CNI International News

ဝါရှင်တန်၊ နိုဝင်ဘာ ၇

အမေရိကန်သမ္မတ ရွေးကောက်ပွဲ ကျင်းပရန် တစ်နှစ်အလိုတွင် လက်ရှိ ဒီမိုကရက်တစ်သမ္မတ ဂျိုးဘိုင်ဒန် (Joe Biden) သည် ရီပတ်ဘလစ်ကန်ပါတီ၏ ရေပန်းစားနေသည့် သမ္မတဟောင်း ဒေါ်နယ်ထရမ့် (Donald Trump) နှင့် နှိုင်းယှဉ်ပါက အဓိက ယှဉ်ပြိုင်ရမည့် ပြည်နယ် ၆ ခုအနက် ၅ ခုတွင် နောက်ကောက်ကျကျန် နေခဲ့သည်ဟု ရိုက်တာမှ ဖော်ပြခဲ့သည်။

အမေရိကန် ပြည်သူများက ဘိုင်ဒန်၏ အသက်အရွယ်ကြောင့် ၎င်း၏ လုပ်ရည်ကိုင်ရည်အပေါ် သံသယရှိနေကြပြီး အမေရိကန်၏ စီးပွားရေးအပေါ်  ဘိုင်ဒန်၏ စီမံကိုင်တွယ်မှုကို အားမလိုအားမရ ဖြစ်နေကြသည်ဟု နိုဝင်ဘာ ၅ ရက်က ထုတ်ပြန်သည့် လူထုသဘောထား စစ်တမ်းကောက်ယူမှုများတွင် ဖော်ပြခဲ့သည်။

New York Times သတင်းစာနှင့် နိုဝင်ဘာ ၆ ရက်က ထုတ်ပြန်သည့် Siena College Polls စစ်တမ်းများတွင် ဖော်ပြထားချက်များအရ ထရမ့်သည် ပြစ်မှုဆိုင်ရာ စွဲချက်များနှင့် ရင်ဆိုင်နေရသည့်တိုင် မဲယိမ်းပြည်နယ် (swing states) အချို့၌ ဘိုင်ဒန်ထက် ၆ ရာခိုင်နှုန်း အသာစီးရနေကြောင်း သိရသည်။

ဘိုင်ဒန်နဲ့ ထရမ့်ကိုတွေ့ရစဉ်

၂၀၂၄ ခုနှစ်တွင် သမ္မတရွေးကောက်ပွဲတွင် ရီပတ်ဘလစ်ကန်ပါတီ ကိုယ်စားပြု ဝင်ရောက်ယှဉ်ပြိုင်မည့် ထရမ့် သည် အရီဇိုးနား (Arizona) ၊ ဂျော်ဂျီယာ (Georgia) ၊ မီချီဂန် (Michigan) ၊ နီဗားဒါး (Nevada) နှင့် ပင်ဆယ်ဗေး နီးယား (Pennsylvania) ပြည်နယ်များတွင် ဦးဆောင်လျက်ရှိသည်။

ဘိုင်ဒန်ကမူ ဝစ္စကွန်ဆင် (Wisconsin) ပြည်နယ်တွင်သာ အသာစီးရနေသည်ဟု နိုဝင်ဘာ ၆ ရက်က ထုတ်ပြန် သည့် စစ်တမ်းများတွင် ဖော်ပြခဲ့သည်။

ဘိုင်ဒန်သည် ၂၀၂၀ ပြည့်နှစ်က ထိုပြည်နယ် ၆ ခုစလုံးတွင် ထရမ့်ကို လူထုသဘောထား စစ်တမ်း၌ အနိုင်ရခဲ့သော် လည်း လက်ရှိမှာတော့ ထရမ့်သည် ထိုပြည်နယ်များတွင် ပျမ်းမျှ ၄၈ ရာခိုင်နှုန်း ထောက်ခံမှုရရှိနေပြီး ဘိုင်ဒန်သည် ၄၄ ရာခိုင်နှုန်းသာ ထောက်ခံမှု ရရှိထားသည်ဟု စစ်တမ်းတွင် ဖော်ပြခဲ့သည်။

ဘိုင်ဒန်နဲ့ ထရမ့်ကိုတွေ့ရစဉ်

၂၀၂၀ ရွေးကောက်ပွဲတုန်းက ဘိုင်ဒန်သည် အရီဇိုးနား၊ ဂျော်ဂျီယာ၊ မီချီဂန်၊ ပင်ဆယ်ဗေးနီးယားနှင့် ဝစ္စကွန်ဆင် ပြည်နယ်များတွင် ထရမ့်ကို အနိုင်ရခဲ့သဖြင့် ၂၀၂၄ ခုနှစ် ရွေးကောက်ပွဲတွင်လည်း ထိုအနိုင်ရလဒ်များကို ထိန်းသိမ်းထားရန် ကြိုးပမ်းရမည်ဟု ကျွမ်းကျင်သူများက ပြောကြားခဲ့သည်။

ထို့ကြောင့် ဘိုင်ဒန် ဦးဆောင်သည့် ဒီမိုကရက် အစိုးရအနေနှင့် စီးပွားရေးနှင့် အလုပ်အကိုင် အခွင့်အလမ်းများ ပိုမို တိုးတက်အောင် လုပ်ဆောင်ပြီး လူငယ်မဲဆန္ဒရှင်များ၏ ထောက်ခံမှုများကို ရယူရန် လိုအပ်သည်ဟုလည်း ကျွမ်းကျင်သူများက ပြောကြားခဲ့သည်။

