်းက သက်ဆင် (Thaksin Shinawatra)၏ နေအိမ်တွင် တွေ့ဆုံခဲ့ကြသည့် ပါတီတာဝန်ရှိသူများ၏ သဘောတူညီချက်နှင့် ကွဲလွဲနေလိမ့်မည် ဖြစ်သည်။

ပါတီတာဝန်ရှိသူများက ချိုင်ကာဆမ် နိတိသီရိ (Chaikasem Nitisiri) ကို ဝန်ကြီးချုပ် ကိုယ်စားလှယ်လောင်း အဖြစ် အဆိုပြုရန် ဆန္ဒရှိနေကြသည်။

Source: Thai PBS World

CNI International News

အက်ရှ်ဗေးလ်၊ ဩဂုတ် ၁၆

အမေရိကန်သမ္မတရွေးကောက်ပွဲဝင် ရီပတ်ဘလစ်ကန် ကိုယ်စားလှယ်လောင်း ဒေါ်နယ်ထရမ့် (Donald Trump) သည် ဩဂုတ် ၁၄ ရက်က မြောက်ကာရိုလိုင်းနား (North Carolina) ပြည်နယ်၊ အက်ရှ်ဗေးလ် (Asheville) မြို့တွင် ပြုလုပ်သည့် မဲဆွယ်စည်းရုံးပွဲ၌ ဒီမိုကရက်တစ်ကိုယ်စားလှယ်လောင်း ကာမယ်လာ ဟားရစ် (Kamala Harris) ၏ မူဝါဒများနှင့် ပုဂ္ဂိုလ်ရေးများကို ဝေဖန်ထိုးနှက်ခဲ့သည်ဟု ရိုက်တာမှ ဖော်ပြခဲ့သည်။

ထရမ့်၏ မဟာမိတ်များ၊ အလှူရှင်များနှင့် အကြံပေးများကမူ အမေရိကန်ဒုတိယသမ္မတ ဟားရစ်၏ ဉာဏ်ရည် ဉာဏ်သွေးကို ဝေဖန်တိုက်ခိုက်နေမှုအပေါ် စိုးရိမ်ကြောင်း ဖော်ပြခဲ့ကာ ထရမ့်အနေဖြင့် ဟားရစ်၏ ဒုသမ္မတအဖြစ် တာဝန်ထမ်းဆောင်နေစဉ် ကာလအတွင်း အောင်မြင်ခြင်း မရှိခဲ့သည့် မူဝါဒများကို ထောက်ပြပြီး ဝေဖန်ထိုးနှက်မှု ကိုသာ အာရုံစိုက်ရန် အကြံပြုခဲ့သည်။

ထရမ့်သည် ထိုမဲဆွယ်စည်းရုံးပွဲတွင် ဟားရစ်၏ လူမျိုးရေးနှင့် မူဝါဒများအကြောင်းကို ယခင်မဲဆွယ်စည်းရုံးပွဲများ ထက် ပိုပြီး အသေးစိတ် ပြောကြားခဲ့သည်။ 

ကာမယ်လာဟားရစ်ကို တွေ့ရစဉ်

သို့သော် ထရမ့်သည် ဟားရစ်၏ ပုဂ္ဂိုလ်ရေးကို အဆက်မပြတ် ဝေဖန်ထိုးနှက်ခဲ့ပြီး ဟားရစ်ကို "ရူးနှမ်းသူ" ဟု ပြောဆိုသုံးနှုန်းခဲ့ကာ ဟားရစ်၏ ရီမောသံသည် အလွန်ဆိုးရွားကြောင်း၊ ပြဿနာများနှင့် ရင်ဆိုင်နေရသူများ သည်သာ ထိုကဲ့သို့ ရီမောလေ့ရှိကြောင်း ပြောကြားခဲ့သည်။

ပြီးခဲ့သည့်လက သမ္မတဂျိုးဘိုင်ဒန် (Joe Biden) သည် အမေရိကန်သမ္မတရွေးကောက်ပွဲမှ နုတ်ထွက်သွားခဲ့ ပြီးနောက် ဟားရစ်သည် ဒီမိုကရက်တစ်ပါတီ ကိုယ်စားပြု ကိုယ်စားလှယ်လောင်းအဖြစ် ပေါ်ထွက်လာခဲ့ပြီး ကတည်းက ရွေးကောက်ပွဲ ပြိုင်ပွဲလမ်းကြောင်းသည် သိသာစွာ ပြောင်းလဲသွားခဲ့သည်။

