CNI International News

ကိယက်ဗ်၊ ဒီဇင်ဘာ ၁၁

လာမည့်နှစ်အတွင်း သိမ်းပိုက်ခံ ယူကရိန်းနယ်မြေများတွင် ရုရှားသမ္မတ ရွေးကောက်ပွဲအတွက် မဲရုံများပြုလုပ်ပြီး မဲပေးမှုများ ပြုလုပ်လိုသည့် ရုရှား၏ ရည်ရွယ်ချက်ကို ယူကရိန်းက ရှုတ်ချခဲ့သည်ဟု အေပီမှ ဖော်ပြခဲ့သည်။

သိမ်းပိုက်ခံ ယူကရိန်း၏ ဒေသများတွင် မဲပေးမှုများ ပြုလုပ်မည့် အစီအစဉ်သည် တရားဝင်မှု ရှိလိမ့်မည် မဟုတ် ကြောင်း ယူကရိန်းနိုင်ငံခြားရေးဝန်ကြီးဌာနက ပြောကြားခဲ့သည်။

အဆိုပါ ရုရှားရွေးကောက်ပွဲများကို စောင့်ကြည့်လေ့လာရန် နိုင်ငံတကာ၏ လေ့လာစောင့်ကြည့်သူများ စေလွှတ်မှု သည် ရာဇဝတ်မှုဆိုင်ရာ တာဝန်ယူမှု၊ တာဝန်ခံမှုနှင့် ရင်ဆိုင်ရမည်ဖြစ်ကြောင်း သတိပေးခဲ့သည်။

"နိုင်ငံတကာ အသိုင်းအဝိုင်းအနေနဲ့ သိမ်းပိုက်ခံထားရတဲ့ ယူကရိန်းနယ်မြေတွေမှာ ပြုလုပ်မယ့် ရွေးကောက်ပွဲ တွေကို ပြတ်ပြတ်သားသား ရှုတ်ချကြဖို့ ကျနော်တို့ တိုက်တွန်းပါတယ်။ ပြီးတော့ အဲဒီရွေးကောက်ပွဲမှာ ပါဝင်တဲ့ အဖွဲ့အစည်းတွေကို ပိတ်ဆို့မှုတွေ ပြုလုပ်ဖို့ တိုက်တွန်းပါတယ်" ဟု ယူကရိန်းနိုင်ငံခြားရေးဝန်ကြီးဌာနက ထုတ်ပြန်ခဲ့သည်။

ရုရှားသမ္မတ ပူတင်ကိုတွေ့ရစဉ်

ရုရှားနိုင်ငံ၏ လွှတ်တော်အမတ်များသည် ၂၀၂၄ သမ္မတရွေးကောက်ပွဲကို မတ်လ ၁၇ ရက်တွင် ကျင်းပရန် ဒီဇင်ဘာ ၇ ရက်က အတည်ပြုခဲ့သည်။ 

ဒီဇင်ဘာ ၈ ရက်တွင်မူ ရုရှားသမ္မတ ဗလာဒီမာပူတင်က ရွေးကောက်ပွဲကို နောက်တစ်ကြိမ် ဝင်ရောက်ယှဉ်ပြိုင် မည်ဖြစ်ကြောင်း ကြေညာခဲ့သည်။ ထို့ကြောင့် ပူတင်သည် ၆ နှစ်သက်တမ်းရှိသည့် နောက်ထပ် သမ္မတသက်တမ်း ကို  ထပ်မံအနိုင်ရရှိလိမ့်မည်ဟု ကျယ်ကျယ်ပြန့်ပြန့် ယူဆခံထားရသည်။

ရုရှားအာဏာပိုင်များသည် ၎င်းတို့ သိမ်းပိုက်ထားသည့် ယူကရိန်း၏ ဒွန်နက်စ် (Donetsk) ၊ လူဟန့်စ် (Luhansk) ၊ ဇာပိုရီရှား (Zapoizhzhia) နှင့် ခါဆွန်(Kherson) ဒေသများတွင် ရွေးကောက်ပွဲများ ပြုလုပ်ရန် သင့်/မသင့် စဉ်းစား လျက်ရှိသည်။

ပူတင်သည် အဆိုပါဒေသများတွင် မာရှယ်လော ထုတ်ပြန်ထားပြီး ရုရှား လွှတ်တော်အမတ်များကမူ ရွေးကောက်ပွဲ ကျင်းပနိုင်ရန် စည်းမျဉ်းစည်းကမ်းများ ပြဋ္ဌာန်းခဲ့သည်။

ရုရှား သမ္မတရွေးကောက်ပွဲ မဲဆွယ်မှုများကိုတွေ့ရစဉ်

ရုရှားသည် စက်တင်ဘာလ အတွင်းကလည်း အဆိုပါဒေသများတွင် ၎င်းတို့ခန့်အပ်ခဲ့သည့် ဥပဒေပြုအာဏာပိုင် အဖွဲ့များအတွက် ရွေးကောက်ပွဲများ ပြုလုပ်ခဲ့ပြီး ယူကရိန်းနှင့် အနောက်မဟာမိတ်နိုင်ငံများကမူ ထိုရွေးကောက်ပွဲ ကို အတုအယောင်ဖြစ်ကြောင်း ဝေဖန်ရှုတ်ချခဲ့သည်။

သိမ်းပိုက်ထားသည့် ယူကရိန်းနယ်မြေများပေါ်တွင် ရုရှားသမ္မတ ရွေးကောက်ပွဲအတွက် မဲရုံများဖွင့်လှစ်ပြီး မဲပေးမည့် အစီအစဉ်အပေါ် ရွေးကောက်ပွဲအာဏာပိုင်များ၊ ယူကရိန်းရှိ ရုရှားက ခန့်အပ်ထားသည့် ဒေသ အုပ်ချုပ်ရေးမှူးများ၊ လုံခြုံရေးတပ်ဖွဲ့များနှင့် ရုရှားစစ်တပ်တို့က အတူပူးပေါင်းပြီး ဆုံးဖြတ်ချက် ချမှတ်သွားမည် ဟု ရုရှား၏ ဗဟိုရွေးကောက်ပွဲ ကော်မရှင်အကြီးအကဲ အယ်လာ ပမ်ဖီလိုဗာ (Ella Pamfilova) က ပြောကြား ခဲ့သည်။