Source: ရိုက်တာ

CNI International News

တဲလ်အဗစ် ၊ နိုဝင်ဘာ ၇

ဂါဇာကမ်းမြောင်ဒေသကို နျူကလီးယားဖြင့် တိုက်ခိုက်မည်ဆိုသည့် မှတ်ချက်စကား ပြောကြားခဲ့သည့် အစ္စရေး ဝန်ကြီးတစ်ဦးကို ဝန်ကြီးချုပ် ဘင်ဂျမင် နေတန်ယာဟု (Benjamin Netanyahu)က ရာထူးမှ ဆိုင်းငံ့ခဲ့သည်ဟု ရိုက်တာမှ ဖော်ပြခဲ့သည်။

အစ္စရေး အစိုးရအဖွဲ့ထဲမှ ရှေးဟောင်း အမွေအနှစ် ဝန်ကြီးဌာနမှ ဝန်ကြီးဖြစ်သူ အမီဟေး အီလီယာဟု (Amihai Eliyahu) သည် ရေဒီယိုသတင်းဌာန တစ်ခုနှင့် အင်တာဗျူး ပြုလုပ်ခဲ့ချိန်အတွင်း အစ္စရေးက ဂါဇာကို  နျူကလီး ယားဖြင့် တိုက်ခိုက်မည်ဟု မှတ်ချက်ပြု ပြောကြားခဲ့ခြင်းဖြစ်သည်။

ထိုမှတ်ချက်စကား ထွက်ပေါ်ခဲ့ပြီးနောက် နေတန်ယာဟု၏ ရုံးက အလီယာဟုကို အစိုးရအဖွဲ့အတွင်းမှ ဆိုင်းငံ့ ကြောင်းနှင့် နောက်ထပ် ကြေညာချက် မထုတ်ပြန်မီ အချိန်အထိ ရာထူးဆိုင်းငံ့မှုသည် တည်မြဲနေလိမ့်မည် ဖြစ်ကြောင်း ထုတ်ပြန်ခဲ့သည်။

အစ္စရေးဝန်ကြီး အမီဟေး အီလီယာဟုကို တွေ့ရစဉ်

ဂါဇာကို နျူကလီးယားဖြင့် တိုက်ခိုက်မည်ဆိုသည့် အလီယာဟု၏ မှတ်ချက်စကားကို အာရပ်ကမ္ဘာကလည်း ပြင်းထန်စွာ ရှုတ်ချခဲ့သည်။ 

နေတန်ယာဟုနှင့် ၎င်း၏ အာဏာရပါတီ ခေါင်းဆောင်များသည် ဂါဇာစစ်ပွဲနှင့်ပတ်သက်ပြီး ဝန်ကြီးဌာနအဆင့် ဆွေးနွေးမှုများကို ရေဒီယိုနှင့် သတင်းဌာနများတွင် လက်လွတ်စပယ် ပြောကြားခဲ့ခြင်း မရှိပေ။

ထို့ပြင် အစ္စရေးခေါင်းဆာင်များသည် အစ္စရေး၏ နျူကလီးယား လက်နက်အင်အားနှင့် ပတ်သက်ပြီးလည်း ထဲထဲဝင်ဝင် သိရှိနေသည့် သဘောထားများကို လူသိရှင်ကြား ပြောကြားခဲ့ခြင်း မရှိပေ။

အာရပ်နိုင်ငံများအဖွဲ့ချုပ်ကို တွေ့ရစဉ်

အာရပ်နိုင်ငံများအဖွဲ့ချုပ် (League of Arab States) ကမူ အစ္စရေးဝန်ကြီး အလီယာဟု၏ လူမျိုးရေးခွဲခြားသည့် မှတ်ချက်စကားများသည် နျူကလီးယား လက်နက်များကို ပိုင်ဆိုင်ထားကြောင်း ဝန်ခံရုံသာမက ပါလက်စတိုင်း များအပေါ် ရွံရှာသည့် လူမျိုးရေးခွဲခြားမှု သဘောထားရှိသော အစ္စရေး၏ လက်ရှိအမှန်တရားကိုလည်း အတည်ပြုရာ ရောက်သည်ဟု ကြေညာချက် ထုတ်ပြန်ခဲ့သည်။

လက်ရှိတွင် ဂါဇာဒေသ၌ အစ္စရေး၏ လေကြောင်း တိုက်ခိုက်မှုများကြောင့် ပါလက်စတိုင်း ၉၅၀၀ ခန့် သေဆုံးခဲ့ပြီး အစ္စရေး၏ တိုက်ခိုက်ရေး နည်းဗျူဟာများအပေါ် နိုင်ငံတကာ၏ စိုးရိမ်မှုများ မြင့်တက်စေခဲ့သည်။

Source: ရိုက်တာ

CNI International News

ဂူဝါဟတီ ၊ နိုဝင်ဘာ ၇

အမေရိကန် ၊ မြန်မာနှင့် အိန္ဒိယ စစ်တပ်တို့သည် ယခုနှစ်ကုန်နှင့် ဒီဇင်ဘာလထဲတွင် မက်ဂလာယာ (Meghalaya) ပြည်နယ်၊ အမ်ရိုအီ (Umroi JTN) တပ်ပိုင်မြေတွင် ပူးတွဲစစ်ရေး လေ့ကျင့်မှုများ ပြုလုပ်သွားမည်ဟု Northeast Now မှ ဖော်ပြခဲ့သည်။

လက်ရှိတွင် မလေးရှားစစ်တပ်သည် Umroi JTN တွင် အိန္ဒိယ စစ်တပ်နှင့် ပူးတွဲစစ်ရေးလေ့ကျင့်နေပြီး ထိုနေရာ၌ ပင် အိန္ဒိယသည် ပြီးခဲ့သည့် ၃ လအတွင်း အခြားနိုင်ငံ ၃ နိုင်ငံနှင့် ပူးတွဲစစ်ရေး လေ့ကျင့်မှုများကို ဆက်တိုက် လုပ်ဆောင်ခဲ့သည်။

