CNI Internatioanl News

ဒါကာ၊ အောက်တိုဘာ ၇

ဘင်္ဂလားဒေ့ရှ်နိုင်ငံသည် ၎င်း၏ ပထမဆုံ နျူကလီးယား ဓာတ်အားပေး စက်ရုံအတွက် ရုရှားထံမှ ယူရေနီယံ လောင်စာများကို ပထမဆုံးအကြိမ် လက်ခံရရှိခဲ့သည်ဟု အယ်လ်ဂျာဇီးယာမှ ဖော်ပြခဲ့သည်။

ထို့ကြောင့် ဘင်္ဂလားဒေ့ရှ်သည် ကမ္ဘာပေါ်တွင် နျူကလီးယား စွမ်းအင်ထုတ်လုပ်မည့် ၃၃ နိုင်ငံမြောက် ဖြစ်လာ မည် ဖြစ်သည်။

တောင်အာရှနိုင်ငံဖြစ်သည့် ဘင်္ဂလားဒေ့ရှ်သည် ရုရှားနိုင်ငံပိုင် အဏုမြူ ကုမ္ပဏီ Rosatom နှင့်ပူးပေါင်းပြီး နျူကလီးယား ဓာတ်အားပေးစက်ရုံ နှစ်ခုအနက် ပထမဆုံး စက်ရုံတစ်ခုကို တည်ဆောက်နေသည်။

IAEA ၏ အကြီးအကဲ ရာဖေးလ် ဂရော့စီကို တွေ့ရစဉ်

ထိုစက်ရုံ တည်ဆောက်ရေးအတွက် လိုအပ်သည့် ငွေကြေး ၁၂ ဒသမ ၆၅ ဘီလျံထဲမှ ၉၀ ရာခိုင်နှုန်းကို ရုရှားထံမှ ချေးငွေရယူပြီး တည်ဆောက်ခြင်း ဖြစ်သည်။

ရုရှားကို ပြန်လည် အကြွေးဆပ်ရမည့် ကာလသည် ၂၈ နှစ်ဖြစ်ပြီး အကြွေးဆပ်ချိန်ကို ၁၀ နှစ်ကြာ ဆိုင်းငံ့နိုင်သည့် သဘောတူညီချက် ရရှိထားသည်။

"ဒီနေ့ကတော့ ဘင်္ဂလားဒေ့ရှ် ပြည်သူတွေအတွက် ဂုဏ်ယူပျော်ရွှင်ရမယ့်နေ့ ဖြစ်ပါတယ်"ဟု ဘင်္ဂလားဒေ့ရှ် ဝန်ကြီးချုပ် ရှိတ်ဟာစီနာ (Sheikh Hasina) က အောက်တိုဘာ ၅ ရက်တွင် ရုရှားသမ္မတ ဗလာဒီမာပူတင် (Vladimir Putin) နှင့် ဗွီဒီယို ဆက်သွယ်မှုမှတဆင့် ပြုလုပ်သည့် ညီလာခံတွင် ပြောကြားခဲ့သည်။

ဟာစီနာနှင့် ဗွီဒီယို ဆက်သွယ်မှုမှ တဆင့် ပြုလုပ်သည့် ညီလာခံတွင် ပူတင်က ဘင်္ဂလားဒေ့ရှ်၏ နျူကလီးယား စွမ်းအင်စက်ရုံ တည်ဆောက်ရေး စီမံကိန်းကို ကြီးကြပ်ပေးခဲ့သည့် နိုင်ငံတကာ အဏုမြူစွမ်းအင် အေဂျင်စီ (IAEA) ကို ကျေးဇူးတင်ကြောင်း ပြောကြားခဲ့သည်။

ဘင်္ဂလားဒေ့ရှ်က နျူကလီးယား စက်ရုံကိုတွေ့ရစဉ်

IAEA ၏ အကြီးအကဲ ရာဖေးလ် ဂရော့စီ (Rafael Grossi) ကလည်း ဘင်္ဂလားဒေ့ရှ်၏ နျူကလီးယား စွမ်းအင် စက်ရုံ တည်ဆောက်ရေး စီမံကိန်းကို ဂုဏ်ပြုကြောင်း လူမှုမီဒီယာတွင် ရေးသားဖော်ပြခဲ့သည်။

"ဘင်္ဂလားဒေ့ရှ်ဟာ နျူကလီးယားစွမ်းအင် ဖွံ့ဖြိုးတိုးတက်ရေးကဏ္ဍမှာ အသစ်ထွက်ပေါ်လာတဲ့ နိုင်ငံတွေထဲက အောင်မြင်မှုရရှိတဲ့ နိုင်ငံအဖြစ် ရပ်တည်နေပြီး IAEA ရဲ့ လမ်းညွှန်မှုအောက်မှာ နျူကလီးယားစီမံကိန်းကို တိုးတက်အောင် လုပ်ဆောင်နေပါတယ်" ဟု ဂရော့စီက ပြောကြားခဲ့သည်။

ဘင်္ဂလားဒေ့ရှ်နိုင်ငံက တည်ဆောက်မည့် နျူကလီးယား ဓာတ်အားပေး စက်ရုံနှစ်ခုအနက် ပထမဆုံးတစ်ခုသည် စုစုပေါင်း လျှပ်စစ်ဓာတ်အား ၂၄၀၀ မဂ္ဂါဝပ် ထုတ်လုပ်မည်ဖြစ်ကာ လာမည့်နှစ် ဇူလိုင်လအတွင်း စတင် လည်ပတ် ရန် စီစဉ်ထားသည်။

Source: အယ်လ်ဂျာဇီးယား

CNI International News

မော်စကို ၊ အောက်တိုဘာ ၇

အနောက်နိုင်ငံများ၏ စစ်ရေးနှင့် ဘဏ္ဍာရေး အကူအညီများ ရပ်တန့်သွားမည်ဆိုပါက ယူကရိန်းသည် သီတင်း တစ်ပတ်ထက်ကျော်ပြီး တောင့်ခံနိုင်လိမ့်မည် မဟုတ်ကြောင်း ရုရှားသမ္မတ ဗလာဒီမာ ပူတင် (Vladimir Putin) က ပြောကြားခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

ယူကရိန်းအတွက် အမေရိကန်၏ အထောက်အပံ့များ ရပ်တန့်သွားပါက ထိုထောက်ပံ့ရေး ဟာကွက်ကို အစားထိုး ဖြည့်ဆည်း ပေးနိုင်မည် မဟုတ်ကြောင်း ဥရောပသမဂ္ဂ အရာရှိတစ်ဦးက ပြောကြားခဲ့သည့် နေ့မှာပင် ပူတင်၏ ပြောကြားချက် ထွက်ပေါ်လာခြင်း ဖြစ်သည်။

