CNI International News

ကိယက်ဗ်၊ ဇွန်လ ၁၀

ရှေ့တန်းစစ်မြေပြင်နှင့် ကီလိုမီတာ ၆၀၀ (မိုင် ၃၇၀) အကွာအဝေးရှိ ရုရှား၏ လေတပ်စခန်းတွင် ရပ်နားထားသည့် ခေတ်အမီဆုံး စစ်လေယာဉ်များထဲမှ တစ်စင်းကို ယူကရိန်းတပ်ဖွဲ့များမှ ထိမှန်အောင် တိုက်ခိုက်နိုင်ခဲ့သည်ဟု ယူကရိန်းအာဏာပိုင်များက ဇွန်လ ၁၀ ရက်တွင် ပြောကြားခဲ့ကြောင်း အေပီမှ ဖော်ပြခဲ့သည်။

ယူကရိန်း၏ စစ်ထောက်လှမ်းရေးအဖွဲ့သည် တိုက်ခိုက်မှု ဖြစ်ပွားပြီးနောက် ရိုက်ကူးထားသည့် ဂြိုဟ်တုဓာတ်ပုံ များကို ထုတ်ပြန်ခဲ့ပြီး ထိုဖြစ်စဉ်သာ အတည်ပြုနိုင်မည်ဆိုပါက ရုရှား၏ ခေတ်အမီဆုံးဖြစ်သော အင်ဂျင်နှစ်လုံး တပ် Su-57 ကိုယ်ပျောက် တိုက်လေယာဉ်ကို ယူကရိန်းက ပထမဆုံး အောင်မြင်စွာ တိုက်ခိုက်မှုဖြစ်စဉ် ဖြစ်လာ မည် ဖြစ်သည်။

ယူကရိန်းထောက်လှမ်းရေးအဖွဲ့က ထုတ်ပြန်သည့် ဓာတ်ပုံတစ်ပုံတွင် ရပ်နားထားသော  လေယာဉ်တစ်စင်းအနီး တွင် အမည်းရောင် မီးခိုးများနှင့် အသေးစား ချိုင့်ခွက်တစ်ခုကို မြင်တွေ့ရသည်။ 

ယူကရိန်း ထောက်လှမ်းရေးဌာန၏ ထုတ်ပြန်ချက်အရ ထိုတိုက်ခိုက်မှုသည် ဇွန်လ ၉ ရက်က ရုရှားတောင်ပိုင်း အက်ခ်တူဘင့်စ် (Akhtubinsk) လေတပ်စခန်းတွင် ဖြစ်ပွားခဲ့ခြင်း ဖြစ်ကြောင်း ဖော်ပြထားသည်။

ရုရှားစစ်သားကိုတွေ့ရစဉ်

ထိုတိုက်ခိုက်မှုကို မည်သည့် လက်နက်ဖြင့် တိုက်ခိုက်ခဲ့သည်ဆိုခြင်းကို ရှင်းလင်းစွာ မသိရသေးသော်လည်း လေဆိပ်၏ တည်နေရာ အကွာအဝေးအရ ဒရုန်းများဖြင့် တိုက်ခိုက်ခဲ့ခြင်း ဖြစ်နိုင်သည်ဟု ကျွမ်းကျင်သူများက ပြောကြားခဲ့သည်။

အမေရိကန်နှင့် ဂျာမနီတို့က ယူကရိန်းအား ၎င်းတို့ ထောက်ပံ့ပေးထားသည့် လက်နက်များကို အသုံးပြုပြီး ရုရှား နယ်နိမိတ်အတွင်းရှိ ပစ်မှတ်များကို တိုက်ခိုက်ခွင့် ပြုခဲ့ပြီးနောက် အထက်ပါ တိုက်ခိုက်မှု ဖြစ်ပွားခဲ့ခြင်းဖြစ်သည်။

၎င်းတို့ တိုက်ခိုက်ခဲ့သည့် လေယာဉ်သည် ရေဒါကို ရှောင်လွှဲနိုင်သည့် ဒုံးကျည်များကို သယ်ဆောင်နိုင်ပြီး ရုရှား၏ လက်နက်တိုင်းတွင် ထိုအမျိုးအစား လေယာဉ် အနည်းငယ်သာရှိသည်ဟု ယူကရိန်းက ပြောကြားခဲ့သည်။

ယခုဖြစ်စဉ်နှင့်ပတ်သက်ပြီး ရုရှားကာကွယ်ရေးဝန်ကြီးဌာနက မှတ်ချက်ပြုခဲ့ခြင်းမရှိပေ။

ရုရှားအေဂျင်စီများက ထုတ်ပြန်သည့် သတင်းများတွင်မူ ရုရှားစစ်တပ်သည် Su-57 လေယာဉ်အသစ် ၁၀ စင်းကို ရရှိခဲ့ပြီး နောက်ထပ် ၇၆ စင်းကို ၂၀၂၈ ခုနှစ်တွင် အပြီးသတ် ထုတ်လုပ်သွားမည်ဖြစ်ကြောင်း ဖော်ပြခဲ့သည်။

Source: အေပီ

CNI International News

ဘန်ကောက်၊ ဇွန်လ ၁၀

ထိုင်းဘုရင်စနစ်အား ဝေဖန်ခဲ့သည်ဆိုသည့် စွဲချက်များကို ရင်ဆိုင်ရန် အသင့်ရှိကြောင်း ထိုင်းဝန်ကြီးချုပ်ဟောင်း သက်ဆင် ရှင်နာဝပ် (Thaksin Shinawatra) က ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

သက်ဆင်၏ ညီမဖြစ်သူ ယင်းလပ် ရှင်နာဝပ် (Yingluck Shinawatra)ဦးဆောင်သည့် အစိုးရအဖွဲ့ကို ဖြုတ်ချခဲ့ သော ဘုရင်စနစ်သစ္စာခံ ထိုင်းစစ်တပ်က ၂၀၁၅ ခုနှစ်တွင် ပြည်ပမီဒီယာတစ်ခုနှင့် အင်တာဗျူး ပြုလုပ်ချိန်အတွင်း သက်ဆင်၏ မှတ်ချက်စကားများနှင့်ပတ်သက်ပြီး တိုင်ကြားစာ တင်ခဲ့ခြင်းဖြစ်သည်။ 

သက်ဆင်ကို တရားစွဲဆိုထားသည့် အခြားစွဲချက်များတွင် ကွန်ပျူတာ ရာဇဝတ်မှုဥပဒေကို ချိုးဖောက်သည့် စွဲချက် များလည်း ပါဝင်ခဲ့သည်။

