CNI International News

တိုကျို၊ ဇွန်လ ၁၃

အဋ္ဌမအကြိမ်မြောက် ဂျပန်-အန္ဒိယ ပင်လယ်ရေကြောင်းဆိုင်ရာ စစ်ရေးလေ့ကျင့်မှု ၂၀၂၄ (JIMEX 24) တွင် ပါဝင်ရန် အိန္ဒိယရေတပ်၏ ကုန်း/ရေ နှစ်သွယ်သုံး ကိုယ်ပျောက် ဖရီးဂိတ်စစ်သင်္ဘော INS Shivalik သည် ဂျပန်နိုင်ငံ၊ ယိုကိုဆူကာ (Yokosuka) မြို့သို့ ဇွန်လ ၁၂ ရက်တွင် ရောက်ရှိလာခဲ့ကြောင်း the print သတင်း ဝက်ဘ်ဆိုက်မှ ဖော်ပြခဲ့သည်။

၂၀၁၂ ခုနှစ်ကတည်းက စတင်ပြုလုပ်လာခဲ့သည့် ထိုစစ်ရေး လေ့ကျင့်မှုသည် အိန္ဒိယနှင့်ဂျပန် ရေတပ်များအကြား ပူးပေါင်းဆောင်ရွက်မှုနှင့် ရေတပ်အချင်းချင်း ပူးတွဲစစ်ဆင်ရေး စွမ်းဆောင်ရည်များကို တိုးမြှင့်ရန်ဖြစ်ကြောင်း အိန္ဒိယကာကွယ်ရေးဝန်ကြီးဌာနက သတင်းထုတ်ပြန်ခဲ့သည်။

“INS Shivalik သင်္ဘောကို ဂျပန်ရဲ့ ပင်လယ်ရေကြောင်းဆိုင်ရာ ကာကွယ်ရေးတပ်ဖွဲ့ (JMSDF) ရဲ့ တပ်မှူးဖြစ်တဲ့ ရေတပ်ဗိုလ်ချုပ်ကြီး အီတို ဟီရိုရှီ (ITO Hiroshi) နဲ့ ဂျပန်နိုင်ငံဆိုင်ရာ အိန္ဒိယသံအမတ်ကြီး စီဘီ ဂျော့ချ် (Sibi George) တို့က လှိုက်လှိုက်လှဲလှဲ ကြိုဆိုခဲ့ကြပါတယ်” ဟု ထုတ်ပြန်ချက်တွင် ဖော်ပြခဲ့သည်။

အဆိုပါ စစ်ရေးလေ့ကျင့်မှုများအတွင်း ဆိပ်ကမ်းများပေါ်နှင့် ပင်လယ်ရေပြင်များအတွင်း ပြုလုပ်မည့် လေ့ကျင့် ခန်းများ ပါဝင်သည်။

ဂျပန်နဲ့အိန္ဒိယ စစ်ရေးပူးတွဲလေ့ကျင့်နေစဉ်

ထို့နောက် ဆိပ်ကမ်းများတွင် ပြုလုပ်မည့် လေ့ကျင့်ခန်းများတွင် ပရောဖက်ရှင်နယ်များ၊ အားကစားများနှင့် လူမှုရေး ထိတွေ့ဆက်ဆံမှုများ ပါဝင်မည်ဖြစ်သလို နှစ်နိုင်ငံရေတပ်သည် ပင်လယ်ပြင်တွင် တိုက်ခိုက်ရေး စွမ်းရည်များကို မြှင့်တင်ရန်အတွက် ပင်လယ်ရေမျက်နှာပြင်အပေါ်ဘက်နှင့် ရေမျက်နှာပြင်အောက်ဘက်များတွင် ဘက်စုံပါဝင်သည့် စစ်ဆင်ရေးများကို လေ့ကျင့်သွားမည်ဖြစ်ကြောင်း ထုတ်ပြန်ချက်ခဲ့သည်။

ထိုစစ်ရေးလေ့ကျင့်မှုတွင် အိန္ဒိယရေတပ် (INS) ၏ INS Shivalik သင်္ဘောနှင့် JMSDF ၏ ပဲ့ထိန်းဒုံးကျည်တပ် ဖျက်သင်္ဘော JS Yugiri သင်္ဘောတို့ ပါဝင်မည်ဖြစ်သလို နှစ်နိုင်ငံရေတပ်များမှ ရဟတ်ယာဉ်များလည်း ပါဝင် လိမ့်မည်ဟု အိန္ဒိယကာကွယ်ရေးဝန်ကြီးဌာနက ပြောကြားခဲ့သည်။

တစ်နှစ်ထက်တစ်နှစ် စစ်ရေးလေ့ကျင့်မှု အသွင်အပြင်များ ရှုပ်ထွေးလာမှုနှင့်အတူ JIMEX 24 စစ်ရေး လေ့ကျင့်မှု သည် နှစ်နိုင်ငံရေတပ်အကြား အပြန်အလှန် ပူးပေါင်းဆောင်ရွက်မှုကို မြင့်တက်စေရန်နှင့် အင်ဒို-ပစိဖိတ်ဒေသ တွင် ပင်လယ်ရေကြောင်း လုံခြုံရေးကို ရှေးရှုသည့် ကတိကဝတ်များကို ထပ်လောင်း အတည်ပြုရန် အထောက် အကူ ဖြစ်စေလိမ့်မည်ဟု ထုတ်ပြန်ချက်တွင် ဖော်ပြခဲ့သည်။

Source: The Print

CNI International News

အစ္စလာမ်မာဘက်၊ ဇွန်လ ၁၃

ပါကစ္စတန်၏ ပိုမိုဆိုးရွားလာသည့် အများပြည်သူ့ ကြွေးမြီအကျပ်အတည်းကို ဖြစ်စေခဲ့သော  အဓိက အကြောင်းရင်းများထဲတွင် ကာကွယ်ရေးပစ္စည်းများ မဆင်မခြင် ဝယ်ယူမှုလည်း ပါဝင်နေသည်ဟု al arabiya post မှ ဖော်ပြခဲ့သည်။

လက်ရှိတွင် ပါကစ္စတန်၏ ပြည်သူ့ကြွေးမြီ ပမာဏသည် ရူပီး ၆၇ ဒသမ ၅ ထရီလျံအထိ မကြုံစဖူး မြင့်တက်ခဲ့ပြီး သန်းနှင့်ချီသည့် ပါကစ္စတန်ပြည်သူများအတွက် အလွန်မျှော်လင့်ချက် ကင်းမဲ့သော အနေအထားကို ရောက်ရှိစေခဲ့ သည်။