Source: အေပီ

CNI International News

နယူးယောက်၊ ဒီဇင်ဘာ ၁၁

၂၀၂၄ ခုနှစ် အမေရိကန်သမ္မတ ရွေးကောက်ပွဲတွင် သမ္မတဟောင်း ဒေါ်နယ်ထရမ့် (Donald Trump) သာ အနိုင် ရရှိခဲ့မည်ဆိုပါက အမေရိကန်သည် နေတိုးအဖွဲ့မှ ထွက်ခွာသွားမည့် အခြေအနေသို့ ရောက်ရှိနိုင်ကြောင်း တာ့စ် သတင်းဌာနမှ ဖော်ပြခဲ့သည်။ 

ထရမ့်သာ အာဏာပြန်ရလာခဲ့ပါက ယူကရိန်းကို စွန့်ပစ်ရုံသာမက နေတိုးမဟာမိတ်အဖွဲ့ထဲမှ အမေရိကန်ကို နုတ်ထွက်စေသည်အထိ ဖြစ်လာနိုင်မည့်အရေးကို နေတိုးအဖွဲ့ဝင်နိုင်ငံများ၏ အစိုးရများနှင့် သံတမန်များက စိုးရိမ်နေကြောင်း အမေရိကန်၏ The New York Times သတင်းစာက ဖော်ပြခဲ့သည်။ 

"ထရမ့်သာ ဒုတိယအကြိမ် အာဏာပြန်ရလာပြီး အမေရိကန်ကို နေတိုးအဖွဲ့ထဲက ထုတ်ပစ်ခဲ့မယ်ဆိုရင် အဲဒါဟာ ဥရောပအတွက် ကြီးမားတဲ့ အကြောက်တရားတစ်ခု ဖြစ်လာနိုင်ပါတယ်" ဟု ၂၀၀၉ ခုနှစ်မှ ၂၀၁၃ ခုနှစ်အကြား နေတိုး၏ တပ်မှူးတစ်ဦးအဖြစ် တာဝန်ထမ်းဆောင်ခဲ့သည့် အမေရိကန် ရေတပ်ဗိုလ်ချုပ်ကြီးဟောင်း ဂျိမ်းစ် စတက်ဗ်ရီဒစ် (James Stavridis) ၏ ပြောကြားချက်ကို ကိုးကားပြီး  The New York Times သတင်းစာက ဖော်ပြခဲ့သည်။

နေတိုးခေါင်းဆောင်များနဲ့ ဒေါ်နယ်ထရမ့်ကိုတွေ့ရစဉ်

"အဲဒါဟာ ကျနော်တို့ နိုင်ငံရဲ့ အကြီးမားဆုံး မဟာဗျူဟာနဲ့ သမိုင်းဝင် ကျရှုံးမှုတစ်ခု ဖြစ်လာပါလိမ့်မယ်"ဟု စတက်ဗ်ရီဒစ်က ပြောကြားခဲ့သည်။

အမေရိကန်ရွေးကောက်ပွဲတွင် ထရမ့်သာ အနိုင်ရရှိမည်ဆိုပါက အမေရိကန်၏ သေချာမှုမရှိသည့် မူဝါဒအပေါ် ဥရောပနိုင်ငံအများစုက စိုးရိမ်နေကြောင်း၊ သေးငယ်သည့် နိုင်ငံများသည် အမေရိကန်လက်နက်များ ဝယ်ယူမှုကို ပိုမိုတိုးမြှင့်ခြင်းဖြင့် ထရမ့်၏ မျက်နှာသာပေးမှုကို ရရှိရန် ကြိုးပမ်းလိမ့်မည်ဖြစ်ကြောင်း The New York Times သတင်းစာက ဖော်ပြခဲ့သည်။ 

အမေရိကန်သည် ၂၀၂၄ ခုနှစ်၊ နိုဝင်ဘာလတွင် သမ္မတရွေးကောက်ပွဲ ကျင်းပမည် ဖြစ်သည်။ 

ယခုနှစ် ဧပြီလ ၂၅ ရက်တွင် အမေရိကန်၏ ၄၆ ဦးမြောက်သမ္မတ ဂျိုးဘိုင်ဒန် (Joe Biden)သည် ရွေးကောက်ပွဲ ဝင်ရောက် ယှဉ်ပြိုင်မည်ဖြစ်ကြောင်း ကြေညာခဲ့သည်။ 

ထရမ့်ကမူ ၂၀၂၂ ခုနှစ်၊ နိုဝင်ဘာလကတည်းက သမ္မတရွေးကောက်ပွဲတွင် ဝင်ရောက်ယှဉ်ပြိုင်မည်ဖြစ်ကြောင်း ကြေညာခဲ့သည်။

Source: တာ့စ်

CNI International News

ဟောင်ကောင်၊ ဒီဇင်ဘာ ၁၁

ဟောင်ကောင်တွင် ရွေးကောက်ပွဲဝင်ရန် မဖြစ်နိုင်သည့် ဒီမိုကရေစီလိုလားသည့် ကိုယ်စားလှယ်လောင်းများအတွက် မျိုးချစ်ဝါဒီများသီးသန့် ခရိုင်ကောင်စီ ရွေးကောက်ပွဲကို ဒီဇင်ဘာ ၁၀ ရက်က ပထမဆုံးအကြိမ် ကျင်းပခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ထိုရွေးကောက်ပွဲတွင် မဲဆန္ဒရှင်များသည် တရုတ်အစိုးရအား သစ္စာခံသည့် ကိုယ်စားလှယ်လောင်းများကိုသာ မဲပေးရွေးချယ်ခွင့် ရရှိခဲ့သည်။ 

၂၀၁၉ ခုနှစ်က နောက်ဆုံးအကြိမ် ပြုလုပ်ခဲ့သည့် ခရိုင်ကောင်စီ ရွေးကောက်ပွဲတွင်မူ မဲဆန္ဒရှင်များသည် ဒီမိုကရေစီလိုလားသည့် ကိုယ်စားလှယ်လောင်းများကို မဲပေးခဲ့သဖြင့် ဒီမိုကရေစီလိုလားသော ကိုယ်စားလှယ် လောင်းများ အပြတ်အသတ် အနိုင်ရရှိခဲ့သည်။