ထိုင်းဘုရင်ကို ဆန့်ကျင်နေကြစဉ်

သက်ဆင်ကမူ သူသည် ဇွန်လ ၁၈ ရက်တွင် အစိုးရရှေ့နေများနှင့် တွေ့ဆုံမည်ဖြစ်ပြီး အမှုနှင့်ပတ်သက်၍ မစိုးရိမ် ကြောင်း၊ ၎င်းအနေဖြင့် အမှုကို ဖြေရှင်းရန် အသင့်ရှိကြောင်း ပြောကြားခဲ့သည်။

“အဲဒီအမှုက ဘာမှမဟုတ်ဘူး အခြေအမြစ် မရှိပါဘူး” ဟု သက်ဆင်က သတင်းထောက်များကို ပြောသည်။

သက်ဆင် (၇၄ နှစ်)က သူသည် မည်သည့် အမှားအယွင်းမှ လုပ်ထားခြင်း မရှိကြောင်း ငြင်းပယ်ခဲ့ပြီး ကမ္ဘာ့ အတင်းကျပ်ဆုံး တော်ဝင်အသရေဖျက်မှုဥပဒေဖြင့် ကာကွယ်ပေးခံထားရသည့် ဘုရင့်မိသားစုအပေါ် သစ္စာခံ ကြောင်း ထပ်တလဲလဲ ပြောကြားခဲ့သည်။ 

သက်ဆင်၏ အမှုသည် တော်ဝင်အသရေဖျက်မှုဥပဒေဖြင့် တရားစွဲဆိုခံရသည့် အမှုပေါင်း ၂၇၀ ကျော်တွင် လူသိများ အထင်ရှားဆုံးအမှု ဖြစ်သည်။ 

ထိုဥပဒေအရ စွဲချက် တစ်ခုချင်းစီအတွက် အမြင့်ဆုံး ပြစ်ဒဏ်အဖြစ် ထောင်ဒဏ် ၁၅ နှစ်အထိ ချမှတ်ခံရမည် ဖြစ်သည်။

သက်ဆင်ညီမ ယင်းလပ်ကို တွေ့ရစဉ်

သက်ဆင်သည် ဖြူးထိုင်းပါတီကို ထူထောင်ခဲ့သူဖြစ်ပြီး ၎င်းတို့မိသားစုသည် ၂၀၀၁ ခုနှစ်ကတည်းက  ရွေးကောက်ပွဲတစ်ပွဲမှလွဲပြီး ကျန်ရွေးကောက်ပွဲအားလုံးတွင် အနိုင်ရခဲ့သည်။ 

သို့သော် သက်ဆင်မိသားစု၏ အစိုးရအဖွဲ့ ၃ ဖွဲ့(အစိုးရအဖြစ် ၃ ကြိမ် တာဝန်ယူ)သည် အာဏာသိမ်းခံရမှု သို့မဟုတ် တရားရုံးဆုံးဖြတ်ချက်များကြောင့် ဖြုတ်ချခံခဲ့ရသည်။

သက်ဆင်သည် ပြည်ပြေးဘဝဖြင့် ပြည်ပတွင် ၁၅ နှစ်ကြာ နေထိုင်ခဲ့ပြီးနောက် ၂၀၂၃ ခုနှစ် ထိုင်းသို့ ပြန်လည် ဝင်ရောက်ခဲ့သည်။ 

သူသည် အာဏာအလွဲသုံးစားမှု အပါဝင် အခြားအမှုများဖြင့် ထောင်ဒဏ် ၈ နှစ် ချမှတ်ခံခဲ့ရသော်လည်း ထိုင်းဘုရင် က ၎င်း၏ ထောင်ဒဏ်ကို ၁ နှစ်အထိ လျှော့ပေါ့ပေးခဲ့ကာ ယခုနှစ် ဖေဖော်ဝါရီလတွင် ခံဝန်ဖြင့် ပြန်လည် လွတ်မြောက်ခဲ့သည်။

Source: ရိုက်တာ

CNI International News

ဘေကျင်း၊ ဇွန်လ ၁၀

ဇမ်ဘီယာ၊ စင်္ကာပူ၊ ပီရူးနှင့် ယူအေအီးနိုင်ငံများတွင် နေထိုင်သူများကို ပြစ်မှတ်ထားပြီး အွန်လိုင်းပေါ်မှ ငွေကြေး လိမ်လည်မှုများ အပါအဝင် အခြား ဆိုက်ဘာရာဇဝတ်မှုများဖြင့် တရုတ်နိုင်ငံသား ၂၂ ဦးကို ဇမ်ဘီယာတရားရုံးက ဇွန်လ ၇ ရက်၌ ထောင်ဒဏ်ချမှတ်ခဲ့သည်ဟု South China Morning Post မှ ဖော်ပြခဲ့သည်။

လူဆာကာ (Lusaka) မြို့တော်ရှိ ရာဇဝတ်မှုဆိုင်ရာ တရားရုံးက ထိုတရုတ်နိုင်ငံသားများအား ထောင်ဒဏ် ၇ နှစ်မှ ၁၁ နှစ်အထိ ပြစ်ဒဏ်အသီးသီး ချမှတ်ခဲ့သည်။

ထို့ပြင် တရားခံများသည် ကွန်ပြူတာနှင့် ဆက်နွှယ်သည့် လိမ်လည်မှုများကို ပြုလုပ်ခဲ့သော စွဲချက်များအား အပြစ်ရှိကြောင်း ဝန်ခံခဲ့ပြီးနောက် တရားရုံးက ၎င်းတို့ကို ဒဏ်ငွေ ဒေါ်လာ ၁၅၀၀ မှ ဒေါ်လာ ၃၀၀၀ အထိ အသီးသီး ချမှတ်ခဲ့သည်။

ဇမ်ဘီယာမှာ ငွေလိမ်တဲ့လူတွေကို ဖမ်းမိစဉ်

ထို့ပြင် ကင်မရွန်းနိုင်ငံမှ အမျိုးသားတစ်ဦးသည်လည်း အလားတူ စွဲချက်များဖြင့် ထောင်ဒဏ်နှင့် ငွေဒဏ်မှား ချမှတ်ခံခဲ့ရသည်။

ပြစ်ဒဏ်ချမှတ် ခံရသူများသည် ဧပြီလအတွင်းက ဇမ်ဘီယာနိုင်ငံသား အများစု အပါအဝင် လူပေါင်း ၇၇ ဦးအား အွန်လိုင်းမှ ငွေလိမ်သည့် ကွန်ရက်ကို တည်ထောင်မှုနှင့်ပတ်သက်ပြီး ရဲတပ်ဖွဲ့က ဖမ်းဆီးခဲ့သော အုပ်စုထဲတွင် ပါဝင်ခဲ့သူများဖြစ်သည်။

