CNI International News
တိုကျို၊ နိုဝင်ဘာ ၂၆
ထိုင်ဝမ်နှင့်ပတ်သက်ပြီး အရေးပေါ် အခြေအနေ ဖြစ်လာသည့် အချိန်တွင် အမေရိကန်သည် ဂျပန်နှင့် ဖိလစ်ပိုင်၌ စစ်တပ်ဖြန့်ကြက် ချထားရန်အတွက် အရေးပေါ် အစီအစဉ်များ ရေးဆွဲနေသည်ဟု CNA မှ ဖော်ပြခဲ့သည်။
ဂျပန်၏ ကျိုဒိုသတင်းအေဂျင်စီကမူ အမေရိကန်၊ ဂျပန်နှင့် ဖိလစ်ပိုင်တို့သည် ဒီဇင်ဘာလတွင် ပထမဆုံး ပူးတွဲ စစ်ဆင်ရေး အစီအစဉ်တစ်ခုကို ရေးဆွဲနေကြောင်း နိုဝင်ဘာ ၂၄ ရက်က ဖော်ပြခဲ့သည်။
HIMARS အတွဲလိုက်ဒုံးပစ်စနစ်ကို ပိုင်ဆိုင်ထားသည့် အမေရိကန် မရိန်းတပ်ရင်းတစ်ရင်းကို ဂျပန်၏ ကျူးရှူး (Kyushu) ကျွန်းမှ ထိုင်ဝမ်အနီး ယိုနာဂူနီ (Yonaguni) ကျွန်းအထိ ရှည်လျားသည့် နန်ဆိုင်းကျွန်းစု တစ်လျှောက် ဖြန့်ကြက်ချထားလိမ့်မည်ဟု ကျိုဒိုမှ ဖော်ပြခဲ့သည်။
ထိုင်ဝမ်သည် အရေးပေါ်ကိစ္စနှင့် ကြုံတွေ့ရမည့် အခြေအနေတွင် စောစီးသည့် အဆင့်မျိုး၌ အမေရိကန်စစ်တပ်၏ လမ်းညွှန်ချက်များအရ ထိုကျွန်းများပေါ်၌ ယာယီစစ်စခန်းများ တည်ဆောက်မည်ဖြစ်ပြီး မရိန်းစစ်သားများ ဖြန့်ကြက်ချထားလိမ့်မည်ဟု ကျိုဒိုမှ ဖော်ပြခဲ့သည်။
ထိုမရိန်းတပ်ဖွဲ့များအတွက် လောင်စာများနှင့် ခဲယမ်းများ အပါအဝင် ထောက်ပို့ကဏ္ဍအတွက် ဂျပန်စစ်တပ်က ပါဝင် လုပ်ဆောင်လိမ့်မည်ဟု ကျိုဒိုမှ ဖော်ပြခဲ့သည်။
အမေရိကန်ကြည်းတပ်က ဖိလစ်ပိုင်တွင် ဘက်စုံသုံး အထူးတပ်ဖွဲ့များ ဖြန့်ကြက်ချထားမည်ဖြစ်ပြီး တာဝေးပစ် တပ်ဖွဲ့များလည်း ဖြန့်ကြက်လိမ့်မည်ဟု ထိုသတင်း၌ ဖော်ပြထားသည်။
ထိုသတင်းနှင့်ပတ်သက်ပြီး ဂျပန်နှင့်ဖိလစ်ပိုင် ကာကွယ်ရေးဝန်ကြီးများ အပြင် မနီလာ(Manila) မြို့တော်ရှိ အမေရိကန်သံရုံးတို့က မှတ်ချက်ပေးခဲ့ခြင်းမရှိပေ။
ထိုအကြောင်းအရာအပေါ် တရုတ်နိုင်ငံခြားရေးဝန်ကြီးဌာနကို ကျိုဒိုသတင်းအေဂျင်စီက မေးမြန်းရာတွင် တရုတ် နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မော်နင်း (Mao Ning) က ထိုင်ဝမ်သည် တရုတ်၏ ခွဲခြားမရသည့် အစိတ်အပိုင်း တစ်ခုဖြစ်ကြောင်း ပြောကြားခဲ့သည်။
"ဒေသတွင်း ငြိမ်းချမ်းရေးနဲ့ တည်ငြိမ်ရေးကို ထိခိုက်စေတာ၊ တင်းမာမှုနဲ့ ထိပ်တိုက်တွေ့မှုဖြစ်အောင် ရန်စတာ၊ ဒေသတွင်း စစ်အင်အား ဖြန့်ကြက်ချထားဖို့အတွက် ထိုင်ဝမ်အရေးကို အသုံးချတဲ့ သက်ဆိုင်ရာနိုင်ငံတွေကို တရုတ်က ပြင်းပြင်းထန်ထန် ကန့်ကွက်ပါတယ်" ဟု မော်က ပြောကြားခဲ့သည်။
Source: CAN
