- By CNI
- Category: နိုင်ငံရေး
- Hits: 339
CNI International News
မော်စကို၊ မတ်လ ၂၄
ရုရှားနိုင်ငံ၏ ထိပ်သီး လုံခြုံရေးအရာရှိတစ်ဦးဖြစ်သူ ဒီမီထရီ မက်ဗီဒက်ဗ်က နျူကလီးယားစစ်ပွဲ ဖြစ်နိုင်ခြေ မြင့်လာမှုနှင့်ပတ်သက်၍ ကြာသပတေးနေ့တွင် သတိပေးခဲ့သည်။
ထို့နောက် ပူတင်အား ဖမ်းဆီးရန် ခြိမ်းခြောက်ခဲ့သည့် ဂျာမနီဝန်ကြီးတစ်ဦးကိုလည်း ပြစ်တင်ဝေဖန်ခဲ့သည်ဟု အေပီ သတင်းတွင် ဖော်ပြသည်။
ဂျာမနီဝန်ကြီး၏ လုပ်ရပ်သည် ရုရှားနှင့်ဂျာမနီ စစ်ဖြစ်သည်အထိ အခြေအနေ ဆိုးရွားနိုင်ကြောင်းလည်း ၎င်းက ပြောသည်။
အနောက်အုပ်စုနှင့် ရုရှား၏ ဆက်ဆံရေးသည် သမိုင်းတစ်လျှောက် အဆိုးရွားဆုံး အခြေအနေတွင် ရှိနေသည်ဟု ဒီမီထရီ မက်ဗီဒက်ဗ်က သတင်းထောက်များကို ပြောခဲ့သည်။
မက်ဗီဒက်ဗ်သည် ရုရှားလုံခြုံရေးကောင်စီ၏ လက်ထောက် အတွင်းရေးမှူး ဖြစ်သည်။
နျူကလီးယားစစ်ပွဲ ဖြစ်လာနိုင်ခြေနှင့် ပတ်သက်၍ မေးမြန်းခဲ့ရာတွင်လည်း ထိုအန္တရာယ်များ လျော့ပါးမသွားဘဲ တိုးလာကြောင်း၊ အနောက်အုပ်စုမှ ယူကရိန်းကို လက်နက် ထောက်ပံ့လေ ဖြစ်လာနိုင်ခြေ မြင့်တက်လာလေ ဖြစ်သည်ဟု ၎င်းက ပြောသည်။
ဘိုင်ဒန်နဲ့ ဥရောပခေါင်းဆောင်များကိုတွေ့ရစဉ်
မက်ဗီဒက်ဗ်သည် အတိတ်တွင်လည်း ထိုသို့ ပြင်းထန်သော စကားလုံးများဖြင့် အနောက်အုပ်စုအား ဝေဖန်ခဲ့ဖူးသူ ဖြစ်သည်။
အမေရိကန်နှင့် နေတိုးမဟာမိတ်များသည် ရုရှားအား ဖျက်ဆီးရန် ကြိုးပမ်းနေသည်ဟု ၎င်းက ပြောခဲ့ဖူးသည်။
မက်ဗီဒက်ဗ်သည် တစ်ချိန်တုန်းက အနောက်အုပ်စု ကမ္ဘာတွင် ဆက်ဆံရေး ပျော့ပြောင်းသူအဖြစ် ချီးကျူးခံခဲ့ရဖူးသူ ဖြစ်သော်လည်း ၎င်းက အခြေအနေမှာ သိသိသာသာ ပြောင်းလဲလာသည်။
ကြာသပတေးနေ့က သတင်းထောက်များနှင့် တွေ့ဆုံမှုတွင် မက်ဗီဒက်ဗ်သည် ယူကရိန်းတွင် ကလေးများ သေဆုံးမှု အပါအဝင် စွဲချက်များနှင့် ပတ်သက်၍ ပူတင်အား ဖမ်းဆီးရန် ဝရမ်းထုတ်ခဲ့သည့် နိုင်ငံတကာ ရာဇဝတ်မှု တရားရုံး၏ လုပ်ရပ်နှင့်ပတ်သက်၍လည်း ပြစ်တင် ဝေဖန်ခဲ့သည်။
တရားရုံး၏ လုပ်ရပ်က ဆိုးရွားသော အနောက်အုပ်စုနှင့် ရုရှားတို့၏ ဆက်ဆံရေးကို ပိုမိုဆိုးရွား လာစေခဲ့သည်ဟု ၎င်းက ပြောသည်။ မက်ဗီဒက်ဗ်၏ ပြောစကားသည် ဂျာမနီ တရားရေးဝန်ကြီး မာကို ဘွတ်ရှ်မန်း (Marco Buschmann) အား အဓိကရည်ရွယ်ချင်း ဖြစ်သည်။
ရုရှား၏ နျူကလီးယားထိပ်ဖူးကိုတွေ့ရစဉ်
ပူတင်အနေဖြင့် ဂျာမနီသို့ လာရောက်ခဲ့မည်ဆိုလျှင် ICC ဝရမ်းအရ ၎င်းကို ဖမ်းဆီးသွားမည်ဟု ပြီးခဲ့သည့် သီတင်းပတ်တွင် ပြောခဲ့သည်။
နျူကလီးယား ပိုင်ဆိုသည့် နိုင်ငံမှ ခေါင်းဆောင်တစ်ဦး ဂျာမနီကို သွားရောက်လည်ပတ်ပြီး ဖမ်းဆီးခံရသည့် အခြေအနေကို စဉ်းစားကြည့်ပါဦး၊ ဒါက ရုရှားကို စစ်ကြေညာခြင်းမျိုးပင် ဖြစ်သည်ဟု မက်ဗီဒက်ဗ်က ပြောသည်။
ထိုသို့ ဖြစ်လာမည်ဆိုလျှင် ရုရှားအနေဖြင့် ဂျာမနီဝန်ကြီးချုပ်ရုံးခန်းမှစ၍ လေကြောင်း တိုက်ခိုက်မှုများ လုပ် ဆောင် သွားမည်ဟုလည်း ၎င်းက ပြောသည်။
ရုရှား၏ နျူကလီးယား အင်အားသည် ယူကရိန်းစစ်ပွဲတွင် ရုရှားအတွက် ကြီးမားသော အထောက်အပံ့ ဖြစ်စေကြောင်း၊ နျူကလီးယား အင်အားကြောင့်သာ ရုရှားနိုင်ငံ မပျက်စီးရခြင်းဖြစ်ကြောင်း ၎င်းက ပြောခဲ့သည်။
Source: AP
- By CNI
- Category: နိုင်ငံရေး
- Hits: 382
CNI International News
ဝါရှင်တန်၊ မတ်လ ၂၄
နျူကလီးယား အစိတ်အပိုင်းများ ပါဝင်သည်ဟု ရုရှားဘက်မှ ယူဆထားသော ခဲယမ်းများကို ယူကရိန်းသို့ ထောက်ပံ့ သွားမည်ဖြစ်ကြောင်း ဗြိတိန်က ကြေညာခဲ့ပြီးနောက် ယူကရိန်းပဋိပက္ခသည် ပိုမိုပြင်းထန်လာလိမ့် မည်ဟု ရုရှားဘက်ကနေ သတိပေးခဲ့ကြောင်း အေပီသတင်းတွင် ဖော်ပြထားသည်။
