CNI International News

ဒါကာ၊ မေလ ၂၉

ဘင်္ဂလားဒေ့ရှ်နှင့် မြန်မာနိုင်ငံ၏ နယ်နိမိတ်များကိုဖဲ့ယူပြီး အရှေ့တီမောကဲ့သို့ ခရစ်ယာန်နိုင်ငံအသစ်တစ်ခု ထူထောင်ရန် ကြိုးပမ်းသည့် ပူးပေါင်းကြံစည်မှု တစ်ခုရှိခဲ့ပြီး ဘင်္ဂလားဒေ့ရှ်ဝန်ကြီးချုပ် ရှိတ်ဟာစီနာ (Sheikh Hasina) က ပြောကြားခဲ့ကြောင်း The Print သတင်းဝက်ဘ်ဆိုက်မှ ဖော်ပြခဲ့သည်။

ထိုကြိုးပမ်းမှုကို ခွင့်ပြုမည်မဟုတ်ကြောင်း သူမက ပြောသည်။

ထို့ပြင် ဘင်္ဂလားဒေ့ရှ် နယ်နိမိတ်အတွင်း လေတပ်စခန်းတစ်ခု ထူထောင်ရန် ပြည်ပနိုင်ငံတစ်နိုင်ငံကို ခွင့်ပြုပေး မည်ဆိုလျှင် ဇန်နဝါရီ ၇ ရက်တွင် ပြုလုပ်ခဲ့သည့် ရွေးကောက်ပွဲ၌ အတားအဆီးမရှိ ပြန်လည်ရွေးကောက်ခံရလိမ့် မည်ဆိုသည့် ကမ်းလှမ်းချက်ကိုလည်း လက်ခံရရှိခဲ့သည်ဟု ဟာစီနာက ပြောသည်။

သို့သော်လည်း မည်သည့်နိုင်ငံက ၎င်းကို ထိုကဲ့သို့ ကမ်းလှမ်းခဲ့သည်ဆိုခြင်းကိုတော့ ဟာစီနာက ထုတ်ဖော် ပြောဆိုခဲ့ခြင်းမရှိပေ။

မြန်မာနဲ့ ဘင်္ဂလားဒေ့ရှ် နယ်နိမိတ်ကို တွေ့ရစဉ်

အာဝါမီလိဂ်ပါတီဥက္ကဋ္ဌ ဖြစ်သူ ရှိတ်ဟာနီနာသည် မေလ ၂၆ ရက်က ဝန်ကြီးချုပ်ရုံးတွင် ပြုလုပ်ခဲ့သည့် ၁၄ ပါတီ အစည်းအဝေး၌ မိန့်ခွန်းပြောကြားချိန်အတွင်း အဆိုပါ မှတ်ချက်စကားများကို ထည့်သွင်းပြောကြားခဲ့ခြင်း ဖြစ်သည်။ 

ရှိတ်ဟာစီနာက သူသည် ပြည်တွင်း/ပြည်ပ စိန်ခေါ်မှုများနှင့် ရင်ဆိုင်နေရပြီး လျှို့ဝှက်ပူးပေါင်းကြံစည်မှုသည် ဆက်လက် တည်ရှိနေဆဲဖြစ်ကြောင်း အလေးထား ပြောဆိုခဲ့သည်ဟု ဒေသခံမီဒီယာဖြစ်သည့် United News of Bangladesh မှ ဖော်ပြခဲ့သည်။

"သူတို့တွေက အရှေ့တီမောလိုမျိုး ခရစ်ယာန်နိုင်ငံတစ်ခု ထူထောင်ပါလိမ့်မယ်။ အဲဒီနယ်မြေတွေထဲမှာ ဘင်္ဂလားဒေ့ရှ်နဲ့ မြန်မာနိုင်ငံရဲ့နယ်နိမိတ်တွေ ပါဝင်နေပြီး ဘင်္ဂလားပင်လယ်အော်မှာ စခန်းတစ်ခုလည်း တည်ဆောက်ချင်နေကြပါတယ်" ဟု ရှိတ်ဟာစီနာက ပြောသည်။

ရှေးယခင်ကာလများကတည်းက ဘင်္ဂလားပင်လယ်အော်နှင့် အိန္ဒိယသမုဒ္ဒရာတွင် စီးပွားရေး လှုပ်ရှားမှုများ မြင့်တက်ခဲ့သည်ဟု ရှိတ်ဟာစီနာက ဆိုသည်။

 မြန်မာနယ်ခြားစောင့်တပ်က ကင်းလှည့်နေစဉ်

"သူတို့တွေက အဲဒီနေရာကို မျက်စိကျနေကြပါတယ်။ ဘာမှတော့ အငြင်းပွားစရာမရှိပါဘူး။ ကျမကလည်း ဒါမျိုးအဖြစ်ခံမှာ မဟုတ်ပါဘူး။ သူတို့တွေကတော့ ကျမကို ပြဿနာတစ်ခုအဖြစ် ရှုမြင်ထားကြပါတယ်" ဟု ရှိတ်ဟာစီနာက ပြောကြားခဲ့သည်။

ဘင်္ဂလားဒေ့ရှ်နိုင်ငံအတွင်း လေတပ်စခန်း တည်ဆောက်ခွင့်ပြုရန် ကမ်းလှမ်းခဲ့သူသည် လူဖြူအမျိုးသားတစ်ဦး ဖြစ်ကြောင်း ရှိတ်ဟာစီနာက ထပ်လောင်းပြောဆိုခဲ့သည်။

သို့သော် ထိုကမ်းလှမ်းမှုကို လက်မခံခဲ့သဖြင့် အဝါမီလိဂ်ပါတီက ဦးဆောင်သည့် မိမိတို့ အစိုးရအဖွဲ့သည် ပြဿနာ အရှာခံနေရကြောင်း၊ လေတပ်စခန်းကို ဆောက်လုပ်ခွင့် ပြုမည်ဆိုပါက ဘာပြဿနာမှ ရှိလာတော့မည် မဟုတ်ကြောင်း ရှိတ်ဟာစီနာက ပြောကြားခဲ့သည်။