အမေရိကန် အစိုးရအဖွဲ့အတွင်း ဖြစ်ပွားနေသည့် နိုင်ငံရေး ပြဿနာများ မြင့်တက်လာမှုသည် ယူကရိန်းအတွက် အရေးတကြီး လိုအပ်နေသည့် စစ်ရေးနှင့် လူသားချင်းစာနာ ထောက်ထားမှုဆိုင်ရာ အကူအညီများကို ထိခိုက် စေနိုင်ကြောင်း ပူတင်က ပြောသည်။

အမေရိကန်သမ္မတဂျိုးဘိုင်ဒန် (Joe Biden) ကလည်း ယူကရိန်းအတွက် အမေရိကန်၏ အကူအညီများသည် လမ်းလွဲသွားစေမည့် အခြေအနေကို စိုးရိမ်ကြောင်း ယခုသီတင်းပတ်အတွင်း ဝန်ခံပြောကြားခဲ့သည်။

ဇာလန်းစကီးနဲ့ ဘိုင်ဒန်ကိုတွေ့ရစဉ်

ယူကရိန်းသည် လစဉ်လတိုင်း ဒေါ်လာ ဘီလျံချီ ရရှိနေသည့်် လှူဒါန်းမှုများကြောင့် အသက်ရှူ ချောင်နေခဲ့ခြင်း ဖြစ်သည်ဟု ပင်လယ်နက် အပန်းဖြေစခန်း မြို့ဖြစ်သည့် ဆိုချီ (Sochi) မြို့တွင် ပြုလုပ်ခဲ့သည့် မော်စကိုအခြေစိုက် ဗယ်လ်ဒါအီ ဆွေးနွေးရေး ကလပ် (Valdai Discussion Club) ၏ အစည်းအဝေး၌ ပူတင်က ပြောကြားခဲ့သည်။

"အဲဒီလှူဒါန်းမှုတွေသာ ရပ်သွားမယ်ဆိုရင် ယူကရိန်းဟာ တစ်ပတ်အတွင်း အကုန်သေဆုံး သွားပါလိမ့်မယ်။ အဲဒီ လိုပဲ ကာကွယ်ရေးစနစ်ဟာလည်း ရပ်တန့်သွားပါလိမ့်မယ်။ မနက်ဖြန်မှာ အထောက်အပံ့တွေ ရပ်သွားမယ်လို့ တွေးကြည့်လိုက်ပါ။ အဲဒါဆိုရင် ယူကရိန်းမှာ လက်နက်ခဲယမ်း ပစ္စည်းတွေဟာ တစ်ပတ်အတွင်း ပြတ်တောက် သွားပါလိမ့်မယ်"ဟု ပူတင်က ပြောသည်။

ဇွန်လအတွင်းက စတင်ခဲ့သည့်် ယူကရိန်း၏ တန်ပြန်ထိုးစစ်အတွင်း ယူကရိန်းစစ်သား ၉၀,၀၀၀ ကျော် သေဆုံးခဲ့ သည်ဟုလည်း ပူတင်က ပြောသည်။

အောက်တိုဘာ ၅ ရက်က စပိန်နိုင်ငံတွင် ပြုလုပ်ခဲ့သည့် ဥရောပနိုင်ငံရေး အသိုင်းအဝိုင်း (EPC) ၏ အစည်းအဝေး ၌ ဥရောပသမဂ္ဂ နိုင်ငံခြားရေးမူဝါဒ အကြီးအကဲ ဂျိုးဆက် ဘော်ရဲလ် (Josep Borrell) က ဥရောပသမဂ္ဂသည် ယူကရိန်း၏ အဓိက အလှူရှင်ဖြစ်သည့် အမေရိကန်၏ နေရာကို အစားထိုး ဝင်ရောက်နိုင်လိမ့်မည် မဟုတ် ကြောင်း ပြောကြားခဲ့သည်။

"အမေရိကန်က ထောက်ပံ့ မပေးနိုင်တော့ရင် ဥရောပက အဲဒီနေရာကို အစားထိုး ဝင်ရောက်နိုင်ပါ့မလား။ သေချာ တာကတော့ ဥရောပဟာ အမေရိကန်ရဲ့ နေရာကို အစားထိုး ဝင်ရောက်ပြီး ထောက်ပံ့ မပေးနိုင်ပါဘူး" ဟု ဘော်ရဲလ်က ပြောကြားခဲ့သည်။

ဥရောပသမဂ္ဂနှင့် အမေရိကန်သည် ရုရှားကို တိုက်ခိုက်နေသည့် ယူကရိန်းအား ဘဏ္ဍာရေးနှင့် စစ်ရေး အကူအညီ များ ပေးနေသည့် နေတိုးအဖွဲ့ဝင်များ ဖြစ်သည်။

သို့သော် အမေရိကန်လွှတ်တော်တွင် မကြာသေးမီက သဘောတူညီခဲ့သည့် ကာလတို ဘတ်ဂျက် သဘောတူညီမှု တွင် ယူကရိန်းအတွက် စစ်ရေး အကူအညီများကို ထည့်သွင်းခဲ့ခြင်း မရှိပေ။

Source: အယ်လ်ဂျာဇီးယား

CNI International News

မော်စကို၊ အောက်တိုဘာ ၇

ရုရှားနိုင်ငံတွင် ဝဂ်နာကြေးစားစစ်သားကုမ္ပဏီ၏ အကြီးအကဲ ယက်ဂျီနီ ပရီဂေါ့ဇ်ဟင် (Yevgeny Prigozhin) သေဆုံးခဲ့သည့် လေယာဉ်ပျက်ကျမှု၌ ထိုလေယာဉ်အတွင်းဘက်မှာ လက်ပစ်ဗုံးတစ်လုံး ပေါက်ကွဲမှုကြောင့် ပျက်ကျခဲ့ခြင်းဖြစ်သည်ဟု ရုရှားသမ္မတ ဗလာဒီမာ ပူတင် (Vladimir Putin) က ပြောကြားခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

ပရီဂေါ့ဇ်ဟင်၏ လေယာဉ်သည် ဒုံးကျည်ထိမှန်မှုကြောင့် မဟုတ်ဘဲ လေယာဉ်အတွင်းပိုင်းတွင် ပေါက်ကွဲမှုကြောင့် ပျက်ကျခဲ့ခြင်း ဖြစ်သည်ဟု ရုရှားစုံစမ်းစစ်ဆေးရေးကော်မတီက ကောက်ချက်ချခဲ့သည်။

