CNI International News

ဝါရှင်တန် ၊ နိုဝင်ဘာ ၁၄

အမေရိကန်သည် ဆီးရီးယားနိုင်ငံအတွင်းရှိ အီရန်၏ အစ္စလာမ်မစ် တော်လှန်ရေး အစောင့်တပ်ဖွဲ့နှင့် ၎င်း၏ မဟာမိတ်အဖွဲ့များ အသုံးပြုသည့် စခန်းများကို လေကြောင်းတိုက်ခိုက်မှု ၂ ကြိမ် ပြုလုပ်ခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ဆီးရီးယား၏ အယ်လ်ဘူ ကာမယ် (Albu Kamal) မြို့အနီးရှိ စစ်ရေး လေ့ကျင့်ရေး စခန်းတစ်ခုနှင့် မာယာဒင်း (Mayadeen) မြို့အနီးရှိ လျှို့ဝှက်စခန်းတစ်ခုကို ပစ်မှတ်ထားပြီး တိကျသေချာသည့် တိုက်ခိုက်မှုများ ပြုလုပ်ခဲ့ သည်ဟု အမေရိကန်ကာကွယ်ရေးဝန်ကြီး လွိုက်အော်စတင် (Lloyd Austin) က ပြောကြားခဲ့သည်။

အီရတ်နှင့် ဆီးရီးယားရှိ အမေရိကန်တပ်ဖွဲ့များ အဆက်မပြတ် တိုက်ခိုက်ခံနေရမှုကို တုန့်ပြန်သည့်အနေဖြင့် ယခုကဲ့သို့ လေကြောင်းတိုက်ခိုက်မှုများ ပြုလုပ်ခဲ့ခြင်းဖြစ်သည်ဟု လွိုက်အော်စတင်က ပြောသည်။ 

အီရန် ကျောထောက်နောက်ခံပေးထားတဲ့ လက်နက်ကိုင်အဖွဲ့ကို တွေ့ရစဉ်

"သမ္မတ ဂျိုးဘိုင်ဒန် (Joe Biden) ဟာ အမေရိကန်စစ်မှုထမ်းတွေရဲ့ လုံခြုံရေးထက်ပိုပြီး ဘာကိုမှ ဦးစား မပေးပါဘူး။ အမေရိကန်ဟာ ကိုယ်ကိုယ်ကို ကာကွယ်သွားမယ်ဆိုတာကို ပြသတဲ့အနေနဲ့ ဒီနေ့မှာ ပြုလုပ်ခဲ့တဲ့ တိုက်ခိုက်မှုကို သမ္မတကိုယ်တိုင်က ညွှန်ကြားခဲ့တာ ဖြစ်ပါတယ်" ဟု အော်စတင်က ပြောကြားခဲ့သည်။ 

အမေရိကန်၏ တိုက်ခိုက်မှုများထဲမှ တစ်ခုသည် ဒိုင်ယာ အယ်လ်ဇော (Dier al Zor) ပြည်နယ်၏ အယ်လ်ဘူ ကာမယ်မြို့ အနောက်ပိုင်းရှိ အီရန်လိုလားသည့် လက်နက်ကိုင်အဖွဲ့များ အသုံးပြုသည့် စခန်းတစ်ခုကို ပစ်မှတ် ထားခဲ့ကြောင်း အမည်မဖော်လိုသည့် သတင်းရင်းမြစ်များက ဖော်ပြခဲ့သည်။

နောက်ထပ် တိုက်ခိုက်မှု တစ်ခုသည် အီရတ်နယ်စပ်အနီး မာယာဒင်းမြို့ရှိ အီရန်လိုလားသည့် လက်နက်ကိုင်အဖွဲ့ များ အသုံးပြုသော ခြေကုပ်စခန်းတစ်ခုကို ပစ်မှတ်ထားခဲ့ခြင်း ဖြစ်သည်ဟု ဒေသခံ သတင်းရင်းမြစ်များကို ကိုးကားပြီး ရိုက်တာသတင်းဌာနမှ ဖော်ပြခဲ့သည်။

ထိုပစ်မှတ်နှစ်ခုထဲမှ တစ်ခုသည် လက်နက်သိုလှောင်ရုံလည်း ပါဝင်ခဲ့သည်ဟု အမည်မဖော်လိုသည့် အမေရိကန် အရာရှိတစ်ဦး၏ ပြောကြားချက်ကို ကိုးကားပြီး အေပီသတင်းဌာနက ဖော်ပြခဲ့သည်။

သမ္မတ ဂျိုးဘိုင်ဒန်နဲ့ အမေရိကန်ကာကွယ်ရေးဝန်ကြီး လွိုက်အော်စတင်ကိုတွေ့ရစဉ်

အောက်တိုဘာ ၇ ရက်က အစ္စရေး-ဟားမာ့စ် စစ်ပွဲ စတင်ဖြစ်ပွားခဲ့ပြီးနောက်ပိုင်း အီရတ်နှင့် ဆီးရီးယားရှိ အမေရိကန်တပ်ဖွဲ့များကို ဒေသခံလက်နက်ကိုင်အဖွဲ့များက ဒရုန်းများ၊ ဒုံးကျည်များဖြင့် ပစ်ခတ်တိုက်ခိုက်နေမှုကို အဆုံးသတ်စေရန် အမေရိကန်သည် သီတင်းနှစ်ပတ်အတွင်း လေကြောင်းတိုက်ခိုက်မှုများကို တတိယအကြိမ် မြောက် ပြုလုပ်ခဲ့ခြင်း ဖြစ်သည်။

မကြာသေးမီ သီတင်းပတ်များအတွင်း အီရန်က ကျောထောက်နောက်ခံ ပြုထားသည့် လက်နက်ကိုင်များသည် အီရတ်နှင့် ဆီးရီးယားရှိ အမေရိကန်နှင့် ညွန့်ပေါင်းတပ်ဖွဲ့များကို ဒရုန်းများ၊ ဒုံးကျည်များဖြင့် အကြိမ် ၄၀ ထက် မနည်း တိုက်ခိုက်ခဲ့သည်။

