CNI International News

ဗီယန်ကျင်း၊ ဇူလိုင် ၃၁

တိုက်ပွဲများ ပြင်းထန်စွာ ဖြစ်ပွားနေသည့် မြန်မာနိုင်ငံတွင် အပစ်အခတ်ရပ်စဲရေး ရရှိစေရန် မြန်မာနိုင်ငံ၏ အိမ်နီးချင်းနိုင်ငံများအနေဖြင့် ပူးပေါင်းဆောင်ရွက်မှုများကို တိုးမြှင့်လုပ်ဆောင်သင့်ကြောင်း ထိုင်းနိုင်ငံခြားရေး ဝန်ကြီး မာရစ် ဆန်ဂီယမ်ပွန်ဆာ (Maris Sangiampongsa) က တိုက်တွန်းခဲ့ကြောင်း ဘန်ကောက်ပို့စ်မှ ဖော်ပြခဲ့ သည်။

ယခုလ အစောပိုင်းက အိန္ဒိယနိုင်ငံ၊ နယူးဒေလီမြို့တော်တွင် ပြုလုပ်ခဲ့သည့် တောင်အာရှနှင့် အရှေ့တောင်အာရှ အစည်းအဝေးများ၌ မြန်မာနှင့် အိမ်နီးချင်းနိုင်ငံများမှ နိုင်ငံခြားရေးဝန်ကြီးများ အလွတ်သဘောတွေ့ဆုံခဲ့စဉ် မြန်မာ့အရေးကို ဆွေးနွေးခဲ့သည်ဟု ဇူလိုင် ၂၈ ရက်က လာအိုနိုင်ငံ၊ ဗီယန်ကျင်း (Vientiane) မြို့တော်၌ Kyodo News နှင့် ထိုင်းမီဒီယာတစ်ခုကို မစ္စတာမာရစ်က ပြောကြားခဲ့သည်။

မစ္စတာမာရစ်သည် အမေရိကန်၊ ဂျပန်နှင့် တရုတ်နိုင်ငံတို့ အပါအဝင် အာဆီယံ၏ မိတ်ဖက်နိုင်ငံများနှင့် အာဆီယံ အဖွဲ့ဝင်နိုင်ငံများ တက်ရောက်သည့် နိုင်ငံခြားရေးဝန်ကြီးအဆင့် အစည်းအဝေးပွဲများအတွက် ပြီးခဲ့သည့် သီတင်းပတ်က လာအိုနိုင်ငံ၊ ဗီယန်ကျင်းမြို့တော်သို့ ရောက်ရှိနေခြင်းဖြစ်သည်။

ထိုင်းနှင့်အိန္ဒိယသည် မြန်မာ့တပ်မတော်နှင့် လက်နက်ကိုင်အဖွဲ့များအကြား ဖြစ်ပွားနေသော တိုက်ပွဲများကြောင့် ထွက်ပြေးတိမ်းရှောင်နေရသည့် စစ်ဘေးဒုက္ခသည် အများအပြား ဝင်ရောက်လာသော အခြေအနေနှင့် ကြုံတွေ့နေ ရသည်။

လားရှိုးမြို့ကို တိုက်နေသော MNDAA တပ်ဖွဲ့ကို တွေ့ရစဉ်

"မြန်မာ့အရေးနဲ့ ပတ်သက်ပြီး နိုင်ငံအများအပြားဟာ အရင်ကထက်ပိုပြီး ပွင့်လင်းတဲ့ သဘောထားတွေနဲ့အတူ မြန်မာနိုင်ငံရဲ့ အခြေအနေကို တိုးတက်အောင် လုပ်ဆောင်ဖို့ အခွင့်ကောင်းရှိနေတယ်လို့ ကျနော် ယုံကြည်ပါ တယ်" ဟု မစ္စတာ မာရစ်က ပြောကြားခဲ့သည်။

အိန္ဒိယ၊ မြန်မာ၊ ထိုင်း သုံးပွင့်ဆိုင် နိုင်ငံခြားရေးဝန်ကြီးများ ပြုလုပ်သည့် ဆွေးနွေးမှုများတွင် မြန်မာနိုင်ငံ၌ ပိုမို ပွင့်လင်းသော သဘောထားရှိသည်ဟု ခံစားခဲ့ရကြောင်း မစ္စတာမာရစ်က ပြောသည်။

မြန်မာနိုင်ငံသည် ထိုင်း၊ အန္ဒိယ၊ တရုတ်၊ လာအို၊ ဘင်္ဂလားဒေ့ရှ်နိုင်ငံတို့နှင့် နယ်စပ်ချင်း ထိစပ်နေသည်။

Source: ဘန်ကောက်ပို့စ်

CNI International News

တိုင်ပေ၊ ဇူလိုင် ၃၁

ထိုင်ဝမ်အနေဖြင့် မိမိကိုယ်ကိုယ် အားကိုးသည့် ကာကွယ်ရေးကဏ္ဍကို မြှင့်တင်သွားမည်ဖြစ်ပြီး ပြည်ပမှ လက်နက်များကိုလည်း ဆက်လက်ဝယ်ယူသွားမည်ဟု ထိုင်ဝမ်သမ္မတ လိုင်ချင်တေ(Lai Ching-te)က ဇူလိုင် ၃၀ ရက်တွင် ပြောကြားခဲ့ကြောင်း ရိုက်တာမှ ဖော်ပြခဲ့သည်။

တရုတ်သည် အခြားနိုင်ငံတစ်နိုင်ငံကို ခြိမ်းခြောက်နေခြင်းသည် ကမ္ဘာကြီးအတွက် ခြိမ်းခြောက်မှုဖြစ်ကြောင်း လိုင်က ပြောသည်။

ထိုင်ဝမ်သည် ဒေသတွင်း ငြိမ်းချမ်းရေးနှင့် တည်ငြိမ်ရေးကို မြှင့်တင်ရန် အားထုတ်ကြိုးပမ်း သွားမည်ဟုလည်း လိုင်က တိုင်ပေ (Taipei) မြို့တော်တွင် ပြုလုပ်သည့် ညီလာခံတစ်ခုတွင် ပြောကြားခဲ့သည်။

ထိုင်ဝမ်ကို ၎င်း၏ နယ်နိမိတ်တစ်ခုအဖြစ် ရှုမြင်ထားသည့် တရုတ်သည် ထိုင်ဝမ်အပေါ် အချုပ်အခြာအာဏာ ပိုင်ကြောင်း ၎င်း၏ကြေညာချက်ကို ထိုင်ဝမ်က လက်ခံစေရန် စစ်ရေးလေ့ကျင့်မှုများ ပုံမှန်ပြုလုပ်ခဲ့ပြီး ဖိအားများ တိုးမြှင့်ခဲ့သည်။

