CNI International News

နယူးဒေလီ၊ မတ်လ ၂၁

အိန္ဒိယသမုဒ္ဒရာဒေသတွင် ပင်လယ်ဓားပြမှုနှင့် အကြမ်းဖက်မှုများကို တိုက်ဖျက်ရန်၊ လွတ်လပ်စွာ ရေကြောင်း သွားလာခွင့်ကို ဘေးကင်းစေရန် လုပ်ဆောင်မည့် အိန္ဒိယ၏ ကတိကဝတ်များကို ဝန်ကြီးချုပ် မိုဒီ ( Narendra Modi ) က ထပ်လောင်း အတည်ပြုခဲ့သည်ဟု NDTV မှ ဖော်ပြခဲ့သည်။

ပင်လယ်ဓားပြများ၏ ပြန်ပေးဆွဲခံခဲ့ရသည့် ဘူလ်ဂေးရီးယားနိုင်ငံသား ၇ ဦးကို ကယ်တင်ပြီး နေရပ်သို့ ပြန်လည် ပို့ဆောင်ပေးမည့် အစီအစဉ်အတွက် ဘူလ်ဂေးရီးယားသမ္မတ ရူမန် ရာဒက်ဗ် (Rumen Radev) ထံမှ မက်ဆေ့ချ်ကို တုန့်ပြန်သည့်အနေဖြင့် မိုဒီ၏ မှတ်ချက်စကားများ ထွက်ပေါ်လာခဲ့ခြင်းဖြစ်သည်။

ဘူဂေးရီးယားသမ္မတ ရာဒက်ဗ်က ပင်လယ်ဓားပြများ ပြန်ပေးဆွဲခဲ့သည့် MV Ruen သင်္ဘောကို အောင်မြင်စွာ ကယ်တင်နိုင်ခဲ့သော အိန္ဒိယရေတပ်ကို မတ်လ ၁၈ ရက်က ကျေးဇူးတင်စကား ပြောကြားခဲ့ခြင်းဖြစ်သည်။

မိုဒီက ရာဒက်ဗ်၏ ကျေးဇူးတင်စကားကို အသိအမှတ်ပြုကြောင်း ဖော်ပြခဲ့ပြီး အိန္ဒိယသည် ဘူလ်ဂေးရီးယားနိုင်ငံ သားများကို ဘေးကင်းစွာ ပြန်လည်ပို့ဆောင်ပေးမည်ဟု ပြောကြားခဲ့သည်။

MV Ruen သင်္ဘောကို တွေ့ရစဉ်

"ဘူလ်ဂေးရီးယားသမ္မတရဲ့ ကျေးဇူးတင်စကားကို အသိအမှတ်ပြုပါတယ်။ ကျနော်တို့ဟာ ဘူလ်ဂေးရီးယား နိုင်ငံသား ၇ ဦးကို မကြာခင်မှာ ဘေးကင်းစွာနဲ့ ပြန်လည်ပို့ဆောင်သွားမှာပါ" ဟု မိုဒီက ပြောကြားခဲ့သည်။

အိန္ဒိယသမုဒ္ဒရာအတွင်း ပင်လယ်ဓားပြမှုနှင့် အကြမ်းဖက်မှုကို တိုက်ဖျက်ပြီး လွတ်လပ်စွာ ရေကြောင်း သွားလာ ခွင့်ကို ကာကွယ်ရေးအတွက် အိန္ဒိယက ကတိကဝတ်ပြု လုပ်ဆောင်နေကြောင်း မိုဒီက X လူမှုမီဒီယာတွင် ပြောကြားခဲ့သည်။

ဘူလ်ဂေးရီးယားနိုင်ငံသား ၇ ဦး၊ မြန်မာနိုင်ငံသား ၉ ဦး၊ အန်ဂိုလာနိုင်ငံသား ၁ ဦးတို့ လိုက်ပါခဲ့သည့် MV Ruen သင်္ဘောကို ပြီးခဲ့သည့်နှစ်က အာရေဗျပင်လယ်အတွင်း ပင်လယ်ဓားပြများက ပြန်ပေးဆွဲခဲ့ခြင်းဖြစ်သည်။

ထိုကဲ့သို့ ပင်လယ်ဓားပြများ ဖမ်းဆီးထားသည့် ဘူလ်ဂေးရီးယားသင်္ဘော Ruen နှင့် ဘူလ်ဂေးရီးယား နိုင်ငံသား ၇ ဦး အပါအဝင် သင်္ဘောအမှုထမ်းများကို ရဲဝံ့စွာ ကယ်တင်နိုင်ခဲ့သည့် အိန္ဒိယရေတပ်၏ လုပ်ဆောင်မှုအတွက် ဝန်ကြီးချုပ် မိုဒီကို အလေးအနက် ကျေးဇူးတင်ကြောင်း ရာဒက်ဗ်က ပြောကြားခဲ့သည်။

ထို့ပြင် ဘူလ်ဂေးရီးယား နိုင်ငံခြားရေးဝန်ကြီး မာရီယာ ဂေဘီယယ် (Mariya Gabriel) ကလည်း သူသည် ဘူလ်ဂေးရီးယားနိုင်ငံဆိုင်ရာ အိန္ဒိယသံအမတ် ဆန်ဂျေး ရာနာ (Sanjay Rana) နှင့် တွေ့ဆုံခဲ့ပြီး  MV Ruen သင်္ဘောနှင့် ထိုသင်္ဘောပေါ်မှ အမှုထမ်းများကို ကယ်တင်ပေးခဲ့သည့် အိန္ဒိယရေတပ်၏ စစ်ဆင်ရေးကို ကျေးဇူးတင်ကြောင်း ပြောကြားခဲ့သည်ဟု ၎င်း၏ Facebook စာမျက်နှာတွင် ရေးသားဖော်ပြခဲ့သည်။

Source: NDTV

CNI International News

အစ္စလာမ်မာဘက်၊ မတ်လ ၂၀

ပါကစ္စတန်သည် တာရစ်ခ် အီး လက်ဘစ်ခ် ပါကစ္စတန် (TLP) ကဲ့သို့ အစွန်းရောက်အဖွဲ့များကို လူသိရှင်ကြား ထောက်ပံ့ပေးနေသည်ဟု Al Arabiya Post မှ ဖော်ပြခဲ့သည်။

