CNI International News

အင်ဖာ၊ ဧပြီ ၁၁

အိန္ဒိယ၏ ဗဟိုအစိုးရနှင့် မဏိပူရပြည်နယ်အစိုးရတို့၏ အချိန်မီ ကြားဝင်ဖြေရှင်းပေးမှုတို့ကြောင့် ပဋိပက္ခများ ဖြစ်ပွားနေသည့် မဏိပူရပြည်နယ်၏ အခြေအနေမှာ တိုးတက်ကောင်းမွန်လာပြီဖြစ်၍ နာဂလက်နက်ကိုင်နှင့် ငြိမ်းချမ်းရေးကိုလည်း အရှိန်မြင့် လုပ်ဆောင်သွားမည်ဟု အိန္ဒိယဝန်ကြီးချုပ် မိုဒီ (Modi)က ပြောကြားခဲ့သည်ဟု E-PAP သတင်းဝက်ဘ်ဆိုက်မှ ဖော်ပြခဲ့သည်။

မဏိပူရပြည်နယ်တွင် ပဋိပက္ခများ ဖြစ်ပွားမှု အရှိန်အမြင့်ဆုံး ကာလအတွင်း ပြည်ထဲရေးဝန်ကြီး အမစ်ရှား (Amit Shah) သည် သက်ဆိုင်ရာ အဖွဲ့အစည်းများ၊ လူပုဂ္ဂိုလ်များနှင့် ပုဂ္ဂိုလ်ရေးအရ ထိတွေ့ဆက်ဆံခဲ့ပြီး အစည်းအဝေး ၁၅ ကြိမ် ပြုလုပ်ခဲ့မှုအပေါ် မိုဒီက ချီးကျူးခဲ့သည်။

မိုဒီက အရှေ့မြောက်ဒေသရှိ လူငယ်များအပေါ် ၎င်း၏ လျော့နည်းသွားခြင်းမရှိသည့် ယုံကြည်မှုကို ဖော်ပြခဲ့သည်။

မဏိပူရပြည်နယ်အတွင်းက အဓိကရုဏ်းဖြစ်ပွားမှုကိုတွေ့ရစဉ်

ထို့နောက် ဒေသတွင်း အလုံးစုံဖွံ့ဖြိုးတိုးတက်ရေးတွင် လူငယ်များ၏ အခန်းကဏ္ဍသည် မရှိမဖြစ် အရေးကြီး ကြောင်းကိုလည်း ဒေလီ (Delhi) မြို့တော်ရှိ ဝန်ကြီးချုပ်၏ နေအိမ်တွင် The Assam Tribune သတင်းစာနှင့် ပြုလုပ်သည့် အင်တာဗျူး၌ ပြောကြားခဲ့သည်။

အိန္ဒိယနိုင်ငံ လွတ်လပ်ရေး ရပြီးကတည်းက အရှေ့မြောက်ဒေသသည် လျစ်လျူရှုခံခဲ့ရသည်။

လက်ရှိမှာတော့ ထိုအခြေအနေကနေ အကူအပြောင်းကာလသို့ ရောက်ရှိနေပြီးဖြစ်သည်။

ထို့ကြောင့် လက်ရှိ ပေါ်ပေါက်နေသည့် စိန်ခေါ်မှုများကို ဖြေရှင်းရန် ရှုထောင့်ပေါင်းစုံ ပါဝင်သည့် ချဉ်းကပ် ဆောင်ရွက်မှုသည် အရေးကြီးကြောင်း မိုဒီက ပြောကြားခဲ့သည်။

NSCN-IM တပ်ဖွဲ့ကိုတွေ့ရစဉ်

မဏိပူရပြည်နယ်တွင် ကယ်ဆယ်ရေးနှင့် ပြန်လည်ထူထောင်ရေး အစီအစဉ်များကို ဆက်လက် လုပ်ဆောင်လျက် ရှိပြီး ထိုအစီအစဉ်များအနက် ယာယီကယ်ဆယ်ရေး စခန်းများတွင် နေထိုင်နေရသူများကို ငွေကြေးအရ ကူညီ ထောက်ပံ့ရေး အစီအစဉ်လည်း ပါဝင်သည်။
ပြည်နယ်အစိုးရက လိုအပ်သည့် အရာများကို ဗဟိုအစိုးရမှ ထောက်ပံ့ပေးသွားမည် ကတိကဝတ်များကိုလည်း မိုဒီက ထပ်မံအတည်ပြု ပြောကြားခဲ့သည်။ 

ထို့ပြင် နာဂအမျိုးသားဆိုရှယ်လစ်ကောင်စီ-အိုက်ဇက်ရှီချီဆူ/ဗွီးဗား (NSCN-IM) နှင့် အိန္ဒိယဗဟိုအစိုးရကြား ၂၀၁၅ ခုနှစ်၊ သြဂုတ် ၃ ရက်က ငြိမ်းချမ်းရေးမူဘောင် သဘောတူညီချက် လက်မှတ်ရေးထိုးမှုသည်လည်း ဆယ်စုနှစ်များစွာ ကြာမြင့်နေသည့် နာဂနိုင်ငံရေးပြဿနားများကို ဖြေရှင်းရေးအတွက် သိသားထင်ရှားသည့် သဘောတူညီချက်ဖြစ်သည်ဟု မိုဒီက အမွှမ်းတင်ပြောကြားခဲ့သည်။

အိန္ဒိယအစိုးရသည် NSCN-IM အပါအဝင် အခြားနာဂအဖွဲ့များ၊ ကိုယ်စားလှယ်များနှင့်လည်း ငြိမ်းချမ်းရေး ဆွေးနွေးပွဲများတွင် တက်ကြွစွာ ပါဝင်ခဲ့ကြောင်း မိုဒီက ပြောကြားခဲ့သည်။

Source: E-PAO

CNI International News

ပေကျင်း၊ ဧပြီ ၁၀

ဆွီဒင်နိုင်ငံသည် ၎င်း၏ လုံခြုံရေးအတွက် ကြီးမားစွာ ခြိမ်းခြောက်နေသည်ဟု ယူဆထားသည့် တရုတ် ဂျာနယ်လစ်တစ်ဦးကို နိုင်ငံအတွင်းမှ နှင်ထုတ်ခဲ့ကြောင်း South China Morning Post(SCMP)မှ ဖော်ပြခဲ့သည်။

