CNI International News

အစ္စတန်ဘူလ်၊ စက်တင်ဘာ ၂၄

အနောက်နိုင်ငံများနှင့် ရုရှား-တရုတ် ဦးဆောင်သည့် အင်အားစုများအကြား တင်းမာမှုများ မြင့်တက်နေချိန်တွင် တူရကီသည် ထိုအင်အားစု ၂ ခုအကြား ပထဝီနိုင်ငံရေးဆိုင်ရာ အားပြိုင်မှုများအတွင်း အဓိကကျသည့် အခန်းကဏ္ဍမှ ပါဝင်ရန်ကြိုးပမ်းလျက်ရှိသည်ဟု Nikkei Asia မှ ဖော်ပြခဲ့သည်။

တူရကီနိုင်ငံ၏ တည်နေရာသည် ဥရောပ၊ အရှေ့အလယ်ပိုင်းနှင့် အာရှတိုက်တို့၏ လမ်းဆုံလမ်းခွ နေရာတွင် တည်ရှိနေသဖြင့် ပထဝီနိုင်ငံရေးအရ မဟာဗျူဟာကျသည့် နေရာ၌ ရှိနေသည်။

ထို့ပြင် တူရကီသည် ၎င်း၏ တန်းပြည့် စစ်သားအရေအတွက်ကို ၃၅၀,၀၀၀ အထိ တိုးမြှင့်ခဲ့သဖြင့် နေတိုး အဖွဲ့အတွင်း အမေရိကန်ပြီးလျှင် တန်းပြည့်စစ်သားအင်အား ဒုတိယအများဆုံးနိုင်ငံ ဖြစ်နေသည်ဟု အမေရိကန် အခြေစိုက် Global Firepower ဝက်ဘ်ဆိုက်တွင် ဖော်ပြထားသည်။

ထို့ပြင် ၂၀၂၃ ခုနှစ်က တူရကီတွင် ပြုလုပ်ခဲ့သည့် ၁၄ ကြိမ်မြောက် သံအမတ်များ ညီလာခံ၌ တူရကီသမ္မတ အာဒိုဂန်က တူရကီနိုင်ငံသည် နိုင်ငံတကာ ဆက်ဆံရေးများတွင် အရေးကြီးသည့် နိုင်ငံတစ်နိုင်ငံ ဖြစ်လာကြောင်း မိန့်ခွန်းပြောကြားခဲ့သည်။

မိမိတို့ တူရကီသမ္မတနိုင်ငံ ထူထောင်သည့် ခုနှစ်သည် ၂၀၂၃ ခုနှစ်၊ အောက်တိုဘာ ၂၉ ရက်တွင် နှစ်ပေါင်း ၁၀၀ ပြည့်သွားခဲ့ပြီး နောက်ထပ် ရာစုနှစ်အသစ်ကို ထပ်မံဖွင့်လှစ် သွားမည်ဖြစ်ကြောင်း အာဒိုဂန်က ပြောကြားခဲ့သည်။

အာဒိုဂန်ကို တွေ့ရစဉ်

တူရကီ၏ သမိုင်းကြောင်းတွင် ဆိုမာလီယာနှင့် အီသီယိုပီးယား၊ အစ္စရေးနှင့်ပါလက်စတိုင်း အစရှိသည့် ရန်ဘက် များအကြား ကြားဝင်စေ့စပ်ညှိနှိုင်း ပေးမှုများရှိခဲ့ပြီး မကြာသေးမီက အထင်ရှားဆုံး ဖြစ်စဉ်တစ်ခုမှာ ၂၀၂၂ ခုနှစ်က ရုရှားနှင့် ယူကရိန်းအကြား အစ္စတန်ဘူလ် (Istanbul) သဘောတူညီချက်ရရှိအောင် ကြားဝင်စေ့စပ်ပေးနိုင်ခဲ့ခြင်း ဖြစ်သည်။

ထို့ပြင် အာဒိုဂန်သည် တူရကီကို အရှေ့နှင့် အနောက်နိုင်ငံများအကြား ပေါင်းကူးတံတား တစ်ခုအဖြစ် ကြားဝင် ချိတ်ဆက်ပေးသည့် နိုင်ငံတစ်ခုအဖြစ် ပိုမိုခိုင်မာ အားကောင်းစေရန် ကြိုးပမ်းနေပြီး တူရကီ၏ အချုပ်အခြာ အာဏာကို ပိုမိုခိုင်မာစေရန် ထူထောင်နေသည်ဟု ကျွမ်းကျင်သူများက ပြောကြားခဲ့သည်။

ထို့ပြင် ယခုနှစ် ဇူလိုင်လ ၃ ရက်နှင့် ၄ ရက်က ကာဇက်စတန်နိုင်ငံတွင် ပြုလုပ်ခဲ့သည့် ၂၄ ကြိမ်မြောက် ရှန်ဟိုင်း ပူးပေါင်းဆောင်ရွက်ရေးအဖွဲ့ (SCO) ညီလာခံတွင်လည်း အာဒိုဂန်က ယူကရိန်းစစ်ပွဲကို အဆုံးသတ်ရန် တူရကီက ကူညီပေးမည့်အကြောင်း ရုရှားသမ္မတ ဗလာဒီမာ ပူတင် (Vladimir Putin) ကို ပြောကြားခဲ့သည်။

တူရကီသည် အမေရိကန်နှင့် အနောက်နိုင်ငံများ ပါဝင်ဖွဲ့စည်းထားသည့် နေတိုးအဖွဲ့ဝင် ဖြစ်သကဲ့သို့ ရုရှားနှင့် တရုတ်တို့ ပါဝင်သည့် SCO အဖွဲ့ဝင်နိုင်ငံလည်း ဖြစ်နေသဖြင့် အနာဂတ်တွင် တူရကီသည် အရှေ့နှင့် အနောက် အကြား ထိတွေ့ဆက်ဆံမှုများ၌ အဓိကကျသည့် အခန်းကဏ္ဍမှ ပါဝင်လာလိမ့်မည်ဟုလည်း ကျွမ်းကျင်သူများက ပြောကြားခဲ့သည်။

Source: Nikkei Asia

CNI International News

ကိုလံဘို၊ စက်တင်ဘာ ၂၄

သီရိလင်္ကာနိုင်ငံတွင် သမ္မတသစ်အဖြစ် ရွေးကောက်ခံခဲ့ရသည့် လက်ဝဲယိမ်းခေါင်းဆောင် အန်နူရာ ကူမာရာ ဒစ္စနာယာကီ (Anura Kumara Dissanayake)က နိုင်ငံအတွင်း ပြုပြင်ပြောင်းလဲမှုများ ပြုလုပ်မည်ဟု ကတိပြုခဲ့ ကြောင်း ရိုက်တာမှ ဖော်ပြခဲ့သည်။

စက်တင်ဘာ ၂၂ ရက်က ပြုလုပ်ခဲ့သည့် သမ္မတရွေးကောက်ပွဲကို အနိုင်ရရှိခဲ့ပြီး စက်တင်ဘာ ၂၃ ရက်တွင် သမ္မတသစ်အဖြစ် ကျမ်းသစ္စာကျိန်ဆိုခဲ့သည့် အခမ်းအနားမှာ ၎င်းက ပြောကြားခဲ့ခြင်း ဖြစ်သည်။