Source: အယ်လ်ဂျာဇီးယား

CNI International News

ခါဆန်၊ နိုဝင်ဘာ ၁၃

ယူကရိန်းတပ်ဖွဲ့များသည် ခါဆွန် (Kherson) ဆိပ်ကမ်းမြို့ကို ရုရှားတပ်ဖွဲ့များထံမှ ပြန်လည်သိမ်းယူနိုင်ခဲ့သည်မှာ တစ်နှစ်ခန့် ကြာမြင့်ပြီဖြစ်သော်လည်း ရုရှားတပ်ဖွဲ့များသည် ခါဆွန်မြို့ကို လက်နက်ကြီးများဖြင့် အဆက်မပြတ် တိုက်ခိုက်နေဆဲဖြစ်ကြောင်း အေပီမှ ဖော်ပြခဲ့သည်။ 

ဒီနီပါ (Dnieper) မြစ်၏ ဘယ်ဘက် မြစ်ကမ်းပါးတွင် တပ်စွဲထားသည့် ရုရှားတပ်များ၏ ပစ်ခတ်တိုက်ခိုက်မှုများကို ဒေသခံများက နေ့စဉ်နှင့်အမျှ ကြားနေရပြီး စိုးရိမ်ထိတ်လန့်နေရသည်။

လက်ရှိတွင် ခါဆွန်မြို့ထဲ၌  မရှိမဖြစ်ကုန်ပစ္စည်းများ ရောင်းချသည့် ဈေးဝယ်ကုန်တိုက်အချို့သာ ဖွင့်ထားကာ ဈေးဆိုင်အများစုမှာ ပိတ်ထားခဲ့သည်။ 

ခါဆွန်မြို့က ဒေသခံ တစ်ဦးကိုတွေ့ရစဉ်

ထို့ပြင် စည်ပင်သာယာရေး ဝန်ထမ်းများသည်လည်း အမှိုက်များကို လှည်းကျင်းသိမ်းဆည်းရာတွင် ကျည်ကာ အင်္ကျီများကို ဝတ်ဆင်ထားရသည်။

ခါဆွန်မြို့ခံများသည်လည်း အစားအစာများကို အရဲစွန့် ထွက်ဝယ်နေရပြီး အကြောက်အလန့်မရှိသည့် စားသောက်ဆိုင် အနည်းငယ်သာ ဖွင့်ထားသည်ဟု အေပီသတင်းတွင် ဖော်ပြခဲ့သည်။

ပြီးခဲ့သည့်နှစ် နိုဝင်ဘာ ၁၁ ရက်က ယူကရိန်းတပ်ဖွဲ့များသည် ခါဆွန်မြို့ကို ရုရှားတပ်များထံမှ ပြန်လည် သိမ်းယူနိုင်ခဲ့သော်လည်း လက်ရှိအချိန်အထိ လွတ်မြောက်နယ်မြေတစ်ခုအဖြစ် မခံစားရသေးဘဲ ရုရှားတပ်များ၏ တိုက်ခိုက်ခြိမ်းခြောက်မှုကို ခံစားနေရဆဲဖြစ်သည်ဟု ခါဆွန်မြို့ခံများက ပြောသည်။

ခါဆွန်မြို့က စည်ပင်၀န်ထမ်းများကိုတွေ့ရစဉ်

သို့သော် တစ်နေ့နေ့ တစ်ချိန်ချိန်တွင် ပုံမှန်နေထိုင်မှု ဘဝပုံစံကို ပြန်လည်ရောက်ရှိလာမည်ဟု ယုံကြည်ထားကြ သည့် ခါဆွန်မြို့ခံများလည်း ရှိနေသည်။ 

"သိမ်းပိုက်ခံထားရတဲ့ အခြေအနေအောက်မှာ နေထိုင်ရချိန်မှာ လွတ်လပ်မှုရဲ့ တန်ဖိုးကို ခင်ဗျားတို့ နားလည် လာပါလိမ့်မယ်။ ဒါပေမယ့် အခြေအနေ ဘယ်လောက်ပဲဆိုးဆိုး ကျနော်တို့ တောင့်ခံနိုင်ပါလိမ့်မယ်" ဟု ခါဆွန်မြို့ ခံတစ်ဦးဖြစ်သူ ဂရီဂိုရီ မာလော့ဗ် (Grigori Malov) က ပြောကြားခဲ့သည်။

Source: အေပီ

CNI International News

တိုကျို၊ နိုဝင်ဘာ ၁၃

မြောက်ကိုရီးယား၏ ဒုံးကျည် စီမံကိန်းနှင့်ပတ်သက်၍ အချိန်နှင့်တစ်ပြေးညီ သတင်းအချက်အလက်များကို ဒီဇင်ဘာလအတွင်း မျှဝေအသုံးပြုရန် အမေရိကန်၊ ဂျပန်နှင့် တောင်ကိုရီးယား ကာကွယ်ရေး အကြီးအကဲများက သဘောတူခဲ့ကြသည်ဟု တောင်ကိုရီးယားကာကွယ်ရေးဝန်ကြီးဌာနမှ နိုဝင်ဘာ ၁၂ ရက်တွင် ထုတ်ပြန်ခဲ့ကြောင်း ရိုက်တာမှ ဖော်ပြခဲ့သည်။

အမေရိကန် ကာကွယ်ရေးဝန်ကြီး လွိုက်အော်စတင် (Lloyd Austin) သည် နိုဝင်ဘာ ၁၂ ရက်က တောင်ကိုရီးယား ကာကွယ်ရေးဝန်ကြီး ရှင်ဝမ်ဆစ် (Shin Won-sik) ၊ ဂျပန်ကာကွယ်ရေးဝန်ကြီး မီနိုရူ ကီဟာရာ (Minoru Kihara) တို့နှင့် အွန်လိုင်းမှတစ်ဆင့် အစည်းအဝေး ပြုလုပ်ခဲ့သည်။ 

ကာကွယ်ရေးဝန်ကြီးများသည် ဆိုးရွားသည့် လုံခြုံရေး အခြေအနေများကို ရင်ဆိုင်ရာတွင် သုံးပွင့်ဆိုင် ပူးပေါင်း ဆောင်ရွက်မှုများအား တိုးမြှင့်ရန် ဆွေးနွေးခဲ့ကြသည်ဟု ကီဟာရာက သတင်းထောက်များကို ပြောကြားခဲ့သည်။ 

