CNI International News

ဘန်ကောက်၊ မေလ ၁၈

ထိုင်းနှင့် တရုတ်အကြား ယခုသီတင်းပတ် အစောပိုင်းက ရေငုပ်သင်္ဘော ရောင်းဝယ်ရေးနှင့်ပတ်သက်ပြီး သဘောတူညီမှုတစ်ခု ရရှိခဲ့ပြီးနောက် တော်ဝင်ထိုင်းရေတပ် (RTN) သည် တရုတ်နိုင်ငံထံမှ ဘတ် ၁၃ ဒသမ ၅ ဘီလျံတန်ကြေးရှိ ရေငုပ်သင်္ဘောတစ်စင်း ဝယ်ယူရေးအစီအစဉ်ကို ဆက်လက် လုပ်ဆောင်နေသည်ဟု ဘန်ကောက်ပို့စ်မှ ဖော်ပြခဲ့သည်။

ထိုင်းကာကွယ်ရေးဝန်ကြီး ဆူတင် ကလန်ဆန် (Sutin Klungsang) ၏ အကြံပေးပုဂ္ဂိုလ်ဖြစ်သည့် ဗိုလ်ချုပ်ကြီး ဆွမ်ဆက ရန်စီတာ (Somsak Rungsita) သည် မေလ ၁၄ ရက်က တရုတ်၏ စစ်ဘက်ဆိုင်ရာ ပစ္စည်းကိရိယာနှင့် နည်းပညာပူးပေါင်းဆောင်ရွက်ရေးဗျူရို၏ လက်ထောက် ညွှန်ကြားရေးမှူး ဗိုလ်မှူးကြီး ရှီရှောင်နင် (Shi Xion Ning) ဦးဆောင်သည့် ကိုယ်စားလှယ်အဖွဲ့နှင့် ဆွေးနွေးခဲ့သည်။

နောက်တစ်ရက်မှာပင် ရေငုပ်သင်္ဘော ရောင်းဝယ်ရေးနှင့် ပတ်သက်ပြီး တရုတ်ကိုယ်စားလှယ်အဖွဲ့သည် မစ္စတာ ဆူတင်နှင့် တွေ့ဆုံဆွေးနွေးခဲ့သည်ဟု သတင်းရင်းမြစ်တစ်ခုက ပြောကြားခဲ့သည်။

ရေငုပ်သင်္ဘောနောက်ခံနဲ့ ထိုင်း-တရုတ် စစ်ဘက်ဆိုင်ရာ အရာရှိများကိုတွေ့ရစဉ်

ထိုတွေ့ဆုံမှုများတွင် နှစ်ဖက်စလုံးက S26T ယူအန် အမျိုးအစား ရေငုပ်သင်္ဘော တည်ဆောက်ရေးကို ဆက်လက် လုပ်ဆောင်ရန် သဘောတူညီခဲ့ကြသည်။

“နှစ်နိုင်ငံအကြား ကောင်းမွန်တဲ့ ဆက်ဆံရေးတွေကြောင့် ပြဿနာက ပြေလည်သွားပါပြီ” ဟု ထိုသတင်းရင်း မြစ်က ပြောကြားခဲ့သည်။ 

ဂျာမန်လုပ် MTU396 အင်ဂျင်နေရာကို အစားထိုးရန် ထိုရေငုပ်သင်္ဘောတွင် CHD620 လျှပ်စစ်မီးစက်ကို တပ်ဆင် သွားရန်လည်း နှစ်ဖက်စလုံးက သဘောတူခဲ့ကြသည်။

“CHD620 က ရေငုပ်သင်္ဘောမှာသုံးတဲ့ လျှပ်စစ်မီးစက် ဖြစ်ပါတယ်။ အင်ဂျင်သဘောမျိုးတော့ မဟုတ်ပါဘူး” ဟု အမည်မဖော်လိုသည့် သတင်းရင်းမြစ်က ပြောသည်။

ထိုင်းရေတပ်သည် ယခင်ကလည်း တရုတ်တွင် CHD620 မီးစက် စမ်းသပ်မှုကို လေ့လာကြည့်ရှုရန် လုပ်ငန်း တာဝန်အဖွဲ့တစ်ဖွဲ့ကို စေလွှတ်ခဲ့သည်။

ရေငုပ်သင်္ဘောရဲ့အတွင်းပိုင်း ဖွဲ့စည်းပုံကို ပြသထားစဉ်

ယခင်က CHD620 ကို တစ်ခါမှ အသုံးပြုခဲ့ဖူးခြင်း မရှိသည့်တိုင် တရုတ်ကာကွယ်ရေးဝန်ကြီးဌာနသည် ထိုမီးစက် ကို စက်မှုလုပ်ငန်းသုံး အတည်ပြု ထောက်ခံချက် ထုတ်ပေးခဲ့သည်။

ထို့ပြင် ထိုမီးစက်သည် လန်ဒန်အခြေစိုက် နိုင်ငံတကာ ပင်လယ်ကူးသင်္ဘောများ အမျိုးအစား သတ်မှတ်ရေး အဖွဲ့ဖြစ်သည့် Lloyd’s Refister ထံမှ ထောက်ခံချက်လည်း ရရှိထားသည်။

ပါကစ္စတန်နိုင်ငံသည်လည်း တရုတ်မှ ဝယ်ယူထားသည့် ရေငုပ်သင်္ဘော တစ်စစင်းတွင် ဂျာမန်လုပ် အင်ဂျင်နေရာ ကို CHD620  ဖြင့် အစားထိုးရန် တရုတ်နှင့် သဘောတူညီမှုများ ပြုလုပ်ခဲ့သည်ဟု သတင်းရင်းမြစ်တစ်ခုက ပြောကြားခဲ့သည်။

Source: ဘန်ကောက်ပို့စ်

CNI International News

ဘေကျင်း၊ မေလ ၁၈

ထိုင်ဝမ်တွင် သမ္မတသစ် လိုင်ချင်တေ (Lai Ching-te) ကျမ်းသစ္စာမကျိန်ဆိုမီ ရက်ပိုင်းအလိုတွင် ဖိအားများ တိုးမြှင့်စေရန်အတွက် တရုတ်က ထိုင်ဝမ်မှ နိုင်ငံရေးသမား ၅ ဦးကို ပိတ်ဆို့မှုများ ချမှတ်ခဲသည်။

ထို့နောက် တရုတ်အစိုးရသည် ခွဲထွက်ဝါဒီများကို အပြစ်ပေးရန် ဥပဒေတစ်ရပ် ထုတ်ပြန်ခဲ့သည်ဟု Bloomberg မှ ဖော်ပြခဲ့သည်။