အဆင့်နိမ့် ယူရေနီယမ် (depleted uranium-DU) များ ပါဝင်သည့် သံချပ်ကာဖောက် ကျည်ဆန်များကို ယူကရိန်း သို့ ထောက်ပံ့သွားမည်ဖြစ်ကြောင်း ဗြိတိန်ကာကွယ်ရေးဌာနက တနင်္လာနေ့တွင် အတည်ပြု ပြောဆိုခဲ့သည်။
ထိုကျည်များကို စစ်အေးတိုက်ပွဲအတွင်း ရုရှားတင့်ကားများကို ဖျက်ဆီးရန် အမေရိကန်တို့က အသုံးပြုခဲ့သည်။
ယင်းတို့တွင် လက်ရှိ ယူကရိန်းစစ်ပွဲတွင် ရုရှားတို့ အသုံးပြုနေသော T-72 တင့်ကားများလည်း ပါဝင်သည်။
DU များသည် နျူကလီးယား လက်နက် ဖန်တီးရန် လိုအပ်သော ယူရေနီယမ် သန့်စင်မှု လုပ်ငန်းစဉ်မှ ထွက်ပေါ်လာသည့် ဆင့်ပွားအရာတစ်ခု ဖြစ်သည်။
သံချပ်ကာဖျက် ကျည်ဆန်ကိုတွေ့ရစဉ်
ထိုကျည်များတွင် ရေဒီယို သတ္တိကြွ စွမ်းရည် ရှိသော်လည်း ယင်းတို့သည် နျူကလီးယားဗုံးများကဲ့သို့ နျူကလီးယား စွမ်းရည်မရှိကြောင်း နျူကလီးယားအရေး ကျွမ်းကျင်သူတစ်ဦးက ပြောသည်။
မည်သို့ပင်ဆိုစေကာမှု ထိုအချက်သည်ပင် ယင်းသို့သော လက်နက်များကြောင့် ပဋိပက္ခပိုမို ဆိုးရွားလာစေမည် ဆိုသည့် ရုရှားတို့၏ ခြိမ်းခြောက် သတိပေးမှုကို ရပ်တန့်နိုင်ခြင်း မရှိပေ။
ယူကရိန်းစစ်ပွဲသည် နျူကလီးယားစစ်ပွဲ အဆင့်သို့ ရောက်ရှိလာနိုင်သည်ဟုလည်း ရုရှားဘက်က သတိပေးခဲ့ဖူးသည်။ ဗြိတိန်မှ ပေးပို့မည့် ခဲယမ်းမျးသည် နျူကလီးယား လက်နက် မဟုတ်သည့်တိုင် အန္တရာယ်ပေးနိုင်ခြေ ရှိသည်။
ထို့နောက် အမေရိကန်နှင့် ဗြိတန်တို့ဘက်မှ ရုရှား၏ စွပ်စွဲချက်များကို ငြင်းဆိုထားသည်။
DU များသည် နျူကလီးယား လောင်စာနှင့် လက်နက်များကို ထုတ်လုပ်ရန် အသုံးပြုသည့် ယူရေနီယမ်ကို ဖန်တီး ရာမှ ထွက်ပေါ်လာသည့် ဆင့်ပွားအရာများ ဖြစ်သည်။
ယင်းတို့သည် သန့်စင်ယူရေနီယမ်ထက် အားပျော့၍ နျူကလီးယား တုန့်ပြန်မှု ပေါ်ပေါက်နိုင်ခြေ မရှိသော်လည်း DU များသည် ခဲထက် ပိုလေးသည်။ ယင်းက ကျည်ဖူးပြုလုပ်ရန် စွဲဆောင်နိုင်သော အရာလည်း ဖြစ်သည်။
ရုရှား သမ္မတ ပူတင်ကိုတွေ့ရစဉ်
အရမ်းလေးသည့်အတွက် အားကောင်းသည့် အရှိန်အဟုန်ကို ဖြစ်စေပြီး သံချပ်ကာကို ဖောက်နိုင်ကြောင်း၊ ယင်းမှ ထွက်သည့်အပူက မီးလောင်မှုကို ဖြစ်စေကြောင်း နျူကလီးယားပညာရှင်က ပြောသည်။
အမေရိကန်သည် ၁၉၇၀ နှစ်များတွင် DU များကိုသုံးကာ သံချပ်ကာဖျက် ကျည်များကို စတင်အသုံးပြုခဲ့ပြီး စွမ်းရည်ကို မြှင့်တင်ရန် တင့်ကားများတွင်လည်း ထည့်သွင်းခဲ့သည်။
တင့်ဖျက် လက်နက်ဟု ထင်ရှားသည့် A-10 လေယာဉ်များတွင်လည်း DU ကျည်များကို အသုံးပြုသည်။ အမေရိကန် စစ်တပ်သည် M1A2 Abram တင့်ကားအတွက် M829A4 တင့်ဖျက် ကျည်များအပြင် DU ခဲယမ်းများကို အသုံးပြုနေဆဲ ဖြစ်သည်။
အနောက်အုပ်စုမှ နျူကလီးယား ပါဝင်မှုရှိသော လက်နက်များကို အသုံးပြုလာမည်ဆိုလျှင် ရုရှားအနေဖြင့်လည်း ထိုလက်နက်နှင့် တူညီသည့် စွမ်းရည်ရှိသော လက်နက်များကို အသုံးပြုသွားမည်ဟု ရုရှားသမ္မတက အင်္ဂါနေ့တွင် သတိပေးခဲ့သည်။
Source: AP
- By CNI
- Category: နိုင်ငံရေး
- Hits: 300
CNI International News
ပဲရစ်၊ မတ်လ ၂၄
လာမည့် သီတင်းပတ်တွင် တစ်နိုင်ငံလုံးအတိုင်းအတာဖြင့် သပိတ်မှောက်မှုများနှင့် ဆန္ဒပြမှုများလုပ်ဆောင် သွားရန် ပြင်သစ်သမဂ္ဂများက တောင်းဆိုခဲ့သည်ဟု အေပီသတင်းတွင် ဖော်ပြသည်။
ကြာသပတေးနေ့တွင် လူကြိုက်နည်းသည့် ပင်စင်ပြုပြင်ပြောင်းလဲမှုများနှင့်ပတ်သက်၍ နိုင်ငံတွင်း လူ ၁ သန်း ကျော်က ဆန့်ကျင်ဆန္ဒပြခဲ့ကာ လာမည့် သီတင်းပတ်ဆန္ဒပြပွဲများက ချားလ်ဘုရင် ၃ ၏ ပြင်သစ်ခရီးစဉ်နှင့်လည်း တိုက်ဆိုင်နေသည်။