ထို့ပြင် ၎င်းတို့ ၃ ဦးအကြား ယခုကဲ့သို့ အစည်းအဝေး ပြုလုပ်ခြင်းသည် ပထမဆုံးအကြိမ်ဖြစ်သည်ဟု ရိုက်တာမှ ဖော်ပြခဲ့သည်။

မြောက်ကိုရီးယားက ဒုံးကျည် တစ်စင်းပစ်လွှတ်နေစဉ်

" ကျနော်တို့ဟာ ဆွေးနွေးညှိနှိုင်းမှုတွေ ပြုလုပ်ခဲ့ပြီး နောက်ဆုံးအဆင့် သဘောတူညီချက်ကို ရရှိခဲ့ပါတယ်" ဟု ကီဟာရာက ထပ်လောင်း ပြောကြားခဲ့သည်။

အမေရိကန်သမ္မတ ဂျိုးဘိုင်ဒန် (Joe Biden) သည် သြဂုတ် ၁၈ ရက်က တောင်ကိုရီးယားသမ္မတ ယွန်းဆော့ရွဲ (Yoon Suk Yeol) ၊ ဂျပန်ဝန်ကြီးချုပ် ဖူမီယို ကီရှီဒါ (Fumio Kishida)တို့နှင့် တွေ့ဆုံခဲ့ချိန်ကလည်း ယခုနှစ် ကုန်ပိုင်းတွင် မိမိတို့ ၃ နိုင်ငံအကြား မြောက်ကိုရီးယား ဒုံးကျည်များနှင့် ပတ်သက်၍ အချိန်နှင့် တစ်ပြေးညီ သတိပေးချက်များကို မျှဝေရန် သဘောတူခဲ့သည်။

ထို့ပြင် မြောက်ကိုရီးယားနှင့် ရုရှားအကြား စစ်ရေး ပူးပေါင်းဆောင်ရွက်မှုများ မြင့်တက်နေခြင်းသည် ကုလသမဂ္ဂ ပြဋ္ဌာန်းချက်များကို ချိုးဖောက်ရာ ရောက်ကြောင်းလည်း အမေရိကန်၊ တောင်ကိုရီးယားနှင့် ဂျပန် ကာကွယ်ရေး ဝန်ကြီးများက ရှုတ်ချခဲ့ကြသည်။

သီးခြားအနေဖြင့် အမေရိကန် ပူးတွဲစစ်ဦးစီးချုပ်များအဖွဲ့ဥက္ကဋ္ဌ ဗိုလ်ချုပ်ကြီး ချားလ်စ် ဘရောင်း (Charles Q. Brown) သည် နိုဝင်ဘာ ၁၂ ရက်တွင် တောင်ကိုရီးယားနိုင်ငံ၊ ဆိုးလ်မြို့တော်၌ တောင်ကိုရီးယား ပူးတွဲ စစ်ဦးစီးချုပ်များအဖွဲ့ ဥက္ကဋ္ဌ ကင်မ် ဆောင်ကွမ် (Kim Seung-kyum) နှင့်လည်း တွေ့ဆုံခဲ့သည်ဟု တောင်ကိုရီး ယား စစ်တပ်က ထုတ်ပြန်ခဲ့သည်။

Source: ရိုက်တာ

CNI International News

ဝါဆော၊ နိုဝင်ဘာ ၁၃

ပိုလန်နိုင်ငံ၊ ဝါဆော (Warsaw) မြို့တော်တွင် နိုဝင်ဘာ ၁၁ ရက်က မျိုးချစ်အုပ်စုများ၏ ချီတက်ဆန္ဒပြမှု၌ လူပေါင်းထောင်ချီ ပါဝင်ခဲ့ပြီး ထိုဆန္ဒပြမှုသည် ဥရောပမှာ အကြီးမားဆုံး မျိုးချစ်များ၏ ဆန္ဒပြမှုဖြစ်သည်ဟု ဆန္ဒပြပွဲကို စီစဉ်သူများက ပြောကြားခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။ 

ချီတက်ဆန္ဒပြမှုတွင် ပါဝင်သည့် ဆန္ဒပြသူများသည် ပိုလန်၏ အဖြူရောင်နှင့် အနီရောင် နိုင်ငံတော်အလံနှင့် မီးရှူးမီးပန်းများကို ကိုင်ဆောင်ခဲ့ကြပြီး မြို့တော်ခန်းမမှ အမျိုးသား အားကစားရုံသို့ ချီတက်ခဲ့ကြသည်။ 

နှစ်စဉ်နှစ်တိုင်း ပိုလန်လွတ်လပ်ရေးနေ့တွင် ပြုလုပ်လေ့ရှိသည့် ထိုဆန္ဒပြမှုကို လွှတ်တော်ရွေးကောက်ပွဲ၌ ဥရောပလိုလားသည့် အတိုက်အခံများက နေရာအများစုကို အနိုင်ရခဲ့ပြီးနောက် တစ်လမပြည့်မီ အချိန်မှာ ပြုလုပ်ခဲ့ခြင်း ဖြစ်သည်။

ဝါဆောမြို့တော်ဝန် ရာဖယ်လ် တာဇက်စကောစကီးကို တွေ့ရစဉ်

လူဦးရေ ၃၈ သန်းခန့် နေထိုင်သည့်် ပိုလန်တွင် ထိုကဲ့သို့ မျိုးချစ်များ၏ ပွဲအခမ်းအနားများ ပြုလုပ်လေ့ရှိပြီး ထိုအခမ်းအနာများကို အီတလီနှင့် ဟန်ဂေရီ အပါအဝင် ဥရောပနိုင်ငံများမှ အခြား လက်ယာယိမ်း မျိုးချစ်အုပ်စု များက ထောက်ခံကြောင်း ဖော်ပြခဲ့ကြသည်။

ချီတက်ဆန္ဒပြသူများထဲတွင် ဘောလုံးပရိသတ်များသည် လူသိများထင်ရှားပြီး ၎င်းတို့ထဲမှ တစ်ချို့သည် လက်ယာအစွန်းရောက်သော ဆောင်ပုဒ်များ ရေးသားထားသည့် ပိုစတာများကို ကိုင်ဆောင်ခဲ့ကြသည်။ 

ထို့ပြင် ကိုယ်ဝန်ဖျက်ချမှုကို ဆန့်ကျင်သည့် အဖွဲ့များကလည်း ခရစ်ယာန်ဘာသာ၏ သင်္ကေတများကို ကိုင်ဆောင်ပြီး ချီတက်ဆန္ဒပြမှုတွင် ပါဝင်ခဲ့ကြသည်။

