CNI International News

ဝါရှင်တန်၊ ဧပြီ ၂၅

တရုတ်သည် အမေရိကန်၏ နောက်ကျောဘက်တွင် စစ်စခန်းသစ် တည်ဆောက်၍ ခြေကုပ်ယူရန် စီစဉ်နေသည် ဟု Newsweek မှ ဖော်ပြခဲ့သည်။

အမေရိကန်၏ ဗာဂျင်းကျွန်းစု (U.S. Virgin Islands) ကမ်းရိုးတန်းမှ မိုင် ၂၂၀ အကွာအဝေးတွင် တည်ရှိသည့် ကာရစ်ဘီယံ ကျွန်းနိုင်ငံဖြစ်သော အန်တီဂွာ (Antigua) ကျွန်းကို တရုတ်က ထိန်းချုပ်ပြီး အထူးစီးပွားရေးဇုန် တစ်ခုအဖြစ် ပြောင်းလဲရန် စီစဉ်နေခြင်းဖြစ်သည်ဟု လေ့လာစောင့်ကြည့်သူများက ခန့်မှန်းပြောကြားခဲ့သည်။

Newsweek မဂ္ဂဇင်းက ဆန်းစစ်လေ့လာခဲ့သည့် မှတ်တမ်းများအရ အန်တီဂွာကျွန်းပေါ်တွင် ကိုယ်ပိုင် ဓလေ့ ထုံးတမ်းများ၊ လူဝင်မှုရေးရာ လုပ်ထုံးလုပ်နည်းများ၊ သင်္ဘောဆိပ်တစ်ခုနှင့် လေကြောင်းလိုင်းများ ရှိလာမည့်အပြင် ပတ်စ်ပို့များ ထုတ်ပေးနိုင်လိမ့်မည်ဟု ဖော်ပြထားသည်။

ထိုကျွန်းပေါ်တွင် တရုတ်သည် သယ်ယူပို့ဆောင်ရေးမှအစ ဒစ်ဂျစ်တယ် ငွေကြေးများအဆုံး စီးပွားရေးလုပ်ငန်း အားလုံးကို ထူထောင်လိမ့်မည်ဟုလည်း  Newsweek က ဖော်ပြခဲ့သည်။

အန်တီဂွာဝန်ကြီးချုပ် ဂက်စ်တန် ဘရောင်နီနဲ့ ရှီကျင့်ဖျင်ကို တွေ့ရစဉ်

တရုတ်နိုင်ငံပိုင် ကုမ္ပဏီများနှင့် ဖက်စပ်ပုဂ္ဂလိက စီးပွားရေး လုပ်ငန်းများသည် အန်တီဂွာနှင့် ဘာဘူဒါ (Antigua and Barbuda) ကျွန်းစုနိုင်ငံအပြင် အမေရိကန်၏ တတိယနယ်စပ်ဟု လူသိများသည့် မဟာဗျူဟာမြောက် ဒေသရှိ အခြားကာရစ်ဘီယံ နိုင်ငံများတွင် စီးပွားရေးလုပ်ငန်းများကို လျင်မြန်စွာ ချဲ့ထွင်နေသည်ဟု အန်တီဂွာ ခေါင်းဆောင်များနှင့် ပြုလုပ်သည့် အင်တာဗျူးများ အပါအဝင် အစိုးရနှင့် ကော်ပိုရိတ် အချက်အလက်များကို စုံစမ်းထောက်လှမ်းပြီး Newsweek က ဖော်ပြခဲ့သည်။

တရုတ်၏ ကြီးထွားလာသည့် ဒေသတွင်း ရပ်တည်ချက်သည် ၁၉၆၀ ပြည့်နှစ်က ကျူးဘားတွင် ခြေကုပ်ယူရန် ကြိုးပမ်းခဲ့သည့် ဆိုဗီယက်ယူနီယံ၏ ကြိုးပမ်းမှုနောက်ပိုင်း အမေရိကတိုက်တွင် အမေရိကန်အတွက် အကြီးမား ဆုံး ပြည်ပခြိမ်းခြောက်မှု ဖြစ်လာရန် အလားအလာရှိနေသည်။
ထိုအခြေအနေကို အမေရိကန် စစ်တပ်က စိုးရိမ်လျက်ရှိသည်။

“တရုတ်ဟာ စစ်ရေး ရည်ရွယ်ချက်တွေအတွက် စီးပွားရေးနဲ့ သံတမန်ရေးကို ခြေကုပ်ယူလိမ့်မယ်ဆိုတာ ကျနော် တို့ သတိထားမိပါတယ်။ အာရှ၊ အာဖရိကနဲ့ အရှေ့အလယ်ပိုင်း ဒေသတွေမှာ တရုတ်ဟာ စစ်ရေးရည်မှန်းချက်တွေ အတွက် သက်ဆိုင်ရာ နိုင်ငံတွေမှာ ဆိပ်ကမ်းတွေဆောက်ပြီး စီးပွားရေး သဘောတူညီချက်တွေကို ပြုလုပ်ခဲ့ပါ တယ်။ ဒီဒေသမှာလည်း သူတို့ဟာ အဲဒီလို လုပ်လာမှာကို ကျနော်တို့က စိုးရိမ်နေပါတယ်” ဟု အမေရိကန်၏ ဖလော်ရီဒါ (Florida) အခြေစိုက် တောင်ပိုင်းစစ်ဌာနချုပ် (SOUTHCOM) ၏ ပြောရေးဆိုခွင့်ရှိသူက Newsweek ကို ပြောကြားခဲ့သည်။

 အန်တီဂွာကျွန်းကို တွေ့ရစဉ်

အန်တီဂွာကျွန်းတွင် တရုတ်၏ ဒေါ်လာ ဘီလျံချီသည့် ချေးငွေများနှင့် တရုတ်နိုင်ငံပိုင် ကုမ္ပဏီများက ဆိပ်ကမ်း များ၊ လေဆိပ်များ အပါအဝင် မရှိမဖြစ် အခြေခံ အဆောက်အအုံများကို တိုးချဲ့ဆောက်လုပ်နေမှုသည် တစ်ချိန်က အမေရိကန်၏ အိမ်နောက်ဖေး ကွက်လပ်ဟု လူသိများခဲ့သည့် အန်တီဂွာကျွန်းကို တရုတ်၏ အိမ်ရှေ့မျက်နှာစာ အဖြစ် ပြောင်းလဲနေခြင်းဖြစ်သည်ဟု လေ့လာစောင့်ကြည့်သူများက ပြောကြားခဲ့သည်။