အကြမ်းဖက်မှုများရှိခဲ့သော ပဲရစ်(Paris) မြို့မှ ပင်စင်မူဝါဒပြုပြင်ပြောင်းလဲရေးဆိုင်ရာ ဆန္ဒပြပွဲများအတွင်း လူပေါင်း ၁၁၉၀၀၀ အထိ စံချိန်တင်ပါဝင်ခဲ့သည်ဟု ပြင်သစ်ပြည်ထဲရေးဝန်ကြီးက ပြောသည်။ စစ်တမ်း ကောက်ယူမှုများအရ ပြင်သစ်အများစုသည် သမ္မတ အီမန်နွယ် မက်ခရွန် (Emmanuel Macron)၏ အနားယူ ရမည့် သက်တမ်းတိုးမြှင့်မှုအပေါ် ကန့်ကွက်ကြသည်ကို တွေ့ခဲ့ရကြောင်း ၎င်းက ဆိုသည်။
ပါဝင်သူ အရေအတွက် မြင့်တက်လာခြင်းကြောင့် လာမည့် အင်္ဂါနေ့တွင်လည်း ဆန္ဒပြမှုများ သပိတ်မှောက်မှု များကို လုပ်ဆောင်ကြရန် သမဂ္ဂများက တောင်းဆိုခဲ့သည်။ ထိုနေ့တွင် ဗြိတိန်ဘုရင်ကြီးသည် ပြင်သစ်ခရီးစဉ်၏ ဒုတိယနေ့အဖြစ် ဘော်ဒိုးမြို့သို့ လာရောက်ရန် စီစဉ်ထားသည်။ တရားမဝင် ဆန္ဒပြပွဲတစ်ခုမှ အဖွဲ့ဝင်တစ်ဦးသည် ကြာသပတေးနေ့ ညနေပိုင်းတွင် ဘော်ဒိုး (Bordeaux) မြို့ မြို့တော်ခန်းမ၏ သစ်သားတံခါးကြီးအား မီးတင်ရှို့ ခဲ့သည်ဟုလည်း Sud Ouest သတင်းစာတွင် ဖော်ပြထားသည်။
ပဲရစ်မြို့တွင် စုဝေးချီတက်ဆန္ဒပြခဲ့ကြစဉ်(ဓါတ်ပုံ-အေပီ)
တစ်နိုင်ငံလုံး အတိုင်းအတာဖြင့် လူပေါင်း ၁ သန်းကျော်သည် ကြာသပတေးနေ့ ဆန္ဒပြချီတက်မှုများတွင် ပါဝင် ခဲ့သည်ဟုလည်း ပြည်ထဲရေးဌာနက ပြောသည်။ အကြမ်းဖက်မှုများရှိနေသော်လည်း ပြည်ထဲရေးဝန်ကြီး ဂျာရယ် ဒါမာနင် (Gerald Darmanin) က လုံခြုံရေးအတွက် မည်သည့်ပြဿနာမှ မရှိဟု အာမခံကာ ဗြိတိန်ဘုရင်ကို ကြိုဆိုသွားမည်ဟု ပြောခဲ့သည်။ မက်ခရွန်က ပင်စင်ဥပဒေမှုကြမ်းနှင့်ပတ်သက်သည့် ခိုင်မာသောရပ်တည်ချက်ကို ပြသခြင်းဖြင့် ဝေဖန်သူများကို ပိုမိုဒေါသထွက်စေခဲ့ပြီးနောက် တစ်နေ့တွင် ထိုသို့ ဆန္ဒပြပွဲကြီးများ ပေါ်ပေါက် လာရခြင်းဖြစ်သည်။
သီတင်းပတ်ကုန်ပိုင်းတွင် မိမိတို့အစီအစဉ်ဖြင့် ဆန္ဒပြပွဲများပြုလုပ်ပြီး အင်္ဂါနေ့တွင် တစ်နိုင်ငံလုံး အတိုင်းအတာဖြင့် ဆန့်ကျင့်ကန့်ကွက်မှု လုပ်ဆောင်သွားရန် ပင်စင်မူဝါဒပြောင်းလဲမှုကို ဆန့်ကျင်နေသည့် သမဂ္ဂအဖွဲ့ရှစ်ခုမှ ထုတ်ပြန်သောကြေညာချက်တွင် ဖော်ပြထားသည်။
ဆန္ဒပြသူများသည် ပြင်သစ်ရှိ Charles de Gaulle လေဆိပ် နှင့် ဆိပ်ကမ်းများကို ပိတ်ဆို့ထားခြင်းကြောင့် ခရီးသွားလာမှု အခက်အခဲများလည်းပေါ်ပေါက်ခဲ့သည်။ ပြင်သစ်တွင် မျက်နှာဖုံးစွပ် ဆန္ဒပြအုပ်စုများက အသင့်စားစားသောက်ဆိုင်နှစ်ခု၊ စူပါမားကတ်တစ်ခုနှင့် ဘဏ် တစ်ခုတို့ကို တိုက်ခိုက်ခဲ့ပြီး ယင်းက အကြမ်းဖက်မှုများမြင့်တက်လာသည့်သဘောဖြစ်ရုံသာမက ငြိမ်းချမ်းစွာ ဆန္ဒပြသူများထက်ပို၍ အာရုံစိုက်စရာဖြစ်ခဲ့သည်။
Source:AP
- By CNI
- Category: နိုင်ငံရေး
- Hits: 400
CNI International News
နယူးဒေလီ၊ မတ်လ ၂၄
သူခိုးတိုင်း၏နာမည်တွင် မိုဒီပါသည်ဆိုသော စကားကြောင့် မိုဒီ၏ အိန္ဒိယအတိုက်အခံ ခေါင်းဆောင် ရာဟူးဂန္ဒီ (Rahul Gandhi)ကို အသရေဖျက်မှုဖြင့် ထောင်ဒဏ် ၂ နှစ် ပြစ်ဒဏ်ချမှတ်ခဲ့သည်ဟု ဘီဘီစီ အင်္ဂလိပ်ပိုင်း သတင်းတွင် ဖော်ပြထား သည်။
ဝန်ကြီးချုပ် နာရန်ဒရာမိုဒီ (Narendra Modi) ၏ မျိုးရိုးနာမည်နှင့် ပတ်သက်၍ ရာဟူးဂန္ဒီသည် ရွေးကောက်ပွဲ ဆိုင်ရာ လူထုစုဝေးပွဲ တစ်ခုတွင် ထည့်သွင်း ပြောဆိုခဲ့သည့်အတွက် ဂူဂျာရတ် (Gujarat) ပြည်နယ်တရားရုံး တစ်ခုက ပြစ်ဒဏ် ချမှတ်ခဲ့ခြင်း ဖြစ်သည်။
ရာဟူးဂန္ဒီသည် ပြစ်ဒဏ်အတွက် ရက် ၃၀ အာမခံရရှိကာ အယူခံဝင်မည် ဖြစ်သည်။