တရုတ်နဲ့ ထိုင်ဝမ်ကို တွေ့ရစဉ်

"တရုတ်က ဘယ်နိုင်ငံကိုပဲ ခြိမ်းခြောက်နေပါစေ၊ အဲဒါဟာ ကမ္ဘာကြီးအတွက် ခြိမ်းခြောက်မှုပဲဖြစ်ပါတယ်" ဟု လိုင်က တိုင်ပေမြို့တော်ရှိ တရုတ်နိုင်ငံဆိုင်ရာ လွှတ်တော်အချင်းချင်း မဟာမိတ် (IPAC) ညီလာခံတွင် ပြောကြား ခဲ့သည်။

IPAC သည် တရုတ်နိုင်ငံကို ဝေဖန်သည့် ရာနှင့်ချီသော နိုင်ငံရေးသမားများ စုဖွဲ့ထားသည့် နိုင်ငံတကာကွန်ရက် နှင့် ချိတ်ဆက်ထားသော အဖွဲ့ဖြစ်သည်။

"ထိုင်ဝမ်ဟာ အာဏာရှင်စနစ်ရဲ့ ခြိမ်းခြောက်မှုတွေရန်က ကင်းဝေးအောင် မိမိတို့ရဲ့ ဒီမိုကရေစီ မိတ်ဖက်တွေနဲ့ အတူ ဒီမိုကရေစီ ကာကွယ်ရေး ထီးရိပ်တစ်ခု ထူထောင်ဖို့ အကောင်းဆုံး ကြိုးပမ်းဆောင်ရွက်သွားမှာပါ" ဟု လိုင်က ပြောကြားခဲ့သည်။

IPAC အဖွဲ့အတွင်းရှိ နိုင်ငံ ၅ နိုင်ငံမှ လွှတ်တော်အမတ် ၈ ဦးကို ထိုင်ဝမ်မှ ထွက်ခွာသွားရန် တရုတ်အရာရှိများက အီးမေးလ်များပေးပို့ခြင်း၊ ဖုန်းခေါ်ဆိုမှုများ ပြုလုပ်ခြင်းတို့ ရှိခဲ့သည်ဟု IPAC က ထုတ်ပြန်ခဲ့သည်။

မိမိတို့၏ နှစ်ပတ်လည် ညီလာခံကို တရုတ်က ကြားဝင်စွက်ဖက်ရန် ကြိုပမ်းနေခြင်းကို ရှုတ်ချကြောင်း၊ ဒီမိုကရေစီ နည်းကျ ရွေးကောက်ခံထားရသည့် လွှတ်တော်အမတ်များသည် လွတ်လပ်စွာ သွားလာလည်ပတ်ခွင့်ရှိကြောင်း၊ ထိုကဲ့သို့ သွားလာခြင်းသည် ရွေးကောက်ခံအရာရှိများ၏ အခွင့်အရေးနှင့် တာဝန်ဝတ္တရားများအတွက် ပုံမှန် အနေ အထားဖြစ်ကြောင်း IPAC က ထုတ်ပြန်ခဲ့သည်။

Source: ရိုက်တာ

CNI International News

ဝါရှင်တန်၊ ဇူလိုင် ၃၀

ပြီးခဲ့သည့် ရက်ပိုင်းက အစ္စရေးတို့ သိမ်းပိုက်ထားသည့် ဂိုလန်ကုန်းမြင့် (Goland Heights) တိုက်ခိုက်မှုနှင့် ပတ်သက်ပြိး အမေရိကန်ဒုတိယသမ္မတ ကာမယ်လာ ဟားရစ် (Kamala Harris) က အစ္စရေး၏လုံခြုံရေး စီမံကာကွယ်မှုကို ထောက်ခံကြောင်း ဟားရစ်၏ အမျိုးသားလုံခြုံရေးအကြံပေးပုဂ္ဂိုလ် ဖီးလ် ဂေါ်ဒွန် (Phil Gordon)မှ ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဇူလိုင် ၂၇ ရက်က ဂိုလန်ကုန်းမြင့်ရှိ ဘောလုံးကွင်းတစ်ကွင်း ဒုံးကျည်ဖြင့် တိုက်ခိုက်ခံရမှုကြောင့် လူ ၁၂ ဦး သေဆုံးသွားခဲ့သည်။ ထိုဖြစ်စဉ်ကို ဟားရစ်က အနီးကပ်စောင့်ကြည့်ခဲ့ကြောင်း ဂေါ်ဒွန်က ပြောသည်။

"ဒုတိယသမ္မတဟာ အစ္စရေးနိုင်ငံမြောက်ပိုင်း မက်ဂျ်ဒဲလ် ရှမ်းစ် (Majdal Shams) မြို့မှာရှိတဲ့ ဘောလုံးကွင်းကို ဟစ်ဇ်ဘိုလာအဖွဲ့ရဲ့ ကြောက်မက်ဖွက်ကောင်းတဲ့ တိုက်ခိုက်မှု အခြေအနေကို အနီးကပ် စောင့်ကြည့်ခဲ့ပါတယ်။ အဲဒီတိုက်ခိုက်မှုမှာ ကလေးတွေနဲ့ ဆယ်ကျော်သက် လူငယ်တွေ သေဆုံးခဲ့ပါတယ်။ ဒုတိယသမ္မတဟာ အဲဒီလို ကြောက်မက်ဖွယ်ကောင်းတဲ့ တိုက်ခိုက်မှုကို ရှုတ်ချခဲ့ပြီး သေဆုံးသူတွေနဲ့ ဒဏ်ရာရသွားသူတွေအတွက် ဝမ်းနည်း ခဲ့ပါတယ်" ဟုဂေါ်ဒွန်က ပြောကြားခဲ့သည်။

အစ္စရေးအနေဖြင့် ၎င်း၏ လုံခြုံရေးကဏ္ဍတွင် ခြိမ်းခြောက်မှုများကို ဆက်လက် ရင်ဆိုင်နေရပြီး ဒုတိယသမ္မတ သည် အစ္စရေး၏ လုံခြုံရေးစီမံကာကွယ်မှုကို အခိုင်အမာ ထောက်ခံကြောင်းလည်း ဂေါ်ဒွန်က ပြောကြားခဲ့သည်။