အမည်ဖော်ပြမထားသည့် အသက် ၅၇ နှစ်အရွယ် တရုတ်အမျိုးသမီး ဂျာနယ်လစ်တစ်ဦးသည် ပြီးခဲ့သည့်နှစ် အောက်တိုဘာလက ဆွီဒင်လုံခြုံရေးအဖွဲ့၏ ဖမ်းဆီးခြင်းကို ခံခဲ့ရပြီး ပြီးခဲ့သည့် သီတင်းပတ်တွင် နှင်ထုတ်ခံခဲ့ ရသည်။

ထိုအမျိုးသမီးဂျာနယ်လစ်ကို ဆွီဒင်နိုင်ငံအတွင်းသို့ ပြန်လည်ဝင်ရောက်ခွင့်ကိုလည်း တားမြစ်ပိတ်ပင်ခဲ့သည်။

အဆိုပါ အမျိုးသမီးသည် လွန်ခဲ့သည့်နှစ် ၂၀ ခန့်ကတည်းက ဆွီဒင်နိုင်ငံသို့ ရောက်ရှိခဲ့ခြင်းဖြစ်ပြီး နေထိုင်ခွင့် ပါမစ် ရရှိထားကာ ဆွီဒင်အမျိုးသားတစ်ဦးနှင့် လက်ထပ်ပြီး ကလေးများ မွေးဖွားခဲ့ကြောင်း၊ ထိုအမျိုးသမီး၏ ရှေ့နေ ဖြစ်သူ လော်ထရင်မ် ကာဒရီယူ (Leutrim Kadriu) က ပြောကြားခဲ့သည်။

ထိုအမျိူးသမီးအပေါ် စွဲဆိုထားသည့် အမျိုးသားလုံခြုံရေးဆိုင်ရာ စွဲချက်များနှင့်ပတ်သက်သည့် အသေးစိတ် အချက်အလက်များကို မသိရဘဲ ထိုအမှုကို လျှို့ဝှက်အဆင့်အဖြစ် သတ်မှတ်ထားသည်ဟု ကာဒရီယူက ပြော သည်။

ဆွီဒင်လုံခြုံရေးတပ်ဖွဲ့ကို တွေ့ရစဉ်

"ကျနော့်ရဲ့ အမှုသည်က ကြီးမားတဲ့ လုံခြုံရေးခြိမ်းခြောက်မှု ဖြစ်စေနိုင်တယ်လို့ ယူဆရကြောင်း လုံခြုံရေးရဲတပ်ဖွဲ့ က ပြောပါတယ်။ အဲဒီလို ယူဆဖို့ကိုလည်း လူဝင်မှုရေးရာ အေဂျင်စီ၊ လူဝင်မှုရေးရာ တရားရုံးနဲ့ အစိုးရအဖွဲ့တွေက သဘောတူခဲ့ပါတယ်" ဟု ကာဒရီယူက ပြောသည်။

ထိုအကြောင်းအရာနှင့်ပတ်သက်ပြီး လူဝင်မှုရေးရာအေဂျင်စီက မှတ်ချက်ပေးခဲ့ခြင်းမရှိပေ။

ဆွီဒင်ရုပ်သံဖြစ်သည့် SVT ကလည်း စွဲချက်များနှင့်ပတ်သက်သည့် အသေးစိတ် အချက်အလက်များကို ထုတ်ပြန် ခဲ့ခြင်း မရှိသော်လည်း ထိုအမျိုးသမီးသည် ၎င်း၏ ဝက်ဘ်ဆိုက်တွင်သတင်းဆောင်းပါးများ ရေးသားနေပြီး ဆွီဒင် နိုင်ငံ၊ စတော့ဟုမ်း (Stockholm) မြို့ရှိ တရုတ်သံရုံးထံမှ ငွေကြေးများ ရရှိခဲ့ကြောင်း အမည်မဖော်ပြထားသည့် သတင်းရင်းမြစ်များကို ကိုးကားပြီး ဖော်ပြခဲ့သည်။

ထိုအမျိုးသမီးသည် ဆွီဒင်သို့ လာရောက်သည့် တရုတ်အာဏာပိုင်များ၊ စီးပွားရေး ကိုယ်စားလှယ်အဖွဲ့များကို ကြိုဆိုလက်ခံပြီး ဆွီဒင်အရာရှိများနှင့် အစည်းအဝေးများ ဖြစ်မြောက်စေရန် ဆောင်ရွက်ပေးခဲ့ကြောင်း SVT က ဖော်ပြခဲ့သည်။

Source: SCMP

CNI International News

တိုင်ပေ၊ ဧပြီ ၁၀

တရုတ်သည် ထိုင်ဝမ်ကျွန်းအနီးတွင် စစ်ရေးလေ့ကျင့်မှု ပြုလုပ်နေရာမှ ထိုင်ဝမ်ကို တကယ်တိုက်ခိုက်လာမည့် စိတ်မှန်းဖြစ်နိုင်ခြေအား သရုပ်ဖော်ပြီး ပင်လယ်အတွင်း အန္တရာယ်ရှိသည့် နေရာများ၌  စစ်ရေးလေ့ကျင့်မှုများ ပြုလုပ်သွားမည်ဟု ထိုင်ဝမ်ကာကွယ်ရေးဝန်ကြီးဌာနက ပြောကြားခဲ့ကြောင်း ရိုက်တာမှ ဖော်ပြခဲ့သည်။

ထိုင်ဝမ်ကို ၎င်း၏နယ်နိမိတ်အဖြစ် သတ်မှတ်ထားသည့် တရုတ်သည် ပြီးခဲ့သည့် ၄ နှစ်အတွင်း ထိုင်ဝမ်ကျွန်း အနီးတွင် စစ်ရေးလေ့ကျင့်မှုများကို မကြာခဏပြုလုပ်ခဲ့ကာ ထိုင်ဝမ်အပေါ် စစ်ရေးဖိအားများ တိုးမြှင့်ခဲ့သည်။ 

ထိုင်ဝမ်သည် နှစ်စဉ်ပြုလုပ်နေကျ Han Kuang (ဟန်ကောင်)စစ်ရေးလေ့ကျင့်မှုများကို ယခုလအတွင်း စတင်ခဲ့ သည်။