၎င်းသည် အစိုးရ၏ မကောင်းမှုများကို ဖော်ထုတ်မိမှုကြောင့် ပစ်မှတ်ထား ခံခဲ့ရသည်ဟု ကွန်ဂရက်ပါတီက ပြော သည်။ အိန္ဒိယတွင် ရွေးကောက်ပွဲကို လာမည့်နှစ်တွင် ကျင်းပသွားမည်ဖြစ်သည်။
ပြစ်ဒဏ်သည် တရားဥပဒေအရ ခိုင်လုံမှုမရှိကြောင်း ကွန်ဂရက်ပါတီ၏ ပြောခွင့်ရပုဂ္ဂိုလ်က ပြောခဲ့သလို ပြစ်ဒဏ် အပေါ် နှုတ်ဆိတ်မနေရန်လည်း တိုက်တွန်းခဲ့သည်။
၂၀၁၉ ခုနှစ်၊ ဧပြီလက ကာနာတာကာ (Karnataka) ပြည်နယ်မှ လူထုစုဝေးပွဲ တစ်ခု၌ စကားပြောခဲ့ရာတွင် ရာဟူးက နီယတ်ဗ်မိုဒီ၊ လာလစ်မိုဒီနှင့် နာရန်ဒရာမိုဒီ အစရှိသည်ဖြင့် သူခိုးများ၏ နာမည်တွင် ဘာကြောင့် မိုဒီ ပါဝင်နေရပါသလဲဟု ပြောခဲ့သည်။
မိုဒီမျက်နှာကို တပ်ထားသော လူအုပ်ကြီးကိုတွေ့ရစဉ်
နီယတ်ဗ် မိုဒီ (Nirav Modi) သည် ဝရမ်းပြေး စိန်လုပ်ငန်းရှင် တစ်ဦးဖြစ်ကာ လာလစ် မိုဒီ (Lalit Modi) သည် ခရစ်ကတ် ဘုတ်အဖွဲ့မှ တစ်သက်တာ ပွဲပယ်ထားသည့် အိန္ဒိယပရီးမီးယားလိဂ် အကြီးအကဲဟောင်း ဖြစ်သည်။
ထိုပြောစကားသည် အကျင့်ပျက် ခြစားမှုများကို ဦးစားပေး ပြောဆိုခြင်း မဖြစ်သလို မည်သူ တစ်ဦးတစ်ယောက်ကို မှ တိုက်ရိုက်စော်ကားခြင်း မဟုတ်ဟု ရာဟူးဂန္ဒီက ပြောသည်။
အိန္ဒိယအစိုးရအား ဝေဖန်သည်ဟု ယူဆခံထားရသည့် တခြားသော အတိုက်အခံ နိုင်ငံရေးသမားများနှင့် အဖွဲ့စည်း များသည်လည်း တရားစွဲဆိုမှုများနှင့် ရင်ဆိုင်ခဲ့ရသည်။
အရေးပါသည့် အဖွဲ့ဝင်နှစ်ဦး ဖမ်းဆီးခံထားရသော AAP ပါတီကလည်း ဂန္ဒီအား ထောက်ခံကြောင်း ပြောသည်။
ဂန္ဒီအား အပစ်ပေးခဲ့သည့် အမှုကို BJP လွှတ်တော် အမတ်တစ်ဦးဖြစ်သူ ပါနက်ရှ် မိုဒီ (Purnesh Modi) က တိုင်ကြားခဲ့ခြင်းဖြစ်ကာ ရာဟူးသည် မိုဒီ အသိုင်းအဝိုင်း တစ်ခုလုံးကို စော်ကားသည့်စကား ပြောဆိုခဲ့သည်ဟု ပြောသည်။
သို့သော် ဆူရတ် (Surat) မြို့ တရားရုံးမှ ချမှတ်ခဲ့သော အမိန့်က ဥပဒေပညာရှင်တစ်ချို့ကို ပဟေဋိဖြစ်စေခဲ့သည်။
မျိုးရိုးနားမည်နှင့် ပတ်သက်သည့် ညွှန်းဆိုမှုတွင် တစ်စုံတစ်ယောက်ဘက်မှ ၎င်းတို့ပေါ် တိုက်ရိုက် သက်ရောက်မှု ရှိသည်ဟု မဖော်ပြနိုင်မခြင်း တရားဥပဒေအရ အရေးယူ၍မရဟု ဥပဒေပညာရှင်တစ်ဦးက ပြောသည်။
ရာဟူးအား ပြစ်ဒဏ် ချမှတ်ခဲ့ခြင်းနှင့် ပတ်သက်၍ အချက်လေးချက်ကို ကိုးကားကာ ခုခံကာကွယ်သွားမည်ဟု သူ၏ရှေ့နေ့က ဘီဘီစီသတင်းကို ပြောခဲ့သည်။
Source: BBC
- By CNI
- Category: နိုင်ငံရေး
- Hits: 398
CNI International News
ဒီမာပူရ်၊ မတ်လ ၂၃
အိန္ဒိယဗဟိုအစိုးရနှင့် အပစ်အခတ်ရပ်စဲရေး သဘောတူညီချက် လက်မှတ်ရေးထိုးထားသည့် နာဂလက်နက်ကိုင် အဖွဲ့ NSCN-IM က အိန္ဒိယအစိုးရသည် အခြေခံမူဘောင် ရှေ့ဆက်ရေးကို အလေးအနက်မထားကြောင်း စွပ်စွဲခဲ့ သည်။
ထို့နောက် အဆိုပါ လုပ်ရပ်က နာဂငြိမ်းချမ်းရေး လုပ်ငန်းစဉ်ကို ဟာသဖြစ်စေသည်ဟု ပြောခဲ့သည်။
အိန္ဒိယဗဟိုအစိုးရနှင့် NSCN-IM တို့၏ ဆွေးနွေးပွဲများသည် လေကြီးလေကျယ် ပြောသော်လည်း လေးနက်မှု မရှိကြောင်း အဖွဲ့၏ ဥက္ကဋ္ဌဖြစ်သူ Q Tuccu က ဟီဘရွမ်ရုံးချုပ်မှာ ပြောကြားခဲ့သည်။
ထိုအခြေအနေကြောင့် အဖွဲ့အနေဖြင့် အိန္ဒိယအစိုးရသည် ၎င်းတို့နိုင်ငံ ပြည်တွင်း အရင်းအမြစ်အားလုံးဖြင့် နာဂများအား တရားမဝင် နည်းလမ်းများဖြင့် တိုက်ခိုက်ရန် စီစဉ်နေသည်ဟု နားလည် သဘောပေါက်စေသည်။
ထို့ကြောင့် NSCN-IM ဘက်တွင် ယုံကြည်ချက် လျော့နည်းလာသည်ဟုလည်း ၎င်းက ပြောသည်။
NSCN-IM တပ်ဖွဲ့ကိုတွေ့ရစဉ်