ထိုချီတက်ဆန္ဒပြမှုတွင် ပူးပေါင်းပါဝင်ခဲ့သည့် ရာသီဥတုအရေး တက်ကြွလှုပ်ရှားသူများကို ရဲတပ်ဖွဲ့က ဖယ်ရှားခဲ့ ရသည်။ 

ယခုနှစ်တွင် ပြုလုပ်သည့် ချီတက်ဆန္ဒပြမှုကို လူပေါင်း ၄၀,၀၀၀ ခန့် ပါဝင်ခဲ့ပြီး ငြိမ်းချမ်းစွာ ပြီးဆုံးသွားခဲ့သည်ဟု ဝါဆောမြို့တော်ဝန် ရာဖယ်လ် တာဇက်စကောစကီး (Rafal Trzaskowski) က ပြောကြားခဲ့သည်။

မကြာသေးမီ နှစ်များအတွင်းက နှစ်စဉ်ပြုလုပ်လေ့ရှိသည့် လွတ်လပ်ရေးနေ့ ချီတက်ဆန္ဒပြမှုများတွင် လူပေါင်း ၂၅၀,၀၀၀ အထိ ပါဝင်ခဲ့သည်ဟုလည်း အယ်လ်ဂျာဇီးယားသတင်း၌ ဖော်ပြခဲ့သည်။

Source: အယ်လ်ဂျာဇီးယား

CNI International News

လန်ဒန်၊ နိုဝင်ဘာ ၁၃

ဗြိတိန်နိုင်ငံ၊ လန်ဒန်မြို့တော်တွင် ပါလက်စတိုင်းလိုလားသည့် ဆန္ဒပြသူများက ငြိမ်းချမ်းစွာ လမ်းလျှောက် ချီတက် ဆန္ဒပြခဲ့ကြသော်လည်း တန်ပြန်သပိတ်ဖြစ်သော လက်ယာယိမ်း ဆန္ဒပြသူများသည် ရဲတပ်ဖွဲ့နှင့် ခိုက်ရန်ဖြစ်ပွားခဲ့သည်ဟု အေပီမှ ဖော်ပြခဲ့သည်။

ပြီးခဲ့သည့်် သီတင်းပတ်အစောပိုင်းက ဗြိတိန်ပြည်ထဲရေးဝန်ကြီး ဆူအယ်လာ ဘရေဗာမန်း (Suella Braverman) က ပါလက်စတိုင်းလိုလားသည့်် ဆန္ဒပြမှုများကို အမုန်းတရားအတွက် ချီတက်ဆန္ဒပြမှုများအဖြစ် သတ်မှတ် ဖော်ပြခဲ့သဖြင့် ပါလက်စတိုင်းထောက်ခံသူများအကြား တင်းမာမှုများ မြင့်တက်ခဲ့သည်။

ထို့ပြင် နိုဝင်ဘာ ၁၁ ရက် ချီတက်ဆန္ဒပြမှုသည် ပထမကမ္ဘာစစ်အပြီး စစ်ရပ်ဆိုင်းရေးနေ့ (Armistice Day) ကို အကြည်ညို ပျက်စေနိုင်သဖြင့် ထိုချီတက်ဆန္ဒပြမှုကို တားမြစ်ပိတ်ပင်ရန် ဘရေဗာမန်းက ပြောကြားခဲ့ဖူးသဖြင့် ပါလက်စတိုင်း ထောက်ခံသူများ၏ ဝေဖန်မှုကို ခံခဲ့ရသည်။

ပါလက်စတိုင်း ထောက်ခံသူများကိုတွေ့ရစဉ်

ဘရေဗာမန်း၏ မှတ်ချက်စကားများသည် ပါလက်စတိုင်း ထောက်ခံသည့် ဆန္ဒပြသူများနှင့် ထိပ်တိုက်တွေ့ရန် ကြိုးပမ်းနေသည့် လက်ယာယိမ်းအုပ်စုများကို ဆွဲဆောင်နိုင်ခဲ့ဖွယ် ရှိသည်။

ထိုအချက်ကို လက်ယာယိမ်း ဆန္ဒပြသူများနှင့် ရဲတပ်ဖွဲ့အကြား ခိုက်ရန်ဖြစ်ပွားမှုဖြစ်စဉ်က မီးမောင်းထိုး ပြသရာ ရောက်ခဲ့သည်။

ဗြိတိန်တွင် တရားဥပဒေစိုးမိုးရေးကို ကြီးကြပ်ရသည့် ဘရေဗာမန်းအနေဖြင့် လက်ရှိ၌ ရာထူးမှ နုတ်ထွက်ရမည် ဖြစ်ကြောင်း စကော့တလန် ဝန်ကြီးတစ်ဦးဖြစ်သူ ဟမ်ဇာ ယူဆက် (Humza Yousaf)က ပြောကြားခဲ့သည်။

"လက်ယာယိမ်းဝါဒီတွေကို ပြည်ထဲရေးဝန်ကြီးက ရဲဆေးတင်ပေးခဲ့ပါတယ်။ သူ (ဘရောဗာမန်း)ဟာ သဘော ထား ကွဲလွဲမှုတွေကို မီးလောင်ရာ လေပင့်ခဲ့ပါတယ်။ အခုဆိုရင် လက်ယာယိမ်းဝါဒီတွေဟာ စစ်ရပ်ဆိုင်းရေးနေ့မှာ တောင် ရဲတပ်ဖွဲ့တွေကို တိုက်ခိုက်ခဲ့ပါတယ်။ သူဟာ ပြည်ထဲရေးဝန်ကြီးအဖြစ် ရပ်တည်နိုင်စွမ်း မရှိတော့ပါဘူး" ဟု ယူဆက်က ပြောကြားခဲ့သည်။

ပါလက်စတိုင်းအရေး ဆန္ဒပြနေကြစဉ်

ငြိမ်းချမ်းရေးကို ချိုးဖောက်ခံရမည့် အရေးကို ဟန့်တားရန် ဆန္ဒပြသူ ၈၂ ဦးကို ဖမ်းဆီးခဲ့ကြောင်းနှင့် ဖမ်းဆီးခံရ သူများသည် ပါလက်စတိုင်း ထောက်ခံသည့် ဆန္ဒပြသူများအား တန်ပြန် သပိတ်ဆင်နွှဲမည့် လက်ယာယိမ်းအုပ်စုမှ ဖြစ်သည်ဟု လန်ဒန်ရဲတပ်ဖွဲ့က ပြောကြားခဲ့သည်။ 