သြဂုတ်လအတွင်း ဖြစ်ပွားခဲ့သည့် ပရီဂေါ့ဇ်ဟင်၏ လေယာဉ် ပျက်ကျမှုဖြစ်စဉ်တွင် သေဆုံးသူများ၏ ရုပ် အလောင်းများကို လေ့လာရာမှ ပေါက်ကွဲမှု၏ အကြောင်းရင်းကို တွေ့ရှိခဲ့သည်ဟု ပူတင်က ပြောသည်။

"လေယာဉ်ပျက်ကျမှုမှာ သေဆုံးသွားသူတွေရဲ့ ရုပ်အလောင်းတွေထဲမှာ လက်ပစ်ဗုံး အစအနတွေကို တွေ့ခဲ့ရပါ တယ်"ဟု ပူတင်က ပင်လယ်နက် အပန်းဖြေ စခန်းမြို့ဖြစ်သည့် ဆိုချီ (Sochi) မြို့ရှိ ဗယ်လ်ဒါအီ ဆွေးနွေးရေး ကလပ် (Valdai Discussion Club) တွင် ပြုလုပ်သည့် အစည်းအဝေးအတွင်း ပြောကြားခဲ့သည်။

ပူတင်ကို တွေ့ရစဉ်

"လေယာဉ်ဟာ ပြင်ပရဲ့ သက်ရောက်မှု မရှိခဲ့ပါဘူး။ ဒါဟာ အချက်အလက်တွေအပေါ် အခြေခံပြီး ပြောတာပါ"ဟု ပူတင်က ပြောကြားခဲ့သည်။

ပရီဂေါ့ဇ်ဟင်၏ ကိုယ်ပိုင် Embraer ဂျက်လေယာဉ်သည် သြဂုတ် ၂၃ ရက်က စိန့်ပီတာစဘတ်ချ် (Saint Petersburg) သို့ သွားရောက်ချိန်တွင် မော်စကိုမြို့တော် မြောက်ပိုင်းတွင် ပျက်ကျခဲ့ခြင်းဖြစ်သည်။

ထိုဖြစ်စဉ်ကြောင့် ပရီဂေါ့ဇ်ဟင် အပါအဝင် လေယာဉ်ပေါ် လိုက်ပါသွားသူ ၁၀ ဦးစလုံး သေဆုံးခဲ့သည်။

ထိုလေယာဉ် ပျက်ကျမှုတွင် ဝဂ်နာအုပ်စု၏ ထိပ်သီးတပ်မှူး ၂ ဦး၊ ပရီဂေါ့ဇ်ဟင်၏ သက်တော်စောင့် ၄ ဦးနှင့် လေယာဉ်အမှုထမ်း ၃ ဦး သေဆုံးခဲ့သည်။

သေဆုံးသွားတဲ့ ဝဂ်နာအုပ်စု အကြီးအကဲ ယက်ဂျီနီ ပရီဂေါ့ဇ်ဟင်ကို တွေ့ရစဉ်

ပုဂ္ဂလိက ဂျက်လေယာဉ်ပေါ်တွင် လက်ပစ်ဗုံး ပေါက်ကွဲမှုနှင့်ပတ်သက်သည့် အသေးစိတ် အချက်အလက်များကို ပူတင်က ပြောကြားခဲ့ခြင်း မရှိသော်လည်း စုံစမ်းစစ်ဆေးမှုများ၌ သေဆုံးသူများ၏ ရုပ်အလောင်းများကို အရက်နှင့် မူးယစ်ဆေးဝါး သုံးစွဲထားခြင်း ရှိ၊ မရှိ စစ်ဆေးခဲ့ခြင်းမရှိသဖြင့် ထိုအချက်သည် အမှားအယွင်းတစ်ခု ဖြစ်သည်ဟု ဆိုသည်။

"ကျနော့် အမြင်အရ ပြောရမယ်ဆိုရင် အဲဒီလို စုံစမ်းစစ်ဆေးမှုတွေကို လုပ်ခဲ့သင့်ပါတယ်။ ဒါပေမယ့်လည်း မလုပ်ခဲ့ပါဘူး" ဟု ပူတင်က ပြောသည်။

စိန့်ပီတာစဘတ်ချ်မြို့ရှိ ဝဂ်နာအုပ်စု၏ ရုံးခန်းများကို ရှာဖွေရာတွင် ရုရှားနိုင်ငံသုံးငွေ ရူဘယ် ၁၀ ဘီလျံ (ဒေါ်လာ သန်း ၁၀၀) ကို တွေ့ရှိခဲ့ပြီး ကိုကင်း ၅ ကီလိုဂရမ် (၁၁ ပေါင်)ကို တွေ့ရှိခဲ့သည်ဟုလည်း ပူတင်က ပြောကြားခဲ့ သည်။

Source: အယ်လ်ဂျာဇီးယား

CNI International News

မက္ကဆီကို စီးတီး၊ အောက်တိုဘာ ၇

အမေရိကန်သမ္မတ ဂျိုးဘိုင်ဒန် (Joe Biden) အစိုးရအဖွဲ့သည် ပြီးခဲ့သည့်လက အမေရိကန်-မက္ကဆီကို နယ်စပ် တွင် တွေ့ရှိခဲ့သည့် ဗင်နီဇွဲလား ရွှေ့ပြောင်းများကို နိုင်ငံအတွင်းကနေ နေရပ်ပြန်ပို့သွားမည်ဟု အေပီမှ ဖော်ပြခဲ့ သည်။

အမေရိကန်သို့ ဗင်နီဇွဲလား ရွှေ့ပြောင်းများ ဝင်ရောက်လာမှု ဆက်လက် မြင့်တက်နေချိန်တွင် ထိုရွှေ့ပြောင်းများ ကို စီးပွားရေး အကျပ်အတည်းနှင့် ရင်ဆိုင်နေရသည့် ၎င်းတို့၏နိုင်ငံကို ပြန်ပို့ရန် စီစဉ်ခဲ့ခြင်းဖြစ်သည်။

ဘိုင်ဒန်အစိုးရအဖွဲ့သည် ခိုလှုံခွင့် တောင်းခံသူများအတွက် တရားဝင် လမ်းကြောင်းများကို ပိုမိုဖွင့်ပေးထားပြီး လူဝင်မှုကို တင်းကျပ်သည့် အစီအစဉ်သစ်တစ်ခုကို လုပ်ဆောင်နေကြောင်း အမေရိကန် အမိမြေလုံခြုံရေးဝန်ကြီး အလက်ဂျန်ဒရို မာယော်ကက်စ် (Alejandro Mayorkas)က အောက်တိုဘာ ၅ ရက်တွင် မက္ကဆီကိုစီးတီးမြို့၌ မိန့်ခွန်းပြောကြားခဲ့သည်။