ထို့ပြင် အတိုက်အခံပါတီဖြစ်သည့် ဘင်္ဂလားဒေ့ရှ် အမျိုးသားရေးပါတီသည် ရွေးကောက်ပွဲကို ဟန့်တားရန် ကြံစည် ခဲ့သည်ဟုလည်း ရှိတ်ဟာစီနာက စွပ်စွဲပြောကြားခဲ့သည်။

Source: The Print

CNI International News

ပြုံယမ်း၊ မေလ ၂၉

မြောက်ကိုရီးယားသည် မေလ ၂၇ ရက်က စစ်ဘက်သုံး ကင်းထောက်ဂြိုဟ်တု အသစ်တစ်စင်းကို လွှတ်တင်ခဲ့ သော်လည်း ထိုဂြိုဟ်တုကို တင်ဆောင်သွားသည့် ဒုံးပျံ၏ အင်ဂျင်သည် ပျံသန်းနေချိန်တွင် ပေါက်ကွဲသွားခဲ့သဖြင့် အောင်မြင်ခြင်း မရှိခဲ့ကြောင်း ရိုက်တာမှ ဖော်ပြခဲ့သည်။

မြောက်ကိုရီးယားသည် ပြီးခဲ့သည့်နှစ် နိုဝင်ဘာလက ၎င်း၏ ပထမဆုံး ကင်းထောက်ဂြိုဟ်တု တစ်စင်းကို ပတ်လမ်းထဲသို့ အောင်မြင်စွာ လွှတ်တင်နိုင်ခဲ့သည်။

အမေရိကန်နှင့် တောင်ကိုရီးယားတို့ကမူ မြောက်ကိုရီးယား၏ ဂြိုဟ်တုလွှတ်တင်မှုများသည် ပဲ့ထိန်းဒုံးကျည် နည်းပညာကို အသုံးပြုခွင့် တားမြစ်ထားသည့် ကုလသမဂ္ဂ၏ တားမြစ်ချက်ကို ချိုးဖောက်ရာရောက်ကြောင်း ပြောကြားခဲ့သည်။

"ဂြိုဟ်တုကို တင်ဆောင်သွားတဲ့ ဒုံးပျံအင်ဂျင်ရဲ့ ပထမအဆင့်ဟာ လေထုထဲမှာပဲ ပေါက်ကွဲသွားပြီး ဂြိုဟ်တု လွှတ်တင်မှုဟာ အောင်မြင်ခြင်း မရှိခဲ့ပါဘူး"ဟု မြောက်ကိုရီးယား၏ အမျိုးသားလေကြောင်းအာကာသ နည်းပညာ အုပ်ချုပ်ရေးအဖွဲ့က ပြောကြားခဲ့သည်ဟု မြောက်ကိုရီးယားနိုင်ငံပိုင် KCNA သတင်းအေဂျင်စီက ဖော်ပြခဲ့သည်။

 မြောက်ကိုရီးယားရဲ့ ကင်းထောက်ဂြိုဟ်တုကို တွေ့ရစဉ်

ကနဦး လေ့လာချက်များအရ အသစ်တီထွင် ထုတ်လုပ်ခဲ့သည့် လောင်စာရည်သုံး ဒုံးပျံမော်တာကြောင့် ထိုကဲ့သို့ ပေါက်ကွဲမှု ဖြစ်ရသည်ဟု ယူဆထားပြီး နောက်ထပ် စုံစမ်းစစ်ဆေးမှုများကို ဆက်လက် လုပ်ဆောင်နေသည်ဟု KCNA က ထုတ်ပြန်ခဲ့သည်။

တောင်ကိုရီးယားနှင့် ဂျပန်နိုင်ငံမှ အရာရှိများကလည်း မြောက်ကိုရီးယား၏ ဂြိုဟ်တုလွှတ်တင်မှုသည် အောင်မြင်ခဲ့ခြင်းမရှိကြောင်း အစောပိုင်းက ပြောကြားခဲ့သည်။

မြောက်ကိုရီးယားသည် ပင်လယ်ဝါ (Yellow Sea) ပေါ်မှဖြတ်၍ အမျိုးအမည်မသိ ဒုံးတစ်စင်းကို လွှတ်တင်ခဲ့ပြီး မိနစ်ပိုင်းအကြာတွင် ထိုဒုံးယာဉ်သည် ပေါက်ကွဲခဲ့ကာ အပျက်အစီး အပိုင်းအစများသည် ပင်လယ်ထဲသို့ ကျသွားခဲ့သည်ဟု တောင်ကိုရီးယား ပူးတွဲစစ်ဦးစီးချုပ်များအဖွဲ့ (JCS) က ပြောကြားခဲ့သည်။

ဂျပန်နိုင်ငံကလည်း မြောက်ကိုရီးယား၏ ဒုံးကျည်လွှတ်တင်မှုကို ထောက်လှမ်းတွေ့ရှိခဲ့ကြောင်း ပြောကြားခဲ့ပြီး နိုင်ငံတောင်ပိုင်း အိုကီနာဝါ (Okinawa) စီရင်စုနယ်တွင် အရေးပေါ် သတိပေးချက် ထုတ်ပြန်ခဲ့ပြီးနောက် နာရီပိုင်း အကြာတွင် ထိုသတိပေးချက်ကို ပြန်လည်ရုပ်သိမ်းခဲ့သည်။

Source: ရိုက်တာ

CNI International News

ဘန်ကောက်၊ မေလ ၂၈

ထိုင်းဝန်ကြီးချုပ် ဆရီသာ သာဗီဆင် (Srettha Thavisin) သည် ၎င်းအား ဝန်ကြီးချုပ်ရာထူးမှ ဖယ်ရှားရန် အထက်လွှတ်တော်အမတ် ၄၀ က လျှောက်ထားခဲ့သည့် ဖွဲ့စည်းပုံအခြေခံ ဥပဒေဆိုင်ရာခုံရုံး အမှုနှင့်စပ်လျဉ်းပြီး ဒုဝန်ကြီးချုပ်ဟောင်း ဝစ္စနူ ကရီယာ ငမ် (Wissanu Krea-ngam) နှင့် တိုင်ပင်ဆွေးနွေးခဲ့သည်ဟု ထုတ်ဖော် ပြောကြားခဲ့ကြောင်း Thai PBS မှ ဖော်ပြခဲ့သည်။