အစိုးရဆန့်ကျင်သော ဆန္ဒပြမှုများ လနှင့်ချီ ဖြစ်ပွားခဲ့ပြီးနောက် ကျင်းပခဲ့သည့် ထိုရွေးကောက်ပွဲတွင် ပါဝင်မဲပေး သည့် မဲဆန္ဒရှင်အရေအတွက် ၇၁ ရာခိုင်နှုန်းအထိရှိခဲ့ပြီး တရုတ်နှင့် ဟောင်ကောင် အာဏာပိုင်များအတွက် ထိုးနှက်ချက်တစ်ခု ဖြစ်ခဲ့သည်။ 

ဟောင်ကောင် အုပ်ချုပ်ရေးမှူးကိုတွေ့ရစဉ်

သို့သော် မေလက ကြေညာခဲ့သည့် ပြုပြင်ပြောင်းလဲထားသော ရွေးကောက်ပွဲစနစ်အောက်တွင် နေရာ ၄၇၀ အနက် ၈၈ နေရာကို တိုက်ရိုက် ရွေးချယ်မည်ဖြစ်ပြီး ကိုယ်စားလှယ်လောင်းများသည် အစိုးရက ခန့်အပ်ထားသော စိစစ်ရွေးချယ်ရေးကော်မတီများ၏ အတည်ပြုချက်ကို ရရှိရန်လိုအပ်သည်။

တိုက်ရိုက်ရွေးချယ်ခံရသည့် ကိုယ်စားလှယ်များ၏ ၇၀ ရာခိုင်နှုန်းကျော်သည် စိစစ်ရွေးချယ်ရေးကော်မတီ အဖွဲ့ဝင် များ ဖြစ်သည်။ 

ထို့ကြောင့် ဟောင်ကောင်၏ အကြီးဆုံး အတိုက်အခံပါတီဖြစ်သည့် ဒီမိုကရက်တစ်ပါတီက အဆိုတင်သွင်းသည့် ကိုယ်စားလှယ်လောင်းများသည် စိစစ်ရွေးချယ်ရေးကော်မတီများ၏ အတည်ပြုချက်ကို ရရှိခဲ့ခြင်းမရှိပေ။

နိုင်ငံရေးအမြင် မျှတသူများနှင့်် သဘောထား အလယ်အလတ်ရှိသည့်် ရှေးရိုးဝါဒီ လိုလားသူများကပင် ရွေးကောက်ပွဲဆိုင်ရာ စည်းကမ်းအသစ်များကြောင့် ရွေးကောက်ပွဲဝင်ခွင့် ပိတ်ပင်ခံခဲ့ရမှုအပေါ် စောဒက တက်ခဲ့ကြသည်။ 

ဒီဇင်ဘာ ၁၀ ရက်က ရွေးကောက်ပွဲများ မစတင်မီ နာရီပိုင်းအလိုတွင်း မဲရုံတစ်ရုံရှေ့၌ ဆန္ဒပြရန် စီစဉ်နေသည့် ဆိုရှယ်ဒီမိုကရက်တစ်ပါတီဖြစ်သော League of Social Democrats မှ အဖွဲ့ဝင် ၃ ဦးသည် ဖမ်းဆီးခံခဲ့ရကြောင်း ထိုပါတီက ပြောကြားခဲ့သည်။

Source: အယ်လ်ဂျာဇီးယား

CNI International News

ရီယိုဒီဂျနေးရိုး၊ ဒီဇင်ဘာ ၁၁

ဂွိုင်ယာနာနှင့် ဗင်နီဇွဲလား နယ်စပ်ပြဿနာကို တောင်အမေရိက ခေါင်းဆောင်များက စိုးရိမ်တကြီး စောင့်ကြည့် နေကြောင်း ဘရာဇီးလ်သမ္မတ လူးဝစ် အင်နာစီယို လူလာ ဒါဆေးလ်ဗားက (Luiz Inacio Lula da Silva) က ပြောသည်ဟု ဘန်ကောက်ပို့စ်မှ ဖော်ပြခဲ့သည်။ 

ထို့ကြောင့် နယ်စပ်ဒေသအရေး တင်းမာမှုများကို လျှော့ချရန် လူလာက ဗင်နီဇွဲလားသမ္မတ နီကိုလပ်စ် မာဒူရို (Nicolas Maduro) ကို တိုက်တွန်းခဲ့သည်။

ပြီးခဲ့သည့် သီတင်းပတ်ကုန်က ဗင်နီဇွဲလားသည် အိမ်နီးချင်း ဂွိုင်ယာနာနိုင်ငံက ကာလကြာရှည် ထိန်းချုပ်ထား သည့် ပိုင်ဆိုင်မှု အငြင်းပွားနေသော ရေနံများပေါကြွယ်ဝသော အက်စီကွီဘို (Essequibo) ဒေသကို ပိုင်ဆိုင် ကြောင်း ကြေညာခဲ့သည်။

ဘရာဇီးလ်သမ္မတ လူးဝစ် အင်နာစီယို လူလာ ဒါဆေးလ်ဗားကို တွေ့ရစဉ်

အဆိုပါ ကြေညာချက်ကို လူထုဆန္ဒခံယူပွဲ ပြုလုပ်ခဲ့ချိန်တွင် ပါဝင်မဲပေးသည့်် ဗင်နီဇွဲလားနိုင်ငံသား ၉၅ ရာခိုင်နှုန်း က ထောက်ခံမဲပေးခဲ့ကြသည်။

မာဒူရိုနှင့် နီးစပ်သည့် ဆက်ဆံရေးရှိသော လက်ဝဲဝါဒီ တစ်ဦးဖြစ်သူ လူလာသည် မာဒူရိုနှင့် ဖုန်းဖြင့် ဆက်သွယ် ပြောကြားခဲ့ချိန်က ရှင်းလင်းပြတ်သားစွာ သတိပေးခဲ့သည်ဟု ဘရာဇီးလ်သမ္မတရုံးက ထုတ်ပြန်ခဲ့သည်။