"ကျနော်တို့ နှစ်နိုင်ငံဟာ ရွှေ့ပြောင်း နေထိုင်သူတွေ မကြုံစဖူး အများအပြား ဝင်ရောက်လာတဲ့ စိန်ခေါ်မှုနဲ့ ရင်ဆိုင် ခဲ့ရပါတယ်"ဟု မာယော်ကက်စ်က မက္ကဆီကို ရည်ညွှန်းပြီး ပြောကြားခဲ့သည်။

အမေရိကန်သမ္မတ ဂျိုးဘိုင်ဒန်ကို တွေ့ရစဉ်

နေရပ်သို့ ပြန်လည်ပို့ဆောင်မည့် လေကြောင်းခရီးစဉ်များကို မကြာမီ စတင်သွားမည်ဖြစ်ကြောင်း အမည်မဖော်လို သည့် အမေရိကန်အရာရှိနှစ်ဦးက ပြောကြားခဲ့သည်။

သို့သော်လည်း နေရပ်ပြန်ပို့မည့်် လေကြောင်း ခရီးစဉ်များနှင့်ပတ်သက်သည့် အသေးစိတ် အချက်အလက်များကိုမူ ပြောကြားခဲ့ခြင်း မရှိပေ။

ဘိုင်ဒန်အစိုးရအဖွဲ့သည် အမေရိကန်သို့ ရောက်ရှိလာသည့် ထောင်နှင့်ချီသော ဗင်နီဇွဲလား နိုင်ငံသားများအတွက် နေထိုင်ခွင့်ဆိုင်ရာ သတ်မှတ်ချက်များကို တိုးမြှင့်ခဲ့သည်။

ထို့နောက် ယခုနှစ် ဇူလိုင် ၃၁ ရက် မတိုင်မီ နိုင်ငံအတွင်းသို့ ရောက်ရှိလာသည့် ဗင်နီဇွဲလား နိုင်ငံသားများသည် ယာယီ အကာအကွယ် ရရှိထားသည့် စာရင်းတွင် ပါဝင်မည်ဖြစ်သည်။

အမေရိကန် နိုင်ငံခြားရေး ဝန်ကြီး အန်တိုနီ ဘလင်ကင်ကို တွေ့ရစဉ်

အမေရိကန်သည် ရွှေ့ပြောင်း နေထိုင်သူများ၏ အခြေအနေကို သုံးသပ်ပြီး ဗင်နီဇွဲလားနိုင်ငံသားများကို ဘေးကင်း လုံခြုံစွာ ပြန်လည် ပို့ဆောင်ရေးအတွက် စဉ်းစားသုံးသပ်မှုများ ပြုလုပ်ခဲ့ကြောင်း ဘိုင်ဒန်အစိုးရအဖွဲ့က ယခု သီတင်းပတ်အတွင်း ပြောကြားခဲ့သည်။

မက္ကဆီကိုနိုင်ငံသို့ သွားရောက်သည့် အမေရိကန် ကိုယ်စားလှယ်အဖွဲ့ကို ဦးဆောင်သော အမေရိကန် နိုင်ငံခြားရေး ဝန်ကြီး အန်တိုနီ ဘလင်ကင် (Antony Blinken) ကလည်း အမေရိကန်တွင် ယာယီ အကာအကွယ် ရရှိထားသော ရွှေ့ပြောင်းများအတွက် ခိုင်မာသည့် ကတိကဝတ်များအတိုင်း လုပ်ဆောင်ပေးသွားမည်ဟု ပြောကြားခဲ့သည်။

လစ်သူယေးနီးယား လူဝင်မှုနှင့် ဒုက္ခသည် ဝန်ဆောင်မှုဌာနကမူ ဗင်နီဇွဲလား ရွှေ့ပြောင်းများအား နေရပ်သို့ ပြန်လည် ပို့ဆောင်မည့် အမေရိကန်၏ အစီအစဉ်ကို ဝေဖန်ခဲ့သည်။

Source: အေပီ

CNI International News

ဂျကာတာ၊ အောက်တိုဘာ ၆

စစ်တပ်၏ အကြီးစား စစ်လက်နက်ပစ္စည်းများကို အဆင့်မြှင့်တင်ရေးသည် အရေးကြီးသော်လည်း စစ်အသုံးစရိတ် ကို ချင့်ချိန်ပြီး အသုံးပြုသင့်သည်ဟု အင်ဒိုနီးရှားသမ္မတ ဂျိုကို ဝီဒိုဒို (Joko Widodo) က အောက်တိုဘာ ၅ ရက် တွင် ပြောကြားခဲ့ကြောင်း ရိုက်တာမှ ဖော်ပြခဲ့သည်။

လူဦးရေ သန်း ၂၇၀ ရှိသည့် အင်ဒိုနီးရှားနိုင်ငံသည် အရှေ့တောင်အာရှ၏ စီးပွားရေး အင်အား အကြီးဆုံးနိုင်ငံ ဖြစ်ပြီး စစ်တပ်ကို အဆင့်မြှင့််တင်ရန် ကြိုးပမ်းနေသော်လည်း မကြာသေးမီ နှစ်များအတွင်း တခြားသော ဒေသ တွင်း အင်အားကြီးနိုင်ငံများ၏ စစ်အင်အားနှင့် နှိုင်းယှဉ်ပါက နောက်ကောက်ကျနေသည်။

"စစ်လက်နက်ပစ္စည်းတွေ အဆင့်မြှင့်တင်မှုအတွက် အသုံးစရိတ်ကို လျာထားချက်နဲ့ ကိုက်ညီအောင် ချင့်ချိန်ပြီး သုံးစွဲရပါလိမ့်မယ်"ဟု ဝီဒိုဒိုက စစ်ရေးပြ အခမ်းအနားတွင် ပြောကြားခဲ့သည်။

အင်ဒိုနီးရှားသမ္မတ ဂျိုကို ဝီဒိုဒိုကိုတွေ့ရစဉ်

လာမည့်နှစ်တွင် ပြုလုပ်မည့် ရွေးကောက်ပွဲ၌ သမ္မတရွေးကောက်ပွဲ ဝင်ရောက် ယှဉ်ပြိုင်ဖွယ်ရှိသည့် ကာကွယ်ရေး ဝန်ကြီး ပရာဘိုဝို ဆူဘီယန်တို (Prabowo Subianto) က ဒေါ်လာ ၈ ဒသမ ၁ ဘီလျံ တန်ကြေးရှိ Dassault Rafale တိုက်လေယာဉ် ၄၂ စင်း၊ Turkish Aerospace ကုမ္ပဏီမှ ဒေါ်လာ သန်း ၃၀၀ တန်ကြေးရှိ ဒရုန်းအသစ် ၁၂ စင်းနှင့် ဒေါ်လာ သန်း ၈၀၀ တန်ကြေးရှိ Mirage 2000-5 တိုက်လေယာဉ် ၁၂ စင်း အပါအဝင် စစ်လက်နက်ပစ္စည်း များ ဝယ်ယူမှုကို ဦးဆောင်ပြုလုပ်ခဲ့သည်။

