- By CNI
- Category: နိုင်ငံရေး
- Hits: 551
CNI International News
မော်စကို၊ မတ်လ ၁၃
ပြီးခဲ့သည့်ရက်အတွင်း ယူကရိန်း၏ Mi-8 ရဟတ်ယာဉ်နှစ်စင်း၊ HIMARS နှင့် Uragan ဒုံးကျည် ခုနှစ်လုံးနှင့် ဒရုန်းတစ်စင်းတို့ကို ရုရှားလေကြောင်းကာကွယ်ရေးစနစ်က ပစ်ချနိုင်ခဲ့သည်ဟု ရုရှားကာကွယ်ရေးဌာန ပြောခွင့်ရပုဂ္ဂိုလ် အီဂေါ် ကိုနာရှန်ကော့ဗ် (Igor Konashenkov) က တနင်္ဂနွေနေ့တွင် ပြောကြောင်း တာ့စ် သတင်းတွင် ဖော်ပြသည်။
ယူကရိန်းတပ်ဖွဲ့၏ Mi-8 ရဟတ်ယာဉ်နှစ်စင်းကို ဇာပိုရိုးရှီး(Zaporozhye) ဒေသရှိ တန်မရော့ဗ်ကာ (Temirovka) အနီးနှင့် ခါကော့ဗ် (Kharkov) ဒေသ ဒီဗရတ်ချနာယာ (Dvurechnaya) တို့မှ လေကြောင်းကာကွယ်ရေးစနစ်များ က ပစ်ချနိုင်ခဲ့သည်ဟု ကိုနာရှန်ကော့ဗ်က ပြောသည်။
ထို့အပြင် အဆိုပါနေ့၌ပင် HIMARS နှင့် Uragan ဒုံးကျည် ခုနှစ်စင်းကို ကြားဖြတ်ပစ်ချနိုင်ခဲ့ပြီး တဆက်တည်းမှာပင် ခါဆွန် (Kherson) ဒေသ ရှဗနီ မာယက်ခ် (Chervony Mayak) အနီး၌ ယူကရိန်းတို့၏ လူမဲ့လေယာဉ် တစ်စင်းကို ဖျက်ဆီးနိုင်ခဲ့သည်ဟုလည်း ၎င်းက ပြောသည်။ တန်ပြန်တိုက်ပွဲတစ်ခုအတွင်း ခါဆွန်လမ်းကြောင်း ပေါ်ရှိ မောင်းသူမဲ့ ဂါဗါ့စဒီကာ (Gvozdika) ဟောင်ဝစ်ဇာတစ်စင်းကိုပါ ဖျက်ဆီးနိုင်ခဲ့သည်ဟုလည်း သိရသည်။
ဆီးရီးယားရှိ ရုရှား၏ S-400 လေကြောင်းရန်ကာကွယ်ရေးစနစ်များ(ဓါတ်ပုံ-အေပီ)
ရုရှားကာကွယ်ရေးဌာန၏ ထုတ်ပြန်ချက်အရ အထူးစစ်ဆင်ရေး စတင်ခဲ့ပြီးနောက် ယူကရိန်းတို့၏ စစ်လေယာဉ် အစင်း ၄၀၀၊ ရဟတ်ယာဉ် အစင်း ၂၂၀၊ ဒရုန်း ၃၃၈၅ စင်း၊ လေကြောင်းရန်ကာကွယ်ရေးစနစ် ၄၀၁၁ ခု၊ တင့်ကား နှင့်သံချပ်ကာကား ၈၂၇၅ စင်း၊ ဒုံးကျည်စနစ် ၁၀၅၅ ခု၊ အမြှောက်နှင့်မော်တာ ၄၃၂၆ ခုနှင့် စစ်ဘက်သုံး အထူး ယာဉ် ၈၈၇၉ စင်းတို့ကို ဖျက်ဆီးနိုင်ခဲ့သည်ဟု သိရသည်။
တောင်ပိုင်း ဒွန်းနက်ခ် (South Donetsk) နှင့် ဇာပိုရိုးရှီး လမ်းကြောင်းများတွင် ဗော့စ်တော့ခ် (Vostok) တပ်ဖွဲ့ဝင် များက ဒွန်းနက်ခ်ပြည်သူ့သမ္မတနိုင်ငံရှိ ယူကရိန်းတပ်ဖွဲ့ဝင်များ အမြောက်အများဖြင့် ပစ်ခတ်ခဲ့သည်ဟု ကိုနာရှန်ကော့ဗ်က ပြောသည်။
ထိုနေ့အတွင်း ယင်းလမ်းကြောင်းများရှိ ယူကရိန်းတပ်ဖွဲ့ဝင် ၁၀၀ ကျော်၊ သံချပ်ကာ ကားတစ်စင်း၊ pickup ကားလေးစင်း၊ D-30 ဟောင်ဝစ်ဇာတစ်စင်းတို့ကို ဖျက်ဆီးနိုင်ခဲ့သည်ဟု သိရသည်။
Source:တာ့စ်
- By CNI
- Category: နိုင်ငံရေး
- Hits: 419
CNI International News
ဒမတ်စကပ်၊ မတ်လ ၁၃
ဆီးရီးယားအနောက်ပိုင်းနှင့် အလယ်ပိုင်းဒေသကို အစ္စရေးတို့၏ လေကြောင်းတိုက်ခိုက်မှုများကြောင့် အနည်းဆုံး စစ်သားသုံးဦး ဒဏ်ရာရရှိခဲ့သည်ဟု အယ်ဂျာဇီးယား သတင်းတွင် ဖော်ပြသည်။
တိုက်ခိုက်မှုတစ်ခုကို တနင်္ဂနွေနေ့ မနက်ပိုင်းတွင် လုပ်ဆောင်ခဲ့ခြင်းဟု ဆီးရီးယားနိုင်ငံပိုင် SANA သတင်းတွင် ဖော်ပြထားသည်။
မနက် ၇ နာရီ ၁၅ မိနစ်ခန့်က အစ္စရေးလေကြောင်း တိုက်ခိုက်မှုတစ်ခုတွင် လက်ဘနွန် မြောက်ပိုင်းမှ တာတက်စ် (Tartus) နှင့် ဟာမာ (Hama) ကျေးလက်ဒေသများရှိ ပစ်မှတ်များသို့ ဒုံးကျည်များ ပစ်ခတ်ခဲ့သည်ဟု စစ်ဘက် သတင်း ရင်းမြစ်တစ်ခုကို ကိုးကား၍ SANA သတင်းတွင် ဖော်ပြသည်။
တိုက်ခိုက်မှုကြောင့် စစ်သားသုံးဦး ဒဏ်ရာရရှိခဲ့ကာ ပစ္စည်းပျက်စီးမှုတချို့ရှိကြောင်း၊ ဒုံးကျည်တချို့ကို ဆီးရီးယား လေကြောင်း ကာကွယ်ရေးများက ကြားဖြတ်ပစ်ချနိုင်ခဲ့ကြောင်းလည်း သတင်းတွင် ဖော်ပြသည်။
အစ္စရေးရဲ့ လေကြောင်း တိုက်ခိုက်မှု ခံရသော ဆီးရီးယား(GETTY IMAGES)