သမ္မတရွေးကောက်ပွဲတွင် သန်းနှင့်ချီသည့် သီရိလင်္ကာ မဲဆန္ဒရှင်များသည် ကျိုးပျက်လွယ်သည့် စီးပွားရေး နာလန်ထူမှုကို မြှင့်တင်ရန်နှင့် အကျင့်ပျက်ခြစားမှု တိုက်ဖျက်ရန် ကတိပြုထားသည့် အတိုက်အခံ လွှတ်တော် ကိုယ်စားလှယ်လောင်း ဒစ္စနာယာကီကို မဲပေးခဲ့ကြသည်။

သီရိလင်္ကာနိုင်ငံ သမ္မတသစ် ဒစ္စနာယာကီကို တွေ့ရစဉ်

"ဒီမိုကရေစီကို ကာကွယ်ထိန်းသိမ်းဖို့ အာရုံစိုက် လုပ်ဆောင်သွားမယ်လို့ ကျနော် ကတိပြုပါတယ်။ ကျနော်တို့ရဲ့ နိုင်ငံရေးဟာ သန့်ရှင်းဖို့ လိုအပ်ပါတယ်။ လူထုကလည်း မတူကွဲပြားတဲ့ နိုင်ငံရေး အခင်းအကျင်းကို တောင်းဆိုခဲ့ ကြပါတယ်။ အဲဒီလို အပြောင်းအလဲတွေ လုပ်ပေးဖို့ ကျနော့်ဘက်က အသင့်ရှိပါတယ်" ဟု အသက် ၅၅ နှစ်အရွယ် ဒစ္စနာယာကီက သမ္မတရုံးတွင် ပြုလုပ်သည့် ကျမ်းသစ္စာကျိန်ဆိုပွဲ၌ ပြောကြားခဲ့သည်။

သမ္မတရုံး အပြင်ဘက်တွင် ၎င်းကို ထောက်ခံသူများက ၎င်း၏ဓာတ်ပုံများပါသည့် ပိုစတာများကို ကိုင်ဆောင်ထား ကြသလို အချို့ကလည်း သီရိလင်္ကာနိုင်ငံအလံကို ဝှေ့ယမ်းခဲ့ကြသည်။

ဒစ္စနာယာကီသည် ရာထူးမှ ထွက်ခွာသွားသည့် သမ္မတရာနေးလ် ဝီကရီမီဆင်းဟီ (Ranil Wickremesinghe) နေရာကို ဆက်ခံသူဖြစ်လာခဲ့ပြီး သီရိလင်္ကာ၏ ၁၀ ဦးမြောက် သမ္မတဖြစ်လာခဲ့သည်။

ဝီကရီမီဆင်းဟီသည် နိုင်ငံအတွင်း ပြည်ပကြွေးမြီ အကျပ်အတည်း၊ အစားအစာ၊ ဆေးဝါးနှင့် လောင်စာများ ပြတ်လပ်မှုတို့ကြောင့် ဘဏ္ဍာရေး အကျပ်အတည်းများ အမြင့်ဆုံးအချိန်တွင် သမ္မတအဖြစ် တာဝန်ယူခဲ့သူ ဖြစ်သည်။

သီရိလင်္ကာနိုင်ငံ သမ္မတသစ် ဒစ္စနာယာကီကို တွေ့ရစဉ်

အသက် ၇၅ နှစ်အရွယ် ဝီကရီမီဆင်းဟီသည် အခွန်များ တိုးမြှင့်ကောက်ခံခြင်းနှင့် နိုင်ငံတကာ ငွေကြေးရန်ပုံငွေ အဖွဲ့ (IMF) ထံမှ ချေးငွေရယူရန် လိုအပ်သည့် သတ်မှတ်ချက်များအရ ခြိုးခြံချွေတာရေး အစီအစဉ်များကို ကျင့်သုံးခဲ့သည်။

၎င်း၏ မူဝါဒများကြောင့် အခြေခံကုန်ပစ္စည်းများ ပြတ်လပ်သည့် ပြဿနာများ အဆုံးသတ်သွားခဲ့ပြီး စီးပွားရေး ဖွံ့ဖြိုးတိုးတက်မှု ပုံမှန်အခြေအနေသို့ ပြန်လည်ရောက်ရှိခဲ့သော်လည်း သန်းနှင့်ချီသည့် ပြည်သူများသည် စားဝတ် နေရေးအတွက် ရုန်းကန်ခဲ့ရသည်။

လက်ရှိတွင် သမ္မတသစ် ဒစ္စနာယာကီသည် အစိုးရအဖွဲ့သစ် ဖွဲ့စည်းရမည်ဖြစ်ပြီး လွှတ်တော်တွင် IMF ထံမှ ချေးငွေ ဒေါ်လာ ၂ ဒသမ ၉ ဘီလျံရယူရန် ဘတ်ဂျက်ကို အတည်ပြုနိုင်ရန် ကြိုးပမ်းရမည်ဖြစ်သည်။

Source: ရိုက်တာ

CNI International News

နယူးယောက်၊ စက်တင်ဘာ ၂၄

အမေရိကန်သမ္မတဟောင်း ဒေါ်နယ်ထရမ့် (Donald Trump) က သမ္မတရွေးကောက်ပွဲတွင် ၎င်းနှင့် ယှဉ်ပြိုင်ရ မည့် ပြိုင်ဘက်ဖြစ်သူ ကာမယ်လာ ဟားရစ် (Kamala Harris) သည် တတိယကမ္ဘာစစ်ကို တားဆီးနိုင်စွမ်းရှိမည် မဟုတ်ကြောင်း ပြောကြားခဲ့သည်ဟု တာ့စ်သတင်းဌာနမှ ဖော်ပြခဲ့သည်။

"ကမ္ဘာကြီးက အခုချိန်မှာ အရမ်းအန္တရာယ်များတဲ့ နေရာတစ်ခု ဖြစ်လာခဲ့ပါပြီ။ ကာမယ်လာဟားရစ်ဟာ အရိုးရှင်း ဆုံး မေးခွန်းတွေကိုတောင် မဖြေနိုင်ပါဘူး။ ဒါက တော်တော်ဆိုးပါတယ်။ သူသာ မစွမ်းဆောင်နိုင်ဘူးဆိုရင် တတိယကမ္ဘာစစ်ကို သူဘယ်လို တားဆီးနိုင်ပါ့မလဲ။ အဖြေကတော့ ရှင်းပါတယ်။ သူမတားဆီးနိုင်လို့ပါပဲ" ဟု ထရမ့်က ၎င်း၏ Truth Social လူမှုမီဒီယာတွင် ရေးသားဖော်ပြခဲ့သည်။

အစောပိုင်းကလည်း ထရမ့်က အမေရိကန်သည် ဒီမိုကရက်တစ်အစိုးရ လက်အောက်တွင် တတိယကမ္ဘာစစ်ဆီသို့ ဦးတည်လိမ့်မည်ဟု သတိပေးခဲ့ဖူးသည်။

ဟားရစ်ကို တွေ့ရစဉ်

အမေရိကန်တွင် နိုဝင်ဘာ ၅ ရက်၌ သမ္မတရွေးကောက်ပွဲကို ပြုလုပ်မည်ဖြစ်ပြီး လက်ရှိသမ္မတ ဂျိုးဘိုင်ဒန် (Joe Biden) သည် အစောပိုင်းက ရွေးကောက်ပွဲ ဝင်ရောက်ယှဉ်ပြိုင်ရန် မဲဆွယ်စည်းရုံးမှုများ ပြုလုပ်ခဲ့သည်။