ထိုင်ဝမ်ကာကွယ်ရေး၀န်ကြီးကို တွေ့ရစဉ်

ပြီးခဲ့သည့်နှစ် ဇူလိုင်လက ပြုလုပ်ခဲ့သည့် အမှန်တကယ် ဖြစ်ပွားနေသော တိုက်ပွဲပုံစံ စစ်ရေးလေ့ကျင့်မှုကဲ့သို့ စိတ်မှန်းဖြစ်နိုင်ခြေများကို ထည့်သွင်း၍ စစ်ရေးလေ့ကျင့်မှုကို ၈ ရက်တိတိ ပြုလုပ်မည်ဖြစ်သည်။

တရုတ်၏ ပိတ်ဆို့မှုကို ခံရချိန်တွင် ထိုင်ဝမ်၏ မတူညီသည့် လက်နက်ကိုင်တပ်ဖွဲ့များ မည်ကဲ့သို့ ပူးပေါင်း တုန့်ပြန်သွားမည် ဆိုခြင်းကိုလည်း အာရုံစိုက် လုပ်ဆောင်မည်ဖြစ်ကြောင်း ထိုင်ဝမ်ကာကွယ်ရေးဝန်ကြီး ဟန်ချီရှင်း (Tung Chih-hsing) က ပြောကြားခဲ့သည်။

ထိုစစ်ရေး လေ့ကျင့်မှုများကို ရေတပ်၊ လေတပ်နှင့် ကမ်းခြေစောင့်တပ်တို့ ပူးပေါင်းလုပ်ဆောင်သွားမည်ဖြစ်ပြီး ကမ်းရိုးတန်းဒေသတွင် တပ်ဆင်ထားသည့် သင်္ဘောဖျက်လက်နက်များနှင့် ဒရုန်းများကလည်း ပါဝင် အားဖြည့် သွားမည်ဟု ၎င်းက ဆိုသည်။

ထို့ပြင် ရေတပ်၊ လေတပ်နှင့် ကမ်းခြေစောင့်တပ်ဖွဲ့ သင်္ဘောများသည် ပင်လယ်ပြင်နှင့် လေကြောင်း ပျံသန်းမှု လမ်းကြောင်းများကို ပြင်ပကမ္ဘာနှင့်ဆက်လက် ထိတွေ့ပြီး လမ်းကြောင်းများ ဆက်ပွင့်နေစေရန် ကင်းလှည့် စောင့်ကြပ်မှု စစ်ဆင်ရေးများကိုလည်း လုပ်ဆောင်သွားမည်ဟု ဟန်က ပြောကြားခဲ့သည်။

ဒုံးကျည်ပစ်ခတ်နေစဉ်

ပြီးခဲ့သည့်နှစ် ဧပြီလကလည်း ထိုင်ဝမ်ကျွန်းအနီးတွင် ပြုလုပ်ခဲ့သည့် စစ်ရေးလေ့ကျင့်မှု တစ်ခု၌ တရုတ်သည် ထိုင်ဝမ်ကျွန်းကို ပိတ်ဆို့ပြီး ပစ်မှတ်များအား တိကျစွာထိမှန်စေရန် လေ့ကျင့်သည့် စစ်ရေးလေ့ကျင့်မှုများ ပါဝင်ခဲ့သည်။

၂၀၂၂ ခုနှစ်က ယူကရိန်းကို ရုရှား ဝင်ရောက် တိုက်ခိုက်ခဲ့ပြီးကတည်းက ထိုင်ဝမ်သည် ထိုဖြစ်စဉ်ကို သင်ခန်းစာ ယူပြီး ယူကရိန်းထက် အင်အားကြီးမားသည့် ရုရှားတပ်ဖွဲ့များအား ခုခံတိုက်ခိုက်နေသည့် အခြေအနေအား ထိုင်ဝမ်က လေ့လာခဲ့၍ စစ်ရေးလေ့ကျင့်မှုများ ပုံစံပြောင်းခဲ့သည်။

ယခုနှစ်တွင် ပြုလုပ်မည့် စစ်ရေးလေ့ကျင့်မှုများတွင်လည်း ဂါဇာ၌ ဖြစ်ပွားနေသည့် စစ်ပွဲကို သင်ခန်းစာယူပြီး စစ်ရေးလေ့ကျင့်မှုပုံစံအသစ်များ ထည့်သွင်းသွားမည်ဟု ဟန်က ပြောကြားခဲ့သည်။

Source: ရိုက်တာ

CNI International News

နယူးဒေလီ၊ ဧပြီ ၁၀ 

အာရုနာချယ်ပရာဒေ့ရှ် (Arunachal Pradesh) ပြည်နယ်သည် အိန္ဒိယ၏ တည်တံ့ခိုင်မြဲမှုရှိသည့် ဒေသတစ်ခု ဖြစ်ပြီး ထိုအတိုင်းပင် ဆက်လက် တည်ရှိနေလိမ့်မည်ဖြစ်ကြောင်း အိန္ဒိယဝန်ကြီးချုပ် မိုဒီ (Modi) က ပြောကြား ခဲ့ကြောင်း Times of India မှ ဖော်ပြခဲ့သည်။

အာရုနာချယ်ပရာဒေ့ရှ်ဒေသကို ပိုင်ဆိုင်ကြောင်း ထွက်ဆိုနေသည့် တရုတ်၏ ပြောကြားချက်များကို ပယ်ချသည့် အနေဖြင့် မိုဒီက ထိုကဲ့သို့ ပြောကြားခဲ့ခြင်း ဖြစ်သည်။

"အာရုနာချယ်ပရာဒေ့ရှ်ဟာ ဘားရတ် (အိန္ဒိယ၏ အခြားအမည်) နိုင်ငံရဲ့ ခွဲခြားမရတဲ့ အစိတ်အပိုင်း တစ်ခုဖြစ်ခဲ့ပြီး အဲဒီအတိုင်းပဲ ထာဝရတည်ရှိနေပါလိမ့်မယ်" ဟု မိုဒီက Assam Tribune နှင့်ပြုလုပ်သည့် အင်တာဗျူးတွင် ပြောကြားခဲ့သည်။ 

