CNI International News

မနီလာ၊ နိုဝင်ဘာ ၂၉

ဖိလစ်ပိုင်နိုင်ငံတွင် ဆယ်စုနှစ်များစွာကြာ ဖြစ်ပွားခဲ့သည့် လက်နက်ကိုင်ပဋိပက္ခများကို အဆုံးသတ်ရန် ရည်ရွယ် ချက်ဖြင့် ဖိလစ်ပိုင်အစိုးရနှင့် ကွန်မြူနစ်သူပုန်များအကြား ငြိမ်းချမ်းရေးဆွေးနွေးမှုများကို ပြန်လည်စတင်ရန် သဘောတူညီမှု ရရှိခဲ့သည်ဟု CNA မှ ဖော်ပြခဲ့သည်။

ဖိလစ်ပိုင်အစိုးရနှင့် သူပုန်များအကြား ငြိမ်းချမ်းရေး ဆွေးနွေးညှိနှိုင်းမှုများသည် (၆)နှစ်ကြာ ရပ်ဆိုင်းခဲ့ပြီး နောက် ဆွေးနွေးပွဲများကို ပြန်လည်စတင်ရန် သဘောတူညီခဲ့ကြခြင်း ဖြစ်သည်ဟု ဆွေးနွေးပွဲများအတွက် ကြားဝင်စေ့စပ် ပေးသည့် နော်ဝေနိုင်ငံက နိုဝင်ဘာ ၂၈ ရက်တွင် ပြောကြားခဲ့သည်။

ဖိလစ်ပိုင် ကွန်မြူနစ်ပါတီ (CPP) ၏ လက်နက်ကိုင်တပ်ဖွဲ့ဖြစ်သည့် ပြည်သူ့တပ်မတော်သစ် (NPA) နှင့် ဖိလစ်ပိုင် အစိုးရတပ်ဖွဲ့များအကြား နှစ်ပေါင်း ၅၀ ကျော်ကြာ တိုက်ပွဲများ ဖြစ်ပွားခဲ့သဖြင့် လူပေါင်း ၄၀,၀၀၀ ကျော် သေဆုံး ခဲ့ရသည်။

ပြီးခဲ့သည့် သီတင်းပတ်က ဖိလစ်ပိုင်အစိုးရနှင့် သူပုန်တပ်ဖွဲ့၏ ထိပ်သီးအဆင့် ကိုယ်စားလှယ်များသည် ငြိမ်းချမ်းရေးဆွေးနွေးပွဲအတွက် အဓိက အတားအဆီးများကို ဖြေရှင်းရန် ဘုံသဘောထားတစ်ရပ် ရရှိစေရေး ဆွေးနွေးမှုများ ပြန်လည်စတင်ရန် သဘောတူညီခဲ့ကြသည်ဟု နော်ဝေနိုင်ငံခြားရေးဝန်ကြီးဌာနက နိုဝင်ဘာ ၂၈ ရက်တွင် ထုတ်ပြန်ခဲ့သည်။

ဖိလစ်ပိုင် သူပုန်အဖွဲ့ဖြစ်တဲ့ ပြည်သူ့တပ်မတော်သစ်(NPA)ခေါင်းဆောင်ကိုတွေ့ရစဉ်

ဆွေးနွေးညှိနှိုင်းမှုများ အောင်မြင်ခဲ့မည်ဆိုပါက သူပုန်များသည် ၎င်းတို့၏ လက်နက်ကိုင်တော်လှန်မှုကို အဆုံး သတ်မည်၍ နိုင်ငံရေးအင်အားစုအဖြစ် အသွင်ပြောင်းလဲ ဖွဲ့စည်းသွားမည်ဟု ဖိလစ်ပိုင်၏ ငြိမ်းချမ်းရေး လုပ်ငန်း စဉ်အတွက် နှစ်ပေါင်း ၂၀ ကြာ ကြားဝင်စေ့စပ်ပေးခဲ့သည့် နော်ဝေနိုင်ငံက ပြောကြားခဲ့သည်။

ဖိလစ်ပိုင်အစိုးရနှင့် သူပုန်များအကြား တရားဝင် ဆွေးနွေးမှုများသည် ၂၀၁၇ ခုနှစ်အထိ ရှိခဲ့သော်လည်း ယခင် သမ္မတ ရိုဒရီဂို ဒူတာတေး (Rodrigo Duterte) လက်ထက်တွင် ဆွေးနွေးညှိနှိုင်းမှုများသည် အငြင်းပွားမှုများနှင့် ရပ်တန့်သွားခဲ့သည်။

ဒူတာတေးသည် ၂၀၂၂ ခုနှစ် နှစ်လယ်ပိုင်းက သက်တမ်းကုန်ဆုံးသွားခဲ့ပြီး ၎င်း၏ နေရာတွင် ဖာဒီနန် မားကို့စ် ဂျူနီယာ (Ferdinand Marcos Jr) က ရွေးကောက်ပွဲတွင် အနိုင်ရပြီး ဖိလစ်ပိုင်သမ္မတအဖြစ် တာဝန်ကို လွှဲပြောင်း ရယူခဲ့သည်။

မားကို့စ် ဂျူနီယာသည် ကွန်မြူနစ်လှုပ်ရှားမှု အဖွဲ့ဝင်ဟောင်းများ အပါအဝင် သူပုန်အဖွဲ့အချို့ကို လွတ်ငြိမ်းချမ်း သာခွင့် ပေးမည်ဆိုသည့် အမိန့်ကို ထုတ်ပြန်ခဲ့ပြီးနောက် သီတင်းတစ်ပတ် မပြည့််မီအချိန်တွင် အစိုးရနှင့် သူပုန် များအကြား ငြိမ်းချမ်းရေးဆွေးနွေးပွဲများ ပြန်လည်ပြုလုပ်ရန် သဘောတူညီမှုရရှိသည့် ကြေညာချက် ထွက်ပေါ် လာခဲ့ခြင်း ဖြစ်သည်။