NSCN-IM သည် အိန္ဒိယဗဟိုအစိုးရနှင့် နာဂငြိမ်းချမ်းရေး ဆွေးနွေးပွဲများကို ၁၉၉၇ ခုနှစ်မှ စတင်၍ အခြေခံစေ့စပ် ညှိနှိုင်းသူ အဖြစ် ဆောင်ရွက်ခဲ့ကာ ၂၀၁၅ ခုနှစ်၊သြဂုတ် ၃ ရက်တွင် မူဘောင် သဘောတူညီချက်၌ လက်မှတ်ရေး ထိုးခဲ့သည်။
သို့သော် နောက်ဆုံး အဖြေကိုတော့ ရရှိခြင်း မရှိသေးပေ။ အိန္ဒိယဗဟိုအစိုးရသည် ငြိမ်းချမ်းရေး ဆွေးနွေးပွဲများကို ဆောင်ရွက်နေသော်လည်း NSCN-IM သည် ဆွေးနွေးပွဲများကို ကတိ၊ ခံယူချက်တို့ဖြင့် ရှေ့ဆက်လျက် ရှိသည်ဟု အဖွဲ့ဥက္ကဋ္ဌက ပြောသည်။
နာဂသမိုင်းနှင့် နိုင်ငံရေး အခွင့်အရေးကို ကာကွယ်ရေးထက် မည်သည့် စွန့်လွှတ် အနစ်နာခံမှုမှ မမြင့်မြတ်ဟု ၎င်းက ပြောသည်။
အိန္ဒိအစိုးရအတွက် အတူတကွ လုပ်ဆောင်ရန်၊ ယခင်အတိုင်း ပြန်ဖြစ်ရန် လိုအပ်ကြောင်း၊ ပေးထားသော ကတိ များသည် ယခင်နှင့်ယခု ပုံမှန်မဟုတ်သည့် အခြေအနေများကြောင့် မူဘောင် သဘောတူညီချက်၏ အခြေအနေ သည် မတည်မငြိမ် ဖြစ်နေကြောင်း NSCN-IM ခေါင်းဆောင်က ပြောသည်။
နာဂအလံကို ကိုင်ထားတဲ့ NSCN-IM ရဲဘော်ကိုတွေ့ရစဉ်
အိန္ဒိယဗဟိုအစိုးရသည် NSCN-IM ၏ နာဂများအတွက် သီးခြားအလံ တစ်ခုနှင့် ဖွဲ့စည်းပုံအခြေခံဥပဒေ တစ်ခုပေး ရန် စဉ်ဆက်မပြတ် တောင်းဆိုမှုကို ငြင်းဆိုထားသည်။
ယင်းက အရှေ့မြောက်ပိုင်းဒေသ၏ အရှည်ကြာဆုံး ပုန်ကန်မှု ပြဿနာများမှ တစ်ခုကို အဆုံးသတ် အဖြေရှာရေး နည်းလမ်းအတွက် အဟန့်အတား ဖြစ်စေလျက်ရှိသည်။
Source: East Mojo
- By CNI
- Category: နိုင်ငံရေး
- Hits: 389
CNI International News
ဘေရွတ်၊ မတ်လ ၂၃
စီးပွားရေးကျဆင်းမှု ပိုမိုဆိုးလာခြင်းကြောင့် လက်ဘနွန်ပြည်သူများသည် လမ်းပေါ်ထွက် ဆန္ဒပြခဲ့ကြသည်။
အငြိမ်းစား လုံခြုံရေးတပ်ဖွဲ့ဝင် အများစု ပါဝင်သော ဆန္ဒပြသူများကို လက်ဘနွန် အရာရှိများက မျက်ရည်ယိုဗုံးများ အသုံးပြုကာ လူစုခွဲခဲ့သည်ဟု အယ်ဂျာဇီးယား သတင်းတွင် ဖော်ပြသည်။
ပိုမိုဆိုးရွားလာသော စီးပွားရေး အခြေအနေများအတွက် မြို့တော်ရှိ အစိုးရ အဆောက်အဦများအနီးတွင် စုဝေး ဆန္ဒပြခဲ့ကြခြင်း ဖြစ်သည်။
ဗုဒ္ဓဟူးနေ့က မြို့တော် ဘေရွတ် (Beirut) အလယ်ရှိ လမ်းများပေါ်မှ ဆန္ဒပြသူများသည် လက်ဘနွန် အလံများ ကိုင်ဆောင်ကာ ဆန္ဒပြခဲ့ကြသည်။
ထိုသို့ ဆန္ဒပြရန် အငြိမ်းစား စစ်သားများနှင့် ဘဏ်တွင် အပ်နှံထားသော ငွေကို အကန့်အသတ်ဖြင့်သာ ထုတ်ယူခွင့်ရသော ငွေအပ်နှံသူများက ဦးဆောင် ပြုလုပ်ခဲ့ခြင်း ဖြစ်သည်။
လက်ဘနွန်၏ ဘဏ္ဍာရေး အကျပ်အတည်းကြောင့် ဒေသတွင်း ဘဏ်များသည် အပ်နှံငွေ ထုတ်ယူခြင်းနှင့် ပတ်သက်၍ တရားမဝင် ထိန်းချုပ်မှုများ လုပ်ဆောင်ထားသည်။
လက်ဘနွန် ဆန္ဒပြသူများနဲ့ လုံခြုံရေးတပ်ဖွဲ့ ထိပ်တိုက်တွေ့ကြစဉ်
ပိုများသော ပေးချေမှု ရရှိရန် တောင်းဆိုခဲ့ကြသော ဆန္ဒပြသူများသည် အစိုးရ အဆောက်အဦများကို လုံခြုံရေး ယူထားသော အရာရှိများထံ ကျောက်ခဲများဖြင့် ပစ်ပေါက်တိုက်ခိုက်ကာ ခြံစည်းရိုး ကျော်ဝင်မှု လုပ်ဆောင်ရန်လည်း ကြိမ်ဖန်များစွာ ကြိုးစားခဲ့ကြသည်။
လုံခြုံရေးတပ်ဖွဲ့များ၏ တုန့်ပြန်သော မျက်ရည်ယိုဗုံးများကြောင့် လူတချို့တွင် အသက်ရှုကြပ်ခြင်းများ ခံစားခဲ့ရသည်။
နိုင်ငံသုံးငွေကြေးဖြင့် ပေးသော ပင်စင်တန်ဖိုး ကျဆင်းလာခြင်းနှင့် ပတ်သက်၍ ဆန္ဒပြသူများက ဒေါသထွက် လျက်ရှိသည်။ ၂၀၁၉ ခုနှစ်မှ စတင်ကာ လက်ဘနွန်ငွေကြေး တန်ဖိုးသည် အမေရိကန် ဒေါ်လာနှင့် ယှဉ်လျှင် ၉၈ ရာခိုင်နှုန်းကျော် တန်ဖိုးကျဆင်းလာခဲ့ပြီး ထိုအခြေအနေများသည် ပြီးခဲ့သည့် သီတင်းပတ်များတွင် ပိုမို ဆိုးရွား လာခဲ့သည်။