ဟားမာ့စ်တိုက်ခိုက်မှုကိုတွေ့ရစဉ်

အစ္စရေးစစ်တပ်ကမူ ဂိုလန်ကုန်းမြင့်ပေါ်ရှိ ဘောလုံးကွင်းတွင် ဒုံးကျည်ဖြင့် တိုက်ခိုက်ခံရပြီးနောက် လက်ဘနွန် နိုင်ငံအတွင်းရှိ ဟစ်ဇ်ဘိုလာအဖွဲ့၏ ပစ်မှတ်များကို တိုက်ခိုက်ခဲ့ကြောင်း ပြောကြားခဲ့သည်။

ထိုဘောလုံးကွင်း တိုက်ခိုက်မှုကို လက်ဘနွန်နိုင်ငံအတွင်းရှိ အီရန်က ကျောထောက်နောက်ခံ ပြုထားသည့် ဟစ်ဇ်ဘိုလာအဖွဲ့က ပြုလုပ်ခဲ့ခြင်းဖြစ်ကြောင်း အစ္စရေးလေတပ်က ပြစ်တင်ပြောကြားခဲ့သော်လည်း ဟစ်ဇ်ဘိုလာ အဖွဲ့ကမူ ထိုတိုက်ခိုက်မှုကို ၎င်းတို့ လုပ်ဆောင်ခဲ့ခြင်း မရှိကြောင်း ငြင်းဆိုခဲ့သည်။

ထိုတိုက်ခိုက်မှု ဖြစ်ပွားပြီးနောက် အစ္စရေးစစ်တပ်သည် လက်ဘနွန်နိုင်ငံအတွင်းရှိ ဟားမာ့စ်အဖွဲ့၏ ပစ်မှတ်နေရာ ၇ ခုကို လေကြောင်းတိုက်ခိုက်မှုများ ပြုလုပ်ခဲ့ကြောင်း အစ္စရေးစစ်တပ်က ဇူလိုင် ၂၈ ရက်တွင် ထုတ်ပြန်ခဲ့သည်။

Source: ရိုက်တာ

CNI International News

မနီလာ၊ ဇူလိုင် ၃၀

ဖိလစ်ပိုင်နိုင်ငံသည် ၂၀၂၅ ခုနှစ်အတွက် ကာကွယ်ရေးအသုံးစရိတ်ကို ပီဆို ၂၅၆ ဒသမ ၁ ဘီလျံ (ဒေါ်လာ ၄ ဒသမ ၃၈ ဘီလျံ) အသုံးပြုရန် လျာထားကြောင်း ဘတ်ဂျက်ဝန်ကြီးဌာနက ဇူလိုင် ၂၉ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဖိလစ်ပိုင်သည် ပြည်ပရန် ကာကွယ်ရေးကဏ္ဍကို အဆင်မြှင့်တင်ရန် ကြိုးပမ်းနေချိန်တွင် ထိုအသုံးစရိတ် ပမာဏသည် ယခုနှစ် ကာကွယ်ရေး အသုံးစရိတ်ထက် ၆ ဒသမ ၄ ရာခိုင်နှုန်း မြင့်တက်လာခဲ့ခြင်း ဖြစ်သည်။

ထို့ပြင် တောင်တရုတ်ပင်လယ်တွင် တရုတ်နှင့် နယ်မြေပိုင်ဆိုင်ရေး အငြင်းပွားမှုများနှင့် နှစ်နိုင်ငံ ကမ်းခြေစောင့် တပ်ဖွဲ့ သင်္ဘောများအကြား ထိပ်တိုက်တွေ့မှုများ မြင့်တက်နေချိန်၌ ကာကွယ်ရေးအသုံးစရိတ်ကို မြှင့်တင်ရန် ဖိလစ်ပိုင်အစိုးရက အဆိုပြုခဲ့ခြင်းဖြစ်သည်။

ထိုကာကွယ်ရေး အသုံးစရိတ်သည် ၂၀၂၅ ခုနှစ်အတွက် အစိုးရ၏ အသုံးစရိတ် စုစုပေါင်း ပီဆို ၆ ဒသမ ၃၅ ထရီလျံ ၏ ၄ ရာခိုင်နှုန်းဖြစ်ပြီး ထိုအသုံးစရိတ် လျာထားမှုကို အတည်ပြုချက်ရရှိရန် ဘတ်ဂျက်ဝန်ကြီးဌာနက ဇူလိုင် ၂၉ ရက်တွင် လွှတ်တော်ကို တင်သွင်းခဲ့သည်။

ဖိလစ်ပိုင်သမ္မတကို တွေ့ရစဉ်

ကာကွယ်ရေး အသုံးစရိတ် စုစုပေါင်းအနက် ပီဆို ၂၀၄ ဒသမ ၄ ဘီလျံကို ကြည်း၊ ရေ၊ လေ တပ်ဖွဲ့များ၏ ကာကွယ်ရေး အစီအစဉ်များအတွက် အသုံးပြုမည်ဖြစ်ပြီး ပီဆို ဘီလျံ ၅၀ ကို စစ်တပ်၏ အဆင်မြှင့်တင် မွမ်းမံရေး အစီအစဉ်အတွက် အသုံးပြုသွားမည်ဟု ဘတ်ဂျက်ဝန်ကြီးဌာနက ပြောကြားခဲ့သည်။

ကာကွယ်ရေး အသုံးစရိတ် မြှင့်တင်မှုသည် မိမိတို့၏ အချုပ်အခြာအာဏာနှင့် နယ်မြေတည်တံ့ခိုင်မြဲရေးကို ထိန်းသိမ်းရန်ဖြစ်ကြောင်း ဘတ်ဂျက်ဝန်ကြီး အမ်မီနာ ပန်ဂန်ဒါမန် (Amenah Pangandaman) က လွှတ်တော် အမတ်များကို ပြောကြားခဲ့သည်။

အဆိုပြုထားသည့် ၂၀၂၅ ဘတ်ဂျက်အရ တောင်တရုတ်ပင်လယ်အတွင်းရှိ ကင်းလှည့်မစ်ရှင်များ၊ ထောက်ပို့မစ်ရှင် များကို လိုက်ပါစောင့်ကြပ်ပေးနေရသည့် ဖိလစ်ပိုင် ကမ်းခြေစောင့်တပ်ဖွဲ့သည် လက်ရှိ ဘတ်ဂျက်ထက် ၆ ရာခိုင်နှုန်း တိုးမြင့်ရရှိမည်ဖြစ်ပြီး တန်ဖိုးအားဖြင့် ၃၁ ဒသမ ၄ ဘီလျံ ရရှိမည်ဖြစ်သည်။