ဆိုက်ဘာနှင့်ဆက်နွှယ်သည့် လိမ်လည်မှုများ၊ မိုဘိုင်းဖုန်းများနှင့် ဘဏ်အကောင့်များမှ ငွေများထူးဆန်းစွာ ဆုံးရှုံး ခဲ့ရသူများ၏ တိုင်ကြားချက်များ မြင့်တက်လာခဲ့ပြီးနောက် အာဏာပိုင်များက စုံစမ်းစစ်ဆေးမှုကို လုပ်ဆောင်ခဲ့ ခြင်းဖြစ်သည်ဟု မူးယစ်ဆေးဝါး တရားဥပဒေစိုးမိုးရေးကော်မရှင်၏ ညွှန်ကြားရေးမှူးချုပ် နာဆန်ဘန်ဒါ (Nason Banda) က ပြောကြားခဲ့သည်။

ထိုကော်မရှင်မှ အရာရှိများ၊ ရဲတပ်ဖွဲ့ဝင်များ၊ လူဝင်မှုကြီးကြပ်ရေး အရာရှိများနှင့် အကြမ်းဖက်မှု တိုက်ဖျက်ရေး တပ်ဖွဲ့ဝင်များသည် ဧပြီလအတွင်းက လူဆာကာမြို့တော် ဆင်ခြေဖုံးရှိ တရုတ်နိုင်ငံသားများ ပိုင်ဆိုင်သည့် စီးပွားရေးလုပ်ငန်းတစ်ခုကို ဝင်ရောက်စီးနင်းပြီး ယခုပြစ်ဒဏ်ချမှတ်ခံရသူများ အပါအဝင် လူပေါင်း ၇၇ ဦးကို ဖမ်းဆီးခဲ့ခြင်းဖြစ်သည်။

 ဇမ်ဘီယာမှ ငွေလိမ်သူတွေ သုံးတဲ့ ကွန်ပျူတာတွေကိုတွေ့ရစဉ်

ထိုဝင်ရောက် စီးနင်းမှုအတွင်း အာဏာပိုင်များသည် ပြည်တွင်း/ပြည်ပ မိုဘိုင်းဖုန်း ဆင်းကဒ် ၁၃,၀၀၀ ကျော်၊ လက်နက် ၂ လက် ၊ ကျည်ဆန် ၇၈ တောင့်ကို သိမ်းဆည်းရမိခဲ့သည်။

Golden Top Support Services ဟု အမည်ပေးထားသည့် ထိုစီးပွားရေး လုပ်ငန်းသည် အသက် ၂၀ မှ ၂၅ နှစ် ကြား ဇမ်ဘီယာလူငယ်များကို အလုပ်ခန့်ထားပြီး WhatsApp ၊ Telegram ကဲ့သို့ လူမှုမီဒီယာများကို အသုံးပြုကာ ငွေကြေးလိမ်လည်မှုများ လုပ်ဆောင်ခဲ့ခြင်းဖြစ်ကြောင်း အာဏာပိုင်များက ဖော်ပြခဲ့သည်။

ထိုဖြစ်စဉ်တွင် ဖမ်းဆီးရမိခဲ့သည့် ဒေသခံများကိုမူ အာမခံဖြင့် ပြန်လွှတ်ပေးခဲ့သည်။

Source: SCMP

CNI International News

ဝါရှင်တန်၊ ဇွန်လ ၈

ထိုင်ဝမ်အပေါ် စစ်ပွဲဆင်နွှဲမှုသည် ဒုတိယကမ္ဘာစစ်၏ နောက်ဆက်တွဲ အကျိုးသက်ရောက်မှုကဲ့သို့ ကြီးမားသည့် ကမ္ဘာလုံးဆိုင်ရာ နောက်ဆက်တွဲ အခြေအနေများကို ဖြစ်စေလိမ့်မည်ဟု အမေရိကန်ဆိုင်ရာ သြစတြေးလျ သံအမတ် ကီဗင် ရုဒ် (Kevin Rudd) က ပြောကြားခဲ့သည်ဟု ရိုက်တာမှ ဖော်ပြခဲ့သည်။

ယခုလထဲတွင် အသက် ၇၁ နှစ်ပြည့်မည့် တရုတ်သမ္မတ ရှီကျင့်ဖျင် (Xi Jinping) အနေဖြင့် ထိုင်ဝမ်ကို တရုတ်နှင့် အပြီးသတ် ပြန်လည်ပေါင်းစည်းလိုပါက အသက် ၈၀ မပြည့်မီ လာမည့် ဆယ်စုနှစ်အတွင်း လုပ်ဆောင်လိမ့်မည်ဟု ရုဒ်က ဟိုနိုလူလူ (Honolulu) မြို့တွင် ဇွန်လ ၆ ရက်နေ့မှာပဲ မိန့်ခွန်းပြောကြားခဲ့သည်။

"မကြာသေးခင်က တရုတ်ရဲ့ စစ်ရေး လေ့ကျင့်မှုတွေ အပါအဝင် တရုတ်စစ်တပ်ရဲ့ ရှင်းလင်းပြတ်သားတဲ့ အချက်ပြမှုတွေကို လျစ်လျူရှုမယ်ဆိုရင် ကျနော်တို့ ရူးမိုက်ရာကျပါလိမ့်မယ်" ဟု ပြီးခဲ့သည့် ဆယ်စုနှစ်အတွင်း သြစတြေးလျဝန်ကြီးချုပ်အဖြစ် သက်တမ်း ၂ ကြိမ် ထမ်းဆောင်ခဲ့ဖူးသည့် ရုဒ်က ပြောသည်။

တရုတ်က ထိုကဲ့သို့ လုပ်ဆောင်မည် ဟုတ်/မဟုတ် ဆိုခြင်းသည် အမေရိကန်၏ အခြိမ်းအခြောက် အဟန့်အတား ခိုင်မာမှု ရှိ/မရှိ အပေါ်တွင် မူတည်သည်ဟုလည်း ၎င်းက ဆိုသည်။

"စစ်ပွဲဖြစ်ပွားလာမယ်ဆိုရင် စီးပွားရေး ထိခိုက်မှုတွေ၊ ပြည်တွင်းနိုင်ငံရေး ဂယက်ရိုက်မှုတွေနဲ့ မခန့်မှန်းနိုင်တဲ့ ပထဝီ-မဟာဗျူဟာ အကျိုးသက်ရောက်မှုတွေဟာ ဒုတိယကမ္ဘာစစ်နောက်ပိုင်း ကျနော်တို့ တစ်ခါမှ မမြင်ဖူးတဲ့ အခြေအနေအထိ ဖြစ်စေနိုင်ပါတယ်" ဟု ရုဒ်က ပြောသည်။