ထို့ပြင် အန်တီဂွာဝန်ကြီးချုပ် ဂက်စ်တန် ဘရောင်နီ (Gaston Browne) ကလည်း Newsweek မဂ္ဂဇင်းနှင့် ပြုလုပ်ခဲ့သည့် အင်တာဗျူးတစ်ခုတွင် တရုတ်နိုင်ငံ၏ စီးပွားရေး လှုပ်ရှားမှုများနှင့် တရုတ်သမ္မတ ရှီကျင့်ဖျင်ကို ချီးကျူးဂုဏ်ပြုစကားများ ပြောကြားခဲ့သည်။

အန်တီဂွာကျွန်းနိုင်ငံတွင် လူဦးရေ ၉၇,၀၀၀ သာနေထိုင်ပြီး အကျယ်အဝန်းမှာ ၁၇၀ စတုရန်းမီတာရှိသည်။

ထိုကျွန်း၏ အရွယ်အစားမှာ နယူးယောက် စီးတီး (New York City) မြို့၏ ကွင်းစ် (Queens) စီရင်စုနယ်နှင့် မတိမ်းမယိမ်း ဖြစ်သည်။

Source: Newsweek

CNI International News

နယူးဒေလီ၊ ဧပြီ ၂၅

အိန္ဒိယသည် ၈ နှစ်အတွင်း ကာကွယ်ရေးထုတ်ကုန် တင်ပို့မှုများ ၁၀၀ ရာခိုင်နှုန်းကျော် မြင့်တက်မှုနှင့်အတူ ကမ္ဘာလုံးဆိုင်ရာ လက်နက်ဈေးကွက်တွင် အဓိကကျသည့် အခန်းကဏ္ဍသို့ မြင့်တက်လာခဲ့သည်ဟု The Times Kuwait မှ ဖော်ပြခဲ့သည်။

ထိုတင်ပို့ရောင်းချမှုများသည် လက်ရှိတွင် ကမ္ဘာတစ်ဝန်းရှိ နိုင်ငံပေါင်း ၈၅ နိုင်ငံသို့ ရောက်ရှိခဲ့ပြီးဖြစ်သည်။

အိန္ဒိယသည် ကမ္ဘာလုံးဆိုင်ရာ ကာကွယ်ရေး ထုတ်ကုန်တင်ပို့မှု အများဆုံး ၂၅ နိုင်ငံစာရင်းတွင် ပါဝင်ခဲ့ပြီး ထိုကာကွယ်ရေးထုတ်ကုန် တင်ပို့မှုများ၌ ကုမ္ပဏီပေါင်း ၁၀၀ ကျော်က တက်ကြွစွာ ပါဝင်ခဲ့သည်ဟု ဆိုသည်။

တောင်အာရှနိုင်ငံဖြစ်သည့် အိန္ဒိယသည် ဆူပူရှုပ်ထွေးပြီး ပြောင်းလဲမှုများနှင့်အတူ ကြိုတင်ခန့်မှန်းနိုင်စွမ်း မရှိသည့် ပထဝီမဟာဗျူဟာ အခင်းအကျင်းတွင် ကြံ့ကြံ့ခံ ရပ်တည်နိုင်သော ကာကွယ်ရေးထုတ်ကုန်များ တင်ပို့ရောင်းချသူအဖြစ် ရပ်တည်နိုင်ခဲ့သည်။ 

ကမ်းရိုးတန်း ကင်းထောက်လှမ်းမှု စနစ်များမှအစ ဒုံးကျည်များနှင့် ဒုံးပစ်လောင်ချာများအဆုံး ကာကွယ်ရေး ထုတ်ကုန်ကဏ္ဍတွင် အိန္ဒိယ၏ အားတက်သရော ကြိုးပမ်းအားထုတ်မှုများသည် ကမ္ဘာလုံးဆိုင်ရာ စင်မြင့်ထက်၌ အိန္ဒိယကို မဟာဗျူဟာကျသည့် နေရာသို့ တွန်းပို့ပေးနိုင်ခဲ့သည်။

အိန္ဒိယထုတ် ကာကွယ်ရေးထုတ်ကုန်မြင့်တက်မှုကို ညွန်းပြထားစဉ်

လက်ရှိတွင် အိန္ဒိယသည် ကမ္ဘာလုံးဆိုင်ရာ လက်နက် ကုန်သွယ်မှု၌ ယုံကြည်စိတ်ချရသည့် ထောက်ပံ့သူတစ်ဦး အဖြစ် ရပ်တည်နေပြီး ၂၀၂၃-၂၄ ခုနှစ်အတွင်း ကာကွယ်ရေးထုတ်ကုန် တင်ပို့မှုသည် ရူပီး ၂၁,၀၈၃ ကုဋေ ရှိခဲ့သည်။

ထိုပမာဏသည် ရူပီး ၁၅,၉၂၀ ကုဋေ ရှိခဲ့သည့် ၂၀၂၂-၂၃ ခုနှစ်ကထက် ပိုမိုမြင့်တက်ခဲ့ကာ ရာခိုင်နှုန်းအားဖြင့် ၃၂ ဒသမ ၅ ရာခိုင်နှုန်း မြင့်တက်ခဲ့ခြင်းဖြစ်သည်။

ထို့ပြင် ၂၀၂၀ ပြည့်နှစ်အတွင်း ထုတ်ပြန်ခဲ့သည့် အိန္ဒိယ၏ ကာကွယ်ရေး ထုတ်လုပ်မှုနှင့် ပို့ကုန်မြှင့်တင်ရေး မူဝါဒ (DPEPP)သည် အိန္ဒိယ၏ ကာကွယ်ရေးကဏ္ဍကို သိသာစွာ မြင့်တက်စေရန် အထောက်အကူ ဖြစ်စေခဲ့သည်။

DPEPP မူဝါဒအရ အိန္ဒိယသည် ၂၀၂၅ ခုနှစ်တွင် ပို့ကုန်ကဏ္ဍ၌ ဒေါ်လာ ၅ ဘီလျံ အပါအဝင် ကာကွယ်ရေး ထုတ်ကုန်ကဏ္ဍမှာ ဝင်ငွေ အနုတ်၊အသိမ်း  ဒေါ်လာ ၂၅ ဘီလျံ ရှိစေရန် ရည်မှန်းထားသည်။

