CNI International News

ကိယက်ဗ်၊ စက်တင်ဘာ ၁၆

ယူကရိန်းအနေဖြင့် အနောက်နိုင်ငံလုပ် လက်နက်များအားအသုံးပြုပြီး ရုရှား၏ နယ်နိမိတ်အတွင်းပိုင်းကို နက်ရှိုင်း စွာ တိုက်ခိုက်ရန် ကောင်းမွန်သည့် စစ်ရေးအကြောင်းပြချက် ရှိလိမ့်မည်ဟု နေတိုးထိပ်သီး အရာရှိတစ်ဦးက ပြော ကြားခဲ့ကြောင်း ရိုက်တာမှ ဖော်ပြခဲ့သည်။

ယူကရိန်း၏ မဟာမိတ်များက ၎င်းတို့ ထောက်ပံ့ပေးထားသည့် လက်နက်များကို အသုံးပြုပြီး ရုရှားကို တိုက်ခိုက် လိုသော ယူကရိန်း၏ အစီအစဉ်ကို ခွင့်ပြုရန် သင့်/မသင့် ဆွေးနွေးနေချိန်တွင် စက်တင်ဘာ ၁၃ ရက်က ဗြိတိန် ဝန်ကြီးချုပ် ကီယာ စတာမာ (Keir Starmer) နှင့် အမေရိကန်သမ္မတ ဂျိုးဘိုင်ဒန် (Joe Biden ) တို့သည် အိမ်ဖြူတော်၌ တွေ့ဆုံခဲ့ကြသည်။

ရုရှားသမ္မတ ပူတင် (Vladimir Putin) ကမူ အနောက်နိုင်ငံများအနေဖြင့် ၎င်းတို့ ထောက်ပံ့ထားသည့် တာဝေးပစ် ဒုံးကျည်များဖြင့် ရုရှားကို တိုက်ခိုက်ရန် ယူကရိန်းအား ခွင့်ပြုပေးမည်ဆိုပါက အနောက်နိုင်ငံများသည် ရုရှားအား တိုက်ရိုက်တိုက်ခိုက်မှု ဖြစ်လာလိမ့်မည်ဟု ပြောကြားခဲ့သည်။

ဗြိတိန် ဝန်ကြီးချုပ် ကီယာ စတာမာနဲ့ အမေရိကန်သမ္မတ ဘိုင်ဒန်ကို တွေ့ရစဉ်

ချက်သမ္မတနိုင်ငံ ပရာဟာ (Prague) မြို့တော်တွင် ပြုလုပ်သည့် နေတိုးအဖွဲ့၏ အမြင့်ဆုံး စစ်ရေးအာဏာပိုင်အဖွဲ့ ဖြစ်သည့် စစ်ဘက်ဆိုင်ရာကော်မတီ အစည်းအဝေး၌ ကော်မတီဥက္ကဋ္ဌဖြစ်သည့် နယ်သာလန်ရေတပ်ဗိုလ်ချုပ်ကြီး ရော့ဘ် ဘောင်ဝါ (Rob Bauer)က လက်နက်ကိုင်ပဋိပက္ခများ၏ ဥပဒေအရ နိုင်ငံတစ်နိုင်ငံအနေဖြင့် မိမိကိုယ် ကိုယ် ကာကွယ်ခွင့်ရှိပြီး ထိုကာကွယ်ပိုင်ခွင့်သည် နယ်စပ်ဒေသအထိသာ မဟုတ်ဘဲ နယ်စပ်ဒေသကို ကျော်လွန် လွှမ်းခြုံကြောင်း ပြောကြားခဲ့သည်။

ထို့ပြင် လက်နက်ထောက်ပံ့ပေးသည့် နိုင်ငံများအနေဖြင့်လည်း ထိုလက်နက်များကို အသုံးပြုခွင့်ပေးရာတွင် တားမြစ်ကန့်သတ်မှုများ ချမှတ်ပိုင်ခွင့်ရှိသည်ဟုလည်း ဘောင်ဝါက ပြောကြားခဲ့သည်။

"စစ်ရေး သဘောတရားတွေအရ ပြောရမယ်ဆိုရင် သင်ဟာ သင့်ကို တိုက်ခိုက်နေတဲ့ ရန်သူကို အားနည်းစေချင်တဲ့ အတွက် သင့်ရန်သူရဲ့ နယ်မြေကို ပြန်တိုက်တာ ဖြစ်ပါတယ်။ ဒါဟာ ခံစစ်နဲ့ ထိုးစစ်ကို တစ်ချိန်တည်း လုပ်ဆောင် တာ ဖြစ်ပါတယ်" ဟု ၎င်းက ပြောကြားခဲ့သည်။

 ရုရှားသမ္မတ ပူတင်ကို တွေ့ရစဉ်

"အဲဒါကြောင့် စစ်ရေး သဘောတရားအရဆိုရင် ရန်သူကို အားနည်းသွားစေဖို့၊ ရန်သူတွေရဲ့ ထောက်ပို့လမ်း ကြောင်း၊ လောင်စာ၊ လက်နက်ခဲယမ်းတွေ ရှေ့တန်းကို မရောက်စေဖို့အတွက် ရန်သူ့နယ်မြေကို တိုက်ခိုက်တာ ဟာ ကောင်းမွန်တဲ့ အကြောင်းပြချက် ဖြစ်ပါတယ်"ဟု ဘောင်ဝါက ပြောသည်။

အခြားတစ်ဖက်တွင်လည်း လက်နက်ထောက်ပံ့သည့် နိုင်ငံများအနေဖြင့် ၎င်းတို့ ထောက်ပံ့လိုက်သည့် လက်နက် များ၏ သက်ရောက်မှုအတွက် တာဝန်ရှိမည်ဖြစ်ပြီး ထိုအကြောင်းအရာကို နိုင်ငံရေးအရ ဆွေးနွေးမှုများ ဆက်လက် ပြုလုပ်ရမည်ဖြစ်ကြောင်း ၎င်းက ဆိုသည်။

ယူကရိန်းသမ္မတ ဇာလန်းစကီး (Volodymyr Zelenskiy) ကမူ အမေရိကန်၏ တာဝေးပစ် ATACMS လက်နက် စနစ်၊ ဗြိတိန်၏ Storm Shadows ဒုံးကျည်များ အပါအဝင် အနောက်နိုင်ငံလုပ် လက်နက်များကို အသုံးပြုပြီး ရုရှား၏ နယ်နိမိတ်အတွင်းပိုင်းအထိ နက်ရှိုင်းစွာ ပစ်မှတ်ထား တိုက်ခိုက်ခွင့်ပြုရန် အနောက်နိုင်ငံများကို တိုက်တွန်း လျက်ရှိသည်။