ထိုင်ဝမ်၏ နိုင်ငံရေးသမားများ၏ မှတ်ချက်စကားများသည် ထိုင်ဝမ်ဒေသခံအချို့ကို လှည့်ဖျားနေကြောင်း ထိုင်ဝမ် ရေလက်ကြား၏ တစ်ဖက်တစ်ချက်စီတွင်ရှိသည့် ထိုင်ဝမ်နှင့် တရုတ်အကြား ရန်လိုမှုများနှင့် ထိပ်တိုက်တွေ့မှုများ ဖြစ်စေရန် သွေးထိုးလှုံ့ဆော်ပေးနေကြောင်း တရုတ်အစိုးရ၏ ပြောရေးဆိုခွင့်ရှိသူ ချန်ပင်ဟွာ (Chen Binhua) က ပြောကြားခဲ့သည်။

တရုတ်က ပိတ်ဆို့အရေးခဲ့တဲ့ ထိုင်ဝမ်နိုင်ငံရေးသမား ၅ ဦးကိုတွေ့ရစဉ်

ပိတ်ဆို့မှု ချမှတ်ခံရသူ ၅ ဦးသည် လူဦးရေ ၂၃ သန်းခန့် နေထိုင်သည့် ထိုင်ဝမ်တွင် နိုင်ငံရေးစကားဝိုင်းများ၌ မကြာခဏ ပါဝင်ပြောကြားနေသူများ ဖြစ်သည်။ 

တရုတ်သည် ထိုင်ဝမ်အား ၎င်း၏ ပိုင်နက်တစ်ခုအဖြစ် ကြေညာထားပြီး လိုအပ်လာပါက အင်အားသုံး သိမ်းယူသွားမည်ဟု ပြောကြားထားသည်။

ယခုပိတ်ဆို့မှုများ ချမှတ်မည့် တရုတ်၏ လုပ်ဆောင်ချက်များသည် မေလ ၂၀ ရက်တွင် သမ္မတအဖြစ် ကျမ်းသစ္စာ ကျိန်ဆိုမည့် လက်ရှိ ထိုင်ဝမ်ဒုသမ္မတ လိုင်ချင်တေ အပေါ်ထားရှိသည့် တရုတ်၏ သဘောထားကို ပြသခြင်း ဖြစ်သည်ဟု ကျွမ်းကျင်သူများက သုံးသပ်ခဲ့သည်။

တရုတ်သည် ထိုင်ဝမ်၏ အာဏာရပါတီဖြစ်သည့် ဒီမိုကရက်တစ် တိုးတက်ရေး ပါတီ (DPP) ကို ထိုင်ဝမ်နှင့် တရုတ်အကြား စစ်ဖြစ်စေရန် တွန်းပို့နေသည့် ခွဲထွက်ရေးဝါဒီအဖြစ် ရှုမြင်ထားသည်။ 

တရုတ်သမ္မတ ရှီကျင့်ဖျင်ကို တွေ့ရစဉ်

ထို့ပြင် ထိုင်ဝမ်သည် တရုတ်၏ နယ်နိမိတ် မဟုတ်ကြောင်း ငြင်းဆိုထားသည့် လက်ရှိထိုင်ဝမ်သမ္မတ ဆိုင်အင်ဝမ် (Tsai In-wan) နှင့် ထိပ်သီးဆွေးနွေးပွဲများ ပြုလုပ်ရန် တရုတ်က ငြင်းဆိုခဲ့ပြီး ထိုင်ဝမ်အပေါ် စီးပွားရေး၊ သံတမန် ရေးနှင့် စစ်ရေးဖိအားများ တိုးမြှင့်ခဲ့သည်။

အထင်ရှားဆုံး ဥပမာတစ်ခုကို ပြသရမည်ဆိုပါက ၂၀၂၂ ခုနှစ်က အမေရိကန် အောက်လွှတ်တော်ဥက္ကဋ္ဌ နန်စီ ပယ်လိုစီ (Nancy Pelosi) သည် ထိုင်ဝမ်သို့ ရောက်ရှိခဲ့ပြီးနောက် တရုတ်ပြည်သူ့လွတ်မြောက်ရေးတပ်မတော် (PLA) သည် ထိုင်ဝမ်ကျွန်းအနီး ဝန်းကျင်တွင် အကြီးစားစစ်ရေး လေ့ကျင့်မှုများကို ပြုလုပ်ခဲ့သည်။

လိုင်အနေဖြင့် ငြိမ်းချမ်းရေးနှင့် ဆိုးရွားသည့် ထိပ်တိုက်တွေ့ရေး လမ်းစဉ်အကြား တစ်ခုခုကို ရွေးချယ်ရမည်ဟု မစ္စတာ ချန်က ပြောကြားခဲ့သည်။

ယခု ပိတ်ဆို့မှုများနှင့် ပတ်သက်ပြီး ချန်က အသေးစိတ် ပြောကြားခဲ့ခြင်း မရှိသော်လည်း အတိတ်ကာလက ထိုင်ဝမ် ထိပ်သီးခေါင်းဆောင်များအပေါ် ချမှတ်သည့် တရုတ်၏ ပိတ်ဆို့မှုများတွင် တရုတ်နိုင်ငံအတွင်းရှိ အဖွဲ့အစည်းများ၊ လူပုဂ္ဂိုလ်များနှင့် အလုပ်လုပ်ခွင့်၊ ပြည်ဝင်ခွင့်များ ပိတ်ပင်ခဲ့ဖူးသည့် ဖြစ်စဉ်များ ရှိခဲ့သည်။

Source: Bloomberg

CNI International News

နယူးဒေလီ၊ မေလ ၁၇

အိန္ဒိယနိုင်ငံတွင် ရွေးကောက်ပွဲများ ကျင်းပနေချိန်၌ AI နည်းပညာဖြင့် ပြုလုပ်ထားသည့် ဝန်ကြီးချုပ်မိုဒီ (Modi) ကနေသည့် ဗွီဒီယိုများ ထွက်ပေါ်လာကြောင်း ရိုက်တာမှ ဖော်ပြခဲ့သည်။

ထိုဗွီဒီယိုများထဲမှ တစ်ခုတွင် မိုဒီသည် ခေတ်ဆန်သည့် ဂျာကင်အင်္ကျီနှင့် ဘောင်းဘီရှည်များ ဝတ်ဆင်ပြီး စတိတ် စင်ပေါ်တွင် ဘောလီးဝုဒ်သီချင်းနှင့် ကခုန်နေကာ စင်အောက်မှ ပရိသတ်များက အော်ဟစ်အားပေးနေပုံကို မြင်တွေ့ရသည်။

နောက်ထပ် ဗွီဒီယိုတစ်ခုထဲတွင် ထိုစတိတ်စင်ပေါ်၌ မိုဒီ၏ ပြိုင်ဘက်ဖြစ်သူ မာမာတာ ဘာနာဂျီ (Bamata Banerjee) သည် ဆာရီနှင့်ဆင်တူသည့် ဝတ်စုံကို ဝတ်ဆင်ပြီး ကခုန်နေပုံကို မြင်တွေ့ရသည်။

ရဲတပ်ဖွဲ့ကမူ ထို ဗွီဒီယိုများသည် တရားဥပဒေစိုးမိုးရေးကို ထိခိုက်စေနိုင်ကြောင်း ပြောကြားခဲ့ပြီး စုံစမ်းစစ်ဆေးမှု များ ပြုလုပ်လျက်ရှိသည်။