ထိုင်ဝမ်အလံများလွှင့်ထူထားစဉ်

"အဲဒီလို အခြေအနေမှာ အမေရိကန်ကပဲ နိုင်နိုင်၊ တရုတ်ကပဲနိုင်နိုင်၊ ဒါမှမဟုတ် သွေးစွန်းတဲ့ မတိုးသာ မဆုတ်သာ အခြေအနေမျိုးတွေဟာ ကမ္ဘာကြီးဟာ အရင်ကနဲ့မတူတော့တဲ့ အခြေအနေမျိုး ဖြစ်လာနိုင်ပါလိမ့်မယ်" ဟု သြစတြေးလျသံအမတ်က ပြောသည်။

တရုတ်သည် ထိုင်ဝမ်ကို ၎င်း၏ နယ်နိမိတ်တစ်ခုအဖြစ် ကြေညာထားပြီး လိုအပ်လာပါက အင်အားသုံး၍ ထိန်းချုပ် သွားမည်ဟု ပြောကြားခဲ့သော်လည်း ထိုင်ဝမ်ကမူ တရုတ်၏ အချုပ်အခြာ အာဏာပိုင်ကြောင်း ထွက်ဆိုချက်များ ကို ငြင်းပယ်ထားသည်။

ထိုင်ဝမ် လူထုသည် ၎င်းတို့၏ အနာဂတ်ကို ၎င်းတို့ကိုယ်တိုင် ဆုံးဖြတ်နိုင်သည်ဟု ပြောကြားခဲ့သည်။

ပြီးခဲ့သည့်လက ထိုင်ဝမ်သမ္မတ ရွေးကောက်ပွဲနှင့် သမ္မတ လိုင်ချင်တေ (LaiChing-te)၏ ကျမ်းသစ္စာ ကျိန်ဆိုပွဲ အပြီးတွင် ထိုင်ဝမ်ကျွန်းအနီး တရုတ်၏ စစ်ရေးလှုပ်ရှားမှုများနှင့် ပတ်သက်ပြီး အမေရိကန်က စိုးရိမ်ကြောင်း ဖော်ပြခဲ့သည်။

တရုတ်ကမူ အမေရိကန်အား တရုတ်နှင့်ထိုင်ဝမ် အရေးကို ဝင်ရောက် မစွက်ဖက်သင့်ကြောင်း သတိပေးထား သည်။

Source: ရိုက်တာ

CNI International News

ပဲရစ်၊ ဇွန်လ ၈

ပြင်သစ်နိုင်ငံ၊ ပဲရစ် (Paris) မြို့တော်တွင် ဇွန်လ ၇ ရက်တွင် ပြုလုပ်မည့် D-Day နှစ်ပတ်လည် အခမ်းအနားများ၌  အမေရိကန်သမ္မတ ဂျိုးဘိုင်ဒန် (Joe Biden) သည် စစ်ရေးအကူအညီ ဒေါ်လာ ၂၂၅ သန်းနှင့်အတူ ယူကရိန်း သမ္မတ ဗိုလိုဒီမာ ဇာလန်းစကီး (Volodymyr Zelenskiy) နှင့် တွေ့ဆုံမည်ဟု ရိုက်တာမှ ဖော်ပြခဲ့သည်။

ပြီးခဲ့သည့်နှစ် ဒီဇင်ဘာလက ဝါရှင်တန် (Washington) သို့ ဇာလန်းစကီး လာရောက်ခဲ့သည့် ခရီးစဉ်အပြီးတွင် ယခုအကြိမ် တွေ့ဆုံမှုသည် ၎င်းတို့နှစ်ဦးအကြား ပထမဆုံးအကြိမ် မျက်နှာချင်းဆိုင် တွေ့ဆုံဆွေးနွေးမှု ဖြစ်သည်။

ထို့ပြင် ဘိုင်ဒန်နှင့် ဇာလန်းစကီးတို့သည် လာမည့် သတင်းပတ်၌ အီတလီနိုင်ငံတွင် ပြုလုပ်မည့် စက်မှုထိပ်သီး ၇ နိုင်ငံ (G 7) ညီလာခံတွင်လည်း ထပ်မံတွေ့ဆုံမည်ဖြစ်သည်။

ထိုသို့ တွေ့ဆုံစဉ် ချမ်းသာသည့်နိုင်ငံများသည် ရုရှား၏ ပိုင်ဆိုင်မှုများကို ပိတ်ပင်ရေး၊ ယူကရိန်းအား ဒေါ်လာ ဘီလျံ ၅၀ ထောက်ပံ့ရေးတို့ကို ဆွေးနွေးကြမည်ဖြစ်သည်။ 

အနောက်နိုင်ငံများသည် ယူကရိန်းကို ကူညီထောက်ပံ့ရေးအတွက် ဆုံးဖြတ်ချက် ချမှတ်မှုများသည် အလွန် အချိန်ကြာမြင့်သည်ဟု ဇာလန်းစကီးက ပြီးခဲ့သည့်လတွင် ရိုက်တာ သတင်းဌာနသို့ ပြောကြားခဲ့သည်။

ဘိုင်ဒန်နဲ့ ဇာလန်းစကီးကို တွေ့ရစဉ်

ဘိုင်ဒင်သည် ဇွန်လ ၆ ရက်က ပြင်သစ်နိုင်ငံ၏ နောမန်ဒီ (Normandy) ဒေသသို့ ရောက်ရှိလာချိန် ဒုတိယကမ္ဘာစစ်က ဖြစ်စဉ်များနှင့် ယူကရိန်း-ရုရှားစစ်ပွဲကို နှိုင်းယှဉ်ပြောကြားခဲ့ပြီး ရုရှားသမ္မတ ဗလာဒီမာပူတင် (Vladimir Putin) ကို အာဏာရှင်ဟု ခေါ်ဆိုခဲ့သည်။

အမေရိကန်က ယူကရိန်းကို ထောက်ပံ့မည့် ဒေါ်လာ ၂၂၅ သန်းတန် စစ်ရေးအကူအညီတွင် အမြောက်ကျည်များ၊ လေကြောင်းကာကွယ်ရေးစနစ်များနှင့် အခြားလက်နက်ပစ္စည်းများ ပါဝင်သည်ဟု သတင်းရင်းမြစ်များက ဖော်ပြခဲ့ သည်။

ရုရှားတပ်ဖွဲ့များသည် မေလ ၁၀ ရက်စပြီး ထိုးစစ် အသစ်တစ်ခုကို စတင်ခဲ့ပြီးနောက် ယူကရိန်း၏ ကျေးရွာများကို သိမ်းပိုက်ခဲ့ကာ ယူကရိန်းသည် ခါကိဗ် (Kharkiv) ဒေသတွင် ခံစစ်ဆင်နွှဲရန် ရုန်းကန်းနေရသည်။