ပါကစ္စတန်စစ်တပ်၏ ဗိုလ်ချုပ်ကြီးများနှင့် ရေတပ်ဗိုလ်ချုပ်ကြီးများသည် ပြီးခဲ့သည့် နှစ်များအတွင်း တူရကီ၊ တရုတ် အပါအဝင် အခြားနိုင်ငံများနှင့် လက်နက်ဝယ်ယူမှုများ၊ လက်နက်ပူးပေါင်းထုတ်လုပ်ရန် သဘောတူညီမှု များကို မဆင်မခြင် လုပ်ဆောင်ခဲ့သည့် အမှန်တရားကို ပါကစ္စတန် ဘဏ္ဍာရေးဝန်ကြီးဌာနနှင့် ပါကစ္စတန် ဗဟိုဘဏ်တို့က ထုတ်ပြန်ခဲ့သည်။

ပါကစ္စတန်စစ်သားကို တွေ့ရစဉ်

ထို့ပြင် ပါကစ္စတန်၌ စီးပွားရေး ချွတ်ခြုံကျနေသည့် နှစ်များအတွင်း စစ်တပ်ခေါင်းဆောင်များ၏ ပြည်ပခရီးစဉ်များ၊ ပြည်ပခေါင်းဆောင်များက လာရောက်သည့် ပြည်တွင်းခရီးစဉ်များလည်း မြင့်တက်ခဲ့ကြောင်း ဖော်ပြထားသည်။

အစိုးရက ပေးဆောင်ရမည့် ကြွေးမြီများအနက် ရူပီး ၄ ဒသမ ၂၂ ထရီလျံ အတိုးနှုန်း ပေးချေမှု အပါအဝင် ၆၄ ရာခိုင်နှုန်းအထိ မြင့်တက်ခဲ့သည်။ 

ကြွေးမြီပေးချေမှု စုစုပေါင်းသည် ရသုံးငွေ စာရင်းဆိုင်ရာ ခန့်မှန်းငွေကြေး ရူပီး ၇ ဒသမ ၃ ထရီလျံကို ကျော်လွန် ပြီး ရူပီး ၈ ထရီလျံအထိ ရှိလာနိုင်ကြောင်း လေ့လာသူများက ပြောကြားခဲ့သည်။

ကြွေးမြီပြန်လည် ပေးသွင်းမှုသည် ဖက်ဒရယ် အခွန်ဝင်ငွေ၏ ၈၁ ရာခိုင်နှုန်းကျော်ကို ကုန်ကျစေခဲ့ပြီး ကြွေးမြီနှင့် အခွန်ငွေအကြား ကြီးမားစွာ ကွာဟနေမှုသည် နိုင်ငံ့စီးပွားရေး ပြိုလဲစေမည့် အနေအထားအထိ ရောက်ရှိလာ စေခဲ့သည်။

ပါကစ္စတန်၏ ကြည်းတပ်၊ ရေတပ်နှင့် လေတပ်သည် မတူညီသည့် နိုင်ငံများနှင့် လက်နက်ဝယ်ယူရေး၊ လက်နက် ထုတ်လုပ်ရေး သဘောတူညီချက်များကို လုပ်ဆောင်နေချိန်တွင် အများပြည်သူ့ကြွေးမြီများကြောင့် စီးပွားရေး ချွတ်ခြုံကျမည့် အခြေအနေနှင့် ရင်ဆိုင်နေရသည်။

ပါကစ္စတန်ပြည်သူများ စားစရာကို လုနေကြစဉ်

ပါကစ္စတန်ကြည်းတပ်သည် တရုတ်ကုမ္ပဏီများနှင့် ပူးပေါင်းပြီး တိုက်ပွဲဝင် တင့်ကားများ ထုတ်လုပ်မှုကို ငွေကြေး အများအပြား ရင်းနှီးမြှုပ်နှံလျက်ရှိသည်။

ထို့ပြင် ပါကစ္စတန်ရေတပ်သည် တူရကီ၊ တရုတ်ကုမ္ပဏီများနှင့် ပူးပေါင်းပြီး ကင်းလှည့် သင်္ဘောများနှင့် ရေငုပ် သင်္ဘောများလည်း ထုတ်လုပ်လျက်ရှိသည်။

ထို့နောက် ပါကစ္စတန်လေတပ်ကလည်း တိုက်ခိုက်ရေး ဒရုန်းများနှင့် ဖောက်ခွဲရေး လက်နက်ခဲယမ်းများ ရရှိရေး အတွက် ငွေကြေးအများအပြား ရင်းနှီးမြှုပ်နှံလျက်ရှိသည်။

ပါကစ္စတန်တွင် စီးပွားရေး စိန်ခေါ်မှုများ ရှိနေသည့်တိုင် ပါကစ္စတန်စစ်တပ်သည် ပြီးခဲ့သည့်နှစ်က စစ်ရေး အသုံးစရိတ် ဒေါ်လာ ၈၅၂၁ သန်းအထိ သုံးစွဲခဲ့သည်။

ယခုနှစ်တွင်လည်း စီးပွားရေး အခြေအနေ မကောင်းသည့်တိုင် စစ်အသုံးစရိတ်ကို ပြီးခဲ့သည့်နှစ်ထက် ပိုမို သုံးစွဲဖွယ်ရှိနေသည်ဟု လေ့လာသူများက ပြောကြားခဲ့သည်။

Source: al arabiya post

CNI International News

နယူးဒေလီ၊ ဇွန်လ ၁၂

အိန္ဒိယနိုင်ငံတွင် ပြီးခဲ့သည့် သီတင်းပတ်က ပြီးဆုံးသွားခဲ့သော လွှတ်တော်ရွေးကောက်ပွဲ၌ လက်ရှိဝန်ကြီးချုပ် မိုဒီ (Modi)သည် အနိုင်ရရှိခဲ့သော်လည်း အနောက်နိုင်ငံများမှ မီဒီယာများသည် မိုဒီ၏ အောင်ပွဲကို အကျယ်တဝင့် ဖော်ပြခဲ့ခြင်းမရှိဘဲ မှေးမှိန်စေရန် လုပ်ဆောင်ခဲ့သည်ဟု First Post သတင်းဝက်ဘ်ဆိုက်မှ ဖော်ပြခဲ့သည်။