ထိုကဲ့သို့ AI နည်းပညာများကို အသုံးပြုပြီး ဗွီဒီယိုများ ဖန်တီးမှုသည် နည်းပညာကို တလွဲအသုံးချနေသည့် အခြေအနေအား ဖော်ပြရာရောက်ခဲ့ပြီး ကမ္ဘာ့လူဦးရေ အများဆုံးဖြစ်သော အိန္ဒိယနိုင်ငံတွင် နည်းပညာဆိုင်ရာ စည်းကမ်းထိန်းသိမ်းသူများနှင့် လုံခြုံရေးအရာရှိများကို စိုးရိမ်မှုများ မြင့်တက်စေခဲ့သည်။

မိုဒီ၏ ပြိုင်ဘက်ဖြစ်သူ မာမာတာ ဘာနာဂျီကို တွေ့ရစဉ်

AI ဗွီဒီယိုများသည် ဖန်တီးရလွယ်ကူပြီး နည်းပညာနှင့် အကျွမ်းတဝင် ရှိသူများကိုပင် လှည့်စားနိုင်လောက် သည်အထိ အရည်အသွေး ကောင်းမွန်ပြီး ပြည်သူများအကြား ယုန်ထင်ကြောင်ထင်ဖြစ်စေခဲ့သည်။

ထို့ပြင် လူဦးရေ ၁ ဒသမ ၄ ဘီလျံရှိသည့် အိန္ဒိယနိုင်ငံတွင် ထိုကဲ့သို့ သတင်းအမှားများ ပြန့်နှံ့စေနိုင်သည့် AI ဗွီဒီယို များသည် ဂိုဏ်းဂဏကွဲမှုများနှင့် တင်းမာမှုများကို မြင့်တက်စေပြီး အထူးသဖြင့် ယခုကဲ့သို့ ရွေးကောက်ပွဲများ ပြုလုပ်နေချိန်တွင် စိုးရိမ်မှုများကို မြင့်တက်စေသည်။

ယခုနှစ် ဇန်နဝါရီလက ထုတ်ပြန်သည့် ကမ္ဘာ့စီးပွားရေးဖိုရမ်၏ စစ်တမ်းတွင် လာမည့် ၂ နှစ်အတွင်း အိန္ဒိယ၌ သတင်းအမှားများ ပျံ့နှံ့မှုအန္တရာယ်သည် ကူးစက်ရောဂါများ သို့မဟုတ် တရားမဝင် စီးပွားရေး လှုပ်ရှားမှုများ၏ အန္တရာယ်ထက် ပိုမိုမြင့်မားကြောင်း ပြောကြားခဲ့သည်။

“အိန္ဒိယမှာ AI ဓာတ်ပုံတွေနဲ့အတူ သတင်းအမှား ပျံ့နှံ့တဲ့ အန္တရာယ်ဟာ အရှိန်အဟုန် မြင့်လာနိုင်ပါတယ်” ဟု နယူးဒေလီအခြေစိုက် အတိုင်ပင်ခံကုမ္ပဏီမှ ကျွမ်းကျင်သူ ဆာဂါ ဗစ်ရှ်နွိုင်း (Sagar Vishnoi) က ပြောကြား ခဲ့သည်။

Source: ရိုက်တာ

CNI International News

ဘန်စကာ ဘိုင်စတာရီကာ၊ မေ ၁၇

မေလ ၁၅ ရက်နေ့က သေနတ်ဖြင့် ပစ်ခတ်လုပ်ကြံခံခဲ့ရသည့် ဆလိုဗက်ကီးယားဝန်ကြီးချုပ် ရောဘတ် ဖီကို (Robert Fico) သည် အသက်အန္တရာယ် မစိုးရိမ်ရတော့ကြောင်း ဒုတိယဝန်ကြီးချုပ်နှင့် သဘာဝပတ်ဝန်းကျင် ဆိုင်ရာဝန်ကြီး တာဝန်ယူထားသူ တိုမက်စ် တာရာဘာက ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဝန်ကြီးချုပ် ဖီကို (၅၉ နှစစ်) သည် အစိုးရအဖွဲ့ အစည်းအဝေးမှ ပြန်လာချိန်တွင် သေနတ်သမားက ဖီကိုအား သေနတ်ဖြင့် ၅ ချက်ပစ်ခတ်ခဲ့ခြင်းဖြစ်သည်။

အဆိုပါ ပစ်ခတ်ခံရမှုကြောင့် အစောပိုင်းတွင် အသက်အန္တရာယ် စိုးရိမ်ရသည့် အခြေအနေတွင်ရှိခဲ့ပြီး ခွဲစိတ်ကုသ မှုခံယူခဲ့ရသည်။

“ကျနော် တော်တော်လန့် သွားခဲ့ပါတယ်။ ကံကောင်းတာက ခွဲစိတ်မှုဟာ အောင်မြင်သွားခဲ့ပါတယ်။ သူ အသက် ရှင် ပါလိမ့်မယ်။ အခုအချိန်မှာတော့ အသက်အန္တရာယ် မစိုးရိမ်ရပါဘူး” ဟု တာရာဘာက ဘီဘီစီသတင်းဌာန၏ Newshour အစီအစဉ်တွင် ပြောကြားခဲ့သည်။

ဆလိုဗက်ကီးယားဝန်ကြီးချုပ် ရောဘတ်ဖီကိုအား ဆေးရုံသယ်သွားစဉ်

ကျည်ဆန်တစ်ခုသည် ဖီကို၏ အစာအိမ်ကို ဖောက်ထွက်သွားခဲ့ကြောင်း တာရာဘာက ပြောသည်။ 

လက်ရှိတွင် ဖီကိုသည် ခွဲစိတ်ခန်းမှ ထွက်လာပြီး ကျန်းမာရေးအခြေအနေ တည်ငြိမ်နေကြောင်း Aktuality.sk သတင်းဝက်ဘ်ဆိုက်မှ ဖော်ပြခဲ့သည်။

ဖီကိုသည် သေနတ်ဒဏ်ရာအချို့ ရရှိခဲ့ပြီးနောက် ပြင်းထန်သည့် ဒဏ်ရာ အများအပြား ရရှိခဲ့ကြောင်း ကာကွယ်ရေးဝန်ကြီး ရောဘတ် ကာလီနက် (Robert Kalinak)က ပြောကြားခဲ့သည်။

ထို့နောက် ဝန်ကြီးချုပ်၏ အခြေအနေသည် အသက်အန္တရာယ် စိုးရိမ်ရကြောင်း ပြည်ထဲရေးဝန်ကြီး မာတပ်စ် ဆူတက်ဂျ် အက်စ်တော့ခ် (Matus Sutai Estok)က ထပ်မံ၍ အစောပိုင်းတွင် ပြောကြားခဲ့သည်။