ဆွန်နီ အစ္စလာမ်အဖွဲ့ဖြစ်သည့် TLP သည် လူနည်းစုများ ကိုးကွယ်သည့် ဘာသာရေးနေရာများကို ဖျက်ဆီးခြင်း၊ လူနည်းစုများကို သတ်ဖြတ်ခြင်း၊ မှားယွင်းသည့် ဘာသာရေး အသရေဖျက်မှု စွဲချက်များကို ထွက်ဆိုခြင်းနှင့် တရားရုံးချုပ်၏ တရားသူကြီးချုပ်ကိုပင် တိုက်ရိုက်ခြိမ်းခြောက်မှုတို့ ရှိခဲ့သည့်တိုင် ပါကစ္စတန်က ထိုကဲ့သို့ အစွန်းရောက်အဖွဲ့များကို ထောက်ပံ့ပေးနေသည်ဟု ဆိုသည်။

TLP နှင့် အလားတူ အစွန်းရောက်အဖွဲ့များသည် လူနည်းစုများ အထူးသဖြင့် ဟိန္ဒူများကို နည်းလမ်းပေါင်းစုံဖြင့် အနှောင့်အယှက် ပေးနေကြသည်ဟု ဆိုသည်။

ပါကစ္စတန်သည် တာရစ်ခ် အီး လက်ဘစ်ခ် ပါကစ္စတန် (TLP)ကို တွေ့ရစဉ်

ဟိန္ဒူမိန်းကလေးများနှင့် အမျိုးသမီးများသည် ကြုံရာကျပန်း ဖမ်းဆီးခေါ်ဆောင်ခံရခြင်း၊ အဓမ္မပြုကျင့်ခြင်းနှင့် မွတ်ဆလင် အမျိုးသားများနှင့် လက်မထပ်မီ အစ္စလာမ်ဘာသာသို့ ကူးပြောင်းရန် အတင်းအကျပ် ဖိအားပေး ခံရခြင်းတို့ ရှိခဲ့သည်ဟု သတင်းတွင် ဖော်ပြထားသည်။

ယခုနှစ် ဇန်နဝါရီ  ၈ ရက်မှ ဖေဖော်ဝါရီ ၈ ရက်အကြား ဟိန္ဒူမိန်းကလေး ၂၀ ခန့်သည် ရုပ်ပိုင်းဆိုင်ရာ အနိုင်ကျင့်ခံ ခဲ့ရသည်။

အဆိုပါ မိန်းကလေး ၂၀ ဦးအနက် ၁၂ ဦးသည် ၎င်းတို့ကို ပြန်ပေးဆွဲသွားသူများနှင့် အတင်းအကျပ် လက်ထပ်ရမှု၊ အဓမ္မ ပြုကျင့်ခံရမှု ၄ မှု နှင့် လိင်ပိုင်းဆိုင်ရာ ပွတ်သတ်စော်ကားမှု နှစ်မှု တို့ရှိခဲ့ကာ ပြန်ပေးသမားများနှင့် လက်ထပ်ရန် ငြင်းဆိုသူ မိန်းကလေး ၂ ဦးအနက် ၁ ဦးမှာ ပျောက်ဆုံးနေသလို နောက် ၁ ဦးကို သတ်ဖြတ်ရန် ကြိုးပမ်းမှုတို့ ရှိခဲ့သည်ဟု ဒေသခံမီဒီယာများက ဖော်ပြခဲ့သည်။ 

တရားရေးဆိုင်ရာ လုပ်ထုံးလုပ်နည်းများကို ဝေဖန်သည့် ဂျာနယ်လစ်များကို လျင်မြန်စွာ အပြစ်ပေးလေ့ရှိသည့် ပါကစ္စတန်သည် Ahmadis ဘာသာရေးလှုပ်ရှားမှုကို မျက်နှာသာပေးသည့် စီရင်ချက်ကို ချမှတ်ခဲ့သော တရားရုံး ချုပ် တရားသူကြီးတစ်ဦးအား ဆန့်ကျင်သည့် TLP အဖွဲ့ဦးဆောင်သော ဆန္ဒပြမှုများကို လျစ်လျူရှုခဲ့သည်။ 

ပါကစ္စတန်ကို ဆန့်ကျင်နေသည့် အမျိုးသမီးများကို တွေ့ရစဉ်

TLP ဦးဆောင်သည့် ဆန္ဒပြသူများက ထိုတရားသူကြီးချုပ်ကို အစ္စလာမ်ဘာသာ၏ ရန်သူဟု ခေါ်ဆိုခဲ့ပြီး ပန်ဂျပ် ပြည်နယ်အတွင်းရှိ ဗလီ ၅၀ ကျော်တွင် ဆန္ဒပြမှုများ ပြုလုပ်ခဲ့သည်။

အချို့ဆန္ဒပြသူများက တရားသူကြီးချုပ်ကိုပင် ခြိမ်းခြောက်မှုများ ပြုလုပ်ခဲ့သည်။ 

ယခုနှစ် ဖေဖော်ဝါရီလအတွင်း ဘာလိုချီစတန် (Balochistan) ပြည်နယ်၊ ကာလတ် (Kalat) မြို့တွင် ဟိန္ဒူ စီးပွားရေး လုပ်ငန်းရှင်တစ်ဦးကို မော်တော်ဆိုင်ကယ်စီးလာသည့်  အမည်မသိ လက်နက်ကိုင်များက ပစ်ခတ်ခဲ့ သဖြင့် ထိုစီးပွားရေး လုပ်ငန်းရှင်သည် အပြင်းအထန် ဒဏ်ရာရရှိခဲ့သည်။

ဖေဖော်ဝါရီ နောက်ဆုံး သီတင်းပတ်ကလည်း ခရစ်ယာန်ဘာသာဝင် သုံးဘီးမောင်းသူတစ်ဦး သတ်ဖြတ်ခံခဲ့ရပြီး ထိုတိုက်ခိုက်မှုများကို TLP အဖွဲ့က လုပ်ဆောင်ခြင်းဖြစ်သည်ဟု စွပ်စွဲခံထားရသည်။

Source: Al Arabiya Post

CNI International News

ကိယက်ဗ်၊ မတ်လ ၂၀

ရုရှားတပ်ဖွဲ့များအပေါ် အသာစီးရရှိရန်အတွက် မောင်းသူမဲ့စနစ်များ သို့မဟုတ် ဒရုန်းများ ထုတ်လုပ်ခြင်းသည် အဓိကကျကြောင်း ယူကရိန်း၏ စစ်ဦးစီးချုပ် အိုလက်ဇန်းဒါး ဆိုစကီး (Oleksandr Syrskyi)က မတ် ၁၈ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

"မောင်းသူမဲ့ စနစ်တွေ ထုတ်လုပ်ဖို့နဲ့ အသုံးပြုဖို့ဟာ ကျနော့်ရဲ့ ဦးစားပေးကိစ္စ ဖြစ်ပါတယ်" ဟု ဆိုစကီးက ၎င်း၏ လက်ထောက် ဗာဒင် ဆူခါရက်ဗ်စကီး (Vadym Sukharevskyi)နှင့် အစည်းအဝေး ပြုလုပ်ပြီးနောက် Telegram တွင် ရေးသားဖော်ပြခဲ့သည်။