အိန္ဒိယသည် ကမ္ဘာ့အကြီးဆုံး ဒီမိုကရေစီနိုင်ငံ ဖြစ်သည်နှင့်အညီ အိန္ဒိယအထွေထွေရွေးကောက်ပွဲကို ကမ္ဘာ တစ်ဝန်းလုံးက စောင့်ကြည့်ခဲ့ပြီး နိုင်ငံတကာ သတင်းမီဒီယာများတွင် ခေါင်းကြီးပိုင်းသတင်းများအဖြစ် ဖော်ပြခဲ့ကြသည်။

သို့သော် ထိုရွေးကောက်ပွဲတွင် မိုဒီက အနိုင်ရရှိခဲ့ချိန်၌ အနောက်နိုင်ငံများမှ မီဒီယာများသည် ၎င်းတို့၏ သတင်းများကို ဘက်လိုက်ဖော်ပြသည့်ပုံစံဖြင့် ထုတ်ပြန်ခဲ့ကြသည်ဟု လေ့လာသူတစ်ဦးက ပြောသည်။

မိုဒီကို ဖော်ပြထားစဉ်

ထိုသို့ ဘက်လိုက်ဖော်ပြသည့် သတင်းများသည် ပုံစံအမျိုးမျိုးဖြစ်ပြီး မိုဒီ၏ နိုင်ငံရေး အယူအဆများမှအစ အိန္ဒိယ ဒီမိုကရေစီ၏ ရှုပ်ထွေးပွေလီမှုကို ကျော်လွန်သည့် ကျယ်ပြန့်သော ဇာတ်လမ်းများနှင့် မိုဒီ၏ လူကြိုက်များမှု ကျဆင်းကြောင်း ပုံဖော်ထားသည့် လူမှု-နိုင်ငံရေး အကြောင်းအရာများအဆုံး ပုံစံအမျိုးမျိုးဖြင့် ဖော်ပြခဲ့ကြသည်ဟု ဆိုသည်။

"မိုဒီရဲ့ ဂရုတစိုက် ပြုမှုနေထိုင်ခဲ့တဲ့ ယဉ်ကျေးပျူငှာမှုပုံစံဟာ အခုထက်ပိုပြီး အောင်မြင်နိုင်တော့မှာ မဟုတ်ပါဘူး" ဟု ရွေးကောက်ပွဲတွင် မိုဒီ အနိုင်ရပြီးနောက် The New York Times သတင်းစာက မှတ်ချက်ပြုခဲ့သည်။

ထိုသတင်းစာ၏ မျက်နှာဖုံးတွင်လည်း မိုဒီ၏ ရွေးကောက်ပွဲ အနိုင်ရမှုကို "တတိယ သက်တမ်းကာလ အကူအပြောင်းတွင် ဝန်ကြီးချုပ်အတွက် အလေးအနက် ဆင်ခြင်ရမည့် မဲရလဒ်" ဟူသည့်စာသားဖြင့် ဖော်ပြခဲ့သည်။

မိုဒီနဲ့ သူရဲ့ထောက်ခံသူတွေကို တွေ့ရစဉ်

ထိုဖော်ပြချက်သည် ယခုနှစ် ရွေးကောက်ပွဲ၌ မိုဒီ၏ BJP ပါတီက ၂၀၁၉ ခုနှစ် ရွေးကောက်ပွဲကကဲ့သို့ လွှတ်တော် တွင် နေရာအများစု အနိုင်မရခဲ့ဘဲ မဟာမိတ်ပါတီများကို မှီခိုခဲ့ရသည့် အခြေအနေကို ရည်ညွှန်းဖော်ပြခဲ့ပုံ ပေါ်သည်။

ဝါရှင်တန်ပို့စ် သတင်းစာတွင်လည်း အိန္ဒိယ အထွေထွေရွေးကောက်ပွဲရလဒ်သည် "ဝန်ကြီးချုပ်မိုဒီ ခေါင်းဆောင်မှု အပိုင်း၏ ထင်မှတ်မထားသည့် ငြင်းပယ်ခံရမှု" ဟု ဖော်ပြခဲ့ပြီး "အံအားသင့်ဖွယ် မဲရလဒ်လျော့နည်းမှု" ဟုလည်း ဖော်ပြခဲ့သည်။

ထို့ပြင် ဗြိတိန်၏ The Telegraph ၊ The Guardian ၊ Financial Times နှင့် The Economist တို့ အပါအဝင် အခြား နာမည်ကြီး နိုင်ငံတကာသတင်း မီဒီယာများကလည်း မိုဒီ၏ ရွေးကောက်ပွဲအနိုင်ရရှိမှုကို အပြုသဘော ဆောင်သည့် ရှုထောင့်ထက် ဝေဖန်သည့်ရှုထောင့်များမှ ဖော်ပြခဲ့ကြသည်ဟု လေ့လာသူများက ပြောကြားခဲ့သည်။

Source: firstpost

CNI International News

ဘန်ကောက်၊ ဇွန်လ ၁၂

ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) သည် တော်ဝင်အသရေဖျက်မှု စွဲချက်ဖြင့် စွပ်စွဲပြစ်တင်ခံရမှုကို ရှောင်လွှဲရန် ကြိုပမ်းမှုတစ်ခုအဖြစ် သက်ဆင်၏ ရှေ့နေများသည် ထိုစွပ်စွဲချက်ကို ပြန်လည် သုံးသပ်ပေးရန် ပြီးခဲ့သည့်သီတင်းပတ်က အစိုးရရှေ့နေချုပ်အား အသနားခံစာ တင်ခဲ့သည်ဟု Thai PBS World မှ ဖော်ပြခဲ့သည်။

သက်ဆင်သည် ဇွန်လ ၁၈ ရက်တွင် ပြစ်မှုဆိုင်ရာတရားရုံး၌ ကြားနာစစ်ဆေးခံရမည်ဖြစ်သည်။ 

သူသည် ယခင်က ကြားနာစစ်ဆေးမှု ခံယူရန် သတ်မှတ်ထားသည့် ရက်ဖြစ်သော မေလ ၂၉ ရက်က တရားခွင်သို့ လာရောက်နိုင်ခြင်းမရှိခဲ့ဘဲ ထိုအချိန်က COVID-19 ကူးစက်ခံရထားကြောင်း သက်ဆင်က ထွက်ဆိုခဲ့သည်။