တန်ပြန်သပိတ် ဆင်နွှဲသူအများစုသည် ဗြိတိန်နိုင်ငံတစ်ဝန်းမှ ဆိုးသွမ်း ဘောလုံးပရိသတ်များဖြစ်ပြီး ခိုက်ရန် ဖြစ်ပွားမှုများအတွင်း ရဲတပ်ဖွဲ့ဝင် ၉ ဦး ဒဏ်ရာရခဲ့ကာ ၂ ဦးကို ဆေးရုံတင်ထားရကြောင်း လန်ဒန်ရဲတပ်ဖွဲ့က ပြောကြားခဲ့သည်။

Source: အေပီ

CNI International News

ဝါရှင်တန်၊ နိုဝင်ဘာ ၁၁

အရှေ့အလယ်ပိုင်းဒေသတွင် တပ်စွဲထားသည့် အမေရိကန်တပ်ဖွဲ့များသည် ဒေသခံလက်နက်ကိုင်အဖွဲ့များ၏ ပစ်မှတ်ထား တိုက်ခိုက်မှုကို ခံနေရပြီး ဒေသ၌ ပဋိပက္ခ ပိုမိုကြီးမား ကျယ်ပြန့်မည့် အခြေအနေနှင့် ရင်ဆိုင်နေရ သည်ဟု ရိုက်တာမှ ဖော်ပြခဲ့သည်။

အောက်တိုဘာ ၂၇ ရက်က အီရတ်နိုင်ငံရှိ Erbil လေတပ်စခန်းကို အီရန်က ထောက်ခံပေးထားသည့် ပြည်သူ့စစ်က ဒရုန်းဖြင့် တိုက်ခိုက်ခဲ့ချိန်တွင် ထိုဒရုန်းသည် အမေရိကန်၏ လေကြောင်းကာကွယ်ရေးစနစ်ကို ဖောက်ထွင်း ဝင်ရောက်ခဲ့ပြီး အမေရိကန် စစ်သားများ တပ်စွဲထားသည့် စစ်တန်းလျား၏ ဒုတိယထပ်၌ ပျက်ကျခဲ့သည်ဟု အမည်မဖော်လိုသော အမေရိကန်အရာရှိနှစ်ဦးက ပြောကြားခဲ့သည်။

သို့သော် ထိုဒရုန်းတွင် တင်ဆောင်လာသည့် ဖောက်ခွဲရေးပစ္စည်းများသည် ချို့ယွင်းချက် တစ်ခုခုကြောင့် ပေါက်ကွဲ ခဲ့ခြင်း မရှိသဖြင့် အမေရိကန်စစ်မှုထမ်းတစ်ဦးသာ ဒဏ်ရာ အနည်းငယ်ရရှိခဲ့သည်ဟု ဆိုသည်။

အကယ်၍ ထိုဒရုန်းသာ ပေါက်ကွဲခဲ့မည်ဆိုပါက ထိခိုက်ပျက်စီးမှု ကြီးမားနိုင်သဖြင့် အမေရိကန်တပ်ဖွဲ့များအတွက် ကံကောင်းခဲ့သည်ဟု ထိုအရာရှိများက ပြောကြားခဲ့သည်။

အရှေ့အလယ်ပိုင်းဒေသ မြေပုံကိုတွေ့ရစဉ်

ဂါဇာစစ်ပွဲအတွင်း အစ္စရေးကို ထောက်ပံ့သည့် အမေရိကန်ကို တုန့်ပြန်သည့်အနေဖြင့် ပြီးခဲ့သည့် သီတင်းသုံးပတ် အတွင်း အီရတ်နှင့် ဆီးရီးယားရှိ အီရန်က ထောက်ပံ့ပေးထားသော ပြည်သူ့စစ်များသည် အမေရိကန်တပ်ဖွဲ့များကို ဒရုန်းများနှင့် ဒုံးကျည်တိုက်ခိုက်မှုများ အကြိမ် ၄၀ ထက်မနည်း ပြုလုပ်ခဲ့သည်ဟု အမေရိကန်ကာကွယ်ရေး ဝန်ကြီးဌာနက ထုတ်ပြန်သည့် အချက်အလက်များနှင့် အမေရိကန်အရာရှိနှစ်ဦး၏ ပြောကြားချက်များအရ သိရသည်။

ထိုတိုက်ခိုက်မှုများသည် အမေရိကန် တပ်ဖွဲ့များအတွက် ဒဏ်ရာအနည်းငယ်သာ ရရှိစေခဲ့ပြီး ဒရုန်းများနှင့် ဒုံးကျည်အများစုကို အီရတ်နှင့် ဆီးရီးယားရှိ အမေရိကန် လေကြောင်း ကာကွယ်ရေးစနစ်များက ကြားဖြတ် ပစ်ချနိုင်ခဲ့သည်။

အီရတ်နှင့် ဆီးရီးယားတွင် အမေရိကန်စစ်သား ၃၄၀၀ ခန့် တပ်စွဲထားသည်။

အရှေ့အလယ်ပိုင်းတွင် တင်းမာမှုများ မြင့်တက်နေသဖြင့် အီရန်နှင့် ၎င်း၏ မဟာမိတ်လက်နက်ကိုင် အဖွဲ့များ သာမက အမေရိကန်ကလည်း တိုက်ရိုက် ထိပ်တိုက်ရင်ဆိုင် မတွေ့လိုကြောင်း၊ သို့သော် အမေရိကန်တပ်ဖွဲ့များ အတွက် ဆုံးရှုံးမှုကြီးမားသည့် အကြီးစား တိုက်ခိုက်မှု ဖြစ်ပွားလာပါက အလွန်စိုးရိမ်စရာကောင်းသည့် ပဋိပက္ခ ဖြစ်လာလိမ့်မည်ဟု အမေရိကန်ဒုတိယနိုင်ငံခြားရေးဝန်ကြီးဟောင်းဖြစ်သည့် ဒေးဗစ် ရှချန်ကာ (David Schenker) က ပြောကြားခဲ့သည်။