သို့သော် ၎င်း၏ စွမ်းဆောင်ရည် ညံ့ဖျင်းမှုကြောင့် ဇွန်လအတွင်း ရွေးကောက်ပွဲ ဝင်ရောက်ယှဉ်ပြိုင်မှုမှ နုတ်ထွက် ခဲ့ကာ ၎င်းနေရာတွင် ဒုတိယသမ္မတဖြစ်သူ ဟားရစ်ကို အစားထိုးယှဉ်ပြိုင်ရန် ထောက်ခံခဲ့သည်။ 

သြဂုတ်လတွင်မူ ဒီမိုကရက်တစ်ပါတီက ဟားရစ်ကို ပါတီကိုယ်စားပြု ကိုယ်စားလှယ်လောင်းအဖြစ် တရားဝင် ရွေးချယ်ခဲ့သည်။

Source: တာ့စ်

CNI International News

မော်စကို၊ စက်တင်ဘာ ၂၃

အနောက်နိုင်ငံများသည် ယူကရိန်းတွင် စစ်သားအင်အား မကုန်မချင်း ရုရှားအား စစ်ပွဲဆင်နွှဲသည့် အိုင်ဒီယာကို ဖက်တွယ်ထားကြောင်း ကရင်မလင် ပြောရေးဆိုခွင့်ရှိသူ ဒီမီထရီ ပက်စ်ကော့ဗ် (Dmitry Peskov) က ပြောကြား ခဲ့သည်ဟု တာ့စ်သတင်းဌာနမှ ဖော်ပြခဲ့သည်။

ရုရှား၏ နယ်နိမိတ်အတွင်းကို တိုက်ခိုက်ရန်အတွက် အနောက်နိုင်ငံများက ထောက်ပံ့ပေးထားသည့် လက်နက် များကို အသုံးပြုရန် စိုးရိမ်စရာမလိုကြောင်း နေတိုးအတွင်းရေးမှူးချုပ် ဂျန်းစ် စတိုတန်ဘာ့ချ် (Jens Stoltenberg) ၏ ပြောကြားချက်နှင့်ပတ်သက်ပြီး ပက်စ်ကော့ဗ်က ယခုကဲ့သို့ မှတ်ချက်ပေးခဲ့သည်။

"သူတို့က ယူကရိန်းမှာ လူတွေမကုန်မချင်း ကျနော်တို့ကို တိုက်ခိုက်မယ့် အိုင်ဒီယာကို ဖက်တွယ်ထားတာပါ။ အဲဒီ အိုင်ဒီယာကို ဖက်တွယ်ထားတာကိုလည်း ပေါ်လွင်ထင်ရှားအောင် ပြသနေပါတယ်။ စတိုတန်ဘာ့ချ်ရဲ့ ပြောခဲ့တဲ့ စကားမျိုးက အဲဒီအိုင်ဒီယာကို ဖက်တွယ်ထားတာကို ပြသရာရောက်နေပါတယ်" ဟု ပက်စ်ကော့ဗ်က ပြောသည်။

စတိုတန်ဘာ့ချ်သည် ရာထူးမှ ထွက်ခွာရတော့မည့် နေတိုး အတွင်းရေးမှူးချုပ် ဖြစ်သဖြင့် ထိုသို့ ပြောကြားခဲ့ခြင်း လည်း ဖြစ်သည်ဟု ပက်စ်ကော့ဗ်က ဆိုသည်။

"သူက မကြာခင် အလုပ်က အနားယူတော့မှာပါ။ အဲဒါကြောင့် အခုလိုမျိုး တာဝန်မဲ့တဲ့ ပြောကြားချက်ကို ပြောခဲ့တာဖြစ်ပါတယ်" ဟု ပက်စ်ကော့ဗ်က ပြောကြားခဲ့သည်။

နေတိုးအတွင်းရေးမှူးချုပ် ဂျန်းစ် စတိုတန်ဘာ့ချ်ကို တွေ့ရစဉ်

ထို့ပြင် ဥရောပတွင် နေထိုင်သူအချို့သည် နေတိုးအတွင်းရေးမှူးချုပ် စတိုတန်ဘာ့ချ်၏ အတွေးအမြင်နှင့် ပတ်သက်ပြီး ဝမ်းနည်းကြောင်း ဖော်ပြခဲ့ကြသည်ဟုလည်း ၎င်းက ဆိုသည်။

"စိတ်မကောင်းစရာက သူ့ရဲ့ သဘောထားတွေကို ဥရောပမှာ နေထိုင်သူ အများစုက မျှဝေနေပါတယ်။ ဥရောပက အစွန်းရောက်တဲ့ မှတ်ချက်စကားတွေ အများကြီးကို ကျနော်တို့ ကြားခဲ့ရပါတယ်။ အရမ်းတော့လည်း အလေးထား စရာမလိုပါဘူး" ဟု ပက်စ်ကော့ဗ်က ပြောကြားခဲ့သည်။

ယူကရိန်းအား အနောက်နိုင်ငံများမှ ထောက်ပံ့ပေးထားသည့် လက်နက်များဖြင့် ရုရှားကို တိုက်ခိုက်ခွင့်ပြုမည် ဆိုပါက နေတိုးအဖွဲ့သည် ယူကရိန်းပဋိပက္ခတွင် တစ်နည်းနည်းဖြင့် ပါဝင်နေသည်ဟု ယူဆ၍ မရနိုင်ကြောင်း စတိုတန်ဘာ့်ချ်က ပြောကြားခဲ့သည်။

ရုရှားသမ္မတ ဗလာဒီမာ ပူတင် (Vladimir Putin) ကမူ ယူကရိန်းအား အနောက်နိုင်ငံလုပ် လက်နက်များ အသုံးပြု ပြီး ရုရှား၏ နယ်နိမိတ်များကို တိုက်ခိုက်ခွင့်ပေးမည့် အစီအစဉ်အား သတိပေးထားသည်။

ပူတင်၏ သတိပေးချက်ကို အနောက်နိုင်ငံ၏ ကျွမ်းကျင်သူများက နားလည် သဘောပေါက်ကြောင်း ပက်စ်ကော့ဗ် က ပြောကြားခဲ့သည်။

Source: တာ့စ်

CNI International News

ဝယ်လ်မင်တန်၊ စက်တင်ဘာ ၂၃

တရုတ်၏ မြင့်တက်နေသည့် စစ်ရေးလှုပ်ရှားမှုများသည် ဒေသတွင်း သွေးတိုးစမ်းသည့် အားထုတ်ကြိုးပမ်းမှု တစ်ခုဖြစ်ကြောင်း ယူဆသည်ဟု အမေရိကန်သမ္မတ ဂျိုးဘိုင်ဒန် (Joe Biden) က ပြောကြားခဲ့ကြောင်း အေပီမှ ဖော်ပြခဲ့သည်။

