CNI International News

ကိယက်ဗ်၊ ဒီဇင်ဘာ ၂၆

ရုရှား၏ ညအချိန် တိုက်ခိုက်မှုအတွင်း ရုရှားတိုက်လေယာဉ်နှစ်စင်း၊ ခရုစ်ဒုံးကျည် နှစ်စင်းနှင့် Shahed အမျိုး အစား ဒရုန်း ၂၈ စင်းကို ပစ်ချနိုင်ခဲ့သည်ဟု ယူကရိန်းလေတပ်က ဒီဇင်ဘာ ၂၅ ရက်တွင် ပြောကြားခဲ့ကြောင်း အေပီမှ ဖော်ပြခဲ့သည်။

ရုရှားသည် ယူကရိန်း၏ တောင်ပိုင်းနှင့် အလယ်ပိုင်းဒေသများကို တိုက်ခိုက်ခဲ့ခြင်းဖြစ်ပြီး ထိုတိုက်ခိုက်မှုများ ကြောင့် ထိခိုက်သူနှင့် သေဆုံးသူ ရှိ/မရှိ သတင်းများ ချက်ချင်းထွက်ပေါ်ခြင်း မရှိခဲ့ပေ။

ရုရှားသည် ဒရုန်း စုစုပေါင်း ၃၁ စင်းကို ပစ်လွှတ်ခဲ့သော်လည်း ယူကရိန်းလေတပ်က ၂၈ စင်းကို ပစ်ချနိုင်ခဲ့ကာ ကျန်ဒရုန်း ၃ စင်းသည် ပစ်မှတ်များကို ထိမှန်ခဲ့ခြင်း ရှိ/မရှိ ယူကရိန်းလေတပ်က အသေးစိတ် ထုတ်ပြန်ခြင်း မရှိခဲ့ပေ။

ယူကရိန်းနိုင်ငံအတွင်းက တစ်နေရာ ပျက်စီးမှုကိုတွေ့ရစဉ်

ယူကရိန်းသမ္မတရုံးက အကျဉ်းချုံး ထုတ်ပြန်ချက်တွင် ပြီးခဲ့သည့် ၂၄ နာရီအတွင်း ရုရှား၏ တိုက်ခိုက်မှုများ ကြောင့် အရပ်သား ၁ ဦး သေဆုံးပြီး ၄ ဦးထက်မနည်း ဒဏ်ရာရရှိခဲ့သည်ဟု ဖော်ပြထားသည်။

ရုရှားတပ်များ၏ ထိန်းချုပ်မှု အောက်တွင်ရှိနေပြီး တိုက်ပွဲများ နေ့စဉ်ဖြစ်ပွားနေသည့် ခါဆွန် (Kherson) ဒေသရှိ ချာနိုဘစ်ဗ်ကာ (Chornobaivka) မြို့တွင် အရပ်သားတစ်ဦး သေဆုံးခဲ့ခြင်းဖြစ်သည်ဟု တာဝန်ရှိသူများက ပြောကြားခဲ့သည်။

ယူကရိန်းသည် ဒီဇင်ဘာ ၂၅ ရက်နေ့တွင် ကျရောက်သည့် ခရစ္စမတ်နေ့ကို အစိုးရရုံး ပိတ်ရက်အဖြစ် ပထမဆုံး အကြိမ် သတ်မှတ်ခဲ့ပြီး ရုရှား အပါအဝင် အော်သိုဒို့စ် ခရစ်ယာန်ဘာသာ ကိုးကွယ်သည့် နိုင်ငံများကမူ ဇန်နဝါရီ ၇ ရက်ကို ခရစ္စမတ်နေ့အဖြစ် သတ်မှတ်ထားသည်။

ယူကရိန်းသမ္မတ ဇာလန်းစကီးသည် ဇူလိုင်လအတွင်းက အစိုးရရုံးပိတ်ရက် ပြောင်းလဲသည့် ဥပဒေကို လက်မှတ်ရေးထိုး အတည်ပြုခဲ့သည်။ 

ယူကရိန်းတွင် အော်သိုဒို့စ် ခရစ်ယန်ဘာသာဝင်များက လွှမ်းမိုးထားသော်လည်း ယူကရိန်း အော်သိုဒို့စ် ဘုရားကျောင်းနှင့် ရုရှားအော်သိုဒို့စ် ဘုရားကျောင်းအကြား သဘောထားကွဲလွဲမှုများ ဖြစ်ပွားခဲ့သည်။

Source: အေပီ

CNI International News

တီဟီရန်၊ ဒီဇင်ဘာ ၂၆

အိန္ဒိယသမုဒ္ဒရာအတွင်း ဓာတုပစ္စည်းများ တင်ဆောင်ထားသည့် သင်္ဘောတစ်စင်းကို အီရန်က တိုက်ခိုက်ခဲ့သည် ဆိုသည့် အမေရိကန်၏ စွပ်စွဲချက်အား အီရန်နိုင်ငံခြားရေးဝန်ကြီးဌာနက ငြင်းဆိုခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။ 

အီရန်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ နက်ဆာ ကာနာနီ (Nasser Kanaani)က ဒီဇင်ဘာ ၂၅ ရက် တွင် ပြုလုပ်ခဲ့သည့်် သတင်းစာရှင်းလင်းပွဲ၌ အမေရိကန်၏ စွပ်စွဲချက်များကို ငြင်းဆိုခဲ့ခြင်း ဖြစ်သည်။