Source: CAN

CNI International News

ဆိုးလ်၊ နိုဝင်ဘာ ၂၈

ဂြိုဟ်တုလွှတ်တင်မှုများ အပါအဝင် မိမိတို့၏ အချုပ်အခြာအာဏာပိုင် အခွင့်အရေးများကို ကာကွယ်ရန် ဆက်လက်လုပ်ဆောင်သွားမည်ဟု မြောက်ကိုရီးယားက နိုဝင်ဘာ၂၇ ရက်တွင် သတိပေးခဲ့ကြောင်း ရိုက်တာမှ ဖော်ပြထားသည်။

ထို့အပြင် မြောက်ကိုရီးယားသည် တောင်ကိုရီးယား နယ်စပ်တစ်လျှောက်တွင် ယခင်က ဖျက်သိမ်းခဲ့သည့် ကင်းစခန်းများကို ပြန်လည်တည်ဆောက်နေသည်ဟုလည်း နိုင်ငံပိုင် KCNA သတင်းအေဂျင်စီက ဖော်ပြခဲ့သည်။

မြောက်ကိုရီးယားသည် ကိုရီးယားနှစ်နိုင်ငံ နယ်စပ်ဒေသတစ်လျှောက်တွင် ကင်းစခန်း ၁၆၀ ခန့်ကို တည်ဆောက် ထားကြောင်း တောင်ကိုရီးယားက ခန့်မှန်းခဲ့ပြီး တောင်ကိုရီးယားသည် နှစ်နိုင်ငံနယ်စပ်ဒေသတွင် ကင်းစခန်း ၆၀ ကို တည်ဆောက်ထားသည်။

ဆိုးလ်မြို့ ဘူတာတစ်ခုမှာ မြောက်ကိုရီးယားက ဂြိုလ်တုလွှတ်တင်တဲ့ သတင်း (Reuters)

ပြီးခဲ့သည့်် သီတင်းပတ်က စစ်ဘက်သုံး စပိုင်ဂြိုဟ်တုလွှတ်တင်မှုသည် အမေရိကန်နှင့် ၎င်း၏ မဟာမိတ်များကို အနီးကပ်စောင့်ကြည့်ရန် လိုအပ်ခြင်းကြောင့်ဖြစ်သည်ဟု မြောက်ကိုရီးယား နိုင်ငံခြားရေးဝန်ကြီးဌာနက ပြောကြားသည်။

"မြောက်ကိုရီးယားအနေနဲ့ ကိုယ့်ကိုယ်ကို ကာကွယ်မယ့် လုပ်ရပ်တွေကို တရားဝင် ဆက်လက်လုပ်ဆောင် သွားမှာဖြစ်ပြီး အမေရိကန်နဲ့ သူ့ရဲ့ နောက်လိုက်တွေရဲ့ စိုးရိမ်ဖွယ် စစ်ရေးလှုပ်ရှားမှုတွေကို စေ့စေ့စပ်စပ် စောင့်ကြည့််သွားမှာပါ" ဟု မြောက်ကိုရီးယား နိုင်ငံခြားရေးဝန်ကြီးဌာနက ပြောကြားခဲ့ကြောင်း KCNA က ဖော်ပြခဲ့သည်။

နျူကလီးယား လက်နက်ပိုင်ဆိုင်သော မြောက်ကိုရီးယားနိုင်ငံသည် နိုဝင်ဘာ ၂၁ ရက်က စစ်ဘက်သုံး စပိုင် ဂြိုဟ်တုတစ်လုံးကို ပတ်လမ်းအတွင်းသို့ အောင်မြင်စွာ လွှတ်တင်နိုင်ခဲ့ကြောင်း ပြောကြားခဲ့သည်။

မြောက်ကိုရီးယားနှင့် တောင်ကိုးရီးယား စစ်သားတို့  ၂၀၁၈ ခုနှစ်က နှုတ်ဆက်ခဲ့ကြစဉ် (gettyimages)

ထို့အပြင် ၎င်း ဂြိုဟ်တုမှ ရိုက်ကူးခဲ့သည့် ဓာတ်ပုံများကို ထုတ်ပြန်ခဲ့သော်လည်း တောင်ကိုရီးယား ကာကွယ်ရေး အရာရှိများနှင့် ကျွမ်းကျင်သူများကမူ မြောက်ကိုရီးယားဂြိုဟ်တု၏ စွမ်းဆောင်ရည်ကို အတည်ပြုခဲ့ခြင်းမရှိပေ။

မြောက်ကိုရီးယား၏ စစ်ဘက်သုံး စပိုင်ဂြိုဟ်တုလွှတ်တင်မှုကို တုံ့ပြန်သည့်အနေဖြင့် တောင်ကိုရီးယားသည် ၂၀၁၈ ခုနှစ်က မြောက်ကိုရီးယားနှင့် ချုပ်ဆိုခဲ့သည့် ပူးတွဲ စစ်ရေးသဘောတူညီချက်၏ အချို့ အချက်များကို ဆိုင်းငံ့ခဲ့ပြီးနောက် မြောက်ကိုရီးယားကလည်း ထိုစာချုပ်တွင် ပါဝင်မှုကို ဆိုင်းငံ့ခဲ့သည်။

ထို့အပြင်မြောက်ကိုရီးယားသည် ကိုရီးယားနှစ်နိုင်ငံနယ်စပ်ရှိ စစ်မဲ့ဇုန်အနီးတွင် စစ်သားများနှင့် လက်နက်ကြီးများ ပိုမိုဖြန့်ကြက်ချထားခဲ့ကြောင်းလည်း တောင်ကိုရီးယားကာကွယ်ရေးဝန်ကြီးဌာနက ပြောကြားခဲ့သည်။

Source: ရိုက်တာ

CNI International News

မော်စကို၊ နိုဝင်ဘာ ၂၈

အနောက်နိုင်ငံများသည် ၎င်းတို့၏ ကိုယ်ကျိုးစီးပွားများအတွက် ကမ္ဘာလုံးဆိုင်ရာ အခင်းအကျင်းတစ်ရပ်ကို ဖန်တီးလုပ်ဆောင်နေမှုမှာ အသုံးမဝင်တော့ဘဲ ခေတ်နောက်ကျ ကျန်နေခဲ့ပြီဖြစ်ကြောင်း ရုရှားသမ္မတ ပူတင်က Primakov Readings နိုင်ငံတကာဖိုရမ်၌ မိန့်ခွန်းပြောကြားခဲ့သည်ဟု တာ့စ် သတင်းဌာနမှ ဖော်ပြခဲ့သည်။