ဘိုင်ဒန်သည် ဒယ်လာဝဲ (Delaware) ပြည်နယ်ရှိ ၎င်း၏ ဇာတိမြို့ဖြစ်သည့် ဝယ်လ်မင်တန် (Wilmington) မြို့တွင် ပြုလုပ်သည့် Quad အဖွဲ့အစည်းအဝေး၌ အဖွင့်မိန့်ခွန်းအဖြစ် ပြောကြားခဲ့ခြင်းဖြစ်သည်။

တရုတ်၏ လုပ်ဆောင်ချက်များသည် နည်းဗျူဟာအရ ပြောင်းလဲသော်လည်း မဟာဗျူဟာအရ ပြောင်းလဲခြင်း မရှိကြောင်း ဘိုင်ဒန်က ပြောကြားခဲ့ပြီး ထိုကဲ့သို့ ပြောကြားချိန်တွင် မိုက်ကိုဖွင့်ထားချိန်ဖြစ်သဖြင့် မီဒီယာများက ကြားသိခဲ့ရသည်။

တရုတ်အစိုးရသည် အိမ်ခြံမြေစျေးကွက်နှင့် စက်မှုလုပ်ငန်းများ နှေးကွေးလေးလံနေပြီး ကိုရိုနာဗိုင်းရပ်စ် ကပ်ရောဂါကြောင့် ကျဆင်းခဲ့သည့်စီးပွားကို ပြန်လည်မြှင့်တင်ရန် ရုန်းကန်နေရသည်။

Quad အဖွဲ့ဝင်နိုင်ငံများမှ ခေါင်းဆောင်များကို တွေ့ရစဉ်

"တရုတ်ဟာ ရန်လိုစွာနဲ့ ဒေသတွင်းမှာရှိတဲ့ ကျနော်တို့အားလုံးကို သွေးတိုးစမ်းနေပါတယ်။ တောင်တရုတ် ပင်လယ်၊ အရှေ့တရုတ်ပင်လယ်၊ တောင်တရုတ်၊ တောင်အာရှနဲ့ ထိုင်ဝမ်ရေလက်ကြားတွေမှာ အမှန်တကယ်ကို သွေးတိုးစမ်းနေပါတယ်" ဟု ဘိုင်ဒန်က ပြောကြားခဲ့သည်။

ထိုအစည်းအဝေးကို Quad အဖွဲ့ဝင်နိုင်ငံများမှ ခေါင်းဆောင်များဖြစ်သည့် ဩစတြေးလျဝန်ကြီးချုပ် အန်သိုနီ  (Anthony Albanese) ၊ အိန္ဒိယဝန်ကြီးချုပ် မိုဒီ (Narendra Modi) နှင့် ဂျပန်ဝန်ကြီးချုပ် ကီရှီဒါ (Fumio Kishida) တို့ တက်ရောက်ခဲ့သည်။

ထိုအစည်းအဝေးအတွင်း ခေါင်းဆောင်များက မိတ်ဖက်ဆက်ဆံမှုကို တိုးချဲ့ရန်နှင့် အဖွဲ့ဝင်နိုင်ငံများအကြား ပူးပေါင်းဆောင်ရွက်မှုများကို မြှင့်တင်ရန် သဘောတူညီခဲ့ကြသည်။

မိမိတို့အမြင်အရ တရုတ်သမ္မတ ရှီကျင့်ဖျင် (Xi Jinping) သည် ပြည်တွင်း စီးပွားရေး စိန်ခေါ်မှုများနှင့် ရင်ဆိုင်နေ ရချိန်တွင် သံတမန်ဆက်ဆံရေးကို တတ်နိုင်သမျှ တည်ငြိမ်စေရန် ထိန်းသိမ်းထားရန် ကြိုးပမ်းနေသည်ဟုလည်း ဘိုင်ဒန်က ပြောကြားခဲ့သည်။

၂၀၁၈ ခုနှစ်က စတင်ခဲ့သည့် အမေရိကန်-တရုတ် ကုန်သွယ်ရေး စစ်ပွဲအတွင်း ကမ္ဘာလုံးဆိုင်ရာ လုံခြုံရေးမှအစ များပြားသည့် အရေးကိစ္စများတွင် နှစ်နိုင်ငံအကြား ထိပ်တိုက်တွေ့မှုများ ဖြစ်ပွားခဲ့သည်။

Source: အေပီ

CNI International News

ဘန်ကောက်၊ စက်တင်ဘာ ၂၃

ထိုင်းအစိုးရသည် နှစ်စဉ်ပြုလုပ်နေကျ စစ်တပ်ပြင်ဆင်ဖွဲ့စည်းမှု တစ်ခုအဖြစ် စစ်တပ်အတွင်းရှိ အရာရှိပေါင်း ၈၀၈ ဦး၏ ရာထူးနေရာအသစ်များ လွှဲပြောင်းမှုအတွက် အဆိုတင်သွင်းခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ထိုအဆိုတင်သွင်းမှုတွင် ယခုလကုန်ပိုင်း၌ အငြိမ်းစားယူမည့် ထိုင်းတော်ဝင်ကြည်းတပ်နှင့် တော်ဝင်ရေတပ်၏ အကြီးအကဲများနေရာမှာ အစားထိုး တာဝန်ထမ်းဆောင်မည့် အကြီးအကဲသစ်များလည်း ပါဝင်သည်။

တော်ဝင်အစိုးရပြန်တမ်း ဝက်ဘ်ဆိုက်တွင် ဖော်ပြထားသည့် ဝန်ကြီးချုပ်ရုံး၏ ကြေညာချက်အရ ဝန်ကြီးချုပ် ပေတုန်တန် (Paetongtarn Shinawatra)သည် စစ်တပ်ပြင်ဆင်ဖွဲ့စည်းမှုအတွက် ဘုရင့်ထောက်ခံချက်ရရှိရန် လျှောက်ထားခဲ့သည်။

ဘုရင်၏ ထောက်ခံချက်ရရှိပါက ရာထူးပြောင်းလဲ ခန့်အပ်မှုများသည် အောက်တိုဘာ ၁ ရက်မှ စတင်ပြီး အကျုံး ဝင် သက်ရောက်မည်ဟု ဖော်ပြထားသည်။

ထိုင်းစစ်တပ်ကို တွေ့ရစဉ်

စစ်တပ်၏ စစ်ဦးစီးချုပ်အသစ်အဖြစ် ဗိုလ်ချုပ်ကြီး ပါန ကလော်ပလော့သွတ် (Pana Klaewplodthuk) ကို ခန့်အပ်ခဲ့ပြီး ပါနသည် ရာထူးမှ ထွက်ခွာတော့မည့် စစ်ဦးစီးချုပ် ဗိုလ်ချုပ်ကြီး ချာရွန်ချိုင်း ဟင်တာအို (Charoen chai Hintao) နေရာတွင် အစားထိုး တာဝန်ထမ်းဆောင်ရမည်ဖြစ်သည်။

ဗိုလ်ချုပ်ကြီး ပါနသည် လက်ရှိတွင် ကြည်းတပ်၏ စစ်ဦးစီးချုပ်ဖြစ်ပြီး တော်ဝင်အစောင့်တပ်ဖွဲ့များကို လေ့ကျင့် သင်ကြားပေးရသည့် အကြီးအကဲတစ်ဦးဖြစ်ကာ စစ်ဦးစီးချုပ်အဖြစ် ၂၀၂၇ ခုနှစ်အထိ တာဝန်ယူမည်ဖြစ်သည်။