SANA သတင်းတွင် မည်သည့်အရာကို ပစ်မှတ်ထား တိုက်ခိုက်သည်ကိုတော့ မဖော်ပြထားသော်လည်း ဒုံးကျည် ထိမှန်ရာ ဧရိယာများတွင် အီရန်လိုလားသော တပ်ဖွဲ့များနှင့် သိပ္ပံသုတေသန စင်တာတစ်ခု ရှိသည်ဟု စစ်ပွဲ စောင့်ကြည့်ရေး အဖွဲ့တစ်ခုဖြစ်သည့် ဆီးရီးယားလူ့အခွင့်အရေး စောင့်ကြည့်မှုအဖွဲ့က ပြောသည်။
ယခုသီတင်းပတ် အစောပိုင်းတွင် အစ္စရေးတို့သည် အလက်ပို (Aleppo) လေဆိပ်ကို တိုက်ခိုက်ခဲ့ပြီး ယင်းကို အသုံးပြု၍ မရဖြစ်စေခဲ့သည်ဟု သတင်းတွင် ဖော်ပြသည်။
အစ္စရေးသည် ဆယ်စုနှစ် တစ်ခုနီးပါးကြာ အိမ်နီးချင်း ဆီးရီးယားရှိ အီရန်မှ ထောက်ပံ့ပေးသော လက်နက် လွဲပြောင်းမှုနှင့် တပ်ဖွဲ့ဝင်များရှိသည်ဟု သံယရှိရာ နေရာများကို လေကြောင်းတိုက်ခိုက်မှုပေါင်း ရာချီ လုပ်ဆောင် ခဲ့သော်လည်း ယင်းနှင့်ပတ်သက်၍ ဆွေးနွေးခြင်း သို့မဟုတ် အသိပေးခြင်း မရှိခဲ့ပေ။
ဆီးရီးယားသမ္မတ ဘာရှားအယ်လ်-အာဆတ်ကိုတွေ့ရစဉ် (GETTY IMAGES)
ပြီးခဲ့သည့် သီတင်းပတ်များအတွင်း ဆီးရီးယားလေဆိပ်နှင့် လေတပ်စခန်းများကို ပစ်မှတ်ထားသည့် တိုက်ခိုက်မှု များသည် ဆီးရီးယားတွင် အီရန်၏ ခြေကုပ်ယူမှု ကြီးထားလာခြင်းအား လျော့ချရန်အတွက် အရှိန် မြှင့်တင် ဆောင်ရွက်မှု အစိတ်အပိုင်းတစ်ခု ဖြစ်သည်ဟု စစ်ဘက်ဆိုင်ရာ သုံးသပ်သူများက ပြောသည်။
ဆီးရီးယားသမ္မတ ဘာရှားအယ်လ်-အာဆတ် (Bashar al-Assad) အား ထောက်ခံသော အီရန်သည် ပြီးခဲ့သည့်နှစ် များအတွင်း ဆီးရီယားတွင် တပ်အင်အား တိုးမြှင့်လာခဲ့ကာ အစိုးရထိန်းချုပ်ထားသော ဧရိယာအများစုကို ခြေကုပ် ယူထားပြီး လက်နက်ကိုင်နှင့် ပြည်သူ့စစ်အင်အား ထောင်ပေါင်းများစွာကိုလည်း ပိုင်ဆိုင်ထားသည်ဟု အနောက် အုပ်စု ထောက်လှမ်းရေး သတင်းများတွင် ဖော်ပြသည်။
လက်ဘနွန်၏ ဟစ်ဇ်ဘိုလာ (Hezbollah) များ ဦးဆောင်သည့် အီရန်၏ ကြားခံလက်နက်ကိုင်များသည် ဆီးရီးယား အရှေ့ပိုင်း၊ တောင်ပိုင်းနှင့် အရှေ့မြောက်ပိုင်း ဧရိယာများစွာကိုသာမက မြို့တော် ဒမတ်စကပ် (Damascus) အနီးမှ ဆင်ခြေဖုံးများတချို့ကိုလည်း ထိန်းချုပ်ထားသည်။
Source: အယ်ဂျာဇီးယား
- By CNI
- Category: နိုင်ငံရေး
- Hits: 444
CNI International News
တီဘလီဆီ၊ မတ်လ ၁၀
နှစ်ညဆက်တိုက် အကြမ်းဖက် ဆန္ဒပြမှုများ ပေါ်ပေါက်ခဲ့ပြီးနောက် နိုင်ငံခြားသားများနှင့် ပတ်သက်သည့် ဥပဒေ မူကြမ်းကို ဖျက်သိမ်းလိုက်ပြီဖြစ်ကြောင်း ဂျော်ဂျီယာအာဏာရပါတီက ကြာသပတေးနေ့တွင် ပြောခဲ့သည်ဟု ရိုက်တာ သတင်းတွင် ဖော်ပြသည်။
ရုရှားပုံစံအတိုင်း အာဏာရှင် ဆန်ဆန် ပြောင်းလဲလာမှုက နိုင်ငံ၏ EU အဖွဲ့သို့ ပူးပေါင်းရေး မျှော်လင့်ချက်ကို ထိခိုက်စေမည်ဟုဆိုကာ အတိုက်အခံများက ဆန္ဒပြခဲ့ခြင်း ဖြစ်သည်။
ဥပဒေမူကြမ်းကို လုံးဝဖျက်သိမ်းလိုက်ပြီဟု အာဏာရပါတီ Georgian Dream ပါတီက ပြောသည်။
လူ့အဖွဲ့အစည်းအတွင်း ထိပ်တိုက် တွေ့ဆုံမှုများကို လျော့ချရန် ယင်းက ပြောခဲ့ပြီး မူကြမ်းနှင့် ပတ်သက်၍ အ တိုက်အခံများဘက်က ပြောသော အလိမ်အညာများကိုလည်း ရှုတ်ချခဲ့သည်။
ဂျော်ဂျီယာသမ္မတကိုတွေ့ရစဉ်
သို့သော် ဆန္ဒပြပွဲများကို ဆက်လက် လုပ်ဆောင်သွားမည်ဟု အတိုက်အခံ ခေါင်းဆောင်များက ပြောသည်။
အစိုးရအနေဖြင့် မူကြမ်းကို တရားဝင် ပြစ်တင်မှု လုပ်ဆောင်ရန်၊ ဆန္ဒပြပွဲများအတွင်း ဖမ်းဆီးထားသူများကို ပြန်လွှတ်ပေးရန် တောင်းဆိုနေခြင်းသာ ဖြစ်သည်ဟု အတိုက်အခံ Droa ပါတီ၏ ကိုယ်စားလှယ် တစ်ဦးက ပြောသည်။
