CNI International News

လန်ဒန်၊ ဇူလိုင် ၂၇

မြောက်ကိုရီးယားဟက်ကာများသည် မြောက်ကိုရီးယားအစိုးရ၏ နျူကလီးယား စီမံကိန်းများကို ထောက်ပံ့ပေးရန် အတွက် လျှို့ဝှက်အဆင့် စစ်ရေးလျှို့ဝှက်ချက်များအား ခိုးယူရန် ကမ္ဘာတစ်ဝန်း ဆိုက်ဘာသူလျှိုလုပ်မှု အစီအစဉ် ကို လုပ်ဆောင်နေသည်ဟု အမေရိကန်၊ ဗြိတိန်နှင့် တောင်ကိုရီးယားတို့က ပြောကြားခဲ့ကြောင်း ရိုက်တာမှ ဖော်ပြ ခဲ့သည်။

Anadriel သို့မဟုတ် APT45 ဟူသည့် အမည်များဖြင့် လူသိများသည် ဟက်ကာအဖွဲ့သည် တင့်ကားများ၊ ရေငုပ် သင်္ဘောများ၊ ရေတပ်သင်္ဘောများ၊ တိုက်လေယာဉ်များ၊ ဒုံးကျည်များနှင့် ရေဒါစနစ်များ ထုတ်လုပ်သော ကုမ္ပဏီ များ အပါအဝင် ကမ္ဘာတစ်ဝန်းရှိ ကာကွယ်ရေးကုမ္ပဏီများ၏ ကွန်ပျူတာစနစ်များကို ပစ်မှတ်ထား တိုက်ခိုက်ခဲ့ သည်ဟု လေ့လာချက်တစ်ခုတွင် ဖော်ပြခဲ့သည်။

ထိုလေ့လာချက်ကို အမေရိကန်၏ ထောက်လှမ်းရေးအဖွဲ့များဖြစ်သည့် ဖက်ဒရယ်ထောက်လှမ်းရေး ဗျူရို (FBI) ၊ အမျိုးသားလုံခြုံရေး အေဂျင်စီ (NSA) နှင့် ဆိုက်ဘာအေဂျင်စီများ၊ ဗြိတိန်အမျိုးသား ဆိုက်ဘာ လုံခြုံရေးစင်တာ (NCSC) နှင့် တောင်ကိုရီးယား၏ အမျိုးသား ထောက်လှမ်းရေးအဖွဲ့ (NIS) တို့က ပူးတွဲရေးသားခဲ့ခြင်းဖြစ်သည်။

မြောက်ကိုရီးယား စစ်ရေးလေ့ကျင့်နေစဉ်

Anadriel သည် မြောက်ကိုရီးယား သူလျှိုအေဂျင်စီ၏ လက်အောက်ခံ အဖွဲ့အဖြစ် သတ်မှတ်ခံထားရပြီး မြောက်ကိုရီးယားအစိုးရ၏ စစ်ရေးနှင့် နျူကလီးယား ရည်မှန်းချက်များကို မြှင့်တင်ရန် လုပ်ဆောင်ပေးနေကြောင်း NCSC က ပြောကြားခဲ့သည်။

"ကျနော်တို့ ဒီနေ့ ထုတ်ဖော်ပြောဆိုခဲ့တဲ့ ကမ္ဘာလုံးဆိုင်ရာ ဆိုက်ဘာ သူလျှိုလုပ်မှု စစ်ဆင်ရေးဟာ မြောက်ကိုရီးယားအစိုးရက ထောက်ပံ့ပေးထားတဲ့ သူတွေက သူတို့ရဲ့ စစ်ရေးနဲ့ နျူကလီးယား စီမံကိန်းတွေကို အကောင်အထည်ပေါ်အောင် ဆောင်ရွက်ဖို့ ဆန္ဒရှိနေတဲ့ အတိုင်းအတာကို ပြသနေပါတယ်" ဟု NCSC ၏ လုပ်ငန်းညွှန်ကြားရေးမှူး ပေါလ် ချီချက်စတာက ပြောကြားခဲ့သည်။

ဆိုက်ဘာ တိုက်ခိုက်မှုနှင့် ပတ်သက်ပြီး သက်ဆိုင်သည့် ကာကွယ်ရေး အဖွဲ့အစည်းများအနေဖြင့် ၎င်းတို့၏ စနစ်များအတွင်းရှိ အချက်အလက်များကို ကာကွယ်ရန် အရေးကြီးကြောင်းလည်း ၎င်းက ပြောကြားခဲ့သည်။

 မြောက်ကိုရီးယား စစ်ရေးပြကို တွေ့ရစဉ်

Anadriel အဖွဲ့သည် လျှို့ဝှက်အဆင့် အချက်အလက်များကို ခိုးယူရန် အဖျက်ဆော့ဖ်ဝဲများ၊ လှည့်စားမှုများ အပါအဝင် ဆော့ဖ်ဝဲ အားနည်းချက်ရှိသူများကို ဆိုက်ဘာတိုက်ခိုက်မှုများ ပြုလုပ်ခဲ့သည်ဟုလည်း FBI က ထုတ်ပြန်ခဲ့သည်။

ကာကွယ်ရေး၊ လေကြောင်းနှင့် အာကာသ၊ နျူကလီးယားနှင့် အင်ဂျင်နီယာကဏ္ဍများနှင့် ဆက်နွှယ်သည့် ကုမ္ပဏီများအနေဖြင့် မြောက်ကိုရီးယားအစိုးရက ထောက်ပံ့ပေးထားသော ဆိုက်ဘာစစ်ဆင်ရေးအန္တရာယ်မှ ကာကွယ်ရန် သတိဝီရိယရှိရှိဖြင့် လုပ်ဆောင်သင့်ကြောင်း FBI က တိုက်တွန်းခဲ့သည်။

Anadriel အဖွဲ့မှ ဟက်ကာများသည် ကမ္ဘာလုံးဆိုင်ရာ ဆိုက်ဘာတိုက်ခိုက်မှုများ၊ ခြိမ်းခြောက် ငွေညှစ်မှုများမှ ရရှိသည့် ငွေများဖြင့် မြောက်ကိုရီးယား၏ ဒုံးကျည်နှင့် နျူကလီးယားစီမံကိန်းများကို ထောက်ပံ့ပေးနေသည်ဟု ထိုလေ့လာချက်စစ်တမ်းတွင် ဖော်ပြခဲ့သည်။