သက်ဆင်သည် ၂၀၁၅ ခုနှစ်က တောင်ကိုရီးယား မီဒီယာတစ်ခုနှင့် ပြုလုပ်ခဲ့သည့် အင်တာဗျူးတွင် ထိုင်းဘုရင် စနစ်အား ဝေဖန်စော်ကားသည်ဟု ယူဆရသည့် မှတ်ချက်စကားများ ပြောကြားမှု၊ ကွန်ပျူတာ ရာဇဝတ်မှုအက် ဥပဒေကို ချိုးဖောက်မှုတို့ဖြင့် တရားစွဲဆိုရန် အစိုးရရှေ့နေချုပ် အမ်နက် ခက်ချာရွန်နက် (Amnat Chetcharoenrak) က ဆုံးဖြတ်ခဲ့သည်။

ထိုင်းဘုရင်မိသားစုကို တွေ့ရစဉ်

သက်ဆင်၏ ရှေ့နေများက တင်သွင်းသည့် အသနားခံစာတွင် ထိုအမှုကို စုံစမ်းစစ်ဆေးသော  အစိုးရရှေ့နေချုပ် ဟောင်း တရာကူလ် ဝင်နစ်ချိုင်ပက် (Trakul Winitchaipark) ဦးဆောင်ခဲ့သည့် စုံစမ်းစစ်ဆေးရေးကော်မတီ သည် လွတ်လပ်မှု မရှိကြောင်းနှင့် ၎င်းအား တရားစွဲဆိုရန် ယခင်စစ်အစိုးရ၏ ခြိမ်းခြောက်အကျပ်ကိုင်မှုကို ခံခဲ့ရကြောင်း သက်ဆင်က ထွက်ဆိုထားသည်။ 

ဇွန်လ ၈ ရက်ကလည်း သက်ဆင်က သူသည် တော်ဝင်အသရေဖျက်မှုဥပဒေနှင့် ပတ်သက်ပြီး လွတ်လပ်မှုမရှိ သည့် စုံစမ်းစစ်ဆေးရေး အရာရှိများ၏ တရားမျှတမှုမရှိသော တရားစွဲဆိုမှုကို ခံခဲ့ရခြင်းဖြစ်ကြောင်း မီဒီယာ များကို ပြောကြားခဲ့သည်။

ထိုစွဲချက်သည် အဆိပ်ပင်မှ အဆိပ်သီးတစ်လုံး ဖြစ်သည်ဟု သက်ဆင်က ခိုင်းနှိုင်းပြောဆိုခဲ့သည်။

ဇွန်လ ၁၁ ရက်က အစိုးရရှေ့နေချုပ်ဟောင်း တရာကူလ်ကမူ သက်ဆင်၏ ပြောကြားချက်များကို ငြင်းဆိုခဲ့သည်။ 

"ယောကျ်ားတစ်ယောက်ရဲ့ ဂုဏ်သိက္ခာနဲ့အညီ အတည်ပြုရမယ်ဆိုရင် အစိုးရရှေ့နေချုပ်အဖြစ် ကျနော် တာဝန် ထမ်းဆောင်ခဲ့ချိန်က ပြစ်မှုဆိုင်ရာ လုပ်ထုံလုပ်နည်းဥပဒေရဲ့ ပိုဒ်ခွဲ ၂၀ နဲ့အညီ စုံစမ်းစစ်ဆေးမှုကို လုပ်ဆောင်ခဲ့ တာပါ။ ဘယ်သူကမှ ကျနော့်ကို ခြိမ်းခြောက် အကျပ်ကိုင်တာမျိုး မရှိခဲ့ပါဘူး" ဟု တရာကူလ်က Facebook တွင် ရေးသားခဲ့သည်။

Source: Thai PBS World

CNI International News

အစ္စလာမ်မာဘက်၊ ဇွန်လ ၁၁

ပါကစ္စတန်တွင် စည်းကမ်းထိန်းချုပ်မှု ကင်းမဲ့သည့် လက်နက်ကုန်ကူးမှုများကြောင့် နိုင်ငံအတွင်း လုံခြုံရေး အခြေအနေနှင့်ပတ်သက်ပြီး စိုးရိမ်မှုများ မြင့်တက်လျက်ရှိသည်ဟု Khaama သတင်းဝက်ဘ်ဆိုက်မှ ဖော်ပြခဲ့ သည်။

ပါကစ္စတန်တွင် စက်သေနတ် အသေးစားဖြစ်သည့် SMG အမျိုးအစား သေနတ်များနှင့် အခြားတားမြစ်ထားသည့် လက်နက်များအတွက် လိုင်စင်ပေါင်း ၁၁၇,၄၇၉ ခုအထိ အံ့အားသင့်ဖွယ် ထုတ်ပေးထားခဲ့ပြီး ထိုလက်နက်များထဲမှ ၁၁၄,၉၄၆ လက်သည် ပုဂ္ဂလိကလက်ထဲတွင် ရှိနေသည်။

ထိုအချက်အလက်ကို ၂၀၂၄ ခုနှစ်၊ မတ်လ ၁၅ ရက်က ပါကစ္စတန်တရားရုံးချုပ်တွင် ကြားနာစစ်ဆေးမှုအတွင်း ဖက်ဒရယ်အစိုးရက ထုတ်ဖော် ပြောဆိုခဲ့ခြင်းဖြစ်ကာ ထိုကဲ့သို့ အန္တရာယ်များသည့် လက်နက်များ ပျံ့နှံ့နေမှု အခြေအနေကို စိုးရိမ်မှုများ မြင့်တက်စေခဲ့သည်။

တရားရုံးချုပ်၏ တရားသူကြီးချုပ် ကာဇီ ဖာအက်ဇ် အစ္စာ (Qazi Faez Isa) ကလည်း ထိုလက်နက်များကို အများ ပြည်သူများ၏ လက်ထဲတွင် ကျယ်ကျယ်ပြန့်ပြန့် ရောက်ရှိနေမှုအား အလွန်စိုးရိမ်ကြောင်း ပြောကြားခဲ့သည်။

မေလ ၂၁ ရက်က အကြမ်းဖက်မှု တိုက်ဖျက်ရေးဌာနက လက်နက်ကုန်ကူးသူ ၂ ဦးကို ဖမ်းဆီးခဲ့ပြီး ၎င်းတို့ သိမ်းဆည်းထားသည့် လိုင်စင်မဲ့လက်နက်များကို သိမ်းဆည်းရမိခဲ့သည်။

ထိုလက်နက်များကို ခိုင်ဘာ ပက်ခ်ထန်ခါဝါ (Khyber Pakhtunkhwa) ပြည်နယ်၊ ဒါရာအဒမ်ခဲလ် (Darra Adam Khel) မြို့မှ ကရာချီ (Karachi) မြို့သို့ မှောင်ခိုကူးခဲ့ခြင်းဖြစ်သည်ဟု ဖမ်းဆီးခံရသူ ၂ ဦးက ထွက်ဆိုခဲ့သည်။