ရွေးကောက်ပွဲအကြို လူထုဆန္ဒကောက်ယူသည့် စစ်တမ်းများတွင် ဟားရစ်သည် ထရမ့်နှင့် လူထုထောက်ခံမှုနှုန်း ကွာဟချက်ကို ကျဉ်းမြောင်းစေရန် ကြိုးပမ်းခဲ့ပြီး အချို့စစ်တမ်းများတွင်မူ ထရမ့်ထက်ပင် လူကြိုက်များမှု ပိုမို များပြားနေသည်။

ဟားရစ်၏ လူကြိုက်များမှု မြင့်တက်လာခြင်းကို ထရမ့်က ဝေဖန်ထိုးနှက်မှုများဖြင့် တုန့်ပြန်ခဲ့သည်။

ဒေါ်နယ်ထရမ့်ကို တွေ့ရစဉ်

ဟားရစ်၏ မိခင်သည် အိန္ဒိယသူဖြစ်ပြီး ဖခင်သည် ဂျမေကာနိုင်ငံသားဖြစ်သဖြင့် လူမည်းတစ်ဦး၏ လက္ခဏာ အဖြစ် ထရမ့်က သွယ်ဝိုက်ပြောဆိုခဲ့သည်။

ထရမ့်၏ မဟာမိတ်အချိုကမူ ထိုကဲ့သို့ ပြောဆိုမှုများသည် ထရမ့်၏ မဲဆွယ်စည်းရုံးမှုကို ထိခိုက်စေကြောင်း ပြောကြားခဲ့သည်။

"ပုဂ္ဂိုလ်ရေးအရပြောရရင် ကာမယ်လာရဲ့ လူမျိုးရေး လက္ခဏာနဲပတ်သက်ပြီး ကျနော့်အတွက် ဘာမှ ထူးထူး ခြားခြား မရှိပါဘူး" ဟု ဇူလိုင်လကုန်က ထရမ့်၏ တွဲဖက်ကိုယ်စားလှယ်လောင်း ဂျေဒီ ဗန့်စ် (JD Vance) ကို ရွေးချယ်သည့် အခမ်းအနားကို လက်ခံကျင်းပပေးခဲ့သည့် အဓိက ရီပတ်ဘလစ်ကန် အလှူရှင် ဘီလ်ဘင်း (Bill Bean) က ပြောကြားခဲ့သည်။

မြောက်ကာရိုလိုင်းနားပြည်နယ်တွင် ပြုလုပ်ခဲ့သည့် မဲဆွယ်စည်းရုံးပွဲ၌ ထရမ့်က ဟားရစ်၏ ပုဂ္ဂိုလ်ရေးကို တိုက်ခိုက်ခဲ့ပြီးနောက် ၎င်း၏ ကိုယ်ပိုင် မူဝါဒများကို ထုတ်ဖော်ပြောဆိုခဲ့သည်။

သမ္မတအဖြစ် ရွေးကောက်ခံရပါက ၁၂ လမှ ၁၈ လအတွင်း စွမ်းအင်နှင့် မီတာခများကို လျှော့ချပေးသွားမည် ဖြစ်ကြောင်း ကတိပြုခဲ့သည်။

Source: ရိုက်တာ

CNI International News

၂၀၂၄ ခုနှစ်၊ သြဂုတ် ၁၅ 

ဘင်္ဂလားဒေ့ရှ်တွင် ငြိမ်းချမ်းရေး နိုဘယ်ဆုရှင် မူဟာမက် ယူနွတ် (Muhammad Yunus) သည် လူ ၁၇ ဦး ပါဝင်သည့် ကြားဖြတ်အစိုးရတစ်ရပ်ကို ဦးဆောင်သူ ဖြစ်လာခဲ့သည်။