Source: ရိုက်တာ

CNI International News

ဝါရှင်တန်၊ ဇူလိုင် ၂၆

အမေရိကန်၏ အလက်စကာ (Alaska) ပြည်နယ်အနီးရှိ နိုင်ငံတကာလေပိုင်နက်အတွင်းတွင် တရုတ်ဗုံးကြဲ လေယာဉ် ၂ စင်းနှင့် ရုရှားဗုံးကြဲလေယာဉ် ၂ စင်းကို အမေရိကန်နှင့် ကနေဒါတို့က ကြားဖြတ်ဟန့်တားခဲ့ရကြောင်း အမေရိကန်၏ မြောက်အမေရိက လေကြောင်းနှင့်အာကာသ ကာကွယ်ရေးဌာနချုပ် (NORAD) မှ ပြောကြားခဲ့ သည်ဟု အယ်လ်ဂျာဇီးယားမှ ဖော်ပြခဲ့သည်။

ဇူလိုင် ၂၄ ရက်က အမေရိကန်နှင့်ကနေဒါ စစ်လေယာဉ်များသည် ရုရှား၏ TU-95 လေယာဉ် ၂ စင်းနှင့် တရုတ်၏ PRC H-6 စစ်လေယာဉ် ၂ စင်းကို အလက်စကာ လေကြောင်းကာကွယ်ရေး အထူးသတ်မှတ်ဇုန် (ADIZ) အတွင်း ကြားဖြတ်ဟန့်တားခဲ့သည်ဟု NORAD က ထုတ်ပြန်ခဲ့သည်။

ရုရှားနှင့်တရုတ် စစ်လေယာဉ်များသည် ပစိဖိတ်သမုဒ္ဒရာ မြောက်ဘက်ခြမ်းဒေသတွင် ၅ နာရီကျော်ကြာ ပူးတွဲ လေကြောင်း ကင်းလှည့်မှုကို ပြုလုပ်ခဲ့ခြင်းဖြစ်သည်ဟု ရုရှားကာကွယ်ရေးဝန်ကြီးဌာနက ဇူလိုင် ၂၅ ရက်၌ အတည်ပြုခဲ့သည်။

ကင်းလှည့်ပျံသန်းမှု လမ်းကြောင်း၏ နေရာတစ်ခုတွင် မိမိတို့ ကင်းလှည့်လေယာဉ်များကို ပြည်ပနိုင်ငံများ၏ တိုက်လေယာဉ်များက နောက်ယောင်ခံလိုက်ပါ စောင့်ကြပ်မောင်းနှင်ခဲ့သည်ဟုလည်း ရုရှားကာကွယ်ရေးဝန်ကြီး ဌာနက ထုတ်ပြန်ခဲ့သည်။

 ရုရှားဗုံးကြဲလေယာဉ်ကို အမေရိကန်က ဟန့်တားနေစဉ်

တရုတ်ကာကွယ်ရေးဝန်ကြီးဌာန၏ ပြောရေးဆိုခွင့်ရှိသူ ကျန်းရှောင်ကန်း (Zhang Xiaogang) ကလည်း နှစ်ပတ် လည် စစ်ဘက်ဆိုင်ရာ ထိတွေ့ဆက်ဆံမှု အစီအစဉ်အရ ဘာရင်း (Bering) ပင်လယ်ပေါ်တွင်  မဟာဗျူဟာ မြောက် ပူးတွဲလေကြောင်းကင်းလှည့်မှုကို လုပ်ဆောင်ခဲ့ကြောင်း ပြောကြားခဲ့သည်။

ရုရှားနှင့်တရုတ် စစ်လေယာဉ်များသည် အမေရိကန်နှင့်ကနေဒါ၏ လေပိုင်နက်အတွင်းသို့ ဝင်ရောက်ခဲ့ခြင်း မရှိဘဲ၊ ခြိမ်းခြောက်မှု တစ်ခုအဖြစ် သတ်မှတ်ခဲ့ခြင်းမရှိကြောင်း NORAD က ထုတ်ပြန်ခဲ့သည်။

အမေရိကန်၊ တရုတ်၊ အိန္ဒိယနှင့် ဂျပန်တို့ အပါအဝင် နိုင်ငံအများအပြားသည် လေကြောင်းကာကွယ်ရေး အထူး သတ်မှတ်ဇုန်  (ADIZ) များကို တစ်ဖက်သတ် ကြေညာထားသည်။

ထိုလေကြောင်း ကာကွယ်ရေး အထူးသတ်မှတ်ဇုန်များသည် နိုင်ငံတစ်နိုင်ငံ၏ အချုပ်အခြာအာဏာပိုင် လေပိုင်နက်နှင့် သဘောထားခြင်း တူညီမှုမရှိပေ။

လေကြောင်းကာကွယ်ရေး အထူးသတ်မှတ်ဇုန်များကို နိုင်ငံတကာဥပဒေဖြင့် အသိအမှတ်ပြုထားသည့် နိုင်ငံတကာအဖွဲ့အစည်းများ၏ ကြီးကြပ်မှုအောက်တွင် ရှိမနေပေ။

အချုပ်အခြာအာဏာပိုင် လေပိုင်နက်များကိုမူ နိုင်ငံတကာဥပဒေအရ အသိအမှတ်ပြုထားသည်။

Source: အယ်လ်ဂျာဇီးယား

CNI International News

ခါကိဗ်၊ ဇူလိုင် ၂၆

ယူကရိန်းနိုင်ငံ အရှေ့မြောက်ပိုင်း ခါကိဗ် (Kharkiv) မြို့တွင် ဇူလိုင် ၂၄ ရက်က ရုရှား၏ တိုက်ခိုက်မှုများကြောင့် လူ ၃ ဦးသေဆုံးကာ ၆ ဦး ဒဏ်ရာရသွားခဲ့ပြီး ဆွစ်ဇာလန် မိုင်းရှင်းလင်းရေ NGO အဖွဲ့၏ရုံးလည်း ထိခိုက်ပျက်စီး သွားခဲ့သည်ဟု ရိုက်တာမှ ဖော်ပြခဲ့သည်။