ဝန်ကြီးချုပ်အား ပစ်ခတ်သူသည် အသက် ၇၁ နှစ်အရွယ် သက်ကြီးပိုင်း အမျိုးသားဖြစ်သဖြင့် လူထုကို တုန်လှုပ် သွားစေခဲ့သည်။

လက်ရှိတွင် သေနတ်ဖြင့် ပစ်ခတ်သူကို လူသတ်ရန် ကြံစည်မှုဖြင့် တရားစွဲဆိုထားသည်။

ဆလိုဗက်ကီးယားဝန်ကြီးချုပ် ရောဘတ် ဖီကိုကို တွေ့ရစဉ်

ဥရောပသမဂ္ဂနှင့် နေတိုးအဖွဲ့ဝင်ဖြစ်သည့် ဆလိုဗက်ကီးယားတွင် နိုင်ငံရေး အကြမ်းဖက်မှုများသည် ရှားပါး ဖြစ်စဉ်ဖြစ်သည်။

ရုရှားသမ္မတ ပူတင် (Vladimir Putin) နှင့် အမေရိကန်သမ္မတ ဂျိုးဘိုင်ဒန် (Joe Biden) တို့ အပါအဝင် ဥရောပသမဂ္ဂ ခေါင်းဆောင်များက ထိုပစ်ခတ်မှုကို ထိတ်လန့်ကြောင်း ဖော်ပြခဲ့ပြီး ရှုတ်ချခဲ့ကြသည်။

လူဦးရေ ၅ ဒသမ ၄ သန်း နေထိုင်သည့် ဆလိုဗက်ကီးယားနိုင်ငံတွင် မကြာသေးမီ နှစ်များအတွင်း နိုင်ငံရေး သဘောထား ကွဲလွဲမှုများနှင့် အငြင်းအခုံများ ဖြစ်ပွားခဲ့သည်။

ထို့နောက် ပြီးခဲ့သည့်နှစ် အောက်တိုဘာလကုန်က ဖီကိုသည် ဝန်ကြီးချုပ်ရာထူးကို ဒုတိယအကြိမ် ပြန်လည် ရရှိခဲ့သည်။

ဖီကို အာဏာပြန်ရလာပြီးနောက် ဆလိုဗက်ကီးယား အစိုးရအဖွဲ့သည် ယူကရိန်းကို ထောက်ခံမှု လျှော့ချခဲ့ပြီး ရုရှားနှင့် ဆွေးနွေးညှိနှိုင်းမှုများ ပြုလုပ်ခဲ့သဖြင့် အတိုက်အခံများ၏ ဝေဖန်မှုများနှင့် ရင်ဆိုင်ခဲ့ရသည်။

Source: ရိုက်တာ

CNI International News

နယူးဒေလီ၊ မေလ ၁၇

အိန္ဒိယစစ်တပ်သည် တရုတ်နယ်စပ်အနီးရှိ အရှေ့လာဒက် (Eastern Ladakh) ဒေသတွင် တင့်ကားများနှင့် ခြေလျင် တိုက်ခိုက်ရေးတပ်မှ ယာဉ်အစီးရေ ၅၀၀ နှင့်အတူ ထိုဒေသတွင် ကမ္ဘာ့အမြင့်ဆုံး တင့်ကားပြုပြင်ရေး စက်ရုံနှစ်ခုကို တည်ဆောက်ခဲ့ကြောင်း Economic Times မှ ဖော်ပြခဲ့သည်။

အိန္ဒိယသည် တရုတ်နယ်စပ်အနီးရှိ ညိုမာ (Nyoma) နှင့် DBO Sector ဒေသတွင် ကျည်ကာကားများ ပြုပြင် ထိန်းသိမ်းရေး စက်ရုံနှစ်ခုကို တည်ဆောက်ခဲ့ခြင်းဖြစ်သည်။

ထိုဒေသသည် အမြင့်ပေပေါင်း ၁၄,၅၀၀ ခန့်၌ တည်ရှိသဖြင့် ကမ္ဘာ့အမြင့်ဆုံး တိုက်ပွဲဝင် တင့်ကားများနှင့် ခြေလျင်တပ် တိုက်ခိုက်ရေးယာဉ်များ ပြုပြင်သည့် စက်ရုံများအဖြစ် မှတ်တမ်းဝင်ခဲ့ခြင်းဖြစ်သည်။

အရှေ့လာဒက်ဒေသက တရုတ်နဲ့ အိန္ဒိယ နယ်နိမိတ်ကိုတွေ့ရစဉ်

၂၀၂၀ ပြည့်နှစ် ဧပြီလမှ မေလတွင် အိန္ဒိယနှင့် တရုတ် စစ်သားများအကြား ခိုက်ရန်ဖြစ်ပွားမှုများ ရှိခဲ့ပြီးနောက် အိန္ဒိယသည် အရှေ့လာဒက်ဒေသ၌ Quick Reaction တိုက်ခိုက်ရေးယာဉ်များကဲ့သို့ အိန္ဒိယနိုင်ငံသို့ ကျည်ကာ ကားများ၊ BMP တိုက်ခိုက်ရေးယာဉ်များနှင့် တင့်ကားများကို ဖြန့်ကြက်ချထားခဲ့သည်။

“တင့်ကားတွေနဲ့ ခြေလျင် တိုက်ခိုက်ရေးယာဉ်တွေကို ပင်လယ်ရေမျက်နှာပြင်အထက် အရမ်းမြင့်တဲ့ နေရာဒေသ တွေမှာ ဖြန့်ကြက်ချထားခဲ့တာပါ။ အဲဒါကြောင့် အဲဒီလို မြေမျက်နှာပြင် အမြင့်မှာရှိတဲ့ တင့်ကားတွေကို မြေပြန့်ကို ပြန်ခေါ်ပြီး ပြုပြင်ထိန်းသိမ်းဖို့ ခက်ခဲပါတယ်” ဟု အိန္ဒိယစစ်တပ်အရာရှိများက ANI သတင်းဌာနသို့ ပြောကြားခဲ့ သည်။

“အဲဒီပြဿနာကို ဖြေရှင်းတဲ့ အနေနဲ့ အဲဒီဒေသမှာပဲ ကျည်ကာကားတွေ ပြုပြင်ထိန်းသိမ်းတဲ့ စက်ရုံတွေကို ညိုမာ ဒေသနဲ့ DBO Sector ဒေသတွေမှာ တည်ဆောက်ခဲ့ပါတယ်။ အဲဒီဒေသနှစ်ခုမှာ တင့်ကားတွေနဲ့ ခြေလျင်တပ် တိုက်ခိုက်ရေးယာဉ်တွေကို ပြုပြင်ထိန်းသိမ်းမှာဖြစ်ပြီး လာဒက်ဒေသ အရှေ့ပိုင်းကို အာရုံစိုက်သွားမှာ ဖြစ်ပါ တယ်” ဟု အိန္ဒိယစစ်တပ်အရာရှိများက ပြောကြားခဲ့သည်။