"ကျနော်တို့ဟာ ရန်သူတွေအပေါ် အရေအတွက်အားဖြင့်ရော အရည်အချင်းအားဖြင့်ပါ အသာစီးရနိုင်စေဖို့အတွက် ဆန်းသစ်တဲ့ နည်းလမ်းတွေ ရှာဖွေနေပါတယ်" ဟု ၎င်းက ပြောသည်။

ရုရှားနှင့် ယူကရိန်းသည် တစ်ဖက်နှစ်တစ်ဖက် ဒရုန်းများကို အသုံးပြု တိုက်ခိုက်မှုများအား မြှင့်တင်လာခဲ့ပြီး စစ်မြေပြင်တွင် တစ်ဖက်ရန်သူ၏ စစ်တပ်၊ စွမ်းအင်နှင့် သယ်ယူပို့ဆောင်ရေး အခြေခံ အဆောက်အအုံများကို ဒရုန်းများဖြင့် ပစ်မှတ်ထားလာခဲ့သည်။

 ယူကရိန်း၏ စစ်ဦးစီးချုပ် အိုလက်ဇန်းဒါး ဆိုစကီးကို တွေ့ရစဉ်

လက်ရှိတွင် ယူကရိန်းစစ်တပ်သည် မြေပြင်တွင် တပ်ဖွဲ့ဝင်အင်အား နည်းပါးနေပြီး စစ်မျက်နှာပြင်အားလုံး နီးပါး၌  ရုရှားတပ်ဖွဲ့များ၏ ဖိအားပေး တိုက်ခိုက်မှုများကို ခံနေရသည်။

မတ်လ ၁၇ ရက်က ရုရှားသမ္မတ ရွေးကောက်ပွဲတွင် ထပ်မံအနိုင်ရရှိခဲ့သည့် ပူတင် (Vladimir Putin) က ရုရှား တပ်ဖွဲ့များသည် ယူကရိန်းစစ်မြေပြင်၌ အသာစီးရနေပြီး စစ်ဆင်ရေးများကို ဆက်လက် လုပ်ဆောင်သွားမည် ဖြစ်ကြောင်း ပြောကြားခဲ့သည်။

ယူကရိန်းသမ္မတ ဗိုလိုဒီမာ ဇာလန်းစကီး (Volodymyr Zelenskiy) က ဖေဖော်ဝါရီလတွင် ၎င်း၏ စစ်တပ်ကို ပြုပြင်ပြောင်းလဲရန် အမိန့်ပေးခဲ့ပြီး ယူကရိန်းစစ်တပ်တွင် ဒရုန်းများအား ထုတ်လုပ်သည့် တပ်ခွဲသစ်တစ်ခု ဖွဲ့စည်းတည်ထောင်ရန် ညွှန်ကြားခဲ့သည်။

ထိုဒရုန်းများ ထုတ်လုပ်ရေးနှင့် စစ်ဆင်ရေးများအတွက် လက်ထောက် စစ်ဦးစီးချုပ်ဖြစ်သည့် ဆူခါရက်ဗ်စကီးအား ဦးဆောင်ရန် အကြီးအကဲအဖြစ် ခန့်အပ်ခဲ့သည်။

Source: ရိုက်တာ

CNI International News

ဝါရှင်တန်၊ မတ်လ ၁၉

ကမ္ဘာ့နိုင်ငံများအနေဖြင့် ကိုဗစ်ကပ်ရောဂါကဲ့သို့ ထိခိုက်နစ်နာမှုများကို ဖြစ်စေသည့် ဖန်တနိုင်း (fentanyl) မူးယစ်ဆေးဝါများ မှောင်ခိုကူးမှုကို ချက်ချင်းတိုက်ဖျက်ရန် လိုအပ်ကြောင်း အမေရိကန်နိုင်ငံခြားရေးဝန်ကြီး အန်တိုနီ ဘလင်ကင် (Antony Blinken) က မတ်၁၅ ရက်တွင် ပြောကြားခဲ့ကြောင်း ဟောင်ကောင်ပို့စ်မှ ဖော်ပြခဲ့သည်။

သြစတြီးယားနိုင်ငံ၊ ဗီယင်နာ (Vienna) မြို့တော်တွင် ပြုလုပ်ခဲ့သည့် ကုလသမဂ္ဂ ညီလာခံ၌  မိန့်ခွန်းပြောကြား ခဲ့ချိန်မှာ ဘလင်ကင်က မူးယစ်ဆေးဝါးများ၊ စိတ်ကိုပြောင်းလဲစေသော ဆေးဝါးများနှင့် ဓာတုဗေဒနည်းဖြင့် ဖန်တီးထားသည့် လူလုပ် မူးယစ်ဆေးဝါးများ ပျံ့နှံ့နေမှု၏ အန္တရာယ်ကို အဓိကထား ပြောကြားခဲ့သည်။

မူးယစ်ဆေးဝါးဆိုင်ရာ ကုလသမဂ္ဂ ကော်မရှင်တွင် ဘလင်ကင်က အမေရိကန်နိုင်ငံခြားရေးဝန်ကြီးအဖြစ် ပထမဆုံးအကြိမ် မိန့်ခွန်းပြောကြားခဲ့ရာတွင် ကမ္ဘာလုံးဆိုင်ရာ မူးယစ်ဆေးဝါး အကျပ်အတည်း မြင့်တက်လာမှုကို စိုးရိမ်ရကြောင်း ဖော်ပြခဲ့သည်။

အမေရိကန်မူးယစ်မှောင်ခိုး တိုက်ဖျက်ရေးအရာရှိကိုတွေ့ရစဉ်

အမေရိကန်တွင် အသက် ၁၈ နှစ်မှ ၄၅ နှစ်အကြား သေဆုံးမှုဖြစ်စေသည့် အဓိကအကြောင်းရင်းမှာ ဖန်တနိုင်း ကဲ့သို့ လူလုပ်မူးယစ်ဆေးဝါးများကြောင့် ဖြစ်သည်ဟု ဘလင်ကင်က သတိပေးခဲ့သည်။

ကမ္ဘာပေါ်တွင် ဖန်တနိုင်းများ ထုတ်လုပ်သည့် အဓိက အရင်းအမြစ်မှာ တရုတ်နိုင်ငံမှဖြစ်ပြီး ထိုမူးယစ်ဆေးဝါး များကို လမ်းကြောင်း အများအပြားမှ မှောင်ခိုကူးကာ ကမ္ဘာသို့ ဖြန့်နေခြင်းဖြစ်ကြောင်း ကျွမ်းကျင်သူများက ပြောကြားခဲ့သည်။