အိန္ဒိယကမ်းလွန်ရေပြင်တွင် မောင်းနှင်နေသည့် ဂျပန်နိုင်ငံပိုင် ဓာတုပစ္စည်းတင်သင်္ဘောကို အီရန်က ဒရုန်းဖြင့် တိုက်ခိုက်ခဲ့သည်ဆိုသော အမေရိကန်၏ ပြောကြားချက်သည် မှားယွင်းကြောင်း ကာနာနီက ပြောသည်။

ဟူရ်သီသူပုန်များကိုတွေ့ရစဉ်

ပင်လယ်နီ (Red Sea) တွင် ယီမင်နိုင်ငံရှိ အီရန်က ကျောထောက်နောက်ခံ ပေးထားသည့် ဟူရ်သီ (Houthi) သူပုန်များမှ ကုန်တင်သင်္ဘောများကို ပစ်မှတ်ထား တိုက်ခိုက်နေသဖြင့် ကမ္ဘာလုံးဆိုင်ရာ ကုန်သွယ်မှုအပေါ် အကြီးအကျယ် ထိခိုက်နေချိန်၌ ဂျပန်နိုင်ငံပိုင် ဓာတုပစ္စည်းတင်သင်္ဘော တိုက်ခိုက်ခံခဲ့ရခြင်းဖြစ်ပြီး တင်းမာမှုများ မြင့်တက်လာခဲ့သည်။

ဟူရ်သီသူပုန်များကမူ ဂါဇာဒေသတွင် အစ္စရေး၏ ဗုံးကြဲတိုက်ခိုက်မှုများကို ရပ်တန့်စေရန် ဖိအားပေးသည့် အနေဖြင့် အစ္စရေးနှင့် အဆက်အသွယ်ရှိသော သင်္ဘောများကို ပစ်မှတ်ထား တိုက်ခိုက်နေခြင်းဖြစ်သည်ဟု ပြောကြားခဲ့သည်။

"ဒီစွပ်စွဲချက် (အမေရိကန်၏ စွပ်စွဲမှု) တွေဟာ အခြေအမြစ်မရှိဘဲ ပြတ်ပြတ်သားသား ငြင်းဆိုပါတယ်။ အဲဒီ စွပ်စွဲချက်တွေဟာ ဂါဇာဒေသမှာ အစ္စရေးအစိုးရရဲ့ ရာဇဝတ်မှုတွေကို ထောက်ခံပေးနေတဲ့ အမေရိကန်အစိုးရရဲ့ လုပ်ဆောင်ချက်တွေကို ဖုံးကွယ်ဖို့နဲ့ လူတွေကို အာရုံလွှဲတဲ့ ရည်ရွယ်ချက်ဖြစ်ပါတယ်" ဟု ကာနာနီက ပြောကြား ခဲ့သည်။ 

 အမေရိကန်သမ္မတ ဂျိုးဘိုင်ဒန်နဲ့အစ္စရေးဝန်ကြီးချုပ် နေတန်ယာဟုကို တွေ့ရစဉ်

ဒီဇင်ဘာ ၂၃ ရက်က ဖြစ်ပွားခဲ့သည့် ဖြစ်စဉ်အရ အိန္ဒိယနိုင်ငံ၏ ကမ်းလွန် ရေမိုင် ၂၀၀ ( ကီလိုမီတာ ၃၇၀) အကွာအဝေးတွင် မောင်းနှင်နေသော ဂျပန်နိုင်ငံပိုင် MV Chem Pluto သင်္ဘောသည် တိုက်ခိုက်ခံခဲ့ရခြင်း ဖြစ်သည်ဟု အမေရိကန်ကာကွယ်ရေးဝန်ကြီးဌာနက ထုတ်ပြန်ခဲ့သည်။

ထိုသင်္ဘောသည် အစ္စရေးနှင့်် ဆက်နွှယ်မှုရှိပြီး ဆော်ဒီအာရေဗျနိုင်ငံမှ အိန္ဒိယနိုင်ငံသို့ ဦးတည်မောင်းနှင်နေချိန် တွင် တိုက်ခိုက်ခံခဲ့ရခြင်း ဖြစ်သည်ဟု ပင်လယ်ရေကြောင်း လုံခြုံရေးကုမ္ပဏီ Ambrey က ပြောကြားခဲ့သည်။ 

ထိုဖြစ်စဉ်သည် ဟူရ်သီသူပုန်များ တိုက်ခိုက်နေသည့် ပင်လယ်နီ၏ အပြင်ဘက်တွင် ပထမဆုံးအကြိမ်အဖြစ် ကုန်တင်သင်္ဘောတစ်စင်း တိုက်ခိုက်ခံရသော ဖြစ်စဉ်ဖြစ်သည်။

Source: အယ်လ်ဂျာဇီးယား

CNI International News

ဘန်ကောက်၊ ဒီဇင်ဘာ၂၃

ထိုင်းတွင် ဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) အား အကျဉ်းထောင် အပြင်ဘက်တွင် အထူးအရေးကြီးပုဂ္ဂိုလ်အဖြစ် ဆေးဝါးကုသမှု ခံယူခွင့်ပေးသည့် ကိစ္စနှင့်စပ်လျဉ်းပြီး တရားရေးဝန်ကြီး ရဲမှူး တာဝီ ဆွတ်ဆောင် (Tawee Sodsong) က လွှတ်တော်အမတ်တစ်ဦး၏ မေးခွန်းများကို ဖြေကြားခဲ့ရသည်ဟု ဘန်ကောက်ပို့စ်မှ ဖော်ပြခဲ့သည်။