တရုတ်သည် ၎င်း၏ နယ်မြေပိုင်ဆိုင်ကြောင်း ထွက်ဆိုမှုများကို ပိုမိုခိုင်မာစေရန်အတွက် အာရုနာချယ်ပရာဒေ့ရှ် ပြည်နယ်အတွင်းရှိ နေရာပေါင်း ၃၀ အား တရုတ်အမည်များ ပြောင်းလဲခဲ့ပြီးနောက် မိုဒီ၏ မှတ်ချက်စကားများ ထွက်ပေါ်ခဲ့ခြင်းဖြစ်သည်။ 

 မိုဒီကို တွေ့ရစဉ်

ထို့ပြင် မိုဒီက အာရုနာချယ်ပရာဒေ့ရှ်ဒေသသို့ စစ်သားများနှင့် ပစ္စည်းကိရိယာများ လျင်မြန်စွာ ပို့ဆောင်နိုင်သည့် ဆယ်လာ (Sela) တူးမြောင်း၏ မဟာဗျူဟာမြောက် အရေးကြီးပုံကိုလည်း ပြောကြားခဲ့သည်။

"အဲဒီတူးမြောင်းဟာ အခြေအနေကို ပြောင်းလဲနိုင်တဲ့ မဟာဗျူဟာမြောက် တူးမြောင်းဖြစ်ပြီး ဘယ်လို ရာသီဥတု မျိုးမှာမဆို တာဝမ် (Tawang) ခရိုင်နဲ့ ချိတ်ဆက်ထားတဲ့ တူးမြောင်းဖြစ်ပါတယ်" ဟု မိုဒီက ပြောကြားခဲ့သည်။

အိန္ဒိယအစိုးရသည် အရှေ့မြောက်ပိုင်းဒေသ ဖွံ့ဖြိုးတိုးတက်ရေးကို စီမံကိန်းများစွာဖြင့် အာရုံစိုက် လုပ်ဆောင်နေ ကြောင်း မိုဒီက ပြောကြားခဲ့သည်။

"ဒီနေ့မှာတော့ အရှေ့မြောက်ဒေသဟာ အိန္ဒိယနိုင်ငံတော်သစ်ရဲ့ အကြီးမြတ်ဆုံး အောင်မြင်မှု ဇာတ်လမ်းအဖြစ် ပေါ်ထွက်လာခဲ့ပါပြီ" ဟု မိုဒီက ပြောကြားခဲ့သည်။

ထိုဒေသဖွံ့ဖြိုးတိုးတက်ရေးအတွက် အစိုးရအဖွဲ့၏ ရင်းနှီးမြှုပ်နှံမှုများနှင့် စီမံကိန်းများကို အလေးထား ပြောဆိုခဲ့ သည်။

မိုဒီ၏ BJP ပါတီသည် နောက်ဆုံးအကြိမ် ပြုလုပ်ခဲ့သည့် အောက်လွှတ်တော် ရွေးကောက်ပွဲတွင် အရှေ့မြောက် ဒေသ၌ နေရာအများဆုံး အနိုင်ရရှိခဲ့သည်။

Source: Times of India

CNI International News

မော်စကို၊ ဧပြီ ၉

ယူကရိန်းသည် ရုရှားတပ်ဖွဲ့များ ထိန်းချုပ်ထားသည့် ဇာပိုရီရှား (Zaporizhzhia) နျူကလီးယား ဓာတ်အားပေး စက်ရုံကို ဧပြီ ၇ ရက်က ၃ ကြိမ် တိုက်ခိုက်ခဲ့ကြောင်း ရုရှားက ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထိုတိုက်ခိုက်မှုနှင့်ပတ်သက်ပြီး အနောက်နိုင်ငံများအနေဖြင့် တုန့်ပြန်ဆောင်ရွက်ရန် ရုရှားက တောင်းဆိုခဲ့ပြီး ယူကရိန်းအစိုးရကမူ ထိုတိုက်ခိုက်မှုနှင့် ပတ်သက်ခြင်း မရှိကြောင်း ငြင်းဆိုခဲ့သည်။

အဆိုပါ စက်ရုံတွင် ကျွမ်းကျင်သူများ ထားရှိခဲ့သည့် နိုင်ငံတကာ အဏုမြူစွမ်းအင်အေဂျင်စီ (IAEA) ကမူ ဥရောပ၏ အကြီးဆုံးဖြစ်သည့် နျူကလီးယား ဓာတ်အားပေးစက်ရုံဖြစ်သော ဇာပိုရီရှားစက်ရုံကို တိုက်ရိုက် တိုက်ခိုက်ခြင်း သည် ၂၀၂၂ ခုနှစ်၊ နိုဝင်ဘာလ နောက်ပိုင်း ပထမဆုံးအကြိမ်ဖြစ်သည်။

နျူကလီးယားလုံခြုံရေးအတွက် အန္တရာယ်ရှိစေသည်ဟု ပြောကြားခဲ့သည်။

ရုရှားတပ်ဖွဲ့များသည် ၂၀၂၂ ခုနှစ်က ယူကရိန်းကို ဝင်ရောက် တိုက်ခိုက်ခဲ့ပြီးနောက် မကြာမီ အချိန်အတွင်းမှာပင် ထိုစက်ရုံကို ထိန်းချုပ်နိုင်ခဲ့သည်။ 

 နျူကလီးယား စက်ရုံကိုတွေ့ရစဉ်

ထိုစက်ရုံ တိုက်ခိုက်ခံရခြင်းကြောင့် နျူကလီးယား အန္တရာယ်များနှင့်ပတ်သက်ပြီး ရုရှားနှင့် ယူကရိန်းအစိုးရတို့က တစ်ဖက်နှင့်တစ်ဖက် အပြန်အလှန် စွပ်စွဲပြစ်တင်ခဲ့ကြသည်။

ရုရှားနိုင်ငံပိုင် နျူကလီးယားကော်ပိုရေးရှင်းဖြစ်သည့် Rosatom ကမူ ယူကရိန်းသည် ဧပြီ ၇ ရက်က ထိုစက်ရုံကို ဒရုန်းဖြင့် ၃ ကြိမ် တိုက်ခိုက်ခဲ့ကြောင်း၊ ပထမအကြိမ် တိုက်ခိုက်မှုသည် စက်ရုံ၏ စားသောက်ခန်း အနီးတွင်ဖြစ်ပြီး လူ ၃ ဦး ဒဏ်ရာရရှိသွားခဲ့ကြောင်း ပြောကြားခဲ့သည်။