အိန္ဒိယ၏ ကာကွယ်ရေး ထုတ်ကုန်ကဏ္ဍသည် မကြာသေးမီက ဒေါ်လာ ၁၂ ဘီလျံအထိ မြင့်တက်ခဲ့ကာ ၅ နှစ် အတွင်း ၂ ဆနီးပါး မြင့်တက်ခဲ့ပြီး ပြည်သူပိုင်ကဏ္ဍမှ ၈၀ ရာခိုင်နှုန်း၊ ပုဂ္ဂလိကပိုင် ကဏ္ဍမှ ၂၀ ရာခိုင်နှုန်း ပါဝင်ခဲ့ သည်။

Source: The Times Kuwait

CNI International News

ကိယက်ဗ်၊ ဧပြီ ၂၄

ယူကရိန်းအာဏာပိုင်များသည် ရုရှားနှင့်ဖြစ်ပွားနေသည့် စစ်ပွဲအတွင်း တပ်သားသစ်များကို ထပ်မံစုဆောင်းနိုင်ရန် ကြိုးပမ်းလျက်ရှိကြောင်း ရိုက်တာမှ ဖော်ပြခဲ့သည်။

မကြာသေးမီက ယူကရိန်း၏ တပ်သားသစ်စုဆောင်းသည့် ကြိုးပမ်းအားထုတ်မှုများကို ပြည်သူလူထုက အယုံ အကြည် ကင်းမဲ့ခဲ့သဖြင့် တပ်သားသစ်များ စုဆောင်းနိုင်ရန် အခက်တွေ့ခဲ့ရပြီးနောက် ကာကွယ်ရေး အရာရှိများ နှင့် စစ်တပ်၏ တပ်ရင်းတပ်ဖွဲ့များသည် အရပ်သားများကို စစ်ထဲဝင်ရန် နည်းမျိုးစုံဖြင့် ဆွဲဆောင်လျက်ရှိသည်။

ထိုနည်းလမ်းများထဲတွင် ရှေ့တန်း စစ်မြေပြင်နှင့်ဝေးသည့် မြို့များ၊ နယ်များတွင် စစ်ထဲဝင်ရန် မက်လုံးပေး ကမ်းလှမ်းထားသည့် ပိုစတာများ၊ ဆိုင်းဘုတ်များကို စိုက်ထူခြင်း၊ အလုပ်အကိုင်ရှာဖွေရေး ဝက်ဘ်ဆိုက်များတွင် တပ်သားသစ်စုဆောင်းသည့် ခေါ်စာများ ထည့်သွင်းခြင်း၊ လူမှုမီဒီယာများတွင် စစ်မှုထမ်းရန် တိုက်တွန်းခြင်းတို့ ပါဝင်သည်။

ယူကရိန်း ပြည်သူများ စစ်မှုထမ်းရန် သင်တန်းတက်နေစဉ်

ယူကရိန်း ဒုတိယကာကွယ်ရေးဝန်ကြီး နာတာလီယာ ကယ်လ်မိုင်ကိုဗာ (Natalia Kalmykkova) က စစ်တပ်၏ စီမံကိန်းရေးဆွဲသူများသည်  ဒီမိုကရေစီနိုင်ငံဖြစ်သည့် ယူကရိန်းတွင် ပြည်သူများအား စစ်ထဲသို့ ဝင်ရောက်ရန် ဆွဲဆောင်ရာမှာ ရွေးချယ်ခွင့် အချို့ပေးခြင်းသည် အဓိကကျသည်ဆိုသော အချက်ကို လက်ခံထားကြကြောင်း ပြောကြားခဲ့သည်။

“ကျမတို့နိုင်ငံကို ကာကွယ်ချင်တဲ့ လူတွေဟာ အခုဆိုရင် စစ်တပ်ထဲဝင်ရတာကို အသက်မွေးဝမ်းကြောင်း တစ်ခု အဖြစ် ရွေးချယ်ကြသူတွေ မဟုတ်ပါဘူး။ သူတို့ဟာ အရပ်သားတွေ ဖြစ်ပါတယ်။ အရပ်သားတွေဟာ သူတို့ ကိုယ်ပိုင် ရွေးချယ်ခွင့်ရှိပါတယ်” ဟု နာတာလီယာက ပြောကြားခဲ့သည်။

ရုရှား-ယူကရိန်း စစ်ပွဲ ဖြစ်ပွားလာသည်မှာ ၃ နှစ်ထဲသို့ ဝင်ရောက်လာချိန်တွင် ရုရှားနှင့် တိုက်ပွဲဖြစ်ပွားနေသည့် ကီလိုမီတာ ၁၀၀၀ အရှည်ရှိသော ရှေ့တန်းစစ်မျက်နှာပြင်၌ ယူကရိန်းဘက်မှ စစ်သားအင်အားများ လျော့နည်း လာမှုနှင့် ရင်ဆိုင်နေရသည်။

ယူကရိန်းက စစ်မှုထမ်းရန် စည်းရုံးနေစဉ်

ရုရှား၏ ကျူးကျော်မှု စတင်ခဲ့သည့် ၂၀၂၂ ခုနှစ်၊ ဖေဖော်ဝါရီလက ယူကရိန်း၏ မျိုးချစ်စိတ်ဓာတ် ပြင်းထန်သူများ သည် စစ်ထဲသို့ စုပြုံဝင်ရောက်ခဲ့သော်လည်း လက်ရှိတွင် မိမိသဘော ဆန္ဒအလျောက် စစ်မှုထမ်းသူများ မရှိသလောက် လျော့ကျခဲ့သည်။

ထို့ပြင် ထောင်နှင့်ချီသည့် ယူကရိန်းနိုင်ငံသားများသည် စစ်မှုထမ်းဥပဒေကို ရှောင်ရှားပြီး အချို့ကလည်း စစ်မှုထမ်းရမည်ကို ထိတ်လန့်သဖြင့် နိုင်ငံအတွင်းမှ ထွက်ပြေး တိမ်းရှောင်မှုများနှင့်အတူ တပ်သားသစ် စုဆောင်းသည့် အစီအစဉ်သည် အခက်အခဲများနှင့် ရင်ဆိုင်နေရကြောင်း အစိုးရက ဝန်ခံထားသည်။