အိန္ဒိယစစ်တပ်သည် အပူချိန် အလွန်ကျဆင်းသည့် ဆောင်းရာသီတွင် ကုန်းမြင့်ဒေသများ၌ T-90 နှင့် T-72 တင့်ကားများ၊ BMP နှင့် K-9Vajra ဟောင်ဝဇ္ဇာများ အပါအဝင် ၎င်း၏တင့်ကားများကို လက်ခံထားရှိရေးအတွက် ကြီးမားသည့် အခြေခံ အဆောက်အအုံများကို ဖန်တီးခဲ့သည်။

အိန္ဒိယကြည်းတပ် အကြီးအကဲ ဗိုလ်ချုပ်ကြီး မနို့ဂျ် ပန်ဒီကို တွေ့ရစဉ်

မကြာသေးမီကလည်း အိန္ဒိယကြည်းတပ် အကြီးအကဲ ဗိုလ်ချုပ်ကြီး မနို့ဂျ် ပန်ဒီ (Manof Pande) သည် ကျည်ကာ တိုက်ခိုက်ရေးယာဉ် (AFV) များအတွက် အလတ်စား ပြုပြင်ထိန်းသိမ်ရေးစက်ရုံ တစ်ခုသို့ သွားရောက်ကြည့်ရှုခဲ့ သည်။ 

ကုန်းမြင့်ဒေသများတွင် တည်ဆောက်ခဲ့သည့် တင့်ကားပြုပြင် ထိန်းသိမ်းရေးစက်ရုံများသည် အပူချိန် အနုတ် ၄၀ ဒီဂရီအထိ ကျဆင်းသွားသည့် အခြေအနေမျိုးမှာပင် စက်ရုံကို လည်ပတ်နိုင်ကြောင်း အရာရှိများက ပြောကြားခဲ့ သည်။

ပြီးခဲ့သည့် ၄ နှစ်အတွင်း အိန္ဒိယနှင့် တရုတ်သည် လာဒက်ဒေသတွင် ထိပ်တိုက်တွေ့ခဲ့ပြီး နယ်စပ်ဒေသများ၌ စစ်သားအင်အား ၅၀,၀၀၀ စီ ဖြန့်ကြက်ချထားခဲ့သည်။

Source: Economic Times

CNI International News

အစ္စလာမ်မာဘက်၊ မေလ ၁၇

ပါကစ္စတန်က ထိန်းချုပ်ထားသည့် ဂျမူးနှင့် ကက်ရှ်မီးယား (PoKJ) ဒေသတွင် ရဲတပ်ဖွဲ့နှင့် ဆန္ဒပြသူများအကြား အဓိကရုဏ်းများ ဖြစ်ပွားခဲ့၍ အကျပ်အတည်းသည် တောင်အာရှကို ရိုက်ခတ်နိုင်သည်ဟု Times of Israel သတင်းဝက်ဘ်ဆိုက်မှ ဖော်ပြခဲ့သည်။

ထို့အပြင် အာဖဂန်နစ္စတန်တွင် တာလီဘန်အဖွဲ့ အာဏာပြန်ရလာပြီးနောက် ပါကစ္စတန်နိုင်ငံအပေါ် ရန်လိုနေမှု များနှင့်လည်း ရင်ဆိုင်နေရသည်။

ပါကစ္စတန်အစိုးရက အာဇက် ဂျမူးနှင့် ကက်ရှ်မီးယား (AJK) ဟု ခေါ်ဆိုသည့် ထိုဒေသတွင် မေလ ၁၀ ရက်မှ ၁၂ ရက်အထိ နေရာဒေသ အနှံ့အပြား၌ ဆန္ဒပြသူများနှင့် ရဲတပ်ဖွဲ့များအကြား အဓိကရုန်း ဖြစ်ပွားခဲ့ခြင်းဖြစ်သည်။

 ပါကစ္စတန် ဝန်ကြီးချုပ် ရှာဘက် ရှရစ်ဖ်ကို တွေ့ရစဉ်

ဂျုံစျေးနှုန်းများ မြင့်တက်ခြင်း၊ အစားအစာ စျေးနှုန်းများ ဖောင်းပွခြင်း၊ အလုပ်လက်မဲ့နှုန်း မြင့်တက်လာခြင်း၊ အစိုးရ၏ ဂျုံထောက်ပံ့မှု ရပ်တန့်သွားခြင်း၊ မကြာခဏ လျှပ်စစ်ဓာတ်အားများ ပြတ်တောက်ခြင်းနှင့် PoJK ဒေသ၏ သဘာဝသယံဇာတများ အမြတ်ထုတ် ခံရခြင်းတို့ကြောင့် နိုင်ငံရေးသမားများနှင့် လူ့အခွင့်အရေးအဖွဲ့များ က ဆန္ဒပြခဲ့ခြင်းဖြစ်သည်။

ပါကစ္စတန်အစိုးရက ထိုဆန္ဒပြမှုများကို ကြမ်းတမ်းစွာ ကိုင်တွယ်ခဲ့ပြီး ဆန္ဒပြသူများ၊ လူ့အခွင့်အရေးအဖွဲ့ ခေါင်းဆောင်များကို ဖမ်းဆီးထိန်းသိမ်းခြင်းတို့ ပြုလုပ်ခဲ့သဖြင့် ဆန္ဒပြမှုများ ငြိမ်သက်သွားခဲ့သည်။

ထို့ပြင် ငြိမ်းချမ်းစွာ ဆန္ဒပြမှုများကို ဖြိုခွင်းရန် ပါကစ္စတန်အစိုးရက အာဇက်ကက်ရှ်မီးယားဒေသသို့ ရာနှင့်ချီသည့် စစ်သားများ ဖြန့်ကြက်ချထားခဲ့သည်။

မေလ ၁၁ ရက်က ဆန္ဒပြမှု ဖြစ်ပွားခဲ့ပြီးနောက် ပါကစ္စတန် ရိန်းဂျားတပ်ရင်း ၃ ရင်းသည် AJK ဒေသအတွင်းသို့ ဝင်ရောက်လာခဲ့ပြီးနောက် မူဇက်ဖာရာဘက် (Muzaffarabad) မြို့တော်တွင် ဆန္ဒပြသူများကို ဖြိုခွင်းခဲ့သဖြင့် ရာနှင့်ချီသည့် ဒေသခံများ ဒဏ်ရာရခဲ့သည်။

ပါကစ္စတန်သမ္မတ အဆစ်ဖ် အလီ ဇာဒါရီကို တွေ့ရစဉ်

အာဇက် ကက်ရှ်မီးယား ဒေသအနှံ့နှင့် မူဇက်ဖာရာဘက်မြို့တော်တွင် အခြေအနေများ တင်းမာလျက်ရှိနေပြီး တည်ငြိမ်မှုကို ပြန်လည်ထိန်းသိမ်းရန် ဝန်ကြီးချုပ် ရှာဘက် ရှရစ်ဖ်က (Shehbaz Sharif) က X လူမှုမီဒီယာတွင် ကြေညာချက် ထုတ်ပြန်ခဲ့သည်။