လာမည့်နှစ် အစိုးရ၏ အလုံးစုံ အသုံးစရိတ်သည် နိုင်ငံ့ဂျီဒီပီ၏ ၂၂ ရာခိုင်နှုန်းနှင့် ညီမျှနေကာ လက်ရှိ ဘတ်ဂျက် ထက် ၁၀ ဒသမ ၁ ရာခိုင်နှုန်း  မြင့်တက်ခဲ့ခြင်းဖြစ်သည်။

ထို့ပြင် အစိုးရ၏ အသုံးစရိတ် စုစုပေါင်းအနက် ပညာရေးကဏ္ဍအတွက် အသုံးစရိတ်ကို ပီဆို ၉၇၇ ဒသမ ၆ ဘီလျံ အထိ လျာထားကြောင်း သိရသည်။

Source: ရိုက်တာ

CNI International News

တိုကျို ဇူလိုင် ၃၀

Quad အဖွဲ့ဝင်နိုင်ငံများဖြစ်သည့် ဩစတြေးလျ၊ အိန္ဒိယ၊ ဂျပန်နှင့် အမေရိကန်တို့မှ နိုင်ငံခြားရေးဝန်ကြီးများသည် တောင်တရုတ်ပင်လယ်အတွင်း ခြိမ်းခြောက်မှုများ၊ အန္တရာယ်ရှိသည့် ချဉ်းကပ်လုပ်ဆောင်ပုံများနှင့် ပတ်သက်ပြီး အလွန်စိုးရိမ်ကြောင်း ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဂျပန်နိုင်ငံ၊ တိုကျိုမြို့တော်တွင် ပြုလုပ်သည့် Quad အစည်းအဝေးအပြီး ပူးတွဲထုတ်ပြန်ချက်တွင် အဖွဲ့ဝင်နိုင်ငံများ အနေဖြင့် ဒေသတွင်း ပင်လယ်ရေကြောင်း လုံခြုံရေးကို မြှင့်တင်ရန်လည်း ကတိပြုခဲ့ကြသည်။

ထိုအစည်းအဝေးကို ဩစတြေးလျနိုင်ငံခြားရေးဝန်ကြီး ပန်နီ ဝေါင် (Penny Wong) ၊ အိန္ဒိယနိုင်ငံခြားရေးဝန်ကြီး ဆူဘရာမန်ယမ် ဂျိုင်ရှန်ကာ (Subrahmanyam Jaishankar) ၊ ဂျပန်နိုင်ငံခြားရေးဝန်ကြီး ယိုကို ကာမီကာဝါ (Yoko Kamikawa) နှင့် အမေရိကန်နိုင်ငံခြားရေးဝန်ကြီး အန်တိုနီ ဘလင်ကင် (Antony Blinken) တို့ တက် ရောက်ခဲ့သည်။

ဇူလိုင် ၂၈ ရက်က အမေရိကန်နှင့် ဂျပန်အကြား ပြုလုပ်ခဲ့သည့် လုံခြုံရေးဆွေးနွေးပွဲများတွင်လည်း မဟာမိတ် နှစ်နိုင်ငံက တရုတ်သည် ဒေသတွင်း ရင်ဆိုင်နေရသည့် အကြီးမားဆုံး မဟာဗျူဟာမြောက် စိန်ခေါ်မှုဖြစ်ကြောင်း တံဆိပ်ကပ်ခဲ့သည်။

Quad အဖွဲ့၀င်များ ဆွေးနွေးနေစဉ်

"အရှေ့တရုတ်ပင်လယ်နဲ့ တောင်တရုတ်ပင်လယ်တွေက အခြေအနေတွေကို ကျနော်တို့ အရမ်းစိုးရိမ်ပါတယ်။ အင်အားသုံးမှု ဒါမှမဟုတ် ခြိမ်းခြောက်မှုတွေနဲ့ ရှိရင်းစွဲ အခြေအနေကို ပြောင်းလဲမယ့် တစ်ဖက်သတ် လုပ်ဆောင် ချက်တွေကို ပြင်းပြင်းထန်ထန်ဆန့်ကြောင်း ထပ်လောင်း အတည်ပြုသည်”ဟု နိုင်ငံခြားရေးဝန်ကြီးများက တရုတ် ကို တိုက်ရိုက် အမည်တပ်ခြင်းမရှိဘဲ ထုတ်ပြန်ခဲ့သည်။

ထို့ပြင် တောင်တရုတ်ပင်လယ်တွင် ကမ်းခြေစောင့်တပ်ဖွဲ့ သင်္ဘောများနှင့် ပင်လယ်ရေကြောင်း ပြည်သူ့စစ် သင်္ဘောများကို အန္တရာယ်ရှိစွာ အသုံးပြုမှု အပါအဝင် ခြိမ်းခြောက် အကျပ်ကိုင်သည့် လုပ်ဆောင်ချက်များ၊ အငြင်းပွားဖွယ် စစ်ရေး အသွင်ဆောင်မှုများနှင့် ပတ်သက်ပြီး စိုးရိမ်ကြောင်းလည်း Quad နိုင်ငံခြားရေးဝန်ကြီးများ က ပြောကြားခဲ့သည်။

Quad နိုင်ငံခြားရေးဝန်ကြီးများ၏ ထုတ်ပြန်ချက်နှင့်ပတ်သက်ပြီး တရုတ်နိုင်ငံခြားရေးဝန်ကြီးဌာန၏ ပြောရေးဆို ခွင့်ရှိသူ လင်ကျန်း (Lin Jian) က တုန့်ပြန်ခဲ့ရာတွင် Quad အဖွဲ့သည် တင်းမာမှုများ မြင့်တက်စေရန် လုပ်ဆောင် နေခြင်း၊ ထိပ်တိုက်တွေ့ရန် လှုံ့ဆော်နေခြင်း၊ အခြားနိုင်ငံများ၏ ဖွံ့ဖြိုးတိုးတက်မှုကို ဟန့်တားခြင်းတို့ လုပ်ဆောင် ခဲ့သည်ဟု ပြောကြားခဲ့သည်။