"တင်းမာမှုများ မြင့်တက်လာနိုင်သည့် တစ်ဖက်သတ်ဆန်သည့် စီမံချက်များကို ရှောင်ကြဉ်ရန် အရေးကြီး ကြောင်း” လူလာက အလေးအနက်ထားပြီး ပြောဆိုခဲ့သည်ဟု ထုတ်ပြန်ချက်တွင် ဖော်ပြခဲ့သည်။

ထိုအခြေအနေအပေါ် တောင်အမေရိကနိုင်ငံများက စိုးရိမ်မှုများ မြင့်တက်နေသည်ဟု ဒီဇင်ဘာ ၇ ရက်က အာဂျင်တီးနား၊ ဘရာဇီးလ်၊ ချီလီ၊ ကိုလံဘီယာ၊ အီကွေဒေါ၊ ပါရာဂွေး၊ ပီရူးနှင့် ဥရုဂွေးနိုင်ငံတို့က ထုတ်ပြန်သည့် ပူးတွဲကြေညာချက်ကို ကိုးကားပြီး လူလာက မာဒူရိုကို ပြောကြားခဲ့သည်ဟု ဆိုသည်။

ထိုပူးတွဲ ကြေညာချက်တွင် သက်ဆိုင်ရာ အဖွဲ့အစည်းများ အနေဖြင့် ငြိမ်းချမ်းသည့် အဖြေတစ်ခုကို ရှာရန်အတွက် ဆွေးနွေးညှိနှိုင်းမှုများ ပြုလုပ်ရန် တိုက်တွန်းထားသည်။

ထို့ပြင် ကိုလံဘီယာသမ္မတ ဂူစတာဗို ပက်ထရို (Gustavo Petro) ကလည်း အလားတူ သတိပေးမှုမျိုး ပြုလုပ်ခဲ့ သည်။

ရေနံများပေါကြွယ်ဝသော အက်စီကွီဘို ဒေသကို တွေ့ရစဉ်

"အကြီးမားဆုံး ကံဆိုးမိုးမှောင်ကျတဲ့ ဖြစ်ရပ်ဟာ တောင်အမေရိကမှာ စစ်ပွဲဖြစ်ပွား လာစေနိုင်ပါတယ်။ အမေဇုန် (Amazon) မိုးသစ်တောမှာ နေတိုး-ရုရှား ပဋိပက္ခပုံစံမျိုး ထိပ်တိုက်တွေ့တဲ့ အခြေအနေဟာ တိုးတက်မှုတွေ၊ လူ့အသက်တွေကို ဆုံးရှုံးစေနိုင်တာကြောင့် ဗင်နီဇွဲလားနဲ့ ဂွိုင်ယာနာနိုင်ငံတွေဟာ ပဋိပက္ခမဖြစ်ပွားအောင် တင်းမာမှုတွေကို လျှော့ချဖို့ လိုအပ်ပါတယ်" ဟု ပက်ထရိုက X လူမှုမီဒီယာတွင် ရေးသားဖော်ပြခဲ့သည်။

ဂွိုင်ယာနာနိုင်ငံသည် ၎င်းနယ်နိမိတ်၏ သုံးပုံနှစ်ပုံကျော် ကြီးမားသည့် အက်စီကွီဘိုဒေသကို ရာစုနှစ်တစ်စုကျော် အုပ်ချုပ်ခဲ့သည်။ 

ဗင်နီဇွဲလားအစိုးရကမူ ထိုဒေသသည် လွန်ခဲ့သည့် နှစ်ပေါင်း ၂၀၀ ခန့်က စပိန်လက်အောက်မှ လွတ်လပ်ရေး ရပြီးကတည်းက ဗင်နီဇွဲလား၏ နယ်နိမိတ်တစ်ခုဖြစ်ကြောင်း ကြေညာခဲ့သည်။

၂၀၁၅ ခုနှစ်က ထိုဒေသတွင် ရေနံများ တွေ့ရှိခဲ့ပြီးနောက် ဗင်နီဇွဲလားနှင့် ဂွိုင်ယာနာအကြား အငြင်းပွားမှုများ နောက်တကြိမ် မြင့်တက်လာခဲ့ခြင်း ဖြစ်သည်။

Source: ဘန်ကောက်ပို့စ်

CNI International News
ဘန်ကောက်၊ ဒီဇင်ဘာ ၉

ထိုင်းနိုင်ငံတွင် ဒီဇင်ဘာ ၉ ရက်၌ ပြုလုပ်မည့် ဒီမိုကရက်ပါတီ ခေါင်းဆောင်ရာထူး ရွေးကောက်ပွဲတွင် ဝင်ရောက် ယှဉ်ပြိုင်မည့် ကိုယ်စားလှယ်လောင်းဖြစ်သူ ဝတ္တည ဘန်နက်ဂ် (Watanya Bunnag) က ပါတီခေါင်းဆောင်ရာထူး နေရာအတွက် အကြိတ်အနယ် ယှဉ်ပြိုင်သွားမည်ဟု ပြောကြားခဲ့ကြောင်း Thai PBS World မှ ဖော်ပြခဲ့သည်။

ဒီမိုကရက်ပါတီ၏ လွှတ်တော်ကိုယ်စားလှယ် ၂၁ ဦးက ပါတီခေါင်းဆောင် နေရာအတွက် ပါတီအတွင်းရေးမှူးချုပ် ဟောင်းဖြစ်သူ ချာလမ်ချိုင်း သီရိအွန် (Chalermchai Srion) ကို ထောက်ခံနေသည့်တိုင် ဝတ္တညက အထက်ပါ အတိုင်း ပြောကြားခဲ့ခြင်း ဖြစ်သည်။