ဥပဒေမူကြမ်းကြောင့် မဟုတ်ဘဲ Georgian Dream ပါတီ၏ ရုရှားစတိုင် လုပ်ဆောင်မှုများကြောင့် ဆန္ဒပြနေရ ခြင်းဖြစ်ကြောင်း၊ ၎င်းတို့အပေါ် ယုံကြည်နိုင်တော့မည် မဟုတ်ကြောင်း Droa ပါတီအား တည်ထောင်သူ ဟယ်လင် ခိုစတာရီယာ (Helen Khoshtaria)က ပြောသည်။
လူဦးရေ ၃ ဒသမ ၇ သန်းသာရှိသော ဂျော်ဂျီယာနိုင်ငံသည် ၂၀၀၃ ခုနှစ် နှင်းဆီတော်လှန်ရေး ၊ ၂၀၀၈ ခုနှစ် ရုရှားနှင့် စစ်ပွဲတို့ အပါအဝင် ဆိုဗီယက်ပြည်ထောင်စုမှ ခွဲထွက်ပြီးချိန်ကတည်းက နိုင်ငံရေးပြဿနာများစွာနှင့် ကြုံတွေ့ခဲ့ရသည်။
ကန့်ကွက်နေကြသော မူကြမ်းတွင် နိုင်ငံခြားမှ ရံပုံငွေ ၂၀ ရာခိုင်နှုန်းကျော် ရရှိနေသော ဂျော်ဂျီယာ အဖွဲ့အစည်း များအနေဖြင့် နိုင်ငံခြား အေးဂျင့်များအဖြစ် မှတ်ပုံတင်ရန် သို့မဟုတ် ဒဏ်ငွေအပြစ် ပေးခံရမည်ဟု ပါဝင်သည်။
ဂျော်ဂျီယာမှာ ဆန္ဒပြကြစဉ်
နိုင်ငံ၏ နိုင်ငံရေး မျက်နှာစာမှ နိုင်ငံခြားလွှမ်းမိုးမှုနှင့် စပိုင်များကို ရှင်းထုတ်ရန် ထိုဥပဒေမူကြမ်းသည် အရေးပါ ကြောင်းနှင့် အစိုးရသည် နိုင်ငံတွင်းရှိ အစိုးရ မဟုတ်သည့် အဖွဲ့အစည်းများသည် မည်သည့်နေရာမှ ရံပုံငွေ ရရှိ နေသည် ဆိုသည်ကိုသိရှိရန် အခွင့်အရေးရှိသည်ဟု ဂျော်ဂျီယာ တာဝန်ရှိသူများက ပြောသည်။
သို့သော် ယင်းသည် ရုရှားဥပဒေအတိုင်း ပုံတူကူးချမှုဟု အတိုက်အခံများက စွပ်စွဲသည်။ ဂျော်ဂျီယာ ဆိုင်ရာ အီးယူ ကိုယ်စားလှယ်များကလည်း အစိုးရ၏ ဆုံးဖြတ်ချက်ကို ကြိုဆိုကြောင်း ပြောသည်။
အငြင်းပွားနေသော ဥပဒေမူကြမ်းကို လွှတ်တော်က အင်္ဂါနေ့တွင် ကနဦး အတည်ပြုပေးခဲ့ပြီး လွှတ်တော်အပြင် ဘက်တွင် လူထောင်ပေါင်းများစွာက စုဝေးဆန္ဒပြကာ ရဲတပ်ဖွဲ့ဝင်များကို ဓာတ်ဆီဗုံးများ၊ ကျောက်ခဲများ၊ ပလတ် စတစ် ရေဗူးများဖြင့် ပစ်ပေါက် တိုက်ခိုက်ခဲ့သည်။
လူဒါဇင်ချီ ထိန်းသိမ်းခဲ့သည်ဟုလည်း အာဏာပိုင်များက ပြောသည်။ ဥပဒေ မူကြမ်းသည် အာဏာရပါတီနှင့် အီးယူ လိုလားသော သမ္မတ ဆလိုမို ဇိုရာဘစ်ချ်ဗီလီတို့အကြား တင်းမာမှုကို ပိုမိုဆိုးရွားလာစေခဲ့သည်။
လွှတ်တော်သည် သူမထက်ပို၍ လုပ်ပိုင်ခွင့်ရှိသော်ငြား အဆိုပါမူကြမ်းကို ဗီတိုအာဏာသုံး၍ ပယ်ဖျက်မည်ဟု ဂျော်ဂျီယာသမ္မတက ပြောခဲ့သည်။
Source: Reuters
ယူကရိန်းနိုင်ငံတစ်ဝန်းလုံးရှိ မြို့ကြီးများသို့ ရုရှားဘက်မှ ဒုံးကျည်အလုံးအရင်းဖြင့် ပစ်ခတ်တိုက်ခိုက်
- By CNI
- Category: နိုင်ငံရေး
- Hits: 1327
CNI International News
ကိယက်ဗ်၊ မတ်လ ၁၀
ကြာသပတေးနေ့က ရုရှားဘက်မှ ဒုံးကျည်နှင့်ဒရုန်းအင်အားများစွာဖြင့် အစုလိုက်အပြုံလိုက် ပစ်ခတ်မှုကြောင့် ယူကရိန်းနိုင်ငံတစ်ဝန်းလုံးရှိ လူနေအိမ်များ၊ အရေးကြီးသည့် အခြေခံအဆောက်အဦများ ထိမှန်ခဲ့ပြီး လူခြောက်ဦး သေဆုံးခဲ့ရသည်ဟု AP သတင်းတွင်ဖော်ပြသည်။
အဆိုပါ တိုက်ခိုက်မှုကြောင့် လူရာချီ၍ အပူပေးစနစ်(သို့မဟုတ်)လျှပ်စစ်မီး ပြတ်တောက်ခဲ့ရသည်။ ထိုတိုက်ခိုက်မှုသည် သုံးပတ်အတွင်း အင်အားအပြင်းထန်ဆုံးသော တိုက်ခိုက်မှုလည်း ဖြစ်သည်။
တိုက်ခိုက်မှုများသည် ရှေ့တန်းစစ်မျက်နှာနှင့်ဝေးသော ယူကရိန်းအနောက်ပိုင်းအပါအဝင် နိုင်ငံ၏ ဧရိယာ တော်တော်များများသို့ ပစ်မှတ်ထားခဲ့ခြင်းကြောင့် တစ်ညလုံးနီးပါး လေကြောင်းအချက်ပေးသံများ သောသောညံ နေခဲ့သည်။ လူပေါင်းများစွာ အိပ်ပျော်နေချိန်တွင်ပြုလုပ်ခဲ့သော ယခုကဲ့သို့ အစုလိုက်အပြုံလိုက် ပစ်ခတ်မှုသည် ယူကရိန်းအား နောက်တစ်ကြိမ် ခြိမ်းခြောက်မှုဖြစ်သည်ဟု သမ္မတ ဇာလန်းစကီးက ပြောသည်။
ယူကရိန်းအဖျက်သမားများဟု ရုရှားဘက်မှ စွပ်စွဲထားသည့် ရုရှားအနောက်ပိုင်း ဘီယန့်ခ် (Bryansk) ဒေသကို မကြာသေးခင်က ကျူးကျော်ဝင်ရောက်ခဲ့မှုအပေါ် တုန့်ပြန်သည့်အနေဖြင့် ယခုကဲ့သို့ ပစ်ခတ်ခဲ့ခြင်းဖြစ်သည်ဟု ရုရှားကာကွယ်ရေးဌာနက ပြောသည်။