Source: ရိုက်တာ

CNI International News

ဆိုးလ်၊ စက်တင်ဘာ ၁၄

မြောက်ကိုရီးယားနိုင်ငံသည် လက်နက်ထုတ်လုပ်နိုင်သည့် ယူရေနီယံများ ထုတ်လုပ်သော လျှို့ဝှက်စက်ရုံတစ်ရုံ၏ ရှားပါးဓာတ်ပုံများကို စက်တင်ဘာ ၁၃ ရက်က ထုတ်ပြန်ခဲ့ကြောင်း အေပီမှ ဖော်ပြခဲ့သည်။

မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) ထိုယူရေနီယံစက်ရုံသို့ သွားရောက် စစ်ဆေးကြည့်ရှု ခဲ့ပြီး နျူကလီးယား လက်နက်များကို တိုးမြှင့်ထုတ်လုပ်ရန် တိုက်တွန်းသည်။

ထို့နောက် ခရီးစဉ်တွင် ဓာတ်ပုံများကို နိုင်ငံပိုင် KCNA သတင်းအေဂျင်စီက ထုတ်ပြန်ခဲ့သည်။

အဆိုပါ ယူရေနီယံစက်ရုံသည် မြောက်ကိုရီးယား၏ အဓိက ယွန်ဗြောင် (Yongbyon) နျူကလီးယားစက်ရုံဝင်း အတွင်း တည်ရှိခြင်း ရှိ/မရှိကိုမူ အသေးစိတ် မသိရသေးပေ။

မြောက်ကိုရီးယားသည် ၂၀၁၀ ပြည့်နှစ်က ယွန်ဗြောင် နျူကလီးယားစက်ရုံဝင်း အတွင်းသို့ အမေရိကန် ကျွမ်းကျင် သူများ လာရောက်လေ့လာသည့် အချိန်က ၎င်း၏ ယူရေနီယံ ထုတ်လုပ်ရေး စက်ရုံတစ်ရုံကို ပထမဆုံးအကြိမ် ပြသခဲ့ဖူးသည်။

ယူရေနီယံစက်ရုံကို သွားစစ်ဆေးနေတဲ့ ကင်မ်ကို တွေ့ရစဉ်

ယခုနောက်ဆုံးအကြိမ် ယူရေနီယံစက်ရုံကို ထုတ်ဖော်ပြသခြင်းသည် အမေရိကန်နှင့် ၎င်း၏ မဟာမိတ်များကို ဖိအားများတိုးမြှင့်ရန် အားထုတ်ကြိုးပမ်းမှု ဖြစ်နိုင်ကြောင်း ကျွမ်းကျင်သူများက ပြောကြားခဲ့သည်။

နျူကလီးယား လက်နက်များ ထုတ်လုပ်ရေးဌာနနှင့် ယူရေနီယံများ ထုတ်လုပ်သည့် စက်ရုံသို့ သွားရောက် လေ့လာကြည့်ရှုသည့် ခရီးစဉ်အတွင်း ကင်မ်က နိုင်ငံ၏ နျူကလီးယားကဏ္ဍတွင် နည်းဗျူဟာမြောက် အင်အားကို မြှင့်တင်ရန် ထပ်တလဲလဲ တိုက်တွန်းခဲ့သည်ဟု KCNA က ဖော်ပြခဲ့သည်။

ကင်မ်သည် ယူရေနီယံစက်ရုံ၏ ထိန်းချုပ်ခန်းနှင့် နျူကလီးယား လက်နက်များ ထုတ်လုပ်ရန်အတွက် နေရာ ချဲ့ထွင်ရန် တည်ဆောက်နေသည့် ဆောက်လုပ်ရေး လုပ်ငန်းခွင်တစ်ခုကို လှည့်လည် ကြည့်ရှုခဲ့သည်ဟု  KCNA က ဖော်ပြခဲ့သည်။

ယူရေနီယံစက်ရုံကို သွားစစ်ဆေးနေတဲ့ ကင်မ်ကို တွေ့ရစဉ်

နိုင်ငံပိုင်မီဒီယာက ထုတ်ပြန်သည့် ဓာတ်ပုံများထဲတွင် ယူရေနီယံ ထုတ်လုပ်ရေးစက်ရုံ၏ စက်ပစ္စည်းများ တန်းစီ ထားသည့် အလယ်တွင် ကင်မ်သည် သိပ္ပံပညာရှင်များ၏ တင်ပြချက်များကို နားထောင်ရင်း လမ်းလျှောက်နေပုံ များ ပါဝင်သည်။

အမေရိကန် ဦးဆောင်သည့် အင်အားစုများသည် မြောက်ကိုရီးယား ဆန့်ကျင်သည့် နျူကလီးယားခြိမ်းခြောက် မှုများကို ပြုလုပ်နေ၍ မိမိတို့အနေဖြင့် ပိုမိုကောင်းမွန်သည့် ကာကွယ်ရေးနှင့် ကြိုတင်လက်ဦးမှု ရယူတိုက်ခိုက် နိုင်စွမ်းကို မြှင့်တင်ရန် လိုအပ်ကြောင်း ကင်မ်က ပြောကြားခဲ့သည်။

တောင်ကိုရီးယား၏ ပြန်လည်ပေါင်းစည်းရေးဝန်ကြီးဌာနကမူ မြောက်ကိုရီးယား၏ နျူကလီးယား စွမ်းဆောင် ရည်များ အရှိန်မြှင့်တင်နေမှုကို ပြင်းထန်စွာ ရှုတ်ချခဲ့ပြီး မြောက်ကိုရီးယားသည် ကုလသမဂ္ဂ၏ ပြဋ္ဌာန်းချက်များ အား ချိုးဖောက်ကာ နျူကလီးယား လက်နက်များကို တရားမဝင် ထုတ်လုပ်နေသည်ဟု ထုတ်ပြန်ခဲ့သည်။

Source: အေပီ

CNI International News

တိုကျို၊ စက်တင်ဘာ ၁၃

ဂျပန်နိုင်ငံတွင် အာဏာရ လစ်ဘရယ်ဒီမိုကရက်တစ်ပါတီ (LDP) က လက်ရှိဝန်ကြီးချုပ် ဖူမီအို ကီရှီဒါ (Fumio Kishida) ၏ နေရာ၌ အစားထိုး တာဝန်ထမ်းဆောင်မည့် ဝန်ကြီးချုပ်သစ်တစ်ဦးကို ရွေးကောက်တင်မြှောက်ရန် ပါတီတွင်း မဲဆွယ်စည်းရုံးမှုများအား စက်တင်ဘာ ၁၂ ရက်က စတင်ခဲ့ကြောင်း Nikkei Asia မှ ဖော်ပြခဲ့သည်။