ရေတပ်ဗိုလ်ချုပ်ကြီး ဂျီရာပိုလ် ဝေါင်ဝစ် (Jirapol Wongwit) ကို ရေတပ်၏ စစ်ဦးစီးချုပ်အဖြစ် အမည်စာရင်း တင်သွင်းခဲ့ပြီး ဂျီရာပိုလ်သည် ရာထူးမှ ထွက်ခွာတော့မည့် ရေတပ်စစ်ဦးစီးချုပ် အဒွန် ပန် အင်မ် ( Adoong Pan-iam.) နေရာတွင် အစားထိုး တာဝန်ထမ်းဆောင်မည်ဖြစ်သည်။

ထို့ပြင် လေတပ်၏ စစ်ဦးစီးချုပ် လေတပ်ဗိုလ်ချုပ်ကြီး ပန်ဒက်ဒီ ပတ္တနာကူလ် (Panpakdee Pattanakul) က ၎င်း၏ လက်ထောက်အဖြစ် ထိပ်သီးဗိုလ်ချုပ်ကြီး ချာအင်နတ်ဖိုလ်ကစ် (Chainat Pholkit) ကိုခန့်အပ်မည် ဖြစ်သည်။

Source: ဘန်ကောက်ပို့စ်

CNI International News

တဲလ်အဗစ်၊ စက်တင်ဘာ ၂၃

အစ္စရေးတပ်ဖွဲ့များသည် စက်တင်ဘာ ၂၂ ရက်က အနောက်ဘက်ကမ်းဒေသ၏ ရာမလာ (Ramallah) မြို့ရှိ အယ်လ်ဂျာဇီးယား သတင်းဌာန၏ ရုံးခန်းကို ဝင်ရောက်စီးနင်းခဲ့ပြီး ရုံးကို ၄၅ ရက်ကြာပိတ်ရန် အမိန့်ထုတ်ပြန် ခဲ့သည်ဟု ရိုက်တာမှ ဖော်ပြခဲ့သည်။

ထိုဖြစ်စဉ်သည် ဂါဇာစစ်ပွဲ ဖြစ်ပွားနေချိန်အတွင်း  အယ်လ်ဂျာဇီးယား သတင်းဌာနနှင့် အစ္စရေးဝန်ကြီးချုပ် ဘင်ဂျမင် နေတန်ယာဟု ( Benjamin Netanyahu) ၏ အစိုးရအဖွဲ့အကြား ကာလကြာရှည်ရှိခဲ့သည့် ရန်စောင်မှု များ၏ နောက်ဆုံးဖြစ်စဉ်ဖြစ်သည်။

ပြီးခဲ့သည့်နှစ် အောက်တိုဘာ ၇ ရက်ကစပြီး ဟားမာ့စ်အဖွဲ့က အစ္စရေးကို တိုက်ခိုက်မှုများလုပ်ခဲ့ရာမှ ဖြစ်ပွားလာ ခဲ့သည့် ဂါဇာစစ်ပွဲအတွင်း အယ်လ်ဂျာဇီးယား သတင်းဌာနသည် အစ္စရေးတပ်ဖွဲ့များ၏ စစ်ဆင်ရေးကြောင့် မြေပြင် တွင် သက်ရောက်မှုများကို အချိန်နှင့်တစ်ပြေးညီ သတင်းများ ထုတ်လွှင့်ခဲ့သည်။

အစ္စရေးတပ်ဖွဲ့က အယ်လ်ဂျာဇီးယား ရုံးခန်းကို စီးနင်းနေစဉ်

အစ္စရေးစစ်တပ်ကမူ ကာတာအခြေစိုက် အယ်လ်ဂျာဇီးယား သတင်းဌာန၏ သတင်းထောက်များသည် ဟားမာ့စ် သို့မဟုတ် ဟားမာ့စ်၏ မဟာမိတ်ဖြစ်သည့် အစ္စလာမ်မစ်ဂျီဟတ်အဖွဲ့နှင့် အဆက်အသွယ်ရှိကြောင်း မကြာခဏ စွပ်စွဲခဲ့သည်။

အယ်လ်ဂျာဇီးယား သတင်းဌာနကမူ အစ္စရေး၏ စွပ်စွဲချက်များကို ငြင်းဆိုခဲ့ပြီး အစ္စရေးသည် ဂါဇာကမ်းမြောင် ဒေသအတွင်းရှိ အယ်လ်ဂျာဇီးယား ဝန်ထမ်းများကို စနစ်တကျ ပစ်မှတ်ထားနေကြောင်း ပြောကြားခဲ့သည်။

ဂါဇာစစ်ပွဲ စတင်ခဲ့ချိန်ကတည်းက ဂါဇာဒေသအတွင်းရှိ အယ်လ်ဂျာဇီးယား သတင်းဌာန ရုံးခန်းတစ်ခု ဗုံးကြဲခံခဲ့ ရကာ သတင်းထောက် ၄ ဦး သေဆုံးခဲ့သည်။

အစ္စရေးတပ်ဖွဲ့ လုံခြုံရေးယူထားစဉ်

အစ္စရေးစစ်သားများသည် အနောက်ဘက်ကမ်းဒေသရှိ အယ်လ်ဂျာဇီးယား သတင်းဌာနရုံးခန်း ပိတ်ခိုင်းသည့် အကြောင်းရင်းကို အသေးစိတ် ပြောကြားခဲ့ခြင်း မရှိကြောင်း အယ်လ်ဂျာဇီးယားသတင်းဌာန၏ အနောက်ဘက် ကမ်းဒေသဆိုင်ရာ ဗျူရိုအကြီးအကဲ ဝါလစ် အယ် အိုမာရီ (Walid al-Omari) က ပြောကြားခဲ့သည်။

အစ္စရေး တရားရုံးတစ်ရုံး၏ အမိန့်အရ ရုံးခန်းကို ပိတ်ခဲ့ရခြင်းဖြစ်ပြီး ထိုအမိန့်တွင် အယ်လ်ဂျာဇီးယား သတင်းဌာန သည် အကြမ်းဖက်မှုကို ထောက်ခံ အားပေးမှု၊ သွေးထိုးလှုံ့ဆော်မှုများ ပြုလုပ်နေကြောင်း စွပ်စွဲခံခဲ့ရသည်ဟု အိုမာရီက ပြောသည်။

ရာမလာမြို့အခြေစိုက် ပါလက်စတိုင်း နိုင်ငံခြားရေးဝန်ကြီးဌာနကမူ အစ္စရေးစစ်တပ်၏ ဝင်ရောက်စီးနင်းမှုသည် သတင်းလွတ်လပ်ခွင့်ကို ချိုးဖောက်ခြင်းဖြစ်ကြောင်း ဝေဖန်ရှုတ်ချခဲ့သည်။

Source: ရိုက်တာ

CNI International Article

၂၀၂၄ ခုနှစ်၊ စက်တင်ဘာ ၂၁

စက်တင်ဘာ ၁၆ ရက်က တရုတ်နိုင်ငံပိုင် ရုပ်သံက ထုတ်လွှင့်ခဲ့သည့် မှတ်တမ်းဗွီဒီယိုထဲတွင် ထိုင်ဝမ်ကို ကမ်းတက်တိုက်ပွဲဖြင့် တိုက်ခိုက်မှုပုံစံကို အရိပ်အမြွက်ဖော်ပြခဲ့သည်။