ရုရှားနိုင်ငံ Belgorod ဒေသမှ ယူကရိန်းနိုင်ငံသို့ ဒုံးကျည်သုံးစင်းပစ်လွှတ်ခြင်းကို ၂၀၂၃ ခုနှစ်၊ မတ်လ ၉ ရက် ကြာသပတေးနေ့ညက ယူကရိန်းနိုင်ငံ ခါကိဗ်မြို့မှ မြင်တွေ့ရစဉ်(ဓါတ်ပုံ-အေပီ)
သို့သော် ယူကရိန်းဘက်မှ အဆိုပါ စွပ်စွဲမှုကို ငြင်းဆိုကာ ရုရှားသည် ၎င်းတို့၏တိုက်ခိုက်မှုများကို အရှိန်မြှင့်တင်နိုင်ရေး လုပ်ဇာတ်ဖန်တီးခြင်းသာဖြစ်သည်ဟု ပြောသည်။ ယူကရိန်းစစ်ပွဲသည် ဆောင်းရာသီတစ်လျှောက်လုံး တအုံနွေးနွေး အခြေအနေတွင်ရှိနေခဲ့သည်။ ရုရှားသည် ယူကရိန်းပြည်သူများ စိတ်ဓာတ်ပျက်ပြားစေရန်၊ ယူကရိန်း အစိုးရကို ရုရှားဘက်မှသတ်မှတ်သည့် ငြိမ်းချမ်းရေးစကားဝိုင်းသို့ ခေါ်ဆောင်နိုင်ရန်အတွက် ပြီးခဲ့သည့် နိုဝင်ဘာလတွင် ယူကရိန်း စွမ်းအင်အရင်းအမြစ်များကို ပစ်မှတ်ထား တိုက်ခိုက်ခဲ့သည်။ သို့သော်နောက်ပိုင်းတွင် ထိုသို့သောတိုက်ခိုက်မှုများ လျော့နည်းသွားခဲ့သည်။ ရုရှားဘက်တွင် လက်နက်ခဲယမ်းများ ရှားပါးလာခြင်းကြောင့် ဟု လေ့လာသူများက သုံးသပ်သည်။
ကြာသပတေးနေ့တွင် ရုရှားသည် ဒုံးကျည် ၈၁ လုံး၊ အီရန်လုပ် Shahed ဖောက်ခွဲရေးဒရုန်း ၈ စီးဖြင့် တိုက်ခိုက် ခဲ့သည်ဟု ယူကရိန်းကာကွယ်ရေးဦးစီးချုပ်က ပြောသည်။ ယင်းတို့မှ ဒုံးကျည် ၃၄ လုံးနှင့် ဒရုန်း ၄ စင်းကို ကြားဖြတ်ပစ်ချနိုင်ခဲ့သည်ဟုလည်း ၎င်းက ပြောသည်။
ကြာသပတေးနေ့တွင် ပစ်ခဲ့သောလက်နက်များတွင် အသံထက်ပိုမြန်သော Kinzhal ခရုဇ် ဒုံးကျည်ခြောက်လုံး ပါဝင်သည်ဟု ယူကရိန်းလေတပ် ပြောခွင့်ရပုဂ္ဂိုလ်က ပြောသည်။ ဒုံးကျည်များသည် ယူကရိန်းရှိ စစ်တပ်နှင့် စက်မှု လုပ်ငန်းများအပြင် ယင်းတို့ကို စွမ်းအင်ဖြန့်ဖြူးနေသည့် စွမ်းအင်စက်ရုံများကို ပစ်မှတ်ထားသည်ဟု ရုရှား ကာကွယ်ရေးဌာနက ပြောသည်။
Source:AP
- By CNI
- Category: နိုင်ငံရေး
- Hits: 900
CNI International News
ဆိုးလ်၊ မတ်လ ၁၀
မြောက်ကိုရီးယားသည် ၎င်းတို့၏ အနောက်ဘက် ကမ်းလွန်ရေပြင်သို့ တာတိုပစ် ပဲ့ထိန်းဒုံးကျည်တစ်လုံး ပစ်ခတ်ခဲ့သည်ကို သတိပြုမိခဲ့သည်ဟု တောင်ကိုရီးယား စစ်တပ်က ပြောကြောင်း အယ်ဂျာဇီးယား သတင်းတွင် ဖော်ပြ ထားသည်။
ကြာသပတေးနေ့ ညနေ ၆ နာရီ ၂၀ မိနစ်တွင် အနောက်ဘက် ကမ်းရိုးတမ်း နမ်ပို(Nampo) မြို့အနီး ဧရိယာ တစ်ခုမှ ပစ်ခတ်ခဲ့ခြင်း ဖြစ်သည်ဟု တောင်ကိုရီးယားပူးတွဲ စစ်ဦးစီးချုပ်က ပြောသော်လည်း ဒုံးကျည်သည် မည်မျှသွားခဲ့သည် ဆိုသည်နှင့် ပတ်သက်၍ ချက်ချင်း ထုတ်ပြန်ခြင်း မရှိခဲ့ပေ။
ကြာသပတေးနေ့ ပစ်ခတ်မှုသည် အမေရိကန်နှင့် တောင်ကိုရီးယားတို့၏ ပူးတွဲစစ်ရေး လေ့ကျင့်မှုများနှင့် ပတ်သက်၍ ခေါင်းဆောင် ကင်မ်ဂျုံအန်၏ ညီမဖြစ်သူက သတိပေးခဲ့ပြီးနောက် ပေါ်ပေါက်လာခြင်း ဖြစ်သည်။
မြောက်ကိုရီးယား၏ နျူကလီးယား ခြိမ်းခြောက်မှုများ မြင့်တက်လာချိန်တွင် မဟာမိတ် နှစ်နိုင်ငံသည် စစ်ရေးလေ့ကျင့်မှုများကို တိုးမြှင့်ဆောင်ရွက်လာသည်။ မဟာမိတ် နှစ်နိုင်ငံသည် မတ်လ ၁၃ ရက်နေ့မှ စတင်ကာ အနည်းဆုံး ၁၀ ရက်ကြာမည့် အကြီးမားဆုံးသော Freedom Shield စစ်ရေးလေ့ကျင့်မှုကို လုပ်ဆောင်ရန် စီစဉ်ထားသည်။
မြောက်ကိုရီးယားခေါင်းဆောင် ကင်မ်ဂျုံအန်နဲ့ သမီးဖြစ်သူကိုတွေ့ရစဉ်
၂၀၂၂ ခုနှစ်၊ စက်တင်ဘာလမှ စတင်ကာ မြောက်ကိုရီးယားသည် ဒုံးကျည်စမ်းသပ်မှု၊ စစ်အင်အားပြမှုတို့ကို အချိန်ကိုက် ဆောင်ရွက်ခဲ့ကြောင်း၊ ယင်းတို့သည် အမေရိကန်နှင့် တောင်ကိုရီးယားတို့၏ လုပ်ရပ်များ ပြောင်းလဲသွား စေရန် ရည်ရွယ်ခြင်းဖြစ်ကြောင်း အမေရိကန် ထောက်လှမ်းရေး အေဂျင်စီများ၏ ထုတ်ပြန်ချက်တစ်ခုတွင် ဖော်ပြထားသည်။