LDP ပါတီသည် ရန်ပုံငွေ အရှုပ်တော်ပုံများကြောင့် လူထု၏ ယုံကြည်မှုကို ပြန်လည်မြှင့်တင်ရန် ကြိုးပမ်းနေချိန် တွင် မဲဆွယ်စည်းရုံးရေး ကာလကို ၁၅ ရက်ကြာ ပြုလုပ်မည်ဖြစ်ပြီး ထိုရွေးကောက်ပွဲ၌ ပါဝင်ယှဉ်ပြိုင်သည့် ကိုယ်စားလှယ်လောင်း ၉ ဦးအထိရှိခဲ့သည်။

ကိုယ်စားလှယ်လောင်း ၉ ဦးအနက် စီးပွားရေးလုံခြုံရေးဝန်ကြီး တာကာအီချီ ဆာနာအီ (Takaichi Sanae) ၊ စီးပွားရေးလုံခြုံရေးဝန်ကြီးဟောင်း ကိုဘာယာရှိ တာကာယူကီ (Kobayashi Takayuki) ၊ အစိုးရအဖွဲ့ အတွင်းဝန် ချုပ် ဟာယာရှီ ယိုရှီမာဆာ (Hayashi Yoshimasa) ၊ သဘာဝပတ်ဝန်းကျင်ရေးရာဝန်ကြီး ကိုအီဇူမီ ရှီနီဂျီရို (Koizumi Shinjiro) ၊ နိုင်ငံခြားရေးဝန်ကြီး ကာမီကာဝါ ယိုကို ( Kamikawa Yoko) တို့ ပါဝင်သည်။

ထို့ပြင် ကျန်ကိုယ်စားလှယ်လောင်းများမှာ အစိုးရအဖွဲ့ အတွင်းဝန်ချုပ်ဟောင်း ကာတို ကတ်ဆူနိုဘူ (Kato Katsunobu) ၊ ဒစ်ဂျစ်တယ် အသွင်ကူးပြောင်းရေးဝန်ကြီး ကိုနိုတာရို (Kono Taro) ၊ LDP အတွင်းရေးမှူးချုပ် ဟောင်း အီရှီဘာ ရှီဂီရူ (Ishiba Shigeru) နှင့် လက်ရှိ ပါတီအတွင်းရေးမှူးချုပ် မိုတီဂီတိုရှီမစ်ဆု (Motegi Toshimitsu) တို့ဖြစ်သည်။

ဝန်ကြီးချုပ် ကီရှီဒါကို တွေ့ရစဉ်

ဝန်ကြီးချုပ် ရွေးချယ်မှုကို စက်တင်ဘာ ၂၇ ရက်တွင် ပြုလုပ်မည်ဖြစ်ပြီး ဝင်ရောက်ယှဉ်ပြိုင်မည့် ကိုယ်စားလှယ် လောင်း အရေအတွက်သည် စံချိန်တင် များပြားခဲ့သည့်အတွက် မဲများပျံ့သွားနိုင်ကြောင်း ကျွမ်းကျင်သူများက ပြောကြားခဲ့သည်။

ရွေးကောက်ပွဲတွင် အနိုင်ရရှိသူသည် LDP ဥက္ကဋ္ဌသစ် ဖြစ်လာမည်ဖြစ်ပြီး နိုင်ငံအတွင်း ကုန်စျေးနှုန်း မြင့်တက်မှု၊ တရုတ်နှင့် မြောက်ကိုရီးယားတို့၏ လုံခြုံရေးခြိမ်းခြောက်မှုများကို ကိုင်တွယ်ဖြေရှင်းရမည်ဖြစ်သည်။

ဂျပန်တွင် အထက်လွှတ်တော်နှင့် အောက်လွှတ်တော် နှစ်ရပ်စလုံးကို LDP ပါတီနှင့် ၎င်း၏ ညွန့်ပေါင်းမဟာမိတ် ကိုမီအီတို ပါတီတို့က ထိန်းချုပ်ထားသဖြင့် LDP ပါတီဥက္ကဋ္ဌသစ်အဖြစ် ရွေးချယ်ခံရသူသည် ဝန်ကြီးချုပ်ရာထူးကို အလိုအလျောက် ရရှိမည်ဖြစ်သည်။

ကိုမီအီတိုပါတီသည်လည်း ယခုလအတွင်း ပါတီခေါင်းဆောင်သစ်တစ်ဦးကို ရွေးချယ်မည်ဖြစ်ပြီး အတိုက်အခံပါတီ ဖြစ်သည့် ဖွဲ့စည်းပုံအခြေခံဥပဒေဆိုင်ရာ ဒီမိုကရက်တစ်ပါတီသည်လည်း ပါတီခေါင်းဆောင်သစ် ရွေးချယ်သွား မည်ဖြစ်သည်။

Source: Nikkei Asia

CNI International News

မော်စကို၊ စက်တင်ဘာ ၁၃

ရုရှားအနေဖြင့် ယူကရိန်းတွင် နေတိုး၏ ရန်လိုမှုကို ထောက်ခံနေသည့် နိုင်ငံများအား နျူကလီးယား လက်နက် များ အသုံးပြုဖြေရှင်းလိုသည့် သဘောထားကို ရှင်းရှင်းလင်းလင်း ပြသသင့်သည်ဟု ရုရှား၏ ဩဇာကြီးမားသည့် နိုင်ငံခြားရေးမူဝါဒဆိုင်ရာ သဘောထားတင်းမာသူ ဆာဂျေ ကရာဂါနော့ဗ် (Sergei Karaganov) က ပြောကြား ခဲ့သည်ဟု ရိုက်တာမှ ဖော်ပြခဲ့သည်။

ရုရှားသမ္မတ ပူတင် (Vladimir Putin) အနေဖြင့် အနောက်နိုင်ငံများအပေါ်ထားရှိသည့် နျူကလီးယား ရပ်တည် ချက်ကို ပိုမိုအားမာန်ပြည့်ဝသည့် အခြေအနေမျိုး ဖန်တီးသင့်ကြောင်းလည်း ဝါရင့်နိုင်ငံရေးသိပ္ပံပညာရှင် ကရာဂါနော့ဗ်က Kommersant သတင်းစာနှင့်ပြုလုပ်သည့် အင်တာဗျူးတစ်ခုတွင် ပြောကြားခဲ့သည်။

ရုရှားအနေဖြင့် အလုံးစုံ နျူကလီးယားစစ်ပွဲကို ဆင်နွှဲစရာမလိုဘဲ နေတိုးအဖွဲ့ဝင် တစ်နိုင်ငံကို အကန့်အသတ် ရှိသည့် နျူကလီးယား တိုက်ခိုက်မှု ပြုလုပ်နိုင်သည်ဟု ၎င်းက ထောက်ပြသည်။