ဘလင်ကင်ကိုတွေ့ရစဉ်

မကြာသေးမီက တရုတ်သင်္ဘောများသည် တောင်တရုတ်ပင်လယ်အတွင်းရှိ ပိုင်ဆိုင်မှု အငြင်းပွားနေသည့် Second Thomas သောင်ခုံအနီးတွင် ဖိလစ်ပိုင်သင်္ဘောများနှင့် ထိပ်တိုက်တွေ့မှုများ ဖြစ်ပွားခဲ့ပြီး ဇူလိုင်လ အတွင်းက တရုတ်နှင့်ဖိလစ်ပိုင်အကြား တင်းမာမှုများ လျှော့ချရန် သဘောတူညီခဲ့သည့်တိုင် တင်းမာမှုများ ရှိနေဆဲဖြစ်သည်။

Quad အဖွဲ့ကမူ ၎င်းတို့အနေဖြင့် ဂြိုဟ်တု ဆက်သွယ်ရေး အချက်အလက်များ၊ သက်ဆိုင်ရာ လေ့ကျင့် သင်ကြား မှုများမှတစ်ဆင့် မိတ်ဖက်နိုင်ငံအချင်းချင်း ကူညီပေးမှု အပါအဝင် လွတ်လပ်ပွင့်လင်းသည့် ပင်လယ်ရေကြောင်း အခင်းအကျင်းကို ထိန်းသိမ်းရန် အစီအစဉ်များ လုပ်ဆောင်နေကြောင်း ပြောကြားခဲ့သည်။

Source: ရိုက်တာ

CNI International News

ဘန်ကောက်၊ ဇူလိုင် ၂၉

ထိုင်းနိုင်ငံတွင် အထက်လွှတ်တော်ဥက္ကဋ္ဌအသစ်အဖြစ် ရွေးကောက်ခံရသည့် မွန်ကောလ် သူရဆာဂျာ (Mongkol Surasajja) နှင့် ၎င်း၏ လက်ထောက်နှစ်ဦးသည် ဇူလိုင် ၂၇ ရက်က ကျမ်းသစ္စာကျိန်ဆိုခဲ့သည်ဟု ဘန်ကောက်ပို့စ် မှ ဖော်ပြခဲ့သည်။

မစ္စတာ မွန်ကောလ်နှင့် ၎င်း၏ လက်ထောက်နှစ်ဦးဖြစ်သည့် ဗိုလ်ချုပ်ကြီး ကရီယန်ကရိုင် ဆရီရတ် (Kriangkrai Srirak) နှင့် ဘွန်းဆောင်း နွိုင်ဆိုဖွန် (Boonsong Noisophon) တို့သည် တော်ဝင်နန်းတော်၏ ထောက်ခံချက်ကို လက်ခံခဲ့ပြီး ထိုထောက်ခံချက်သည် ကျမ်းသစ္စာ ကျိန်ဆိုပွဲ အခမ်းအတွက် တရားဝင် လုပ်ထုံးလုပ်နည်းတစ်ခု ဖြစ်သည်။

အထက်လွှတ်တော်များနှင့် ထိပ်သီးအရာရှိများသည် တော်ဝင်နန်းတော်၏ ထောက်ခံမှုကို ပေးအပ်ခြင်းခံရပြီး ထိုထောက်ခံချက်ကို အခမ်းအနားအား ဦးစီးကျင်းပသည့် အစိုးရအတွင်းဝန်ချုပ် နတ်ဂျာရီ အန်န်တာစစ် (Natjaree Anantasilp) က လက်ခံသူများထံ ဆောင်ကြဉ်းပေးရခြင်းဖြစ်သည်။

ထိုကျမ်းသစ္စာကျိန်ဆိုပွဲတွင် မစ္စစ် နတ်ဂျာရီက ဘူရီရမ် (Buri Ram) အုပ်ချုပ်ရေးမှူးဟောင်း မစ္စတာ မွန်ကောလ် ကို အထက်လွှတ်တော်ဥက္ကဋ္ဌသစ် အဖြစ်လည်းကောင်း၊ Bhumjaithai ပါတီ အကြံပေးပုဂ္ဂိုလ်ဟောင်း ဗိုလ်ချုပ်ကြီး ကရီယန်ကရိုင်ကို ဒုတိယလွှတ်တော်ဥက္ကဋ္ဌ(၁) အဖြစ်လည်းကောင်း၊ ရွေးကောက်ပွဲကော်မရှင် 
အကြီးအကဲ ဟောင်း မစ္စတာဘွန်းဆောင်းကို ဒုတိယလွှတ်တော်ဥက္ကဋ္ဌ အဖြစ်လည်းကောင်း တော်ဝင်နန်းတော်၏ ထောက်ခံ ချက်ကို ဖတ်ကြားခဲ့သည်။

ထို့နောက် ကျမ်းသစ္စာကျိန်ဆိုပွဲ၏ လုပ်ထုံးလုပ်နည်းများ ပြီးဆုံးသွားချိန်တွင် ရာထူးခန့်အပ်မှု လုပ်ငန်းစဉ် အဆုံးသတ်ခဲ့ပြီး လွှတ်တော်ဥက္ကဋ္ဌသစ်နှင့် လက်ထောက်များသည် ၎င်းတို့၏ တာဝန်များကို စတင်တာဝန် ထမ်းဆောင်ခဲ့သည်။

 ထိုင်းအထက်လွှတ်တော်ဥက္ကဋ္ဌအသစ်ကိုတွေ့ရစဉ်

ပြီးခဲ့သည့် သီတင်းပတ်က မစ္စတာ မွန်ကောလ်သည် အထက်လွှတ်တော်ဥက္ကဋ္ဌအဖြစ် အထက်လွှတ်တော် အမတ်များ၏ မဲခွဲဆုံးဖြတ်မှုတွင် မဲစုစုပေါင်း ၂၀၀ ရှိသည့်အနက် ထောက်ခံမဲ ၁၅၉ မဲဖြင့် အနိုင်ရရှိခဲ့သည်။

အထက်လွှတ်တော်ဥက္ကဋ္ဌ ရွေးကောက်ပွဲများကို ခရိုင်အဆင့်၊ ပြည်နယ်အဆင့်နှင့် နိုင်ငံတော်အဆင့် အစရှိသည့် အဆင့် ၃ ဆင့်ခွဲကာ ရက်အနည်းငယ်ကြာ အချိန်ယူ ပြုလုပ်ခြင်းဖြစ်သည်။