"အခုနှစ် ဖိုရမ်ရဲ့ အဓိကဆိုလိုရင်းကိုတော့ 'ဂလိုဘယ်လိုက်ဇေးရှင်း အလွန် (post-globalization) အသိအမြင်များ' လို့ အမည်ပေးထားပါတယ်" ဟု ပူတင်က ပြောကြားခဲ့သည်။

ရုရှားသမ္မတ ပူတင်အားတွေ့ရစဉ် 

ဂလိုဘယ်လိုက်ဇေးရှင်းဟူသည့် ဝေါဟာရသည် ကမ္ဘာကြီးကို ဖြန့်ကျက်လွှမ်းခြုံထားသော ဆက်သွယ်ရေးနှင့် ကူးသန်းရောင်းဝယ်ရေး ကွန်ယက်မှတစ်ဆင့် ဒေသတွင်းဆိုင်ရာ စီးပွားရေးများ၊ လူ့အဖွဲ့အစည်းများနှင့် ယဉ်ကျေးမှုများ စတင်ပေါင်းစည်းလာသည့် ဖြစ်စဉ်တစ်ရပ်ကို ဖော်ပြခြင်းဖြစ်သည်။

"အနောက်နိုင်ငံတွေ ဖန်တီးထူထောင်ခဲ့တဲ့ ဂလိုဘယ်လိုက်ဇေးရှင်းပုံစံဟာ တဖြည်းဖြည်းနဲ့ အသုံးမဝင်တော့ဘဲ ခေတ်နောက်ကျလာခဲ့တာ သိသားထင်ရှားလာပါပြီ။ နိုင်ငံတကာ ဆက်ဆံရေးမှာ မျှတမှုရှိပြီး ဒီမိုကရေစီစနစ် ပိုဆန်တဲ့ အခင်းအကျင်းအသစ်တစ်ခု ပေါ်ထွက်လာခဲ့ပါပြီ။ အဲဒီအခင်းအကျင်းအသစ်ဟာ ကမ္ဘာလုံးဆိုင်ရာ လူအများစုရဲ့ လိုအပ်ချက်တွေကို ပိုမိုကောင်းမွန်စွာ ဖြည့်ဆည်းပေးနိုင်ပါလိမ့်မယ်" ဟု ပူတင်က ပြောသည်။

ပူတင်၊ ဇာလန်းစကီးနှင့် ဘိုင်ဒန်တို့ကိုတွေ့ရစဉ် (AFP)

ကမ္ဘာ့အရေးကိစ္စများတွင် သြဇာလွှမ်းမိုးမှုရရှိရန် ကြိုးပမ်းနေသည့် လူသိများသော နိုင်ငံများသည် ၎င်းတို့၏ ယိမ်းယိုင်လာသည့် သြဇာလွှမ်းမိုးမှုကို ပြန်လည်ထိန်းသိမ်းရန် ခြိမ်းခြောက်မှုများ၊ အကြပ်ကိုင်မှုများ ပြုလုပ်နေပြီး စည်းမျဉ်းအခြေပြု နိုင်ငံတကာအခင်းအကျင်းတစ်ရပ်ကို အစားထိုးနေကြောင်း ပူတင်က ဆက်လက်ပြောကြားခဲ့သည်။ 

"အဲဒီလို တည်ငြိမ်မှုကို ပျက်ယွင်းစေတဲ့ မူဝါဒဟာ ယူကရိန်း ပဋိပက္ခနဲ့ အစ္စရေး-ပါလက်စတိုင်း စစ်ပွဲကို ပိုမို အရှိန်မြင့်တက်စေပါတယ်" ဟုလည်း ရုရှား သမ္မတက ပြောကြားခဲ့ခြင်းဖြစ်သည်။

Source: TASS

CNI International News

တဲလ်အဗစ်၊ နိုဝင်ဘာ ၂၈ 

ဂါဇာကမ်းမြောင်ဒေသတွင် အစ္စရေးနှင့် ဟားမာ့စ်အကြား အပစ်အခတ်ရပ်စဲရေးကာလကို သက်တမ်းတိုးရန် နိုင်ငံတကာမှ ကြားဝင်စေ့စပ်သူများက တိုက်တွန်းခဲ့ကြသည်ဟု အေပီမှဖော်ပြခဲ့သည် ။

အစ္စရေးနှင့် ဟားမာ့စ်အကြား လေးရက်ကြာ အပစ်အခတ်ရပ်စဲရေး သဘောတူညီချက်သည် နိုဝင်ဘာ ၂၄ ရက်က စတင်ခဲ့ပြီး နိုဝင်ဘာ ၂၇ ရက်တွင် သက်တမ်းကုန်ဆုံးမည်ဖြစ်သည်။

အစ္စရေးကမူ ဟားမာ့စ်တို့ဘက်မှ ဖမ်းဆီးထားသည့် ဓားစာခံအား ၁၀ ဦးစီ ပြန်လွှတ်ပေးမည်ဆိုပါက အပစ်အခတ်ရပ်စဲရေးကာလကို တစ်ရက်စီ သက်တမ်းတိုးသွားမည်ဟု ပြောကြားခဲ့သည်။

Khuzaa ရွာတွင် အစ္စရေး၏တိုက်ခိုက်မှုကြောင့် ပါလက်စတိုင်းသားများ ဖျက်ဆီးခံရမှု AFP

ဟားမာ့စ်တို့ကလည်း အမေရိကန်၊ ကာတာနှင့် အီဂျစ်နိုင်ငံတို့က ကြားဝင်စေ့စပ်မှုကြောင့် ရရှိခဲ့သည့် အစ္စရေးနှင့် အပစ်အခတ်ရပ်စဲရေး သဘောတူညီချက်ကို သက်တမ်းတိုးရန် မျှော်လင့်ထားကြောင်း ပြောကြားခဲ့သည်။ 

သို့သော်အစ္စရေးသည် ဂါဇာကမ်းမြောင်ဒေသကို ၁၆ နှစ်ကြာ အုပ်ချုပ်ခဲ့သည့် ဟားမာ့စ်အဖွဲ့၏ အုပ်ချုပ်မှုကို အဆုံးသတ်ရန်နှင့် ဟားမာ့စ်အဖွဲ့၏ စစ်ရေးစွမ်းဆောင်ရည်များကို ချေမှုန်းရန် ကတိကဝတ်အတိုင်း ဆက်လက် လုပ်ဆောင်မည်ဟုလည်း ပြောကြားထားသည်။