အလားတူ တရုတ်ပြည်သူ့လွတ်မြောက်ရေးတပ်မတော် (PLA) ကလည်း ထိုသေနင်္ဂဗျူဟာဖြင့် စစ်ရေးလေ့ကျင့်မှု များကို အရှိန်မြှင့်တင်လျက်ရှိသည်။

Quenching အမည်ရှိ အခန်းဆက် မှတ်တမ်းဗွီဒီယို၏ နောက်ဆုံး ဇာတ်ကွက်တစ်ခုကို စက်တင်ဘာ ၁၆ ရက်က ပြသခဲ့ရာတွင် PLA ၏ ကြည်းတပ်၊ ရေတပ်နှင့် ဒုံးကျည်တပ်ဖွဲ့များ၏ စစ်ရေးလေ့ကျင့်မှု မှတ်တမ်းများ ပါဝင်ခဲ့ သည်။

ထိုပြကွက်များတွင် မြေပြင်တပ်ဖွဲ့၏ လေကြောင်းတပ်ဖွဲ့က ရဟတ်ယာဉ်များဖြင့် လေကြောင်းတိုက်ခိုက်မှုများ ပြုလုပ်ခြင်း၊ လေယာဉ်တင်သင်္ဘော ဦးဆောင်သည့် တိုက်ခိုက်ရေး စစ်သင်္ဘောအုပ်စုက အီလက်ထရောနစ် စစ်ဆင်ရေးများနှင့် တာဝေးပစ်ဒုံးကျည်များ ပစ်လွှတ်သည့် စစ်ရေးလေ့ကျင့်မှုများ ပါဝင်ခဲ့သည်။

မိနစ် ၂၀ ကြာမြင့်ခဲ့သည့် ထိုရုပ်သံမှတ်တမ်း အစီအစဉ်ကို ထိုင်ဝမ်နှင့် ပြည်မကြီး ပြန်လည်ပေါင်းစည်းလိုသော ဆန္ဒဖြင့် မျှော်လင့်တောင့်တနေသည့် စစ်သားတစ်ဦး၏ ပြကွက်ဖြင့် စတင်ဖွင့်လှစ်ပြသခဲ့သည်။

ထို့ပြင် ထိုင်ဝမ်ကို ကမ်းတက်တပ်သားများ စေလွှတ်ရာတွင် ရဟတ်ယာဉ်များကို အသုံးပြုရန်နှင့် ထိုရဟတ်ယာဉ် များကို ထောက်လှမ်းရေးနှင့် တိုက်ခိုက်ရေးဒရုန်းများက အကူအညီပေးမည့် အသေးစိတ် အချက်အလက်များကို ဖော်ပြခဲ့သည်။

 ဒုံးကျည် ပစ်နေစဉ်

တရုတ်သည် ထိုင်ဝမ်ကို ၎င်း၏ နယ်နိမိတ်အဖြစ် သတ်မှတ်ထားပြီး လိုအပ်လာပါက အင်အားသုံး သိမ်းယူသွား မည်ဟု မကြာခဏ ပြောကြားခဲ့သည်။

ထိုမှတ်တမ်း ဗွီဒီယိုအတွင်း PLA သည် အမြင့်ပျံသန်းနိုင်သည့် ထောက်လှမ်းရေးဒရုန်းများ အသုံးပြုပြီး ရဟတ်ယာဉ်များကလည်း ပင်လယ်ရေမျက်နှာပြင်နှင့် နီးကပ်စွာပျံသန်းကာ ကမ်းရိုးတန်းဒေသရှိ ပစ်မှတ်များကို တိုက်ခိုက်မည့်ပုံစံများကို ပြသခဲ့သည်။

ထို့ပြင် တရုတ်ရဟတ်ယာဉ်များနှင့် ကမ်းတက်တပ်သားများသည် ပုခုံးထမ်းတင်ပြီး ပစ်လွှတ်နိုင်သည့် လေကြောင်း ကာကွယ်ရေးဒုံးကျည်များ ကိုင်ဆောင်ထားသော ရန်သူတပ်ဖွဲ့များ၏ ခုခံမှုများနှင့် ရင်ဆိုင် ရပုံများကိုလည်း ဖော်ပြခဲ့သည်။

"ပုခုံးပေါ်ထမ်းပြီး သယ်ယူနိုင်တဲ့ လေကြောင်းကာကွယ်ရေး လက်နက်တွေဟာ စစ်မြေပြင်တွေမှာ ကျယ်ကျယ် ပြန့်ပြန့် အသုံးပြုခဲ့ပြီး ရဟတ်ယာဉ်တွေဟာလည်း အဲဒီဒုံးကျည်တွေရဲ့ ခြိမ်းခြောက်မှုတွေနဲ့ ရင်ဆိုင်နေရပါတယ်။ တိုက်ပွဲ တကယ်ဖြစ်လာရင် ဒီပြဿနာဖြေရှင်းပြီး အနိုင်ယူဖို့ ကျနော်တို့ နည်းလမ်းသစ်တွေ ရှာဖွေရပါမယ်" ဟု PLA အရာရှိတစ်ဦးက ကြည့်ရှုသူများကို ပြောကြားခဲ့သည်။

ထိုင်ဝမ်သည် အမေရိကန်ထံမှ FIM-92 Stinger MANPADS ဒုံးကျည် အစင်း ၂၅၀ ကို ဝယ်ယူခဲ့ပြီး ယခုလ အစောပိုင်းကလည်း နောက်ထပ်ဒုံးကျည် ၁၉၈၅ ခုကို ထပ်မံဝယ်ယူရန် အစီအစဉ်ရှိကြောင်း ကြေညာခဲ့သည်။

အမေရိကန်သည် ထိုင်ဝမ်ကို လွတ်လပ်သည့် နိုင်ငံတစ်ခုအဖြစ် အသိအမှတ် ပြုမထားသော်လည်း ထိုင်ဝမ် ရေလက်ကြားတွင် ရှိရင်းစွဲအခြေအနေကို အင်အားသုံးပြီး ပြောင်းလဲမည့် မည်သည့် အားထုတ်ကြိုးပမ်းမှုကိုမဆို ဆန့်ကျင်ကြောင်း ပြောကြားခဲ့ကာ ထိုင်ဝမ်ကို လက်နက်အများဆုံး ထောက်ပံ့ပေးနေသည့် နိုင်ငံဖြစ်သည်။

မှတ်တမ်းဗွီဒီယိုထဲတွင် PLA သည် မီးကျည်များ အသုံးပြုခြင်း၊ ရန်သူများ၏ လေကြောင်း ကာကွယ်ရေးကို ချိုးဖောက်ရန် ကြိုးပမ်းသည့်အနေဖြင့် ဒုံးကျည်များပစ်လွှတ်ခြင်း အစရှိသည့် လေ့ကျင့်မှုများကို ဖော်ပြခဲ့သည်။

 တရုတ်တိုက်လေယာဉ်များကိုတွေ့ရစဉ်

ရဟတ်ယာဉ်ဖြင့် လေကြောင်းတိုက်ခိုက်မှု စစ်ဆင်ရေးကို လေယာဉ်ကွင်း တစ်ခုထဲတွင် ပြုလုပ်ခဲ့ပြီး မြေပေါ်ရှိ ပစ်မှတ်များကို ရန်သူများ၏ ခံတပ်စခန်းများအဖြစ် ပုံဖော်ဆောက်လုပ်ခဲ့သည်။ 