အတိုက်အခံ Move Forward ပါတီ (MFP) လွှတ်တော်အမတ်တစ်ဦးဖြစ်သူ ချွန်သီချာ ဂျန်ဂရူးသည် ထိုအကြောင်း အရာကို ဒီဇင်ဘာ ၂၁ ရက်က လွှတ်တော် အစည်းအဝေးအတွင်း ထည့်သွင်းပြောကြားခဲ့ပြီး တာဝီကို မေးခွန်းများ မေးမြန်းခဲ့ခြင်း ဖြစ်သည်။

ထိုသို့ မေးမြန်းချိန်အတွင်း တာဝီက သက်ဆင်အား အကျဉ်းထောင် အပြင်ဘက်တွင် ဆေးဝါးကုသမှုပေးခဲ့သည့်် အကျဉ်းသား စာရိတ္တ ပြုပြင်ပြောင်းလဲရေး ဌာန (Department of Corrections- DoC) ၏ ဆုံးဖြတ်ချက်သည် သူနှင့် သက်ဆိုင်ခြင်း မရှိသည့်ပုံစံမျိုးဖြင့် ဖြေကြားခဲ့သည်။

ချွန်သီချာက သက်ဆင်အား ရဲတပ်ဖွဲ့ အထွေထွေဆေးရုံတွင် ရက်ပေါင်း ၁၂၀ ထက်ကျော်လွန်ပြီး ဆေးဝါးကုသမှု ပေးခဲ့သည့် DoC ၏ ဆုံးဖြတ်ချက်ကို ပြင်းထန်စွာ ဝေဖန်ခဲ့ပြီး သက်ဆင်အား ထိုကဲ့သို့ အခွင့်ထူးခံပေးထားမှုကို အခြားအကျဉ်းသားများက လက်မခံနိုင်ကြောင်း ပြောကြားခဲ့သည်။

တရားရေးဝန်ကြီး ရဲမှူး တာဝီ ဆွတ်ဆောင်

မစ္စစ် ချွန်သီချာသည် သက်ဆင်၏ အခြေအနေကို အကျဉ်းချခံခဲ့ရသည့် နိုင်ငံရေးတက်ကြွလှုပ်ရှားသူ အီကာချိုင်း ဟောင်ကန်ဝမ် (Ekachai Hongkangwan) ၏ အခြေအနေနှင့် နှိုင်းယှဉ်ပြောကြားခဲ့သည်။

အီကာချိုင်းသည် အသည်းရောဂါကို ကုသရန် အကျဉ်းထောင် အပြင်ဘက်ရှိ ဆေးရုံသို့ လွှဲပြောင်းပို့ဆောင်ပြီး ကုသမှုခံယူခဲ့သော်လည်း ကုသမှုများ အဆုံးမသတ်မီ အကျဉ်းထောင် အပြင်ဘက်တွင် ကုသမှုခံယူခွင့်ရရှိသည့် သတ်မှတ်ကာလ ပြည့်သွားချိန်တွင် အကျဉ်းထောင်သို့ ပြန်လည်ပို့ဆောင်ခံခဲ့ရသည်ဟု ချွန်သီချာက ပြောကြား ခဲ့သည်။

ထို့ကြောင့် သက်ဆင်ကို ရဲတပ်ဖွဲ့ဆေးရုံ၏ ၁၄ လွှာရှိ အထူးအခန်းတွင် နေထိုင်ခွင့်ပေးထားသည့် အခြေအနေကို ရှင်းလင်းတင်ပြရန် ချွန်သီချာက တာဝီကို မေးမြန်းခဲ့သည်။

တာဝီကမူ သက်ဆင်ကို ကုသပေးနေသည့် ဆရာဝန်များက သက်ဆင်သည် ဖျားနာနေကြောင်း အတည်ပြုခဲ့ သည်ဟု ဆိုသည်။

ထို့ပြင် DoC အရာရှိများကလည်း သက်ဆင်သည် နာကျင်မှု၊ သွေးတိုးနှင့် နှလုံးရောဂါများ အပါအဝင် ဝေဒနာ အချို့ကို ခံစားနေရကြောင်း အတည်ပြုခဲ့သည်ဟု တာဝီက ပြောသည်။

ထို့ပြင် DoC ၏ စည်းမျဉ်းစည်းကမ်းများ အောက်တွင် သက်ဆင်၏ လုံခြုံရေးအတွက် ဆေးရုံ၏ ၁၄ လွှာတွင် ထားရှိခြင်းဖြစ်ပြီး ထို ၁၄ လွှာတွင် နေထိုင်ခြင်းသည် အခွင့်ထူးခံ အခြေအနေ မဟုတ်ကြောင်းလည်း တာဝီက ဖြေကြားခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ ဒီဇင်ဘာ ၂၃

ဒီဇင်ဘာ ၂၂ ရက်က ထိုင်းနိုင်ငံ၊ မောင်း (Muang)ခရိုင်ရှိ Youtuber တစ်ဦး၏အိမ်ကို ရဲတပ်ဖွဲ့က ဝင်ရောက် ရှာဖွေခဲ့ချိန်အတွင်း လက်နက်နှင့် ခဲယမ်း အများအပြားကို တွေ့ရှိခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ဆိုက်ဘာရဲတပ်ဖွဲ့ (Police Cyber Taskforce) မှ အရာရှိများနှင့် ဒေသခံရဲတပ်ဖွဲ့ဝင်များ ပူးပေါင်းထားသည့် အဖွဲ့သည် ဘန်ကရန် (Ban Krang) ရပ်ကွက်ရှိ အိမ်တစ်လုံးကို ဝင်ရောက်ရှာဖွေခဲ့ခြင်း ဖြစ်သည်။