အစ္စရေး၏ ပြောကြားချက်အရ ၎င်း၏ မြေပြင်ထိုးစစ်ကို ဂါဇာမြောက်ပိုင်းမှ တောင်ပိုင်းအထိ ချဲ့ထွင်သွားမည့် သဘောသက်ရောက်နေပြီး လက်ရှိတွင် ဂါဇာတောင်ပိုင်း၌ သောင်းနှင့်ချီသည့် ပါလက်စတိုင်း ဒုက္ခသည်များ သည် ကုလသမဂ္ဂ၏ ကယ်ဆယ်ရေးစခန်းများတွင် နေထိုင်နေရသည်။

ဂျုံမှုန့်အိတ်များကို လက်ခံရယူရန် ပါလက်စတိုင်းသားများ စုဝေးနေကြစဉ် Reuters

ထို့အပြင် အပစ်အခတ်ရပ်စဲရေး သဘောတူညီချက်အရ လူသားချင်းစာနာထောက်ထားမှုအကူအညီများ အရှိန်အဟုန်မြှင့် ဆောင်ရွက်နေသည့်တိုင် ၎င်းဒုက္ခသည်စခန်းများရှိ ပါလက်စတိုင်းတို့၏ နေထိုင် စားသောက်ရေးသည် ခက်ခဲသည့် အခြေအနေနှင့် ရင်ဆိုင်နေရသည်။

အပစ်အခတ်ရပ်စဲရေးကာလ၏ တတိယမြောက်ရက်ဖြစ်သည့် နိုဝင်ဘာ ၂၆ ရက်က ဟားမာ့စ်အဖွဲ့သည် အစ္စရေးနိုင်ငံသား ၁၄ ဦးအပါအဝင် ဓားစာခံ ၁၇ ဦးကို တတိယအသုတ်အဖြစ် ပြန်လွှတ်ပေးခဲ့သည်။ 

အပြန်အလှန်အနေဖြင့် အစ္စရေးကလည်း ၎င်းတို့ အကျဉ်းထောင်များထဲတွင် ဖမ်းဆီးထိန်သိမ်းထားသည့် ပါလက်စတိုင်းအကျဉ်းသား ၃၉ ဦးကို ပြန်လွှတ်ပေးခဲ့သည်။

CNI International News

အေသင်၊ နိုဝင်ဘာ ၂၄

တရုတ်၏ အမျက်ဒေါသကို ရှောင်လွှဲရန်အတွက် ထိုင်ဝမ်က ပြုလုပ်သည့် ပွဲအခမ်းအနားများကို တက်ရောက်ခြင်း မပြုရန် ဂရိအစိုးရက ပြည်တွင်းနှင့် ပြည်ပရှိ ၎င်း၏ အစိုးရအရာရှိများအား သတိပေးခဲ့သည်ဟု Nikkei Asia မှ ဖော်ပြခဲ့သည်။

ဂရိ၏ သတိပေးချက် ထုတ်ပြန်မှုသည် ထိုင်ဝမ်အရေးနှင့်ပတ်သက်ပြီး ဥရောပသမဂ္ဂ၏ မူဝါဒတွင် သဘောထား ကွဲလွဲမှုများ မြင့်တက်နေသည်ကို မီးမောင်းထိုးပြသရာ ရောက်ခဲ့သည်။

ပြီးခဲ့သည့်လက ဂရိနိုင်ငံ၊ အေသင်မြို့တော်တွင် ထိုင်ဝမ်၏ အမျိုးသားနေ့ အထိမ်းအမှတ်အဖြစ် အခမ်းအနား မကျင်းပမီ ရက်ပိုင်းအလို၌ ဂရိနိုင်ငံခြားရေးဝန်ကြီးဌာနက ထိုအခမ်းအနားသို့ တက်ရောက်ခြင်း မပြုရန် ဂရိ သံတမန်များနှင့် ဂရိအစိုးရဝန်ထမ်းများကို အီးမေးလ်မှတဆင့် စာများပို့ခဲ့သည်။ 

ဂရိနိုင်ငံသားများကိုတွေ့ရစဉ်

ဂရိအစိုးရ ဝန်ထမ်များသည် ထိုင်ဝမ်ကပြုလုပ်သည့် ပွဲအခမ်းအနားများကို တက်ရောက်မည်ဆိုပါက တရုတ်၏ ပိတ်ဆို့မှုများကို ချမှတ်ခံရနိုင်ခြေရှိကြောင်းလည်း ဂရိနိုင်ငံခြားရေးဝန်ကြီးဌာန၏ အောက်တိုဘာ ၄ ရက် နေ့စွဲဖြင့် ထုတ်ပြန်ခဲ့သည့် နို့တစ်စာတွင် သတိပေးခဲ့သည်။ 

ထိုနို့တစ်စာကို ဂရိလက်ထောက် နိုင်ငံခြားရေးဝန်ကြီး  အလက်ဇန္ဒား ပါပါဒိုပူလူ (Alexandra Papadopoulu) က လက်မှတ်ရေးထိုးခဲ့ပြီး ဂရိအစိုးရ အဆောက်အအုံများ သို့မဟုတ် ထိုင်ဝမ်၏ သံရုံးအမည်ခံဖြစ်သည့် တိုင်ပေ ကိုယ်စားလှယ်ရုံးများတွင် ထိုင်ဝမ်အရာရှိများနှင့် အစည်းအဝေးများ ပြုလုပ်ခြင်းမပြုရန် သတိပေးခဲ့သည်။

ထိုမူဝါဒ အပြောင်းအလဲနှင့် ထိုသို့ သတိပေးချက် ထုတ်ပြန်ခြင်းသည် တရုတ်၏ ဖိအားကြောင့် ဟုတ်/မဟုတ် မေးမြန်းထားသည့် မေးခွန်းများကို ဂရိနိုင်ငံခြားရေးဝန်ကြီးဌာနက ဖြေကြားခြင်းမရှိခဲ့ပေ။