ထို့ပြင် အမေရိကန်သည် ၎င်း၏ မဟာမိတ်များအား နျူကလီးယားထီးရိပ်ဖြင့် အကာအကွယ်ပေးမည်ဟု ကတိပြု ထားခြင်းသည် လိမ်ညာနေခြင်းဖြစ်သည်ဟု ကရာဂါနော့ဗ်က ပြောသည်။

ရုရှား၏ နျူကလီးယားလမ်းစဉ်တွင် အဓိက ရည်မှန်းချက်သည် ရုရှားအနေဖြင့် နျူကလီးယား လက်နက်များကို အသုံးပြုရန် အဆင်သင့် ဖြစ်နေသည့်အချက်ကို လက်ရှိ ရန်သူများနှင့် အနာဂတ် ရန်သူများ သိရှိစေရန် လုပ်ဆောင်သင့်ကြောင်း ၎င်းက ပြောသည်။

ပူတင်ကို တွေ့ရစဉ်

ယူကရိန်းတပ်ဖွဲ့များသည် ရုရှား၏ ကာစ့် (Kursk) ဒေသကို ဝင်ရောက်တိုက်ခိုက်ခဲ့ပြီး နယ်မြေအချို့ကို သိမ်းပိုက် ထားကာ ရုရှားတပ်ဖွဲ့များက ယူကရိန်းတပ်များကို နိုင်ငံအတွင်းမှ မောင်းထုတ်ရန် တိုက်ခိုက်နေချိန်တွင် ကရာဂါနော့ဗ်၏ မှတ်ချက်စကားများ ထွက်ပေါ်လာခြင်းဖြစ်သည်။

"အခုချိန်က ကျနော်တို့ နယ်နိမိတ်ကို တိုက်ခိုက်နေတဲ့ ဘယ်လို တိုက်ခိုက်မှုကိုမဆို တုန့်ပြန်ဖို့ ကျနော်တို့မှာ အခွင့်အရေးရှိတယ်ဆိုတာ ကြေညာရမယ့် အချိန်ဖြစ်ပါတယ်" ဟု ကရာဂါနော့ဗ်က ပြောကြားခဲ့သည်။

၎င်း၏ ပြောကြားချက်များ ထွက်ပေါ်လာပြီးနောက် အနောက်နိုင်ငံများမှ လုံခြုံရေးကျွမ်းကျင်သူများသည် ရုရှား၏ နိုင်ငံခြားရေး၊ ကာကွယ်ရေးနှင့် နျူကလီးယား မူဝါဒများကို အနီးကပ်စောင့်ကြည့်ခဲ့ကြသည်။

လွန်ခဲ့သည့် ၁ နှစ်ကျော်ကတည်းက ကရာဂါနော့ဗ်သည် ရုရှား၏ နျူကလီးယား လမ်းစဉ်ကို အပြောင်းအလဲများ ပြုလုပ်ရန် တိုက်တွန်းခဲ့သည့် ဝါရင့်နိုင်ငံရေးသမား တစ်ဦးဖြစ်ပြီး ယခုအကြိမ်တွင် ထပ်မံတိုက်တွန်းခဲ့ခြင်း ဖြစ် သည်။

Source: ရိုက်တာ

CNI International News

ဘန်ကောက်၊ စက်တင်ဘာ ၁၃

ထိုင်းဝန်ကြီးချုပ် ပေတုန်တန်(Paetongtarn Shinawatra)က ထိုင်းနိုင်ငံ၏ စီးပွားရေးကို ဖွံ့ဖြိုးတိုးတက်ရန်နှင့် ပြည်သူများ၏ စားဝတ်နေရေးကို မြှင့်တင်ရန် ၎င်းတို့အစိုးရအဖွဲ့အနေဖြင့် ချက်ချင်းလုပ်ဆောင်မည့် မူဝါဒ ၁၀ ချက်ကို စက်တင်ဘာ ၁၂ ရက်က ကြေညာခဲ့သည်ဟု The Nation မှ ဖော်ပြခဲ့သည်။

မိမိတို့အစိုးရအဖွဲ့သည် ပြည်သူများ၏ ကြွေးမြီဖိအားများ၊ ကုန်စျေးနှုန်းနှင့် လူမှုလုံခြုံရေးအတွက် အန္တရာယ်ရှိ သည့် အခြေအနေများ အပါအဝင် ပြည်သူများ၏ အခက်အခဲများကို လျော့ပါးသက်သာအောင် အရေးတကြီး လုပ်ဆောင်ရန် လိုအပ်သည်ဟု သတိပြုမိခဲ့ကြောင်း ပေတုန်တန်က လွှတ်တော်ကို ပြောကြားခဲ့သည်။

"အစိုးရအဖွဲ့အနေနဲ့ ကြွေးမြီပြဿနာကို ဖြေရှင်းတာ၊ ကုန်စျေးနှုန်းလျှော့ချတာ၊ ဝင်ငွေမြှင့်တင်တာနဲ့ လူမှု လုံခြုံရေး အန္တရာယ်တွေကို ဖြေရှင်းတာတွေ လုပ်ဆောင်ပြီး စီးပွားရေး သာတူညီမှုနဲ့ အခွင့်အလမ်းတွေကို ဖန်တီးဖို့ အရှိန်မြှင့် လုပ်ဆောင်ရပါတယ်" ဟု ပေတုန်တန်က ပြောကြားခဲ့သည်။

ထိုင်းလွှတ်တော်မှာ ပေတုန်တန် အစိုးရအဖွဲ့ကို တွေ့ရစဉ်

၎င်းတို့ အစိုးရအဖွဲ့ ချက်ချင်း လုပ်ဆောင်မည့် မူဝါဒ ၁၀ ချက်မှာ-

၁။ ဘဏ်များ၊ ဘဏ္ဍာရေး အဖွဲ့အစည်းများ၊ ပိုင်ဆိုင်မှု စီမံခန့်ခွဲရေး ကုမ္ပဏီများနှင့်ပူးပေါင်းပြီး ထိုင်းပြည်သူများ အတွက် ရည်ရွယ်ကာ ကြွေးမြီကဏ္ဍ ပြန်လည်ရေးဆွဲရေး၊ အထူးသဖြင့် အိမ်နှင့်ကား အရစ်ကျဝယ်ယူမှု ချေးငွေ အစီအစဉ်များကို ပြန်လည်ရေးဆွဲရေး။

၂။ ထိုင်းစီးပွားရေး၏ မောင်းနှင်အားကို ပြန်လည်ထိန်းသိမ်းရန် အသေးစားနှင့် အလတ်စား လုပ်ငန်းများအကြား ကြွေးမြီပြဿနာကို ဖြေရှင်းပြီး ထိုင်းစီးပွားရေး လုပ်ငန်းရှင်များအား မျှတမှုမရှိသည့် စျေးကွက်ယှဉ်ပြိုင်မှုများမှ ကာကွယ်ရေး။