ထိုအချိန်အတောအတွင်း ဒီမိုကရက်ပါတီ ခေါင်းဆောင်ဟောင်း ချူအန် လိခ်ပိုင် (Chuan Leekpai) က ပါတီ၏ လွှတ်တော် ကိုယ်စားလှယ်များသည် ချာလမ်ချိုင်းအား ထောက်ခံမှုအပေါ် အံ့အားသင့်ခြင်း မရှိကြောင်းနှင့် ချာလမ်ချိုင်းသည် ပါတီ၏ အတွင်းရေးမှူးချုပ်အဖြစ် တာဝန်ထမ်းဆောင်ခဲ့သည့် ၄ နှစ်တာကာလအတွင်း လွှတ်တော်ကိုယ်စားလှယ်များနှင့် ခိုင်မာသည့် ဆက်ဆံရေးရှိကြောင်း ပြောကြားခဲ့သည်။ 

စီးပွားရေး လုပ်ငန်းရှင်ဟောင်း တစ်ဦးဖြစ်သည့် ဝတ္တညသည် ဒီမိုကရက်ပါတီ ခေါင်းဆောင်ရာထူးကို အနိုင်ရရှိရန် ပါတီဝင် စုစုပေါင်း၏ ၇၅ ရာခိုင်နှုန်း ထောက်ခံမှုကို ရရှိရန်လိုအပ်သည်။

ဒီမိုကရက်ပါတီ ခေါင်းဆောင်ဟောင်း ချူအန် လိခ်ပိုင်ကို တွေ့ရစဉ်

ဝတ္တညကမူ သူသည် ထိုင်းနိုင်ငံ၏ သက်တမ်းအရင့်ဆုံး နိုင်ငံရေးပါတီဖြစ်သည့် ဒီမိုကရက်ပါတီ၏ ခေါင်းဆောင် နေရာအတွက် အကြိတ်အနယ် ယှဉ်ပြိုင်သွားမည်ဖြစ်ကြောင်းနှင့် ပါတီအပေါ် ပြည်သူလူထု၏ ယုံကြည်မှုကို ပြန်လည် ထိန်းသိမ်းသွားမည်ဖြစ်ကြောင်း ပြောကြားခဲ့သည်။ 

ပါတီခေါင်းဆောင် ရာထူးနေရာအတွက် မဲပေးရွေးချယ်မှု လုပ်ငန်းစဉ်တွင် သာမန်ပါတီဝင်များ၏ ထောက်ခံမဲထက် ပါတီ၏ လွှတ်တော်ကိုယ်စားလှယ်များ၏ ထောက်ခံမဲက ပိုမို ခိုင်မာအားကောင်းမှုရှိသည်။ 

ဝတ္တညကမူ အခြေအနေသည် သူ့ဘက်တွင် မရှိသော်လည်း ပါတီခေါင်းဆောင် ရွေးကောက်ပွဲ၏ ရလဒ်သည် ပါတီဝင်များအပေါ်တွင် မူတည်နေပြီး ၎င်း၏ နိုင်ငံရေးရည်မှန်းချက်များကို ဆက်လက် အကောင်အထည် ဖော်သွားမည်ဟု ပြောကြားခဲ့သည်။ 

အခြားကိုယ်စားလှယ်လောင်းတစ်ဦးဖြစ်ပြီး လက်ရှိ ပါတီ၏ ယာယီဒုတိယ ခေါင်းဆောင်အဖြစ် တာဝန်ယူထား သည့် နာရာပတ် ကေအိုသွန်း (Narapat Kaeothong) ကမူ ချာလမ်ချိုင်းသည် ပါတီခေါင်းဆောင်ရာထူးကို ပြန်လည်ရယူရန် သဘောတူညီခဲ့မည်ဆိုပါက သူ့အနေနှင့် ရွေးကောက်ပွဲကို ဝင်ရောက်ယှဉ်ပြိုင် တော့မည် မဟုတ်ကြောင်း ပြောကြားခဲ့သည်။ 

Source: Thai PBS World

CNI International News

ကိယက်ဗ်၊ ဒီဇင်ဘာ ၉

ယူကရိန်း၏ ရှေ့တန်းစစ်မြေပြင်အနီးရှိ လျှပ်စစ်ဓာတ်အားပေး စက်ရုံတစ်ရုံကို လက်နက်ကြီး ထိမှန်ခဲ့ပြီးနောက် လျှပ်စစ်ဓာတ်အားများကို ချွေတာရန် ယူကရိန်းအာဏာပိုင်များက ဒေသခံများကို တိုက်တွန်းခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ထိုသတိပေးချက်သည် အပူချိန်များ အလွန်အမင်း ကျဆင်းနေသည့် ဆောင်းရာသီ ကာလအတွင်း ပထမဆုံး သတိပေးချက် ဖြစ်သည်။

ပြီးခဲ့သည့်နှစ်က ယူကရိန်း၏ စွမ်းအင် အရင်းအမြစ်များအပေါ် ရုရှား၏ တိုက်ခိုက်မှုများကြောင့် ယူကရိန်းတွင် လျှပ်စစ်ဓာတ်အား ပြတ်တောက်မှုများ ဖြစ်ပွားခဲ့ပြီးနောက် ရုရှားသည် ယခုနှစ် ဆောင်းရာသီတွင်လည်း ယူကရိန်း၏ စွမ်းအင်အခြေခံ အဆောက်အအုံများကို တိုက်ခိုက်မှုများအား အရှိန်မြှင့်တင်ရန် စီစဉ်ထားကြောင်း ယူကရိန်း အရာရှိများက ပြောသည်။

"ဒီနေ့ မွန်းလွဲပိုင်းမှာ ရန်သူတွေဟာ ရှေ့တန်း စစ်မြေပြင်မှာရှိတဲ့ စွမ်းအင်စက်ရုံတစ်ရုံကို တိုက်ခိုက်ခဲ့ပါတယ်။ လက်နက်ကြီးနဲ့ ပစ်ခတ်တိုက်ခိုက်မှုကြောင့် စက်ရုံမှာ အကြီးအကျယ် ထိခိုက်ပျက်စီးသွားခဲ့ပါတယ်" ဟု ယူကရိန်းစွမ်းအင်ဝန်ကြီးဌာနက ပြောသည်။