အင်္ဂါနေ့တွင် လက်ဘနွန် ငွေကြေး၏ တန်ဖိုးမှာ အနိမ့်ဆုံးသို့ ကျဆင်းသွားခဲ့ပြီး တန်ဖိုးပြန်တက်မလာခင် တစ်ဒေါ်လာ ဝယ်ဈေးမှာ လက်ဘနွန် ငွေကြေး ၁၄၃၀၀၀ ကျော် ဖြစ်ခဲ့သည်။ တရားဝင်ငွေလဲနှုန်းမှာ တစ်ဒေါ်လာလျှင် ပေါင် ၁၅၀၀၀ ဖြစ်သည်။
လက်ဘနွန်ပြည်သူများ ဘဏ်က ငွေထုတ်ခွင့်မပေးလို့ ဒေါသထွက်နေကြစဉ်
လက်ဘနွန်နိုင်ငံသည် ကာလရှည်ကြာ အမြစ်တွယ်နေသော အကျင့်ပျက်ခြစားမှု၊ နိုင်ငံရေးသမားများ၏ လွဲမှား သော စီမံခန့်ခွဲမှုများကြောင့် လေးနှစ်မြောက် စီးပွားရေး အကျပ်အတည်းအတွင်းသို့ ရောက်ရှိနေသည်ဟု လက်ဘနွန်ရှိ အယ်ဂျာဇီးယား သတင်းထောက်က ပြောသည်။
ဘဏ္ဍာရေး အကျပ်အတည်းကြောင့် ကျောင်းများကို ပိတ်ထားရပြီး မိသားစုများလည်း အစားအစာကို ဝယ်ယူရန် မတတ်နိုင်ရုံမက လောင်စာဆီကဲ့သို့ အခြေခံ လိုအပ်ချက်များအတွက်လည်း အခက်အခဲနှင့် ရင်ဆိုင်နေရသည်။
အစိုးရဘက်မှ လျှပ်စစ်မီး ထောက်ပံ့ပေးသော်လည်း နေရာ အများစုမှာ ရရှိခြင်း မရှိပေ။ လက်ဘနွန် ငွေကြေး တန်ဖိုး ကျဆင်းရခြင်း၏ အဓိကအကြောင်းအရင်းမှာ ငွေစက္ကူများကို အဆမတန် ရိုက်ထုတ်မှုကြောင့် ဖြစ်သည်ဟု လက်ဘနွန်ဈေးကွက် လေ့လာရေးအဖွဲ့ ဒါရိုက်တာက ပြောသည်။
Source: အယ်ဂျာဇီးယား
- By CNI
- Category: နိုင်ငံရေး
- Hits: 431
CNI International News
ကိယက်ဗ်၊ မတ်လ ၂၃
ရုရှားတို့သည် ဗုဒ္ဓဟူးနေ့တွင် ယူကရိန်းရှိ လူနေတိုက်ခန်းများကို ဒုံးကျည်ဖြင့် တိုက်ခိုက်ခြင်း ၊မြို့ကြီးများတွင် ဒရုန်းဖြင့် တိုက်ခိုက်ခြင်းများလုပ်ဆောင်ခဲ့သည်ဟု ရိုက်တာသတင်းတွင် ဖော်ပြသည်။
ယင်းက တရုတ်သမ္မတ ရှီကျင့်ဖျင် (Xi Jinping) ၏ မော်စကိုခရီးစဉ် ပြီးဆုံးခြင်းအပေါ် ရုရှားသမ္မတပူတင်၏ အင်အားပြနှုတ်ဆက်ခြင်းဟုလည်း သတင်းတွင် ရေးသားထားသည်။
မီးသတ်သမားများသည် ဇာပိုရေးဇီးယား (Zaporizhzhia) မြို့ရှိ ဘေးချင်းကပ် လူနေအထပ်မြင့် အဆောက်အဦး နှစ်ခုတွင် မီးသတ်ခဲ့ရပြီး ရုရှား၏ဒုံးကျည်ဖြင့် နှစ်ကြိမ်တိုက်ခိုက်မှုကြောင့် အနည်းဆုံးလူ ၁ ဦးသေဆုံးကာ ၃၃ ဦးဒဏ်ရာရရှိခဲ့သည်ဟု အရာရှိများက ပြောသည်။
အရပ်သားများနှင့် ကလေးများနေထိုင်ရာနေရာများတွင် မီးလောင်နေသည်ဟု သမ္မတ ဗိုလိုဒီမီယာ ဇာလန်းစကီး (Volodymyr Zelenskiy) က တွစ်တာတွင် ရေးသားခဲ့သည်။
လုံခြုံရေးမှတ်တမ်းဗီဒီယိုများတွင်လည်း ဒုံးကျည်ထိမှန်သည့် အဆောက်အဦးတစ်ခု ပေါက်ကွဲသွားခဲ့သည်ကို တွေ့ခဲ့ရသည်။ ထိုသို့သောနေ့မျိုး ယူကရိန်း(သို့မဟုတ်)မည်သည့်နေရာတွင်မှ ထပ်မဖြစ်ရပါဘူး။ ရုရှား၏ မြင့်တက်လာသောအကြမ်းဖက်မှုများကို နှိမ်နင်းရန်၊ အသက်များကို ကာကွယ်ရန် ကမ္ဘာကြီးအနေဖြင့် စည်းလုံးမှု နှင့် စိတ်ပိုင်းဖြတ်မှုကိုပြသဖို့လိုအပ်နေသည်ဟုလည်း ယူကရိန်းသမ္မတက ပြောသည်။
ဒုံးကျည်ဒဏ်ကြောင့် ကစားကွင်းနှင့် ကားပါကင်တစ်ခုတို့အတွင်း မှန်ကွဲစများ၊ အပျက်အစီးများနှင့် ကားပျက် များကို မြင်တွေ့ခဲ့ရသည်။ ဒဏ်ရာရသူများကိုသယ်ဆောင်ကာ လမ်းလျှောက်နိုင်သူများကို လိုက်ပါ ပို့ဆောင်ပေးနေသည့် အရေးပေါ်ဝန်ထမ်းများကိုလည်း မြင်တွေ့ခဲ့ရသည်။ မျက်နှာတွင် ဒဏ်ရာများနှင့် အဘွားအိုတစ်ဦး ခုံတန်းရှည်တစ်ခုပေါ်တွင် တစ်ဦးတည်းထိုင်နေကာ မျက်ရည်သုတ်ရင်း ဆုတောင်းနေသည်ကိုလည်း ဝမ်းနည်း ဖွယ်မြင်တွေ့ခဲ့ရသည်။
ရုရှားသမ္မတ ဗလာဒီမာပူတင်နှင့် တရုတ်သမ္မတ Xi Jinping တို့သည် မော်စကိုမြို့ရှိ ဂုဏ်ပြုဧည့်ခံပွဲအပြီး မတ်လ ၂၁ ရက်နေ့က ကရင်မလင်နန်းတော်မှ ထွက်ခွာခဲ့စဉ်(ဓါတ်ပုံ-ရိုက်တာ)