အိန္ဒိယ စစ်တပ်သည်  ပြည်ပနိုင်ငံများမှ စစ်တပ်များနှင့် ပူးတွဲစစ်ရေး လေ့ကျင့်မှုများအတွက် ၂၀၁၆ ခုနှစ် ကတည်းက အမ်ရိုအီတွင် လေ့ကျင့်ရေးကွင်း နေရာအဖြစ် ရည်မှန်းလုပ်ဆောင်ခဲ့ခြင်း ဖြစ်သည်။

 အမ်ရိုအီဒေသရှိ လေဆိပ်ကိုတွေ့ရစဉ်

အမ်ရိုအီတပ်ပိုင်မြေသည် အူမီယမ် (Umiam) မြစ်တစ်လျှောက် ရှီလောင်း (Shillong) မြို့တော်၏ မြောက်ဘက် တောင်ခြေနေရာတွင် တည်ရှိသည်။

ထိုနေရာသည် ရာသီဥတုကောင်းမွန်ခြင်းနှင့် ပြေပြစ်သည့် မြေနေရာ အနေအထားတို့ကြောင့် စစ်ရေးလေ့ကျင့်ရန် သင့်တော်သော နေရာတစ်ခုအဖြစ် အိန္ဒိယ စစ်တပ်က ရွေးချယ်ခဲ့ခြင်းဖြစ်သည်။

အဆိုပါ နေရာကို ကမ္ဘာ့ထိပ်သီး စစ်တပ်များ၏ လေ့ကျင့်ရေး စင်တာများနှင့်အတူ တွဲဖက် တည်ထောင်ခဲ့ခြင်း ဖြစ်သည်။

အိန္ဒိယနဲ့ မလေးရှား စစ်တပ် စစ်ရေးပူးတွဲလေ့ကျင့်စဉ်

Umroi JTN သည် အိန္ဒိယစစ်တပ်၏ အရှေ့ပိုင်း စစ်ဌာနချုပ်အတွက် ပြည်ပနိုင်ငံများမှ စစ်တပ်များနှင့် ပူးတွဲ စစ်ရေး လေ့ကျင့်မှုများ ပြုလုပ်မှုရန် ရွေးချယ်ထားခဲ့သည့် နေရာတစ်ခုဖြစ်သည်။ 

ပြီးခဲ့သည့် ၇ နှစ်အတွင်း ထိုနေရာသည် နိုင်ငံတကာစစ်တပ်များ၏ ပူးတွဲစစ်ရေး လေ့ကျင့်မှုပြုလုပ်သည့် နေရာ တစ်ခုအဖြစ် ဖွံ့ဖြိုးလာခဲ့ပြီး စစ်ဘက်ဆိုင်ရာအဆင့် ထိတွေ့ဆက်ဆံမှုများ ပြုလုပ်သော နေရာတစ်ခု ဖြစ်လာခဲ့ သည်။

ထို့ပြင် ထိုနေရာသည် အိန္ဒိယနှင့် ရင်းနှီးမှုရှိသည့် ပြည်ပနိုင်ငံများနှင့် မိတ်ဖက်ဆက်ဆံရေး၊ စည်းလုံးညီညွတ်ရေး ကို ထူထောင်ရန် ရှေးရှုသော ကတိကဝတ်များကို အထောက်အကူ ဖြစ်စေခဲသည်။

Source: Northeast Now

CNI International News

ပေကျင်း၊ နိုဝင်ဘာ ၆

တရုတ်အစိုးရသည် အနောက်နိုင်ငံများနှင့် တင်းမာမှု မြင့်တက်နေသည့်အချိန်တွင် အမျိုးသားလုံခြုံရေးကို အဓိက ထားပြီး လုပ်ဆောင်နေသကဲ့သို့ တရုတ်၏ အကျင့်ပျက်ခြစားမှု တိုက်ဖျက်ရေးအဖွဲ့က နိုင်ငံခြားရေးအရာရှိများနှင့် ကွန်မြူနစ်ပါတီ ကေဒါများကို အကျင့်ပျက်ခြစားမှုနှင့် သူလျှိုလုပ်မှုဆိုင်ရာ သတိပေးချက်များကို ထုတ်ပြန်ခဲ့သည်ဟု ဘန်ကောက်ပို့စ်မှ ဖော်ပြခဲ့သည်။ 

"သံတမန်ရေးနဲ့ နိုင်ငံခြားရေးဆိုင်ရာ ကေဒါတွေဟာ ပြည်ပဆက်ဆံရေး ကိစ္စတွေမှာ အဓိက အင်အားစုတွေ ဖြစ် တယ်။ အထူးသဖြင့် ရန်လိုတဲ့ အနောက်အင်အားစုတွေနဲ့ ရင်ဆိုင်တဲ့နေရာမှာ သူတို့ဟာ ပြည်ပရေးရာ ဆက်ဆံမှု တွေအတွက် ရှေ့တန်းနေရာက ရှိနေပါတယ်" ဟု တရုတ်၏ စည်းကမ်းပိုင်းဆိုင်ရာ စစ်ဆေးရေး ဗဟိုကော်မရှင် (CCID) မှ ထိပ်သီးအရာရှိတစ်ဦးဖြစ်သူ ကျန်းကျီဝမ် (Zhang Jiwen) က နိုဝင်ဘာ ၁ ရက်တွင် ထုတ်ပြန်ခဲ့သည့် CCID မဂ္ဂဇင်းတွင် ဆောင်းပါးရေးသား ဖော်ပြခဲ့သည်။ 