ထိုဆွေးနွေးမှုကို မေလ ၂၆ ရက်က ဝစ္စနူ၏ နေအိမ်တွင် ပြုလုပ်ခဲ့ခြင်းဖြစ်ကြောင်း ဆရီသာက ပြောကြားခဲ့သော် လည်း အမှုသည် ဆက်လက် ရင်ဆိုင်ရမည်ဖြစ်သဖြင့် ဆွေးနွေးခဲ့သည့် အသေးစိတ် အကြောင်းအရာများကို ပြောကြားရန် ငြင်းဆိုခဲ့သည်။

မေလ ၂၃ ရက်က ဖွဲ့စည်းပုံဆိုင်ရာခုံရုံးသည် ဆရီသာအား ဖွဲ့စည်းပုံ၏ ဥပဒေအပုဒ်ခွဲ ၁၇၀ (၄) နှင့် (၅) တို့ကို ချိုးဖာက်မှုဖြင့် စွပ်စွဲထားသည့် အထက်လွှတ်တော်အမတ် ၄၀ ၏ လျှောက်လှဲချက်ကို စဉ်းစားရန် သဘောတူခဲ့ သည်။

ထိုလျှောက်ထားချက်တွင် ဆရီသာသည် ယခင်က အဂတိလိုက်စားမှုဖြင့် စီရင်ချက် ချမှတ်ခံခဲ့ရသည့် ပီချစ် ချူအန်ဘန် (Phichit Chuenban) အား ဝန်ကြီးရာထူးနေရာ ခန့်အပ်ခဲ့ခြင်းဖြင့် ဖွဲ့စည်းပုံအခြေခံဥပဒေကို ချိုးဖောက်ကြောင်း ဖော်ပြထားသည်။

 ထိုင်းဝန်ကြီးချုပ် ဆရီသာ သာဗီဆင်ကို တွေ့ရစဉ်

ပီချစ်သည် ထိုအမှုကြောင့် ရာထူးမှ နုတ်ထွက်ခဲ့သည်။ ဆရီသာသည်လည်း ၎င်း၏ ခုခံလျှောက်လှဲချက်ကို တရားရုံးသို့ တင်သွင်းရန် အချိန် ၁၅ ရက် ရရှိထားသည်။

တရားရုံးသို့ အသနားခံ လျှောက်လဲခဲ့သည့် အထက်လွှတ်တော်အမတ် ၄၀ တွင် ၂၁ ဦးသည် ပြီးခဲ့သည့်နှစ် သြဂုတ်လက အောက်လွှတ်တော်နှင့် အထက်လွှတ်တော် အစည်းအဝေးတွင် ဆရီသာအား ဝန်ကြီးချုပ်အဖြစ် ထောက်ခံမဲပေးခဲ့သူများဖြစ်သည်။

မကြာသေးမီက King Prajadhipok's Institute က ပြုလုပ်ခဲ့သည့် စစ်တမ်းတွင် ဖြူးထိုင်းပါတီ၏ လူကြိုက် များမှုသည် Move Forward ပါတီ (MFP) နောက်တွင် နောက်ကျကျန်နေခဲ့ကြောင်း ဖော်ပြထားသည်။

ဝန်ကြီးချုပ်ဆရီသာကမူ သူ့အနေနှင့် အမှုကို အကောင်းဆုံး ရင်ဆိုင်ရန် အားထုတ်ကြိုးပမ်းသွားမည်ဖြစ်ကြောင်း ပြောကြားခဲ့သည်။

Source: Thai PBS World

CNI International News

မက်ဒရစ်၊ မေလ ၂၈

စပိန်သည် ဒေါ်လာ  ၁ ဒသမ ၂၃ ဘီလျံ တန်ကြေးရှိသည့် လက်နက်ထောက်ပံ့မှု အစီအစဉ်၏ တစ်စိတ်တစ်ပိုင်း အနေဖြင့် ယူကရိန်းကို Patriot ဒုံးကျည်များနှင့် Leopard တင့်ကားများ ပေးပို့ရန်စီစဉ်နေသည်ဟု ရိုက်တာမှ ဖော်ပြခဲ့သည်။

စပိန်သည် ယူကရိန်းအား Patriot လေယာဉ်ပစ်ဒုံးကျည် ၁ ဒါဇင်ကျော်၊ တစ်ပတ်ရစ် ဂျာမန်လုပ် Leopard 2A4 တင့်ကား ၁၉ စီးနှင့် ဒရုန်းတိုက်ဖျက်ရေး ကိရိယာများနှင့်ခဲယမ်းများ အပါအဝင် စပိန်နိုင်ငံလုပ် လက်နက်များကို ပေးပို့လိမ့်မည်ဟု အမည်မဖော်ပြထားသည့် သတင်းရင်းမြစ်များကို ကိုးကားပြီး စပိန်၏ El Pais သတင်းစာက ဖော်ပြခဲ့သည်။

ထိုလက်နက်များ ဖြန့်ချိမည့် အစီအစဉ်ကို စပိန်နိုင်ငံ၊ မက်ဒရစ်မြို့တော်သို့ ယူကရိန်းသမ္မတ ဇာလန်းစကီး (Volodymyr Zelenskiy) လာရောက်လည်ပတ်မည့် ခရီးစဉ်အတွင်း ကြေညာလိမ့်မည်ဟု ဆိုသည်။

ဇာလန်းစကီးနဲ့ စပိန်၀န်ကြီးချုပ်ကို တွေ့ရစဉ်

ဇာလန်းစကီးသည် စပိန်ခရီးစဉ်အတွင်း စပိန်ဝန်ကြီးချုပ် ပက်ဒရိုဆန်းချက် (Pedro Sanchez) နှင့် စပိန်ဘုရင် ဖီးလစ် (King Felipe) တို့နှင့် တွေ့ဆုံလိမ့်မည်ဟု စပိန်၏ El Pais သတင်းစာက ဖော်ပြခဲ့သည်။