လက်နက်ခဲယမ်းများကိုတွေ့ရစဉ်

ထိုလက်နက်များကို ပိုင်ဆိုင်သည့် ခိုင်ဘာပက်ခ်ထန်ခါဝါပြည်နယ်ရှိ ကုမ္ပဏီများသည် ၎င်းတို့၏ ဖောက်သည် များကို အွန်လိုင်းမှတဆင့် လက်နက်များ ရောင်းချခဲ့ခြင်းဖြစ်သည်ဟု သံသယရှိသူ ၂ ဦးက ထွက်ဆိုခဲ့သည်။

၂၀၂၄ ခုနှစ်၊ ဧပြီ ၈ ရက်ကလည်း အကြမ်းဖက်မှု တိုက်ဖျက်ရေးဌာနသည် ကရာချီမြို့သို့ လက်နက်မှောင်ခို ကူးမှုတွင် ပါဝင်ပတ်သက်သည့် ခိုင်ဘာပက်ခ်ထန်ခါဝါရဲတပ်ဖွဲ့မှ ရဲအရာရှိတစ်ဦးကို ဖမ်းဆီးခဲ့သည်။

ဖမ်းဆီးခံခဲ့ရသည့် ရဲအရာရှိသည် လက်နက်မှောင်ခိုကူးသည့် ဂိုဏ်းများနှင့် ပတ်သက်မှုရှိနေပြီး ကျောင်းသားများ အသုံးပြုသည့် လွယ်အိတ်များထဲတွင် လက်နက်ငယ်များထည့််ပြီး သိမ်းဆီးထားခဲ့သည်ကို အာဏာပိုင်များက တွေ့ရှိခဲ့သည်။

ထို့ကြောင့် ပါကစ္စတန်တွင် လိုင်စင်မဲ့ သေနတ်များ ပြန့်နှံ့နေမှုနှင့် အချို့လက်နက် မှောင်ခိုကူးမှုများတွင် ရဲအရာရှိများပင် ပါဝင်နေသဖြင့် အများပြည်သူလုံခြုံရေးအတွက် အလွန်စိုးရိမ်စရာ ဖြစ်သည်ဟု ကျွမ်းကျင် သူများက ပြောကြားခဲ့သည်။

Source: Khaama

CNI International News

ပဲရစ်၊ ဇွန်လ ၁၁

ပြင်သစ်သမ္မတ မက်ခရွန် (Emmanuel Macron) က ပါလီမန်ကို ဖျက်သိမ်းမည်ဖြစ်ကြောင်း ကြေညာခဲ့ပြီး လွှတ်တော်ရွေးကောက်ပွဲအသစ်ကို ပြုလုပ်ရန် တိုက်တွန်းခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ဥရောပလွှတ်တော် ရွေးကောက်ပွဲတွင် မက်ခရွန်၏ မဟာမိတ်များသည် အတိုက်အခံဖြစ်သည့် မာရိန်း လီပန် (Marine Le Pen) ၏ လက်ယာစွန်း RN ပါတီကို အပြတ်အသတ် ရှုံးနိမ့်ခဲ့ပြီးနောက် မက်ခရွန်၏ ကြေညာချက် ထွက်ပေါ်ခဲ့ခြင်းဖြစ်သည်။

ဇွန်လ ၉ ရက်က ဥရောပလွှတ်တော် ရွေးကောက်ပွဲ ရလဒ်များသည် ၎င်း၏ အစိုးရအဖွဲ့အတွက် စိတ်ပျက်စရာ အခြေအနေဖြစ်ခဲ့ပြီး လျစ်လျူမရှုနိုင်သည့် အနေအထားဖြစ်ကြောင်း မက်ခရွန်က ပြောကြားခဲ့သည်။

ထို့ပြင် ၎င်း၏ နိုင်ငံတော်မိန့်ခွန်းအတွင်း မက်ခရွန်က ဇွန်လ ၃၀ ရက်တွင် အောက်လွှတ်တော် ရွေးကောက်ပွဲကို ပြုလုပ်ရန်နှင့် ဇူလိုင် ၇ ရက်၌ ဒုတိယအကျော့ ရွေးကောက်ပွဲအား ပြုလုပ်လိမ့်မည်ဖြစ်ကြောင်း ပြောကြားခဲ့သည်။

"အခုအချိန်က ရှင်းရှင်းလင်းလင်း လုပ်ရမယ့် အချိန်ဖြစ်ပါတယ်။ ခင်ဗျားတို့ရဲ့ အသံတွေ၊ ခင်ဗျားတို့ရဲ့ စိုးရိမ်ပူပန်မှု တွေကို ကျနော် ကြားခဲ့ရပါတယ်။ ဒါကို ကျနော် ပြန်မဖြေဘဲ မနေပါဘူး။ ပြင်သစ်ဟာ တည်ငြိမ်အေးချမ်းပြီး သဟဇာတ ဖြစ်မှုအတွက် ရှင်းလင်းတဲ့ လုပ်ဆောင်ချက်တစ်ခု လိုအပ်ပါတယ်" ဟု မက်ခရွန်က ပြောကြားခဲ့သည်။

အတိုက်အခံပါတီက လီပန်ကို တွေ့ရစဉ်

လက်ယာစွန်းပါတီများသည် ဥရောပတိုက် တစ်တိုက်လုံးတွင် တိုးတက်မှုရရှိနေကြောင်း၊ ထိုအခြေအနေကြောင့် မိမိအနေဖြင့် ရာထူးမှ မနုတ်ထွက်နိုင်သေးကြောင်း ၎င်းက ဆိုသည်။

ဥရောပရွေးကောက်ပွဲတွင် လီပန်၏ NR ပါတီသည် မဲရလဒ် ၃၂ ရာခိုင်နှုန်းရရှိခဲ့ပြီး မဲရလဒ် ၁၅ ရာခိုင်နှုန်းသာ ရရှိခဲ့သည့် မက်ခရွန်၏ Renaissance ပါတီထက် မဲနှစ်ဆကျော် ပိုမိုများပြားခဲ့သည်။ 

မက်ခရွန်၏ မဟာမိတ်ဖြစ်သည့် ဆိုရှယ်လစ်ပါတီသည် မဲရလဒ် ၁၄ ရာခိုင်နှုန်းသာ ရရှိခဲ့သည်။