"သူတို့ (သံတမန်ရေးနှင့် နိုင်ငံခြားရေးဆိုင်ရာ ကေဒါများ) တွေဟာ အကျင့်ပျက်ခြစားမှုတွေကတစ်ဆင့် ဘက်ပြောင်းခိုလှုံနိုင်ခြေ အများဆုံး အဆင့်မှာ ရှိနေပါတယ်" ဟု ကျန်းက ပြောကြားခဲ့သည်။ 

တရုတ် သမ္မတ ရှီကျင့်ဖျင်ကို တွေ့ရစဉ်

ကျန်းသည် တရုတ်ကွန်မြူနစ်ပါတီ၏ နိုင်ငံခြားရေးကို ကြီးကြပ်ရသည့် ဗဟိုနိုင်ငံခြားရေးကော်မရှင်ရုံးမှ CCID ၏ အကြီးအကဲတစ်ဦး ဖြစ်သည်။

သူရေးသားခဲ့သည့် ဆောင်းပါးထဲတွင် လျှို့ဝှက်အဆင့် သတင်းအချက်အလက်များ ပေါက်ကြားမှု အပါအဝင် များပြားလှသည့် ဌာနများအကြား လုံခြုံရေးကျိုးပေါက်နိုင်သည့် အန္တရာယ်ကို စုံစမ်းစစ်ဆေးနေကြောင်း ရေးသား ဖော်ပြခဲ့သည်။ 

"ပြည်သူ့ဘဏ္ဍာကိုသုံးပြီး ခရီးသွားတဲ့ တာဝန်ရှိသူတွေရဲ့ ခရီးစဉ်တွေအတွင်း ပုဂ္ဂလိက စီးပွားရေး လုပ်ငန်းရှင် တွေဆီက တံစိုးလက်ဆောင်တွေကို တရားမဝင် လက်ခံရယူတဲ့ ကိစ္စမျိုးတွေ အပါအဝင် ပြဿနာတွေ အများကြီး ရှိနေပါသေးတယ်" ဟု ကျန်းက ပြောကြားခဲ့သည်။ 

 ရာထူးက ဖြုတ်ခံလိုက်ရသော နိုင်ငံခြားရေးဝန်ကြီး ချင်ကန်းကို တွေ့ရစဉ်

တရုတ်နိုင်ငံတွင် ၂၀၁၂ ခုနှစ်က သမ္မတ ရှီကျင့်ဖျင် (Xi Jinping) အာဏာရလာခဲ့ချိန်ကတည်းက သောင်းနှင့်ချီ သည့် တရုတ်အရာရှိများသည် အရေးယူခံခဲ့ရသည်။ 

မကြာသေးမီ လများအတွင်းကလည်း နိုင်ငံခြားရေးဝန်ကြီး ချင်ကန်း (Qin Gang) နှင့် ကာကွယ်ရေးဝန်ကြီး လီရှန်ဖူ (Li Shangfu) တို့ကဲ့သို့ ထိပ်သီးအရာရှိများ ရာထူးမှ ဖယ်ရှားခံခဲ့ရသည်။

Source: ဘန်ကောက်ပို့စ် 

CNI International News

ရာမလာ၊ နိုဝင်ဘာ ၆

အစ္စရေး-ဟားမာ့စ် စစ်ပွဲဖြစ်ပွားနေချိန်တွင် အမေရိကန်နိုင်ငံခြားရေးဝန်ကြီး အန်တိုနီ ဘလင်ကင် (Antony Blinken)သည် ပါလက်စတိုင်းသမ္မတ မာမွတ် အာဘက်စ် (Mahmoud Abbas) နှင့် တွေ့ဆုံပြီး ဆွေးနွေးခဲ့ သည်ဟု အေပီမှ ဖော်ပြခဲ့သည်။ 

ဘလင်ကင်သည် အစ္စရေး-ဟားမာ့စ် စစ်ပွဲနှင့်ပတ်သက်ပြီး အရှေ့အလယ်ပိုင်း ခရီးစဉ်၏ နောက်ဆုံး ခရီး တစ်ထောက် ရပ်နားမှုအဖြစ် အနောက်ဘက်ကမ်းဒေသ (West Bank) သို့ ရောက်ရှိခဲ့ချိန်တွင် အာဘက်စ်နှင့် တွေ့ဆုံခဲ့ခြင်း ဖြစ်သည်။

ကြိုတင် ကြေညာထားခြင်း မရှိသည့် အနောက်ဘက်ကမ်း ခရီးစဉ်အတွင်း ဘလင်ကင်သည် ကျည်ကာ မော်တော်ယာဉ်တန်းဖြင့် အနောက်ဘက်ကမ်းဒေသ၏ ရာမလာ (Ramallah) မြို့သို့ သွားရောက်ခဲ့ခြင်းဖြစ်သည်။

ဘလင်ကင်ကို ကျည်ကာကားနဲ့တွေ့ရစဉ်

ဘလင်ကင်သည် အနောက်ဘက်ကမ်းဒေသသို့ သွားရောက်လိမ့်မည်ဟု အိမ်ဖြူတော်က ကြိုတင် ကြေညာချက် ထုတ်ပြန် မထားသည့််တိုင် ရာမလာမြို့တွင် ဘလင်ကင်၏ ခရီးစဉ်ကို ဆန့်ကျင်ဆန္ဒပြမှုများ ဖြစ်ပွားခဲ့သည်။ 

ရာမလာမြို့တွင် ဘလင်ကင်သည် အာဘက်စ်နှင့် အစည်းအဝေး ပြုလုပ်ခဲ့သော်လည်း ၎င်းတို့နှစ်ဦးအကြား တွေ့ဆုံမှုကို အသေးစိတ် ထုတ်ပြန်ခဲ့ခြင်း မရှိပေ။