အဆိုပါ အကြောင်းအရာနှင့်ပတ်သက်ပြီး အေသင်မြို့တော်ရှိ တိုင်ပေ ကိုယ်စားလှယ် ရုံးကလည်း မှတ်ချက်ပေးရန် ငြင်းဆိုခဲ့သည်။

ထိုင်ဝမ်ပြည်သူများကို တွေ့ရစဉ်

တရုတ်သည် ဂရိနိုင်ငံတွင် ကြီးမားသည့် စီးပွားရေးလုပ်ငန်းများ ဖွင့်လှစ်လုပ်ဆောင်နေပြီး ဥရောပသမဂ္ဂ အပြင် ဘက်တွင် ဂရိ၏ အကြီးများဆုံး ကုန်သွယ်ဘက်နိုင်ငံ ဖြစ်သည်။ 

ဂရိဝန်ကြီးချုပ် ကရီယာကို့စ် မစ်ဆိုတာကစ် (Kyriakos Mitsotakis) သည် နိုဝင်ဘာ ၃ ရက်က တရုတ်နိုင်ငံ  ဘေကျင်းမြို့တော်တွင် တရုတ်သမ္မတ ရှီကျင့်ဖျင် (Xi Jinping) နှင့် မတွေ့ဆုံမီ သီတင်းပတ် အနည်းငယ်အလို၌ ထိုင်ဝမ်၏ ပွဲအခမ်းအနားများကို တက်ရောက်ခြင်းမပြုရန် ဂရိနိုင်ငံခြားရေးဝန်ကြီးဌာန၏ သတိပေးချက် ထွက်ပေါ်ခဲ့ခြင်း ဖြစ်သည်။

Source: Nikkei Asia

CNI International News

ပြုံယမ်း၊ နိုဝင်ဘာ ၂၄

မြောက်ကိုရီးယားသည် ၂၀၁၈ ခုနှစ်က တောင်ကိုရီးယားနှင့် ချုပ်ဆိုခဲ့သည့် ပူးတွဲစစ်ရေး သဘောတူညီချက်ကို ဆိုင်းငံ့ခဲ့ပြီး တောင်ကိုရီးယားနှင့်ထိစပ်နေသည့်် နယ်စပ်ဒေသသို့ စစ်သားများနှင့် စစ်လက်နက်ပစ္စည်းများ ပိုမို ပို့ဆောင်သွားမည်ဟု ပြောကြားခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

မြောက်ကိုရီးယား၏ စစ်ဘက်သုံး စပိုင်ဂြိုဟ်တု လွှတ်တင်မှုကို တုန့်ပြန်သည့်အနေဖြင့် တောင်ကိုရီးယားသည် ထို စစ်ရေးသဘောတူညီမှု၏ အချို့ ချက်များကို ဆိုင်းငံ့ခဲ့ပြီးနောက် မြောက်ကိုရီးယား၏ ကြေညာချက် ထွက်ပေါ်ခဲ့ ခြင်း ဖြစ်သည်။ 

မြောက်ကိုရီးယားသည် ထိုသဘောတူညီမှုတွင် ပါဝင်တော့မည် မဟုတ်ကြောင်း မြောက်ကိုရီးယား ကာကွယ်ရေး ဝန်ကြီးဌာန၏ ပြောကြားချက်ကို ကိုးကားပြီး နိုင်ငံပိုင်မီဒီယာက နိုဝင်ဘာ ၂၃ ရက်တွင် ဖော်ပြခဲ့သည်။ 

မြောက်ကိုရီးယားက စပိုင်ဂြိုဟ်တုလွှတ်တင်နေစဉ်

ပြည့်စုံကျယ်ပြန့်သည့် စစ်ရေး သဘောတူညီချက် (CMA) ကို မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) နှင့် တောင်ကိုရီးယားသမ္မတဟောင်း မွန်းဂျေအင် (Moon Jae-in) တို့ ပြုလုပ်ခဲ့သည့် ၂၀၁၈ ခုနှစ် ထိပ်သီးညီလာခံတွင် လက်မှတ်ရေးထိုးခဲ့ခြင်း ဖြစ်သည်။

ကိုရီးယားနှစ်နိုင်ငံအကြား ယုံကြည်မှုကို တည်ဆောက်ရန်နှင့် ကိုရီးယားကျွန်းဆွယ်ပေါ်တွင် တင်းမာမှုများအား လျှော့ချရန် ကြိုးပမ်းသည့် အနေဖြင့် နှစ်နိုင်ငံ ခေါင်းဆောင်များအကြား ညီလာခံပြုလုပ်ခဲ့ကာ စာချုပ်ကို လက်မှတ် ရေးထိုးခဲ့ခြင်း ဖြစ်သည်။

သို့သော် မြောက်ကိုရီးယားသည် Malligyong-1 အမည်ရှိ စစ်ဘက်သုံးဂြိုဟ်တုကို ပတ်လမ်းအတွင်းသို့ အောင်မြင် စွာ လွှတ်တင်နိုင်ခဲ့ကြောင်း ကြေညာခဲ့ပြီးနောက် နိုဝင်ဘာ ၂၂ ရက်တွင် တောင်ကိုရီးယားက ထိုသဘောတူ စာချုပ်၏ အချို့အချက်အလက်များကို ဆိုင်းငံ့ကြောင်း ကြေညာခဲ့သည်။ 

မြောက်ကိုရီးယားနိုင်ငံပိုင် KCNA သတင်းအေဂျင်စီက ထုတ်ပြန်သည့် အစီရင်ခံစာတွင်လည်း မိမိတို့သည် ထိုစစ်ရေး သဘောတူညီချက်အရ ရပ်နားထားခဲ့သည့် စစ်ရေးအစီအစဉ်များ အားလုံးကို ချက်ချင်း ပြန်လည် လုပ်ဆောင်တော့မည်ဖြစ်ကြောင်း ဖော်ပြခဲ့သည်။ 