ယူကရိန်း၏ ဒုတိယအကြီးဆုံး မြို့ဖြစ်သည့် ခါကိဗ်သည် ရုရှားနှင့် နယ်စပ်ချင်း ထိစပ်နေပြီး ၂၀၂၂ ခုနှစ်၊ ဖေဖော်ဝါရီလတွင် ရုရှားက ယူကရိန်းကို စတင်တိုက်ခိုက်ခဲ့ချိန်ကတည်းက ဒရုန်းများ၊ ဒုံးကျည်များ၊ ပဲ့ထိန်း ဗုံးများဖြင့် တိုက်ခိုက်ခံခဲ့ရသည်။

ရုရှား၏ တိုက်ခိုက်မှုများသည် ခါကိဗ်တောင်ပိုင်း လိုဇိုဗာ (Lozova) မြို့ကို ထိမှန်ခဲ့ပြီး လူ ၃ ဦးသေဆုံးကာ ၆ ဦး ဒဏ်ရာရခဲ့ကာ ကယ်ဆယ်ရေးလုပ်ငန်းများကို လုပ်ဆောင်နေကြောင်း ဒေသဆိုင်ရာရဲတပ်ဖွဲ့က ပြောကြားခဲ့သည်။

ရုရှား တိုက်ခိုက်မှုကြောင့် ပျက်စီးနေတဲ့ အဆောက်အအုံကို တွေ့ရစဉ်

ဇူလိုင် ၂၄ ရက် ညအချိန် တိုက်ခိုက်မှုကြောင့် ဆွစ်ဇာလန်နိုင်ငံ၏ မိုင်းရှင်းလင်းရေး NGO အဖွဲ့ရုံး အဆောက်အအုံ ၏ မျက်နှာစာ ထိခိုက်ပျက်စီးခဲ့ပြီး မျက်နှာကြက်များ ပြိုကျခဲ့သည်ဟု ဒေသအုပ်ချုပ်ရေးမှူး အိုလက် ရှနီဟူဘော့ဗ် (Oheh Shniehubov) က ပြောကြားခဲ့သည်။

ထို့ပြင် ဆွစ်ဇာလန် NGO အဖွဲ့ အသုံးပြုသည့် မော်တော်ကား ၆ စီးလည်း ထိခိုက်ပျက်စီးခဲ့ပြီး ဆေးတပ်သားများ လည်း ဒဏ်ရာရခဲ့သည်ဟု ၎င်းက ပြောသည်။ 

ထို NGO အဖွဲ့သည် ဒေသတွင်း မိုင်းရှင်းလင်းရေး လုပ်ငန်းများအတွက် အလွန်အရေးကြီးသည့် အဖွဲ့ဖြစ်သည် ဟုလည်း ရှနီဟူဘော့ဗ်က ပြောသည်။

ရုရှားသည် ညအချိန်တွင် တိုက်ခိုက်မှု ၅ ခု ပြုလုပ်ခဲ့ပြီး နောက်ဆုံး တိုက်ခိုက်မှုသည် စက်မှုဇုန်ကို ထိမှန်ခဲ့ကာ လူ ၆ ဦး ဒဏ်ရာရခဲ့ပြီး မော်တော်ကားများ အပါအဝင် အခြေခံအဆောက်အအုံများ ထိခိုက်ပျက်စီးခဲ့သည်ဟု ခါကိဗ် မြို့တော်ဝန် အိုင်ဟော် တာရီကော့ဗ် (Ihor Terekhov) က ပြောကြားခဲ့သည်။

ရုရှားကမူ အရပ်သားများအား ရည်ရွယ်ချက်ရှိရှိ ပစ်မှတ်ထား တိုက်ခိုက်ခြင်းမရှိကြောင်း ငြင်းဆိုခဲ့သော်လည်း ယူကရိန်းကို ဝင်ရောက်တိုက်ခိုက်သည့် ၂၉ လတာ ကြာမြင့်လာသော စစ်ပွဲအတွင်း ယူကရိန်းအရပ်သား ထောင်ချီ သေကြေ၊ ဒဏ်ရာရမှုများ ရှိခဲ့သည်။

Source: ရိုက်တာ

CNI International News

ဝါရှင်တန်၊ ဇူလိုင် ၂၆

ဘိုင်ဒန် နုတ်ထွက်သွားပြီးနောက် အမေရိကန်သမ္မတရွေးကောက်ပွဲသည် ဒေါ်နယ်ထရမ့် (Donald Trump) နှင့် ဒုတိယသမ္မတ ကာမယ်လာဟားရစ် (Kamala Harris) တို့အကြား အပြန်အလှန် ဝေဖန်ထိုးနှက်မှုများဖြင့် ပြန်လည်အသက်ဝင်လာခဲ့သည်ဟု ရိုက်တာမှ ဖော်ပြခဲ့သည်။ 

အမေရိကန်သမ္မတ ဂျိုးဘိုင်ဒန် (Joe Biden)သည် သမ္မတရွေးကောက်ပွဲကို ဝင်မပြိုင်တော့ကြောင်း ကြေညာ ခဲ့ပြီးနောက် ပထမဆုံးအကြိမ်အဖြစ် နိုင်ငံတော်မိန့်ခွန်းအား ဇူလိုင် ၂၄ ရက်က ပြောကြားခဲ့သည်။

ဘိုင်ဒန်၏ ဘဲဥပုံရုံးခန်း (Oval Office) အတွင်းမှ ပြောကြားခဲ့သည့် မိန့်ခွန်းတွင် သူသည် ဒီမိုကရေစီကို ကယ်တင်ရန်အတွက် ပုဂ္ဂိုလ်ရေး ရည်မှန်းချက်ကို စွန့်လွှတ်ရန် ဆုံးဖြတ်ခဲ့ခြင်း ဖြစ်သည်ဟု ပြောသည်။