ယူကရိန်းတွင် စစ်စည်းရုံးရေး ဥပဒေသည် လာမည့် သီတင်းပတ်တွင် စတင်အကျုံးဝင် သက်ရောက်မည်ဖြစ်ပြီး စစ်မှုထမ်းဥပဒေကို ရှောင်းလွှဲမည့် သူများကို ပြင်းထန်စွာ အပြစ်ပေးမည်ဖြစ်ကြောင်း ထိုဥပဒေမှာ ဖော်ပြထား သည်။

Source: ရိုက်တာ

CNI International News

ပေကျင်း၊ ဧပြီ ၂၄

အမေရိကန်သည် ဒေသတွင်း စစ်ရေးတင်းမာမှုများ မြင့်တက်စေရန် လုပ်ဆောင်နေသည်ဟု တရုတ်က စွပ်စွဲခဲ့ကြောင်း Daily Hunt သတင်းဝက်ဘ်ဆိုက်မှ ဖော်ပြခဲ့သည်။

အမေရိကန်သည် မကြာသေးမီက ဖိလစ်ပိုင်တွင် ကီလိုမီတာ ၁၆၀၀ အကွာအဝေးအထိ ပစ်ခတ်နိုင်သည့် လက်နက်များနှင့် အင်အားပြင်း ဒုံးပစ်လောင်ချာတစ်ခု ဖြန့်ကြက်ချထားခဲ့ပြီးနောက် ယခုလို တရုတ်က စွပ်စွဲခဲ့ခြင်း ဖြစ်သည်။

Typhon system ဟုလည်း လူသိများသည့် အမေရိကန်ကြည်းတပ်၏ တာလတ်ပစ် MRC မြေပြင်အခြေစိုက် ဒုံးကျည်စနစ်ကို အမေရိကန်က အာရှ-ပစိဖိတ်ဒေသ၏ စစ်နယ်ဝန်းတွင် ပထမဆုံးအကြိမ် ဖြန့်ကြက် ချထားခြင်းလည်း ဖြစ်သည်။

ထိုပြင် အမေရိကန်နှင့် ဖိလစ်ပိုင်အကြား နှစ်စဉ်ပြုလုပ်နေကျ Balikatan စစ်ရေးလေ့ကျင့်မှုများ အပါအဝင် အခြား စစ်ရေး လေ့ကျင့်မှုများကို ဆက်တိုက် ပြုလုပ်နေချိန်တွင် အဆိုပါ ဒုံးကျည်စနစ်ကို ဖြန့်ကြက်ချထားခဲ့ခြင်း ဖြစ်သည်။

 အမေရိကန်ရဲ့ Typhon system စနစ် ဒုံးကျည်ကိုဖြန့်ကြက်ထားစဉ်

Typhon system သည် ကီလိုမီတာ ၃၇၀ အကွာအဝေးအထိ ပစ်ခတ်နိုင်သည့် Standard Missile 6 (SM-6) ပဲ့ထိန်းဒုံးကျည်နှင့် ကီလိုမီတာ ၁၆၀၀ အကွာအဝေးအထိ ပစ်ခတ်ရောက်ရှိနိုင်သည့် Tomahawk Land Attack ခရုဇ်ဒုံးကျည်များကို ပစ်ခတ်နိုင်ကြောင်း နိုင်ငံတကာမဟာဗျူဟာလေ့လာရေးစင်တာ (CSIS) မှ ဒုံးကျည် ကာကွယ်ရေး ပရောဂျက်က ထုတ်ပြန်ခဲ့သည်။

CNN သတင်းဌာန၏ ဖော်ပြချက်အရ ထိုဒုံးကျည်စနစ် ဖြန့်ကြက်ချထားမှုသည် တရုတ်၏ စိုးရိမ်မှုများကို မြင့်တက်စေခဲ့သည်ဟု ဆိုထားသည်။

တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ လင်ကျန်း (Lin Jian) ကမူ အမေရိကန်သည် တစ်ဖက်သတ် စစ်ရေး အသာစီးရရှိစေရန် ကြိုးပမ်းနေကြောင်း စွပ်စွဲခဲ့သည်။

ပြီးခဲ့သည့် သီတင်းပတ်က ပြုလုပ်ခဲ့သည့် သတင်းစာ ရှင်းလင်းပွဲတွင် လင်ကျန်းက ဖိလစ်ပိုင်၌ အမေရိကန်၏ ဒုံးကျည်စနစ် ဖြန့်ကြက်ချထားမှုကို တရုတ်အစိုးရမှ အပြင်းအထန် ဆန့်ကျင်ကန့်ကွက်ကြေင်း ပြောကြားခဲ့သည်။

အမေရိကန်နဲ့ တရုတ် စစ်တပ်ကိုနှိုင်းယှဉ်ထားစဉ်

“အမေရိကန်အနေနဲ့ အခြားနိုင်ငံတွေရဲ့ လုံခြုံရေး စိုးရိမ်မှုတွေကို လေးစားဖို့၊ စစ်ရေးအရ ထိပ်တိုက်တွေ့မှု ဖြစ်အောင် လှုံ့ဆော်နေတာကို ရပ်တန့်ဖို့၊ ဒေသတွင်း တည်ငြိမ်ရေးနဲ့ ငြိမ်းချမ်းရေးကို လျော့ပါးစေအောင် လုပ်ဆောင်နေတာကို ရပ်တန့်ဖို့နဲ့ မဟာဗျူဟာမြောက် အန္တရာယ်တွေကို လျှော့ချနိုင်မယ့် ခိုင်မာတဲ့ လုပ်ဆောင် ချက်တွေကို ဆောင်ရွက်ဖို့ မိမိတို့ တိုက်တွန်းပါတယ်”ဟု လင်က ပြေကြားခဲ့သည်။

အမေရိကန်စစ်တပ်ကမူ ဧပြီ ၁၁ ရက်က စတင်ခဲ့သည့်  Salaknib စစ်ရေး လေ့ကျင့်မှုအတွက် ထိုဒုံးကျည်စနစ် ဖြန့်ကြက်ချထားမှုသည် ဒေသတွင်း စစ်ရေးစွမ်းဆောင်ရည်များအတွက် သမိုင်းမှတ်တိုင် တစ်ခုဖြစ်ကြောင်း ပြောကြားခဲ့သည်။