မြောက်ကိုရီးယားက စပိုင်ဂြိုဟ်တုလွှတ်တင်နေစဉ်

ကိုရီးယားနှစ်နိုင်ငံ စစ်မဲ့ဇုန်တစ်လျှောက် စစ်လက်နက်ပစ္စည်း အမျိုးအစားသစ်များနှင့် အင်အားကြီးမားသည့် လက်နက်ကိုင်တပ်ဖွဲ့များကို ပိုမိုဖြန့်ကြက်ချထားမှု၊ ကုန်းကြောင်း၊ လေကြောင်းနှင့် ရေကြောင်း အပါအဝင် နယ်ပယ်အားလုံးတွင် စစ်ရေးတင်းမာမှုများနှင့် ပဋိပက္ခများကို ဟန့်တားရန် စစ်ရေး အစီအစဉ်များကို ရပ်တန့် ထားသည့်် ထိုစာချုပ်မှ နုတ်ထွက်မည်ဖြစ်ဖြစ်ကြောင်း KCNA က ဖော်ပြခဲ့သည်။ 

ထိုသဘောတူ စာချုပ်ကို ကိုရီးယားနှစ်နိုင်ငံစလုံးက ဆိုင်းငံ့ခဲ့သည့် ရလဒ်သည် တင်းမာမှုများကို ပိုမိုမြင့်တက် စေလိမ့်မည်ဟု တောင်ကိုရီးယားနိုင်ငံ၊ ဆိုးလ်မြို့တော်ရှိ ယူဝါ အမျိုးသမီး တက္ကသိုလ် (Ewha Womans University)မှ နိုင်ငံတကာလေ့လာရေး ပါမောက္ခ လိဖ် အဲရစ် အက်စလေ (Leif-Eric Easley) က ပြောကြား ခဲ့သည်။

Source: အယ်လ်ဂျာဇီးယား

CNI International News

ဆိုးလ်၊ နိုဝင်ဘာ ၂၃

စစ်ဘက်သုံး စပိုင်ဂြိုဟ်တုတစ်လုံးကို ပတ်လမ်းအတွင်းသို့ အောင်မြင်စွာ လွှတ်တင်နိုင်ခဲ့ကြောင်း မြောက်ကိုရီး ယားက နိုဝင်ဘာ ၂၂ ရက်တွင် ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။ 

မြောက်ကိုရီးယားသည် ယခုလွှတ်တင်မှုမတိုင်မီ ဂြိုဟ်တုလွှတ်တင်ရန် နှစ်ကြိမ်ကြိုးပမ်းခဲ့သော်လည်း အောင်မြင် မှုမရခဲ့ဘဲ အမေရိကန်နှင့် ၎င်း၏မဟာမိတ်များကတော့ မြောက်ကိုရီးယား၏ ဂြိုဟ်တုလွှတ်တင်မှုများသည် ကုလသမဂ္ဂ၏ ပိတ်ဆို့မှုများကို ချိုးဖောက်ခြင်းဖြစ်သည်ဟု ရှုတ်ချခဲ့သည်။

မြောက်ကိုရီးယားသည် နိုဝင်ဘာ ၂၁ ရက်ညပိုင်းက မြောက်ပြုံဂန်ပြည်နယ်မှ Malligyong-1 အမည်ရှိ ထောက်လှမ်းရေး ဂြိုဟ်တုကို လွှတ်တင်ခဲ့ခြင်းဖြစ်ပြီး ထိုဂြိုဟ်တုကို သယ်ဆောင်သွားသည့် ဒုံးပျံသည် ဂြိုဟ်တုကို ပတ်လမ်းအတွင်း ပို့ဆောင်နိုင်ခဲ့သည်ဟု မြောက်ကိုရီးယားနိုင်ငံပိုင် KCNA သတင်းအေဂျင်စီက ဖော်ပြခဲ့သည်။ 

မြောက်ကိုရီးယား ခေါင်းဆောင် ကင်မ်ဂျုံအန် (Kim Jong Un) သည် ထိုဂြိုဟ်တုလွှတ်တင်မှုကို ကြည့်ရှုခဲ့ပြီး ဂြိုဟ်တုလွှတ်တင်မှု အောင်မြင်ခဲ့သည့်အတွက် သိပ္ပံပညာရှင်များနှင့် နည်းပညာရှင်များကို ဂုဏ်ပြုခဲ့သည်ဟု KCNA မှ ဖော်ပြခဲ့သည်။ 

မြောက်ကိုရီးယားက စပိုင်ဂြိုဟ်တု လွှတ်တင်တဲ့သတင်းကို ကြည့်နေစဉ်

အမေရိကန်နှင့် ၎င်း၏ မဟာမိတ်များကမူ မြောက်ကိုရီးယား၏ ဂြိုဟ်တုလွှတ်တင်မှုကို ဝေဖန်ခဲ့ကြပြီး ထိုလွှတ်တင်မှုသည် ကုလသမဂ္ဂ၏ ပြဋ္ဌာန်းချက်များကို ချိုးဖောက်ခင်းဖြစ်သည်ဟု ပြောကြားခဲ့သည်။

ထို့ပြင် တောင်ကိုရီးယားကလည်း မြောက်ကိုရီးယားနှင့် ၂၀၁၈ ခုနှစ် စစ်ရေး သဘောတူညီမှုတစ်ခုကို တစ်စိတ်တစ်ပိုင်း ဆိုင်းငံ့ခဲ့ပြီး နှစ်နိုင်ငံနယ်စပ်တစ်လျှောက် ထောက်လှမ်းရေး လုပ်ငန်းစဉ်များ ပြန်လည် လုပ်ဆောင်မည်ဟု ပြောကြားခဲ့သည်။ 

မြောက်ကိုရီးယားသည် ယခုနှစ် မေလနှင့် သြဂုတ်လကလည်း ထောက်လှမ်းရေး ဂြိုဟ်တုလွှတ်တင်ရန် ကြိုးပမ်းခဲ့သော်လည်း နှစ်ကြိမ်စလုံး အောင်မြင်ခြင်းမရှိဘဲ ပျက်ကျခဲ့သည်။

အမေရိကန်၊ တောင်ကိုရီးယားနှင့် ဂျပန်တို့ကမူ မြောက်ကိုရီးယားကို နောက်တစ်ကြိမ် ဂြိုဟ်တုလွှတ်တင်ခြင်း မပြုရန်နှင့် ဂြိုဟ်တုလွှတ်တင်မည်ဆိုပါက ကုလသမဂ္ဂ၏ ပြဋ္ဌာန်းချက်များကို ချိုးဖောက်ရာ ရောက်လိမ့်မည် ဖြစ်ကြောင်း ထပ်တလဲလဲ သတိပေးခဲ့သည်။