ထိုမိန့်ခွန်း မပြောကြားမီ ရီပတ်ဘလစ်ကန် ကိုယ်စားလှယ်လောင်း ထရမ့်က ဇူလိုင် ၂၄ ရက်တွင် ပြုလုပ်ခဲ့သည့် မဲဆွယ်စည်းရုံးပွဲ၌ ဒီမိုကရက်တစ် ပြိုင်ဘက် ဟားရစ်ကို ဝေဖန် ထိုးနှက်ခဲ့သည်။

ဘိုင်ဒန်ကို တွေ့ရစဉ်

ဟားရစ်သည် တစ်ယူသန် လက်ဝဲယိမ်းသည့် မိုက်မဲသူဖြစ်ကြောင်း ထရမ့်က တံဆိပ်ကပ်ခဲ့သည်။

ထရမ့်၏ မဲဆွယ်စည်းရုံးပွဲ မတိုင်မီ ၂ ရက်အလိုက ပြုလုပ်သည့် ဟားရစ်၏ မဲဆွယ်စည်းရုံးပွဲတွင် ဟားရစ်က ထရမ့်၏ တရားရေးအရှုပ်တော်ပုံများ၊ လိင်ပိုင်းဆိုင်ရာ အရှုပ်တော်ပုံများကို အဓိကထားပြီး ဝေဖန်ထိုးနှက်ခဲ့သည်။

သမ္မတဟောင်း ဘာရက် အိုဘားမား (Barrack Obama) သည် ဟားရစ်ကို ဒီမိုကရက်တစ်ပါတီ ကိုယ်စားပြု ကိုယ်စားလှယ်လောင်းအဖြစ် ထောက်ခံတော့မည်ဖြစ်ကြောင်း NBC News မှ ဖော်ပြခဲ့ပြီးနောက် ဟားရစ်၏ မဲဆွယ်စည်းရုံးရေး လှုပ်ရှားမှုသည် အရှိန်အဟုန် မြင့်တက်လာခဲ့သည်။

ဘိုင်ဒန်ကလည်း ၎င်း၏ ပထမသက်တမ်းက စွမ်းဆောင်နိုင်ခဲ့မှု မှတ်တမ်းများအပေါ် အခြေခံပြီး နောက်တစ်ကြိမ် ပြန်လည် ရွေးကောက်ခံရန် ထိုက်တန်ကြောင်း၊ သို့သော် နိုင်ငံကိုချစ်သဖြင့် ပြိုင်ပွဲမှ ဘေးထွက်နေရန် ဆုံးဖြတ် ခဲ့ခြင်းဖြစ်ကြောင်း နိုင်ငံတော်မိန့်ခွန်းအတွင်း ထည့်သွင်း ပြောကြားခဲ့သည်။

ဘိုင်ဒန်နဲ့ ကာမယ်လာဟားရစ်ကို တွေ့ရစဉ်

အသက် ၈၁ နှစ်အရွယ်ရှိ ဘိုင်ဒန်သည် အမေရိကန်သမိုင်းတွင် အသက်အကြီးဆုံး သမ္မတဖြစ်ပြီး ၎င်း၏ နိုင်ငံတော် မိန့်ခွန်း ပြောကြားအပြီး၌ အိမ်ဖြူတော်အတွင်း ထောက်ခံသူများ၏ ဂုဏ်ပြုသံများ ထွက်ပေါ်လာခဲ့သည်။

ထရမ့်နှင့် ၎င်း၏ မဲဆွယ်စည်းရုံးရေးအဖွဲ့သည် ယခင်က ဘိုင်ဒန်ကို ဝေဖန်ထိုးနှက်ရန်သာ အာရုံစိုက် ပြင်ဆင်ခဲ့ ခြင်းဖြစ်သည်။

ထရမ့်သည် လက်ရှိတွင် ပြိုင်ဘက် ပြောင်းသွားခဲ့သဖြင့် ပြိုင်ဘက် အမျိုးသမီးဖြစ်သည့် ဟားရစ်ကို ဝေဖန်ထိုးနှက် ရန် ယခင်ကအစီအစဉ်များနှင့် မဟာဗျူဟာများကို ပြန်လည်ပြင်ဆင်ခဲ့ရသည်။

ဟားရစ်သည် ဒီမိုကရက်တစ်ပါတီ၏ ထောက်ခံမှုကို လျှင်မြန်စွာရရှိခဲ့ပြီး ၎င်း၏ မဲဆွယ်စည်းရုံးရေးအဖွဲ့သည် ဇူလိုင် ၂၂ ရက်မှ ဇူလိုင် ၂၄ ရက်အတွင်း ရန်ပုံငွေ ဒေါ်လာ ၁၂၆ သန်းကို လျှင်မြန်စွာ ရှာဖွေနိုင်ခဲ့သည်။

Source: ရိုက်တာ

CNI International News

ဘန်ကောက်၊ ဇူလိုင် ၂၆

ထိုင်းအာဏာရ ဖြူးထိုင်းပါတီခေါင်းဆောင် ပေတုန်တန် ရှင်နာဝပ် (Paetongtarn Shinawatra) က ပါတီ လွှတ်တော် ကိုယ်စားလှယ်တစ်ဦးဖြစ်သည့် ချာလမ် ယူဘမ်ရန် (Chalerm Yubamrung) ကို ပါတီတွင်း အသုံးပြုသည့် လူမှုဆက်သွယ်ရေး အက်ပလီကေးရှင်းဖြစ်သော Line group ထဲမှ ဖယ်ရှားလိုက်ကြောင်း The Nation မှ ဖော်ပြခဲ့သည်။

သို့သော် ပေတုန်တန်က ပါတီအနေဖြင့် တာဝန်ပျက်ကွက်သည့် လွှတ်တော်ကိုယ်စားလှယ်များကို ပါတီတွင်းမှ ထုတ်ပယ်သော မူဝါဒမျိုးမရှိဘဲ Line Group ထဲမှသာ ဖယ်ရှားခဲ့ခြင်းဖြစ်သည်ဟု ပြောကြားခဲ့သည်။