ရဲတပ်ဖွဲ့သည် ခရစ္စမတ်ကာလနှင့် နှစ်သစ်ကူး ပျော်ပွဲရွှင်ပွဲများ မတိုင်မီ အများပြည်သူ လုံခြုံရေးကို မြှင့်တင်ရန် ရည်ရွယ်ချက်ဖြင့် သံသယရှိသည့် နေရာများကို ဝင်ရောက်ရှာဖွေသော စစ်ဆင်ရေးကို ပြုလုပ်ခဲ့ခြင်းဖြစ်သည်။

Tacticool BoB အမည်ဖြင့် YouTube ချန်နယ်တစ်ခုဖွ င့်ထားပြီး လက်နက်များအကြောင်းကို ဗွီဒီယိုများ တင်ဆက်ပေးနေသည့် ထရင်ဆက် ဝါချီရာဆရီစီရီကူလ် (Transak Wachirasrisirikul)၏ နေအိမ်ခြံဝင်းအတွင်း ရဲအရာရှိများက တရားရုံး၏ ရှာဖွေခွင့်ဝရမ်းဖြင့် ဝင်ရောက်ရှာဖွေခဲ့သည်။

ထိုရှာဖွေမှုအတွင်း အမျိုးအစားစုံလင်သည့် သေနတ် ၈၇ လက်၊ ကျည်ဆန် ၄၅၇၆ တောင့်၊ ကျည်အိမ် ၇ ခုကို တွေ့ရှိခဲ့ကြောင်း ရဲချုပ် နစ်ခွန်း ခူနိုပါရတ် (Nikhom Kheunopparat) က ပြောကြားခဲ့သည်။

အသက် ၃၃ နှစ်အရွယ် မစ္စတာ ထရင်ဆက်က သူသည် ထိုလက်နက်များကို သူ့အဖေထံမှ အမွေရရှိခဲ့ခြင်းဖြစ် သည်ဟု ရဲတပ်ဖွဲ့ကို ပြောကြားခဲ့သည်။

ထိုလက်နက်အားလုံးကိုလည်း သူ့ဖခင်အမည်ဖြင့် တရားဝင် မှတ်ပုံတင်ထားခဲ့သည်ဟု ဆိုသည်။

လက်ရှိတွင် ရဲတပ်ဖွဲ့သည် ထိုလက်နက်များ၏ မှတ်ပုံတင်ပိုင်ဆိုင်ခွင့်ကို မစ္စတာ ထရင်ဆက်အား တရားဝင် လွှဲပြောင်းရန် သင့််/မသင့် စဉ်းစားသုံးသပ်လျက်ရှိသည်။

အကယ်၍ မှတ်ပုံတင် မူပိုင်ခွင့်နှင့်ပတ်သက်ပြီး မှတ်တမ်းမရှိပါက ထရင်ဆက်သည် လက်နက်ခဲယမ်းများကို တရားမဝင် ပိုင်ဆိုင်မှုနှင့်ဆက်နွှယ်သည့် စွဲချက်များဖြင့် အမှုရင်ဆိုင်ရနိုင်သည်။

ရဲတပ်ဖွဲ့သည် ထိုလက်နက်များကို သိမ်းဆည်းခဲ့ပြီးနောက် မစ္စတာ ထရင်ဆက်သည် ဖမ်းဆီးထိန်းသိမ်း ခံခဲ့ရသည် ဟု အတည်မပြုနိုင်သည့် သတင်းများ ထွက်ပေါ်လျက်ရှိသည်။

Source: ဘန်ကောက်ပို့စ်

CNI International News

ဒါကာ၊ ဒီဇင်ဘာ ၂၃

ဘင်္ဂလားဒေ့ရှ်နိုင်ငံတွင် အထည်ချုပ်စက်ရုံဝန်ထမ်းများ၏ ဆန္ဒပြမှုများ ဖြစ်ပွားခဲ့ပြီးနောက် အနောက်နိုင်ငံများ၏ စီးပွားရေးပိတ်ဆို့မှုများ ချမှတ်ခံရမည့် အခြေအနေနှင့် ရင်ဆိုင်နေရသည်ဟု အယ်လ်ဂျာဇီးယားမှ ဖော်ပြခဲ့သည်။

အမေရိကန်သည် ဘင်္ဂလားဒေ့ရှ်နိုင်ငံအတွက် အဓိကဝင်ငွေရှာပေးနေသည့် RMG အထည်ချုပ်လုပ်ငန်းအား အလုပ်သမား အခွင့်အရေးချိုးဖောက်မှု ပြဿနာများနှင့် ပတ်သက်ပြီး ပိတ်ဆို့မှုများ ပြုလုပ်မည်ဟု ခြိမ်းခြောက်ခဲ့ သည်။

အမေရိကန်နှင့် ဥရောပသမဂ္ဂသည် ဘင်္ဂလားဒေ့ရှ်နိုင်ငံ၏ ဒေါ်လာ ဘီလျံချီ တန်ကြေးရှိသည့် အထည်ရောင်းချမှု စုစုပေါင်း၏ ၈၀ ရာခိုင်နှုန်းကို ဝယ်ယူနေသဖြင့် ပိတ်ဆို့မှုများ ချမှတ်ခံရမည်ဆိုပါက ယခင်ကတည်းက ယိုယွင်း နေသည့် ဘင်္ဂလားဒေ့ရှ်နိုင်ငံ စီးပွားရေးအတွက် ကြီးမားသည့် ထိုးနှက်ချက်တစ်ခု ဖြစ်လာနိုင်သည်။