ယူကရိန်းမြို့တော်တောင်ပိုင်း မြစ်ကမ်းဘေးမြို့တစ်ခုဖြစ်သော ရှိဖ်ရှစ် (Rzhyshchiv) မြို့တွင် ကောလိပ်အဆောင်များ ဒရုန်းဖြင့်တိုက်ခိုက်ခံရမှုကြောင့် အနည်းဆုံးလူ ၆ ဦးသေဆုံးကာ ၁၈ ဦးဒဏ်ရာရခဲ့ပြီး ၃ ဦး ပျောက်ဆုံးနေဆဲဖြစ်သည်။
ဗုဒ္ဓဟူးနေ့ညတွင် လေကြောင်းအချက်ပေးသံများမှာ မြို့တော်အပါအဝင် မြောက်ပိုင်းနယ်မြေများတွင် ဆူညံခဲ့ပြီး ရုရှားဘက်မှ ပစ်လိုက်သော အီရန်လုပ် Shahed ဖောက်ခွဲရေးဒရုန် ၂၁ စီးမှ ၁၆ စီးကို ပစ်ချနိုင်ခဲ့သည်ဟု ယူကရိန်း စစ်တပ်က ပြောသည်။ ရုရှားတွင် တစ်စုံတစ်ဦးက ငြိမ်းချမ်းရေးအကြောင်းကြားရရန် ကြိုးစားချိန်၌ တခြား တစ်ဖက်တွင် ရာဇဝတ်မှုမြောက်သော တိုက်ခိုက်မှုများပေါ်ပေါက်လာလေ့ရှိသည်ဟုလည်းယူကရိန်းသမ္မတက သူ၏တွစ်တာတွင် ရေးသားထားသည်။
ယင်းက ရုရှားမြို့တော်မော်စကိုသို့ လာရောက်လည်ပတ်ခဲ့သော တရုတ်သမ္မတအား ရည်ရွယ်ပြောဆိုခြင်း လည်းဖြစ်သည်။
Source:Newshub
- By CNI
- Category: နိုင်ငံရေး
- Hits: 325
CNI International News
နယူးယောက်၊ မတ်လ ၂၃
အမေရိကန် သမ္မတဟောင်း ဒေါ်နယ်ထရမ့် ဖမ်းဆီးခံရနိုင်ခြေရှိသည်ဟုဆိုကာ ထရမ့်ထောက်ခံသူများက နယူးယောက်မြို့သို့ အလုံးအရင်းဖြင့် စုဝေး ရောက်ရှိလာခြင်းကြောင့် နယူးယောက်ရဲတပ်ဖွဲ့(NYPD)သည် အင်အား ၃၆၀၀၀ လုံးကို လုံခြုံရေးချထားရန် အမိန့်ပေးခဲ့သည်။
သမ္မတဟောင်း ဒေါ်နယ်ထရမ့်ကို ထောက်ခံသူများသည် ၎င်း(ထရမ့်)ဖမ်းဆီး ခံရနိုင်ခြေရှိသည့် ဗုဒ္ဓဟူးနေ့တွင် နယူးယောက် (New York) မြို့သို့ အလုံးအရင်းဖြင့် ရောက်ရှိလာခဲ့သည်ဟု Foxnews တွင် ဖော်ပြထားသည်။
မန်ဟက်တန် (Manhattan)ခရိုင် အစိုးရရှေ့နေ အဲလ်ဗင် ဘရက်(Alvin Bragg)၏ ရုံးပြင်ပတွင် ထရမ့်ကို ထောက်ခံသော ဆန္ဒပြသူများ စုဝေးလျက်ရှိနေသည်။
လူပေါင်းများစွာ လာရောက်ကြရန် မျှော်လင့်သည်ဟု ထရမ့်အား ထောက်ခံသူတစ်ဦးက ပြောသည်။
သမ္မတဟောင်း ထရမ့်အား တရားစွဲဆိုမှုသည် အင်္ဂါနေ့တွင် ဖြစ်နိုင်ခဲ့ဖွယ်မရှိဟု ဥပဒေရေးရာ အာဏာပိုင်များက ပြောခဲ့ပြီး အစောဆုံး ဗုဒ္ဓဟူးနေ့ မတိုင်ခင်အထိလည်း ဖြစ်လာနိုင်ဖွယ် မရှိဟုဆိုသည်။
ဒေါ်နယ်ထရမ့်ကိုတွေ့ရစဉ်
ထရမ့်သာ အမှန်တကယ် တရားစွဲခံရမည်ဆိုလျှင် ၎င်းကို ထောက်ခံကြသူများသည် လမ်းပေါ်ထွက်လာနိုင်ဖွယ် ရှိနေသည်။
ထို့နောက် ကြိုတင် ပြင်ဆင်မှုအနေဖြင့် နယူးယောက်ရဲတပ်ဖွဲ့(NYPD)သည် ၎င်းတို့၏ အင်အား ၃၆၀၀၀ လုံးကို အင်္ဂါနေ့တွင် ထရမ့်အဖမ်းခံရမည်ဟု ယူဆချက်ဖြင့် ကြိုတင် ပြင်ဆင်ထားရန် အမိန့်ပေးခဲ့သည်။
အမေရိကန် ကတ်ပီတိုရဲတပ်ဖွဲ့(USCP)ကလည်း တရားစွဲခံရမည်ဟု ယူဆသောကြောင့် အတားအဆီးများ လုပ်ဆောင်ခြင်း၊ လူအင်အား ဖြည့်တင်းပေးရန် တောင်းဆိုခြင်းတို့ ပြုလုပ်ခဲ့သော်လည်း ဆန္ဒပြသူ အနည်းငယ်သာ ရှိခဲ့ပြီး ထရမ့်လည်း အဖမ်းမခံခဲ့ရပေ။
ထရမ့် အဖမ်းခံရနိုင်ခြေရှိမှု အခြေအနေအတွင်း အမေရိကန်ရှိ လုံခြုံရေးဌာနများသည် မန်ဟက်တန်ရှိ နယူးယောက် ရဲတပ်ဖွဲ့ရုံးချုပ်တွင် တနင်္လာနေ့က တွေ့ဆုံရန် စီစဉ်ထားခဲ့ကြသည်။
ယင်းကို နယူးယောက်ရဲတပ်ဖွဲ့က ဦးဆောင်ခဲ့ပြီး ပြည်သူ့လုံခြုံရေးဌာန အကြီးအကဲ၊ ထောက်လှမ်းရေး ဌာန၏ နယူးယောက်ရုံး၏ အကြီးအကဲနှင့် မန်ဟက်တန် အစိုးရရှေ့နေရုံးမှ ကိုယ်စားလှယ်များ ပါဝင်ခဲ့သည်။
ဒေါ်နယ်ထရမ့်ထောက်ခံသူများကိုတွေ့ရစဉ်
ဘရက်၏ ရုံးမှ တရားစွဲဆိုမည်ဆိုလျှင် ထရမ့်သည် အမေရိကန် သမိုင်းတွင် ရာဇဝတ်မှုအတွက် တရားစွဲခံရသည့် ပထမဆုံး သမ္မတဟောင်းအဖြစ် မှတ်တမ်းဝင်မည် ဖြစ်သည်။