ဘိုင်ဒင်သည် ပြီးခဲ့သည့် သီတင်းပတ်ကလည်း ယူကရိန်းအား အမေရိကန်က ထောက်ပံ့ပေးသော  လက်နက်များ ကို အသုံးပြုပြီး ရုရှားနိုင်ငံအတွင်းရှိ စစ်ရေးပစ်မှတ်များအား တိုက်ခိုက်ခွင့်ပြုခဲ့သည်။

လက်ရှိအချိန်တွင် အမေရိကန်သည် ယူကရိန်း၏ လက်နက် လိုအပ်ချက်များကို ဖြည့်ဆည်းပေးနိုင်ရန် ကြိုးပမ်း နေရကြောင်း ဝါရှင်တန်ရှိ လက်ထောက်အမျိုးသားလုံခြုံရေး အကြံပေးပုဂ္ဂိုလ်ဖြစ်သည့် ဂျွန် ဖိုင်နာ (Jon Finer) က ဇွန်လ ၆ ရက်တွင် ပြောကြားခဲ့သည်။

Source: ရိုက်တာ

CNI International News

နယူးဒေလီ၊ ဇွန်လ ၈

တရုတ်သည် လူမှုမီဒီယာများတွင် နိုင်ငံတကာရှိ ဆစ်ခ်ဆန္ဒပြမှု သတင်းအမှားများကို ဖြန့်ပြီး သွေးထိုးလှုံ့ဆော် မှုများ ပြုလုပ်နေသည့် Bitter Winter အွန်လိုင်းမဂ္ဂဇင်းမှ ဖော်ပြခဲ့သည်။

၂၀၂၃ ခုနှစ်၊ ဇွန်လ ၁၈ ရက်က ကနေဒါတွင် ဆစ်ခ်ခွဲထွက်ရေး တက်ကြွလှုပ်ရှားမှု ခေါင်းဆောင် ဟာဒိပ် ဆင်း နစ်ဂျား (Hardeep Singh Nijjar) သည် ဗြိတိသျှ ကိုလံဘီယာ (British Comumbia) ပြည်နယ် ဆာရေး (Surrey) မြို့တွင် ပစ်ခတ်သတ်ဖြတ်ခံခဲ့ရသည်။

နစ်ဂျားသည် ခါလစ္စတန် (Khalistan) အမည်ရှိ အိန္ဒိယမှ ခွဲထွက်ပြီး ဆစ်ခ်နိုင်ငံ ထူထောင်ရေးအတွက် အားကြိုး မာန်တက် လှုပ်ရှားခဲ့သူဖြစ်ပြီး ၎င်း သတ်ဖြတ်ခံရမှုတွင် အိန္ဒိယထောက်လှမ်းရေးအဖွဲ့များ ပါဝင်ပတ်သက်ဖွယ်ရှိ သည်ဟု ကနေဒါအာဏာပိုင်များက ပြောကြားခဲ့သဖြင့် ကနေဒါနှင့် အိန္ဒိယအကြား သံတမန်ဆက်ဆံရေး တင်းမာ ခဲ့ရသည်။

နစ်ဂျားကို မည်သူက သတ်ဖြတ်ခဲ့သည်ဆိုခြင်းမှာ ရှင်းလင်းစွာ မသိခဲ့ရသော်လည်း လက်ရှိတွင် တရုတ်သည် ထိုဖြစ်စဉ်ကို အသုံးချပြီး နိုင်ငံတကာသို့ ပြန့်ကြဲထွက်ခွာခဲ့သည့် ဆစ်ခ်များအား သွေးထိုးလှုံ့ဆော်လျက်ရှိသည်။

 ဆစ်ခ်လူမျိုးများ ဆန္ဒပြနေကြစဉ်

ထို့နောက် သြစတြေးလျ၊ နယူးဇီလန်နှင့် အခြားနိုင်ငံများတွင်လည်း အိန္ဒိယဆန့်ကျင်သည့် ဆန္ဒပြမှုအတုများကို ဖန်တီးနေသည့် အချက်မှာ သိသာထင်ရှားလာခဲ့သည်ဟု  Bitter Winter မှ ဖော်ပြခဲ့သည်။ 

Facebook ၊ Instagram နှင့် WhatsApp တို့ကို ပိုင်ဆိုင်သည့် Meta ကုမ္ပဏီ၏ မေလအတွင်းက ထုတ်ပြန်ချက် တစ်ခုတွင် တရုတ်က ဖန်တီးခဲ့သော လူမှုမီဒီယာ အကောင့်တုများနှင့်ပတ်သက်ပြီး သတိပေးခဲ့သည်။

ထိုသတိပေးစာတွင် တရုတ်နိုင်ငံအတွင်း ဖန်တီးခဲ့သည့် ကွန်ရက်သည် သြစတြေးလျ၊ ကနေဒါ၊ အိန္ဒိယ၊ နယူးဇီလန်၊ ပါကစ္စတန်၊ ဗြိတိန်နှင့် နိုက်ဂျီးရီးယား အပါအဝင် ကမ္ဘာလုံးဆိုင်ရာ ဆစ်ခ်အသိုင်းအဝိုင်းကို ပစ်မှတ်ထားခဲ့ကြောင်း ဖော်ပြခဲ့သည်။

ထို့ပြင် တရုတ်သည် ထိုလှုပ်ရှားမှုကို "Operation K" ဟုပင် နာမည် ပေးထားသည်ဟု ဆိုသည်။ Meta ကုမ္ပဏီက Facebook အကောင့် ၃၇ ခု၊ Page ၁၃ ခု၊ Group ၅ ခု၊ Instagram အကောင့် ၉ ခု တို့ကို ဖယ်ရှားခဲ့ကြောင်း သတင်းထုတ်ပြန်ခဲ့သည်။

 ဆစ်ခ်လူမျိုးများ ဆန္ဒပြနေကြစဉ်

အဆိုပါ Facebook Page များတွင် follow လုပ်ထားသည့် အကောင့်ပေါင်း ၂၇,၀၀၀ ခန့်ရှိပြီး Facebook Group များထဲမှ Group တစ်ခု သို့မဟုတ် တစ်ခုထက်ပိုသော Group များတွင် အကောင့်ပေါင်း ၁၃၀၀ ပါဝင်သည်ဟု Meta က ထုတ်ပြန်ခဲ့သည်။

ထို့ပြင် Instagram အကောင့်တစ်ခု သို့မဟုတ် တစ်ခုထက်ပိုသည့် အကောင့်များတွင် follow လုပ်ထားသော အကောင့်ပေါင်း ၁၀၀ ခန့်ရှိသည်။