ဘင်္ဂလားဒေ့ရှ်တွင် ဇန်နဝါရီ ၇ ရက်၌ ရွေးကောက်ပွဲများ ကျင်းပမည်ဖြစ်ပြီး ထိုရွေးကောက်ပွဲများမတိုင်မီ အမေရိကန်၏ ပိတ်ဆို့မှု ခြိမ်းခြောက်စကားများ ထွက်ပေါ်လာခြင်းဖြစ်သည်။

ထိုရွေးကောက်ပွဲသည် အတိုက်အခံများကို ဖိနှိပ်ထားပြီး တစ်ဖက်သတ်ဆန်သည့် ရွေးကောက်ပွဲ ဖြစ်လာလိမ့် မည်ဟု ကျယ်ကျယ်ပြန့်ပြန့် ရှုမြင်ခံထားရသည်။

ဘင်္ဂလားဒေ့ရှ်၏ အထည်ချုပ် လုပ်ငန်းကဏ္ဍတွင် ထိပ်သီး ခေါင်းဆောင်များနှင့် အစိုးရ အရာရှိများကမူ အမေရိကန်၏ ပိတ်ဆို့မှု ခြိမ်းခြောက်စကားများကို ကောလာဟလအဖြစ် ယူဆထားပြီး ထိုခြိမ်းခြောက်မှုများသည် ဘင်္ဂလားဒေ့ရှ်အစိုးရကို ဆန့်ကျင်သည့် ဝါဒဖြန့်မှုများဖြစ်သည်ဟု ပြောကြားခဲ့သည်။

ထို့ပြင် ဘင်္ဂလားဒေ့ရှ်အပေါ် စီးပွားရေးပိတ်ဆို့မှုများ၊ အထူးသဖြင့် အထည်ချုပ်ကဏ္ဍအပေါ် ပိတ်ဆို့မှုများ ချမှတ်နိုင်မည် မဟုတ်ဘဲ ဘင်္ဂလားဒေ့ရှ်၏ အထည်ချုပ် လုပ်ငန်းများသည် နိုင်ငံတကာ အလုပ်သမား ဥပဒေများ အားလုံးကို လိုက်နာကျင့်သုံး လျက်ရှိကြောင်း စောဒကတက်ခဲ့သည်။

မကြာသေးမီက ဘင်္ဂလားဒေ့ရှ်တွင် အထည်ချုပ်စက်ရုံ ဝန်ထမ်းများက လုပ်ခလစာ တိုးမြှင့်ပေးရန် အစိုးရကို တောင်းဆိုသည့် ဆန္ဒပြမှုများ ပြုလုပ်ခဲ့သဖြင့် အထည်ချုပ်စက်ရုံ အများအပြားသည် လုပ်ငန်းလည်ပတ်နိုင်ခြင်း မရှိဘဲ စက်ရုံများကို ပိတ်ခဲ့ရသည်။

ထို့ပြင် ဝန်ကြီးချုပ် ရှိတ်ဟာစီနာ (Sheikh Hasina) အစိုးရအဖွဲ့ကို နုတ်ထွက်ရန် တောင်းဆိုသည့် ဆန္ဒပြမှုများ လည်း ဖြစ်ပွားခဲ့ပြီး ထိုဆန္ဒပြမှုများအတွင်း အတိုက်အခံခေါင်းဆောင် အများအပြား ဖမ်းဆီးထိန်းသိမ်းခံခဲ့ရသည်။

Source: အယ်လ်ဂျာဇီးယား

CNI International News

ကိယက်ဗ်၊ ဒီဇင်ဘာ ၂၂ 

အသက် ၂၅ နှစ်မှ ၆၀ အရွယ်ကြားတွင်ရှိသည့် ပြည်ပရောက် ယူကရိန်းအမျိုးသားများအနေဖြင့် စစ်တပ်ထဲတွင် ပြန်လည် စစ်မှုထမ်းဆောင်ရန် တိုက်တွန်းသွားမည်ဟု ယူကရိန်းကာကွယ်ရေးဝန်ကြီး ရုစ်စ်တမ် အူမာရော့ဗ် ( Rustem Umerov ) က ပြောကြားခဲ့သည်ဟု ဘီဘီစီ အင်္ဂလိပ်ပိုင်းမှ ဖော်ပြခဲ့သည်။

ထိုတိုက်တွန်းချက်သည် ဖိတ်ကြားချက် တစ်ခုသာဖြစ်ကြောင်း၊ သို့သော် လိုက်နာခြင်းမရှိသည့် မည်သူ့ကိုမဆို ပိတ်ဆို့မှုများ ချမှတ်သွားမည်ဖြစ်ကြောင်း အူမာနော့ဗ်က ပြောသည်။

မည်သို့ပင်ဆိုစေ ယူကရိန်း ကာကွယ်ရေးဝန်ကြီးဌာန၏ ပြောရေးဆိုခွင့်ရှိသူကမူ ထိုကြေညာချက်ကို ငြင်းဆိုခဲ့ပြီး စဉ်းစားသုံးသပ်မှုများ ပြုလုပ်မည်ဖြစ်ကြောင်း ထပ်မံထုတ်ပြန်ခဲ့သည်။

ပြီးခဲ့သည့် ရက်ပိုင်းအတွင်းက ယူကရိန်းစစ်တပ်သည် တပ်သားသစ် ၄၅၀,၀၀၀ မှ ၅၀၀,၀၀၀ အထိ ထပ်မံ စုဆောင်းရန် အဆိုပြုခဲ့ပြီး ယူကရိန်းသမ္မတ ဗိုလိုဒီမာ ဇာလန်းစကီး(Volodymyr Zelensky) က စစ်တပ်၏ အဆိုပြုချက်ကို စဉ်းစားမည်ဟု ပြောကြားခဲ့ပြီးနောက်ပိုင်း ယခုသတင်း ထွက်ပေါ်လာခဲ့ခြင်း ဖြစ်သည်။