ကျွမ်းကျင်သူများကမူ ထိုဒုံးကျည်စနစ် ဖြန့်ကြက်ချထားမှုသည် အမေရိကန် အနေနှင့် တောင်တရုတ်ပင်လယ်၊ တရုတ် ပြည်မကြီးတောင်ပိုင်းနှင့် ထိုင်ဝမ်ရေလက်ကြား တစ်လျောက် တရုတ်၏ စခန်းများကို ထိုးစစ်ဆင် တိုက်ခိုက်နိုင်သည့် အကွာအဝေးတွင် လက်နက်များကို ထားရှိသည့် အရိပ်လက္ခဏာတစ်ခုဖြစ်ကြောင်း ပြောကြား ခဲ့သည်။

Source: Daily Hunt

CNI International News

အမ်ရစ်ဆာ၊ ဧပြီ ၂၃

အိန္ဒိယ နယ်စပ်လုံခြုံရေးတပ်ဖွဲ့ (BSF) သည် ပန်ဂျပ် (Punjab) ပြည်နယ်၊ အမ်ရစ်ဆာ (Amritsar) ခရိုင်၏ နယ်စပ်တွင် ဘိန်းဖြူထုပ်ဟု သံသယရှိသည့် အထုပ်တစ်ထုပ်ကို သယ်ဆောင်ထားသော တရုတ်လုပ်ဒရုန်း တစ်စင်းကို ရှာဖွေတွေ့ရှိခဲ့သည်ဟု Bejing News သတင်းဝက်ဘ်ဆိုက်မှ ဖော်ပြခဲ့သည်။

BSF ၏ ထောက်လှမ်းရေးအဖွဲ့သည် သံသယဖြစ်ဖွယ် အထုပ်တစ်ထုပ်နှင့်အတူ ဒရုန်းတစ်စင်း တွေ့ရှိသည့် သတင်းကို လက်ခံရရှိခဲ့ပြီးနောက် BSF တပ်ဖွဲ့ဝင်များက သံသယဖြစ်ဖွယ် နေရာကို ရှာဖွေရေးများ လုပ်ဆောင် ခဲ့သည်။

ဒေသစံတော်ချိန် မွန်းလွဲ ၄ နာရီ ၄၅ မိနစ်ခန့်တွင် BSF အဖွဲ့ဝင်များသည် ၅၀၀ ဂရမ် အလေးချိန်ရှိ ဘိန်းဖြူဟု သံသယဖြစ်ဖွယ် အထုပ်တစ်ထုပ်နှင့်အတူ ဒရုန်းတစ်စင်းကို အမ်ရစ်ဆာခရိုင်ရှိ နက်စ်သာ (Nestha) ကျေးရွာ၏ လယ်ကွင်းထဲတွင် တွေ့ရှိခဲ့သည်ဟု ဆိုသည်။

တရုတ်လုပ် ဒရုန်းတစ်စင်းကို ဘိန်းဖြူထုတ်နဲ့အတူ တွေ့ရစဉ်

ရှာဖွေတွေ့ရှိခဲ့သည့် ဒရုန်းသည် တရုတ်နိုင်ငံလုပ် DJI Mavic 3 Classic ဒရုန်းတစ်စင်းဖြစ်ကြောင်း ဖော်ထုတ် သိရှိခဲ့သည်ဟု BSF က ထုတ်ပြန်ခဲ့သည်။

အဆိုပါ သံသယဖြစ်ဖွယ် အထုပ်ကို အဝါရောင်တိပ်ဖြင့် ပတ်ထားပြီး ဒရုန်းတွင် သေးငယ်သည့် အချက်ပြ မီးတစ်ခု ကိုလည်း တွေ့ရှိခဲ့သည်ဟု ထုတ်ပြန်ချက်၌ ဖော်ပြခဲ့သည်။

ယခုအကြိမ် ဒရုန်းတွေ့ရှိမှုသည် ပန်ဂျပ်ပြည်နယ်တွင် ဒုတိယအကြိမ်မြောက် အမျိုးအစားတူ တရုတ်ဒရုန်း တစ်စင်းကို တွေ့ရှိခဲ့ခြင်းဖြစ်သည်။ 

ဧပြီ ၁၇ ရက်ကလည်း BSF သည် ပန်ဂျပ်ပြည်နယ် ရဲတပ်ဖွဲ့နှင့်အတူ တန်တာရန် (Tarn Taran) မြို့တွင် တရုတ်လုပ် DJI Mavic 3 ဒရုန်းတစ်စင်းကို တွေ့ရှိခဲ့သည်။

ယခုလ အစောပိုင်းကလည်း ပန်ဂျပ်ပြည်နယ်၊ အမ်ရစ်ဆာခရိုင်၏ နယ်စပ်ဒေသတွင် ဘိန်းဖြူဟု သံသယဖြစ်ဖွယ် အထုတ်တစ်ထုပ်ကို BSF က ရှာဖွေတွေ့ရှိခဲ့သည်။

Source: Bejing News

CNI International News

ဝါရှင်တန်၊ ဧပြီ ၂၃

အမေရိကန်သမ္မတ ဂျိုးဘိုင်ဒန် (Joe Biden) အစိုးရအဖွဲ့သည် လာမည့်ရက်ပိုင်းအတွင်း ယူကရိန်းကို စစ်လက်နက်ပစ္စည်းများ ကူညီထောက်ပံ့ရန် ပြင်ဆင်နေသော်လည်း ၂၀၂၅ ခုနှစ်အတွက် ယူကရိန်းအား အကူအညီပေးမည့် အစီအစဉ်သည် သေချာရေရာမှု မရှိသေးကြောင်း ရိုက်တာမှ ဖော်ပြခဲ့သည်။

အမေရိကန်အောက်လွှတ်တော်သည် ကာလကြာရှည် နှောင့်နှေးကြန့်ကြာခဲ့ရသည့်  ဒေါ်လာ ၆၀ ဘီလျံတန်ဖိုးရှိ ယူကရိန်းအား စစ်ရေးအကူအညီပေးရေး ဥပဒေမူကြမ်းကို ပြီးခဲ့သည့်ရက်ပိုင်းက အတည်ပြုခဲ့သည်။