ထိုတွေ့ရှိချက်သည် ပမာဏ အနည်းငယ်သာဖြစ်နိုင်ပြီး နောက်ထပ် ထောက်လှမ်းတွေ့ရှိခြင်း မရှိသေးသည့် အကောင့်များနှင့် Page များ များစွာရှိနိုင်သည်ဟု Meta က ထုတ်ပြန်ခဲ့သည်။

Source: Bitter Winter

CNI International News

ဝါရှင်တန်၊ ဇွန်လ ၇

ဂါဇာကမ်းမြောင်ဒေသတွင် အစ္စရေးနှင့်ဖြစ်ပွားနေသည့် စစ်ပွဲအတွင်း ဟားမာ့စ်အဖွဲ့၏ အင်အားသည် ထက်ဝက်ခန့် ချေမှုန်းခံခဲ့ပြီးနောက် ဟားမာ့စ်အဖွဲ့သည် တိုက်ခိုက်မှုနည်းစနစ်များ ပြောင်းလဲလာခဲ့သည်ဟု အမေရိကန်နှင့် အစ္စရေးအရာရှိများက ပြောကြားခဲ့ကြောင်း ရိုက်တာမှ ဖော်ပြခဲ့သည်။

ဂါဇာကမ်းမြောင်ဒေသကို အုပ်ချုပ်သည့် ဟားမာ့စ်အဖွဲ့၏ တိုက်ခိုက်ရေးသမား အင်အားသည် ၉၀၀၀ မှ ၁၂,၀၀၀ အကြားသာရှိတော့ကြောင်း ထိုပဋိပက္ခနှင့်နီးစပ်သည့် အမေရိကန် ထိပ်သီးအရာရှိ ၃ ဦးက ပြောကြားသည်။ 

အမေရိကန်သည် ဟားမာ့စ်အဖွဲ့၏ အင်အားကို ၂၀,၀၀၀ မှ ၂၅၀,၀၀၀ အကြား ရှိလိမ့်မည်ဟု ခန့်မှန်းထားပြီး ယခုတွင် ဟားမာ့စ်တိုက်ခိုက်ရေးသမားအင်အားကို လျှော့ချခန့်မှန်းခဲ့ခြင်း ဖြစ်သည်။ 

အစ္စရေးကမူ ဂါဇာစစ်ပွဲအတွင်း အစ္စရေးစစ်သား ၃၀၀ နီးပါး သေဆုံးကြောင်း ထုတ်ပြန်ခဲ့သည်။

လက်ရှိတွင် အစ္စရေးတပ်ဖွဲ့များသည် ဂါဇာတောင်ပိုင်း၊ ရာဖာ (Rafah) မြို့ကို ဝင်ရောက်ပြီး စစ်ဆင်ရေး ပြုလုပ် နေမှုနှင့်အတူ ဟားမာ့စ်အဖွဲ့သည် ခြုံခိုတိုက်ခိုက်မှုများ၊ လက်လုပ်ဗုံးများနှင့် တိုက်ခိုက်မှုများ အစရှိသည့် ပြောက်ကျားနည်းဗျူဟာများဖြင့် ပြောင်းလဲတိုက်ခိုက်လာသည်ဟု အမေရိကန်အရာရှိတစ်ဦးက ပြောသည်။

အစ္စရေးတပ်ဖွဲ့ကို တွေ့ရစဉ်

ဂါဇာဒေသခံများကလည်း ဟားမာ့စ်အဖွဲ့၏ နည်းဗျူဟာ အပြောင်းအလဲကို သတိထားမိကြောင်း ဂါဇာဒေသခံ တစ်ဦးဖြစ်သည့် ဝစ်ဆမ် အီဘရာဟင် (Wissam Ibrahim) က ပြောကြားခဲ့သည်။

“အစောပိုင်းလတွေတုန်းက ဟားမာ့စ် တိုက်ခိုက်ရေးသမားတွေဟာ အစ္စရေးစစ်သားတွေ သူတို့ နယ်နိမိတ်ထဲ ဝင်လာချိန်မှာ ကြားဖြတ်ဟန့်တားပြီး အပြန်အလှန် ပစ်ခတ်တိုက်ခိုက်မှုတွေ ပြုလုပ်ခဲ့ပါလိမ့်မယ်။ ဒါပေမယ့် အခုတော့ ဟားမာ့စ်တွေဟာ ခြုံခိုတိုက်ခိုက်တာတွေ၊ ပစ်ပြီးပြေးတဲ့ နည်းဗျူဟာတွေကို ပြောင်းလဲလာပါတယ်”ဟု အီဘရာဟင်က ပြောသည်။

အမည်မဖော်လိုသည့် အမေရိကန်အရာရှိများကလည်း ဟားမာ့စ်အဖွဲ့၏ နည်းဗျူဟာ အပြောင်းအလဲသည် ဂါဇာဒေသအတွင်းသို့ မြေအောက်လိုဏ်ခေါင်းများမှတစ်ဆင့် မှောင်ခိုတင်သွင်းရသည့် လက်နက်အင်အားကို ချွေတာရာရောက်ကြောင်း ပြောကြားခဲ့သည်။

ထိုအခြေအနေများကြောင့် ဂါဇာစစ်ပွဲသည် ၂၀၂၄ ခုနှစ်ကုန်ပိုင်းအထိ ဆက်လက် ဖြစ်ပွားနိုင်ကြောင်း ပြောကြား ခဲ့သည့် အစ္စရေးဝန်ကြီးချုပ် ဘင်ဂျမင် နေတန်ယာဟု (Benjamin Netanyahu) ၏ အမျိုးသားလုံခြုံရေးအကြံပေး ပုဂ္ဂိုလ်၏ ခန့်မှန်းသုံးသပ်ချက်သည် မှန်ကန်လာဖွယ်ရှိသည်ဟု ကျွမ်းကျင်သူများက ပြောကြားခဲ့သည်။

ဟားမာ့စ်အဖွဲ့၏ ပြောရေးဆိုခွင့်ရှိသူကမူ ၎င်းတို့အဖွဲ့၏ တိုက်ပွဲဝင်နည်းဗျူဟာ အပြောင်းအလဲနှင့်ပတ်သက်ပြီး မှတ်ချက်ပေးရန် တောင်းဆိုချက်ကို တုန့်ပြန်ခြင်းမရှိခဲ့ပေ။