ထိုကြေညာချက်တွင် ရှရစ်ဖ်က အာဇက် ဂျမူးနှင့် ကက်ရှ်မီးယား(AJK)ဒေသ ဝန်ကြီးချုပ် ချောင်ဒရီ အန်ဝါ အူဟက် (Chaudhry Anwar-ul-Haq)အား ဂျမူး-ကက်ရှ်မီးယား ပူးတွဲ အဝါမီ လှုပ်ရှားမှု ကော်မတီ (JAAC) နှင့် ဆွေးနွေးညှိနှိုင်းမှုများ ပြုလုပ်ရန် တိုက်တွန်းခဲ့သည်။

ပါကစ္စတန်သမ္မတ အဆစ်ဖ် အလီ ဇာဒါရီ (Asif Ali Zardari) ကလည်း AJK ဒေသတွင် ဖြစ်ပွားနေသည့် လက်ရှိ အခြေအနေအပေါ် ဝမ်းနည်းကြောင်း၊ ထိုဒေသတွင် ကျန်းမာရေး၊ ပညာရေး၊ ခရီးသွားလာရေးနှင့် အခြေခံ အဆောက်အအုံကဏ္ဍများ အပါအဝင် လူမှုစီးပွား ဖွံ့ဖြိုးတိုးတက်ရေး အစီအစဉ်များကို ဦးစားပေး လုပ်ဆောင်သင့် ကြောင်း ပြောကြားခဲ့သည်။

Source: Times of Israel

CNI International News

နယူးဒေလီ၊ မေလ ၁၆

အိန္ဒိယနှင့် ဩစတြေးလျအကြား ပင်လယ်ရေကြောင်းဆိုင်ရာ ပူးပေါင်းဆောင်ရွက်မှုကို တိုးမြှင့်သည့် ခြေလှမ်း တစ်ရပ်အနေဖြင့် ၁၆ ကြိမ်မြောက် အိန္ဒိယရေတပ်-ဩစတြေးလျရေတပ် ဆွေးနွေးပွဲအား မေလ ၁၄ ရက်က အောင်မြင်စွာ နိဂုံးချုပ်ခဲ့သည်ဟု Devdiscourse သတင်းဝက်ဘ်ဆိုက်မှ ဖော်ပြခဲ့သည်။

အန္ဒိယရေတပ်၏ ဒုတိယရေတပ်ဦးစီးချုပ် ရေတပ်ဗိုလ်ချုပ်ကြီး နီယာဘဟေး ဘက်ပ်နာ (Nirbhay Bapna) နှင့် ဩစတြေးလျ တော်ဝင်ရေတပ်မှ ရေတပ်ဗိုလ်ချုပ်ကြီး ဂျွန်နသန် အာလေး (Jonathan Earley) တို့က ကြီးမှူး ကျင်းပသည့် ထိုဆွေးနွေးပွဲသည် နှစ်နိုင်ငံရေတပ်များအကြား ပူးပေါင်းဆောင်ရွက်မှုများတွင် သမိုင်းမှတ်တိုင် တစ်ခု ဖြစ်ခဲ့သည်။

“၁၆ ကြိမ်မြောက် အိန္ဒိယရေတပ်-ဩစတြေးလျရေတပ် ၊ ရေတပ်အချင်းချင်း ဆွေးနွေးမှုတွေကို ကိုချီ (Kochi) မြို့မှာ အောင်မြင်စွာ အဆုံးသတ်နိုင်ခဲ့ပြီး အိန္ဒိယနဲ့ ဩစတြေးလျအကြား ပင်လယ်ရေကြောင်းဆိုင်ရာ ပူးပေါင်း ဆောင်ရွက်မှုမှာ ကြီးမားတဲ့ သမိုင်းမှတ်တိုင်တစ်ခု စိုက်ထူခဲ့ပါတယ်။ 

အိန္ဒိယရေတပ်ဗိုလ်ချုပ်ကြီး ဘက်ပ်နာနဲ့ ဩစတြေးလျ ရေတပ်ဗိုလ်ချုပ်ကြီး အာလေးတို့က ပူးတွဲပြီး ကြီးမှူးကျင်းပတဲ့ အဲဒီဆွေးနွေးပွဲတွေမှာ ပူးပေါင်း စစ်ဆင်ရေးကို တိုးမြှင့်ရေး၊ ပင်လယ်ရေကြောင်းဆိုင်ရာ မိတ်ဖက်ဆက်ဆံမှုအတွက် လမ်းကြောင်းသစ်တွေနဲ့ ဆက်ဆံရေးကို ခိုင်မာစေရေးတို့ကို အဓိကထားပြီး ဆွေးနွေးခဲ့ပါတယ်” ဟု အိန္ဒိယရေတပ်က မေလ ၁၄ ရက်တွင် ပြောကြားခဲ့သည်။

အိန္ဒိယနဲ့ ဩစတြေးလျရေတပ်ကို တွေ့ရစဉ်

ဆွေးနွေးညှိနှိုင်းမှုများတွင် ပင်လယ်ရေကြောင်း ပိုင်နယ်များအတွင်း နှစ်နိုင်ငံ ပူးပေါင်းဆောင်ရွက်သည့် အားထုတ် ကြိုးပမ်းမှုကို ခိုင်မာစေရန်နှင့် ဆက်ဆံရေးများ နက်ရှိုင်းစေရန် ကတိကဝတ်များကို နှစ်ဖက်စလုံးက ဖော်ပြခဲ့ကြ သည်။

ထိုဆွေးနွေးပွဲများသည် အင်ဒို-ပစိဖိတ်ဒေသတွင် အိန္ဒိယနှင့် ဩစတြေးလျအကြား ပူးပေါင်းဆောင်ရွက်မှု၏ မဟာဗျူဟာမြောက် အရးကြီးသည့် အခြေအနေကို မီးမောင်းထိုးပြသရာ ရောက်နေပြီး သမုဒ္ဒရာများအတွင်း ဟာကွက်များကို ဖြည့်ဆည်းခြင်းဖြင့် နှစ်နိုင်ငံရေတပ်များသည် ဒေသတွင် ငြိမ်းချမ်းရေးနှင့် ချမ်းသာကြွယ်ဝ ရေးတို့ကို တိုးမြှင့်ရုံသာမက လုံခြုံရေးနှင့် တည်ငြိမ်ရေးတို့ကိုလည်း စိတ်ချသေချာမှုရှိအောင် လုပ်ဆောင်ရန် မျှော်မှန်းထားသည်ဟု အိန္ဒိယရေတပ်က ပြောကြားခဲ့သည်။

မေလ ၁၂ ရက်ကလည်း အိန္ဒိယ၏ INS Kiltan သင်္ဘောသည် ဗီယက်နမ်နိုင်ငံ ကမ်ရန် ပင်လယ်အော် (Cam Ranh Bay) သို့ ရောက်ရှိခဲ့ပြီး ထိုသင်္ဘောကို ဗီယက်နမ်ရေတပ်နှင့် ဗီယက်နမ်ရှိ အိန္ဒိယသံရုံးတို့က ကြိုဆိုခဲ့ကြသည်။