၃။ စွမ်းအင်အသုံးပြုခ စျေးနှုန်းများကို လျှော့ချခြင်း၊ လူအများအပြား သွားလာနိုင်သည့် သယ်ယူပို့ဆောင်ရေး စနစ်များကို မြှင့်တင်ရေး။

၄။ ပညာရေး၊ ပြည်သူ့ကျန်းမာရေးနှင့် ဝန်ဆောင်မှု လုပ်ငန်းများအတွက် လျာထားနိုင်မည့် တရားမဝင် မြေအောက် စီးပွားရေးလုပ်ငန်းများ (ဥပမာ-ကာစီနိုရုံများ) ထံမှ အခွန်ကောက်ယူရေး။

၅။ ဒစ်ဂျစ်တယ်ငွေကြေး ထောက်ပံ့မှု အစီအစဉ်ဖြင့် ပြည်သူများ၏ လိုအပ်ချက်ကို ဖြည့်ဆည်းပေးရန် ဒစ်ဂျစ် တယ် စီးပွားရေးနှင့် ပြည်သူ့အချက်အလက်စင်တာများ ကောက်ယူရေး။

၆။ လယ်ယာစိုက်ပျိုးရေး ထုတ်ကုန်တန်ဖိုးများနှင့် လယ်သမားများ၏ ဝင်ငွေကို မြှင့်တင်ရန် ခေတ်မီ လယ်ယာ စိုက်ပျိုးရေးကဏ္ဍကို အကောင်အထည်ဖော်ရေး။

ထိုင်းက သစ်သီးဈေးကိုတွေ့ရစဉ်

၇။ ထိုင်းနိုင်ငံသို့ လွယ်ကူချောမွေ့စွာ ဝင်ထွက်သွားလာနိုင်ရန် ဗီဇာလျှောက်ထားမှု လုပ်ငန်းစဉ်ကို ပြန်လည် ရေးဆွဲပြီး ခရီးသွားကဏ္ဍကို မြှင့်တင်ရေး။

၈။ မူးယစ်ဆေးဝါးပြသနာကို တိုက်ဖျက်ရေးနှင့် မူးယစ်ဆေး စွဲနေသူများအား ဆေးဖြတ်ရာတွင် ကူညီရေး။

၉။ ထိုင်းပြည်သူများ၏ အကျိုးစီးပွားများကို ကာကွယ်ရန် ပြည်တွင်း/ပြည်ပ ရာဇဝတ်မှုများ၊ အွန်လိုင်းပေါ်မှာ လိမ်ညာသည့် ဂိုဏ်းများနှင့် ဆိုက်ဘာရာဇဝတ်မှုများကို အိမ်နီးချင်းနိုင်ငံများနှင့် ပူးပေါင်းတိုက်ဖျက်ရေး။

၁၀။ ပြည်သူများ အထူးသဖြင့် မသန်စွမ်းများ၊ သက်ကြီးရွယ်အိုများ၊ တိုင်းရင်းသားများနှင့် နိုင်ငံမဲ့ လူပုဂ္ဂိုလ်များ အတွက် အခွင့်အလမ်းများကို သာတူညီမျှရှိစေသည့် လူမှုဖူလှုံရေးအစီအစဉ်ကို ထူထောင်ရေး။

အစရှိသည့် အချက်များဖြစ်သည်။

ထိုင်းနိုင်ငံတွင် သြဂုတ်လက ဝန်ကြီးချုပ် ဆရီသာကို ရာထူးမှ ဖယ်ရှားခံရပြီးနောက် ပေတုန်တန်အား  ဝန်ကြီးချုပ်အသစ်အဖြစ် ရွေးချယ်တင်မြှောက်ခဲ့သည်။

ထို့နောက် ပေတုန်တန် ဦးဆောင်သည့် အစိုးရအဖွဲ့သစ်ကို ပြန်လည် ဖွဲ့စည်းကာ စီးပွားရေးမူဝါဒများ ချမှတ်၍ အကောင်အထည်ဖော်လာခြင်းဖြစ်သည်။

Source: The Nation

CNI International News

ဘန်ဂီ၊ စက်တင်ဘာ ၁၂

အမေရိကန်နှင့် ရုရှားအကြား အာဖရိကတိုက်တွင် ဩဇာလွှမ်းမိုးရန် အပြိုင်အဆိုင် ကြိုးပမ်းနေမှုသည် ဗဟိုအာဖရိကသမ္မတနိုင်ငံ (CAR)တွင် ပိုမိုအရှိန်မြင့်တက်လာခဲ့သည်ဟု အေပီမှ ဖော်ပြခဲ့သည်။

ပြီးခဲ့သည့်နှစ်က ရုရှားနိုင်ငံတွင် ကြေးစားစစ်သားအဖွဲ့ဖြစ်သည့် Wagner Group ခေါင်းဆောင် ယက်ဗ်ဂျီနီ ပရီဂိုဇင် (Yevgeny Prigozhin) ၏ ပုန်ကန်မှုဖြစ်ပွားပြီး နာရီပိုင်းအကြာတွင် ဗဟိုအာဖရိကသမ္မတနိုင်ငံ၏ အရာရှိများသည် အမေရိကန်ကို အကူအညီတောင်းခံသည့် စာတစ်စောင် ပေးပို့ခဲ့သည့်သတင်း ထွက်ပေါ်လာ ခဲ့သည်။

Wagner ကြေးစားစစ်သား ၁၅၀၀ ခန့် တပ်စွဲထားသည့် ဗဟိုအာဖရိကနိုင်ငံ၏ အရာရှိများသည် အမေရိကန် ပုဂ္ဂလိက လုံခြုံရေးကုမ္ပဏီတစ်ခုနှင့် အစည်းအဝေးများ ပြုလုပ်ရန် ထိုပေးစာထဲတွင် ရေးသားတောင်းဆိုခဲ့သည်။

ထို့နောက် ဗဟိုအာဖရိကသမ္မတနိုင်ငံနှင့် အမေရိကန်၏ ပုဂ္ဂလိက လုံခြုံရေးကုမ္ပဏီဖြစ်သည့် Bancroft Global Development အစည်းအဝေးများ ဆက်တိုက်ပြုလုပ်ခဲ့ကာ လုံခြုံရေးပူးပေါင်းဆောင်ရွက်မှု သဘောတူညီချက် တစ်ခု ချုပ်ဆိုနိုင်ခဲ့သည်။