အမေရိကန် နိုင်ငံခြားရေး၀န်ကြီး ဘလင်ကင်ကို တွေ့ရစဉ်

"အီရတ်နဲ့ ဆီးရီးယား ပြည်သူ့စစ်တွေဟာ အမေရိကန်စစ်သား အများအပြားကို သတ်ဖြတ်ဖို့ထက် အနှောင့် အယှက် ပေးဖို့အတွက်သာ တိုက်ခိုက်မှုတွေကို လုပ်ဆောင်နေတာ ဖြစ်ပါတယ်။ ဒါပေမယ့် သူတို့ (အီရတ်နှင့် ဆီးရီးယားပြည်သူ့စစ်များ) တွေဟာ အခုထက်ပိုပြီး အများကြီး လုပ်ဆောင်နိုင်ပါတယ်" ဟု ရှချန်ကာက ပြော သည်။

အမေရိကန်စစ်သား အများအပြား သေဆုံးနိုင်မည့် အကြီးစား တိုက်ခိုက်မှု ဖြစ်ပွားလာပါက သမ္မတ ဂျိုးဘိုင်ဒန် (Joe Biden) အနေဖြင့် မည်သို့ တုန့်ပြန်ဆောင်ရွက်မည်ကို ရှင်းလင်းစွာ မသိရသေးပေ။

သို့သော် လာမည့်နှစ် သမ္မတ ရွေးကောက်ပွဲ မတိုင်မီတွင် ဘိုင်ဒန်သည် ပဋိပက္ခအတွင်း အမေရိကန်၏ ပါဝင် ပတ်သက်မှုကို ကန့်သတ်ထားပြီး အစ္စရေးကို စစ်ရေးအထောက်အပံ့များ ပေးရန်သာ စိတ်အားထက်သန် နေသည်ဟု မကြာသေးမီက ပြုလုပ်သည့် လူထုသဘောဆန္ဒ စစ်တမ်းများတွင် ဖော်ပြခဲ့သည်။

Source: ရိုက်တာ

CNI International News

နယူးဒေလီ၊ နိုဝင်ဘာ ၁၁

အိန္ဒိယနိုင်ငံတွင် ပြုလုပ်မည့် ၂၀၂၄ ရွေးကောက်ပွဲတွင် ဝန်ကြီးချုပ် မိုဒီ (Narendra Modi)၏ အာဏာရ BJP ပါတီသည် မွတ်ဆလင်မဲဆန္ဒရှင်များ၏ ထောက်ခံမဲများရရှိရန် ကြိုးပမ်းနေသည်ဟု ရိုက်တာမှ ဖော်ပြခဲ့သည်။

BJP ပါတီထဲတွင် မွတ်ဆလင် အသိုင်းအဝိုင်းမှ ခေါင်းဆောင် ၂၅၀,၀၀၀ ခန့် ပါဝင် စာရင်းပေးထားသည်။

ထိုမွတ်ဆလင် ခေါင်းဆောင်များကို မိုဒီ၏ မိတ်ဆွေ (Modi Mitr)အဖြစ် သတ်မှတ်ဖော်ပြခဲ့ ကြသည်။

လာမည့်နှစ် မေလတွင် ကျင်းပမည့်် ရွေးကောက်ပွဲတွင် မိုဒီအား တတိယသက်တမ်း အနိုင်ရစေရန် ကူညီပေး နေကြသည့် မွတ်ဆလင်ခေါင်းဆောင်ပေါင်း ၂၅,၀၀၀ ကျော်ရှိသည်ဟု BJP ပါတီ၏ အရာရှိများက ရိုက်တာ သတင်းဌာနသို့ ပြောကြားခဲ့သည်။

BJP ပါတီသည် ပညာရေး၊ စီးပွားရေး၊ ဘာသာရေးနှင့် အစိုးရဝန်ထမ်းဟောင်းများကဲ့သို့ အဓိက နယ်ပယ်များမှ ခေါင်းဆောင်များ၏ အကူအညီကို ရယူရန် ကြိုးပမ်းနေသည်ဟုလည်း BJP ပါတီ၏ လူနည်းစုခေါင်းဆောင် ဂျမဲလ် ဆစ်ဒီကွီ (Jamal Siddiqui) က ပြောကြားခဲ့သည်။

BJP ပါတီတွင် ပါဝင်စာရင်းသွင်းခဲ့သည့် မွတ်ဆလင် ခေါင်းဆောင်များနှင့် အခြား ပါတီဝင်များကမူ မိုဒီသည် နိုင်ငံ၏ ကောင်းမွန်သည့် စီးပွားရေးအင်အားကို အသုံးပြုပြီး အမွေဆက်ခံမှုတွင် ဘာသာရေးခွဲခြားမှုကို ဆန့်ကျင် သည့် ဥပဒေများ၊ ကျား/မ တန်းတူညီမျှမှု အခွင့်အရေးများနှင့် မွတ်ဆလင် မဲဆန္ဒရှင်များ၏ အခွင့်အရေးများအား တိုးတက်အောင် လုပ်ဆောင်လိမ့်မည်ဟု မျှော်လင့်နေကြသည်။

မွတ်ဆလင် အမျိုးသမီးများကို မဲပေးအပြီးတွေ့ရစဉ်

မွတ်ဆလင် ဘာသာဝင်များအား စည်းရုံးသည့်် မဟာဗျူဟာကို BJP ပါတီက ယခင်ကတည်းက အသေးစိတ် ထုတ်ပြန်ခဲ့ခြင်းမရှိပေ။

BJP ပါတီ၏ လက်ရှိ ကြိုးပမ်းမှုများသည် BJP ပါတီ၊ မိုဒီနှင့် ကာလကြာရှည် အစေးမကပ်ခဲ့သည့် အိန္ဒိယ၏ မွတ်ဆလင်ဘာသာဝင် သန်း ၂၀၀ ၏ ထောက်ခံမှုကို ရရှိရန် လုပ်ဆောင်နေခြင်း ဖြစ်သည်။

မိုဒီကမူ အိန္ဒိယနိုင်ငံအတွင်း ဘာသာရေး ခွဲခြားဆက်ဆံမှု မရှိကြောင်း ငြင်းဆိုထားသည်။