ချာလမ်သည် ဘန်ကောက်မြို့တော် ဘန်းဘွန် (Bang Bon) ခရိုင်ရှိ ၎င်း၏နေအိမ်တွင် ပြုလုပ်ခဲ့သည့် သတင်းစာ ရှင်းလင်းပွဲတွင် ၎င်းအား ပါတီတွင်းမှ ထုတ်ပယ်ရန် ဖြူးထိုင်းပါတီကို စိန်ခေါ်ပြောကြားခဲ့ပြီးနောက် တစ်ရက် အကြာ၌ ပါတီတွင်း လူမှုမီဒီယာမှတစ်ဆင့် စကားပြောဆိုကြသည့် Line Group ထဲမှ ဖယ်ရှားခံခဲ့ရခြင်းဖြစ်သည်။

ချာလမ် ယူဘမ်ရန်ကို တွေ့ရစဉ်

ချာလမ်ကမူ ၎င်းနှင့် ပေတုန်တန်၏ ဖခင်ဖြစ်သည့် ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) အကြား ချစ်ခင်ရင်းနှီးမှုမှာ အဆုံးသတ်သွားခြင်း မရှိကြောင်းလည်း ပြောကြားခဲ့သည်။

"ချာလမ်ကို ဖြူးထိုင်းပါတီ လွှတ်တော်ကိုယ်စားလှယ်တွေ အသုံးပြုတဲ့ Line Group ထဲကနေ ထုတ်ပစ်ခဲ့တာ ကျမပါ" ဟု ပေတုန်တန်က ပြောကြားခဲ့သည်။

ထို Group ထဲတွင် share သည့် အကြောင်းအရာများသည် အလွန်အတိမ်းအစောင်း မခံနိုင်ကြောင်း ထပ်လောင်း ပြောကြားခဲ့သည်။

ပေတုန်တန်က သူသည် ပါတီ၏ လွှတ်တော်ကိုယ်စားလှယ်များအတွက် ပါတီ၏ အစီအစဉ်များနှင့် အခြား အရေးကြီးသည့် အချက်အလက်များကို ပေးပို့ရန် Line အက်ပလီကေးရှင်းကို အသုံပြုပြီး Group ဖွဲ့ ထားခဲ့ခြင်း ဖြစ်သည်ဟု ပြောသည်။

ချာလမ်၏ သားဖြစ်သူ ဝမ်ယူဘမ်ရန်ကို တွေ့ရစဉ်

ချာလမ်၏ သတင်းစာ ရှင်းလင်းပွဲတွင် ပါတီကို စိန်ခေါ်သည့် စကားများ ပြောကြားခဲ့သည့်အတွက် ချာလမ်ကို ထို Group ထဲတွင် ဆက်ထားပါက ပါတီ၏ အခြားလွှတ်တော် ကိုယ်စားလှယ်များအကြား မကျေနပ်မှုများ ဖြစ်လာ မည်ကို စိုးရိမ်ကြောင်း ပေတုန်တန်က ပြောကြားခဲ့သည်။

ချာလမ်၏ သားဖြစ်သူ ဝမ် ယူဘမ်ရန် (Wan Yubamrung) သည်  ပြီးခဲ့သည့်လက ပြုလုပ်ခဲ့သည့် ပက်သမ် သာနီ (Pathum Thani) မြို့ အုပ်ချုပ်ရေးမှူး ရွေးကောက်ပွဲတွင် ပြိုင်ဘက်ကိုယ်စားလှယ်လောင်းကို ထောက်ခံခဲ့သဖြင့် ပေတုန်တန်က ဝမ်ကို တရားဝင် အပြစ်တင်ဆုံးမခဲ့ပြီးနောက် ၎င်းတို့၏ မိသားစုနှစ်စုအကြား ဆက်ဆံရေးများ ယိုယွင်းခဲ့သည်။

ဝမ်သည် ပြီးခဲ့သည့် သီတင်းပတ်က ဖြူးထိုင်းပါတီမှ နုတ်ထွက်သွားခဲ့ပြီး ဇူလိုင် ၂၃ ရက်တွင် ပါလန်း ပရာချာရက် (Palang Pracharath) ပါတီခေါင်းဆောင် ဗိုလ်ချုပ်ကြီး ပရာဝစ် ဝေါင်ဆူဝန်နှင့် သတင်းစာ ရှင်းလင်းပွဲ ပြုလုပ်ခဲ့ ကာ ထိုပါတီသို့ ဝင်ရောက်ကြောင်း ကြေညာခဲ့သည်။

Source: The Nation

CNI International News

ဘန်ကောက်၊ ဇူလိုင် ၂၅    

ပီချစ်ချူအန်ဘန်း(Phichit Chuenban)ကို အစိုးရအဖွဲ့ဝန်ကြီးအဖြစ် ခန့်အပ်သည့် ကိစ္စနှင့်ပတ်သက်ပြီး ထိုင်းဝန်ကြီးချုပ်အား ရာထူးမှ ဖယ်ရှားရန် တောင်းဆိုထားသည့်အမှုကို သြဂုတ် ၁၄ ရက် ဒေသစံတော်ချိန် ညနေ ၃ နာရီတွင် စီရင်ချက်ချသွားမည်ဖြစ်ကြောင်း ဖွဲ့စည်းပုံအခြေခံဥပဒေဆိုင်ရာခုံရုံး(Constitutional Court)က ထုတ်ပြန်ခဲ့သည်ဟု Thai PBS world မှ ဖော်ပြခဲ့သည်။

ပီချစ်သည် လွန်ခဲ့သည့် ၁၆ နှစ်ခန့်က တရားရုံးအား မထီမဲ့မြင်ပြုမှုဖြင့် ထောင်ဒဏ် ၆ လ ချမှတ်ခံခဲ့ရသောကြောင့် ဝန်ကြီးတစ်ဦးအဖြစ် အရည်အချင်းပြည့်မီမှုမရှိကြောင်းကို ဝန်ကြီးချုပ် ဆရီသာ သာဗီဆင်( Srettha Thavisin)က သတိပြုမိခြင်းမရှိခဲ့ကြောင်း အထက်လွှတ်တော်အမတ်ဟောင်း အယောက် ၄၀ ပါဝင်သည့်အဖွဲ့က အခိုင်အမာ ပြောကြားခဲ့သည်။