ထိုအခြေအနေကြောင့် အာဖရိကတိုက်တွင် ဩဇာလွှမ်းမိုးရန် အပြိုင်အဆိုင် ကြိုးပမ်းနေသည့် အမေရိကန်နှင့် ရုရှားအကြား တင်းမာမှုများသည် ဗဟိုအာဖရိကသမ္မတနိုင်ငံတွင် ပိုမိုအရှိန်မြင့်တက်လာခဲ့သည်။

ကွယ်လွန်သွားပြီဖြစ်တဲ့ Wagner Group ခေါင်းဆောင် ယက်ဗ်ဂျီနီ ပရီဂိုဇင်ကို တွေ့ရစဉ်

ရုရှားကြေးစား စစ်သားများသည် ၎င်းတို့၏ အင်အားကို ချဲ့ထွင်ရန် ဗဟိုအာဖရိကသမ္မတနိုင်ငံအတွင်း သူပုန်များ အား ချေမှုန်းသည့် နည်းဗျူဟာကိုအသုံးပြုခဲ့သည်။

သို့သော် ရုရှားကြေးစား စစ်သားများသည် အရပ်သားများကို ညှင်းပန်းနှိပ်စက်ခြင်း၊ တွင်းထွက်ပစ္စည်းများနှင့် ကျွန်းသစ်များကဲ့သို့ သဘာဝသယံဇာတများကို ရယူ၍ အမြတ်ထုတ်ခြင်းတို့ရှိခဲ့ကြောင်း ဒေသခံများနှင့် လူ့အခွင့်အရေးအဖွဲ့များက စွပ်စွဲခဲ့ကြသည်။

Wagner Group ခေါင်းဆောင် ပရီဂိုဇင် လေယာဉ်ပျက်ကျမှုကြောင့် သေဆုံးခဲ့ပြီးနောက် ရုရှားသည် အာဖရိကတွင် လှုပ်ရှားနေသည့် ၎င်းတို့၏ စစ်ဆင်ရေးများကို ပြန်လည်ချိန်ညှိခဲ့သည်။

ပြီးခဲ့သည့်နှစ်များအတွင်း အာဖရိကနှင့် အဆက်အဆံ သိပ်မရှိခဲ့သည့် အမေရိကန်ကမူ အာဖရိကတွင် ရုရှား ဩဇာ လွှမ်းမိုးမှုကို ဟန့်တားရန် ကြိုးပမ်းနေပြီး အာဖရိကနိုင်ငံများကို ရုရှားကြေးစားများနှင့် ခပ်ကင်းကင်းနေရန် တွန်းအားပေးလျက်ရှိသည်။

 ရုရှားထောက်ခံကြောင်း ပြသနေတဲ့ အာဖရိကနိုင်ငံသားတွေကို တွေ့ရစဉ်

အာဖရိကတွင် အမေရိကန်ဆန့်ကျင်ရေး သဘောထားများ ပျံ့နှံ့နေမှုသည် ရုရှားကြောင့်ဖြစ်ကြောင်း၊ ရုရှားသည် ၎င်း၏ ဗျူဟာကို ပြောင်းလဲရန် ကြိုပမ်းနေသည်ဟု အမေရိကန်အရာရှိများက ပြောကြားခဲ့သည်။

"တကယ်လို့ အာဖရိကမှာ အမေရိကန်က ခြေကုပ်မယူနိုင်ဘူးဆိုရင် ရုရှားအတွက် စီးပွားရေးနဲ့ နိုင်ငံရေး အသာစီး ရလာပါလိမ့်မယ်။ တကယ်လို့ ဗဟိုအာဖရိကသမ္မတနိုင်ငံမှာ ရုရှားဟာ ဩဇာလွှမ်းမိုးမှု ဆုံးရှုံးသွားမယ်ဆိုရင် တခြား အာဖရိကနိုင်ငံတွေမှာလည်း ရုရှားရဲ့ ဩဇာလွှမ်းမိုးမှုတွေ ဆက်တိုက် ကျဆင်းလာနိုင်ပါတယ်" ဟု ဗြိတိန် ၏ ကာကွယ်ရေးနှင့်လုံခြုံရေး ကျွမ်းကျင်ပညာရှင်အဖွဲ့ဖြစ်သည့် Royal United Services Institute မှ ကျွမ်းကျင် သူ ဆင်မြူယယ် ရာမီနီ (Samuel Ramani) က ပြောကြားခဲ့သည်။

Source: အေပီ

CNI International News

ဘန်ကောက်၊ စက်တင်ဘာ ၁၂

ဖြူးထိုင်းပါတီကို ဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra )က တရားမဝင် ထိန်းချုပ် ထားခြင်း ရှိ/မရှိ စုံစမ်းစစ်ဆေးပေးရန် Thai Pakdee Party ဥက္ကဋ္ဌ ဝါရွန် ဒီကီထီဝီကရွန် (Warong Dechgitvigrom)က ထိုင်းရွေးကောက်ပွဲကော်မရှင်ကို တောင်းဆိုခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

အတိုက်အခံ တစ်ဦးဖြစ်သည့် ဝါရွန်သည် ၎င်း၏ လျှောက်ထားလွှာကို စက်တင်ဘာ ၁၁ ရက်က ရွေးကောက်ပွဲ ကော်မရှင်ရုံး၌ တင်သွင်းခဲ့သည်။

သက်ဆင်သည် ဖြူးထိုင်းပါတီအပေါ် ဩဇာလွှမ်းမိုးထားကြောင်းနှင့် ဖြူးထိုင်းပါတီ ကိုယ်တိုင်ကလည်း သက်ဆင် ၏ လွှမ်းမိုးမှုကို လက်ခံထားကြောင်း ဒေါက်တာဝါရွန်က စွပ်စွဲခဲ့သည်။

ထိုင်းတွင် နိုင်ငံရေးပါတီများဆိုင်ရာ အခြေခံအက်ဥပဒေအရ နိုင်ငံရေးပါတီများအနေဖြင့် မည်သူတစ်စုံတစ်ဦး၏ လွှမ်းမိုးမှုအောက်တွင် မရှိစေရန် တားမြစ်ထားပြီး တားမြစ်ချက်ကို ချိုးဖောက်သည့် ပါတီသည် ဖျက်သိမ်းခံရ မည်ဖြစ်သည်။

ဝန်ကြီးချုပ်ဟောင်း ဆရီသာ သာဗီဆင် (Srettha Thavisin) ရာထူးမှ ဖယ်ရှားခံရပြီးနောက် ဩဂုတ် ၁၄ ရက်တွင် သက်ဆင်သည် ဖြူးထိုင်ပါတီ အပါအဝင် ညွန့်ပေါင်းပါတီများ၏ ထိပ်သီးခေါင်းဆောင်များကို ၎င်း၏ နေအိမ်တွင် ဖိတ်ကြားပြီး အစိုးရသစ် ဖွဲ့စည်းရေး ဆွေးနွေးခဲ့သည်ဟု ဒေါက်တာဝါရွန်က ပြောကြားခဲ့သည်။