ပါလက်စတိုင်း အာဏာပိုင်အဖွဲ့ထံသို့ အခွန် လွှဲပြောင်းပေးပို့မှုများကို ပြန်ဖွင့်ပေးရန် အမေရိကန်က အစ္စရေးကို တွန်းအားပေးခဲ့ကြောင်း ဘလင်ကင်က အာဘက်စ်ကို ပြောကြားခဲ့သည်။

ဘလင်ကင်ကို ထွက်သွားရန် ဆန္ဒပြနေကြစဉ်

အာဘက်စ်ကမူ ပါလက်စတိုင်း အာဏာပိုင်အဖွဲ့သည် နိုင်ငံရေး ဖြေရှင်းချက် တစ်ခုအနေနှင့် ဟားမာ့စ်တို့ ထိန်းချုပ်ထားသည့် ဂါဇာကမ်းမြောင်ဒေသတွင် အာဏာရယူလိုကြောင်းနှင့် ဂါဇာတွင် အစ္စရေး၏ လေကြောင်း တိုက်ခိုက်မှုများကို ရှုတ်ချကြောင်း ဘလင်ကင်ကို ပြောကြားခဲ့သည်။ 

ထို့ပြင် အစ္စရေးနှင့် ဟားမာ့စ်အကြား ချက်ချင်း အပစ်အခတ်ရပ်စဲရန်လည်း အာဘက်စ်က တောင်းဆိုခဲ့ပြီး ဂါဇာ ကမ်းမြောင် ဒေသအတွင်းသို့ အစားအစာ၊ သောက်သုံးရေ၊ လောင်စာ၊ ဆေးဝါးနှင့် လူသားချင်း စာနာထောက်ထား မှုဆိုင်ရာ အကူအညီများ ပေးအပ်ခွင့် ပြုသင့်ကြောင်းလည်း ပြောကြားခဲ့သည်။

Source: အေပီ

CNI International News

ဘန်ကောက်၊ နိုဝင်ဘာ ၆

မြန်မာနိုင်ငံ၏ ရှမ်းပြည်နယ်မြောက်ပိုင်း၊ လောက်ကိုင်မြို့ရှိ ထိုင်းနိုင်ငံသား ၁၆၂ ဦးကို နေရပ်သို့ ပြန်လည် ခေါ် ဆောင်ရေးအတွက် မြန်မာအာဏာပိုင်များနှင့် ဆွေးနွေးမှုများ ပြုလုပ်ရန် ထိုင်းအမျိုးသားရဲတပ်ဖွဲ့၏ ဒုတိယ အကြီးအကဲ ရဲချုပ် ဆူရချာတီ ဟက်ပန်း (Surachate Hakparn)သည် နိုဝင်ဘာ ၆ ရက်တွင် မြန်မာသို့လာရောက် မည်ဟု ဘန်ကောက်ပို့စ်မှ ဖော်ပြခဲ့သည်။

ထိုင်းနိုင်ငံသား ၁၆၂ ဦးသည် ကိုးကန့်ကိုယ်ပိုင်အုပ်ချုပ်ခွင့်ရဒေသ၏ မြို့တော်ဖြစ်သည့် လောက်ကိုင်တွင် တရုတ် စီးပွားရေး လုပ်ငန်းရှင်များ ဖွင့်လှစ်ထားသော တရားမဝင် လုပ်ငန်းများတွင် အလုပ်လုပ်ကိုင်ရန် အင်တာနက်မှ တဆင့် လိမ်လည်သည့်် ဒုစရိုက်ဂိုဏ်းတစ်ဂိုဏ်း၏ သွေးဆောင်ဖြားယောင်းပြီး ခေါ်ယူခြင်းကို ခံခဲ့ရသည်။

နိုဝင်ဘာ ၄ ရက်က လောက်ကိုင်မြို့တွင် အွန်လိုင်းမှတဆင့် လိမ်ညာခေါ်ယူခံခဲ့ရသည့် ထိုင်းနိုင်ငံသား ၂၉ ဦးကို ၎င်းတို့ ပုန်းအောင်းနေသော နေရာတစ်ခုမှ ဟော်တယ်တစ်ခုသို့ မြန်မာအာဏာပိုင်များက ကူညီရွှေ့ပြောင်း ပေးခဲ့သည်။

လောက်ကိုင်မြို့ရှိ တိုက်ပွဲရှောင်စခန်းကိုတွေ့ရစဉ်

နောက်ပိုင်းတွင် ထိုထိုင်းနိုင်ငံသား ၂၉ ဦးသည် မြန်မာနိုင်ငံအတွင်းရှိ စစ်စခန်းတစ်ခုအတွင်း ခိုလှုံနေသည့် ထိုင်းနိုင်ငံသား ၁၃၃ ဦးနှင့် ပူးပေါင်းခဲ့၍ စုစုပေါင်း ထိုင်းနိုင်ငံသား ၁၆၂ ဦးအထိ ရှိလာခဲ့သည်။

ရဲချုပ် ဆူရချာတီက သူသည် ရန်ကုန်သို့ ရောက်ရှိချိန်တွင် ထိုထိုင်းနိုင်ငံသား ၁၆၂ ဦးကို ထိုင်းနိုင်ငံသို့ ပြန်လည် ခေါ်ဆောင်ရန် မြန်မာအာဏာပိုင်များနှင့် တွေ့ဆုံဆွေးနွေးသွားမည်ဟု ပြောကြားခဲ့သည်။ 

ထို့နောက် သူသည် ထိုင်နိုင်ငံသားများ ခိုလှုံနေသည့် တပ်မတော်၏ စစ်စခန်းသို့ သွားရောက်ပြီး ထိုစခန်းရှိ ထိုင်းနိုင်ငံသားများနှင့် တွေ့ဆုံရန် စီစဉ်ထားသည်။