ထိုင်းဝန်ကြီးချုပ် ဆရီသာကို တွေ့ရစဉ်

ခုံရုံးက ထိုအဖွဲ့ တင်သွင်းခဲ့သည့် အသနားခံစာကို မေလက လက်ခံခဲ့သည်။

ထိုင်းဘုရင်က ခွင့်ပြုပေးခဲ့သည့် ဆရီသာ၏ အစိုးရအဖွဲ့ ပြုပြင်ပြောင်းလဲမှုအတွင်း ပီချစ်သည် ဝန်ကြီးတစ်ဦး အဖြစ် ခန့်အပ်ခံခဲ့ရသည်။

အသနားခံစာ တင်သွင်းခဲ့ပြီးနောက် မကြာမီ ပီချစ်သည် ရာထူးမှ နုတ်ထွက်ခဲ့သောကြောင့် ဆရီသာသည် တရားရုံး၏ ဆုံးဖြတ်ချက် တစ်ခုတည်းနှင့်သာ ရင်ဆိုင်ရမည်ဖြစ်သည်။

ဆရီသာ အနေဖြင့် ၎င်း၏ လက်ရေးဖြင့် ရေးသားထားသော အသေးစိတ် ရှင်းလင်းဖော်ပြထားသည့် ခုခံ လျှောက်လှဲချက်ကို ဇူလိုင် ၃၁ ရက်မတိုင်မီ တင်သွင်းရန် တရားရုံးက ပြောကြားခဲ့သည်။

Source: Thai PBS world

CNI International News

တိုကျို၊ ဇူလိုင် ၂၅

တရုတ်ကုမ္ပဏီများသည် ရုရှားလက်နက်များတွင် အသုံးပြုသည့် အနုစိတ်ပစ္စည်း အစိတ်အပိုင်းများအား ဘယ်လာရုစ် ကာကွယ်ရေး ကန်ထရိုက်တာအဖွဲ့ကို တင်ပို့ရောင်းချခဲ့သည်ဟု Nikkei Asia မှ ဖော်ပြခဲ့သည်။

တရုတ်ကမူ ၎င်းသည် ယူကရိန်းရှိ ရုရှား၏ စစ်ရေးအားထုတ် ကြိုးပမ်းမှုများအတွက် လက်နက်များ ထောက်ပံ့ ပေးခဲ့ခြင်းမရှိကြောင်း အခိုင်အမာ ပြောဆိုခဲ့သော်လည်း တရုတ်ကုမ္ပဏီများသည် ရုရှားကို လက်နက်ထောက်ပံ့ ပေးဖွယ်ရှိနေသည့် အခြေအနေများကို တွေ့ရှိနေရသည်။

အမေရိကန်နှင့် ဥရောပနိုင်ငံများသည် ရုရှားအပေါ် နိုင်ငံတကာပိတ်ဆို့မှုများ ပိုမိုတင်းကျပ်ရန် ကြိုးပမ်းနေချိန်တွင် တရုတ်နှင့် ရုရှား၏ အခြေအနေကို အနီးကပ် စောင့်ကြည့်လျက်ရှိသည်။

ဘယ်လာရုစ် အတိုက်အခံအဖွဲ့ဖြစ်သည့် BelPol အဖွဲ့သည် ဘီလာရုစ်နှင့် တရုတ် ကုမ္ပဏီများအကြား စက်မှု လုပ်ငန်းဆိုင်ရာ အရောင်းအဝယ်အရင်းအမြစ်များမှ ကန်ထရိုက်များ၊ ငွေပေးချေမှု မှတ်တမ်းများနှင့် အခြား အချက်အလက်များကို ရရှိခဲ့သည်။

ထိုမှတ်တမ်းများအရ တရုတ်၏ ရှန်ကျန်း ( Shenzhen) အခြေစိုက် Green Cycle Energy ကုမ္ပဏီသည် ဘီလာရုစ် ကာကွယ်ရေး ကန်ထရိုက်တာဖြစ်သည့်  BelOMO Holding ကုမ္ပဏီထံမှ LAD-21T လေဆာမော်ဂျူးများအတွက် အစိတ်အပိုင်း ၃၀၀၀  အား ဝယ်ယူရန် အော်ဒါကို ဒီဇင်ဘာ ၁ ရက်တွင် လက်ခံရရှိခဲ့ကြောင်း ဖော်ပြခဲ့သည်။

ဘယ်လာရုစ်နဲ့ တရုတ် ခေါင်းဆောင်များကို တွေ့ရစဉ်

ထိုလေဆာမော်ဂျူးများသည် လေဆာပဲ့ထိန်းဗုံးများနှင့် ဒုံးကျည်များတွင် ထည့်သွင်း အသုံးပြုနိုင်သည့် ပစ္စည်းများ ဖြစ်ပြီး ထိုပစ္စည်းများ အော်ဒါမှာယူမှုအတွက် ငွေပေးချေးမှုကို ယွမ်ငွေဖြင့် ပေးချေခဲ့သည်ဟု မှတ်တမ်းများတွင် ဖော်ပြခဲ့သည်။

အဆိုပါ အရောင်းအဝယ်ကိစ္စတွင် ရှန်ဟိုင်း (Shanghai) မြို့ရှိ ရုရှားနိုင်ငံပိုင် VTB ဘဏ်လည်း ပါဝင်ခဲ့သည်။

အမေရိကန်ဘဏ္ဍာရေးဝန်ကြီးဌာနသည် ရုရှားစစ်တပ်အား လက်နက်များ ထောက်ပံ့ပေးမှုဖြင့် ဘီလာရုစ်၏ BelOMO ကုမ္ပဏီကို ဒီဇင်ဘာ ၅ ရက်က ပိတ်ဆို့မှုများ ချမှတ်ခဲ့သည်။

သို့သော် တရုတ်၏ Green Cycle Energy နှင့် BelOMO ကုမ္ပဏီတို့သည် လေဆာအစိတ်အပိုင်းများ အရောင်း အဝယ်ကိစ္စအတွက် ဖေဖော်ဝါရီ ၁၆ ရက်တွင် ယွမ် ၅ ဒသမ ၅၆ သန်း တန်ကြေးရှိ အရောင်းအဝယ်စာချုပ်ကို ချုပ်ဆိုခဲ့သည်။