ထိုစစ်ရေး အကူအညီများသည် ရုရှား၏ ပြင်းထန်သည့် တိုက်ခိုက်မှုများအောက်တွင် လက်နက်ခဲယမ်းများ ပြတ်လပ်နေသော ယူကရိန်းအတွက် မျှော်မှန်းထားသည်ထက် နောက်ကျကာ ရောက်ရှိလာမည်ဖြစ်သည်။

ထို့ပြင် အမေရိကန်သည် လာမည့်နှစ်တွင် ယူကရိန်းအား ကူညီထောက်ပံ့မှုများ ဆက်ပေးရန် ရှိ/မရှိ အာမခံချက် မရှိကြောင်းလည်း ကျွမ်းကျင်သူများက သုံးသပ်ခဲ့ကြသည်။

သို့သော် လက်နက်ကြီးကျည်များ၊ ပစ်မှတ်တိကျသည့် ပဲ့ထိန်းဒုံးကျည်များနှင့် လေကြောင်းကာကွယ်ရေး စနစ်များ သည် ယူကရိန်းစစ်တပ်၏ အနေအထားကို ပြောင်းလဲစေမည်ဆိုသော အချက်ကို အရာရှိများနှင့် ကျွမ်းကျင်သူများ က လက်ခံထားကြသည်။

ဘိုင်ဒန်ကိုတွေ့ရစဉ်

"စစ်ရေးအကူအညီတွေဟာ ယူကရိန်းအတွက် လက်တွေ့အရရော၊ စိတ်ပိုင်းဆိုင်ရာအရပါ ခွန်အားဖြစ်စေပြီး ၂၀၂၄ ခုနှစ် တစ်နှစ်လုံးမှာ လက်နက်ခဲယမ်း မပြတ်လပ်ဘဲ တိုက်ခိုက်နိုင်မှာဖြစ်သလို ပူတင် (Putin)ရဲ့ တစ်ဖက်သတ် ထင်မြင်ချက်တွေ မှားယွင်းတယ်ဆိုတာကို ပြသရာရောက်ပါတယ်" ဟု စီအိုင်အေ ညွှန်ကြားရေးမှူး ဝီလျံဘန်းစ် က ဧပြီ ၁၈ ရက်တွင် ဒဲလက်စ် (Dallas) မြို့ရှိ Bush Center Forum on Leadership ၌ ပြောကြားခဲ့သည်။

စစ်ရေး အကူအညီပေးမည့် ဥပဒေမူကြမ်းကို လက်မှတ် ရေးထိုးပြီးနောက် ရက်ပိုင်းအတွင်းမှာပင် ယူကရိန်းသို့ လေကြောင်း ကာကွယ်ရေး စနစ်များနှင့် တာဝေးပစ် လက်နက်များ၊ ခဲယမ်းများ ပို့ဆောင်ပေးနိုင်လိမ့်မည်ဟု ၎င်းက ဆိုသည်။

"စစ်ရေး အကူအညီတွေ ပို့ဆောင်မှုမှာ အမေရိကန်ဘက်က နှောင့်နှေးကြန့်ကြာမှုတွေ ရှိနေမှာမဟုတ်ပါဘူး" ဟု ဘန်းစ်က ပြောကြားခဲ့သည်။

ယူကရိန်း-ရုရှား စစ်ပွဲ ဖြစ်ပွားလာသည်မှာ ၂ နှစ်ကျော် ကြာမြင့်လာချိန်တွင် ယူကရိန်းသည် နိုင်ငံ၏ အရှေ့ပိုင်း နယ်မြေအချို့ကို ဆုံးရှုံးခဲ့ပြီး ရုရှားတပ်ဖွဲ့များသည် အနောက်နိုင်ငံများ၏ ယူကရိန်း အကူအညီများ နှောင့်နှေး ကြန့်ကြာ နေချိန်၌ မြို့များကို ဗုံးကြဲတိုက်ခိုက်မှုများ အရှိန်မြှင့်လုပ်ဆောင်ခဲ့သည်။

Source: ရိုက်တာ

CNI International News

ဘန်ကောက်၊ ဧပြီ ၂၃ ရက် 

မြန်မာနိုင်ငံ၊ မြဝတီမြို့တွင် ဖြစ်ပွားနေသည့် တိုက်ပွဲများ လျော့ကျလာပြီး ဆွေးနွေးညှိနှိုင်းမှုများ စတင်နေချိန်တွင် ထိုင်းနိုင်ငံ၊ တာ့ခ် (Tak)ခရိုင်၊ မဲဆောက် (Mae Sot) မြို့ရှိ မြန်မာတိုက်ပွဲရှောင် ဒုက္ခသည် အရေအတွက်သည် ဧပြီ ၂၁ ရက်က ၃၀၀၀ ရှိခဲ့ရာမှ ဧပြီ ၂၂ ရက်တွင် ၁၀၀၀ ခန့်သာ ကျန်ရှိတော့ကြောင်း ဘန်ကောက်ပို့စ်မှ ဖော်ပြခဲ့သည်။

မြဝတီမြို့တွင် မြန်မာ့တပ်မတော်နှင့် KNLA-PDF ပူးပေါင်းအဖွဲ့ကြား တိုက်ပွဲများ အပြင်းအထန် ဖြစ်ပွား၍ ဒေသ တွင်းနေ အရပ်သားများသည် ထိုင်းနိုင်ငံ၊ မဲဆောက်မြို့ဘက်သို့ ထွက်ပြေးတိမ်းရှောင်ခဲ့ကြရသည်။

ပဋိပက္ခနှင့်ပတ်သက်ပြီး နှစ်ဘက်အကြား ဆွေးနွေးနေပြီး မြန်မာအစိုးရ၏ စစ်ကူများသည် ကော့ကရိတ်မှ ရောက်ရှိခဲ့ခြင်းမရှိကြောင်း ထိုင်းစစ်တပ်၏ ဒုတိယဗိုလ်ချုပ်ကြီး ပရာဆန် ဆန်သီရီရက် (Prasan Saengsirirak) က Thai PBS ကို ပြောကြားခဲ့သည်။

ထိုင်းဘက်ကို ထွက်ပြေးတိမ်းရှောင်လာတဲ့ မြန်မာတိုက်ပွဲရှောင်တွေကို တွေ့ရစဉ်

တိုက်ပွဲများကြောင့် မြဝတီမှ မဲဆောက်သို့ ထွက်ပြေး တိမ်းရှောင်ခဲ့ကြသူ အများစုသည် လက်ရှိတွင် မဲဆောက်မှ ပြန်လည်ထွက်ခွာနေကြသည်။