Source: ရိုက်တာ

CNI International News

နယူးဒေလီ၊ ဇွန်လ ၇

အိန္ဒိယနိုင်ငံတွင် ပြုလုပ်သည့် ရွေးကောက်ပွဲကာလအတွင်း ဝန်ကြီးချုပ် မိုဒီ (Narendra Modi) နှင့် ၎င်း၏ အင်အားကြီးမားသည့် ဟိန္ဒူအမျိုးသားရေး(BJP)ပါတီတို့က သောင်ပြိုကမ်းပြို အနိုင်ရရှိလိမ့်မည်ဟု ယူဆချက် များ ကျယ်ကျယ်ပြန့်ပြန့် ထွက်ပေါ်ခဲ့သည့်တိုင် အတိုက်အခံများသည် မထင်မှတ်ထားသော မဲရလဒ်များကို ရရှိခဲ့ သည်ဟု အေပီမှ ဖော်ပြခဲ့သည်။

ရွေးကောက်ပွဲတွင် အပြတ်အသတ် ရှုံးနိမ့်လိမ့်မည်ဟု ထင်ကြေးပေးခံခဲ့ရသည့် အတိုက်အခံ အင်အားစုသည် ရွေးကောက်ပွဲမဲရလဒ်များ ထွက်ရှိချိန်၌ မိုဒီနှင့် ၎င်း၏ BJP ပါတီကို လွှတ်တော်တွင် နေရာအများစု မရရှိစေရန် စွမ်းဆောင်နိုင်ခဲ့သည်။

ထို့နောက် မိုဒီသည် အာဏာကို ဆက်လက်ကိုင်ဆွဲရန် ပထမဆုံးအကြိမ်အဖြစ် မဟာမိတ်များ၏ အကူအညီအား ရယူခဲ့ရသည်။

ထို့ကြောင့် ဆယ်စုနှစ်တစ်စုကြာ လွှတ်တော်နေရာ အများစုကို သိမ်းပိုက်နိုင်ခဲ့သည့် မိုဒီ၏ BJP ပါတီသည် ယခုအခါတွင် နေရာအများစုအား ရရှိရန်အတွက် မဟာမိတ်ပါတီများနှင့် ပူးပေါင်းရမည်ဖြစ်သဖြင့် မိုဒီ၏ အုပ်ချုပ်မှုပုံစံ၌ သိသာသည့် အပြောင်းအလဲတစ်ခု ဖြစ်လာဖွယ်ရှိသည်။

မိုဒီကို တွေ့ရစဉ်

ဇွန်လ ၆ ရက်က ထုတ်ပြန်သည့် ရွေးကောက်ပွဲရလဒ်များတွင် အဓိက အတိုက်အခံပါတီဖြစ်သော ကွန်ဂရက်ပါတီ နှင့် ၎င်း၏ မဟာမိတ်ပါတီများသည် ထင်ကြေးပေးမှုများကို ဖီဆန်ပြီး နေရာ ၅၄၃ နေရာရှိသည့် လွှတ်တော်တွင် ၂၃၂ နေရာအထိ ရရှိခဲ့သည်။

ထိုပမာဏသည် နောက်ဆုံးအကြိမ် ပြုလုပ်ခဲ့သည့် ရွေးကောက်ပွဲတွင် ရရှိခဲ့သည့် နေရာအရေအတွက်ထက် နှစ်ဆခန့် မြင့်တက်ခဲ့ခြင်းဖြစ်သည်။

“အတိုက်အခံတွေဟာ မိုးထဲလေထဲမှာ ရုန်းကန်နိုင်စွမ်းရှိမှုနဲ့ ခိုင်မာမှုရှိတဲ့ ခံယူချက်တွေကို ပြသလိုက်တာ ဖြစ်ပါ တယ်။ ဒါဟာ အိန္ဒိယရဲ့ ဒီမိုကရေစီကို ကယ်တယ်ခဲ့တာလို့ ပြောလို့ရပြီး မိုဒီ အနေနဲ့ လွယ်လွယ် အနိုင်မရဘဲ စိန်ခေါ်ခံနေရတုန်းပဲဆိုတာကို ပြသရာ ရောက်ပါတယ်”ဟု ဂျာနယ်လစ်တစ်ဦးဖြစ်ပြီး နိုင်ငံရေးလေ့လာသုံးသပ်သူ ရာရှစ် ကစ်ဝါအီ (Rasheed Kidwai) က ပြောကြားခဲ့သည်။

INDIA ဟု အမည်ပေးထားသည့် အတိုက်အခံပါတီ ၂၀ ကျော် ပါဝင်သည့် မဟာမိတ်အဖွဲ့ကို ပြီးခဲ့သည့်နှစ်က ဖွဲ့စည်းခဲ့ခြင်း ဖြစ်သည်။ 

ထိုအတိုက်အခံ အုပ်စုက မိုဒီသည် အိန္ဒိယ၏ ဒီမိုကရေစီအင်စတီကျူရှင်းများကို တင်းကျပ်ပြီး ဟိန္ဒူအမျိုးသားရေး ဝါဒကို မြှင့်တင်နေသည်ဟု ယူဆထားကြသည်။

“ဒီရွေးကောက်ပွဲဟာ မိုဒီနဲ့ INDIA အဖွဲ့ရဲ့ အားပြိုင်မှု၊ မိုဒီရဲ့ အတွေးအခေါ်နဲ့ INDIA အဖွဲ့ရဲ့ အားပြိုင်မှုဖြစ်ပါတယ်” ဟု ကွန်ဂရက်ပါတီ အတိုက်အခံ ခေါင်းဆောင်ဖြစ်သည့် ရာဟူး ဂန္ဓီ (Rahul Gandhi) က ပြောကြားခဲ့သည်။

 အိန္ဒိယ၏ အတိုက်အခံ ကွန်ဂရက်ပါတီ ခေါင်းဆောင်များကို တွေ့ရစဉ်

ဂန္ဓီသည် အိန္ဒိယ၏ နေရူး-ဂန္ဓီ နိုင်ငံရေးမျိုးဆက် (Nehru-Gandhi) ကို ဆက်ခံသူဖြစ်ပြီး မိုဒီ၏ လှောင်ပြောင်မှုကို ကာလကြာရှည်ခံခဲ့ရသူဖြစ်သည်။

မိုဒီက ဂန္ဓီနှင့် ၎င်း၏ ပါတီသည် ၎င်းတို့၏ နိုင်ငံရေးမျိုးဆက်များ၏ သမိုင်းအစဉ်အလာများဖြင့် အမြတ်ထုတ် နေသူများဖြစ်သည်ဟု ယူဆခဲ့သည်။

ဂန္ဓီ၏ ဖခင်၊ အဖွားနှင့် အဘေးသည် အိန္ဒိယဝန်ကြီးချုပ်များဖြစ်သည်။ ဂန္ဓီ၏ လက်ထက်ဖြစ်သည့် ၂၀၁၉ ရွေးကောက်ပွဲတွင် ကွန်ဂရက်ပါတီသည် နေရာ ၅၂ နေရာသာ ရရှိခဲ့သည်။