ထိုခရီးစဉ်သည် အိန္ဒိယရေတပ်၏ အရှေ့ပိုင်း စစ်သင်္ဘောအုပ်စု၏ စစ်ဆင်ရေးဆိုင်ရာ ဖြန့်ကြက်ချထားမှု၏ တစ်စိတ်တစ်ပိုင်းဖြစ်ပြီး နှစ်နိုင်ငံ မိတ်ဖက်ဆက်ဆံရေးနှင့် ပူးပေါင်းဆောင်ရွက်မှုကို တိုးမြှင့်လိုသည့် ရည်ရွယ်ချက်ကို ဖော်ပြခဲ့ခြင်းဖြစ်သည်။

အိန္ဒိယနဲ့ ဩစတြေးလျရေတပ် အကြီးအကဲများကို တွေ့ရစဉ်

အိန္ဒိယနှင့် ဗီယက်နမ်သည် ပြည့်စုံကျယ်ပြန့်သည့် မဟာဗျူဟာမြောက် မိတ်ဖက်ဆက်ဆံရေးကို ထူထောင်ထား သည်။

ထိုဆက်ဆံရေးကို မြှင့်တင်သည့် အနေဖြင့် အိန္ဒိယရေတပ်၏ INS Kiltan စစ်သင်္ဘော ဗီယင်္ကနမ်သို့ ရောက်ရှိလာ သော ခရီးစဉ်တွင် နှစ်နိုင်ငံရေတပ်အကြား အပြန်အလှန် ထိတွေ့ဆက်ဆံမှုကို တိုးမြှင့်ပြီး စံတန်ဖိုးများကို မျှဝေ မှုများ ပြုလုပ်ရန် အာရုံစိုက်လုပ်ဆောင်ခဲ့သည်။

ထိုခရီးစဉ်ကို နှစ်နိုင်ငံရေတပ်အကြား ပင်လယ်ပြင်တွင် ပင်လယ်ရေကြောင်းဆိုင်ရာ မိတ်ဖက်ဆက်ဆံမှု လေ့ကျင့် ခန်းများဖြင့် အဆုံးသတ်မည် ဖြစ်သည်။

ထိုလေ့ကျင့်ခန်းများသည် နှစ်နိုင်ငံအကြား ထိတွေ့ဆက်ဆံမှုနှင့် အကောင်းဆုံး စစ်ရေးဆောင်ရွက်ချက်များကို မျှဝေမှုများတွင် ပိုမိုခိုင်မာ အားကောင်းစေမည်ဖြစ်သည်။

Source: Devdiscourse

CNI International News

ဘန်ကောက်၊ မေလ ၁၆

ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) သည် ထိုင်း-မြန်မာနယ်စပ်တွင် ငြိမ်းချမ်းရေးကို မြှင့်တင်လိုသည့် ဆန္ဒသာရှိကြောင်း ၎င်း၏သမီးဖြစ်သူ ပေတုန်တန် ရှင်နာဝပ် (Paetongtarn Shinawatra) က ပြောကြားခဲ့သည်ဟု The Nation သတင်းစာမှ ဖော်ပြခဲ့သည်။

သက်ဆင်သည် ပုဂ္ဂိုလ်ရေးခင်မင်မှုကို အသုံးချပြီး မြန်မာနိုင်ငံ၏ လက်နက်ကိုင်အဖွဲ့များနှင့် ဆွေးနွေးမှုများ ပြုလုပ်နေမှုအပေါ် ဖြူးထိုင်းပါတီခေါင်းဆောင် ပေတုန်တန်က ကာကွယ်ပြောဆိုပေးခဲ့ခြင်း ဖြစ်သည်။

မကြာသေးမီက သက်ဆင်သည် မြန်မာနိုင်ငံတွင် ဖြစ်ပွားနေသည့် ပဋိပက္ခများကို အဖြေရှာရန်အတွက် ကချင် လက်နက်ကိုင်နှင့် NUG ၏ ကိုယ်စားလှယ်များဖြင့် တွေ့ဆုံခဲ့သည်။

အဆိုပါ ကိုယ်စားလှယ်များနှင့် တွေ့ဆုံပြီးနောက် သက်ဆင်သည် ရှမ်းပြည်ပြန်လည်ထူထောင်ကောင်စီ(RCSS)မှ  ခေါင်းဆောင်များနှင့် တွေ့ဆုံခဲ့သည်။

သက်ဆင်၏ လုပ်ဆောင်ချက်များကို ထိုင်းနိုင်ငံအတွင်းရှိ အဖွဲ့အစည်းအချို့က ဝေဖန်ခဲ့ကြသည်။

ထို့နောက် အမျိုးသားလုံခြုံရေးနှင့် နယ်စပ်ရေးရာ အောက်လွှတ်တော်ကော်မတီက ထိုဖြစ်စဉ်ကို စုံစမ်းစစ်ဆေးမှု ပြုလုပ်ရသည့် အခြေအနေသို့ ရောက်ရှိစေခဲ့သည်။

သက်ဆင်ကိုတွေ့ရစဉ်

သက်ဆင်သည် အစိုးရအဖွဲ့ထဲတွင် မည်သည့်ရာထူးကိုမျှ ရယူထားခြင်းမရှိသဖြင့် ၎င်း၏ လုပ်ဆောင်ချက်များ သည် ထိုင်းနိုင်ငံ၏ နိုင်ငံတကာမူဝါဒကို မေးခွန်းများ ထွက်ပေါ်စေခဲ့ကြောင်း အမျိုးသားလုံခြုံရေးနှင့် နယ်စပ်ရေးရာ အောက်လွှတ်တော်ကော်မတီဥက္ကဋ္ဌ ရန်စီမန် ရိုမီ (Rangsiman Rome) က ပြောကြားခဲ့သည်။

ပေတုန်တန်ကမူ ရန်စီမန်၏ မှတ်ချက်ကို တုန့်ပြန်သည့်အနေဖြင့် သက်ဆင်သည် မိမိနိုင်ငံအရေးကို စိုးရိမ်နေ သည့် ထိုင်းနိုင်ငံသားတစ်ဦးအဖြစ် ဆောင်ရွက်ခဲ့ခြင်းသာဖြစ်ကြောင်း ပြောကြားခဲ့သည်။

“ပြည်ပမှာ ၁၇ နှစ်လောက် နေခဲ့တာတောင်မှ သူဟာ ထိုင်းပြည်သူတွေကို ဂရုစိုက်နေတုန်းပါပဲ။ ပြီးတော့ သူတတ်နိုင်တဲ့ဘက်က ဘာမဆိုလုပ်ပေးဖို့ ကူညီချင်တဲ့သူပါ” ဟု ပေတုန်တန်က ပြောကြားခဲ့သည်။