အဆိုပါ လက်နက်များ ထောက်ပံ့ပေးမည့် အစီအစဉ်ကို ပြီးခဲ့သည့်လအတွင်း စပိန်အစိုးရက အတည်ပြုပေးခဲ့ သော်လည်း မည်သည့် လက်နက်များ ပါဝင်သည်ဆိုခြင်းကိုမူ အသေးစိတ် ထုတ်ပြန်ခဲ့ခြင်းမရှိပေ။

စပိန်ဝန်ကြီးချုပ် ဆန်းချက်၏ ပြောရေးဆိုခွင့်ရှိသူကမူ El Pais သတင်းစာ၏ ဖော်ပြချက်နှင့်ပတ်သက်ပြီး မှတ်ချက်ပေးရန် ငြင်းဆိုခဲ့သည်။

Source: ရိုက်တာ

CNI International News

ဝါရှင်တန်၊ မေလ ၂၇

အမေရိကန်နိုင်ငံ၊ ဝါရှင်တန် (Washington) မြို့တော်တွင် ပြုလုပ်သည့် ဟောပြောပွဲတစ်ခုတွင် သမ္မတ ရွေးကောက်ပွဲဝင် ကိုယ်စားလှယ်လောင်း ဒေါ်နယ်ထရမ့် (Donald Trump) ကို ပရိသတ်များက အော်ဟစ် လှောင်ပြောင်ခဲ့ကြသည်ဟု ရိုက်တာမှ ဖော်ပြခဲ့သည်။

လွတ်လပ်မှုကို အဓိက တန်ဖိုးထားပြီး အစိုးရအဖွဲ့ကို အယုံအကြည်နည်းသည့် လစ်ဘာတေရီယမ်ဝါဒ (Libertarianism) ကို ဆုပ်ကိုင်ထားသူများက ထရမ့်ကို လှောင်ပြောင်ခဲ့ကြခြင်းဖြစ်သည်။

ထို့ကြောင့် ထရမ့်သည် မဲဆွယ်စည်းရုံးပွဲများတွင် ၎င်း၏ ထောက်ခံသူများ၏ အားပေးထောက်ခံသံများနှင့် ဆန့်ကျင်ဘက်ဖြစ်ခဲ့သည့် အခြေအနေနှင့် ရင်ဆိုင်ခဲ့ရသည်။

ထရမ့်သည် သမ္မတအဖြစ် တာဝန်ထမ်းဆောင်ခဲ့ချိန်က COVID-19 ကာကွယ်ဆေးများကို အလောတကြီး ထုတ်လုပ်ရန်စီစဉ်မှု၊ ကပ်ရောဂါကာလအတွင်း ကာကွယ်ဆေး မထိုးနှံသူများနှင့်ပတ်သက်ပြီး ပြည်သူ့ ကျန်းမာရေးဆိုင်ရာ တားမြစ်ကန့်သတ်ချက်များအား အဆုံးသတ်ရန် မလုပ်ဆောင်ပေးခဲ့မှုအတွက် လစ်ဘာတေရီယမ်များက ဝေဖန်ခဲ့ကြသည်။

ထရမ့်သည် ဝါရှင်တန်တွင် ပြုလုပ်သည့် ဟောပြောပွဲ စင်မြင့်ထက်သို့ တက်လာချိန်တွင် လှောင်ပြောင် အော်ဟစ်သံများ တစ်ခဲနက် ထွက်ပေါ်လာခဲ့ပြီး ထရမ့်ကို ထောက်ခံသူ အနည်းစုကသာ သူ့ကို အားပေးခဲ့ကြသည်။

ဒေါ်နယ်ထရမ့်ကို အော်ဟစ်လှောင်ပြောင်နေသူကို တွေ့ရစဉ်

ထရမ့်စင်ပေါ် တက်လာချိန်နှင့် မရှေးမနှောင်းမှာပင် လစ်ဘာတေရီယမ်ပါတီဝင်တစ်ဦးက “ဒေါ်နယ်ထရမ့် ကျည်ဆန်တစ်တောင့်လောက် မှန်ခဲ့သင့်တယ်” ဟု ထအော်ခဲ့သည်။

ထိုဖြစ်စဉ်နှင့်ပတ်သက်ပြီး ထရမ့်၏ မဲဆွယ်စည်းရုံးရေးအဖွဲ့က မှတ်ချက်ပေးရန် ရိုက်တာသတင်းဌာန၏ တောင်းဆိုချက်ကို ချက်ချင်း မတုန့်ပြန်ခဲ့ပေ။

၂၀၁၇ ခုနှစ်မှ ၂၀၂၀ ပြည့်နှစ်အထိ သမ္မတအဖြစ် တာဝန်ထမ်းဆောင်ခဲ့သည့် ထရမ့်ကမူ နိုဝင်ဘာ ၅ ရက်တွင် ပြုလုပ်မည့် သမ္မတရွေးကောက်ပွဲ၌ ယှဉ်ပြိုင်ရမည့် သမ္မတဂျိုးဘိုင်ဒန် (Joe Biden)၏ အစိုးရအဖွဲ့ကို ဝေဖန် တိုက်ခိုက်ခဲ့သည်။

ထို့ပြင် ထရမ့်သည် လစ်ဘာတေရီယမ်များကို ချွေးသိပ်ရန် ကြိုးပမ်းခဲ့ပြီး အခွန်နှင့် အစိုးရအဖွဲ့ အရွယ်အစားနှင့် ပတ်သက်ပြီး ရီပတ်ဘလစ်ကန်ပါတီ၏ သဘောထားသည် ဒီမိုကရက်တစ်ပါတီထက် ပိုပြီး လစ်ဘာတေရီယမ် ပါတီနှင့် ပိုတူကြောင်း ပြောကြားခဲ့သည်။

“ကျနော်တို့ဟာ တစ်ဖက်နဲ့ တစ်ဖက် မတိုက်ခိုက်သင့်ပါဘူး” ဟု ထရမ့်က ပြောကြားခဲ့ပြီး ဘိုင်ဒန်ကို အနိုင်ရရန် ၎င်းနှင့်အတူ လက်တွဲလုပ်ဆောင်ကြရန် လစ်ဘာတေရီယမ်များကို တိုက်တွန်းခဲ့သည်။