ကာကွယ်ရေးဝန်ကြီးဌာန အပါအဝင် လုံခြုံရေးအေဂျင်စီများ၏ အသုံးစရိတ်သည် အလွန်များပြားနေကြောင်းနှင့် ကောင်းမွန်မျှတသည့် ဘတ်ဂျက်ကို ထိန်းသိမ်းထားရန် ဝီဒိုဒိုက ဇူလိုင်လအတွင်း အစိုးရအဖွဲ့ကို သတိပေးခဲ့သည်။

ပြီးခဲ့သည့် ဆယ်စုနှစ်အတွင်း အင်ဒိုနီးရှား၏ ကာကွယ်ရေး အသုံးစရိတ်သည် နိုင်ငံ့ ဂျီဒီပီ၏ ရာခိုင်နှုန်းနှင့် တွက်ကြည့်ပါက အရှေ့တောင်အာရှ၏ ပေါ်ထွန်းစ ဈေးကွက်စီးပွားရေးနိုင်ငံ ခြောက်နိုင်ငံထဲတွင် အနိမ့်ဆုံး အသုံးစရိတ်ဖြစ်ကြောင်း စတော့ဟုမ်း နိုင်ငံတကာ ငြိမ်းချမ်းရေး သုတေသနဌာန (Stockholm International Prace Research Institute)၏ အချက်အလက်များတွင် ဖော်ပြခဲ့သည်။

Source: ရိုက်တာ

CNI International News

အစ္စတန်ဘူလ်၊ အောက်တိုဘာ ၆

တူရကီသည် အီရတ်နိုင်ငံရှိ ကာ့ဒ်ပစ်မှတ်များကို အောက်တိုဘာ ၄ ရက်က တိုက်ခိုက်မှုအသစ်များ လုပ်ဆောင်ခဲ့ ပြီး နယ်စပ်ဖြတ်ကျော် တိုက်ခိုက်သည့် လေကြောင်းစီးနင်းမှုများ ပိုမိုပြင်းထန်လာမည်ဟု တူရကီမှ သတိပေးခဲ့ ကြောင်း ဘန်ကောက်ပို့စ်က ဖော်ပြခဲ့သည်။ 

ဆီးရီးယားမှ ဝင်ရောက်လာသည့် စစ်သွေးကြွများသည် တူရကီ၏ အန်ကာရာမြို့တော်တွင် ပြီးခဲ့သည့် သီတင်း ပတ်ကုန်က တိုက်ခိုက်မှု ပြုလုပ်ခဲ့ပြီးနောက် တူရကီ၏ သတိပေးချက် ထွက်ပေါ်ခဲ့ခြင်း ဖြစ်သည်။

အန်ကာရာမြို့တော်၏ အစိုးရရုံးများ အခြေစိုက်သည့် ခရိုင်တွင် အောက်တိုဘာ ၁ ရက်က ဖြစ်ပွားခဲ့သည့် တိုက်ခိုက်မှုကို တုံ့ပြန်ရန်အတွက် ပြင်ဆင်မှုများ ပြုလုပ်ရန် တူရကီအစိုးရသည် ကာကွယ်ရေးနှင့် ထောက်လှမ်းရေး အကြီးအကဲများ ပါဝင်သည့် အမျိုးသား လုံခြုံရေး အစည်းအဝေးကို ခေါ်ယူခဲ့သည်။

 ကာ့ဒ် အလုပ်သမား ပါတီ (PKK)ကို တွေ့ရစဉ်

တူရကီ ပြည်ထဲရေး ဝန်ကြီးဌာန အပြင်ဘက်တွင် ဖြစ်ပွားခဲ့သည့် အသေခံ ဗုံးခွဲတိုက်ခိုက်မှု၌ ရဲတပ်ဖွဲ့သည် စစ်သွေးကြွတစ်ဦးကို ပစ်ခတ် သတ်ဖြတ်ခဲ့သလို နောက်တစ်ဦးသည် အသေခံဗုံးခွဲမှုမှာပဲ သေဆုံးခဲ့သည်။

ထို့နောက် တူရကီ လုံခြုံရေးအရာရှိ ၂ ဦး ဒဏ်ရာရရှိခဲ့သည်။

ထိုတိုက်ခိုက်မှုကို တူရကီနှင့် ၎င်း၏ အနောက်နိုင်ငံများမှ မဟာမိတ်များက အကြမ်းဖက်အဖွဲ့အဖြစ် သတ်မှတ် ထားသည့် ကာ့ဒ် အလုပ်သမား ပါတီ (PKK) က ၎င်းတို့ လုပ်ဆောင်ခဲ့ခြင်းဖြစ်ကြောင်း ကြေညာခဲ့သည်။ 

"အကြမ်းဖက် သမားနှစ်ဦးဟာ ဆီးရီးယားမှာ တိုက်ခိုက်ရေး သင်တန်းတွေ လေ့ကျင့်ခဲ့ပြီး တူရကီနိုင်ငံထဲကို ဝင်ရောက် လာတယ်ဆိုတာ ပိုမိုရှင်းလင်း လာခဲ့ပါတယ်။ အခုအခါမှာတော့ အီရတ်နဲ့ ဆီးရီးယားမှာရှိတဲ့ ကာ့ဒ် လက်နက်ကိုင်အဖွဲ့တွေ ပိုင်ဆိုင်တဲ့ ကြီးမားတဲ့ အဆောက်အအုံတွေနဲ့ စွမ်းအင် အဆောက်အအုံတွေဟာ ကျနော် တို့ လုံခြုံရေးတပ်ဖွဲ့တွေအတွက် တရားဝင်မှုရှိတဲ့ ပစ်မှတ်တွေ ဖြစ်လာခဲ့ပါပြီ"ဟု တူရကီနိုင်ငံခြားရေးဝန်ကြီး ဟက်ကန် ဖီဒန်က ပြောကြားခဲ့သည်။ 

အီရတ် ဝန်ကြီးချုပ် သာဘက် အယ် အဘက်စီကို တွေ့ရစဉ်

အဆိုပါ အဆောက်အအုံများနှင့် ခပ်ဝေးဝေးတွင် နေထိုင်ရန် အီရတ်နှင့် ဆီးရီးယား အာဏာပိုင်များကို အကြံပြုလို ကြောင်း ဖီဒန်က ပြောသည်။ 