သို့သော် CCTV က ထုတ်လွှင့်ခဲ့သည့် ထိုမှတ်တမ်းဗွီဒီယိုတွင် တည်နေရာကို လျှို့ဝှက်ထားရန် အဆောက်အအုံ များ၏ ပုံများကို မှုန်ဝါးဝါး ပြသထားသည်ကို မြင်တွေ့ရသည်။

ထို့ပြင် တရုတ်ရေတပ်၏ လှုပ်ရှားမှုများကို ပြသရာတွင်လည်း တန် ၁၂,၀၀၀ အလေးချိန်ရှိ  Type 055 ဖျက်သင်္ဘော၏ အခန်းကဏ္ဍနှင့် လေယာဉ်တင် သင်္ဘောအုပ်စု၏ အီလက်ထရောနစ် စစ်ဆင်ရေးများကို အသားပေးဖော်ပြခဲ့သည်။

Yanan အမည်ရှိ အဆိုပါ ဖျက်သင်္ဘောတွင် ဘက်စုံသုံး ပဲ့ထိန်းဒုံးကျည်စနစ် တပ်ဆင်ထားပြီး၊ လေကြောင်း ကာကွယ်ရေးစနစ်၊ ဒုံးကျည်ကာကွယ်ရေးစနစ်၊ ရေငုပ်သင်္ဘောဖျက်စနစ်၊ အီလက်ထရောနစ် စစ်ဆင်ရေးစနစ်များ တပ်ဆင်ထားသည်။

ထိုမှတ်တမ်းဗွီဒီယိုတွင် Yanan သင်္ဘောသည် လျှပ်စစ်သံလိုက်လှိုင်း နှောင့်ယှက်သည့် အချက်ပြမှုများကို ထောက်လှမ်းပြီး ထိုသတင်းအချက်အလက်များကို J-15 တိုက်လေယာဉ်များထံ ပေးပို့ကာ စုံစမ်းထောက်လှမ်း ခိုင်းသည့် မြင်ကွင်းများကိုလည်း ပြသထားသည်။ 

ထို့နောက် J-15  တိုက်လေယာဉ်များက ရန်သူတို့၏ အီလက်ထရောနစ် စစ်ဆင်ရေး လေယာဉ်နှစ်စင်းကို ထောက်လှမ်းတွေ့ရှိပြီး အောင်မြင်စွာ မောင်းထုတ်နိုင်ခဲ့ပုံကိုလည်း ပြသခဲ့သည်။

အဆိုပါ စစ်ရေးလေ့ကျင့်မှုများကို မည်သည့်အချိန်က ပြုလုပ်ခဲ့သည်ကို ဖော်ပြခဲ့ခြင်း မရှိသော်လည်း ဇူလိုင်လ အတွင်းက Yanan သင်္ဘောသည် Shandong လေယာဉ်တင် သင်္ဘောအုပ်စုနှင့်အတူ အနောက်ပစိဖိတ် သမုဒ္ဒရာ ထဲတွင် ပြုလုပ်သည့် စစ်ရေးလေ့ကျင့်မှုများအတွင်း ပါဝင်ခဲ့သည်။

ဂျပန်စစ်တပ်ကမူ ဇူလိုင်လက ပြုလုပ်ခဲ့သည့် တရုတ်၏ စစ်ရေးလေ့ကျင့်မှုအတွင်း  Yanan သင်္ဘောကို ဓာတ်ပုံ ရိုက်ယူနိုင်ခဲ့ပြီး Shandong သင်္ဘောပေါ်သို့ တိုက်လေယာဉ်များနှင့် ရဟတ်ယာဉ်များ အတက်၊အဆင်း ပြုလုပ်နေ ပုံများကိုလည်း ဓာတ်ပုံရိုက်ယူခဲ့သည်။

ထိုင်ဝမ်နဲ့တရုတ်အလံကို စစ်သားတစ်ဦးကြည့်နေစဉ်

ထိုအချိန်နှင့် တစ်ချိန်တည်းမှာပင် အမေရိကန်ကလည်း ဟာဝိုင်အီ (Hawaii) ကျွန်းအနီးတွင် RIMPAC အမည်ရှိ ကမ္ဘာ့အကြီးဆုံး ပင်လယ်ရေကြောင်း စစ်ရေးလေ့ကျင့်မှုကို ဦးဆောင်ပြုလုပ်ခဲ့သည်။

ထိုင်ဝမ်အရှေ့ဘက် ရေပြင်များသည် PLA ၏ သေနင်္ဂဗျူဟာများထဲတွင် အဓိကကျသည့် အခန်းကဏ္ဍမှ ပါဝင်နေ ပြီး တိုက်ခိုက်မှု ဖြစ်ပွားလာပါက ထိုရေပြင်များ၌ အမေရိကန်နှင့် ၎င်း၏ မဟာမိတ်များ ကြားဝင်စွက်ဖက် လာနိုင် ခြေရှိသည်။

တရုတ်၏ မှတ်တမ်းဗွီဒီယိုထဲတွင် မြေပြင်တပ်ဖွဲ့တစ်ဖွဲ့ PLA ၏ ခေတ်အမီဆုံး PCL-191 တာဝေးပစ် အတွဲလိုက် ဒုံးပစ်လောင်ချာစနစ်တစ်ခုကို ပစ်ခတ်နေပုံအား ပြသခဲ့သည်။ ထိုဒုံးပစ်လောင်ချာသည် ၃၇၀ မမ ဒုံးကျည်များကို ၃၅၀ ကီလိုမီတာ (၂၁၇ မိုင်) အထိပစ်ခတ်နိုင်ပြီး၊ ၇၅၀ မမ ပဲ့ထိန်းဒုံးကျည်များကို ၅၀၀ ကီလိုမီတာ (၃၁၁ မိုင်) အထိ ပစ်ခတ်နိုင်သည်။                                          

ထိုင်ဝမ်ရေလက်ကြားသည် အကျဉ်းမြောင်းဆုံးနေရာမှာ ၂၈၀ ကီလိုမီတာ (၁၇၄ မိုင်) သာရှိပြီး ထိုဒုံးကျည်စနစ် များအရ တရုတ်ပြည်မကြီး၏ ဖူကျန်း (Fujian) ပြည်နယ်တွင် တပ်စွဲပြီး ထိုင်ဝမ်၏ အနောက်ဘက် ကမ်းရိုးတန်း ကို တိုက်ခိုက်နိုင်စွမ်းရှိသည်။

ထိုင်ဝမ်စစ်တပ်သည် ယခုနှစ်အတွင်း  ရွှေ့ပြောင်းရလွယ်ကူသည့် M142  လက်နက်ကြီး ဒုံးပစ်စနစ် ၁၁ ခုနှင့် ခဲယမ်းများထဲမှ ပထမအသုတ်ကို လက်ခံရရှိမည်ဖြစ်သည်။ 

အမေရိကန်လုပ် အဆိုပါ အတွဲလိုက် ဒုံးပစ်စနစ်သည် ကီလိုမီတာ ၃၀၀ အထိ ပစ်ခတ်ရောက်ရှိနိုင်ကာ ယူကရိန်း စစ်ပွဲတွင် အဓိကကျသည့် အခန်းကဏ္ဍမှ ပါဝင်နေသည်။