Source: ရိုက်တာ

CNI International News

ဘန်ကောက်၊ မေလ ၂၇

ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) သည် ဝန်ကြီးချုပ်ရုံး ဝန်ကြီးရာထူးနေရာ အတွက် ၎င်းတို့မိသားစု၏ ရှေ့နေဖြစ်သူ ပီချစ် ချူအန်ဘန် (Phichit Chuenban) အား ခန့်အပ်ရန် အကြံပြုခဲ့ သည်ဆိုသည့် သတင်းများကို ငြင်းဆိုခဲ့ကြောင်း Thai PBS World မှ ဖော်ပြခဲ့သည်။

သက်ဆင်က သူသည် အသက်အရွယ် ကြီးရင့်နေပြီဖြစ်ပြီး အစိုးရအဖွဲ့အတွင်း မည်သည့် ရာထူးနေရာမှ ရယူ မထားကြောင်း၊ လူငယ်များအား နေရာပေးရန် အကြံပြုခြင်းသည် နိုင်ငံအတွက် တတ်နိုင်သည့်ဘက်မှ ကူညီခြင်း ဖြစ်ကြောင်း ပြောကြားခဲ့သည်။

ထို့ပြင် အချို့ပြဿနာများသည် အချိန်ယူ ဖြေရှင်းရမည်ဖြစ်သဖြင့် လက်ရှိဝန်ကြီးချုပ် ဆရီသာ သာဗီဆင် (Srettha Thavisin) ကို ဝန်ကြီးချုပ်အဖြစ် တတ်နိုင်သမျှ အချိန်ကြာမြင့်စွာ ထမ်းဆောင်စေရန် ဆန္ဒရှိကြောင်း သက်ဆင်က ပြောသည်။

ရှေ့နေဖြစ်သူ ပီချစ် ချူအန်ဘန်ကို တွေ့ရစဉ်

နိုင်ငံရေးနောက်ခံ အရှုပ်တော်ပုံများရှိသည့် ပီချစ်အား ဝန်ကြီးချုပ်ရုံး ဝန်ကြီးအဖြစ် ခန့်အပ်မှုကြောင့် အထက် လွှတ်တော်အမတ် ၄၀ ခန့်က ဆရီသာအား ရာထူးမှ ဖယ်ရှားရန် ဖွဲ့စည်းပုံအခြေခံဥပဒေဆိုင်ရာခုံရုံးကို စောဒက တက်ခဲ့ခြင်းသည် ပြဿနာအချို့ကို ဖြစ်စေနိုင်ကြောင်း၊ သိုသော် ဆရီသာသည် ရာထူးမှ ဖယ်ရှားခံရမည် မဟုတ် ကြောင်း သက်ဆင်က ပြောသည်။

ထို့ပြင် သူ့အနေဖြင့် အထက်လွှတ်တော်အမတ် ၄၀ ကို ဆန့်ကျင်သည့် တုန့်ပြန်မှုများကို ပြုလုပ်လိမ့်မည်ဆိုသည့် သတင်းများကိုလည်း သက်ဆင်က ငြင်းဆိုခဲ့သည်။

မကြာသေးမီက ချင်းမိုင် (Chiang Mai) တွင် မြန်မာနိုင်ငံမှ တိုင်းရင်းသားအဖွဲ့အစည်းများ၏ ကိုယ်စားလှယ်များ နှင့် ဆွေးနွေးမှု၊ ထိုင်းတောင်ပိုင်းတွင် ဖြစ်ပွားနေသည့် မတည်ငြိမ်မှုများကို ဆွေးနွေးရန် ဖူးခက် (Phuket) တွင် မလေးရှားဝန်ကြီးချုပ် အန်ဝါ အီဘရာဟင် (Anwar Ibrahim) နှင့် လျှို့ဝှက်တွေ့ဆုံမှုများသည် ကောင်းမွန်သည့် ရည်ရွယ်ချက်ဖြင့် ပြုလုပ်ခဲ့ခြင်းဖြစ်ပြီး ကိုယ်ကျိုးစီးပွားအတွက် မဟုတ်ကြောင်းလည်း သက်ဆင်က ပြောကြားခဲ့ သည်။

ထိုင်းဝန်ကြီးချုပ် ဆရီသာ သာဗီဆင်ကို တွေ့ရစဉ်

မြန်မာနိုင်ငံသည် ထိုင်းနိုင်ငံ၏ အိမ်နီးချင်းဖြစ်ပြီး အာဆီယံအဖွဲ့ဝင်နိုင်ငံဖြစ်ကာ မြန်မာနိုင်ငံ၏ ပဋိပက္ခသည် အာဆီယံကို အားနည်းစေနိုင်ပြီး မြန်မာပြည်သူများသည် ထိုင်းနိုင်ငံအတွင်းသို့ ထွက်ပြေး ဝင်ရောက်ရသည့် အခြေအနေသို့ ရောက်ရှိစေခဲ့ကြောင်း ၎င်းက ဆိုသည်။

သက်ဆင်သည် မေလ ၂၆ ရက်က ၎င်း၏ ကွယ်လွန်သွားသည့် ယာဉ်မောင်းဖြစ်သူ ဝီချိုင်း ချန်လက် (Wichai Changlek) ကို ဂါရဝပြုရန် သမီးဖြစ်သူ ပေတုန်တန် ရှင်နာဝပ် (Paetongtarn Shinawatra) နှင့် သားဖြစ်သူ ပန်သွန်တေး ရှင်နာဝပ် (Panthongtae Shinawatra) တို့နှင့်အတူ နာခွန်း ရတ်ချာစီမာ (Nakhon Ratchasima) မြို့သို့ သွားရောက်ခဲ့သည်။

သက်ဆင်ကို ၂၀၁၆ ခုနှစ်တွင် အစိုးရရှေ့နေချုပ်ဟောင်းက တော်ဝင်မိသားစုအား ဝေဖန်သည့် တော်ဝင်အသရေ ဖျက်မှုဥပဒေဖြင့် တရားစွဲဆိုခဲ့ပြီး မေလ ၂၉ ရက်တွင် ထိုအမှုကို ကြားနာစစ်ဆေးမှု ခံယူရမည်ဖြစ်သည်။