အမှတ် ၁ ထိုင်း-မြန်မာ ချစ်ကြည်ရေးတံတားတွင် ခြေကျင်သွားလာရသည့် လူသွားစင်္ကြန့်လမ်းနှင့် ကုန်သွယ်ရေး ယာဉ်လမ်းကြောင်းကို ဖွင့်ထားသလို မိုအီမြစ် (သောင်ရင်းမြစ်) တစ်လျှောက်ရှိ တရားဝင် ဆိပ်ခံတံတားများကို လည်း ဖွင့်ပေးထားကြောင်း ပရာဆန်က ပြောကြားခဲ့သည်။

မြန်မာနိုင်ငံမှ ပစ်ခတ်ခဲ့သည့် ကျည်ဆန်တစ်ခုသည် မဲဆောက်မြို့ရှိ အိမ်တစ်အိမ်ကို ထိမှန်ခဲ့ပြီးနောက် ထိုင်း၏ အမှတ် ၃ တပ်မတော်သည် နယ်စပ်ဒေသတစ်လျောက် အခြေအနေကို အနီးကပ်စောင့်ကြည့်နေကြောင်း ပရာဆန်က ပြောကြားခဲ့သည်

Source: ဘန်ကောက်ပို့စ်

CNI International News

ကာရာကက်စ်၊ ဧပြီ ၂၂

ဗင်နီဇွဲလားနိုင်ငံ၏ အတိုက်အခံများသည် လူထုအကြား ပေါ်ပေါ်ထင်ထင်မနေသည့် သံတမန်ဟောင်း အက်မန်ဒို ဂွန်ဇာလက် (Edmundo Gonzalez) ကို ဇူလိုင်လအတွင်း ကျင်းပမည့် သမ္မတရွေးကောက်ပွဲတွင် လက်ရှိသမ္မတ နီကိုလပ်စ် မာဒူရို (Nicolas Maduro) နှင့် ယှဉ်ပြိုင်မည့် ကိုယ်စားလှယ်လောင်းအဖြစ် ရွေးချယ်ခဲ့သည်ဟု ရိုက်တာ မှ ဖော်ပြခဲ့သည်။

ရွေးကောက်ပွဲသည် အချိန် နီးကပ်နေပြီဖြစ်သဖြင့် ယခင်ကတည်းက လူထုနှင့် ရင်းနှီးကျွမ်းဝင်မှု မရှိသည့် ဂွန်ဇာလက်သည် မဲဆန္ဒရှင်များအကြားတွင် ၎င်း၏ ပုံရိပ်ကို လျင်မြန်စွာ တည်ဆောက်ရန် လိုအပ်နေသည်ဟု နိုင်ငံရေးလေ့လာစောင့်ကြည့်သူများက ပြောကြားခဲ့သည်။

တောင်အမေရိကန်နိုင်ငံဖြစ်သည့် ဗင်နီဇွဲလားအပေါ်  ပိတ်ဆို့မှုများ ဖြေလျှော့ပေးရန်အတွက် တရားမျှတသော ရွေးကောက်ပွဲကျင်းပရန် အမေရိကန်က ပြောကြားထားသဖြင့် ဇူလိုင် ၂၈ ရက်တွင် ပြုလုပ်မည့် ရွေးကောက်ပွဲ သည် အလျော်အစား ကြီးမားသည်ဟု ကျွမ်းကျင်သူများက ပြောသည်။

ဗင်နီဇွဲလား အတိုက်အခံ အက်မန်ဒို ဂွန်ဇာလက်ကို တွေ့ရစဉ်

အတိုက်အခံများအကြား ရွေးကောက်ပွဲဝင် ကိုယ်စားလှယ်လောင်း ရွေးချယ်ရေးအတွက် ခက်ခဲစွာ စဉ်းစားခဲ့ကြ ပြီးနောက် ကိုယ်စားလှယ်လောင်း အမည်စာရင်းတင်သွင်းမှု နောက်ဆုံးရက်မတိုင်မီ တစ်ရက်အလိုဖြစ်သည့် ဧပြီ ၁၈ ရက်တွင် အာဂျင်တီးနားနိုင်ငံဆိုင်ရာ ဗင်နီဇွဲလားသံအမတ်ဟောင်း ဂွန်ဇာလက်ကို ရွေးချယ်ခဲ့ကြခြင်း ဖြစ်သည်။

ထိုရွေးကောက်ပွဲသည် ဗင်နီဇွဲလားနိုင်ငံတွင် ၂၀၁၈ ခုနှစ်နောက်ပိုင်း ပထမဆုံးအကြိမ် သမ္မတရွေးကောက်ပွဲ ဖြစ်သဖြင့် အသက် ၇၄ နှစ်အရွယ် ဂွန်ဇာလက်သည် ခက်ခဲကြမ်းတမ်းသည့် လမ်းကြောင်းပေါ်ကို လျှောက်လှမ်း ရလိမ့်မည်ဖြစ်ကြောင်း ကျွမ်းကျင်သူများက ပြောကြားခဲ့သည်။

“သူက လူသိနည်းတဲ့ ကိုယ်စားလှယ်လောင်း ဖြစ်ပါတယ်။ သူ့ကို လူတွေသိလာအောင် လုပ်ဖို့က သူ့အတွက် စိန်ခေါ်မှုတစ်ခု ဖြစ်ပါတယ်” ဟု Estrategia y Poder အတိုင်ပင်ခံကုမ္ပဏီမှ ညွှန်ကြားရေးမှူး ရီကာဒို ရီယို့စ် (Ricardo Rios) က ပြောကြားခဲ့သည်။

အတိုက်အခံခေါင်းဆောင် ဟိုဆေး ဂွာရာကို တွေ့ရစဉ်

အတိုက်အခံများသည် ရွေးကောက်ပွဲဝင် ကိုယ်စားလှယ်လောင်း တစ်ဦးကို တညီတညွတ်တည်း ရွေးချယ်ရန် မျှော်လင့်ခဲ့ပြီးနောက် ၁၉၉၀ ပြည့်နှစ် ကာလများက နိုင်ငံခြားရေးဝန်ကြီးဌာနတွင် ကာလကြာရှည် တာဝန် ထမ်းဆောင်ခဲ့သည့် ဂွန်ဇာလက်ကို ရွေးချယ်ခဲ့ကြခြင်းဖြစ်သည်။