စစ်မှုထမ်းရန် လေ့ကျင့်နေတဲ့ ယူကရိန်းအမျိုးသားတွေကို တွေ့ရစဉ်

အမေရိကန်တွင် ရီပတ်ဘလစ်ကန်အမတ်များက  ယူကရိန်းအား ဒေါ်လာ ၆၁ ဘီလျံ ထောက်ပံ့ပေးမည့် အစီအစဉ် ကို ပိတ်ဆို့ထားခြင်းနှင့် ဥရောပသမဂ္ဂ၌ ယူကရိန်းအား ယူရို ၅၀ ဘီလျံ ထောက်ပံ့ပေးမည့် အစီအစဉ်ကို ဟန်ဂေရီ က ပိတ်ပင်ခြင်းတို့ ကြုံတွေ့နေချိန်မှာပဲ ယူကရိန်းစစ်တပ်က မကြုံစဖူး တပ်သားသစ်များ စုဆောင်းသည့် သတင်းများ ထွက်ပေါ်လာခဲ့ခြင်း ဖြစ်သည်။

ဇာလန်းစကီးကမူ စစ်တပ်၏ တပ်သားသစ် စုဆောင်းမည့် အဆိုပြုချက်သည် အလွန်ထိလွယ်ရှလွယ်ရှိသည့် အရေးကိစ္စဖြစ်သဖြင့် ထိုအဆိုပြုချက်ကို လွှတ်တော်သို့ မတင်သွင်းမီ စစ်တပ်နှင့် အစိုးရအဖွဲ့အကြား ဆွေးနွေး မှုများ ပြုလုပ်သွားမည်ဟု ပြောကြားခဲ့သည်။

ရုရှား၏ ကျူးကျော်စစ်ကာလ အစောပိုင်းက ယူကရိန်းတွင် မိမိသဘော ဆန္ဒအလျောက် စစ်ထဲဝင် တိုက်ခိုက် ခဲ့သူများ ရှိခဲ့သော်လည်း လက်ရှိတွင် ရှေ့တန်းသို့ ပို့ထားသည့် စစ်သားများ၏နေရာတွင် စစ်သားအင်အား အစားထိုးဖြည့်ဆည်းရန် နောက်တန်း၌ တပ်သားသစ်များ စုဆောင်းလျက်ရှိသည်။

စစ်ပွဲ စတင်ဖြစ်ပွားခဲ့ချိန်ကတည်းက ယခုအချိန်အထိ ရုရှားနှင့်် ယူကရိန်းသည် ၎င်းတို့ဘက်မှ ထိခိုက်ကျဆုံးသည့် စစ်သား အရေအတွက်ကို ထုတ်ပြန်ခဲ့ခြင်း မရှိသော်လည်း နှစ်ဘက်စလုံးတွင် ထိခိုက်သေဆုံးသူ အရေအတွက် ထောင်၊ သောင်းချီ ရှိနိုင်ကြောင်း အမေရိကန်အရာရှိများက ခန့်မှန်းထားသည်။

Source: BBC

CNI International News

ဆိုးလ်၊ ဒီဇင်ဘာ ၂၂ 

နျူကလီးယား လက်နက်များနှင့် ရန်စခံရမည်ဆိုပါက နျူကလီးယားလက်နက်များဖြင့် တုန့်ပြန်တိုက်ခိုက်ရန် တုံ့ဆိုင်းသွားမည် မဟုတ်ကြောင်း မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) က ပြောသည်ဟု CNA မှ ဖော်ပြခဲ့သည်။

ပြီးခဲ့သည့် သီတင်းပတ်က ဝါရှင်တန်တွင် တောင်ကိုရီးယားနှင့် အမေရိကန်အကြား အစည်းအဝေး ပြုလုပ်ခဲ့ပြီး နောက် ဒီဇင်ဘာ ၂၁ ရက်တွင် ကင်မ်က သတိပေးခဲ့ခြင်း ဖြစ်သည်ဟု မြောက်ကိုရီးယားနိုင်ငံပိုင် KCNA သတင်း အေဂျင်စီက ဖော်ပြခဲ့သည်။

တောင်ကိုရီးယားနှင့် အမေရိကန်အကြား အစည်းအဝေး လုပ်ငန်းစဉ်ထဲတွင် နျူကလီးယားနှင့် မဟာဗျူဟာ မြောက် အစီအစဉ်များ ပါဝင်ခဲ့ပြီး ၎င်းတို့အပေါ် မည်သည့် နျူကလီးယား တိုက်ခိုက်မှုကိုမဆို ပြုလုပ်မည်ဆိုပါက မြောက်ကိုရီးယားအစိုးရ၏ အဆုံးသတ်ဖြစ်မည်ဟု ပြောကြားခဲ့သည်။ 

သို့သော် ကင်မ်ကမူ မြောက်ကိုရီးယားအနေဖြင့် နျူကလီးယားလက်နက်များဖြင့် ရန်စခံရမည်ဆိုပါက နျူကလီးယား လက်နက်များနှင့် ပြန်လည်တိုက်ခိုက်ရန် တွန့်ဆုတ်နေမည် မဟုတ်ကြောင်း မြောက်ကိုရီးယား စစ်တပ်၏ ဒုံးကျည်တပ်ဖွဲ့ကို ပြောကြားခဲ့သည်ဟု KCNA မှ ဖော်ပြခဲ့သည်။