လီပန်၏ ပါတီသည် ၂၀၁၉ ခုနှစ်က နောက်ဆုံးအကြိမ် ပြုလုပ်ခဲ့သည့် ဥရောပသမဂ္ဂ ရွေးကောက်ပွဲအတွင်းက ရရှိခဲ့သည့် မဲရမှတ်ထက် ၁၀ မှတ် ပိုမိုမြင့်တက်ခဲ့ကာ သမ္မတသက်တမ်းပြည့်ရန် သုံးနှစ်သာလိုတော့သည့် မက်ခရွန်၏ နိုင်ငံရေးအင်အားစုသည် အားနည်းလာမည့် အခြေအနေတွင် ရှိနေသည်။

မက်ခရွန်၏ ကြေညာချက် ထွက်ပေါ်လာခဲ့ပြီးနောက် လီပန်က ပြင်သစ်နိုင်ငံအနေဖြင့် လာမည့် ရွေးကောက်ပွဲ များတွင် မိမိတို့အား ယုံကြည်ခဲ့မည်ဆိုပါက အာဏာကို ရယူရန် အသင့်ရှိကြောင်း ပြောကြားခဲ့သည်။

Source: အယ်လ်ဂျာဇီးယား

CNI International News

ကိုင်ရို၊ ဇွန်လ ၁၁

ဂါဇာဒေသတွင် ဖြစ်ပွားနေသည့် စစ်ပွဲကို အဆုံးသတ်ရန် အစ္စရေးအား ဖိအားပေးဖို့ ဟားမာ့စ်အဖွဲ့၏ ထိပ်သီး အရာရှိတစ်ဦးက အမေရိကန်ကို ဇွန်လ ၁၀ ရက်တွင် တိုက်တွန်းခဲ့သည်ဟု ရိုက်တာမှ ဖော်ပြခဲ့သည်။

ဂါဇာစစ်ပွဲ အပစ်အခတ်ရပ်စဲရေး အားထုတ်ကြိုးပမ်းမှုများကို တွန်းအားပေးလုပ်ဆောင်ရန် ဇွန်လ ၁၀ ရက်က အမေရိကန်နိုင်ငံခြားရေးဝန်ကြီး အန်တိုနီဘလင်ကင် (Antony Blinken) အရှေ့အလယ်ပိုင်းဒေသသို့ လာရောက် မည့် ခရီးစဉ်မတိုင်မီ ဟားမာ့စ်ထိပ်သီးအရာရှိ ဆာမီ အဘူ ဇူဟရီ (Sami Abu Zuhri) က တိုက်တွန်းခဲ့ခြင်း ဖြစ် သည်။

ဘလင်ကင်သည် အီဂျစ်နှင့် အစ္စရေးသို့ သွားရောက်မည်ဖြစ်ပြီး ဂါဇာစစ်ပွဲကို လက်ဘနွန်နိုင်ငံအထိ ပျံ့နှံ့မသွားစေ ရန် စိတ်ချသေချာစေရေးအတွက် ရည်ရွယ်ပြီး သက်ဆိုင်ရာ အရာရှိများနှင့် ဆွေးနွေးမှုများ ပြုလုပ်မည်ဖြစ်သည်။

“ဂါဇာစစ်ပွဲ အဆုံးသတ်စေဖို့အတွက် အစ္စရေးကို ဖိအားပေးဖို့ အမေရိကန်အစိုးရကို ကျနော်တို့ တိုက်တွန်းပါ တယ်။ ဟားမာ့စ်အဖွဲ့ဟာလည်း စစ်ပွဲအဆုံးသတ်ဖို့အတွက် ဘယ်လိုအစီအစဉ်နဲ့ပဲဖြစ်ဖြစ် အပြုသဘောဆောင်စွာ ဖြေရှင်းဖို့ အဆင်သင့်ပါပဲ" ဟု ဇာဟရီက ပြောသည်။

ပြီးခဲ့သည့်နှစ် အောက်တိုဘာ ၇ ရက် စတင်ခဲ့သည့် အစ္စရေး-ဟားမာ့စ် စစ်ပွဲ ဖြစ်ပွားချိန်ကတည်းက အရှေ့ အလယ်ပိုင်းဒေသသို့ လာရောက်ခဲ့သည့် ၈ ကြိမ်မြောက် ခရီးစဉ်တွင် ဘလင်ကင်သည် ဂျော်ဒန်နှင့် ကာတာ နိုင်ငံများသို့လည်း သွားရောက်ရန် စီစဉ်ထားသည်။

ဟားမာ့စ်ထိပ်သီးအရာရှိ ဆာမီ အဘူ ဇူဟရီကိုတွေ့ရစဉ်

ဘလင်ကင်သည် ကိုင်ရို (Cairo) မြို့တော်တွင် အီဂျစ်သမ္မတ အဗ္ဗဒယ် ဖာတာ အယ်စီစီ (Abdel Fattah al-Sisi) နှင့် တွေ့ဆုံမည်ဖြစ်ပြီး၊ ထို့နောက် အစ္စရေးသို့သွားကာ အစ္စရေးဝန်ကြီးချုပ် ဘင်ဂျမင် နေတန်ယာဟု (Benjamin Netanyahu) ၊ အစ္စရေးကာကွယ်ရေးဝန်ကြီး ယိုအက်ဗ် ဂဲလန့် (Yoav Gallant) တို့နှင့် တွေ့ဆုံမည်ဖြစ်သည်။

ဇွန်လ ၁၀ ရက် နံနက်အစောပိုင်းက ဂါဇာရှိ လူဦးရေ ထူထပ်သိပ်သည်းပြီး စစ်သွေးကြွများရှိသည့် ရှာဘူရာ (Shaboura) မြို့သို့ အစ္စရေးတင့်ကားများ ဝင်ရောက်ရန် ကြိုးပမ်းခဲ့သည်ဟု ဒေသခံများက ပြောကြားခဲ့သည်။

အစ္စရေးတင့်ကားတပ်ဖွဲ့သည် ဂါဇာနှင့် အီဂျစ်နယ်စပ် ဒေသတစ်ခုလုံးကို ပိတ်ဆို့ထားကာ အိုးမဲ့အိမ်မဲ့ဖြစ်ခဲ့ရသည့် လူပေါင်းသန်းချီ ခိုလှုံနေသည့် ရာဖာ (Rafah) မြို့ကို ဝင်ရောက် တိုက်ခိုက်မှုများ ပြုလုပ်ခဲ့သဖြင့် လူပေါင်းသိန်းချီ ဘေးလွတ်ရာ ထွက်ပြေးတိမ်းရှောင်ခဲ့ရသည်။