Thai Pakdee Party ဥက္ကဋ္ဌ ဝါရွန် ဒီကီထီဝီကရွန်ကိုတွေ့ရစဉ်

ထိုကဲ့သို့ ဆွေးနွေးခဲ့သည့် အချက်ကိုလည်း မည်သည့်ပါတီကမျှ ငြင်းဆိုခဲ့ခြင်း မရှိကြောင်း ၎င်းက ပြောသည်။

ဩဂုတ် ၂၀ ရက်တွင်လည်း သက်ဆင်က သူ့သမီးဖြစ်သူ ဝန်ကြီးချုပ် ပေတုန်တန် ရှင်နာဝပ် ( Paetongtarn Shinawatra) သည် ကာကွယ်ရေးဝန်ကြီးဌာနတွင် တာဝန်ထမ်းဆောင်လိမ့်မည် မဟုတ်ကြောင်း၊ အဘယ်ကြောင့် ဆိုသော် ပေတုန်တန်အတွက် ထိုတာဝန်သည် ကြီးလေးလွန်းသောကြောင့်ဖြစ်ကြောင်း သတင်းထောက်များကို ပြောဆိုခဲ့သည်ဟု ဒေါက်တာဝါရွန်က ပြောသည်။

ထို့ပြင် သက်ဆင်က သူသည် ပေတုန်တန်ကို ဩဇာလွှမ်းမိုးမည် မဟုတ်ကြောင်း မှတ်ချက်ပေးခဲ့သော်လည်း သမီးတစ်ဦးအဖြစ် ပိုင်ဆိုင်ကြောင်း ပြောကြားခဲ့သည်ဟု ဝါရွန်က ပြောသည်။

ထိုင်းအစိုးရအဖွဲ့သစ်အပေါ် သက်ဆင်၏ လွှမ်းမိုးချုပ်ကိုင်မှုများ ရှိနေခြင်း ရှိ/မရှိ ကျွမ်းကျင်သူများက မေးခွန်း ထုတ်နေချိန်တွင် ဝါရွန်၏ ပြောကြားချက်များ ထွက်ပေါ်လာခဲ့ခြင်းဖြစ်သည်။

ထို့ကြောင့် ဖြူးထိုင်းပါတီ အနေဖြင့် ဖျက်သိမ်းခံရနိုင်မည့် အန္တရာယ်နှင့် ရင်ဆိုင်လာခဲ့ရခြင်းဖြစ်သည်။

Source: ဘန်ကောက်ပို့စ်

CNI International News

ဝါရှင်တန်၊ စက်တင်ဘာ ၁၂

အမေရိကန်သမ္မတရွေးကောက်ပွဲဝင် ကိုယ်စားလှယ်လောင်းများဖြစ်သည့် ဒေါ်နယ်ထရမ့်နှင့် ကာမယ်လာဟားရစ် တို့၏ စကားစစ်ထိုးပွဲမှာ ဘာတွေပြောကြလဲဆိုသည်ကို CNN သတင်းဌာနက ကောက်နုတ်ဖော်ပြခဲ့သည်။

အမေရိကန်သမ္မတရွေးကောက်ပွဲဝင် ကိုယ်စားလှယ်လောင်းများဖြစ်သည့် သမ္မတဟောင်း ဒေါ်နယ်ထရမ့် (Donald Trump) နှင့် ဒုတိယသမ္မတ ကာမယ်လာဟားရစ် (Kamala Harris) တို့သည် စက်တင်ဘာ ၁၀ ရက်က ဖီလာဒဲဖီးယား (Philadelphia) ပြည်နယ်တွင် ပထမဆုံးအကြိမ် စကားစစ်ထိုးပွဲ ပြုလုပ်ခဲ့သည်။

ABC သတင်းဌာနက စပွန်စာပေးခဲ့သည့် ၁ နာရီနှင့် ၄၅ မိနစ်ကြာမြင့်ခဲ့သော ထိုစကားစစ်ထိုးပွဲတွင် ဒီမိုကရက် တစ် ကိုယ်စားလှယ်လောင်း ဟားရစ်က ရီပတ်ဘလစ်ကန် ကိုယ်စားလှယ်လောင်း ထရမ့်ကို မခံချိမခံသာ ဖြစ်စေ သည့် စကားလုံးများနှင့် ထိုးနှက်ခဲ့ပြီး ထရမ့်ကလည်း မကြာခဏဆိုသလို ဒေါသတကြီး တုန့်ပြန်ခဲ့သည်။

ဟားရစ်သည် ထိုစကားစစ်ထိုးပွဲအတွက် ဂရုတစိုက် ပြင်ဆင်လာခဲ့ခြင်းဖြစ်ပြီး မေးခွန်းအားလုံးနီးပါးကို ထရမ့် စိတ်တိုဒေါသထွက်စေမည့် မှတ်ချက်များဖြင့် ဖြေကြားခဲ့သည်။

ကာမယ်လာဟားရစ်ကို တွေ့ရစဉ်

ထရမ့်ကို ကမ္ဘာ့ခေါင်းဆောင်များက ဟာသအနေဖြင့် ရှုမြင်ထားကြောင်း၊ စစ်ဘက်ခေါင်းဆောင်များက ထရမ့်ကို ရှက်စရာတစ်ခုအဖြစ် ရှုမြင်ထားကြောင်း၊ ထရမ့်သည် အားနည်းပြီး မှားယွင်းနေသူဖြစ်ကြောင်း ဟားရစ်က ပြောကြားခဲ့သည်။

ထို့ပြင် အမေရိကန် မဲဆန္ဒရှင် ၈၁ သန်းသည် ထရမ့်ကို သမ္မတရာထူးမှ ထုတ်ပယ်ခဲ့ကြောင်း ဟားရစ်က ပြောကြား ခဲ့ပြီး ထိုမဲ ၈၁ သန်းသည် ၂၀၂၀ ပြည့်နှစ် ရွေးကောက်ပွဲက သမ္မတဂျိုးဘိုင်ဒန် ရရှိခဲ့သည့် မဲအရေအတွက်ကို ရည်ညွှန်းပြောဆိုခဲ့ခြင်းဖြစ်သည်။

ဟားရစ်၏ ပြောကြားချက်များကြောင့် ထရမ့်သည် မကြာခဏဆိုသလို ဒေါသထွက်ခဲ့ပြီး  လေသံကျယ်ကျယ် လောင်လောင်ဖြင့် တုန့်ပြန်ပြောကြားခဲ့သည်။