ရှမ်းပြည်နယ်မြောက်ပိုင်းရှိ တပ်မတော် ရှေ့တန်းစခန်းတစ်ခုမှ တပ်သားများကိုတွေ့ရစဉ်

ထိုထိုင်းနိုင်ငံသားများထဲက အချို့သည် တရားမဝင် လူမှောင်ခို ကူးခံရသူများဖြစ်ပြီး အချို့သည် အင်တာနက်မှ တဆင့် သွေးဆောင်ဖြားယောင်းခံရပြီး မြန်မာနိုင်ငံသို့ လိမ်ညာခေါ်ဆောင်ခံရသူများဖြစ်သည်ဟု ဆူရချာတီက ပြောသည်။
မြန်မာနိုင်ငံတွင် တပ်မတော်နှင့် လူမျိုးစု လက်နက်ကိုင်များအကြား တိုက်ပွဲများ ပြင်းထန်စွာ ဖြစ်ပွားနေချိန်တွင် တပ်မတော် စစ်စခန်းအတွင်း ခိုလှုံနေရသည့် ထိုင်းနိုင်ငံသား ၁၆၂ ဦးကို တရုတ်နိုင်ငံ၊ ကူမင်း (Kunming) မြို့သို့ အရင်ဆုံး ပို့ဆောင်ပေးမည်ဖြစ်သည်။

ထိုမှတစ်ဆင့် ထိုင်းနိုင်ငံသို့ လေယာဉ်ဖြင့် ခေါ်ဆောင်မည်ဟု ဆူရချာတီက ပြောကြားခဲ့သည်။

Source: ဘန်ကောက်ပို့စ်

CNI International News 

မော်စကို၊ နိုဝင်ဘာ ၆

ရုရှားသည် နျူကလီးယား လက်နက်ထိပ်ဖူးများ တပ်ဆင်နိုင်သည့် နျူကလီးယားစွမ်းအင်သုံး Imperator Alexander III ရေငုပ်သင်္ဘောအသစ်ဖြင့် Bulava တိုက်ချင်းပစ် ပဲ့ထိန်းဒုံးကျည်တစ်စင်းကို စမ်းသပ် ပစ်လွှတ်ခဲ့ သည်ဟု ရုရှားကာကွယ်ရေးဝန်ကြီးဌာနက ထုတ်ပြန်ခဲ့ကြောင်း ရိုက်တာမှ ဖော်ပြခဲ့သည်။

ပဲ့ထိန်းဒုံးကျည် စမ်းသပ်ပစ်လွှတ်မှုသည် ရေငုပ်သင်္ဘောအသစ် စမ်းသပ်မှု၏ နောက်ဆုံးအဆင့်ဖြစ်ပြီး ရုရှား ရေတပ်အတွင်းသို့ ထည့်သွင်းရန် ဆုံးဖြတ်သွားမည်ဟု ရုရှားကာကွယ်ရေးဝန်ကြီးဌာနက Telegram တွင် ဖော်ပြခဲ့သည်။

ရုရှားသမ္မတ ပူတင် (Vladimir Putin)သည် လုံခြုံရေး ခြိမ်းခြောက်မှုများကို တန်ပြန်ရန် နိုင်ငံ၏ နျူကလီးယား အဟန့်အတားအား ထိန်းသိမ်းထားရေးအတွက် တွန်းအားပေး လုပ်ဆောင်ခဲ့သည်။

၂၀၂၂ ခုနှစ်က ယူကရိန်းကို ကျူးကျော်ခဲ့မှုနှင့်ပတ်သက်ပြီး ရုရှားနှင့် အနောက်နိုင်ငံများအကြား ဆက်ဆံရေးများ ကျဆင်းနေချိန်တွင် ပူတင်က နျူကလီးယား အင်အားကို မြှင့်တင်ရန် အားထုတ်ကြိုးပမ်းခဲ့ခြင်းဖြစ်သည်။

ရုရှားရေငုပ်သင်္ဘောကိုတွေ့ရစဉ်

ရုရှား၏ မြောက်ဘက်ကမ်းလွန် ပင်လယ်ဖြူ (White Sea) အတွင်းရှိ ရေငုပ်သင်္ဘောပေါ်မှ ပစ်လွှတ်ခဲ့သည့် Bulava ပဲ့ထိန်းဒုံးကျည်သည် ရုရှားအရှေ့ဖျားဒေသရှိ ကမ်ချက်ကာ (Kamchatka) ကျွန်းဆွယ်နှင့် ကီလိုမီတာ ထောင်ချီကွာဝေးသည့်် ပစ်မှတ်ကို ထိမှန်ခဲ့သည်ဟု ရုရှားကာကွယ်ရေးဝန်ကြီးဌာနက ထုတ်ပြန်ခဲ့သည်။

ထိုဒုံးကျည်ကို မည်သည့်အချိန်တွင် စမ်းသပ်ပစ်လွှတ်ခဲ့သည် ဆိုခြင်းကိုမူ ထုတ်ပြန်ချက်တွင် ဖော်ပြခြင်းမရှိခဲ့ပေ။

Borei အမျိုးအစား မဟာဗျူဟာမြောက် ဒုံးကျည်တပ် နျူကလီးယားစွမ်းအင်သုံး ရေငုပ်သင်္ဘော Imperator Alexander III သည် Bulava ဒုံးကျည် ၁၆ စင်းနှင့် ခေတ်မီ တော်ပီဒိုလက်နက်များ တပ်ဆင်ထားသည့်် ရေငုပ်သင်္ဘောဖြစ်သည်။ 

ထိုရေငုပ်သင်္ဘောကို ပြီးခဲ့သည့်နှစ် ဒီဇင်ဘာလက ဖွင့်ပွဲအခမ်းအနားဖြင့် ရေချခဲ့ပြီး ထိုအခမ်းအနားကို သမ္မတ ပူတင်လည်း တက်ရောက်ခဲ့သည်။ 