တရုတ်၏ စက်မှုလုပ်ငန်း နေရာများတွင် ဖန်တနိုင်းနှင့် အခြားလူလုပ် မူးယစ်ဆေးဝါးများ အများအပြား ထုတ်လုပ်နေပြီး မူးယစ်ဆေး မှောင်ခိုကူးသူများသည် လုံခြုံရေးပိုင်း အားနည်းသည့် ထိုနေရာဒေသများကို အခွင့်ကောင်းယူ အမြတ်ထုတ်နေကြသည်ဟု ဆိုသည်။

 မူးယစ်ဆေးများကိုတွေ့ရစဉ်

တရုတ်နိုင်ငံမှ ဖန်တနိုင်းများကို မြန်မာ၊ အိန္ဒိယ၊ ဗီယက်နမ် အပါအဝင် အိမ်နီးချင်း တောင်အာရှနိုင်ငံများကို အရင်ဆုံး မှောင်ခိုကူးပြီး ထိုနိုင်ငံများမှတစ်ဆင့် ကမ္ဘာလုံးဆိုင်ရာ မူးယစ်ဆေးဝါး ဈေးကွက်များအတွင်းသို့ ဖြန့်နေခြင်းဖြစ်သည်ဟု ကျွမ်းကျင်သူများက ပြောသည်။

မက္ကဆီကိုတွင် စီနာလိုအာ (Sinaloa) နှင့် ဂျာလစ္စကို နယူးဂျန်နရေးရှင်း (Jalisco New Generation) တို့ကဲ့သို့ အင်အားကြီးမားသည့် မူးယစ်းဆေးဝါးဂိုဏ်းများသည် ဖန်တနိုင်းများကို နယ်စပ်မှဖြတ်ပြီး အမေရိကန်နိုင်ငံအတွင်း သို့ မှောင်ခိုသွင်းနေကြသည်ဟု စုံစမ်းဖော်ထုတ်ရေးသားသည့် Investigative Journalism Reportika အဖွဲ့က သတင်းထုတ်ပြန်ခဲ့သည်။

ဖန်တနိုင်းများ မှောင်ခိုကူးမှုကို တိုက်ဖျက်သည့် နိုင်ငံတကာ၏ အားထုတ်ကြိုးပမ်းမှုများ ရှိနေသည့်တိုင် စိန်ခေါ်မှုများ ဆက်ရှိနေဆဲဖြစ်ပြီး ဖန်တနိုင်း မူးယစ်ဆေးဝါးပမာဏ အများအပြား ဖမ်းဆီးရမိသည့် သတင်းများကို မကြာခဏ ကြားသိနေရဆဲဖြစ်သည်ဟု လေ့လာသူများက ပြောကြားခဲ့သည်။

Source: ဟောင်ကောင်ပို့စ်

CNI International News

ဆိုးလ်၊ မတ်လ ၁၉

တောင်ကိုရီးယားနှင့် အမေရိကန်၏ ပူးတွဲစစ်ရေး လေ့ကျင့်မှုအပြီး ရက်ပိုင်းအကြာဖြစ်သည့် မတ်လ ၁၈ ရက်တွင် မြောက်ကိုရီးယားသည် အရှေ့ဘက်ပင်လယ်အတွင်းသို့ တာတိုပစ်ပဲ့ထိန်းဒုံးကျည်များ စမ်းသပ်ပစ်လွှတ်ခဲ့သည်ဟု တောင်ကိုရီးယားက ပြောကြားခဲ့ကြောင်း အေပီမှ ဖော်ပြခဲ့သည်။

တစ်လအတွင်း မြောက်ကိုရီးယား၏ ပထမဆုံးအကြိမ် ဒုံးကျည်စမ်းသပ်သည့် လှုပ်ရှားမှုများဖြစ်သော ထိုပစ်လွှတ် မှုများသည် တောင်ကိုရီးယားနိုင်ငံ ဆိုးလ်မြို့တော်တွင် ပြုလုပ်သည့် ဒီမိုကရေစီ ညီလာခံအတွက် အမေရိကန် နိုင်ငံခြားရေးဝန်ကြီး အန်တိုနီ ဘလင်ကင် (Antony Blinken) ရောက်ရှိနေချိန်၌ ဖြစ်ပွားခဲ့ခြင်းဖြစ်သည်။

မြောက်ကိုရီးယားသည် နိုဝင်ဘာလတွင် ကျင်းပမည့် အမေရိကန်ရွေးကောက်ပွဲ မတိုင်မီ ဒုံးကျည်စမ်းသပ်မှုများကို ပိုမိုအရှိန်မြှင့်တင် လုပ်ဆောင်လိမ့်မည်ဟု ပြည်ပကျွမ်းကျင်သူများက ပြောကြားခဲ့သည်။

 အမေရိကန် နိုင်ငံခြားရေးဝန်ကြီး အန်တိုနီ ဘလင်ကင်ကို တွေ့ရစဉ်

ဂျပန်ကာကွယ်ရေးဝန်ကြီးဌာနကလည်း မြောက်ကိုရီးယားသည် မတ်လ ၁၈ ရက် နံနက် ၇ နာရီ ၄၄ မိနစ်တွင် ဒုံးကျည် ၂ စင်း ပစ်လွှတ်ခဲ့ပြီး ၃၇ မိနစ်အကြာ၌ နောက်ထပ် ဒုံးကျည် ၁ စင်း ထပ်မံပစ်လွှတ်ခဲ့သည်ဟု ထုတ်ပြန် ခဲ့သည်။ 

ထိုဒုံးကျည်များသည် ကိုရီးယားကျွန်းဆွယ်နှင့် ဂျပန်နိုင်ငံအကြား ဂျပန်၏ အထူးစီးပွားရေးဇုန် အပြင်ဘက်ရှိ ရေပြင်များအတွင်း ကျသွားခဲ့ကြောင်းနှင့် ထိခိုက်ပျက်စီးမှု၊ ဒဏ်ရာရမှုများ မရှိကြောင်း ဂျပန်နိုင်ငံခြားရေးဝန်ကြီး ဖူမီယို ကီရှီဒါ (Fumio Kishida) က ပြောကြားခဲ့သည်။

မြောက်ကိုရီးယား၏ ဒုံးကျည်စမ်းသပ်မှု လုပ်ရပ်များသည် ဂျပန်နိုင်ငံ၊ ဒေသတွင်းနှင့် နိုင်ငံတကာ အသိုင်းအဝိုင်း၏ ငြိမ်းချမ်းရေးနှင့် လုံခြုံရေးကို ခြိမ်းခြောက်နေခြင်းဖြစ်သည်ဟု ကီရှီဒါက ပြောကြားခဲ့သည်။