Source: Thai PBS World

CNI International News

နယူးဒေလီ၊ မေလ ၂၇

ဧပြီလအတွင်းက တောင်တရုတ်ပင်လယ်တွင် အမေရိကန်၊ ဂျပန်၊ ဩစတြေးလျနှင့် ဖိလစ်ပိုင်တို့သည် ပူးတွဲ ရေကြောင်း ကင်းလှည့်မှုများနှင့် ပထမဆုံးအကြိမ် အမေရိကန်-ဂျပန်-ဖိလစ်ပိုင် သုံးပွင့်ဆိုင် အစည်းအဝေး ပြုလုပ်မှုများသည် Squad ဟုခေါ်ဆိုနိုင်သည့် မဟာမိတ်အဖွဲ့အသစ်တစ်ခု ပေါ်ထွက်လာသည့် အခင်းအကျင်း ဖြစ်သည်ဟု ကျွမ်းကျင်သူများက ပြောကြားခဲ့ကြောင်း Lowy Institute ဝက်ဘ်ဆိုက်မှ ဖော်ပြခဲ့သည်။

အဆိုပါ လေးနိုင်ငံသည် တောင်တရုတ်ပင်လယ်တွင် တရုတ်နှင့်ဖိလစ်ပိုင်အကြား နယ်နိမိတ်ပိုင်ဆိုင်မှု အငြင်းပွား မှုများကြောင့် တင်းမာမှုများ မြင့်တက်လာသည့် အခြေအနေတွင် တရုတ်ကို တန်ပြန်ရန် ရည်ရွယ်ခဲ့ခြင်း ဖြစ်နိုင် သည်ဟု ဆိုသည်။

တစ်ချိန်တည်းမှာပင် အိန္ဒိယ၊ ဩစတြေးလျ၊ ဂျပန်နှင့် အမေရိကန်တို့ ပါဝင်သည့် Quad အဖွဲ့ခေါင်းဆောင်များ၏ အစည်းအဝေးကို အိန္ဒိယက ရွှေ့ဆိုင်းမှု၊ မကြာသေးမီက ရုရှား-ယူကရိန်းစစ်ပွဲတွင် ကုလသမဂ္ဂ၏ ကြေညာချက် ထုတ်ပြန်မှုတွင် အိန္ဒိယက လက်ရှောင်နေမှု၊ အိန္ဒိယနှင့် ရုရှားအကြား ကုန်သွယ်ဖက် ဆက်ဆံရေးများ ထိန်းသိမ်း ထားမှု၊ အီရန်နှင့် ဆိပ်ကမ်းသဘောတူစာချုပ် ချုပ်ဆိုမှုများကြောင့် အိန္ဒိယနှင့် အခြား Quad အဖွဲ့ဝင်နိုင်ငံများ အကြား စည်းလုံးညီညွတ်မှုအပေါ် မေးခွန်းများ ထွက်ပေါ်လာခဲ့သည်။

တောင်တရုတ်ပင်လယ် အခြေအနေကို တွေ့ရစဉ်

The Interpreter ဂျာနယ်တွင် ပင်တိုင်ဆောင်းပါးရှင်ဖြစ်သည့် ရစ်ချက် ဟေဒရီယန် (Richard Heydarian) ကဲ့သို့ ဒေသတွင်း လေ့လာစောင့်ကြည့်သူအချို့ကမူ Squad အဖွဲ့သည် Quad အဖွဲ့ထက် ပိုမိုထိရောက်မှု ရှိနိုင်လိမ့်မည် ဟု သုံးသပ်ခဲ့ကြသည်။

Squad အဖွဲ့သည် လက်ရှိ ဩစတြေးလျ-ဗြိတိန်-အမေရိကန်တို့ ပါဝင်သည့် AUKUS အဖွဲ့နှင့် အမေရိကန်-ဂျပန်-ဖိလစ်ပိုင် သုံးပွင့်ဆိုင်အဖွဲ့တို့၏ တိုးတက်ပြောင်းလဲလာသည့် အဖွဲ့မျိုးဖြစ်သည်။

Squad ဟု သုံးနှုန်းဖော်ပြခဲ့သည့် အဆိုပါအဖွဲ့သည် တရုတ်၏ ရန်လိုမှုများကို ပိုမိုရင်ဆိုင်နေရသည့် ဖိလစ်ပိုင် အတွက် နိုင်ငံရေး အသိုက်အဝန်းများထဲတွင် ယုံကြည်မှုကို ပိုမိုမြှင့်တင်ပေးနိုင်မည်မှာ သေချာကြောင်း ကျွမ်းကျင်သူများက ပြောကြားခဲ့သည်။

သို့သော် Squad အဖွဲ့ အခင်းအကျင်းနှင့်ပတ်သက်ပြီး ထည့်သွင်းစဉ်စားရမည့် အဓိကအချက် ၂ ချက်ရှိသည်။

အိန္ဒိယနိုင်ငံခြားရေးဝန်ကြီးကို တွေ့ရစဉ်

ပထမအချက်မှာ ဖိလစ်ပိုင်သည် အင်ဒို-ပစိဖိတ်ဒေသတွင် တရုတ်ကို တန်ပြန်ရန်အတွက် ၎င်း၏မိတ်ဖက်နိုင်ငံများ နှင့် စီးပွားရေးအရသော်လည်းကောင်း၊ စစ်ရေးအရသော်လည်းကောင်း လိုအပ်ချက်များ ရှိနေခြင်းဖြစ်သည်။

ဒုတိယအချက်မှာ Quad အဖွဲ့သည် ထိရောက်မှု မရှိသည့်အဖွဲ့အဖြစ် ကောက်ချက်ချရန် အချိန်စောလွန်းနေခြင်း ဖြစ်သည်။ 

အကယ်၍ လက်ရှိပြုလုပ်နေသည့် အိန္ဒိယရွေးကောက်ပွဲတွင် ဝန်ကြီးချုပ်မိုဒီ (Narendra Modi) အနိုင်ရခဲ့ မည်ဆိုပါက Quad အဖွဲ့၏ အနေအထားသည် ပြောင်းလဲသွားနိုင်သည်။ 