“အက်မန်ဒိုက အရမ်း ပရော်ဖက်ရှင်နယ် ပီသပြီး သိုသိုသိပ်သိပ် နေထိုင်တတ်သူဖြစ်သလို ဒီမိုကရေစီ ခံယူချက် ခိုင်မာတဲ့သူပါ။ သူက စကား ကြီးကြီးကျယ်ကျယ် ပြောတတ်တဲ့သူမျိုး မဟုတ်ပါဘူး” ဟု အတိုက်အခံတစ်ဦး ဖြစ်သူ ဂျီးဆပ် တိုရီယယ်ဘာ (Jesus Torresalba) က ပြောကြားခဲ့သည်။

ထိုပြင် အတိုက်အခံခေါင်းဆောင် ဟိုဆေး ဂွာရာ (Jose Guerra) ကလည်း နိုင်ငံတကာရေးရာ၊ စီးပွားရေးနှင့် နိုင်ငံရေး ပြဿနာများတွင် ဂွန်ဇာလက်၏ ဗဟုသုတကြွယ်ဝမှုနှင့် ပြင်သစ်၊ အင်္ဂလိပ်နှင့် စပိန်ဘာသာစကားများ ပြောဆိုတတ်မှုကို ချီးကျူးခဲ့သည်။

Source: ရိုက်တာ

CNI International News

ဝါရှင်တန်၊ ဧပြီ ၂၂

အမေရိကန်အောက်လွှတ်တော် ကိုယ်စားလှယ်များသည် ယူကရိန်း၊ အစ္စရေးနှင့် ထိုင်ဝမ်တို့ကို လုံခြုံရေး ကူညီ ထောက်ပံ့မှုများပေးမည့် ဒေါ်လာ ၉၅ ဘီလျံတန်ကြေးရှိ အကူအညီပေးရေးဥပဒေမူကြမ်းအား ဧပြီ ၁၉ ရက်က အတည်ပြု ထောက်ခံခဲ့သည်ဟု ရိုက်တာမှ ဖော်ပြခဲ့သည်။

လက်ရှိတွင် ထိုဥပဒေမူကြမ်းသည် ဒီမိုကရက်များ ထိန်းချုပ်ထားသည့် အထက်လွှတ်တော်သို့ ရောက်ရှိသွားပြီ ဖြစ်ပြီး အထက်လွှတ်တော်ကလည်း ဥပဒေမူကြမ်းကို အတည်ပြုဖွယ် ရှိနေသည်။

အဆိုပါ ဥပဒေမူကြမ်းကို အတည်ပြုပေးရန် ဒီမိုကရက်ခေါင်းဆောင်များဖြစ်သည့် သမ္မတ ဂျိုးဘိုင်ဒန် (Joe Biden) ကအစ အထက်လွှတ်တော် ရီပတ်ဘလစ်ကန်တစ်ဦးဖြစ်သည့် မစ်ချ် မက်ကွန်နယ် (Mitch McConnell) အဆုံး ရီပတ်ဘလစ်ကန် အောက်လွှတ်တော်ဥက္ကဋ္ဌ မိုက် ဂျွန်ဆင် (Mike Johnson) ကို တိုက်တွန်းခဲ့ကြသည်။

အထက်လွှတ်တော်သည် အောက်လွှတ်တော်က အတည်ပြုခဲ့သည့် ထိုဥပဒေမူကြမ်းကို ထပ်မံအတည်ပြုရန် အတွက် ဧပြီ ၂၂ ရက်တွင် စဉ်းစားသုံးသပ်မည်ဖြစ်ပြီး ထိုနေ့ မွန်းလွဲပိုင်းတွင် ပဏာမ မဲခွဲဆုံးဖြတ်မှု ပြုလုပ်မည် ဖြစ်သည်။

အမေရိကန် အောက်လွှတ်တော်ဥက္ကဋ္ဌ မိုက်ဂျွန်ဆင်ကို တွေ့ရစဉ်

ထိုဥပဒေမူကြမ်းကို အတည်ပြုရေးအတွက် နောက်ဆုံးအဆင့် လုပ်ထုံးလုပ်နည်းများအား လာမည့် သီတင်းပတ် တွင် ပြုလုပ်မည်ဖြစ်ပြီး၊ ထို့နောက် သမ္မတဘိုင်ဒန်က ဥပဒေအဖြစ် အတည်ပြု လက်မှတ်ရေးထိုးမည်ဖြစ်သည်။

အဆိုပါ ဥပဒေမူကြမ်းတွင် ယူကရိန်းအား ဒေါ်လာ ၆၀ ဒသမ ၈၄ ဘီလျံ၊ အစ္စရေးကို ၂၆ ဘီလျံနှင့် ထိုင်ဝမ် အပါအဝင် အာရှ-ပစိဖိတ်ဒေသအတွက် ၈ ဒမသ ၁၂ ဘီလျံ ထောက်ပံ့ပေးမည့် အစီအစဉ်များ ပါဝင်သည်။

ယူကရိန်းသမ္မတ ဇာလန်းစကီး (Volodymyr Zelenskiy) ကမူ ထိုဥပဒေမူကြမ်းအား အတည်ပြုခဲ့သည့် အောက်လွှတ်တော်ကို ကျေးဇူးတင်ကြောင်းနှင့် အမေရိကန်လွှတ်တော်အမတ်များသည် သမိုင်းကြောင်းကို လမ်းကြောင်းမှန်ပေါ် ပြန်ရောက်စေရန် လုပ်ဆောင်ခဲ့ခြင်းဖြစ်ကြောင်း ပြောကြားခဲ့သည်။

''ဒီနေ့ အမေရိကန်အောက်လွှတ်တော်က အတည်ပြုခဲ့တဲ့ ဥပဒေမူကြမ်းဟာ စစ်ပွဲကို မကြာရှည်စေဖို့နဲ့ သိန်း/သန်း ချီတဲ့ လူ့အသက်တွေကို ကယ်တင်ဖို့ အထောက်အကူဖြစ်စေပြီး ကျနော်တို့ နိုင်ငံတွေရဲ့ အကူအညီတွေကို ပိုမို ခိုင်မာစေပါတယ်” ဟု ဇာလန်းစကီးက X လူမှုမီဒီယာတွင် ပြောကြားခဲ့သည်။

Source: ရိုက်တာ