ထို့နောက် ထရမ့်သည် ၂၀၂၀ ရွေးကောက်ပွဲအတွင်း လိမ်ညာမှုများရှိခဲ့ကြောင်း သက်သေ အထောက်အထား မပြနိုင်သည့် မှတ်ချက်စကားများကို ထပ်တလဲလဲ ပြောဆိုခဲ့သည်။

ဒေါ်နယ်ထရမ့်ကို တွေ့ရစဉ်

ထို့ပြင် ဒီမိုကရက်များ၏ လစ်ဟင်းမှုကြောင့် အမေရိကန်သို့ ဝင်ရောက်လာသည့် ရွှေ့ပြောင်းနေထိုင်သူများသည် အိမ်မွေးတိရစ္ဆာန်များကို စားသောက်နေကြောင်း၊ ဒီမိုကရက်များသည် ကိုယ်ဝန်ဖျက်ချခွင့်ကို ထောက်ခံနေ ကြောင်း၊ ထိုသို့ ထောက်ခံနေခြင်းသည် လူသတ်မှုမြောက်ကြောင်း ထရမ့်က ပြောကြားခဲ့သည်။

အလားတူ ဟားရစ်နှင့် ထရမ့်တို့သည် ရုရှား-ယူကရိန်း စစ်ပွဲနှင့်ပတ်သက်ပြီး မတူညီသည့် သဘောထားများကို ပြောဆိုခဲ့ကြသည်။

ထရမ့်က ယူကရိန်းစစ်ပွဲကို အဆုံးသတ်စေရန် သဘောတူညီချက်တစ်ခုကို တွန်းအားပေး လုပ်ဆောင်သွားမည်ဟု ပြောကြားခဲ့ပြီး ဟားရစ်ကမူ ရုရှား၏ ကျူးကျော်မှုကို ပြန်လည်တိုက်ထုတ်နေသည့် ယူကရိန်းကို ကူညီထောက်ပံ့မှု များပေးရန် လိုအပ်ကြောင်း ပြောဆိုခဲ့သည်။

Source: CNN

CNI International News

လန်ဒန်၊ စက်တင်ဘာ ၁၂

ရုရှားသည် ယူကရိန်းစစ်ပွဲတွင် အသုံးပြုရန် ပဲ့ထိန်းဒုံးကျည်များကို အီရန်နိုင်ငံထံမှ လက်ခံရရှိခဲ့ကြောင်း အမေရိကန်က ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထို့နောက် အမေရိကန်သည် ရုရှားထံ အီရန်လက်နက်များ ပေးပို့မှုတွင် ပါဝင်ပတ်သက်နေသည့် သင်္ဘောများနှင့် ကုမ္ပဏီများကိုလည်း ပိတ်ဆို့မှုအသစ်များ ပြုလုပ်ခဲ့သည်။

ရုရှားကို ပဲ့ထိန်းဒုံးကျည်များ ထောက်ပံ့ခြင်းသည် တင်းမာမှုကို ပိုမိုမြင့်တက်လာစေနိုင်ကြောင်း အမေရိကန်က အီရန်ကို သတိပေးခဲ့ကြောင်း ဗြိတိန်နိုင်ငံ လန်ဒန် (London) မြို့တော်တွင် ပြုလုပ်သည့် ဗြိတိန်နိုင်ငံခြားရေး ဝန်ကြီး ဒေးဗစ် လမ်မီ (David Lammy) နှင့် အမေရိကန်နိုင်ငံခြားရေးဝန်ကြီး ဘလင်ကင် ( Antony Blinken) တို့၏ ပူးတွဲသတင်းစာ ရှင်းလင်းပွဲ၌ ပြောကြားခဲ့သည်။

"ရုရှားဟာ အခုဆိုရင် ပဲ့ထိန်းဒုံးကျည်တွေကို လက်ခံရရှိနေပြီး အဲဒီဒုံးကျည်တွေကို မကြာခင် သီတင်းပတ်အတွင်း ယူကရိန်းမှာ အသုံးပြုပါလိမ့်မယ်" ဟု ဘလင်ကင်က ပြောကြားခဲ့သည်။

ယခုရရှိထားသည့် ထိုထောက်လှမ်းရေး သတင်းအချက်အလက်ကို ကမ္ဘာတစ်ဝန်းရှိ အမေရိကန်၏ မဟာမိတ် နိုင်ငံများ၊ မိတ်ဖက်နိုင်ငံများကို မျှဝေထားသည်ဟုလည်း ၎င်းက ပြောသည်။

အီရန် ခေါင်းဆောင်တွေနဲ့ ပဲ့ထိန်းဒုံးကျည်ကိုတွေ့ရစဉ်

အီရန်မှ ရုရှားသို့ လက်နက်များ ပေးပို့မှုတွင် ရုရှားအလံတင်သင်္ဘော ၉ စင်း ပါဝင်ခဲ့သည်။

ထိုသင်္ဘောများကို အမေရိကန်၏ ပိတ်ဆို့မှုစာရင်းတွင် ထည့်သွင်းခဲ့သည်ဟု အမေရိကန် ဘဏ္ဍာရေးဝန်ကြီးဌာန၏ ဝက်ဘ်ဆိုက်တွင် ဖော်ပြခဲ့သည်။

ထို့ပြင် အီရန်နှင့် ရုရှားအကြား စစ်ဘက်ဆိုင်ရာ ပူးပေါင်းဆောင်ရွက်မှုတွင် ပါဝင်သည့် ကုမ္ပဏီများ၊ လူပုဂ္ဂိုလ်များ နှင့် Iran Air လေကြောင်းလိုင်းတို့ကိုလည်း ပိတ်ဆို့မှုများ ချမှတ်ခဲ့သည်ဟု အမေရိကန်ဘဏ္ဍာရေးဝန်ကြီးဌာနက ထုတ်ပြန်ခဲ့သည်။

အီရန်နိုင်ငံသည် ၎င်း၏ Fath-360 တာတိုပစ် ပဲ့ထိန်းဒုံးကျည်စနစ်ကို အသုံးပြုတတ်စေရန် ရုရှားစစ်မှုထမ်းများ အား လေ့ကျင့်သင်ကြားပေးခဲ့သည်ဟုလည်း ဘလင်ကင်က ပြောကြားခဲ့သည်။

အီရန်သည် ယခင်ကလည်း ယူကရိန်းစစ်ပွဲအတွင်း ရုရှားကို Shahed ဒရုန်းများ ထောက်ပံ့ပေးခဲ့သော်လည်း ပဲ့ထိန်းဒုံးကျည်များ ထောက်ပံ့ပေးခြင်းမရှိကြောင်း ငြင်းဆိုခဲ့သည်။

Source: ရိုက်တာ