တူရကီသည် အောက်တိုဘာ ၁ ရက်က အန်ကာရာ တိုက်ခိုက်မှုအပြီး နာရီပိုင်းအကြာတွင် အီရတ်နိုင်ငံ မြောက်ပိုင်းရှိ PKK တပ်ဖွဲ့များ၏ စခန်းများကို လေကြောင်း တိုက်ခိုက်ခဲ့သည်။ 

အောက်တိုဘာ ၄ ရက်တွင်လည်း အီရတ်၏ ခရိုင် ၅ ခုတွင် လေကြောင်း တိုက်ခိုက်မှုများကို ပြုလုပ်ခဲ့ပြီး အကြမ်းဖက်သမား အများအပြားအား ချေမှုန်းနိုင်ခဲ့သည်ဟု တူရကီကာကွယ်ရေးဝန်ကြီးဌာနက ထုတ်ပြန်ခဲ့သည်။ 

ထိုလေကြောင်း တိုက်ခိုက်မှုများကြောင့် အီရတ်နှင့် တူရကီအကြား တင်းမာမှုများ မြင့်တက်နေသဖြင့် အီရတ် ဝန်ကြီးချုပ် သာဘက် အယ် အဘက်စီ (Thabet al-Abbasi) သည် အန်ကာရာမြို့တော်တွင် တူရကီကာကွယ်ရေး ဝန်ကြီးနှင့် တွေ့ဆုံဆွေးနွေးရန် စီစဉ်ထားသည်။

Source: ဘန်ကောက်ပို့စ်

CNI International News

တဲလ်အဗစ်၊ အောက်တိုဘာ ၆

အစ္စရေးသည် နာဂေါ်နို-ကာရာဘက်ဒေသကို ပြန်လည်သိမ်းယူသည့် အဇာဘိုင်ဂျန်၏ စစ်ဆင်ရေးကို လျှို့ဝှက်စွာ ကူညီပေးခဲ့ပြီး အဇာဘိုင်ဂျန်အား အင်အားပြင်း လက်နက်များ ထောက်ပံ့ပေးခဲ့သည်ဟု အရာရှိများနှင့် ကျွမ်းကျင် သူများက ပြောကြားခဲ့ကြောင်း အေပီမှ ဖော်ပြခဲ့သည်။

စက်တင်ဘာ ၁၉ ရက်က အဇာဘိုင်ဂျန်၏ ၂၄ နာရီကြာ စစ်ဆင်ရေး မပြုလုပ်မီ သီတင်းပတ် အနည်းငယ်အလို တွင် အဇာဘိုင်ဂျန် စစ်တပ်၏ ကုန်တင်လေယာဉ်သည် အစ္စရေးနိုင်ငံ တောင်ပိုင်းရှိ လေတပ်စခန်းနှင့် နာဂေါ်နို-ကာရာဘက် ဒေသအနီးရှိ လေယာဉ်ကွင်း တစ်ခုအကြား ကြိမ်ဖန်များစွာ ပျံသန်းခဲ့ကြောင်း လေယာဉ်ပျံသန်းမှုများ ကို ခြေရာခံသည့်် အချက်အလက်များနှင့် အာမေးနီးယား သံတမန်များက ပြောကြားခဲ့သည်။

ထိုလေယာဉ် ပျံသန်းမှုများကြောင့် အစ္စရေးနှင့် အဇာဘိုင်ဂျန်အကြား မဟာဗျူဟာမြောက် မဟာမိတ်ဆက်ဆံရေး ကို စိုးရိမ်နေသည့် အာမေးနီးယားနိုင်ငံ၏ အရာရှိများအား စိတ်သောက ရောက်စေခဲ့သည်။

အဇာဘိုင်ဂျန်၀န်ကြီးချုပ်နဲ့ အစ္စရေး၀န်ကြီးချုပ်ကို တွေ့ရစဉ်

ထို့ပြင် အစ္စရေးသည် ကော့ကေးဆပ် တောင်တန်းဒေသများ၏ တောင်ဘက်တွင်ရှိသော နာဂေါ်နို-ကာရာဘက် ဒေသတွင် ၎င်း၏ အမျိုးသား အကျိုးစီးပွားများ ရှိနေသည်ကို ပြသရာ ရောက်ခဲ့သည်။ 

"ကျနော်တို့အတွက်တော့ အစ္စရေး လက်နက်တွေဟာ ကျနော်တို့ လူမျိုးတွေကို ပစ်ခတ်ခဲ့တဲ့ ဖြစ်စဉ်ဟာ ကြီးမား တဲ့ စိုးရိမ်စရာကိစ္စ ဖြစ်ပါတယ်"ဟု အစ္စရေးနိုင်ငံဆိုင်ရာ အာမေးနီးယားသံအမတ် အာမန် အက်ကိုပီယန် (Arman Akopian) က အေပီသတင်းဌာနသို့ ပြောကြားခဲ့သည်။

"အစ္စရေးအနေနဲ့ ကိုယ်နေထိုင်တဲ့ နေရပ်ကနေ မောင်းထုတ်ခံခဲ့ရတဲ့ လူတွေရဲ့ ကံကြမ္မာနဲ့ ပတ်သက်ပြီး စိုးရိမ် ကြောင်းလေးတော့ ပြသသင့်ပါတယ်။ ဘာကြောင့်များ အဇာဘိုင်ဂျန်ဘက်က ရပ်တည်လဲဆိုတာ ကျနော် မသိပါ ဘူး"ဟု ၎င်းက ပြောသည်။

 အဇာဘိုင်ဂျန်ရဲ့ စစ်လက်နက်တွေကိုတွေ့ရစဉ်

စက်တင်ဘာလက အဇာဘိုင်ဂျန် စစ်တပ်သည် အစ္စရေးနှင့် တူရကီတို့က ထောက်ပံ့ပေးခဲ့သည့်် လက်နက်ကြီးများ၊ ဒုံးပစ်လောင်ချာများနှင့် ဒရုန်းများ အပါအဝင် သာလွန်အင်အားဖြင့် အာမေးနီးယား ခွဲထွက်ဝါဒီ လက်နက်ကိုင် များကို တိုက်ခိုက်ခဲ့သဖြင့် အာမေးနီးယားတပ်ဖွဲ့များသည် လက်နက်ချခဲ့ရပြီး အဇာဘိုင်ဂျန်နှင့် ဆွေးနွေးမှုများ ပြုလုပ်ခဲ့သည်။

အဇာဘိုင်ဂျန်၏ တိုက်ခိုက်မှုများကြောင့် ကာရာဘက်ဒေသတွင် အာမေးနီးယားလူမျိုး ၂၀၀ ကျော် သေဆုံးခဲ့ပြီး သေဆုံးသူ အများစုသည် အာမေးနီးယား လက်နက်ကိုင်များဖြစ်ကာ အဇာဘိုင်ဂျန် စစ်သား ၂၀၀ ခန့် သေဆုံးခဲ့ သည်ဟု အရာရှိများက ပြောကြားခဲ့သည်။