မည်သည့်စက်ရုံ ထိခိုက်ပျက်စီးခဲ့သည်ဆိုခြင်းကို အသေးစိတ် ထုတ်ပြန်ခဲ့ခြင်း မရှိသော်လည်း ထိုစက်ရုံ၏ ဓာတ်အားပေး ယူနစ်နှစ်ခု ရပ်တန့်သွားခဲ့သဖြင့် ထိုစက်ရုံ၏ ဓာတ်အားလိုင်းတွင် ယာယီ လျှပ်စစ်ဓာတ်အား ပြတ်တောက်မှု ဖြစ်ပွားခဲ့သည်ဟု ယူကရိန်းစွမ်းအင်ဝန်ကြီးဌာနက ထုတ်ပြန်ခဲ့သည်။

ထို့ကြောင့် စွမ်းအင်ဝန်ကြီးဌာန အနေနှင့် လျှပ်စစ်ဓာတ်အားသုံးစွဲမှု အမြင့်ဆုံး အချိန်ကာလအတွင်း စီးပွားရေး အရရော၊ အခြေအနေအရပါ လျှပ်စစ်ဓာတ်အား သုံးစွဲမှုများကို ချွေတာခြင်းဖြင့် စွမ်းအင်ဝန်ကြီးဌာန၏ အင်ဂျင်နီယာများကို တစ်ဖက်တစ်လမ်းမှ ကူညီပေးကြရန် မေတ္တာရပ်ခံကြောင်း ထုတ်ပြန်ချက်တွင် ဖော်ပြခဲ့ သည်။

အပူချိန်များ လျော့ကျမှု၊ အရေးပေ ါ်ပြင်ဆင်မှုများနှင့် ဆိုလာစွမ်းအင်စနစ် အားနည်းမှုများသည် လျှပ်စစ် ဓာတ်အားပြတ်တောက်မှု အခြေအနေကို ပိုမိုဆိုးရွားစေကြောင်း ယူကရိန်းဝန်ကြီးချုပ် ဒန်နိစ် ရှမိုင်ဟယ် (Denys Shmygal) က ပြောကြားခဲ့သည်။

ထို့ကြောင့် ယူကရိန်းအစိုးရနှင့် စွမ်းအင်ကဏ္ဍမှ တာဝန်ရှိသူများသည်  မနက် ၉ နာရီမှ ည ၇ နာရီအတွင်း လျှပ်စစ်ဓာတ်အားသုံးစွဲမှုများကို လျှော့ချရန် လူတိုင်းကို မေတ္တာရပ်ခံကြောင်း ရှမိုင်ဟယ်က လူမှုမီဒီယာတွင် ရေးသားဖော်ပြခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ ဒီဇင်ဘာ ၉

မြန်မာနိုင်ငံတွင် ဖြစ်ပွားနေသည့် တိုက်ပွဲများကြောင့် အိုးမဲ့အိမ်မဲ့ ဖြစ်ခဲ့ရသူများကို လူသားချင်း စာနာထောက်ထား မှုဆိုင်ရာ အကူအညီများပေးရန်အတွက် အထူးတာဝန်အဖွဲ့ ဖွဲ့စည်းသွားမည်ဖြစ်ကြောင်း ရိုက်တာမှ ဖော်ပြခဲ့ သည်။

ထိုအထူးတာဝန်အဖွဲ့သည် အခြား အကူအညီပေးရေး အေဂျင်စီများနှင့်လည်း ပူးပေါင်းဆောင်ရွက်သွားမည်ဟု ထိုင်းနိုင်ငံခြားရေးဝန်ကြီးဌာနက ဒီဇင်ဘာ ၉ ရက်တွင် ပြောကြားခဲ့သည်။

မြန်မာနိုင်ငံနှင့် အရှေ့တောင်အာရှနိုင်ငံများအသင်း (အာဆီယံ)၊ နိုင်ငံတကာ အသိုင်းအဝိုင်းတို့အကြား ခိုင်မာသည့် ပူးပေါင်းဆောင်ရွက်မှုများကို ဖြစ်ပေါ်စေရန် ထိုအစီအစဉ်က အထောက်အကူ ပြုပေးလိမ့်မည်ဟု မျှော်လင့် ကြောင်း ထိုင်းနိုင်ငံခြားရေးဝန်ကြီးဌာနက ပြောကြားခဲ့သည်။

မြန်မာနိုင်ငံ၏ နယ်စပ်ဒေသများတွင် တပ်မတော်နှင့် လက်နက်ကိုင်အဖွဲ့များအကြား တိုက်ပွဲများ ပြင်းထန်နေပြီး လက်နက်ကိုင်အဖွဲ့များက လုံခြုံရေးတပ်ဖွဲ့များကို ပစ်မှတ်ထား တိုက်ခိုက်လျက်ရှိသည်။

အောက်တိုဘာလကုန်ပိုင်းက လက်နက်ကိုင်အဖွဲ့များ၏ ထိုးစစ်ဆင် တိုက်ခိုက်မှုများ စတင်ဖြစ်ပွားခဲ့ချိန် ကတည်း က လူပေါင်း ၃၀၀,၀၀၀ ကျော်သည် အိုးမဲ့အိမ်မဲ့ဖြစ်ခဲ့ရကြောင်း ကုလသမဂ္ဂက ခန့်မှန်းပြောကြားခဲ့သည်။

ယခုဖြစ်ပွားနေသည့် တိုက်ခိုက်မှုများသည် တပ်မတော်က အာဏာကို ရယူခဲ့ပြီးနောက်ပိုင်း တပ်မတော်အတွက် အကြီးမားဆုံး စိန်ခေါ်မှုတစ်ခုဖြစ်ခဲ့ပြီး ဒုက္ခသည်များ အစုလိုက်အပြုံလိုက် ဝင်ရောက်လာနိုင်သည့်် အခြေအနေ အပေါ် တရုတ်နှင့် ထိုင်းနိုင်ငံတို့ကို စိုးရိမ်စေခဲ့သည်။

ယခုကိစ္စအပေါ် ဆွေးနွေးမှုများ ပြုလုပ်ရန် မြန်မာနိုင်ငံသည် လုပ်ငန်းတာဝန်အဖွဲ့ တစ်ဖွဲ့ မကြာမီ စေလွှတ်သွား မည်ဖြစ်ကြောင်း၊ ကနဦး အဆင့်များ အောင်မြင်စွာ လုပ်ဆောင်နိုင်ပါက အခြား အကူအညီပေးရေး အေဂျင်စီများ ကိုလည်း ဖိတ်ကြားသွားမည်ဖြစ်ကြောင်း ထိုင်းနိုင်ငံခြားရေးဝန်ကြီးဌာနက ထုတ်ပြန်ခဲ့သည်။