 ဂျပန်နိုင်ငံခြားရေးဝန်ကြီး ဖူမီယို ကီရှီဒါကို တွေ့ရစဉ်

ထို့ပြင် ထိုကဲ့သို့ ပဲ့ထိန်းဒုံးကျည်များ ပစ်လွှတ်မှုကို တားမြစ်ထားသည့် ကုလသမဂ္ဂ၏ လုံခြုံရေးကောင်စီ၏ ပြဋ္ဌာန်းချက်များကို ချိုးဖောက်သော မြောက်ကိုရီးယား၏ လုပ်ရပ်များကို ဂျပန်က ပြင်းပြင်းထန်ထန် ရှုတ်ချ ကြောင်း ၎င်းက ပြောသည်။

တောင်ကိုရီးယား စစ်တပ်ကလည်း မတ်လ ၁၈ ရက် နံနက်ပိုင်းတွင် မြောက်ကိုရီးယားက ပစ်လွှတ်ခဲ့သည့် ဒုံးကျည်အချို့ကို ထောက်လှမ်းတွေ့ရှိခဲ့ကြောင်း တောင်ကိုရီးယား ပူးတွဲစစ်ဦးစီးချုပ်များအဖွဲ့ (JCS) က ထုတ်ပြန်ခဲ့သည်။

တောင်ကိုရီးယားအနေဖြင့် အမေရိကန်နှင့် စစ်ရေးမဟာမိတ်ဖွဲ့မှုအပေါ် အခြေခံပြီး မြောက်ကိုရီးယား၏ ရန်စသည့် လုပ်ရပ်များအားလုံးကို တုန့်ပြန်ရန် အသင့်အနေအထားရှိမှုအား ဆက်လက် ထိန်းသိမ်းထားမည်ဟု ထုတ်ပြန်ချက်တွင် ဖော်ပြခဲ့သည်။

Source: အေပီ

CNI International News

မော်စကို၊ မတ်လ ၁၉

အမေရိကန်ဦးဆောင်သည့် နေတိုးစစ်ရေး မဟာမိတ်အဖွဲ့နှင့် ရုရှားအကြား တိုက်ရိုက် ပဋိပက္ခဖြစ်ပွားမှုသည် ကမ္ဘာကြီးအား တတိယကမ္ဘာစစ်ဖြစ်ပွားမည့် အခြေအနေမှ ခြေတစ်လှမ်းအကွာသို့ ရောက်ရှိစေလိမ့်မည်ဖြစ် ကြောင်း ရုရှားသမ္မတ ဗလာဒီမာ ပူတင် (Vladimir Putin) က မတ် ၁၈ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

ယူကရိန်းစစ်ပွဲကြောင့် ရုရှားနှင့် အနောက်အုပ်စုအကြား ဆက်ဆံရေးများသည် ၁၉၆၂ ခုနှစ် ကျူးဘားဒုံးကျည် အကျပ်အတည်း နောက်ပိုင်း အဆိုးရွားဆုံး အခြေအနေသို့ ရောက်ရှိစေခဲ့သည်။

ပူတင်သည် နျူကလီးယားစစ်ပွဲ ဖြစ်ပွားမည့် အန္တရာယ်နှင့်ပတ်သက်ပြီး မကြာခဏ သတိပေးခဲ့သော်လည်း ယူကရိန်းစစ်ပွဲတွင် နျူကလီးယားလက်နက်များ အသုံးပြုရန် လိုအပ်သည်ဟု မထင်ကြောင်း ပြောကြားခဲ့သည်။

 သတင်းထောက်များနဲ့ ပူတင်တွေ့ဆုံစဉ်

ပြီးခဲ့သည့်လက ပြင်သစ်သမ္မတ မက်ခရွန် (Emmanuel Macron) သည် အနာဂတ်ကာလတွင် ယူကရိန်း၌ မြေပြင် စစ်သားများ ဖြန့်ကြက်ချထားမည့် အစီအစဉ်ကို စာရင်းထဲမှ ဖယ်ထုတ်မည် မဟုတ်ကောင်း ပြောကြားခဲ့ပြီး အနောက်နိုင်ငံများက မက်ခရွန်၏ အစီအစဉ်ကို သဘောမတူခဲ့သော်လည်း အရှေ့ဥရောပနိုင်ငံများကမူ ထောက်ခံ ကြောင်း ဖော်ပြခဲ့သည်။

မက်ခရွန်၏ မှတ်ချက် စကားများ အပြင် ရုရှားနှင့် နေတိုးအကြား ဖြစ်လာနိုင်ခြေရှိသည့် ပဋိပက္ခအန္တရာယ်များနှင့် ပတ်သက်ပြီး ရိုက်တာသတင်းဌာနက မေးမြန်းခဲ့ချိန်တွင် ပူတင်က "မျက်မှောက်ခေတ် ကမ္ဘာကြီးမှာ အရာအားလုံး ဟာ ဖြစ်လာနိုင်ပါတယ်" ဟု ပြန်လည်ဖြေကြားခဲ့သည်။

"အဲဒီ အခြေအနေဆိုရင် တတိယကမ္ဘာစစ်ကြီးဖြစ်ဖို့ ခြေတစ်လှမ်းအကွာကို ရောက်ရှိလာလိမ့်မယ်ဆိုတာ လူတိုင်း က ရှင်းရှင်းလင်းလင်း သိထားပါတယ်။ လူတိုင်းက အဲဒီလို ဖြစ်စေချင်ကြလိမ့်မယ်လို့ ကျနော်မထင်ပါဘူး" ဟု ပူတင်သည်။

 ရုရှားဒုံးကျည် ပစ်လွှတ်စဉ်

ဆိုဗီယက်ခေတ်လွင် ရုရှားသမိုင်းတွင် ပြုလုပ်သည့် သမ္မတရွေးကောက်ပွဲ၌ အကြီးမားဆုံး သောင်ပြိုကမ်းပြို အနိုင်ရခဲ့ပြီးနောက် ပူတင်က သတင်းထောက်များကို ပြောကြားခဲ့ ခြင်းဖြစ်သည်။

နေတိုးစစ်မှုထမ်းများသည် ယူကရိန်းတွင် ယခင်ကတည်းက ရှိနေပြီး ရုရှားတပ်ဖွဲ့များသည် ယူကရိန်းစစ်မြေပြင် တွင် အင်္ဂလိပ်ဘာသာစကားနှင့် ပြင်သစ်ဘာသာစကားများဖြင့် ဆက်သွယ်ပြောဆိုမှုများကို ကြားဖြတ်ဖမ်းယူ နိုင်ခဲ့သည်ဟု ပူတင်က ပြောကြားခဲ့သည်။