အိန္ဒိယတွင် လူနည်းစုဖြစ်သည့် မွတ်ဆလင်များနှင့် လူများစုဖြစ်သည့် ဟိန္ဒူများအကြား အကြမ်းဖက်မှုများ ရှိခဲ့သော်လည်း အလွန်ဆိုးရွားသည့် ဖြစ်စဉ် အနည်းငယ်သာ ရှိခဲ့သည်ဟု BJP ပါတီဝင်များက ပြောသည်။

လက်ရှိတွင် BJP ပါတီ၏ နိုင်ငံရေး ပြိုင်ဘက်များသည် မွတ်ဆလင်-ဟိန္ဒူ ပဋိပက္ခကို အသုံးချပြီး BJP ပါတီကို ပစ်မှတ်ထား တိုက်ခိုက်ရန် ကြိုးပမ်းနေသည်ဟု BJP ပါတီခေါင်းဆောင် တစ်ဦးဖြစ်သည့် မွတ်ဆလင်ဘာသာဝင် ဆေးယက် ဇက်ဖာ (Syed Zafer) က ပြောကြားခဲ့သည်။

Source: ရိုက်တာ

CNI International News

ဘန်ကောက်၊ နိုဝင်ဘာ ၁၀

မြန်မာနိုင်ငံ၏ တိုက်ပွဲများဖြစ်ပွားနေသည့် နေရာဒေသတွင် ရောက်ရှိနေထိုင်နေသော ထိုင်းနိုင်ငံသား ၂၀၀ ကျော် ကို မြန်မာအာဏာပိုင်များက ထိုင်းသို့ ပြန်ခွင့်ပြုမည်ဆိုပါက ယခုသီတင်းပတ်အတွင်း ထိုင်းနိုင်ငံသို့ ပြန်လည် ခေါ်ယူမည်ဖြစ်ကြောင်း ရဲတပ်ဖွဲ့၏ ဒုတိယအကြီးအကဲ ရဲချုပ် ဆူရချာတီ ဟက်ပန်း (Surachate Hakparn) က နိုဝင်ဘာ ၈ ရက်တွင် ပြောကြားခဲ့သည်ဟု ဘန်ကောက်ပို့မှ ဖော်ပြခဲ့သည်။

မြန်မာနိုင်ငံ၏ ရှမ်းပြည်နယ်တွင် တပ်မတော်နှင့် တိုင်းရင်းသား လက်နက်ကိုင် တပ်ဖွဲ့များအကြား တိုက်ပွဲများ ဖြစ်ပွားခဲ့ပြီးနောက် ပိတ်မိနေသည့် ထိုင်းနိုင်ငံသား ၁၆၂ ဦးကို မြန်မာအာဏာပိုင်များက လောက်ကိုင်မြို့ရှိ ဟော်တယ်တစ်ခု၌ ကယ်ဆယ်နေရာ ချထားခဲ့ပြီးနောက် ဒေသခံ စစ်စခန်းတစ်ခုမှာ ခိုလှုံခွင့်ပေးထားကြောင်း ဆူရချာတီက ပြောသည်။

မည်သို့ပင်ဆိုစေ ထိုထိုင်းနိုင်ငံသားများထဲမှ ၇၄ ဦးသည် call center လိမ်ညာသူများ၏ ရိုက်နှက်မှုများကြောင့် ဒဏ်ရာအနည်းငယ် ရရှိခဲ့ပြီး ထိုဖြစ်စဉ်ကြောင့် မြန်မာ့တပ်မတော်နှင့် အတိုက်အခံ လက်နက်ကိုင်များအကြား တိုက်ပွဲဖြစ်ပွားနေချိန်တွင် ထိုင်းပြည်သူများအား ထိုင်းသို့ ပြန်ခေါ်ယူရမည့် လုပ်ငန်းစဉ်ကို ခက်ခဲစေခဲ့သည်ဟု ဆူရချာတီက ပြောကြားခဲ့သည်။

 လောက်ကိုင်ဒေသက တိုက်ပွဲရှောင်စခန်းကိုတွေ့ရစဉ်

နှစ်နိုင်ငံ အာဏာပိုင်များသည် မြန်မာနိုင်ငံရှိ လူဝင်မှုကြီးကြပ်ရေး အရာရှိများနှင့်အတူ ထိုင်းနိုင်ငံသားများအား ဘေးကင်းလုံခြုံစွာ ပြန်လည်ခေါ်ယူရေးအတွက် ဆွေးနွေးညှိနှိုင်းနေသည်ဟု ဆူရချာတီက ပြောသည်။

မြန်မာအာဏာပိုင်များအနေဖြင့် ခွင့်ပြုချက် ပေးမည်ဆိုပါက ဒဏ်ရာရရှိထားသည့် ထိုင်းနိုင်ငံသား ၇၄ ဦး အပါအဝင် ထိုင်းနိုင်ငံသား ၂၀၀ ခန့်ကို ယခုသီတင်းပတ်ကုန်ပိုင်းတွင် ပြန်လည်ခေါ်ဆောင်နိုင်မည်ဟု မျှော်လင့် ထားသည်ဟုလည်း ၎င်းက ပြောကြားခဲ့သည်။

ထို့ပြင် ထိုင်းနိုင်ငံသားများအား ပြန်လည်ခေါ်ယူရေးအတွက် ဘေကင်းလုံခြုံသည့် တည်နေရာများကို သွားရောက် ကြည့်ရှုမည်ဟုလည်း ဆူရချာတီက ပြောသည်။ 

လက်ရှိတွင် မြန်မာနိုင်ငံမှ ထိုင်းသို့ ပြန်လည်ခေါ်ဆောင်မည့် ထိုင်းနိုင်ငံသားများ၏ အမည်စာရင်းကို ရရှိထားသည် ဟုလည်း ၎င်းက ပြောသည်။ 

မြန်မာနိုင်ငံတွင် call center မှတစ်ဆင့် ရည်ရွယ်ချက်ရှိရှိ လိမ်ညာသည့် ထိုင်းနိုင်ငံသားများကို တရားစွဲဆို သွားမည်ဖြစ်ပြီး လိမ်လည်လှည့်ဖျား၍ ခေါ်ဆောင်ခံရသည့် ထိုင်းနိုင်ငံသားများကိုမူ ဥပဒေအရ နစ်နာကြေးများ ရရှိစေရန် လုပ်ဆောင်ပေးသွားမည်ဟု ဆူရချာတီက ပြောကြားခဲ့သည်။ 