တောင်ကိုရီးယားသမ္မတနဲ့ အမေရိကန်သမ္မတကို တွေ့ရစဉ်

မြောက်ကိုရီးယား၏ ကြေညာချက် ထွက်ပေါ်လာခဲ့ပြီးနောက် အမေရိကန်၊ တောင်ကိုရီးယားနှင့် ဂျပန်တို့က မြောက်ကိုရီးယားအနေဖြင့် နောက်ထပ် ရန်လိုမှုများကို ရပ်တန့်ရန်နှင့် ဆွေးနွေးညှိနှိုင်းမှုများ ပြုလုပ်ရန် ထုတ်ပြန်ခဲ့သည်။ 

ယခုနှစ်အတွင်း မြောက်ကိုရီးယားသည် ဒုံးကျည်စမ်းသပ်မှုများ စံချိန်တင် ပြုလုပ်ခဲ့ပြီးနောက် အမေရိကန်၊ တောင်ကိုရီးယားနှင့် ဂျပန်တို့သည် သုံးပွင့်ဆိုင် ကာကွယ်ရေး ပူးပေါင်းဆောင်ရွက်မှုများကို မြှင့်တင်ခဲ့သည်။

ထို့ပြင် အမေရိကန်၊ တောင်ကိုရီးယားနှင့် ဂျပန်တို့သည် မြောက်ကိုရီးယား၏ ဒုံးကျည်ပစ်လွှတ်မှုများနှင့် ပတ်သက် ပြီး အချိန်နှင့်တစ်ပြေးညီ အချက်အလက်များကို မျှဝေသည့် အစီအစဉ်အား ဒီဇင်ဘာ ၁၉ ရက်တွင် စတင် လုပ်ဆောင်ခဲ့သည်။

ဒီဇင်ဘာ ၁၈ ရက်ကလည်း မြောက်ကိုရီးယားသည် ၎င်း၏ အင်အားအပြင်းဆုံး တိုက်ချင်းပစ် ပဲ့ထိန်းဒုံးကျည်ဖြစ် သည့် Hwasong-18 ဒုံးကျည်ကို စမ်းသပ်ပစ်လွှတ်ခဲ့သည်။

ထိုဒုံးကျည် ပစ်လွှတ်မှုသည် အမေရိကန်နှင့် ၎င်း၏ မဟာမိတ်များကို သတိပေးခြင်းဖြစ်ကြောင်း မြောက်ကိုရီးယားက ပြောကြားခဲ့သည်။

Source: CNA

CNI International News

မော်စကို၊ ဒီဇင်ဘာ ၂၂

အမေရိကန်သည် ပါလက်စတိုင်းနိုင်ငံထူထောင်မည့် အခြေအနေကို ပယ်ဖျက်ရန် ကြိုးပမ်းနေသည်ဟု ရုရှားနိုင်ငံ ခြားရေးဝန်ကြီး ဆာဂျေ လာဗရော့ဗ် (Sergey Lavrov) က ပြောကြားခဲ့ကြောင်း တာ့စ်သတင်းဌာနမှ ဖော်ပြခဲ့ သည်။

အာရပ်လိဂ် (Arab League) ၊ အစ္စလာမ်မစ် ပူးပေါင်းဆောင်ရွက်ရေးအဖွဲ့ (OIC) အဖွဲ့ဝင်နိုင်ငံများအပြင် ရုရှားနှင့် တူနီးရှားနိုင်ငံတို့သည် အစ္စရေး-ပါလက်စတိုင်း ပဋိပက္ခအတွက် ကြေညာချက်တစ်ခု ထုတ်ပြန်ရန် စဉ်ဆက်မပြတ် ကြိုးပမ်းဆောင်ရွက်ခဲ့ကြောင်း လာဗရော့ဗ်က ပြောသည်။

မည်သို့ပင်ဆိုစေ မိမိတို့သည် ပါလက်စတိုင်းနိုင်ငံ ထူထောင်ရေးအတွက် အနောက်နိုင်ငံများ၏ စိတ်အားထက်သန် မှုမရှိသည့် အခြေအနေများကို မြင်တွေ့ခဲ့ရကြောင်း လာဗရော့ဗ်က တူနီးရှားနိုင်ငံတွင် တူနီးရှားသမ္မတ ကာအစ်စ် ဆိုင်အက်ဒ် (Kais Saied) နှင့် အစည်းအဝေး ပြုလုပ်ခဲ့ပြီးနောက် ပြောကြားခဲ့ခြင်း ဖြစ်သည်။

 ပါလက်စတိုင်း တက်ကြွလှုပ်ရှားသူများကို တွေ့ရစဉ်

အမေရိကန်သည် ကုလသမဂ္ဂလုံခြုံရေးကောင်စီတွင် အစ္စရေး-ပါလက်စတိုင်း ပဋိပက္ခအတွက် အပစ်အခတ်ရပ်စဲ ရေး၊ လူသားချင်း စာနာထောက်ထားမှုဆိုင်ရာ အကူအညီများ ထောက်ပံ့ပေးရေးနှင့်ပတ်သက်ပြီး ကြေညာချက် တစ်စောင် ထုတ်ပြန်ရန် အဆိုပြုချက်များကို ဗီတိုအာဏာဖြင့် ပယ်ချခဲ့ကြောင်း လာဗရော့ဗ်က ပြောကြားခဲ့သည်။

"ကုလသမဂ္ဂလုံခြုံရေးကောင်စီရဲ့ ပြဋ္ဌာန်းချက်ကို ပိုမိုထင်ရှားစေမယ့် မူဝါဒတွေအပေါ် အခြေခံထားတဲ့ ဆွေးနွေး ညှိနှိုင်းမှုတွေမှာ ပါလက်စတိုင်းနိုင်ငံ ထူထောင်ရေးနဲ့ပတ်သတ်တဲ့ အားထုတ်ကြိုးပမ်းမှုတွေဟာ ပယ်ချခံခဲ့ရပါ တယ်”ဟု ရုရှားနိုင်ငံခြားရေးဝန်ကြီးက ပြောသည်။