အမေရိကန်-တောင်ကိုရီးယား စစ်ရေးလေ့ကျင့်မှုများအပေါ် တုန့်ပြန်မှုအဖြစ် မြောက်ကိုရီးယားသည် ၎င်းတို့၏ ဒုံးကျည် စမ်းသပ်မှုများနှင့် စစ်ရေးလေ့ကျင့်မှုများကို လုပ်ဆောင်ခဲ့ခြင်း ဖြစ်သည်။
တနင်္လာနေ့ လေကြောင်း လေ့ကျင့်မှု တစ်ခုတွင် အမေရိကန်သည် ၎င်းတို့၏ B-52 ဗုံးကြဲလေယာဉ် တစ်စင်းကို အသုံးပြုခဲ့ပြီး ယင်းက မြောက်ကိုရီးယား၏ နျူကလီးယားအပြင်ဒုံးကျည်ဆိုင်ရာ ခြိမ်းခြောက်မှုများနှင့် ပတ်သက်၍ အင်အားပြမှုဟုတောင်ကိုရီးယား ကာကွယ်ရေးဌာနက ပြောသည်။
၂၀၁၉ ခုနှစ် ကင်မ်ဂျုံအန်နှင့် အမေရိကန်သမ္မတ(ဟောင်း) ဒေါ်နယ်ထရမ့်တို့အကြား ဆွေးနွေးပွဲများ ပျက်စီးသွားခဲ့ပြီးနောက် သံတမန်ဆက်ဆံရေး ရပ်တန့်သွားခဲ့ကာ မြောက်ကိုရီးယားသည် စစ်ရေးမြှင့်တင်မှုများကို နှစ်ဆ တိုးမြှင့်ဆောင်ရွက်လာခဲ့သည်။
မြောက်ကိုရီးယားက ဒုံးကျည်ပစ်လွှတ်နေစဉ်
စစ်ရေးလိုလားသည့် တောင်ကိုရီးယားသမ္မတ ယွန်းဆော့ရွဲ(Yoon Suk-yeol) သည်လည်း မြောက်ကိုရီးယား၏ ခြိမ်းခြောက်မှု မြင့်တက်လာခြင်းအပေါ် တုန့်ပြန်ရန် ဂျပန်၊ အမေရိကန်တို့နှင့် လုံခြုံရေး၊ သံတမန်ရေး ပူးပေါင်း ဆောင်ရွက်မှုများ မြှင့်တင်ခဲ့သည်။
ဧပြီ ၂၆ ရက်တွင် ယွန်သည် အမေရိကန်သို့ သွားရောက်ကာ သမ္မတဘိုင်ဒန်နှင့် တွေ့ဆုံမည်ဖြစ်ပြီး လာမည့် သီတင်းပတ်တွင် ဂျပန်သို့ သွားရောက်မည်ဟု တာဝန်ရှိသူများက ပြောသည်။
Source: Aljazeera
- By CNI
- Category: နိုင်ငံရေး
- Hits: 378
CNI International News
ဘေဂျင်း၊ မတ်လ ၁၀
တရုတ်လက်နက်ကိုင်တပ်ဖွဲ့များကို ကမ္ဘာ့အဆင့် စံချိန်များနှင့်အညီ ဖြစ်စေရန် မြန်မြန်ဆန်ဆန် အဆင့်မြှင့် တင်သင့်သည်ဟု တရုတ်သမ္မတ ရှီကျင့်ဖျင်က တိုက်တွန်းခဲ့ကြောင်း အေပီသတင်းတွင် ဖော်ပြထားသည်။
မဟာဗျူဟာမြောက် အန္တရာယ်များကို ဖြေရှင်းရန်၊ မဟာဗျူဟာမြောက် အကျိုးစီးပွားကို ကာကွယ်ရန်နှင့် မဟာ ဗျူဟာမြောက် ရည်ရွယ်ချက်များကို နားလည် သဘောပေါက်စေရေး နိုင်ငံ၏အလုံးစုံ အင်အားကို စနစ်တကျ အဆင့်မြှင့်တင်ရန်အတွက် နိုင်ငံတော်မဟာဗျူဟာမြောက် လုပ်နိုင်စွမ်းကို အမြင့်ဆုံးတွင် ထားရှိရမည်ဟု ရှီက ဗုဒ္ဓဟူးနေ့တွင် ပြောခဲ့သည်။
ပြည်သူ့လွတ်မြောက်ရေးတပ်မတော် PLA ကိုယ်စားပြု လွှတ်တော် အခမ်းအနားတွင် ကိုယ်စားလှယ်များကို ရှီက ထိုသို့ ပြောခဲ့ကြောင်း ဆင်ဟွာသတင်းတွင် ဖော်ပြသည်။
ရှီကျင့်ဖျင်နဲ့ တရုတ်စစ်တပ် အရာရှိများကိုတွေ့ရစဉ်
သိပ္ပံနှင့်နည်းပညာကဏ္ဍတွင် ကိုယ့်အားကိုယ် ကိုးရေးအတွက် တည်ဆောက်ရေးကို အရှိန်မြှင့်တင်ရန်၊ အရေးပေါ် ကဏ္ဍများတွင် မဟာဗျူဟာမြောက် လုပ်နိုင်စွမ်းကို တိုးမြှင့်ရန်တို့ အပါအဝင် ကဏ္ဍပေါင်းစုံတွင် မြှင်တင်ရေး အတွက်လည်း ရှီက တိုက်တွန်းခဲ့သည်။
ဆားကစ်ပြားမှ အာကာသရေးရာအထိ ပါဝင်သော အရေးကြီးသည့်ကဏ္ဍ ၁၀ ခုတွင် တရုတ်နိုင်ငံ ကြီးစိုးထား စေရန် ရည်ရွယ်သည့် Made in China 2025 ကမ်ပိန်းနှင့် စီးပွားရေးတွင် စစ်ဘက်-အရပ်ဘက် ပေါင်းစပ် ပါဝင် ခြင်း ၁၀ နှစ်ကြာ စီမံကိန်းတို့ အပါအဝင် ရှီ တိုက်တွန်းခဲ့သည့် အကြောင်းအရာ တော်တော်များများသည် စတင် ခဲ့ပြီးဖြစ်သည့် အခြေအနေတွင် ရှိနေသည်။
၂၀၂၇ ခုနှစ်တွင် ကျရောက်မည့် PLA ၏ ရာပြည့် အခမ်းအနားအတွက် ရည်မှန်းချက်များကို ပြည့်မှီအောင် ဆောင်ရွက်ရန်လည်း ရှီက အလေးပေး ပြောကြားခဲ့သည်။
ရှီကျင့်ဖျင်နဲ့ တရုတ်စစ်တပ် အရာရှိများကိုတွေ့ရစဉ်