ထိုကြားဖြတ်အစိုးရအဖွဲ့အတွင်း ဝန်ကြီးချုပ်ဟောင်း ရှိတ်ဟာစီနာ (Sheikh Hasina) ကို ရာထူးမှ နုတ်ထွက်စေခဲ့ သည့် ဆန္ဒပြမှုကို ဦးဆောင်သော ကျောင်းသားခေါင်းဆောင် နှစ်ဦး၊ ဗဟိုဘဏ်အုပ်ချုပ်ရေးမှူး၊ လူ့အခွင့်အရေး တက်ကြွလှုပ်ရှားသူများ၊ စာရေးဆရာနှစ်ဦး၊ သဘာဝပတ်ဝန်းကျင် တက်ကြွလှုပ်ရှားသူတစ်ဦး၊ စစ်ဗိုလ်ချုပ် တစ်ဦးနှင့် ယခင်အစိုးရအဖွဲ့ထဲမှ တာဝန်ထမ်းဆောင်နေသူအချို့ ပါဝင်ခဲ့သည်။

ယူနွတ်ကို စစ်တကောင်းမြို့(Chittagong) အနီးရှိ ကျေးရွာတစ်ရွာတွင် ၁၉၄၀ ခုနှစ်က မွေးဖွားလာခဲ့ခြင်းဖြစ်ကာ မွေးချင်း ၉ ဦးတွင် တတိယမြောက် ဖြစ်သည်။

သူသည် ၁၉၆၁ ခုနှစ်တွင် ဒါကာတက္ကသိုလ်မှ ဘွဲ့ရရှိခဲ့သည်။

ထို့နောက်  စီးပွားရေးပညာရပ်တွင် ၎င်း၏ Ph.D ဘွဲ့အတွက် Fullbright ပညာသင်ဆုဖြင့် ၁၉၆၅ ခုနှစ်၌ အမေရိကန်နိုင်ငံ၊ ဗန်ဒါဘေ့ဒ် (Vanderbilt) တက္ကသိုလ်တွင် တက်ရောက် ပညာသင်ကြားခဲ့ကာ ၁၉၆၉ ခုနှစ်မှာ ပြီးဆုံးခဲ့သည်။

ရှိတ်ဟာစီနာကို တွေ့ရစဉ်

သူသည် အမေရိကန် တန်နက်က်ဆီ (Tennessee) ပြည်နယ်၊ မစ်ဒယ်တန်နက်ဆီပြည်နယ် တက္ကသိုလ် (Middle Tennessee State University) တွင် လက်ထောက်ပါမောက္ခတစ်ဦး ဖြစ်လာခဲ့သည်။

၁၉၇၁ ခုနှစ်က ပါကစ္စတန်စစ်တပ်ကို ဆန့်ကျင်သည့် ခွဲထွက်ရေးစစ်ပွဲအတွင်း ယူနွတ်သည် ဘင်္ဂလားဒေ့ရှ် လွတ်လပ်ရေးအတွက် စွမ်းစွမ်းတမံ ကြိုးပမ်းခဲ့သည်။

သူသည် အမေရိကန်နိုင်ငံ၊ နက်ရှ်ဗေးလ် (Nashville) မြို့တွင် အရပ်ဖက်ကော်မတီတစ်ရပ် တည်ထောင်ကာ ပါကစ္စတန်အား စစ်ဘက်ဆိုင်ရာ အကူအညီပေးမှုကို ရပ်တန့်ရန်အတွက် ဘင်္ဂလားဒေ့ရှ် သတင်းအချက်အလက် စင်တာတစ်ခု ထားရှိရန် ကူညီခဲ့သည်။

ထိုစင်တာသည် အမေရိကန်လွှတ်တော်ကို စည်းရုံးရေးဆင်းရန်အတွက် ထားခြင်းဖြစ်သည်။

ယူနွတ်သည် ဆင်းရဲချို့တဲ့သော ကျေးရွာများတွင် အသေးစား ငွေချေးမှုတစ်ရပ်ကို စီစဉ်ပေးခြင်းဖြင့် ကြီးမားသော ပြောင်းလဲမှုကြီးတစ်ရပ်ကို ဖန်တီးပေးနိုင်ခဲ့သည်။

Ref: Wikipedia

CNI International News

ကဘူး၊ ဩဂုတ် ၁၅

အာဖဂန်နစ္စတန်နိုင်ငံကို တာလီဘန်တို့ ပြန်လည်ထိန်းချုပ်ခဲ့သည်မှာ ၃ နှစ်ပြည့်ခဲ့ပြီဖြစ်ပြီး လက်ရှိတွင် တာလီဘန်တို့သည် သူပုန်ဘဝမှ အာဏာပိုင်ဘဝအဖြစ် အသွင်ကူးပြောင်းခဲ့သည်။