လက်ရှိ ရုရှားရေတပ်တွင် Borei အမျိုးအစား နျူကလီးယားစွမ်းအင်သုံး ရေငုပ်သင်္ဘော ၃ စင်းသည် တပ်တော်ဝင် တာဝန် ထမ်းဆောင်လျက်ရှိပြီး တစ်စင်းသည် စမ်းသပ်မှုများ ပြီးစီးခဲ့ကာ နောက်ထပ် သုံးစင်းကို တည်ဆောက်နေ ဆဲဖြစ်ကြောင်း ရုရှား ကာကွယ်ရေးဝန်ကြီးဌာနက ထုတ်ပြန်ခဲ့သည်။

Source: ရိုက်တာ

CNI International News

ဘေရွတ်၊ နိုဝင်ဘာ ၄

ဟစ်ဇ်ဘိုလာ (Hezbollah)ခေါင်းဆောင် ဆေးယက် ဟက်ဆန် နာဆရာလာ (Sayyed Hassan Nasrallah) သည် အစ္စရေး-ဟားမာ့စ် စစ်ပွဲနှင့်ပတ်သက်ပြီး ပထမဆုံးအကြိမ် မှတ်ချက်ပေး ပြောကြားလိမ့်မည်ဟု ရိုက်တာမှ ဖော်ပြခဲ့သည်။

အီရန်၏ ကျောထောက်နောက်ခံကို ရရှိထားသည့် ဟစ်ဇ်ဘိုလာအဖွဲ့သည် လက်ဘနွန်နှင့် အစ္စရေးနယ်စပ်တွင် အစ္စရေးတပ်ဖွဲ့များနှင့် ထိတွေ့တိုက်ပွဲများ ဖြစ်ပွားလျက်ရှိသည်။

နယ်စပ်တစ်လျှောက် အစ္စရေးနှင့်ဖြစ်ပွားခဲ့သည့် ထိတွေ့တိုက်ပွဲများအတွင်း ဟစ်ဇ်ဘိုလာ တပ်ဖွဲ့ဝင် ၅၅ ဦး သေဆုံးခဲ့သည်။ ထိုသေဆုံးသူ အရေအတွက်သည် ၂၀၀၆ ခုနှစ်က အစ္စရေးနှင့် ပထမအကြိမ် စစ်ပွဲဖြစ်ပွားပြီး နောက်ပိုင်း ဟစ်ဇ်ဘိုလာ အဖွဲ့ဝင်များ သေဆုံးမှုအများဆုံး ဖြစ်ခဲ့သည်။

အစ္စရေးဝန်ကြီးချုပ် ဘင်ဂျမင် နေတန်ယာဟုကို တွေ့ရစဉ်

ဟစ်ဇ်ဘိုလာခေါင်းဆောင် နာဆရာလာ၏ မိန့်ခွန်းမပြောကြားမီ နာရီပိုင်းအလိုတွင် ဟစ်ဇ်ဘိုလာအဖွဲ့သည် အစ္စရေး-ဟားမာ့စ် စစ်ပွဲဖြစ်ပွားနေသည့် သီတင်း ၃ ပတ်ကျော်အတွင်း အကြီးမားဆုံး တိုက်ခိုက်မှုအဖြစ် အစ္စရေး စစ်တပ်၏ စခန်းများကို ၁၉ ကြိမ်တိတိ မရပ်မနား တိုက်ခိုက်ခဲ့သည်။

အစ္စရေးကလည်း ဟစ်ဇ်ဘိုလာအဖွဲ့၏ တိုက်ခိုက်မှုကို တုန့်ပြန်သည့်အနေဖြင့် လေကြောင်းတိုက်ခိုက်မှုများ၊ တင့်ကားများ၊ အမြောက်များဖြင့် ပစ်ခတ်မှုများကို လုပ်ဆောင်ခဲ့သည်။

မည်သို့ပင်ဆိုစေ ထိုတိုက်ပွဲငယ်များသည် စစ်မြေပြင်နှင့် ဝေးကွာလွန်းသည့် နေရာများတွင် ဖြစ်ပွားခဲ့ခြင်း ဖြစ် သည်။ ဟစ်ဇ်ဘိုလာ အဖွဲ့သည် လက်နက်ကြီး ပစ်ကူ အနည်းငယ်ဖြင့်သာ အစ္စရေးကို ခြိမ်းခြောက်နိုင်ခဲ့သည်။

ဟစ်ဇ်ဘိုလာ အဖွဲ့ကို တွေ့ရစဉ်

အစ္စရေးစစ်တပ်ကမူ လက်ဘနွန်နှင့် မြောက်ပိုင်းနယ်စပ်တွင် စစ်မျက်နှာသစ် ဖွင့်ရန် ဆန္ဒမရှိကြောင်း ပြောကြားခဲ့ သည်။

အစ္စရေးဝန်ကြီးချုပ် ဘင်ဂျမင် နေတန်ယာဟု (Benjamin Netanyahu) ကလည်း ဟစ်ဇ်ဘိုလာအဖွဲ့ အနေနှင့် အစ္စရေးနှင့် ဒုတိယအကြိမ်မြောက် စစ်ပွဲဖြစ်ပွားရန် ပြင်ဆင်နေသည့် အခြေအနေကို သတိပေးခဲ့သည်။

ဟစ်ဇ်ဘိုလာ အဖွဲ့သည် အစ္စရေးကို စစ်ပွဲဆင်နွှဲမည်ဆိုပါက အစ္စရေးဘက်က မမျှော်မှန်းနိုင်လောက်သည့် တန်ပြန် တိုက်ခိုက်မှုများကို လုပ်ဆောင်သွားမည်ဟု ၎င်းက ပြောကြားခဲ့သည်။