"သူတို့ (နေတိုးစစ်မှုထမ်းများ) တွေအတွက် ဘာမှ ကောင်းတာမရှိပါဘူး။ ဘာလို့လဲဆိုတော့ စစ်ပွဲမှာ သူတို့တွေ အများအပြား သေဆုံးနေလို့ ဖြစ်ပါတယ်" ဟု ပူတင်က ပြောကြားခဲ့သည်။

Source: ရိုက်တာ

CNI International News

အင်ဖာ၊ မတ်လ ၁၉

မဏိပူရပြည်နယ်တွင် ငြိမ်းချမ်းရေးလုပ်ငန်းစဉ် ဖော်ဆောင်ရန် မြန်မာနိုင်ငံမှ ဝင်ရောက်လာသည့် လက်နက်ကိုင် ကူကီးစစ်သွေးကြွများကို ထောက်လှမ်းဖော်ထုတ်ပြီး နှင်ထုတ်ရမည်ဟု သူပုန်ခေါင်းဆောင်ဟောင်း အာရ်ကေ ဆန်နာယိုင်မာ (RK Sanayaima)က ပြောကြားခဲ့ကြောင်း The Sangai Express မှ ဖော်ပြခဲ့သည်။

မြန်မာနိုင်ငံမှ ကူကီးစစ်သွေးကြွများကို ဖော်ထုတ်ပြီး နေရပ်သို့ ပြန်လည်ပို့ဆောင်ခြင်းသည် အစိုးရက ငြိမ်းချမ်း ရေး ပြန်လည်ထိန်းသိမ်းရန် လုပ်ဆောင်နေသည့် ကြိုးပမ်းအားထုတ်မှုကို မဏိပူရပြည်နယ်အတွင်း နေထိုင်သည့် ဒေသခံများအကြား သိရှိခံစားစေလိမ့်မည်ဖြစ်ကြောင်း ဆန်နာယိုင်မာက ပြောသည်။

သူပုန်ခေါင်းဆောင်ဟောင်း အာရ်ကေဆန်နာယိုင်မာကို တွေ့ရစဉ်

မဏိပူရပြည်နယ်အတွင်း ဖြစ်ပွားခဲ့သည့် ပဋိပက္ခများကို ကူကီးလူမျိုးစုများက စတင်ခဲ့ခြင်းဖြစ်ကြောင်း သူပုန် ခေါင်းဆောင်ဟောင်း တစ်ဦးဖြစ်သည့် ယိုင်စကူလ် (Yaiskul) က MDU Hall ခန်းမတွင် ပြုလုပ်သည့် ၎င်းတို့အဖွဲ့ ၏ စာအုပ်မိတ်ဆက်ပွဲတွင် မီဒီယာများနှင့် သီးသန့်တွေ့ဆုံခဲ့ချိန်က ပြောကြားခဲ့သည်။

အိန္ဒိယအစိုးရသည် ပဋိပက္ခကို ဖြေရှင်းရန် အရင်းအမြစ်များနှင့် လုပ်နိုင်စွမ်း အားလုံးရှိကြောင်း ဆန်နာယိုင်မာက ပြောကြားခဲ့သည်။

ထို့နောက် စစ်ဆင်ရေးများဆိုင်းငံ့မှု (Suspension of Operation-SoO) သဘောတူညီချက်အောက်တွင် ရှိနေသည့် ကူကီးစစ်သွေးကြွများ သာမကဘဲ မကြာသေးမီက မြန်မာနိုင်ငံမှ မဏိပူရသို့ ဝင်ရောက်လာသည့် ကူကီး လက်နက်ကိုင်များကပါ ပဋိပက္ခ ၌ ပါဝင်ပတ်သက်နေသည်ဟု ၎င်းက ဆိုသည်။

ကူကီးတပ်ဖွဲ့ကို တွေ့ရစဉ်

အိန္ဒိယအစိုးရအနေနှင့် ကူကီးစစ်သွေးကြွများကို ထိန်းချုပ်ရန်နှင့် ရှိရင်းစွဲ အခြေအနေကို ထိန်းသိမ်းရန် တာဝန်ယူ လုပ်ဆောင်ရေးသည် အရေးကြီးကြောင်း ဆန်နာယိုင်မာက ပြောသည်။

မြန်မာနိုင်ငံနှင့် နယ်စပ်ချင်း ထိစပ်နေမှုနှင့်ပတ်သက်ပြီး အိန္ဒိယအစိုးရက အပြုသဘောဆောင်သည့် လုပ်ဆောင် ချက်များနှင့် စီမံဆောင်ရွက် လိမ့်မည်ဖြစ်သော်လည်း မဏိပူရပြည်နယ်နှင့် မြန်မာနယ်စပ်အကြား နယ်စပ်စည်းရိုး ကာမည်ဆိုပါက မဏိပူရပြည်နယ်၏ နယ်စပ်ဒေသ ၂၀၀ စတုရန်း ကီလိုမီတာသည် မြန်မာနိုင်ငံထဲသို့ ပါသွားနိုင် သည်ဟုလည်း ၎င်းက ဆိုသည်။

မဏိပူရပြည်နယ်တွင် နေထိုင်သည့် ဒေသခံများကလည်း အဆိုပါ နယ်စပ်စည်းရိုးကာမည့် အစီအစဉ်၏ ဖြစ်လာနိုင်ခြေရှိသော အကျိုးဆက်များကို မေးခွန်းထုတ်ခဲ့ကြသည်။

မည်သို့ပင်ဆိုစေ မဏိပူရဒေသခံများသည် ကဘော် တောင်ကြား (Kabaw Valley) ကို မြန်မာနိုင်ငံဘက်ခြမ်းသို့ ပါသွားပြီး လက်လွတ်ဆုံးရှုံးရမည့် အခြေအနေကို အလွန်စိုးရိမ်နေကြသည်ဟု ဆန်နာယိုင်မာက ပြောကြားခဲ့ သည်။

Source: The Sangai Express

CNI International News

နယူးဒေလီ၊ မတ်လ ၁၈

ဂျူးဆန့်ကျင်မှု၊ ခရစ်ယာန်ဘာသာ သို့မဟုတ် အစ္စလာမ်ဘာသာအပေါ် ကြောက်စိတ်လွန်ကဲမှု၊ ဟိန္ဒူ ဆန့်ကျင်မှု၊ ဗုဒ္ဓဘာသာ ဆန့်ကျင်မှု၊ ဆစ်ခ် ဆန့်ကျင်မှုများ အပါအဝင် ဘာသာရေးနှင့်ပတ်သက်သည့် ဆန့်ကျင်မှုများ ကြောက်စိတ်လွန်ကဲမှု ပုံစံအားလုံးကို အိန္ဒိယက ပြင်းပြင်းထန်ထန် ရှုတ်ချကြောင်း ပြောကြားခဲ့သည်ဟု Devdiscourse မှ ဖော်ပြခဲ့သည်။ 