Source: ဘန်ကောက်ပို့စ်

CNI International News

သီရိနာဂါ၊ နိုဝင်ဘာ ၁၀ 

အနောက်နိုင်ငံများ၏ မြို့ကြီးပြကြီးများမှအစ မွတ်ဆလင်နိုင်ငံများအဆုံး အစ္စရေး-ဟားမာ့စ် စစ်ပွဲနှင့်ပတ်သက်ပြီး ဆန္ဒပြမှုများ ဖြစ်ပွားလျက်ရှိသော်လည်း အိန္ဒိယက ထိန်းချုပ်ထားသည့် ကက်ရှ်မီးယားဒေသတွင်မူ ပါလက်စတိုင်း ထောက်ခံသော ဆန္ဒပြမှုများကို တားမြစ်ပိတ်ပင်ထားသည်ဟု အေပီမှ ဖော်ပြခဲ့သည်။

အိန္ဒိယ အာဏာပိုင်များသည် မွတ်ဆလင်အများစု နေထိုင်သည့် ကက်ရှ်မီးယားဒေသတွင် ပါလက်စတိုင်းများနှင့် စည်းလုံးညီညွတ်မှုရှိကြောင်း ပြသသော ဆန္ဒပြမှုများကို တားမြစ်ပိတ်ပင်ခဲ့သည်။

ထို့နောက် မွတ်ဆလင် ဘာသာရေး ဆရာများကိုလည်း တရားဟောချိန်အတွင်း အစ္စရေး-ဟားမာ့စ် ပဋိပက္ခအား ထည့်သွင်းဟောပြောခြင်း မပြုရန် တိုက်တွန်းခဲ့သည်ဟု ဒေသခံများနှင့် ဘာသာရေးခေါင်းဆောင်များက အေပီ သတင်းဌာနကို ပြောကြားခဲ့သည်။ 

အိန္ဒိယ မွတ်စလင်များကိုတွေ့ရစဉ်

ထိုကဲ့သို့ တားမြစ် ကန့်သတ်ချက်များသည် ကက်ရှ်မီးယားဒေသတွင် အိန္ဒိယအစိုးရ၏ ဗဟိုအုပ်ချုပ်မှုကို အဆုံး သတ်ရန် တောင်းဆိုလာမည့် ဆန္ဒပြမှုများအဖြစ်သို့ ပြောင်းလဲလာသည့် အခြေအနေကို ဟန့်တားရန်အတွက် အိန္ဒိယအာဏာပိုင်များ၏ အားထုတ်ကြိုးပမ်းမှုများထဲက တစ်စိတ်တစ်ပိုင်း ဖြစ်သည်။

ထို့ပြင် ဝန်ကြီးချုပ်မိုဒီ (Narendra Modi) ၏ အုပ်ချုပ်မှုအောက်တွင် ပါလက်စတိုင်းတို့ကို ကာလကြာရှည် ထောက်ခံလာခဲ့သည့် အိန္ဒိယ၏ နိုင်ငံခြားရေးမူဝါဒ ပြောင်းလဲမှုတစ်ရပ်ကို ထင်ဟပ်စေခဲ့သည်။ 

အိန္ဒိယသည် စစ်ပွဲဖြစ်ပွားနေသည့် အစ္စရေးနှင့် ဟားမာ့စ်အကြား ဆက်ဆံရေးကို ဟန်ချက်ညီစွာ ထိန်းညှိခဲ့သည်။

အဘယ်ကြောင့်ဆိုသော် အိန္ဒိယသည် အစ္စရေးနှင့်ရော ဟားမာ့စ်နှင့်ပါ နီးစပ်သည့် သမိုင်းဝင် ဆက်ဆံရေး ရှိခဲ့သောကြောင့် ဖြစ်သည်။

သို့သော် အိန္ဒိယသည် အောက်တိုဘာ ၇ ရက်က အစ္စရေးကို တိုက်ခိုက်ခဲ့သည့် ဟားမာ့စ်အဖွဲ့ကို ရှုတ်ချခဲ့ပြီး အရပ်သားများ သေဆုံးမှုမြင့်တက်နေချိန် ဂါဇာ၌ လူသားချင်းစာနာ ထောက်ထားမှုဆိုင်ရာ ဥပဒေကို ပြဋ္ဌာန်းရန် တိုက်တွန်းခဲ့သည်။

အိန္ဒိယမှာ ဆန္ဒပြနေကြစဉ်

ကက်ရှ်မီးယားဒေသသည် ပါလက်စတိုင်းများနှင့် စည်းလုံးညီညွတ်စွာရှိကြောင်း ကာလကြာရှည် ပြသခဲ့ပြီး ဂါဇာ တွင် လက်ရှိဖြစ်ပွားနေသည့် စစ်ပွဲမတိုင်မီကတည်းက အစ္စရေးဆန့်ကျင်သော ဆန္ဒပြမှုများ ဖြစ်ပွားခဲ့သည်။ 

ကက်ရှ်မီးယားတွင် အစ္စရေးဆန့်ကျင်သည့် ဆန္ဒပြမှုများသည် တစ်ခါတစ်ရံ၌ လမ်းများပေါ်မှာ ဆူပူအုံကြွမှုများ ဖြစ်ပွားလေ့ရှိပြီး အိန္ဒိယ၏ ဗဟိုချုပ်ကိုင်မှုကို အဆုံးသတ်ရန် တောင်းဆိုမှုများနှင့်အတူ သေဆုံး၊ ဒဏ်ရာရမှုများ နှင့်် အဆုံးသတ်ခဲ့သည်။ 

မည်သို့ပင်ဆိုစေ အောက်တိုဘာ ၁၂ ရက်ကမူ အိန္ဒိယ နိုင်ငံခြားရေးဝန်ကြီးဌာနက ပါလက်စတိုင်းနှင့် အစ္စရေးတို့ တူယှဉ်တွဲနေထိုင်ရန်၊ လွတ်လပ်သည့် ပါလက်စတိုင်းနိုင်ငံ ထူထောင်ရန် ထောက်ခံကြောင်း အစီရင်ခံစာ ထုတ်ပြန် ခဲ့သည်။

Source: အေပီ