ထို့ပြင် ၄၄၀၀ စတုရန်း ကီလိုမီတာရှိသည့် ကာရာဘက်ဒေသကို အဇာဘိုင်ဂျန် တပ်ဖွဲ့များက ထိန်းချုပ်ခဲ့သဖြင့် ထိုဒေသတွင် နေထိုင်သည့်် အာမေးနီးယားဒေသခံ စုစုပေါင်း၏ ၈၀ ရာခိုင်နှုန်းကျော်ဖြစ်သည့် လူပေါင်း ၁၀၀,၀၀၀ ကျော်သည် အာမေးနီးယားနိုင်ငံသို့ ထွက်ပြေး တိမ်းရှောင်ခဲ့ရသည်။

Source: အေပီ

CNI International News

ဝါရှင်တန်၊ အောက်တိုဘာ ၆

အမေရိကန်နိုင်ငံ တောင်တက္ကဆက်ဒေသ (South Texas) တွင် နယ်စပ်တံတိုင်း တည်ဆောက်ရေးအတွက် ဖက်ဒရယ်ဥပဒေ ၂၆ ခုကို ဖြေလျှော့ကြောင်း သမ္မတဂျိုးဘိုင်ဒန် (Joe Biden) အစိုးရအဖွဲ့က ကြေညာခဲ့သည်ဟု အေပီမှ ဖော်ပြခဲ့သည်။

ထိုကြေညာချက်သည် ဘိုင်ဒန် အစိုးရအဖွဲ့အနေနှင့် သမ္မတအုပ်ချုပ်ရေး အမိန့်ကို ပထမဆုံးအကြိမ် အသုံးပြုမှုဖြစ် ပြီး ယခင်သမ္မတ ဒေါ်နယ်ထရမ့် (Donaln Trump) လက်ထက်ကမူ သမ္မတ အုပ်ချုပ်ရေးအမိန့်ကို မကြာခဏ အသုံးပြုခဲ့သည်။

နယ်စပ်တံတိုင်း ဆောက်လုပ်ရေးအတွက် အသေးစိတ် အချက်အလက်အချို့နှင့်အတူ အမေရိကန်အမိမြေ လုံခြုံရေးဝန်ကြီးဌာန (Department of Homeland Security-DHS)က အမေရိကန် ဖက်ဒရယ် မှတ်ပုံတင်ရုံး (US Federal Registry) တွင် အစီအရင်ခံစာ တစ်စောင် တင်ခဲ့သည်။

အမေရိကန်နဲ့ မက္ကစီကို နယ်စပ် တံတိုင်းကို တွေ့ရစဉ်

အစိုးရ၏ အချက်အလက်များအရ ယခုဘဏ္ဍာနှစ်အတွင်း ရီယို ဂရန်ဒီ တောင်ကြား ဒေသ (Rio Grande Valley) မှဖြတ်ပြီး နိုင်ငံပေါင်း ၂၁ နိုင်ငံမှ တရားမဝင် ဝင်ရောက်မှုပေါင်း ၂၄၅,၀၀၀ ခန့်ရှိသည်ဟု သိရသည်။

"အမေရိကန်နိုင်ငံထဲကို တရားမဝင် ဝင်ရောက်မှုတွေကို တားဆီးဖို့အတွက် နယ်စပ်ဒေသအနီး တစ်ဝိုက်မှာရှိတဲ့ လမ်းတွေနဲ့ အတားအဆီးတွေ တည်ဆောက်ဖို့ အရေးတကြီး လိုအပ်နေပါတယ်"ဟု DHS ဝန်ကြီး အလက်ဂျန်ဒရို မာယော်ကက်စ် (Alejandro Mayorkas) က နို့တစ်စာတွင် ပြောကြားခဲ့သည်။

DHS က ဖြေလျှော့ပေးခဲ့သည့် ဖက်ဒရယ် ဥပဒေများထဲတွင် လေသန့်ရှင်းရေး အက်ဥပဒေ၊ သန့်ရှင်းသည့် သောက်သုံးရေ အက်ဥပဒေနှင့် မျိုးသုဉ်းပျောက်ကွယ်မည့် မျိုးစိတ်များ အက်ဥပဒေတို့ ပါဝင်ခဲ့သည်။

ထို့အပြင် နယ်စပ်တံတိုင်း တည်ဆောက်ရေးအတွက် ၂၀၁၉ ခုနှစ်က လွှတ်တော်မှ ချပေးခဲ့သည့် ရန်ပုံငွေများကို အသုံးပြုမည် ဖြစ်သည်။

ဖက်ဒရယ်ဥပဒေများကို ဖြေလျှော့မှုကြောင့် သဘာဝပတ်ဝန်းကျင်ဆိုင်ရာ ဥပဒေများကို ချိုးဖောက်ရာ ရောက်မည့် တရားရေးဆိုင်ရာ အမှုအခင်းများနှင့် အချိန်ကာလ ကြာမြင့်နိုင်မည့် စိစစ်သုံးသပ်ချက်များကို ရှောင်လွှဲနိုင်မည် ဖြစ်သည်။

DHS ဝန်ကြီး အလက်ဂျန်ဒရို မာယော်ကက်စ်ကို တွေ့ရစဉ်

ကြေညာချက်အတွင်း နယ်စပ်တံတိုင်းများ တည်ဆောက်မည့် မြေပုံများကို ဖော်ပြခဲ့ခြင်း မရှိသော်လည်း အမေရိကန် အကောက်ခွန်နှင့် နယ်စပ်ဒေသ ကာကွယ်ရေး (CBP) ဌာနက ဇွန်လအတွင်း ကြေညာခဲ့သည့် ပရောဂျက်တစ်ခုတွင် ထိုဒေသ၌ လက်ရှိတည်ရှိဆဲ နယ်စပ် အတားအဆီး စနစ်အထိ မိုင် ၂၀ ထပ်မံ တိုးချဲ့ တည်ဆောက်မည်ဟု ပြောကြားခဲ့သည်။

စတားကောင်တီ တရားသူကြီး အီလွိုင်း ဗီရာကလည်း တက္ကဆက်ပြည်နယ် ဖယ်လ်ကွန် ရေကာတာ (Falcon Dam) ၏ တောင်ဘက်မှစပြီး ဆယ်လင်နီနို (Salineno) ဒေသအထိ နယ်စပ်တံတိုင်းကို တည်ဆောက်သွားမည်ဟု ပြောကြားခဲ့သည်။