ဒုတိယအကြိမ် တိုက်ခိုက်မှုသည် ကုန်လှောင်ရုံ အနီးတွင်ဖြစ်ပြီး တတိယအကြိမ် တိုက်ခိုက်မှုသည် စက်ရုံ၏ နံပါတ် ၆ ဓာတ်ပေါင်းဖို၏ အဆောက်အအုံ ခေါင်မိုးပေါ်တွင်ဖြစ်ကြောင်း Rosatom က ထုတ်ပြန်ခဲ့သည်။

"ဇာပိုရီရှား နျူကလီးယား ဓာတ်အားပေးစက်ရုံဟာ ဒရုန်းတွေနဲ့ တိုက်ခိုက်ခံခဲ့ရပြီး စက်ရုံလုံခြုံရေးအတွက် ခြိမ်းခြောက်မှုတွေ ဖြစ်စေခဲ့ပါတယ်။ စက်ရုံအတွင်းက ရေဒီယို ဓာတ်သတ္တိကြွမှု အခြေအနေဟာ ပြောင်းလဲခဲ့ခြင်း မရှိပါဘူး" ဟု ထုတ်ပြန်ချက်တွင် ဖော်ပြခဲ့သည်။

ယူကရိန်း ထောက်လှမ်းရေး အရာရှိတစ်ဦးကမူ ယူကရိန်းတပ်ဖွဲ့များသည် ထိုစက်ရုံကို မည်သည့် တိုက်ခိုက်မှုမှ လုပ်ဆောင်ခဲ့ခြင်းမရှိဘဲ ထိုတိုက်ခိုက်မှုကို ရုရှားတပ်ဖွဲ့များက လုပ်ဆောင်ခဲ့ခြင်း ဖြစ်သည်ဟု ပြောကြားခဲ့သည်။

Source: ရိုက်တာ

CNI International News

ကွီတို၊ မတ် ၈

အီကွေဒေါနိုင်ငံ၊ ကွီတို (Quito) မြို့တော်ရှိ မက္ကဆီကို သံရုံးကို အီကွေဒေါရဲတပ်ဖွဲ့က ဝင်ရောက်စီးနင်းခဲ့ခြင်း ကြောင့် မက္ကဆီကိုအစိုးရက အီကွေဒေါနှင့် သံတမန်ဆက်ဆံရေး ဖြတ်တောက်ခဲ့သည်ဟု အေပီမှ ဖော်ပြခဲ့သည်။

မက္ကဆီကိုသံရုံးထဲတွင် အီကွေဒေါဒုသမ္မတဟောင်း ဂျော့ချ် ဂလက်စ် (Jorge Glas) ခိုလှုံနေခြင်းကြောင့် အီကွေဒေါ အာဏာပိုင်များက ဖမ်းဆီးရန် သံရုံးကို ဝင်ရောက်စီးနင်းခဲ့သည်။

ထိုသို့ သံရုံးအား မကြုံစဖူး အင်အားသုံး ဝင်ရောက်စီးနင်းမှုသည် ဒေသတွင်း ခေါင်းဆောင်များနှင့် သံတမန်များကို အံ့သြတုန်လှုပ်စေခဲ့သည်။

ဧပြီ ၅ ရက် နှောင်းပိုင်းက အီကွေဒေါရဲတပ်ဖွဲ့သည် ဂလက်စ်ကို ဖမ်းဆီးရန် ကွီတိုမြို့တော်ရှိ မက္ကဆီကို သံရုံး၏ အပြင်တံခါးကို ချိုးဖျက်ဝင်ရောက်ခဲ့ခြင်းဖြစ်သည်။

ဂလက်စ်သည် အကျင့်ပျက်ခြစားမှု စွဲချက်များဖြင့် စွပ်စွဲပြစ်တင် ခံခဲ့ရပြီးနောက် မက္ကဆီကိုသံရုံးထဲတွင် နိုင်ငံရေး ခိုလှုံခွင့်ရရှိရန် ကြိုးပမ်းခဲ့သူဖြစ်သည်။

ထိုကဲ့သို့ သံရုံးစီးနင်း ခံရပြီးနောက် မက္ကဆီကိုသမ္မတ အန်ဒရီစ် မန်နျူယယ် လိုပက်ဇ် အိုဘရာဒေါက အီကွေဒေါ နှင့် သံတမန်ဆက်ဆံရေး အဆက်ဖြတ်ကြောင်း ကြေညာခဲ့သည်။

အီကွေဒေါဒုသမ္မတဟောင်း ဂျော့ချ် ဂလက်စ်ကို အီကွေဒေါရဲတပ်ဖွဲ့က ဖမ်းဆီးသွားစဉ်

ထို့နောက် မက္ကဆီကိုအစိုးရ၏ ပြည်ပဆက်ဆံရေး အတွင်းရေးမှူးကလည်း ထိုဖြစ်စဉ်ကို နယ်သာလန်နိုင်ငံ သည်ဟိဂ် (The Hague) မြို့ရှိ ကမ္ဘာ့ခုံရုံးတွင် ဖြေရှင်းမည်ဟု ပြောကြားခဲ့သည်။

ဂလက်စ်သည် သံရုံးအတွင်း ဖမ်းဆီးခံခဲ့ရပြီးနောက် ဧပြီ ၆ ရက်တွင် ကွီတိုမြို့ရှိ အစိုးရရှေ့နေချုပ်ရုံးမှ ဂွာယာကီလ်(Guayaquil) မြို့သို့ လွှဲပြောင်းပို့ဆောင်ခံခဲ့ရပြီး အချုပ်ချခံထားရသည်။

ဂလက်စ်၏ ရှေ့နေ ဆိုနီယာ ဗီရာ (Sonia Vera) ကမူ အီကွေဒေါရဲအရာရှိများသည် မက္ကဆီကို သံရုံးအတွင်းရှိ ဂလက်စ်နေထိုင်သည့် အခန်းထဲသို့ ဝင်ရောက်ခဲ့ပြီး ဂလက်စ်ကို ရိုက်နှက်ဖမ်းဆီး သွားခဲ့ခြင်းဖြစ်သည်ဟု ပြောကြားခဲ့သည်။