ထိုရည်မှန်းချက်များတွင် တရုတ်အနေဖြင့် ထိုင်ဝမ်ကို စစ်ရေးအရ အနိုင်ယူနိုင်သည့် စွမ်းဆောင်ရည် ရှိနေစေရန် လည်း ပါဝင်သည်ဟု အမေရိကန် အရာရှိများက ပြောသည်။
တရုတ်အစိုးရသည် ၎င်းတို့၏ ရာစုနှစ် ရည်မှန်းချက် အများစုကို မရေရာ၊ မသေချာသည့် စကားလုံး အသုံးအနှုန်း များဖြင့် သတ်မှတ်ထားသည်။
တရုတ်အနေဖြင့် မဟာဗျူဟာမြောက် တားဆီးကာကွယ်ရေး အင်အားများ ရရှိရန်၊ နယ်ပယ်အသစ်၊ အရည် အသွေး အသစ်ရှိသော တိုက်ခိုက်ရေး အင်အားကို မြှင်တင်ရန်၊ တိုက်ခိုက်ရေးကို အခြေပြုသည့် စစ်ရေး လေ့ကျင့် မှုများကို လေးလေးနက်နက် တိုးမြှင့်ရန်အတွက် ခိုင်မာသောစနစ်တစ်ခု တည်ထောင်ရန် လိုအပ်သည်ဟု ရှီက ပြီးခဲ့သည့်နှစ် မိန့်ခွန်းတစ်ခုတွင် ထည့်သွင်း ပြောဆိုခဲ့သည်။
Source: AP
- By CNI
- Category: နိုင်ငံရေး
- Hits: 303
CNI International News
အေသင်၊ မတ်လ ၉
နိုင်ငံ၏အဆိုးရွားဆုံးသော ရထားလမ်းမတော်တဆမှုအတွင်း လူ ၅၇ ဦးသေဆုံးခဲ့ရမှုနှင့်ပတ်သက်၍ တာဝန်ယူမှု ရှိစေရေး တောင်းဆိုရန် ဂရိမြို့တော် အေသင် (Athens) နှင့် မြို့ကြီးများတွင် လူပေါင်းသောင်းနှင့်ချီ စုဝေးဆန္ဒ ပြခဲ့သည်ဟု အယ်လ်ဂျာဇီးယား သတင်းတွင် ဖော်ပြသည်။
ဗုဒ္ဓဟူးနေ့တွင် မြို့တော်အေသင်၌ လူ ၄၀၀၀၀(လေးသောင်း)နီးပါး ချီတက်ဆန္ဒပြခဲ့ကြပြီး အလုပ်သမားသမဂ္ဂများ နှင့် ကျောင်းသားအဖွဲ့အစည်းများက ဦးဆောင်ခဲ့သည်။ သပိတ်မှောက်မှုများကြောင့် ကျွန်းများသို့ ဖယ်ရီခရီးစဉ် များနှင့် နိုင်ငံပိုင်သယ်ယူပို့ဆောင်ရေးလုပ်ငန်းများလည်း ရပ်တန့်သွားခဲ့သည်။
မြို့လယ်ခေါင်မှ လွှတ်တော်ချီတက် ဆန္ဒပြသူများက မတော်တဆမှု မဟုတ်ကြောင်း၊ ရာဇဝတ်မှုဖြစ်ကြောင်း အော်ဟစ်ချီတက်ခဲ့ကြပြီး နိုင်ငံ၏ဒုတိယအကြီးဆုံး သက်ဆာလိုနီကိုင် (Thessaloniki) မြို့တွင်လည်း လူ ၂၀၀၀၀(နှစ်သောင်း)ကျော် ဆန္ဒပြခဲ့ကြသည်ဟု သိရသည်။ သက်ဆာလိုနီကိုင် ဆန္ဒပြပွဲများတွင် ရဲတပ်ဖွဲ့နှင့် ဆန္ဒပြလူငယ်များအကြား ပဋိပက္ခများ ဖြစ်ပွားခဲ့သည်။
ပြီးခဲ့သည့် သီတင်းပတ်က ရထားနှစ်စင်း ခေါင်းချင်းဆိုင်တိုက်မှုတွင် မြို့၏တက္ကသိုလ်မှ ကျောင်းသား ၁၂ ဦးလည်း သေဆုံးခဲ့ရသည်။ နိုင်ငံတောင်ပိုင်း ပါထရတ်စ် (Patras) မြို့ ဆန္ဒပြပွဲများတွင် ရဲတပ်ဖွဲ့က မျက်ရည်ယိုဗုံးများ သုံး ကာ လူစုခွဲခဲ့ပြီး မတော်တဆမှုဖြစ်ပွားရာနေရာအနီးရှိ လာရစ်ဆာ (Larissa) မြို့တွင် ကျောင်းသားများက အနက် ရောင် ပူဖောင်းများ ကိုင်ဆောင်ကာ “အသက်များအပေါ် အမြတ်မထုတ်ပါနှင့်”ဟု အော်ဟစ်ချီတက်ခဲ့ကြသည်။
ဂရိနိုင်ငံ လာရစ်စာမြို့အနီးတွင် ဖေဖော်ဝါရီလ ၂၈ ရက်နေ့က ရထားနှစ်စင်း တိုက်မိပြီး လူ ၅၇ ဦး သေဆုံးခဲ့စဉ်(ဓါတ်ပုံ-ရိုက်တာ)
ဖေဖော်ဝါရီလ ၂၈ ရက်တွင် ဖြစ်ပွားခဲ့သော ရထားမတော်တဆမှုသည် ဟောင်းနွမ်းနေပြီဖြစ်သော ဂရိနိုင်ငံ၏ မီးရထားလမ်းစနစ်များအပေါ် ပြည်သူများ၏ အမျက်ဒေါသကို ကြီးထွားလာစေခဲ့သည်။ လူများစွာ သေဆုံးခဲ့ရ သည့် မတော်တဆမှုသည် ဂရိနိုင်ငံ၏ ကာလရှည်ကြွေးမြီပြဿနာ၏အရင်းခံ နှစ်ပေါင်းများစွာ လျစ်လျူရှုမှု၊ ရင်းနှီးမြှုပ်နှံမှုနည်းပါးမှု၊ ဝန်ထမ်းအင်အားနည်းပါးမှုတို့ကို အပြစ်တင်ရမည်ဟု သပိတ်မှောက်ဝန်ထမ်းများက ပြောသည်။
မတော်တဆမှုဖြစ်စဉ်သည် လူပေါင်း ၃၅၀ ကို တင်ဆောင်လာသည့် ရထားသည် ကုန်တင်ရထားတစ်စင်းနှင့် တိုက်မိခဲ့ခြင်းဖြစ်သည်။ လူစီးရထားသည် ပိတ်ရက်ရှည်အတွက် အေသင်မှ သက်ဆာလိုနီကိုင်မြို့သို့ သွားမည့် တက္ကသိုလ်ကျောင်းသားများ လိုက်ပါလာသည့် ရထားလည်းဖြစ်သည်။