အိန္ဒိယသည် ရွေးကောက်ပွဲအပြီးတွင် အစိုးရသစ် ဖွဲ့စည်းပြီးသည်နှင့် တစ်ပြိုင်တည်း ၂၀၂၄ ခုနှစ် ဒုတိယနှစ်ဝက် အတွင်း Quad အဖွဲ့အစည်းအဝေးကို လက်ခံကျင်းပရန် စီစဉ်ထားသည်။

Source: Lowy Institute

CNI International News

နယူးဒေလီ၊ မေလ ၂၅

အိန္ဒိယနိုင်ငံတွင် လာမည့် သီတင်းပတ်အတွင်း အဆုံးသတ်တော့မည့် လွှတ်တော်ရွေးကောက်ပွဲများ၌ မိမိ၏ BPJ ပါတီသည် နေရာအများစုကို အနိုင်ရထားပြီးဖြစ်ကြောင်း အိန္ဒိယဝန်ကြီးချုပ် နာရန်ဒရာမိုဒီ (Narendra Modi) က ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

BJP ပါတီသည် ပြည်သူလူထု၏ ထောက်ခံမှုဖြင့် လုပ်ပိုင်ခွင့်အာဏာကို သမိုင်းဝင် အနိုင်ရရှိလိမ့်မည်ဟု မိုဒီက မေလ ၂၃ ရက်တွင် ဖော်ပြခဲ့သည့် The Economic Times နှင့်ပြုလုပ်သည့် အင်တာဗျူး၌ ပြောကြားခဲ့သည်။

မိမိတို့ပါတီသည် အောက်လွှတ်တော်၏ နေရာ ၅၄၃ နေရာအနက် ၂၇၂ နေရာကို အနိုင်ရရှိပြီး လွှတ်တော်၏ နေရာ အများစုကို ရရှိကြောင်း၊ ထိုအနိုင်ရရှိမှုသည် မြေပြင်တွင်ရှိသည့် ပြည်သူများက ရှင်းလင်းပြတ်သားစွာ အချက်ပြခဲ့ သည်ဟု မိုဒီက ပြောသည်။

လူဦးရေ ၁ ဒသမ ၄ ဘီလျံရှိသည့် အိန္ဒိယတွင် ဧပြီ ၁၉ ရက်မှစပြီး ဇွန်လ ၁ ရက်အထိ အဆင့် ၇ ဆင့်ခွဲပြီး ပြုလုပ် သည့် ရွေးကောက်ပွဲကို ဆက်လက် ပြုလုပ်နေသည်။ ထို့နောက် မဲရလဒ်များကိုတော့ ဇွန်လ ၄ ရက်တွင် ထုတ်ပြန် ကြေညာမည် ဖြစ်သည်။

မိုဒီကမူ ၎င်း၏ BJP ပါတီနှင့် မဟာမိတ်များသည် ၂၀၁၉ ခုနှစ် ရွေးကောက်ပွဲက အနိုင်ရခဲ့သည့် နေရာ ၃၅၀ ထက် ပိုပြီး ယခုရွေးကောက်ပွဲတွင် နေရာ ၄၀၀ အထိ အနိုင်ရလိမ့်မည်ဟု ခန့်မှန်းပြောကြားခဲ့သည်။ 

မိုဒီကို တွေ့ရစဉ်

BJP ပါတီသည် ၂၀၁၉ ရွေးကောက်ပွဲက ၃၀၃ နေရာကို အနိုင်ရခဲ့ပြီး ယခုရွေးကောက်ပွဲတွင် နိုင်ငံတောင်ပိုင်းနှင့် အရှေ့ပိုင်းဒေသများ၌ သိသာစွာ အသာစီး ရရှိထားကြောင်း မိုဒီက ပြောသည်။

“ဒီတစ်ကြိမ်မှာတော့ ကျနော်တို့ဟာ တမီလ်နာဒူး (Tamil Nadu) ၊ တယ်လန်နာဂါ (Telangana) ၊ အန်ဒရာ ပရာဒေ့ရှ် (Andhra Pradesh)၊ ကီရာလာ (Kerala)၊ အနောက်ဘန်ဂေါ (West Bengal) နဲ့ အိုဒစ်ရှာ (Odisha) လို ပြည်နယ်တွေမှာ မဲရလဒ်တွေ တိုးတက်ကောင်းမွန် လာပါလိမ့်မယ်” မိုဒီက The Economic Times သတင်းစာကို ပြောကြားခဲ့သည်။

BJP ပါတီသည် ယခုရွေးကောက်ပွဲတွင် အုပ်စု ၂၀ ကျော် ပါဝင်သည့် အတိုက်အခံ မဟာမိတ်အဖွဲ့နှင့် ယှဉ်ပြိုင် နေရပြီး ထိုအတိုက်အခံများက မိုဒီနှင့် BJP ပါတီကို ဖြုတ်ချရန် ရည်ရွယ်ထားသည်။

ဥတ္တရာပရာဒေ့ရှ် (Uttar Pradesh) ပြည်နယ်၏ ဒေသခံပါတီကို ဦးဆောင်သည့် အတိုက်အခံ ခေါင်းဆောင် အခ်ဟီလက်ရှ် ယာဒေ့ဗ် (Akhilesh Yadav) နှင့် ဒေလီဝန်ကြီးချုပ် အာဗင်း ကက်ဂျ်ရီဝယ်လ် (Arvind Kejriwal) တို့ကမူ ယခုရွေးကောက်ပွဲတွင် BJP ပါတီသည် နေရာအများစု ရရှိလိမ့်မည် မဟုတ်ကြောင်း ပြောကြားခဲ့သည်။

သို့သော် မိုဒီကမူ ဇွန်လ ၄ ရက်တွင် ထုတ်ပြန်မည့် မဲရလဒ်များ၌ BJP ပါတီသည် မဲများကို စံချိန်တင် ရရှိလိမ့်မည် ဟု ယုံကြည်ကြောင်း ပြောကြားခဲ့သည်။