၎င်းတို့၏ တရားရေးအဖွဲ့သည် အစိုးရရှေ့နေရုံးတွင် ဂလက်စ်နှင့် စကားပြောဆိုခွင့် မရရှိခဲ့ဘဲ ရှေ့တော်သွင်း စာချွန်လွှာ (မတရား ချုပ်နှောင်ခံနေရခြင်း သို့မဟုတ် ညှင်းပန်းနှိပ်စက်ခံရခြင်း ရှိ/မရှိ စစ်ဆေးသည့် သဘောဖြင့် တရားခံအား ရုံးထုတ်ခြင်း) တင်သွင်းရန် ပြင်ဆင်နေကြောင်း ပြောကြားခဲ့သည်။

ဂလက်စ်သည် ၂၀၁၆ ခုနှစ်က လူပေါင်းရာချီ သေဆုံးခဲ့သည့် အင်အားပြင်း ငလျင်လှုပ်ခတ်ခဲ့ပြီးနောက် ပြန်လည် ထူထောင်ရေး လုပ်ငန်းစဉ်များတွင် အကျင့်ပျက်ခြစားမှု၊ လာဘ်ယူမှု၊ အဂတိလိုက်စားမှု စွဲချက်များဖြင့် စုံစမ်း စစ်ဆေးခံနေရသူ ဖြစ်သည်။

Source: အေပီ

CNI International News

အစ္စလာမ်မာဘက်၊ ဧပြီ ၈

ပါကစ္စတန်နိုင်ငံရှိ တရုတ်နိုင်ငံသားများကို လုံခြုံရေးစီမံချက်များအား လိုက်နာရန် တောင်းဆိုချိန်တွင် ၎င်းတို့က စိတ်တိုဒေါသဖြစ်ကြကြောင်း ပန်ဂျပ် (Punjab)ပြည်နယ်ဝန်ကြီးချုပ် မာရမ်နာဝက်ဇ် (Maryam Nawaz) က ပြောကြားခဲ့ကြောင်း WION သတင်းတွင် ဖော်ပြထားသည်။

ခိုင်ဘာပက်တွန်ခါဝါ (Khyber Pakhtunkhwa) ပြည်နယ်တွင် အသေခံ ဗုံးခွဲမှုတစ်ခုအတွင်း တရုတ်အင်ဂျင်နီယာ ၅ ဦးနှင့်ပါကစ္စတန် ယာဉ်မောင်း ၁ ဦး သေဆုံးခဲ့ပြီးနောက် သီတင်းတစ်ပတ်အကြာတွင် မာရမ်က ယခုကဲ့သို့ မှတ်ချက်ပြု ပြောကြားခဲ့ခြင်းဖြစ်သည်။

ဝန်ကြီးချုပ် သက်တမ်းသုံးကြိမ် တာဝန်ထမ်းဆောင်ခဲ့သည့် နာဝက်ဇ်ရှာရစ် (Nawaz Sharif) ၏ သမီးဖြစ်သည့် အပြင် ပြည်နယ်ဝန်ကြီးချုပ်ရာထူးကို ရရှိသည့် ပထမဆုံးအမျိုးသမီးဖြစ်လာသော မာရမ်က ၎င်း၏ပထမဆုံး Apex ကော်မတီ အစည်းအဝေးအတွင်း ယခုကဲ့သို့ ပြောကြားခဲ့ခြင်းဖြစ်သည်။

 ဝန်ကြီးချုပ်ဟောင်း နာဝက်ဇ်ရှာရစ်နဲ့ မာရမ်နာဝက်ဇ်ကို တွေ့ရစဉ်

နိုင်ငံတွင်းရှိ တရုတ်နိုင်ငံသားများသည် လုံခြုံရေးစီမံချက်များကို လိုက်နာရန် တွန့်ဆုတ်နေကြသည်ဟု ၎င်းက ပြောသည်။

“သူတို့တွေကို လုံခြုံရေးစီမံချက်တွေ လိုက်နာဖို့ တောင်းဆိုတဲ့အချက်မှာ မကျေမနပ် ဖြစ်နေကြပါတယ်။ သူတို့ လုံခြုံရေးနဲ့ပတ်သက်ပြီး စိုးရိမ်ပူပန်နေတဲ့အတွက် ဘယ်လိုစည်းမျဉ်းတွေအောက်မှာမှ မနေချင်ကြဘူး” ဟု မာရမ် က ပြောကြားခဲ့သည်။

အဆိုပါ အစည်းအဝေးသို့ လာဟိုး (Lahore) တပ်မဌာနချုပ်မှ ဒုတိယဗိုလ်ချုပ်ကြီး ဆေးရတ်အေမာရာဇာ(Syed Aamer Raza) နှင့် အခြားထိပ်သီး စစ်ဘက်တာဝန်ရှိသူများ တက်ရောက်ခဲ့ကြသည်။

၎င်း၏ အစိုးရအနေဖြင့် ပန်ဂျပ်ရှိ တရုတ်အလုပ်သမားများအတွက် ခိုင်မာသောလုံခြုံရေးကို ထောက်ပံ့ပေးသွား မည်ဟု မာရမ်က အာမခံခဲ့သည်။

 အဓိကရုဏ်းဖြစ်ပွားနေစဉ်

ထိုအစည်းအဝေးတွင် ဘီရှမ် ( Bisham) ၌ တရုတ်အင်ဂျင်နီယာများ သေဆုံးမှုနှင့်ပတ်သက်ပြီး ပြစ်တင်ရှုတ်ချခဲ့ သည်။

လွန်ခဲ့သည့် သီတင်းပတ်က ဘီရှမ်တွင် တရုတ်အင်ဂျင်နီယာ ၅ ဦးနှင့် ၎င်းတို့၏ ပါကစ္စတန်ယာဉ်မောင်းတို့သည် အစ္စလာမာဘတ် (Islamabad) မြို့တော်မှ ခိုင်ဘာပက်တွန်ခါဝါပြည်နယ်၊ ဒါဆုမြို့ရှိ ဆောက်လုပ်ရေး လုပ်ငန်းခွင် တစ်ခုမှ ရေကာတာတစ်ခုသို့ သွားရောက်ချိန်တွင် အသေခံဗုံးခွဲ တိုက်ခိုက်ခံရမှုကြောင့် သေဆုံးခဲ့သည်။