မြန်မာနိုင်ငံခြားရေးဝန်ကြီး ဦးသန်းဆွေနှင့် ထိုင်းနိုင်ငံခြားရေးဝန်ကြီး ပန်ပရီ ဘာဟစ်ဒါ နူကာရာ (Parnpree Bahidha-Nukara) တို့သည် တရုတ်နိုင်ငံတွင် ပြုလုပ်သည့် မဲခေါင်-လန်ချန် ပူးပေါင်းဆောင်ရွက်ရေး (Mekong-Lancang Cooperation) အစည်းအဝေးတွင် တွေ့ဆုံဆွေးနွေးခဲ့သည်။

၎င်းတို့နှစ်ဦး၏ ဆွေးနွေးမှုများအတွင်း နှစ်နိုင်ငံပူးပေါင်းသည့် အထူးတာဝန်အဖွဲ့ကို ဖွဲ့စည်းရန် ဆုံးဖြတ်ခဲ့ခြင်း ဖြစ်ကြောင်း သိရသည်။

Source: ရိုက်တာ

CNI International News
မော်စကို၊ ဒီဇင်ဘာ ၉

အနောက်နိုင်ငံများသည် ဂါဇာကမ်းမြောင်ဒေသတွင် ပါလက်စတိုင်းတို့အပေါ် ကျူးလွန်နေသည့် အစ္စရေး၏ လူမျိုးသုဉ်း သတ်ဖြတ်မှုကို ထောက်ခံပေးနေကြောင်း အီရန်သမ္မတ အီဘရာဟင် ရိုင်စီ (Ebrahim Raisi) က ဒီဇင်ဘာ ၇ ရက်တွင် စွပ်စွဲခဲ့သည်ဟု ရိုက်တာမှ ဖော်ပြခဲ့သည်။

ရာအီစီသည် ရုရှားနိုင်ငံ၊ မော်စကိုမြို့တော်တွင် ရုရှားသမ္မတ ဗလာဒီမာ ပူတင် (Vladimir Putin) နှင့် တွေ့ဆုံပြီး အစည်းအဝေး ပြုလုပ်ချိန်၌ အထက်ပါအတိုင်း စွပ်စွဲခဲ့ခြင်း ဖြစ်သည်။

ပူတင်သည် ယူအေအီးနှင့် ဆော်ဒီအာရေဗျနိုင်ငံများသို့ သွားရောက်ခဲ့ပြီးနောက် တစ်ရက်အကြာတွင် ကရင်မလင် (Kremlin) နန်းတော်၌ ရိုင်စီကို ကြိုဆိုခဲ့ကာ ဆွေးနွေးမှုများ ပြုလုပ်ခဲ့သည်။ 

ရုပ်သံမှ ထုတ်လွှင့်သည့် မှတ်ချက်စကားများအတွင်း ပူတင်နှင့် ရိုင်စီတို့သည် နှစ်နိုင်ငံအကြား စစ်ဘက်ဆိုင်ရာ ပူးပေါင်းဆာင်ရွက်မှုများကို မြှင့်တင်ရေးကို ရည်ညွှန်းပြောကြားခဲ့သည်။

အရှေ့အလယ်ပိုင်းဒေသ၏ အခြေအနေ၊ အထူးသဖြင့် ပါလက်စတိုင်း နယ်နိမိတ်များတွင် ဖြစ်ပွားနေသည့် အခြေ အနေများကို ဆွေးနွေးမှုသည် အလွန်အရေးကြီးကြောင်း ပူတင်က ပြောသည်။

ရိုင်စီကလည်း ပါလက်စတိုင်းနှင့် ဂါဇာတွင် ဖြစ်ပွားနေသည့် အခြေအနေများသည် လူမျိုးသုဉ်း သတ်ဖြတ်မှုနှင့် လူသားမျိုးနွယ်အပေါ် ဆန့်ကျင်သည့် ရာဇဝတ်မှုများဖြစ်သည်ဟု ပြောကြားခဲ့သည်။

ထိုဖြစ်စဉ်များကို အမေရိကန်နှင့် အနောက်နိုင်ငံများက ထောက်ခံနေသည်မှာ ဝမ်းနည်းစရာ ပိုကောင်းသည်ဟု ပြောကြားခဲ့သည်။

အီရန်သည် အစ္စရေး-ဟားမာ့စ် စစ်ပွဲတွင် ဟားမာ့စ်အဖွဲ့ကို ထောက်ခံပေးထားသည်။ ရုရှားကမူ အရှေ့အလယ်ပိုင်း ဒေသတွင် ဟားမာ့စ်နှင့် အစ္စရေး အပါအဝင် အဓိကကျသည့် နိုင်ငံများနှင့် ဆက်ဆံရေးများရှိနေပြီး အောက်တိုဘာလက မော်စကိုတွင် ဟားမာ့စ်ကိုယ်စားလှယ်အဖွဲ့ကို လက်ခံတွေ့ဆုံခဲ့သဖြင့် အစ္စရေး၏ ဝေဖန်မှုကို ခံခဲ့ရသည်။

အစ္စရေး-ဟားမာ့စ် စစ်ပွဲကြောင့် ယူကရိန်းတွင် စစ်ပွဲဆင်နွှဲနေသည့် ရုရှား၏ စစ်ပွဲအပေါ် နိုင်ငံတကာ၏ အာရုံစိုက် မှု ပြောင်းလဲသွားခဲ့ပြီး ရုရှားအတွက် ပါလက်စတိုင်းတို့ဘက်မှ ရပ်တည်သည့် ဖွံ့ဖြိုးဆဲနိုင်ငံများနှင့် ဆက်ဆံရေး များ ပိုမိုနီးစပ်စေရန် လုပ်ဆောင်ခွင့် ရရှိခဲ့သည်ဟု ကျွမ်းကျင်သူများက ပြောကြားခဲ့သည်။