တရုတ်စစ်တပ်၏ စစ်ရေးလေ့ကျင့်မှုတွင် ညအချိန် လေ့ကျင့်မှုများလည်း ပါဝင်နေပြီး ရန်သူတပ်ဖွဲ့များက ဒုံးကျည်များ၊ ရော့ကတ်များဖြင့် တရုတ်ဗုံးကြဲလေယာဉ်များနှင့် စစ်သင်္ဘောများကို တိုက်ခိုက်နေသည့် အသွင်သ ဏ္ဍန်ဖြင့် စစ်ရေးလေ့ကျင့်ခဲ့သည်။

"ကျနော်တို့က ရန်သူကို သေနတ်ပြောင်းချိန်ထားချိန်မှာ သူတို့ကလည်း ကျနော်တို့ကို သေနတ်ပြောင်းနဲ့ ချိန်ထားမှာပါ။ နိုင်ပွဲကတော့ စက္ကန့်ပိုင်းမှာ ရပါလိမ့်မယ်။ ကျနော်တို့ အနေနဲ့ သူတို့ကို ပြန်တိုက်ခွင့်ပေးမှာ မဟုတ်ပါဘူး" ဟု တရုတ်၏ Quenching အမည်ရှိ အခန်းဆက် မှတ်တမ်းဗွီဒီယိုတွင် နောက်ခံစကားပြောဖြင့် ဖော်ပြခဲ့သည်။

Source: SCMP

CNI International News

ဝါရှင်တန်၊ စက်တင်ဘာ ၂၁

နိုဝင်ဘာ ၅ ရက်တွင် ပြုလုပ်သည့် သမ္မတရွေးကောက်ပွဲ၌ ဒုတိယသမ္မတ ကာမယ်လာဟားရစ် ( Kamala Harris) ကို ရှုံးနိမ့်ခဲ့မည်ဆိုပါက ဂျူး-အမေရိကန်နွယ်ဖွား မဲဆန္ဒရှင်များကိုလည်း တစ်နည်းနည်းဖြင့် အပြစ်တင်ရလိမ့်မည် ဖြစ်ကြောင်း ဒေါ်နယ်ထရမ့် (Donald Trump) က ပြောကြားခဲ့သည်ဟု ရိုက်တာမှ ဖော်ပြခဲ့သည်။

သမ္မတဟောင်း ထရမ့်သည် အမေရိကန်ဂျူးများအကြား ဟားရစ်လောက် လူကြိုက်မများကြောင်း အစ္စရေး-အမေရိကန် အမျိုးသားကောင်စီ ညီလာခံတွင် ပြောကြားခဲ့သည့် ၎င်း၏ မှတ်ချက်စကားများက သက်သေပြနေ သည်။

ရွေးကောက်ပွဲတွင် ဟားရစ်သာ အနိုင်ရခဲ့ပါက ၂ နှစ်အတွင်း အစ္စရေးနိုင်ငံလည်း ပျောက်ကွယ်သွားဖွယ်ရှိပြီး ဟားရစ်ကို မဲပေးခဲ့သဖြင့် ဖြစ်ပွားလာမည့် အကျိုးဆက်များအတွက် ဂျူးများကို တစ်စိတ်တစ်ဒေသ အပြစ်တင် ရလိမ့်မည်ဟု ထရမ့်က ပြောကြားခဲ့သည်။

"ဒီရွေးကောက်ပွဲမှာသာ ကျနော် မနိုင်ဘူးဆိုရင်၊ ပြီးတော့ ဂျူးလူမျိုးတွေရဲ့ ၄၀ ရာခိုင်နှုန်း၊ ၆၀ ရာခိုင်နှုန်းလောက် က ရန်သူကို မဲပေးခဲ့မယ်ဆိုရင် ကျနော့်အထင်တော့ အစ္စရေးနိုင်ငံဟာ ၂ နှစ်အတွင်း ပျောက်ကွယ်သွားပါလိမ့် မယ်" ဟု ထရမ့်က ညီလာခံတွင် ပြောကြားခဲ့သည်။

ဒေါ်နယ်ထရမ့်ကို တွေ့ရစဉ်

ဟားရစ်သည် အမေရိကန်ဂျူးများ၏ မဲ ၆၀ ရာခိုင်နှုန်းကို ရရှိလိမ့်မည်ဟု စစ်တမ်းကောက်ယူမှု တစ်ခု၏ ရလဒ်ကို ထရမ့်က ကိုးကားပြီး အထက်ပါအတိုင်း ပြောကြားခဲ့ခြင်းဖြစ်သည်။

ထရမ့်သည် ၂၀၁၆ ခုနှစ် ရွေးကောက်ပွဲက အမေရိကန်ဂျူးများ၏ မဲ ၃၀ ရာခိုင်နှုန်းအောက်သာ ရရှိခဲ့သော်လည်း ထိုရွေးကောက်ပွဲတွင် အနိုင်ရရှိခဲ့သည်။ 

၂၀၂၀ ရွေးကောက်ပွဲတွင်လည်း ထရမ့်သည် အမေရိကန်ဂျူးများ၏ မဲ ၃၀ ရာခိုင်နှုန်းအောက်သာ ရရှိခဲ့ပြီး လက်ရှိသမ္မတ ဂျိုးဘိုင်ဒန် ( Joe Biden) ကို ရှုံးနိမ့်ခဲ့သည်။

ထရမ့်သည် မည်သည့် လူထုသဘောဆန္ဒ စစ်တမ်းကို ကိုးကားပြောဆိုခဲ့သည် ဆိုခြင်းကို ရှင်းလင်းစွာ မသိရသော်လည်း မကြာသေးမီက Pew Research Survey ၏ စစ်တမ်းတစ်ခုတွင် အမေရိကန်ဂျူးများအကြား ဟားရစ်သည် ထောက်ခံမှုနှုန်း ၆၅ ရာခိုင်နှုန်းရှိခဲ့ကာ ထရမ့်သည် ၃၄ ရာခိုင်နှုန်းသာရှိခဲ့သည်။

အမေရိကန်ဂျူးများသည် ဖက်ဒရယ်ရွေးကောက်ပွဲများတွင် ဒီမိုကရက်များကိုသာ ဆယ်စုနှစ်များစွာကြာ မဲပေး လာခဲ့သော်လည်း ဂျူးလူမျိုး မဲဆန္ဒရှင်များအကြား သေးငယ်သည့် အပြောင်းအလဲ တစ်ခုကပင် နိုဝင်ဘာ ၅ ရက် သမ္မတရွေးကောက်ပွဲတွင် အနိုင်ရရှိမည့်သူကို အဆုံးအဖြတ်ပေးနိုင်သည်။

ဥပမာအားဖြင့် အကြိတ်အနယ် ယှဉ်ပြိုင်ရသည့် ပင်ဆယ်ဗေးနီးယားပြည်နယ် ( Pennsylvania) တွင် ဂျူးလူမျိုး ၄၀၀,၀၀၀ ကျော်ရှိပြီး ထိုပြည်နယ်တွင် ဘိုင်ဒန်သည် မဲ ၈၁,၀၀၀ ဖြင့် အနိုင်ရရှိခဲ့သည်။

Source: ရိုက်တာ