"အကြမ်းဖက်သမားတွေဟာ ဒီဂျစ်တယ် အသွင်ပြောင်းလာခဲ့ပြီး ဒီလိုပလက်ဖောင်းတွေမှာ သူတို့ရဲ့အရှေ့ကို ကြိုရောက်နေဖို့ လိုအပ်ပါတယ်။ ဒါပြင် အကြမ်းဖက်သမားတွေမှာ နောက်ဆုံးပေါ် လက်နက်နဲ့ နည်းပညာတွေ ရှိပါတယ်။ သူတို့ဆီမှာ အာဖဂန်နစ္စတန်နိုင်ငံကနေ ရလာတဲ့ အမေရိကန်လက်နက်တွေ ရှိပါတယ်။ အာဖဂန် နစ္စတန်ကနေ ရလာတဲ့ ဒီလက်နက်တွေဟာ ဥပဒေပြုရေး အေဂျင်စီတွေအတွက် ကြီးမားတဲ့စိန်ခေါ်မှုတစ်ခု ဖြစ်ပါတယ်"ဟု မာရမ်က ပြောကြားခဲ့သည်။

Source: WION

CNI International News

ကိယက်ဗ်၊ ဧပြီ ၈

ရုရှားအနေဖြင့် တာဝေးပစ် ဒုံးကျည်များနှင့် တိုက်ခိုက်နေသည့် စစ်ဆင်ရေးကို အရှိန်မြှင့်တင်မည်ဆိုပါက ယူကရိန်း၏ လေကြောင်းရန် ကာကွယ်ရေး ဒုံးကျည်များသည် ပြတ်လပ်သွားနိုင်ကြောင်း ယူကရိန်းသမ္မတ ဇာလန်းစကီး(Volodymyr Zelenskiy) က ဧပြီ ၆ ရက်တွင် ပြောကြားခဲသည်ဟု ရိုက်တာမှ ဖော်ပြခဲ့သည်။

ရုရှားသည် ယူကရိန်း၏ စွမ်းအင်စနစ်များ၊ မြို့များ၊ မြို့နယ်များကို ဒုံးကျည်နှင့် ဒရုန်းများဖြင့် သီတင်းပတ် များစွာကြာ တိုက်ခိုက်ခဲ့ပြီးနောက် ယူကရိန်းလေကြောင်းရန် ကာကွယ်ရေးတပ်ဖွဲ့ ရင်ဆိုင်နေရသော ဆိုးရွားလာသည့် အခြေအနေကို ဇာလန်းစကီးက သတိပေးခဲ့ခြင်းဖြစ်သည်။

"တကယ်လို့ သူတို့တွေဟာ ယူကရိန်းကို ပြီးခဲ့တဲ့လကလို နေ့စဉ်နေ့တိုင်း တိုက်ခိုက်နေမယ်ဆိုရင် ကျနော်တို့ရဲ့ ဒုံးကျည်တွေ ပြတ်လပ်သွားပါလိမ့်မယ်။ ဒါကိုလည်း မိတ်ဖက်နိုင်ငံတွေ သိထားပါတယ်"ဟု ဇာလန်းစကီးက ယူကရိန်းရုပ်သံမှ ထုတ်လွှင့်သည့် အင်တာဗျူးတစ်ခုတွင် ပြောကြားခဲ့သည်။

မဟာမိတ်နိုင်ငံများထံ လေကြောင်းရန် ကာကွယ်ရေး အကူအညီများ ထပ်တလဲလဲ တောင်းဆိုနေသည့် ဇာလန်းစကီးက ယူကရိန်းသည် လတ်တလော ကာလအတွင်း ရုရှား၏ တိုက်ခိုက်မှုများကို တွန်းလှန်ရန် လက်နက် လုံလောက်နေသေးကြောင်း၊ သို့သော် မိမိတို့တွင်ရှိသည့် ဒုံးကျည်များဖြင့် မည်သည့်အရာကို ကာကွယ်ရမည်ဆိုခြင်းကို ရွေးချယ်ရာတွင် အခက်အခဲများရှိခဲ့ကြောင်း ပြောကြားခဲ့သည်။

 ယူကရိန်းစစ်သားတွေကို တွေ့ရစဉ်

အမေရိကန်၏ Patriot လေကြောင်းရန် ကာကွယ်ရေးစနစ် ၂၅ ခုကို လိုအပ်ကြောင်းလည်း ၎င်းက ပြောသည်။

ခေတ်မီဆန်းပြားသည့် အမေရိကန်၏ လေကြောင်းကာကွယ်ရေးစနစ်သည် ရုရှား၏ ပဲ့ထိန်းဒုံးကျည်နှင့် ဟိုက်ပါဆိုးနစ် ဒုံးကျည်များ၏ တိုက်ခိုက်မှုများကို ကြားဖြတ်ပစ်ချရာတွင် အလွန်အရေးကြီးသည့် အခန်းကဏ္ဍမှ ပါဝင်ခဲ့သည်။

ရုရှား၏ အဆက်မပြတ် တိုက်ခိုက်မှုများကြောင့် ယူကရိန်းအရပ်သားများ သေဆုံးခဲ့ကြောင်း အရာရှိများက ပြောကြားခဲ့ပြီးနောက် ဇာလန်းစကီး၏ မှတ်ချက်စကား ထွက်ပေါ်လာခြင်းဖြစ်သည်။

ဧပြီ ၁၃ ရက် နံနက် အစောပိုင်းနှင့် မွန်းလွဲပိုင်း အချိန်များတွင် ခါကိဗ် ( Kharkiv) မြို့၌ ရုရှား၏ ဒုံးကျည်များနှင့် ဒရုန်း တိုက်ခိုက်မှု နှစ်ခုအတွင်း လူ ၈ ဦး သေဆုံးကာ လူ ၁၀ ဦးထက်မနည်း ဒဏ်ရာရခဲ့သည်။