မြောက်ကိုရီးယားသည် ယူကရိန်းစစ်ပွဲတွင် ရုရှားအတွက် လက်နက်များ ထောက်ပံ့ပေးခဲ့ပြီး ပြန်အလှန်အနေဖြင့် ရုရှားထံမှ နည်းပညာအကြံဉာဏ်များ ရရှိခဲ့ဖွယ်ရှိကြောင်း တောင်ကိုရီးယား ထောက်လှမ်းရေးအေဂျင်စီက ပြောကြားခဲ့သည်။

Source: ဘန်ကောက်ပို့စ်

CNI International News

ဘန်ကောက်ပို့စ် ၊ နိုဝင်ဘာ ၂၃

ထိုင်းနိုင်ငံတွင် မေလ ၁၄ ရက်က ပြုလုပ်ခဲ့သည့် ရွေးကောက်ပွဲအပြီး၌ ထိုင်းဝန်ကြီးချုပ်ဟောင်း သက်ဆင်နှင့် ဟောင်ကောင်မှာ တွေ့ဆုံပြီး စကားစမြည် ပြောဆိုခဲ့ဖူးကြောင်း Progressive Movement ပါတီခေါင်းဆောင် သာနာသွန်း ဂျူအန်ရွန်ရန်ကစ် (Thanathorn Juangroongruangkit) က အတည်ပြု ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

သက်ဆင်က နောက်ကွယ်မှ ကြိုးကိုင်နေသည်ဟု ယူဆခံထားရသည့် အာဏာရ ဖြူးထိုင်းပါတီမှ ဒုဝန်ကြီးချုပ် ဖွမ်သမ် ဝီချာရာချိုင်း (Phumtham Wechayachai) ကမူ သက်ဆင်နှင့် သာနာသွန်းတို့ ဟောင်ကောင်တွင် တွေ့ဆုံခဲ့ခြင်းကို မသိကြောင်း ငြင်းဆိုခဲ့သည်။ 

"သင့်အနေနဲ့ မစ္စတာ သာနာသွန်းနဲ့ မစ္စတာသက်ဆင်ကို မေးသင့်ပါတယ်။ အပြင်မှာ ဘာတွေဖြစ်ခဲ့လဲဆိုတာ ဘယ်သူကမှ မသိပါဘူး" ဟု ဖွမ်သမ်က ပြောသည်။

သတင်းကြေညာသူ ဆော်ရာယွတ် သုသစန္ဒာချင်ဒါကို တွေ့ရစဉ်

မကြာသေးမီက လူသိများသည့် သတင်းကြေညာသူ ဆော်ရာယွတ် သုသစန္ဒာချင်ဒါ (Sorrayuth Suthas sana chinda) နှင့် အင်တာဗျူး ပြုလုပ်ခဲ့ချိန်တွင် အတိုက်အခံ Move Forward(MFP) ပါတီ၏ အဓိကထောက်ခံသူ ဖြစ်သည့် မစ္စတာ သာနာသွန်းက သူသည် အစိုးရမဖွဲ့စည်းမီ ဇူလိုင်လအတွင်းက သက်ဆင်နှင့်တွေ့ဆုံရန် ဟောင်ကောင်သို့ သွားရောက်ခဲ့သည်ဆိုသည့် သတင်းကို အတည်ပြုခဲ့သည်။ 

ထိုအချိန်က Progressive Movement နှင့် MFP ပါတီတို့၏ အဓိက ခေါင်းဆောင်များက ၎င်းတို့နှစ်ဦး၏ တွေ့ဆုံမှုကို ငြင်းဆိုခဲ့ပြီးနောက် ယခုအကြိမ်သည် သာနာသွန်းက ပထမဆုံးအကြိမ်အဖြစ် အတည်ပြုခဲ့ခြင်း ဖြစ်သည်။

"ကျနော်က နိုင်ငံရေးအရ ဘယ်လိုရာထူးကိုမဆို ရယူထားခြင်း မရှိပါဘူး။ တကယ်လို့ ကျနော်ဟာ နိုင်ငံရေးအရ သဘောတူညီချက်တွေ လုပ်ခဲ့မယ်ဆိုရင် MFP ဟာ ဖျက်သိမ်းခံရပါလိမ့်မယ်" ဟု သာနာသွန်းက ပြောကြားခဲ့ သည်။

သာနာသွန်းကို တွေ့ရစဉ်

MFP ပါတီမတိုင်မီ ဖွဲ့စည်းခဲ့သည့် Future Forward ပါတီ (ယခုဖျက်သိမ်း)၏ ခေါင်းဆောင်ဟောင်းဖြစ်သူ မစ္စတာ သာနာသွန်းက Future Forward ပါတီမှ ဆင်းသက်လာခဲ့သည့် MFP သည် သူမပါဘဲ ဖွံ့ဖြိုးတိုးတက်လာခဲ့သည် ကို မြင်တွေ့ရသည်မှာ ဂုဏ်ယူစရာကောင်းကြောင်း ပြောကြားခဲ့သည်။ 

"MFP ဟာ ဘယ်သူ တစ်စုံတစ်ဦးကိုမှ မှီခိုခြင်းမရှိတဲ့ နိုင်ငံရေး အင်စတီကျူးရှင်းတစ်ခု ဖြစ်လာခဲ့တယ်ဆိုတာ ပြသနိုင်ခဲ့ပြီ ဖြစ်ပါတယ်" ဟု သာနာသွန်းက ပြောကြားခဲ့သည်။ 

Future Forward (FFP) ပါတီ ဖျက်သိမ်းခံခဲ့ရပြီးနောက် သာနာသွန်းသည် သီးခြားပါတီတစ်ခုအဖြစ် Progressive Movement ပါတီကို ထူထောင်ခဲ့သူ ဖြစ်သည်။ 

ထို့နောက် သာနာသွန်း၏ Progressive Movement ပါတီသည် ရွေးကောက်ပွဲတွင် MFP ပါတီ၏ မဲဆွယ်စည်းရုံး မှုများတွင် ကူညီပေးခဲ့သည်။