 Bhumjaithai ပါတီသည် အထက်လွှတ်တာ်၏ အုပ်စု ၃ စုအနက် အင်အားအကြီးဆုံး လွှတ်တော်ကိုယ်စားလှယ် အင်အားစုဖြစ်ပြီး ထိုလွှတ်တော်ကိုယ်စားလှယ်များထဲမှ အချို့သည် အာဏာရဖြူးထိုင်းပါတီ၊ အတိုက်အခံ Move Forward ပါတီတို့နှင့် အနည်းငယ် ဆက်နွှယ်မှုရှိနေသည်။

ပြီးခဲ့သည့်သီတင်းပတ်က ရွေးကောက်ပွဲရလဒ်များကို ဝန်ကြီးချုပ် ဆရီသာ သာဗီဆင် (Srettha Thavisin) ထံ ပေးပို့ခဲ့ပြီး ဝန်ကြီးချုပ်က တော်ဝင်ထောက်ခံချက် ရယူရန်အတွက် ဘုရင့်ထံ တင်သွင်းခဲ့ခြင်းဖြစ်ကာ တော်ဝင် နန်းတော်က ရာထူးခန့်အပ်ကြောင်း ထောက်ခံချက်ကို ထုတ်ပေးခဲ့ခြင်းဖြစ်သည်။

Source: ဘန်ကောက်ပို့စ်

CNI International News

မော်စကို၊ ဇူလိုင် ၂၉

အမေရိကန်အနေဖြင့် ဂျာမနီတွင် တာဝေးပစ်ဒုံးကျည်များ ဖြန့်ကြက်ချထားမည်ဆိုပါက စစ်အေးကာလက ဒုံးကျည် အကျပ်အတည်းပုံစံမျိုး ဖြစ်လာနိုင်ကြောင်း ရုရှားသမ္မတ ပူတင် (Vladimir Putin)က သတိပေးခဲ့သည်ဟု ရိုက်တာမှ ဖော်ပြခဲ့သည်။

အမေရိကန်က ဒုံးကျည်များ ဖြန့်ကြက်ချထားမည်ဆိုပါက ရုရှားကလည်း အနောက်နိုင်ငံများကို ပစ်ခတ်ရောက်ရှိ နိုင်သည့် အလားတူ တာဝေးပစ် ဒုံးကျည်များကို ဖြန့်ကြက်ချသွားမည်ဟု ပူတင်က ပြောသည်။

ဂျာမနီတွင် ၂၀၂၆ ခုနှစ်မှစပြီး SM-6 နှင့် Tomahawk ခရုဇ်ဒုံးကျည်များ၊ အသံထက်မြန်သည့် ဟိုက်ပါဆောနစ် လက်နက်များ အပါအဝင် တာဝေးပစ် ဒုံးကျည်များကို ဖြန့်ကြက်ချထားရန် ပြင်ဆင်နေကြောင်း အမေရိကန်က ဇူလိုင် ၁၀ ရက်က ပြောကြားခဲ့သည်။

အမေရိကန်၏ ဒုံးကျည်များ ဖြန့်ကြက်ချထားမည့် အစီအစဉ်ကို တုန့်ပြန်သည့်အနေဖြင့် ပူတင်က စိန့်ပီတာစဘတ်ချ် (St Petersburg) မြို့တွင် ပြုလုပ်သည့် ရုရှား၏ ရေတပ်နေ့ အခမ်းအနားတွင် ရုရှား၊ တရုတ်၊ အယ်လ်ဂျီးရီးယားနှင့် အိန္ဒိယနိုင်ငံများမှ သင်္ဘောသားများကို မိန့်ခွန်းပြောကြားခဲ့သည်။

ထိုမိန့်ခွန်းအတွင်း ပူတင်က အမေရိကန်၏ အစီအစဉ်သည် စစ်အေးကာလက ဒုံးကျည် အကျပ်အတည်မျိုး ဖြစ်စေသည့် အန္တရာယ်ကို မြင့်တက်စေလိမ့်မည်ဖြစ်ကြောင်း သတိပေးခဲ့သည်။

ပူတင်ကို တွေ့ရစဉ်

"ကျနော်တို့ နယ်နိမိတ်ပေါ်က ပစ်မှတ်တွေဆီကို နျူကလီးယားလက်နက်တွေ တပ်ဆင်ထားနိုင်ခြေရှိတဲ့ အဲဒီ ဒုံးကျည်တွေ ပျံသန်းရောက်ရှိမယ့် ကြာမြင့်ချိန်ဟာ ၁၀ မိနစ်ပဲ ကြာပါလိမ့်မယ်။ ကျနော်တို့ကလည်း ဥရောပနဲ့ ကမ္ဘာ့အခြား နေရာဒေသတွေမှာရှိတဲ့ အမေရိကန်ရဲ့ ဂြိုဟ်တုလွှတ်တင်မှုတွေ အပါအဝင် အမေရိကန်ရဲ့ လုပ်ဆောင်ချက်တွေအတိုင်း ထပ်တူညီတဲ့ အစီအစဉ်တွေကို ချမှတ်လုပ်ဆောင်သွားမှာပါ"ဟု ပူတင်က သတိ ပေးခဲ့သည်။

၂၀၂၂ ခုနှစ်တွင် ယူကရိန်းကို စစ်တပ်စေလွှတ်ပြီး တိုက်ခိုက်ခဲ့သည့် ပူတင်က ယူကရိန်းစစ်ပွဲသည် အနောက် နိုင်ငံများနှင့် ရုရှားအကြား သမိုင်းဝင်အားပြိုင်မှု၏ တစ်စိတ်တစ်ပိုင်းဖြစ်ပြီး ၁၉၉၁ ခုနှစ်တွင် ဆိုဗီယက်ယူနီယံ ပြိုကွဲပြီးနောက် အနောက်နိုင်ငံများက ရုရှားကို အရှက်ရစေရန် လုပ်ဆောင်ခဲ့ခြင်းဖြစ်သည်ဟု ပူတင်က ပြောကြား ခဲ့သည်။

ယူကရိန်းနှင့် အနောက်နိုင်ငံများကမူ ပူတင်သည် နယ်မြေချဲ့ထွင်သည့် ပုံစံမျိုးဖြင့် ယူကရိန်း၏ နယ်နိမိတ်များကို သိမ်းပိုက်နေကြောင်း စွပ်စွဲခဲ့ပြိး လက်ရှိတွင် ခရိုင်းမီးယား (Crimea) ကျွန်းဆွယ်နှင့် ယူကရိန်းအရှေ့ပိုင်းမှ ဒေသ ၄ ခု အပါအဝင် ယူကရိန်း၏ နယ်နိမိတ် စုစုပေါင်း၏ ၁၈ ရာခိုင်နှုန်းကို ထိန်းချုပ်ထားသည့် ရုရှားအား အနိုင်ယူ တိုက်ခိုက် သွားမည်ဖြစ်ကြောင်း ပြောကြားခဲ့သည်။