Source: ဘန်ကောက်ပို့စ်

CNI International News

ဘေကျင်း၊ မေလ ၂၄

တရုတ်သည် ထိုင်ဝမ်ကျွန်းအနီးတွင် မေလ ၂၃ ရက်က လက်နက်ကြီးများ တပ်ဆင်ထားသည့် စစ်လေယာဉ်များ စေလွှတ်ပြီး တိုက်ခိုက်မှုများ ပြုလုပ်သည့်ပုံစံဖြင့် စစ်ရေးလေ့ကျင့်ခဲ့သည်ဟု ရိုက်တာမှ ဖော်ပြခဲ့သည်။

ထိုင်ဝမ်တွင် သမ္မတသစ် လိုင်ချင်တေ (Lai Ching-te) ၏ ကျမ်းသစ္စာကျိန်ဆိုမှုကို တရုတ်နိုင်ငံပိုင်မီဒီယာက ရှုတ်ချနေချိန်၌ ခွဲထွက်ရေး လှုပ်ရှားချက်များကို တုန့်ပြန်သည့်အနေဖြင့် ယခုကဲ့သို့ စစ်ရေးလေ့ကျင့်မှုများ ပြုလုပ်ခြင်းဖြစ်ကြောင်း တရုတ်က ပြောကြားခဲ့သည်။

ထိုင်ဝမ်ရေလက်ကြားနှင့် ထိုင်ဝမ်မှ ထိန်းချုပ်ထားသည့် ကျွန်းစုများအနီးတွင် ပြုလုပ်ခဲ့သည့် စစ်ရေးလေ့ကျင့်မှု များသည် တရုတ်က ခွဲထွက်ရေးဝါဒီအဖြစ် သတ်မှတ်ထားသော လိုင်သည် ထိုင်ဝမ်သမ္မတအဖြစ် စတင်ရုံးထိုင်ခဲ့ပြီး ၃ ရက်အကြာတွင် ပေါ်ပေါက်လာခဲ့ခြင်းဖြစ်သည်။

ထိုင်ဝမ်ကို ၎င်း၏ နယ်နိမိတ်အဖြစ် ကြေညာထားသည့် တရုတ်က မေလ ၂၀ ရက်က ပြုလုပ်ခဲ့သော တရုတ်၏ ကျမ်းသစ္စာကျိန်ဆိုပွဲ မိန့်ခွန်းကို ရှုတ်ချခဲ့သည်။ 

တရုတ်စစ်သင်္ဘောကို တွေ့ရစဉ်

လိုင်သည် ထိုမိန့်ခွန်းအတွင်း တရုတ်အား ခြိမ်းခြောက်မှုများ ရပ်တန့်ရန် တိုက်တွန်းခဲ့ပြီး ထိုမိန့်ခွန်းကို တရုတ်နိုင်ငံ ခြားရေးဝန်ကြီး ဝမ်ယိ (Wang Yi) က ကျက်သရေမရှိကြောင်း ရှုတ်ချခဲ့သည်။

လိုင်သည် တရုတ်နှင့် ဆွေးနွေးမှုများ ပြုလုပ်ရန် ထပ်တလဲလဲ ကမ်းလှမ်းခဲ့သော်လည်း ပယ်ချခံခဲ့ရသည်။ 

ထိုင်ဝမ် လူထုအနေဖြင့် ၎င်းတို့၏ အနာဂါတ်ကို ၎င်းတို့ကိုယ်တိုင် ဆုံးဖြတ်နိုင်ကြောင်း ပြောကြားခဲ့ပြီး တရုတ်၏ အချုပ်အခြာအာဏာပိုင်ကြောင်း ကြေညာချက်ကို ငြင်းပယ်ခဲ့သည်။

တရုတ်ပြည်သူ့လွတ်မြောက်ရေးတပ်မတော် (PLA) ၏ အရှေ့ပိုင်း စစ်နယ်ဝန်း ဌာနချုပ်က ဒေသစံတော်ချိန် နံနက် ၇ နာရီ ၄၅ မိနစ်တွင် ထိုင်ဝမ်ကျွန်းအနီး ဝန်းကျင်၌ ကြည်းတပ်၊ ရေတပ်၊ လေတပ်နှင့် ဒုံးကျည်တပ်ဖွဲ့များ ပါဝင်သည့် ပူးတွဲစစ်ရေး လေ့ကျင့်မှုများကို စတင်ပြုလုပ်ခဲ့ကြောင်း ပြောကြားခဲ့သည်။

တိုက်လေယာဉ်ကို တွေ့ရစဉ်

ထိုစစ်ရေး လေ့ကျင့်မှုများကို ထိုင်ဝမ်ရေလက်ကြား၊ ထိုင်ဝမ်ကျွန်း၏ မြောက်ဘက်၊ တောင်ဘက်နှင့် အရှေ့ဘက် နေရာများ၊ ထိုင်ဝမ်က ထိန်းချုပ်ထားသည့် ကင်မန် (Kinmen) ၊ မတ်ဆု (Matsu) ၊ ၀ူချူး (Wuqiu) နှင့် တောင်ယင်း (Dongyin) ကျွန်းစုများအနီးတွင် ပြုလုပ်ခဲ့ကြောင်း တရုတ်နိုင်ငံပိုင်မီဒီယာက ထုတ်ပြန်ခဲ့သည်။

ထိုစစ်ရေး လေ့ကျင့်မှုများတွင် တရုတ်သည် ဒုံးကျည်အစစ်များ တပ်ဆင်ထားသော ဒါဇင်နှင့်ချီသည့် တိုက်လေယာဉ်များကို စေလွှတ်ခဲ့ကာ ရေတပ်သင်္ဘောများနှင့်အတူ သတ်မှတ်ထားသည့် ပစ်မှတ်များကို တိုက်ခိုက်ခဲ့သည်ဟု ထုတ်ပြန်ချက်၌ ဖော်ပြခဲ့သည်။

"Joint Sword - 2024A" ဟု အမည်ပေးထားသည့် အဆိုပါ စစ်ရေးလေ့ကျင့်မှုများကို နှစ်ရက်ကြာ ပြုလုပ်ရန် စီစဉ်ထားကြောင်း တရုတ်က ပြောကြားခဲ့ပြီး ထိုင်ဝမ်ကာကွယ်ရေးဝန်ကြီးဌာနကမူ တရုတ်၏ စစ်ရေးလေ့ကျင့် မှုများကို ရှုတ်ချခဲ့သည်။

Source: ရိုက်တာ