ကုလသမဂ္ဂဆိုင်ရာ အိန္ဒိယ၏ အမြဲတမ်း ကိုယ်စားလှယ်ဖြစ်သည့် ရူချိုင်ရာ ကမ်ဘော့ဂျ် (Ruchira Kamboj) က ကုလသမဂ္ဂ အထွေထွေညီလာခံ၏ (၇၈)ကြိမ်မြောက် အစည်းအဝေးတွင် "အစ္စလာမ်ဘာသာအပေါ် ကြောက်စိတ် လွန်ကဲမှုကို တိုက်ဖျက်ရန် အစီအစဉ်များ" ဆိုသည့် ကြေညာချက် ထုတ်ပြန်သည့် အချိန်အတွင်း ထိုကဲ့သို့ ပြောကြားခဲ့ခြင်းဖြစ်သည်။

ကုလသမဂ္ဂဆိုင်ရာ အိန္ဒိယ၏ အမြဲတမ်း ကိုယ်စားလှယ်ဖြစ်သည့် ရူချိုင်ရာ ကမ်ဘော့ဂျ်ကို တွေ့ရစဉ်

"ဘာသာရေး ကြောက်စိတ်လွန်ကဲမှု ပုံစံအားလုံးကို အိန္ဒိယက ဆန့်ကျင်ပါတယ်။ ဂျူးဆန့်ကျင်မှုပဲဖြစ်ဖြစ်၊ ခရစ်ယာန် ဒါမှမဟုတ် အစ္စလာမ် ဘာသာအပေါ် ကြောက်စိတ်လွန်ကဲမှုပဲ ဖြစ်ဖြစ်၊ ဟိန္ဒိူ၊ ဗုဒ္ဓဘာသာနဲ့ ဆစ်ခ် ဆန့်ကျင်မှုတွေပဲဖြစ်ဖြစ် အားလုံးကို ဆန့်ကျင်ပါတယ်" ဟု ကမ်ဘော့ဂျ်က ပြောကြားခဲ့သည်။

"အစ္စလာမ်ဘာသာအပေါ် ကြောက်စိတ်လွန်ကဲမှုကို တိုက်ဖျက်ရန် အစီအစဉ်များ" ဆိုသည့် ကြေညာချက်နှင့် ပတ်သက်ပြီး အိန္ဒိယ၏ သဘောထားကို ရှင်းလင်းပြောကြားခဲ့ရာတွင် ကမ်ဘော့ဂျ်က "ဒီနေ့ ကျမတို့ရဲ့ ကမ္ဘာကြီး မှာ ကျမတို့ဟာ ပထဝီနိုင်ငံရေး တင်းမာမှုတွေ၊ သာတူညီမျှမှုမရှိတဲ့ ဖွံ့ဖြိုးတိုးတက်မှုတွေ မြင့်မားလာတာနဲ့အတူ ရလဒ်အနေနဲ့ သည်းခံနိုင်စွမ်းကုန်ဆုံးမှု၊ ခွဲခြားဆက်ဆံမှုနဲ့ ဘာသာရေးနဲ့ ယုံကြည်ကိုးကွယ်မှုအပေါ် အခြေခံတဲ့ အကြမ်းဖက်မှုတွေ မြင့်တက်လာတာကို တွေ့နေရပါတယ်" ဟု ပြောကြားခဲ့သည်။

 အိန္ဒိယ၏ ဘာသာရေး သင်္ကေတများကို တွေ့ရစဉ်

"မူမတူသော်လည်း အတူယှဉ်တွဲ နေထိုင်ရေးကို ဂုဏ်ယူစွာ ကျင့်သုံးသည့် အိန္ဒိယအနေဖြင့် ဘာသာပေါင်းစုံ၊ ယုံကြည်ကိုးကွယ်မှုပေါင်းစုံကို မြှင့်တင်ဖို့နဲ့ ကာကွယ်ပေးဖို့အတွက် သာတူညီမျှမှုရှိတဲ့ မူဝါဒကို ခိုင်မာစွာ ကိုင်စွဲထားပါတယ်" ဟု ကမ်ဘော့ဂျ်က ပြောကြားခဲ့သည်။

မူမတူ ယှဉ်တွဲနေထိုင်ရေး မူဝါဒကို ခိုင်မာစွာ ကျင့်သုံးခဲ့သည့် သမိုင်းကြောင်းရှိပြီး ဒီမိုကရေစီ နိုင်ငံဖြစ်သည့် အိန္ဒိယနိုင်ငံသည် မတူကွဲပြားသော ဘာသာရေးများကို လက်ခံယုံကြည်ပြီး ဘာသာရေး ခံယူချက်ကြောင့် ဖိနှိပ် ခံရသူများကို ခိုလှုံခွင့်ပေးခဲ့သော နိုင်ငံဖြစ်ကြောင်း ၎င်းက ပြောကြားခဲ့သည်။

“ဘာသာတရားတိုင်းသည် တူညီမှုရှိသည် (Sarva Dharma Sama Bhava) ဆိုသည့် မဟတ္တမ ဂန္ဓီ (Mahatma Gandhi) ၏ အယူအဆအတိုင်း မည်သည့် ဘာသာဝင် ဖြစ်နေပါစေ။ ဘာသာရေးကိုးကွယ်မှုကြောင့် ဖိနှိပ်ခံရ သူများအတွက် အိန္ဒိယသည် ခိုလှုံစရာနေရာ တစ်ခုဖြစ်သည်”ဟု ကမ်ဘော့ဂျ်က ပြောကြားခဲ့သည်။

"ကျမတို့ရဲ့ Sarva Dharma Sama Bhava မူဝါဒရဲ့ အဓိကအချက်က လောကီကိစ္စတွေမှာ ဘာသာအယူဝါဒ ရေးရာ လွှမ်းမိုးမှု မရှိစေတဲ့ အိန္ဒိယရဲ့ မူဝါဒကို အရှင်းဆုံး ဖော်ပြပေးနေပြီး ဘာသာအားလုံးရဲ့ ကောင်းမွန်တဲ့ အချက်တွေကို အပြန်အလှန် လေးစားမှုနဲ့ လက်ခံထားပါတယ်" ဟု ၎င်းက ပြောကြားခဲ့သည်။