မေလ ၃၁ ရက်က အမေရိကန်သမ္မတ ဂျိုးဘိုင်ဒန်သည် အစ္စရေးက အဆိုပြုထားသည့် အပစ်အခတ်ရပ်စဲရေး အဆိုပြုချက်ကို ထုတ်ပြန်ခဲ့ပြီးနောက် ဘလင်ကင်၏ အရှေ့အလယ်ပိုင်းခရီးစဉ် ပေါ်ပေါက်လာခဲ့ခြင်းဖြစ်သည်။

Source: ရိုက်တာ

CNI International News

နယူးဒေလီ၊ ဇွန်လ ၁၁

အိန္ဒိယသည် တိဘက်ဒေသရှိ နေရာဒေသပေါင်း ၃၀ ကျော်ကို အမည်များ ပြောင်းလဲသတ်မှတ်ရန် စီစဉ်နေသည် ဟု Tibetan Review သတင်းဝက်ဘ်ဆိုက်မှ ဖော်ပြခဲ့သည်။

မကြာသေးမီနှစ်များအတွင်း အိန္ဒိယ၏ အာရုနာချယ်ပရာဒေ့ရှ်(Arunachal Pradesh) ပြည်နယ်ကို ပိုင်ဆိုင် ကြောင်းကြေညာခဲ့သည့် တရုတ်၏ ကြေညာချက်များအား အိန္ဒိယက ငြင်းဆိုခဲ့ပြီးနောက် တရုတ်၏ နယ်နိမိတ် ပိုင်ဆိုင်ကြောင်း ထွက်ဆိုချက်များကို တုန့်ပြန်သည့်အနေဖြင့် ထိုကဲ့သို့ လုပ်ဆောင်ရန် စီစဉ်ခဲ့ခြင်းဖြစ်သည်။

တရုတ်က အုပ်ချုပ်ထားသည့် တိဘက်ဒေသရှိ နေရာများကို အမည်ပြောင်းလဲ သတ်မှတ်မည့် စာရင်းကို အိန္ဒိယစစ်တပ်က သုတေသန ပြုလုပ်ခဲ့ခြင်းဖြစ်သည်။

ထို့နောက် လာမည့်သီတင်းပတ်တွင် အစိုးရအဖွဲ့သစ် စတင် တာဝန်ထမ်းဆောင်ပြီးနောက် မကြာမီအချိန်အတွင်း ထုတ်ပြန်ကြေညာလိမ့်မည်ဟု thediplomat.com သတင်းဝက်ဘ်ဆိုက်မှ ဖော်ပြခဲ့သည်။

တိဘက်ဒေသကိုတွေ့ရစဉ်

"ဝန်ကြီးချုပ် မိုဒီ (Modi)ဟာ သူ့ရဲ့ပုံရိပ်ကို ပိုမိုခိုင်မာစေဖို့အတွက် အဲဒီသုတေသန စစ်တမ်းတွေနဲ့ အနိုင်ယူဖို့ ကြိုပမ်းခဲ့ပါတယ်။ သူ့ရဲ့ ပုံရိပ်ကို မြှင့်တင်ဖို့အတွက် တိဘက်ဒေသက နေရာတွေကို အမည်ပြောင်းလဲဖို့ အမိန့်ပေး တာဟာ သဘာဝကျပါတယ်" ဟု အိန္ဒိယထောက်လှမ်းရေးဗျူရို အရာရှိဟောင်း ဘီနူဂို့ရှ် (Benu Ghosh) က ပြောကြားခဲ့သည်။

အာရုနာချယ်ပရာဒေ့ရှ် ပြည်နယ်နှင့် အငြင်းပွားနေသည့် နယ်စပ်ဒေသမှ အခြားနယ်မြေများကို တရုတ်က ပိုင်ဆိုင် ကြောင်း ကြေညာမှုကို တုန့်ပြန်သည့် ကမ္ဘာလုံးဆိုင်ရာ လှုပ်ရှားမှု၏ တစ်စိတ်တစ်ပိုင်းအနေဖြင့် ထိုစာရင်းအား မီဒီယာမှတစ်ဆင့် လူသိရှင်ကြား ထုတ်ပြန်မည်ဖြစ်သည်။ 

ထိုသို့ အမည်သစ်များ ပြောင်းလဲသတ်မှတ်မှုကို သမိုင်းကြောင်းအရ ကျယ်ပြန့်သည့် သုတေသနများဖြင့် သတ်မှတ် ခြင်းဖြစ်သည်ဟု အမည်မဖော်လိုသည့် အိန္ဒိယအရာရှိများက ပြောကြားခဲ့သည်။

တိဘက်ဒေသကိုတွေ့ရစဉ်

"အဲဒီနေရာဒေသတွေကို အမည်သစ်ပြောင်းလဲမှုဟာ တိဘက်ဒေသနဲ့ပတ်သက်ပြီး အိန္ဒိယက မေးခွန်းထုတ် လိုက်တဲ့ သဘောသက်ရောက်ပါတယ်။ တရုတ်က တိဘက်ဒေသကို အင်အားသုံး သိမ်းပိုက်ခဲ့ပြီးကတည်းက တိဘက်ဟာ တရုတ်ရဲ့ အစိတ်အပိုင်း ဖြစ်တယ်ဆိုတာ အိန္ဒိယက လက်ခံခဲ့ပါတယ်။ ဒါပေမယ့် အခုချိန်မှာ မိုဒီအစိုးရအဖွဲ့က တရုတ်ရဲ့ နယ်မြေပိုင်ဆိုင်မှုနဲ့ပတ်သက်တဲ့ ရန်လိုမှုတွေကို လမ်းကြောင်းပြောင်းပစ်ဖို့ ပြင်ဆင်နေပုံ ပေါ်ပါတယ်"ဟု ဂို့ရှ်က ပြောကြားခဲ့သည်။

တရုတ်သည် မတ်လအတွင်းက အိန္ဒိယ၏ အာရုနာချယ်ပရာဒေ့ရှ် ပြည်နယ်အတွင်းရှိ နေရာဒေသပေါင်း ၃၀ ခန့်ကို အမည်များ ပြောင်းလဲခဲ့ပြီး အာရုနာချယ်ပရာဒေ့ရှ်အား တရုတ်က ကျန်းနန် (တိဘက်တောင်ပိုင်း) ဒေသအဖြစ် သတ်မှတ်ခေါ်ဆိုခဲ့သည်။