ထရမ့်အစိုးရအဖွဲ့ လက်ထက်က နိုင်ငံအနောက်တောင်ပိုင်း နယ်စပ်ဒေသတစ်လျှောက် မိုင် ၄၅၀ ရှည်လျားသည့် နယ်စပ်တံတိုင်း တစ်ခုကို ၂၀၁၇ ခုနှစ်မှ ၂၀၁၁ ခုနှစ်အကြား တည်ဆောက်ခဲ့သည်။

Source: အေပီ

CNI International News

တိုင်ပေ၊ အောက်တိုဘာ ၅

လာမည့်နှစ် ဇန်နဝါရီလတွင် ပြုလုပ်မည့် ထိုင်ဝမ်ရွေးကောက်ပွဲကို ဝင်ရောက်စွက်ဖက်ရန် တရုတ်တွင် နည်းလမ်း အများအပြားရှိသည်ဟု ထိုင်ဝမ်ထိပ်သီး လုံခြုံရေးအရာရှိတစ်ဦးက ပြောကြောင်း ရိုက်တာမှ ဖော်ပြခဲ့သည်။ 

ထိုနည်းလမ်းများတွင် လူထုသဘောဆန္ဒ စစ်တမ်းများကို ကြိုးကိုင်ခြယ်လှယ်မှု အပါအဝင် စစ်ရေးဖိအားများမှအစ သတင်းအမှားများ ဖြန့်မှုအဆုံး ပါဝင်သည်ဟု ထိုင်ဝမ်က ပြောသည်။

ထိုင်ဝမ်သည် ရွေးကောက်ပွဲများ မပြုလုပ်မီအချိန်တွင် တရုတ်၏ ကြားဝင်စွက်ဖက်နိုင်သည့် အခြေအနေများကို အမြဲတမ်း သတိထားပြီး စောင့်ကြည့်ခဲ့ရသည်။

တရုတ်သည် ၎င်းတို့ လိုလားသည့် ကိုယ်စားလှယ်လောင်းများကို အနိုင်ရရှိစေရန် ကြိုးပမ်းနေသည်ဟုလည်း ထိုင်ဝမ်က ပြောသည်။ 

ထိုင်ဝမ်နဲ့တရုတ် အလံများကိုတွေ့ရစဉ်

"ရွေးကောက်ပွဲတွေမှာ တရုတ်ကွန်မြူနစ်တွေရဲ့ ကြားဝင်စွက်ဖက်မှုဟာ နည်းလမ်း အများအပြား ရှိခဲ့ပါတယ်" ဟု ထိုင်ဝမ်အမျိုးသား လုံခြုံရေးဗျူရို၏ ညွှန်ကြားရေးမှူးချုပ် ဆိုင်မင်ယန် (Tsai Ming-yen) က လွှတ်တော်ကော်မတီ အစည်းအဝေးအတွင်း လွှတ်တော်အမတ်များကို ပြောကြားခဲ့သည်။

တရုတ်သည် ရွေးကောက်ပွဲအတွင်း မဲဆန္ဒရှင်များကို စစ်ပွဲ သို့မဟုတ် ငြိမ်းချမ်းရေးကို ရွေးချယ်ရမည်ဆိုသည့် သတင်းအမှားများ သို့မဟုတ် စီးပွားရေးဆိုင်ရာ ခြိမ်းခြောက်မှုများနှင့် စစ်ရေး ဖိအားများကို အသုံးပြုနိုင်သည်ဟု လည်း ဆိုင်က ပြောသည်။ 

"လူထုသဘောထားဆန္ဒ ကောက်ယူမှုတွေ၊ ပြည်သူ့ဆက်ဆံရေး ကုမ္ပဏီတွေနဲ့ ပူးပေါင်းပြီး လူထုဆန္ဒတွေကို ကြိုးကိုင်ခြယ်လှယ်ကာ ရွေးကောက်ပွဲကို ကြားဝင်စွက်ဖက်ဖို့ လုပ်ဆောင်နေတဲ့ တရုတ်ကွန်မြူနစ်ပါတီရဲ့ အစီအစဉ်တွေကို ကျနော်တို့က အထူးအာရုံစိုက်ပြီး စောင့်ကြည့်နေပါတယ်" ဟု ဆိုင်က ကုမ္ပဏီများ၏ အမည်ကို မဖော်ပြဘဲ ပြောကြားခဲ့သည်။

 ထိုင်ဝမ် ရွေးကောက်ပွဲရလဒ် တွက်နေကြစဉ်

ထိုအကြောင်းအရာနှင့် ပတ်သက်ပြီး တရုတ်၏ ထိုင်ဝမ်ရေးရာရုံးက မှတ်ချက်ပေးရန် ဖုန်းခေါ်ဆိုမှုကို ဖြေကြားခြင်း မရှိခဲ့ပေ။ 

အာဏာရ DPP ပါတီ၏ ထိုင်ဝမ် ဒုတိယသမ္မတ ဝီလျံလိုင် (William Lai) သည် ထိုင်ဝမ်လွတ်လပ်ရေးကို ထောက်ခံသူတစ်ဦးဖြစ်ပြီး လာမည့်ရွေးကောက်ပွဲတွင် အနိုင်ရရှိရန် ရေပန်းစားနေသည်ဟု လူထု သဘောဆန္ဒ ကောက်ယူမှု စစ်တမ်းများအရ သိရသည်။ 

တရုတ်ကမူ လိုင်နှင့် ၎င်း၏ DPP ပါတီကို ခွဲထွက်ဝါဒီများအဖြစ် ရှုမြင်ထားပြီး ၎င်းတို့၏ ဆွေးနွေးပွဲ ကမ်းလှမ်း ချက်များကို မကြာခဏ ငြင်းဆိုခဲ့သည်။ 

လိုင်က ထိုင်ဝမ်ရေလက်ကြား တစ်လျှောက် ရှိရင်းစွဲအခြေအနေကို ပြောင်းလဲရန် ကြိုးပမ်းမည် မဟုတ်ကြောင်း၊ ထိုင်ဝမ် ဒေသခံများအနေနှင့် ၎င်းတို့၏ အနာဂတ်ကို ၎င်းတို့ကိုယ်တိုင်သာ ဆုံးဖြတ်မည်ဖြစ်ကြောင်း ပြောကြားခဲ့ သည်။ 

ထိုင်ဝမ်တွင် ၂၀၂၀ ပြည့်နှစ်က နောက်ဆုံးအကြိမ် ကျင်းပခဲ့သည့် ရွေးကောက်ပွဲအပြီးတွင် တရုတ်သည် ထိုင်ဝမ် ကျွန်းအနီးသို့ စစ်သင်္ဘောများ တိုက်လေယာဉ်များ စေလွှတ်ခဲ့ပြီး စစ်ရေးလှုပ်ရှားမှုများကို တိုးမြှင့်ခဲ့သည်။

Source: ရိုက်တာ