ယူကရိန်း၏အရှေ့ပိုင်း ဒွန်းနက်စ် (Donetsk) ဒေသတွင်လည်း ရုရှား၏ လက်နက်ကြီးကျည် ကျရောက်ပေါက်ကွဲမှု ကြောင့် အမျိုးသမီးနှစ်ဦး အပါအဝင် လူ ၄ ဦး သေဆုံးခဲ့ကာ အိုဒက်ဆာ (Odesa) မြို့တွင် ဒုံးကျည်ကျရောက်မှု ကြောင့် လူ ၁ ဦး သေဆုံးခဲ့သည်။

Source: ရိုက်တာ

CNI International News

မနီလာ၊ ဧပြီ ၆

ဖိလစ်ပိုင်၊ အမေရိကန်နှင့် ဂျပန်ခေါင်းဆောင်များသည် လာမည့်သီတင်းပတ်တွင် ပြုလုပ်မည့် သုံးပွင့်ဆိုင် အစည်းအဝေးတွင်း တောင်တရုတ်ပင်လယ်၌ ဖိလစ်ပိုင်နှင့် တရုတ်အကြား တင်းမာမှုများ မြင့်တက်စေခဲ့သည့် မကြာသေးမီက ဖြစ်စဉ်များကို ဖြေရှင်းသွားမည်ဟု ဖိလစ်ပိုင်အရာရှိတစ်ဦးက ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

"အနောက် ဖိလစ်ပိုင်ပင်လယ်အတွင်း မကြာသေးခင်က ဖြစ်စဉ်တွေနဲ့ပတ်သက်ပြီး သုံးနိုင်ငံအကြား သဘောထား တွေ တူညီလိမ့်မယ်လို့ ကျနော်တို့ မျှော်လင့်ပါတယ်" ဟု ဖိလစ်ပိုင် ဒုတိယနိုင်ငံခြားရေးဝန်ကြီး ဟန်းစ် မိုဟိုင်မင် ဆီရီဘန် (Hans Mohaimin Siriban) က ဧပြီ ၅ ရက်တွင် ပြောကြားခဲ့သည်။

ပြီးခဲ့သည့်လက တရုတ်နှင့် ဖိလစ်ပိုင် သင်္ဘောများအကြား နောက်ဆုံးအကြိမ် ထိပ်တိုက်တွေ့မှုတွင် တရုတ် ကမ်းခြေစောင့်တပ်ဖွဲ့ သင်္ဘောနှစ်စင်း၏ မီးသတ်ပိုက်ဖြင့် ထိုးမှုကြောင့်  ဖိလစ်ပိုင် အရပ်ဖက်သင်္ဘောတစ်စင်း ဆိုးရွားစွာ ထိခိုက်ခဲ့သလို သင်္ဘောသားများလည်း ဒဏ်ရာရခဲ့သည်ဟု ဖိလစ်ပိုင်က ပြောကြားခဲ့သည်။

တရုတ်ကမ်းခြေစောင့်တပ်ဖွဲ့ကမူ ၎င်းတို့အနေဖြင့် ကျိုးကြောင်း သင့်တော်မှုရှိစွာ ပရော်ဖက်ရှင်နယ်ကျကျ လုပ်ဆောင်ခဲ့ခြင်း ဖြစ်သည်ဟု ပြောကြားခဲ့သည်။ 

ဖိလစ်ပိုင် - ဂျပန် မဟာမိတ်ဆက်ဆံရေးတို့ကို တွေ့ရစဉ်

အမေရိကန်သမ္မတ ဂျိုးဘိုင်ဒန် (Joe Biden) သည် ဖိလစ်ပိုင်သမ္မတ ဖာဒီနန် မားကို့စ် ဂျူနီယာ (Ferdinand Marcos Jr)၊ ဂျပန်ဝန်ကြီးချုပ် ဖူမီယို ကီရှီဒါ (Fumio Kishida) တို့နှင့် အိမ်ဖြူတော်တွင် ဧပြီ ၁၁ ရက်၌ တွေ့ဆုံပြီး အင်ဒို-ပစိဖိတ်ဒေသ ငြိမ်းချမ်းရေးနှင့် လုံခြုံရေးတို့အပြင် စီးပွားရေးကဏ္ဍများတွင် သုံးပွင့်ဆိုင် ပူးပေါင်းဆောင်ရွက် မှုများကို ဆွေးနွေးမည်ဖြစ်သည်။

"အဲဒီ သုံးပွင့်ဆိုင် ပူးပေါင်းဆောင်ရွက်မှုဟာ ဘယ်နိုင်ငံကိုမှ ဦးတည်တာ မဟုတ်ပါဘူး" ဟု ဆီရီဘန်က ပြောကြား ခဲ့ပြီး စီးပွားရေးခိုင်မာစွာ တည်ဆောက်ရေးကိုသာ အဓိက ရည်ရွယ်ကြောင်း ထပ်လောင်း ပြောကြားခဲ့သည်။

သို့သော် သုံးနိုင်ငံမဟာမိတ်အဖွဲ့သည် ဖိလစ်ပိုင်၏ ပင်လယ်ရေကြောင်း လုံခြုံရေးနှင့် မိမိတို့ မဟာမိတ်များနှင့် ပူပေါင်းဆောင်ရွက်သည့် ဖိလစ်ပိုင်၏ လုပ်နိုင်စွမ်းများကို မြှင့်တင်ရန် အထောက်အကူ ဖြစ်စေလိမ့်မည်ဟု ၎င်းက ဆိုသည်။

ပြီးခဲ့သည့် သီတင်းပတ်ကလည်း မားကို့စ်က တောင်တရုတ်ပင်လယ်အတွင်း တရုတ်သင်္ဘောများ၏ အန္တရာယ်များ သော တိုက်ခိုက်မှုများကို ဆန့်ကျင်သည့် တန်ပြန်အစီအစဉ်များကို လုပ်ဆောင်သွားမည်ဖြစ်ကြောင်းနှင့် ဖိလစ်ပိုင် ၏ အချုပ်အခြာအာဏာကို လုံခြုံစိတ်ချစေရန် မဟာမိတ်များနှင့် ဆွေးနွေးသွားမည်ဖြစ်ကြောင်း ပြောကြားခဲ့ သည်။

Source: ဘန်ကောက်ပို့စ်