ရုရှားကမူ ထိုနယ်မြေများသည် တစ်ချိန်က ရုရှားအင်ပါယာ၏ အစိတ်အပိုင်းများဖြစ်ခဲ့ပြီး ယခုတစ်ကြိမ်တွင် ရုရှား ပိုင် နယ်မြေများအဖြစ် ပြန်လည် သိမ်းယူခဲ့ခြင်းဖြစ်ကာ ယူကရိန်းကို ပြန်ပေးမည် မဟုတ်ကြောင်း ပြောကြားခဲ့ သည်။

Source: ရိုက်တာ

CNI International News

ပြုံယမ်း၊ ဇူလိုင် ၂၉

မြောက်ကိုရီးယားခေါင်းဆောင် ကင်မ်ဂျုံအန်(Kim Jong Un) အမိန့်ပေးသည့်အခါ စစ်ပွဲဖြစ်လာလျှင် ရန်သူအားလုံးကို အလုံးစုံချေမှုန်းပစ်မည်ဟု ကတိပြုခဲ့ကြောင်း ရိုက်တာမှ ဖော်ပြခဲ့သည်။

ခေါင်းဆောင်ကင်မ်သည် ဇူလိုင် ၂၇ ရက်က ပြုလုပ်သည့် ၇၁ နှစ်ပြည့် ကိုရီးယားစစ်ပွဲ ယာယီစစ်ပြေငြိမ်းသည့် နှစ်ပတ်လည် အခမ်းအနားကို အောင်ပွဲခံရန် တက်ရောက်ခဲ့သည်။

ခေါင်းဆောင်ကင်မ် ပါဝင်သည့် ထိုအစည်းအဝေးတွင် မြောက်ကိုရီးယား ကြည်းတပ် ဗိုလ်မှူးကြီး ရီအွန်ယွန်(Ri Un Ryong)နှင့် ရေတပ်ဒုတိယတပ်မှူး ယူဂယွန်ဆောင်(Yu Kyong Song) အပါအဝင် အကြီးတန်းစစ်ဘက် တာဝန်ရှိသူများက အမေရိကန်နှင့် တောင်ကိုရီးယားကို ရည်ရွယ်သည့် မှတ်ချက်များကို ပြောကြားခဲ့သည်။

မြောက်ကိုရီးယားနှင့် အမေရိကန်တို့သည် တင်းမာမှုများကို နျူကလီးယားဖျက်သိမ်းရေး ဆွေးနွေးမှုများသည် ၂၀၁၉ ခုနှစ်ကတည်းက လျော့ကျခဲ့ပြီး သံတမန်ဆက်ဆံရေးများလည်း မရှိခဲ့ပေ။

လာမည့် အမေရိကန်ရွေးကောက်ပွဲတွင် မည်သူ ရွေးကောက်ခံရမည်ဖြစ်စေ အခြေအနေ ပြောင်းလဲသွားမည် မဟုတ်ကြောင်း မြောက်ကိုရီးယား နိုင်ငံပိုင်မီဒီယာတွင် မကြာသေးမီက ဖော်ပြခဲ့သည်။

 မြောက်ကိုရီးယားခေါင်းဆောင် ကင်မ်ဂျုံအန်ကိုတွေ့ရစဉ်

အမေရိကန်နှင့် တောင်ကိုရီးယားသည် နျူကလီးယား စစ်ပွဲဖြစ်လာစေရန် လှုံ့ဆော်နေကြောင်း မြောက်ကိုရီးယား က စွပ်စွဲပြောကြားခဲ့ပြီး စစ်ပွဲဖြစ်လာပါက ခေါင်းဆောင်ကင်မ် အမိန့်ပေးလာသည်နှင့်တစ်ပြိုင်နက် ရန်သူများကို သာလွန်အင်အားဖြင့် တိုက်ခိုက်ချေမှုန်းသွားမည်ဟု ပြောကြားခဲ့သည်။

မြောက်ကိုရီးယားသည် အမေရိကန်၊ တရုတ်တို့နှင့်အတူ သုံးနှစ်ကြာ ဖြစ်ပွားသည့် ကိုရီးယားစစ်ပွဲကို အဆုံးသတ် ရန် ၁၉၅၃ ခုနှစ်၊ ဇူလိုင် ၂၇ ရက်တွင် ယာယီစစ်ပြေငြိမ်းရေး သဘောတူစာချုပ် ချုပ်ဆိုခဲ့သည်။

ထိုအချိန်က အမေရိကန်ဗိုလ်ချုပ်ကြီးများသည် တောင်ကိုရီးယားကို ကျောထောက်နောက်ခံ ပေးထားသည့် ကုလသမဂ္ဂတပ်ဖွဲ့များ၏ကိုယ်စား သဘောတူစာချုပ်ကို လက်မှတ်ရေးထိုးခဲ့သည်။

မြောက်ကိုရီးယားက ဇူလိုင် ၂၇ ရက်နေ့ကို အောင်ပွဲနေ့ဟု သတ်မှတ်ခေါ်ဆိုသော်လည်း တောင်ကိုရီးယားကမူ ယင်းနေ့တွင် အထင်ကရ အခမ်းအနားများ ပြုလုပ်ခြင်းမရှိပေ။

ကိုရီးယားစစ်ပွဲသည် ငြိမ်းချမ်းရေးစာချုပ်ဖြင့် အဆုံး သတ်ခဲ့ခြင်း မဟုတ်ဘဲ စစ်ပွဲရပ်ဆိုင်းရန် သဘောတူညီမှု ဖြင့်သာ အဆုံးသတ်ခဲ့ခြင်းဖြစ်သည်။

ထို့ကြောင့် ကိုရီးယား နှစ်နိုင်ငံအကြား သဘောတရားအရ စစ်ပွဲဖြစ်ပွားနေဆဲ အခြေအနေတွင်ပဲ ဆက်လည် တည်ရှိနေသည်။