အိန္ဒိယအစိုးရကမူ အာရုနာချယ်ပရာဒေ့ရှ်သည် အိန္ဒိယ၏ အစိတ်အပိုင်းဖြစ်ပြီး တရုတ်၏ ပိုင်ဆိုင်ကြောင်း ထွက်ဆိုချက်များကို ထပ်တလဲလဲ ငြင်းဆိုခဲ့သည်။

Source: Tibetan Review

CNI International News

ပရပ်၊ ဇွန်လ ၁၀

တရုတ်ကွန်မြူနစ်ပါတီ (CCP) သည် ဥရောပရွေးကောက်ပွဲများကို ဩဇာလွှမ်းမိုးရန်အတွက် ဆန်းပြားရှုပ်ထွေး သည့် လုပ်ဆောင်ချက်များဖြင့် ကြိုးပမ်းလာကြောင်း ချက်နိုင်ငံ၊ ပရပ် (Prague) မြို့တော်အခြေစိုက် နိုင်ငံတကာ ရေးရာအသင်း၏ မကြာသေးမီက ထုတ်ပြန်သည့် လေ့လာချက်ကို ကိုးကားပြီး EPARDAFAS သတင်းဝက်ဘ်ဆိုက် မှ ဖော်ပြခဲ့သည်။

ဥရောပပါလီမန် ရွေးကောက်ပွဲမတိုင်မီ ရက်ပိုင်းအလိုတွင် ထုတ်ပြန်ခဲ့သည့် ထိုလေ့လာချက်၌  ရွေးကောက်ပွဲ ဆိုင်ရာ ဝင်ရောက်စွက်ဖက်မှုတွင် တရုတ်၏ ပါဝင်မှု မြင့်တက်နေသော အခြေအနေကို အလေးထားဖော်ပြခဲ့သည်။

တရုတ်သည် ဥရောပရွေးကောက်ပွဲများကို စိုးမိုးခြယ်လှယ်ရန် နိုင်ငံရေး ဩဇာလွှမ်းမိုးမှု၊ သတင်းအချက်အလက် ကြိုးကိုင်ခြယ်လှယ်မှု၊ လာဘ်ပေးလာဘ်ယူမှုနှင့် သူလျှိုလုပ်မှု အပါအဝင် များပြားသည့် နည်းစနစ်များကို အသုံးပြု ခဲ့ကြောင်း သုတေသနပညာရှင်များက တွေ့ရှိခဲ့သည်။

ဥရောပရွေးကောက်ပွဲကို တွေ့ရစဉ်

ဥရောပပါလီမန်တွင် လာမည့် သက်တမ်း ၅ နှစ်အတွက် လွှတ်တော်အမတ်များကို ရွေးကောက်ရန် ဇွန်လ ၆ ရက်မှ ၉ ရက်အထိ ပြုလုပ်သည့် ရွေးကောက်ပွဲ၌ လူပေါင်း သန်း ၄၀၀ နီးပါးက မဲပေးရန် ပြင်ဆင်ခဲ့ချိန် ရွေးကောက်ပွဲ အပေါ် လွှမ်းမိုးရန် တရုတ်၏ ကြိုးပမ်းမှုသတင်း ထွက်ပေါ်ခဲ့ခြင်းဖြစ်သည်။

ထိုရွေးကောက်ပွဲ ရလဒ်များသည် နိုင်ငံရေး အခင်းအကျင်းကို ပြန်လည်ပုံဖော်စေနိုင်ပြီး တရုတ်အပေါ်ထားရှိသည့် မူဝါဒကို ပြောင်းလဲစေမည်ဖြစ်ကာ ဒီမိုကရေစီ လုပ်ငန်းစဉ်များတွင် ပြည်ပ၏ လွှမ်းမိုးမှုနှင့်ပတ်သက်၍ ဥရောပ သမဂ္ဂ၏ ရပ်တည်ချက်အပေါ် သက်ရောက်မှုရှိမည်ဖြစ်သည်။

ထိုလေ့လာချက်တွင် တရုတ်သည် ၎င်း၏ စီးပွားရေး ဖွံ့ဖြိုးတိုးတက်မှုကို လှုံ့ဆော်ရန်နှင့် ခေတ်မီ နည်းပညာများ ကို ရရှိပိုင်ဆိုင်ရန် စေ့ဆော်မှုဖြင့် ထိုကဲ့သို့ ကြားဝင် စွက်ဖက်မှုများကို လုပ်ဆောင်ရန် ကြိုးပမ်းခဲ့ခြင်းဖြစ်သည်ဟု ဖော်ပြထားသည်။

ဥရောပရွေးကောက်ပွဲကို တွေ့ရစဉ်

တရုတ်သည် အမေရိကန်နှင့် တင်းမာမှုများ မြင့်တက်နေချိန်တွင် ကုန်သွယ်ရေးကဏ္ဍ၌ အမေရိကန်အပေါ်  မှီခိုမှု လျှော့ချမည်ဆိုပါက ဥရောပသမဂ္ဂကို အလားအလာရှိသည့် ကုန်သွယ်မိတ်ဖက်အဖြစ် CCP က ရှုမြင်ထားသည်။

ပြီးခဲ့သည့် ဆယ်စုနှစ်အတွင်း CCP သည် နိုင်ငံပေါင်း ၇ နိုင်ငံတွင် ပြုလုပ်ခဲ့သည့် ရွေးကောက်ပွဲ ၁၀ ခုကို ဆိုက်ဘာ နှင့် ဆက်နွှယ်သော ကြားဝင်စွက်ဖက်မှုများ ပြုလုပ်ခဲ့သည်။

ထိုရွေးကောက်ပွဲ အများစုမှာ အာရှ-ပစိဖိတ်ဒေသမှ ဖြစ်သည်ဟု လေ့လာချက်တွင် ဖော်ပြခဲ့သည်။

ထိုကြားဝင်စွက် ဖက်မှုများတွင် မဲဆန္ဒရှင်များ၏ အချက်အလက်များကို ခိုးယူခြင်း၊ လွှတ်တော်ဆိုင်ရာ ဆာဗာများ အား ချိုးဖောက်ဝင်ရောက်ခြင်း၊ ထောက်လှမ်းရေး အချက်အလက်များ ရယူရန် ဆိုက်ဘာတိုက်ခိုက်ခြင်းတို့ ပါဝင် ကြောင်း လေ့လာမှုတွင် ဖော်ပြခဲ့သည်။

Source: EPARDAFAS