Source: ဘန်ကောက်ပို့စ်

CNI International News

ဂါဇာ၊ နိုဝင်ဘာ ၂၃

အစ္စရေးနှင့် ဟားမာ့စ်အဖွဲ့အကြား နိုဝင်ဘာ ၂၂ ရက်နေ့က ၄ ရက်ကြာ အပစ်အခတ်ရပ်စဲရေး သဘောတူညီမှု ရရှိခဲ့ကြောင်း ရိုက်တာမှ ဖော်ပြခဲ့သည်။ 

အစ္စရေးတွင် အကျဉ်းချခံထားရသည့် ပါလက်စတိုင်း အကျဉ်းသား ၁၅၀ နှင့် ဂါဇာတွင် ဖမ်းဆီးခံထားရသည့် ဓားစာခံ ၅၀ ကို လဲလှယ်ရန်၊ ဂါဇာဒေသအတွင်းသို့ လူသားချင်း စာနာထောက်ထားမှုဆိုင်ရာ အကူအညီများ ပေးပို့ခွင့်ရစေရန် အပစ်အခတ်ရပ်စဲရေး သဘောတူညီမှု ပြုလုပ်ခဲ့ခြင်း ဖြစ်သည်။

ထိုအပစ်အခတ်ရပ်စဲရေး သဘောတူညီချက်အတွက် ဆွေးနွေးညှိနှိုင်းမှုများကို လျှို့ဝှက်ပြုလုပ်ခဲ့ရကြောင်း အပစ်အခတ်ရပ်စဲရေးကို ကြားဝင်စေ့စပ်ပေးသည့် ကာတာနိုင်ငံမှ အရာရှိများက ပြောကြားခဲ့သည်။

အဆိုပါ သဘောတူညီချက် ရရှိရန် နီးစပ်နေပြီဖြစ်ကြောင်း ပြီးခဲ့သည့် ရက်ပိုင်းကတည်းက အမေရိကန်၊ အစ္စရေးနှင့် ဟားမာ့စ်အရာရှိများက ပြောကြားခဲ့ကြသည်။

ဟားမာ့စ်က ဖမ်းထားတဲ့ ဓားစားခံတွေ ပြန်လွှတ်ပေးဖို့ တောင်းဆိုနေကြစဉ်

ဟားမာ့စ်အဖွဲ့သည် အောက်တိုဘာ ၇ ရက်က အစ္စရေးကို ဝင်ရောက်တိုက်ခိုက်ခဲ့ချိန်တွင် လူပေါင်း ၁၂၀၀ ခန့်ကို သတ်ဖြတ်ခဲ့သလို ဓားစာခံ ၂၀၀ ကျော်ကိုလည်း ဖမ်းဆီးခေါ်ဆောင် သွားခဲ့သည်ဟု ယူဆရကြောင်း အစ္စရေး အရာရှိများက ထုတ်ပြန်ခဲ့သည်။ 

၄ ရက်ကြာ အပစ်အခတ်ရပ်စဲရေး ကာလအတွင်း ဂါဇာ၌ ဖမ်းဆီးခံထားရသည့် ဓားစာခံများအနက် အမျိုးသမီး များနှင့် ကလေးများ စုစုပေါင်း ၅၀ ခန့် လွတ်မြောက်လာလိမ့်မည်ဟု အစ္စရေးဝန်ကြီးချုပ် ဘင်ဂျမင် နေတန်ယာဟု (Benjamin Netanyahu) ၏ ရုံးက ထုတ်ပြန်ခဲ့သည်။

နောက်ထပ် ဓားစာခံ ၁၀ ဦးစီ ပြန်လွတ်လာတိုင်း အပစ်အခတ်ရပ်စဲရေးကို တစ်ရက်စီ ထပ်တိုးသွားမည်ဟု အစ္စရေးဝန်ကြီးချုပ်ရုံးက ထုတ်ပြန်ချက်တွင် ဖော်ပြထားသည်။

အစ္စရေးဘက်က ပါလက်စတိုင်း အကျဉ်းသားမည်မျှကို ပြန်လွှတ်ရမည်ဆိုခြင်းကို အသေးစိတ် ထုတ်ပြန်ခဲ့ခြင်း မရှိပေ။

ဟားမာ့စ်က ဖမ်းထားတဲ့ ဓားစားခံတွေ ပြန်လွှတ်ပေးဖို့ တောင်းဆိုနေကြစဉ်

"အစ္စရေးအစိုးရဟာ ဓားစာခံအားလုံး ပြန်လည်လွတ်မြောက်လာစေဖို့ ကြိုးပမ်း လုပ်ဆောင်နေပါတယ်။ ဒီနေ့ည မှာတော့ ဓားစာခံတွေ ပြန်လည်လွတ်မြောက်ရေးအတွက် ပထမအဆင့်အဖြစ် အပစ်အခတ်ရပ်စဲရေး အဆိုပြု ချက်ကို အတည်ပြုခဲ့ပါတယ်" ဟု ထုတ်ပြန်ချက်တွင် ဖော်ပြခဲ့သည်။ 

အပစ်အခတ်ရပ်စဲရေး သဘောတူညီချက်တွင် လူသားချင်း စာနာထောက်ထားမှု အကူအညီများ၊ ဆေးဝါးနှင့် လောင်စာများ တင်ဆောင်ထားသော ရာနှင့်ချီသည့် ထရပ်ကားများကို ဂါဇာဒေသအတွင်းသို့ ဝင်ခွင့်ပြုရန် သဘောတူညီချက်လည်း ပါဝင်ခဲ့သည်။ 

အစ္စရေးစစ်တပ်ကလည်း အပစ်အခတ်ရပ်စဲရေး ကာလအတွင်း ဂါဇာဒေသအတွင်း တိုက်ခိုက်မှုများ သို့မဟုတ် ဖမ်းဆီးမှုများကို လုပ်ဆောင်မည် မဟုတ်ကြောင်း ကတိပြုခဲ့သည်။ 

ထိုအပစ်အခတ်ရပ်စဲရေး သဘောတူညီချက်ကို အမေရိကန်သမ္မတ ဂျိုးဘိုင်ဒန် (Joe Biden) လည်း ကြိုဆိုခဲ့ သည်။

Source: ရိုက်တာ