Source: Devdiscourse

CNI International News

ရီယိုဒီ ဂျနေးရိုး၊ မတ်လ ၁၈ 

ဘရာဇီးလ်သမ္မတဟောင်း ဂျိုင်ယာ ဘော်လ်ဆိုနာရို (Jair Bolsonaro)သည် ၂၀၂၂ ခုနှစ် ရွေးကောက်ပွဲ ရှုံးနိမ်မှု ရလဒ်ကို ပြောင်းပြန်လှန်ပစ်ပြီး အာဏာသိမ်းရန် ကြံစည်မှုတစ်ခုတွင် စစ်ဘက်အကြီးအကဲများနှင့် ပူးပေါင်း ကြိုးပမ်းခဲ့ကြောင်း ထုတ်ဖော်ခဲ့သည့် ရဲတပ်ဖွဲ့၏ စုံစမ်းစစ်ဆေးမှု ထွက်ပေါ်ခဲ့ပြီးနောက် တစ်ရက်အကြာတွင် သူ့အနေဖြင့် အမှုရင်ဆိုင်ရမည်ကို မကြောက်ရွံ့ကြောင်း မတ်လ ၁၆ ရက်က ပြောကြားခဲ့သည်ဟု ရိုက်တာမှ ဖော်ပြခဲ့သည်။

လက်ယာယိမ်းဝါဒီ ဘော်လ်ဆိုနာရိုသည် ရွေးကောက်ပွဲအနိုင်ရသည့် လက်ဝဲယိမ်းသမ္မတ လူးဝစ် အင်နာစီယို လူလာ ဒါဆေးလ်ဗား (Luiz Inacio Lula da Silva)အား အာဏာပြန်လည် ရယူမှုမှ ဟန့်တားရန် ဖြစ်နိုင်ခြေ ရှိသည့် အာဏာသိမ်းမှုတစ်ခုကို ဆွေးနွေးရန် ၎င်းတို့နှစ်ဦးအား ဆင့်ခေါ်ခဲ့သည်ဟု စစ်တပ်၏ တပ်မှူးနှစ်ဦးက စွပ်စွဲခဲ့သည်။

 ဘော်ဆ်ဆိုနာရို မဲဆွယ်ပေးနေစဉ်

ဘော်လ်ဆိုနာရိုသည် ထိုစွပ်စွဲချက်များနှင့်ပတ်သက်ပြီး တိုက်ရိုက် ရည်ညွှန်း ပြောဆိုခဲ့ခြင်း မရှိသော်လည်း သူ့အနေဖြင့် တရားရင်ဆိုင်ရမည့် အခြေအနေအတွက် ကြောက်လန့်နေခြင်း မရှိကြောင်း ပြောကြားခဲ့သည်။

"တရားသူကြီးတွေ သမာသမတ် ကျနေသရွေ့ ဘယ်လို တရားစီရင်မှုမျိုးကိုမဆို မကြောက်ပါဘူး" ဟု ဘော်လ်ဆိုနာရိုက ပြောသည်။

အောက်တိုဘာလတွင် ပြုလုပ်မည့် ဒေသန္တရရွေးကောက်ပွဲ၌ မြို့တော်ဝန်နေရာအတွက် ဝင်ရောက်ယှဉ်ပြိုင်မည့် ၎င်းက ထောက်ခံပေးထားသည့် ကိုယ်စားလှယ်တစ်ဦး၏ မဲဆွယ်စည်းရုံးပွဲမှာ ဘော်လ်ဆိုနာရိုက ပြောကြားခဲ့ခြင်း ဖြစ်သည်။

ရီယိုဒီဂျနေရိုး (Rio de Janeiro) မြို့ ရီယိုဆမ်ဘာ အကသင်တန်းကျောင်းတွင် ပြုလုပ်သည့် မဲဆွယ်စည်းရုံးပွဲ၌ ဘော်လ်ဆိုနာရိုက သူသည် လက်ရှိသမ္မတ လူလာအစိုးရအဖွဲ့၏ နိုင်ငံရေးအရ ဖိနှိပ်မှုကို ခံနေရခြင်းဖြစ်သည်ဟု ပြောကြားခဲ့သည်။

 ဘော်ဆ်ဆိုနာရိုရဲ့ မဲဆွယ်ပွဲကို လာရောက်ကြသူများကိုတွေ့ရစဉ်

ထို့ပြင် ဘော်လ်ဆိုနာရိုက သူသည် ရွေးကောက်ပွဲတွင် ရှုံးနိမ့်ခဲ့ပြီးနောက် အာဏာသိမ်းရန် စီစဉ်ခဲ့သည်ဆိုသည့် စွပ်စွဲချက်များကို ငြင်းဆိုခဲ့သည်။ 

ရွေးကောက်ပွဲအပြီးတွင် ဘော်လ်ဆိုနာရိုသည် လူလာအား သမ္မတစလွယ် လွှဲပြောင်းပေးမှုကို ရှောင်လွှဲရန်အတွက် ဖလော်ရီဒါသို့ သွားရောက်ခဲ့ပြီး ရက်ပိုင်းအကြာမှာ ၎င်းကို ထောက်ခံသူများက အာဏာသိမ်းရန် အားထုတ် ကြိုးပမ်းမှု တစ်ခုအဖြစ် အစိုးရရုံးများကို ဝင်ရောက်စီးနင်းခဲ့သည်။ 

ပြီးခဲ့သည့်နှစ်က ဘော်လ်ဆိုနာရိုသည် သမ္မတအဖြစ် တာဝန်ထမ်းဆောင်ခဲ့ချိန်က အာဏာအလွဲသုံးစားမှုဖြင့် ရွေးကောက်ပွဲများ ဝင်ရောက်ယှဉ်ပြိုင်ခွင့် ၈ နှစ်ကြာ တားမြစ်ပိတ်ပင်ခံခဲ့ရသည်။

ထို့နောက် သူသည် နိုင်ငံ၏ ရွေးကောက်ပွဲစနစ်ကို မကြာခဏ ဝေဖန်ခဲ့ပြီး လက်ရှိတွင် ဖမ်းဆီးခံရမည့် အခြေအနေ နှင့် ရင်ဆိုင်နေရသည်။ 

"နိုင်ငံရေးလောကထဲမှာ ကျနော်ဆက်ရှိနေဖို့ မျှော်လင့်ပါတယ်" ဟု ဘော်လ်ဆိုနာရိုက ပြောကြားခဲ့သည်။ 

ဘော်လ်ဆိုနာရိုက ထောက်ခံပေးထားသည့် ကိုယ်စားလှယ်လောင်းဖြစ်သူ ရာမာဂျန် (Ramagen)သည် ရီယိုမြို့တော်ဝန် နေရာအတွက် လက်ရှိမြို့တော်ဝန် အီဒူရာဒို ပါယက်စ် (Edurado Paes) နှင့် ယှဉ်ပြိုင်ရမည် ဖြစ်သည်။

Source: ရိုက်တာ