ရွေးကောက်ပွဲ ဘဏ္ဍာရေးဆိုင်ရာ ချိုးဖောက်ခြင်း စွဲချက်ဖြင့် ထရမ့်သည် တရားစွဲခံရနိုင်ခြေ ရှိနေခြင်း ဖြစ်သည်။
သို့သော် ထိုသို့သော တရားစွဲဆိုမှုက ပြောင်းပြန်ရလဒ်များ ထွက်လာကာ ထရမ့်နှင့် ပတ်သက်သည့် တခြား စုံစမ်းစစ်ဆေးမှု နှစ်ခုအပေါ် ပိုမိုခက်ခဲလာစေမည်ကို ဒီမိုကရက်တစ် တချို့က စိုးရိမ်လျက်ရှိသည်။
Source: Foxnews
- By CNI
- Category: နိုင်ငံရေး
- Hits: 336
CNI International News
ဇူးရစ်၊ မတ်လ ၂၂
ကမ္ဘာ့အရေး ခေါင်းကြီးပိုင်း စာမျက်နှာများတွင် ပါဝင်လာသည့် တနင်္ဂနွေနေ့ နှောင်းပိုင်း၌ တက်သုတ်ရိုက် ဆွေးနွေးပွဲများ မတိုင်ခင် ရက်အနည်းငယ်ကတည်းက ဆွစ်ဇာလန်မှ ထိပ်သီးနိုင်ငံရေးသမားများသည် ကမ္ဘာကြီး တစ်ခုလုံးကို တုန်လှုပ်သွားစေမည့် ဆောင်ရွက်မှုတစ်ခုအား လျှို့ဝှက်ပြင်ဆင်ခဲ့ကြောင်း ရိုက်တာသတင်းတွင် ဖော်ပြထားသည်။
ဆွစ်ဇာလန် ဗဟိုဘဏ်နှင့် ဘဏ္ဍာရေးဆိုင်ရာ အာဏာပိုင်များက Credit Suisse ဘဏ်၏ အခြေအနေသည် ကောင်းမွန်ကြောင်း လူသိရှင်ကြား ထုတ်ပြန်ခဲ့သော်လည်း နောက်ကွယ်တွင်မူ နိုင်ငံ၏ ဒုတိယအကြီးဆုံးဘဏ် အား ကယ်တင်နိုင်ရန် ကြိုးပမ်းမှုများ လုပ်ဆောင်ခဲ့ရသည်။
နိုင်ငံတော်ရံပုံငွေ ဆွစ်ဖရန့် ၂၆၀ ဘီလီယံဖြင့် ထောက်ပံ့ပေးထားသော ပေါင်းစည်းခြင်းနှင့် ဘဏ်ရှယ်ယာရှင် များကို ဦးစားပေးကာ စာချုပ်ပိုင်ရှင်များကို ထိခိုက်စေသည့် ဆောင်ရွက်မှုကလည်း ဆွစ်ဇာလန်၏ ဂုဏ်သတင်း ကျော်ဇောမှုများမှ တစ်ဦးကို ထိခိုက်စေခဲ့သည်။
global finance ရဲ့ အညွန်းကိန်းများကိုတွေ့ရစဉ်
ငွေကြေး ကြွယ်ဝချမ်းသာ သူများအတွက် လုံခြုံသော နေရာတစ်ခုအဖြစ် ကာလရှည် အသုံးတော်ခံခဲ့သည့် ဆွစ်ဇာလန်နိုင်ငံ၏ ဖြစ်စဉ်များက ၂၀၀၈ ခုနှစ် ဘဏ္ဍာရေး အကြပ်အတည်းမှ ရရှိထားသော သင်ခန်းစာများနှင့် ဆန့်ကျင်ဘက် ဖြစ်နေသည်။
Credit Suisse အား ကယ်တင်ရေး အစီအစဉ်ကလည်း အင်အားကြီး ဘဏ်လုပ်ငန်းတစ်ခုဖြစ်သော UBS Group AG အား ပိုမိုကြီးမားသည့် အန္တရာယ်တွင်းသို့ ရောက်ရှိစေခဲ့သည်။
ထို့အပြင် စာချုပ်ပိုင်ရှင်များကို မထိခိုက်စေရေး ဆောင်ရွက်မှုက စတော့ရင်းနှီးမြှုပ်နှံမှုများအတွက် ထိခိုက်မှု ဖြစ်စေကာ ကမ္ဘာ့စီးပွားရေး တိုးတက်မှုကို ခြိမ်းခြောက်မှု ဖြစ်စေသည့် ချေးငွေကုန်ကျစရိတ် မြင့်တက်မှုအား ဖြစ်စေသည်။
ထိုဖြစ်ရပ်များနှင့် ပတ်သက်၍ ဆွစ် အမျိုးသားဘဏ်မှ မှတ်ချက်ပေးရန် ငြင်းဆိုထားပြီး ဆွစ်ဘဏ္ဍာရေးဝန်ကြီးအား ဆက်သွယ်မှုသည်လည်း အကြောင်းပြန်မှု မရရှိသေးပေ။
ဆွစ်ဇာလန်ဘဏ် တစ်ခုကိုတွေ့ရစဉ်
နှစ်ပေါင်းများစွာ အရှုံးပေါ်ခြင်းနှင့် သိက္ခာကျစရာ ဖြစ်ရပ်များကြောင့် Credit Suisse ဘဏ်သည် ၎င်းတို့၏ ကိုယ်ပိုင် ယုံကြည်မှု တည်ဆောက်ခြင်းဆိုင်ရာ အကြပ်အတည်းနှင့် လပေါင်းများစွာ ရင်ဆိုင်နေရသည်။
ထို့ကြောင့် ရက်ပိုင်းအတွင်းမှာပင် Credit Suisse အား UBS ၏ ဝယ်ယူမှု အပြီးသတ် သွားခြင်းဖြစ်သည်။
အမေရိကန်အစိုးရ၏ အလယ်အလတ်တန်းစား ဘဏ်နှစ်ခု၏ ငွေကြေး လိုအပ်ချက်ကို ထိန်းသိမ်းပေးရေး ဘဏ် အပ်နှံငွေ အားလုံးကို အာမခံပေးမည့် သတင်းများ ထွက်ပေါ်လာခဲ့ပြီးနောက်ပိုင်း Credit Suisse ဘဏ်နှင့် ငွေအပ် နှံသူများ၏ ယုံကြည်မှုကို မည်သို့မည်ပုံ ထိန်းသိမ်းမည်လဲဆိုခြင်းသည် အာရုံစိုက်စရာ ဖြစ်လာခဲ့သည်။
၂၀၂၂ ခုနှစ် နောက်ဆုံး သုံးလတွင် ဇူးရစ် (Zurich) အခြေစိုက်ဘဏ်မှ ငွေထုတ်ယူမှု ပမာဏသည် ဒေါ်လာဘီလီယံ ၁၁၀ အထိရှိခဲ့ပြီး Credit Suisse သည် ထိုသို့သော ပမာဏကို ပြန်လည် ဖြည့်တင်းရန်လည်း ရုန်းကန်ရလျက် ရှိသည်။
Source: ရိုက်တာ