အဆိုပါဖြစ်ရပ်ကြောင့် ဂရိတစ်နိုင်ငံလုံးတွင် ဆန္ဒပြပွဲများ ဖြစ်ပွားခဲ့ပြီး တနင်္ဂနွေနေ့တွင် လူပေါင်း ၁၀၀၀၀ (တစ်သောင်း)ကျော်က မြို့တော် အေသင်တွင် စုဝေးကာ အနက်ရောင် ပူဖောင်း ရာပေါင်းများစွာကို ကောင်းကင်သို့ လွှတ်တင်ခဲ့ကြသည်။
မီးရထားဝန်ထမ်းများ၏ သပိတ်မှောက်မှုကြောင့် ရထားလမ်းကြောင်းများ ရပ်တန့်သွားခဲ့ပြီး ဝန်ထမ်းများ၏ လုံခြုံရေးကိုမြှင့်တင်ပေးရန် တောင်းဆိုမှုသည် နှစ်ပေါင်းများစွာကြာလာသည့်တိုင် ဖြည့်ဆည်းပေးနိုင်မှုမရှိသေးဟု ပြောသည်။
Source:Aljazeera
- By CNI
- Category: နိုင်ငံရေး
- Hits: 484
CNI International News
လာဟိုး၊ မတ်လ ၉
ဝန်ကြီးချုပ်ဟောင်း အီမရန်ခမ်း (Imram Khan) အား ထောက်ခံသူများနှင့် ပါကစ္စတန်ရဲတပ်ဖွဲ့တို့ကြား ပဋိပက္ခ ဖြစ်ပွားခဲ့ရာ နှစ်ဖက်စလုံး ထိခိုက်ဒဏ်ရာ ရရှိမှုများ ရှိခဲ့ကြောင်း ရိုက်တာ သတင်းတွင် ဖော်ပြထားသည်။
ရဲတပ်ဖွဲ့ဝင်များက မျက်ရည်ယိုဗုံးများ သုံးခြင်း၊ တုတ်ဖြင့်ရိုက်ခြင်းတို့ ရှိခဲ့သည်ဟုလည်း သိရသည်။
ပဋိပက္ခများသည် ပါကစ္စတန်အရှေ့ပိုင်း လာဟိုး (Lahore) မြို့တွင် ရွေးကောက်ပွဲ မဲဆွယ်မှု စတင်ရေး စီစဉ်ထား သည့် လူထူစုဝေးပွဲတစ်ခု မစတင်ခင် ပေါ်ပေါက်ခဲ့ခြင်း ဖြစ်သည်။
ပါကစ္စတန်အစိုးရက မဲဆွယ်စည်းရုံးမှုကို ပိတ်ပင်ထားသည်။ ဝန်ကြီးချုပ်ဟောင်း အီမရန်ခမ်းသည် ပြီးခဲ့သည့်နှစ် က အယုံအကြည် မရှိကြောင်း လွှတ်တော်မဲခွဲမှုကြောင့် နှုတ်ထွက်ခဲ့ရပြီး ကတည်းက ကြားဖြတ် ရွေးကောက်ပွဲ ကျင်းပပေးရန် တောင်းဆိုခဲ့သူ ဖြစ်သည်။
သို့သော် ဝန်ကြီးချုပ်သစ်က ထိုတောင်းဆိုချက်ကို ငြင်းပယ်ခဲ့ပြီး ရွေးကောက်ပွဲကို စီစဉ်ထားသည့်အတိုင်း ယခုနှစ် ကုန်ပိုင်းမှသာ ကျင်းပမည်ဟု ပြောခဲ့သည်။
အီမရန်ခမ်းကိုတွေ့ရစဉ်(GETTY IMAGES)
အီမရန်ခမ်းသည် ပြီးခဲ့သည့်နှစ်က ကျင်းပခဲ့သော နိုင်ငံရေး စုဝေးပွဲတစ်ခုတွင်လည်း သေနတ်ဖြင့် ပစ်ခတ်ခံရ၍ ဒဏ်ရာ ရရှိခဲ့သည်။
လူထုစုဝေးပွဲ ကျင်းပမည့် နေရာတွင် အပြည်ပြည်ဆိုင်ရာ အမျိုးသမီးများနေ့ အခမ်းအနား ကျင်းပရန် ရှိနေသဖြင့် ဥပဒေစိုးမိုးရေးဆိုင်ရာ ခြိမ်းခြောက်မှုများ ရှိလာနိုင်သောကြောင့် ယင်းကို တားမြစ်ခဲ့ခြင်း ဖြစ်သည်ဟု ပြည်နယ် သတင်းအချက်အလက်ဝန်ကြီး အေမာ မား(Amir Mir)က ပြောသည်။
အီမရန်ခမ်းအား ထောက်ခံသူများသည် လူစုခွဲရန် ပြောသော ရဲများကို တိုက်ခိုက်ခဲ့သည်ဟုလည်း ၎င်းက ပြော သည်။
ယင်းကို တုန့်ပြန်သည့် အနေဖြင့် ရဲတပ်ဖွဲ့က ရေအမြောက်များ၊ မျက်ရည်ယိုဗုံးများနှင့် တုတ်များသုံးကာ လူစု ခွဲခဲ့ကြောင်း၊ ပဋိပက္ခအတွင်း ရဲတပ်ဖွဲ့ဝင်တစ်ဦး ဒဏ်ရာရရှိခဲ့ကာ ခမ်း၏ PTI ပါတီမှ ဝန်ထမ်း ၁၂ ဦးကို ဖမ်းဆီး ခဲ့သည်ဟု မားက ပြောသည်။
ပါကစ္စတန်ရဲတပ်ဖွဲ့နဲ့ အီမရန်ခမ်း ထောက်ခံသူများ ထိပ်တိုက်တွေ့စဉ် (AFP)
ပဋိပက္ခများအတွင်း အလုပ်သမားတချို့ ဒဏ်ရာ ရရှိခဲ့ကြောင်း၊ ရဲတပ်ဖွဲ့သည် ဖက်ဆစ်နည်းလမ်းများကို သုံးခဲ့ ကြောင်း ခမ်း၏ လက်ထောက်ဖြစ်သူ ရှာကွတ် မာမွတ် (Shafqat Mahmood)က ပြောသည်။
ရုပ်သံထုတ်လွှင့် မှုများတွင်လည်း ခမ်း၏ လာဟိုးမြို့ရှိ အိမ်အနီး နေရာများကို ရဲများက မျက်ရည်ယိုဗုံးများဖြင့် ပစ်နေသည်နှင့် အလုပ်သမားတချို့ သွေးထွက်သံယို ဖြစ်နေသည်ကို တွေ့ခဲ့ရသည်။
ခမ်းသည် တာဝန်ယူခဲ့စဉ် ၂၀၁၈ မှ ၂၀၂၂ ခုနှစ်အတွင်း ရရှိခဲ့သော နိုင်ငံတော် လက်ဆောင်များကို တရားမဝင် ရောင်းချမှု စွပ်စွဲချက်များကို ခုခံချေပရန် မတ်လ ၁၃ ရက်နေ့ တရားရုံးသို့ ဆင့်ခေါ်ခံထားရသူ ဖြစ်သည်။
Source: Reuters
- By CNI
- Category: နိုင်ငံရေး
- Hits: 451