ထို့ပြင် နောက်ထပ် တရုတ်၏ စက်ပစ္စည်း အစိတ်အပိုင်းများ ထုတ်လုပ်သည့် Morotack ကုမ္ပဏီသည်လည်း ဖေဖော်ဝါရီ ၁ ရက်က BelOMO ကုမ္ပဏီလုပ်ငန်းစု၏ Diaproektor ကုမ္ပဏီနှင့် ယွမ် ၁၁၄,၀၀၀ တန်ဖိုးရှိ စာချုပ် တစ်ခုကို ချုပ်ဆိုခဲ့ပြီး ထိုအရာင်းအဝယ်ကိစ္စတွင် ဘီလာရုစ်နှင့် တရုတ်ဘဏ်များ ပါဝင်ခဲ့သည်။

Source: Nikkei Asia

CNI International News

ဝါရှင်တန် ၊ ဇူလိုင် ၂၅

အမေရိကန်သမ္မတ ဂျိုးဘိုင်ဒန် (Joe Biden) သည် သမ္မတရွေးကောက်ပွဲမှ နုတ်ထွက်သွားခဲ့ပြီးနောက် ဒုတိယ သမ္မတ ကာမယ်လာ ဟားရစ် (Kamala Harris) မဲဆွယ်စည်းရုံးမှုများ ပြုလုပ်နေချိန်တွင် ပြိုင်ဘက်ဖြစ်သူ ဒေါ်နယ်ထရမ့် (Donald Trump)က ဇူလိုင် ၂၃ ရက်တွင် ဝေဖန်ထိုးနှက်ခဲ့သည်ဟု ရိုက်တာမှ ဖော်ပြခဲ့သည်။

ထရမ့်သည် မြောက်ကာရိုလိုင်းနား ( North Carolina) ပြည်နယ်၊ ရှားလော့ (Charlotte) မြို့တွင် မဲဆွယ်စည်းရုံးပွဲ ပြုလုပ်မည်ဖြစ်သည်။

ထိုပြည်နယ်သည် နိုဝင်ဘာ ၅ ရက်တွင် ပြုလုပ်မည့် သမ္မတရွေးကောက်ပွဲ၌ အဓိကယှဉ်ပြိုင်ရမည့် မဲယိမ်း ပြည်နယ် တစ်ခုဖြစ်သည်။ 

ထရမ့်၏ မဲဆွယ်စည်းရုံးရေးအဖွဲ့ကမူ ဟားရစ်သည် ဒီမိုကရက်တစ်ပါတီ ကိုယ်စားပြု ကိုယ်စားလှယ်လောင်း ဖြစ်လာမည်ဆိုပါက ထိုအခြေအနေအတွက် ကြိုတင်ပြင်ဆင်ထားသည်။

ဒေါ်နယ်ထရမ့်သည် သမ္မတ ဂျိုးဘိုင်ဒန်၏ စီးပွားရေးနှင့် လူဝင်မှုကြီးကြပ်ရေး မူဝါဒများတွင် လက်ကိုင်တုတ် သဖွယ် ဖြစ်လာလိမ့်မည်ဟု ပြောကြားခဲ့သည်။

ထို့ပြင် ဇူလိုင် ၂၃ ရက်ကလည်း ထရမ့်က နယ်စပ်ဒေသ အရေးနှင့်ပတ်သက်ပြီး ၎င်း၏ မဲဆွယ်စည်းရုံးရေး အစီအစဉ်များကို သတင်းထောက်များအား ပြောကြားရာတွင် ရွှေ့ပြောင်းများ ဝင်ရောက်လာမှုအတွက် ဟားရစ်တွင်လည်း အနည်းနှင့်အများဆိုသလို တာဝန်ရှိကြောင်း ပြောကြားခဲ့သည်။

“သူ (ဟားရစ်) က တစ်ယူသန် လက်ဝဲသမားဖြစ်ပါတယ်။ ဒီနိုင်ငံကို ဖျက်ဆီးမယ့် တစ်ယူသန် လက်ဝဲသမားကို အလိုမရှိပါဘူး။ သူက နယ်စပ်တွေကို ဖွင့်ပေးချင်နေပါတယ်။ ဘယ်သူကမှ မလုပ်ချင်တာတွေကို သူက လုပ်ချင်နေ ပါတယ်” ဟု ထရမ့်က ပြောကြားခဲ့သည်။

ကာမယ်လာဟားရစ်ကို တွေ့ရစဉ်

ဇူလိုင် ၂၃ ရက်က ရိုက်တာနှင့် Ipsos တို့၏ လူထုသဘောထား ကောက်ယူမှု စစ်တမ်းများတွင် ပါဝင်ဖြေဆိုသူ စုစုပေါင်းအနက် ဟားရစ်က ထရမ့်ထက် လူထုထောက်ခံမှုနှုန်း ၂ ရာခိုင်နှုန်း ပိုမိုများပြားနေသည်ကို ဖော်ပြခဲ့ သည်။

သို့သော် အခြားစစ်တမ်းများတွင်မူ ထရမ့်က ဟားရစ်ထက် ပိုမိုအသာစီးရသည့် ရလဒ်များ ထွက်ပေါ်ခဲ့သည်။

ထိုအချိန်အတောအတွင်း ဒီမိုကရက်တစ်ပါတီ ကိုယ်စားလှယ်အများစုက ဟားရစ်သည် ဘိုင်ဒန်၏ နေရာကို အစားထိုးရမည့် တစ်ဦးတည်းသော ကိုယ်စားလှယ်လောင်းဖြစ်သည်ဟု ပြောကြားခဲ့သည်။

ရွေးကောက်ပွဲမှ နုတ်ထွက်သွားသည့် ဘိုင်ဒန်၏နေရာကို အစားထိုးရန် သီတင်းပတ် အနည်းငယ်သာ အချိန် ရမှုနှင့်အတူ ဒီမိုကရက်အများစုသည် ဟားရစ်ကို ထောက်ခံ နေကြသည်။