အစ္စရေးကမူ လူမျိုးသုဉ်း သတ်ဖြတ်မှု စွပ်စွဲချက်များကို ယခင်ကတည်းက ငြင်းဆိုထားပြီး ၎င်းတို့၏ လုပ်ဆောင် ချက်များသည် ဟားမာ့စ်အဖွဲ့ကို ပစ်မှတ်ထားခြင်းဖြစ်ပြီး အရပ်သားများကို ပစ်မှတ်ထားခြင်း မဟုတ်ကြောင်း ပြောကြားခဲ့သည်။

Source: ရိုက်တာ

CNI International News

ဘေကျင်း၊ ဒီဇင်ဘာ ၈

တရုတ်နှင့် ဥရောပနိုင်ငံများအကြား တစ်ဖက်နှင့်တစ်ဖက် ပြိုင်ဘက်ကဲ့သို့ မရှုမြင်သင့်ကြောင်းနှင့်် ထိပ်တိုက် တွေ့မှုများကို မပြုလုပ်သင့်ကြောင်း တရုတ်သမ္မတ ရှီကျင့််ဖျင် (Xi Jinping) က ဒီဇင်ဘာ ၆ ရက်တွင် ဘေကျင်း မြို့တော်၌ ပြုလုပ်သည့် အစည်းအဝေးအတွင်း ဥရောပသမဂ္ဂ (အီးယူ)၏ ထိပ်သီးအရာရှိများကို သတိပေးခဲ့ သည်ဟု ရိုက်တာမှ ဖော်ပြခဲ့သည်။

ရှီသည် ၄ နှစ်အတွင်း ဥရောပ ထိပ်သီးအရာရှိများနှင့် ပထမဆုံးအကြိမ်အဖြစ် လူချင်းတွေ့ဆုံသည့် အစည်းအဝေး အတွင်း အထက်ပါအတိုင်း သတိပေးခဲ့ခြင်း ဖြစ်သည်။

ထိုအစည်းအဝေးအတွင်း တရုတ်နှင့် ဥရောပခေါင်းဆောင်များသည် ကုန်သွယ်ရေးမှအစ ယူကရိန်းစစ်ပွဲအဆုံး အကြောင်းအရာ အများအပြားကို ဆွေးနွေးခဲ့ပြီး တရုတ်သည် ဥရောပသမဂ္ဂ၏ အဓိက စီးပွားရေးနှင့် ကုန်သွယ် ရေး မိတ်ဖက်နိုင်ငံ ဖြစ်လာစေရန် ဆန္ဒရှိကြောင်း၊ သိပ္ပံနှင့် နည်းပညာကဏ္ဍတွင်လည်း ပူးပေါင်းဆောင်ရွက်မှုများ ပြုလုပ်ရန် ဆန္ဒရှိကြောင်း ရှီက ပြောကြားခဲ့သည်။

တရုတ်နဲ့ EU အလံကိုတွေ့ရစဉ်

ထို့ပြင် တရုတ်နှင့် ဥရောပသမဂ္ဂအကြား ဆက်ဆံရေးများကို ကြားဝင်စွက်ဖက်မည့် အခြေအနေများအားလုံးကို ဖယ်ရှားရန်လည်း ရှီက Diaoyutai နိုင်ငံတော်ဧည့်ဂေဟာတွင် ပြုလုပ်သည့် အစည်းအဝေးအတွင်း ဥရောပ ခေါင်းဆောင်များကို တိုက်တွန်းခဲ့သည်။

တရုတ်နှင့် ဥရောပသမဂ္ဂအနေနှင့် တစ်ဖက်နှင့်တစ်ဖက် မှန်ကန်သည့် သဘောထားတစ်ခုကို ဖော်ဆောင်ရန်နှင့် အပြန်အလှန် ယုံကြည်နားလည်မှု တည်ဆောက်ရန် လိုအပ်ကြောင်းလည်း ရှီက ပြောကြားခဲ့သည်ဟု တရုတ် နိုင်ငံပိုင် CCTV ရုပ်သံက ဖော်ပြခဲ့သည်။

ဥရောပကော်မရှင်ဥက္ကဋ္ဌ အာဆူလာ ဗွန် ဒါလီယန် (Ursula von der Leyen)၊ ဥရောပကောင်စီဥက္ကဋ္ဌ ချားလ်စ် မိုက်ကယ် (Charles Michel) နှင့် ဥရောပသမဂ္ဂ နိုင်ငံခြားရေးမူဝါဒ အကြီးအကဲ ဂျိုးဆက်ဖ် ဘော်ရဲလ် (Josep Borrell) တို့သည် တစ်ရက်ကြာ တရုတ်ခရီးစဉ်အတွင်း တရုတ်ဝန်ကြီးချုပ် လီချင် (Li Qiang) နှင့် တွေ့ဆုံခဲ့ ကြသည်။

EU ခေါင်းဆောင် ၂ ဦးကိုတွေ့ရစဉ်

ထိုတွေ့ဆုံမှုအတွင်း လီက တရုတ်သည် ဈေးကွက်စီးပွားရေး၏ အခြေခံစံနှုန်းများကို ချိုးဖောက်သည့် စီးပွားရေးနှင့် ကုန်သွယ်ရေးဆိုင်ရာ အရေးကိစ္စများတွင် နိုင်ငံရေးသဘော သက်ဝင်နေမှုကို ဆန့်ကျင်ကြောင်း ဥရောပသမဂ္ဂ ခေါင်းဆောင်များကို ပြောကြားခဲ့သည်ဟု CCTV က ဖော်ပြခဲ့သည်။

ဒီဇင်ဘာ ၇ ရက်က ပြုလုပ်ခဲ့သည့် တရုတ်-ဥရောပသမဂ္ဂ ခေါင်းဆောင်များ၏ အစည်းအဝေးသည် လာမည့် နှစ်တွင် ပြုလုပ်မည့် ဥရောပ ပါလီမန်ရွေးကောက်ပွဲ မတိုင်မီ နောက်ဆုံးအကြိမ် ပြုလုပ်သည့်် အစည်းအဝေး တစ်ခုဖြစ်သည်ဟု ရိုက်တာမှ ဖော်ပြခဲ့သည်။

Source: ရိုက်တာ