ထို့နောက် နိုင်ငံအတွင်း အစ္စလာမ်မစ်ဥပဒေကို ပြဋ္ဌာန်းခဲ့ပြီး နိုင်ငံတကာ၏ အသိအမှတ်ပြုမှုကို ရရှိရန် ကြိုးပမ်းနေသည်ဟု အေပီမှ ဖော်ပြခဲ့သည်။

တာလီဘန်တို့၏ အုပ်ချုပ်မှုကို ပြည်တွင်းစိန်ခေါ်မှုများ မရှိသကဲ့သို့ ပြည်ပနိုင်ငံများကလည်း တာလီဘန်တို့ကို ထောက်ပံ့ပေးရန် စိတ်ဝင်စားပုံ မပေါ်ကြပေ။ 

ထို့ကြောင့် တာလီဘန်တို့ အာဏာပြန်ရလာမှုနှင့်ပတ်သက်ပြီး သိရှိရမည့်အချက် ၅ ချက်ကို အောက်ပါအတိုင်း တွေ့ရမည်ဖြစ်သည်။

အုပ်ချုပ်မှုပုံစံ
************
တာလီဘန်အဖွဲ့၏ အမြင့်ဆုံး ခေါင်းဆောင်ဖြစ်သည့် ဟိုင်ဘာတူလာ အက်ခွန်ဇာဒါ (Hibatullah Akhundzada) သည် ပိရမစ်ပုံစံရှိသည့် အုပ်ချုပ်မှုစနစ်တွင် အမြင့်ဆုံးနေရာ၌ ရှိနေသည်။

တာလီဘန်အဖွဲ့၏ မူဝါဒအားလုံးကို အက်ခွန်ဇာဒါက ချမှတ်ခြင်းဖြစ်ပြီး ကျန်သည့် တာလီဘန်တစ်ဖွဲ့လုံးက လိုက်နာရသည်။

ဗလီများနှင့် ဘာသာရေး ခေါင်းဆောင်များသည်လည်း အက်ခွန်ဇာဒါအောက်တွင် အရေးကြီးသည့် နေရာ၌ ရှိနေသည်။ 

တစ်နည်းဆိုရပါက တာလီဘန်အုပ်ချုပ်ရေးအဖွဲ့တွင် တာဝန်ရှိသူများသည် အက်ခွန်ဇာဒါနှင့် ဘာသာရေး ဆရာများ၏ ဆုံးဖြတ်ချက်ကို အကောင်အထည် ဖော်ပေးရခြင်းဖြစ်သည်ဟု Crisis Group ၏ တောင်အာရှ အစီအစဥ်မှ ကျွမ်းကျင်သူ အီဘရာဟင် ဘာဟစ် (Ibraheem Bahiss) ကပြောကြားခဲ့သည်။

တာလီဘန်နဲ့ အမျိုးသမီးတစ်ဦးကိုတွေ့ရစဉ်

ရာထူးခန့်အပ်မှုများ
*****************
ယခု တာလီဘန် အစိုးရအဖွဲ့သည် မျက်မှောက်ခေတ် အာဖဂန်နစ္စတန်တွင် အင်အားအတောင့်တင်းဆုံး အစိုးရ ဖြစ်ပြီး ကျေးရွာအဆင့်အထိပင် အမိန့်ပြန်တမ်းများကို ထုတ်နိုင်သည်ဟု ဘာဟစ်က ပြောသည်။

ပြည်သူ့ဝန်ထမ်းများသည် ၎င်းတို့အုပ်ချုပ်သည့် ရာထူးနေရာများနှင့် ကိုက်ညီသည့် ပညာအရည်အချင်းနှင့် အတွေ့အကြုံများရှိသည်ဟု ထင်ရသည်။