CNI International News
ကိယက်ဗ်၊ မတ်လ ၉
ယူကရိန်းတို့ တပ်စွဲထားရာ ဘက်ခ်မွတ် (Bakhmut) မြို့အရှေ့ပိုင်းအစိတ်အပိုင်းများကို သိမ်းပိုက်နိုင်ခဲ့ပြီဟု ရုရှား၏ ဝဂ်နာကြေးစားစစ်ဘက်ဆိုင်ရာ ကန်ထရိုက်တာက ပြောကြောင်း AP သတင်းတွင် ဖော်ပြသည်။
ဘက်ခ်မွတ်မြို့သည် ယူကရိန်းနှင့်ရုရှားနှစ်ဘက်စလုံးအတွက် ရန်သူများကို အင်အားချည့်နဲ့လာစေရေး ဆောင်ရွက်ရန် အချက်အခြာကျသောစစ်မျက်နှာပြင်တစ်ခုဖြစ်လာခဲ့သည်။ ရုရှားတပ်ဖွဲ့များအတွက် ၎င်းတို့ မထိန်းချုပ်နိုင်သေးသည့် ဒွန်းနက်ခ် (Donetsk) ပြည်နယ်မှ ဧရိယာများသို့ ဝင်ရောက်နိုင်ရန်အတွက် ဘက်ခ်မွတ် မြို့ကို မဖြစ်မနေသိမ်းပိုက်နိုင်ရန် လိုအပ်နေသည်။
သို့သော် ရှရှားအနေဖြင့် မြို့ကိုသိမ်းပိုက်နိုင်သည့်တိုင် ယူကရိန်းစစ်ပွဲ၏ လားရာပြောင်းလဲသွားခြင်း ရှိမည် မဟုတ်ဟု အနောက်အုပ်စုက ပြောသည်။ ပြီးခဲ့သည့် လများအတွင်း ယူကရိန်းတွင် ဖြစ်ပွားခဲ့သော တိုက်ပွဲ အများစုသည် ဘက်ခ်မွတ်မြို့နှင့် ပတ်သက်နေခဲ့ပြီး နှစ်ဖက်စလုံးမှ ရန်သူ့အင်အားကျဆင်းလာစေရန်၊ ထိုးစစ်ဆင်မှုအသစ်များ လုပ်ဆောင်ရေး ပြင်ဆင်ချိန်ရရှိရန် အသုံးချလျက်ရှိသည်။
လက်ရှိအချိန်အထိ ဘက်ခ်မွတ်တိုက်ပွဲအတွင်း မည်သည့်ဘက်မှ အထိအခိုက်အကျအဆုံး များနေသည်ကို ကွဲကွဲ ပြားပြားမသိရသေးဘဲ ခြောက်လကြာ တိုက်ပွဲအတွင်း စစ်မဖြစ်ခင် ဒေသခံ ၇၀၀၀၀(ခုနှစ်သောင်း) ကျော် ရှိသော မြို့သည် မြို့ပျက်ကြီးတစ်ခုကဲ့သို့ ပြောင်းလဲလာခဲ့ပြီ ဖြစ်သည်။
ဝဂ်နာတပ်သားများသည် ဘက်ခ်မွတ်တိုက်ပွဲများအတွင်း ရှေ့တန်းနေရာမှ ပါဝင်လျက်ရှိကာ ၎င်းတို့သည် မြို့ကို ဖြတ်သန်းစီးဆင်းသွားသော ဘက်ခ်မွတ်ကာ (Bakhmutka) မြစ်၏ အရှေ့ခြမ်းမှ ခရိုင်အားလုံးကို အပြည့်အဝ ထိန်းချုပ်ထားနိုင်ခဲ့ပြီဟု ဝဂ်နာပိုင်ရှင် ယက်ဗ်ဂန်နီ ပရီဂိုရှင်း (Yevgeny Prigozhin) က ပြောသည်။ မြို့လယ်သည် မြစ်အနောက်ဘက်တွင် ရှိသည်။
ယူကရိန်းနိုင်ငံ ကိယက်ဗ်ရှိ စိန့်မိုက်ကယ်ဘုရားရှိခိုးကျောင်းတွင် ဈာပနအခမ်းအနားကျင်းပနေစဉ် ယူကရိန်း စစ်မှုထမ်းဟောင်း Oleksiy Sokolovskyi ၏ ရုပ်အလောင်းအား လူများက အလေးပြုကြစဉ်(ဓါတ်ပုံ-အေပီ)
လက်ရှိအချိန်အထိ ဘက်ခ်မွတ်အရှေ့ခြမ်းအား ထိန်းချုပ်နိုင်သည်ဆိုသော စကားကို ရုရှားနှင့်ယူကရိန်းစစ်ဘက် အရာရှိများက တစ်စုံတစ်ရာပြောဆိုခြင်း မရှိသေးသော်လည်း ယူကရိန်းတပ်များ ဆုတ်ခွာမှုကြောင့် ပရီဂိုရှင်း ၏ ပြောဆိုချက်သည် မှန်ကန်နိုင်ဖွယ်ရှိသည်ဟု ဝါရှင်တန်အခြေစိုက် Study of War ပညာရှင်များအဖွဲ့က သုံးသပ် သည်။
ရုရှားတပ်များသည် မြို့ကိုသုံးဘက်သုံးတန်မှ ဝိုင်းထားသောကြောင့် အနောက်ဘက်သို့သွားရန် ကျဉ်းမြောင်းသည့် လမ်းကြောင်းတစ်ခုသာ ရှိသည်။ မြို့အနောက်ပိုင်းသို့ ရောက်ရှိနိုင်သည့် တစ်ခုတည်းသော လမ်းကြောင်းကို ရုရှားဘက်မှ ပစ်မှတ်ထားတိုက်ခိုက်နေမှုကြောင့် မြို့ကိုကာကွယ်နေသော ယူကရိန်းတပ်များသည် ရွှံ့ထူသော ကျေးလက်လမ်းများကိုသာ မှီခိုနေရသည်။
ဘက်ခ်မွတ်မြို့ကို စွန့်ခွာသွားမည်မဟုတ်ဟု ယူကရိန်း သမ္မတက တနင်္လာနေ့တွင်ပြောခဲ့ပြီး ဘက်ခ်မွတ်မြို့ကို သိမ်းနိုင်လျှင် ဒွန်နက်ခ် (Donetsk) သို့ ထိုးစစ်ဆင်မှုများ လုပ်ဆောင်ရန် လမ်းပွင့်သွားစေမည်ဟု ရုရှား ကာကွယ် ရေးဝန်ကြီးက ပြောသည်။
ဘက်ခ်မွတ်မြို့သည် မကြာခင်အချိန်အတွင်းမှာပင် ရုရှားတို့လက်သို့ ရောက်ရှိသွားမည့် အရိပ်အယောင်မျိုး ရှိသည်ဟုလည်း နေတိုးအဖွဲ့ အထွေထွေအတွင်းရေးမှူး စတိုတန်ဘာ့ဂျ်(Jens Stoltenberg )က ပြောသည်။
Source:AP