Source: ရိုက်တာ

CNI International News

ဂျရုဆလင်၊ ဇူလိုင် ၂၉

အစ္စရေးတို့ သိမ်းပိုက်ထားသော ဂိုလန်ကုန်းပြင်မြင့် (Golan Heights) ရှိ ဘောလုံးကွင်းတစ်ကွင်းကို ဇူလိုင် ၂၇ ရက်က ရော့ကတ်တစ်စင်း ထိမှန်မှုကြောင့် လူငယ် ၁၂ ဦး သေဆုံးခဲ့သည်ဟု အစ္စရေးအာဏာပိုင်များက ပြောကြားခဲ့ကြောင်း အေပီမှ ဖော်ပြထားသည်။

ထိုလေကြောင်းတိုက်ခိုက်မှုသည် အစ္စရေးနှင့် လက်ဘနွန်စစ်သွေးကြွအဖွဲ့ ဟစ်ဇ်ဘိုလာ(Hezbollah)ကြား တိုက်ပွဲများ စတင်ဖြစ်ပွားချိန်ကတည်းက နိုင်ငံ၏မြောက်ပိုင်း နယ်စပ်တစ်လျှောက် အစ္စရေးကို ပစ်မှတ်ထားသည့် တိုက်ခိုက်မှုများအတွင်း လူသေဆုံးမှုအများဆုံး တိုက်ခိုက်မှုကြီးဖြစ်လာခဲ့သည်။

ထို့အပြင် ကျယ်ပြန့်သော ဒေသတွင်းစစ်ပွဲတစ်ရပ် ဖြစ်လာမည့် အရေးကို စိုးရိမ်လျက်ရှိသည်။

ဂိုလန်ကုန်းပြင်မြင့်တွင် လေကြောင်း တိုက်ခိုက်မှု ဖြစ်စဉ်အတွက် အစ္စရေးက ဟစ်ဇ်ဘိုလာအဖွဲ့ကို ပြစ်တင် ပြောကြားခဲ့သော်လည်း ဟစ်ဇ်ဘိုလာအဖွဲ့က ငြင်းဆိုခဲ့သည်။

အစ္စရေးဝန်ကြီးချုပ် ဘန်ဂျမင်နေတန်ယာဟုကို တွေ့ရစဉ်

အစ္စရေးဝန်ကြီးချုပ် ဘန်ဂျမင်နေတန်ယာဟု(Benjamin Netanyahu)က ဟစ်ဇ်ဘိုလာအဖွဲ့အား ထိုတိုက်ခိုက် မှုအတွက် တန်ဖိုးကြီးကြီးမားမား ပြန်လည် ပေးဆပ်ရလိမ့်မည်ဟု သတိပေးပြောကြားခဲ့သည်။

အစ္စရေးစစ်တပ် ပြောရေးဆိုခွင့်ရှိသူ ရေတပ်ဗိုလ်ချုပ် ဒန်နီယယ်ဟာဂါရီ(Daniel Hagari)က ထိုတိုက်ခိုက်မှုအား အောက်တိုဘာ ၇ ရက် ဟားမာ့စ်(Hamas)တို့၏ တိုက်ခိုက်မှု ဖြစ်စဉ်ပြီးနောက် အစ္စရေးအရပ်သား သေဆုံးမှု အများဆုံး တိုက်ခိုက်မှုဖြစ်စဉ်ဖြစ်ကြောင်း ပြောကြားခဲ့သည်။

ယင်းတိုက်ခိုက်မှုတွင် နောက်ထပ်လူ ၂၀ ခန့် ထိခိုက်ဒဏ်ရာရရှိခဲ့သည်။

“ဟစ်ဇ်ဘိုလာအဖွဲ့က စည်းကျော်လာပြီး ဒါကို လက်တုန့်ပြန်သွားမှာပါ”ဟု အစ္စရေးနိုင်ငံခြားရေးဝန်ကြီး အစ္စရေးကာ့ဇ်(Israel Katz)က Israeli Channel 12 သတင်းကို ပြောကြားခဲ့သည်။

ဟစ်ဇ်ဘိုလာ အကြီးအကဲ၏ ပြောရေးဆိုခွင့်ရှိသူ မိုဟာမက်အက်ဖစ်(Mohammed Afif)က ဟစ်ဇ်ဘိုလာအဖွဲ့ အနေဖြင့် မက်ဂျ်ဒယ်ရှမ်း(Majdal Shams)မြို့ကို တိုက်ခိုက်မှု မပြုလုပ်ခဲ့ကြောင်း ငြင်းဆိုခဲ့သည်။ 

ဂိုလန်ကုန်းပြင်မြင့်ရှိ ဘောလုံးကွင်း တိုက်ခိုက်ခံရစဉ်

ဟစ်ဇ်ဘိုလာအဖွဲ့သည် တိုက်ခိုက်မှု ဖြစ်စဉ်များကို ပုံမှန်အားဖြင့် ငြင်းဆိုလေ့မရှိပေ။

အမေရိကန်သို့ ရောက်ရှိနေသည့် နေတန်ယာဟုသည် မည်သည့်အချိန်တွင် အစ္စရေးသို့ ပြန်လာမည်ဆိုခြင်းကို ပြောကြားခဲ့ခြင်းမရှိဘဲ ခရီးစဉ်ကို အချိန်လျှော့ချမည်ဟု ပြောကြားခဲ့ကြောင်း အစ္စရေးဝန်ကြီးချုပ်ရုံးက ပြောကြား ခဲ့သည်။

နေတန်ယာဟုသည အစ္စရေးသို့ ပြန်ရောက်ရောက်ချင်း လုံခြုံရေးအစိုးရအဖွဲ့ အစည်းအဝေး တစ်ရပ် ပြုလုပ်သွားမည်ဟု ဆိုသည်။

နေတန်ယာဟု၏ အစိုးရအဖွဲ့မှ လက်ယာစွန်းအဖွဲ့ဝင်များက ဟစ်ဇ်ဘိုလာကို ပြင်းပြင်းထန်ထန် လက်တုန့်ပြန်ရန် တောင်းဆိုခဲ့သည်။

မက်ဂျ်ဒယ်ရှမ်း(Majdal Shams)မြို့ကို ပစ်ခတ်ခဲ့သည့် ရော့ကတ်သည် လက်ဘနွန်တောင်ပိုင်း ချီဘား(Chebaa) ကျေးရွာ၏ မြောက်ပိုင်းမှ ပစ်လွှတ်ခဲ့ခြင်းဖြစ်ကြောင်း ၎င်း၏ အကဲဖြတ် လေ့လာမှုတွင် တွေ့ရှိခဲ့သည်ဟု အစ္စရေး စစ်တပ်က ပြောကြားခဲ့သည်။

Source: အေပီ