ထိုအချိန်က မိုဒီ၏ ပါတီသည် သောင်ပြိုကမ်းပြို အနိုင်ရခဲ့သည်။

Source: အေပီ

CNI International News

မော်စကို၊ ဇွန်လ ၇ 

ရုရှား၏ နယ်နိမိတ်အတွင်းရှိ ပစ်မှတ်များကို တိုက်ခိုက်ရန် ယူကရိန်းအား အနောက်နိုင်ငံလုပ် လက်နက်များ အသုံးပြုခွင့်ပေးလျှင် အမေရိကန်နှင့် ဥရောပမဟာမိတ်နိုင်ငံများကို တိုက်ခိုက်နိုင်သည့် ဒုံးကျည်များ ဖြန့်ကြက် ချသွားမည်ဟု ရုရှားသမ္မတ ပူတင် (Vladimir Putin)က ပြောကြားခဲ့ကြောင်း ရိုက်တာမှ ဖော်ပြခဲ့သည်။
ပူတင်သည် ယူကရိန်းစစ်ပွဲ စတင်ခဲ့ပြီးနောက်ပိုင်း နိုင်ငံတကာသတင်းအေဂျင်စီများမှ ဝါရင့်အယ်ဒီတာများနှင့် ပထမဆုံးအကြိမ် အစည်းအဝေး ပြုလုပ်ခဲ့သည်။

ထိုအစည်းအဝေးတွင် ပူတင်က ရုရှားအနေဖြင့် နျူကလီးယား လက်နက်များကို မည်သည့်အခါမှ အသုံးပြုလိမ့် မည် မဟုတ်ဟု ယူဆထားသည့် အနောက်နိုင်ငံများ၏ ယူဆချက်သည် မှားယွင်းကြောင်းနှင့် ရုရှား၏ နျူကလီးယားလက်နက် အသုံးပြုမှုဆိုင်ရာ အယူဝါဒကို ပေါ့ပေါ့တန်တန် သဘောမထားသင့်ကြောင်း ပြောကြား ခဲ့သည်။

အနောက်နိုင်ငံများအနေဖြင့် ၎င်းတို့၏ လက်နက်များကို ယူကရိန်းအား အသုံးပြုစေပြီး ရုရှားကို တိုက်ခိုက်ခွင့် ပြုခဲ့မည်ဆိုပါက ထိုကဲ့သို့ ခွင့်ပြုပေးခဲ့သည့် နိုင်ငံများအား တိုက်ခိုက်နိုင်မည့် နည်းပညာမြင့်မားသော  တာဝေးပစ် ဒုံးကျည်များကို ဖြန့်ကြက်ချထားရန် ရုရှားက စဉ်းစားနေသည်ဟု ပူတင်က ပြောသည်။

ပူတင်နဲ့ နိုင်ငံရေးအယ်ဒီတာတွေ တွေ့ရစဉ်

“ရုရှားကို ဆန့်ကျင်တဲ့ စစ်ထဲကို ဝင်ပါလာမယ့် နိုင်ငံတွေ ရှိလာခဲ့မယ်ဆိုရင် ကျနော်တို့ကလည်း အလားတူ နည်းလမ်းနဲ့ မှန်မှန်ကန်ကန် တုန့်ပြန်သွားမှာပါ။ ခြုံပြောရရင် ဒါက အရမ်းစိုးရိမ်ရတဲ့ ပြဿနာတွေ ဖြစ်စေနိုင်ပါ တယ်” ဟု ပူတင်က ပြောသည်။

ရုရှား၏ ဒုံးကျည်များကို မည်သည့် နေရာများတွင် ဖြန့်ကြက်ချထားမည် ဆိုသည့်အချက်အား ပူတင်က အသေးစိတ် ပြောကြားခဲ့ခြင်းမရှိပေ။

အမေရိကန်သမ္မတ ဂျိုးဘိုင်ဒန် (Joe Biden) သည် အမေရိကန်က ထောက်ပံ့ပေးခဲ့သည့် လက်နက်အချို့ကို အသုံးပြုပြီး ရုရှား၏ နယ်နိမိတ်အတွင်းရှိ စစ်ရေးပစ်မှတ်များအား တိုက်ခိုက်ရန် ယူကရိန်းကို ခွင့်ပြုပေးခဲ့သည်။

သို့သော် အမေရိကန်သည် ကီလိုမီတာ ၃၀၀ (၁၈၆ ကီလိုမီတာ) အကွာအဝေးအထိ ပစ်ခတ်ရောက်ရှိနိုင်သည့် ATACMS တာဝေးပစ် လက်နက်စနစ်နှင့် အခြား အမေရိကန်က ထောက်ပံ့ပေးထားသည့် တာဝေးပစ် လက်နက် များကို အသုံးပြုပြီး ရုရှား၏ နယ်နိမိတ်အတွင်းသို့ တိုက်ခိုက်ခွင့်ကိုမူ တားမြစ်ထားဆဲဖြစ်သည်။

ယူကရိန်းစစ်သားကိုတွေ့ရစဉ်

ဗြိတိန်နိုင်ငံခြားရေးဝန်ကြီး ဒေးဗစ် ကင်မရွန်း (David Cameron) ကလည်း မေလ ၃ ရက်တွင် ယူကရိန်း၏ ကိယက်ဗ် (Kiev) မြို့တော်ကို ရောက်ရှိခဲ့သည့် ခရီးစဉ်အတွင်း ယူကရိန်းသည် ဗြိတိန်က ထောက်ပံ့ပေးထားသည့် လက်နက်များ အသုံးပြုပြီး ရုရှားနိုင်ငံအတွင်းရှိ ပစ်မှတ်များကို တိုက်ခိုက်ပိုင်ခွင့်ရှိကြောင်း၊ ထိုအကြောင်းအရာ သည် ယူကရိန်းအပေါ်တွင်သာ မူတည်ကြောင်း ပြောကြားခဲ့သည်။

စိန့်ပီတာစဘတ်ချ် (St. Petersburg) မြို့ရှိ Gazprom တာဝါတွင် နိုင်ငံတကာ ဂျာနယ်လစ်များနှင့် သုံးနာရီကျော် ကြာ ပြုလုပ်ခဲ့သည့် အစည်းအဝေး၌ ပူတင်က ဂါဇာစစ်ပွဲမှအစ အမေရိကန်ရွေးကောက်ပွဲ ကိစ္စများကိုပါ ဆွေးနွေး ခဲ့သော်လည်း အမေရိကန်ရွေးကောက်ပွဲ၌ မည်သူက အနိုင်ရလိမ့်မည်ကို ရုရှားက စိတ်မဝင်စားကြောင်း ပြောကြားခဲ့သည်။

Source: ရိုက်တာ