Source: ရိုက်တာ

CNI International News

ကိယက်ဗ်၊ နိုဝင်ဘာ ၄

ရုရှားသည် အောက်တိုဘာ ၃ ရက် နံနက်အစောပိုင်းက အကြီးမားဆုံး ဒရုန်းတိုက်ခိုက်မှုများကို ပြုလုပ်ခဲ့သဖြင့် ယူကရိန်းနိုင်ငံ အနောက်ပိုင်းနှင့် တောင်ပိုင်းရှိ အဓိက အခြေခံအဆောက်အအုံများကို ထိမှန်ခဲ့သည်ဟု ရိုက်တာမှ ဖော်ပြခဲ့သည်။

ထိုတိုက်ခိုက်မှုများကြောင့် ယူကရိန်း၏ ဒုတိယအကြီးဆုံးမြို့ဖြစ်သည့် ခါကိဗ် (Kharkiv) မြို့ရှိ လူနေအိမ်ရာများ၊ စီးပွားရေး အဆောက်အအုံများလည်း ထိခိုက်ပျက်စီးခဲ့သည်ဟု ယူကရိန်းအရာရှိများက ပြောကြားခဲ့သည်။

သီတင်းပတ်များစွာအတွင်း အပြင်းထန်ဆုံး ဒရုန်းတိုက်ခိုက်မှုအဖြစ် ယူကရိန်း အရှေ့မြောက်ပိုင်း ခါကိဗ်၊ တောင်ပိုင်းရှိ အိုဒက်ဆာ (Odesa) နှင့် ခါဆွန် (Kherson)၊ အနောက်ပိုင်းရှိ ပိုလန်နယ်စပ်အနီး လီဗစ် (Lviv) မြို့တို့ကို ရုရှားက Shahed ဒရုန်း အစင်း ၄၀ ဖြင့် တိုက်ခိုက်ခဲ့ခြင်း ဖြစ်သည်။

ယူကရိန်းနိုင်ငံအတွင်းက အဆောက်အအုံများ တိုက်ခိုက်ခံရစဉ်

ထိုဒရုန်းများထဲမှ ဒရုန်း ၂၄ စင်းနှင့် X-59 ဒုံးကျည်တစ်စင်းကို ပစ်ချနိုင်ခဲ့သည်ဟု ယူကရိန်းလေတပ်က ပြောကြား ခဲ့သည်။

"ဆောင်းရာသီ ရောက်ကာနီးအချိန်မှာ ရုရှားတပ်ဖွဲ့တွေဟာ ကျနော်တို့ရဲ့ အခြေခံ အဆောက်အအုံတွေကို ပိုပြီး တိုက်ခိုက်လာပါလိမ့်မယ်။ ကျနော်တို့ဘက်ကလည်း ရန်သူကို တုန့်ပြန်တိုက်ခိုက်သွားမှာပါ"ဟု ယူကရိန်းသမ္မတ ဇာလန်းစကီး (Volodymyr Zelenskiy) က ပြောကြားခဲ့သည်။

ထို့ပြင် ယူကရိန်းစစ်တပ်သည် မတူကွဲပြားသည့် ဒေသ ၁၀ ခုတွင် လေကြောင်းကာကွယ်ရေးစနစ်များကို ဖြန့်ကြက်ချထားသည်ဟု ဇာလန်းစကီးက ထပ်လောင်း ပြောကြားခဲ့သည်။

ရုရှားနှင့် ဖြစ်ပွားနေသည့် စစ်ပွဲအတွင်း ဒုတိယမြောက် ဆောင်းရာသီသို့ ရောက်ရှိလာခဲ့ချိန်တွင် မိမိတို့၏ စွမ်းအင် အခြေခံ အဆောက်အအုံများကို ရုရှားက လေကြောင်းတိုက်ခိုက်မှုများ ပြုလုပ်လာနိုင်သော အခြေအနေအတွက် ကြိုတင် ပြင်ဆင်ထားသည်ဟုလည်း ယူကရိန်းအာဏာပိုင်များက ပြောကြားခဲ့သည်။

ယူကရိန်းနိုင်ငံအတွင်းက အဆောက်အအုံများ တိုက်ခိုက်ခံရစဉ်

လီဗစ်မြို့တွင် ဖြစ်ပွားခဲ့သည့် တိုက်ခိုက်မှုများအတွင်း အခြေခံ အဆောက်အအုံများသည် ယခင်ကထက် ၅ ဆ ပိုပြီး တိုက်ခိုက်ခံခဲ့ရသည်ဟု လီဗစ်မြို့ အုပ်ချုပ်ရေးမှူး မက်ဆင်မ် ကိုဇက်စကီး (Maksym Kozytskiy) က ပြောကြားခဲ့သော်လည်း ထိခိုက်ပျက်စီးမှု အသေးစိတ် အချက်အလက်ကို ထုတ်ပြန်ခဲ့ခြင်း မရှိပေ။

ရုရှား၏ နောက်ဆုံးအကြိမ် ဒရုန်းတိုက်ခိုက်မှုများကြာင့် ခါကိဗ်မြို့တွင် လူနေအိမ် ၈ လုံး၊ ၃ ထပ်တိုက် အဆောက်အအုံ ၁ လုံး၊ ကားအချို့နှင့် ကားဝပ်ရှော့ရုံ တစ်ရုံတို့ ထိခိုက် ပျက်စီးခဲ့သည်ဟု ယူကရိန်း ပြည်ထဲရေးဝန်ကြီး အိုင်ဟော် ကလီမန်ကို (Ihor Klymenko) က ပြောကြားခဲ့သည်။

Source: ရိုက်တာ