သို့သော် တာလီဘန် ဦးဆောင်သည့် ပြည်သူ့ဝန်ထမ်းများသည် ၎င်းတို့ ကိုင်တွယ်ရသည့် ဌာနများနှင့်ပတ်သက်ပြီး ကိုက်ညီသည့် ဗဟုသုတမရှိဘဲ ဘာသာရေးအဆုံးအမကိုသာ အားကိုးအားထား ပြုနေသည်ဟု အရှေ့အလယ်ပိုင်း အင်စတီကျု၏ ပညာရှင် ဂျာဗစ် အာမက် (Javid Ahmad) က ပြောကြားခဲ့သည်။

စီးပွားရေးအခြေအနေ
*********************
အာဖဂန်နစ္စတန်၏ စီးပွားရေးမှာ အားအင်ချိနဲ့နေပြီး ၂၀၁၃ ခုနှစ်တွင် ပြည်ပ၏ ကူညီထောက်ပံ့မှုများသည် နိုင်ငံ့ ဂျီဒီပီ၏ ၃၀ ရာခိုင်နှုန်းခန့်ရှိသည်။

လွန်ခဲ့သည့် ၃ နှစ်အတွင်း ကုလသမဂ္ဂသည် နိုင်ငံတကာ အကူအညီပေးရေး အဖွဲ့များမှတစ်ဆင့် အာဖဂန်ကို ဒေါ်လာ ၃ ဒသမ ၈ ဘီလျံ ထောက်ပံ့ခဲ့သည်။

အမေရိကန်သည် အကြီးဆုံး အလှူရှင်နိုင်ငံဖြစ်ပြီး တာလီဘန်တို့ အာဏာရလာကတည်းက အကူအညီ ဒေါ်လာ ၃ ဘီလျံကျော် ထောက်ပံ့ခဲ့သည်။

တာလီဘန်ခေါင်းဆောင်တွေကို တွေ့ရစဉ်

နိုင်ငံတကာဆက်ဆံရေး
**********************
အာဖဂန်နစ္စတန်သည် ကြီးမားသည့် အိမ်နီးချင်းများစွာရှိသည့် သေးငယ်သည့် နိုင်ငံဖြစ်သည်။

လက်ရှိအချိန်အထိ တာလီဘန်အဖွဲ့ကို အာဖဂန်နစ္စတန်၏ တရားဝင်အစိုးရအဖြစ် မည်သည့်နိုင်ငံကမျှ အသိအမှတ် ပြုမထားသေးပေ။ 

သို့သော် ကုလသမဂ္ဂလုံခြုံရေးကောင်စီ အမြဲတမ်းအဖွဲ့ဝင်များဖြစ်သည့် တရုတ်နှင့် ရုရှားကို ဆက်ဆံရေးသည် တာလီဘန်အဖွဲ့အတွက် အလွန်အရေးကြီးသည်။

မည်သို့ပင်ဆိုစေ တာလီဘန်တို့ အာဏာပြန်ရလာသည့် အချိန်ကာလ ၃ နှစ် ကြာလာချိန်တွင် ပင်လယ်ကွေ့နိုင်ငံ များသည် တာလီဘန်အဖွဲ့နှင့် ထိတွေ့ဆက်ဆံမှုများ ပြုလုပ်လာကြသည်။

လုံခြုံရေးအခြေအနေ
*********************
တာလီဘန်တို့သည် အာဏာပြန်ရလာကတည်းက စစ်ရေးဂိတ်များ ထူထောင်ခြင်း ကျည်ကာကားများနှင့် ကင်းလှည့်ခြင်း၊ သောင်းနှင့်ချီသည့် တိုက်ခိုက်ရေးသမားများကို နိုင်ငံတစ်ဝန်း ဖြန့်ကြက်ချထားခဲ့သည်။

သို့သော် အာဖဂန်နစ္စတန်တွင် လုံခြုံမှုမရှိသေးဘဲ အထူးသဖြင့် အမျိုးသမီးများနှင့် လူနည်းစုများအတွက် အန္တရာယ်များရှိနေဆဲ ဖြစ်သည်။

ထို့ပြင် မကြာသေးမီက တာလီဘန်အဖွဲ့၏ ရန်ဘက်အဖွဲ့ဖြစ်သည့် အိုင်အက်စ်အဖွဲ့သည် နိုင်ငံအတွင်း အသေခံ ဗုံးခွဲတိုက်ခိုက်မှုများနှင့် ပစ်ခတ်တိုက်ခိုက်မှုများကို လုပ်ဆောင်ခဲ့သည်။

Source: အေပီ