သက်ဆင်သည် အစိုးရအဖွဲ့ထဲတွင် မည်သည့်ရာထူးကိုမျှ ရယူထားခြင်း မရှိသော်လည်း သူသည် ၂၀၀၁ ခုနှစ်မှ ၂၀၀၆ ခုနှစ်အထိ ဝန်ကြီးချုပ်အဖြစ် တာဝန်ထမ်းဆောင်ခဲ့ချိန်အတွင်း မြန်မာနိုင်ငံ၏ တိုင်းရင်းသားအဖွဲ့များ အပါအဝင် မြန်မာ့တပ်မတော်နှင့် ပုဂ္ဂိုလ်ရေးအရ ခင်မင်မှုရှိခဲ့သည်။

ထို့နောက် နယ်စပ်ဖြတ်ကျော် မူးယစ်ဆေးဝါးဂိုဏ်းများကို နှိမ်နင်းခဲ့ဖူးကြောင်း ပေတုန်တန်က ထပ်လောင်း ပြောကြားခဲ့သည်။

Source: The Nation

CNI International News

အမ်မန်၊ မေလ ၁၆

အမေရိကန်၏ မဟာမိတ်ဖြစ်သည့် ဂျော်ဒန်နိုင်ငံတွင် အီရန်က ဦးဆောင်ပြုလုပ်သည်ဟု သံသယရှိသော လက်နက်များ မှောင်ခိုကူးမည့် အစီအစဉ်တစ်ခုကို ဟန့်တားနိုင်ခဲ့သည်ဟု ရိုက်တာမှ ဖော်ပြခဲ့သည်။ 

ထိုလက်နက်မှောင်ခိုကူးမည့် အစီအစဉ်သည် ဂျော်ဒန်ဘုရင်၏  အတိုက်အခံများကို အဖျက်အမှောင့် လုပ်ငန်းများ လုပ်ဆောင်ရာတွင် အကူအညီ ပေးရန်ဖြစ်သည်ဟု ထိုအကြောင်းအရာနှင့် နီးစပ်သည့် ဂျော်ဒန် သတင်း အရင်းအမြစ်နှစ်ခုက ပြောကြားခဲ့သည်။

ထိုလက်နက်များကို ဆီးရီးယားရှိ အီရန်က ကျောထောက်နောက်ခံ ပေးထားသည့် စစ်သွေးကြွများက ဂျော်ဒန် နိုင်ငံအတွင်းရှိ Muslim Brotherhood အဖွဲ့အစည်း၏ လက်အောက်ခံအဖွဲ့ထံ ပေးပို့ခဲ့ခြင်းဖြစ်သည်။

ထိုအဖွဲ့သည် ပါလက်စတိုင်း ဟားမာ့စ်အဖွဲ့နှင့် အဆက်အသွယ်ရှိသည်ဟု အမည်မဖော်လိုသူတစ်ဦးက ရိုက်တာ သို့ ပြောကြားခဲ့သည်။

ဂျော်ဒန်အစိုးရ ခေါင်းဆောင်ကိုတွေ့ရစဉ်

ထိုလက်နက်သေတ္တာကို မတ်လအတွင်းက ဖမ်းဆီးရမိခဲ့သည့် ဂျော်ဒန်နိုင်ငံအတွင်းရှိ ပါလက်စတိုင်းများ ဖွဲ့စည်းထားသော အဖွဲ့ဝင်များနှင့်အတူ သိမ်းဆည်းရမိခဲ့ခြင်း ဖြစ်သည်ဟု ၎င်းက ပြောသည်။

အဆိုပါ ပူးပေါင်းကြံစည်မှုနှင့် ဖမ်းဆီးမှုများကို ယခုမှ ပထမဆုံးအကြိမ် သတင်းထုတ်ပြန်ခဲ့ခြင်းဖြစ်ပြီး အမေရိကန် က ထောက်ခံပေးထားသည့် အစ္စရေးနှင့် အီရန်၏ တော်လှန်ရေး အင်အားစု ကွန်ရက်တွင် ပါဝင်သော ဟားမာ့စ် အဖွဲ့အကြား စစ်ပွဲဖြစ်ပွားနေမှုနှင့်အတူ အရှေ့အလယ်ပိုင်းတွင် တင်းမာမှုများ မြင့်တက်နေသည့် အချိန်နှင့် တိုက်ဆိုင်နေသည်။

ဂျော်ဒန် သတင်းရင်းမြစ်နှစ်ခုကမူ စုံစမ်းစစ်ဆေးမှုများကို ဆက်လက် ပြုလုပ်နေဆဲဖြစ်သဖြင့် ထိုလက်နက်များ မှောင်ခိုကူးမှု၏ အဓိကရည်ရွယ်ချက်ဖြစ်သည့် အဖျက်အမှောင့်လုပ်ငန်း၏ အကြောင်းအရာ အသေးစိတ်ကို ပြောကြားရန် ငြင်းဆိုခဲ့သည်။

ပူးပေါင်းကြံစည်မှု၏ အဓိကရည်မှန်းချက်မှာ အမေရိကန် စစ်စခန်းများကို လက်ခံထားရှိပြီး အစ္စရေး၊ ဆီးရီးယား၊ အီရတ်တို့နှင့် နယ်စပ်ချင်း ထိစပ်နေသည့် ဂျော်ဒန်နိုင်ငံကို တည်ငြိမ်မှု ပျက်ပြားစေရန် ဖြစ်ကြောင်း အဆိုပါ သတင်းရင်းမြစ်များက ပြောကြားခဲ့သည်။

ဂျော်ဒန်လူထုကိုတွေ့ရစဉ်

မတ်လအတွင်းက သိမ်းဆည်းရမိခဲ့သည့် လက်နက်သေတ္တာထဲတွင် မည်သည့် လက်နက်အမျိုးအစားများ ပါဝင်သည်ကို အသေးစိတ် ဖော်ပြခဲ့ခြင်းမရှိဘဲ မကြာသေးမီ လများအတွင်းက ဂျော်ဒန်ထောက်လှမ်းရေးအဖွဲ့ သည် မြေမြှုပ်မိုင်းများ၊ ကလက်ရှ်နီကော့ဗ် ရိုင်ဖယ်များနှင့် ၁၀၇ မမ Katyusha ဒုံးကျည်များ အပါအဝင် လက်နက်များ မှောင်ခိုကူးရန် အီရန်နှင့် ၎င်း၏မဟာမိတ်များ၏ အားထုတ်ကြိုးပမ်းမှုများကို ဟန့်တားနိုင်ခဲ့ သည်ဟု ဆိုသည်။

ဂျော်ဒန်နိုင်ငံအတွင်းသို့ ဝင်ရောက်လာသည့် ထိုလက်နက် အများစုသည် အစ္စရေးက သိမ်းပိုက်ထားသည့် အနောက်ဘက်ကမ်း ပါလက်စတိုင်းနယ်မြေသို့ ပေးပို့ရန် ရည်ရွယ်ခဲ့ခြင်းဖြစ်သည်ဟု ဂျော်ဒန် သတင်း အရင်းအမြစ်များက ပြောကြားခဲ့သည်။

Source: ရိုက်တာ