ထို့ကြောင့် လျင်မြန်ပြီး လက်တွေ့ကျသည့် ရွေးချယ်မှုပြုလုပ်ရန် လိုအပ်ကြောင်း ပြောကြားခဲ့ကြသည်။

Source: ရိုက်တာ 

CNI International News

တိုကျို၊ ဇူလိုင် ၂၄

အမေရိကန်တွင် ဒီမိုကရက်တစ်ပါတီ ကိုယ်စားပြု သမ္မတရွေးကောက်ပွဲဝင် ကိုယ်စားလှယ်လောင်းဖြစ်ရန် အလွန် နီးစပ်နေပြီဖြစ်သည့် ဒုတိယသမ္မတ ကာမယ်လာ ဟားရစ်(Kamala Harris) ၏ အာရှရေးရာ မူဝါဒများသည် ဂျပန်၏ စိုးရိမ်မှုများကို ပြေလျော့စေနိုင်ဖွယ်ရှိကြောင်း Japan Times မှ ဖော်ပြခဲ့သည်။

အသက် ၅၉ နှစ်အရွယ် ဟားရစ်သည် ဂျပန်နှင့် မဟာမိတ်ဖွဲ့မှုကို ဆက်လက် ထောက်ခံပြီး တရုတ်ကို တန်ပြန်မှု များ ဆက်လက် လုပ်ဆောင်လိမ့်မည်ဟု ကျွမ်းကျင်သူများက ယူဆထားကြသည်။

ဇူလိုင် ၂၁ ရက်က သမ္မတဂျိုးဘိုင်ဒန် (Joe Biden) သည် သမ္မတရွေးကောက်ပွဲကို ဝင်ရောက်ယှဉ်ပြိုင်တော့မည် မဟုတ်ကြောင်း ပြောကြားခဲ့ပြီးနောက် ဟားရစ်ကို ၎င်းနေရာ အစားထိုးမည့် ကိုယ်စားလှယ်လောင်းအဖြစ် ထောက်ခံကြောင်း ပြောကြားခဲ့သည်။

ဟားရစ်သည် အမေရိကန် အထက်လွှတ်တော် အမတ်အဖြစ် ၄ နှစ်၊ ဒုတိယသမ္မတအဖြစ် ၃ နှစ်ကျော်ကြာ တာဝန်ထမ်းဆောင်ခဲ့ချိန်အတွင်း အာရှမှ မဟာမိတ်နိုင်ငံများ၏ ခေါင်းဆောင်များနှင့် ဆက်ဆံရေးများ တည်ဆောက်ခဲ့သည်။

အထူးသဖြင့် တောင်တရုတ်ပင်လယ်တွင် တရုတ်၏ အငြင်းပွားဖွယ် လှုပ်ရှားမှုများ၊ မြောက်ကိုရီးယား၏ နျူကလီးယားနှင့် ဒုံးကျည်ခြိမ်းခြောက်မှုကို တုန့်ပြန်ရာ၌ ဂျပန်၊ တောင်ကိုရီးယားတို့နှင့် စည်းလုံး ညီညွတ်စွာ ရပ်တည်နေသည့် အမေရိကန်၏ မူဝါဒများကို ဟားရစ်က ထောက်ခံခဲ့သည်။

ကာမယ်လာဟားရစ်နဲ့ ဂျပန်၀န်ကြီးချုပ် ကီရှီဒါကို တွေ့ရစဉ်

ထို့ကြောင့် ဟားရစ်သည် သမ္မတရွေးကောက်ပွဲတွင် ဝင်ရောက်ယှဉ်ပြိုင်ရန် ရွေးချယ်ခံရပြီး သမ္မတအဖြစ် ရွေးကောက်ခံရပါက အမေရိကန်၏ ဂျပန်အပေါ်ထားရှိသည့် မူဝါဒများ ကြီးကြီးမားမား  အပြောင်းအလဲ မရှိနိုင်ကြောင်း ကျွမ်းကျင်သူများက ပြောကြားခဲ့သည်။

"အမေရိကန်ရွေးကောက်ပွဲမှာ ဟားရစ်ပဲ ရွေးကောက်ခံရမလား၊ အရင်သမ္မတဟောင်း ဒေါ်နယ်ထရမ့် (Donald Trump) ပဲ ပြန်လည်ရွေးကောက် ခံရမလားဆိုတာကို စောင့်ကြည့်ရပါမယ်။ ဟားရစ်နဲ့ ဘိုင်ဒန်တို့ရဲ့ နိုင်ငံခြား ရေးမူဝါဒနဲ့ ထရမ့်ရဲ့ နိုင်ငံခြားရေးမူဝါဒဟာ မတူညီဘူးဆိုတာကို ဂျပန်အစိုးရက ကောင်းကောင်း သိရှိထားပါ တယ်" ဟု ဒတ်မောင့် တက္ကသိုလ် (Dartmouth University) မှ ပါမောက္ခဖြစ်ပြီး အရှေ့အာရှ မူဝါဒရေးရာ ကျွမ်းကျင်သူ ဂျင်နီဖာ လင်း (Jennifer Lind) က ပြောကြားခဲ့သည်။

ဂျပန်သည် ထရမ့်၏ ဆိုးရွားသည့် သံတမန်ရေး ချဉ်းကပ်ဆောင်ရွက်မှုများကို အကောင်းဆုံး ကိုင်တွယ် ဖြေရှင်းနိုင်ခဲ့သဖြင့် ထရမ့် ရွေးကောက်ခံရပါကလည်း အလွန်စိုးရိမ်စရာကောင်းသည့် အခြေအနေမဟုတ်ပေ။ 

ဟားရစ်ကမူ အာရှတွင် ဘိုင်ဒန်၏ မူဝါဒများကို ဆက်လက် ကျင့်သုံးသွားမည်ဖြစ်ကြောင်း ရှင်းလင်းပြတ်သားစွာ ပြောကြားထားသဖြင့် ဂျပန်အတွက် ဟားရစ်နှင့်ထရမ့်တို့ မည်သူပဲ ရွေးကောက်ခံရစေကာမူ စိုးရိမ်စရာ မဟုတ်ကြောင်း ကျွမ်းကျင်သူများက ပြောကြားခဲ့သည်။

Source: Japan Times