လာဗရော့ဗ်က  သူသည် ဂါဇာကမ်းမြောင်ဒေသ အရေးနှင့်ပတ်သက်ပြီး တူနီးရှားသမ္မတနှင့် ဆွေးနွေးမှုများ လုပ်ဆောင်ခဲ့ပြီး လူသားချင်းစာနာထောက်ထားမှုဆိုင်ရာ အကူအညီများ အမြန်ဆုံးရရှိရေးနှင့် အကြမ်းဖက် မှုများကို အမြန်ဆုံး ရပ်တန့်အောင် လုပ်ဆောင်ရန် သဘောတူညီခဲ့သည်ဟုလည်း ပြောကြားခဲ့သည်။

Source: တာ့စ်

CNI International News

မော်စကို၊ ဒီဇင်ဘာ ၂၁

ဖင်လန်နှင့် အမေရိကန်အကြား ကာကွယ်ရေးသဘောတူစာချုပ် အသစ်တစ်ခု ချုပ်ဆိုခဲ့မှုကို ဆန့်ကျင်ရန် ရုရှားက ဒီဇင်ဘာ ၁၉ ရက်တွင် ဖင်လန် သံအမတ်ကြီးအား ဆင့်ခေါ်ခဲ့ပြီး ထိုစာချုပ်ကို တုန့်ပြန်သွားမည်ဖြစ်ကြောင်း ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဖင်လန်နှင့် အမေရိကန်အကြား သဘောတူညီချက်အရ ရုရှားနှင့် နယ်စပ်ချင်းထိစပ်နေသည့် ဖင်လန်နိုင်ငံ၏ နယ်စပ်ဒေသတစ်လျှောက်တွင် အမေရိကန်က ကျယ်ကျယ်ပြန့်ပြန့် ဝင်ရောက်လှုပ်ရှားခွင့် ရရှိမည်ဖြစ်သည်။

ရုရှားအနေဖြင့် မိမိတို့ နယ်စပ်ဒေသတစ်လျှောက် နေတိုး၏ စစ်အင်အား တည်ဆောက်မှု အလားအလာကို ခွင့်ပြုမည်မဟုတ်ဘဲ ထိုအခြေအနေသည် မိမိတို့နိုင်ငံ၏ လုံခြုံရေးကို ခြိမ်းခြောက်နေကြောင်း၊ မိမိတို့အနေနှင့် ဖင်လန်နှင့် ၎င်း၏ နေတိုးမဟာမိတ်များ၏ ရန်လိုသည့် ဆုံးဖြတ်ချက်များကို တန်ပြန်ရန် လိုအပ်သည့် အစီအမံ များ လုပ်ဆောင်သွားမည်ဖြစ်ကြောင်း ရုရှားနိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မာရီယာ ဇာခါရိုဗာ (Maria Zakharova) က ပြောကြားခဲ့သည်။

ရုရှားနိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မာရီယာ ဇာခါရိုဗာကို တွေ့ရစဉ်

၂၀၂၂ ခုနှစ်၊ ဖေဖော်ဝါရီလက ယူကရိန်းကို ရုရှားက ဝင်ရောက် တိုက်ခိုက်ခဲ့ပြီးနောက် ဖင်လန်သည် ဧပြီ ၄ ရက် တွင် နေတိုးမဟာမိတ်အဖွဲ့၏ အဖွဲ့ဝင်အသစ်ဖြစ်လာခဲ့သည်။ 

ဒီဇင်ဘာ ၁၈ ရက်က ဖင်လန်နှင့် အမေရိကန်အကြား သဘောတူညီချက်အရ ပဋိပက္ခဖြစ်ပွားလာခဲ့သည့် အခြေအနေတွင် အမေရိကန်သည် ဖင်လန်ကို စစ်ရေးကူညီထောက်ပံ့မှုများအား လျင်မြန်စွာ ပေးနိုင်လိမ့်မည် ဖြစ်ကြောင်း အမေရိကန်အရာရှိများက ပြောကြားခဲ့သည်။ 

ထိုသဘောတူညီချက်တွင် လေတပ်စခန်း ၄ ခုနှင့် စစ်ဘက်ဆိုင်ရာ ဆိပ်ကမ်းတစ်ခု အပါအဝင် ဖင်လန်ရှိ အဆောက်အအုံများနှင့် နေရာဒေသ ၁၅ ခု၌ အမေရိကန်စစ်တပ်က ဝင်ရောက်လှုပ်ရှားခွင့်နှင့် လက်နက်ပစ္စည်း များ၊ ခဲယမ်းများ သိုလှောင်ခွင့် ရရှိမည်ဖြစ်သည်။
အမေရိကန်သည် အရှေ့ဥရောပနိုင်ငံ အများစုနှင့််လည်း အလားတူ သဘောတူညီချက်များ ရရှိထားသည်။ 

ရုရှားအစိုးရကမူ ထိုသဘောတူညီချက်သည် မိမိတို့အတွက် ခြိမ်းခြောက်မှု ဖြစ်လာလိမ့်မည်ဖြစ်ပြီး ရုရှားနှင့် ဖင်လန်အကြား တင်းမာမှုများ မြင့်တက်စေနိုင်ကြောင်း ဒီဇင်ဘာ ၁၅ ရက်က ပြောကြားခဲ့သည်။

Source: ရိုက်တာ